Category Archives: இணைய செய்திகள்

பிட்காயினில் முதலீடு செய்யலாமா?

பிட்காயின் என்றால் என்ன? எனும் கேள்வியை இப்போது பலரும் கேட்கத்துவங்கியிருக்கின்றனர். இந்த கேள்விக்கு பின்னே ஒரு ஆர்வம் இருக்கிறது. ( அதிகப்படியான ஆர்வம் என்றும் சொல்லலாம். அதை பின்னர் பார்ப்போம்). இந்த ஆர்வம் தான் முக்கியம். ஏனெனில் இதற்கு முன்னர் கூட இந்த கேள்வி கேட்கப்பட்டிருக்கிறது. அப்போதெல்லாம், கேட்பவரிடம் பிட்காயின் பற்றிய அறியாமையே இருக்கும். பெரும்பாலானவர்கள் பிட்காயின் எனும் ஒரு வஸ்து இருப்பதையே அறிந்திருக்க வாய்ப்பில்லை. எனவே எங்காவது பிட்காயின் பற்றி கேள்விப்படும் போது, பிட்காயின் என்றால் என்ன? என்று ஒருவித அலட்சியத்துடம் அது பற்றி அறிந்து கொள்ளும் ஆர்வம் இல்லாமல் கேட்கும் நிலை இருந்தது.

சுருக்கமாக சொன்னால், பிட்காயின் பற்றி பெரும்பாலானோர் அறிந்திருக்கவில்லை, அது பற்றி கவலைப்படவும் இல்லை. எதிர்கால நாணயம், மறை பணம், டிஜிட்டல் நாணயம் என்றெல்லாம் பலவிதமாக வர்ணிக்கப்பட்ட பிட்காயினின் அருமையையும், மகிமையும் உணர்ந்த தொழில்நுட்ப பித்தர்களும், நவீன அபிமானிகளும் இருந்தாலும் அவர்கள் தனித்தீவு போலவே இருந்தனர். பிட்காயின் தொடர்பான இணையதளங்களும், விவாத குழுக்களும் அநேகம் இருந்தாலும்,  அவற்றை தொழில்நுட்ப சமூகத்திற்கு வெளியே யாரும் பெரிதாக அறிந்திருக்கவில்லை.

ஆனால், இப்போது பிட்காயினுக்கு மவுஸ் அதிகரித்திருக்கிறது. அதன் விளைவு தான் பலரும் பிட்காயின் பற்றி அறிந்து கொள்ள விரும்புகின்றனர். இந்த ஆர்வத்திற்கு இரண்டு முக்கிய காரணங்கள் இருக்கின்றன. ஒன்று பிட்காயின், இணைய மிரட்டலுக்கான பணமாக அறியப்படுவது. மற்றொன்று பிட்காயின் புதிய தங்கம் என சொல்லப்படுவது.

கடந்த சில மாதங்களுக்கு முன் இணைய உலகை ரான்சம்வேர் வைரஸ் உலுக்கியது நினைவில் இருக்கிறதா? எங்கோ இருக்கும் ஹேக்கர்கள் பயனாளிகளின் கம்ப்யூட்டருக்கு டிஜிட்டல் பூட்டு போட்டு அதை விடுவிக்க பணம் கேட்டு மிரட்டியதால் மற்ற வைரஸ்களைவிட இந்த வைரஸ் நெட்டிசன்களையும், சிட்டிசன்களையும் கொஞ்சம் கூடுதலாகவே கவர்ந்தது. அது மட்டும் அல்ல, இந்த ஹேக்கர்கள் தாங்கள் சிக்கி கொள்ளக்கூடாது என்பதற்காக பினைத்தொகையை ரூபாயாகவோ, டாலாரகாவோ கேட்காமல் பிட்காயினாக கேட்டது நெட்டிசன்களை பிட்காயின் பற்றி யோசிக்க வைத்தது. ஹேக்கர்கள் ஏன் பிட்காயினை கேட்டனர் எனும் கேள்விக்கு இது புதுவகையான பணம், இதை எந்த மத்திய வங்கிகளும் வெளியிடுவதில்லை, இதன் பரிவர்த்தனை பிளாக்செயின் மூலம் நிகழ்கிறது என்றெல்லாம் அடுக்கி கொண்டே போகலாம் என்றாலும் மக்கள் மத்தியில் பதிந்த விஷயம் பிட்காயின் அனாமதேய பணம் என்பதும், அதில் கொடுக்க வாங்கல் வைத்துக்கொண்டால் காவல்துறையால் கண்டுபிடிக்க முடியாது என்பது தான். எனவே டிஜிட்டல் நாணயமான பிட்காயினை இணைய நிழல் உலகிற்கான பணம் என எளிதாக புரிந்து கொண்டனர்.

அதே நேரத்தில், பிட்காயினின் மதிப்பு எங்கே போய்க்கொண்டிருப்பதும், ஒரு சில பிட்காயின்கள் வைத்திருந்தால் கூட இன்று அதன் மதிப்பு லட்சக்கணக்கில் என்று சொல்லப்படுவதும், பிட்காயின் மீது தனி ஆர்வத்தை ஏற்படுத்தி விட்டிருக்கிறது. பிட்காயினை பரிவர்த்தனை செய்யலாம் என்கின்றனர். அதை டாலராகவோ வேறு நாணயமாகவோ மாற்றிக்கொள்ளலாம். இன்றைய தேதி கணக்குப்படி ஒரு பிட்காயினின் மதிப்பு இந்திய நாணயப்படி கிட்டத்தட்ட மூன்று லட்சம் ரூபாய். ஆக, சில ஆண்டுகளுக்கு முன் கொஞ்சம் போல பிட்காயினை வாங்கிப்போட்டிருந்தால் ( வாங்க முடியாது, இணையத்தில் கம்ப்யூட்டர் கொண்டு மைன் செய்ய வேண்டும் என்பது வேறு விஷயம்) இன்று லட்சாதிபதி என்று சொல்லப்படுவதில் ஒரு ஈர்ப்பு இருக்கத்தானே செய்கிறது.

பிட்காயின் தொடர்பான மற்ற விஷயங்களும், விளக்கங்களும் குழப்பத்தை ஏற்படுத்தினாலும், அதை எப்படி பர்வர்த்தனை செய்வது, எப்படி பயன்படுத்துவது போன்றவை இன்னும் சிக்கலாக தோன்றினாலும், பிட்காயின் மதிப்பு ஏறிக்கொண்டிருக்கிறது (இறங்கவும் செய்கிறது) என்பது, பிட்காயின் மீது தனி ஈடுபாட்டை ஏற்படுத்தியிருகிறது. அதோடு தொழில்நுட்ப கில்லாடிகள் பலரும் பிட்காயினில் முதலீடு செய்து வருவதும் இதை மிகச்சிறந்த முதலீடு என பேச வைத்திருக்கிறது. எப்படி ஒரு காலத்தில் காலி மனைகள் வாங்கிப்போட்டால், எதிர்காலத்தில் அதை விற்று பணமாக்கலாம் என கருதப்பட்டதோ அதே போல, இப்போது பிட்காயின் ஒரு முதலீடாக பார்க்கப்படுகிறது. பத்திரிகை கட்டுரைகளும் பிட்காயினை புதிய தங்கம் என வர்ணிக்கும் போது கேட்கவா வேண்டும்!

பொதுமக்கள் மத்தியில் பிட்காயினை வாங்கும் பழக்கம் வந்துவிடவில்லை என்றாலும், இந்த புரியாத நாணயத்தில் பணத்தை போட்டால் அது பலன் தரும் முதலீடாக இருக்கும் எனும் எண்ணம் வலுப்பெறத்துவங்கியிருக்கிறது. பங்குச்சந்தை முதலீடு போல வருங்காலத்தில் பலரும் பிட்காயின் முதலீட்டில் ஆர்வம் காட்டலாம். இப்போதே கூட, புத்திசாலிகள் சிலர் பிட்காயினை வாங்கிப்போடுவோம் என நினைத்து செயல்பட்டுக்கொண்டிருக்கலாம்.

எல்லாம் சரி, பிட்காயினில் முதலீடு செய்யலாமா? இந்த முதலீடு எதிர்பார்த்த பலன் தருமா? பிட்காயினை கண்டுகொள்ளாமல் இருப்பது அருமையான வாய்ப்பை தவறவிடுவதாகுமா?

இது போன்ற கேள்விகளுக்கு எளிய பதில்கள் இல்லை. எல்லா முதலீடுகள் போலவே பிட்காயின் முதலீடும் ரிஸ்கானவை, அவை அள்ளித்தரலாம். அல்லது மதிப்பு சரிந்து காலையும் வாரலாம். ஆனால் விஷயம் அதுவல்ல, பிட்காயினை முதலீடு நோக்கில் மட்டும் அணுகுவது சரியாக இருக்காது.

முதலில் பிட்காயினை புரிந்து கொள்ள வேண்டும். இதுவரை பிட்காயினை வாலெட்டில் வைத்திருப்பவர்கள் ( அதற்கென டிஜிட்டல் பர்ஸ் இருக்கிறது) அடிப்படையில் பிட்காயினின் மைய கருத்தாக்கத்தால் ஈர்க்கப்பட்டவர்கள். அதன் பயனாக அவர்கள் பிட்காயினில் பரிவர்த்தனை செய்ய விரும்பினர். அது அவர்களுக்கு முதலீடாகவும் பலன் அளிக்கிறது. இதில் யூக பேரங்கள் நுழைந்துவிட்டன என்றாலும், பிட்காயினில் ஆர்வம் உள்ளவர்கள் முதலில் அதை முழுமையாக புரிந்து கொள்வதே சரியாக இருக்கும்.

பிட்காயினின் அடிப்படை கருத்தாக்கத்தை உள்வாங்கிக்கொள்ள வேண்டும். பிட்காயினை அதன் அபிமானிகள் விரும்புவதற்கான முக்கிய காரணம், அது அனாமதேய பணமாக இருக்கிறது என்பது மட்டும் அல்ல, அது மையமாக கட்டுப்படுத்தப்படாத பணமாகவும் இருப்பதனால் தான். கோட்பாடு அளவில் பார்த்தால், பிட்காயின் எந்த ஒரு அரசாங்கம் அல்லது மத்திய வங்கியால் வெளியிடப்படாமல் அதன் பயனாளிகளால் நிர்வகிகப்படும் பணம். பிட்காயினை இஷ்டம் போல அச்சிட முடியாது என்பதும், நிர்ணயிக்கப்பட்ட அளவு நாணயங்கள் மட்டுமே மொத்தமாக உருவாக்கப்பட முடியும் என்பது போன்ற பல அமசங்கள் அதில் இருக்கின்றன. மேலும் பிட்காயின் பரிவர்த்தனைகள் அனைத்தும் கண்ணுக்குத்தெரியாத டிஜிட்டல் லெட்ஜரில் பதிவாகி வருகின்றன. பிளாக்செயின் என சொல்லப்படும் இந்த நுட்பத்தை தான் வங்கிகளும் நிதி உலகுமும் உன்னிபாக கவனித்து வருகின்றன.

ஆக, கொள்கை அளவிலும், தொழில்நுட்ப நோக்கிலும் அறிந்து கொள்ள பிட்காயினில் அநேக விஷயங்கள் இருக்கின்றன. அதன் பிறகே பிட்காயின் முதலீடு பற்றி யோசிக்க வேண்டும். அது மட்டும் அல்ல பிட்காயினின் சட்டப்பூர்வ அந்தஸ்தும் கேள்விக்குறியாக இருக்கிறது. இந்தியாவில் பிட்காயின் பயன்பாடு பற்றி ரிசர்வ் வங்கி ஏற்கனவே எச்சரித்துள்ளது. இந்த நாணயத்தை முறைப்படுத்துவது பற்றியும் பேச்சு இருக்கிறது.

எனவே பிட்காயினை தொடர்ந்து கவனியுங்கள், அது நல்ல விஷயம்.

இந்த கதை எல்லாம் வேண்டாம், பிட்காயினில் முதலீடு செய்யலாமா? வேண்டாமா? என தொடர்ந்து பிடிவாதமாக கேட்டால், பொருளாதார பேராசிரியர் ராபர்ட் ஷில்லர் பிட்காயின் பற்றி அண்மையில் அளித்துள்ள பேட்டியில் கூறிய கருத்துக்களை தான் சுட்டிக்காட்ட வேண்டும். ஷில்லர் ஒன்றும் சாதாரண பேராசிரியர் அல்ல. மனிதர் பொருளாதாரத்திற்கான நோபல் பரிசு பெற்றவர். அதைவிட முக்கியமான விஷயம், 2008 ல் அமெரிக்காவில் உருவான பொருளாதார நெருக்கடியால் உலக அளவில் பெரும் தேக்க நிலை உண்டானது அல்லவா? அது பற்றி 2003 ம் ஆண்டே கணித்து எச்சரித்தவர் ஷில்லர்.

அமெரிக்காவில் வீடுகளின் விலை எக்கச்சக்கமாக உயர்வது கண்டு, இது செயற்கையானது, இந்த குமிழ் வெடிக்கும் என அவர் எச்சரித்தார். சில ஆண்டுகள் கழித்து சப் பிரைம் கிரைசிஸ் வடிவில் அந்த குழு வெடித்தது.

இப்படி வரலாறுதோறும் ஏற்படும் குமிழ்கள் மற்றும் அவற்றிக்கு காரணமாக மிகை ஆர்வம் பற்றியும் ஷில்லர் விரிவாக ஆய்வு செய்து எழுதியும் பேசியும் வருகிறார்.

அப்படிப்பட்ட ஷில்லர் தான், தற்போதைய சூழலில் மிகை ஆர்வத்திற்கு அழகான உதாரணம் பிட்காயின் என கூறியிருக்கிறார். பிட்காயின் கதைக்கு உள்ள ஊக்கம் தரும் தன்மையும், அதன் பின்னே உள்ள மர்ம நிறுவனர் கதையும் சேர்த்து இதன் மீதான ஆர்வத்தை அதிகமாக்கியுள்ளது என்கிறார் ஷில்லர். பிட்காயினை என்னால் புரிந்து கொள்ள முடியும், அதில் யூகம் செய்து பணம் பார்க்க முடியும் என்ற நம்பிக்கை பலருக்கு இருப்பதாகவும் ஷில்லர் கூறியிருக்கிறார்.

ஆக, பிட்காயின் பற்றி புரிந்து கொள்ளும் முயற்சியை நீங்கள் ஷில்லரின் பேட்டியில் இருந்து கூட துவக்கலாம்: https://qz.com/1067557/robert-shiller-wrote-the-book-on-bubbles-he-says-the-best-example-right-now-is-bitcoin/

யுவர் ஸ்டோரி தமிழில் எழுதும் தகவல் திங்கள் இதழில் எழுதியது. இப்போதைய சூழலில் இன்னும் பொருத்தமான வாசிப்பு.

 

டிஜிட்டல் விடுதலை அளிக்கும் இசை சாதனம்

20160919_MIGHTY_RIO18_CMF1_-_BluBlack_-_HERO_Shadow_-_SML_largeகட்டுரைக்குள் நுழைவதற்கு முன் ஒரு சிறு குறிப்பு. இந்த கட்டுரையில் விவரிக்கப்பட இருக்கும் இசை சாதனத்தை இந்தியர்கள் இப்போதைக்கு பயன்படுத்துவதற்கான வாய்ப்பில்லை. ஏனெனில் இந்த சாதனத்தை தருவித்துக்கொண்டாலும் அதன் ஆதாரமாக இருக்கும் இசை பாயும் சேவையான ஸ்பாட்டிபை இந்தியாவில் இன்னமும் அதிகாரபூர்வமாக அறிமுகமாகவில்லை என்பதால், அதை பயன்படுத்த முடியாது. அதனால் என்ன, சில சாதனங்களை நீங்கள் பயன்படுத்த வேண்டும் என்றில்லை, அதன் கருத்தாக்கத்தை தெரிந்து கொண்டாலே அட, நன்றாக இருக்கிறதே என வியக்கத்தோன்றும்.

அப்படி வியந்து போவதற்காக தான், மைட்டி எனும் அந்த சாதனத்தை இந்தப்பகுதியில் அறிமுகம் செய்து கொள்வோம். இந்த சாதனம் புதுமையானது மட்டும் அல்ல விஷயம், நாம் வசிக்கும் காலத்தையும் நினைவூட்டுவதாக இந்த சாதனம் அமைந்திருப்பது தான் இன்னும் முக்கியமான விஷயம்.

ஆம். நாம் கேட்ஜெட்களின் காலத்தில் வசிக்கிறோம். இதை ஒரு நுகர்வோராகவும் நாம் உணர வேண்டியது அவசியம். தொழில்முனைவோராகவும் இதை உணர்ந்திருப்பது நல்லது. அப்போது தான் மைட்டி போன்ற புதுமையான கேட்ஜெட்டை நம்மாலும் உருவாக்க முடியும்.

கேட்ஜெட் என்பதை குறுஞ்சாதனம் என்று புரிந்து கொள்ளலாம். டிவி ரிமோட் துவங்கி, கார் கதவுகள் தானாக லாக் செய்து கொள்ள உதவும் சாவிக்கொத்து சாதனம் வரை பலவிதமான கேட்ஜெட்களை நாம் பயன்படுத்துகிறோம். ஏசி ரிமோட், கிட்சன் டைமர் எல்லாவற்றையும் இதில் சேர்த்துக்கொள்ளலாம். இவைத்தவிர பிரத்யேகமான கேட்ஜெட்களும் அறிமுகமாகி கொண்டிருக்கின்றன. இந்த வரிசையில் தான் மைட்டி கேட்ஜெட்டும் அறிமுகமாகி இருக்கிறது.

உள்ளங்கையில் அடங்கிவிடக்கூடிய வகையில் சதுர வடிவமாக இருக்கும் இந்த சாதனம் ஒரு இசை கேட்பு சாதனம். அதாவது மியூசிக் பிளேயர். இதில் உள்ள பட்டனை நான்கு திசையிலும் அழுத்தி பாட்டு கேட்கலாம். இதை சட்டை பாக்கெட் அல்லது பாண்ட் பாக்கெட்டில் சொருகி கொண்டால் போதும், இயர்போனில் விரும்பிய இசையை கேட்டு மகிழலாம். இதென்ன பிரமாதம், ஸ்மார்ட்போன் இருந்தாலே போதுமே எப்போது வேண்டுமானாலும் இசை கேட்கலாமே, இதற்கு என தனியே ஒரு சாதனம் தேவையா? என்று நீங்கள் கேட்கலாம். விஷயமே அது தான். இது ஸ்மார்ட்போனுக்கான துணை சாதனம். அதாவது ஸ்மார்ட்போனை கையில் எடுத்துச்செல்லாமலே அதன் மூலம் இசை கேட்டு ரசிக்க வழி செய்யும் சாதனம்.

நீங்கள் இசைப்பிரியர் என்றால், அதிலும் ஸ்டீரிமிங் வகையில் இசையை பாய்ந்தோடச்செய்யும் ஸ்பாட்டிபை சேவையின் ரசிகர் என்றால், இது போன்ற ஒரு சாதனத்தின் தேவையை எளிதாக புரிந்து கொள்ளலாம். ஏனெனில் அவர்களுக்காக உருவாக்கப்பட்டது தான் இந்த சாதனம். ஸ்பாட்டிபை காப்புரிமை சிக்கல் இல்லாமல் சந்தா செலுத்தி விரும்பிய பாடல்களை ஸ்டீரிமிங் முறையில் கேட்டு ரசிக்க வழி செய்யும் சேவை என்பதை நீங்கள் அறிந்திருக்கலாம். காப்புரிமை காரணமாகவே இன்னமும் இந்தியாவில் அந்த சேவை அதிகாரபூர்வமாக அறிமுகமாகவில்லை.

ஸ்பாட்டிபை சேவையை கம்ப்யூட்டரிலும் கேட்கலாம்; அதைவிட சுலபமாக செயலி மூலம் ஸ்மார்ட்போனிலும் கேட்கலாம். வீட்டில் இருக்கும் போது அல்லது பஸ்சிலோ, காரிலோ பயணம் செய்யும் போதோ ஸ்மார்ட்போனில் ஸ்பாட்டிபை மூலம் பாட்டு கேட்பதில் எந்த சிக்கலும் இல்லை. ஆனால் ஜாகிங் செல்லும் போது அல்லது உடற்பயிற்சி செய்யும் போது ஸ்மார்ட்போனை கையில் எடுத்துச்செல்வது சிக்கலாக இருக்கலாம். இது போன்ற நேரங்களில் காதில் இயர்போனை மாட்டியபடி பாடல்களை கேட்டுக்கொண்டிருப்பது உற்சாகத்தை அளிக்க கூடும் என்றாலும், ஸ்மார்ட்போன் இல்லாமல் இது சாத்தியமில்லை. ஆனால், ஜாகிங்கிற்கு நடுவே ஸ்மார்ட்போன் இடைஞ்சலாக இருக்கலாம். அது மட்டும் அல்ல அதன் அழைப்புகளும், நோட்டிபிகேஷன்களும் தொல்லையாக அமையலாம்.

இவை எல்லாம் இல்லாமல், இசையை மட்டும் கேட்டு ரசித்தபடி, ஜாகிங்கோ, வாக்கிங்கோ அல்லது டிரெக்கிங்கோ செய்ய முடிந்தால் எப்படி இருக்கும்? என்று ஏங்குபவர்களுக்காக உருவாக்கப்பட்டது தான் மைட்டி இசை கேட்பு சாதனம். ஆப்பிளின் பழைய ஐபாடு இசை எம்பி 3 பிளேயரை நினைவுபடுத்தும் இந்த சாதனத்தை ஏகாந்தமாக வெளியே செல்ல விரும்பும் போது கையில் எடுத்துச்செல்லலாம். புளுடூத் மற்றும் வயர்லெஸ் மூலம் இதை ஸ்மார்ட்போனில் இணைத்துவிட்டால் போதும் ஸ்பாட்டிபையில் கேட்க விரும்பும் பாடல்களை இதிலேயே கேட்கலாம். இதற்கான பிரத்யேக ஒருங்கினைப்பு செயலியையும் மைட்டி வழங்குகிறது. ஆக, வெளியே செல்லும் போது, போன் கீழே விழுந்த விடும் என்ற கவலை இல்லாமல் பாட்டு கேட்கலாம். அது மட்டும் அல்ல, நொடிக்கொரு முறை போனை எடுத்துப்பார்க்க வேண்டும் எனும் டிஜிட்டல் கவனச்சிதறல்கள் இல்லாமல் காரியத்தில் கண்ணாக இருக்கலாம். இத்தகைய டிஜிட்டல் விடுதலையை விரும்புகிறவர்கள் மைட்டியை நிச்சயம் கூடுதலாக விரும்புவார்கள்.

இது தான் மைட்டியின் கதை. யோசித்துப்பார்த்தால் ஆச்சர்யமாக இருக்கும். படம் பார்ப்பது, பாட்டு கேட்பது, கேம் ஆடுவது என எல்லாவற்றையும் ஸ்மார்ட்போன் மூலமே நிறைவேற்றிக்கொள்ளலாம் எனும் நிலையில், பாடல்களை கேட்டு ரசிப்பதற்காக மட்டுமே ஒரு சின்னஞ்சிறிய சாதனத்தை உருவாக்குவதும் அதற்கான தேவை இருப்பதை உணர்வதும் ஆச்சர்யமானது தான் இல்லையா!

அதிலும் குறிப்பாக டிஜிட்டல் இசையை கேட்க வழி செய்து பெரும் வெற்றி பெற்ற ஆப்பிளின் ஐபாடு சாதனம், ஐபோன் எழுச்சிக்குப்பிறகு தேவையற்று போய்விட்டதாக கருதப்பட்ட நிலையில், மைட்டி வடிவில் இசை கேட்பு சாதனம் மறு அவதாரம் எடுத்துள்ளது ஆச்சர்யமானது. ஆனால், முன்னாள் கூகுள் பொறியாளரான அந்தோனி மெண்டல்சனுக்கு முதன் முதலில் இந்த ஐடியா உதித்த போது, இது செல்லுபடியாகும் என எத்தனை பேர் நினைத்திருப்பார்கள் எனத்தெரியவில்லை. அதனால் தான் மெண்டல்சன், இணைய நிதி திரட்டும் மேடையான கிக்ஸ்டார்ட்டரை இதற்கான வெள்ளோட்ட மேடையாக தேர்வு செய்தார்.

மைட்டி சாதனத்தின் மையக்கருத்தை விளக்கி கூறி, இதற்கு ஆதரவு அளிக்குமாறு கிக்ஸ்டார்ட்டர் மூலம் அவர் கோரினார். இதற்கு அமோக வரவேற்பு கிடைத்ததோடு கேட்டதை விட அதிகமாக நிதியும் குவிந்தது. ஆனால் வாக்குறுதி அளித்தது போல் உடனடியாக மைட்டி சாதனத்தை உற்பத்தி செய்து கொடுக்க முடியாமல் போனாலும் சற்று தாமதமாக இந்த சாதனம் அதை ஆதரித்தவர்களுக்கு அனுப்பி வைக்கப்பட்டுள்ளது. அது மட்டும் அல்ல, இப்போது கட்டணம் செலுத்தி வாங்கிக்கொள்ளும் வகையில் சந்தையிலும் அறிமுகம் செய்யப்பட்டுள்ளது.

,கொஞ்சம் புதுமையான ஐடியாவில் உருவானது தான் மைட்டி சாதனம். ஆனால் இதற்கான தேவை இருப்பதை இசைப்பிரியர்கள் நிருபித்துள்ளனர். ஸ்மார்ட்போன் தான் எல்லாம் என்பதை எல்லாம் விட்டுத்தள்ளுங்கள், நமக்கு இது போன்ற சின்னஞ்சிறிய சாதனங்களும் தேவை தான். அதனால் தான் நம் காலத்தை கேட்ஜெட்களின் காலம் என்பது பொருத்தமாக இருக்கும்!

மைட்டி சாதனத்தின் இணையதளம்: https://bemighty.com/

ரோபோ புன்னகை என்ன விலை?

DOnf8ENXcAAXL_Zவிருதுகள், தேர்வுகள் என்று வந்தாலே சர்ச்சைகள் எழுவது இயல்பானது தான். ஆனால், சர்வதேச புகைப்பட போட்டி ஒன்றில் எழுந்திருக்கும் சர்ச்சை கொஞ்சம் வித்தியாசமானது. இந்த சர்ச்சை விருதுக்கு தேர்வு செய்யப்பட்ட புகைப்படத்தின் தரம் அல்லது தகுதி குறித்து உண்டாகவில்லை. மாறாக புகைப்படத்தில் இருக்க வேண்டிய உயிர்த்துடிப்பு அல்லது ஆன்மா தொடர்பான கேள்விகளை எழுப்புகிறது. இந்த கேள்விகள் சுவாரஸ்யமாக அமைவதோடு, நம் காலத்து கேள்விகளாகவும் இருப்பது தான் முக்கிய விஷயமாக இருக்கிறது.

சர்ச்சைக்குள்ளாகி இருக்கும் அந்த புகைப்படத்தில் ஒரு நல்ல புகைப்படத்திற்கு தேவையான எல்லா அம்சங்களும் இருக்கவே செய்கின்றன. அந்த படம் அழகாக இருக்கிறது. அதில் ஒரு வசீகரம் இருக்கிறது. அது ஒரு மைய கருத்தை பேசுகிறது. எல்லாம் இருந்தும் அந்த படத்தினுள் உயிரோட்டம் இல்லை எனும் குற்றச்சாட்டு எழுந்துள்ளது. ஏனெனில் அந்த படத்தில் இருப்பது மனித முகம் அல்ல, மனித இயந்திரம் முகம் என்பது தான்!

மனித மாதிரிகளை போஸ் கொடுக்க வைத்து படம் எடுப்பது போல, புகைப்பட கலைஞர் ஒருவர் இயந்திர மனித மாதிரியை போஸ் கொடுக்க வைத்து படம் எடுத்திருக்கிறார். படம் எடுத்தவர் பின்லாந்து நாட்டைச்சேர்ந்தவர். அவர் படம் எடுத்த மாதிரி, ஜப்பானைச்சேர்ந்த எரிகா எனும் எந்திரன். எரிகா ஒரு ரோபோ தான் என்றாலும், சாதாரண ரோபோ அல்ல. அது ஒரு ஆண்ட்ராய்டு. அதாவது மனித முகம் போன்ற தோற்றத்தை கொண்ட ரோபோ.

ரோப்போக்களி;ல் பலவகை உண்டு. தொழிற்சாலைகளில் பார்க்க கூடிய ரோபோக்கள் இயந்திர வகையை சேர்ந்தவை. மனித வடிவிலான ரோபோக்களும் இருக்கின்றன. ஹோண்டோவின் அசிமோ இதற்கு நல்ல உதாரணம். ரோபோ விலங்குகளும் உள்ளன. அண்மையிம் மறுஅறிமுகம் செய்யப்படுவதாக அறிவிக்கப்பட்ட சோனியின் ஐபோ நாய்க்குட்டி இதற்கு அழகான உதாரணம். இன்னும் பல வகை ரோபோக்கள் உள்ளன. இவற்றில் அச்சு அசல் மனித உருவத்தை கொண்டுள்ளவை ஆண்ட்ராய்டு என குறிப்பிடப்படுகின்றன.

ஆண்ட்ராய்டு ரோபோவுக்கு உதாரணம் தேவையில் எனில் நமக்கு பரீட்சயமான எந்திரன் படத்தின் சிட்டி ரோபோவை சொல்லலாம். ரஜினியை போலவே காட்சி அளித்தததால் தான் சிட்டி ஆண்ட்ராய்டு ரகம். இத்தகைய ஆண்ட்ராய்டு ரோபோ உருவாக்கத்திலும், ஆய்விலும் முன்னணியில் இருப்பது ஜப்பானியர்கள் தான். அதிலும் ஹிரோஷி இஷிகுரோ (Hiroshi Ishiguro ) எனும் விஞ்ஞானி தான் படுகில்லாடியாக இருக்கிறார். ரோபோ குரு என்றே வர்ணிக்கப்படும் இஷிகுரோ, மனித வடிவிலான ரோபோக்களை உருவாக்கும் ஆய்வில் தீவிரமாக ஈடுபட்டு வருபவர். சுய தோற்றம் கொண்ட ரோபோ ஒன்றையும் உருவாக்கியுள்ள இஷிகுரோவின் மற்றொரு உருவாக்கம் தான் எரிகா.

23 வயது பெண் தோற்றம் கொண்ட எரிகாவை விஷேசமான ரோபோ என்று தான் சொல்ல வேண்டும். ஏனெனில் இது பேசும் ரோபோ என்பது மட்டும் அல்ல, கிட்டத்தட்ட மனிதர்கள் போலவே பேசும் ஆற்றலும் கொண்டது. குறிப்பிட்ட தலைப்புகளின் கீழ் உரையாடவும் செய்யக்கூடியது. உலகிலேயே மிகவும் அழகான ஆண்ட்ராய்டு என வர்ணிக்கப்படும் எரிகா, மனித தோற்றத்துக்கு மிகவும் நெருக்கமான உருவ அமைப்பையும் கொண்டிருக்கிறது.

இஷிகுரோ உருவாக்கிய ரோபோக்களில் எரிகா மட்டும் தான் சுயம்பு ரகம். அதாவது, மனித மாதிரியை அடிப்படையாக கொள்ளாமல் சுயேட்சையாக உருவாக்கப்பட்டது.

எரிகா ரோபோ பற்றியே நிறைய பேசலாம். ஆனால், இப்போதைக்கு எரிகாவால் உண்டான சர்ச்சை மற்றும் அது தொடர்பான இருத்தலியல் கேள்விகள் பார்க்கலாம்.

எரிகா அச்சு அசல் பெண் போலவே இருப்பதால் பின்லாந்து புகைப்படக்கலைஞரான மைஜா டம்மி என்பவர், எரிகாவை அழகாக படமெடுத்து டெய்லர் வெஸிக் போட்டோகிராபில் போர்ட்ரய்ட் பரிசுக்கு அனுப்பி வைத்தார். அந்த புகைப்படம் இறுதிச்சுற்றுக்கு தேர்வானதோடு, மூன்றாவது பரிசையும் வென்றிருக்கிறது. இந்த தேர்வே சர்ச்சைக்கு காரணமாகியுள்ளது.

போட்டியே போர்ட்ரயட் எனப்படும் உருவப்படம் தொடர்பானது. உருவப்படம் என்றால், மனிதர்களின் ஆளுமை சித்திரங்கள் என புரிந்து கொள்ளலாம். இந்த வகை படங்கள் பல உணர்வுகளை சொல்லாமல் சொல்லக்கூடியவை. இந்த போட்டியிலேயே முதல் பரிசை வென்ற லிபியா கடற்கரை பகுதியில் மீட்கப்பட்ட ஆப்பிரிக்க அகதியின் புகைப்படம் இதற்கான சரியான உதாரணமாக அமைகிறது. காமிராவை அகன்ற கண்களால் வெறித்துப்பார்ப்பது போல அமைந்துள்ள அந்த அகதியின் ஊடுருவும் பார்வை, மீட்கப்பட்ட நம்பிக்கை, சூழலின் மீதான அவநம்பிக்கை, இனம் புரியாத அச்சம் என பலவித உணர்வுகளை பேசுவதாக பாராட்டப்படுகிறது.

இத்தகைய ஆளுமை சித்திரங்கள் நடுவே ஒரு ரோபோ படத்தை தேர்வு செய்வது சரியா? என்பது தான் கேள்வியாக எழுந்துள்ளது. ஆனால், இந்த கேள்விக்கு பதில் தேடும் முன் எரிகாவின் உருவப்படத்தை ஒரு முறை பார்த்துவிட வேண்டும். முதல் பார்வைக்கு ஜப்பானிய பெண் எனும் தோற்றத்தை தரக்கூடிய அந்த புகைப்படத்தில் எரிகா, பக்கவாட்டில் நோக்கியபடி புன்னகைக்க முயல்பவர் போல காட்சி அளிக்கிறார். இந்த படத்தை சட்டென்று பார்க்கும் எவரும் இதில் உள்ளது ரோபோ என உணர மாட்டார்.

எனினும் எரிகா ரோபோ என்று கண்டுபிடிக்க முடியாதது என்பதல்ல விஷயம். எரிகா எனும் ரோபோவை படம் எடுத்து அனுப்பியிருக்கிறேன் என்று குறிப்பிட்டே புகைப்பட கலைஞர் டம்மி போட்டியில் பங்கேற்று இருக்கிறார். இந்த விஷயம் தெரிந்து விவாதிக்கப்பட்டே நடுவர்களும் இந்த படத்தை அனுமதித்து தேர்வும் செய்துள்ளனர்.

_97673208_taylor_wessing_ppp_2017_0155உருவப்படத்திற்கான போட்டி விதிகளின் படி, வாழ்க்கையில் இருந்து தேர்வு செய்யப்பட்டவர் மற்றும் உயிருடன் போஸ் கொடுத்தவரின் படமாக இருக்க வேண்டும் என தெளிவாக குறிப்பிடப்பட்டுள்ளது. அதன் படி பார்த்தால், ரோபோவை படமெடுத்தது உருவப்படம் கீழ் வராது. ஆனால் இந்த காரணத்தினால் படத்தை தகுதி நீக்கம் செய்யாமல், தேர்வு செய்ய நடுவர்கள் தீர்மானித்துள்ளனர். இது தொடர்பாக விதிகளில் மாற்றம் தேவையா என பின்னர் தீர்மானிக்கபடும் என கூறியுள்ள போட்டி நிர்வாகிகள், ஒரு சில தீவிரமான உருவப்பட சித்திரங்கள், அவற்றின் ரகம் தொடர்பாக வலுவான கேள்விகளை எழுப்பக்கூடியவை எனும் அடிப்படையில் எரிகாவின் தேர்வு அனுமதிக்கப்படுவதாக தெரிவித்துள்ளனர்.

ஒரு ரோபோ புகைப்படம் பரிசுக்குறியதாக தேர்வு செய்யப்பட்டது சுவாரஸ்யமாக இருந்தாலும், புகைப்பட வல்லுனர்கள் இதை கேள்விக்குள்ளாக்கி உள்ளனர். உருவப்படம் என்பது ஜீவன் சார்ந்தது, உயிரில்லாத ஒரு படத்தை எப்படி ஏற்க முடியும் என கேள்வி எழுப்பியுள்ளனர். இந்த படம் அழகாக இருக்கலாம் ஆனால், அதில் ஜீவனோ, உயிரோட்டமோ இல்லையே என விமர்சித்துள்ளனர். எரிகா ஒரு பொம்மை போல் அல்லவா இருக்கிறது, அதன் ஆன்மா எங்கே என்றும் சிலர் கேட்டுள்ளனர்.

இந்த கேள்விகளே அழமான விவாதத்திற்கு வழி வகுத்துள்ளன. ரோபோக்கள் சகஜமாக துவங்கும் சாத்தியம் உள்ள சூழலில், ஆன்மா இல்லை என்பதால் அவற்றை நிராகரிக்க முடியுமா என்பது போன்ற கேள்விகள் எழுகின்றன. அதிலும் செயற்கை நுண்ணறிவு சார்ந்த ஆய்வுகள் தீவிரமடைந்துள்ள நிலையில், பேசும் இயந்திரங்களும், இன்னும் பிறவகை புத்திசாலி இயந்திரங்களும் உருவாக்கப்பட்டு வரும் சூழலில் இயந்திரம் தொடர்பான நம்முடைய புரிதல் எவற்றின் அடிப்படையில் அமைய வேண்டும் எனும் கேள்வி எழுகிறது.

ஒரு சில புகைப்பட கலைஞர்கள் எரிகா சர்ச்சை சார்ந்து இருத்தலியல் தொடர்பான கேள்விகளையும் எழுப்பியுள்ளனர். எது ரோபோ தன்மை, எது மனித தன்மை எனும் கேள்விகளும் இது தொடர்பாக எழுகின்றன.

எரிகாவை படமெடுத்த புகைப்படக்கலைஞர் டம்மி எதிர்பார்த்ததும் இத்தகைய விவாதத்தை தான். ’ மனிதர்களாக இருப்பது என்றால் என்ன? உயிருடன் இருப்பது என்றால் என்ன? என்பது போன்ற கேள்விகளை எழுப்ப முயன்றிருக்கிறேன் என அவர் கூறியிருக்கிறார். இதற்காகவே ஜப்பான் சென்று எரிகாவுடன் அரை மணி நேரம் செலவிட்டு இந்த படத்தை எடுத்துள்ளார்.

புகைப்படக்கலையில் டாக்டர் பட்டம் பெற ஆய்வு செய்து வருபவர் ரோபோக்களை நாம் அணுகும் விதத்தையும் கேள்விக்குள்ளாக்குகிறார். அவர் எழுப்பும் கேள்வியில் உங்களுக்கு உடன்பாடு இருக்கிறதா? உங்கள் பதிலை பதிவு செய்யுங்களேன்.

 

எரிகா தேர்வு புகைப்பட போட்டி செய்தி: http://www.bbc.com/news/in-pictures-41161964

புகைப்பட போட்டி அமைப்பின் இணையதளம்: https://www.npg.org.uk/whatson/twppp-2017/exhibition.php

 

நன்றி; யுவர் ஸ்டோரி தமிழ் இணையதளத்தில் எழுதும் பத்தியிர்ல் இருந்து…

 

பிரபஞ்ச ரகசியமும், காணாமல் போன அணுக்களும்!

cc_Large-scale_structure_of_light_distribution_in_the_universe_16x9பூமி தட்டை என கருதப்பட்டு பின்னர் உருண்டை என கண்டறியப்பட்டது தெரிந்த விஷுயம் தான். இவ்வளவு ஏன், செயற்கைகோள் உதவியால் இப்போது பூமி பந்தை பறவை பார்வையாகவும் பார்க்கலாம். எல்லாம் சரி, இந்த பூமி உருண்டையில், பிறை நில வடிவில் உள்ள பகுதி மட்டுமே கண்ணில் படுகிறது, மற்ற பகுதி எல்லாம் எங்கே போயின என்று தெரியாமல் இருந்தால் எப்படி இருக்கும்.

நல்ல வேளையாக பூமிக்கு இப்படி எல்லாம் எதுவும் ஆகிவிடவில்லை. ஆனால் பிரபஞ்சத்திற்கு இது போன்ற நிலை இருப்பது விஞ்ஞானிகளை வெகுகாலமாக குழப்பிக்கொண்டிருக்கிறது தெரியுமா?

ஆம், பிரபஞ்சத்தில் இருக்க வேண்டிய வஸ்துகளில் பெரும்பகுதி காணாமல் போய்விட்டதாக கருதப்படுகிறது. இவற்றை தான் விஞ்ஞானிகள் ரொம்ப காலமாக தேடிக்கொண்டிருக்கின்றனர். இந்த தேடலில் இப்போது ஒரு ஒளிக்கீற்று தென்பட்டு பிரபஞ்ச புதிர் கொஞ்சம் விடுபடவும் செய்திருப்பதாக இரு ஆய்வுகள் தெரிவிக்கின்றன.

சாமானியர்களுக்கு இது ஆச்சர்யமாக இருக்கலாம். பிரபஞ்சத்தில் தான் நமது சூரிய குடும்பம் இருக்கிறது. சூரிய குடும்பம் தவிர எண்ணற்ற நட்சத்திரங்களும், எர்கற்களும் இன்னும் பிற வஸ்துகளும் இருக்கின்றன. எல்லாம் சேர்ந்து தான் பால்வீதி மண்டலமாக அமைகிறது. பால்வீதி மண்டலம் தவிர லட்சக்கணக்காண மண்டலங்கள் ( கேலக்ஸி) சேர்ந்தது தான் பிரபஞ்சம். அதுவும் விரிவடைந்து கொண்டே இருக்கிறது.

இந்த பிரபஞ்சம் பற்றி நமக்கு தெரிந்த விஷயங்கள் உண்மையிலேயே கையளவு தான். தெரியாதது பிரபஞ்ச அளவு. எனவே பிரபஞ்சம் பற்றிய புரிதலை மேலும் தெளிவாக்கி கொள்வதற்காக விஞ்ஞானிகள் தொடர்ந்து ஆய்வில் ஈடுபட்டு வருகின்றனர். இதன் பயனாக பிரபஞ்சம் எப்படி தோன்றியிருக்கும் என்பதை ஓரளவு துல்லியமாக கணித்திருக்கின்றனர். ஆதியில் ஒரு பெரு வெடிப்பு நிகழ்ந்து அதன் பிறகு அந்த பிரும்மாண்ட நெருப்பு பிழம்பு குளிர்ந்து பிரபஞ்சமாக உருவானதாக கருதப்படுகிறது. இந்த நிகழ்வே பிக் பேங் என குறிப்பிடப்படுகிறது. இந்த பெருவெடிப்புக்கு பின் தான் எல்லாமே தோன்றியது.

பெரு வெடிப்பு நிகழ்வின் தாக்கம் தொடர்பாக விஞ்ஞானிகளிடம் தெளிவான கணக்கு இருக்கிறது. இந்த நிகழ்வுக்கு பின் 20 நிமிடங்களில் எத்தனை ஹைட்ரஜன், ஹீலியம் அணுக்கள் உருவாயின என்றெல்லாம் கணக்கு போட்டு வைத்துள்ளனர். ஆதாரமில்லா அனுமானங்கள் இல்லை; பெருவெடிப்பிற்கு பிந்தைய பாதிப்பான காஸ்மிக் மைக்ரோவேவ் பின்னணி ஒளிர்தல் அடிப்படையிலான ஆதாரபூர்வ கணக்கு.

இந்த கணக்கின்படி பார்த்தால் பிரபஞ்சம், 70 சதவீதம் டார்க் எனர்ஜி எனப்படும் அடர் ஆற்றல் மற்றும் 23 சதவீதம் டார்க் மேட்டர் எனப்படும் அடர் பொருளால் ஆகியிருக்கிறது. எஞ்சிய 4.6 சதவீதமே சாதாரன பொருட்களால் ஆகியிருக்கின்றன. அதாவாது நாமறிந்த பருப்பொருட்கள். பூமி உள்ளிட்ட கோள்களும், நட்சத்திரங்களும், எரிகற்கலும், வால் நட்சத்திரங்களும் இன்னும் பிற வஸ்துகளும் இந்த பிரிவில் தான் வருகின்றன.

நாம் என்னடாவென்றால், பூமி பெரிது, சூரிய மண்டலம் அதனினும் பெரிது, பால்வீதி மண்டலம் இன்னும் பெரிது என்றெல்லாம் நினைத்துக்கொண்டிருந்தால், இத்தனை பெரிய பிரபஞ்சத்தில் கோள்களும், நட்சத்திரங்களும், கேலக்ஸிகளும் வெறும் 5 சதவீதத்திற்கும் குறைவு தான் என்கிறது விஞ்ஞானம். மற்றவை எல்லாம் நம் அறிவுக்கு புலப்படாத அடர் சங்கதிகள்.

இது ஒரு பக்கம் இருக்கட்டும், பிரபஞ்சத்தின் பெரும்பகுதி அடர் ஆற்றல், பொருட்களால் சூழப்பட்டிருக்கும் நிலையில், அவற்றுக்கு மத்தியில் கொஞ்சமாக படர்ந்திருக்கும் 5 சதவீதத்திற்கும் குறைவாக சாதாரண பொருட்கள் இருப்பதாக கருதப்படுவதில் இன்னொரு பெரிய பிரச்சனை இருக்கிறது. இவற்றில் பெரும்பாலானவை எங்கே இருக்கின்றன என்பதே தெரியவில்லை. இது கொஞ்சம் விநோதமானது தான்.

சூரிய மண்டலம்,. நட்சத்திரங்கள் போன்ற வானியல் வஸ்துகள் எல்லாம் அணுக்களால் ஆனவை. இவை எல்லாவற்றையும் கூட்டு கழித்துப்பார்த்தால் கூட, பெருவெடிப்பு கணக்குபடி இருக்க வேண்டிய சாதாரண பொருட்களில் வெறும் 10 சதவீதம் மட்டுமே வருகின்றன. அப்படி என்றால் எஞ்சிய 90 சதவீத சாதாரண பொருட்கள் எங்கே? இதுவே விஞ்ஞானம் பதில் தேடும் கேள்வியாக இருக்கிறது.

இந்த பிரச்சனை விஞ்ஞான உலகில் காணாமல் போன பார்யோனிய சிக்கல் என குறிப்பிடப்படுகிறது. அணுக்கள் சார்ந்த பொருட்கள் பொதுவாக பார்யான் என குறிப்பிடப்படுகிறது. அணுவுக்குள் இருக்கும் புரோடான்கள், நியூட்ரான்கள் உள்ளிட்டவை இதில் அடங்கும். எனினும் எலக்ட்ரான் இதில் சேராது. இது லெப்டான் வகையின் கீழ் வருகிறது. இந்த வேறுபாட்டை விட்டுவிட்டு பார்த்தால், அணுக்கள் சார்ந்த பொருட்களால் உருவான கோள்களும், நட்சத்திரங்களும் 10 சதவீதம் மட்டுமே இருப்பதால், மற்றவை எங்கே, எப்படி இருக்கின்றன எனும் கேள்வி புரியாத புதிராக இருக்கிறது.

இந்த கேள்விக்கு தான் பதிலை இரண்டு விஞ்ஞானிகள் கண்டுபிடித்துள்ளதாக செய்திகள் வெளியாகியுள்ளன. தனித்தனியே மேற்கொள்ளப்பட்ட இரண்டு ஆய்வுகள் மூலம் விஞ்ஞானிகள் காணாமல் போனதாக கருதப்பட்ட அணுக்கள் இருப்பிற்கான மறைமுக ஆதாரங்களை கண்டறிந்துள்ளனர். இன்னும் அங்கீகரிக்கப்படவில்லை எனினும் இந்த ஆய்வுகள் அறிவியல் உலகில் உற்சாகத்தை ஏற்படுத்தியுள்ளன.

காணாமல் போனதாக கருதப்படும் அணுக்கள் இருப்பு தெரிய வந்துள்ளது பிரபஞ்ச ரகசியம் பற்றிய புரிதலில் அடுத்த கட்ட பாய்ச்சலாக அமையலாம் என கருதப்படுகிறது. எல்லாம் சரி, இருக்க வேண்டிய அணுக்கள் இருப்பதை கண்டறிந்து விட்டதாக கூறும் போது, அதை மறைமுக ஆதாரமாக கண்டறிந்ததாக சொல்கின்றனர் என கேட்கலாம்.

மறைந்திருக்கும் அணுக்களை பார்ப்பது என்பது அந்த அளவு கடினமானது என்பதே இந்த கேள்விக்கான பதில். அதுவே இந்த கண்டுபிடிப்பை மேலும் முக்கியமானதாக ஆக்குகிறது.

மொத்தமாக பிரபஞ்சத்தில் இருக்க வேண்டிய அணுக்கள் இல்லை என்பதை அறிந்திருந்த விஞ்ஞானிகள் அவை எங்கே இருக்க கூடும் என்பதையும் அனுமானித்துள்ளனர். பிரபஞ்சம் உண்டான பல லட்சம் கோடி ஆண்டுகளாக ஏற்பட்டு வந்துள்ள வளர்ச்சி, மாற்றத்தின் அடிப்படையில் பிரபஞ்சம் அடர் ஆற்றல் மற்றும் அடர் வஸ்துகளால் நிரம்பியிருக்கிறது. அதன் நடுவே காலெக்ஸிகள் சிதறிக்கிடக்கின்றன. இத்தகைய கேலக்ஸிகள் லட்சக்கணக்கில் இருக்கின்றன. இந்த காலெக்ஸிகள் ஒன்றோடு ஒன்று வாயு இழைகளால் இணைக்கப்பட்டுள்ளன. இந்த வாயு இழைகளில் தான் எஞ்சிய அணுக்கள் இருக்க வேண்டும் என விஞ்ஞானிகள் கருதுகிறது.

அப்படி என்றால் அந்த வாயு இழைகளை ஆய்வு செய்து பார்க்கலாமே என்று கேட்கலாம். பார்க்கலாம் தான், ஆனால் அவை தெரியாது என்பதே விஷயம். கேலக்ஸிகளை பின்னி பிணைத்திருக்கும் இந்த வாயு இழைகள் வார்ம் ஹாட் இண்டர்கிலேஸியேட்டிக் மேட்டர் என சொல்லப்படுகிறது. சுருக்கமாக விம். இவற்றின் வெப்பநிலை பல லட்சம் அளவில் இருக்கிறது. இவற்றில் இருந்து எக்ஸ் கதிர்கள் ஒளிர்ந்தாலும், தொலைநோக்கிகளால் காண முடியாத அளவுக்கு அவை மெல்லியதாக இருப்பதே சிக்கல்.

கொஞ்சம் சக்திவாய்ந்த தொலைநோக்கிகள் மூலம் இவற்றை உத்தேசமாக நோக்கி, 70 சதவீத காணாமல் போன அணுக்களை கூட கணக்கிட்டுவிட்டனர். ஆனால் அப்போது கூட இன்னொரு 30 சதவீதம் இடித்துக்கொண்டிருக்கிறது.

இந்நிலையில் தான் எடின்பர்க் பல்கலை மற்றும் இன்னொரு ஆய்வுக்குழுவினர் இந்த புதிருக்கு விடையை கண்டுபிடித்துள்ளனர்.

கேலக்ஸிக்களுக்கு இடையிலான வாயு இழைகள் பார்க்க முடியாதவையாக இருக்கும் நிலையில், பெருவெடிப்பின் தாக்கமான காஸ்மிக் கதிர் ஒளிர்வை பின்னணியாக கொண்டு இவற்றை நோக்கி அணுக்களின் இருப்பிற்கான ஆதாரங்களை சேகரித்துள்ளனர்.

இதற்கு உதவிய நிகழ்வு சுன்யேவோ ஜெல்டோவிச் (Sunyaev-Zel’dovich (SZ) )  நிகழ்வு என குறிப்பிடப்படுகிறது. அதாவது காஸ்மிக் வலையில் உள்ள ஒளியில் இருக்கும் போட்டான்கள் அணுக்களில் உள்ள எதிர்மறை ஆற்றல் கொண்ட எலக்ட்ரான்கள் சந்திக்கும் போது கூடுதல் ஆற்றல் பெற்று அவற்றின் அலைவரிசை கொஞ்சம் மாறுகிறது. இந்த மாற்றமும் பத்து லட்சத்தில் ஒரு மடங்கு எனும் அளவுக்கு மிகவும் சிறியதானது. எனவே இதை உணர்வதும் சிக்கல் தான்.

ஆனால், விஞ்ஞானிகள் பக்கத்தில் பக்கத்தில் உள்ள லட்சத்திற்கும் மேற்பட்ட கேலக்ஸிகளை ஒன்றிணைத்து அவற்றின் வரைபடம் மூலம் இடையே உள்ள வாய் இழைகளில் இந்த விளைவை கவனித்துள்ளனர். இதன் படி பார்த்தால் சுற்றுப்புற பகுதிகளைவிட வாயு இழைகள் ஆறு மடங்கு அடர்த்தியாக இருக்கிறது. ( இன்னொரு ஆய்வு மூன்று மடங்கு என்கிறது). ஆக, இங்கு தான் காணாமல் போன அணுக்கள் இருப்பது உறுதியாகி உள்ளதாக கருதப்படுகிறது.

இந்த ஆய்வுகள் அறிவியல் உலகால் ஏற்றுக்கொள்ளப்பட்டு விவாதிக்கப்பட்டு மேலும் ஆராயப்பட வேண்டும். அப்போது தான் பிரபஞ்ச ரகசியத்தை அறிவதில் மேலும் ஒரு அடி எடுத்து வைக்கலாம். ஏனெனில் பிரபஞ்சத்தின் பெரும் பகுதியாக இருக்கும் அடர் ஆற்றல் பற்றி நம் அறிவு இன்னமும் சொற்பமாகவே இருக்கிறது.

 

 

இணைப்புகள்

  1. http://www.sciencemag.org/news/2017/10/astronomers-say-they-ve-found-many-universe-s-missing-atoms
  2. https://www.geek.com/science/scientists-find-universes-missing-atoms-1719446/

நன்றி; மின்னம்பலம் இதழில் எழுதியது

 

 

கமலின் ’மய்யம்விசில்’ செயலி எப்படி இருக்கும்?

kamal1_13104அரசியல் பிரவேசம் குறித்து கமல் ஏமாற்றவில்லை; ஆனால் முழுவதுமாக எதிர்பார்ப்பை நிறைவேற்றவும் இல்லை. தெளிவான சமிஞ்சைகளை வெளியிட்டாலும், இன்னும் பல யூகங்களை தன்னிடமே வைத்துக்கொண்டிருக்கிறார். அரசியலுக்கு வருவாரா? எனும் கேள்வியை வைத்துக்கொண்டு ஆர்வத்தை தூண்டிக் கொண்டிருக்காமல், அரசியலுக்கு வந்துவிட்டேன் எனச்சொல்லி ஆர்வத்தை தூண்டியிருக்கிறார். ஆனால், கட்சியின் பெயர், அதன் கொள்கை, எப்போது ஆரம்பம் போன்ற கேள்விகளுக்கு எல்லாம் உடனடி பதில் சொல்லாமல், கட்சி அமைப்புக்கான தயாரிப்பு பணிகள் நடந்து கொண்டிருப்பதாக மட்டும் கூறியிருக்கிறார்.

பிறந்த நாளை முன்னிட்டி செய்தியாளர்களை சந்தித்த நடிகர் கமல்ஹாசன், எதிர்பார்த்தபடியே அரசியல் பிரவசத்தை உறுதிப்படுத்திவிட்டு, கட்சி துவங்கும் முன் மக்களை சந்திக்க சுற்றுப்பயணம் செய்யப்போவதாக கூறியிருக்கிறார். இது நல்ல உத்தி மட்டும் அல்ல, சரியான செயலும் தான். உலக நாயகன் உள்ளூர் மக்களின் கருத்துக்களை நேரில் கேட்டறியட்டும்!

கமல் அறிவிப்பில் கவனத்தை ஈர்த்து விவாதிக்கும் வகையில் பல அம்சங்கள் இருந்தாலும், கட்சிக்கான பிரத்யேக செயலி அறிவிப்பும், இயக்கத்திற்கான பிரத்யேக ஹேஷ்டேகுகள் வெளியிட்டிருப்பதும் கூடுதலாக கவனத்தை ஈர்க்கின்றன. #theditheerpomvaa, #virtuouscycles, #maiamwhistle   ஆகிய மூன்று ஹேஷ்டேகுகளை கமல் அறிவித்திருக்கிறார். இதில் ’மய்யம்விசில்’ ஏற்கனவே டிவிட்டரில் டிரெண்டிங் ஆகத்துவங்கிவிட்டது. இணையத்தில் ஹேஷ்டேக் என்பது முக்கியமான ஆயுதங்கள் அல்லது கருவிகள். பொருத்தமான ஹேஷ்டேக் மூலம் ஒத்த கருத்துக்களை சமூக ஊடக வெளியில் திரட்டுவதோடு, அர்த்தமுள்ள உரையாடலையும் சாத்தியமாக்கலாம். அந்த வகையில் தனக்கான ஹேஷ்டேகுகளை கமலே தேர்வு செய்து வெளியிட்டுள்ளது சரியான டிஜிட்டல் உத்தி தான். ஆனால் இந்த ஹேஷ்டேகுகள் சார்ந்த அர்த்தமுள்ள விவாதம் நடைபெறுவதை உறுதி செய்வது கமலின் கைகளில் தான் இருக்கிறது. அவரது டிவிட்டர் பக்கத்தில் இருந்தே இதை செய்யலாம். பொருத்திருந்து பார்க்கலாம் என்ன செய்கிறார் என!

அவரது சுற்றுப்பயணத்திற்கான முன்னேற்பாடாக கூட இந்த பகிர்வுகள் அமையலாம்.

ஹேஷ்டேக் தவிர ’மய்யம்விசில்’ எனும் பெயரிலான செயலியை அறிவித்திருக்கிறார். ஆனால் இந்த செயலி பீட்டா வடிவில் இருப்பதாக கூறியவர், ஜனவரியில் தான் இது அறிமுகமாகும் என கூறிவிட்டார். செயலியின் அம்சங்கள் குறித்தும் எந்த தகவலையும் பகிர்ந்து கொள்ளவில்லை. கதை திருட்டு போல செயலி திருட்டும் நடைபெறலாம் என அஞ்சுகிறார் போலும்!

செயலியின் முக்கிய அம்சங்கள் அறிவிக்கப்பட்டிருந்தால் கமலின் அரசியல் திட்டம் குறித்து அலசியிருக்கலாம். ஆனால் இந்த செயலி ஊழல் குறித்த தகவல்களை பகிர்வதற்கான வழியாக இருக்கும் என்று மட்டுமே கமல் கூறியிருக்கிறார். தன் மீதான தவறுகளையும் சுட்டிக்காட்டலாம் என கூறியிருக்கிறார். மேலதிக விவரங்கள் இல்லை. ஆனால், இந்த செயலி எப்படி இருக்க கூடும் என்று அனுமானிப்பதைவிட, இந்த செயலி எப்படி இருக்க வேண்டும் என்று யோசித்துப்பார்க்கலாம்.

அதற்கு முன்னர், ஒரு புதிய அரசியல் கட்சிக்கு செயலியால் என்ன பயன்? எனும் கேள்வியை கேட்டுக்கொள்ளலாம். ஸ்மார்ட்போன்கள் மூலம், உலகம் உண்மையிலேயே உள்ளங்கையில் வந்திருக்கும் காலகட்டத்தில் மொபைல் செயலிகளின் முக்கியத்துவத்தை குறைத்து மதிப்பிட்டுவிட முடியாது. வர்த்தகம் உள்பட எல்லாத்துறைகளிலும் செயலிகள் பயன்படுத்தப்படுகின்றன. அரசியலிலும் செயலிகள் பயன்படுத்தப்படுகின்றன.

அந்த வகையில் அரசியல் கட்சிகளுக்கும் செயலி ஒரு அருமையான கருவி தான். ஆனால் ஒன்று, கட்சியின் செயலி என்பது வேறுபட்டதாக இருக்க வேண்டும். அதாவது, ஏற்கனவே உள்ள பிரச்சார சங்கதிகளின் டிஜிட்டல்மயமாக்கப்பட்ட வடிவமாக செயலி இருப்பதால் அதிக பயன் இல்லை. அவை அலுப்பையே ஏற்படுத்தும். டிஜிட்டல் தலைமுறையை விலகிச்செல்ல செய்துவிடும். மாறாக ஒரு செயலி துடிப்புடன் இருக்க வேண்டும். தொழில்நுட்ப மொழியில் சொல்வதனால் டைனமிக்காக இருக்க வேண்டும்.

டிஜிட்டல் யுகத்தில் அரசியல் கட்சிகள் செயலிகளை நாடுவதற்கான முக்கிய காரணங்கள் என டெக்யுகோ வலைப்பதிவில் வெளியான கட்டுரை ஒன்று கீழ் கண்டவற்றை பட்டியலிடுகிறது.

  • விழிப்புணர்வு- பொதுமக்கள் மத்தியில் அரசியல் கட்சியின் நோக்கம் பற்றி தெளிவாக உணர்த்தி விழிப்புணர்வை ஏற்படுத்த வேண்டும்.
  • நிதி – செயலி நிதி திரட்டுவதற்கான மேடையாக அமையலாம்.
  • செய்தி- செயலி தகவல் தெரிவிப்பதற்கான சிறந்த வழி.
  • தொடர்பு- செய்தி என்பது ஒருவழிப்பாதையாக இல்லாமல், உரையாடலாக இருக்க வேண்டும்.
  • மீடியா- செய்திகளை வெளியிடுவதற்கான வாகனம்
  • கல்வி- மக்கள் பிரச்சனைகள் பற்றி விழிப்புணர்வை ஏற்படுத்தலாம்.
  • சமூக ஊடகம்- சமூக ஊடக பகிர்வுகள்
  • சர்வே- மக்கள் கருத்துக்களை சர்வேக்கள் மூலம் அறியலாம்.

 

விதிவிலக்கான சந்தர்பங்கள் தவிர பொதுவாக அரசியல் கட்சிகள் ஒரு வழிப்பாதை தகவல் தொடர்பையே பயன்படுத்துகின்றன. மக்களுக்கும், தொண்டர்களுக்கும் தகவல்கள் தெரிவிக்கப்படும் அளவிற்கு அவர்கள் கருத்துக்களை அறிய முயற்சி மேற்கொள்ளப்படுவதில்லை. ஆனால் செயலி மூலம் இதை மாற்றலாம். மக்களுடன் வெளிப்படையாக தொடர்பு கொண்டு அவர்கள் கருத்துக்களை அறியலாம். அரசியல் கட்சிகள் பெரும்பாலும் நிர்வாகிகளின் ஜால்ரா கருத்துக்களையே கேட்க நேரிடுகிறது. செயலி மூலம் மக்கள் என்ன நினைக்கின்றனர் என்பதை பட்டவர்த்தனமாக தெரிந்து கொள்ளலாம். இதற்கு பதிலும் அளிக்கத்துவங்கினால் இரு தரப்பினருக்குமே அது நலன் பயக்கும்.

முக்கிய பிரச்சனைகள் தொடர்பாக கட்சி கருத்தை மட்டும் திணிக்காமல் முதலில் மக்கள் மன ஓட்டத்தை அறிந்து அதற்கேற்க கட்சி நிலைப்பாட்டை வகுப்பது ஜனநாயகமயமானதாக இருக்கும். முக்கிய பிரச்சனைகளை மக்களையே பரிந்துரைக்க செய்யலாம்.

வெளிப்படையாக தொடர்பு கொள்வது மூலம் மக்களிடம் நம்பகத்தன்மையை அதிகமாக்கி கொள்ளலாம். நிர்வாகிகள் மற்றும் வேட்பாளர்கள் பற்றிய கருத்துக்களையும் அறியலாம். இது கட்சியையை ஜனநாயகபூர்வமாக வைத்திருக்கும்.

செயலி மூலம் இன்னும் பல விஷயங்களை செய்யலாம். ஆனால் ஒன்று பயணர் இடைமுகம் முக்கியம். அது நட்பானதாக இருக்க வேண்டும். எதையும் வெளிப்படையாக பகிர முடிய வேண்டும். அதைவிட முக்கியமாக கருத்துக்கள் ஒரு வழிப்பாதையாக நின்றுவிடாமல் அவற்றுக்கு முறையாக பதில் அளிக்கப்பட வேண்டும்.

சமூக ஊடக பகிர்வு வசதி, பேஸ்புக் வைவ் வசதி, அரட்டை வசதி, அறிக்கை வெளியீடு உள்ளிட்ட அம்சங்கள் இருக்க வாய்ப்புள்ளது. இவை எல்லாவற்றையும் விட, மக்களுடன் நேரடியாக தொடர்பு கொண்டு அவர்கள் கருத்துக்களை அறிந்து செயல்படும் வழியில் செயலி இருக்க வேண்டும். நிதி திரட்டுவது பற்றி கமல் பேசியது, எல்லாவற்றையும் பதிவு செய்யும் முறையை சுட்டிக்காட்டுகிறது.

கமல் செயலி பற்றி தனியே பேசாமல் மக்கள் தொடர்புக்கான டிஜிட்டல் அரங்கின் ஒரு அம்சமாக இதை சொல்லியிருப்பது நிறைய எதிர்பார்க்க வைக்கிறது. தொழில்நுட்ப போக்குகளை நன்கறிந்த கமல், டிஜிட்டல் உலக சாத்தியங்களை தனது இயக்கத்திற்கு பயன்படுத்திக்கொள்ளும் மேடையை உருவாக்கினார் என்றால் அது நிச்சயம் ஒரு முன்னோடி முயற்சியாக இருக்கும்.

செயலி, டிஜிட்டல் அரங்கம் எல்லாம் நவீன உத்திகள் தான். ஆனால் இவை மட்டும் போதாது. களத்தில் எப்படி செயல்படுகிறார் என்பதை கொண்டே இந்த உத்திகள் பயன் தரும்.

கமல் நிறைய எதிர்பார்ப்பை ஏற்படுத்தியிருக்கிறார். அதை தக்க வைத்துக்கொள்கிறாரா என்பது தான் முக்கியமான கேள்வி!

 

=—

நன்றி; யுவர்ஸ்டோரி தமிழ் இணையதளத்தில் எழுதியது