All posts by CyberSimman

இண்டெர்நெட் சமூக மாற்றத்திற்கு வித்திடக்கூடிய ஜனநாயக தன்மை கொண்ட தொழில்நுட்பம் என்று சொல்லப்படுவதில் என‌க்கு மிகுந்த நம்பிக்கை உண்டு என்பதால் இண்டெர்நெட்டை எப்படியெல்லாம் பயன்படுத்திகொள்ள முடிகிறது என சுட்டிக்கட்டுவதை எனது கடமையாக‌வே கருதுகிறேன்... மேலும்

இயற்கை வளம் காக்கும் இணைய முயற்சி!

afeature_phone_o4xapaஇயற்கை வளம் மற்றும் சுற்றுச்சூழல் நலன் காப்பது தொடர்பான விழிப்புணர்வை ஏற்படுத்தும் நோக்கத்துடன் பல இணயதளங்களும், செயலிகளும் உருவாக்கப்பட்டுள்ளன. இயற்கை ஆர்வலர்களை மேலும் உற்சாகம் கொள்ள வைக்கும் வகையில் மேலும் இரண்டு இணையதளங்கள் இந்த வரிசையில் சேர்ந்துள்ளன. முதல் இணையதளமான ‘நோ யுவர் பிஷ்’ தளம் இந்தியாவில் மீன் வளத்தை பாதுகாக்கும் வகையில் உருவாக்கப்பட்டுள்ளது என்றால், இரண்டாவது தளமான ’பிராக் ஐடி’ ஆஸ்திரேலியாவில் தவளைகள் நலன் காக்க உருவக்கப்பட்டுள்ளது. இரண்டுமே, இயற்கை நலன் காக்க இணையத்தை எப்படி எல்லாம் பயன்படுத்தலாம் என்பதற்கான அழகான உதாரணமாக விளங்குபவை.

முதலில் ’நோ யுவர் பிஷ்’ இணையதளம் பற்றி பார்க்கலாம். இந்த தளம் கடல் உணவை பொறுப்பான முறையில் சுவைக்க வேண்டும் என வழிகாட்டுவதற்காக உருவாக்கப்பட்டுள்ளது. இதற்காக என்றே மீன் நாட்காட்டியையும் உருவாக்கியுள்ளனர். இந்த நாட்காட்டியை பார்த்து, எந்த காலத்தில் எந்த வகை மீனை சாப்பிடலாம், எந்த வகை மீனை தவிர்க்கலாம் என தெரிந்து கொள்ளலாம். மீன் வளம் குறையாமல் பாதுகாக்க இத்தகைய கட்டுப்பாடு அவசியம் எனும் அடிப்படையில் இந்த தளம் அமைக்கப்பட்டுள்ளது.

இருபக்கமும் நீண்ட கடற்கரையை கொண்டுள்ள நம் நாடு அள்ள அள்ள குறையாக மீன் வளத்தையும் கொண்டிருக்கிறது தான். ஆனால் அதற்காக எந்தவித வரைமுறையும் இல்லாமல் மீன் வளத்தை சூறையாடிக்கொண்டிருந்தால் காலப்போக்கில் மீன் வளம் குறைந்துவிடும் அபாயம் இருக்கவே செய்கிறது. அதிலும் சில குறிப்பிட்ட மீன் இனங்களே அழிந்தே போய்விடலாம் என எச்சரிக்கப்படுகிறது. இந்த நிலையை தவிர்ப்பதற்காக தான், மீன்கள் இனப்பெருக்க காலத்தில் மீன்பிடித்தலுக்கு தடை விதிக்கப்படும் வழக்கம் அமலில் இருக்கிறது.

இந்த கட்டுப்பாடு மட்டும் போதாது, சுய கட்டுப்பாடும் அவசியம் என வலியுறுத்தும் வகையில் மயுரேஷ் கங்கல் உள்ளிட்ட மீன் வள ஆர்வலர்கள் மேலே சொன்ன இணையதளத்தை அமைத்துள்ளனர். கடல் வளத்திற்கு பாதிப்பு ஏற்படுத்தாத வகையில் மீன் உணவை சுவைக்க வழி செய்வதற்கான தன்னார்வ முயற்சி இந்த தளம் என இவர்கள் குறிப்பிடுகின்றனர். மீன் வளம் தொடர்பான தகவல்களை எளிதாக புரிந்து கொள்ளும் வகையில் முன்வைத்தால் மக்கள் தாங்களாகவே முன்வந்து சரியான முடிவை எடுப்பார்கள் என்பதும் இவர்களின் நம்பிக்கையாக இருக்கிறது.

அதாவது, மீன்கள் இனப்பெருக்கம் செய்யும் காலத்தை அறிந்து கொண்டு, அந்த காலத்தில் குறிப்பிட்ட மீன்களை சாப்பிடாமல் பொதுமக்களே தவிர்க்க வேண்டும் என இவர்கள் விரும்புகின்றனர். இதற்கான தகவல்களை எளிதாக புரிந்து கொள்ளும் வகையில் மீன்வள நாட்காடியாகவும் உருவாக்கி தந்துள்ளனர். இந்த நாட்காட்டியில் எந்த எந்த மாதங்களில் எந்த வகை மீன்கள் இனப்பெருக்கம் செய்யும் காலம் என்பது குறிப்பிடப்பட்டிருக்கும். அதே போல் எந்த வகை மீன்களை எந்த மாதங்களில் சாப்பிடலாம் என்றும் உணர்த்தப்பட்டுள்ளது.

பல ஆண்டு ஆய்வுகளின் அடிப்படையில் திரட்டப்பட்ட தகவல்களை இப்படி எளிதான முறையில் தொகுத்தளித்திருக்கின்றனர். இந்த நாட்காட்டியை பார்த்து மீன் உணவு பிரியர்களே, மீன்களின் இனப்பெருக்கம் பாதிக்காத வகையில் தங்கள் தேர்வுகளை அமைத்துக்கொண்டால் மீன் வளத்தை காக்கும் செயலாக அது அமையும் அல்லவா? அந்த எண்ணத்தில் தான் இந்த தளத்தை அமைத்துள்ளனர். மீன் உணவுப்பிரியர்கள் மட்டும் அல்லாமல் கடலோரப்பகுதியில் உள்ள உணவு விடுதிகளிலும் இந்த நாட்காட்டி பற்றிய விழிப்புணர்வை ஏற்படுத்தி வருகின்றனர். குஜராத் முதல் கேரளா வரையான கடற்கரைப்பகுதியில் பயன்படுத்தும் வகையில் இந்த நாட்காட்டி அமைந்துள்ளது. மற்ற பகுதிகளுக்கும் விரிவாக்கம் செய்தால் நன்றாக இருக்கும் அல்லவா! http://knowyourfish.org.in/our-calendar/

இதே போல ஆஸ்திரேலியாவில் தவளைகள் நலன் காப்பதற்கான விழிப்புணர்வு முயற்சியில் ஈடுபட்டுள்ளனர். இதற்காக நாடு தழுவிய அளவில் தவளை கணக்கெடுப்பில் ஈடுபட்டு வருகின்றனர். ஆஸ்திரேலியா பரந்து விரிந்த பெரிய நாடு என்பதால் ஆய்வாளர்கள் மட்டுமே இதை செய்து முடிப்பது சாத்தியம் இல்லை. அதனால் இதில் பொதுமக்கள் பங்களைப்பை கோரியுள்ளனர். தவளையை கண்டால் தகவல் தெரிவிப்பதற்காக என்று ஒரு பிரத்யேக செயலியையும் உருவாக்கி தந்துள்ளனர்.

இந்த திட்டத்தில் குடிமக்கள் விஞ்ஞானியாக பங்கேற்க ஆர்வம் கொண்டவர்கள் தவளையை கண்டுணரும் திட்டத்தின் செயலியை தங்கள் போனில் டவுண்லோடு செய்து கொள்ள வேண்டும். அதன் பிறகு தவளைகளை தேடி புறப்பட வேண்டும். தங்கள் பகுதியில் தவளையை காணும் போது அதன் ஒலியை மட்டும் பதிவு செய்து இந்த செயலி மூலம் சமர்பித்தால் போதுமானது. விஞ்ஞானிகள் மற்றும் ஆய்வாளர்கள் குழு, இந்த ஒலிப்பதிவுகளை கேட்டு அது எந்த வகை தவளைக்கு உரியது என கண்டறியும். இதன் மூலம் குறிப்பிட்ட இடத்தில் வாழும் தவளைகளின் எண்ணிக்கையையும் கண்டறிய முடியும்.

ஆஸ்திரேலியாவில் மொத்தம் 240 வகைக்கு மேல் வகைப்பட்ட தவளைகள் வாழ்கின்றன. இவற்றில் பல அழியும் நிலையை நோக்கி தள்ளப்பட்டு வரும் நிலையில், நாடு முழுவதும் தவளை கணக்கெடுப்பு நடத்துவதன் மூலம், எந்த வகையான தவளைகள் ஆபத்தில் இருக்கின்றன என்பதை எளிதாக அறிந்து நடவடிக்கை எடுக்க முடியும் என ஆய்வாளர்கள் நம்புகின்றனர்.

தவளைகள் சுற்றுசூழல் நோக்கில் முக்கியமான விலங்காக அமைகின்றன. ஏனெனில் சுற்றுச்சூழலில் ஏற்படும் மாற்றங்களினால் முதலில் பாதிக்கப்படும் விலங்குகளில் ஒன்றாக தவளைகள் இருக்கின்றன. எனவே தவளைகள் நலனை கண்காணிப்பதன் மூலம் சுற்றுசூழல் மற்றும் பருவநிலை மாற்றத்தின் பாதிப்பை முன்கூட்டியே உணர்ந்து கொள்ளலாம் என்றும் ஆய்வாளர்கள் கருதுகின்றனர்.

அந்த வகையில் தவளைகளை காப்பதற்கான முயற்சியில் ஈடுபட்டுள்ளனர். பொதுமக்களுக்கு ஆர்வம் அளிக்கும் வகையில் தவளைகளின் முக்கியத்துவம் மற்றும் அவற்றின் வாழும் முறை உள்ளிட்ட தகவல்களும் இந்த திட்டத்திற்கான இணையதளத்தில் அளிக்கப்பட்டுள்ளன.

மேலும் தகவல்களுக்கு: https://www.frogid.net.au/

 

 

தளம் புதிது; டிவிட்டர் பதிவுகளை நீக்க உதவும் தளம்

சமூக ஊடகங்களில் பகிர்ந்து கொள்ளும் சில தகவல்கள் பயனாளிகளுக்கு பாதகமாக அமையலாம். இப்படி பழைய சமூக ஊடக பகிர்வுகளால் வேலையை இழப்பு உள்ளிட்ட பாதிப்புக்கு பலர் இலக்காகி இருக்கின்றனர். எனவே சமூக ஊடகங்களில் கொஞ்சம் பின்னோக்கி பார்த்து தேவையில்லாத தகவல்களை நீக்கி விடுவது நல்லது தான். ஆனால் இது அத்தனை எளிதானது அல்ல. பெரும்பாலான சமூக ஊடக சேவைகள் பழைய பதிவுகளை நீக்க எளிதான வழியை அளிப்பதில்லை. உதாரணத்திற்கு குறும்பதிவு சேவையான டிவிட்டரில் பழைய பதிவுகளை எல்லாம் ஒருவர் நீக்க நினைத்தாலும் அது எளிதாக இருக்காது. கணக்கை முடக்கி வைப்பது அல்லது ஒட்டுமொத்தமாக வெளியேறுவது போன்ற வழிகளை தேர்வு செய்தால், குறும்பதிவு செய்வதை தொடர முடியாமல் போகலாம்.

இந்த இடத்தில் தான் டிவீட்டெலிட் இணையதளம் கைகொடுக்கிறது. இந்த தளம் பழைய குறும்பதிவுகளை எளிதாக நீக்க வழி செய்கிறது. இந்த சேவையின் மூலம் 3,200 வரையான குறும்பதிவுகளை ஒரே நேரத்தில் நீக்கி விடலாம். அது மட்டும் அல்ல, எதிர்காலத்தில் பகிரும் குறும்பதிவுகளையும் குறிப்பிட்ட கால இடைவெளிக்குப்பின் தானாக நீக்கப்படவும் இதன் மூலமே வழி செய்யலாம்.

இணைய முகவரி: https://www.tweetdelete.net/

செயலி புதிது; ஹாஷ்டேக் வழிகாட்டி

சமூக ஊடகங்களில் தகவல்களை பகிர்ந்து கொள்ளும் போது அவற்றுடன் பொருத்தமான ஹாஷ்டேகை இணைப்பதும் முக்கியம். அப்போது தான் அவற்றின் மையகருத்திற்கு ஏற்ப மற்றவர்களால் எளிதாக அடையாளம் காண முடியும். டிவிட்டர், பேஸ்புக், இன்ஸ்டாகிராம் என எல்லா சமூக ஊடகங்களிலும் ஹாஷ்டேக் பயன்பாடு பிரபலமாக இருக்கிறது. ஆனால் ஒன்று செய்திகள், தகவல்களை விட ஒளிப்படங்களுக்கான ஹாஷ்டேகை தேர்வு செய்வது கொஞ்சம் சிக்கலானதாக இருக்கலாம். இன்ஸ்டாகிராமில் முன்னிலையில் இருக்கும் ஹாஷ்டேகாக மட்டும் இருந்தால் போதாது, படத்திற்கு பொருத்தமானதாகவும் இருக்க வேண்டும். இந்த வகையில் ஒளிபட கலைஞர்களுக்கு உதவுவதற்காக என்றே போட்டர்லூ,காம் சார்பில் புதிய செயலி அறிமுகம் செய்யப்பட்டுள்ளது. செயற்கை நுண்ணறிவு மூலம் செயல்படும் இந்த செயலியிடம் ஒளிப்படத்தை சமர்பித்தால் அதற்கு பொருத்தமான ஹாஷ்டேக் மற்றும் குறிச்சொற்களை பரிந்துரைக்கிறது. இந்த பட்டியலில் இருந்து தேர்வு செய்து கொள்ளலாம்.

மேலும் தகவல்களுக்கு: https://app.photerloo.com/InstagramHashtagKeywordingApp/

 

வீடியோ புதிது; தலைவலி அறிவோம்

தலைவலியால் பாதிக்கப்பட்ட அனுபவம் எல்லோருக்கும் இருக்கலாம். ஆனால் தலைவலியில் பல வகை இருக்கின்றன. சிலருக்கு ஒத்த தலைவலி வரலாம். சிலருக்கு பனிச்சுமையால் தலைவலி உண்டாகலாம். எனவே இவற்றுக்கான நிவாரணமும் மாறுபடும். இப்படி தலைவலியில் உள்ள வகைகள் மற்றும் அவற்றுக்கான நிவாரணத்தை ஒரு வீடியோ மூலம் அறிந்து கொள்ள விரும்பினால், உங்களுக்காக என்றே குட்லைப் வீடியோ ஒன்றை உருவாக்கியுள்ளது. பலவகையான தலைவலிக்கான எளிய விளக்கத்தை இந்த வீடியோ மூலம் தெரிந்து கொள்ளலாம்.

வீடியோவை காண: http://designtaxi.com/news/396889/Watch-Different-Types-Of-Headaches-And-How-To-Cure-Them/

 


 

நன்றி; தமிழ் இந்துவில் எழுதியது;

 

தமிழில் இதுவரை எழுதியவற்றை படிக்க:http://tamil.thehindu.com/…/%E0%AE%9A%E0%AF%88%E0%AE%AA%E0…/

 

விசா பெற வழிகாட்டும் இணையதளம்

visaசுற்றுலா அல்லது உயர் கல்விக்காக வெளிநாடு செல்ல இருப்பவர்கள் அந்நாடுகளில் உள்ள விசா நடைமுறை விதிகளை தெரிந்து கொள்ள விரும்பினால் அதற்கான தகவல்களை எளிதாக தெரிந்து கொள்ள உதவுகிறது விசாடிபி இணையதளம்.
இந்த தளத்தை பயன்படுத்துவது எளிதானது. முதலில் எந்த நாட்டைச்சேர்ந்தவர் என்பதை குறிப்பிட வேண்டும். அதன் பிறகு பயணம் செய்வதற்கான காரணத்தை தேர்வு செய்துவிட்டு, செல்வதற்கான நாட்டை தேர்வு செய்தால், அந்த நாட்டிற்கான விசா நடைமுறை தொடர்பான தகவல் தெரிவிக்கப்படுகிறது. ஆனால் ஒன்று இந்த தகவல்கள் வழிகாட்டும் நோக்கத்திலானவை மட்டுமே. இவற்றை அடிப்படையாக கொண்டு, அதிகாரப்பூர்வ வழியில் உறுதி செய்து கொள்ள வேண்டும். ஏனெனில் இந்த தளம் இணையத்தில் உள்ள விசா தகவல்களை திரட்டித்தருகிறது. இந்த சேவையை வழங்கும் வேறு சில இணையதளங்கள் இருந்தாலும் இதன் இடைமுகம் எளிமையாக இருப்பது சிறப்பு.
இணைய முகவரி; http://visadb.io/index.html

செயலி புதிது : புதிய நண்பர்களை பெற உதவும் சேவை
புதிய நண்பர்களை அடையாளம் காண விரும்புகிறவர்களுக்கும், ஆர்வத்தின் அடிப்பையில் நட்பு வலை விரிப்பதில் ஆர்வம் கொண்டவர்களுக்கும் கைகொடுக்கும் வகையில் டூகதர் செயலி அமைந்துள்ளது.
சமூக வலைப்பின்னல் வகையை சேர்ந்த இந்த செயலி மூலம், பயனாளிகள் தங்கள் அருகாமையில் உள்ள ஒத்த கருத்துள்ளவர்களை அடையாளம் கண்டு அவர்களுடன் தொடர்பு கொள்ளலாம். இதற்கேற்ப தங்களுக்கு விருப்பமான செயல்களை பட்டியலிட்டு அதில் ஆர்வல் உள்ளவர்களை தேடி தொடர்பு கொள்ளலாம். இதே போல மற்றவர்கள் உருவாக்கியுள்ள விருப்ப பட்டியலிலும் இணைத்துக்கொள்ளலாம்.
புதிய நிகழ்ச்சிகளை கண்டறியவும் இந்த செயலியை பயன்படுத்தலாம். வார விடுமுறை நாட்களில் நிகழ்வுகளை திட்டமிடவும் இந்த செயலி உதவலாம். புதிய குழுக்களில் இணைந்து கொள்ளவும் இந்த செயலி வழிகாட்டும். ஆண்ட்ராய்டு மற்றும் ஐபோன்களில் செயல்படுகிறது.
மேலும் தகவல்களுக்கு: https://www.letsdogether.com/

கண்டுபிடிப்பாளர்களின் பாதையில்…

பயண ஏற்பாட்டு இணையதளமான டிராவல்பேக், ’கண்டுபிடிப்பின் பாதையில்’ எனும் சுவாரஸ்யமான இணைய பக்கத்தை உருவாக்கி வரலாற்றில் பின்னோக்கி பயணிக்க வைத்துள்ளது.

,எளிமையாக வடிவமைக்கப்பட்ட இந்த பக்கத்தில் வரலாற்றின் ஆகச்சிறந்த கண்டிபிடிப்பாளராக கருதப்படும் கொல்ம்பசில் துவங்கி, வரலாற்று பயணியான மார்கோ போலோ வரை 13 முக்கிய கண்டுபிடிப்பாளர்கள் தொடர்பான தகவல்கள் இடம்பெற்றுள்ளன.

இந்த கண்டுபிடிப்பாளர்கள் பயணத்தை மேற்கொண்ட போது அதற்கு தேவைப்பட்ட காலமும், தற்போது நவீன போக்குவரத்து வசதிகள் உள்ள சூழலில் அந்த பயணத்தை நிறைவேற்றக்கூடிய கால அவகாசமும் ஒப்பிடப்பட்டுள்ளது. இந்த ஒப்பீட்டை கூகுள் வரைபடம் மூலமும் செய்து பார்க்கலாம். கண்டுபிடிப்பாளர்கள் மேற்கொண்ட சாகசப்பயணத்தின் வழித்தடத்தை கூகுள் வரைபடம் மீது பார்க்கலாம்.

அட்லாண்டிக் பெருங்கடலை விமானம் மூலம் கடந்த வீராங்கனை அமிலி எர்ஹார்ட், கேப்டன் குக் உள்ளிட்டோரது சாகப்பயணங்களையும் இப்படி வரைபடத்தில் ஒப்பிட்டு பார்க்கலாம்.

இணைய முகவரி: https://www.travelbag.co.uk/a-race-of-discovery/#

 

செயலி புதிது: இமோஜிகள் உங்கள் கைகளில்…

ஸ்மார்ட்போனில் வாழ்த்து செய்தி அனுப்புவதாக இருந்தாலும் சரி, சாதாரண வாட்ஸ் அப் செய்தி அனுப்புவதாக இருந்தாலும் சரி, இமோஜி எனப்படும் சித்திர எழுத்துக்களை நாடுவதே பலரது வழக்கமாக இருக்கிறது. தேவையான் இமோஜிகளை தேர்வு செய்யும் வசதி போன் விசைப்பலக்கையிலேயே இருக்கிறது என்றாலும், இதற்கென பிரத்யேக செயலிகளும் இல்லாமல் இல்லை. அந்த வகையில் டெக்ஸ்ட் டு இமோஜி செயலி, வார்த்தைகளை இமோஜிகளாக மாற்றித்தருகிறது.

இதில் உள்ள தேடல் கட்டத்தில் ஆங்கில வார்த்தைகளை டைப் செய்து அதற்கு பொருத்தமான இமோஜிகளை கண்டுபிடிக்கலாம். இது தவிர ஆயிரக்கணக்கான இமோஜிகளில் இருந்தும் தேர்வு செய்து கொள்ளலாம்.

இமோஜி வாசகங்களை விருப்பம் போல மாற்றிக்கொள்ளும் வசதி இருக்கிறது. இவற்றை சமூக ஊடகங்களில் பகிரும் வசதியும் இருக்கிறது. இமோஜிகளை நகலெடுக்கும் வசதியும் இருக்கிறது. இமோஜி பிரியர்களுக்கு சுவாரஸ்யமான அனுபவமாக இந்த செயலி அமைந்துள்ளது.

 

மேலும் தகவல்களுக்கு: http://bit.ly/2tBl6vn

நீங்கள் அறியாத தேடல் ரகசியங்கள்

ddg-bangs-640x460மாற்று தேடியந்திரங்களில் முன்னணியில் இருக்கும் ’டக்டக்கோ’ பற்றி நீங்கள் கேள்விப்பட்டிருக்கலாம். கூகுள் சவால் விடக்கூடிய அளவுக்கு மிகப்பெரிய தேடியந்திரம் இல்லை என்றாலும், ’டக்டக்கோ’ கடந்த 7 ஆண்டுகளில் கொஞ்சம் கொஞ்சமாக வளர்ந்து தனக்கென தனியிடத்தை பிடித்திருக்கிறது. இதற்கு முக்கிய காரணம் டக்டக்கோ இணைவாசிகளின் தனியுரிமையை மதிக்கும் வகையில் செயல்படுவது தான். ஆம், இணையவாசிகளின் தேடல் பழக்கத்தை கண்காணிப்பதில் ஈடுபடாமல் இருப்பதும், அவர்களைப்பற்றி தகவல்களை திரட்டி விளம்பர வலை விரிக்காமல் இருப்பதும் டக்டக்கோவின் தனிச்சிறப்பாக அமைகிறது. இணையத்தில் தகவல்களை தேடுவதற்காக டக்டக்கோவை பயன்படுத்தும் போது, நீங்கள் யார் என்பதை அது கவனிக்காமல் இருக்கிறது. இந்த அனாமதேய தன்மையை பிரைவசி ஆர்வலர்கள் கொண்டாடி வருகின்றனர்.

எனவே உங்கள் இணைய தேடல் அனாமதேயமாக இருக்க வேண்டும் என விரும்பினால் நீங்களும் டக்டக்கோவை பயன்படுத்திப்பார்க்கலாம். பிரைவசி பாதுகாப்பு பிரதான அம்சம் என்றாலும், டக்டக்கோவுக்கு மாறலாம் என நினைப்பதற்கு மேலும் பல காரணங்கள் இருக்கின்றன. ஒரு தேடியந்திரமாக டக்டக்கோ பல தனித்தன்மையான சேவைகளை வழங்கி வருகிறது. இவற்றில் பல பிரத்யேகமானவை என்பது குறிப்பிடத்தக்கது:

ஸ்டாப்வாட்ச்

நீங்கள் விரும்பினால் டக்டக்கோவை ஸ்டாப்வாட்சாக பயன்படுத்தலாம். இதன் கட்டத்தில் ஸ்டாப்வாட்ச் என டைப் செய்தால் போதும், அதற்கான கடிகாரம் தோன்றும். அதில் உங்களுக்கு தேவையான நேரத்தை அமைத்துக்கொள்ளலாம். அது மட்டும் அல்ல, அடுத்தடுத்து வேலைகள் இருப்பின், லேப் வசதி மூலம் தொடச்சியாக பயன்படுத்தலாம். இதே முறையில் டைமர் சேவையையும் பயன்படுத்தலாம். டைமரில் நேரம் முடிந்ததும் அலாரமும் ஒலிக்கும்.

பெரிய எழுத்துக்கள்

ஆங்கில வாசகங்களில் தேவையான இடங்களில் கேபிடல் எழுத்துக்களை அமைக்க விரும்பினால் அதற்கான வசதியையும் இந்த தேடியந்திரம் வழங்குகிறது. வாசகத்தை டைப் செய்து அதற்கு முன் டைடில் கேஸ் என குறிப்பிட்டு இடைவெளி விடுவதன் மூலம் இந்த வசதியை பயன்படுத்திக்கொள்ளலாம். எழுத்துக்களை லோவர் கேஸ் அல்லது அப்பர் கேசாக மாற்றவும் இதை பயன்படுத்தலாம். மாணவர்களுக்கு இந்த வசதி மிகவும் பயனுள்ளதாக இருக்கும்.

செய்திகளை தேட

கூகுளில் தகவல்களை தேடும் போது, தொடர்புடைய செய்திகளும் இடம்பெற்றிருக்கும். ஆனால் டக்டக்கோ தேடல் முடிவுகளை மட்டுமே அளிக்கிறது. இருப்பினும் செய்திகளும் இடம்பெற விரும்பினால், தேடலுக்கான கீவேர்டு முன் அல்லது முடிவில் நியூஸ் என சேர்த்துக்கொண்டால் போதும், தொடர்புடைய செய்திகளையும் காணலாம். 100 க்கும் மேற்பட்ட தளங்களில் இருந்து செய்திகள் பட்டியலிடப்படுகின்றன.

பிடிஎப் கோப்புகள்

டக்டக்கோவில் எச்.டி.எம்.எல் கோப்புகளையும் எளிதாக தேடலாம். எச்.டி.எம்.எல்: என குறிப்பிட்டால் பொருத்தமான முடிவுகளை காணலாம். புரோகிராமிங் சிறப்பு குறியீடுகளையும் தேடலாம். இதே போல பிடிஎப் கோப்புகள் அல்லது மின் புத்தகங்களை எதிர்பார்க்கும் போது, கீவேர்டுடன் பிடிஎப் எனும் வார்த்தையை சேர்த்துக்கொண்டால் போது, இத்தகைய கோப்புகளை மட்டும் தேடலாம்.

நெத்தியடி தேடல்

சில நேரங்களில் ஒட்டுமொத்த இணைய கடலிலும் தேட விரும்பாமல் குறிப்பிட்ட இணையதளத்தில் மட்டும் தேட விரும்பலாம். இதற்கும் டக்டக்கோவில் வழி இருக்கிறது. இந்த வசதி ஐபேங்க் என சொல்லப்படுகிறது. தேடல் பதத்திற்கு முன் ஆச்சர்யக்குறியை சேர்த்து, குறிப்பிட்ட தளத்திற்கான முதல் எழுத்தை குறிப்பிட்டால் போதும், அந்த ஒரு தளத்தில் மட்டும் தேடலாம். உதாரணத்திற்கு  !a என்றால் அமேசான் தளத்தில் தேடலாம். இப்படி நூற்றுக்கணக்கான தளங்களில் நேரடியாக தேடும் வசதியை அளிக்கிறது. இதற்கான நீண்ட பட்டியலும் கொடுக்கப்பட்டுள்ளது: https://duckduckgo.com/bang

ஆய்வுப்பிரிவிலும் தளங்கள் பட்டியலிடப்பட்டுள்ளதால் மாணவர்கள் மற்றும் ஆய்வாளர்களுக்கு இந்த சேவை மிகவும் பயனுள்ளதாக இருக்கும். இவ்வளவு ஏன், இந்த வசதியை பயன்படுத்தி கூகுளிலும் தேடலாம் தெரியுமா? https://duckduckgo.com/bang?q=google

உடனடி பதில்கள்

இன்ஸ்டண்ட் ஆன்சர்ஸ் எனும் பெயரில் உடனடி பதில்களையும் டக்டக்கோ வழங்கி வருகிறது. குறிப்பிட்ட பல கேள்விகள் அல்லது பதங்களுக்கு தேடல் வார்த்தையை டைப் செய்ததுமே பொருத்தமான பதிலை காணலாம். கிளிக் செய்யாமலே தேடும் வசதி எனும் வர்ணனையோடு டக்டக்கோ இதை அறிமுகம் செய்தது. கூகுள் நாலட்ச் கிராப் எனும் பெயரில் இது போன்ற வசதியை வழங்கினாலும், முதலில் டக்டக்கோ தான் இதை அறிமுகம் செய்தது.

வீடியோ தேடல்

வீடியோ கோப்புகள் மட்டும் தான் தேவை எனில் தேடல் பதத்திற்கு முன் வீடியோ என சேர்த்துக்கொண்டால் 28 வீடியோக்கள் வந்து நிற்கின்றன. மேலும் வீடியோக்கள் தேவையில் எனில் அதற்கான வசதியை கிளிக் செய்யலாம். சமையல் குறிப்பு வீடியோக்கள் என்று குறிப்பிட்டும் தேடலாம். இந்த முடிவுகள் யூடியூப் மட்டுமே சார்ந்திருப்பது தான் ஒரே குறை.

குறுக்கு வழிகள்

இணையசேவைகளுக்கான கீபோர்டு சார்ந்த குறுக்கு வழிகள் தேவை எனில், சீட்ஷீட் வசதியை பயன்படுத்திக்கொள்ளலாம். உதாரணத்திற்கு போட்டோஷாப்  சீட்ஷீட் என தேடினால் போட்டோஷாப் தொடர்பான குறுக்கு வழிகளை பெறலாம். புரோகிராமிங் தொடர்பான தகவல்களையும் எளிதாக தேடலாம்.

டக்டக்கோவில் இன்னும் கூட பல அம்சங்கள் இருக்கின்றன. எல்லாம் சரி, கூகுள் போல வருமா? என கேட்பவர்களுக்காக கூகுல் தொடர்புடைய சுவாரஸ்யமான தகவல் ஒன்று. கூகுளில் ஏதேனும் பிரச்சனையா? எனும் பொருள்பட, ஈஸ் கூகுள் டவுன் என கூகுளில் கேட்டால், இல்லை (நோ) என பதில் பளிச் என தோன்றுகிறது.

 

தளம் புதிது: லண்டன் திரைப்பட வரைபடம்

லண்டன் நகரம் பல விஷயங்களுக்கு புகழ் பெற்றது. தேம்ஸ் நதிக்கரை, லார்ட்ஸ் மைதானம், விம்பிள்டன் மைதானம் என நீளும் இந்த பட்டியலில் திரைப்படங்ளுக்கான படிப்பிடிப்பையும் சேர்த்துக்கொள்ள வேண்டும். ஆங்கில படங்கள் பல லண்டனில் படமாக்கப்பட்டுள்ளன. லண்டன் நகரில் படமாக்கப்பட்ட படங்கள் பற்றி அறிய விருப்பம் எனில், கோ3சினிமா தளத்தின் திரைப்பட படப்பிடிப்பு பகுதி உதவுகிறது.

இந்த பகுதியில் லண்டன் நகர் மற்றும் சுற்றுப்புற பகுதிகளில் படமாக்கப்பட்ட படங்கள் தொடர்பான விவரங்களை பார்க்கலாம். லண்டன் வரைபடம் மீதி இந்த தகவல்கள் அழகாக சுட்டிக்காட்டப்பட்டுள்ளன. வரைப்படத்தில் மஞ்சள் மற்றும் சிவப்பு நிற ஐகான்கள் மீது கிளிக் செய்தால் படப்பிடிப்பு தொடர்பான விவரங்களை காணலாம். திரைப்பட போஸ்டர் சின்னதாக எட்டிப்பார்க்க மற்ற தகவல்களும் சுருக்கமாக இடம்பெற்றுள்ளன.

திரைப்பட ரசிகர்களுக்கு இந்த தளம் நிச்சயம் சுவாரஸ்யமானதாக இருக்கும். லண்டன் நகர் மீது அபிமானமும் இருந்தால் இன்னும் ஈர்ப்புடையதாக இருக்கும். மற்ற நகரங்களுக்குக் இது போன்ற ஒரு வரைபடம் இருந்தால் நன்றாக இருக்குமே என்ற எண்ணத்தையும் இது ஏற்படுத்தலாம்.

இணைய முகவரி:  https://go2cinema.com/filming-location-map

 

செயலி புதிது: மாணவர்களுக்கான பயனுள்ள செயலி

மாணவர்கள் ஸ்மார்ட்போன்களை பொழுதுபோக்கு நோக்கில் மட்டும் பயன்படுத்துவதில்லை. கல்வி தொடர்பான பணிகளுக்கும் ஸ்மார்ட்போனை பயன்படுத்தலாம். இதற்கு உதவக்கூடிய எண்ணற்ற செயலிகள் இருக்கின்றன. இந்த பட்டியலில் டைம்டேபிள் செயலியையும் சேர்த்துக்கொள்ள வேண்டும்.

இந்த செயலி வகுப்பு பாட அட்டவனையை குறித்து வைத்துக்கொண்டு, வகுப்புகளை மறக்காமல் இருக்க உதவுகிறது. இதில் வகுப்புகள் நடைபெறும் நேரத்தை குறிப்பிடுவதோடு, மாணவர்கள் தங்களுக்கு தரப்படும் வீட்டுப்பாடங்கள் போன்றவற்றையும் குறித்து வைக்கலாம். விடுமுறை நாட்களையும் குறித்து கொள்ளலாம். வகுப்பில் எடுக்கும் குறிப்புகளையும் இதில் சேமித்து வைக்கலாம். முக்கியமாக வகுப்பு நடந்து கொண்டிருக்கும் போது போனில் அழைப்பு வந்தால் அதை மவுனமாக்கும் வசதியும் இருக்கிறது.

பள்ளி அல்லது கல்லூரி பாடத்திட்டங்களை நிர்வகிப்பதில் இந்த செயலி மிகவும் உதவியாக இருக்கும். எந்த சாதனத்தில் இருந்து வேண்டுமானாலும் இதில் உள்ள தகவல்களை அணுகலாம்.

மேலும் தகவல்களுக்கு: https://play.google.com/store/apps/details?id=com.gabrielittner.timetable&hl=en_GB

 

 

நன்றி; தமிழ் இந்துவில் எழுதியது.

 

டக்டக்கோ பற்றிய முந்தைய பதிவுகள்;

டக்டக்கோ தேடியந்திரத்திற்கு மாறலாமா? http://cybersimman.com/2015/10/28/search-55/

*

கூகுள் தவிர நீங்கள் அறிந்திருக்க வேண்டிய தேடியந்திரங்கள்! http://cybersimman.com/2016/09/28/%E0%AE%95%E0%AF%82%E0%AE%95%E0%AF%81%E0%AE%B3%E0%AF%8D-%E0%AE%A4%E0%AE%B5%E0%AE%BF%E0%AE%B0-%E0%AE%A8%E0%AF%80%E0%AE%99%E0%AF%8D%E0%AE%95%E0%AE%B3%E0%AF%8D-%E0%AE%85%E0%AE%B1%E0%AE%BF%E0%AE%A8/

 

-\

 

மாற்று தேடியந்திரங்கள் எதற்காக? http://cybersimman.com/2016/07/31/search-56/

ரோபோ புன்னகை என்ன விலை?

DOnf8ENXcAAXL_Zவிருதுகள், தேர்வுகள் என்று வந்தாலே சர்ச்சைகள் எழுவது இயல்பானது தான். ஆனால், சர்வதேச புகைப்பட போட்டி ஒன்றில் எழுந்திருக்கும் சர்ச்சை கொஞ்சம் வித்தியாசமானது. இந்த சர்ச்சை விருதுக்கு தேர்வு செய்யப்பட்ட புகைப்படத்தின் தரம் அல்லது தகுதி குறித்து உண்டாகவில்லை. மாறாக புகைப்படத்தில் இருக்க வேண்டிய உயிர்த்துடிப்பு அல்லது ஆன்மா தொடர்பான கேள்விகளை எழுப்புகிறது. இந்த கேள்விகள் சுவாரஸ்யமாக அமைவதோடு, நம் காலத்து கேள்விகளாகவும் இருப்பது தான் முக்கிய விஷயமாக இருக்கிறது.

சர்ச்சைக்குள்ளாகி இருக்கும் அந்த புகைப்படத்தில் ஒரு நல்ல புகைப்படத்திற்கு தேவையான எல்லா அம்சங்களும் இருக்கவே செய்கின்றன. அந்த படம் அழகாக இருக்கிறது. அதில் ஒரு வசீகரம் இருக்கிறது. அது ஒரு மைய கருத்தை பேசுகிறது. எல்லாம் இருந்தும் அந்த படத்தினுள் உயிரோட்டம் இல்லை எனும் குற்றச்சாட்டு எழுந்துள்ளது. ஏனெனில் அந்த படத்தில் இருப்பது மனித முகம் அல்ல, மனித இயந்திரம் முகம் என்பது தான்!

மனித மாதிரிகளை போஸ் கொடுக்க வைத்து படம் எடுப்பது போல, புகைப்பட கலைஞர் ஒருவர் இயந்திர மனித மாதிரியை போஸ் கொடுக்க வைத்து படம் எடுத்திருக்கிறார். படம் எடுத்தவர் பின்லாந்து நாட்டைச்சேர்ந்தவர். அவர் படம் எடுத்த மாதிரி, ஜப்பானைச்சேர்ந்த எரிகா எனும் எந்திரன். எரிகா ஒரு ரோபோ தான் என்றாலும், சாதாரண ரோபோ அல்ல. அது ஒரு ஆண்ட்ராய்டு. அதாவது மனித முகம் போன்ற தோற்றத்தை கொண்ட ரோபோ.

ரோப்போக்களி;ல் பலவகை உண்டு. தொழிற்சாலைகளில் பார்க்க கூடிய ரோபோக்கள் இயந்திர வகையை சேர்ந்தவை. மனித வடிவிலான ரோபோக்களும் இருக்கின்றன. ஹோண்டோவின் அசிமோ இதற்கு நல்ல உதாரணம். ரோபோ விலங்குகளும் உள்ளன. அண்மையிம் மறுஅறிமுகம் செய்யப்படுவதாக அறிவிக்கப்பட்ட சோனியின் ஐபோ நாய்க்குட்டி இதற்கு அழகான உதாரணம். இன்னும் பல வகை ரோபோக்கள் உள்ளன. இவற்றில் அச்சு அசல் மனித உருவத்தை கொண்டுள்ளவை ஆண்ட்ராய்டு என குறிப்பிடப்படுகின்றன.

ஆண்ட்ராய்டு ரோபோவுக்கு உதாரணம் தேவையில் எனில் நமக்கு பரீட்சயமான எந்திரன் படத்தின் சிட்டி ரோபோவை சொல்லலாம். ரஜினியை போலவே காட்சி அளித்தததால் தான் சிட்டி ஆண்ட்ராய்டு ரகம். இத்தகைய ஆண்ட்ராய்டு ரோபோ உருவாக்கத்திலும், ஆய்விலும் முன்னணியில் இருப்பது ஜப்பானியர்கள் தான். அதிலும் ஹிரோஷி இஷிகுரோ (Hiroshi Ishiguro ) எனும் விஞ்ஞானி தான் படுகில்லாடியாக இருக்கிறார். ரோபோ குரு என்றே வர்ணிக்கப்படும் இஷிகுரோ, மனித வடிவிலான ரோபோக்களை உருவாக்கும் ஆய்வில் தீவிரமாக ஈடுபட்டு வருபவர். சுய தோற்றம் கொண்ட ரோபோ ஒன்றையும் உருவாக்கியுள்ள இஷிகுரோவின் மற்றொரு உருவாக்கம் தான் எரிகா.

23 வயது பெண் தோற்றம் கொண்ட எரிகாவை விஷேசமான ரோபோ என்று தான் சொல்ல வேண்டும். ஏனெனில் இது பேசும் ரோபோ என்பது மட்டும் அல்ல, கிட்டத்தட்ட மனிதர்கள் போலவே பேசும் ஆற்றலும் கொண்டது. குறிப்பிட்ட தலைப்புகளின் கீழ் உரையாடவும் செய்யக்கூடியது. உலகிலேயே மிகவும் அழகான ஆண்ட்ராய்டு என வர்ணிக்கப்படும் எரிகா, மனித தோற்றத்துக்கு மிகவும் நெருக்கமான உருவ அமைப்பையும் கொண்டிருக்கிறது.

இஷிகுரோ உருவாக்கிய ரோபோக்களில் எரிகா மட்டும் தான் சுயம்பு ரகம். அதாவது, மனித மாதிரியை அடிப்படையாக கொள்ளாமல் சுயேட்சையாக உருவாக்கப்பட்டது.

எரிகா ரோபோ பற்றியே நிறைய பேசலாம். ஆனால், இப்போதைக்கு எரிகாவால் உண்டான சர்ச்சை மற்றும் அது தொடர்பான இருத்தலியல் கேள்விகள் பார்க்கலாம்.

எரிகா அச்சு அசல் பெண் போலவே இருப்பதால் பின்லாந்து புகைப்படக்கலைஞரான மைஜா டம்மி என்பவர், எரிகாவை அழகாக படமெடுத்து டெய்லர் வெஸிக் போட்டோகிராபில் போர்ட்ரய்ட் பரிசுக்கு அனுப்பி வைத்தார். அந்த புகைப்படம் இறுதிச்சுற்றுக்கு தேர்வானதோடு, மூன்றாவது பரிசையும் வென்றிருக்கிறது. இந்த தேர்வே சர்ச்சைக்கு காரணமாகியுள்ளது.

போட்டியே போர்ட்ரயட் எனப்படும் உருவப்படம் தொடர்பானது. உருவப்படம் என்றால், மனிதர்களின் ஆளுமை சித்திரங்கள் என புரிந்து கொள்ளலாம். இந்த வகை படங்கள் பல உணர்வுகளை சொல்லாமல் சொல்லக்கூடியவை. இந்த போட்டியிலேயே முதல் பரிசை வென்ற லிபியா கடற்கரை பகுதியில் மீட்கப்பட்ட ஆப்பிரிக்க அகதியின் புகைப்படம் இதற்கான சரியான உதாரணமாக அமைகிறது. காமிராவை அகன்ற கண்களால் வெறித்துப்பார்ப்பது போல அமைந்துள்ள அந்த அகதியின் ஊடுருவும் பார்வை, மீட்கப்பட்ட நம்பிக்கை, சூழலின் மீதான அவநம்பிக்கை, இனம் புரியாத அச்சம் என பலவித உணர்வுகளை பேசுவதாக பாராட்டப்படுகிறது.

இத்தகைய ஆளுமை சித்திரங்கள் நடுவே ஒரு ரோபோ படத்தை தேர்வு செய்வது சரியா? என்பது தான் கேள்வியாக எழுந்துள்ளது. ஆனால், இந்த கேள்விக்கு பதில் தேடும் முன் எரிகாவின் உருவப்படத்தை ஒரு முறை பார்த்துவிட வேண்டும். முதல் பார்வைக்கு ஜப்பானிய பெண் எனும் தோற்றத்தை தரக்கூடிய அந்த புகைப்படத்தில் எரிகா, பக்கவாட்டில் நோக்கியபடி புன்னகைக்க முயல்பவர் போல காட்சி அளிக்கிறார். இந்த படத்தை சட்டென்று பார்க்கும் எவரும் இதில் உள்ளது ரோபோ என உணர மாட்டார்.

எனினும் எரிகா ரோபோ என்று கண்டுபிடிக்க முடியாதது என்பதல்ல விஷயம். எரிகா எனும் ரோபோவை படம் எடுத்து அனுப்பியிருக்கிறேன் என்று குறிப்பிட்டே புகைப்பட கலைஞர் டம்மி போட்டியில் பங்கேற்று இருக்கிறார். இந்த விஷயம் தெரிந்து விவாதிக்கப்பட்டே நடுவர்களும் இந்த படத்தை அனுமதித்து தேர்வும் செய்துள்ளனர்.

_97673208_taylor_wessing_ppp_2017_0155உருவப்படத்திற்கான போட்டி விதிகளின் படி, வாழ்க்கையில் இருந்து தேர்வு செய்யப்பட்டவர் மற்றும் உயிருடன் போஸ் கொடுத்தவரின் படமாக இருக்க வேண்டும் என தெளிவாக குறிப்பிடப்பட்டுள்ளது. அதன் படி பார்த்தால், ரோபோவை படமெடுத்தது உருவப்படம் கீழ் வராது. ஆனால் இந்த காரணத்தினால் படத்தை தகுதி நீக்கம் செய்யாமல், தேர்வு செய்ய நடுவர்கள் தீர்மானித்துள்ளனர். இது தொடர்பாக விதிகளில் மாற்றம் தேவையா என பின்னர் தீர்மானிக்கபடும் என கூறியுள்ள போட்டி நிர்வாகிகள், ஒரு சில தீவிரமான உருவப்பட சித்திரங்கள், அவற்றின் ரகம் தொடர்பாக வலுவான கேள்விகளை எழுப்பக்கூடியவை எனும் அடிப்படையில் எரிகாவின் தேர்வு அனுமதிக்கப்படுவதாக தெரிவித்துள்ளனர்.

ஒரு ரோபோ புகைப்படம் பரிசுக்குறியதாக தேர்வு செய்யப்பட்டது சுவாரஸ்யமாக இருந்தாலும், புகைப்பட வல்லுனர்கள் இதை கேள்விக்குள்ளாக்கி உள்ளனர். உருவப்படம் என்பது ஜீவன் சார்ந்தது, உயிரில்லாத ஒரு படத்தை எப்படி ஏற்க முடியும் என கேள்வி எழுப்பியுள்ளனர். இந்த படம் அழகாக இருக்கலாம் ஆனால், அதில் ஜீவனோ, உயிரோட்டமோ இல்லையே என விமர்சித்துள்ளனர். எரிகா ஒரு பொம்மை போல் அல்லவா இருக்கிறது, அதன் ஆன்மா எங்கே என்றும் சிலர் கேட்டுள்ளனர்.

இந்த கேள்விகளே அழமான விவாதத்திற்கு வழி வகுத்துள்ளன. ரோபோக்கள் சகஜமாக துவங்கும் சாத்தியம் உள்ள சூழலில், ஆன்மா இல்லை என்பதால் அவற்றை நிராகரிக்க முடியுமா என்பது போன்ற கேள்விகள் எழுகின்றன. அதிலும் செயற்கை நுண்ணறிவு சார்ந்த ஆய்வுகள் தீவிரமடைந்துள்ள நிலையில், பேசும் இயந்திரங்களும், இன்னும் பிறவகை புத்திசாலி இயந்திரங்களும் உருவாக்கப்பட்டு வரும் சூழலில் இயந்திரம் தொடர்பான நம்முடைய புரிதல் எவற்றின் அடிப்படையில் அமைய வேண்டும் எனும் கேள்வி எழுகிறது.

ஒரு சில புகைப்பட கலைஞர்கள் எரிகா சர்ச்சை சார்ந்து இருத்தலியல் தொடர்பான கேள்விகளையும் எழுப்பியுள்ளனர். எது ரோபோ தன்மை, எது மனித தன்மை எனும் கேள்விகளும் இது தொடர்பாக எழுகின்றன.

எரிகாவை படமெடுத்த புகைப்படக்கலைஞர் டம்மி எதிர்பார்த்ததும் இத்தகைய விவாதத்தை தான். ’ மனிதர்களாக இருப்பது என்றால் என்ன? உயிருடன் இருப்பது என்றால் என்ன? என்பது போன்ற கேள்விகளை எழுப்ப முயன்றிருக்கிறேன் என அவர் கூறியிருக்கிறார். இதற்காகவே ஜப்பான் சென்று எரிகாவுடன் அரை மணி நேரம் செலவிட்டு இந்த படத்தை எடுத்துள்ளார்.

புகைப்படக்கலையில் டாக்டர் பட்டம் பெற ஆய்வு செய்து வருபவர் ரோபோக்களை நாம் அணுகும் விதத்தையும் கேள்விக்குள்ளாக்குகிறார். அவர் எழுப்பும் கேள்வியில் உங்களுக்கு உடன்பாடு இருக்கிறதா? உங்கள் பதிலை பதிவு செய்யுங்களேன்.

 

எரிகா தேர்வு புகைப்பட போட்டி செய்தி: http://www.bbc.com/news/in-pictures-41161964

புகைப்பட போட்டி அமைப்பின் இணையதளம்: https://www.npg.org.uk/whatson/twppp-2017/exhibition.php

 

நன்றி; யுவர் ஸ்டோரி தமிழ் இணையதளத்தில் எழுதும் பத்தியிர்ல் இருந்து…

 

பிரபஞ்ச ரகசியமும், காணாமல் போன அணுக்களும்!

cc_Large-scale_structure_of_light_distribution_in_the_universe_16x9பூமி தட்டை என கருதப்பட்டு பின்னர் உருண்டை என கண்டறியப்பட்டது தெரிந்த விஷுயம் தான். இவ்வளவு ஏன், செயற்கைகோள் உதவியால் இப்போது பூமி பந்தை பறவை பார்வையாகவும் பார்க்கலாம். எல்லாம் சரி, இந்த பூமி உருண்டையில், பிறை நில வடிவில் உள்ள பகுதி மட்டுமே கண்ணில் படுகிறது, மற்ற பகுதி எல்லாம் எங்கே போயின என்று தெரியாமல் இருந்தால் எப்படி இருக்கும்.

நல்ல வேளையாக பூமிக்கு இப்படி எல்லாம் எதுவும் ஆகிவிடவில்லை. ஆனால் பிரபஞ்சத்திற்கு இது போன்ற நிலை இருப்பது விஞ்ஞானிகளை வெகுகாலமாக குழப்பிக்கொண்டிருக்கிறது தெரியுமா?

ஆம், பிரபஞ்சத்தில் இருக்க வேண்டிய வஸ்துகளில் பெரும்பகுதி காணாமல் போய்விட்டதாக கருதப்படுகிறது. இவற்றை தான் விஞ்ஞானிகள் ரொம்ப காலமாக தேடிக்கொண்டிருக்கின்றனர். இந்த தேடலில் இப்போது ஒரு ஒளிக்கீற்று தென்பட்டு பிரபஞ்ச புதிர் கொஞ்சம் விடுபடவும் செய்திருப்பதாக இரு ஆய்வுகள் தெரிவிக்கின்றன.

சாமானியர்களுக்கு இது ஆச்சர்யமாக இருக்கலாம். பிரபஞ்சத்தில் தான் நமது சூரிய குடும்பம் இருக்கிறது. சூரிய குடும்பம் தவிர எண்ணற்ற நட்சத்திரங்களும், எர்கற்களும் இன்னும் பிற வஸ்துகளும் இருக்கின்றன. எல்லாம் சேர்ந்து தான் பால்வீதி மண்டலமாக அமைகிறது. பால்வீதி மண்டலம் தவிர லட்சக்கணக்காண மண்டலங்கள் ( கேலக்ஸி) சேர்ந்தது தான் பிரபஞ்சம். அதுவும் விரிவடைந்து கொண்டே இருக்கிறது.

இந்த பிரபஞ்சம் பற்றி நமக்கு தெரிந்த விஷயங்கள் உண்மையிலேயே கையளவு தான். தெரியாதது பிரபஞ்ச அளவு. எனவே பிரபஞ்சம் பற்றிய புரிதலை மேலும் தெளிவாக்கி கொள்வதற்காக விஞ்ஞானிகள் தொடர்ந்து ஆய்வில் ஈடுபட்டு வருகின்றனர். இதன் பயனாக பிரபஞ்சம் எப்படி தோன்றியிருக்கும் என்பதை ஓரளவு துல்லியமாக கணித்திருக்கின்றனர். ஆதியில் ஒரு பெரு வெடிப்பு நிகழ்ந்து அதன் பிறகு அந்த பிரும்மாண்ட நெருப்பு பிழம்பு குளிர்ந்து பிரபஞ்சமாக உருவானதாக கருதப்படுகிறது. இந்த நிகழ்வே பிக் பேங் என குறிப்பிடப்படுகிறது. இந்த பெருவெடிப்புக்கு பின் தான் எல்லாமே தோன்றியது.

பெரு வெடிப்பு நிகழ்வின் தாக்கம் தொடர்பாக விஞ்ஞானிகளிடம் தெளிவான கணக்கு இருக்கிறது. இந்த நிகழ்வுக்கு பின் 20 நிமிடங்களில் எத்தனை ஹைட்ரஜன், ஹீலியம் அணுக்கள் உருவாயின என்றெல்லாம் கணக்கு போட்டு வைத்துள்ளனர். ஆதாரமில்லா அனுமானங்கள் இல்லை; பெருவெடிப்பிற்கு பிந்தைய பாதிப்பான காஸ்மிக் மைக்ரோவேவ் பின்னணி ஒளிர்தல் அடிப்படையிலான ஆதாரபூர்வ கணக்கு.

இந்த கணக்கின்படி பார்த்தால் பிரபஞ்சம், 70 சதவீதம் டார்க் எனர்ஜி எனப்படும் அடர் ஆற்றல் மற்றும் 23 சதவீதம் டார்க் மேட்டர் எனப்படும் அடர் பொருளால் ஆகியிருக்கிறது. எஞ்சிய 4.6 சதவீதமே சாதாரன பொருட்களால் ஆகியிருக்கின்றன. அதாவாது நாமறிந்த பருப்பொருட்கள். பூமி உள்ளிட்ட கோள்களும், நட்சத்திரங்களும், எரிகற்கலும், வால் நட்சத்திரங்களும் இன்னும் பிற வஸ்துகளும் இந்த பிரிவில் தான் வருகின்றன.

நாம் என்னடாவென்றால், பூமி பெரிது, சூரிய மண்டலம் அதனினும் பெரிது, பால்வீதி மண்டலம் இன்னும் பெரிது என்றெல்லாம் நினைத்துக்கொண்டிருந்தால், இத்தனை பெரிய பிரபஞ்சத்தில் கோள்களும், நட்சத்திரங்களும், கேலக்ஸிகளும் வெறும் 5 சதவீதத்திற்கும் குறைவு தான் என்கிறது விஞ்ஞானம். மற்றவை எல்லாம் நம் அறிவுக்கு புலப்படாத அடர் சங்கதிகள்.

இது ஒரு பக்கம் இருக்கட்டும், பிரபஞ்சத்தின் பெரும்பகுதி அடர் ஆற்றல், பொருட்களால் சூழப்பட்டிருக்கும் நிலையில், அவற்றுக்கு மத்தியில் கொஞ்சமாக படர்ந்திருக்கும் 5 சதவீதத்திற்கும் குறைவாக சாதாரண பொருட்கள் இருப்பதாக கருதப்படுவதில் இன்னொரு பெரிய பிரச்சனை இருக்கிறது. இவற்றில் பெரும்பாலானவை எங்கே இருக்கின்றன என்பதே தெரியவில்லை. இது கொஞ்சம் விநோதமானது தான்.

சூரிய மண்டலம்,. நட்சத்திரங்கள் போன்ற வானியல் வஸ்துகள் எல்லாம் அணுக்களால் ஆனவை. இவை எல்லாவற்றையும் கூட்டு கழித்துப்பார்த்தால் கூட, பெருவெடிப்பு கணக்குபடி இருக்க வேண்டிய சாதாரண பொருட்களில் வெறும் 10 சதவீதம் மட்டுமே வருகின்றன. அப்படி என்றால் எஞ்சிய 90 சதவீத சாதாரண பொருட்கள் எங்கே? இதுவே விஞ்ஞானம் பதில் தேடும் கேள்வியாக இருக்கிறது.

இந்த பிரச்சனை விஞ்ஞான உலகில் காணாமல் போன பார்யோனிய சிக்கல் என குறிப்பிடப்படுகிறது. அணுக்கள் சார்ந்த பொருட்கள் பொதுவாக பார்யான் என குறிப்பிடப்படுகிறது. அணுவுக்குள் இருக்கும் புரோடான்கள், நியூட்ரான்கள் உள்ளிட்டவை இதில் அடங்கும். எனினும் எலக்ட்ரான் இதில் சேராது. இது லெப்டான் வகையின் கீழ் வருகிறது. இந்த வேறுபாட்டை விட்டுவிட்டு பார்த்தால், அணுக்கள் சார்ந்த பொருட்களால் உருவான கோள்களும், நட்சத்திரங்களும் 10 சதவீதம் மட்டுமே இருப்பதால், மற்றவை எங்கே, எப்படி இருக்கின்றன எனும் கேள்வி புரியாத புதிராக இருக்கிறது.

இந்த கேள்விக்கு தான் பதிலை இரண்டு விஞ்ஞானிகள் கண்டுபிடித்துள்ளதாக செய்திகள் வெளியாகியுள்ளன. தனித்தனியே மேற்கொள்ளப்பட்ட இரண்டு ஆய்வுகள் மூலம் விஞ்ஞானிகள் காணாமல் போனதாக கருதப்பட்ட அணுக்கள் இருப்பிற்கான மறைமுக ஆதாரங்களை கண்டறிந்துள்ளனர். இன்னும் அங்கீகரிக்கப்படவில்லை எனினும் இந்த ஆய்வுகள் அறிவியல் உலகில் உற்சாகத்தை ஏற்படுத்தியுள்ளன.

காணாமல் போனதாக கருதப்படும் அணுக்கள் இருப்பு தெரிய வந்துள்ளது பிரபஞ்ச ரகசியம் பற்றிய புரிதலில் அடுத்த கட்ட பாய்ச்சலாக அமையலாம் என கருதப்படுகிறது. எல்லாம் சரி, இருக்க வேண்டிய அணுக்கள் இருப்பதை கண்டறிந்து விட்டதாக கூறும் போது, அதை மறைமுக ஆதாரமாக கண்டறிந்ததாக சொல்கின்றனர் என கேட்கலாம்.

மறைந்திருக்கும் அணுக்களை பார்ப்பது என்பது அந்த அளவு கடினமானது என்பதே இந்த கேள்விக்கான பதில். அதுவே இந்த கண்டுபிடிப்பை மேலும் முக்கியமானதாக ஆக்குகிறது.

மொத்தமாக பிரபஞ்சத்தில் இருக்க வேண்டிய அணுக்கள் இல்லை என்பதை அறிந்திருந்த விஞ்ஞானிகள் அவை எங்கே இருக்க கூடும் என்பதையும் அனுமானித்துள்ளனர். பிரபஞ்சம் உண்டான பல லட்சம் கோடி ஆண்டுகளாக ஏற்பட்டு வந்துள்ள வளர்ச்சி, மாற்றத்தின் அடிப்படையில் பிரபஞ்சம் அடர் ஆற்றல் மற்றும் அடர் வஸ்துகளால் நிரம்பியிருக்கிறது. அதன் நடுவே காலெக்ஸிகள் சிதறிக்கிடக்கின்றன. இத்தகைய கேலக்ஸிகள் லட்சக்கணக்கில் இருக்கின்றன. இந்த காலெக்ஸிகள் ஒன்றோடு ஒன்று வாயு இழைகளால் இணைக்கப்பட்டுள்ளன. இந்த வாயு இழைகளில் தான் எஞ்சிய அணுக்கள் இருக்க வேண்டும் என விஞ்ஞானிகள் கருதுகிறது.

அப்படி என்றால் அந்த வாயு இழைகளை ஆய்வு செய்து பார்க்கலாமே என்று கேட்கலாம். பார்க்கலாம் தான், ஆனால் அவை தெரியாது என்பதே விஷயம். கேலக்ஸிகளை பின்னி பிணைத்திருக்கும் இந்த வாயு இழைகள் வார்ம் ஹாட் இண்டர்கிலேஸியேட்டிக் மேட்டர் என சொல்லப்படுகிறது. சுருக்கமாக விம். இவற்றின் வெப்பநிலை பல லட்சம் அளவில் இருக்கிறது. இவற்றில் இருந்து எக்ஸ் கதிர்கள் ஒளிர்ந்தாலும், தொலைநோக்கிகளால் காண முடியாத அளவுக்கு அவை மெல்லியதாக இருப்பதே சிக்கல்.

கொஞ்சம் சக்திவாய்ந்த தொலைநோக்கிகள் மூலம் இவற்றை உத்தேசமாக நோக்கி, 70 சதவீத காணாமல் போன அணுக்களை கூட கணக்கிட்டுவிட்டனர். ஆனால் அப்போது கூட இன்னொரு 30 சதவீதம் இடித்துக்கொண்டிருக்கிறது.

இந்நிலையில் தான் எடின்பர்க் பல்கலை மற்றும் இன்னொரு ஆய்வுக்குழுவினர் இந்த புதிருக்கு விடையை கண்டுபிடித்துள்ளனர்.

கேலக்ஸிக்களுக்கு இடையிலான வாயு இழைகள் பார்க்க முடியாதவையாக இருக்கும் நிலையில், பெருவெடிப்பின் தாக்கமான காஸ்மிக் கதிர் ஒளிர்வை பின்னணியாக கொண்டு இவற்றை நோக்கி அணுக்களின் இருப்பிற்கான ஆதாரங்களை சேகரித்துள்ளனர்.

இதற்கு உதவிய நிகழ்வு சுன்யேவோ ஜெல்டோவிச் (Sunyaev-Zel’dovich (SZ) )  நிகழ்வு என குறிப்பிடப்படுகிறது. அதாவது காஸ்மிக் வலையில் உள்ள ஒளியில் இருக்கும் போட்டான்கள் அணுக்களில் உள்ள எதிர்மறை ஆற்றல் கொண்ட எலக்ட்ரான்கள் சந்திக்கும் போது கூடுதல் ஆற்றல் பெற்று அவற்றின் அலைவரிசை கொஞ்சம் மாறுகிறது. இந்த மாற்றமும் பத்து லட்சத்தில் ஒரு மடங்கு எனும் அளவுக்கு மிகவும் சிறியதானது. எனவே இதை உணர்வதும் சிக்கல் தான்.

ஆனால், விஞ்ஞானிகள் பக்கத்தில் பக்கத்தில் உள்ள லட்சத்திற்கும் மேற்பட்ட கேலக்ஸிகளை ஒன்றிணைத்து அவற்றின் வரைபடம் மூலம் இடையே உள்ள வாய் இழைகளில் இந்த விளைவை கவனித்துள்ளனர். இதன் படி பார்த்தால் சுற்றுப்புற பகுதிகளைவிட வாயு இழைகள் ஆறு மடங்கு அடர்த்தியாக இருக்கிறது. ( இன்னொரு ஆய்வு மூன்று மடங்கு என்கிறது). ஆக, இங்கு தான் காணாமல் போன அணுக்கள் இருப்பது உறுதியாகி உள்ளதாக கருதப்படுகிறது.

இந்த ஆய்வுகள் அறிவியல் உலகால் ஏற்றுக்கொள்ளப்பட்டு விவாதிக்கப்பட்டு மேலும் ஆராயப்பட வேண்டும். அப்போது தான் பிரபஞ்ச ரகசியத்தை அறிவதில் மேலும் ஒரு அடி எடுத்து வைக்கலாம். ஏனெனில் பிரபஞ்சத்தின் பெரும் பகுதியாக இருக்கும் அடர் ஆற்றல் பற்றி நம் அறிவு இன்னமும் சொற்பமாகவே இருக்கிறது.

 

 

இணைப்புகள்

  1. http://www.sciencemag.org/news/2017/10/astronomers-say-they-ve-found-many-universe-s-missing-atoms
  2. https://www.geek.com/science/scientists-find-universes-missing-atoms-1719446/

நன்றி; மின்னம்பலம் இதழில் எழுதியது