All posts by CyberSimman

இண்டெர்நெட் சமூக மாற்றத்திற்கு வித்திடக்கூடிய ஜனநாயக தன்மை கொண்ட தொழில்நுட்பம் என்று சொல்லப்படுவதில் என‌க்கு மிகுந்த நம்பிக்கை உண்டு என்பதால் இண்டெர்நெட்டை எப்படியெல்லாம் பயன்படுத்திகொள்ள முடிகிறது என சுட்டிக்கட்டுவதை எனது கடமையாக‌வே கருதுகிறேன்... மேலும்

தளம் புதிது: கதை எழுதலாம் வாங்க!

writeஎழுதுவதில் ஆர்வம் கொண்ட மாணவர்களுக்கு வழிகாட்டும் வகையில், ’ரைட்டிங் ஸ்பார்க்ஸ்’ இணையதளம் அமைந்துள்ளது. எழுத்து துறைக்கு புதியவர்களுக்கு தேவையான ஊக்கம் மற்றும் வழிகாட்டுதலை அளிக்கும் வகையில் இந்த இணையதளம் அமைந்துள்ளது.

எழுத்தார்வம் மிக்க மாணவர்கள் இந்த தளத்தில் உள்ள, மாணவர்களுக்கான எழுது பகுதியை தேர்வு செய்ய வேண்டும். அதன் பிறகு, கதை, செய்தி,கவிதை மற்றும் கருத்து ஆகிய நான்கு வாய்ப்புகள் தோன்றும். அவற்றில் எது தேவையோ அதை கிளிக் செய்து எழுத துவங்கலாம். செய்தி எனில் அதற்கான பகுதி தோன்றுகிறது. அதில் தலைப்பை டைப் செய்துவிட்டு, செய்தியை எழுத துவங்கலாம். அருகிலேயே செய்தியை உருவாக்குவதற்கான குறிப்புகளையும் எழுதிக்கொள்ளலாம். இதே போலவே கவிதை மற்றும் கதைகளையும் எழுதிப்பழகலாம்.

இதன் இடைமுகமே அழகாக இருப்பதால் கூடுதல் உற்சாகத்தோடு பயன்படுத்தலாம். இதே போலவே ஆசிரியர்கள் மாணவர்களுக்கு, எழுதுவதில் வழிகாட்டுவதற்கான பகுதியும் இருக்கிறது. அதில் மாணவர்களுக்கு தூண்டுதலாக அமையக்கூடிய அறிமுக வாசகங்களை காணலாம்.

நைட்ஜூடீச்சர் எனும் இணைய நிறுவனத்தின் சார்பாக உருவாக்கப்பட்ட இந்த சேவையில் கூடுதலாக பல அம்சங்கள் உள்ளன. பிரத்யேகமாக பள்ளிகளுக்கு என்று உருவாக்கப்பட்டுள்ள இந்த சேவையை முழுமையாக பயன்படுத்த உறுப்பினராக வேண்டும் என்றாலும் இதன் அடிப்படை சேவையை எல்லோரும் பயன்படுத்திப்பார்க்கலாம்.

இணைய முகவரி: https://writingsparks.com/

 

செயலி புதிது: பயண பிரியர்களுக்கான செயலி

பயணங்களுக்கான கையேடுகளை வழங்குவதில் புகழ்பெற்ற லோன்லிபிளானட் நிறுவனம், சுற்றுலா பிரியர்களை கவரும் வகையில் டிரிப்ஸ் எனும் பெயரிலான செயலியை அறிமுகம் செய்துள்ளது. இந்த செயலி மூலம் பயணாளிகள் தங்கள் பயண அனுபவங்களை ஒளிப்படங்களாக பகிர்ந்து கொள்ளலாம்.

இதே போல சக பயணிகள் பகிர்ந்து கொள்ளும் ஒளிப்படங்களையும் பார்த்து ரசிக்கலாம். அவை புதிய இடங்களை கண்டறிவதற்கான எளிய வழியாகவும் அமையும். ஏற்கனவே இன்ஸ்டாகிராம் உள்ளிட்ட செயலிகளில் இது போன்ற வசதி இருந்தாலும், சுற்றுலா பிரியர்களுக்கு இந்த சேவை ஏற்றதாக இருக்கும்.

பயணங்களை திட்டமிடவும் இந்த வசதியை பயன்படுத்திக்கொள்ளலாம். ஒளிப்படங்களை பொதுவிலும் பகிர்ந்து கொள்ளலாம் அல்லது நண்பர்கள் வட்டத்தில் மட்டும் பகிரலாம். தனிப்பட்ட அனுபவங்களோடு, நிறுவனத்தின் வல்லுனர்கள் தகவல்களையும் சேர்த்துக்கொள்ளலாம்.

 

மேலும் தகவல்களுக்கு: http://www.lonelyplanet.com/trips

யூடியூப்பில் வெற்றி பெற 3 வழிகள்!

mqdefaultபீட்டர் மெக்கின்னானை உங்களுக்குத்தெரியுமா? நீங்கள், வீடியோ பகிர்வு இணையதளமான யூடியூப்பில் அடிக்கடி உலா வருபவராக இருந்து, அதிலும் குறிப்பாக புகைப்படக்கலை நுணுக்கங்கள் தொடர்பான வீடியோக்களை ஆர்வத்துடன் பார்த்து ரசிப்பவர் என்றால் மெக்கினானை நிச்சயம் அறிந்திருக்கலாம். இல்லை என்றாலும், மெக்கினானை இப்போது அறிமுகம் செய்து கொள்ளலாம். ஏனெனில், டொரண்டோவைச்சேர்ந்த புகைப்பட கலைஞரான மெக்கினான் யூடியூப்பில் வெற்றிக்கொடி நாட்டியிருக்கிறார். அவரது யூடியூப் சேனலுக்கு 11 லட்சம் சந்தாதாரர்கள் சேர்ந்திருக்கின்றனர். இத்தனைக்கும் அவர் சேனல் துவங்கிய ஓராண்டுக்குள் இந்த ரசிகர்கள் பட்டாளத்தை ஈர்த்திருக்கிறார். தனது சேனலின் மூலம் அவர் விளம்பர வருவாயாக மட்டுமே மாதந்தோறும் 13,000 டாலர்களுக்கு மேல் சம்பாதிக்கிறார் என அறிய முடிகிறது. இதைத்தவிர, ஸ்பான்ஸர்ஷிப், துணை விளம்பரம் உள்ளிட்ட வழிகளிலும் அவர் வருவாய் ஈட்டி வருகிறார்.

இதெல்லாம் எப்படி சாத்தியம்? மெக்கினான் யூடியூப்பில் வெற்றி பெற்ற ரகசியம் என்ன? என்னாலும் அவரைப்போல யூடியூப்பில் கலக்க முடியுமா? இது போன்ற கேள்விகள் உங்கள் மனதில் இருந்தால், 11 நிமிடம் பொறுமையாக இருந்தால் போதும். அதற்காக 11 நிமிடங்கள் காத்திருக்க வேண்டும் என்றில்லை, 11 நிமிடங்கள் ஓடக்கூடிய ஒரு யூடியூப் வீடியோவை பொறுமையாக பார்க்க வேண்டும்.

’பேடி கல்லோவே’ எனும் யூடியூப்வாசி தான் இந்த வீடியோவை உருவாக்கியிருக்கிறார். பாகுபலி போன்ற பிரும்மாண்ட படைப்புகள் பெரும் வெற்றி பெற்று பாக்ஸ் ஆபிசில் வசூலை அள்ளும் போது அவற்றின் வெற்றி ரகசியங்கள் அலசி ஆராயப்படுவது போல, கல்லோவே யூடியூப்பில் மெக்கினான் வெற்றி பெற்ற ரகசியத்தை அலசி ஆராய்ந்து விளக்கும் வகையில் இந்த வீடியோவை உருவாக்கி இருக்கிறார்.

புகைப்பட கலைஞரான மெக்கினான் புதிய யூடியூப் சேனல் துவங்கிய 9 மாதங்களில் 11 லட்சத்திற்கும் மேற்பட்ட சந்தாதாரர்களை பெற முடிந்ததற்கான காரணங்களை அழகாக விளக்கும் இந்த வீடியோ மூலம் அவரது வெற்றி ரகசியத்தை அறிந்து கொள்வதோடு, யூடியூப்பில் வெற்றி பெற என்ன தேவை என்பதையும் தெரிந்து கொள்ளலாம்.

புகைப்பட கலைஞர் மற்றும் இயக்குனரான மெக்கின்னான் புகைப்பட கலை தொடர்பாக தான் அறிந்த நுணுக்கங்களை வீடியோக்களாக யூடியூப்பில் பகிர்ந்து வருகிறார். இதற்கென தனது பெயரிலேயே யூடியூப் சேனலையும் அமைத்திருக்கிறார். இந்த சேனலுக்கு தான் அமோக ஆதரவு கிடைத்திருக்கிறது. யூடியூப்பில் தடுக்கி விழுந்தால் புகைப்படக்கலை தொடர்பான வீடியோக்களையும், போட்டோஷாப் நுணுக்கங்களை கற்றுத்தரும் வீடியோக்களையும் பார்க்கலாம். புகைப்படக்கலை நுணுக்கங்களை கற்றுக்கொள்ளும் ஆர்வம் உள்ளவர்களால் இந்த வீடியோக்கள் பல்லாயிரக்கணக்கான முறை பார்த்து ரசிக்கப்படுகின்றன.

ஆனால் இவற்றுக்கு மத்தியில் பத்தோடு பதின்னொன்னாக காணாமல் போய்விடாமல், மெக்கின்னான் சேனல் மட்டும் தனித்து நிற்க என்ன காரணம்? இந்த கேள்விக்கான பதிலை தான், 11 நிமிட வீடியோவில் சுவையாக முன்வைக்கிறார் கல்லோவே.

மெக்கின்னான் வழக்கமான வீடீயோ வலைப்பதிவாளராக தான் துவங்கியிருக்கிறார். அதாவது வீடியோக்களை உருவாக்கி யூடியூப்பில் பதிவேற்றியிருக்கிறார். புகைப்படக்கலை நுணுக்கங்களை எளிய முறையில் விளக்கும் இந்த வீடியோக்களுக்கு ஓரளவு வரவேற்பு இருந்தாலும் அவர் எதிர்பார்த்த ஆதரவு குவியவில்லை. இதன் பிறகே மெக்கின்னான் தனது வீடியோக்களில் முக்கிய மாற்றத்தை செய்ததாகவும் அதன் பலனாகவே அவரது வீடியோக்கள் மிகப்பெரிய அளவில் ஹிட்டாகி புதிய பார்வையாளர்களை ஈர்த்ததுடன் அவர்களில் பெரும்பாலானோரை சந்தாதாராகவும் ஆக்கியிருக்கிறது.

இந்த மாற்றத்திற்கு பின் அவரது வீடியோக்களில் மூன்று முக்கிய அம்சங்கள் இருப்பதாக கல்லோவே சுட்டிக்காட்டுகிறார்.

ஆரம்ப கவனத்தை ஈர்க்கும் வகையில் வீடியோக்கள் இருப்பது தான் முதல் அம்சம் என்கிறார் அவர். இரண்டாவது அம்சம் தரமான உள்ளடக்கத்தை அளிப்பது என்றால் மூன்றாவது அம்சம் ரசிகர்களுடன் உறவை வளர்த்துக்கொள்வது என்கிறார். இந்த மூன்று அம்சங்களுக்கும் மெக்கின்னான் வீடியோக்களில் இருந்தே உதாரணம் காட்டி விளக்கியிருக்கிறார்.

’ஆரம்ப கவனத்தை ஈர்க்க வேண்டும்’ எனும் முதல் அம்சத்தையே எடுத்துக்கொள்வோம். முதலில் மெக்கின்னான் பொதுவான தலைப்புகளில் தான் வீடியோக்களை உருவாக்கியிருக்கிறார். ஆனால், பின்னர் அவற்றின் தலைப்பையே ஈர்ப்பு மிக்கதாக மாற்றிவிட்டார். உதாரணமாக ’90 நொடிகளில் கற்றுக்கொள்ளக்கூடிய 8 புகைப்படக்கலை நுணுக்கங்கள்’  எனும் தலைப்பில் உருவாக்கிய வீடியோ தான் அவருக்கு முதல் ஹிட்டாக அமைந்துள்ளது. இந்த தலைப்பே கவர்ந்திழுக்கிறது அல்லவா? இதை தான் ரசிகர்கள் கவனத்தை ஈர்க்கும் உத்தி என்கிறார் கல்லோவே. கவனத்தை ஈர்ப்பதோடு கிளிக் செய்யும் வகையில் மற்றும் மற்றவர்களுடன் பகிரும் வகையில் இவை அமைந்துள்ளன. அது மட்டும் அல்ல, அவரது வீடியோவின் அறிமுகமும் அவற்றில் இருந்து என்ன எதிர்பார்க்கலாம் என்பதை எடுத்த எடுப்பில் புரிய வைத்துவிடும் வகையில் கச்சிதமாக அமைந்துள்ளன என்கிறார். 15 நொடியில் வீடியோவை அறிமுகம் செய்து ரசிகர்கள் மத்தியில் எதிர்பார்ப்பையும் ஏற்படுத்தி விடுகிறார்.

இப்படி ரசிகர்களை உள்ளே வர வைத்தால் மட்டும் போதாது, அவர்களை கவரக்கூடிய உள்ளடக்கமும் இருக்க வேண்டும். மெக்கின்னானை பொருத்தவரை ரசிகர்களுக்கு புதிய நுணுக்கங்களை எளிமையான முறையில் கற்றுத்தரும் வீடியோக்களை உருவாக்குகிறார். இந்த தரத்திற்காக தான் பார்வையாளர்கள் அவரது ரசிகர்களாக மாறுகின்றனர். அது மட்டும் அல்ல, அவர் தனது வீடியோவை ஏனோதானோவென்றெல்லாம் உருவாக்குவதில்லை. துல்லியமான தரத்தில், நேர்த்தியான ஒளி அமைப்புடன் கச்சிதமாக உருவாக்குகிறார். இந்த தரம் ரசிகர்களை கட்டிப்போடுகிறது. புதிய நுணுக்கங்களை கற்றுத்தருவதாலும், அவற்றை மிகவும் விளக்கமாகவும் செய்வதாலும் பார்வையாளர்கள் உளவியல் நோக்கில் அவருக்கு கடமைப்பட்டவர்கள் போல உணர்கின்றனர். அதன் காரணமாகவே அந்த வீடியோவை மட்டும் பார்த்துவிட்டு வெளியேறமால், சந்ததாராராகி விடுகின்றனர்.

கொஞ்சம் மெனக்கெட்டால் தர்மான வீடியோக்களை உருவாக்கிவிடலாம் தான். ஆனால் மெக்கின்னான் இத்துடன் நின்றுவிடவில்லை. ஒவ்வொரு வீடியோவிலும் ரசிகர்களுடன் தொடர்பு கொள்ள முயன்று அவர்களுடன் ஒரு பிணைப்பை ஏற்படுத்திக்கொள்கிறார். வெறும் புகைப்படக்கலை நுணுக்கங்கள் பற்றி மட்டும் பேசிக்கொண்டிருக்காமல் தன்னைப்பற்றி தனிப்பட்ட விஷயங்களையும் பகிர்ந்து கொண்டு அதன் மூலம் வாடிக்கையாளர்களுடன் உரையாடுகிறார். உதாரணத்திற்கு ஒரு வீடியோவில் அப்பாக்கள் பற்றி பேசி தானும் ஒரு தந்தை தான் என்று பேசுகிறார். இந்த தனிப்பட்ட தன்மையே ரசிகர்களுடன் உறவை ஏற்படுத்திக்கொள்ள வழி செய்கிறது என்கிறார் கல்லோவே. ரசிகர்களுக்கு நல்ல விதமாக வரவேற்பு கூறுவது, நகைச்சுவையாக பேசுவது மற்றும் தனிப்பட்ட தகவலை பகிர்வது மூலம் இதை அவர் சிறப்பாக செய்வதையும் சுட்டிக்காட்டுகிறார்.

ரசிகர்களுடன் தனிப்பட்ட முறையில் தொடர்பு கொள்ள தயாராக இருக்கும் அம்சமே ஒரு சில மாதங்களில் அவருக்கான சந்தாதாரர்கள் அதிகரிக்க முக்கிய காரணமாக இருக்கிறது என்றும் அவர் குறிப்பிடுகிறார்.

யூடியூப்பிலேயே முழுநேரமாக ஈடுபட்டு வரும் யூடியூப்வாசிகள் பலர் இருக்கின்றனர். இவர்களில் பலர் பெரிய அளவில் வெற்றியும் பெற்றுள்ளனர். ஆனால் இவர்களின் வெற்றி ரகசியம் இதுவரை இந்த அளவுக்கு நுணுக்கமாக அலசி ஆராயப்படவில்லை என்று சொல்லும் வகையில், கல்லோவே தனது மாஸ்டர்கிளாஸ் வீடியோ வரிசையில் மெக்கின்னான் வெற்றியின் பின்னணியை விவரித்திருக்கிறார்.

யூடியூப்பில் வெற்றி பெற வேண்டும் எனும் எண்ணம் உள்ளவர்கள் அவர் சுட்டிக்காட்டும் மூன்று வழிகளையும் முயன்று பார்க்கலாம்.

வீடியோ விளக்கம்: https://www.youtube.com/channel/UClga3ybuyyjpvqsh-cf3DvQ

 

இணையத்தில் நல்லெண்ணத்தை பரப்பும் பேராசிரியர்

sஇணையத்தின் மீது நம்பிக்கை கொண்டவர்கள் தென்கொரிய பேராசிரியர் மின் யங் சுல் பற்றியும் அவரது ’முழு ஒளி’ இயக்கம் பற்றியும் தெரிந்து கொள்ள வேண்டும். இணையத்தின் எதிர்மறை தன்மையால் அதன் மீது அவம்பிக்கை கொண்டவர்களும் இந்த பேராசிரியரை அவசியம் அறிமுகம் செய்து கொள்ள வேண்டும்.

ஏனெனில் இந்த பேராசிரியரின் முழு ஒளி இயக்கம், , இணையத்தின் மிகப்பெரிய பிரச்சனைக்கு தீர்வு காணும் வகையில் அமைந்திருக்கிறது என்பது தான். இந்த இயக்கம் பற்றி அறிந்து கொண்டால் நிச்சயம் பேராசிரியரை பாராட்டவும் தோன்றும், அவர் செய்வதை பின்பற்றி நடக்கவும் தோன்றும். இந்த ஊக்கமே அவரை கவனிக்க வைக்கிறது.

இணையத்தில் நல்ல விஷயங்கள் கொட்டிக்கிடக்கின்றன. கூட்ட நிதி திரட்டுதல் முதல் கூட்டு முயற்சிகள் வரை எண்ணற்ற செயல்களுக்கு இணையத்தை பயன்படுத்தலாம். இணையம் மூலம் மாற்றங்களை கொண்டு வரலாம், புதிய பாதை காட்டலாம். ஆனால் இணைய பயன்பாட்டிற்கு இன்னொரு பக்கமும் இருக்கிறது. இது எதிர்முறையான செயல்களையும் கொண்டிருக்கிறது. அதிலும் குறிப்பாக இணையத்தில் அவதூறு பரப்புவதும், காரணமே இல்லாமல் வசைபாடி வெறுப்பை உமிழ்வதும் வெகு சுலபம்.

இதை பின்னூட்ட  வடிவில் செய்யலாம். நேரடி தாக்குதலாகவும் நடத்தலாம். விவாதங்களில் ஊடுருவி அதன் மைய பொருளையே பாழாக்கலாம். இன்னும் பலவிதங்களில் நிகழும் இந்த பாதிப்பு பிரச்சனை பொதுவாக ’டிரால்ஸ்’ என குறிப்பிடப்படுகிறது. அதாவது இணையத்தில் ஒருவரை பின் தொடர்ந்து எதிர்மறையான கருத்துக்களை கூறி வெறுப்பேற்றுவது. சைபர் சீண்டிவிடுதல் என்றும் இதை புரிந்து கொள்ளலாம்.

பேஸ்புக்கில் துவங்கி, டிவிட்டர், வாட்ஸ் அப், விவாத தளங்கள், செய்தி தளங்கள் என எல்லாவற்றிலும் இவற்றை பார்க்கலாம். அரத்தமுள்ள கருத்துக்களுக்கு நடுவே எதிர்மறை கருத்துக்கள் தோன்றும். இவை வெற்று கேலியாக இருக்கலாம். ஆவேசம் கொண்ட தாக்குதலாகவும் இருக்கலாம். துவேஷ நஞ்சை கக்கலாம். இணைய சாமானியர்கள் முதல் நட்சத்திரங்கள் வரை பலரும் இந்த தாக்குதலுக்கு இலக்காகுகின்றனர். பலர் இணையத்தில் இப்படியும் உண்டு என புறந்தள்ளி சென்றுவிடுகின்றனர். இன்னும் சிலர் வேதனைக்கு இலக்காகி இணையமே வேண்டாம் என விலகி விடுவதும் உண்டு. விபரீதமான சில தருணங்களில் தாக்குதலுக்கு இலக்கானவர்கள் தற்கொலை போன்ற தீய முடிவுகளுக்கும் வந்துவிடுவதுண்டு.

இணையம் இந்த பிரச்சனையை அறியாமல் இல்லை. இதை கட்டுப்படுத்தவும் இணையத்தில் பலர் முயன்று வருகின்றனர். இந்த வரிசையில் தான் கொரிய பேராசிரியரும் வருகிறார். ஆச்சர்யப்படும் வகையில் பத்தாண்டுகளுக்கும் மேலாக இந்த முயற்சியில் அவர் ஈடுபட்டிருக்கிறார். இந்த முன்னோடி பற்றி தற்செயலாகவே அறிந்து கொள்ள முடிந்தது. இணைய கலாச்சாரம் தொடர்பாக தேடிக்கொண்டிருந்த போது, சைபர்வெளியில் நல்லெண்ணத்தை பரப்பும் கொரிய பேராசிரியர் எனும் செய்தி தலைப்பு கவனத்தை ஈர்தத்து. ஸ்டார்2 எனும் தளத்தில் வெளியாகி இருந்த அந்த செய்தியை கிளிக் செய்து படித்துப்பார்த்தால், கொரிய பேராசிரியரின் முயற்சி வியக்க வைப்பதாக இருக்கிறது.

பேராசிரியர் மின், இணையத்தில் நல்லெண்ண கருத்துக்களை பரவச்செய்து வருகிறார். அதாவது இணையத்தில் வெளியாகும் எதிர்மறையான கருத்துக்களுக்கு பதிலடி கொடுக்கும் வகையில் நல்லவிதமான கருத்துக்களை பதிவு செய்ய ஊக்குவித்து வருகிறார். இதற்காக என்றே ’முழுஒளி’ இணைய இயக்கத்தையும் துவக்கி நடத்தி வருகிறார்.

கொரியாவில் உள்ள பள்ளி மாணவர்கள் மற்றும் இணையவாசிகள் நல்லெண்ண கருத்துக்களை இணையத்தில் வெளியிடுவதை அவரது இயக்கம் ஊக்குவித்து வருகிறது. அதிலும் குறிப்பாக இணையத்தில் தாக்குதலுக்கும், துவேஷத்திற்கும் இலக்காகின்றனர்களுக்கு ஆறுதல் அளிக்கும் வகையில் நல்லவிதமான கருத்துக்களை வெளியிட ஊக்குவித்து வருகிறது. இதற்காக பள்ளி அளவில் திட்டங்கள் செயல்படுத்தப்பட்டு வருகின்றன. கொரிய அளவில் மட்டும் அல்லாமல் மற்ற நாடுகளிலும் இந்த முறை பிரபலமாகி வருகிறது.

இந்த இயக்கத்தின் பயனாக, இதுவரை 72 லட்சத்திற்கும் மேலான நல்லெண்ண கருத்துக்கள் இதன் உறுப்பினர்களால் பதிவு செய்யப்பட்டுள்ளதாக இயக்க இணையதளத்தில் தெரிவிக்கப்பட்டுள்ளது. எண்ணிக்கை பெரிய விஷயமல்ல. ஆனால் இந்த செயலின் பின்னே உள்ள நோக்கம் பெரியது.

விஷமிகள் இணையத்தில் போகிற போக்கில் மோசமான கருத்துக்களை பதிவு செய்து விட்டுச்செல்கின்றனர். இந்த கருத்துக்கள் ஆறாத வடுக்களை ஏற்படுத்துவதும் உண்டு. அதைவிட மோசமான முடிவுக்கும் கொண்டு செல்வதுண்டு. சில ஆண்டுகளுக்கு முன் சீனாவில் நடைபெற்ற சம்பவம் ஒன்று இதற்கான உதாரணம். விவாத தளம் ஒன்றில் ‘ நான் உயிரை மாய்த்துக்கொள்ள வேண்டுமா? என ஒருவர் கேட்டிருக்கிறார். காதலியுடனான மன முறிவு தந்த சோகத்தில் இருந்த அந்த வாலிபர் கேட்ட கேள்விக்கு, ஆம் என்று ஒருவர் பதில் சொல்லி இருந்தார். இன்னொருவர், நீங்கள் இறப்பதற்கு முன் ஐபோனை கொடுத்து விட்டு செல்லவும் என கூறியிருந்தார். இப்படி நீண்ட கருத்துக்களின் விளையாக அந்த இளைஞர் இறுதியில் தற்கொலை செய்து கொண்டார்.

இது போல எண்ணற்ற வேதனையான உதாரணங்கள் இருக்கின்றன. கொரியாவிலும் நட்சத்திரம் ஒருவர் இணைய பின்னூட்ட தாக்குதலால் மனம் உடைந்து தற்கொலை செய்து கொண்டதை அறிந்த போது பேராசிரியர் மின், இணையத்தில் வெளியாகும் எதிர்மறை கருத்துக்களை சமன் செய்ய ஏதாவது செய்ய வேண்டியது அவசியம் என நினைத்தார். தலைநலர் சியோலில் உள்ள சுன்காங் எனும் பல்கலைக்கழகத்தில் பணியாற்றிக்கொண்டிருந்தவர், பல்வேறு இணையதளங்களில் நட்சத்திரங்களின் பக்கத்தில் நல்ல விதமான கருத்துக்களை பதிவு செய்ய வேண்டும் என தனது மாணவர்களுக்கு வீட்டுப்பாடம் கொடுத்தார். மாணவர்களும் ஆயிரக்கணக்கில் நல்லெண்ன கருத்துக்களை பதிவு செய்தனர்.

இந்த முயற்சி பற்றி நாளிதழ் ஒன்றில் செய்தி வெளியாகி அதற்கு நல்ல வரவேற்பும் கிடைத்தது. இதனால் ஊக்கம் பெற்ற பேராசிரியர் இந்த செயலை தொடர்வதற்காக சன்புல் இயக்கத்தை துவக்கினார். கொரிய மொழியில் முழு ஒளி என்று பொருள்.

இந்த இயக்கத்தின் மூலம், உறுப்பினர்கள் இணையத்தில் நல்லவிதமான கருத்துக்களை வெளியிட ஊக்குவித்து வருகிறார். இதன் உறுப்பினர்கள் இணையத்தில் உலாவி, வெறுப்பை உமிழும் கருத்துக்கள் வெளியாகி இருக்கும் இடங்களில் அதற்கு பதிலடி கொடுக்கும் வகையில் நல்ல கருத்துக்களை பகிர்ந்து வருகின்றனர். ஒவ்வொரு சூழலுக்கும் ஏற்ப பொருத்தமான கருத்துக்களை வெளியிடுகின்றனர்.

பூகம்பம் பாதிப்பு, தீவிரவாத தாக்குதல் போன்ற சம்பங்களால் பாதிக்கப்பட்டவர்களுக்கு ஆறுதல் அளிக்கும் வகையிலும் நல்லெண்ண கருத்துக்களை வெளியிட்டு வருகின்றனர். இப்படி நல்லெண்ண கருத்துக்களை பரவச்செய்ய முயன்று வருவதோடு, அண்மையில் சமூக ஊடக மனித உரிமைகள் குழுவையும் அவர் துவக்கியிருக்கிறார். இந்தக்குழு இணைய தாக்குதலால் பாதிக்கப்பட்டவர்களுக்கு ஆலோசனை மற்றும் சட்ட உதவியை வழங்கி வருகிறது.

மோசமான கருத்துக்கள் எந்த வகையான தாக்கத்தை ஏற்படுத்தகூடியது என்பது நமக்கு தெரிந்தது தான். ஆனால் நல்லவிதமான கருத்துகளை பதிவு செய்வதன் மூலம், எல்லோரும் நமக்கு எதிரானவர்கள் அல்ல, ஆதரவான குரல்களும் உள்ளன என்பதை பாதிக்கப்பட்டவர்களுக்கு உணர்த்த முடியும். அதை தான் முழு ஒளி இயக்கம் ஊக்குவித்து வருகிறது.

அது மட்டும் அல்ல, நல்லவிதமான கருத்துகள் தெரிவிக்கப்பட்டிருப்பது மற்றவர்கள் எதிர்மறையான கருத்துகளை வெளியிடுவதையும் தவிர்க்க உதவலாம். இத்தகைய கருத்துகள் இணைய சீண்டலில் ஈடுபடும் எண்ணம் கொண்டவர்கள் மனதிலும் மாற்றத்தை ஏற்படுத்தலாம்.

இணையத்தில் நல்லெண்ணத்தை விதைப்போம்!

முழுஒளி இயக்க இணையதளம்: http://sun-full.org/index.htm#&panel1-2

 

-=

 

 

 

 

மன அழுத்தம் போக்கும் இணையதளங்கள்

நவீன உலகில் மன அழுத்தம் யாருக்கு தான் இல்லை சொல்லுங்கள். இதற்கான காரணங்கள் வேண்டுமானால் வேறுபடலாமேத்தவிர எல்லோருக்கும் மன அழுத்தம் உண்டு. அது போலவே மன அழுத்தத்தின் அளவும், தாக்கமும் வேறுபடலாம். எப்படி இருந்தாலும் ஸ்டிரெஸ் என சொல்லப்படும் மன அழுத்தம் ஒரு பிரச்சனை தான். அளவுக்கு அதிகமாக இருந்தால் இது ஆரோக்கியத்தை பாதிக்கும். இல்லை எனில் மனநிலையை பாதிக்கும். பல நேரங்களில் செயல்திறனிலும் தாக்கம் செலுத்தலாம்.

இவ்வளவு ஏன், இருக்கும் பிரச்சனைகள் போதாது என்று இணைய பயன்பாடே கூட மன அழுதத்திற்கு காரணமாக அமைந்துவிடலாம். இணையத்தில் சமூக ஊடக தளங்களில் அதிக நேரத்தை செலவிடுவது அல்லது அதில் தெரிவிக்கப்படும் வில்லங்க, துவேஷ கருத்துக்களின் தாக்கத்தால் துவண்டு போவது என பல காரணங்களினால் இணைய பழக்கமும் மன அழுத்தத்திற்கு வழி வகுக்கலாம்.

இணையமும் மன அழுதத்திற்கு வித்திடலாம் என்பது மட்டும் அல்ல, அதிலிருந்து விடுபடவும் உதவும் என்பதே கவனிக்க வேண்டிய விஷயம். ஆம், மன அழுத்த பாதிப்பில் இருந்து விடுபட உதவுவதற்கு என்றே பிரத்யேகமான இணைய சேவைகள் இருக்கின்றன. அவற்றில் சிலவற்றை பார்க்கலாம்:

மூச்சுப்பயிற்சி

நெருக்கடியான மன நிலையில் இருக்கும் போது மூச்சை இழுத்துவிட்டு மனதை நிலைப்படுத்திக்கொள்ள முயற்சிப்பது பலரும் செய்வது தான். இதையே முறையாக மூச்சுப்பயிற்சியாகவும் செய்தால் மனம் லேசாகிவிடும். ஆழமாக மூச்சை இழுத்து சுவாசித்து அதே போல ஆழமாக வெளியே விடுவது சிறந்த பயிற்சியாகும். இதை செய்வதற்கான வழிகாட்டுதலோ அல்லது ஊக்கமோ தேவை எனில், எக்ஸ்ஹேலர் தளத்தை நாடலாம்.

இந்த தளத்தில் நுழைந்ததுமே ஒன்றுக்குள் ஒன்றாக தோன்றும் இரண்டு வளையங்களை காணலாம். உள்ளே இருக்கும் வளையம் சுருங்கி விரிவடைந்து கொண்டே இருக்கும். அது தான் மூச்சை உள்ளே இழுப்பதற்கும், வெளியே விடுவதற்குமான வழிகாட்டுதல். இந்த வளையத்தை பார்த்தபடி மூச்சை இழுத்து வெளியே விட்டால், சுவாரஸ்யமான முறையில் மூச்சுப்பயிற்சியை மேற்கொள்ளலாம்.

மூச்சை இழுத்து விடுவதற்கான கால அளவை மாற்றிக்கொள்ளும் வசதியும் இருக்கிறது. பின்னணி வண்ணத்தை மாற்றுவது, ஆடியோவை ஒலிக்கச்செய்வது போன்ற வசதிகளும் உள்ளன. யோகா அல்லது தியானத்துடன் இணைந்து மேற்கொள்ளலாம். பிராணயம வழிகாட்டி வசதியும் இருக்கிறது.

இணைய முகவரி: http://xhalr.com/

அரட்டை ஆசுவாசம்

மன நிலை மோசமாக இருக்கும் போது நல்ல நண்பர்களிடம் மனம் விட்டு பேசினாலே பாரம் குறைந்தது போல உணரலாம். ஆனால் அப்படி கேட்க ஒருவரும் இல்லை என்று வருந்துகிறீர்களா? கவலையே வேண்டாம், 247 பட்டி இணையதளத்தில் உங்கள் மனதில் உள்ளதை எல்லாம் கொட்டி விடலாம். இந்த தளத்தில் இணையத்தில் உள்ள யாரோ ஒரு முகம் தெரியாத நபருடன் அரட்டை அடித்து உங்கள் மனக்குறைகளை எல்லாம் தெரிவிக்கலாம். உங்களைப்பற்றிய அடையாளத்தை வெளியிட வேண்டாம். இந்த தளத்தில் உறுப்பினராக பதிவு செய்து கொள்ளவும் அவசியம் இல்லை. நீங்கள் விரும்பினால், யாரோ ஒருவரின் மனக்குறைகளை கேட்கும் முகம் தெரியாத நபராகவும் இருக்கலாம். அதாவது நீங்கள் மற்றவர்கள் சொல்வதை கேட்டு பதில் அளிக்கலாம்.

இணைய முகவரி: http://xhalr.com/http://xhalr.com/

ஆன்லைன் சிகிச்சை

ரிலாக்ஸ் ஆன்லைன் தளத்தின் ஸ்டிரெஸ் அனலிஸ்ட் சேவை, உங்களின் மன அழுத்தத்திற்கான காரணங்களை அலசி ஆராய்ந்து அதற்கான தீர்வுகளை சொல்கிறது. இதில் கேட்கப்படும் கேள்விகளுக்கு வரிசையாக பதில் அளித்து ஆய்வு என்ன சொல்கிறது என கவனிக்கலாம். மன அழுத்தம் இல்லாதவர்கள் கூட, இதில் வழிபோக்கர்கள் போல பங்கேற்று கேள்விகளுக்கு பதில் அளிக்கலாம். இவை ஆய்வு நோக்கில் பயன்படுத்திக்கொள்ளப்படும். தனிப்பட்ட விவரங்களை எதையும் இந்த தளத்தில் சமர்பிக்க வேண்டாம்.

இணைய முகவரி: http://www.relaxonline.me.uk/sa1/index.html

அமைதியைத்தேடி

பரபரப்பான வாழ்க்கைக்கு நடுவே கொஞ்சம் அமைதி தேவைப்படுகிறதா/ தி குவைட் பிளேஸ் இணையதளம் அதை வழங்குகிறது. இந்த தளத்தில் மூன்று விதமான வாய்ப்புகள் உள்ளன. முதல் வாய்ப்பில் கம்ப்யூட்டர் ஸ்பேஸ் பார் மூலம் மட்டுமே தொடர்பு கொள்ள வேண்டும். பேஸ்புக் நோட்டிபிகேஷன் போன்ற இடைஞ்சல்கள் எல்லாம் இல்லாமல் 30 நொடிகளை இங்கே செலவிடலாம். இதே போல 90 நொடி அமைதி பயிற்சியையும் தேர்வு செய்யலாம். இல்லை எனில் எழுதும் அறைக்குள் நுழைந்து மனதில் உள்ள எண்ணங்களை எழுதி வைக்கலாம். : http://thequietplaceproject.com/thequietplace

இதே போலவே பிகசல் தாட்ஸ் எனும் இணையதளமும் இருக்கிறது: இந்த தளத்தில் மனதில் உள்ள பாரமான எண்ணங்களை விண்ணில் வீசி விட்டு 60 நொடிகள் தியானம் செய்யலாம்: http://www.pixelthoughts.co/

அமைதி வீடியோ

மன அழுத்தம் என்பது பெரியவர்களுக்கு மட்டும் தான? சிறார்களுடம் கூட பல காரணங்களினால் மன அழுத்தம் பெறலாம். சிறார்கள் மன அழுதத்த்தில் இருந்து விடுபடும் வகையில் வீடியோக்களை வழங்குகிறது கோஜென் இணையதளம். இமெயில் முகவரியை சமர்பித்து இந்த தளத்தை பயன்படுத்தலாம். சிறார்கள் ஆரோக்கியமான முறையைல் இந்த சிக்கலை எதிர்கொள்ள வழி செய்வதாக இந்த தளம் தெரிவிக்கிறது.

இணைய முகவரி: https://www.gozen.com/

இந்த தளங்கள் தவிர அருமையான யூடியூப் வீடியோ ஒன்றும் இருக்கிறது. அயர்லாந்து நாட்டில் உள்ள அதிகம் அறியப்படாத வனப்பகுதியில் பாலத்தின் அடியில் பாய்ந்தோடும் அருவி காட்சியாக இந்த வீடியோ அமைந்துள்ளது. மணிக்கணக்கில் நீளும் இந்த வீடியோவில், அருவியின் சளசளப்பையும், இயற்கையின் கண் கொள்ள காட்சிகளையும், ரம்மியத்தையும், நீங்கள் விரும்பிய நேரத்திற்கு பார்த்து ரசித்து மனதை பறிகொடுக்கலாம். இதுவரை லட்சக்கணக்கானோர் இந்த வீடியோவில் லயித்திருக்கின்றனர். தூக்கம் வராமல் தவித்தவர்கள் எல்லாம் இந்த வீடியோவை பார்த்து மன அமைதி பெற்றதாக தெரிவித்துள்ளனர் என்றால் பார்த்துக்கொள்ளுங்கள்.

வீடியோவைக்காண: https://youtu.be/eKFTSSKCzWA

இணையம் அறிவோம்; இணையம் காப்போம்

 

’நெட் நியூட்ராலிட்டி’ எனப்படும் ’இணைய சமநிலை’ தொடர்பான விவாதம் மீண்டும் கவனத்தை ஈர்த்துள்ளது. அண்மையில் இந்திய தொலை தொடர்பு ஒழுங்குமுறை ஆணையமான டிராய் வெளியிட்ட பரிந்துரைகள் அடிப்படையில் இணைய சமநிலைக்கு ஆதாரவாக அமைந்துள்ளன. இது இணைய சமநிலை ஆர்வலர்களையும், இணைய சுதந்திர ஆதாரவாளர்களையும் மகிழ்ச்சியில் ஆழ்த்தியுள்ளது.

இணைய சமநிலை தொடர்பான பரிந்துரைகளை நவம்பர் 28 ம் தேதி டிராய் வெளியிட்டது. இணைய சேவை வழங்கும் ஐ.எஸ்.பி நிறுவனங்கள் எந்த வகையான உள்ளடக்கத்திற்கும் (சேவை) இடையே பாரபட்சம் காட்டக்கூடாது என்பதும், இத்தகைய விளைவை ஏற்படுத்தக்கூடிய வகையில் அவை யாருடனும் எந்த ஒப்பந்தமும் செய்து கொள்ளக்கூடாது என்பதும் பரிந்துரைகளின் முக்கிய அம்சமாக அமைகின்றன. சாமானியர்களின் நோக்கில் பார்த்தால், இதன் பொருள் இணைய சேவை நிறுவனங்கள் எந்த ஒரு குறிப்பிட்ட இணையதளத்தை வேகத்தை அதிகரிக்கவோ, குறைக்கவோ முடியாது. எல்லா வகையான இணைதளங்களையும், சேவைகளையும் அவை ஒன்றாகவே கருத வேண்டும். எனவே இணையவாசிகள் ஏற்கனவே உள்ளது போலவே எந்த மாறுதலும் இல்லாமல் இணைத்தை அணுகலாம்.

டிராயின் இந்த பரிந்துரைகள் மிகவும் ஆவலுடன் எதிர்பார்க்கப்பட்டன. கடந்த ஒன்னரை ஆண்டுகளுக்கு மேலாக இணைய சமநிலை தொடர்பான பல்வேறு தரப்பினரின் கருத்துக்களை பரிசீலித்து வந்த டிராய், இது தொடர்பான தனது பரிந்துரைகளை வெளியிட்டுள்ளது. இவை இணைய சமநிலைக்கு ஆதரவாக அமைந்திருப்பது ஒரு விதத்தில் இணையவாசிகளுக்கும், இணைய சமநிலை ஆதாரவாளர்களுக்கும் கிடைத்த வெற்றி என்றே சொல்ல வேண்டும். கடந்த இரண்டு ஆண்டுகளுக்கு முன், நாடு தழுவிய அளவில் வெடித்த இணைய சமநிலை போராட்டம் நினைவிருக்கலாம். அப்போது டிராய், ஓவர் தி டாப் சேவைகள் என சொல்லப்படும் வாட்ஸ் அப் , ஸ்கைப் போன்ற சேவைகள் குறித்து, பொதுமக்களிடம் இருந்து கருத்து கேட்கும் வகையில் வெளியிட்டிருந்த அறிக்கையில் இணைய சமநிலைக்கு பாதகமான விஷயங்கள் இருந்தன.

இணைய போராட்டம்

இதனையடுத்து இணைய சுதந்திரத்தை காக்கும் நோக்கத்தோடு இணையவாசிகள் திரண்டனர். இணைய சமநிலைக்கு ஆதாரவான இணையதளங்கள் அமைக்கப்பட்டு, இதை வலியுறுத்தும் வகையில் மெயில்கள் லட்சக்கணக்கில் அனுப்பி வைக்கப்பட்டன. இதன் பயனாக குறிப்பிட்ட சேவைகளை இலவசமாக வழங்க முற்பட்ட ஏர்டெல் ஜீரோ போன்ற சர்ச்சைக்குறிய திட்டங்கள் கைவிடப்பட்டன. பின்னர் பேஸ்புக் நிறுவனம் ஜீரோபேசிஸ் எனும் பெயரில் குறிப்பிட்ட சேவைகளை இலவசமாக வழங்கும் திட்டமும் கைவிடும் சூழல் உருவானது.

இந்நிலையில் தான், டிராயின் பரிந்துரைகளை சீர்தூக்கி பார்க்க வேண்டியிருக்கிறது. இந்த பரிந்துரைகள் தொலைத்தொடர்பு துறையால் பரிசீலிக்கப்பட்டு ஏற்கப்பட்ட பிறகே இவை அமலுக்கு வரும். எனினும் அடிப்படையில் இணைய சமநிலைக்கு திட்டவட்டமாக ஆதரவு தெரிவிக்கும் வகையில் பரிந்துரைகள் அமைந்துள்ளது வரவேற்கத்தக்கதாக அமைந்துள்ளது என்றே பரவலாக கருதப்படுகிறது. ”இணையம் என்பது யார் ஒருவருக்கு சொந்தமானது அல்ல, எனவே அது திறந்த தன்மை கொண்டதாக, எல்லோரும் அணுக கூடியதாக இருப்பதே சரியானது” என டிராய் தலைவர் ஆர்.எஸ்.சர்மா கூறியதை இங்கே பொருத்திப்பார்க்க வேண்டும்.

டிராய் பரிந்துரைகளில் ஒரு சில போதாமைகள் இருப்பதாக இணைய சமநிலை ஆதாரவாளர்கள் கருதினாலும், ஒட்டுமொத்தமாக வரவேற்க தக்கதாகவே இருக்கிறது. அது மட்டும் அல்ல, சர்வதேச அளவில் இணைய சமநிலைக்கு ஆதரவான மிகவும் வலுவான நிலைப்பாடாக இது அமைந்திருப்பதாகவும் பாராட்டப்படுகிறது. அதிலும் குறிப்பாக, இணைய புதுமைகளின் இருப்பிடம் என போற்றப்படும் சிலிக்கான் வேலி அமைந்திருக்கும் அமெரிக்காவில் ஒபாமா அதிபராக இருந்த காலத்தில் கொண்டு வரப்பட்ட இணைய சமநிலைக்கு ஆதாரவான விதிகள் ரத்து செய்யப்படுவதற்கான வாய்ப்பு உருவாகி உள்ள நிலையில் இந்திய நிலைப்பாடு முக்கியத்துவம் பெறுகிறது. இதில் முரண் நகை என்னவெனில், அமெரிக்காவில் பெடரல் கம்யூனிகேஷன்ஸ் கமிஷன்ஸ் சேர்மனாக இருக்கும் இந்திய அமெரிக்கரான அஜித் பாய் என்பவர் தான் இந்த நடவடிக்கையின் மையமாக இருக்கிறார் என்பது தான்.

அமெரிக்காவில் விவாதம்

இணைய சமநிலை இல்லாத நிலை உருவானால், என்ன எல்லாம் பாதிப்பு ஏற்படு என்று அமெரிக்காவும், சிலிக்கான வேலியும் மிகத்தீவிரமாக விவாதித்துக்கொண்டிருக்கிறது. குறிப்பாக இணைய புதுமைக்கு ஊற்றுக்கண்ணாக விளங்கும் ஸ்டார்ட் அப் நிறுவனங்களுக்கு வேட்டு வைத்துவிடலாம் என்று அஞ்சப்படுகிறது. அமெரிக்க வல்லுனர்கள் சிலர் நாமறிந்த வகையில் இணையம் முடிவுக்கு வந்துவிடும் அபாயம் இருப்பதாகவும் எச்சரித்துள்ளனர். எப்படியேனும் இணைய சமநிலையை காப்பாற்ற வேண்டும் எனும் போராட்டமும் அங்கு வலுத்திருக்கிறது.

இணைய சமநிலையின் முக்கியத்துவத்தையும், அவசியத்தையும் புரிந்து கொள்ள வேண்டும் எனில், இதற்கான விளக்கத்தை தெரிந்து கொண்டால் மட்டும் போதாது, இணையத்தின் அடிப்படையையும் புரிந்து கொள்ள வேண்டும்.

இணையம் இன்றியமையாதது என்பது எல்லோருக்கும் தெரியும். இ-காமர்ஸ், பண பரிவர்த்தனை, பொழுதுபோக்கு, இணைய கல்வி என எல்லாவற்றுக்கும் இணையத்தை பயன்படுத்த முடிகிறது. இப்படி இணையம் மிகவும் பழக்கமாகி விட்டதால் பலரும் இணையம் என்றால் என்ன என்றெல்லாம் நினைத்துப்பார்ப்பதில்லை. ஆனால் இது இப்போது மிகவும் அவசியமாகிறது.

இணைய ஆற்றல்

இணையம் என்பது வலைப்பின்னல்களின் வலைப்பின்னல் என்று குறிப்பிடப்படுகிறது, கோடிக்கணக்கான கம்ப்யூட்டர்களும், கையடக்க சாதனங்களும் அந்த வலையில் இணைந்துள்ளது. இதற்கு முன்னர் உருவாக்கப்பட்ட தொலைபேசி உள்ளிட்ட அனைத்துவிதமான வலைப்பின்னல்களில் இருந்தும் இணையம் மிகவும் மாறுபட்டது. ஏனெனில் இணையம் மையமில்லாதது. இணையம் எந்த ஒரு அமைப்பு அல்லது நாடு அல்லது நிறுவனத்தால் கட்டுப்படுத்தப்படாமல் இருக்கிறது. எனவே தான் தணிக்கை முயற்சிகளை எல்லாம் மீறி இணையம் அடிப்படையில் சுதந்திரமானதாக இருக்கிறது. இந்த மையமில்லாத அம்சம் என்பது இணையத்தின் தொழில்நுட்ப கட்டமைப்பிலும் இருப்பதை வல்லுனர்கள் சுட்டிக்காட்டுகின்றனர்.

இணையம் மையமாக கட்டுப்படுத்த முடியாத வகையிலேயே அதன் வடிவமைப்பும் அமைந்துள்ளது. இணையம் எனும் வலைப்பின்னலில் இணையும் புதிய முனைகள் (nodes) மூலமே வலுப்பெறும் வகையில் இணையம் உருவாக்கப்பட்டுள்ளது. அதாவது இணைய போக்குவரத்தை தாங்கியிருக்கும் ரவுட்டர்கள், கம்ப்யூட்டர்கள் போன்றவற்றை எல்லால் விட, இந்த வலைப்பின்னலில் இணையும் புதிய சாதனங்கள் மற்றும் சேவைகள் மூலம் தான் அது தனக்கான புதிய ஆற்றலை பெறுகிறது. இந்த வகை வடிவமைப்பை ‘எண்ட் டூ எண்ட்’ டிசைன் என குறிப்பிடுகின்றனர்.

இந்த இடத்தில் இணையம் உள்ளிட்ட தொழில்நுட்ப தாக்கத்தால் நவீன சமூகத்தில் ஏற்பட்டுள்ள மாற்றங்கள் மற்றும் தாக்கத்தை உணர்த்தும் வகையில் சமகால சமூகத்தை வலைப்பின்னல் சமூகம் என மானுவல் காஸ்டெல்ஸ் எனும் சமூகவியல் அறிஞர் குறிப்பிடுவதை நினைத்துப்பார்ப்பதும் பொருத்தமாக இருக்கும். நம் சமூகம் தற்போது வலைப்பின்னல்களை அடிப்படை சமூக கட்டமைப்பாக கொண்டிருப்பதாக மாறியிருக்கிறது என கூறும் காஸ்டெல்ஸ் உலகமயமாதலும், இணையம் மூலமான அணி சேர்தலும், போராட்டங்களும் இதன் வெவ்வேறு அம்சங்கள் என்கிறார். இந்த வலைப்பின்னலில் எந்த ஒரு தனி முனைக்கும் முக்கியத்துவம் கிடையாது, இதில் இணையும் புதிய முனைகளே இதன் ஆற்றலுக்கு முக்கிய காரணம் என காஸ்டெல்ஸ் குறிப்பிடுகிறார். பழைய முனைகள் முக்கியத்துவம் இழந்து விலகிப்போவதும், புதிய முனைகள் முன்னுக்கு வருவதும் சகஜமானது என்றும் அவர் குறிப்பிடுகிறார். மையமில்லாத தன்மையே இந்த யுகத்தின் தன்மை என்றும் அவர் குறிப்பிடுகிறார். இந்த கருத்தாக்கங்களை விவரித்து அவர் இன்பர்மேஷன் ஏஜ் எனும் மூன்று பகுதி புத்தகத்தை எழுதியிருக்கிறார்.

ஏன் தேவை?

ஆக, இணையத்தின் மையமில்லா தன்மையே அதன் ஆதார பலம். அந்த காலத்தில் உருவான நெட்ஸ்கேப் பிரவுசர், இபே ஏல தளம், ஜியோசிட்டிஸ் இணையதள சேவை மற்றும் இடையே அலையென எழுந்த பேஸ்புக், டிவிட்டர் உள்ளிட்ட சமூக வலைப்பின்னல் சேவைகள், இப்போதைய வாட்ஸ் அப், இன்ஸ்டாகிராம் உள்ளிட்ட புதுமையான சேவைகள் எல்லாம் உருவாக அடிப்படை காரணம் இணையம் திறந்த வெளி தன்மை கொண்டிருப்பதும், அங்கு எல்லோரும் சமம் என்பதுமே ஆகும்.

இந்த தன்மையை கட்டிக்காக்கவே இணைய சமநிலை எனும் கருத்தாக்கம் முன்வைக்கப்பட்டது. அதாவது இணைய சேவை நிறுவனங்கள் எந்த காரணத்திற்காகவும் இணையதளங்கள் அல்லது சேவைகளுக்கு பாரபட்சம் காட்டாமல் எல்லாவற்றையும் சமமாக நடத்த வேண்டும் என்பதாகும். இணைய சேவை நிறுவனங்கள் எந்த ஒரு சேவையையும், முடக்கவோ, வேகத்தை குறைக்கவோ செய்யக்கூடாது என வலியுறுத்தப்படுகிறது. இதே போல ஒரு சில தளங்களுக்கு அதிவேக பாதை அமைத்து தரவும் முயலக்கூடாது என வலியுறுத்தப்படுகிறது.

ஆனால் வீடியோ சேவை வழங்கும் தளங்களும் அதிவேக பாதை தேவை எனும் வாதத்தின் அடிப்படையில் இணைய சமநிலை எதிர்க்கப்படுகிறது. இதன் காரணமாக இணையத்திற்கு மாறுபட்ட கட்டண விகிதங்கள் வரலாம். அதைவிட முக்கியமாக குறிப்பிட்ட சில தளங்கள் முன்நிறுத்தப்பட்டு சில பின்னுக்குத்தள்ளப்படும் நிலை வரலாம். இது நுகர்வோரை பாதிக்கும். மேலும் இணைய சேவை நிறுவனங்களோடு கைகோர்த்து பெரிய நிறுவனங்கள் ஆதிக்கம் செலுத்து புதிய ஸ்டார்ட் அப் நிறுவனங்கள் உருவாவதை கடினமானதாக்கலாம்.

இணைய சமநிலை இன்மையால் ஏற்படக்கூடிய பாதிப்புகளை இன்னும் பெரிதாக பட்டியலிடலாம். அதைவிட எளிதாக இணைய சமநிலை இல்லாத போர்ச்சுகள் நாட்டில், இப்போது இணையவாசிகள் படும்பாட்டை பார்த்தாலே போதும் என்கின்றனர். இங்கு இணையவாசிகள் இணையத்தை முழுமையாக பயன்படுத்த முடியாமல், கேபிள் டிவி பேக்கேஜ் போல குறிப்பிட்ட கட்டணத்திற்கு குறிப்பிட்ட வகை இணையதளங்களை பயன்படுத்தும் நிலை உருவாகி இருப்பதாக செய்திகளில் இருந்து அறிய முடிகிறது.

எனவே தான் இணைய சமநிலையும், அதில் இந்தியா எடுத்துள்ள வலுவான நிலைப்பாடும் முக்கியமாகிறது. இதை கட்டிக்காக்க வேண்டும் என்பது அதைவிட முக்கியம்!

 

 


 

நன்றி; தமிழ் இந்து நாளிதழில் எழுதியது