Category Archives: இணைய செய்திகள்

பலூன் வரும் முன்னே, இணையம் வரும் பின்னே!

 

lபியூர்ட்டோ ரிக்கோ மக்கள் அந்த பலூன்கள் எப்போது வந்து சேரும் என ஏக்கத்துடன் காத்திருக்கின்றனர். அந்நாட்டு அரசாங்கமும், தொண்டு அமைப்புகளும், வர்த்தக நிறுவனங்களும் கூட அந்த பலூன்கள் எப்போது தங்கள் வானில் மிதக்கத்துவங்கும் என எதிர்பார்த்திருக்கின்றனர். மற்ற நாடுகளும் கூட இந்த பலூன்கள் எப்படி செயல்படுகின்றன என்பதை உன்னிப்பாக கவனித்துக்கொண்டிருக்கின்றன.

ஒரு பலூன் மீது இத்தனை எதிர்பார்ப்பா? என்று கேட்கலாம். அதிலும், அண்மையில் சூறாவளியில் சிக்கி அதன் கோரத்தாண்டவத்தில் இருந்து மீள முடியாமல் போராடிக்கொண்டிருக்கும் பியூர்டோ ரிக்கோ மக்கள் ஏன், ஒரு பலூனுக்காக காத்திருக்க வேண்டும் என கேட்கத்தோன்றலாம். அந்த பலூன்கள் சாதாரன பலூன்கள் அல்ல, வானிலிருந்து மண்ணுக்கு இணைய இணைப்பை வழங்க கூடிய அதி நவீன பலூன்கள் என்பது தான் கவனிக்க வேண்டிய விஷயம்.

முன்னணி தேடியந்திர நிறுவனமான கூகுளின் தாய் நிறுவனமான ஆல்பபெட் நிறுவனத்தின் கீழ் செயல்பட்டு வரும் லூன் திட்டத்தின் சார்பில் இந்த வகை பலூன்கள் பறக்க விடப்படுகின்றன. சாகச விளையாட்டாக கருதக்கூடிய ஹாட் ஏர் பலூன் ரகத்தைச்சேர்ந்த இந்த பலூன்கள் காற்றுவெளி மண்டத்தில் மிதந்தபடி தொலைத்தொடர்பு வசதி மற்றும் இணைய வசதியை கீழே உள்ள பகுதிக்கு அளிக்க வல்லவை. அதனால் தான், பியூர்ட்டோ ரிக்கோ மக்கள் இந்த பலூன்கள் வரை எதிர்பார்த்து காத்திருக்கின்றனர். சூறாவளி தாக்குதலால் அந்நாட்டு செல்போன் கோபுரங்களும், தொலைத்தொடர்பு வசதியும் முறித்து போய் கிடக்கின்றன. எனவே அங்கு தகவல் தொடர்பு வசதி முற்றிலும் செயலிழந்து போயிருக்கிறது. இதனால் மீட்பு பணிகளை ஒருங்கிணைப்பது முதல் நிவராண உதவிகளை அளிப்பது வரை எல்லாவற்றிலும் சிக்கல் இருக்கிறது.

தொலைத்தொடர்பு உள்கட்டமைப்பு வசதியை சீரமைக்க மாதக்கணக்கில் ஆகலாம் எனும் நிலையில், அத்தியாவசிய பணிகளை ஒருங்கிணைக்கவும், பொதுமக்கள் தொடர்பு கொள்ளவும் அடிப்படை தொலைத்தொடர்பு வசதி உடனடி தேவை.

இந்த பின்னணியில் தான் ஆல்பபெட் நிறுவனம் தனது லூன் திட்டத்தின் இணைய பலூன்கள் பியூர்ட்டோ ரிக்கோவில் பறக்கவிட திட்டமிட்டு இதற்காக அமெரிக்க அரசின் அனுமதியையும் பெற்றிருக்கிறது. பியூர்ட்டோ ரிக்கோவில் பலூன்களை பறக்கவிட்ட பிறகு உள்ளூர் தொலைத்தொடர்பு நிறுவனங்களுடன் இணைந்து செயல்பட்டு, செல்போன் இணைப்பு மற்றும் இணைய வசதியை அளிக்க திட்டமிடப்பட்டுள்ளது. உறவினர்களை தொடர்பு கொள்ளவும், உதவிகளை பெறவும் செல்போன் இணைப்பு கிடைக்காமல் அல்லாடிக்கொண்டிருக்கும் பியூர்ட்டோ ரிக்கோ மக்களுக்கு இந்த சேவை பேரூதவியாக இருக்கும்.

கூகுளின் தாய் நிறுவனம் இந்த பலூன் திட்டத்தில் மிகுந்த நம்பிக்கை வைத்துள்ளது. பேரிடர் பாதிக்கப்பட்ட பகுதிகள் உள்பட உலகில் இணைய வசதி இல்லாத தொலைதூர பகுதிகள் மற்றும் கிராமப்புற பகுதிகளில் இந்த பலூன்கள் மூலம் இணைய வசதி அளிப்பதை நோக்கமாக கொண்டுள்ளது. குறிப்பிட்ட பகுதியில் வானில் இந்த பலூன்களை வரிசையாக பறக்கவிட்டு அவற்றை வயர்லெஸ் முறையில் வலைப்பின்னலாக இணைப்பதன் மூலம் தரைப்பகுதியில் உள்ளவர்களுக்கு இணைய வசதியை அளிக்கும்.

பலூன்கள் மூலம் எப்படி இணைய வசதி அளிக்க முடியும் என பார்ப்பதற்கு முன், இந்த திட்டம் பற்றி சுருக்கமான அறிமுகம். தேடியந்திரமான கூகுள் பிரவுசர்கள், இமெயில், மொபைல் இயங்குதளம் என பல்வேறு சேவைகளை வழங்கு வருகிறது. இவைத்தவிர கூகுள் நிறுவனம் பல்வேறு ஆய்வு திட்டங்கள் மற்றும் சோதனை திட்டங்களையும் கொண்டிருந்தது. இப்படி கூகுள் குழுவால் பிராஜெக்ட் எக்ஸ் எனும் பெயரில் துவங்கப்பட்டது தான் இணைய பலூன் திட்டம்.

இணையம் மூலம் செய்திகளை தெரிந்து கொள்வது முதல் ஷாப்பிங் செய்வது வரை எண்ணற்ற வசதிகள் சாத்தியமாகி இணையம் இல்லாத வாழ்க்கைக்கு நாம் பழகிவிட்டோம். கம்ப்யூட்டர்கள், லேப்டாப் மட்டும் அல்லாமல், ஸ்மார்ட்போன் மூலம் உள்ளங்கையிலேயே இணைய வசதி சாத்தியமாகிறது. ஆனால், இணைய வசதி என்பது இன்னமும் உலகம் முழுவதும் பரவலாகிவிடவில்லை. உலகில் இணைய வசதி எட்டிப்பார்க்காத பகுதிகளும் அநேகம் இருக்கின்றன. இணைய வசதி மோசமாக உள்ள பகுதிகளும் உள்ளன. மலைப்பகுதி, குக்கிராமங்கள் போன்ற இடங்களுக்கு இணைய வசதியை அளிப்பது என்பது மிகப்பெரிய சவாலாக இருக்கிறது.

இன்னமும் தொலைத்தொடர்பு வசதி எட்டிப்பார்க்காத இடங்களில் இணைய வசதியை அளிப்பதற்கான உள்கட்டமைப்பு வசதியை ஏற்படுத்தி தருவது பெருட்செலவு மிக்கதாகும். இதற்கான லாபமும் குறைவு என்பதால் வர்த்தக நிறுவனங்கள் இதில் அதிக முனைப்பு காட்டவும் தயங்குகின்றன.

இந்த சிக்கலுக்கான தீரவாக தான் பலூன் மூலம் தொலைதூர பகுதிகளில் இணைய வசதி அளிக்கும் திட்டத்தை கூகுள் சோதனை முறையில் துவங்கியது. 2013 ம் ஆண்டு, அதிகாரபூர்வமாக இந்த திட்டம் துவங்கியது. கூகுள் செயல்படுத்தி வந்த பல்வேறு துணை திட்டங்களில் ஒன்றாக விளங்கிய இந்த திட்டம் கடந்த சில ஆண்டுகளுக்கு முன், கூகுளுக்கு என தனியே ஆல்பபெட் எனும் தாய் நிறுவனம் உருவாக்கப்பட்ட போது தனியே பிரிக்கப்பட்டு, அதன் கீழ் இயங்கி வருகிறது. இடைப்பட்ட காலத்தில் கூகுள் தனது பலூன் தொழில்நுட்பத்தை மேம்படுத்தி அதற்கான வெள்ளோட்டங்களையும் நிகழ்த்தி வருகிறது. இதற்கான முதல் சோதனை சில ஆண்டுகளுக்கு முன் நியூசிலாந்து நாட்டில் மேற்கொள்ளப்பட்டது.

தொலைத்தொடர்பு வசதி இல்லாத இடங்களில் வானில் இந்த பலூன்களை பறக்கவிட்டு அவற்றை வலைப்பின்னலாக இணைத்து இணைய இணைப்பை வழங்குவது தான் இந்த திட்டத்தின் நோக்கம். இந்த பலூன்கள் காற்றின் போக்கில் இயங்கி அதற்கேற்ப நிலைநிறுத்திக்கொள்ளும் ஆற்றல் பெற்றிருக்கின்றன. வானிலை நிகழ்வு உள்ளிட்டவற்றால் பாதிக்கப்படாத அளவுக்கு பாதுகாப்பானவை. மேலும் விமானங்கள் போன்றவற்றுக்கு இடைஞ்சல் இல்லாத அளவுக்கு காற்று மண்டத்தில் 15 முதல் 20 கிமீ எல்லையில் இவை இயக்கப்படுகின்றன.

உயர்தரமான பிளாஸ்டிக்கால் ஆன இந்த பலூன்கள் ஹீலியம் வாயுவால் நிரப்பப்பட்டு அதன் மூலம் இயங்குகின்றன. ஒவ்வொரு பலூனும் ஒரு டென்னிஸ் மைதானம் அளவு பெரிதானவை. பூமியில் உள்ள ராட்சத டிரெக்கில் இருந்து இவை விண்ணில் செலுத்தப்படுகின்றன. 30 நிமிடத்திற்கு ஒரு பலூனை இப்படி செலுத்த முடியும். பின்னர், வானில் மிதந்தபடி இவை தங்களுக்கான இடத்தில் நிலைப்பெறும். வரிசையாக பலூன்கள் செலுத்தப்படும் போது பரஸ்பரம் வயர்லெஸ் மூலம் தொடர்பை ஏற்படுத்திக்கொண்டு வானில் வலைப்பின்னல் அமைத்துக்கொள்ளும். இந்த பலூன்கள் சராசரியாக 100 நாட்கள் செயல்படக்கூடியவை. அதன் பிறகு தானாக இறங்கி வந்துவிடும். அதுவரை இயங்குவதற்கான ஆற்றலை உருவாக்கி கொள்ளும் சோலார் வசதியை பெற்றுள்ளன.

பூமியில் உள்ள செல்போன் கோபுரங்கள் மற்றும் செல்பான் பயனாளிகளை இணைக்கும் பாலமாக பலூன் வலைப்பின்னல் செயல்படுவதால் செல்போனில் பேசுவது மற்றும் இணையத்தில் உலாவுவது சாத்தியமாகும். பலூனில் வயர்லெஸ் வசதி இருக்கிறது. 4 ஜி சேவையை இதன் மூலம் பெறலாம் என்றாலும், உண்மையில் இந்த பலூன்கள் இணைய வசதியை அளிப்பதில்லை. இவை செல்போன் கோபுரங்களாக மட்டுமே செயல்படுகின்றன. தரைப்பகுதியில் உள்ள செல்போன் கோபுரங்கள் இந்த மிதக்கும் கோபுரங்களுடன் இணைக்கப்படுவதால் இடைவெளி இல்லாத இணைய இணைப்பு உண்டாகிறது. எனவே லூன் திட்டம் உள்ளூர் தொலைத்தொடர்பு நிறுவனங்கள் மற்றும் அரசு அமைப்புகளுடன் இணைந்தே இந்த சேவையை வழங்க முடியும். கரடுமுரடான பகுதியில் செல்போன் கோபுரங்கள் உள்ளிட்ட உள்கட்டமைப்பு வசதியை அமைப்பதைவிட பலூன்களை செல்போன் கோபுரமாக்கி இணைய இணைப்பு வழங்குவது எளிதானதாக கருதப்படுகிறது.

இந்த நம்பிக்கையுடன் தான், கூகுளின் தாய் நிறுவனம் இணைய பலூன்களை உருவாக்கி வருகிறது. அண்மையில் இந்த திட்டம் தனி நிறுவனமாக அமைக்கப்பட்டுள்ளது. அடுத்த கட்டமாக வர்த்தக நோக்கில் இந்த சேவையை வழங்க திட்டமிட்டுள்ளது. இதனிடையே பேரிடர் பாதித்த பகுதிகளில் அவசர கால உதவியாக இணைய இணைப்பை வழங்க இந்த பலூன்கள் பயன்படுத்தப்படுகின்றன. சில மாதங்களுக்கு முன் தென்னமரிக்க நாடான பெருவில் வெள்ள பாதிப்பு உண்டான போது, இணைய பலூன்கள் மூலம் தொலைத்தொடர்பு வசதி அளிக்கப்பட்டது. தற்போது பேரிடர் பாதித்த பியூர்ட்டோ ரிக்கோவில் இந்த பலூனள் வலம் வந்து மிகவும் அவசியமான இணைப்பு சேவையை அளிக்க உள்ளன.

உலகம் முழுவதும் இணைய வசதியில் ஏற்றத்தாழ்வு நிலவி வரும் சூழலில், தொலைதூர பிராந்தியங்களில் இணைய வசதியை அமைக்க லூன் பலூன்கள் உதவியாக இருக்கும் என கருதப்படுகிறது. சமூக வலைப்பின்னல் தளமான பேஸ்புக்கும், இதே போலவே ஆளில்லா விமானம் மூலம் தொலைதூர பகுதிகளில் இணைய வசதியை வழங்கும் சோதனை திட்டத்தில் கவனம் செலுத்து வருவதும் குறிப்பிடத்தக்கது.

 

 

சைபர்சிம்மன்

 

 

எந்திரன்களிடம் எப்படி பேச வேண்டும்?

 

maxresdefaultஎந்திரன் படத்தில் சந்தானமும், கர்ணாசும் சிட்டி ரோபோவிடம் இடக்காகவும், ஆபாசமாகவும் பேசி விட்டு அதற்காக நாயகன் ரஜினியிடன் வாங்கி கட்டிக்கொள்வது போல ஒரு காட்சி வரும். வெறும் நகைச்சுவை என்பதை மீறி இந்தக்காட்சி எதிர்காலத்தில் நினைவில் கொள்ள வேண்டிய செய்தியை கொண்டிருக்கிறது தெரியுமா? எந்திரன்களிடம் கன்ணியமாக நடந்து கொள்ள வேண்டும் என்பது தான் அந்த செய்தி. இல்லை எனில் விளைவுகள் விபரீதமாக இருக்கலாம். வேலையை இழக்கும் அபாயமும் ஏற்படலாம்!

உடனே எந்திரன் போன்ற சூப்பர் ரோபோ நடைமுறையில் இப்போதைக்கு சாத்தியமில்லையே என்று வாதாட  முற்பட வேண்டாம்.  இத்தகைய எந்திரன்கள் பழக்கத்திற்கு வர காலம் ஆகலாம் என்றாலும், நம்முடன் உரையாடல் நடத்தக்கூடிய, கேள்விகளுக்கு பதில் சொல்லகூடிய மென்பொருள் எந்திரன்கள் நிச்சயம் சர்வ சகஜமாக இருக்கும்.

இந்த போக்கு ஏற்கனவே துவங்கிவிட்டது. ஆப்பிளின் சிறியும், மைக்ரோசாப்டின் கார்ட்டனாவும், அமேசானின் அலெக்சாவும் இதற்கான உதாரணங்கள். அரட்டை இயந்திரங்கள் ( சாட் பாட்) என குறிப்பிடப்படும்  மென்பொருள்களில் இவை டிஜிட்டல் உதவியாளர்கள் எனும் பிரிவின் கீழ் வருகின்றன. போனுக்குள் வீற்றிருக்கும் உதவியாளர்கள். இந்த மென்பொருள்கள் அடிப்படையான செயற்கை அறிவை கொண்டிருப்பதோடு, எந்திர கற்றல் ஆற்றலையும் கொண்டுள்ளன. எனவே, இவை பயனாளின் கேள்விகளுக்கு பதில் அளித்து அவர்களுடன் உரையாடும் ஆற்றல் பெற்றிருப்பதோடு, காலப்போக்கில் பயனாளிகளின் விருப்பு வெறுப்புகளை புரிந்து கொண்டு, அதற்கேற்ப  பரிந்துரகளை வழங்க கூடியவையாக இருக்கும். உதாரணத்திற்கு, தொடர்ந்து இளையராஜா பாடல்களை விரும்பிக்கேட்டால், இந்த மென்பொருள்கள் அதை புரிந்து கொண்டு, ஓய்வு நேரத்தில் ராஜாவின் பாடலை ஒலிக்கச்செய்யலாம்.

கூகுளும் கூட இந்த பிரிவில் ஒரு மென்பொருளை பெற்றிருக்கிறது. பேஸ்புக்கும் இந்த பிரிவில் விஷேச கவனம் செலுத்தி வருகிறது. அதோடு  வாடிக்கையாளர் சேவையில் இருந்து, காப்பீடு அல்லது முதலீடு பரிந்துரை போன்றவற்றை மென்பொருள்கள்வழங்கத்துவங்கியிருக்கின்றன. வங்கிகள், இகாமர்ஸ் நிறுவனங்கள், வர்த்தக நிறுவனங்கள் இது போன்ற மென்பொருள் எந்திரன்களை பயன்படுத்த துவங்கியுள்ளன.

ஸ்டார்ட் அப் நிறுவனங்களும் கூட இத்தகைய எந்திரன்களை உருவாக்குவதில் ஆர்வம் காட்டி வருகின்றன. குறிப்பாக நிதிச்சேவை பிரிவில் பல வகையான அரட்டை மென்பொருள் எந்திரங்கள் உருவாக்கப்பட்டுள்ளன. ரோபோ அட்வைசர் என குறிப்பிடப்படும் இவை, கேள்விகளுக்கு முதலீட்டாளர்கள் அளிக்கும் பதில்களின் அடிப்படையில் அவர்களுக்கு ஏற்ற முதலீட்டு வாய்ப்புகளை பரிந்துரைக்கின்றன. நிதிச்சேவைகளுக்கான செலவை குறைக்கவும், அவற்றை பரவலாக்கவும் இந்த வகை ’பாட்க’ள் கைகொடுக்கும் என்று கருத்தும் உற்சாகமாக முன்வைக்கப்படுகிறது.

இவ்வளவு ஏன் செய்தி சேகரிப்புக்கு கூட இத்தகைய மென்பொருள்களை உருவாக்கி களமிறக்கலாம். அலுவலக பணிகளுக்கும் இவை உருவாக்கப்படலாம். இன்னும் பலவிதங்களில் இவற்றை பயன்படுத்தலாம். நாமும் கூட இவற்றை பலவிதங்களில் பயன்படுத்தலாம் என்பதையும் நினைவில் கொள்ளுங்கள். எனவே தான் நாம் இவற்றிடம் எப்படி நடந்து கொள்கிறோம் என்பதில் எச்சரிக்கையாக இருக்க வேண்டியது அவசியமாகிறது. இவற்றிடம் வாய்த்துடுக்கு காட்டுவதோ அல்லது வசை பாடுவதோ வில்லங்கமாக அமையலாம். இப்படி தான் ஹார்வர்டு பிஸ்னஸ் ரிவ்யூ கட்டுரை ஒன்று எச்சரிக்கிறது.

எல்லாம் சரி மென்பொருள்களிடம் நாம் ஏன் வாய் கொடுக்கப்போகிறோம் என்று கேட்பதற்கில்லை. ஏனெனில் ஏற்கனவே பலர் இதை தான் செய்து கொண்டிருக்கின்றனர். டிஜிட்டல் உதவியாளர் மென்பொருள்கள் அளிக்கும் பதில் திருப்தி அளிக்கவில்லை அல்லது ஏமாற்றம் தரும் விதமாக இருந்தால், அதன் பயனாளிகள் கடுப்பாகி கோபத்தை வார்த்தைகளாக வெளிப்படுத்துவது அடிக்கடி நடக்கவே செய்கிறது. ஆப்பிளின் சிறி மென்பொருள் மீதோ, மைக்ரோட்சாப்டின் கார்ட்டனா மென்பொருள் மீதோ பயனாளிகள் கோபம் கொண்டதற்கான எண்ணற்ற உதாரணங்கள் இருக்கின்றன. மேலும் தெளிவு தேவை எனில் இது தொடர்பாக கூகுளில் தேடிப்பாருங்கள்.

பொதுவாக டிஜிட்டல் உதவியாளர் மென்பொருள்கள் புத்திசாலித்தனமாக உருவாக்கப்பட்டிருந்தாலும் அவற்றில் போதாமைகள் அதிகம். இன்றைய வானிலை எப்படி இருக்கும் என்றோ, நகரில் குறிப்பிட்ட திரையரங்கில் என்ன திரைப்படம் பார்க்கலாம் என்றோ பொதுவாக கேட்டால் இவை சரியாக பதில் சொல்லிவிடும். ஆனால் குறிப்பிட்ட கேள்விகளுக்கு இவை சொதப்பிவிடலாம். இது போன்ற நேரங்களில் பலருக்கு சிரிப்பு வரலாம். இன்னும் சிலருக்கு கோபம் வரலாம். அதனால் ஆபாசமாக திட்டவும் செய்யலாம்.

மென்பொருள் தானே திட்டினால் என்ன ஆகிவிடும் என்றும் கேட்கத்தோன்றலாம். இந்த மென்பொருள்கள் உணர்வில்லாதவையாக இருக்கலாம், ஆனால் பதில் பேசாமல் இருக்கக்கூடியவை அல்ல. மோசமான வார்த்தைகள் பேசப்படும் போது, கொஞ்சம் பார்த்துப்பேசுங்கள் என்று இவை பதிலுக்கு சொல்லக்கூடும். ’ஒரு போன் நம்மை பார்த்து வாயை மூடச்சொல்கிறதே’ என இது போன்ற ஒரு சம்பவத்தை உதாரணம் காட்டுகிறது ’மெட்ரோ’ பத்திரிகை கட்டுரை.

பெரும்பாலான நவீன அரட்டை மென்பொருள்கள் பயனாளிகள் கேள்விகளுக்கு பதில் அளிப்பதோடு, அவர்கள் சொல்லும் வார்த்தைகளை புரிந்து கொள்ளும் தன்மையும் கொண்டிருக்கின்றன. அதாவது பயனாளிகள் நடவடிக்கையை பார்த்து அவையும் கற்றுக்கொண்டு தங்களை மேம்படுத்திக்கொள்கின்றன. ஆப்பிளின் சிறி மென்பொருள், ஆபாச வார்த்தைகள் இனங்கண்டு கொண்டு, கொஞ்சம் பார்த்து பேசுங்கள் என்று சொன்னது இப்படி தான்.

ஆக, நாம் விவாதிக்கும் விஷயத்திற்கு வந்துவிட்டோம். அரட்டை மென்பொருள்கள் பயனாளிகளுடனான உரையாடல் மூலம் கற்றுக்கொள்ளும் எந்திர கற்றல்( மிஷின் லேர்னிங்) ஆற்றலுடன் உருவாக்கப்பட்டிருப்பதால் அவை காலப்போக்கில் மேலும் மேலும் புத்திசாலி ஆகிவிடும் எனும் எதிர்பார்ப்பு இருக்கிறது. ஆக நாம் நல்லவிதமாக பேசினால் மென்பொருள்கள் அதற்கேற்ப கற்றுக்கொண்டு, அடுத்த முறை தொடர்புடைய கேள்விகள் வரும் போது பொருத்தமாக பதில் அளிக்கும். மாறாக அவற்றிடம் மோசமாக பேசினால் அவை தப்பும் தவறுமான விஷயங்கள் கற்றுக்கொள்ளும்.

மைரோசாப்ட் நிறுவனம் அறிமுகம் செய்த ’டே’ எனும் செயற்கை அறிவு சார்ந்த மென்பொருள், மற்றவர்களுடன் பேசத்துவங்கியவுடன், நாசிசம் பற்றி பேசவும், ஹிட்லர் நல்லவர் என கூறவும் கற்றுக்கொண்டுவிட்டது. இந்த சம்பவம் பெரும் சர்ச்சையை ஏற்படுத்தி இயந்திர கற்றலில் உள்ள சிக்கல்களை உணர்த்தியது. ஒரு சில விஷமத்தனமான பயனாளிகள் அதனிடம் விவகாரமான முறையில் உரையாடியதன் விளைவு இது.

இப்படி தான் பலரும், நடந்து கொள்வதாக டாக்டர்.ஷெரில் பிரானம் எனும் ஆய்வாளரும் கூறுகிறார். மென்பொருள்களுடனான மனிதர்கள் உரையாடல் பற்றி விரிவாக ஆய்வு நடத்தியிருக்கும் ஷெரில், 50 சதவீதம் வரையான இத்தகையை உரைடால்கள் அவதூறான வகையில் இருப்பதாக பேட்டி ஒன்றில் தெரிவித்துள்ளார். ஆக, மனிதர்களாகிய நம்முடைய நயத்தக்க நாகரீகம் இவ்வளவு தான். பாட்களிடம் பேசும் போது நம்மில் பலர், எந்திரன் சந்தானம் போலவே நடந்து கொள்ளும் வாய்ப்பிருக்கிறது.

ஆனால், இது பாட்களுக்கும் நல்லதல்ல. நமக்கும் நல்லதல்ல.

பாட்களுக்கு ஏன் நல்லதல்ல என எளிதாக புரிந்து கொள்ளலாம். நாம் வசைபாடினால் அவை நல்ல விஷயங்களை எப்படி கற்றுக்கொள்ள முடியும். சரி, இதனால் பயனாளிகளுக்கு என்ன பிரச்சனை? என்று கேட்கலாம்.

இந்த பாட் வகை மென்பொருள்கள் உருவாக்கத்திலும், ஆய்விலும் அமேசான், கூகுள் உள்ளிட்ட நிறுவனங்கள் பெரும் செல்வத்தையும், உழைப்பையும் முதலீடு செய்துள்ளன. இவற்றின் மீது மிகுந்த நம்பிக்கையும் வைத்துள்ளன. ஆகவே அவை தங்கள் மென்பொருள் படைப்புகள் பயனாளிகளால் மோசமாக நடத்தப்படுவதை விரும்பாது என்பதோடு இவ்வாறு நிகழ்வதை தவிர்க்கவே முயற்சிக்கும். அது மட்டும் அல்ல, மோசமாக நடத்தப்படும் போது அதை உணர்ந்து கொண்டு, புகார் செய்யவும் இவை புரோகிராம் செய்யப்படலாம் என்கிறது ஹார்வர்டு பிஸ்னஸ் ரிவ்யூ கட்டுரை.

நிறுவனங்களில் பலவிதமான பணிகளுக்கு டிஜிட்டல் உதவியாளர்கள் பயன்படுத்தப்படும் போது, பலரும் பழக்க தோஷத்தில் அவற்றை வசை பாடலாம், வம்புக்கு இழுக்கலாம், மோசமான வார்த்தைகளை பேசலாம். ஆனால் நிறுவனங்கள் இவற்றை பார்த்துக்கொண்டு சும்மா இருக்காது என்கிறது இந்தக்கட்டுரை. மோசமான உரையாடல்கள் தங்கள் மென்பொருள்களின் ஆற்றலை பாதிக்கும் என்பதால் நிறுவனங்கள் அவற்றிடம் தரக்குறைவாக நடந்து கொள்ளும் ஊழியர்களை கண்டறிந்து அவர்கள் மீது நடவடிக்கை எடுக்கும் வாய்ப்பு இருப்பதாக குறிப்பிடப்பட்டுள்ளது. விஷமத்தனம் கொண்ட ஊழியர்கள் பாட்களிடம் ஆபாசமாக பேசுவது தெரியவந்தால், மனிதவள அதிகாரியிடம் இருந்து அழைப்பு வந்து வேலையில் இருந்து நீக்கப்படலாம்.

எனவே தான் நாளைய அலுவலகங்களில் பாட்களிடம் மோசமாக நடந்து கொள்வது ஏற்றுக்கொள்ளப்படாத விஷயமாக இருக்கும் என்றும் இந்தக்கட்டுரையில் தெரிவிக்கப்பட்டுள்ளது. எனவே பாட்களிடம் எப்படி பேச வேண்டும் என நாம் கற்றுக்கொள்வதும் நல்லது தான்.

எச்.பி.ஆர் கட்டுரை: https://hbr.org/2016/10/why-you-shouldnt-swear-at-siri

மெட்ரோ செய்தி; http://metro.co.uk/2017/10/05/heres-what-happens-when-you-swear-at-or-insult-apples-siri-6942091/

 

நன்றி; யுவர்ஸ்டோரிக்காக எழுதியது

 

 

 

சாதனை இந்திய பெண் விஞ்ஞானி அசிமா சாட்டர்ஜி !

asima-chatterjees-100th-birthday-4652731129135104-2xகூகுளுக்கு தான் நன்றி சொல்ல வேண்டும். இல்லை எனில் பெரும்பாலான இந்தியர்களுக்கு இந்த சாதனை விஞ்ஞானியை நினைவில் நிறுத்துக்கொள்ளும் வாய்ப்பு கிடைத்திருக்காது. செப்டம்பர் 23 ம் தேதி கூகுள் தேடியந்திரம் தனது முகப்பு பக்கத்தில் அசிமா சாட்டர்ஜியின் (Asima Chatterjee) படத்தை டூடுல் சித்திரமாக வெளியிட்டு கவுரவித்திருந்தது. அவரது நூற்றாண்டு விழாவை முன்னிட்டி கூகுள் இவ்வாறு சிறப்பித்திருந்தது.

தேடல் சேவையை வழங்கி வரும் கூகுளின் முகப்பு பக்கத்தின் மையத்தில் உள்ள லோகோவை நீங்கள் கவனித்திருக்கலாம். முக்கிய நிகழ்வுகள் மற்றும் சாதனையாளர்கள் தொடர்பான முக்கிய தினங்களின் போது இந்த லோகோவை சித்திரமாக மாற்றி அமைத்து அவர்களை கவுரவிப்பதை வழக்கமாக கொண்டிருக்கிறது. இந்த வகை சித்திரங்கள் கூகுள் டூடுல் என பிரபலமாக குறிப்பிடப்படுகின்றன. சுதந்திர தினம், புத்தாண்டு, ஒலிம்பிக் போட்டிகள் போன்றவற்றின் போது அவற்றை பிரதிபலிக்கும் கூகுள் டூடுல்களை பார்க்கலாம். சாதனையாளர்கள் பிறந்த தினங்களின் போதும் டூடுல் வாயிலாக கூகுள் அவர்களை நினைவு கூர்வதுண்டு. பலரும் மறந்துவிட்ட அரிய சாதனையாளர்களை எல்லாம் கூகுல் டூடுல் அறிமுகம் செய்திருக்கிறது.

இப்படி தான் அண்மையில் கூகுள் இந்தியா உள்ளிட்ட நாடுகளுக்கான முகப்பு பக்கத்தில் விஞ்ஞானி அசிமா சாட்டர்ஜியின் படத்தை வெளியிட்டு, யார் இந்த அசிமா? என கேட்க வைத்தது. இதற்கான பதிலை அறியும் ஆர்வத்தோடு லோகோவை கிளிக் செய்தால் நூற்றாண்டு காணும் அசிமா பற்றிய விக்கிபீடியா பக்கம் உள்ளிட்ட தகவல்கள் விரிந்து வியக்க வைக்கிறது. இவைத்தவிர, அசிமா நினைவை போற்றும் வகையில் கூகுள் கலாச்சார கழக இணையதளத்தில் இடம்பெற்றுள்ள டிஜிட்டல் கண்காட்சியும் அவர் எத்தனை பெரிய அறிவியல் ஆளுமையாக இருந்திருக்கிறார் என உணர்த்துகிறது.

இந்தியாவில் அறிவியலில் டாக்டர் பட்டம் பெற்ற முதல் பெண் விஞ்ஞானியாக அறியப்படும் அசிமா குறித்தும், அவரது ஆய்வுகள் குறித்தும் தெரிந்து கொண்டால் வியப்பாக இருக்கிறது. எத்தனை பெரிய சாதனையாளராக அவர் இருந்திருக்கிறார். அசிமா, பத்ம பூஷன் உள்ளிட்ட பல்வேறு விருதுகளையும் அங்கீகாரத்தையும் பெற்றிருக்கிறார். மாநிலங்களவை உறுப்பினராக இருந்திருக்கிறார். 2006 ல் இயற்கை எய்தும் வரை அறிவியல் மாணவர்களுக்கு வழிகாட்டி வந்திருக்கிறார்.

இத்தனை சிறப்புகளை பெற்றிருந்தும் கூட, அசிமா பெரும்பாலனவர்களால் அறியப்படாமல் இருப்பது வருந்ததக்கது தான். ஆனால், அசிமாவை நாம் அறியாவிட்டாலும் கூட, அவரது ஆய்வின் பயனை ஏதாவது ஒரு விதத்தில் தான் அனுபவித்துக்கொண்டிருக்கிறோம். புற்றுநோய்க்கான கீமோதெரபியில் பயன்படுத்தப்படும் மருந்து முதல், மலேரியாவை கட்டுப்படும் மருந்து, வலிப்பு நோயை கட்டுப்படுத்தும் ஆயுஷ்-56 மருந்து வரை அவரது பங்களிப்பு பலவிதமாக இருக்கிறது.

கூகுள் டூடுல் வெளியான போது, இந்திய நாளிதழ்களின் இணையதளங்கள் துவங்கி, அமெரிக்காவின் ’டைம்’ இணையதளம், பிரிட்டனின் சன் பத்திரிகை இணையதளம் என எண்ணற்ற செய்தி தளங்கள், அசிமா பற்றிய அறிமுக செய்தியை பெரிதாக வெளியிட்டிருந்தன. இவற்றோடு தி வயர் உள்ளிட்ட இணைய இதழ்களில் வெளியான சிறப்புக்கட்டுரைகளை வாசிக்கும் போது அசிமா பற்றி மேலும் அறிய முடிகிறந்து.

அசிமா வேதியல் துறையில் சிறந்த ஆய்வாளராக இருந்திருக்கிறார். அதிலும் குறிப்பாக மருத்துவ வேதியலில் ஆர்வம் கொண்டு, மூலிகைகளின் மூலக்கூறுகளை பிரித்தறிவதில் முக்கிய பங்காற்றியிருக்கிறார். பல நூற்றாண்டுகளாக இந்தியர்கள் மூலிகை செடிகளின் மருத்துவ குணத்தை அறிந்திருந்தனர். இவற்றை மருத்துவத்திலும் பயன்படுத்தி வருகின்றனர். ஆனால் மூலிகைகளின் மருத்துவ குணத்தின் உயிரியல் சார்ந்த அம்சங்கள் அசீமா போன்ற விஞ்ஞானிகளின் ஆய்வு மூலமே வெளிச்சத்திற்கு வந்தன.

வேதியலின் ஒரு முக்கிய அங்கமான இயற்கை வேதியலின் கீழ் வரும் இயற்கை பொருட்களின் வேதியல் எனும் பிரிவில் இடம்பெறும் இந்த வகை ஆய்வுகள் எளிதானதல்ல. அதிலும் ஆரம்ப கால கட்டத்தில் முறையான வசதிகள், மற்றும் நவீன உபகரணங்கள் இல்லாமலே அசிமா, இதற்கான ஆய்வில் ஓய்வில்லாமல் ஈடுபட்டு சாதித்திருக்கிறார் என்பது தான் கவனிக்க வேண்டிய விஷயம்.

ஒருவிதத்தில் அசிமாவின் குடும்ப பாரம்பரியமும் இதற்கு ஒரு காரணமாக அமைகிறது. அசிமா 1916 ம் ஆண்டு செப்டம்பர் 23 ம் தேதி கொல்கத்தாவில் பிறந்தார். அவரது நாராயன் முகர்ஜி ஒரு மருத்துவர். அவரது சகோர்தரன் சராஷி ரஞ்சன் முகர்ஜியும் பின்னாளில் சர்ஜனாக புகழ்பெற்று விளங்கியவர். 1936 ல் வேதியலில் பட்டம் பெற்ற அசிமா, 1938 ல் இயற்கை வேதியலில் முதுகலை பட்டம் பெற்றார். 1940 ல் கொல்கத்தாவின் லேடி பிராபோர்னே கல்லூரியில் வேதியல் துறை நிறுவன தலைவராக பணிக்கு சேர்ந்தார். 1944 ல் அவர் கொல்கத்தா பல்கலைக்கழகத்தில் கவுரவ விரிவுரையாளராக நியமிக்கப்பட்டார். அதே ஆண்டு, டாக்டர் பட்டமும் பெற்றார்.

இதனிடையே அசிமா, பரதானந்தா சாட்டர்ஜியை திருமணம் செய்து கொண்டார். இயற்பியல் மற்றும் மண் வேதியல் விஞ்ஞானியான பரதானந்தா பர்ந்த மனம் கொண்டவராக இருந்தார். அவரது ஆதரவும் ஊக்கமுமே அசிமாவை அந்த காலகட்டத்தின் சமூக தடைகளை உடைந்த்தெறிந்து ஆய்வுப்பணியில் ஈடுபட வைத்தது. இந்த தம்பதியின் மகளான ஜூலி பானர்ஜியும்,இயற்கை வேதியல் பேராசிரியராக இருக்கிறார்.

இந்தியா சுதந்திரம் அடைந்த ஆண்டு அசிமா, மூன்று ஆண்டு விடுப்பு எடுத்துக்கொண்டு மேற்படிப்பிற்காக அமெரிக்கா சென்றார். அங்கு அமெரிக்க பேராசிரியர்களுடன் இணைந்து ஆய்வில் ஈடுபட்டார். இங்கு தான் அவருக்கு ஆல்கலாய்ட்கள் தொடர்பான ஆய்வின் மீது தனி ஈடுபாடு ஏற்பட்டது. 1950 ல் இந்தியா திரும்பியதும் அவர் ஆல்கலாய்ட் மற்றும் கவ்மரின் தொடர்பான ஆய்வுகளில் ஈடுபட்டார். இவற்றில் தான் அவர் பல சாதனை கண்டுபிடிப்புகளை நிகழ்த்தினார்.

ஆய்வாளராக தன்னை நிலைநிறுத்திக்கொள்ள அவர் மிகவும் கஷ்டப்பட வேண்டியிருந்தது. அவரது முதல் ஆய்வு மாணவர்களில் ஒருவரான டாக்டர்.எஸ்.சி,.பிரகாஷ், இது பற்றி கட்டுரை ஒன்றில் விரிவாக குறிப்பிட்டிருக்கிறார். பல்கலைக்கழக ஆய்வுக்கூடங்களில் போதிய வசதிகள் கூட கிடையாது என்பதோடு, வேதியல் பொருட்களை வாங்கவும் போராட வேண்டியிருக்கும் என்கிறார் அவர். மாணவர்களுக்கான ஊக்கத்தொகையும் சொற்பமாக இருந்தது என்றும், பொருட்களை குத்திக்கொண்டு வர தொலைதூர இடங்களுக்கு சென்று வர வேண்டும் என்றும் குறிப்பிடுகிறார். ஆனால் இந்த போதாமைகளை எல்லாம் மீறி அசிமா ஆய்வு பணிகளில் ஈடுபட்டார்.

அடிப்படை வசதிகள் குறைவாக இருந்தோடு நவின உபகரணங்களும் சொற்பமாகவே இருந்தன. இவற்றை எல்லாம் ஒரு தடையாக கருதாமல், மூலிகைகளில் இருந்து நுண்ணிய அளவிலான ரசாயணங்களை பிரித்தறிந்தார். உபகரணங்களின் போதாமையை ஈடு செய்யும் ஆற்றல் மற்றும் அதீத கவனத்தோடு செயல்பட்டு, பல மூலிகைகளின் மருத்துவ குணத்திற்கான அடிப்படையான வேதியல் கூறுகளை கண்டறிந்தார். இவையே நோய்களை குணமாக்கும் மருந்துகளுக்கு வித்திட்டன.

பின்னர் நவீன உபகரணங்கள் சாத்தியமான போது அவரது ஆய்வு மேலும் தீவிரமாகி மேம்பட்டது,. 40 ஆண்டு கால ஆய்வு வாழ்க்கையில் அவர் ஆல்கயால்டு தொடர்பான ஆய்வுகளில் தான் அதிகம் ஈடுபட்டிருக்கிறார். இவையே புற்றுநோய் சிகிச்சையில் உதவும் மருத்து உள்ளிட்டவற்றை கண்டுபிடிக்க வைத்தது.

இத்தனைக்கும் ஒரு இல்லத்தலைவியாக குடும்ப பொறுப்புகளை திறம்பட நிறைவேற்றியபடியே அவர் ஆய்வுலகிலும் இயங்கி வந்திருக்கிறார். தினமும் அதிகாலை எழுந்திருந்து வீட்டு வேலைகளை முடித்த பிறகே அவர் பல்கலைக்கழகம் செல்வார் என கூகுள் டிஜிட்டல் கண்காட்சி தகவல் குறிப்பிடுகிறது. பின்னர் மாலை வீடு திரும்பியதும் மீண்டும் வீட்டு வேலை கவனிப்பதை வழக்கமாக கொண்டிருக்கிறார்.

இந்திய மருத்துவ மூலிகைகளுக்கான பிராந்திய ஆய்வு மையத்தை நிறுவியது, நூற்றுக்கணக்கான ஆய்வு மாணவர்களுக்கு வழிகாட்டியாக இருந்தது, சர்வதேச பல்கலைக்கழகங்களில் உரையாற்றியது என தீவிரமாக இயங்கி வந்த அசிமா, சாந்தி ஸ்வருப் பட்னாகர் விருது, சு.வி.ராமன் விருது  பத்ம விபூஷன் உள்ளிட்ட அங்கீகாரங்களை பெற்றிருக்கிறார்.

நிகரில்லாத ஆய்வாளராக அவர் அறிவியல் ஆர்வம் கொண்டவர்களுக்கு ஊக்கம் அளிக்கும் எண்ணற்ற சாதனையாளர்களில் ஒருவராக திகழ்கிறார்.

 

 

இணைப்புகள்:

  1. அசிமா சாட்டரிஜியை கவுரவிக்கும் கூகுள் டிஜிட்டல் கண்காட்சி; https://www.google.com/culturalinstitute/beta/exhibit/rgKiCdKgS8UJIw
  2. அசிமா சாட்டர்ஜியின் ஆய்வுலக சாதனைகள்: http://indian-scientists.padakshep.org/subjectareas/chemical-sciences/chem-bhatnagar-prize-winners/asima-chatterjee
  3. அசிமா பற்றிய சிறப்புக்கட்டுரை: https://thewire.in/180533/asima-chatterjee-alkaloids-phytomedicine-antimalarial-bhatnagar-google/

 

நன்றி.; மின்னம்பலம் இணைய இதழில் எழுதியது

கண்ணை நம்பாதே! ஒளிப்படங்கள் ஏமாற்றும்…

42570D2B00000578-4697160-One_of_these_images_has_been_changed_but_which_one_is_it_and_whe-a-90_1500359733849இனி அடுத்தமுறை இணையத்தில் ஒளிப்படங்களை பார்த்து ரசிக்கும் போது கொஞ்சம் கூடுதல் கவனம் செலுத்துங்கள். கண்ணில் விளக்கெண்ணெய் விட்டுக்கொண்டு பார்ப்பது என்பார்களே, அது போல கூட நீங்கள் காணும் ஒளிப்படத்தை ஆய்வு செய்யுங்கள். அதிலும் முக்கியமாக, ஒரு ஒளிப்படம் உங்களை கவர்ந்து அதை இணையவெளியில் பகிர்ந்து கொள்ளத்தோன்றும் நிலையில், அந்த படத்தை ஒருமுறைக்கு இருமுறை கூர்ந்து கவனிப்பது நல்லது. ஏனெனில், அந்த படம் போலியான ஒளிப்படமாக கூட இருக்கலாம். எனவே நீங்களும் ஏமாந்து, மற்றவர்களையும் ஏமாற செய்யக்கூடாது அல்லவா? அதனால் தான், ஒளிப்படங்கள் விஷயத்தில் கொஞ்சம் எச்சரிக்கை தேவை.

இது என்ன வம்பா பேச்சோ என்று நீங்கள் நினைக்கலாம். ஆனால் இணைய யதார்த்தம் இப்படி தான் இருக்கிறது. இணையத்தை ஒரு பக்கம், ஃபேக் நியூஸ் எனப்படும் பொய்ச்செய்தி உலக்கிக்கொண்டிருக்கிறது என்றால் இன்னொரு பக்கம் பொய் படங்கள் பெரிய பிரச்சனையாக இருக்கிறது. அண்மையில் இது தொடர்பாக முக்கியமான ஆய்வு முடிவு ஒன்றும் வெளியாகி இருக்கிறது. அதைப்பற்றி பார்க்கும் முன், முதலில் பொய் படங்களின் பிரச்சனையை சுருக்கமாக பார்த்துவிடலாம்.

ஃபேக் நியூஸ் பிரச்சனை பற்றி நீங்கள் அறிந்திருக்கலாம். இணையத்தில் நிஜ செய்திகள் ;போலவே வெளியிடப்படும் உண்மை அல்லாத செய்திகளே இவ்வாறு கூறப்படுகின்றன. உண்மையான இணையதளம் போல தோன்றும் இணையதளங்களில் வெளியிடப்படுவதும், கவனத்தை ஈர்க்கும் பளிச் தலைப்புகளும், விறுவிறுப்பான விவரிப்பும் பொய்ச்செய்திகளின் முக்கிய அம்சங்களாக அமைகின்றன. பெரும்பாலான இணையவாசிகள் இவற்றை அடையாளம் காண முடியாமல் ஏமாந்து போவதும், அதைவிட முக்கியமாக இவற்றை சமூக ஊடகங்களில் தாராளமாக பகிர்ந்து கொண்டு பிரபலமாக்குவதும் மோசமான தாக்கத்தை ஏற்படுத்தி வருகிறது. சமூக வலைப்பின்னல் சேவையான பேஸ்புக் மற்றும் கூகுளில் இத்தகைய பொய்ச்செய்திகள் வடிகட்டப்படாமல் தலைகாட்டுவதும் பெரும் விவாதத்தை ஏற்படுத்தியுள்ளது.

பொய்ச்செய்திகளை கண்டறிவது எப்படி? கட்டுப்படுத்துவது எப்படி? களைவது எப்படி? என்றெல்லாம் விவாதம் தீவிரமாகி இருக்கிறது. இதற்காக என்றே பிரத்யேக அல்கோரிதம்கள் உருவாக்கப்படுகின்றன. இந்த பொறுப்பை மென்பொருள்கள் வசம் ஒப்படைப்பது பலன் தராது, விக்கிபீடியா பாணியில் இணைய கூட்டமே இந்த கண்டறிதலை சிறப்பாக செய்ய முடியும் எனும் நம்பிக்கையில், விக்கிபீடியா நிறுவனர் ஜிம்மி வேல்சும் தன் பங்கிற்கு, விக்கிடிரிப்யூன் எனும் புதிய இணையதளத்தை நிறுவியிருக்கிறார்.

பொய்ச்செய்திகள் போலவே, பொய் படங்களும் இணையத்தில் உலா வருகின்றன. அதாவது ஒளிப்படங்களை திருத்தி மேம்படுத்த உதவும் போட்டோஷாப் மென்பொருள் கொண்டு, மாற்றப்பட்ட படங்கள். பொதுவாக ஒளிப்படத்தின் பின்னணியில் உள்ள ஒளி அடர்த்தியை மாற்றுவது, சின்ன சின்ன குறைகளை சரி செய்வது போன்றவை மூலம் ஒளிப்படத்தை மெருகேற்றுவதற்காக போட்டோஷாப் பயன்படுகிறது. வண்ணத்தை கூட்டலாம், குறைக்கலாம் என்றாலும், படத்தின் மூல அம்சங்களில் கை வைக்க கூடாது. அதாவது படத்தில் இல்லாத அம்சத்தை சேர்ப்பது, இருக்கும் அம்சத்தை நீக்குவது போன்றவற்றை செய்யக்கூடாது. இப்படி மூல அம்சங்களில் மாற்றம் அல்லது திருத்தங்களை செய்தால் அந்த படம் பொய் படமாக கருதப்படுகிறது.

ஆர்வக்கோளாறு கொண்ட இணையவாசிகள் பலர் இப்படி போடோஷாப் செய்த படங்களை வெளியிட்டு மாட்டிக்கொண்டிருக்கின்றனர். இதைவிட மோசம், முன்னணி ஒளிப்பட கலைஞர்கள் சிலரும் இத்தகைய சர்ச்சையில் சிக்கி இருக்கின்றனர். அதே போல முன்னணி வலைப்பதிவாளர்கள் சிலரும் கூட, ஒளிப்படத்தில் கையை வைத்து மாட்டிக்கொண்டிருக்கின்றனர். அண்மையில் கூட, பிரபல பேஷன் மற்றும் சுற்றுலா வலைப்பதிவாளரான அமீலியா லயானா என்பவர், போட்டோஷாப் மூலம் மாற்றப்பட்ட படங்களை தனது இன்ஸ்டாகிராம் பக்கத்தில் பகிர்ந்து கொண்டது கண்டுபிடிக்கபட்டு கடும் விமர்சனத்திற்கு இலக்கானார்.

இன்னொரு பக்கம் பார்த்தால், சமூக ஊடகங்களில் பகிரப்பட்டு பரபரப்பாக பேசப்படும் பல படங்கள் உண்மையில் மாற்றம் அல்லது திருத்தம் செய்யப்பட்டவையாக இருப்பதை பலரும் உணர்வதில்லை. இந்த பின்னணியில் தான், பிரிட்டனின் வார்விக் பல்கலைக்கழகத்தை சேர்ந்த ஆய்வுக்குழு ஒன்று, பொய் படங்கள் தொடர்பான ஆய்வை நடத்தி, அதன் முடிவுகளை வெளியிட்டுள்ளது.

இந்த ஆய்வின் போது, 707 பயனாளிகளிடம் இரண்டு வகையான ஒளிப்படங்கள் காண்பிக்கப்பட்டுள்ளன. இவற்றில் ஐந்து மூலப்படங்கள் மற்றும் ஐந்த படங்கள் டிஜிட்டல் முறையில் மாற்றப்பட்டவை. இந்த படங்களில் பொய்யான அம்சங்களை கண்டறிய முடியுமா எனும் கேள்வியோடு, அவற்றை கண்டறியும் சோதனையில் ஈடுபடுத்தப்பட்டனர். இவர்களில் 60 சதவீதம் பேருக்கு மேல் பொய் படங்களை கண்டறிந்தாலும், அதில் என்ன பிரச்சனை என கண்டறிய முடியாமல் திண்டாடியிருக்கின்றனர்.

இன்னொரு சோதனையில், பொய்படங்கள் பற்றிய தகவல் தெரிவிக்காமல் இரண்டு வகையான படங்களை பார்த்து வித்தியாசத்தை கண்டறியுமாறு கேட்கப்பட்டனர். இவர்களில் 65 சதவீதம் பேர் படத்தில் வில்லங்கம் இருப்பதை கண்டுபிடித்தாலும், பெரும்பாலானோரால் படத்தில், எந்த இடத்தில் பிரச்சனை இருக்கிறது என கண்டறிய முடியவில்லை.

இந்த ஆய்வு முடிவுகள் தொடர்பான விரிவான கட்டுரை அறிவியல் சஞ்சிகை ஒன்றில் வெளியிடப்பட்டுள்ளது. ஒரு ஒளிப்படம் உண்மையானதா? பொய்யானதா? என்பதை கண்டறியும் திறன் மக்களிடம் குறைவாக இருப்பதை இந்த ஆய்வு சுட்டிக்காட்டுகிறது.

முனைவர் பட்ட ஆய்வாளர் சோபியா நைட்டிங்கேல் மற்றும் டெரிக் வாட்சன் உள்ளிட்டோர் இந்த ஆய்வை மேற்கொண்டுள்ளனர். ஒளிப்படங்களை ஆதாரமாக கொள்வதை இது சிக்கலாக்கும் என்று சோபியா கூறியிருக்கிறார். ஒளிப்படங்கள் நமது நினைவாற்றல் மீது மிகப்பெரிய தாக்கம் செலுத்துவதால், உண்மையான படத்தையும், பொய்யான படத்தையும் கண்டறிய முடியாதது நாம் நம்புவது மற்றும் நினைவில் கொள்வது மீது தாக்கம் செலுத்தலாம் என்கிறார் வாட்சன்.

இந்த ஆய்வு தொடர்பாக இணையதளம் ஒன்றும் அமைக்கப்பட்டுள்ளது; http://bit.ly/2uEbjow  இந்த தளத்தில் நீங்களும் கூட பொய பட கண்டறிதல் சோதனைக்கு உங்களை உட்படுத்திக்கொள்ளலாம். உங்கள் திறமையை சோதித்துக்கொள்வதோடு, இணைய ஆய்வுக்கு பங்களிப்பு செலுத்தியது போலவும் இருக்கும்.

 

 

தளம் புதிது; செய்திகளுக்கான சமூக வலைப்பின்னல்

செய்திப்பிரியர்களை உற்சாகத்தில் ஆழ்த்தும் வகையில், செய்திகளை தெரிந்து கொள்வதற்காக புதிய இணையதளம் ஒன்று அறிமுகம் ஆகியிருக்கிறது. காங்ஸ்டர்ஸ் எனும் அந்த தளம், செய்திகளை கண்டறிவதற்கானது மட்டும் அல்ல, பகிர்ந்து கொள்வதற்கானதாகவும் இருக்கிறது. அதாவது செய்திகளுக்கான வலைப்பின்னல் தளம் போல இது உருவாக்கப்பட்டுள்ளது.

இதில் சக உறுப்பினர்கள் பகிர்ந்து கொள்ளும் செய்திகளை பார்ப்பதோடு, அவற்றை சமூக ஊடகங்களிலும் பகிர்ந்து கொள்ளலாம். இதில் முன்னிலை பெறும் செய்திகளை கிளிக் செய்தால் அவற்றின் சுருக்கத்தை வாசிக்கலாம். மேலும் கிளிக் செய்தால் விரிவான செய்தியை வாசிக்கலாம்.

பலவித தலைப்புகளில் செய்திகள் வெளியாகின்றன. தினமும் ஒரு லட்சத்திற்கு மேற்பட்ட செய்திகளை பரிசீலித்து செய்திகளை தேர்வு செய்து வழங்குவதாக இந்த தளத்தின் அறிமுகப்பகுதியில் குறிப்பிடப்பட்டுள்ளது.

சமூக செய்தி கண்டறிதல் சேவையாக அறியப்பட்ட டிக் உள்ளிட்ட தளங்கள் வழங்கிய சேவையை போன்றதே என்றாலும், செய்திகளை அறிந்து கொள்வதில் ஆர்வம் உள்ளவர்கள் இந்த தளத்தை பயன்படுத்திப்பார்க்கலாம்.

செய்திகளை தேடிப்பார்க்கும் மற்றும் சமர்பிக்கும் வசதி இருக்கிறது.

இணைய முகவரி: http://gongsters.com/

 

 

 

செயலி புதிது: வரலாற்றில் நடந்தது என்ன?

வரலாற்று நிகழ்வுகளை உள்ளங்கையில் கொண்டு வரும் வகையில் வாட் ஹாப்பண்ட் டுடே இன் ஹிஸ்டிரி, செயலி உருவாக்கப்பட்டுள்ளது. ஐபோனுக்காக உருவாக்கப்பட்டுள்ள இந்த செயலியில், ஒவ்வொரு மாதத்திற்கான முக்கிய வரலாற்று நிகழ்வுகள் சுட்டிக்காட்டப்படுகின்றன. அவற்றில் எந்த நிகழ்வு தொடர்பான கூடுதல் தகவல்களையும் தெரிந்து கொள்ளலாம். நிகழ்வுகளின் ஒளிப்படங்களையும் காணலாம். எல்லா நிகழ்வுகளுமே கவனமாக தேர்வு செய்யப்பட்டுள்ளதாக குறிப்பிடப்பட்டுள்ளது. முப்பரிமான டச் முன்னோட்ட வசதியும் இருப்பதாக தெரிவிக்கப்பட்டுள்ளது.

நிகழ்வுகளை அறிவிக்கையாக பெறும் வசதியும் இருக்கிறது. இந்த வசதி மூலம் முக்கிய நிகழ்வுகளை தவறவிடாமல் இருக்கலாம். வரலாற்று நிகழ்வுகளில் ஆர்வம் உள்ளவர்களை கவரக்கூடிய செயலி இது. ஆண்ட்ராய்டு வடிவம் எப்போது வெளியாகும் என்றுத்தெரியவில்லை.

மேலும் தகவல்களுக்கு: http://apple.co/2gX5U6R

 

 

 

சைபர்சிம்மன்

 

அறிவியல்புரி அழைக்கிறது: தமிழில் ஒரு முன்னோடி மின்மடல் முயற்சி!

ariஅறிவியல் தொடர்பான கேள்விகள் உங்களிடம் இருக்கின்றதா? அறிவியல் தொடர்பான கட்டுரைகளை வாசிக்கும் ஆர்வம் இருக்கிறதா? பயனுள்ள, சுவாரஸ்யமான அறிவியல் கட்டுரைகளை இணையத்தில் சல்லடைப்போட்டு தேடிப்பார்த்து தேர்வு செய்து, அவற்றை ஏன் படிக்க வேண்டும் என யாரேனும் பரிந்துரை செய்தால் நன்றாக இருக்கும் எனும் ஆதங்கமும் இருக்கிறதா? ஆம், ஆம், ஆம் எனில், உங்களை உற்சாகத்தில் ஆழ்த்தக்கூடிய ஒரிடம் இணையத்தில் உருவாகி இருக்கிறது.

மிகவும் பொருத்தமாக அறிவியல்புரி எனும் பெயரில் அமைந்துள்ள அந்த இணையதளத்தில் இருந்து விஞ்ஞான மின்மடல் உங்களை தேடி வரக்காத்திருக்கிறது. வாரம் மூன்று முறை அறிவியல் உலக பாய்ச்சல்களை தேர்ந்தெடுத்த கட்டுரைகளின் அறிமுகத்தெறிப்புகளாக இந்த மன்மடல் வழங்க இருக்கிறது.

” உங்கள் அறிவியல் ஆர்வத்திற்கு அறிவியல்புரி இலவச மின்மடல் ஒரு ராஜபோக விருந்தாக இருக்கப்போகிறது” என மின்மடலுக்கான அறிமுகம் அறிவிப்பில் குறிப்பிடப்பட்டுள்ளது.

இது தொடர்பான அறிமுகம் இப்படி நீள்கிறது:

“இணையத்தில் நான் தேடிப் படித்த, ஆங்கில அறிவியல் கட்டுரைகளில், எனக்குப் பிடித்தவற்றை உங்களுக்காகத் தொகுத்து அறிவியல்புரி இலவச மின்மடல் மூலம் அனுப்புகிறேன்.

 

தமிழில் சிறு அறிமுகத்துடன் குறைந்தது 5 அறிவியல் தலைப்புகள் ஒவ்வொரு மடலிலும் இருக்கும்.  நீங்கள் இணைப்புகளை சொடுக்கி, நேரே அந்தந்த ஆங்கிலக் கட்டுரைகளுக்குப் போய் படித்து பயன்பெறலாம்.

 

கட்டுரைகளை தேடிப் படித்து தேர்ந்தெடுக்க ஒவ்வொரு மின்மடலுக்கும் குறைந்தது நான்கு மணி நேரங்களைச் செலவிடுகிறேன். இதனால் உங்கள் பொன்னான நேரமும், இணையம் மற்றும் கணினி மின் கட்டணங்களும் மிச்சமாகும்!

 

தமிழில் பல அறிவியல் தலைப்புக்களைப் பற்றி இன்னும் பேச்சே இல்லை என்பதையும் இந்த மின்மடல் உங்களுக்கு உணர்த்தும்.

 

சில வாரங்களில் குறைந்தது 100 அறிவியல் தலைப்புகளுக்கு மேல் விரிவாக அறிந்து கொள்வீர்கள்.”

 

இந்த அனுபவத்தில் இணைய நீங்கள் செய்ய வேண்டியதெல்லாம், அறிவியல்புரி இணையதளத்தில் உங்கள் மினஞ்சல் முகவரியை சமர்பித்துவிட்டு வாரந்தோறும் ஆர்வத்துடன் காத்திருப்பது தான். இந்த காத்திருப்பு உற்சாகம் அளிக்க கூடியதாகவே இருக்கும்.

 

தமிழில் அறிவியல் கட்டுரைகளுக்கான மின்மடல் சேவை என்பது வரவேற்க தக்க முயற்சி. தொழில்நுட்ப உலகிலும், அறிவியல் உலகிலும் ஆய்விலும், நடைமுறை சேவைகளிலும் பெரும் பாய்ச்சலி நிகழும் கால கட்டம் இது. தமிழில் இவற்றை அடையாளம் காட்டுவது காலம் சார்ந்த தேவை. புதிய வாசகர்களையும், வருங்கால கண்டுபிடிப்பாளர்களையும் ஊக்குவிக்க இது நிச்சயம் உதவும்.

 

இந்த மின்மடல் அறிவிப்பின் வாலில் இன்னொரு உற்சாக செய்தியும் மறைந்திருக்கிறது. மின்மடல் ஆசிரியர், இதே பெயரில் அறிவியல் கட்டுரைகள் தொகுப்பு நூல் வரிசையையும் உருவாக்கி வருவதாக குறிப்பிட்டுள்ளார். அந்த நூல் எப்படி இருக்கும் என கற்பனை விரிகிறது. நீங்களும் அதில் சிறகடியுங்கள்: https://www.arivialpuri.com/

 

( பி.கு; இந்த செய்தி மடலின் ஆசிரியர் எனது நெருங்கிய நண்பர். ஆனால் இந்த பதிவை எழுத அது காரணம் அல்ல. அறிவியல் உலகில் நிகழ்ந்து வரும் மாற்றங்களிலும், முன்னேற்றத்திலும் ஆர்வம் கொண்ட தொழில்நுட்ப வலைப்பதிவாளர் எனும் முறையில் இந்த மின்மடல் தமிழில் ஒரு முன்னோடி முயற்சியாக இருக்கும் என கருதுகிறேன். அதுவே இந்த பதிவிற்கான காரணம்.