Category Archives: இன்டெர்நெட்

ரோபோ புன்னகை என்ன விலை?

DOnf8ENXcAAXL_Zவிருதுகள், தேர்வுகள் என்று வந்தாலே சர்ச்சைகள் எழுவது இயல்பானது தான். ஆனால், சர்வதேச புகைப்பட போட்டி ஒன்றில் எழுந்திருக்கும் சர்ச்சை கொஞ்சம் வித்தியாசமானது. இந்த சர்ச்சை விருதுக்கு தேர்வு செய்யப்பட்ட புகைப்படத்தின் தரம் அல்லது தகுதி குறித்து உண்டாகவில்லை. மாறாக புகைப்படத்தில் இருக்க வேண்டிய உயிர்த்துடிப்பு அல்லது ஆன்மா தொடர்பான கேள்விகளை எழுப்புகிறது. இந்த கேள்விகள் சுவாரஸ்யமாக அமைவதோடு, நம் காலத்து கேள்விகளாகவும் இருப்பது தான் முக்கிய விஷயமாக இருக்கிறது.

சர்ச்சைக்குள்ளாகி இருக்கும் அந்த புகைப்படத்தில் ஒரு நல்ல புகைப்படத்திற்கு தேவையான எல்லா அம்சங்களும் இருக்கவே செய்கின்றன. அந்த படம் அழகாக இருக்கிறது. அதில் ஒரு வசீகரம் இருக்கிறது. அது ஒரு மைய கருத்தை பேசுகிறது. எல்லாம் இருந்தும் அந்த படத்தினுள் உயிரோட்டம் இல்லை எனும் குற்றச்சாட்டு எழுந்துள்ளது. ஏனெனில் அந்த படத்தில் இருப்பது மனித முகம் அல்ல, மனித இயந்திரம் முகம் என்பது தான்!

மனித மாதிரிகளை போஸ் கொடுக்க வைத்து படம் எடுப்பது போல, புகைப்பட கலைஞர் ஒருவர் இயந்திர மனித மாதிரியை போஸ் கொடுக்க வைத்து படம் எடுத்திருக்கிறார். படம் எடுத்தவர் பின்லாந்து நாட்டைச்சேர்ந்தவர். அவர் படம் எடுத்த மாதிரி, ஜப்பானைச்சேர்ந்த எரிகா எனும் எந்திரன். எரிகா ஒரு ரோபோ தான் என்றாலும், சாதாரண ரோபோ அல்ல. அது ஒரு ஆண்ட்ராய்டு. அதாவது மனித முகம் போன்ற தோற்றத்தை கொண்ட ரோபோ.

ரோப்போக்களி;ல் பலவகை உண்டு. தொழிற்சாலைகளில் பார்க்க கூடிய ரோபோக்கள் இயந்திர வகையை சேர்ந்தவை. மனித வடிவிலான ரோபோக்களும் இருக்கின்றன. ஹோண்டோவின் அசிமோ இதற்கு நல்ல உதாரணம். ரோபோ விலங்குகளும் உள்ளன. அண்மையிம் மறுஅறிமுகம் செய்யப்படுவதாக அறிவிக்கப்பட்ட சோனியின் ஐபோ நாய்க்குட்டி இதற்கு அழகான உதாரணம். இன்னும் பல வகை ரோபோக்கள் உள்ளன. இவற்றில் அச்சு அசல் மனித உருவத்தை கொண்டுள்ளவை ஆண்ட்ராய்டு என குறிப்பிடப்படுகின்றன.

ஆண்ட்ராய்டு ரோபோவுக்கு உதாரணம் தேவையில் எனில் நமக்கு பரீட்சயமான எந்திரன் படத்தின் சிட்டி ரோபோவை சொல்லலாம். ரஜினியை போலவே காட்சி அளித்தததால் தான் சிட்டி ஆண்ட்ராய்டு ரகம். இத்தகைய ஆண்ட்ராய்டு ரோபோ உருவாக்கத்திலும், ஆய்விலும் முன்னணியில் இருப்பது ஜப்பானியர்கள் தான். அதிலும் ஹிரோஷி இஷிகுரோ (Hiroshi Ishiguro ) எனும் விஞ்ஞானி தான் படுகில்லாடியாக இருக்கிறார். ரோபோ குரு என்றே வர்ணிக்கப்படும் இஷிகுரோ, மனித வடிவிலான ரோபோக்களை உருவாக்கும் ஆய்வில் தீவிரமாக ஈடுபட்டு வருபவர். சுய தோற்றம் கொண்ட ரோபோ ஒன்றையும் உருவாக்கியுள்ள இஷிகுரோவின் மற்றொரு உருவாக்கம் தான் எரிகா.

23 வயது பெண் தோற்றம் கொண்ட எரிகாவை விஷேசமான ரோபோ என்று தான் சொல்ல வேண்டும். ஏனெனில் இது பேசும் ரோபோ என்பது மட்டும் அல்ல, கிட்டத்தட்ட மனிதர்கள் போலவே பேசும் ஆற்றலும் கொண்டது. குறிப்பிட்ட தலைப்புகளின் கீழ் உரையாடவும் செய்யக்கூடியது. உலகிலேயே மிகவும் அழகான ஆண்ட்ராய்டு என வர்ணிக்கப்படும் எரிகா, மனித தோற்றத்துக்கு மிகவும் நெருக்கமான உருவ அமைப்பையும் கொண்டிருக்கிறது.

இஷிகுரோ உருவாக்கிய ரோபோக்களில் எரிகா மட்டும் தான் சுயம்பு ரகம். அதாவது, மனித மாதிரியை அடிப்படையாக கொள்ளாமல் சுயேட்சையாக உருவாக்கப்பட்டது.

எரிகா ரோபோ பற்றியே நிறைய பேசலாம். ஆனால், இப்போதைக்கு எரிகாவால் உண்டான சர்ச்சை மற்றும் அது தொடர்பான இருத்தலியல் கேள்விகள் பார்க்கலாம்.

எரிகா அச்சு அசல் பெண் போலவே இருப்பதால் பின்லாந்து புகைப்படக்கலைஞரான மைஜா டம்மி என்பவர், எரிகாவை அழகாக படமெடுத்து டெய்லர் வெஸிக் போட்டோகிராபில் போர்ட்ரய்ட் பரிசுக்கு அனுப்பி வைத்தார். அந்த புகைப்படம் இறுதிச்சுற்றுக்கு தேர்வானதோடு, மூன்றாவது பரிசையும் வென்றிருக்கிறது. இந்த தேர்வே சர்ச்சைக்கு காரணமாகியுள்ளது.

போட்டியே போர்ட்ரயட் எனப்படும் உருவப்படம் தொடர்பானது. உருவப்படம் என்றால், மனிதர்களின் ஆளுமை சித்திரங்கள் என புரிந்து கொள்ளலாம். இந்த வகை படங்கள் பல உணர்வுகளை சொல்லாமல் சொல்லக்கூடியவை. இந்த போட்டியிலேயே முதல் பரிசை வென்ற லிபியா கடற்கரை பகுதியில் மீட்கப்பட்ட ஆப்பிரிக்க அகதியின் புகைப்படம் இதற்கான சரியான உதாரணமாக அமைகிறது. காமிராவை அகன்ற கண்களால் வெறித்துப்பார்ப்பது போல அமைந்துள்ள அந்த அகதியின் ஊடுருவும் பார்வை, மீட்கப்பட்ட நம்பிக்கை, சூழலின் மீதான அவநம்பிக்கை, இனம் புரியாத அச்சம் என பலவித உணர்வுகளை பேசுவதாக பாராட்டப்படுகிறது.

இத்தகைய ஆளுமை சித்திரங்கள் நடுவே ஒரு ரோபோ படத்தை தேர்வு செய்வது சரியா? என்பது தான் கேள்வியாக எழுந்துள்ளது. ஆனால், இந்த கேள்விக்கு பதில் தேடும் முன் எரிகாவின் உருவப்படத்தை ஒரு முறை பார்த்துவிட வேண்டும். முதல் பார்வைக்கு ஜப்பானிய பெண் எனும் தோற்றத்தை தரக்கூடிய அந்த புகைப்படத்தில் எரிகா, பக்கவாட்டில் நோக்கியபடி புன்னகைக்க முயல்பவர் போல காட்சி அளிக்கிறார். இந்த படத்தை சட்டென்று பார்க்கும் எவரும் இதில் உள்ளது ரோபோ என உணர மாட்டார்.

எனினும் எரிகா ரோபோ என்று கண்டுபிடிக்க முடியாதது என்பதல்ல விஷயம். எரிகா எனும் ரோபோவை படம் எடுத்து அனுப்பியிருக்கிறேன் என்று குறிப்பிட்டே புகைப்பட கலைஞர் டம்மி போட்டியில் பங்கேற்று இருக்கிறார். இந்த விஷயம் தெரிந்து விவாதிக்கப்பட்டே நடுவர்களும் இந்த படத்தை அனுமதித்து தேர்வும் செய்துள்ளனர்.

_97673208_taylor_wessing_ppp_2017_0155உருவப்படத்திற்கான போட்டி விதிகளின் படி, வாழ்க்கையில் இருந்து தேர்வு செய்யப்பட்டவர் மற்றும் உயிருடன் போஸ் கொடுத்தவரின் படமாக இருக்க வேண்டும் என தெளிவாக குறிப்பிடப்பட்டுள்ளது. அதன் படி பார்த்தால், ரோபோவை படமெடுத்தது உருவப்படம் கீழ் வராது. ஆனால் இந்த காரணத்தினால் படத்தை தகுதி நீக்கம் செய்யாமல், தேர்வு செய்ய நடுவர்கள் தீர்மானித்துள்ளனர். இது தொடர்பாக விதிகளில் மாற்றம் தேவையா என பின்னர் தீர்மானிக்கபடும் என கூறியுள்ள போட்டி நிர்வாகிகள், ஒரு சில தீவிரமான உருவப்பட சித்திரங்கள், அவற்றின் ரகம் தொடர்பாக வலுவான கேள்விகளை எழுப்பக்கூடியவை எனும் அடிப்படையில் எரிகாவின் தேர்வு அனுமதிக்கப்படுவதாக தெரிவித்துள்ளனர்.

ஒரு ரோபோ புகைப்படம் பரிசுக்குறியதாக தேர்வு செய்யப்பட்டது சுவாரஸ்யமாக இருந்தாலும், புகைப்பட வல்லுனர்கள் இதை கேள்விக்குள்ளாக்கி உள்ளனர். உருவப்படம் என்பது ஜீவன் சார்ந்தது, உயிரில்லாத ஒரு படத்தை எப்படி ஏற்க முடியும் என கேள்வி எழுப்பியுள்ளனர். இந்த படம் அழகாக இருக்கலாம் ஆனால், அதில் ஜீவனோ, உயிரோட்டமோ இல்லையே என விமர்சித்துள்ளனர். எரிகா ஒரு பொம்மை போல் அல்லவா இருக்கிறது, அதன் ஆன்மா எங்கே என்றும் சிலர் கேட்டுள்ளனர்.

இந்த கேள்விகளே அழமான விவாதத்திற்கு வழி வகுத்துள்ளன. ரோபோக்கள் சகஜமாக துவங்கும் சாத்தியம் உள்ள சூழலில், ஆன்மா இல்லை என்பதால் அவற்றை நிராகரிக்க முடியுமா என்பது போன்ற கேள்விகள் எழுகின்றன. அதிலும் செயற்கை நுண்ணறிவு சார்ந்த ஆய்வுகள் தீவிரமடைந்துள்ள நிலையில், பேசும் இயந்திரங்களும், இன்னும் பிறவகை புத்திசாலி இயந்திரங்களும் உருவாக்கப்பட்டு வரும் சூழலில் இயந்திரம் தொடர்பான நம்முடைய புரிதல் எவற்றின் அடிப்படையில் அமைய வேண்டும் எனும் கேள்வி எழுகிறது.

ஒரு சில புகைப்பட கலைஞர்கள் எரிகா சர்ச்சை சார்ந்து இருத்தலியல் தொடர்பான கேள்விகளையும் எழுப்பியுள்ளனர். எது ரோபோ தன்மை, எது மனித தன்மை எனும் கேள்விகளும் இது தொடர்பாக எழுகின்றன.

எரிகாவை படமெடுத்த புகைப்படக்கலைஞர் டம்மி எதிர்பார்த்ததும் இத்தகைய விவாதத்தை தான். ’ மனிதர்களாக இருப்பது என்றால் என்ன? உயிருடன் இருப்பது என்றால் என்ன? என்பது போன்ற கேள்விகளை எழுப்ப முயன்றிருக்கிறேன் என அவர் கூறியிருக்கிறார். இதற்காகவே ஜப்பான் சென்று எரிகாவுடன் அரை மணி நேரம் செலவிட்டு இந்த படத்தை எடுத்துள்ளார்.

புகைப்படக்கலையில் டாக்டர் பட்டம் பெற ஆய்வு செய்து வருபவர் ரோபோக்களை நாம் அணுகும் விதத்தையும் கேள்விக்குள்ளாக்குகிறார். அவர் எழுப்பும் கேள்வியில் உங்களுக்கு உடன்பாடு இருக்கிறதா? உங்கள் பதிலை பதிவு செய்யுங்களேன்.

 

எரிகா தேர்வு புகைப்பட போட்டி செய்தி: http://www.bbc.com/news/in-pictures-41161964

புகைப்பட போட்டி அமைப்பின் இணையதளம்: https://www.npg.org.uk/whatson/twppp-2017/exhibition.php

 

நன்றி; யுவர் ஸ்டோரி தமிழ் இணையதளத்தில் எழுதும் பத்தியிர்ல் இருந்து…

 

வீடியோ வழிகாட்டி இணையதளங்கள்

 

what-to-watch-next-findie-670x330’என்ன புத்தகம் படிக்கலாம்’ எனும் கேள்வி புத்தக புழுக்களுக்கு இருப்பது போல, ’என்ன வீடியோ பார்க்கலாம்’ எனும் கேள்வி வீடியோ பிரியர்களுக்கு இருக்கலாம். அதிலும் இப்போது ஆன்லைனில் அப்லோட் செய்யப்படும் வீடியோக்கள் அதிகரித்து வரும் நிலையில், பார்த்து ரசித்து பயன்பெற ஏற்ற வீடியோக்களை கண்டறிவது என்பது சவாலானது தான். ஒரு புள்ளிவிவரப்படி பார்த்தால் யூடியூப்பில் மட்டும் நிமிடத்திற்கு 100 மணி நேரத்திற்கு நிகரான வீடியோக்கள் பதிவேற்றப்படுகின்றன. இன்னொரு கணக்குபடி பார்த்தால் அமெரிக்காவில் கடந்த 30 ஆண்டுகளில் முன்னணி தொலைக்காட்சி சேனல்கள் உருவாக்கிய வீடியோக்களை விட அதிக வீடியோ 30 நாட்களில் இணையத்தில் பதிவேற்றப்படுகின்றன.

வீடியோ இணையதளங்களில் யூடியூப் முன்னணியில் இருந்தாலும், வேறு பல வீடியோ இணையதளங்களும் அநேகம் இருக்கின்றன. அதோடு, வழக்கமாக அறியப்படும் பொழுதுபோக்கு, நகைச்சுவை வீடியோக்கள் தவிர எண்ணற்ற வகை வீடியோக்களும் இணையத்தில் கொட்டிக்கிடக்கின்றன. அவற்றின் மத்தியில் தேடிப்பார்த்தால் அசர வைக்கும் பொக்கிஷங்களை கண்டறியலாம். இதற்காக இணையத்தில் அங்கும் இங்கும் அல்லாட வேண்டும் என்றில்லை. சுவாரஸ்யமான வீடியோக்களை அடையாளம் காட்டும் அருமையான இணையதளங்கள் இருக்கின்றன. அவற்றில், நீங்கள் புக்மார்க் செய்ய வேண்டிய தளங்கள் இதோ:

ஆன்லைன் டிவி

ஹைப்பர்ஸ்கிரீன் இணையதளத்திற்கு விஷயம் செய்தால் அதன் முகப்பு பக்கத்திலேயே வரிசையாக வீடியோ நிகழ்ச்சிகளை பார்க்கலாம். ஆன்லைன் டிவி என வர்ணித்துக்கொள்ளும் இந்த தளம், பல்வேறு வகையான சுவாரஸ்யாமான வீடியோ நிகழ்ச்சிகளை பட்டியலிட்டு பரிந்துரைக்கிறது. ஷேக்ஸ்பியரை புரிந்து கொள்வது என்பதில் துவங்கி, ஜப்பானில் அவசியம் பார்க்க வேண்டிய இடங்கள் வரை பலவகையான வீடியோ நிகழ்ச்சிகளை பார்க்கலாம்.

எந்த வீடியோவை பார்க்க விருப்பமோ அதை கிளிக் செய்தால் போதும், வீடியோ ஓடத்துவங்கி விடுகிறது. அதாவது முகப்பு பக்கத்திலேயே பார்க்கலாம். ஒரு சில வீடியோக்கள் மட்டும் வெளியே சென்று அதற்கான இணையதளத்தில் பார்க்க வேண்டியிருக்கிறது. இந்த பட்டியலே சுவாரஸ்யமாக இருந்தாலும், பயனாளிகள் தங்கள் விருப்பத்திற்கு ஏற்ப, வீடியோக்களை அவற்றின் வகைக்கேற்ப தேர்வு செய்து கொள்ளலாம். குறிப்பிட்ட வீடியோவை தேடிப்பார்ப்பதற்கான தேடல் வசதியும் இருக்கிறது. உறுப்பினராக பதிவு செய்து கொண்டால் கூடுதல் வசதிகளும் இருக்கின்றன. தினமும் புதிய வீடியோக்கள் பட்டியலிடப்படுகின்றன.

இணைய முகவரி: https://www.hypescreen.com/

பரிந்துரை புதிது

வீடியோக்களை தேடும் போது பொதுவாக அவற்றின் வகைகளை தான் குறிப்பிட்டு தேடுவோம். உதாரணத்திற்கு கல்வி வீடியோ அல்லது அறிவியல் வீடியோ எனத்தேடுவோம். இதற்கு மாறாக, பயனாளிகள் தங்கள் மனநிலைக்கு ஏற்ற வீடியோக்களை தேட வழிசெய்யும் புதுமையான இணையதளமான ஃபைண்டி விளங்குகிறது. மகிழ்ச்சி, சோகம், உற்சாகம், ஊக்கம், ஆர்வம், நம்பிக்கை, பரிவு என பலவகையான மனநிலைகளை குறிப்பிட்டு அதற்கு உரிய வீடியோக்களை தேடிப்பார்க்கலாம். இந்த மனநிலைகள் அழகான இமோஜிகள் மூலம் உணர்த்தப்படுகின்றன. அவற்றில் இருந்து தேர்வு செய்த பின், வீடியோ வகையையும் தேர்வு செய்து கொள்ளலாம். வீடியோவுக்கான கால அளவையும் தேர்வு செய்து கொள்ளலாம். முகப்பு பக்கத்தில் பட்டியலிடப்படும் வீடியோக்களையும் பார்த்து ரசிக்கலாம்.

சுவாரஸ்யமான வீடியோக்களை கண்டறிவதற்கான சுவாரஸ்யமான தளமாக இது விளங்குகிறது.

இணைய முகவரி: https://www.findie.me/

செய்தி விடியோக்கள்

செய்தி நோக்கிலான வீடியோக்கள் தேவை எனில் டிக் விடியோ பகுதி ஏற்றதாக இருக்கும். சமூக திரட்டி வகை சேவைகளில் முன்னோடியான டிக் அறிமுகமான காலத்தில் பயனாளிகள் செய்தி இணைப்புகளை பகிர்ந்து கொள்ள வழி செய்தது. பயனாளிகளே அந்த இணைப்புகளை வாக்களித்து முன்னிலைப்பெறச்செய்யலாம் என்பது டிக் அறிமுகம் செய்த புதுமை அம்சமாக விளங்கியது. சில ஆண்டுகள் செல்வாக்குடன் திகழ்ந்த நிலையில் பின் தங்கிப்போன டிக் இப்போது வீடியோ பரிந்துரை சேவையாக உருமாற்றம் பெற்றிருக்கிறது. இதன் முகப்பு பக்கத்தில் அருமையான செய்தி வீடியோக்களை பார்க்கலாம். வேறு வகையான வீடியோக்களையும் பார்க்கலாம்.

அறிவியல், தொழில்நுட்பம், செய்தி, பொழுதுபோக்கு என பலவேறு பிரிவுகளில் இருந்தும் தேர்வு செய்யலாம். இப்போது பெரிதாக பேசப்படும் செய்தி சார்ந்த வீடியோக்கள் முன்னிலைப்படுத்தப்படுகின்றன.

இணைய முகவரி: http://digg.com/video

கதை சொல்லும் படங்கள்

இலக்கில்லாத வீடியோக்களை விட அர்த்தம் உள்ள வீடியோக்களை பார்க்க விருப்பம் எனில், ஷார்ட் ஆப் தி விக் இணையதளம் கச்சிதமாக இருக்கும். குறும்படம் மற்றும் ஆவணப்பட வகைகளை சேர்ந்த வீடியோக்களில் இருந்து கவனமாக தேர்வு செய்யப்பட்ட அருமையான வீடியோக்களை இந்த தளம் பரிந்துரைக்கிறது. எல்லாமே ஏதோ ஒரு வகையில் கதை சொல்லும் வீடியோக்கள்.

ஒவ்வொரு வீடியோவுடனும் அதற்கான அறிமுகமும் சுருக்கமாக இடம்பெறுகிறது. இந்த அறிமுகம் வீடியோவில் எதிர்பார்க்க கூடிய விஷயங்களுக்கான வழிகாட்டியாக அமையும். ஈரானிய படங்களில் துவங்கி இசை  வீடியோ வரை பலவகை குறும்படங்களை பார்த்து ரசிக்கலாம். இதன் நேர்த்தியான முகப்பு பக்கமும் கவர்கிறது. பல ஆண்டுகளாக செயல்பட்டு வரும் இணையதளம் இது.

இணைய முகவரி: https://www.shortoftheweek.com/

கல்வி வீடியோக்கள்

அன்பிளக்டிவி மிகவும் எளிமையான வீடியோ சேவை. ஆனால் மிகவும் சுவாரஸ்யமானது. தொலைக்காட்சி நிகழ்ச்சிகளுக்கு பதிலாக பயனுள்ள வீடியோக்களை பரிந்துரைப்பது தான் இந்த தளத்தின் நோக்கம். முகப்பு பக்கத்தில் எப்போதும் ஒரு வீடியோ பரிந்துரைக்கப்படுகிறது. அந்த வீடியோ பிடிக்காவிட்டால், அடுத்த வீடியோவுக்கு கிளிக் செய்யலாம். இல்லை எனில் அடுத்த வீடியோவுக்கு கிளிக் செய்யலாம். இப்படி வரிசையாக வீடியோக்களை பார்த்துக்கொண்டே இருக்கலாம். எல்லாமே புதிய விஷயங்கள் தொடர்பான விழிப்புணர்வை ஏற்படுத்தக்கூடிய வீடியோக்கள்.

இணைய முகவரி: http://unplugthetv.com/

சுட்டிஸ்களுக்கான வீடியோ

சிறுவர், சிறுமிகள் பார்த்து ரசிக்கும் வகையில் அவர்கள் பிஞ்சு மனதுக்கு ஆர்வம் அளிக்கும் வகையிலான வீடியோக்களை பரிந்துரைக்கிறது திகிட்ஸ்ஷுட்சீதிஸ் இணையதளம். அறிவியல், தொழில்நுட்பம், இசை, அனிமேஷன் என பலவகையான வீடியோக்களை பார்க்கலாம். எல்லாமே கவனமாக தேர்வு செய்யப்பட்டு பரிந்துரைக்கப்படுபவை.

இணைய முகவரி: http://thekidshouldseethis.com/

பிரமிட் தொடர்பான புதிய கண்டுபிடிப்பும், கீழடி கேள்விகளும்!

2_khufus-aerial-3d-cut-view-with-scanpyramids-big-void-1 உலக அதிசயங்களில் ஒன்றான எகிப்து பிரமிடில் மறைந்திருக்கும் வெற்றிடம் ஒன்றை ஆய்வாளர்கள் கண்டறிந்துள்ளனர். வெற்றிடம் தானே என அலட்சியம் செய்வதற்கில்லை, ஆய்வுலகை பொருத்தவரை இது முக்கிய செய்தி. பிரமிடுகளில் பொதிந்து கிடக்கும் ரகசியங்களுக்கான திறவுகோளாக இது அமையலாம் என கருதப்படுகிறது. அதனால் தான், இந்த கண்டுபிடிப்பு தொடர்பான செய்தியை ஆய்வாளர்களும், அறிவியல் அறிஞர்களும் மிகுந்த ஆர்வத்தோடு விவாதிக்கத்துவங்கியுள்ளனர்.

இந்த ஆய்வு செய்தியை அறிந்து கொண்டால் பிரமிடுகள் மீது கூடுதல் ஆர்வம் உண்டாகும். அப்படியே கிடப்பட்டில் போடப்பட்டிருக்கும் நம் கீழை ஆய்வு தொடர்பாக வேதனையும் உண்டாகும். பிரமிடுக்கும், கீழடிக்கும் நேரடி தொடர்பில்லை என்றாலும், இந்த ஆய்வு கீழடி பற்றி ஏங்க வைக்கும். ஏனெனில் பிரமிடுகளுக்குள் ஒளிந்திருக்கும் வரலாற்று ரகசியங்களை உலகின் பார்வைக்கு கொண்டு வர விடாமல் ஆய்வு செய்து கொண்டிருக்கின்றனர். நாமோ கீழடியில் சரித்திர பொக்கிஷம் புதைந்து கிடக்கலாம் என தெரிந்திருந்தும் ஆய்வில் அக்கறை காட்டாமல் இருக்கிறோம்.

எல்லாம் சரி, முதலில் பிரமிட்டில் அப்படி என்ன கண்டுபிடித்திருக்கின்றனர் என்று பார்க்கலாம். ஒரு வெற்றிடம் அல்லது நீளமான குகை போன்ற அமைப்பு பிரமிட்டில் இருக்கலாம் என்பது தான் இந்த கண்டுபிடிப்பு. இது கூட உறுதியான கண்டுபிடிப்பு என்று சொல்ல முடியாது, ஒரு அறிவியல் அனுமானம்! ஆனால் காஸ்மிக் கதிர்களை கொண்டு கண்டறியப்பட்டுள்ளதால் இந்த அனுமானத்திற்கு அறிவியல் ஆதாரம் இருக்கிறது. அதனாலே முக்கியமாக அமைகிறது.

எகிப்து நாகரீகம்

பிரமிடுகள் எகிப்தின் தலைநகர் கெய்ரோ அருகே இருக்கும், கிஸா பகுதியில் அமைந்துள்ளன. சுமார் 4,500 ஆண்டுகளுக்கு ,முன் இவை கட்டப்பட்டதாக கருதுகின்றன. அப்போதையை எகிப்து அரச குடும்பத்தினரின் கடைசி இருப்பிடமாக இவை அமைக்கப்பட்டன. பிரமிடில் மன்னரின் கல்லறை, மகாராணியின் கல்லறை மற்றும் இதர அம்சங்கள் உள்ளன. இப்படி பல விஷயங்கள் வரலாற்றாசிரியர்கள் மூலம் தெரிய வந்திருந்தாலும், பலவிதங்களில் இன்னமும் பிரமிடுகள் புரியாத புதிராக இருக்கின்றன. பிரமிடுகள் எதற்காக அமைக்கப்பட்ட என்று தெரிந்திருந்தாலும், அவற்றுக்குள் என்னவெல்லாம் இருக்கின்றன என்பது தெரியாது. இதுவரை கண்டறியப்பட்டது தவிர அதனுள் ரகசிய அறைகளும், வேறு பல சங்கதிகளும் இருக்கலாம் என கருதப்படுகிறது. ஆனால் பிரமிடுகள் மூடப்பட்டிருப்பதால், அவற்றுக்குள் புகுந்து பார்ப்பதெல்லாம் சாத்தியமில்லை என்பதால் இவை எல்லாம் அனுமானங்களாக மட்டுமே இருக்கின்றன.

இந்த அனுமானங்களுக்குள் தான் காஸ்மிக் கதிர்கள் துணையோடு எட்டிப்பார்த்து முக்கிய கண்டுபிடிப்பை நிகழ்த்தியுள்ளனர். பிரமிடுக்குள் மிகப்பெரிய வெற்றிடம் இருக்கிறது என்பது தான் அந்த கண்டுபிடிப்பு. சும்மாயில்லை, ஜப்பான் மற்றும் பிரான்ஸ் விஞ்ஞானிகளை கொண்ட குழு இரண்டு ஆண்டுகளுக்கு மேல் ஆய்வு செய்து இந்த வெற்றிடத்தை கண்டறிந்துள்ளது.

உள்ளே உறங்கும் ரகசியம்

FILE PHOTO: A group of camels and horses stand idle in front of the Great Pyramids awaiting tourists in Giza, Egypt on March 29, 2017. REUTERS/Mohamed Abd El Ghany/File Photo
FILE PHOTO: A group of camels and horses stand idle in front of the Great Pyramids awaiting tourists in Giza, Egypt on March 29, 2017. REUTERS/Mohamed Abd El Ghany/File Photo

பிரமிடுகளில் மிகப்பெரியதாக கருதப்படும் கிரேட் பிரமிட் என சொல்லப்படும் கூபு பிரமிட்டில் இந்த வெற்றிடம் அமைந்திருக்கிறது. பிரமிடுகள் தொடர்பான வியப்புகளில் ஒன்று அவை எப்படி கட்டப்பட்டிருக்கும் எனும் கேள்வி தான். விடை தெரியாத கேள்வி என வைத்துக்கொள்ளலாம். பிரமிட்டின் கட்டுமானம் மற்றும் அதன் விஸ்தாரம் மாபெரும் அதிசயம் தான். கிரேட் பிரமிட்டின் அடிப்பகுதி 5 ஹெக்டேர் பரப்பை கொண்டிருக்கிறது. 150 மீட்டர் உயரத்தோடு, 5 மில்லியன் டன் எடை கொண்டதாக கருதப்படுகிறது. எல்லாம் கற்களால் ஆனவை. இத்தனை எடை கொண்ட கட்டுமானத்தை, 4500 ஆண்டுகளுக்கு முன் எப்படி கட்டி முடித்தார்கள் என்பது ஆச்சர்யம் தான்.

இந்த ஆச்சர்யத்திற்கு தான் விஞ்ஞானிகள் விடை தேடிக்கொண்டிருக்கின்றனர். இதன் ஒரு பகுதியாகவே ஸ்கேன் பிரமிட் எனும் ஆய்வு திட்டம் மேற்கொள்ளப்பட்டு பிரமிடுக்குள் இருப்பதாக அறியப்படும் கிராண்ட் காலெரிக்கு மேல் வெற்றிடம் அல்லது ஒரு குகை போன்ற பகுதி இருக்கலாம் என தெரிய வந்துள்ளது. இந்த குகை அமைப்பு தொடர்பாக மேலதிக விவரங்கள் தெரியவில்லை. ஆனால் இது இருப்பது உறுதியானதே முக்கிய விஷயமாக கருதப்படுகிறது. இதன் நோக்கம் அல்லது பயன்பாடு என்ன என்பது இனிமேல் தான் ஆய்வு செய்யப்பட வேண்டும். இப்போதைக்கு, ராட்சத கற்களின் எடை, உள்ளே இருக்கும் கல்லறைகள் உள்ளிட்டவற்றை தாக்காமல் இருப்பதற்காக இது போல அமைக்கப்பட்டிருக்கலாம் என கருதப்படுகிறது. கட்டுமானத்தின் போது திட்டமிட்டு இந்த வெற்றிடத்தை அமைத்திருக்க வேண்டும் என்கின்றனர் ஆய்வாளர்கள்.

இருள் குகை

எப்படியோ, பிரமிடுக்குள் ஒரு குகை போன்ற அமைப்பு இருப்பது உறுதியாகி இருப்பதால், இது குறித்து மேலும் ஆய்வு செய்ய திட்டமிட்டிருக்கின்றனர். பிரமிடுக்குள் மெலிதாக துளை போட்டி அதற்குள் சின்னதாக ஒரு ரோபோவை அனுப்பி ஆய்வு செய்யலாமா என உத்தேசித்து எகிப்து அரசிடம் அனுமதி கேட்டிருக்கின்றனர்.

பிரமிடுக்குள் கை வைக்க அனுமதி அளிக்கப்படுமா? என்பது சந்தேகம் தான். சில நூற்றாண்டுகளுக்கு முன் பிரமிடுக்குள் குண்டு வைத்தெல்லாம் உள்ளே சென்று ஆய்வு செய்திருக்கின்றனர். ஆனால் இப்போது இந்த வரலாற்று நினைவுச்சின்னத்தை அப்படி எல்லாம் அஜாக்கிரதையாக கையாள மாட்டார்கள். வெகு காலம் வரை மனிதன் உண்டாக்கிய மிகப்பெரிய கட்டுமானமாக கருதப்பட்ட இந்த சரித்திர பொக்கிஷத்தை அதன் பழைய வடிவத்தில் தொடர்ந்து பாதுகாப்பதே முக்கியம்.

அதனால், தான் அறிவியல் துணையோடு ஆய்வு நடத்திக்கொண்டிருக்கின்றனர். எப்படி என பார்க்கலாம்.

பிரமிடுக்குள் மேலும் பல ரகசிய அடுக்குகள் இருக்கலாம் என்று சந்தேகிக்கப்பட்டு வந்தாலும், அதற்குள் சென்று பார்க்க வழி இல்லாமல் இருந்தது. பல ஆண்டுகளுக்கு முன் நடத்தப்பட்ட ஆய்வு ஒன்றில், பிரமிடுக்குள் வேறுபாடுகள் இருக்கலாம் என தெரிய வந்தது. ஆனால் அப்போது துளையிட்டு பார்த்தும் அறை போன்ற எதுவும் கண்டறியப்படவில்லை. ’

இந்த நிலையில் ஸ்கேன் பிரமிட் ஆய்வுக்குழு, பிரமிட்டை நவீன முறையில் ஆய்வு செய்தது. மனித உடலை எக்ஸ் ரே ஆய்வுக்கு உட்படுத்துவது போல பிரமிட்டை காஸ்மிக் கதிர் ஆய்வுக்கு உள்ளாக்கியது. விண்வெளியில் இருந்து காஸ்மிக் கதிர்கள் மழை போல பூமி மீது பொழிந்து கொண்டே இருக்கிறது. இந்த கதிர்கள் காற்று மூலக்கூறுகளை சந்திக்கும் போது, முவான் எனப்படும் அணுத்துகள்களை உருவாக்குகின்றன. ஒளியை விட வேகமாக பயணிக்க கூடிய முவான்கள் பூமியின் அடி ஆழம் வரை ஊடுருவி செல்லக்கூடியவை. இவற்றில் சில பாறைகளால் உறிஞ்சப்பட்டு விடுவதும் உண்டு. இருப்பிடத்தின் அடர்த்திக்கு ஏற்ப இது அமையலாம்.

நவீன ஆய்வு

முவான்களின் இந்த குணத்தை கொண்டு தான் பூமியின் ரகசியங்களை ஆய்வு செய்கின்றனர். எரிமலை அல்லது பனிப்பாறைகளின் தன்மையை அறிய அவற்றை முவான் டிடெக்டர் கருவுகள் மூலம் ஆய்வு செய்கின்றனர். இந்த கருவியில் சிக்கும் முவான்களின் போக்கை கொண்டு எரிமலை அல்லது பனிப்பாறையின் உள் அமைப்புகள் குறித்து அறிய முடிகிறது. ஜப்பான் அணு உலையிலும் இது போலவே ஆய்வு செய்தனர்.

அதாவது முவான்கள் உள்ளே நுழைந்து வெளியே வரும் விதத்தை வைத்து அடர்த்தியின் அளவை அனுமானிக்கலாம். இப்படி தான் பிரமிட் அமைப்பில் முவான்களை பல மாதங்களாக பல கோணங்களில் சேகரித்து அவற்றின் போக்கை வைத்து, ராட்சத வெற்றிடம் உள்ளே இருப்பதை கண்டறிந்துள்ளனர். முவான்கள் தவிர, இன்பிராரெட் தெர்மோகிராபி, மாடுலேடட் தெர்மோகிராபி ஆகிய நுட்பங்களையும் பயன்படுத்தியுள்ளனர். அதிக ஊடுருவல் இல்லாத ஆய்வு முறை இவை. எனவே கட்டுமானத்தின் மூலத்தன்மைக்கு எந்த பாதிப்பும் இல்லாமல் அதன் உண்மைகளை தெரிந்து கொள்ளலாம்.

ஆக, இந்த கண்டுபிடிப்பை அறிவியல் சாதனை என்று தான் சொல்ல வேண்டும். பிரமிடுகள் பற்றி விடாமல் ஆய்வு செய்யும் இந்த வேட்கையின் விளைவாகவே இப்போது, பிரமிடு உள்ளுக்குள் உறங்கி கொண்டிருக்கும் ரகசியங்கள் தொடர்பாக முக்கிய தடையம் கிடைத்துள்ளது.

இப்போது கீழடிக்கு வருவோம். தமிழர்களின் பண்டை கால கலாச்சார கூறுகளுக்கான வரலாற்று ஆதாரங்கள் கீழடியில் பொந்திந்து கிடக்கலாம் என கருதப்படுகிறது. சங்க இலக்கியம் மூலம் தெரிய வந்துள்ள வரலாற்று காலத்தின் தடையங்களையும், நாகரீக கூறுகளையும் இங்கே அகழ்ந்தெடுக்க வாய்ப்பிருப்பதாக கருதப்படுகிறது. ஆனாலும் என்ன, நாம் ஆய்வை தொடராமல் அரசியல் பேசிக்கொண்டிருக்கிறோம். அதிலும் நவீன அறிவியல் ஆய்வுக்கான நவீன உத்திகளையும், உபகரணங்களையும் உருவாக்கி அளித்திருக்கும் நிலையில் நாம் அவற்றை பயன்படுத்தி வரலாற்று பெருமையை உறுதிப்படுத்திக்கொள்ள வழியில்லாமல் இருப்பதை என்னவென சொல்வது!

 

பிரமிட் ஆய்வு கண்டுபிடிப்பு பற்றிய செய்தி: http://www.bbc.com/news/science-environment-41845445

 

பிரமிட் ஆய்வு பற்றிய விவரம்: http://www.scanpyramids.org/assets/components/pyramids/pdfs/About_ScanPyramids-en.pdf

 

  • நன்றி; மின்னம்பலம் இணைய இதழில் எழுதியது.

 

இணைய பாதுகாப்பை உறுதி செய்ய 10 பரிசோதனைகள்

03-Twitter-Privacy-Settingsஇணைய பயன்பாட்டில் கொஞ்சம் எச்சரிக்கையாக இருப்பது எப்போதுமே நல்லது. தனிப்பட்ட தகவல்களை திருடும் அடையாளத்திருட்டில் துவங்கி, மால்வேர் வைரஸ் தாக்குதல், கிரெடிட் கார்டு மோசடி, பாஸ்வேர்டு திருட்டு, நூதன மோசடி என பலவிதங்களில் ஆன்லைனில் கள்வர்களும், விஷமிகளும் வலைவிரித்து காத்திருக்கின்றனர். எனவே இணையத்தில் உலாவும் போது நம் பாதுகாப்பை உறுதி செய்து கொள்ள முன்னெச்சரிக்கையாக நடந்து கொள்வது அவசியமாகிறது. ஆனால் பலரும் நினக்க கூடியது போல இது ஒன்றும் சிக்கலானது அல்ல: சில எளிமையான விஷயங்களை தொடர்ச்சியாக மேற்கொண்டு வருவதும், தேவையான நடவடிக்கைகளில் அலட்சியம் அல்லது சோம்பல் காட்டாமல் இருப்பதும் முக்கியமானது. அந்த வகையில் இணைய பாதுகாப்பிற்காக நெட்டிசன்கள் தவறாமல் மேற்கொள்ள வேண்டிய பரிசோதனைகள் இவை;
அப்டேட் தேவை
ஸ்மார்ட்போனிலோ, கம்ப்யூட்டரிலோ மென்பொருள் அல்லது செயலிகளை அப்டேட் செய்யுங்கள் எனும் நோட்டிபிகேஷன் வரும் போது, உடனே அப்டேட் செய்வதற்கு பதில் பின்னர் நினைவூட்டவும் எனும் வாய்ப்பை கிளிக் செய்துவிட்டு கடந்து போவது தான் பலரது வழக்கமாக இருக்கிறது. ஆனால், மென்பொருள்களுக்கான அப்டேட்களை நிறைவேற்றுவது மிகவும் முக்கியமானது. இயங்குதளம் உள்ளிட்ட மென்பொருள்களில் குறிப்பிட்ட குறை அல்லது ஓட்டைகளை கண்டறியும் போது அதற்கான பாதுகாப்பு உருவாக்கப்படுகுறது. மென்பொருள் உலகில் இதை செக்யூரிட்டி பேட்ச் என்கின்றனர். இந்த மென்பொருள் ஒட்டுவேலைக்கான நினைவூட்டல் தான் அப்டேட் கோரிக்கையாக வருகிறது. எனவே இதில் சோம்பல் வேண்டாம். கடந்த சில மாதங்களுக்கு முன் ரான்சம்வேர் வைரஸ் பெரும் பாதிப்பை ஏற்படுத்தியதற்கு முக்கிய காரணம், பல பயனாளிகள் விண்டோஸ் இயங்குதளத்திற்கான அப்டேட்களை நிறுவாமல் விட்டது தான் என்பதை நினைவில் கொள்ளவும்.
பாஸ்வேர்டு பலம்
பலவீனமான பாஸ்வேர்டை விட இணைய பாதுகாப்பிற்கான வில்லங்கம் வேறில்லை. இமெயில் முகவரி, வங்கி சேவைக்கான இணைய கணக்கு போன்றவற்றுக்கான பாஸ்வேர்டு பலமாக இருக்கிறதா? என்பதை சோதித்து அறியவும். தேவை எனில் குறிப்பிட்ட இடைவெளியில் பாஸ்வேர்டை மாற்றவும் செய்யலாம். அதிலும் குறிப்பாக இணைய உலகில் பெரிய அளவில் இமெயில் முகவரிகள் திருடப்பட்டது தொடர்பாக ஹேக்கர்களின் கைவரிசை பற்றிய செய்திகள் வெளியாகும் போது உங்கள் பாஸ்வேர்ட்கள் மீது ஒரு கண் வைத்திருக்கவும். பாஸ்வேர்டு பாதிப்புக்கு உள்ளாகியுள்ளதா? என அடையாளம் காட்டும் ஹேவ் ஐ பி பாண்ட் ( ) போன்ற இணைய சேவைகளிலும் உங்கள் இமெயில் முகவரியை சமர்பித்து அதன் பாதுகாப்பை உறுதி செய்து கொள்ளலாம்.
பிரைவஸி பூட்டு
சமூக ஊடக தளங்களில் தகவல்களை பகிர்ந்து கொள்வதில் காட்டும் ஆர்வத்தை பலரும் அந்த தகவல்கள் எப்படி எல்லாம் பயன்படுத்தப்படும் அபாயம் இருப்பதை அறிவதில்லை. பொதுவெளியில் பகிர்ந்து கொள்ளும் தனிப்பட்ட தகவல்கள் ஒருவரைப்பற்றி பல வித செய்திகளை உணர்த்த வல்லவை. இதன் மூலம் விளம்பர வலையும் விரிக்கலாம், மோசடி வலையும் விரிக்கலாம். எனவே, சமூக ஊடகங்களில் பகிரும் தனிப்பட்ட தகவல்கள் குறித்து கவனமாக இருக்க வேண்டும். பேஸ்புக் உள்ளிட்ட பல சேவைகள், தனிப்பட்ட தகவல்களுக்கான பல வகை பிரைவஸி பாதுகாப்பு அம்சங்களை அளிக்கின்றன. இவற்றை முழுமையாக பயன்படுத்திக்கொள்ள வேண்டும். டைம்லைன் மற்றும் டேகிங் வசதியையும் அடிக்கடி ஆய்வு செய்ய வேண்டும்.
செயலி அனுமதி
ஸ்மார்ட்போனில் புதிய செயலிகளை நிறுவும் போது அவை கேட்பதற்கு எல்லாம் அனுமதி கொடுத்துவிடுகிறோம். ஆனால் எந்த செயலிகள் எந்த வகையான தகவல்களை சேகரித்து அவற்றை எப்படி எல்லாம் பயன்படுத்துகின்றன என்பது நமக்குத்தெரியாது. ஒரு சில வில்லங்க செயலிகள் நமது தகவல்களை தவறான நோக்கில் பயன்படுத்தும் அபாயம் இருக்கிறது. எனவே அவ்வப்போது, எந்த செயலிக்கு எல்லாம் என்னவகையான அனுமதி அளித்திருக்கிறோம், அவை தேவையா என பரிசீலிப்பது அவசியம். செட்டிங்ஸ் பகுதியில் உள்ள பிரைவஸி வாய்ப்பை கிளிக் செய்து இது பற்றி பார்வையிடலாம். தேவையில்லாத அனுமதி எனில் அதை ரத்து செய்துவிடலாம்.
பிசியை கவனியுங்கள்
உங்கள் கம்ப்யூட்டரில் என்ன எல்லாம் செயல்கள் நடந்து கொண்டிருக்கின்றன என்பதை கவனிப்பதும் அவசியம். விண்டோசில் டாஸ்க் மேனஜரில் சென்று பார்த்தால் கம்ப்யூட்டர் பின்னணியில் செயல்பட்டுக்கொண்டிருக்கும் செயலிகளை பார்வையிடலாம். அவற்றில் எதுவும் சந்தேகத்திற்கு உரியவையாக இல்லாதவரை எந்த பிரச்சனையும் இல்லை.
மால்வேர் ஸ்கேன்
உங்கள் கம்ப்யூட்டரில் நீங்கள் அறியாமலேயே மால்வேர்கள் அழையா விருந்தாளியாக வந்து உட்கார்ந்திருக்கலாம். இமெயில் இணைப்புகளை கிளிக் செய்வதால் அல்லது வில்லங்க விளம்பர பக்கம் போவதால் மால்வேர்கள் ஊடுருவலாம். பொதுவாக வைரஸ் தடுப்பு மென்பொருள் இருந்தால் இவற்றை எல்லாம் விரட்டி அடித்துவிடும். இருந்தாலும் அவ்வப்போது மால்வேர் கண்டறியும் மென்பொருளையும் பயன்படுத்தி பரிசோதிப்பது நல்லது.
கணக்கை கவனி
பல இணைய சேவைகளை கூகுள் அல்லது பேஸ்புக் லாகின் மூலம் பயன்படுத்தும் வாய்ப்பு இருக்கிறது. இந்த வசதி எளிதாக இருந்தாலும், அந்த மூன்றாம் தரப்பு இணையதளங்கள் இந்த அனுமதியை எப்படி பயன்படுத்துகின்றன என்பது தெரியாது. எனவே எந்த தளங்களுக்கு எல்லாம் அனுமதி கொடுத்திருக்கிறீர்கள் என்பதையும் அடிக்கடி பார்த்துக்கொள்வது நல்லது. ஜிமெயிலில் மை அக்கவுண்ட் பக்கத்தில் இது பற்றி பார்வையிடலாம். பயன்படுத்தாத சேவைகள் ஏதேனும் இருந்தால் அவற்றுக்கான அனுமதியை நீக்கிவிடுலாம்.
இரண்டு அடுக்கு பாதுகாப்பு
பாஸ்வேர்டு தவிர போனில் அனுப்பி வைக்கப்படும் குறிப்பை கொண்ட இரண்டு அடுக்கு பாதுகாப்பு வசதி எப்போதுமே சிறந்தது. எந்த தளங்களில் எல்லாம் இந்த வசதியை பயன்படுத்த முடியுமோ அவற்றில் எல்லாம் பயன்படுத்திக்கொள்ளலாம். அதிலும் முக்கிய சேவைகள் எனில் நிச்சயம் 2 அடுக்கு பாதுகாப்பு தேவை.
இதே போலவே உங்கள் இணைய கணக்குகளை வேறு யாரேனும் பயன்படுத்தியிருக்கின்றனரா என சோதிப்பதும், உங்கள் வைபை வசதியை வேறு நபர்கள் பயன்படுத்துகின்றனரா என்பதை சரி பார்த்துக்கொள்வதும் அவசியமானது.

பலூன் வரும் முன்னே, இணையம் வரும் பின்னே!

 

lபியூர்ட்டோ ரிக்கோ மக்கள் அந்த பலூன்கள் எப்போது வந்து சேரும் என ஏக்கத்துடன் காத்திருக்கின்றனர். அந்நாட்டு அரசாங்கமும், தொண்டு அமைப்புகளும், வர்த்தக நிறுவனங்களும் கூட அந்த பலூன்கள் எப்போது தங்கள் வானில் மிதக்கத்துவங்கும் என எதிர்பார்த்திருக்கின்றனர். மற்ற நாடுகளும் கூட இந்த பலூன்கள் எப்படி செயல்படுகின்றன என்பதை உன்னிப்பாக கவனித்துக்கொண்டிருக்கின்றன.

ஒரு பலூன் மீது இத்தனை எதிர்பார்ப்பா? என்று கேட்கலாம். அதிலும், அண்மையில் சூறாவளியில் சிக்கி அதன் கோரத்தாண்டவத்தில் இருந்து மீள முடியாமல் போராடிக்கொண்டிருக்கும் பியூர்டோ ரிக்கோ மக்கள் ஏன், ஒரு பலூனுக்காக காத்திருக்க வேண்டும் என கேட்கத்தோன்றலாம். அந்த பலூன்கள் சாதாரன பலூன்கள் அல்ல, வானிலிருந்து மண்ணுக்கு இணைய இணைப்பை வழங்க கூடிய அதி நவீன பலூன்கள் என்பது தான் கவனிக்க வேண்டிய விஷயம்.

முன்னணி தேடியந்திர நிறுவனமான கூகுளின் தாய் நிறுவனமான ஆல்பபெட் நிறுவனத்தின் கீழ் செயல்பட்டு வரும் லூன் திட்டத்தின் சார்பில் இந்த வகை பலூன்கள் பறக்க விடப்படுகின்றன. சாகச விளையாட்டாக கருதக்கூடிய ஹாட் ஏர் பலூன் ரகத்தைச்சேர்ந்த இந்த பலூன்கள் காற்றுவெளி மண்டத்தில் மிதந்தபடி தொலைத்தொடர்பு வசதி மற்றும் இணைய வசதியை கீழே உள்ள பகுதிக்கு அளிக்க வல்லவை. அதனால் தான், பியூர்ட்டோ ரிக்கோ மக்கள் இந்த பலூன்கள் வரை எதிர்பார்த்து காத்திருக்கின்றனர். சூறாவளி தாக்குதலால் அந்நாட்டு செல்போன் கோபுரங்களும், தொலைத்தொடர்பு வசதியும் முறித்து போய் கிடக்கின்றன. எனவே அங்கு தகவல் தொடர்பு வசதி முற்றிலும் செயலிழந்து போயிருக்கிறது. இதனால் மீட்பு பணிகளை ஒருங்கிணைப்பது முதல் நிவராண உதவிகளை அளிப்பது வரை எல்லாவற்றிலும் சிக்கல் இருக்கிறது.

தொலைத்தொடர்பு உள்கட்டமைப்பு வசதியை சீரமைக்க மாதக்கணக்கில் ஆகலாம் எனும் நிலையில், அத்தியாவசிய பணிகளை ஒருங்கிணைக்கவும், பொதுமக்கள் தொடர்பு கொள்ளவும் அடிப்படை தொலைத்தொடர்பு வசதி உடனடி தேவை.

இந்த பின்னணியில் தான் ஆல்பபெட் நிறுவனம் தனது லூன் திட்டத்தின் இணைய பலூன்கள் பியூர்ட்டோ ரிக்கோவில் பறக்கவிட திட்டமிட்டு இதற்காக அமெரிக்க அரசின் அனுமதியையும் பெற்றிருக்கிறது. பியூர்ட்டோ ரிக்கோவில் பலூன்களை பறக்கவிட்ட பிறகு உள்ளூர் தொலைத்தொடர்பு நிறுவனங்களுடன் இணைந்து செயல்பட்டு, செல்போன் இணைப்பு மற்றும் இணைய வசதியை அளிக்க திட்டமிடப்பட்டுள்ளது. உறவினர்களை தொடர்பு கொள்ளவும், உதவிகளை பெறவும் செல்போன் இணைப்பு கிடைக்காமல் அல்லாடிக்கொண்டிருக்கும் பியூர்ட்டோ ரிக்கோ மக்களுக்கு இந்த சேவை பேரூதவியாக இருக்கும்.

கூகுளின் தாய் நிறுவனம் இந்த பலூன் திட்டத்தில் மிகுந்த நம்பிக்கை வைத்துள்ளது. பேரிடர் பாதிக்கப்பட்ட பகுதிகள் உள்பட உலகில் இணைய வசதி இல்லாத தொலைதூர பகுதிகள் மற்றும் கிராமப்புற பகுதிகளில் இந்த பலூன்கள் மூலம் இணைய வசதி அளிப்பதை நோக்கமாக கொண்டுள்ளது. குறிப்பிட்ட பகுதியில் வானில் இந்த பலூன்களை வரிசையாக பறக்கவிட்டு அவற்றை வயர்லெஸ் முறையில் வலைப்பின்னலாக இணைப்பதன் மூலம் தரைப்பகுதியில் உள்ளவர்களுக்கு இணைய வசதியை அளிக்கும்.

பலூன்கள் மூலம் எப்படி இணைய வசதி அளிக்க முடியும் என பார்ப்பதற்கு முன், இந்த திட்டம் பற்றி சுருக்கமான அறிமுகம். தேடியந்திரமான கூகுள் பிரவுசர்கள், இமெயில், மொபைல் இயங்குதளம் என பல்வேறு சேவைகளை வழங்கு வருகிறது. இவைத்தவிர கூகுள் நிறுவனம் பல்வேறு ஆய்வு திட்டங்கள் மற்றும் சோதனை திட்டங்களையும் கொண்டிருந்தது. இப்படி கூகுள் குழுவால் பிராஜெக்ட் எக்ஸ் எனும் பெயரில் துவங்கப்பட்டது தான் இணைய பலூன் திட்டம்.

இணையம் மூலம் செய்திகளை தெரிந்து கொள்வது முதல் ஷாப்பிங் செய்வது வரை எண்ணற்ற வசதிகள் சாத்தியமாகி இணையம் இல்லாத வாழ்க்கைக்கு நாம் பழகிவிட்டோம். கம்ப்யூட்டர்கள், லேப்டாப் மட்டும் அல்லாமல், ஸ்மார்ட்போன் மூலம் உள்ளங்கையிலேயே இணைய வசதி சாத்தியமாகிறது. ஆனால், இணைய வசதி என்பது இன்னமும் உலகம் முழுவதும் பரவலாகிவிடவில்லை. உலகில் இணைய வசதி எட்டிப்பார்க்காத பகுதிகளும் அநேகம் இருக்கின்றன. இணைய வசதி மோசமாக உள்ள பகுதிகளும் உள்ளன. மலைப்பகுதி, குக்கிராமங்கள் போன்ற இடங்களுக்கு இணைய வசதியை அளிப்பது என்பது மிகப்பெரிய சவாலாக இருக்கிறது.

இன்னமும் தொலைத்தொடர்பு வசதி எட்டிப்பார்க்காத இடங்களில் இணைய வசதியை அளிப்பதற்கான உள்கட்டமைப்பு வசதியை ஏற்படுத்தி தருவது பெருட்செலவு மிக்கதாகும். இதற்கான லாபமும் குறைவு என்பதால் வர்த்தக நிறுவனங்கள் இதில் அதிக முனைப்பு காட்டவும் தயங்குகின்றன.

இந்த சிக்கலுக்கான தீரவாக தான் பலூன் மூலம் தொலைதூர பகுதிகளில் இணைய வசதி அளிக்கும் திட்டத்தை கூகுள் சோதனை முறையில் துவங்கியது. 2013 ம் ஆண்டு, அதிகாரபூர்வமாக இந்த திட்டம் துவங்கியது. கூகுள் செயல்படுத்தி வந்த பல்வேறு துணை திட்டங்களில் ஒன்றாக விளங்கிய இந்த திட்டம் கடந்த சில ஆண்டுகளுக்கு முன், கூகுளுக்கு என தனியே ஆல்பபெட் எனும் தாய் நிறுவனம் உருவாக்கப்பட்ட போது தனியே பிரிக்கப்பட்டு, அதன் கீழ் இயங்கி வருகிறது. இடைப்பட்ட காலத்தில் கூகுள் தனது பலூன் தொழில்நுட்பத்தை மேம்படுத்தி அதற்கான வெள்ளோட்டங்களையும் நிகழ்த்தி வருகிறது. இதற்கான முதல் சோதனை சில ஆண்டுகளுக்கு முன் நியூசிலாந்து நாட்டில் மேற்கொள்ளப்பட்டது.

தொலைத்தொடர்பு வசதி இல்லாத இடங்களில் வானில் இந்த பலூன்களை பறக்கவிட்டு அவற்றை வலைப்பின்னலாக இணைத்து இணைய இணைப்பை வழங்குவது தான் இந்த திட்டத்தின் நோக்கம். இந்த பலூன்கள் காற்றின் போக்கில் இயங்கி அதற்கேற்ப நிலைநிறுத்திக்கொள்ளும் ஆற்றல் பெற்றிருக்கின்றன. வானிலை நிகழ்வு உள்ளிட்டவற்றால் பாதிக்கப்படாத அளவுக்கு பாதுகாப்பானவை. மேலும் விமானங்கள் போன்றவற்றுக்கு இடைஞ்சல் இல்லாத அளவுக்கு காற்று மண்டத்தில் 15 முதல் 20 கிமீ எல்லையில் இவை இயக்கப்படுகின்றன.

உயர்தரமான பிளாஸ்டிக்கால் ஆன இந்த பலூன்கள் ஹீலியம் வாயுவால் நிரப்பப்பட்டு அதன் மூலம் இயங்குகின்றன. ஒவ்வொரு பலூனும் ஒரு டென்னிஸ் மைதானம் அளவு பெரிதானவை. பூமியில் உள்ள ராட்சத டிரெக்கில் இருந்து இவை விண்ணில் செலுத்தப்படுகின்றன. 30 நிமிடத்திற்கு ஒரு பலூனை இப்படி செலுத்த முடியும். பின்னர், வானில் மிதந்தபடி இவை தங்களுக்கான இடத்தில் நிலைப்பெறும். வரிசையாக பலூன்கள் செலுத்தப்படும் போது பரஸ்பரம் வயர்லெஸ் மூலம் தொடர்பை ஏற்படுத்திக்கொண்டு வானில் வலைப்பின்னல் அமைத்துக்கொள்ளும். இந்த பலூன்கள் சராசரியாக 100 நாட்கள் செயல்படக்கூடியவை. அதன் பிறகு தானாக இறங்கி வந்துவிடும். அதுவரை இயங்குவதற்கான ஆற்றலை உருவாக்கி கொள்ளும் சோலார் வசதியை பெற்றுள்ளன.

பூமியில் உள்ள செல்போன் கோபுரங்கள் மற்றும் செல்பான் பயனாளிகளை இணைக்கும் பாலமாக பலூன் வலைப்பின்னல் செயல்படுவதால் செல்போனில் பேசுவது மற்றும் இணையத்தில் உலாவுவது சாத்தியமாகும். பலூனில் வயர்லெஸ் வசதி இருக்கிறது. 4 ஜி சேவையை இதன் மூலம் பெறலாம் என்றாலும், உண்மையில் இந்த பலூன்கள் இணைய வசதியை அளிப்பதில்லை. இவை செல்போன் கோபுரங்களாக மட்டுமே செயல்படுகின்றன. தரைப்பகுதியில் உள்ள செல்போன் கோபுரங்கள் இந்த மிதக்கும் கோபுரங்களுடன் இணைக்கப்படுவதால் இடைவெளி இல்லாத இணைய இணைப்பு உண்டாகிறது. எனவே லூன் திட்டம் உள்ளூர் தொலைத்தொடர்பு நிறுவனங்கள் மற்றும் அரசு அமைப்புகளுடன் இணைந்தே இந்த சேவையை வழங்க முடியும். கரடுமுரடான பகுதியில் செல்போன் கோபுரங்கள் உள்ளிட்ட உள்கட்டமைப்பு வசதியை அமைப்பதைவிட பலூன்களை செல்போன் கோபுரமாக்கி இணைய இணைப்பு வழங்குவது எளிதானதாக கருதப்படுகிறது.

இந்த நம்பிக்கையுடன் தான், கூகுளின் தாய் நிறுவனம் இணைய பலூன்களை உருவாக்கி வருகிறது. அண்மையில் இந்த திட்டம் தனி நிறுவனமாக அமைக்கப்பட்டுள்ளது. அடுத்த கட்டமாக வர்த்தக நோக்கில் இந்த சேவையை வழங்க திட்டமிட்டுள்ளது. இதனிடையே பேரிடர் பாதித்த பகுதிகளில் அவசர கால உதவியாக இணைய இணைப்பை வழங்க இந்த பலூன்கள் பயன்படுத்தப்படுகின்றன. சில மாதங்களுக்கு முன் தென்னமரிக்க நாடான பெருவில் வெள்ள பாதிப்பு உண்டான போது, இணைய பலூன்கள் மூலம் தொலைத்தொடர்பு வசதி அளிக்கப்பட்டது. தற்போது பேரிடர் பாதித்த பியூர்ட்டோ ரிக்கோவில் இந்த பலூனள் வலம் வந்து மிகவும் அவசியமான இணைப்பு சேவையை அளிக்க உள்ளன.

உலகம் முழுவதும் இணைய வசதியில் ஏற்றத்தாழ்வு நிலவி வரும் சூழலில், தொலைதூர பிராந்தியங்களில் இணைய வசதியை அமைக்க லூன் பலூன்கள் உதவியாக இருக்கும் என கருதப்படுகிறது. சமூக வலைப்பின்னல் தளமான பேஸ்புக்கும், இதே போலவே ஆளில்லா விமானம் மூலம் தொலைதூர பகுதிகளில் இணைய வசதியை வழங்கும் சோதனை திட்டத்தில் கவனம் செலுத்து வருவதும் குறிப்பிடத்தக்கது.

 

 

சைபர்சிம்மன்