Category Archives: இணைய செய்திகள்

பிளேஷ் மூடுவிழா அறிவிப்பும், இணைய வரலாறு கவலையும்!

960x0பழையன கழிதல் என்பது மென்பொருள் சேவைகளுக்கும் பொருந்தும் தான். அதிலும் இணைய தொழில்நுட்பம் வெகு வேகமாக மாறிக்கொண்டிருக்கும் நிலையில், பழைய மென்பொருள் சேவைகள் காலாவதியாகி கைவிடப்படும் நிலை ஏற்படுவது இயற்கையானது தான். இணையத்தின் அடையாளங்களில் ஒன்றாக திகழும் அடோப் பிளேஷ் மென்பொருளுக்கும் இது தான் நிகழ இருக்கிறது. பிளேஷ் மென்பொருளுக்கு விடை கொடுக்க இருப்பதாக அடோப் நிறுவனம் அண்மையில் அறிவித்ததை நீங்களும் கவனித்திருக்கலாம். இது தொடர்பாக அடோப் வெளியிட்ட அறிவிப்பில், பிளேஷ் மென்பொருள் வாழ்க்கையை முடிக்க இருப்பதாக தெரிவித்திருந்தது. 2020 ம் ஆண்டு வாக்கில் பிளேஷ் பிளேயர் மென்பொருளை வெளியிடுவது மற்றும் அதற்கான அப்டேட்கள் நிறுவத்தப்படும் என்றும் அந்த அறிவிப்பில் தெரிவிக்கப்பட்டிருந்தது. இதன் பொருள் பிளேஷ் மென்பொருள் மெல்ல கொல்லப்படும் என்பதாகும்.

இந்த அறிவிப்புக்கான எதிர்வினைகளை பார்க்கும் போது, பிளேஷ் மென்பொருளுக்கு விடை கொடுக்க பெரும்பாலானோர் தயாராகிவிட்டது போலவே தோன்றுகிறது. பிளேஷ் மென்பொருளின் முடிவு நீண்ட காலமாக எதிர்பார்க்கப்பட்டது தான் என்றும், இப்போதாவது அடோபிற்கு இதை அறிவிக்க மனம் வந்ததே என்பது போலவும் தான் பலரும் கருத்து தெரிவித்துள்ளனர். தொழில்நுட்ப செய்தி தளங்கள் கூட, பிளேஷின் தவிர்க்க இயலாத மரணம் என்பது போல தலைப்பு வெளியிட்டிருந்தன. கிஸ்மோடோ இணையதளம் பிளேஷை கருணக்கொலை செய்ய அடோப் முன்வந்துள்ளது என வர்ணித்திருந்தது. இன்னும் சிலர், தவிர்க்க இயலாத பிளேஷ் முடிவு இப்போதாவது அறிவிக்கப்பட்டுள்ளதே என நிம்மதி பெருமூச்சு விட்டுள்ளனர். பல தளங்கள் பிளேஷ் மென்பொருளுக்கு இறங்கற்பா எழுதிக்கொண்டிருக்கின்றன.

பிளேஷ் மீது ஏன் இத்தனை வெறுப்பும், விமர்சனமும் இருந்தாலும் ஒரு காலத்தில் அது கொண்டாடப்பட்ட மென்பொருளாக இருந்ததை மறந்துவிடக்கூடாது. பிளேஷ் அடிப்படையில் இணையத்திற்கான மல்டிமீடியா சேவைகளை உருவாக்க பயன்படும் மென்பொருள். அனிமேஷன், வீடியோகேம் மற்றும் வீடியோக்களை உருவாக்க பிளேஷ் பயன்படுத்தப்படுகிறது. கிராபிக் தான் இதன் பலம் என்பதால், இணையதளங்களை செழுமையாக்க கூடிய செயலிகளையும், சேவைகளையும் பிளேஷ் கொண்டு எளிதாக உருவாக்க முடிந்தது. அது மட்டும் அல்ல இணையத்தில் வீடியோக்களை எளிதாக பார்க்கவும் பிளேஷ் கைகொடுத்தது. வீடியோ பகிர்வு சேவை பிரிவில் முன்னோடியான யூடியூப் 2005 ல் அறிமுகமான போது பிளேஷ் பிளேயர் மூலமே வீடியோக்களை பார்க்க வழி செய்ததாக விக்கிபீடியா கட்டுரை குறிப்பிடுகிறது என்றால் பார்த்துக்கொள்ளுங்கள். அது மட்டும் அல்ல, பிளேஷ் கொண்டு எண்ணற்ற கேம்களும், அனிமேஷன்களும் உருவாக்கப்பட்டுள்ளன.

இப்படி கோலோச்சிய பிளேஷ் முடுவிழாவை நோக்கி தள்ளப்பட இரண்டு முக்கிய காரணங்கள் இருக்கின்றன. முதல் காரணம், பிளேஷ் தொழில்நுட்பம் காலாவதியாகவிட்டது என்பது. ஒரு காலத்தில் இணையதளங்களுக்கான சுவாரஸ்யமான உள்ளடக்கத்தை உருவாக்க பிளேஷ் தேவைப்பட்டது என்றாலும், அதன் பின் நிகழ்ந்த பாய்ச்சலில் அதைவிட மேம்பட்ட தொழில்நுட்பங்கள் வந்துவிட்டன. அதோடு பிரவுசர்களில் பயன்படுத்தப்படும் எச்டிஎம்.எல் தொழில்நுட்பத்திற்கு பிளேஷ் அந்நியமாகிவிட்டது. எனவே மென்பொருளாளரகள் பிளேஷுக்கு குட்பை சொல்லி வருகின்றனர்.

பிளேஷை பொருத்தவரை இன்னொரு பிரச்சனை, அதில் உள்ள பாதுகாப்பு பிரச்சனைகள். பிளேஷ் மென்பொருள் கொண்டு உருவாக்கப்படும் பல சேவைகள் மால்வேர் எனப்படும் வில்லங்க வாகனங்கள் மறைந்திருக்கும் இடமாக கருதப்படுகிறது. பிளேஷில் உருவாக்கப்பட்ட எட்டிப்பார்க்கும் விளம்பரங்கள் அல்லது வீடியோக்கள் மால்வேர்களின் உரைவிடமாக அமைவது உண்டு. அதோடு, உங்கள் பிளேஷ் பிளேயர் காலாவதியாகிவிட்டது, அப்டேட் செய்யவும் எனும் அறிவிப்பையும் பிளேஷ் சார்ந்த தளங்களில் அடிக்கடி பார்த்திருக்கலாம். பெரும்பாலும் இதுவும் வில்லங்க அறிவிப்பாக அமைந்து, இதை கிளிக் செய்தால் மால்வேருக்கான ஜன்னல் திறக்கப்பட்டு அவை கம்ப்யூட்டருக்குள் புகுந்துவிடும். இதற்கு பிளேஷை குற்றம் சாட்ட முடியாது என்றாலும், மால்வேரை உருவாக்கும் விஷமிகளின் பயன்பாட்டால் பிளேஷ் பாதுகாப்பு ஓட்டைகள் நிறம்பியதாக கருதப்பட்டு வருகிறது.

மேம்பட்ட தொழில்நுட்பம் வந்துவிட்டதாலும், மால்வேர் வாகனமாக இருப்பதாலும் பிளேஷுக்கு எதிராக வலுவான விமர்சனங்கள் தொடர்ந்து கூறப்படுகின்றன. பல பிரவுசர் நிறுவனங்களும், பிளேஷை கழற்றிவிட்டுள்ளன. இவ்வளவு ஏன், ஆப்பிள் நிறுவனர் மறைந்த ஸ்டீவ் ஜாப்ஸ், ஐபோனில் இதற்கு இடமே கொடுக்கவில்லை. பிளேஷ் மறைந்தாக வேண்டிய மென்பொருள் என முதலில் அறிவித்தது ஜாப்ஸ் தான். பிளேஷ் டெஸ்க்டாப் காலத்திற்கான மென்பொருள், ஸ்மார்ட்போன யுகத்தில் அதற்கு தேவையில்லை என ஜாப்ஸ் காட்டமாக கூறியிருந்தார்.

ஏதோ ஒரு விதத்தில் பலரும் இப்போது இதை ஏற்கத்துவங்கிவிட்டனர். அதன் விளைவு தான் அடோப் நிறுவனம், பிளேஷை கைவிடும் முடிவை அறிவித்துள்ளது: https://blogs.adobe.com/conversations/2017/07/adobe-flash-update.html

நிற்க இந்த செய்திக்கு இன்னொரு பக்கம் இருக்கிறது. பிளேஷ் மென்பொருளுக்கு ஆதரவாளர்கள் இருக்கின்றனர் என்பதும், அவர்களில் பலர் பிளேஷ் நீடுழி வாழ வேண்டும் என கோரிக்கை எழுப்பியிருப்பதும் தான் அது. மென்பொருளாலரான ஜுஹா லின்ஸ்டெட் (Juha Lindstedt ) என்பவர் பிளேஷை கைவிடக்கூடாது என வலியுறுத்தி கையெழுத்து இயக்கம் ஒன்றை துவக்கியிருக்கிறார். அவரது கோரிக்கை ஒரளவு வரவேற்பை பெற்றிருப்பதோடு காரசாரமான விவாதத்தையும் துவக்கி வைத்திருக்கிறது.

லின்ஸ்டெட் பிளேஷை காப்பற்ற வேண்டும் என்பதற்காக எடுத்து வைக்கும் வாதம் மிகவும் முக்கியமானது. பிளேஷுக்கு முடிவிழா என்பது ஒரு மென்பொருள் சார்ந்த முடிவு மட்டும் அல்ல, அது இணைய வரலாறு சார்ந்ததும் கூட என்பது தான் அவரது வாதத்தின் முக்கிய அம்சம். அதாவது பிளேஷ் கொண்டு உருவாக்கப்பட்ட இணையசேவைகளும், கேம்களும், அனிமேஷன்களும் தொடர்ந்து பயன்படுத்தப்படா முடியாமல் போய்விடும் என்று அவர் கவலைப்படுகிறார். இந்த சேவைகளும், கேம்களும் இணைய வரலாற்றின் அங்கமாக இருப்பதால் அவை காணாமல் போவது இணைய வரலாற்றின் ஒரு பகுதி அழிந்து போவதற்கு சமம் என்கிறார் அவர்.

இதற்காக கித்ஹப் எனும் தொழில்நுட்ப தளத்தில் கோரிக்கை மனு அளித்து ஆதரவு கோரியுள்ளவர், பிளேஷ் பிளேயர் என்பது இணைய வரலாற்றின் முக்கிய துண்டு, அதை கொல்வது எதிர்கால தலைமுறை கடந்த காலத்தை அணுக முடியாமல் செய்துவிடும் என்று தெரிவித்துள்ளார். கேம்கள், இணையதளங்கள், இணைய சோதனை முயற்சிகள் எல்லாமே மறக்கப்பட்டுவிடும் என்றும் அவர் தெரிவித்துள்ளார்.

மென்பொருளில் ஏற்படும் முன்னேற்றம் என்பது கடந்த காலத்தை அழிப்பதாக அமைய வேண்டுமா என்பது தான் அவர் கேட்கும் கேள்வி. ஆம், சில ஆண்டுகள் கழித்து மென்பொருள் வரலாறு பற்றி விவாதிக்கும் போது பிளேஷ் மென்பொருள் தொடர்பாக பேசும் போது, அதற்கான உதாரணங்களை காண முடியாமல் வெறும் விக்கிபீடியா கட்டுரையை தகவலை மட்டும் காண்பது என்பது வரலாற்று வெறுமையாகி விடலாம் அல்லவா? இந்த கவலையினால் தான் லின்ஸ்டெட் பிளேஷை காப்பாற்ற குரல் கொடுக்க கோரியிருக்கிறார். ஆனால், பிளேஷ் தொடர்பான நிதர்சனத்தை அவர் உணராமல் இல்லை. எனவே தான், பிளேஷ் மென்பொருளை கொலை செய்துவிடாமல், அதை ஓபன் சோர்ஸ் முறையில் வெளியிட்டு இணையவாசிகள் கைகளில் ஒப்படைக்க வேண்டும் என கேட்டிருக்கிறார். இது சரியா? பலன் தருமா? எனும் நோக்கில் மென்பொருள் உலகில் விவாதம் நடைபெற்று வருகிறது.: https://github.com/pakastin/open-source-flash

இணைய யுகத்தின் பழைய சேவைகளையும், தளங்களையும் தக்க வைத்து, இணைய வரலாற்றை காக்க வேண்டும் எனும் இயக்கத்தின் பாதையில் பிளேஷுக்கான போராட்டம் முக்கிய பங்கு வகிக்கும் என எதிர்ப்பாக்கலாம். இந்த செய்திக்கு வாலாக ஒரு தகவலையும் நினைத்துப்பார்ப்பது பொருத்தமாக இருக்கும். அண்மையில் மைக்ரோசாப்ட் நிறுவனம் வரைவதற்கான எம்.எஸ் பெயிண்ட் மென்பொருளுக்கு விடை கொடுப்பதாக அறிவித்தது. ஆனால் அந்த எளிமையான மென்பொருளுக்கு ஆதரவாக பயனாளிகள் டிவிட்டரில் பொங்கியதை அடுத்து, பெயிண்ட் மென்பொருள் விண்டோஸ் ஸ்டோரில் தொடரும் என அறிவித்தது. 32 ஆண்டுகளுக்கு முன் அறிமுகமான மென்பொருளுக்கு இத்தனை அபிமானிகளா என்றும் வியந்து போவதாக மைக்ரோசாப்ட் தெரிவித்திருந்தது. கம்ப்யூட்டரில் வரைவதை எளிதாக்கிய அந்த மென்பொருளும் இணைய வரலாற்றின் அங்கம் தான்.

 

தளம் புதிது: அந்த நாள் இணையதளங்கள்

இணைய வரலாற்றை திரும்பி பார்க்க இணையதளங்களை திரும்பி பார்ப்பதைவிட சிறந்த வழி வேறில்லை. அதாவது, சில ஆண்டுகளுக்கு முன் குறிப்பிட்ட இணையதளங்கள் எப்படி இருந்தன என்பதை திரும்பி பார்ப்பது. குறிப்பிட்ட கால கட்டத்தில் இணையதளங்கள் எப்படி தோற்றம் அளித்த என தெரிந்து கொள்ள முடிவது இணைய வடிவமைப்பு பற்றி மட்டும் அல்ல, உள்ளடக்கத்தின் போக்கு பற்றியும் புரிய வைக்கும்.

அந்த வகையில், இணையத்தின் முன்னணி இணையதளங்கள் பத்தாண்டுகளுக்கு முன் எப்படி இருந்தன என்பதை தெரிந்து கொள்ள வழி செய்கிறது டென் இயர்ஸ் அகோ இணையதளம்.

இதன் முகப்பு பக்கத்தில் பட்டியலிடப்பட்டுள்ள ரெட்டிட், யூடியூப், அமேசான், பிபிசி, டைம், ஆப்பிள் உள்ளிட்ட இணையதளங்களின் லோகோ மீது கிளிக் செய்தால் அவை 10 ஆண்டுகளுக்கு முன் எப்படி காட்சி அளித்தன என்பதை பார்க்கலாம்.

இணையதளங்களின் பழைய வடிவங்களை சேமித்து காப்பாற்றிவரும், வெப் ஆர்கேவ் தளத்தில் சேமிக்கப்பட்ட இணைய பக்கங்களை கொண்டு இந்த இணையதளம் உருவாக்கப்பட்டுள்ளது. நீல் அகர்வால் என்பவர் இந்த சுவாரஸ்மான இணையதளத்தை அமைத்திருக்கிறார்.

இணைய முகவரி: http://tenyearsago.io/

 

செயலி புதிது; புத்தக குழுக்களை உருவாக்கலாம் வாங்க!

நல்ல புத்தகத்தை படித்தால் மட்டும் போதுமா என்ன? அது பற்றி சக வாசகர்களுடன் விவாதித்தால் தான் வாசிப்பு அனுபவம் இன்னும் விசாலமாகும் அல்லவா? ஸ்மார்ட்போன் யுகத்தில் இத்தகைய பகிர்தலுக்கு உதவும் வகையில் புக்டிரைப்ஸ் செயலி உருவாக்கப்பட்டுள்ளது.

ஐபோனுக்காக உருவாக்கப்பட்டுள்ள இந்த செயலியில், புத்தக புழுக்கள் தாங்கள் படித்த ரசித்த புத்தகம் தொடர்பான குழுவை உருவாக்கி கொண்டு அது பற்றி விவாதிக்கலாம். இந்த குழுவில் சேருமாறு நண்பர்களுக்கு அழைப்பு விடுக்கலாம். நமக்கு பிடித்த புத்தகம் தொடர்பான குழுவில் சேர்ந்து கருத்து தெரிவிக்கலாம்.

நாம் விவாதிக்க விரும்பும் புத்தகங்களை நண்பர்களுடன் பகிர்ந்து கொண்டு கருத்து சொல்ல அழைக்கலாம். ஒவ்வொரு புத்தகம் பின்னும் ஒரு குழு இருக்கிறது என்பதை சாத்தியமாக்க விரும்புகிறது இந்த செயலி.

மேலும் விவரங்களுக்கு: http://booktribes.us/

 

 

நன்றி; தமிழ் இந்து இளமை புதுமையில் எழுதியது.

பேஸ்புக்கில் நீங்கள் யார்?

People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images
People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images

சமூக வலைப்பின்னல் சேவையான பேஸ்புக்கை நீங்கள் பயன்படுத்தும் முறை குறித்து எப்போதாவது யோசித்திருக்கிறீர்களா? அதாவது பேஸ்புக்கை எதற்காக, எப்படி பயன்படுத்துகிறீர்கள் என்று நினைத்துப்பார்த்தது உண்டா? இதுவரை இப்படி யோசித்ததில்லை எனில், இப்போது, உங்கள் பேஸ்புக் பயன்பாடு குறித்து யோசியுங்கள். ஏனெனில், பேஸ்புக்கில் நீங்கள் என்னவாக இருக்கிறீர்கள் எனும் கேள்விக்கான விடையை ஆய்வாளர்கள் கண்டறிந்துள்ளனர். அது உங்களுக்கு பொருந்துகிறதா என பார்க்க, பேஸ்புக்கை நீங்கள் எப்படி எல்லாம் பயன்படுத்துகிறீர்கள் என்பதை கொஞ்சம் சுய ஆய்வுக்கு உள்ளாக்கி கொள்வது நல்லது தானே.

இனி பேஸ்புக் தொடர்பான ஆய்வை பார்ப்போம்.

பேஸ்புக்கின் தாக்கமும், வீச்சும் அதன் பயனாளிகள் அறிந்தது தான். அண்மை புள்ளிவிவரப்படி பேஸ்புக் 200 கோடி பேர் பயனாளிகளுக்கு மேல் பெற்றுள்ளது. சராசரியாக ஒவ்வொரு நாளுன் 128 கோடி பேர் அதை பயன்படுத்துகின்றனர். பேஸ்புக் பயனாளி சராசரியாக தினமும் 35 நிமிடம் இந்த தளத்தில் செல்வு செய்கிறார்.  இவர்கள் ஒவ்வொருவரும் பேஸ்புக்கை ஒவ்வொரு விதமாக பயன்படுத்தலாம். நோக்கங்களும் மாறுபடலாம். ஆனால் இந்த இரண்டிலுமே பரவலான பொதுத்தன்மைகளை காணலாம்.

இந்த பொதுத்தன்மையை தான் அமெரிக்க ஆய்வாளர்கள் தங்கள் ஆய்வு மூலம் கண்டறிந்து அறிக்கையாக தந்துள்ளனர். பிரிகாம் யங் பல்கலைக்கழகத்தை சேர்ந்த இந்த ஆய்வாளர்கள் முன்வைக்கும் கண்டுபிடிப்பு என்னவெனில் பேஸ்புக் பயனாளிகளை அடிப்படையில் நான்கு வகையாக பிரிக்கலாம் என்பது தான். அதாவது பேஸ்புக் பயனாளிகளில் நான்கு வகை இருப்பதாக இந்த ஆய்வு சொல்கிறது.

உறவுகளை வலுப்படுத்துபவர்கள், தண்டோரா போடுபவர்கள், சுயபுராணம் பாடுபவர்கள் மற்றும் வேடிக்கை பார்ப்பவர்கள் என இந்த நான்கு வகையான பயனாளிகளை அமைகின்றனர் என தெரிவிக்கப்பட்டுள்ளது. இந்த வகையினருக்கான பேஸ்புக் குணங்களும் தெரிவிக்கப்பட்டுள்ளன.

முதல் வகையான உறவுகளை மேம்படுத்துபவர்கள், பேஸ்புக்கை தங்கள் நிஜ வாழ்க்கையின் நீட்டிப்பாக, குடும்பத்தினர் மற்றும் நண்பர்களுடன் பயன்படுத்திக்கொள்கின்றனர். இவர்கள் நிலைத்தகவல்களை வெளியிடுவதற்கு பின்னே உறவுக்கு கைகொடுப்போம் என்ற நோக்கம் இருப்பதாக ஆய்வாளர்கள் தெரிவிக்கின்றனர். அதாவது பேஸ்புக்கிற்கு வெளியே உள்ள உறவுகளை வலுப்படுத்திக்கொள்வதற்காக தான் நிலைத்தகவல்களை வெளியிடுவதிலும், பதிவுகளுக்கு பதில் சொல்வதிலும் இவர்கள் கவனம் செலுத்துகின்றனர். கொஞ்சம் ஆச்சர்யமாக இருக்கிறது என்றாலும், குடும்பத்தின் மீதான அன்பை வெளிப்படுத்தவும், அவர்கள் தங்கள் அன்பை வெளிப்படுத்தவும் பேஸ்புக் உதவுவதாக இந்த பிரிவினர் கூறியிருக்கின்றனர். இந்த பிரிவினர் ஒளிப்படங்களையும், காணொலிகளையும் அதிகம் பகிர்கின்றனர்.

இரண்டாவது பிரிவினர் தண்டோரா போடுபவர்களாக இருக்கின்றனர். இவர்களுக்கு தங்களை வெளிப்படுத்திக்கொள்வதைவிட உலகில் என்ன நடக்கிறது என்பதையும், நாட்டு நடப்புகளை பதிவு செய்வதிலும் தான் ஆர்வம் அதிகம். இவர்கள் பெரும்பாலும் செய்திகளையும் நிகழ்வுகளையும் பகிர்ந்து கொள்கின்றனர். அதே நேரத்தில் தங்கள் அறிமுக பக்கத்தை அப்டேட் செய்வதில் அதிக ஆர்வம் காட்டாதவர்களாக இருக்கின்றனர்.

மூன்றாவது பிரிவினர் சுயநல செல்பீக்கள். அதாவது தங்களை முன்னிறுத்திக்கொள்ளவும், விளம்பரப்படுத்திக்கொள்ளவும் பேஸ்புக்கை பயன்படுத்துபவர்கள். முதல் பிரிவினரைப்போலவே இவர்களும் ஒளிப்படங்கள் மற்றும் காணொலிகளை அதிகம் பகிர்ந்தாலும் நோக்கம் எல்லாம், இவற்றுக்கு எத்த்தனை லைக்குகள் குவிகின்றன என்பதிலேயே இருக்கின்றன. எந்த அளவுக்கு லைக் தொடர்பான அறிவிப்புகள் வருகின்றனவோ அந்த அளவு சக மனிதர்களால் அங்கீகரிக்கப்படுவதாக நினைக்கின்றனர்.

சரியோ தவறோ தங்களைப்பற்றிய ஒரு பிம்பத்தை பேஸ்புக் மூலம் உருவாக்குவது தான் செல்பி பிரிவினரின் நோக்கமாக அமைகிறது.

நான்காவது பிரிவினர், ஷாப்பிங் மால்களில் எதையும் வாங்காமல் அப்படியே உலா வந்து வேடிக்கை பார்ப்பவர்களுக்கு நிகரானவர்கள். இவர்கள் பேஸ்புக்கிலும் இப்படி தான் செய்து கொண்டிருக்கின்றனர். தங்களைப்பற்றி தனிப்பட்ட தகவல்களை பதிவு செய்வதில் ஆர்வம் காட்டாமல், மற்றவர்கள் என்ன செய்கின்றனர் என்பதை அறிந்து கொள்ள முற்படும் கில்லாடிகளாக இருக்கின்றனர். பேஸ்புக்கில் யாரது பக்கத்தை வேண்டுமானாலும் எட்டிப்பார்த்து அவர்கள் விருப்பு வெறுப்புகளை தெரிந்து கொள்வேன் என்று கூறுபவர்களாக இந்த பிரிவினர் இருக்கின்றனர்.

இந்த நான்கு வகை பேஸ்புக் பயனாளிகளில் தண்டோரா போடுபவர்களும், வேடிக்கை பார்ப்பவர்களும் புதிதாக வெளிச்சத்திற்கு வந்து இருப்பவர்கள் என ஆய்வை முன்னின்று நடத்திய பேராசிரியர் டாம் ராபின்சன் வியப்புடன் கூறியுள்ளார். ஏனெனில், இதற்கு முன்னரும் பேஸ்புக் பயன்பாடு தொடர்பாக பல ஆய்வுகள் நடத்தப்பட்டுள்ளன. அவற்றின் அடிப்படையில் பேஸ்புக் பயனாளிகளும் வகைப்படுத்தப்பட்டுள்ளனர். அந்த வகையினருடன் பொருத்திப்பார்க்கும் போது, உறவுகளை மேம்படுத்துபவர்களும், சுய புராணம் பார்ப்பவர்களும் எற்கனவே அறியப்பட்டுள்ளனர். ஆனால் மற்ற இரு பிரிவினரும் புதிதாக உள்ளனர் என ராபின்சன் கூறுகிறார்.

இந்த இரு பிரிவினர் குறித்து இதுவரை யாரும் அதிகம் பேசியதில்லை என்று கூறுபவ தங்கள் ஆய்வில் இவர்கள் மிகவும் பொருத்தமானவர்களாக தெரிகின்றனர் என்கிறார்.

ராபின்சனும் குழுவினரும் இந்த ஆய்வை மிக விரிவாகவே நடத்தியுள்ளனர். பேஸ்புக்குடனான தொடர்பு குறித்து 48 விதமான வாசகங்களை கொடுத்து அதற்கான கருத்துக்களை பயனாளிகளிடம் இருந்து பெற்று அதன் பிறகு தனிப்பட்ட கேள்விகளை கேட்டு ஆய்வை நடத்தியுள்ளனர். மக்கள் ஏன் பேஸ்புக்கில் தங்கள் வாழ்க்கையை வெளிப்படுத்திக்கொள்ள முற்படுகின்றனர் என்பதை ஆதார கேள்வியாக கொண்டு ஆய்வு நடந்திருக்கிறது.

ஆய்வு முடிவுகள் சுவாரஸ்யம் தருபவையாக இருப்பதோடு சிந்திக்கவும் வைக்கின்றனர். எல்லாம் சரி, இந்த நான்கு ரகத்தில் நீங்கள் எந்த ரகம் என நினைக்கிறீர்கள்? அந்த ரகம், இந்த ரகம் என தீர்மானிக்கும் முன் ஆய்வாளர்கள் சொல்லும் இன்னொரு முக்கியமான விஷயத்தையும் நினைவில் கொள்ளுங்கள். பேஸ்புக் பயனாளிகளில் பலர், இவற்றில் ஒன்றுக்கு மேற்பட்ட வகையினருடன் தங்களை தொடர்பு படுத்துக்கொள்ளலாம் என்பது தான் அது. ஒன்றுக்கும் மேற்பட்ட வகையினரின் குணத்தை பார்க்க முடிந்தாலும், குறிப்பிட்ட ஒரு வகையின் தாக்கம் தூக்கலாக இருக்கும் என்கின்றனர் ஆய்வாளர்கள். ஆய்வில் பங்கேற்றவர்களே கூட, இதில் கொஞ்சம் அதில் கொஞ்சம் என பதில் கூறினாலும், பெரும்பாலும் பார்த்தால் இது தான் என குறிப்பிட்ட ஒரு பிரிவின் பக்கம் சாய்ந்துள்ளனர். இனி, ஆய்வின் படி நீங்கள் எந்த வகை பேஸ்புக் பயனாளி என ஆய்வு செய்து கொள்ளுங்கள்!

 

 

தளம் புதிது: இணைய குலுக்கல் நடத்த உதவும் தளம்

நடைமுறை வாழ்க்கையில் செய்யும் பல விஷயங்களை இணையம் மூலம் இன்னும் எளிதாக செய்ய உதவும் இணையதளங்கள் பட்டியலில் நேம்பிக்கர்நிஞ்சா தளத்தையும் சேர்த்துக்கொள்ள வேண்டும்.

இந்த தளம், பல பெயர்களை கொண்ட பட்டியலில் இருந்து ஏதேனும் ஒரு பெயரை தேர்வு செய்ய உதவுகிறது. அதாவது பெயர்களை எல்லாம் துண்டு சீட்டுகளில் எழுதிப்போட்டு குலுக்கல் நடத்தி ஒரு பெயரை தேர்வு செய்வோம் அல்லவா? இது போன்ற நேரங்களில் இந்த தளத்தை பயன்படுத்தலாம்.

இந்த தளத்தின் முகப்பு பக்கத்தில் உள்ள பட்டியலில் பெயர்களை எல்லாம் வரிசையாக தட்டச்சு செய்து, கோ எனும் கட்டளையை கிளிக் செய்தால், பட்டியலில் உள்ள பெயர்கள் வரிசையாக ஓடி, இறுதியில் ஒரு பெயர் மட்டும் முன்வைக்கப்படுகிறது.

சீட்டு குலுக்குப்போட பயன்படுத்தலாம். அதைவிட பள்ளி ஆசரியர்கள் மாணவர்கள் பெயர்களை எழுதி, அடுத்த கேள்வி யாரிடம் கேட்பது என தீர்மானிக்க பயன்படுத்தலாம். அடுத்த முறை அந்த பெயரை மட்டும் நீக்கவிட்டு புதிதாக பயன்படுத்தலாம். அல்லது, அந்த பெயரையும் வைத்துக்கொண்டு மீண்டும் ஒரு முறை பட்டியலை சுழலவிடலாம். கேள்விக்கு பதில் சொல்ல மட்டும், வகுப்பில் மாணவர் தலைவரை தேர்வு செய்யுவும் கூட இந்த முறையை பயன்படுத்தலாம்.

எளிமையான இணையதளம் தான். ஆனால் சுவாரஸ்யமானது.

இணைய முகவரி: http://namepickerninja.com/index.html

 

 

செயலிபுதிது; வானிலை அறிய உதவும் செயலி

வானிலை அறிவதற்கு இன்னொரு செயலியை தரவிறக்கம் செய்ய நான் தயாரில்லை என நினைப்பவர்கள் கூட, ட்பிள்யூடிஎச்.ஆர் எனும் வானிலை செயலியை பார்த்தால் மனம் மாறும் வாய்ப்பு இருக்கிறது. ஏனெனில் இந்த செயலி, அத்தனை எளிமையான முறையில் வானிலை தகவல்களை அளித்து கவர்கிறது.

ஐபோனுக்கான உருவாக்கப்பட்டுள்ள இந்த செயலி, வானிலை தகவல்களை அழகாக சுட்டிக்காட்டுகிறது. ஆனால் அதைத்தவிர வேறு எதையும் செய்வதில்லை. திரையில் அன்றைய தினத்திற்கான வானிலை தகவல் இடம்பெறுகிறது, அவ்வளவு தான். கூடுதலாக வேறு எந்த தகவலும் கிடையாது.

மினிமலிசம் என்று சொல்லப்படும், தேவையான குறைந்த பட்ச தகவல்களை மட்டுமே அளிக்கும் கோட்பாட்டிற்கு ஏற்ப இந்த செயலி வானியை விவரங்களை கச்சிதமாக அளிக்கிறது. இந்த தகவல்களும் கையால் வரையப்பட்ட மேகச்சித்திரத்துடன், கையான் எழுதிய எழுத்துக்கள் மூலம் தெரிவிக்கப்படுவது இன்னும் சிறப்பு.

 

மேலும் தகவல்களுக்கு: https://itunes.apple.com/app/id1252405260

 

 

 

பிட்காயின் ஒரு அறிமுகம்!

இணைய உலகில் கீக் என குறிப்பிடப்படும் தொழில்நுட்ப பித்தர்கள் மட்டுமே அறிந்திருந்த புதுயுக நாணயமான பிட்காயின் பற்றி இப்போது பலரும் பேசத்துவங்கியிருக்கின்றனர். சில மாதங்களுக்கு முன்னர் இணைய உலகை உலுக்கிய ரான்சம்வேர் தாக்குதலுக்கு காரணமாக தாக்காளர்கள் (ஹேக்கர்கள்) பிணைத்தொகையாக பிட்காயினை கேட்டதும் இந்த டிஜிட்டல் நாணயம் மீது கூடுதல் ஆர்வத்தை ஏற்படுத்தியுள்ளது. இணைய நிழல் உலகம் என சொல்லப்படும் இருண்ட வலையில் (டார்க் வெப்) பிட்காயின் பயன்பாடு அதிகம் இருப்பதும், இதன் முக்கிய அம்சமாக சொல்லப்படும் அனாமதேய தன்மையும் பிட்காயின் மீதான ஆர்வத்தை அதிகமாக்கியுள்ளது.

இதனிடையே பிட்காயின் தொடர்பாக பொதுமக்களின் கருத்துக்களை அரசு கோரியதும், அண்மையில் நிதி அமைச்சர் பிட்காயின் குறித்து ஆலோசனை நடத்தியதும், அதென்ன பிட்காயின் என பலரையும் கேட்க வைத்துள்ளது.

இணைய உலகின் அற்புதம் என அதன் ஆதாரவாளர்களாலும், இணைய பூதம் என அதன் எதிர்ப்பாளர்களாலும் கருதப்படும் பிட்காயின் என்றால் என்ன? அதன் பயன்பாடு என்ன? பிரச்சனைகள் என்ன? போன்றவை குறித்து பார்ப்போம்…

பிட்காயின் என்றால் என்ன? இந்த கேள்விக்கு பலவிதமாக பதில் அளிக்கலாம். பிட்காயின் என்பது ஒரு வகையான மெய்நிகர் பணம் அல்லது டிஜிட்டல் பணம். இணையத்திற்கான பணம் என்றும் குறிப்பிடப்படும் பிட்காயின் கொண்டு பொருட்களை வாங்கலாம், விற்கலாம். பிட்காயினில் முதலீடு செய்யலாம். ஆனால் இந்த பணத்தை கண்ணால் பார்க்க முடியாது, கையால் தொட முடியாது. ஏனெனில் இதற்கு உருவம் கிடையாது. பிட்காயின் எண்ம வடிவிலானது. இதற்காக உருவாக்கப்பட்ட பிரத்யேக் மென்பொருளால் அடையாளம் காணக்கூடிய கம்ப்யூட்டர் நிரல் துண்டுகளால் ஆனது என வைத்துக்கொள்ளலாம்.

ஆனால், இந்த பதில்களால் பிட்காயினை முழுவதுமாக புரிந்து கொள்ள முடியாது. பிட்காயினை புரிந்து கொள்ள வேண்டும் என்றால் அதன் அடிப்படை கோட்பாட்டையும், அதற்கே உரிய தனிச்சிறப்பான அம்சங்களையும் புரிந்து கொள்ள வேண்டும்.

பிட்காயின் என்பது அடிப்படையில் மின்னணு முறையில் உருவாக்கப்பட்டு மின்னணு முறையில் வைத்திருந்து பரிவர்த்தனை செய்யப்படும் ஒரு வகையான டிஜிட்டல் பணம். பிட்காயின் என்பது டிஜிட்டல் பணம் மட்டும் அல்ல, அந்த பணம் செயல்படுவதற்கான பரிவர்த்தனை அமைப்பும் தான். இதையே வேறு விதமாக சொலவது என்றால், மற்ற பணம் போல் பிட்காயின் எந்த ஒரு நாட்டு அரசாலும் வெளியிடப்படுவதில்லை: எந்த மத்திய வங்கியாலும் கட்டுப்படுத்தப்படுவதில்லை. அதனை அச்சிடவும் முடியாது. அதனால் தான் பிட்காயின் மையமில்லா பணம் என்று சொல்லபடுகிறது.

இந்த தன்மையால் தான் பிட்காயின் ஆர்வலர்கள் அதை நேசிக்கின்றனர். மத்திய வங்கிகளும், அரசாங்களும் இதை சந்தேகமாக பார்க்கின்றனர். தாக்காளர்களும், இணைய திருடர்களும் பிட்காயினை விரும்பி நாட இதுவே காரணம்.

பிட்காயின் தகவல்கள் சுவாரஸ்யமாக இருந்தாலும், குழப்புகிறதா? அதன் பின்னே உள்ள நுணுக்கங்கள் அப்படி!

கொஞ்சம் பொறுமையாக பிட்காயினை புரிந்து கொள்ள முயற்சிப்போம். முதலில் பிட்காயின் தோற்றம் பற்றி சில தகவல்கள். பிட்காயின் டிஜிட்டல் பணம் என்று குறிப்பிடப்பட்டாலும் அது முற்றிலும் புதுவகையான நாணயம். டிஜிட்டில் வடிவிலான எல்லா பரிவர்த்தனைக்கும் அதை முறைப்படுத்தக்கூடிய ஒரு மூன்றாம் அமைப்பு தேவை. அது வங்கியாக இருக்கலாம் அல்லது கிரெடிட் கார்டு நிறுவனமாக இருக்கலாம். ஆனால் பிட்காயினை, இப்படி எந்த ஒரு மூன்றாம் அமைப்பும் இல்லாமலே வாங்குபவரும், பெறுபவரும் நேரடியாக பரிவர்த்தனை செய்து கொள்ளலாம். இப்படி, இடைத்தரகர்கள் இல்லாத, பயணாளிகளுக்கு இடையிலான பரிவர்த்தனையே பிட்காயினின் ஆதாரம் அம்சங்களில் ஒன்றாக சொல்லப்படுகிறது.

எல்லாம் சரி, நேரடியாக பரிவர்த்தனை செய்யலாம் என்றால், ஒரே பிட்காயினை பலருக்கு கொடுப்பது போன்ற ஏமாற்று வேலைகள் எல்லாம் நடக்காதா? என கேட்கலாம். அப்படி எதுவும் நடக்க முடியாத அளவுக்கு, பிட்காயின் பரிவர்த்தனைக்கான முறை பக்காவாக உருவாக்கப்பட்டுள்ளது. சமகால வங்கி அமைப்புகளே வியந்து போகும் பிளாக்செயின் எனப்படும் இந்த நுட்பம் பிட்காயினின் இன்னொரு தனிச்சிறப்பாக அமைகிறது. கள்ள நாணயம் அல்லது கருப்பு பிட்காயினுக்கு எல்லாம் வாய்ப்பு இல்லாத வகையில் பிட்காயினுக்கான ஆதார வலைப்பின்னல் அமைப்பு அமைந்துள்ளது.

இந்த அமைப்பு பற்றி பின்னர் விரிவாக பார்க்கலாம். இப்போது பிட்காயின் தோற்றத்தை கவனிக்கலாம். பிட்காயினை விட அதன் தோற்றம், புதிரானது என்பது சுவாரஸ்யமான விஷயம். 2009 ல் சடோஷி நாகமோட்டோ என்பவர் முன்வைத்த இணைய அறிக்கையில் இருந்து தான் பிட்காயின் உருவானது. ஆனால் இன்று வரை யார் இந்த சடோஷி என்பது ஒருவருக்கும் தெரியாது. அவர் ஒருவரா? அல்லது பலரா? என்பதும் தெரியாது. யார் இந்த சடோஷி என்பதை கண்டுபிடிப்பதற்கான தேடல் ஒரு பக்கம் நடந்து கொண்டே இருக்கிறது.

விஷயம் என்னவெனில், 2009 ல் மூன்றாம் தரப்பு துணை இல்லாமலே இரு நபர்கள் நேரடியாக பரிவர்த்தனை செய்து கொள்வதற்கான கம்ப்யூட்டர் சார்ந்த முறையை பிட்காயின் ஒரு சகாக்களிடையேயான மின்னணு பண பரிவர்த்தனை முறை எனும் தலைப்பிலான கட்டுரை சடோஷி பெயரில் இணையத்தில் வெளியானது. இந்த பரிவர்த்தனையை உறுதி செய்வதற்கான அடிப்படையையும் அவர் வெளியிட்டிருந்தார். இணைய ஆர்வலர்கள் பலருக்கு இந்த முறையின் பின்னே இருந்த கோட்பாடு பிடித்துப்போகவே, இதற்கு செயல்வடிவம் கொடுக்க உதவும் மென்பொருளை உருவாக்கி வெளியிட்டனர். இந்த மென்பொருளை யார் வேண்டுமானாலும் தரவிறக்கம் செய்து பயன்படுத்திக்கொள்ளலாம் என அறிவித்தனர்.

இப்படி தான் பிட்காயின் புழக்கத்திற்கு வந்தது. மத்திய வங்கிகளால் கட்டுப்படுத்தப்படாத தன்மை மற்றும் பரிவர்த்தனைக்கு பின்னே உள்ளவர்கள் அடையாளம் காணப்படாமல் அனாமதேயமாக இருப்பதற்கான வாய்ப்பு உள்ளிட்ட அம்சங்கள் இணைய ஆர்வலர்களை கவர்ந்திழுக்கவே இணைய உலகில் இந்த நாணயம் பிரபலமாகத்துவங்கியது.

கட்டுப்பாடில்லாத, மையமில்லா நாணயம் என்பது சரி. அப்படி எனில் பிட்காயினை வெளியிடுவது யார்? அது எப்படி புழக்கத்திற்கு வருகிறது? பிட்காயினை யாரும் வெளியிடுவதில்லை: மாறாக எல்லோரும் சேர்ந்து அதை உருவாக்கி புழக்கத்திற்கு கொண்டு வருகின்றனர். அதெப்படி?

பிட்காயின் என்றால், கண்ணுக்குத்தெரியாத கம்ப்யூட்டர் நிரல் துகள்களால் ஆனது அல்லவா? இந்த டிஜிட்டல் துகள்கள் பிட்காயின் மென்பொருளில் இருந்து, ஒரு வகையான கணித புதிரை விடுவிப்பது மூலம் உருவாக்கப்படுகிறது. மென்பொருளை தரவிறக்கம் செய்து, கணித புதிரை விடுவித்தால் அதற்கான பரிசாக புதிய பிட்காயினை பெறலாம். ஒவ்வொரு பத்து நிமிடத்திற்கு ஒரு முறை குறிப்பிட்ட அளவு பிட்காயின் விடுவிக்கப்படும்.

பிட்காயின் உருவாக்கத்தில் சில முக்கியமான விதிகள் இருக்கின்றன. முதல் விஷயம் பிட்காயின் உருவாக்கத்திற்கு என்று ஒரு இறுதி வரம்பு இருக்கிறது. இஷ்டம் போல பிட்காயினை உருவாக்கி கொண்டிருக்க முடியாது. இன்றைய தேதிக்கு 11 மில்லியன் பிட்காயின் உருவாக்கப்பட்டுள்ளது. ஆனால் ஆக மொத்தம் 21 மில்லியன் பிட்காயின் தான் உருவாக்கப்பட முடியும். இதற்கான கெடு 2140 என கெடு நிர்ணயிக்கப்பட்டுள்ளது. அது வரை பிட்காயின் உருவாக்கம் கடினமாகி கொண்டே இருக்கும். அதாவது போகப்போக பிட்காயின் புதிரை விடுவித்து புதிய பிட்காயின்களை விடுவிப்பது மிகவும் கடினமாகும். இதற்கு இன்னும் கூடுதலான கம்ப்யூட்டர் ஆற்றல் தேவை. இதுவே பிட்காயின் உலகின் மைனிங் என சொல்லப்படுகிறது. பிட்காயினை டிஜிட்டல் முறையில் தோண்டியெடுப்பது என்றும் புரிந்து கொள்ளலாம்.

இதில் இன்னொரு விஷயமும் கவனிக்க வேண்டும். பிட்காயின் என்பது நாணயம் மற்றும் அது செயல்படுவதற்கான அமைப்பும் என்று பார்த்தோம் அல்லவா? அதாவது பிட்காயின் உருவாக்கம் மற்றும் அதன் பரிவர்த்தனை இரண்டையும் மைனிங் தான் நிறைவேற்றித்தருகிறது. பிட்காயின் புழக்கம் அதிகரிப்பதற்கு ஏற்ப அதை பராமரிப்பதற்கு தேவையான ஆற்றலும் அதிகரிக்கும் தானே. அதனால் தான் பிட்காயின் உருவாக்கத்திற்கு தேவையான கம்ப்யூட்டர் ஆற்றலும் அதிகரிக்கும் வகையில் இந்த முறை உருவாக்கப்பட்டுள்ளது.

ஆக, கூடுதல் பிட்காயின் தேவை எனில் சக்தி வாய்ந்த கம்ப்யூட்டர்களை அமைப்பில் இணைந்து பிட்காயினை உருவாக்க வேண்டும். இதன் மூலம் அதிகரிக்கும் பிட்காயின் புழக்கத்தை கையாளும் திறனும் அமைப்பிற்கு உண்டாகும்.

கம்ப்யூட்டர் ஆற்றலை அளித்து மைனிங்கில் ஈடுபட்டால் பிட்காயினை விடுவித்து அதற்கு பரிசாக பிட்காயின் பெறலாம் சரி, ஆனால் பிட்காயினை பயன்படுத்துவது எப்படி?  அதை வைத்திருப்பது எப்படி? அதன் கொடுக்கல் வாங்கலை கண்காணிப்பது எப்படி?

இந்த கேள்விகளுக்கான பதில் பிட்காயினுக்கான பிளாக்செயின் முறையில் உள்ளது. பிளாக்செயினை டிஜிட்டல் பதிவேடு என்று வைத்துக்கொள்ளுங்களேன். ஒவ்வொரு முறை பிட்காயின் பரிவர்த்தனை செய்யப்படும் போது அதற்கான குறிப்பு இந்த பதிவேட்டில் இடம்பெறும். இது தான் பரிவர்த்தனைக்கான ஆதாரம். இந்த பதிவேட்டை பராமரிக்க ஒருவர் இருக்க வேண்டும் அல்லவா? அப்போது தானே ஏமாற்று வேலைகள் நடக்காமல் இருக்கும். ஆனால் அப்படி எந்த பராமரிப்பாளரும் கிடையாது. மையம் என்பதே பிட்காயினில் கிடையாதே, என்ன செய்ய!

எனில், பிட்காயின் பரிவர்த்தனையை உறுதி செய்வது எப்படி? பிளாக்செயின் பதிவேட்டில் தான் இதற்கான பதில் அடங்கியிருக்கிறது. ஒவ்வொருவரிடமும் ஒரு பதிவேடு இருக்கும் என்பதும், ஒவ்வொரு பரிவர்த்தனையும் எல்லா பதிவேட்டிலும் பதிவாகும் என்பது தான் விஷயம். ஆக, ஒரு முறை பரிவர்த்தனை நிகழ்ந்தால் அதற்கான குறிப்பு எல்லா பதிவேட்டிலும் அப்டேட் செய்யப்படும். இதன் பொருள் இதுவரை நிகழ்ந்த பரிவர்த்தனைகள் மற்றும் இனி நிகழ்ப்போகும் பரிவர்த்தனைகள் என எல்லாவற்றுக்குமான குறிப்புகளுடம் பிளாக் செயின் பதிவேட்டில் அப்டேட்டாகி  கொண்டே இருக்கும்.

ஒவ்வொரு பத்து நிமிடத்திற்கு நடக்கும் பரிவர்த்தனைகள் ஒரு பிளாக்காக சேர்க்கப்பட்டு ஏற்கனவே பதிவேட்டில் உள்ள பிளாக்கில் சேர்க்க்கப்படும். ஒருங்கிணைந்த பிட்காயின் மென்பொருள் கொண்டு பிட்காயின் சமூகத்தினர் தங்கள் கம்ப்யூட்டரை இணைத்து இவற்றை செய்து வருகின்றனர்.

எனவே பிடிகாயின் பரிவர்த்தனையில் போலி செய்வது, ஏமாற்றுவது சாத்தியம் இல்லை. எல்லா விவரத்திற்கும் பிளாக்செயின் சாட்சி. இந்த நுட்பத்தை தான் வங்கி அமைப்புகள் உன்னிப்பாக கவனித்து வருகின்றன. இந்த அம்சமே பிட்காயினை எதிர்கால நாணயமாக இருக்கும் என்றும் பேச வைக்கிறது.

பிட்காயினை தோண்டியெடுக்க பெரும் கம்ப்யூட்டர் ஆற்றல் தேவை என்பதால் எல்லோருக்கும் இது சாத்தியமில்லை. அதற்கான கவலைப்பட வேண்டாம், டாலர் அல்லது ரூபாய் போன்ற நாணயம் கொண்டு பிட்காயினை வாங்கிக்கொள்ளலாம். இதற்கான பிட்காயின் இணைப்பகங்கள் இணையத்தில் இருக்கின்றன. சில நாடுகளில் பிட்காயின் ஏ.டி.எம்கள் கூட இருக்கின்றன. நாணயம் வாங்குவது போல அன்றைய சந்தை விலையில் பிட்காயினை வாங்கலாம்.

சந்தையில் பிட்காயினுக்கான தேவைக்கு ஏற்ப அதன் மதிப்பு அமைகிறது. இன்றைய தேதிக்கு பிடிகாயினுக்கு நல்ல டிமாண்ட் இருப்பதால் ஒரு பிடிகாயினின் மதிப்பு 2,400 டாலருக்கு மேல். இந்திய மதிப்பை கேட்டால் தலைசுற்றும். ஒரு லட்சத்து ஐம்பத்தெட்டாயிரத்துக்கு மேல். கற்பனை செய்து பாருங்கள் சில ஆண்டுகளுக்கு முன் கொஞ்சம் பிட்காயின் வாங்கி வைத்திருந்தால் இப்போது எப்படி இருக்கும் என்று! பிட்காயின் ஒரு முதலீடாக கவர்வதற்கான காரணம் இந்த எகிரும் மதிப்பு தான். ஆனால் இடையே பிட்காயின் மதிப்பு சரிந்த காலங்களும் உண்டு என்பதை மனதில் கொள்ள வேண்டும். பங்குச்சந்தை போன்றது தான் அதுவும்.

இந்தியாவின் ஜெப்பே, காயின்செக்யூர் போன்ற ஸ்டார்ட் அப் நிறுவனங்கள் பிட்காயினை வாங்கி விற்க வழி செய்கின்றன.

பிட்காயின் மோகத்திற்கான பதில் இப்போது கிடைத்திருக்கும். சரி, பிட்காயினை எப்படி கையாள்வது? இதற்காக என்று பிட்காயின் வாலெட்கள் இருக்கின்றன. வாலெட்கள் என்றால், மின்னணு பர்ஸ் போன்றவை. இதில் தான் பிட்காயின் வீற்றிருக்கும். எண்ம நாணயம் என்பதால், இதை விடுவிக்கவும் வாங்கவும், மின்னணு பர்சிற்கான இரண்டு சாவிகள் உண்டு. ஒரு சாவி பொதுவானது. அதை பரிவர்த்தனையின் போது பகிரலாம். மற்றொரு சாவி தனிப்பட்டது. அதை ரகசியமாக வைத்திருந்து இயக்கலாம். இந்த ரகசிய சாவியே பிட்காயின் பரிவர்த்தனையை பாதுகாப்பானதாக்குகிறது.

இனி முக்கிய கேள்விகளுக்கு வருவோம். பிட்காயின் எதிர்காலம் என்ன? அது எந்த அளவு சட்டபூர்வமானது?

பிட்காயின் எதிர்காலம் எப்படி இருக்கும் என்பது சுவாரஸ்யமான கேள்வி. அதன் ஆதாரவாளர்கள் பிட்காயின் தான் எதிர்கால பணம் என்று கொண்டாடுகின்றனர். தொழில்நுட்ப ஆர்வலர்கள் பலரும் இதன் அம்சங்களால் கவரப்பட்டு பிட்காயினுக்கு தாவுகின்றனர். தடயம் இல்லாத பரிவர்த்தனை என்பதால் தாக்காளர்கள் பிணைத்தொகை கேட்டாலும் பிட்காயினாக கேட்கின்றனர்.

மையமில்லாத பணம் என்பதால் மத்திய வங்கிகள் பிட்காயினை சந்தேகத்துடனே நோக்குகின்றன. பிட்காயினுக்கான சட்டபூர்வ அந்தஸ்து நாட்டுக்கு நாடு மாறுகிறது. ஒருசில நாடுகள் பிட்காயின் பரிவர்த்தனையை சட்ட விரோதமானதாக அறிவித்துள்ளன ஆனால் பணமாக பிட்காயின் பரிவர்த்தனை தொடர்பான அணுகுமுறை மற்றும் கட்டுப்பாடுகளும் மாறுபடுகின்றன.

இந்தியாவை பொருத்தவரை பிட்காயின் பயன்பாட்டிற்கு அவரவரே பொறுப்பு என ரிசர்வ வங்கி சில மாதங்களுக்கு முன் எச்சரித்துள்ளது. அதன் பிறகு மத்திய நிதி அமைச்சகம் சார்பில் பிட்காயின் உள்ளிட்ட டிஜிட்டல் நாணயங்கள் ( பிட்காயின் போலவே வேறு பல நாணயங்களும் உள்ளன) தொடர்பாக ஆய்வு செய்ய ஒரு குழு அமைக்கப்பட்டது. மத்திய அரசும் டிஜிட்டல் நாணயங்களை கட்டுப்படுத்துவது தொடர்பாக பொதுமக்களின் கருத்துக்களை இணையம் மூலம் கோரியது. அண்மையில் நிதி அமைச்சர் அருண் ஜேட்லி தலைமையில் இது தொடர்பாக ஆலோசனை கூட்டமும் நடைபெற்றுள்ளது.

பிட்காயின் போன்ற டிஜிட்டல் நாணயங்களை கட்டுப்படுத்துவது அல்லது முறைப்படுத்துவது தொடர்பான விவாதமும் தீவிரமாகி வரும் நிலையில் பிட்காயின் மீதான ஆர்வமும் அதிகரித்து வருகிறது.

 

ரொக்கமில்லா சமூகம் சாத்தியமா? அலசும் ‘டிஜிட்டல் பணம்” புத்தகம்

vanigaபணமதிப்பு நீக்க நடவடிக்கைக்கு பிறகு டிஜிட்டல் பரிவர்த்தனை தொடர்பான சர்ச்சையும், விவாதமும் தீவிரமடைந்து சற்று ஓய்ந்திருக்கிறது. இந்நிலையில், டிஜிட்டல் பரிவர்த்தனையை மையமாக கொண்டு டிஜிட்டல் பணம் புத்தகம் வெளியாகி இருக்கிறது. பத்திரிகையாளரும், தொழில்நுட்ப வலைப்பதிவாளருமான சைபர்சிம்மன் இந்த புத்தகத்தை எழுதியிருக்கிறார். கிழக்கு பதிப்பக வெளியீடாக இந்த நூல் வெளியாகி இருக்கிறது.

கடந்த நவம்பர் மாதம் அறிவிக்கப்பட்ட பண மதிப்பு நீக்க நடவடிக்கை பொதுமக்களுக்கு ஒரு பக்கம் பெரும் இன்னலை ஏற்படுத்தினாலும், டிஜிட்டல் பரிவர்த்தனையை சார்ந்த ரொக்கமில்லா சமூகம் தொடர்பான விவாதத்தையும் ஏற்படுத்தியது. இந்தியா போன்ற நாட்டில் முழுவதும் டிஜிட்டல் பரிவர்த்தனைக்கு மாறுவது சாத்தியம் தானா? எனும் கேள்வியும் பலரால் கேட்கப்பட்டது. இதற்கான பதில்கள் மாறுபட்ட நிலையில், எல்லாமே டிஜிட்டலுக்கு மாறிவரும் உலகில் பணமும் டிஜிட்டல்மயமாவது தவிக்க இயலாதது என வாதிடுகிறது ‘டிஜிட்டல் பணம்’ புத்தகம்.

நவீன தொழில்நுட்ப வளர்ச்சியின் காரணமாக உலகம் ரொக்கமில்லா சமூகத்தை நோக்கி முன்னேறிக்கொண்டிருப்பதை விவரிக்கும் இந்த புத்தகம், இந்தியா போன்ற நாடுகளில், இதற்கு கைகொடுக்க கூடிய மொபைல் பணம் தொடர்பான விரிவாக பேசுகிறது.

சாதாரண செல்போன் மூலம் டிஜிட்டல் பண பரிவர்த்தனையை சாத்தியமாக்கும் மொபைல் பணம் சார்ந்த முன்னோடி முயற்சிகள் பற்றி விரிவான கட்டுரைகள் இடம்பெற்றுள்ளன. மொபைல் பணம் சார்ந்த முன்னோடி முயற்சிகள் இந்தியாவில் நடைபெற்று வருவதை அடையாளம் கட்டுரைகள் நிச்சயம் வியப்பில் ஆழ்த்தும்.

 

இந்த புத்தகம் தொடர்பான கேள்விகளுக்கு சைபர்சிம்மன் அளித்த பதில்கள் வருமாறு:

டிஜிட்டல் பணம் புத்தகம் எழுதியது ஏன்?

பணமதிப்பு நீக்க நடவடிக்கை அறிவிக்கப்பட்ட பின், ரொக்க பணத்திற்கான தட்டுப்பாடு நிலவிய நிலையில், டிஜிட்டல் பரிவர்த்தனைக்கு மாறுவது தொடர்பான அவசியத்தை வலியுறுத்தி இந்த புத்தகத்தை எழுதுவதற்கான எண்ணம் உண்டானது. ஏடிஎம் வாயில்களில் நீண்ட வரிசையில் மக்கள் கால் கடுக்க காத்திருந்த நிலையில், பொது கருத்து டிஜிட்டல் பரிவர்த்தனைக்கு எதிராக அமைந்த நிலையில் இந்த புத்தகத்திற்கான தகவல் சேகரிப்பு மற்றும் ஆய்வில் ஈடுபட்டிருந்தேன்.

டிஜிட்டல் பணம் இந்தியாவுக்கு எல்லாம் சரிபட்டு வராது என பரவலாக கருதப்பட்ட சூழலில் இந்த புத்தகத்தை எழுத தீர்மானித்ததற்கு சில முக்கிய காரணங்கள் உண்டு. அவற்றில் முதன்மையானது கென்யாவில் எம்-பெசா எனும் மொபைல் பணம் பெரும் வெற்றி பெற்று ஒரு முன்னோடி முயற்சியாக இருந்ததை அறிந்திருந்தது தான். ஆப்பிரிக்க நாடான கென்யாவில் மொபைல் மூலமான பண பரிவர்த்தனை சரியாக வரும் எனில் இந்தியாவிலும் இந்த சிக்கலுக்கான பதில் மொபைல் பணமாக தான் இருக்க வேண்டும் என நம்பினேன்.

இங்கு கவனிக்க வேண்டிய விஷயம், மொபைல் பணம் என்பது பரவலாக அறியப்பட்ட மொபைல் வாலெட்டில் இருந்து வேறுபட்டது. இது சாதாரணா செல்போனிலேயே செயல்படக்கூடியது. அதனால் தான் எம்-பெசா கென்யாவில் வெற்றி பெற்று மற்ற ஏழை நாடுகளிலும் பரவலானது . உள்நாட்டு போரால் பாதிக்கப்பட்ட ஆப்கானிஸ்தான் மற்றும் சோமாலியாவிலும் மொபைல் பணம் செயல்படுத்தப்படுவதை கட்டுரைகள் வாயிலாக அறிய முடிந்தது.

எம்-பெசா பற்றிய புரிதலே இந்த புத்தகம் எழுத மூலக்காரணம். அதே போலவே தொழில்நுட்பத்தின் மீது எனக்கிருந்த ஆர்வமும், நம்பிக்கையும் மற்றொரு முக்கிய காரணமாக அமைந்தது. டிஜிட்டல்மயமாக்கலின் முக்கியத்துவம் மற்றும் தவிர்க்க இயலா தன்மையை அறிந்திருப்பதால் பணமும் டிஜிட்டல்மயமாக வேண்டும் என நினைத்தேன். அதுவே இந்த புத்தகத்தை எழுத மூலக்காரணம்.

moneyரொக்கமில்லா சமூகம் ஏன் தேவை என நினைக்கிறீர்கள்?

பண பரிவர்த்தனை தொடர்பான வரலாற்று செய்திகளை தேடிப்படித்த போது இன்னும் கூடுதல் புரிதல் கிடைத்தது. ரொக்கமில்லா சமூகம் எனும் கருத்தாக்கத்தின் துவக்கப்புள்ளி காசோலை இல்லா சமூகம் எனும் புள்ளியிலிருந்து துவங்குவதையும், கம்ப்யூட்டர்களின் வருகை மற்றும் பயன்பாடு இதற்கு முக்கிய காரணம் என்பதையும் அறிய முடிந்தது. இந்த வரலாறு பற்றிய கட்டுரைகள் புத்தகத்தின் துவக்கமாக அமைந்துள்ளன.

உண்மையில், தந்தி மூலமான தகவல் பரிமாற்றம் பண பரிவர்த்தனைக்கு உதவிய காலத்திலேயே பணம் டிஜிட்டல் மயமாவது துவங்கிவிட்டது. இப்போது நவீன தொழில்நுட்பம் இதை மேலும் செழுமையாக்கியுள்ளது.

இவைத்தவிர ஸ்வீடன் போன்ற நாடுகள் ரொக்கமில்லா சமூகத்திற்கு மாறியுள்ள தகவலும் என்னை ஈர்த்தன. ஸ்விடனில் ரொக்கமில்லா சமூகத்திற்கான கருத்தாக்கம் வேரூன்றிய விதமும், செயல்படுததப்படும் விதமும் தனிக்கட்டுரைகளாக அமைந்துள்ளன.

ஸ்வீடன் சரி, இந்தியாவுக்கு எப்படி பொருந்தும் என கேட்பர்வர்களுக்கு பதிலாக நம் நாட்டிலேயே விளிம்பு நிலை மக்களுக்கு மொபைல் பணம் மூலம் நிதிச்சேவைகளை கொண்டு சேர்க்கும் எகோ மணி, பீம் மணி போன்ற முயற்சிகள் அமைந்துள்ளன. இவை பற்றிய தனிக்கட்டுரைகள் உள்ளன. இது தவிர வங்கதேசத்தில் மொபைல் போனை ஏழைகளுக்கு கொண்டு சென்ற முன்னோடி தொழில்முனைவோரான இக்பால் காதீர் பற்றியும் எழுதியுள்ளேன்.

உண்மையில் ரொக்கமில்லா சமூகத்தின் சாத்தியம் பற்றிய வல்லுனர்கள் விவாதம் மற்றும் சந்தேகங்களை மீறி, மொபைல் பணம் சார்ந்த முன்னோடி முயற்சிகளில் ஈடுபட்டுள்ள தொலைநோக்கு மிக்க மனிதர்களின் முயற்சியே இந்த புத்தகத்தை எழுதும் உத்வேகத்தை தீவிரமாக்கியது.

அதென்ன மொபைல் பணம்?

இந்த புத்தகத்தை எழுதும் முயற்சியில் ஈடுபட்டிருந்த போது,  ரொக்கமில்லா சமூகத்தில் வாழந்து பார்த்த மனிதர்களின் பரிசோதனை முயற்சியும் அறிந்து கொள்ள முடிந்தது. முக்கியமாக பணத்தின் வரலாற்றை ஆய்வு செய்து எழுதிய பத்திரிகையாளர் டேவிட் வால்மனின் புத்தகம் பற்றி படித்தது கண்களை திறந்துவிட்டது போல இருந்தது. வால்மன் புத்தகம் மூலமே இந்தியாவில் மொபைல் பணம் முயற்சிகள் பற்றி அறிய முடிந்தது.

மொபைல் பணம் என்பது செல்போன் மூலமான டிஜிட்டல் பணவர்த்தனை. மொபைல் பணம் என்பது செல்போன் ரீசார்ஜ் செய்வது போலதான். சாதாரண செல்போனே இதற்கு போதும். இந்த வகை பரிவர்த்தனை வசதி மூலம் குக்கிராமங்களுக்கு கூட டிஜிட்டல் பரிவர்த்தனையை கொண்டு செல்லலாம். இதற்கு உதாரணமாக திகழும் இந்திய கிராமம் பற்றியும் புத்தகத்தில் தனிக்கட்டுரை இடம்பெற்றுள்ளது.

ரொக்கமில்லா சமூகத்தின் சாத்தியம் குறித்த அனைத்து அம்சங்களை எழுத விரும்பினாலும், அதன் மீதான சந்தேகங்களுக்கு பதிலாக அமையக்கூடிய மொபைல் பணம் பற்றிய முக்கிய கவனம் செலுத்தியுள்ளேன்.

இந்த புத்தகம் எழுதும் போக்கில், மொபைல் பணம் மூலம் ஏழை மக்களுக்கு நிதிச்சேவைகளை கொண்டு செல்லும் முயற்சிகள் பற்றியும், வங்கியில்லா வங்கிச்சேவைகள் பற்றியும் அறிந்து கொள்ள முடிந்தது. ஏழைகளுக்கு டிஜிட்டல் பணம் எல்லாம் சரிபட்டு வருமா என்பது தவறான கேள்வி. உண்மையில் டிஜிட்டல் பணம் மூலம் தான் ஏழைகளுக்கு அடிப்படை நிதிச்சேவைகளை அளிக்க முடியும் என்பது தான் இந்த புத்தகம் சொல்லும் சேதி.

இந்த புத்தகம் ரொக்கமில்லா சமூகத்திற்கு ஆதாரவானதா?

ஆம்.

இந்தியா போன்ற நாடுகளில் ரொக்கமில்லா சமூகம் எப்படி சாத்தியம்?

இதற்கான பதில் மொபைல் பணம் எனும் கருத்தாக்கத்தில் உள்ளது. அதை மையமாக கொண்ட முயற்சிகளை தான் இந்த புத்தகம் பேசுகிறது.

  • கிரெடிட் கார்டு, டெபிட் கார்டு எல்லோரிடமும் இல்லையே?

கார்டு தேவையில்லை. மொபைல் போதுமானது என்பதே இந்த புத்தகத்தின் அடிநாதம்.

 

  • ஸ்மார்ட்போனும் எல்லோரிடமும் இல்லையே?

தேவையில்லை. சாதாரண போனே போதும்.

  • எப்படி ?

கென்யாவின் மொபைல் பணமான எம்-பெசா இதற்கான உதாரணம்.

  • இந்தியாவில் யதார்த்தம் என்ன?

இந்தியாவிலும் எகோ மணி, பீம் மணி போன்ற முன்னோடி உதாரணங்கள் உள்ளன. இந்தியா மட்டும் அல்ல ஆப்கானிஸ்தான் , சோமாலிலாந்தில் முன்னோடி முயற்சிகள் மேற்கொள்ளபடுகின்றன.

  • ரொக்கமில்லா பரிவர்த்தனை ஏழைகளுக்கு பாதகமாக அமையாதா?

பரவலாக கருதப்படுவதற்கு மாறாக ரொகமில்லா பரிவர்த்தனை ஏழைகளுக்கு உதவக்கூடியது. மொபைல் பணம் என்பது ஏழைகளுக்கான வங்கிச்சேவைக்கான அடிப்படையாக பார்க்கபடுகிறது.

  • வங்கி சேவையை இன்னும் பரவலாகவில்லையே?

வங்கிச்சேவையை ஏழைகள் மற்றும் விளிம்பு நிலை மக்களுக்கு கொண்டு செல்ல செல்போன் உதவும். செல்போன் மாற்றத்திற்கான சாதமாக பார்க்கப்படுக்கிறது. மூன்றாம் உலக நாடுகளில் இதற்கான முன்னோடி முயற்சிகள் இருக்கின்றன.

  • இந்த புத்தகத்திற்கான அவசியம் என்ன?

உலகில் எல்லாம் டிஜிட்டல்மயமாகி வருகிறது. பணமும் டிஜிட்டல் மயமாவது தொழில்நுட்ப நோக்கில் தவிர்க்க இயலாதது. அதற்கு நாம் தயாராக வேண்டும். உலகின் பல்வேறு நாடுகளில் இந்த முயற்சி துவங்கிவிட்டது. நாமும் பின் தங்கியிருக்க முடியாது. அது மட்டும் அல்ல, பண பரிவர்த்தனையை டிஜிட்டல் மயமாக்க தொழில்நுட்பம் சார்ந்த பல முன்னோடி முயற்சிகள் மேற்கொள்ளப்பட்டு வருகின்றன. நாமும் அதில் இணைவதே சரி . இல்லை எனிம் தொழில்புரட்சி பேருந்தை தவறவிட்டது போல டிஜிட்டல் பண பேரூந்தை தவறவிட்டு பின்னால் ஓட வேண்டியிருக்கும்.

  • பணமதிப்பு நீக்க நடவடிக்கை பற்றி?

இந்த புத்தகம் அது பற்றி பேசவில்லை.

  • ஏன்?

இதன் மைய நோக்கம் அதுவல்ல. பண மதிப்பு நீக்க நடவடிக்கையின் போது அதிக கவனத்தையும், சர்சையையும், விவாதத்தையும் ஏற்படுத்திய ரொக்கமில்லா பரிவர்த்தனையின் சார்பு அம்சங்களை தொழில்நுட்ப நோக்கில் இந்த புத்தகம் பேசுகிறது.

  • பண மதிப்பு நீக்க நடவடிக்கை சரியானதா?

தெரியாது. ஆனால் அது மிக மோசமாக செயல்படுத்தப்பட்டது.

  • டிஜிட்டல் பணத்தில் வேறு என்ன சாதகம் உண்டு?

டிஜிட்டல் பணம் டிஜிட்டல் கடன், அனைவரிக்குமான வங்கி- நிதிச்சேவைகள் பற்றி எல்லாம் சிந்திக்க வைக்கிறது. நடைமுறையிலும் செயல்பட வைக்கிறது.

  • கருப்புபணம் ஒழியுமா?

ஓரளவு உதவலாம். ஆனால் கருப்பு பணம் வேறு பிரச்சனை.

  • டிஜிட்டல் பணம் பாதுகாப்பானதா?

பாதுகாப்பாக ஆக்குவதற்கான எல்லா வழிமுறைகளும் உள்ளன. ஆனால் சைபர் தாக்குதல், இணைய களவு உள்ளிட்ட ஆபத்துகள் உள்ளனை. அவற்றை எதிர்கொள்ள வேண்டும். ஆனால் இது டிஜிட்டல் யுகத்தின் பிரச்சனை. டிஜிட்டல் பணத்திற்கு மட்டும் உரியது அல்ல. டிஜிட்டல் பணம் இல்லாவிட்டாலும் கூட இத்தகைய ஆபத்துகள் உண்டு.

  • இந்த புத்தகத்தை படித்தால் டிஜிட்டல் பணத்திற்கு மாற முடியுமா?

இல்லை. டிஜிட்டல் பணம் தொடர்பாக உலகில், குறிப்பாக தொழில்நுட்ப உலகில் நடைபெறும் முன்னோடி முயற்சிகளை தெரிந்து கொண்டு நீங்களாக அதை நோக்கி முன்னேறலாம்.

 

 

’டிஜிட்டல் பணம்’

சைபர்சிம்மன்

கிழக்கு பதிப்பக வெளியீடு

விலை.ரூ150

 

—-

நன்றி; வணிகமணி இதழ் 

 

டிஜிட்டல் பணம் புத்தகம் எழுதியது ஏன்?

moneyபணமதிப்பு நீக்க நடவடிக்கை அறிவிக்கப்பட்ட பின், ரொக்க பணத்திற்கான தட்டுப்பாடு நிலவிய நிலையில், டிஜிட்டல் பரிவர்த்தனைக்கு மாறுவது தொடர்பான அவசியத்தை வலியுறுத்தி இந்த புத்தகத்தை எழுதுவதற்கான எண்ணம் உண்டானது. ஏடிஎம் வாயில்களில் நீண்ட வரிசையில் மக்கள் கால் கடுக்க காத்திருந்த நிலையில், பொது கருத்து டிஜிட்டல் பரிவர்த்தனைக்கு எதிராக அமைந்த நிலையில் இந்த புத்தகத்திற்கான தகவல் சேகரிப்பு மற்றும் ஆய்வில் ஈடுபட்டிருந்தேன்.

டிஜிட்டல் பணம் இந்தியாவுக்கு எல்லாம் சரிபட்டு வராது என பரவலாக கருதப்பட்ட சூழலில் இந்த புத்தகத்தை எழுத தீர்மானித்ததற்கு சில முக்கிய காரணங்கள் உண்டு. அவற்றில் முதன்மையானது கென்யாவில் எம்-பெசா எனும் மொபைல் பணம் பெரும் வெற்றி பெற்று ஒரு முன்னோடி முயற்சியாக இருந்ததை அறிந்திருந்தது தான். ஆப்பிரிக்க நாடான கென்யாவில் மொபைல் மூலமான பண பரிவர்த்தனை சரியாக வரும் எனில் இந்தியாவிலும் இந்த சிக்கலுக்கான பதில் மொபைல் பணமாக தான் இருக்க வேண்டும் என நம்பினேன்.

இங்கு கவனிக்க வேண்டிய விஷயம், மொபைல் பணம் என்பது பரவலாக அறியப்பட்ட மொபைல் வாலெட்டில் இருந்து வேறுபட்டது. இது சாதாரணா செல்போனிலேயே செயல்படக்கூடியது. அதனால் தான் எம்-பெசா கென்யாவில் வெற்றி பெற்று மற்ற ஏழை நாடுகளிலும் பரவலானது . உள்நாட்டு போரால் பாதிக்கப்பட்ட ஆப்கானிஸ்தான் மற்றும் சோமாலியாவிலும் மொபைல் பணம் செயல்படுத்தப்படுவதை கட்டுரைகள் வாயிலாக அறிய முடிந்தது.

எம்-பெசா

எம்-பெசா பற்றிய புரிதலே இந்த புத்தகம் எழுத மூலக்காரணம். அதே போலவே தொழில்நுட்பத்தின் மீது எனக்கிருந்த ஆர்வமும், நம்பிக்கையும் மற்றொரு முக்கிய காரணமாக அமைந்தது. டிஜிட்டல்மயமாக்கலின் முக்கியத்துவம் மற்றும் தவிர்க்க இயலா தன்மையை அறிந்திருப்பதால் பணமும் டிஜிட்டல்மயமாக வேண்டும் என நினைத்தேன்.

பண பரிவர்த்தனை தொடர்பான வரலாற்று செய்திகளை தேடிப்படித்த போது இன்னும் கூடுதல் புரிதல் கிடைத்தது. ரொக்கமில்லா சமூகம் எனும் கருத்தாக்கத்தின் துவக்கப்புள்ளி காசோலை இல்லா சமூகம் எனும் புள்ளியிலிருந்து துவங்குவதையும், கம்ப்யூட்டர்களின் வருகை மற்றும் பயன்பாடு இதற்கு முக்கிய காரணம் என்பதையும் அறிய முடிந்தது. இந்த வரலாறு பற்றிய கட்டுரைகள் புத்தகத்தின் துவக்கமாக அமைந்துள்ளன.

உண்மையில், தந்தி மூலமான தகவல் பரிமாற்றம் பண பரிவர்த்தனைக்கு உதவிய காலத்திலேயே பணம் டிஜிட்டல் மயமாவது துவங்கிவிட்டது. இப்போது நவீன தொழில்நுட்பம் இதை மேலும் செழுமையாக்கியுள்ளது.

இவைத்தவிர ஸ்வீடன் போன்ற நாடுகள் ரொக்கமில்லா சமூகத்திற்கு மாறியுள்ள தகவலும் என்னை ஈர்த்தன. ஸ்விடனில் ரொக்கமில்லா சமூகத்திற்கான கருத்தாக்கம் வேரூன்றிய விதமும், செயல்படுததப்படும் விதமும் தனிக்கட்டுரைகளாக அமைந்துள்ளன.

ஸ்வீடன் சரி, இந்தியாவுக்கு எப்படி பொருந்தும் என கேட்பர்வர்களுக்கு பதிலாக நம் நாட்டிலேயே விளிம்பு நிலை மக்களுக்கு மொபைல் பணம் மூலம் நிதிச்சேவைகளை கொண்டு சேர்க்கும் எகோ மணி, பீம் மணி போன்ற முயற்சிகள் அமைந்துள்ளன. இவை பற்றிய தனிக்கட்டுரைகள் உள்ளன.

ஏழைகளுக்கானது …

இது தவிர வங்கதேசத்தில் மொபைல் போனை ஏழைகளுக்கு கொண்டு சென்ற முன்னோடி தொழில்முனைவொரான இக்பால் காதீர் பற்றியும் எழுதியுள்ளேன்.

உண்மையில் ரொக்கமில்லா சமூகத்தின் சாத்தியம் பற்றிய வல்லுனர்கள் விவாதம் மற்றும் சந்தேகங்களை மீறி, மொபைல் பணம் சார்ந்த முன்னோடி முயற்சிகளில் ஈடுபட்டுள்ள தொலைநோக்கு மிக்க மனிதர்களின் முயற்சியே இந்த புத்தகத்தை எழுதும் உத்வேகத்தை தீவிரமாக்கியது.

இதனிடையே ரொக்கமில்லா சமூகத்தில் வாழந்து பார்த்த மனிதர்களின் பரிசோதனை முயற்சியும் அறிந்து கொள்ள முடிந்தது. முக்கியமாக பணத்தின் வரலாற்றை ஆய்வு செய்து எழுதிய பத்திரிகையாளர் டேவிட் வால்மனின் புத்தகம் பற்றி படித்தது கண்களை திறந்துவிட்டது போல இருந்தது. வால்மன் புத்தகம் மூலமே இந்தியாவில் மொபைல் பணம் முயற்சிகள் பற்றி அறிய முடிந்ததை என்னவென சொல்வது?

மொபைல் பணம் !

ரொக்கமில்லா சமூகத்தின் சாத்தியம் குறித்த அனைத்து அம்சங்களை எழுத விரும்பினாலும், அதன் மீதான சந்தேகங்களுக்கு பதிலாக அமையக்கூடிய மொபைல் பணம் பற்றிய முக்கிய கவனம் செலுத்தியுள்ளேன்.

இந்த புத்தகம் எழுதும் போக்கில், மொபைல் பணம் மூலம் ஏழை மக்களுக்கு நிதிச்சேவைகளை கொண்டு செல்லும் முயற்சிகள் பற்றியும், வங்கியில்லா வங்கிச்சேவைகள் பற்றியும் அறிந்து கொள்ள முடிந்தது. ஏழைகளுக்கு டிஜிட்டல் பணம் எல்லாம் சரிபட்டு வருமா என்பது தவறான கேள்வி. உண்மையில் டிஜிட்டல் பணம் மூலம் தான் ஏழைகளுக்கு அடிப்படை நிதிச்சேவைகளை அளிக்க முடியும் என்பது தான் இந்த புத்தகம் சொல்லும் சேதி.

புத்தகத்தை வாசித்துப்பார்த்து இதை ஏற்க முடிகிறதா என சொல்லுங்கள்.

 

அன்புடன் சைபர்சிம்மன்

 

டிஜிட்டல் பணம் –

கிழக்கு பதிப்பக வெளியீடு,

விலைரூ.150