Category Archives: இணையதளம்

குற்றங்களுக்கு ஒரு விக்கி

வரைபடத்தை பார்த்தே சென்னை நகரில் எந்த இடங்களில் எல்லாம் குற்றங்கள் அதிகம் நடக்கின்றன என்று தெரிந்து கொள்ள முடிந்தால் எப்படி இருக்கும்?
அப்படி தெரிந்து கொள்ள முடிந்தால் குறிப்பிட்ட இடத்தில் வழிபறி அதிகம் நடந்து வருவதை உணர்ந்து கொண்டு எச்சரிக்கையாக இருக்கலாம் அல்லவா? அதே போல் வேறொரு இடத்தில் இரவு நேர திருட்கள் திடீரென அதிகரித்து வருவதை தெரிந்து கொள்ள முடிந்தால் அதற்கேற்ப தற்காப்பு நடவடிக்கைகளை மேற்கொள்ளலாம் அல்லவா?

இவை எல்லாம் அப்படி ஒன்றும் கஷ்டமான விஷயங்களும் இல்லை! மேலும் சென்னை நகரம் என்றில்லை. உலகின் வேறு எந்த நகருக்கும் கூட பொருந்தி வரக்கூடிய விஷயம்தான்!

இதற்கு நமக்கு தேவைப்படுவதெல்லாம் விக்கி கிரைம்ஸ் (wikicrimes) போன்றதொரு இணையதளம்தான்!

கால்பந்துக்கு பெயர் பெற்ற தென்னமெரிக்க‌ நாடான பிரேசிலில் எந்தெந்த இடத்தில் எந்த வகையான குற்றங்கள் நடக்கின்றன என்பதை பார்த்த மாத்திரத்திலேயே இந்த தளம் உணர்த்தி விடுகிறது. அதுவும் அழகாக அந்நாட்டின் வரைபடத்தின் மீது இந்த விவரங்கள் சுட்டிக் காட்டப்படுகிறது.

பிரேசிலின் டிஜிட்டல் வரைபடத்தின் மீது கொடி பறப்பது போல சின்ன சின்ன கம்பங்கள் மின்னிக் கொண்டிருக்கும். ஒவ்வொரு கம்பத்திற்கு பின்னும் ஒரு குற்றம் நடைபெற்றிருக்கிறது என்று பொருள். அந்த கொடி கம்பத்தை கிளிக் செய்தால் அங்கு

எப்போது என்ன குற்றம் நடந்தது என்ற விவரத்தை தெரிந்து கொள்ளலாம்.
கொடிக்கம்பங்கள் அங்கொன்றும் இங்கொன்றுமாக இருந்தால் அந்தப் பிராந்தியத்தில் குற்றங்கள் குறைவாக இருப்பதற்கான அடையாளமாக எடுத்துக் கொள்ளலாம்.

மாறாக நெரிசல் நேர போக்குவரத்து போல கொடிக்கம்பங்கள் அடர்த்தி யாக இருந்தால் அங்கு குற்றங்கள் அதிகம் என உஷாராகலாம்.

இதை தொடர்ந்து கவனிப்பதன் மூலமே குற்றங்களின் போக்கையும் அவற்றின் எண்ணிக்கை கூடுகிறதா, குறைகிறதா போன்ற விவரங்களை யும் தெரிந்து கொள்ளலாம்.
சுருக்கமாக சொன்னால் குற்றங்களுக்கான வரைபடமாக இந்த தளம் விளங்குகிறது.

அட பரவாயில்லையே, நல்ல விஷயமாக இருக்கிறதே. பிரேசில் போலீசுக்கு ஒரு சபாஷ் போடலாமே என்று அந்நாட்டு காவல் துறையை பாராட்ட நினைத்தால் கொஞ்சம் பொறுங்கள், இந்த தளத்திற்கும், பிரேசில் காவல் துறைக்கும் எந்த நேரடி தொடர்பும் இல்லை. இதன் பின்னே இருப்பது அந்நாட்டு பொதுமக்கள்தான்!

“விக்கி கிரைம்ஸ்’ என்ற பெயரை பார்த்தவுடனேயே இது சாமான்யர்களின் பங்களிப்பு சார்ந்த தளமாக தான் இருக்க வேண்டும் என்று புரிந்து கொண்டிருக்கலாம்!
ஆம்! சாமான்ய நிபுணர்களின் பங்களிப்போடு உருவான மகத்தான இன்டெர்நெட் கலைக்களஞ்சியமான புகழ்மிக்க விக்கிபிடியாவைப் போல இந்த தளமும், குற்றங்களுக்கான விக்கிதான்!

பிரேசில் நாட்டில் போர்டலேசா பல்கலைக்கழகத்தில் கம்ப்யூட்டர் அறிவியல் பேராசிரியராக இருக்கும் டாக்டர் வாஸ்கோ பர்டாடோ என்பவர்தான் இந்த தளத்தை உருவாக்கியவர். மாணவர்களுக்கு கம்ப்யூட்டர் அறிவியலை பயிற்றுவிப்பதோடு கம்ப்யூட்டர் சார்ந்த ஆய்வுப்பணிகளிலும் “பர்டாடோ’ ஆர்வம் மிக்கவர். ஆய்வுப்பணி சார்ந்த திட்டங்களில் அவர் தனது மாணவர்களையும் ஈடுபடுத்தி வருகிறார். கம்ப்யூட்டர் சார்ந்த அறிவை நடைமுறை பிரச்சனைகளுக்கு தீர்வு காண எப்படி எல்லாம் பயன்படுத்திக் கொள்ள முடியும் என்பதே இவரது பிரதான நோக்கமாக இருக்கிறது.

அந்த வகையில்தான் குற்றங்களுக் கான டிஜிட்டல் வரைபடமாக விக்கி கிரைம்சை உருவாக்கி உள்ளார்.

திருட்டுக் கொடுப்பதோ, வழிபறி ஆசாமிகளிடம் சிக்கிக் கொள்ளும் அனுபவமோ யாருக்கு வேண்டு மானால் ஏற்படலாம். இத்தகைய நேரங்களில் பொருட்களை பறிகொடுத்தவர்கள் (அ) இந்த சம்பவத்திற்கு சாட்சியாக இருந்தவர்கள் செய்வது என்ன? பலர் போலீசில் புகார் கொடுக்க முற்பட்டாலும் பெரும்பாலானோர் தங்களுக்கு நேர்ந்த அனுபவம் பற்றி தெரிந்தவர்களிடம் புலம்புவதோடு நிறுத்திக் கொள்வதாக டாக்டர் வாஸ்கோ கூறுகிறார்.

காவல்துறை மீதான அவநம்பிக்கை மற்றும் நாம் ஏன் வம்பில் மாட்டிக் கொள்ள வேண்டும் என்ற எண்ணம் பரவலாக இருப்பதாலேயே பெரும் பாலானோர் புகார் அளிக்க முன் வருவதில்லை என்கிறார் அவர்.

புகார் கொடுக்கின்றனரோ இல்லையோ, நடந்த சம்பவத்தை நண்பர்கள், தெரிந்தவர்களோடு பகிர்ந்து கொள்ளத் தயாராக இருக்கின்றனர் அல்லவா? அதற்காக என்று ஒரு இணைய தளத்தை அமைத்துக் கொடுத்தால் அதுவே சொல்லாத சேதிகளை சொல்லுமே என்று நினைத்தார். இதன் பயனாக உருவானதே “விக்கி கிரைம்ஸ்’.

திருட்டுக் கொடுக்க நேர்ந்தவர்கள், வழிபறிக்கு ஆளானவர்கள் (அ) கொள்ளை அடிக்கப்பட்டவர்கள் அந்த விவரத்தை இந்த தளத்தின் மூலம் பிறருடன் பகிர்ந்து கொள்ளலாம். இதற்கு அவர்கள் செய்ய வேண்டியதெல்லாம் இந்த தளத்தில் நுழைந்து பெயர் மற்றும் இமெயில் முகவரியை தெரிவித்த பின் வரைபடத்தில் குற்றம் நடந்த இடத்தை தேர்வு செய்து என்ன நடந்தது என்பதை தெரிவிக்க வேண்டும். பின்னர் அந்த இடத்தில் குற்றத்துக்கான கொடிகம்பம் தோன்றி நிற்கும். என்ன வகை குற்றம் என்பதையும் தேர்வு செய்து கொள்ளலாம். நடந்த குற்றத்தை நேரில் பார்த்த சாட்சிகளும், அது பற்றிய விவரத்தை பதிவு செய்யலாம்.

கூகுலின் வரைபட சேவை இதற்காக பயன்படுத்திக் கொள்ளப் பட்டிருக்கிறது.
இதனால் குற்றங்களுக்கு தீர்வு பிறக்க வழியில்லை என்றாலும் குற்றங்கள் அதிகம் நிகழும் பகுதியை தெரிந்து கொள்ள நிச்சயம் உதவியாக இருக்கும். அது மட்டுமல்லாமல் குற்றங்களை புகார் செய்யும் சமூக கடமையை வம்பு வழக்கு என்ற அச்சம் இல்லாமல் பாதுகாப்பாக அதனை நிறைவேற்றலாம்.

தற்போது குற்றங்கள் தொடர்பான புள்ளி விவரங்கள் காவல் துறையின் கட்டுப்பாட்டில்தான் இருக்கின்றன. காவல் துறை ஒரு போதும் குற்ற நிலவரத்தை உள்ளது உள்ளபடி பகிர்ந்து கொண்டதில்லை. அடக்கி வாசிப்பது, மூடி மறைப்பது போன்ற உத்திகளை எல்லாம் பின்பற்ற தயங்க மாட்டார்கள். இதை மீறி நாட்டு நடப்பை உலகத்தின் அடிப் படையில்தான் தெரிந்து கொள்ள முடியும். எனவே குற்றங்கள் சார்ந்த புரிதல் மிகைப்படுத்தப் பட்டதாகவும் அமைந்து விடலாம்.

ஆனால் விக்கி கிரைம்ஸ் போன்ற தளத்தின் மூலம் இத்தகைய விவரத்தை சாமான்யர்களே உருவாக்கி கொள்ளலாம்!

—————

link;www.wikicrimes.org

செல்போன் குறுக்கு வழி

இருந்த இடத்தில் இருந்தே இன்டெர்நெட்டை அணுகும் வசதி. செல்போன் மூலம் இன்டெர்நெட் இணைப்பை பெறுவது, இந்த நிலையைத்தான் ஏற்படுத்தி இருக்கிறது. இந்த வசதி காரணமாக இன்டெர்நெட்டை அணுகும் விதமே மாறி வருவதாக கருதப்படுகிறது.

இன்டெர்நெட்டை அணுகுவதற்கு இன்டெர்நெட் மையங்களையோ, வீட்டில் உள்ள கம்ப்யூட்டரையோ சார்ந்திராமல், கையில் இருக்கும் செல்போன் மூலமே வலையை வரவைத்து விடுவது. நினைத்த நேரத்தில் தகவல்களை தேடிக் கொள்ள மற்றும்சேவைகளை பெற வழி செய்திருக்கிறது.

ஆனால் செல்போன் மூலம் இன்டெர்நெட்டை அணுகுவதில் நிறைய சிக்கல்கள் இருக்கின்றன. முதலில் அதற்கேற்ற நவீன செல்போன் மற்றும் இன்டெர்நெட் சேவைக்கு ஈடுகொடுக்கக்கூடிய செல்போன் இணைப்பு ஆகியவை தேவை. மேலும் இதற்கான விசேஷ சாப்ட்வேர்களும் தேவைப்படுகிறது.

செல்போனின் சின்னத்திரை இன்டெர்நெட் பயன்பாட்டில் மிகப்பெரிய தடையாக இருப்பதாக கருதப்படுகிறது. இந்த பிரச்சனைக்கான மாற்று வழிகளை கண்டறியும் முயற்சிகளும் நடைபெற்று வருகின்றன.

செல்போனின் இன்டெர்நெட்டை அணுகுவதில் மற்றொரு பிரச்சனையும் இருக்கிறது. இதுவரை அதனை யாரும் பெரிதாக கருதவில்லை. ஆனால் செல்போன் சார்ந்த இன்டெர்நெட் பயன்பாடு அதிகரிக்கக்கூடிய நிலையில், இந்த பிரச்சனையை எல்லோருமே உணரத் தொடங்கலாம். பலரும் இந்த பிரச்சனையை உணர்வதற்கு முன்பாகவே ஆஸ்திரேலிய வாலிபர் ஒருவர் இதற்கான தீர்வை முன்வைத்திருக்கிறார்.

செல்போன்களுக்கு ஏற்ற வகையில் இணையமுகவரிகளை மாற்றி அமைக்கும் சேவையை டிஜிட் யூஆர்எல்(www.digiturl.com) என்னும் பெயரில் அவர் அறிமுகம் செய்திருக்கிறார். சிறிய அளவிலான இன்டெர்நெட் முகவரிகளை நினைவில் வைத்து கொள்வதிலோ, டைப் செய்வதிலோ எந்த பிரச்சனையும் இல்லை. உதாரணத்திற்கு சி.என்.என்.டாட்காம், பி.பி.சி.டாட்காம் போன்றவை.
ஆனால் எல்லா இணைய முகவரிகளும் இப்படி எளிமையாக இருப்பதில்லை.

நீளமான இணையமுகவரிகள் இருக்கின்றன. அதுமட்டுமல்லாமல் இணையதளத்தில் குறிப்பிட்ட பக்கத்துக்கு செல்லவேண்டுமானால் அதனை குறிப்பிடும் முகவரி சிக்கலானதாகவே இருக்கும். கம்ப்யூட்டரில் இவற்றை டைப் செய்வது சிக்கலானது.

அப்படியிருக்க செல்போனின் சின்ன விசைப்பலகையில் சிக்கலான இணையமுகவரிகளை டைப் செய்வது சுலபமான காரியமில்லை. இந்த பிரச்சனையை தீர்க்கத்தான் டிஜிட் யூஆர்எல் சேவை அறிமுகமாகியிருக்கிறது.

இந்த சேவையை பயன்படுத்தும் போது, இணையமுகவரியை செல்போனில் டைப் செய்ய வேண்டிய அவசியமில்லை. அதற்கு மாறாக குறிப்பிட்ட எண்ணை டைப் செய்தால் போதும்.
இணையமுகவரிகளை எண்ணாக மாற்றும் வசதியை டிஜிட்யூஆர்எல் வழங்குகிறது.

எனவே எந்த முகவரியையும் நேரடியாக குறிப்பிடாமல் அவற்றுக்கான எண்ணை டைப் செய்வதன் மூலம் சம்பந்தப்பட்ட இணையதளங்களை எளிதாக செல்போன் மூலம் அணுகிவிட முடியும்.

செல்போனில் எழுத்துக்களை டைப் செய்வது சிக்கலானது என்பதை அனைவரும் அறிந்திருக்கலாம். ஆனால் செல்போனில் எண்களை டைப் செய்வது மிகவும் இயல்பானதாகவே இருக்கிறது.

அந்த வகையில் இப்படி குறிப்பிட்ட எண்களை டைப் செய்வதன் மூலம் இணையதள முகவரிகளை அணுகுவது செல்போன் வைத்திருப் பவர்களுக்கு பேருதவியாக இருக்கும்.
ஆஸ்திரேலியாவைச் சேர்ந்த ஆன்ட்ரூ கிரே என்னும் வாலிபர் இந்த சேவையை உருவாக்கியிருக்கிறார்.

ஏற்கனவே சிக்கலான இணையமுகவரிகளுக்கு மாற்றாக எளிமையான இணையமுகவரிகள் டைனியூஆர்எல் என்னும் பெயரில் வழங்கப்பட்டு வருகின்றன. இதே போல செல்போன்களுக்கான குறுக்கு வழி சேவையாக டிஜிட் யூஆர்எல்லை உருவாக்கியிருப்பதாக கிரே கூறுகிறார்.

எதிர்காலத்தில் செல்போன் மூலம் இன்டெர்நெட்டை அணுகுவது பன்மடங்கு அதிகரிக்கக்கூடிய நிலையில் இந்த சேவை மிகவும் தேவையானதாக இருக்கும் என்று அவர் கருதுகிறார்.

டிஜிட்யூஆர்எல் இணைய தளத்தில் இருந்து இதற்கான சாப்ட்வேரை இலவசமாக டவுன்லோடு செய்து கொள்ளலாம். ஜாவா சாப்ட்வேர் செயல்படக்கூடிய எல்லா போன்களும் இது செயல்படும். இந்த சேவையை கம்ப்யூட்டரில் பயன்படுத்தும் வசதியும் இருக்கிறது. கம்ப்யூட்டரில் நாம் பார்க்கும் இணைய தளங்களில் பின்னர் பயன்படுத்துவதற்காக சேமித்து வைத்து கொள்ளும் வசதியும் உண்டு.

பத்திரிகை கட்டுரைகளை படிப்பது, இன்டெர்நெட் ஷாப்பிங் செய்வது, பிராட்காஸ்டிங் மற்றும் வரைபட விவரங்களை பெறுவது போன்ற விஷயங்களில் இந்த சேவை மிகவும் உதவியாக இருக்கும் என்று கிரே தெரிவிக்கிறார்.

தொழில்நுட்பத்தின் மீது மிகுந்த ஆர்வம் கொண்ட இவர், கடந்த ஓராண்டுகளுக்கும் மேலாக முயற்சி செய்து இந்த சேவையை உருவாக்கி யிருக்கிறார். இன்டெர்நெட் மற்றும் செல்போனின் பயன்பாடு வேகமாக மாறிவருவதை கருத்தில் கொண்டு இந்த சேவையை உருவாக்குவதற் கான எண்ணம் பிறந்ததாக அவர் கூறுகிறார்.

செல்போன் மூலம் இன்டெர் நெட்டை பயன்படுத்துவது என்பது எளிதாக இருக்க வேண்டும் என்பது தனது நோக்கம் என்று அவர் கூறுகிறார்

உலகம் முழுவதும் உதவி

உங்கள் வீட்டு வாஷிங்மிஷன் பழுதாகி விட்டது என்று வைத்துக் கொள்ளுங்கள். நீங்கள் என்ன செய்வீர்கள்? இது என்ன கேள்வி? அந்த மிஷினை தயாரித்த கம்பெனி அல்லது டீலருக்கு போன் செய்து உதவி கோருவீர்கள்.
.
சம்பந்தப்பட்ட கம்பெனி உடனடியாக யாரையாவது அனுப்பி வைக்கலாம்; அல்லது நாள் கணக்கில், வாரக் கணக்கில் இழுத்தடிக்கலாம். பிரச்சனை அதுவல்ல. உண்மையில் வாஷிங்மிஷினில் ஏற்பட்ட பழுது மிகச் சிறிய தொழில்நுட்ப கோளாறாக இருக்கும். அதனை சரி செய்ய சில நிமிடங்கள்தான் ஆகும்.

அந்த விஷயம் தெரியாமல் நீங்கள் அல்லாடியிருப்பீர்கள். இதுவும் கூட பிரச்சனை அல்ல. வாழ்க்கையில் இதெல்லாம் சகஜம்தானே! பிரச்சனை என்னவென்றால், செல்போன், கம்ப்யூட்டர், ஐபாடு, டிவிடி பிளேயர், ஏசி என நமது வீடு முழுவதும் நவீன சாதனங்களாக நிறைந்திருக்கும்போது அவற்றில் ஏதோவது பழுது ஏற்பட்டால், அதனை சரி செய்ய முடியாமல் முழி பிதுங்கி நிற்பது அடிக்கடி நேரும் அனுபவமாகி விட்டதுதான்.

வீட்டில் பயன்படுத்தும் கம்ப்யூட்டர் மானிட்டர் திடீரென செயலிழந்து போயிருக்கும். கம்ப்யூட்டரே கெட்டுப் போய் விட்டதோ என நீங்கள் திகைத்துப் போய் நிற்பீர்கள். ஆனால் விஷயமறிந்த உங்களது அலுவலக நண்பர், அதனை ஆப் செய்து விட்டு ரீஸ்டாட் செய்தால் எல்லாம் சரியாக போய் விடும் என்பது போல ஒரு குறிப்பை சொல்வார். என்ன ஆச்சரியம்! மானிட்டர் மீண்டும் உயிர் பெற்று விடும்.

செல்போன்கள் விஷயத்திலும் இதே நிலைதான். நவீன சாதனங்களில் எதிர்பாராமல் ஏற்படும் சின்ன சின்ன பழுதுகள் குறைந்தபட்சம் இந்த நேரத்துக்கு நமது வாழ்க்கையை முடக்கி போட்டு விடுகிறது.

அதற்கு தீர்வு காண்பது பெரும் சோதனையாக மாறி விடுகிறது. நிறுவனத்தை அணுகுவதோ அல்லது நிபுணர்களை நாடுவதோ மட்டும்தான் நமக்கு தெரிந்த உபாயமாக இருக்கிறது.
அதிர்ஷ்டசாலிகள் சிலருக்கு விஷயமறிந்த நண்பர்கள் அல்லது தெரிந்தவர்கள் இதற்கான தீர்வை தங்கள் அனுபவத்தின் மூலம் அழகாக சொல்லி விடுகிறார்கள்.

எல்லோருமே இப்படி அதிர்ஷ்டசாலிகளாக உணரக் கூடிய இணையதளம் ஒன்று இஸ்ரேல் நாட்டின் தொழில்முனைவோரால் தொடங்கப்பட்டுள்ளது. அந்நாட்டை சேர்ந்த பென் சடான் என்பவர் பிக்ஸ் யா எனும் பெயரில் இந்த தளத்தை அமைத்திருக்கிறார்.

வாஷிங்மிஷினில் தொடங்கி ஐபாடு, அதை விட சூப்பர் எம்.பி.3 பிளேயர், ஐபோன், ஸ்மார்ட் போன் என எந்த நவீன தொழில்நுட்ப சாதனத்தில் பிரச்சனை ஏற்பட்டாலும் அந்த பிரச்சனையை இந்த தளத்தில் குறிப்பிட்டு உதவி கோரலாம்.

உலகில் எங்காவது ஒரு மூளையில் இருக்கும் நபர் யாராவது இந்த பிரச்சனையை தீர்க்கும் வழியை பதிலாக குறிப்பிடுவார்கள். நமக்குத்தான் அது பெரிய பிரச்சனையாக தெரியுமே தவிர, விஷயமறிந்தவர்களுக்கு அல்லது இது போன்ற பிரச்சனைகளை ஏற்கனவே சந்தித்தவர்களுக்கு அதனை தீர்க்கும் உபாயம் தெரிந்திருக்கும்.

இப்படி உலகம் முழுவதும் தொழில்நுட்ப கோளாறுகளை சரி செய்யும் வழிகளை அறிந்திருப்பவர்கள் சங்கமிக்கும் இடமாக இந்த தளம் செயல்பட்டு வருகிறது.

செல்போன் அல்லது மானிட்டர் கோளாறால் பாதிக்கப்பட்டிருக்கும் நபர் அந்த பிரச்சனையை இந்த தளத்தில் குறிப்பிட்டால் இவர்களில் யாராவது ஒருவர் அல்லது பலர் பொருத்தமான பதிலை தந்து விடுவார்.

இந்த தளத்தை தொடங்கிய பென் சடான் தொழில்நுட்ப சாதனங்களில் கோளாறு ஏற்படும் போது அதற்கு தீர்வு காண நிறுவனங்கள் உதவுவதில் அக்கறை காட்டுவதில்லை என்பதை உணர்ந்து நொந்துபோனார்.

இதையே ஒரு வர்த்தக வாய்ப்பாக மாற்றிக் கொள்ளும் உத்தேசத்தோடு பிக்ஸ்யா Fixya.com இணைய தளத்தை அமைத்தார்.

பிரச்சனை இருப்பவர்கள் அதனை தெரிவிக்கட்டும். அப் பிரச்சனையை தீர்க்கும் வழி அறிந்தவர்கள் அதனை தெரிவிக்கட்டும் என்னும் கோட்பாட்டை செயல்பாட்டு வேதமாக கொண்டு இந்த தளம் செயல்பட்டு வருகிறது.

இதுவரை 10 லட்சம் சாதனங்களுக்கு மேற்பட்ட பிரச்சனைகளும், தீர்வுகளும் இதில் குறிப்பிடப்பட்டுள்ளது. குறிப்பிட்ட நபர் சொல்லும் தீர்வு எந்த அளவுக்கு பயனுள்ளதாக இருக்கிறது என்பதை மதிப்பிடும் வசதியும் இந்த தளத்தில் இருக்கிறது.

அது மட்டுமல்லாமல் இப்படி அதிக மதிப்பு பெற்ற நிபுணர்களோடு நேரடியாக இன்டெர்நெட் அரட்டை மூலம் தொடர்பு கொண்டு பிரச்சனைகளுக்கு ஆலோசனை பெறும் புதிய வசதியும் அறிமுகமாகி இருக்கிறது.

அடுத்த முறை உங்கள் செல்போன் செயலிழந்து போனாலோ அல்லது ஏசி சாதனம் பழுதானாலோ இந்த தளத்திற்குள் எட்டிப் பாருங்கள். உங்களுக்கு தேவையான ஆலோசனை கிடைக்கலாம்.

பழுதாகும் வரை கூட காத்திருக்க வேண்டியதில்லை. உடனடியாக இந்த தளத்திற்கு சென்று பாருங்கள். அதில் பட்டியலிடப்பட்டிருக்கும் பிரச்சனைகளையும், பதில்களையும் பார்த்தீர்கள் என்றால் எந்த பிரச்சனைக்கும் உலகில் உதவி கிடைக்கும் என்ற நம்பிக்கை ஏற்பட்டு விடும்.

பள்ளிக்கு திரும்ப வைப்போம்!

பள்ளிக்குத் திரும்புதல்’ என்னும் தலைப்பு நன்றாக இருக்கிறது அல்லவா! இது ஏதோ நாவல் (அ) புதிய கவிதைத் தொகுதியின் தலைப்பு அல்ல! பாராட்டத்தக்க ஒரு இணைய தளத்தின் தலைப்பு இது!

.
பேக்டூ ஸ்கூல் (back 2 school.in) என்னும் இந்த இணைய தளத்தின் முகவரியை பலவிதங்களில் தமிழ்படுத்தலாம். “மீண்டும் பள்ளிக்கு’ அவற்றில் ஒன்று. இதைவிட பள்ளிக்கு திரும்புதல் என்பது கவித்துவமான ஒன்றாக இருப்பதோடு, இணைய தளத்தின் நோக்கத்திற்கும் பொறுத்தமாக இருக்கிறது.

பள்ளி படிப்பை பாதியில் கைவிட நேரும், மாணவ மாணவிகளை அப்படியே சென்றுவிட அனுமதிக்காமல், மீண்டும் அவர்களை பள்ளிக்கு கொண்டு வந்து சேர்க்கும் நோக்கத்துடன் செயல்பட்டு வரும் இணைய தளம் இது.

உள்ளபடியே உன்னதமான முயற்சி: ஆனால் கடினமானது, சவாலானது. எந்த அளவுக்கு சவாலானதோ அதே அளவுக்கு இன்றியமையாததும் கூட! இதை நன்கு உணர்ந்தே, பள்ளிக்கு திரும்ப வைக்கும் முயற்சியாக “பேக்டு ஸ்கூல்’ இணைய தளம் அமைக்கப்பட்டுள்ளது.

பள்ளி படிப்பை நிறுத்திக் கொள்வது என்பது சர்வ சாதாரணமாக இருக்கும் இந்தியாவில், இத்தகைய முயற்சிக் கான தேவை உணரப்பட்டு, இந்த இணைய தளம் அமைக்கப் பட்டிருப்பது பாராட்டுக்குரியது. இதில் மேலும் மகிழ்ச்சி அளிக்கக் கூடிய விஷயம் என்னவென்றால், நாட்டுக்கே முன் மாதிரியாக திகழக் கூடிய “பேக்டூ ஸ்கூல்’ இணைய தளம் தமிழகத்தில் இருந்து மேற்கொள்ளப் பட்டிருக்கிறது என்பதுதான்! ஆம் தமிழகத்தின் கிருஷ்ணகிரி மாவட்டத்தில் இந்த முன்னோடி முயற்சி மேற்கொள்ளப்பட்டுள்ளது. மாவட்ட கலெக்டர் டாக்டர் சந்தோஷ் பாபு முயற்சியால் “பேக்டூ ஸ்கூல்’ இணைய தளம் அமைக்கப்பட்டு மாணவர்கள் பள்ளிப்படிப்பை பாதியில் நிறுத்திக் கொள்வதற்கு முற்றுப்புள்ளி வைக்கும் முயற்சி மேற்கொள்ளப்பட்டு வருகிறது.

ஏழைகளே அதிகம் உள்ள நம்நாட்டில் பள்ளி படிப்பை தொடராமல் போவதற்கு எத்தனையோ காரணங்கள் இருக்கின்றன. அவற்றில் விநோதமானவையும் உண்டு. வேதனையில் ஆழ்த்துபவையும் உண்டு. இருப்பினும் இந்த காரணங் களில் சில பொதுத்தன்மைகள் இல்லாமல் இல்லை. எதிர்பாராமல் குடும்ப உறுப்பினர்கள் மரண மடைவது, அல்லது வருமானம் ஈட்டுவோர் வேலை இழப்பது போன்றவை பெரும்பாலான மாணவர்கள் பள்ளிப் படிப்பை தொடர முடியாமல் போவதற்கான முக்கிய காரணங்களாக அமைகின்றன. இது போன்ற சூழ்நிலையில் சம்பந்தப்பட்ட குடும்பங்களின் பொருளாதார சுமை மிகுதியாகி, பிள்ளைகளின் கல்வி செலவை சுமக்க முடியாமல் போகலாம் (அ) குடும்ப செலவை சுமக்க பிள்ளைகளின் பிஞ்சுக்கரம் தேவைப்படலாம். இந்த நிலை வேதனையானது! அது ஒரு புறமிருக்க பல நேரங்களில் பிறப்புச் சான்றிதழ் இல்லாமல் போவது போன்ற எளிமையான காரணங்களுக்காக படிப்பு நிறுத்தப்படுவதும் உண்டு. பள்ளி படிப்பை தொடர வேண்டிய நிர்ப்பந்தம் வலுவலாக இல்லாத நாட்டில் இது சகஜம்தான்!

இந்த இடத்தில் தான், “பேக்டு ஸ்கூல்’ இணைய தள முயற்சி முக்கியத்துவம் பெறுகிறது. மாணவர்கள் படிப்பை நிறுத்திக் கொள்வதற்கான காரணம் எதுவாக வேண்டுமானாலும் இருக்கட்டும்; அதனை அறிந்து கொண்டு தீர்வு காண வேண்டியது, ஆட்சி பொறுப்பில் உள்ளவர்களின் கடமை அல்லவா!

கிருஷ்ணகிரி மாவட்ட கலெக்டர் சந்தோஷ் பாபு இப்படி தான் நினைத்தார். மாணவர்கள் படிப்பை நிறுத்தும் நிலைஏற்படும் போது, அதற்கான காரணத்தை தெரிந்து கொண்டு, பிரச்சனையை தீர்க்க முயன்றால், அம்மாணவர்களை தொடர்ந்து கல்வி பயில வைக்கலாம் என்பது அவரது நம்பிக்கை.

நல்ல எண்ணம் தான்! ஆனால் ஒவ்வொரு பள்ளியிலும் உள்ள நூற்றுக்கணக்கான மாணவர்கள் மத்தியில் யாரெல்லாம் படிப்பை நிறுத்துகின்றனர் என்று தெரிந்து கொள்வது சாத்தியம் தானா?

அப்படியே தெரிந்து கொண்டாலும் குறிப்பிட்ட மாணவர்களுக்கு ஏன் இந்தநிலை ஏற்பட்டது என்று கண்டுபிடிப்பது நடைமுறை சாத்தியம் தானா? இதற்கு நூற்றுக்கணக்கான பள்ளிகளில் பயிலும் ஆயிரக்கணக்கான மாணவர்களின் நிலையை கண்கொத்தி பாம்பாக பார்த்துக் கொண்டிருக்க வேண்டாமா?

மனம் இருந்தால் சாப்ட்வேர் உண்டாயிற்றே! இந்த கண்காணிப்பு பணியை கண்ணும் கருத்துமாக செய்யக்கூடிய சாப்ட்வேர் உருவாக்கப் பட்டு, அதனை பக்கபலமாக கொண்டு, பேக்டு ஸ்கூல் இணைய தளம் வடிவமைக்கப்பட்டது. இரண்டு கட்டங்களாக இந்தப் பணி மிக அருமையாக மேற்கொள்ளப்பட்டு வருகிறது. முதல் கட்டத்தில், அரசு பள்ளிகளில் பயிலும் மாணவர்கள் அனைவர் பற்றிய விவரங்களும் சேரிக்கப்பட்டு அவர்களுக்கு என ஒரு அடையாள எண் கொடுக்கப்படுகிறது. இந்த விவரங்கள் அனைத்தும் சாப்ட்வேரிடம் சமர்பிக்கப்பட்டு விடுகின்றன.

இரண்டாவது கட்டத்தில் அவ்வப் போது மாணவர்களின் வருகை சரிபார்க்கப்பட்டு, தொடர்ந்து பள்ளிக்கு வந்து கொண்டிருக் கின்றனரா என்னும் விவரங்கள் சேகரிக்கப்பட்டு அவையும் சாப்ட்வேரிடம் சமர்பிக்கப் படுகின்றன. ஏற்கனவே உள்ள விவரப் பட்டியலோடு இவற்றை ஒப்பிட்டுப் பார்க்கும் சாப்ட்வேர் படிப்பை நிறுத்திக் கொண்ட மாணவர்கள் பற்றிய தகவலை, மைய கம்ப்யூட்டரில் எட்டிப் பார்க்கச் செய்கிறது. மைய கம்ப்யூட்டர் மாவட்ட கலெக்டர் கட்டுப்பாட்டில் இருப்பதால், படிப்பை கைவிடும் மாணவர்களை அறிந்து கொள்ளும் கலெக்டர், அதன் பின்னே உள்ள பிரச்சனையை தீர்த்து, மாணவனை மீண்டும் பள்ளிக்கு கொண்டு வரும் முயற்சியை மேற்கொள்ள முடியும்.

அவ்வப்போது பள்ளிக்கு விஜயம் செய்து , விலகிச் செல்லும் மாணவர்கள் பற்றிய விவரங்களை தெரிந்து கொள்ளும் பொறுப்பு தன்னார்வ தொண்டர்களிடம் விடப்பட்டுள்ளது. பஞ்சாயத்து ஊழியர் முதல் தலைமை ஆசிரியர் வரை பலர் அரசு பணியை மேற்கொள்கின்றனர். மற்ற பொறுப்பை மாவட்ட கலெக்டர் பார்த்துக் கொள்கிறார்.

கடந்த ஆண்டு இறுதியில் தொடங்கப்பட்ட இந்த தளம் சிறப்பாக செயல்பட்டு வருகிறது. முதல் கட்டத்தில் 337 பஞ்சாயத்துகளும், 9000 தன்னார்வ தொண்டர்கள் மூலம் கிருஷ்ணகிரியில் உள்ள பள்ளியில் பயிலும் மாணவர்கள் பற்றிய விவரங்கள் சேகரிக்கப்பட்டுள்ளது.

கிருஷ்ணகிரி மாவட்டத்தில் உள்ள மாணவர்களில் ஒருவர் கூட பள்ளி படிப்பை நிறுத்திவிடக்கூடாது என்பதை முதன்மை நோக்கமாக அறிவிக்கும் இந்த தளத்தில், மாணவர்கள் படிப்பை தொடர அரசு தரும் உதவித் திட்டங்கள் உள்ளிட்ட பல்வேறு விஷயங்கள் இடம் பெற்றுள்ளன. மேலும் குழந்தை தொழிலாளர் பற்றி புகார் தெரிவிக்கும் வசதியும் இடம் பெற்றுள்ளது.

கிருஷ்ணகிரி மாவட்டத்தில் சோதனை முறையில் செயல்படுத்தப் படும் அரசு திட்டம், எந்த மாவட்டத்தில் வேண்டுமானாலும் செயல்படுத்தப்படலாம்.

| |

வாயில்லா ஜீவனுக்காக வாய்ஸ்

“”சொல்லக் கொதிக்குதடா நெஞ்சம்” என்று பாரதி குமுறியது போல, ஏதாவது ஒரு கொடுஞ் செயலை கண்டு  உங்களுக்கும் நெஞ்சம் பதறுகிறதா?  இந்த உணர்வோடு ஏதாவது செய்ய வேண்டும் என்று துடிக்கிறீர்களா?

ஒரு இணையதளம் அமைத்து உங்கள் நோக்கம் நிறைவேற போராடினால் தான் என்ன?
அமெரிக்காவைச் சேர்ந்த அலக்ஸ் அலிக்கான்சான்யன் என்பவர் நாய்களை காப்பதற்காக இப்படி ஒரு இணையதளத்தை அமைத்து செயல்பட்டு வருகிறார். 

ஒரு நோக்கம் நிறைவேறுவதற்காக  அமைக்கப் படும் இணையதளம் எப்படி இருக்க வேண்டும் என்ப தற்கான உதாரணமாக, இதனை சொல்லலாம். ‘dogsindanger.com’ இதுதான் அந்த தளத்தின் முகவரி. உலகிலேயே செல்லப்பிராணிகள் அதிகம் வளர்க்கப்படும் தேசமாக அமெரிக்கா விளங்குகிறது. 

செல்லப் பிராணிகளாக வளர்க்கப் படும் நாய்கள் அதிகம் கொல்லப் படுவதும் அந்நாட்டில் தான்! ஆம், ஆண்டுதோறும் அமெரிக்காவில் 40 லட்சம் நாய்கள் கொல்லப் படுகின்றன.

இது பரிதாபமான நிலைதான். பல்வேறு காரணங்களினால் பராமரிப்பின்றி விடப்படும் நாய்கள் வேறு வழியின்றி கொல்லப் படுகின்றன. இத்தனைக்கும், தெரு நாய்கள் மற்றும் பராமரிப்பில்லாத நாய்களுக்கு அடைக்கலம் அளிப்பதற்காக அமெரிக்கா முழுவதும் புகலிடங்கள் அமைக்கப் பட்டுள்ளன.

ஆனால் இந்த மையங்களால் பராமரிக்கப்படக் கூடிய எண்ணிக்கையை விட அதிகமாக கைவிடப்பட்ட நாய்கள் வந்து சேரும்போது அவை கொல்லப்பட்டு விடுகின்றன.

மனிதாபிமானம் மிக்கவர்களை இந்த தகவல் வாட்டி வதைத்து விடும். அதிலும், செல்லப்பிராணிகள் மீது பாசம் வைத்திருப்பவர்கள், ரொம்பவே துடித்துப்போய் விடுவார்கள்.

அலக்ஸ் அலிக்கான்சும் இப்படித்தான் துடித்தார். ஆனால் நம்மால் என்ன செய்ய முடியும் என்றுஅவர் விலகிச் சென்று விடவில்லை. தன்னால் முடிந்த வரை நாய்கள் கொல்லப்படுவதை தடுக்க விரும்பினார். 

அதாவது நாய்களை காப்பாற்ற விரும்பு கிறவர்களை  தொடர்பு கொண்டு அவற்றை தத்து எடுத்துக்கொள்ள செய்ய முயற்சிப்பது என முடிவு செய்து கொண்டார். நாய்கள் ஆபத்தில் இருக்கின்றன. அவற்றை காக்க வாருங்கள் என அழைப்பு விடுக்கும் வகையில் “டாக்ஸ் இன் டேஞ்சர்’ இணையதளத்தை ஏற்படுத்தினார்.

தளத்தின் முகப்பு பக்கத்தில் கொல்லப்பட இருக்கும் நாய்களின் புகைப்படமும், அவை பலியாக எஞ்சியிருக்கும் நாட்களும் குறிப்பிடப் பட்டிருக்கும்.

நாட்களின் எண்ணிக்கை குறைந்து கொண்டே வருவது, ஒரு வித அவசரத்தை ஏற்படுத்தும். இந்த படத்தை பார்த்து பரிதாபப் படுபவர்கள் சம்பந்தப் பட்ட புகலிட மையத்தை தொடர்பு கொண்டு அந்த நாய்களை தத்து எடுத்துக்கொண்டு அவை கொல்லப்படாமல் தடுக்கலாம்.

இப்படியாக அமெரிக்காவின் பல்வேறு மாநிலங்களில் உள்ள புகலிட மையங்களில் கொல்லப்பட உள்ள  நாய்கள் பற்றிய விவரங்கள் திரட்டப்பட்டு பக்கத்தில் இடம் பெறுகிறது. 

காக்கப்படும் நாய்கள், வெற்றிக்கதை என்னும் அறிவிப் போடு அதற்குரிய பகுதியில் யார் அதனை தத்து எடுத்துக் கொண்டுள்ளனர் என்ற தகவலோடு குறிப்பிடப்படுகிறது. தத்து எடுக்கப்படாத அதிர்ஷ்டம்  இல்லாத நாய்களின் சோகத்தை நினைவிடம் என்னும் பகுதியில் உறைந்து போகின்றன.

வெற்றிக் கதைகள் நிம்மதி பெருமூச்சு விட வைக்கின்றன என்றால், சோக கதைகள், நாய்களின் நிலையை எண்ணி வருந்த வைக்கின்றன. மொத்தத்தில் நாய்களை காக்க வேண்டும் என்ற எண்ணத்தை ஏற்படுத்தக்கூடியதாக இருக்கின்றன. 

அத்தகைய எண்ணத்தை பெறுபவர்கள் பலிபீடத்தில் உள்ள நாய்களில் ஏதாவது ஒன்றை தத்து எடுக்க முன் வரலாம். அல்லது நேரடியாக புகலிட மையங்களை தொடர்பு கொண்டு அங்கு கொல்லப்படுவதற்காக காத் திருக்கும் நாய்களில் ஒன்றுக்கு அடைக்கலம் அளிக்கலாம்.

தத்து எடுக்க பணமிருந்தும் இயலாதவர்கள் அதற்கு பதிலாக நன்கொடை அளிக்கலாம்.
இன்னும் ஒரு படி மேலே போய் புதிதாக செல்லப் பிராணிகள் வாங்க உள்ள நண்பர்களிடம் இந்த தளத்தை சுட்டிக்காட்டி அதற்கு பதிலாக இங்கு ஒரு நாயை தேர்வு செய்து வளர்க்குமாறு கேட்டுக்கொள்ளலாம்.

அதோடு வீட்டில் உள்ள பிள்ளை களுக்கு விலங்குகளை பாசத்தோடு பராமரிப்பதன் முக்கியத்து வத்தையும் எடுத்துக்கூற வேண்டும் என்று இந்த தளம் ஊக்குவிக்கிறது.
இதுவரை ஆயிரத்து ஆறு நூற்றுக்கும் மேற்பட்ட நாய்கள் இந்த தளத்தின் மூலம் காப்பாற்றப் பட்டுள்ளதாக குறிப்பிடப் பட்டுள்ளது. இந்த எண்ணிக்கை மேலும் அதிகரிக்கும் என்று எதிர்பார்க்கலாம்.

அலெக்ஸ், இந்த தளத்தை நடத்துவதற்காக என்று ஒரு தன்னார்வ தொண்டு நிறுவனத்தை ஏற்படுத்தி அதன் மூலம் இதனை நடத்தி வருகிறார். கைவிடப்பட்ட நாய்கள் பற்றிய விவரங்களை சேகரிப்பதற்காக என்று தனியே ஊழியர்களையும் நியமித்துள்ளார்.

“”ஒரு நேரம் தனது விலங்குகளை நடத்தும் விதத்தை கொண்டே அதன் தார்மீக பலத்தை அளவிட முடியும்” என மகாத்மா காந்தி சொன்ன வாசகமே தனது உந்து சக்தி என்கிறார் அலெக்ஸ்.
அமெரிக்காவை நாய் ஆர்வலர்களின்  தேசம் என்று பெருமையோடு குறிப்பிடும் அவர், அதன் விளைவாகவே கைவிடப் பட்ட நாய்களுக்கு புகலிட மையங்கள் அமைத்து பராமரிப் பதையும் சுட்டிக்காட்டி இதனையும் மீறி பலியாகும் நாய்களுக்கு மறு வாழ்வு அளிக்கவே இந்த இணையதளம் என்று சொல்கிறார்.