Category Archives: இமெயில்

சில்லென்று ஒரு இமெயில் அனுப்புவது எப்படி?

coldmailஇமெயில் உலகில் ஸ்பேம் மெயில்கள் மிகவும் பிரசித்தமானது. அழையா விருந்தாளிகளாக இன்பாக்சை வந்தடையும் இந்த வகை வீணான விளம்பர மெயில்களை இமெயில் முகவரி பெட்டியில் நீங்கள் பலமுறை எதிர்கொண்டிருக்கலாம். சில நேரங்களில் இத்தையை குப்பை மெயில்கள் கோபத்தின் உச்சிக்கே கூட கொண்டு செல்லலாம்.

ஸ்பேம் மெயில்கள் போலவே இன்னொரு வகையான மெயில்கள் இருக்கின்றன தெரியுமா? இந்த வகை மெயில்களையும், அவற்றை அனுப்பி வைக்கும் நுணுக்கங்களையும் அறிந்து வைத்திருப்பது, வேலை வாய்ப்பு தேடல் முதல் வலைப்பின்னலுக்கான வலை வீச்சு வரை பலவிதங்களில் உதவியாக இருக்கும்.

அதென்ன இமெயில் வகை என்று கேட்கிறீர்களா?  கோல்ட் இமெயில்கள் தான் அவை. தமிழில் குளிர் இமெயில் என பொருள் கொள்ள முடியாது. இதமில்லா இமெயில் என வேண்டுமானாலும் வைத்துக்கொள்ளலாம்.  இப்படி ஒரு இமெயிலை ஏன் அனுப்ப வேண்டும்? அதனால் என்ன பலன்?

இதமில்லா இமெயில்களை அனுப்பி வைப்பதற்கான அவசியம் இருக்கிறது. சரியான முறையில் அனுப்பி வைத்தால் இவற்றுக்கு நல்ல பலனும் கிடைக்கும்!

பொதுவாக தெரிந்தவர்களுக்கும், நண்பர்களுக்கும் தான் இமெயில் அனுப்புவது வழக்கம். அல்லது அலுவல் நோக்கில் வந்துள்ள மெயில்களுக்கு பதில் அனுப்பி வைப்போம். இவ்வாறு இல்லாமல் முன்பின் அறிமுகம் இல்லாத ஒருவருக்கு அவர் நம்மிடம் இருந்து மெயில் வரக்கூடும் என்று எதிர்பார்க்காத நிலையில், இமெயில் அனுப்பி வைப்பதை தான் ஆங்கிலத்தில் கோல்ட் இமெயில் என்கின்றனர். அறிமுகம் இல்லாத ஒருவரை தொலைபேசியில் அழைத்து பேசுவது கோல்ட் கால் என சொல்லப்படுவதை போல, அனுமதி இல்லாமல் அனுப்பபடும் மெயில்கள் கோல்ட் மெயில் என சொல்லப்படுகின்றன.

எதிர்பார்ப்பு இல்லாத போது நிகழும் அறிமுகம் ஊடுருவல் என்பதால் இதமானவை அல்ல என்பதை உணர்த்த கோல்ட் என குறிப்பிடப்படுகிறது.

அனுமதி இல்லாமல் அனுப்பி வைக்கப்பட்டாலும், இந்த வகை இமெயில்கள் அழையா விருந்தாளிகளாக கருதப்படும் ஸ்பேம் மெயில்களில் இருந்து வேறுபட்டவை. ஏனெனில் இவை விளம்பர நோக்கில் அனுப்பி வைக்கப்படுபவை அல்ல. அதைவிட முக்கியமாக, ஆயிரக்கணக்கானோருக்கு அனுப்பி வைப்போம், யாராவது ஒரு சிலர் பார்த்தாலும் லாபமே என்ற மலிவான மார்கெட்டிங் உத்தி போல இல்லாமல், இவை குறிப்பிட்ட ஒருவருக்கு மட்டுமே அனுப்பி வைக்கப்படுபவை என்பதோடு, அவரிடம் இருந்து பதிலை முக்கியமாக எதிர்பார்ப்பவை. எனவே, தேவையான நேரங்களில் இந்த உத்தியை தாராளமாக பயன்படுத்தலாம்.

உதாரணமாக, ஒரு நிறுவனத்தில் வேலைவாய்ப்புக்கான நுழைவு தேவை எனில் அங்குள்ள உயர் அதிகாரி ஒருவருக்கு இமெயில் அனுப்பி வைக்கலாம். புதிய முயற்சிக்கான ஆதரவு தேவை எனில், முன்பின் தெரியாத பெரிய மனிதரிடம் இமெயிலில் உதவி கோரலாம். இயக்குராகும் கனவில் இருப்பவர்கள் பிரபல தயாரிப்பாளருக்கு குறும்பட இணைப்புடன் வாய்ப்பு கேட்கும் இமெயில் அனுப்பலாம். இப்படி எண்ணற்ற தருணங்களில் குறிப்பிட்ட நோக்கத்திற்காக அறிமுகம் இல்லாதவர்களுக்கு அனுமதி இல்லாமலே இமெயில் அனுப்பி வைக்கலாம்.

இது இமெயில் உலகில் ஏற்றுக்கொள்ளப்பட்ட உத்தியாகவே இருக்கிறது. கூகுளில் கோல்ட் இமெயில் எனும் பதத்தை தேடிப்பார்த்தால், சிறிந்த முறையில் கோல்ட் மெயில் அனுப்புவதி எப்படி என வழிகாட்டும் கட்டுரைகள் அணிவகுத்தி நிற்பதை பார்க்கலாம். எனவே இது இமெயில் கலையில் அவசியம் கற்றுக்கொள்ள வேண்டிய கலை.

இந்த நுணுக்கங்களை விளக்கும் பல்வேறு கட்டுரைகளில் பொதுவாக காணப்படும் முக்கிய அம்சங்களை பார்க்கலாம்:

தலைப்பு முக்கியம்: நீங்கள் யார் என்பது தெரியாததால் உங்கள் மெயிலை பார்த்ததுமே அதை அலட்சியம் செய்ய அல்லது டெலிட் செய்யத்தோன்றலாம். அதற்குள் நீங்கள் கவனத்தை ஈர்த்தாக வேண்டும். இமெயிலுக்கான தலைப்பு மூலம் அதை செய்ய வேண்டும். மெயிலின் நோக்கம், உள்ளடக்கம் ஆகியவற்றை தலைப்பு கச்சிதமாக தெரிவிக்க வேண்டும். கொஞ்சம் கவனத்தை ஈர்க்கும் வகையில் இருந்தாலும் நல்லது. ஆனால் மிகை வார்த்தைகளோ, அலங்காரமோ தேவையில்லை. இத்தகைய தலைப்புக்கு கொஞ்சம் யோசிக்க வேண்டும்.

நீங்கள் யார்? தலைப்பு மூலம் கவனத்தை ஈர்த்த சில நொடிகளில் நீங்கள் யார் என்பதை தெரிவித்து விட வேண்டும். அதற்கான அறிமுகம் இமெயிலில் இருக்க வேண்டும். மெயில் பெறுபவருக்கு நீங்கள் அறிமுகம் இல்லாத நபர் என்பதால் இது மிகவும் முக்கியம். அதோடு உங்களைப்பற்றிய அறிமுகம் ஒரு நம்பகத்தன்மையை கொடுக்கும். இதை செய்ய சிறந்த வழி, இருவருக்கும் பொதுவாக அறிமுகமான ஒருவரை சுட்டிக்காட்டலாம். அப்படி யாரும் இல்லாவிட்டால், மெயில் அனுப்பும் நபர் பற்றி நன்றாக ஆய்வு செய்து அடிப்படை தகவல்களை தெரிந்து கொண்டு அவருக்கு ஏற்ற வகையில் தகவல்களை தெரிவிக்க வேண்டும்.

சிக்கனம் முக்கியம்: இனி உங்களுக்கு என்ன தேவை என்பதை தெரிவிக்க வேண்டும். சுற்றி வளைக்காமல் நேரடியாக விஷயத்திற்கு வர வேண்டும். இரண்டு, மூன்று பத்திகளில் விஷயத்தை முடித்துக்கொள்ள வேண்டும். ஏனெனில் அதற்கு மேல் நீளும் மெயில்கள் அநேகமாக படிக்கப்படும் வாய்ப்பில்லை. தவிர அவரது நேரத்தை அதிகம் எடுத்துக்கொள்வதும் முறையல்ல.

நெத்தியடி கோரிக்கை; சுருக்கமான வார்த்தைகளில் நீங்கள் எதிர்பார்ப்பது என்ன என்பதை தெரிவிக்க வேண்டும். இந்த கோரிக்கை எளிமையானதாக, மறுக்கப்பட முடியாததாக இருந்தால் இன்னும் சிறப்பு. உதாரணத்திற்கு உங்கள் நிறுவனத்தில் வேலை கிடைக்குமா என கேட்பதைவிட, உங்கள் நிறுவன கலாச்சாரம் பற்றி அறிய பத்து நிமிடம் உங்களை சந்தித்து பேச இயலுமா என கேட்கலாம்.

கொஞ்சம் புகழுங்கள்: கேட்டத்து கிடைக்கும் என்றால் நீங்கள் ஏதாவது கொடுக்கத்தயாராக இருக்க வேண்டும். அப்படி ஏதேனும் உங்களிடம் இருக்கிறதா என பார்த்து அதை குறிப்பிடவும். உதாரணத்திற்கு பிரபல இயக்குனர் எனில், இணைய விஷமிகள் பற்றி புலம்பியிருந்தால், அதில் இருந்து தற்காத்துக்கொள்ளும் இணையவழிகளை குறிப்பிடலாம். இப்படி எதுவும் இல்லாவிட்டாலும் பரவாயில்லை, அவரைப்பற்றி புகழ்ச்சியாக நான்கு வார்த்தைகள் கூறுங்கள். ஆனால் இவை வெறும் புகழ்ச்சியாக இல்லாமல், இயல்பானதாக, அவரைப்பற்றிய சரியான புரிதல் அடிப்படையில் இருக்க வேண்டும்.

தனிப்பட்ட தன்மை: நீங்கள் தொடர்பு கொள்ளும் நபரை பற்றி இயன்ற அளவு ஆய்வு செய்து அவருக்கு ஏற்ற வகையில் தனிப்பட்ட முறையில் உங்கள் கோரிக்கையை வைக்கவும்.

எப்போதேனும் தேவை ஏற்பட்டால் இப்படி ஒரு மெயிலை அனுப்பி பாருங்கள். ஒரு சிறு குறிப்பு; இணையத்தில் தேடினால், சிறந்த கோல்ட் இமெயில்களை அனுப்புவதற்கான குறிப்புகள் மட்டும் அல்ல, இதற்கான இமெயில் வடிவங்களே கூட கொட்டிக்கிடக்கின்றன. ஆனால் ஒரு போதும் அவற்றை பயன்படுத்த முயற்சிக்க வேண்டாம். ஏனெனில் இந்த வகை மெயிலின் பலமே, பெறுபவருக்கு ஏற்ற வகையில் அதை நீங்கள் தனிப்பட்ட தன்மையோடு அனுப்புவதில் தான் இருக்கிறது.

இன்னொரு குறிப்பு, இப்படி ஆயிரம் மெயில்களை அனுப்பி வைத்து அதனடிப்படையில் ஆயுவு செய்து ஸ்மார்ட் கட்ஸ் எனும் புத்தகத்தை ஷேன் ஸ்னோ எனும் பத்திரிகையாளர் எழுதியிருக்கிறார்;. goo.gl/LQ5Gz8

உதவக்கூடிய கட்டுரை: goo.gl/LcY3pF

 

நன்றி; தமிழ் இந்து இளமை புதுமையில் எழுதியது.

திரைப்படத்தில் பார்த்த பர்னீச்சர்கள்!

furnitureதளம் புதிது; திரைப்படத்தில் பார்த்த பர்னீச்சர்கள்!

திரைப்படங்களை பார்க்கும் போது கதை, திரைக்கதை, வசனம்,காமிரா கோணம் இத்யாதிகளை மட்டும் நாம் ரசிப்பதில்லை. நட்சத்திரங்களின் பேஷன் மற்றும் படப்பிடிப்பு அரங்கில் பயன்படுத்தப்பட்ட மேஜை,நாற்காலி உள்ளிட்ட பர்னீச்சர்களையும் ரசிக்காமல் இருப்பதில்லை. நம்மில் பலர் ஒரு படி மேலேச்சென்று படத்தில் பார்த்த பர்னீச்சர் பிடித்திருந்தால் அதையே தேடிப்பிடித்து வாங்குவதும் உண்டு.
ஆனால் இது அத்தனை எளிதல்ல: குறிப்பிட்ட காட்சியில் இடம்பெற்ற பர்னீச்சரை அடையாளம் கண்டு அதை எங்கே வாங்க முடியும் என தெரிந்து கொள்ள முயலும் போது பல நேரங்களில் கூகுளே கூட கைவிரிக்கலாம்.
ஆனால் கவலையே வேண்டாம், இப்படி திரைப்படங்களில் பார்த்த பர்னீச்சர்களை கண்டு கொள்வதற்காக என்றே அருமையான இணையதளம் ஒன்று இருக்கிறது. சீன் ஆன் செட் (https://www.seenonset.com/ ) எனும் அந்த தளத்தில் ஹாலிவுட் படங்களில் உள் அலங்காரத்திற்காக பயன்படுத்தப்பட்ட பர்னீச்சர்களை எளிதாக அடையாளம் காணலாம்.
பர்னீச்சர்கள் மட்டும் அல்ல, ஒளி விளக்குகள் போன்றவற்றையும் அடையாளம் காணலாம். அதே போல டிவி நிகழ்ச்சிகளில் இடம்பெற்றவற்றையும் இதில் தேடலாம்.
பரினீச்சர்கள் அல்லது படங்களை குறிப்பிட்டு தேடும் வசதி இருப்பதோடு, ஒவ்வொரு நாளும் குறிப்பிட்ட திரைப்பட பர்னீச்சர் முகப்பு பக்கத்தில் முன்னிறுத்தப்படுகிறது.

செயலி புதிது; கல்லூரித்தகவல்கள்

பள்ளி படிப்பை முடித்ததும் வெளிநாடுகளில் உயர் கல்வி பெற விரும்புகிறவர்கள் அங்குள்ள கல்லூரிகள் மற்றும் பல்கலைக்கழகங்கள் பற்றிய விவரங்களை சரியாக தெரிந்து கொள்ள விரும்பலாம். இதற்காக இணையத்தில் தேடிப்பார்த்து தனித்தனியே தகவல்களை தேர்வு செய்வது ஒரு வழி. மாறாக ஒரே இடத்தில் தகவல்களை பெற விரும்பினால் ஸ்கூல்டு செயலி அதற்கு உதவியாக இருக்கும். ஆண்ட்ராய்டு மற்றும் ஐபோனில் செயல்படும் இந்த செயலி, அமெரிக்காவில் உள்ள முன்னணி கல்லூரிகள் மற்றும் பல்கலைகழகங்கள் தொடர்பான தகவல்களை அளிக்கிறது. அனுமதி வாய்ப்பு குறித்த விவரங்களையும் அறியலாம். கல்லூரிகளில் வழங்கப்படும் பாட திட்டங்கள் பற்றிய தகவல்களோடு .கல்லூரி படிப்பை முடித்தால் கிடைக்க கூடிய ஊதியம் உள்ளிட்ட தகவல்களையும் பெறலாம்.

மேலும் விவரங்களுக்கு: http://www.schoold.co/


வீடியோ புதிது; செல்வந்தர் காட்டும் வழி

செல்வந்தராக வேண்டும் என்ற விருப்பம் உங்களுக்கு இருக்கிறதா? அதற்கான வழிகளை ஆர்வத்துடன் தேடிக்கொண்டிருக்கிறீர்களா? எனில் டேனியல் அல்லேயின் வீடியோ உங்களுக்கு வழிகாட்டும். அமெரிக்க இளம் லட்சாதிபதிகளில் ஒருவரான டேனியல் அல்லே தன்னிடம் குவிந்திருக்கும் செல்வத்தை சுயமாக சம்பாதித்தவர். அந்த அனுபவம் தந்த நம்பிக்கையில் தான் செல்வ குறிப்புகளை பகிர்ந்து கொண்டு வருகிறார்.
இவர் உருவாக்கியுள்ள ஒரு வீடியோவில் செல்வந்தாரவாதை தவிருக்கும் ஐந்து பதங்கள் பற்றி எச்சரிக்கிறார். ” இதன் விலை மிகவும் அதிகம், ‘ மழை காலத்திற்காக சேமிக்கிறேன்,’ என் வாழ்க்கைத்துணை நிதி விஷயங்கள பார்த்துக்கொள்கிறார்”, ‘பணம் மகிழ்ச்சியை வாங்கித்தராது’ மற்றும் பணம் தீயது ஆகிய ஐந்து பதங்களை தவிர்க்க வேண்டும் என்கிறார். இந்த பதங்கள் தான் உங்களின் செல்வம் சேர்க்கும் ஆற்றலை சுருக்குகின்றன என்றும் சொல்கிறார். இது பற்றிய விரிவான விளக்கத்தை வீடியோவில் பார்க்காலம்.

வீடியோவை காண: https://www.youtube.com/watch?v=6W6iokBfH-E

இமெயில் குறிப்புகள்

அலுவல்நோக்கிலும் சரி, தனிப்பட்ட முறையிலும் சரி நீங்கள் இமெயிலை அடிக்கடி பயன்படுத்தி வரலாம். இமெயில் அனுப்புவதில் உங்களுக்கென தனி பாணியும் இருக்கலாம். ஆனால் நீங்கள் அனுப்பும் இமெயில் சிறந்ததாக இருக்க வேண்டும் என்ற அக்கரையும் ஆர்வமும் உங்களுக்கு இருந்தால் அவுட்சோர்ஸ்-பிலிப்பைன்ஸ்.காம் தளம் உருவாக்கியுள்ள இமெயில் பயன்பாடு குறிப்புகள் தொடர்பான வரைபட சித்திரம் உதவியாக இருக்கும்.
இந்த வரைபட சித்திரம் ஒருவர் அனுப்பும் இமெயில்கள் அதை பெறுபவருக்கு நெருடலை ஏற்படுத்தாத வகையில் அமைவதற்கான வழிகளை பட்டியலிடுகிறது.
இந்த வழிகளை இமெயிலில் தவிர்க்க வேண்டிய பத்து வார்த்தைகள் எனும் தலைப்பில் அவற்றுக்கான விளக்கத்துடன் பட்டியலிட்டுள்ளது.
முக்கியமானது என்ற வார்த்தையை பயன்படுத்த வேண்டாம். மெயிலை பெறுபவருக்கு மெயில்கள் முக்கியமானவை எனத்தெரியும். – தேங்க்ஸ் என்று சுருக்கமாக குறிப்பிட வேண்டாம். எப்போதும் தேங்க் யூ என்றே பயன்படுத்துங்கள்- இல்லை என்று வார்த்தையை பயன்படுத்தாமல் அந்த பொருள் வரும் வித்த்தில் கருத்துக்களை தெரிவுக்கவும்- மன்னிப்பு கேட்காதீர்கள். மன்னிப்பு கேட்க வேண்டும் என்றால் அதை நேரில் கேளுங்கள் ,மெயிலில் அல்ல . இப்படி விரிகின்றன விளங்கங்கள்.

இமெயில் குறிப்புகளை மேலும் அறிய: http://www.outsource-philippines.com/these-10-words-make-you-sound-rude-in-emails-infographic/

இமெயிலை மேம்படுத்திக்கொள்ள ஐந்து வழிகள்!

best-email-tricks-you-arent-using-canned-emailsபேஸ்புக், வாட்ஸ் அப், டிவிட்டர் என வந்துவிட்டாலும், இமெயிலின் முக்கியத்துவம் இன்னமும் குறைந்துவிடவில்லை. தனிப்பட்ட பயன்பாட்டிற்கும், அலுவலக தொடர்புக்கும் பெரும்பாலானோர் இமெயிலை பயன்படுத்துவது தவிர்க்க இயலாததாக இருக்கிறது. பலர் இமெயிலிலேயே மணிக்கணக்கில் நேரத்தை செலவிடும் நிலையும் இருக்கிறது. ஆனால், நல்ல வேளையாக இமெயில்களை சிறந்த முறையில் நிர்வகிக்க உதவும் சேவைகளும் அநேகம் இருக்கின்றன. அந்த வகையில், இமெயில் பயன்பாட்டை மேம்படுத்திக்கொள்ள உதவும் அருமையான சேவைகள் சில:

* உடனடி மெயில் வாசகங்கள்

இமெயிலில் அதிக நேரம் செலவிடுபவர்கள் ’கேன்ட் இமெயில்ஸ்’ (http://www.cannedemails.com/# ) இணையதளத்தை குறித்து வைத்துக்கொள்ள வேண்டும். இதன் மூலம் இமெயிலுக்காக தேவையில்லாமல் அதிக நேரம் செலவிடுவதை தவிர்க்கலாம். எப்படி என்றால், எப்போதெல்லாம் வழக்கமான பதில்களை இமெயிலில் அனுப்ப நேருகிறதோ அப்போது இந்த தளத்தை பயன்படுத்திக்கொள்ளலாம். அதாவது, இதில் உள்ள வாசகங்களை அப்படியே நகலெடுத்து பயன்படுத்திக்கொள்ளலாம்.
இமெயில்களை அனுப்பும் போது மெயிலின் உள்ளடக்கம் சரியாக இருக்க வேண்டும். அதை வெளிப்படுத்தும் வகையில் வார்த்தைகள் கச்சிதமாக அமைந்திருக்க வேண்டும். எனவே இதற்காக நேரம் ஒதுக்கி தனி கவனம் செலுத்தியாக வேண்டும். ஆனால் எல்லா நேரங்களிலும் இப்படி செய்ய வேண்டும் என்றில்லை. சில நேரங்களில் மிகவும் சம்பிரதாயமான பதிலை அனுப்பினால் போதும். இன்னும் சில நேரங்களில் வழக்கமான வாசகங்களை டைப் செய்தால் போதும். இதற்கு பல உதாரணங்களை சொல்லலாம். இது போன்ற நேரங்களில் ஒரே விதமான மெயிலை மீண்டும் டைப் செய்வது நேரத்தை வீணாக்கும் என்பதோடு, அலுப்பாகவும் அமையும்.
இந்த பிரச்சனைக்கான அழகான தீர்வாக தான் கேன்ட் மெயில் அமைகிறது. வழக்கமாக எதிர்கொள்ளக்கூடிய தருணங்களுக்கான மெயில் வாசகங்கள் இந்த தளத்தில் கொடுக்கப்பட்டுள்ளன. ஒரு பிரச்சனைக்காக மன்னிப்பு கோருவது, சேவையை ரத்து செய்து பணம் திரும்ப கோருவது, முந்தைய மெயிலுக்கு நினைவூட்டல் அனுப்புவது, மன்னிக்கவும், விருப்பமில்லை என சொல்வது என வரிசையாக பல தருணங்களான ரெடிமேட் மெயில் வாசகங்களை இந்த தளத்தில் பார்க்கலாம். எது தேவை என தேர்வு செய்து பயன்படுத்திக்கொள்ளலாம். அப்படியே பயன்படுத்திக்கொள்ளலாம், அல்லது ஒரு சில வார்த்தைகளை மட்டும் தேவைக்கேற்ப மாற்றிக்கொள்ளலாம். ஆங்கிலத்தில் அமைந்திருப்பது மட்டுமே ஒரே குறை!
best-email-tricks-you-arent-using-thisemailxyz
* இமெயில் வடிவங்கள்

கேன்ட் மெயில் தளம் போலவே, ’காண்டாக்ட்வலி டெம்பிளேட்ஸ்’ (http://templates.contactually.com/ ) பொருத்தமான இமெயில் உள்ளட்டக்கத்தை தேர்வு செய்வதற்கான தளம் என்றாலும் அதைவிட மேம்பட்ட சேவை இது. சூழ்நிலைக்கு ஏற்ற மெயில்களை இதில் நாமாக உருவாக்கி கொள்ளலாம். இதற்கென சிறிய விண்ணப்ப படிவம் முகப்பு பக்கத்தில் கொடுக்கப்பட்டுள்ளது. அதில், இமெயில் அனுப்புவது யாருக்கு, அதன் நோக்க என்ன எனும் கேள்விகளுக்கான பதில்களை தேர்வு செய்தால் போதும் அதற்கேற்ற பொருத்தமான மெயில் மாதிரியை உருவாக்கித்தருகிறது.

* இணையதளமாகும் இமெயில்

உங்கள் இமெயிலை ஒரு இணையதள பக்கமாக மாற்றிக்கொள்ள வழி செய்கிறது திஸ் இமெயில் இணையதளம். ( http://www.thisemail.xyz/). உங்களுக்கு வரும் இமெயில்களில் சிலவற்றை நண்பர்களுடன் பகிர்ந்து கொள்ளலாம் என்று தோன்றும் போது, இந்த சேவை கைகொடுக்கும். மெயிலை பகிர்ந்து கொள்ள எளிய வழி அதை அப்படியே பார்வேர்டு செய்வது தானே என நினைக்கலாம். ஆனால் இப்படி செய்வதன் மூலம் உங்கள் இமெயில் முகவரியை பகிர்ந்து கொள்ள வேண்டும். மேலும் பலருக்கு அனுப்ப விரும்பினால் சிக்கல் தான். இது போன்ற சூழ்நிலையில், நீங்கள் பகிர விரும்பும் மெயிலை இந்த தளத்திற்கு பார்வேர்டு செய்தால், அந்த மெயிலை ஒரு இணைய பக்கமாக மாற்றி, அதற்கென ஒரு இணைய முகவரியையும் உருவாக்கித்தருகிறது. இந்த இணைய முகவரியை மட்டும் நண்பர்களுடன் பகிர்ந்து கொண்டால் போதும். உறுப்பினராக பதிவு செய்து கொள்ளாமலேயே எளிதாக பயன்படுத்தக்கூடிய சேவை இது!


* இமெயில் பாதுகாப்பு!

பேஸ்புக், டிவிட்டர் உள்ளிட்ட சமூக வலைத்தள சேவைகளில் இமெயில் முகவரியை பகிர்ந்து கொள்ளும் தேவை ஏற்படும் போது நேரடியாக முகவரியை டைப் செய்யாமல் ஸ்கிரிம் ( http://scr.im/) தளம் வழியே அதை செய்வது நல்லது. ஏனெனில் இணையத்தில் பொது வெளியில் பகிரப்படும் இமெயில் முகவரிகளை அறுவடை செய்வதற்கு என்றே விளம்பர நிறுவனங்கள் பாட்களை உருவாக்கி வைத்திருக்கின்றன. சமூக ஊடகங்களில் மெயில் முகவரிகளை வெளியிடும் போது இந்த பாட்கள் அவற்றை ஸ்கேன் செய்து சேகரிக்கின்றன. இதனால் ஸ்பேம் மெயில் தொல்லை அதிகமாகலாம். இதில் இருந்து பாதுகாப்பு அளிக்கும் வகையில் ஸ்கிரிம், இமெயில் முகவரியை பாட்கள் ஸ்கேன் செய்ய முடியாத வகையில் பாதுகாப்பாக மாற்றித்தருகிறது.

* இமெயில் சுருக்கம்

பை.சென்டன்சஸ் ( http://five.sentenc.es/) தளம் இமெயில் பயன்பாட்டில் நேரடியாக உதவக்கூடிய சேவை இல்லை. ஆனால் இமெயில் பயன்பாட்டில் நினைவு கொள்ள வேண்டிய முக்கியமான அறிவுரையை இந்த தளம் வழங்குகிறது. இமெயிலுக்கு என அதிக நேரம் செலவிடுவதை தவிர்க்கும் வகையில், ஐந்து வரிகளில் எல்லா மெயில்களையும் முடித்துக்கொள்ள்வும் என்பது தான் அந்த ஆலோசனை.
இமெயிலை அனுப்பவும், பதில் அளிக்கவும் அதிக நேரம் செலவிட வேண்டியிருப்பது பிரச்சனை என குறிப்பிடும் இந்த தளம் இதற்கான தீர்வு, குறுஞ்செய்திகள் போல இமெயில் பதில்களுக்கும் ஒரு வரம்பு தேவை என வலியுறுத்துகிறது. இதற்காக, எல்லா மெயில்களுக்கும் ஐந்து வரிகள் அல்லது அதற்கு குறைவாக பதில் அளிக்க வேண்டும் எனும் கொள்கையை கடைபிடிக்கவும் என்றும் வலியுறுத்துகிறது.
இமெயில் பயன்பாடு பற்றி யோசிக்க வைக்க கூடிய சுவாரஸ்யமான இணையதளம்!.

நன்றி; தமிழ் இந்துவில் எழுதியது!

இமெயில் வாசிக்கப்பட்டதா என அறிவது எப்படி? சில வழிகள்! பல கேள்விகள்!

bananatag_01-100612056-large.idgeநான் அனுப்பிய இமெயில் திறக்கப்பட்டு, படிக்கப்பட்டதா என்பதை அறிவது எப்படி?
இமெயில் பயனாளிகள் பலருக்கும் கேட்கக்கூடிய கேள்வி தான் இது. இந்த கேள்விக்கான தேவையை எளிதாக புரிந்து கொள்ளலாம். மிகவும் முக்கியமான மெயிலை அனுப்பும் நிலையில் ஒருவர் அது வாசிக்கப்பட்டதா? என்பதை அறிந்து கொள்ள ஆர்வம் காட்டலாம். அந்த மெயிலுக்கான பதில் மிகவும் எதிர்பார்க்கப்படும் நிலையிலும் இவ்வாறு ஆர்வம் ஏற்படலாம். பொதுவாகவே, ஒருவர் படிக்கப்பட வேண்டும் என்பதற்காக தானே மெனக்கெட்டு மெயில் அனுப்புகிறார். எனவே அது வாசிக்கப்பட்டதா என்பதை தெரிந்து கொள்ளும் ஆர்வம் இயல்பானதே!

இமெயில் பயனாளிகளில் எத்தனை பேருக்கு இந்த கேள்வி எழுகிறது? எப்போது எழுகிறது என்பவை சுவாரஸ்யமான துணை கேள்விகள்!

இப்போது, இமெயில் வாசிக்கப்பட்டதா என்பதை அறியும் வழி இருக்கிறதா? எனும் ஆரம்ப கேள்விக்கான பதிலை பார்க்கலாம். இந்த கேள்விக்கான பதில் எளிமையானது மற்றும் சிக்கலானது. எளிமையான பதில், இமெயில் வாசிக்கப்பட்டதை அறிய வழி இருக்கிறது. ஆனால் அது உங்கள் இமெயில் சேவையில் இல்லை; தனியே நாடப்பட வேண்டும். அதாவது இந்த வசதியை அளிப்பதற்கு என்றே தனியே இணையதளங்கள் இருக்கின்றன.

இத்தகைய சேவைகளை பட்டியலிட்டு அவை செயல்படும் விதம் பற்றி விளக்குவதற்கு முன் அடிப்படையான சில விஷயங்களை தெரிந்து கொள்ள வேண்டும். ஏனெனில் இமெயில் வாசிக்கப்பட்டதா? என்பதை அறியும் வசதி இமெயில் கண்காணிப்பு என்றே குறிப்பிடப்படுகிறது. ஆங்கிலத்தில் இமெயில் டிராக்கிங் என்று சொல்லப்படுகிறது. கண்காணிப்பு என்றவுடன் ஒற்று அறிவது அல்லது உளவு பார்ப்பதுடன் ஒப்பிட முடியாது என்றாலும் கூட, இமெயில் வாசிக்கப்பட்டதா என்பதை அறிவதற்கான வழிகள் அனைத்தும் ஒருவிதத்தில் கண்காணிப்பு என்று சொல்லக்கூடிய உத்தியையே பின்பற்றுகின்றன. அதனால் தான் இந்த பதில் சிக்கலானதாகவும் அமைகிறது.
வழக்கமாக யார் இமெயில் அனுப்பி வைத்தாலும் சரி, பெறுபவர் அதை உடனடியாக படித்துப்பார்கலாம், அல்லது தாமதமாக படிக்கலாம். இல்லை படிக்காமலே டெலிட் செய்து விடலாம். இது அவரது விருப்பம் மற்றும் உரிமை. அனுப்புகிறவர் இமெயில் பெறும் போதும் இது பொருந்தும்.

பொதுவான இமெயில் அமைப்பில், மெயில் வாசிக்கப்பட்டதா என்பதை உணரும் வழி இல்லை. அவுட்லுக் போன்ற இமெயில் சேவையில், இதை உறுதி செய்து கொள்வதற்காக, பெறப்பட்டது என்பதை தெரிவிக்கும் வசதி இருக்கிறது. ஆனால் இந்த வசதியை ஏற்று பதில் தெரிவிப்பது மறுமுனையில் இருப்பவரின் விருப்பம் சார்ந்தது. இந்த வசதியை பிளாக் செய்வதற்கான வழியும் இருக்கிறது. எனவே, இதற்கான நேரடி வழி இல்லை.
இந்த இடத்தில் தான் இமெயில் டிராக்கிங் சேவைகள் வருகின்றன். பனானாடேக், பூமாரங், ட்டிதேரீட் இட் ஸ்டீரிக், காண்டாக்ட் மன்கி மற்றும் இன்னும் பிற பல சேவைகள் இந்த வசதியை அளிக்கின்றன. குரோம் பிரவுசருக்கான நீட்டிப்பு மூலம் இந்த வசதியை அளிக்கும் சேவைகளும் கூட இருக்கின்றன.

இந்த சேவைகளை பயன்படுத்தும் போது அவை ஒருவர் அனுப்பும் இமெயிலில் சின்னதாக ஒரு புகைப்பட குறியீட்டை இடம்பெறச்செய்கின்றன. கண்ணுக்குத்தெரியாத புள்ளியாக கூட அது இருக்கலாம். அதில் இருக்கும் எச்.டி.எம்.எல் குறியீடு மூலம் மெயில் பிரிக்கப்பட்டதும், சர்வருக்கு தகவல் தெரிவிக்கப்படும். இந்த தகவல் பயனாளிக்கும் தெரிவிக்கப்படும்.

இதே முறையில் இமெயிலில் அனுப்பும் இணைப்புகள் கிளிக் செய்யப்பட்டதா என்பதை அறியவும் தனியே ஒரு குறியீடு இணைக்கப்படுகிறது. இந்த சேவைகளின் மூலம் இமெயில் எப்போது பிரிக்கப்பட்டது என்பதையும், அதன் இணைப்புகள் கிளிக் செய்யப்பட்டதா என்பதையும் அறியலாம். பொதுவாக மார்க்கெட்டிங் நோக்கில் இமெயில்களை கூட்டம், கூட்டமாக அனுப்பி வைப்பவர்கள் தங்கள் முயற்சியின் பலனை அறிய இந்த சேவைகளை பயன்படுத்துகின்றன. தனி நபர்களும் கூட இந்த சேவையை பயன்படுத்தலாம். இவற்றில் இலவச சேவைகளும் இருக்கின்றன, கட்டண சேவைகளும் இருக்கின்றன. இது தொடர்பான இணைப்பு: http://www.computerworld.com/article/2979569/web-browsers/review-6-chrome-extensions-let-you-track-your-gmail.html

ஆனால் இதை கூட நூறு சதவீதம் உத்திரவாதமானது என்று சொல்வதற்கில்லை. டிராக்கிங் சேவைகள் அதிகபட்சமாக இமெயில் திறக்கப்பட்ட தகவலை தெரிவிக்கின்றன. ஆனால் அது வாசிக்கப்பட்டதன் அடையாளமாக அமையுமா என்பது கேள்விக்குறி தான். அதை மெயில் பெற்றவர் மட்டும் தான் உறுதி செய்ய முடியும்.

இமெயிலின் அத்தனை வசதிகளையும் மீறி இது நிச்சயம் இமெயிலின் குறை தான். இல்லை அப்படியும் சொல்வதற்கில்லை. உண்மையில் இது இமெயில் பயன்படுத்தப்படும் விதத்தின் பக்கவிளைவாக உண்டான பிரச்சனை. இமெயில் அடிப்படையில் இலவசமாக இருப்பதால், அதை தகவல் தொடர்புக்காக மட்டும் அல்லாமல், மார்க்கெட்டிங் மற்றும் விளம்பர நோக்கிலும் பயன்படுத்தி வருகின்றனர். காசா, பணமா, ஒரு இமெயில் தானே என வர்த்தக நிறுவனங்கள் கூட்டமாக மெயில்களை அனுப்பி வைக்கின்றன. இவை த்தவிர மோசடி மெயில்கள், வில்லங்க மெயில்கள், மால்வேர் வாகன மெயில்கள் என பல ரகங்கள் இருக்கின்றன. இவை எல்லாமுமாக சேர்ந்து ஸ்பேம் எனப்படும் குப்பை மெயில்களாக வகைப்படுத்தப்படுகின்றன.

இத்தகைய குப்பை மெயில்களில் இருந்து பயனாளிகளுக்கு பாதுகாப்பு தேவைப்படவே செய்கிறது. இதன் விளைவாகவே மெயில்களை படித்துவிட்டோம் என தெரிவிக்கும் வசதி செயலிழக்க செய்யப்பட்டுள்ளது. இதன் விளைவை உண்மையான அக்கரையோடு தங்கள் மெயிலுக்கான எதிர்வினையை தெரிந்து கொள்ள நினைப்பவர்களும் அனுபவிக்க வேண்டியிருக்கிறது.

இதற்கான மூன்றாம் தரப்பு தீர்வாகனே மெயில் டிராக்கிங் சேவைகள் அமைகின்றன. ஆனால் அதிலும் சிக்கல்கள் இல்லாமல் இல்லை. இது போன்ற சேவைகள் மூலம் மெயில் பிரிக்கட்ட நேரத்தை அறிவதோடு, அவை பிரிக்கப்பட்ட இடத்தை கூட அறியலாம். இது தனியுரிமை மீறலுக்கு வழிவகுக்கலாம். மேலும் இணைய விஷமிகள் இதை தவறான நோக்கத்தில் பயன்படுத்தும் வாய்ப்பும் இருக்கிறது. எனவே இமெயில் டிராக்கிங் சேவையை பயன்படுத்தும் எண்ணம் இருந்தால், அதை மெயில் அனுப்பும் போது தெரிவித்துவிடுவது சிறந்த இணைய அறமாக இருக்கும். அதிலும் வர்த்தக நிறுவனத்தில் இருந்து கொண்டு இதை செய்யும் நிலையில் நிச்சயம் இது தொடர்பான நிறுவன கொள்கையை அறிந்திருப்பது நல்லது.

பயனாளிகள் நோக்கில் பார்த்தால், இன்பாக்ஸ் தேடி வரும் இமெயிலுக்குள் இப்படி ஒரு வசதி இருப்பதும் அதை அறியாமல் இருப்பதும் திடுக்கிட வைக்கலாம். ஆனால் நல்லவேளையாக இதை தடுக்கும் வசதியும் இல்லாமல் இல்லை. ஜிமெயில் உள்ளிட்ட பெரும்பாலான மெயில் சேவைகளில் செட்டிங் பகுதிக்கு சென்று , புகைப்படம் போன்றவை இணைக்கப்பட்டிருக்கும் நிலையில் அவை தானாக திறக்கப்படாமல், புகைப்பட இணைப்பை திறக்கலாமா என அனுமதி கேட்டு அதன் பிறகே செயல்படும் வகையில் அமைத்துக்கொள்ளலாம். இது தொடர்பான இணைப்பு: http://bgr.com/2015/11/19/how-to-stop-email-tracking/

விநாடிக்கு 24 லட்சம் இமெயில்!

email
இமெயில் பழங்காலத்து சங்கதி என்னும் எண்ணம் உங்களுக்கு இருக்கிறதா? எனில் மேக்ஸ் யூஸ் ஆப் தொழில்நுட்ப செய்தி தளம் பட்டியலிட்டிருக்கும் இமெயில் தொடர்பான புள்ளி விவரங்கள் உங்களுக்கு இரட்டிப்பு ஆச்சர்ய்த்தை அளிக்க கூடும். ;http://www.makeuseof.com/tag/5-staggering-email-stats-that-are-hard-to-believe/
முதல் புள்ளிவிவரத்தை பார்ப்போமா? தினந்தோறும் பரிமாறிக்கொள்ளப்படும் எண்ணிக்கை எவ்வளவு தெரியுமா? 20,500 கோடி மெயில்கள் ஆகும். அதாவது விநாடிக்கு 24 லட்சம் இமெயில்கள் பறந்து கொண்டிருக்கின்றன.நம்ப முடியாமல் இருக்கிறதா? 2015ம் ஆண்டு கணக்கு இது. இப்போது இன்னும் கூட அதிகமாகி இருக்கலாம்.ஆனால் இன்று, இந்த மெயில்களில் பெரும்பாலானவை(90சதவீதம்)ஸ்பேம் என்படும் குப்பை மெயில்கள் மற்றும் வைரஸ் வாகனமாக மாறிவிடும் வில்லங்க மெயில்களாகும்.

ஆனாலும் கூட தினமும் 250 கோடி பயனாளிகள் உண்மையான மெயில்களை அனுப்பிக்கொண்டிருக்கின்றனர்.
இன்னொரு கணக்கு படி இமெயில் பயனாளிகளில் 91 சதவீதம் பேர் தினம் ஒரு முறையேனும் தங்கள் முகவரி பெட்டியை பார்க்கும் வழக்கம் கொண்டுள்ளனர்.

இமெயில் சேவைகளில் பிரபலமாக இருக்கும் ஜிமெயில் 100 கோடி தீவிர பயனாளிகளை கொண்டிருக்கிறது. ஆக இமெயிலின் பளபளப்பு வேண்டுமானால் குறைந்திருக்கலாம்,அதன் பயன்பாடு அல்ல என்பதை இந்த புள்ளிவிவரங்கள் மூலம் தெரிந்து கொள்ளலாம் இல்லையா?

——
590ccd51-c884-428a-bcc0-2eadaeb0a378
தளம் புதிது: கோகோ தோட்டம்
புதிதாக தொழில் துவங்கலாம் என்ற எண்ணம் இருக்கிறதா? அப்படி என்றால் ஏதாவது ஒரு கட்டத்தில் உங்கள் வர்த்தகத்திற்கான லோகோவை உருவாக்கியாக வேண்டும். லோகோ உருவாக்கத்தில் உங்களுக்கு உதவி தேவை என்றால் லோலோகார்டன் தளம் அதற்காக என்றே இருக்கிறது. இந்த தளத்தில் பயனாளிகள் தங்களுக்கான இலவச லோகோவை எளிதாக உருவாக்கி கொள்ளலாம். லோகோ உருவாக்கத்திற்கான சாதங்களும் கொடுக்கப்பட்டுள்ளன. அதற்கு முன்னதாக இந்த தளத்தில் உள்ள மாதிரி லோகோக்களை பார்த்து உங்களுக்கான லோகோ எப்படி இருக்கலாம் என்பது தொடர்பான ஊக்கத்தையும் பெறலாம்.தனித்தனி தலைப்புகளில் பலவிதமான துறைகளைச்சேர்ந்த லோகோக்கள் பட்டியலிடப்பட்டுள்ளன. தொழில்முனைவோருக்கு உதவுவதற்காக என்றே இந்த தளம் அமைக்கப்பட்டுள்ளதாக குறிப்பிடப்பட்டுள்ளது.
இணையதள முகவரி; http://www.logogarden.com

———–

செயலி புதிது; காற்றின் தரம் அறிய

helpchat_airqualityindex_main
ஹெல்ப்சேட் செயலியை நீங்கள் அறிந்திருக்கலாம். ஸ்மார்ட்போன் பயனாளிகளின் டிஜிட்டல் உதவியாளராக செயல்பட்டு பயனுள்ள தகவல்களை அளிக்க கூடிய இந்த செயலி தற்போது இந்திய நகரங்களில் காற்றின் தரத்தை அறிந்து கொள்ள வழி செய்யும் தகவல்களையு அளிக்கத்துவங்கியிருக்கிறது. மத்திய மாசு கட்டுப்பாட்டு வாரியத்தின் தகவல்களை பிரதானமாக வைத்துக்கொண்டு இந்த சேவையை ஹெல்ப்சேட் அளிக்கிறது. காற்றின் தரம் பற்றிய விவரம் ஆறு பிரிவுகளில் பச்சை முதல் சிவப்பு வரையான வண்ணங்களில் உணர்த்தப்படுகிறது. காற்று மாசு அடிபடையில் எந்த எந்த இடங்களை தவிர்க்கலாம் என்று முடிவு செய்ய இது உதவலாம்.திரைப்படங்கள்,டீல்கள்,வானிலை ஆகிய விவரங்களுடன் காற்று மாசு பற்றிய தகவலை முகப்புத்திரையிலேயே அளிக்கிறது.
சுற்றுசூழல் பற்றிய விழிப்புணர்வு அதிகரித்து வரும் நிலையில் இந்த சேவை பயனுள்ளதாக இருக்கும்.
மேலும் விவரங்களுக்கு:https://www.helpchat.in/

=======
prehistoric-68074_640வீடியோ புதிது; டைனோசர் நிறம் என்ன?
ஒரு காலத்தில் பூமியில் இருந்து மறைந்த பிரம்மாண்ட விலங்கினமான டைனோசர்கள் ஆய்வில் அறிந்து கொள்ள சுவாரஸ்யமான விஷயங்கள் இருக்கின்றன.டைனோசர்களின் படிமங்களை கொண்டு அவை எப்படி இருந்திருக்கும் என விஞ்ஞானிகள் பல தகவல்களை கண்டறிகின்றனர். ஆனால் டைனோசர்கள் என்ன நிறத்தில் இருந்திருக்கும்? அதை எப்படி அறிவது? இந்த கேள்விக்கு விஞ்ஞானிகள் எப்படி விடை அறிகின்றனர் என்பதி டெட் அமைப்பின் புதிய வீடியோ விளக்குகிறது. படிம ஆய்வில் துவங்கி ஒளியில் வரை பல விஷயங்களை இதில் ஆய்வாளரான லென் பிலாக் விளக்குகிறார். டைனோசர்கள் பற்றி மட்டும் அல்ல இயற்பியலின் அடிப்படைகளையும் சுவாரஸ்யமாக தெரிந்து கொள்ளலாம்.

வீடியோவை காண; http://ed.ted.com/lessons/how-do-we-know-what-color-dinosaurs-were-len-bloch#review

——–