Category Archives: இன்டெர்நெட்

பேஸ்புக்கில் நீங்கள் கண்காணிக்கப்படுவது தெரியுமா?

facebook-change-visibilityநீங்கள் தீவிர பேஸ்புக் பயனாளி என்றால் ஸ்டாக்ஸ்கேன் இணையதளம் உங்களை லேசாக திகைப்பில் ஆழ்த்தும். பேஸ்புக் பயன்பாடு தொடர்பாக விழிப்புணர்வு தேவை எனும் எண்ணத்தையும் ஏற்படுத்தும். அதோடு பேஸ்புக்கில் அதிகம் கவனிக்காமல் இருக்கும் தகவல்களை பொதுவெளியில் தோன்றும் வித்ததை தீர்மானிக்கும் தனியுரிமை அமைப்பை (பிரைவசி செட்டிங்) ஆய்வு செய்யவும் தூண்டும்.

ஸ்டாக்ஸ்கேன் தளம் அப்படி என்ன செய்கிறது என்றால், உங்கள் பேஸ்புக் பக்கத்தை வேறு யார் வேண்டுமானாலும் உளவு பார்ப்பது சாத்தியம் என்பதை புரிய வைக்கிறது. என் பேஸ்புக் பக்கத்தை உளவு பார்க்க என்ன இருக்கிறது என நீங்கள் நினைக்கலாம். விஷயம் அதுவல்ல, ஒருவரது பேஸ்புக் பயன்பாட்டை இன்னொருவரால் எட்டிப்பார்க்க முடியும் என்பதையே இந்த இணையதளம் உணர்த்துகிறது.

நட்பு வளையம்

பேஸ்புக்கில் நட்பு வளையத்தில் இருப்பவர்கள் தானே நாம் பகிரும் தகவல்களை பார்க்க முடியும், அப்படியிருக்க யாரோ ஒருவரால் எப்படி நம் பேஸ்புக் செயல்பாட்டை அறிய முடியும் என நீங்கள் கேட்கலாம். இந்த கேள்விக்கான பதிலை தெரிந்து கொள்ள ஸ்டாக்ஸ்கேன் தளத்தை ஒரு முறை பயன்படுத்திப்பாருங்கள். யாரோ ஒரு பேஸ்புக் பயனாளி தொடர்பான எத்தனை தகவல்களை தெரிந்து கொள்ள முடிகிறது என்ற வியப்பு ஏற்படும். இதற்கு, குறிப்பிட்ட பயனாளியின் பேஸ்புக் முகவரியை மட்டும் இருந்தால் போதுமானது.

ஸ்டாக்ஸ்கேன் தளத்தில் பேஸ்புக் பயனாளி முகவரியை டைப் செய்து தேடினால், அவர் பேஸ்புக்கில் பகிர்ந்து கொண்ட தகவல்களை எவை எல்லாம் பொதுவெளியில் இருக்கின்றன என்பதை இந்த தளம் காண்பிக்கிறது. பொதுவெளியில் இருக்கிறது என்றால், அந்த தகவல்கள் வேறு யாரால் வேண்டுமானாலும் பார்க்கப்படலாம் என பொருள்.

எந்த வகையான விவரங்கள் எல்லாம் தோன்ற வாய்ப்பிருக்கிறது தெரியுமா? ஒருவரது ஒளிப்படங்கள், நிலைத்தகவல்கள், காணொலிகள், கலந்து கொண்ட நிகழ்வுகள் உள்ளிட்டவற்றை தெரிந்து கொள்ளலாம். ஒருவருடைய வயது, உறவு நிலை, பாலினம் போன்ற தகவல்கள், அவர் மற்ற ஒளிப்படங்களில் டேக் செய்யப்பட்டிருந்தால் அவை தொடர்பான தகவல்கள் ஆகியவற்றையும் அறியலாம். அதே போல ஒருவர் இதற்கு முன்னர் எந்த படங்கள் அல்லது விஷயங்களை எல்லாம் லைக் செய்திருக்கிறார், யாருடைய பதிவுகளுக்கு எல்லாம் பின்னூட்டம் அளித்திருக்கிறார், எந்த இடங்களுக்கு எல்லாம் சென்றிருக்கிறார், உறவினர்கள் யார், உடன் பணியாற்றியவர்கள் யார்?, எந்த குழுக்களில் எல்லாம் உறுப்பினராக உள்ளார் உள்ளிட்ட தகவல்களை எல்லாம் அறிய முடியும்.

பேஸ்புக் தேடல்

பேஸ்புக் உறுப்புனர் முகவரியை சமர்பித்ததுமே, அந்த முகவரி தொடர்பாக திரட்டப்பட்ட தகவல்களை பல்வேறு தலைப்புகளின் கீழ் வகைப்படுத்திக்காட்டுகிறது. ஒவ்வொரு வகையாக தேர்வு செய்து ஆய்வு செய்துப்பார்க்கலாம்.

பொதுவாக பேஸ்புக்கை நண்பர்களும், நண்பர்களின் நண்பர்கள் சூழ்ந்த அறையாகவும் நினைத்துக்கொண்டிருக்கிறோம். அந்த உணர்வுடன் தான் தகவல்களையும், ஒளிப்படங்களையும் பகிர்ந்து கொள்கிறோம். விவாவிதிக்கிறோம், உரையாடுகிறோம். நட்பு வளையத்திற்கு வெளியே இருப்பவர்களுக்கு என்னத்தெரியப்போகிறது என நாம் நினைக்கலாம். ஆனால், பேஸ்புக்கில் பகிரும் தகவல்கள் எந்த அளவுக்கு பொது வெளியில் சிதறிக்கிடக்கின்றன என்பதை பலரும் அறிவதில்லை. இதை தான் ஸ்டாக்ஸ்கேன் இணைய சேவை அம்பலப்படுத்துகிறது. பேஸ்புக் தகவல்களை மற்றவர்கள் அணுகுவது எளிது என்பதையும் புரிய வைக்கிறது.

ஆனால், ஸ்டாக்ஸ்கேன் அத்துமீறி எதையும் செய்யவில்லை. சொல்லப்போனால் அது பிரமாதமாக எதையுமே செய்யவில்லை. பேஸ்புக் தகவல்களில் பொதுவெளியில் காண கூடியவற்றை அது அடையாளம் காட்டுகிறது அவ்வளவே. இதில் கவனிக்க வேண்டிய விஷயம் என்னவெனில், இந்த அடையாளம் காட்டுதலையும் பேஸ்புக் வழங்கும் தேடல் வசதி கொண்டே சாத்தியமாக்குகிறது.

அதாவது இந்த தேடலுக்கு ஸ்டாக்ஸ்கேன் தேவை என்றில்லை. 2013 ம் ஆண்டு பேஸ்புக் அறிமுகம் செய்ய கிராப் சர்ச் தேடல் வசதி மூலம் யார் வேண்டுமானாலும் இது போன்ற தகவல்களை தேட முடியும். அப்படி தேடக்கூடிய தகவல்களை எல்லாம் ஒரே இடத்தில் பல்வேறு தலைப்புகளின் கீழ் எளிதாக அணுக்ககூடிய வகையில் ஸ்டாக்ஸ்கேன் அளிக்கிறது என்பதே அதன் சிறப்பு.

நல்லெண்ண தாக்காளர்

பேஸ்புக் பயன்பாட்டின் தனியுரிமை அம்சம் தொடர்பாக விழிப்புணர்வை ஏற்படுத்தவே இதை செய்கிறது. பெல்ஜியம் நாட்டைச்சேர்ந்த Inti De Ceukelaire  எனும் நல்லெண்ண தாக்காளர் இந்த சேவையை உருவாக்கியிருக்கிறார். கிராப் சர்ச் தேடலின் வீச்சும், பிரச்சனையும் பரவலாக அறியப்படாமல் இருப்பதால், சாதாரண இணையவாசிகளும் இதை அறிந்து கொள்ளும் வகையில் இந்த சேவையை உருவாக்கியதாக மதர்போர்ட் இணைய இதழுக்கு அளித்த பேட்டியில் அவர் கூறியிருக்கிறார்.

பெரும்பாலான சாமானியர்களுக்கு தாங்கள் பொதுவெளியில் பகிர்ந்து கொள்பவை பற்றிய புரிதால் இல்லாத நிலையில், இது தொடர்பான விழிப்புணர்வை ஏற்படுத்த பயனாளிகளுக்கு நட்பான இந்த சேவையை உருவாக்கியதாகவும் அவர் தெரிவித்துள்ளார்.

கிராப் சர்ச் அறிமுகமான போது அதன் அந்தரங்க மீறல் தன்மைக்காக பெரும் சர்ச்சை உண்டானது. பின்னர் பேஸ்புக் இந்த தேடல் சேவையை அதிகம் முன்னிறுத்துவதில்லை. மற்ற தேடல் அம்சங்களிலேயே கவனம் செலுத்துகிறது. எனினும் விஷயம் அறிந்தவர்கள் கிராப் சர்ச் தேடலை பயன்படுத்தி தகவல் வேட்டை நடத்திக்கொள்ளலாம். இதை தான் ஸ்டாக்ஸ்கேன் வெளிச்சத்திற்கு கொண்டு வந்துள்ளது.

ஆனால், இந்த சேவை பேஸ்புக்கின் தனியுரிமை கொள்கையை மீறவில்லை என்றும், பொதுவெளியில் பார்க்க கூடிய, ஆனால் மறைந்திருக்கும் தகவல்களை மட்டுமே காட்டுவதாகவும் தளத்தின் முகப்பு பக்கத்திலேயே குறிப்பிடப்பட்டுள்ளது.

ஆக, ஒரு பேஸ்புக் பயனாளி தான் பகிரும் தகவல்களை நண்பர்கள் பார்வைக்கு மட்டும் என அமைத்திருந்தால் என்றால் அதற்குள் யாரும் எட்டிப்பார்க்க முடியாது. ஆனால் எப்படி பகிர்ந்து கொள்கிறோம் என அறியாமல் பொதுவெளியில் பகிர்ந்து கொண்டவர்களின் தகவலை எல்லோரும் பார்க்க முடியும்.

நீங்களும் உஷார்

நீங்களும் கூட இந்த தளத்தில் உங்கள் பேஸ்புக் முகவரியை டைப் செய்து பார்த்தால், உங்கள் பேஸ்புக் விவரங்களில் எத்தகைய தகவல்கள் மற்றவர் பார்வைக்கு கடை பரப்பி வைக்கப்படுள்ளது என்பதை தெரிந்து கொள்ளலாம். அதிக தகவல்கள் இல்லை எனில், நீங்கள் தனியுரிமை அமைப்பை நன்றாக பயன்படுத்துகிறீர்கள் என திருப்தி பட்டுக்கொள்ளலாம். மாறாக, உங்களை திகைப்பில் ஆழ்த்தக்கூடிய அல்லது சங்கடத்தில் ஆழ்த்தக்கூடிய தகவல்கள் எல்லாம் தேடலில் கிடைக்க கூடியதாக இருந்தால் உங்கள் பேஸ்புக் பக்கத்திற்கான தனியுரிமை பாதுகாப்பு போதுமானதல்ல என உணர வேண்டும்.

உடனடியாக, உங்கள் பேஸ்புக் பக்கத்தில் செட்டிங்ஸ் பகுதியில் உள்ள பிரைவசி அமைப்பை ஆய்வு செய்து, எவற்றை எல்லாம் நண்பர்கள் பார்க்கலாம், எவை எல்லாம் பொது வெளியில் தோன்றலாம் போன்ற விஷயங்களில் கவனம் செலுத்துவது நல்லது. ஒவ்வொரு முறை நிலைத்தகவல் பதியும் போது, அல்லது பின்னூட்டம் அளிக்கும் போதும் கூட இதை நினைவில் கொள்வது இன்னும் நல்லது. இதற்கான இணைய முகவரி: https://www.facebook.com/help/443357099140264

இணையதள முகவரி: https://www.stalkscan.com

 

நீங்கள் தீவிர பேஸ்புக் பயனாளி என்றால் ஸ்டாக்ஸ்கேன் இணையதளம் உங்களை லேசாக திகைப்பில் ஆழ்த்தும். பேஸ்புக் பயன்பாடு தொடர்பாக விழிப்புணர்வு தேவை எனும் எண்ணத்தையும் ஏற்படுத்தும். அதோடு பேஸ்புக்கில் அதிகம் கவனிக்காமல் இருக்கும் தகவல்களை பொதுவெளியில் தோன்றும் வித்ததை தீர்மானிக்கும் தனியுரிமை அமைப்பை (பிரைவசி செட்டிங்) ஆய்வு செய்யவும் தூண்டும்.

ஸ்டாக்ஸ்கேன் தளம் அப்படி என்ன செய்கிறது என்றால், உங்கள் பேஸ்புக் பக்கத்தை வேறு யார் வேண்டுமானாலும் உளவு பார்ப்பது சாத்தியம் என்பதை புரிய வைக்கிறது. என் பேஸ்புக் பக்கத்தை உளவு பார்க்க என்ன இருக்கிறது என நீங்கள் நினைக்கலாம். விஷயம் அதுவல்ல, ஒருவரது பேஸ்புக் பயன்பாட்டை இன்னொருவரால் எட்டிப்பார்க்க முடியும் என்பதையே இந்த இணையதளம் உணர்த்துகிறது.

நட்பு வளையம்

பேஸ்புக்கில் நட்பு வளையத்தில் இருப்பவர்கள் தானே நாம் பகிரும் தகவல்களை பார்க்க முடியும், அப்படியிருக்க யாரோ ஒருவரால் எப்படி நம் பேஸ்புக் செயல்பாட்டை அறிய முடியும் என நீங்கள் கேட்கலாம். இந்த கேள்விக்கான பதிலை தெரிந்து கொள்ள ஸ்டாக்ஸ்கேன் தளத்தை ஒரு முறை பயன்படுத்திப்பாருங்கள். யாரோ ஒரு பேஸ்புக் பயனாளி தொடர்பான எத்தனை தகவல்களை தெரிந்து கொள்ள முடிகிறது என்ற வியப்பு ஏற்படும். இதற்கு, குறிப்பிட்ட பயனாளியின் பேஸ்புக் முகவரியை மட்டும் இருந்தால் போதுமானது.

ஸ்டாக்ஸ்கேன் தளத்தில் பேஸ்புக் பயனாளி முகவரியை டைப் செய்து தேடினால், அவர் பேஸ்புக்கில் பகிர்ந்து கொண்ட தகவல்களை எவை எல்லாம் பொதுவெளியில் இருக்கின்றன என்பதை இந்த தளம் காண்பிக்கிறது. பொதுவெளியில் இருக்கிறது என்றால், அந்த தகவல்கள் வேறு யாரால் வேண்டுமானாலும் பார்க்கப்படலாம் என பொருள்.

எந்த வகையான விவரங்கள் எல்லாம் தோன்ற வாய்ப்பிருக்கிறது தெரியுமா? ஒருவரது ஒளிப்படங்கள், நிலைத்தகவல்கள், காணொலிகள், கலந்து கொண்ட நிகழ்வுகள் உள்ளிட்டவற்றை தெரிந்து கொள்ளலாம். ஒருவருடைய வயது, உறவு நிலை, பாலினம் போன்ற தகவல்கள், அவர் மற்ற ஒளிப்படங்களில் டேக் செய்யப்பட்டிருந்தால் அவை தொடர்பான தகவல்கள் ஆகியவற்றையும் அறியலாம். அதே போல ஒருவர் இதற்கு முன்னர் எந்த படங்கள் அல்லது விஷயங்களை எல்லாம் லைக் செய்திருக்கிறார், யாருடைய பதிவுகளுக்கு எல்லாம் பின்னூட்டம் அளித்திருக்கிறார், எந்த இடங்களுக்கு எல்லாம் சென்றிருக்கிறார், உறவினர்கள் யார், உடன் பணியாற்றியவர்கள் யார்?, எந்த குழுக்களில் எல்லாம் உறுப்பினராக உள்ளார் உள்ளிட்ட தகவல்களை எல்லாம் அறிய முடியும்.

பேஸ்புக் தேடல்

பேஸ்புக் உறுப்புனர் முகவரியை சமர்பித்ததுமே, அந்த முகவரி தொடர்பாக திரட்டப்பட்ட தகவல்களை பல்வேறு தலைப்புகளின் கீழ் வகைப்படுத்திக்காட்டுகிறது. ஒவ்வொரு வகையாக தேர்வு செய்து ஆய்வு செய்துப்பார்க்கலாம்.

பொதுவாக பேஸ்புக்கை நண்பர்களும், நண்பர்களின் நண்பர்கள் சூழ்ந்த அறையாகவும் நினைத்துக்கொண்டிருக்கிறோம். அந்த உணர்வுடன் தான் தகவல்களையும், ஒளிப்படங்களையும் பகிர்ந்து கொள்கிறோம். விவாவிதிக்கிறோம், உரையாடுகிறோம். நட்பு வளையத்திற்கு வெளியே இருப்பவர்களுக்கு என்னத்தெரியப்போகிறது என நாம் நினைக்கலாம். ஆனால், பேஸ்புக்கில் பகிரும் தகவல்கள் எந்த அளவுக்கு பொது வெளியில் சிதறிக்கிடக்கின்றன என்பதை பலரும் அறிவதில்லை. இதை தான் ஸ்டாக்ஸ்கேன் இணைய சேவை அம்பலப்படுத்துகிறது. பேஸ்புக் தகவல்களை மற்றவர்கள் அணுகுவது எளிது என்பதையும் புரிய வைக்கிறது.

ஆனால், ஸ்டாக்ஸ்கேன் அத்துமீறி எதையும் செய்யவில்லை. சொல்லப்போனால் அது பிரமாதமாக எதையுமே செய்யவில்லை. பேஸ்புக் தகவல்களில் பொதுவெளியில் காண கூடியவற்றை அது அடையாளம் காட்டுகிறது அவ்வளவே. இதில் கவனிக்க வேண்டிய விஷயம் என்னவெனில், இந்த அடையாளம் காட்டுதலையும் பேஸ்புக் வழங்கும் தேடல் வசதி கொண்டே சாத்தியமாக்குகிறது.

அதாவது இந்த தேடலுக்கு ஸ்டாக்ஸ்கேன் தேவை என்றில்லை. 2013 ம் ஆண்டு பேஸ்புக் அறிமுகம் செய்ய கிராப் சர்ச் தேடல் வசதி மூலம் யார் வேண்டுமானாலும் இது போன்ற தகவல்களை தேட முடியும். அப்படி தேடக்கூடிய தகவல்களை எல்லாம் ஒரே இடத்தில் பல்வேறு தலைப்புகளின் கீழ் எளிதாக அணுக்ககூடிய வகையில் ஸ்டாக்ஸ்கேன் அளிக்கிறது என்பதே அதன் சிறப்பு.

நல்லெண்ண தாக்காளர்

பேஸ்புக் பயன்பாட்டின் தனியுரிமை அம்சம் தொடர்பாக விழிப்புணர்வை ஏற்படுத்தவே இதை செய்கிறது. பெல்ஜியம் நாட்டைச்சேர்ந்த Inti De Ceukelaire  எனும் நல்லெண்ண தாக்காளர் இந்த சேவையை உருவாக்கியிருக்கிறார். கிராப் சர்ச் தேடலின் வீச்சும், பிரச்சனையும் பரவலாக அறியப்படாமல் இருப்பதால், சாதாரண இணையவாசிகளும் இதை அறிந்து கொள்ளும் வகையில் இந்த சேவையை உருவாக்கியதாக மதர்போர்ட் இணைய இதழுக்கு அளித்த பேட்டியில் அவர் கூறியிருக்கிறார்.

பெரும்பாலான சாமானியர்களுக்கு தாங்கள் பொதுவெளியில் பகிர்ந்து கொள்பவை பற்றிய புரிதால் இல்லாத நிலையில், இது தொடர்பான விழிப்புணர்வை ஏற்படுத்த பயனாளிகளுக்கு நட்பான இந்த சேவையை உருவாக்கியதாகவும் அவர் தெரிவித்துள்ளார்.

கிராப் சர்ச் அறிமுகமான போது அதன் அந்தரங்க மீறல் தன்மைக்காக பெரும் சர்ச்சை உண்டானது. பின்னர் பேஸ்புக் இந்த தேடல் சேவையை அதிகம் முன்னிறுத்துவதில்லை. மற்ற தேடல் அம்சங்களிலேயே கவனம் செலுத்துகிறது. எனினும் விஷயம் அறிந்தவர்கள் கிராப் சர்ச் தேடலை பயன்படுத்தி தகவல் வேட்டை நடத்திக்கொள்ளலாம். இதை தான் ஸ்டாக்ஸ்கேன் வெளிச்சத்திற்கு கொண்டு வந்துள்ளது.

ஆனால், இந்த சேவை பேஸ்புக்கின் தனியுரிமை கொள்கையை மீறவில்லை என்றும், பொதுவெளியில் பார்க்க கூடிய, ஆனால் மறைந்திருக்கும் தகவல்களை மட்டுமே காட்டுவதாகவும் தளத்தின் முகப்பு பக்கத்திலேயே குறிப்பிடப்பட்டுள்ளது.

ஆக, ஒரு பேஸ்புக் பயனாளி தான் பகிரும் தகவல்களை நண்பர்கள் பார்வைக்கு மட்டும் என அமைத்திருந்தால் என்றால் அதற்குள் யாரும் எட்டிப்பார்க்க முடியாது. ஆனால் எப்படி பகிர்ந்து கொள்கிறோம் என அறியாமல் பொதுவெளியில் பகிர்ந்து கொண்டவர்களின் தகவலை எல்லோரும் பார்க்க முடியும்.

நீங்களும் உஷார்

நீங்களும் கூட இந்த தளத்தில் உங்கள் பேஸ்புக் முகவரியை டைப் செய்து பார்த்தால், உங்கள் பேஸ்புக் விவரங்களில் எத்தகைய தகவல்கள் மற்றவர் பார்வைக்கு கடை பரப்பி வைக்கப்படுள்ளது என்பதை தெரிந்து கொள்ளலாம். அதிக தகவல்கள் இல்லை எனில், நீங்கள் தனியுரிமை அமைப்பை நன்றாக பயன்படுத்துகிறீர்கள் என திருப்தி பட்டுக்கொள்ளலாம். மாறாக, உங்களை திகைப்பில் ஆழ்த்தக்கூடிய அல்லது சங்கடத்தில் ஆழ்த்தக்கூடிய தகவல்கள் எல்லாம் தேடலில் கிடைக்க கூடியதாக இருந்தால் உங்கள் பேஸ்புக் பக்கத்திற்கான தனியுரிமை பாதுகாப்பு போதுமானதல்ல என உணர வேண்டும்.

உடனடியாக, உங்கள் பேஸ்புக் பக்கத்தில் செட்டிங்ஸ் பகுதியில் உள்ள பிரைவசி அமைப்பை ஆய்வு செய்து, எவற்றை எல்லாம் நண்பர்கள் பார்க்கலாம், எவை எல்லாம் பொது வெளியில் தோன்றலாம் போன்ற விஷயங்களில் கவனம் செலுத்துவது நல்லது. ஒவ்வொரு முறை நிலைத்தகவல் பதியும் போது, அல்லது பின்னூட்டம் அளிக்கும் போதும் கூட இதை நினைவில் கொள்வது இன்னும் நல்லது. இதற்கான இணைய முகவரி: https://www.facebook.com/help/443357099140264

இணையதள முகவரி: https://www.stalkscan.com/

 

  • நன்றி; தமிழ் இந்துவில் எழுதியது!

ஸ்னேப்சேட் சேவை ஒரு அறிமுகம்!

 

sonakshi_1468591201பாலிவுட் பிரபலங்களின் ஸ்னேப்சேட் பயனர் பெயர் என்ன தெரியுமா?

கேள்வி பதில் இணையதளமான குவோராவில் கேட்கப்பட்ட இந்த கேள்விக்கு பலர் ஆர்வத்துடன் பதில் அளித்துள்ளனர். அதன் படி பார்த்தால் நடிகர் ஹிருத்திக்கின் ஸ்னேப்சேட் பெயர் ஜஸ்ட் ஹிருத்திக் ( justhrithik ), நடிக்கை ஜாக்குலின் பெர்னாண்டசின் ஸ்னேப்சேட் பெயர் ஜாக்குலின் 143 ( jacqueen143) , நடிகை சோனாக்‌ஷி சின்காவின் பெயர் அலிசோனா (-asilsona). ரசிகர்கள், ஸ்னேப்சேட்டில் இவர்களை பின் தொடர விரும்பினால் இந்த பெயரை அடையாளமாக பயன்படுத்திக்கொள்ளலாம்.

இன்னும் யாரெல்லாம் ஸ்னேப்சேட்டில் இருக்கின்றனர் என அறிய விரும்பி கூகுளில் தேடினால், ஸ்னேப்சேட்டில் பிரலபலமாக இருக்கும் பாலிவுட் பிரபலங்களின் பல்வேறு பட்டியல்கள் கவர்ந்திழுக்கின்றன. நடிகை சோனம் கபூரில் துவங்கி, நர்கிஸ், பரிணிதி சோப்ரா என பலரும் இந்த பட்டியலில் இருக்கின்றனர். ரன்வீர் கபூர், மிலிந்த் சோமன் என நடிகர்கள் பட்டியலும் நீளமாக இருக்கிறது. அன்மையில் அனுஷ்கா சர்மாவும் இந்த பட்டியலில் இணைந்துள்ளார். ஸ்னேப்சேட் மூலம் அவர் பகிர்ந்து கொண்டு அசத்தலான ஒளிப்படங்கள் கவனத்தை ஈர்த்துள்ளன. அந்த ஒளிப்படங்களில் கலந்திருக்கும் நகைச்சுவையான தன்மை வெகுவாக ரசிக்கப்பட்டுள்ளன.

ஆக,அனுஷ்கா சர்மா ரசிகர்கள் இனி ஸ்னேப்சேட்டில் அவரையும் பின் தொடரலாம். படப்பிடிப்பு தள காட்சிகள் முதல், அவரது மேக்கப் ரகசியம், ஆடை அழகு என பலவற்றையும் ஸ்னேப்சேட்டில் தரிசிக்கலாம்.

பாலிவுட்டில் இருந்து விலகி உலக அளவில் சென்றால் ஸ்னேப்சேட்டில் பின் தொடர வேண்டிய பிரபலங்கள், ஒளிப்பட கலைஞர்கள், நட்சத்திரங்கள் என பல்வேறு பரிந்துரைகளை பார்க்கலாம். ஸ்னேப்சேட் கதைகள், ஸ்னேப்சேட் நினைவுக்அள், ஸ்னேப்கோடு என இன்னும் பலவித நவீன பரிபாஷைகள் சார்ந்த பட்டியலையும் பார்க்கலாம்.

எல்லாம் சரி, ’ஸ்னேப்சேட்டா அது என்ன’ என சிலர் விழிக்கலாம். இன்னும் சிலர், ஸ்னேப்சேட் சேவை புரியாத புதிராக குழப்பமாக இருக்கிறதே என நினைக்கலாம். மாறாக இளசுகள் கண்ணில் ஒளி பொங்க, ஸ்னேப்சேட் அருமை பெருமைகளை பேசத்தயாராகலாம்.

எது எப்படியோ ஸ்னேப்சேட் சேவையை பரிட்ச்யம் செய்து கொள்வது நல்லது. ஏனெனில் இணைய உலகில் வேகமாக வளரும் சேவைகளில் ஸ்னேப்சேட்டும் ஒன்றாக இருக்கிறது. அதோடு அதிகம் பேசப்படும் சேவையாகவும், எதிர்பார்ப்பை ஏற்படுத்தும் சேவையாகவும் இருக்கிறது. அது மட்டும் அல்லாமல் பேஸ்புக்கும், அதன் துணை சேவைகளுமான இன்ஸ்டாகிராமும், வாட்ஸ் அப்பும் அன்மை காலமாக அறிமுகம் செய்யும் புதிய வசதிகள் எல்லாம் ஸ்னேப்சேட் சேவையின் நகல் என்றே சொல்லப்படுவதும், அன்மையில் இதன் தாய் நிறுவனமான ஸ்னேப் ஐஎன்சி பங்குச்சந்தையில் நுழைந்து அதன் இணை நிறுவனரான இவான் ஸ்பிஜெல்லை இளம் கோடீஸ்வரராக்கியதும், ஸ்னேப்சேட் பற்றிய ஆர்வத்தை அதிகமாக்கியுள்ளது.

ஸ்னேப்சேட் அடிப்படையில் மெசேஜிங் சேவை. ஆனால் வழக்கமான மெசேஜிங் சேவை அல்ல: கொஞ்சம் மாறுபட்டது. இதிலும் ஒளிப்படங்களையும், காணொலிகளை பகிர்ந்து கொள்ளலாம் என்றாலும், அதில் ஒரு சின்ன டிவிஸ்ட் இருக்கிறது. ஸ்னேப்சேட் சேவை வழியே பகிரப்படும் படங்கள் தற்காலிகமானவை- தானாக மறைந்துவிடும் தன்மை கொண்டவை. ஆம், ஸ்னேப்சேட்டில் பகிரப்படும் படங்கள் பார்க்கப்பட்ட பின், தானாக அழிக்கப்பட்டுவிடும். அதிகபட்சமாக பத்து விநாடிகள் மட்டுமே அவற்றை பார்க்கலாம். அதற்கு மேல் அவை இல்லாமல் போய்விடும்.

இப்படி தானாக மறையும் படங்கள் தான் ஸ்னேப்சேட்டின் தனிச்சிறப்பு என்றாலும், முதல் முறையாக இந்த சேவையை அறிமுகம் செய்து கொள்ளும் எவருக்குமே, அழியும் படங்களை பகிர்வதால் என்ன பயன் என்று தான் கேடக்கத்தோன்றும். பகிர்வதும் அதன் பிறகு சேமித்து வைப்பதுமே பெரும்பாலான இணைய சேவைகளின் தன்மையாக இருக்கும் போது, தற்காலிகத்தன்மை கொண்ட ஒளிப்படங்களை பகிர்வது வீணானது என நினைக்கத்தோன்றும்.

2011 ல் ஸ்னேப்சேட் அறிமுகமாகும் போது பலரும் இப்படி குழம்பித்தவித்தனர். ஆனால் அதையெல்லாம் மீறி ஸ்னேப்சேட் பெரிய அளவில் வரவேற்பை பெற்றது. அதற்கு முக்கிய காரணம், மில்லினியல்ஸ் என சொல்லப்படும் புத்தாயிரமாண்டு வாக்கில் பிறந்து வளர்ந்த இளம் தலைமுறை இந்த சேவையை ஆர்வத்தோடு தங்களுக்கானதாக ஏற்றுக்கொண்டது தான். பெரியவர்கள் எல்லாம் பேஸ்புக் பக்கம் சாய்ந்து கொண்டிருந்த நிலையில், இளம் தலைமுறை ஒளிப்பட பகிர்வு சேவையான இன்ஸ்டாகிராம் பக்கம் சென்று கொண்டிருந்த நிலையில், பதின் பருவத்தினர் ஸ்னேப்சேட் மூலம் பேசிக்கொண்டனர். பார்க்கப்பட்டவுடன் அழிந்துவிடும் என்பதை அறிந்தும் கூட, தாங்கள் பகிர விரும்பும் தருணங்களை ஒளிப்படமாக ஆர்வத்தோடு பகிர்ந்து கொண்டனர். தங்கள் நட்பு வட்டத்தில் இருந்து இப்படி வந்து சேர்ந்த படங்களை இன்னும் ஆர்வத்துடன் பார்த்து ரசித்தனர். அந்த படங்கள் எல்லாம் காணாமல் போனது பற்றி அவர்கள் கவலைப்படவே இல்லை. அவர்களைப்பொருத்தவரை, அந்த கணங்களை தான் முக்கியம். அவற்றை தான் பகிர்ந்து கொண்டாயிற்றே- பார்த்து ரசித்தாயிற்றே!

இந்த தன்மையால் ஸ்னேப்சேட் புதுயுக தகவல் தொடர்பு மொழியானது. மெல்ல இளசுகளின் வட்டத்திற்கு வெளியேவும் அது பிரபலமானது. அப்போது தான் அடுத்த பெரிய செயலி எனும் ஸ்னேப்சேட் என்று தெரிய வந்தது. இதை முதலில் புரிந்து கொண்டவர்களில் ஒருவர் பேஸ்புக் நிறுவனர் மார்க் ஜக்கர்பர்கும் ஒருவர். அதனால் தான், அவர் ஸ்னேப்சேட்டை விலைக்கு வாங்க முற்பட்டார். ஆனால் ஸ்னேப்சேட்டின் இளம் நிறுவனரான ஸ்பிஜெல் இந்த வாய்ப்பை நிராகரித்துவிட்டார். அதன் பிறகு ஸ்னேப்சேட் பெற்றுள்ள வளர்ச்சி ஸ்பிஜெல்லின் பிடிவாதம் அசட்டுத்துணிச்சல் அல்ல என நிருபித்திருக்கிறது. இன்று பேஸ்புக் தான் எப்படியாவது ஸ்னேப்சேட்டை கோட்டைக்குள் நுழைந்துவிட வேண்டும் என துடித்துக்கொண்டிருக்கிறது.

1488793841-picmonkey-collageஸ்னேப்சேட்டின் வெற்றிக்கு காரணம் அதன் விநோத தன்மை தான். பகிர்ந்தவுடன் அழிந்துவிடும் படங்களால் என்ன பயன் எனும் கேள்வி பழைய தலைமுறையால் கேட்கப்படுவதாகும். இணையத்திற்கு பழகிய இக்கால தலைமுறை இந்த வசதியை இயல்பாக கருதுகிறது. அதற்கு முக்கிய காரணம், ஸ்னேப்சேட் உரையாடல் என்பது பலவிதங்களில் நிஜ உலக உரையாடல் போலவே அமைந்திருப்பதை அவர்கள் உணர்ந்திருப்பது தான். அன்றாட வாழ்க்கையில் நாம் எப்படி உரையாடுகிறோம். பார்க்கிறோம், பேசிக்கொள்கிறோம் அவ்வளவு தானே. அந்த தருணங்களை எல்லாம் நாம் படம் எடுத்து சேமித்து வைப்பதில்லையே- ஸ்னேப்சேட் உரையாடலும் இப்படி தான் நிகழ்கிறது.

பயனாளிகள் தாங்கள் பகிர விரும்பும் தருணங்களை கிளிக் செய்து பகிர்ந்து கொள்கின்றனர். ஸ்னேப்சேட் செயலியை திறந்ததுமே காமிரா திரை தான் தோன்றும். சுயபடம் அல்லது வேறு காட்சியை கிளிக் செய்து, தொடர்பு பட்டியலில் உள்ளவர்களுடன் பகிரலாம். அவர்கள் பார்த்தவுடன் அந்த படம் மறைந்துவிடும். உதாரணத்திற்கு ஒரு இளம் பயனாளி இசைக்கச்சேரிக்கு செல்கிறார் என வைத்துக்கொள்வோம், கச்சேரி அரங்கிற்கு வெளியே நிற்கும் காட்சியை கிளிக் செய்து அவர் வெளியிடலாம். நான் இங்கே இருக்கிறேன் என தெரிவிப்பது மட்டும் தான் அவரது நோக்கம். நண்பர்களும் அதை தெரிந்து கொள்கின்றனர். அவ்வளவு தான் முடிந்தது விஷயம். இது தான் ஸ்னேப்சேட்டின் அடிநாதம்.

இந்த வசதி புத்தாயிரமாண்டின் தலைமுறையை கவர்வதற்கு காரணம், இத்தகைய அக உரிமை அவர்களுக்கு தேவைப்பட்டது தான். சமூக வலைப்பின்னலாக பேஸ்புக் பிரபலமானதும் அதிலும் பெற்றோர்களும், பெரியவர்களும் கூட்டம் கூட்டமாக உள்ளே வந்ததை பிள்ளைகள் ரசிக்கவில்லை. நம் உலகில் ஊடுருவியதாக நினைத்தவர்கள் பலரும் பேஸ்புக்கில் இருந்து வெளியேறினர். அதே நேரத்தில் அறிமுகமான ஸ்னேப்சேட் சேவை அவர்களுக்கு பொருத்தமாக இருந்ததோடு, படங்கள் பார்க்கப்பட்டவுடன் அழிந்துவிடுவது, இது எங்கள் உலகம் என பூட்டு போடுவதாகவும் அமைந்தது.

இந்த அம்சங்களே ஸ்னேப்சேட்டை வெற்றி பெற வைத்தாலும், அது படிபடியாக புதிய அம்சங்களை அமைத்து மேலும் மேலும் வளர்ந்து வந்திருக்கிறது. ஆரம்ப வரவேர்பிற்கு பிறகு ஸ்னேப்சேட் தானாக மறையும் படங்கள் தவிர, 24 மணி நேரம் மட்டும் இருக்க கூடிய படங்களை உருவாக்கும் வசதியை ஸ்னேப்சேட் ஸ்டோரி எனும் பெயரில் அறிமுகம் செய்தது. தொடர்ந்து பிடித்த படங்களை சேமித்து வைக்கும் மெம்மரி வசதியை அறிமுகம் செய்தது. மேலும் படங்களை இஷ்டம் போல மாற்றிக்கொள்ளும் பில்டர் வசதிகளையும் அறிமுகம் செய்தது.  பயனாளிகள் மற்றவர்கள் கதைகளை பின் தொடரும் வசதியையும் அறிமுகம் செய்தது. அப்படியே பிராண்ட்கள் மற்றும் பிரபலங்களின் பக்கமும் சென்றது.

திடுரென பார்த்தால், பிரபலங்களும், தொழில்முறை கலைஞர்களும் ஸ்னேப்சேட்டில் இருந்தனர். ஸ்னேப்சேட்டில் கணக்கு துவங்குவதும், அதில் போய் வடிவிலான அறிமுக சித்திரங்களை உருவாக்கி கொள்வதும் பிரபலமானது. ஸ்னேப்சேட் மூலம் ரசிகர்களை புதிய முறையில் தொடர்பு கொள்ள முடிவதாக நட்சத்திரங்கள் கருதுகின்றனர். இவ்வளவு ஏன் ஸ்னேப்சேட்டை ஆர்வமாக பயன்படுத்தும் டாக்டர்கள் எல்லாம் இருக்கின்றனர். இக்கால தலைமுறையுடன் தொடர்பு கொள்ள ஸ்னேப்சேட்டே பொருத்தமான வழியாக கருதப்படுகிறது.

இப்போது அனுஷ்கா சர்மாவும் தன் பங்கிற்கு ஸ்னேப்சேட்டை பிரபலமாக்கியிருக்கிறார்.

 

 

ஸ்னேப்சேட் அகராதி

ஸ்னேப்ஸ்; ஸ்னேப்சேட் செயலி முலம் எடுக்கப்படும் ஒளிப்படம் அல்லது காணொலி.

ஸ்னேப்சேட்டர்ஸ்: ஸ்னேப்சேட் பயனாளிகள்

ஸ்னேப்பேக்: ஸ்னேப்களுக்கான பதில்

ஸ்டோரி; பின் தொடர்பாளர்களுக்கு ஒளிபரப்ப கூடிய ஒளிபடங்களின் வரிசை. 24 மணி நேரம் பார்வையில் இருக்கும். ஸ்னேப்சேட்டில் கதை சொல்வதை போல கருதலாம்.

ஸ்கோர்; பயனாளி பகிர்ந்த ஸ்னேப்கள், பெற்ற ஸ்னேப்கள், கதைகள் உள்ளிட்டவையின் எண்ணிக்கை.

ஸ்னேப்கோட்; ஸ்னேப்சேட்டில் நண்பர்களை எளிதாக சேர்த்துக்கொள்ள வழி செய்யும் ஸ்கேன் செய்யும் வசதி கொண்ட குறியீடு. புரபைல் திரையின் மத்தியில் இருக்கும். காமிரா திரையின் மேல் உள்ள பிசாசு ஐகானை கிளிக் செய்து அணுகலாம்.

சேட்: ஸ்னேப்சேட் பயனாளிகளின் நேரடியாக தொடர்பு கொள்ளும் வசதி. வீடியோசேட் வசதியும் உண்டு.

லென்ஸ்; ஸ்னேப்களை மேலும் கேளிக்கை மிக்கதாக மாற்றும் வசதிகள். ஸ்பெஷல் எபெக்ட் போன்றவை. காமிரா திரையில் தோன்றும்.

பில்டர்கள்:ஸ்னேப்கள் மீது பலவித தோற்றங்களை உண்டாக்கும் வசதி.

 

 

  • நன்றி; தமிழ் இந்துவுக்காக எழுதியது.

 

* இணைய உலகை கலக்கும் ஸ்னேப்சேட் சேவை உருவான விதம் பற்றி அறிய;

ஸ்னேப்சேட் வெற்றிக்கதை- புதுயுக செயலியை உருவாக்கிய ஸ்பிஜெல் !

 

 

 

 

 

 

டிரால்கள் பிரச்சனைக்கு புதுமையான தீர்வு!

linkmoji-readyexamples-left-p-500x500இணையத்தின் டாப் டென் பிரச்சனைகளை பட்டியலிட்டால், டிரால்களின் தாக்குதல் அதில் நிச்சயம் முன்னணியில் இடம் பெறும். ஃபேக் நியூஸ் போன்ற புதிய பிரச்சனைகள் விஸ்வரூபம் எடுத்து வரும் நிலையில், டிரால்கள் எனப்படும் இணைய விஷமிகளின் தாக்குதல் இணையத்தின் தீராத தலைவலியாக தொடர்கிறது.

இணையத்தின் ஆதிகால பிரச்சனையான இதற்கு பலவித தீர்வுகள் முயற்சிக்கப்பட்டு, எதுவும் முழு பலன் தராத நிலையில் நார்வே நாட்டு இணையதளம் ஒன்று புதிய தீர்வை முன்வைத்துள்ளது. இந்த தீர்வு புதுமையாக மட்டும் அல்ல புதிர் வடிவிலும் அமைந்துள்ளது. அதாவது கேள்வி பதில் வடிவில் அமைந்துள்ளது.

டிரால்களுக்கு பலவிதமான விளக்கம் சொல்லப்படுகிறது. அதற்கேற்ப டிரால்களும் பலவிதமான வடிவில் செயல்பட்டு வருகின்றனர். ஆனால், டிரால்களின் பொதுத்தன்மை என்று பார்த்தால் இணைய விவாதம் போன்றவற்றில் சம்மன் இல்லாமல் ஆஜராகி துவேஷம் நிறைந்த கருத்துக்களை பதிவு செய்வது என புரிந்து கொள்ளலாம். விவாதத்தின் நோக்கத்தை பாதிப்பதில் துவங்கி, தொடர்புடையவர்கள் மனதை நோகடிப்பது வரை இது அமையலாம். இத்தைய தாக்குதலுக்கு இலக்காகி இணைய பக்கமே இனி வரமாட்டேன் என கண்ணீர் மல்க விலகிய பிரபலங்கள் உண்டு. அன்மை காலமாக இணைய சாமானியர்களும் இந்த வகை தாக்குதலுக்கு இலக்காகி அவதிப்பட்டு வருகின்றனர்.

சுருக்கமாக சொலவதானால் இணைய விஷமிகள் இணையத்தை பாதுகாப்பற்ற இடமாக மாற்றி வருகின்றனர். இவ்வளவு ஏன் செய்தி தளங்களிலும் கூட டிரால்கள் தொடர்ந்து கைவரிசை காட்டி வருகின்றனர். செய்தி கட்டுரைகள் தொடர்பாக கருத்து தெரிவிக்கும் பின்னூட்ட வசதியை தவறாக பயன்படுத்தி மனம் போன போக்கில் கருத்துக்களை பதிவு செய்து வெறுத்துப்போக வைப்பதில் விஷமிகள் ஆனந்தம் காண்கின்றனர். சிலர் வம்புக்காகவேனும் தேவையில்லாத கருத்துகளை தெரிவித்து கோபம் கொள்ள வைப்பதும் உண்டு. ஏதேனும் ஒரு விதத்தில் தூண்டிவிடுவது தானே அவர்களின் நோக்கம்!

பின்னூட்டங்களில் இப்படி காழ்ப்புணர்ச்சி கொண்ட கருத்துக்கள் பதிவு செய்யப்படுவதை தவிர்க்க கண்காணிப்பு, கட்டுப்பாடு போன்ற உத்திகள் எல்லாம் பலன் தராமல் போகவே, பல இணையதளங்கள் பின்னூட்ட வசதியையே ரத்து செய்துவிட்டன. ஆனால், பின்னூட்டம் என்பது இணையம் சாத்தியமாக்கும் பங்கேற்பு ஜனநாயகத்தின் முக்கிய அம்சம் என்பதால் இந்த உத்தியையும் அப்படியே ஏற்றுக்கொள்வதற்கில்லை. மேலும் பின்னூட்ட வசதி அர்த்தமுள்ள விவாதம் மூலம் கருத்து பரிமாற்றம் மற்றும் கூடுதல் புரிதலுக்கு வழிவகுக்கும்.

எனவே தான் பின்னூட்ட வசதியை இயன்ற வரை ஆரோக்கியமான முறையிலேயே பயன்படுத்தப்படுவதை உறுதி செய்வது எப்படி என பலரும் யோசித்து வருகின்றனர். இந்த வரிசையில் தான் நார்வே நாட்டு பொதுத்துறை ஒளிபரப்பு ஊடகமான என்.ஆர்.கேவின் தொழில்நுட்ப பிரிவான என்.ஆர்.கே. பீட்டா பின்னூட்டங்களை நெறிப்படுத்த புதிய தீர்வை அறிமுகம் செய்துள்ளது. இந்த தீர்வு கேள்வி பதில் பாணியில் அமைந்துள்ளது.

அதாவது, குறிப்பிட்ட செய்தி அல்லது கட்டுரை தொடர்பாக யாரேனும் பின்னூட்டம் வெளியிட விரும்பினால் முதலில், சில கேள்விகளுக்கு பதில் சொல்ல வேண்டும். அவர்கள் பின்னூட்டம் அளிக்க விரும்பும் கட்டுரை தொடர்பாக அந்த கேள்விகள் அமைந்திருக்கும். அவற்றுக்கு சரியான பதில் அளித்தால் மட்டுமே பின்னூட்டம் பதிவு செய்ய முடியும்.

பெரும்பாலும் இணைய விஷமிகள் செய்திகளை படிக்காமலேயே பின்னூட்டத்தில் துவேஷ கருத்துக்களை கூறி கசப்புணர்வு அளிக்கின்றனர் என கருதப்படுகிறது. இதை தடுக்கும் வகையில், முதலில் கருத்து சொல்ல விரும்புகிறவர்கள் அது தொடர்பான கட்டுரையை படித்திருப்பதை உறுதி செய்ய இந்த கேள்வி பதில் உத்தி முயற்சிக்கிறது.

” கருத்து தெரிவிக்க விரும்புகிறீர்களா? எனில் இது தொடர்பான கேள்விகளுக்கு பதில் அளியுங்கள். கருத்துக்களின் தரம் குறித்து கவலைப்படுவதால், பின்னூட்டம் அளிப்பவர்கள் அது தொடர்பான செய்தியை வாசித்திருப்பதை உறுதி செய்ய விரும்புகிறோம்” என இதற்கான காரணம் அந்த இணையதளம் சார்பாக விளக்கப்பட்டுள்ளது.

கருத்து தெரிவிப்பதற்கு முன், எல்லோரும் கட்டுரையில் என்ன இருக்கிறது என்பதை ஒப்புக்கொண்டார்கள் எனில், அவர்கள் தெரிவிக்கும் கருத்துக்கள் அர்த்தமுள்ளதாக அமைய வாய்ப்புள்ளது என என்.ஆர்.கே பீட்டா தளத்தில் பணியாற்றும் செய்தியாளர் ஒருவர் இது தொடர்பாக தெரிவித்துள்ளார்.

நிச்சயம், பின்னூட்ட வசதி தவறாக பயன்படுத்தப்படுவதை தடுக்கும் போராட்டத்தில் இது சுவாரஸ்யமான முயற்சி தான். பின்னூட்டம் மூலம் விஷம் கக்குவதை இது தடுக்குமா? என்று தெரியவில்லை. ஆனால், கருத்து தெரிவிக்கவுள்ள ஒரு கட்டுரையை முழுவதும் படித்து, அதன் சாரம்சத்தை புரிந்து கொண்டு பதில் அளிக்க நிர்பந்திக்கப்படுவது போகிற போக்கில் கருத்துக்களை வீசி எறிவதில் இன்பம் காண்பவர்களை யோசிக்க வைக்கலாம். அல்லது குறைந்தபட்சம் விலக்கி வைக்கலாம். மேலும் இடைப்பட்ட நேரம் அவர்களின் ஆவேசத்தையும் தணித்துவிடலாம்.

ஆனால், கட்டுரையின் உண்மையான வாசகர்கள் இப்படி கேள்வி கேட்கப்படுவதை எப்படி எடுத்துக்கொள்வார்கள் எனத்தெரியவில்லை. கட்டுரை தொடர்பான கேள்விகளுக்கு பதில் அளிப்பதை அவர்கள் ரசிக்கவும் செய்யலாம். எனில் இது, இணைய யுகத்தில் செய்திகள் தொடர்பான உரையாடல் தன்மையில் கூடுதல் அம்சமாகலாம். வாசித்த பிறகே பின்னூட்டம் தெரிவிக்க வழி செய்யும் இந்த உத்தி அர்த்தமுள்ள இணைய விவாதத்திற்கு வழி செய்யலாம் என்று இணைய வல்லுனர்கள் தரப்பிலும் கருத்து தெரிவிக்கப்பட்டுள்ளது.

 

தளம் புதிது: இமோஜி வடிவில் இணையதள இணைப்புகள்!

இணையதளங்களின் இணைப்புகளை பகிர்ந்து கொள்ளும் பழக்கமும்,தேவையும் இணையவாசிகளில் பலருக்கு இருக்கலாம். இணையதள முகவரிகள் நீளமாக வால் போல தோன்றமால், கச்சிதமான இருக்க வேண்டுமானால் அதற்காக முகவரி சுருக்க சேவைகள் இருக்கின்றன. அதே போல இணையதள முகவரிகளை கொஞ்சம் சுவாரஸ்யமான முறையில் பகிர்ந்து கொள்ள விரும்பினால், லிங்க்மோஜி இணையதளம் அதற்கு உதவுகிறது.

இந்த இணையதளம் இணைய முகவரிகளை எல்லோருக்கும் பிடித்தமான இமோஜிகள் வடிவில் பகிர்ந்து கொள்ள வைக்கிறது. இதற்கு, முதலில் பகிர விரும்பும் இணைய முகவரிகளை இந்த தளத்தில் சமர்பிக்க வேண்டும். உடனே அந்த இணைப்பை இமோஜி எழுத்துக்கள் கொண்டதாக மாற்றித்தருகிறது.

இந்த இணைப்பை பேஸ்புக், டிவிட்டர் மூலம் பகிர்ந்து கொள்ளலாம். இமோஜி இணைப்பை கிளிக் செய்தால் அதன் பின்னே உள்ள இணையதளத்திற்கு செல்லலாம்.

லிங்க்மோஜி தளம் உருவாக்கித்தரும் இமோஜி இணைப்பு பிடிக்கவில்லை எனில், பயனாளிகள் தாங்கள் விரும்பிய இமோஜி உருவங்களை தேர்வு செய்து இணைப்பை உருவாக்கி கொள்ளலாம். இணைய பயன்பாட்டில் கொஞ்சம் சுவாரஸ்யமும் தேவை என நினைப்பவர்கள் முயன்று பார்க்கலாம். ஆனால் இமோஜி இணைப்பை கிளிக் செய்ததும், இணையதளம் தோன்றும் வரை காத்திருக்க நேரலாம்.

இணைய முகவரி: http://www.linkmoji.co/

 

செயலி புதிது; பிரிஸ்மா செயலியில் புதிய வசதி

ஸ்மார்ட்போன் பிரியர்களின் மனம் கவர்ந்த பிரிஸ்மா செயலி புதிய அம்சங்களோடு தொடர்ந்து மேம்பட்டுக்கொண்டே இருக்கிறது. இப்போது இந்த செயலி புதிய பில்டர் வசதியை அறிமுகம் செய்துள்ளது.

பிரிஸ்மா செயலி, பயனாளிகளின் ஒளிப்படங்களை நவீன ஓவியம் போன்ற தோற்றமாக மாற்றி பகிர்ந்து கொள்ள வழி செய்கிறது. ஸ்மார்ட்போனில் எடுக்கப்பட்ட ஒளிப்படத்தை பிரிஸ்மா செயலியின் பில்டர்கள் மூலம் கலைபடைப்பாக மாற்றிக்கொள்ளலாம். செயற்கை நுண்ணறிவு சார்ந்த தொழில்நுட்பம் இதன் பின்னே இயங்குகிறது.

இந்த புதுமையான அம்சத்திற்காக அறிமுகமான வேகத்திலேயே பிரிஸ்மா, ஸ்மார்ட்போன் பயனாளிகள் மத்தியில் பெரும் வரவேற்பை பெற்றது. ஆண்ட்ராய்டு மற்றும் ஐபோன்களுக்கான 2016 ம் ஆண்டுக்கான சிறந்த செயலி விருதையும் வென்றது.

பிரிஸ்மா தொடர்ந்து பயனாளிகளை கவரும் வகையில் புதிய அம்சங்களை அறிமுகம் செய்து வருகிறது. பயனாளிகள் புரபைல் மற்றும் பீட்களை பராமரிக்கும் வசதியை அறிமுகம் செய்தது. தற்போது, பயனாளிகள் புதிய பில்டர்களை உருவாக்கி கொள்ளும் வசதி அறிமுகம் ஆகியுள்ளது.

இதுவரை, அடிப்படையான பில்டர்களை மட்டுமே பயன்படுத்த முடியும். இப்போது பிரிஸ்மா ஸ்டோர் மூலம் அதில் உள்ள ஸ்டைல்களை அணுகி, புதிய பில்டர்களை உருவாக்கி கொள்ளலாம். முதல் கட்டமாக இலவசமாக அறிமுகமாகியுள்ளது. ஆனால் இது கட்டணச்சேவையாகும் வாய்ப்பு உள்ளது.

மேலும் விவரங்களுக்கு: https://prisma-ai.com/

 

ஊக்கம் பெற 16 வழிகாட்டும் இன்போகிராபிக்

எப்போதும் சுறுசுறுப்பாக பம்பரம் போல சுற்றிச்சுழன்று செயல்பட்டுக்கொண்டிருக்கவே எல்லோரும் விரும்புகின்றனர் என்றாலும், பல நேரங்களில் சோம்பலும், சோர்வும் நம்மை முடக்கி விடுவதுண்டு. இன்னும் சில நேரங்களில் இலக்கில்லாமல் செயல்பட்டு நேரத்தை வீணடித்துக்கொண்டிருப்பும் அனுபவமும் ஏற்படலாம்.

இந்த நிலையில் இருந்து மீண்டு செயல்திறன் பெற்று ஊக்கமுடன் செயல்படுவதற்கான 16 எளிய வழிகளை ரைக்.காம் (wrike.com/ ) இன்போகிராபிக் எனப்படும் தகவல் வரைபடமாக உருவாக்கியுள்ளது.

5 நிமிடங்கள் கவனம் செலுத்துவதன் மூலம் ஊக்கம் பெறலாம், சிரித்தபடி அலுவலகத்தில் இருக்கையில் இருந்து எழுந்து நடை பயிலுங்கள், நாளைய செயல்களை இன்று இரவே குறித்து வைத்துக்கொள்ளுங்கள், ஊக்கம் தரும் வாசகங்களை படியுங்கள் என்பது உட்பட எளிய வழிகளை இந்த தகவல் வரைபடம் விவரிக்கிறது. உங்கள் இலக்குகளை நினைவில் கொள்ளுங்கள், மனதுக்கு பிடித்த இசையை கேளுங்கள் உள்ளிட்ட வழிகளோடு, முழுமைவாதியாக இருக்க வேண்டும் என்றும் குறிப்பிடப்பட்டுள்ளது.

இணைப்பு: http://bit.ly/2lRMBd2

 

நன்றி; தமிழ் இந்துவில் எழுதியது

 

புத்தகங்களை வாசிக்க உதவும் இணையதளங்கள்

bஇணையத்தில் புத்தக பிரியர்களுக்கு சுவாரஸ்யம் அளிக்ககூடிய இணையதளங்கள் அநேகம் இருப்பதை நீங்கள் அறிந்திருக்கலாம். புத்தகங்களை வாங்க உதவும் அமேசன், பிலிப்கார்ட் போன்ற மின்வணிக தளங்கள் தவிர, லைப்ரரிதிங், குட்ரீட்ஸ் போன்ற புத்தகம் சார்ந்த சமூக வலைப்பின்னல் தளங்கள் இருக்கின்றன. இந்த தளங்கள் மூலம் புத்தக புழுக்கள் தங்களுக்குள் நட்பு வளர்த்துக்கொள்ளலாம் என்பதோடு தாங்கள் வாசிப்பு அனுபவம் அடிப்படையில் படிக்க வேண்டிய புதிய புத்தகங்களையும் அறிமுகம் செய்து கொள்ளலாம்.

பேஸ்புக்கை மட்டுமே அறிந்திருக்கும் இணையவாசிகள் லைப்ரரிதிங் மற்றும் குட்ரீட்ஸ் தளங்களை குறித்து வைத்துக்கொள்வது நல்லது. ஆனால் இந்த தளங்கள் எல்லாம், முதல் வகை புத்தக பிரியர்களுக்கானது. இரண்டாவது வகை புத்தக பிரியர்களுக்கு இந்த தளங்கள் உற்சாகத்தை தரும் அளவுக்கு வாசிப்பில் கைகொடுக்காது.

புத்தக பிரியர்களில் இரண்டு ரகமா என யோசிக்கலாம். புத்தக பிரியர்கள் ஒரே ரகம் தான். தேடித்தேடி புத்தகங்களை படிப்பது அவர்கள் குணம். தங்களுக்கு ஆர்வம் அளிக்கும் எந்த புத்தகத்தையும் எப்படியாவது படித்துவிடுவார்கள். எப்போதும் அடுத்து என்ன படிக்கலாம் என அலைபாய்ந்து கொண்டே இருப்பார்கள். இவர்கள் உண்மையான புத்தக புழுக்கள்.

இரண்டாவது ரகத்தினர், புத்தக வாசிப்பில் ஆர்வம் கொண்டவர்கள்- ஆனால் பல்வேறு காரணங்களினால் விரும்பிய வேகத்தில் புத்தகத்தை படித்து முடிக்க முடியாமல் தவிப்பவர்கள். புத்தக வாசிப்பு மூலம் அறிவை பெருக்கி கொள்ள வேண்டும் என்ற விருப்பம் கொண்ட இவர்கள் தாங்கள் விரும்பும் புத்தகங்களை வாங்கியும் வைத்துக்கொள்வதுண்டு. ஆனால் அவற்றை படிப்பதற்கான நேரம் இல்லை என சொல்லிக்கொண்டிருப்பார்கள். இன்னும் சிலர், புத்தகங்களை படிக்க விருப்பம் தான், ஆனால் அது சாத்தியமாவதில்லை என வெளிப்படையாகவே ஒப்புக்கொள்வார்கள்.

இன்னும் சிலரோ, வாசிக்கும் ஆர்வம் இருந்தாலும், ஆங்கிலத்தில் உள்ள புத்தகங்களை மொழித்தடை காரணமாக படிக்க முடியாமல் தவித்துக்கொண்டிருப்பார்கள். இந்த இரண்டாம் பிரிவினரின் வாசிப்பு ஆர்வத்திற்கு உதவும் வகையில் புத்தக சுருக்க சேவை இணையதளங்கள் அமைந்துள்ளன. புத்தகங்களின் சாரம்சத்தை சுருக்கமாக தருவது தான் இந்த தளங்களின் நோக்கம்.

அதாவது முழு புத்தகத்தையும் வாசிக்காமலேயே அதில் உள்ள விஷயங்களை சுருக்கமாக தெரிந்து கொள்ள இந்த தளங்களின் அறிமுகம் உதவுகிறது.

புத்தகம் தொடர்பான மதிப்புரை அல்லது விமர்சனங்கள் பிரபலமாக இருந்தாலும் இவை புத்தகத்தின் நிறைகுறைகளை அறிந்து கொள்ள உதவும் அளவுக்கு அவற்றின் சாரம்சத்தை முழுவதுமாக உணர்த்துவதில்லை. ஆனால், புத்தக சுருக்க தளங்கள், ஒரு புத்தகத்தை சாறு பிழிந்து தருவது போல அவற்றின் மையக்கருத்தை சட்டென்று உணர்ந்து கொள்ளும் வகையில் சுருக்கமாக வழங்குகின்றன. இவை வாசிக்கவும் எளிதானது. ஐந்து முதல் பத்து நிமிடங்களுக்குள் படித்து முடித்துவிடலாம். இதன் மூலம் குறிப்பிட்ட அந்த புத்தகம் சொல்ல வரும் விஷயத்தை நன்றாகவே உள்வாங்கிக்கொள்ளலாம்.

சர்வதேச அளவில் பிளின்கிஸ்ட் (https://www.blinkist.com/ ) தளம் இந்த பிரிவில் பிரபலமாக இருக்கிறது. 1800 க்கும் மேற்பட்ட புனைகதை அல்லாத புத்தகங்களை 15 நிமிட நேரத்தில் படித்து விடக்கூடிய வகையில் சுருக்கமாக இந்த தளம் வழங்குகிறது. பெரும்பாலும் தொழில்முறையாக உதவக்கூடிய புத்தகங்களாக தேர்வு செய்து அவற்றின் சுருக்கத்தை இந்த தளம் அளிக்கிறது. சுய முன்னேற்றம் சார்ந்த நூல்கள் அதிகம் இருப்பதை பார்க்கலாம்.

இந்த தளத்தின் அடிப்படை சேவை இலவசமானது. ஆனால் கட்டண வசதியும் இருக்கிறது. மின்னஞ்சல் மூலம் சுருக்கங்களை பெறலாம். ஐபோன் மற்றும் ஆண்ட்ராய்டு போன்களில் செயலி வடிவிலும் இந்த சேவையை அணுகலாம். புத்தகத்தின் முக்கிய அம்சங்களை விளக்கும் வகையில் சுருக்கம் அமைந்துள்ளது குறிப்பிடத்தக்கது.

பல்வேறு தலைப்புகளின் கீழ் புத்தக சுருக்கத்தை தேர்வு செய்து கொள்ளலாம். ஒலிப்புத்தக வடிவில் கேட்கும் வசதியும் இருக்கிறது.

ஆக்‌ஷனபில் புகஸ் (http://www.actionablebooks.com/en-ca/ ) தளமும் இதே ரகம் தான் என்றாலும், இது முழுக்க முழுக்க வர்த்தக வழிகாட்டுதல் வகை புத்தகங்களுக்கானது. வர்த்தக உலகின் வெற்றிக்கு வழிகாட்டக்கூடிய எண்ணற்ற புத்தகங்கள் இருக்கின்றன அல்லவா? நிறுவன சி.இ.ஓக்கள் கூட இவற்றை விழுந்து விழுந்து படிப்பதுண்டு. இத்தகைய வர்த்தக ஆலோசனை புத்தகங்களை தேர்வு செய்து அவற்றின் முக்கிய கோட்பாடுகளை சுருக்கமாக இந்த தளம் வழங்குகிறது. இந்த சுருக்கங்களை வாசித்து அவற்றின் ஆலோசனையை செயல்படுத்தியும் பார்க்கலாம் என்பது தான் இந்த தளத்தின் சிறப்பம்சம். இதை தான் தளத்தின் பெயரும் குறிக்கிறது.

வர்த்தக உலகின் பிரபலமான புத்தகங்களை இந்த தளம் முலம் அறிமுகம் செய்து கொள்ளலாம்.

கெட்நக்கட் (http://www.getnugget.co/ ) இதே ரகம் தான் என்றாலும் கொஞ்சம் வித்தியாசமானது,. மிகச்சிறந்த புத்தகங்களை சுருக்கமாக அளிக்கும் இந்த தளம் அதை காட்சிரீதியாகவும் அளிக்கிறது. எனவே இந்த எளிதாக வாசிக்கலாம் என்பதோடு மற்றவர்களுடன் எளிதாக பகிர்ந்து கொள்ளவும் செய்யலாம். அதற்கேற்ப சாரம்சத்தின் சுருக்கம், அதில் உள்ள மேற்கோள்கள் என சுருக்கம் அமைகிறது. ஸ்மார்ட்போன் வைத்திருப்பவர்கள் சில நிமிடங்களில் இந்த சுருக்கங்களை வாசத்துவிடலாம். பின்னர் இவற்றை தங்கள் நட்பு வட்டத்தில் பகிர்ந்து கொள்ளவும் செய்யலாம். பத்தாயிரம் புத்தகங்களுக்கு மேல் சுருக்க வடிவில அணுகலாம்.

விக்கிபீடியாவின் துணை தளமான விக்கிசம்மரீஸ் மூலமும் இதே வசதியை பெறலாம்.- http://www.wikisummaries.org/wiki/Main_Page. விக்கிபீடியா போலவே இதுவும் இணைய பயனாளிகளின் பங்களிப்பால் உருவான சேவை. எனவே நீங்கள் வாசிப்பதோடு விரும்பினால் புத்தக சுருக்க சேவையிலும் பங்களிப்பு செலுத்தலாம்.

இவை எல்லாம் சர்வதேச தளங்கள் என்றால், இந்தியர்களுக்கான பிரத்யேக சேவைகளும் இல்லாமல் இல்லை. அம்ருத் தேஷ்முக் எனும் இளைஞர் உருவாக்கியுள்ள புக்லெட் (Booklet  ) செயலி இதில் ஒன்று. இந்த தளம் புகழ்பெற்ற புனை கதை அல்லாத நூல்களை சுருக்கமாக படித்து புரிந்து கொள்ள வழி செய்கிறது.

தனது நண்பர்களில் பலர் வாசிப்பு ஆர்வம் கொண்டிருந்தும் கூட, புத்தகங்களை படிக்க முடியாமல் தவிப்பதை பார்த்து அவர்களைப்போன்றவர்களுக்கு உதவும் வகையில் இந்த சேவையை துவக்கியதாக தேஷ்முக் பேட்டி ஒன்றில் கூறியுள்ளார். ஒரு முறை திரையரங்கிற்கு சென்றிருந்த போது நண்பர்களிடம் தான் வாசித்து ரசித்த புத்தகம் பற்றி விவரித்துக்கொண்டிருந்த போது, அவர்களில் பலரும் ஈர்க்கப்பட்டதை அறிந்த போது, இப்படி விவரிக்கும் ஆற்றலை மற்றவர்கள் புத்தக வாசிப்புக்கு தூண்டுகோளாக இருக்கும் வகையில் பயன்படுத்த தீர்மானித்ததாக அவர் கூறியுள்ளார்.

இந்தியர்களுக்கு ஆர்வம் அளிக்க கூடிய புத்தகங்களை புக்லெட் சேவை மூலம் அறிமுகம் செய்து கொள்ளலாம். இந்த தளத்தில் ஒலிபுத்தக வடிவில் கேட்கும் வசதியும் இருக்கிறது. வாரம் ஒரு புத்தகம் எனும் விதத்தில் எளிமையாக படிக்க கூடிய ஆங்கிலத்தில் புத்தகங்களை இவர் அறிமுகம் செய்து வருகிறார்.

இதே போலவே புக்பிஹுக் (http://bookbhook.com/ ) தளமும் புத்தக சுருக்க சேவையை வழங்கு வருகிறது. தேர்ந்தெடுத்த புத்தகங்களின் சுருக்கமான அறிமுகங்களை இதில் காணலாம். இந்தியா சார்ந்த புத்தகங்கள் அதிகம் உள்ளன. கவுதம் குப்தா என்பவர் இந்த சேவையை வழங்கு வருகிறார். வர்த்தக நிறுவனத்தில் உயர் பதவியில் இருந்த கவுதம், வாசிப்பில் எப்போதுமே தனக்கு ஆர்வம் இருந்தது என்கிறார். ஆனால் தனது குழுவில் இருந்த இளைஞர்கள் பலருக்கு வாசிப்பு பழ்ககம் இல்லாமல் இருப்பதை கவனித்தவர், அவர்களைப்போல புத்தகங்களை வாசிக்கும் பொறுமை இல்லாதவர்களுக்காக புத்தகங்களை சுருக்கி த்தரும் வசதியை அளித்து வருகிறார்.

இந்த தளங்கள் வாசிப்பு சுமை கொண்டவர்களுக்கு நிச்சயம் உதவும். அதே நேரத்தில் புத்தக புழுக்களும் கூட, அடுத்து வாசிக்க கூடிய புத்தகங்களுக்கான பரிந்துரையாக இவற்றை பயன்படுத்திக்கொள்ளலாம்.

இக்கால தலைமுறை மத்தியில் வாசிப்பு ஆர்வத்தை ஏற்படுத்துவதை நோக்கமாக கொண்டு இந்த தளங்கள் செயல்பட்டு வருகின்றன.

 


 

வணிகமணி இதழில்  இனி எல்லாம் இணையமே தொடரில் எழுதியது.

 

 

ஒரு இணைய கையேடு மூடப்படுகிறது, கொஞ்சம் வருந்தலாமே பிளிஸ்!

C6ifJ90VwAAatO4டி.எம்.ஒ.இசட் தளம் முடப்பட்டிருக்கிறது. தனிப்பட்ட முறையில் இது எனக்கு வருத்தம் தரும் செய்தி என்றாலும், அதைவிட முக்கியமானது, இணையத்தின் மகத்தான ஒரு சகாப்தம் முடிவுக்கு வந்திருக்கிறது என்பது தான். அது மட்டுமா, இணைய தேடலின் ஒரு முக்கிய அத்தியாயம் முடிவுக்கு வந்திருக்கிறது. மறக்கப்பட்ட அத்தியாம் என்று வைத்துக்கொள்ளுங்களேன். அதனால் தான் இந்த செய்தி இன்னும் வேதனை தருகிறது.
டி.எம்.ஒ.இசட் தளமா அது என்ன? என்ற சந்தேகம் உங்களுக்கு இருந்தால், இந்த தளம் பற்றி ஒரு சுருக்கமான அறிமுகம். இணையத்தின் ஆதிகால கையேடு இது. அதாவது இணையதளங்களை பட்டியலிட்டு பரிந்துரைத்த தளம். யாஹு கையேட்டை போல என்று வைத்துக்கொள்ளுங்களேன்.
யாஹூ கையேடா? அது என்ன என்றும் கேட்கலாம். என்ன செய்ய? கூகுள் அலையில் காணாமல் போன சேவையில் யாஹூ கையேடும் ஒன்று! இருந்தாலும் என்ன யாஹு கையேடு தான் இரு காலத்தில் இணையவாசிகளுக்கு புதிய பயனுள்ள இணையதளங்களை அடையாளம் காட்டும் சேவையாக இருந்தது. இணையத்தின் கலங்கரை விளக்கம் என்றும் சொல்லலாம். அதாவது கவனமாக தேர்ந்தெடுக்கப்பட்ட சிறந்த இணையதளங்கள், அவற்றின் தன்மைக்கேற்ப பலவித தலைப்புகளில் பட்டியலிடப்பட்டிருக்கும். புதிய தளங்களை நாடுபவர்கள் இந்த பட்டியலில் தங்களுக்கு தேவையான பிரிவில் விரும்பிய தலைப்பை கிளிக் செய்து, புதிய தளங்களை தெரிந்து கொள்ளலாம். இதுவும் ஒரு தேடியந்திரம் தான்!
இணையத்தின் துவக்கத்தில் இதுவே இணையதளங்களை கண்டறிவதற்கான வழியாக இருந்தது. லைகோஸ், அல்டாவிஸ்டா போன்ற தேடியந்திரங்களுக்கு மத்தியிலும் இது பிரபலமாக இருந்தது. எனினும், தேடியந்திரமாக கூகுள் எழுச்சி பெற்று இணையத்தில் எதையும் தேடுவதை சுலபமாக்கிய பிறகு, யாஹூ கையேடு செல்வாக்கை இழந்து பின்னர் மூடப்பட்டது.
யாஹூ கையேடு மூடப்பட்டாலும், அதே போன்ற இணைய கையேடான , ஓபன் டைரக்டரி எனப்படும் டி.எம்.ஓ.இசட் தளம் தொடர்ந்து செயல்பட்டுக்கொண்டிருந்தது. சிறந்த இணையதளங்களை அறிந்து கொள்ள உதவும் இந்த தளம், தன்னார்வலர்களின் பங்களிப்புடன் இணைய கூட்டு முயற்சியாக பளிச்சிட்டுக்கொண்டிருந்தது. இடையே இந்த தளத்தின் வடிவமைப்பும் புதுப்பிக்கப்பட்டு சிறந்த தோற்றத்தை பெற்றிருந்தது.
இந்நிலையில் தான், இந்த சேவை மார்ச் 14 க்கு பிறகு செயல்படாது என கடந்த மாதம் ஏ.ஓல்.எல் நிறுவனம் அறிவித்தது. ஏ.ஓ.எல் தான் ஓபன் டைரக்டரி தளத்தின் உரிமையாளர்.
தேடியந்திர முடிவுகளை பட்டியலிடுவது உட்பட பலவற்றில் மென்பொருள்கள் இயக்கும் அல்கோரிதம் ஆதிக்கம் செலுத்தும் இணைய உலகில், கைகுத்தல் அரசி போல, மனிதர்கள் பார்த்து கவனமாக தேர்வு செய்த இணையதளங்களின் தொகுப்பாக ஓபன் டைரக்டரி இருந்தது என்பது அதன் தனிச்சிறப்பு. தன்னார்வர்லர்கள் பார்த்து பார்த்து தொகுத்து வழிகாட்டிய அந்த சேவை மூடுவிழா கண்டிருக்கிறது என்பது வருத்தமாக உள்ளது. ஒருவிதத்தில் இணையத்தில் இனி மனிதர்கள் தேர்வுக்கு மதிப்பில்லையோ எனும் கேள்வியையும் எழுப்புகிறது.
கூகுள் ஆதிக்கத்தால் மற்ற மாற்று தேடியந்திரங்களே கவனிப்பாரற்று கிடக்கும் போது, ஓபன் டைரக்டரி சேவை ஈர்ப்பில்லாமல் போனதில் வியப்பென்ன என நினைக்கலாம். இன்னொரு கோணத்தில் பார்த்தால், இணைய கையேடு எனும் கருத்தாக்கத்தின் தேவை முடிந்துவிட்டதே என்றும் கூறலாம்.
இந்த சேவை மூடப்படுவது பற்றிய இரங்கற்பா செய்திகளில் கூட, எப்படியும் ஓபன் டைரக்டரி சேவையை இப்போது யாரும் கண்டுகொள்வதில்லை, மேலும் அது அடிக்கடி சரியாக அப்டேட் செய்யப்படுவதும் இல்லை என்று தெரிவிக்கப்பட்டுள்ளது.
இந்த பாராமுகத்தை மீறி, ஓபன் டைரக்டரி சேவை முக்கியமானது என்பதை, அது தொடர்பான குறும்பதிவுகள் உணர்த்துகின்றன. (#DMOZ ) . அது மட்டும் அல்ல, இந்த சேவை மூடப்பட்டது ஏ.ஓ.எல் நிறுவனத்தின் தனிப்பட்ட முடிவு என்றும், இந்த திடீர் முடிவு அதன் தன்னார்வலர்கள் சமூகத்தை அதிர்ச்சியில் ஆழ்த்தியுள்ளது என்றும் மதர்போர்ட் செய்தி தளம் தெரிவிக்கிறது. இது பற்றி ஏ.ஓ.எல் விரிவான விளக்கம் அளிக்கவில்லை என்றும் கூறப்பட்டுள்ளது.
ஏ.ஓ.எல் மூடிவிட்டாலும் தன்னார்வலர்கள் ஒன்று கூடி ஏதேனும் ஒரு வகையில் இதை காப்பாற்றலாம் என எதிர்பார்க்க தோன்றுகிறது.
நிற்க அதே செய்தியில், இந்த தளத்தின் முக்கியத்துவம் பற்றிய ஒரு குறிப்பும் வருகிறது. தன்னார்வலர்கள் கூட்டு முயற்சியால் செயல்படும் இந்த தளம், கட்டற்ற களஞ்சியமான விக்கிபீடியாவுக்கு முன்னோடியும் கூட. இந்த சேவை தங்களுக்கு ஊக்கம் அளித்ததாக விக்கிபீடியா இணை நிறுவனர் லாரி சாங்கர் ஒரு முறை கூறியுள்ளார்.
ஏ.ஒ.எல் நிறுவனம் விலைக்கு வாங்கி இருந்தாலும், இதன் தன்னார்வலர்கள் தங்களுக்குள் சமூக ஒப்பந்தம் செய்து கொண்டே செயல்பட்டு வந்தனர்..
ஆக, விக்கிபிடியாவுக்கு முன்னுதாரணமாக இருந்த இந்த சேவை ஏதேனும் ஒரு வகையில் மறு அவதாரம் எடுக்கட்டும்.
இணையத்தில் எப்போதும் கூட்டு முயற்சியின் கை ஓங்கியிருக்க வேண்டும்.

குறிப்பு1; டி,எம்.ஓ.இசட் சேவை பற்றி தமிழ் இந்து இணைய பதிப்பில் எழுதிய ஆவலை விசுவோம் தொடரில் விரிவாக எழுதியுள்ளேன்.- http://bit.ly/2d8rMHm