Category Archives: டிவிட்டர்

c3

பிரெஞ்சு பத்திரிகைக்கு ஆதரவாக டிவிட்டரில் எழுச்சி பெற்ற ஹாஷ்டேக்

பாரிசில் பிரெஞ்சு பத்திரிகை மீதான தாக்குதல் மனிதநேயம் மற்றும் கருத்து சுதந்திரம் மீதான இரட்டை தாக்குதலாக அமைந்து திகப்பை ஏற்படுத்தியிருக்கும் நிலையில் டிவிட்டரில் லட்சகணக்கானோர் ஐயம் சார்லி (#JeSuisCharlie) என பொருள்படும் ஹாஷ்டேக் கொண்ட குறும்பதிவுகள் மூலம் தங்கள் உணர்வுகளையும் ஆதரவையும் தெரிவித்து வருகின்றனர்.
பிரெஞ்சு பத்திரிகையான சார்லி ஹெப்டோ மீது தீவிரவாதிகள் நடத்தில் கொடூர தாக்குதலில் 4 கார்டூனிஸ்ட் உட்பட 12 பேர் சுட்டுக்கொல்லப்பட்டனர். நையாண்டி மற்றும் கேலி சித்திரங்களை வெளியிடுவதற்காக அறியப்படும் இந்த பத்திரிகை அலுவலகத்தில் நடத்தப்பட்ட இந்த தாக்குதலும் தொடர்ந்து ஏற்பட்ட உயிரிழப்பும் உலகை அதிர்ச்சியிலும் வேதனையிலும் ஆழ்த்தியது.
இந்த தாக்குதலை உலக தலைவர்கள் மற்றும் பத்திரிகையாளர்கள் கண்டித்துள்ள நிலையில் டிவிட்டரில் லட்சக்கணக்கானோர் குறும்பதிவுகள் மூலம் தங்கள் உணர்வுகளை வெளிப்படுத்தி வருகின்றனர். இந்த குறும்பதிவுகள் தாக்குதலில் பலியானவர்களுக்கும் காயமடைந்தவர்களுக்கும் இரங்கல் தெரிவிக்கும் வகையில் அமைந்திருப்பதுடன் கருத்து சுதந்திரத்திற்கு ஆதரவு தெரிவிக்கும் வகையில் அமைந்துள்ளது. இந்த குறும்பதிவுகள் பெரும்பாலும் #JeSuisCharlie எனும் ஹாஷ்டேக் அடையாளத்துடன் ஒன்று பட்ட குரலாக ஓங்கி ஒலிக்கின்றன.
ஐயம் சார்லி அதாவது நான் தான் சார்லி என பொருள்படும் இந்த ஹாஷ்டேக் மூலம் உலகம் முழுவதும் உள்ள பத்திரிகையாளர்கள் உட்பட லட்சக்கணக்கானோர் தங்கள் ஆதரவை தெரிவித்து வருகின்றனர்.
தாக்குதல் நடந்த சில மணி நேரங்களில் எல்லாம் இந்த ஹாஷ்டேகுடன் 2,50,000 குறும்பதிவுகளுக்கு மேல் பகிர்ந்துகொள்ளப்பட்டன.
இந்த குறும்பதிவுகள் அனைத்தும் கருத்து சுதந்திரத்தை வலியுறுத்தும் வகையில் அமைந்திருந்தன. பல்ரும் தங்கள் ஆதரவை தெரிவிக்கும் வகையில் குறும்பதிவுகளுடன் கேலிச்சித்திரங்களையும் பகிர்ந்து கொண்டனர். பலரும் வாள் முனையை விட பேனா முனை வலியது எனும் கருத்தையும் பகிர்ந்து கொண்டனர்.
செபஸ்டின் குட்ஸ் எனும் டிவிட்டர் பயனாளி” தீவிரவாதிகள் தாக்குதலை மீறி உலகம் முழுவதும் பத்திரிகை சுதந்திரத்திற்காக எழுந்து நிற்கும் சாதாரண மக்களுக்காக … என இதயத்தில் இரத்தம் வடிகிறது” என குறும்பதிவிட்டிருந்தார்.
“பிரான்ஸ் ஒன்றுபட்டு நிற்கிறது . உலகம் உடன் நிற்கிறது. உங்கள் அன்பும் ஒற்றுமையும் அழகானது. இன்று நான் உங்களுடன் இருக்கிறேன் “ என குறிப்பிட்டிருந்தார்.
ஆஸ்திரேலியாவை சேர்ந்த கார்டூனிஸ்ட் டேவிட் போப் , சுடப்பட்டு இறந்து கிடக்கும் கார்டூனிஸ்ட் அருகே முகமடி அணிந்த மனிதர் நிற்பது போல கார்டூன் வரைந்து, அவர் தான் முதலில் வரைந்தார், என கூறுவது போல வாசகத்தை இடம்பெற வைத்திருந்த கார்டூனை பகிர்ந்து கொண்டார்.
ஜே மெக்கினான் எனும் டிவிட்டர் பயனாளி “ இன்று இரவு மக்கள் கூட்டம் ஐயம் சார்லி மூலம் பிரான்ஸ் கூடுதலான பத்திரிகை சுந்ததிரத்திற்கு ஆதரவாக நிற்கும் நம்பிக்கையை அளிக்கிறது” என குறிப்பிட்டிருந்தார்.
இப்படி லட்சக்கணக்கானோர் ஐயம் சார்லி எனும் ஹாஷ்டேகுடன் தங்கள் ஆதரவை வெளிப்படுத்தியுள்ளனர். இதனால் டிவிட்டரில் இந்த ஹாஷ்டேக் மிகவும் பிரபலமாகி இருக்கிறது. பத்திரிகை சுதந்திரத்துக்கு ஆதரவான உலகின் ஒன்றுபட்ட குரலாக இந்த ஹாஷ்டேக் தாங்கிய குறும்பதிவுகள் அமைந்துள்ளன.
இதனிடையே பிரபல செய்தி நிறுவனமான ஏஎப்பி ,அதன் புகைப்பட கலைஞர்கள் சார்லி பத்திரிகைக்கு ஆதரவு தெரிவிக்கும் அட்டையை ஏந்தியபடி காட்சி தரும் புகைப்படத்தை டிவிட்டரில் பகிர்ந்து கொண்டுள்ளது.
பிரெஞ்சு அதிபர் ஹாலாண்டேவும் இந்த தாக்குதலுக்கு எதிராக கண்டனம் தெரிவிக்கும் குறும்பதிவை வெளியிட்டுள்ளார்.” எந்த காட்டுமிராண்டித்தனமான செயலாலும் பத்திரிகை சுதந்திரத்தை ஒன்றும் செய்ய முடியாது. நாங்கள் ஒன்றுபட்ட தேசம் என அவர் குறிப்பிட்டிருந்தார்.
இதே போல பிரான்சில் உள்ள அமெரிக்க தூதரகத்தின் டிவிட்டர் பக்கம் தனது அறிமுக பக்கத்தை சார்லி பத்திரிகைக்கு ஆதரவு தெரிவிக்கும் வகையில் மாற்றுக்கொண்டுள்ளது. இதன் அறிமுக பக்கத்தில் ஐயம் சார்லி என்ற பதம் இடம்பெற்றுள்ளது. ” தவறாக வெளியாகும் செய்திகளை மீறி பாரிசில் உள்ள அமெரிக்க தூதரகத்தை மூட எந்த திட்டமும் இல்லை என்றும் குறும்பதிவு மூலம் தெரிவிக்கப்பட்டுள்ளது.
சார்லி ஹெப்டோ பத்திரிகையின் இணையதளம் சிறிது நேரம் முடங்கிய நிலையில் கருப்பு வண்ண முகப்பு பக்கத்துடன் இணையத்திற்கு திரும்பியது. அதன் நடுவே வெள்ளை எழுத்துக்களில் பத்திரிகை பெயர் மின்னியது.
இதன் நடுவே ஐயம் சார்லி ஹாஷ்டேகுடன் பத்திரிகை சுந்ததிரத்துக்கான ஆதரவும் பெருகி கொண்டிருக்கிறது.
ஐயம் சார்லி குறும்பதிவுகளை பின் தொடர: #JeSuisCharlie

——

விக்டன்.காமில் எழுதியது

141228114001-airasia-tony-fernandes-620xa

என் வாழ்வின் மோசமான கொடுங்கணவு; டிவிட்டரில் ஏர் ஆசியா சி.இ.ஓ

162 பயணிகளுடன் ஏர் ஆசியா விமானம் மாயமான சம்பவம் தன் வாழ்வின் கொடுங்கணவு என்று நிறுவன சி.இ.ஓ டோனி பெர்னாண்டஸ் டிவிட்டர் குறும்பதிவு மூலம் வேதனை தெரிவித்துள்ளார்.
காணாமல் போன விமானத்தை தேடும் பணி மற்றும் மீட்பு நடவடிக்கை குறித்தும் அவர் டிவிட்டர் மூலம் அதிகாரபூர்வ தகவல்களை பகிர்ந்து கொண்டு,பாதிக்கப்பட்ட பயணிகளின் குடும்பத்தினருக்கு ஆறுதல் அளித்து வருகிறார்.
இந்தோனேசியாவில் இருந்து சிங்கப்பூருக்கு புறப்பட்ட ஏர் ஆசியா விமானம் ஞாயிற்றுகிழமை காணாமல் போனது. அதிகாலை புறப்பட்ட இந்த விமானம் கட்டுப்பாட்டு அறையுடன் தொடர்பை இழந்து மாயமானது. விமானத்தில் 162 பயணிகள் இருந்தனர். விமானம் மாயமான சம்பவம் பெரும அதிர்ச்சியையும் கவலையையும் ஏற்படுத்தியுள்ளது. மாயமான விமானத்தை மீட்பதற்கான முயற்சி மோசமான வானிலைக்கு நடுவே மேற்கொள்ளப்பட்டு வருகிறது.
இதனிடையே ஏர் ஆசியா விமான சேவை நிறுவனத்தின் சி.இ.ஓ தனது டிவிட்டர் பக்கம் மூலம் மாயமான விமானத்தின் நிலை, அதை கண்டறிவதற்கான முயற்சி பற்றிய அதிகாரபூர்வ தகவல்களை பகிர்ந்து கொண்டு வருகிறார். பாதிக்கப்பட்ட பயணிகளின் குடும்பத்தினருக்கு ஆறுதல் அளிக்கும் குறும்பதிவுகளையும் வெளியிட்டு தொடர்பில் இருந்து வருகிறார்.
இந்த விபத்து , ’என் வாழ்வின் மோசமான கொடுங்கணவு’ என்று அவர் சம்பவத்திற்கு பிறகு வெளியிட்ட குறும்பதிவில் அவர் குறிப்பிடிருந்தார். ”இப்போது என் சிந்தனை முழுவதும் பயணிகள் மற்றும் விமான சேவை குழுவினருடன் தான் இருக்கிறது. தேடல் முயற்சியில் நம்பிக்கை வைத்திருக்கிறோம். இந்தோனேசியா மற்றும் மலோசிய அரசுகளுக்கு நன்றி” என்றும் அவர் குறிப்பிட்டிருந்தார்.
இது தவிர பத்துக்கும் மேற்பட்ட குறும்பதிவுகளை வெளியிட்டிருந்தார். இந்த குறும்பதிவுகள் மூலம் மாயமான விமானத்தின் நிலை பற்றிய விவரங்களை அவர் பகிர்ந்து கொண்டிருந்தார்.
விமானத்தில் பயணம் செய்த பயணிகளின் குடும்பத்தினர் மற்றும் வினான ஊழியரின் குடும்பத்தினருக்கு கள நிலவரத்தை தெரிவிக்கும் முயற்சியாக அவரது குறும்பதிவுகள் அமைந்திருந்தன.
’ குழுமத்தின் சி.இ.ஓ என்ற முறையில் நெருக்கடியான நேரத்தில் நான் உடன் இருப்பேன். நாம் இணைந்தே இந்த சோதனையான நிலையை எதிர்கொள்வோம்.உங்களில் பலரை காணமுடியும் என நம்புகிறேன்” என மற்றொரு குறும்பதிவில் அவர் குறிப்பிட்டிருந்தார்.
” எங்களது முன்னுரிமை எனது ஊழியர்கள் மற்றும் பயணிகளின் நெருரிங்கிய உறவினர்களை கவனித்துக்கொள்வது தான். எங்களால் முடிந்த அனைத்தையும் செய்வோம். கிடைக்கும் தகவல்களை உடனுக்குடன் பகிர்ந்து கொள்வோம்’ என்றும் அவர் இன்னொரு குறும்பதிவில் தெரிவித்திருந்தார்.
தேடல் நடவடிக்கை குறித்தி நேரில் அறிவதற்காக இந்தோனேசியாவின் சுரபயா பகுதிக்கு செல்வது பற்றியும் முன்னதாக குறிப்பிட்டிருந்தார்.
விமானம் மாயமான செய்தி வெளியானதுமே அவர் டிவிட்டரில் அந்த செய்தியை உறுதிபடுத்தியதுடன் , விரைவில் இது பற்றி அதிகாரபூர்வ அறிக்கை வெளியிடப்படும் என்று தெரிவித்தார். அதே போல அறிக்கை வெளியானது.
விமானம் மாயமானது அதில் பயணித்த பயணிகளின் உறவினர்கள் மத்தியில் பெரும் கவலையை ஏற்படுத்திய நிலையில் கள நிலவரம் பற்றி விமான சேவை சி.இ.ஒ நேரடியாக தகவல்களை அளித்து வருவது ஓரளவு ஆறுதல் அளிக்கும் செயலாக அமைந்துள்ளது. கடந்த சில மாதங்களுக்கு முன்னர் மலேசிய விமானம் மாயமான போது, விபத்து பற்றிய தகவல்களை நிறுவனம் முறையாக தெரிவிக்காமல் இருந்ததாக பயணிகளின் உறவினர்கள் வேதனை தெரிவித்தனர்.
ஆனால் ஏர் ஆசியா சி.இ.ஓ டிவிட்டர் மூலம் தன்னால் இயன்ற தகவல்களை பகிர்ந்து கொண்டு நம்பிக்கையும் ஆறுதலும் அளிக்க முயன்று வருகிறார்.
விபத்து போன்ற நெருக்கடியான நேரங்களில் முறையான தகவல்களை தெரியாமல் இருப்பதால் ஏற்படும் இரட்டிப்பு சோகத்தை தவிர்க்கும் வகையில் அவரது முயற்சி அமைந்துள்ளது. அவர் வெளியிடும் குறும்பதிவுகள் நூற்றுக்கணகான முறை ரிடிவீட் செய்யப்ப்பட்டு பகிரப்பட்டு வருகிறது.
இதனிடையே டோனி பெர்னாண்டஸ் தனது டிவிட்டர் பக்கத்தின் லோகோ நிறத்தை கிரே வண்ணத்திற்கு மாற்றி தனது மற்றும் நிறுவன உணர்வுகளை வெளிப்படுத்தியுள்ளார்.
தேடல் முயற்சிகள் மேற்கொள்ளப்படும் நிலையில் பயணிகள் மற்றும் ஊழியர்களின் உறவினர்கள் கவலையுடன் காத்திருக்க #PrayForQZ8501 ஹாஷ்டேக் மூலம் டிவிட்டர் பயனாளிகள் தங்கள் பிராத்தனைகளை பகிர்ந்து வருகின்றனர்.

ஏர் ஆசியா சி.இ.ஓவின் டிவிட்டர் பக்கம்: https://twitter.com/tonyfernandes

 

——

( தகவல் தொடர்பு தான் டிவிட்டரின் ஆதார பலன்களில் ஒன்று என்றால் அதற்கு சரியான உதாரணம் இது. காலத்தினால் பகிரும் தகவல்கள் மிகவும் முக்கியம். நெருக்கடியான நேரங்களில் பொறுப்பிலும் பதவியிலும் இருப்பவர்களிடம் இருந்து எதிர்பார்க்கப்படுவது தகவல் பகிர்வும் கேள்விகளுக்கான பதில்களும். அதை ஏர் ஆசியா சி.இ.ஓ நிறைவேற்ற முயன்றது பற்றிய இந்த பதிவு விகட்ன்.காமில் எழுதியது.

Omar_Abdullah_tweet_650

தேர்தல் தோல்விக்கு பிறகு டிவிட்டரில் அசத்திய ஓமர் அப்துல்லா

காஷ்மீர் முதல்வராக ஓமர் அப்துல்லாவின் செயல்பாடுகள் சொல்லிக்கொள்ளும் படி இல்லாமல் அமைந்திருக்கலாம் – அதனால் தானே காஷ்மீர் மக்கள் தேர்தலில் அவரது கட்சியை ஆட்சியில் இருந்து அகற்றியிருக்கின்றனர். ஆனால் டிவிட்டர் பயன்பாட்டை பொறுத்துவரை ஒமர் அப்துல்லா சபாஷ் வாங்குபடி தான் செயல்பட்டிருக்கிறார். அதிலும் சட்டமன்ற தேர்தல் தோல்விக்கு பிறகு டிவிட்டரில் அவர் காட்டிய சுறுசுறுப்பும், திறந்த மனதுடன் தன்னை வெளிப்படுத்திக்கொண்ட விதமும் பாராட்டுக்குறியது.
ஒமர் அப்துல்லாவின் டிவிட்டர் செயல்பாடு புதிதல்ல தான். உண்மையில் இந்தியாவில் டிவிட்டர் பயன்பாட்டில் முன்னிலை வகிக்கும் அரசியல் தலைவர்களில் அவரும் ஒருவராக இருக்கிறார். ஆனால் ஆட்சியில் இருக்கும் போது டிவிட்டர் செய்வது என்பது வேறு. அப்போது சொல்லிக்கொள்ளவும் பெருமைப்பட்டுக்கொள்ளவும் நிறைய இருக்கும். இருப்பினும் தேர்தல் தோல்வியை சந்தித்த பின்பும் மக்களிடம் தொடர்பு கொள்வது தான் சவால்.
பொதுவாக மக்கள் மன்றத்தில் தோல்வியை எதிர்கொள்ளும் அரசியல் தலைவர்கள் பெரும்பாலும் மவுனத்தை தான் வெளிப்படுத்துவார்கள். அதிர்ச்சியில் உரைந்திருக்கும் போது எங்கே கருத்து சொல்வது?
அதிலும் ஓமர் அப்துல்லா போல ஊடகம் மற்றும் சமூக ஊடகங்களில் அழகாக வெளிப்படுத்திக்கொள்பவர்களுக்கு தோல்விக்கு பிந்தைய காலம் சோதனையானது தான்.
ஓமர் அப்துல்லாவை பொறுத்தவரை இந்த சோதனையை ஓடி ஒளிந்து கொள்ளமால் எதிர்கொண்டிருக்கிறார். தேர்தல் தோல்விக்கு பிறகும் அவர் டிவிட்டரில் தீவிரமாகவே கருத்து பகிர்வில் ஈடுபட்டார். வாக்கு எண்ணிக்கைக்கு முன்பாகவும் அவர் தனது எண்ண ஓட்டத்தை பகிர்ந்து கொண்டார். ’ஆறு ஆண்டுகளுக்கு முன், வாக்குப்பதிவுக்கு முன்பாக பதற்றமாக இருந்தது, ஆனால் இந்த முறை ஆச்சையர்யப்படும் வகையில் அமைதியாக இருக்கிறேன். எது நடக்க வேண்டுமே நடக்கும். எது நடந்தாலும் நான் மகிச்சியாக இருப்பேன்” என்று 22 ம் தேதி குறும்பதிவிட்டிருந்தவர் மறக்காமல் அடுத்த குறும்பதிவில் கட்சி வேறுபாடின்றி எல்லா வேட்பாளர்களுக்கும் நல்வாழ்த்துக்கள் சொல்லியிருந்தார்.
வாக்கு எண்ணிக்கை துவங்கி தேர்தலின் போக்கு புலனாகத்துவங்கிய பின் சோன்வார் தொகுதியில் அவரை தோற்கடித்த அஷர்ப் மிர் -க்கு வாழ்த்து தெரிவித்து குறுமப்திவை வெளியிட்டவர் இனி அவர் தான் என் தொகுதி எம்.எல்.ஏ என்றும் கூறியிருந்தார்.
மற்றொரு தொகுதியிலும் அவர் தோல்வி முகம் என செய்தி வெளியான நிலையில், முன்கூட்டியே என் தோல்வியை கொண்டாடியவர்களுக்கு நன்றி, இந்த வெற்றி இன்னும் இனிக்கிறது” என்று குத்தலான கேலியுடன் ஒரு குறும்பதிவை வெளியிட்டார்.
மறுநாள் கவர்னரை சந்தித்து முதல்வராக ராஜினாமா கடிதம் கொடுக்க இருக்கும் செய்தியையும் டிவிட்டரில் பகிர்ந்து கொண்டார். இதனிடையே எதிர்கட்சியா பிடிபி கட்சியை குத்திகாட்டும் வாய்ப்பையும் தவறவிட்டுவிடவில்லை.
இரண்டு முன்று குறும்பதிவுகளில் பிடிபியை நயமாக விமர்சிப்பதற்காக பயன்படுத்தியவர், ’ 6 ஆண்டுகளுக்கு முன் ஆட்சி அமைக்க ஆதரவு கோருவதற்காக கவர்னர் மாளிகைக்கு சென்றேன். இப்போது ஆட்சியை ஒப்படைக்க செலுகிறேன். வாழ்க்கை ஒரு சுற்று சுற்றி வந்திருக்கிறது” என்று கொஞ்சம் தத்துவார்த்தமாக கருத்து தெரிவித்திருந்தார்.
ஆட்சியை ஒப்படைத்த பின் அவர் முதலில் செய்தது டிவிட்டரில் தனது பயோவை மாற்றியது தான். இது வரை அவரது டிவிட்டர் பயோ காஷ்மீர் முதல்வர் என சொல்லிக்கொண்டிருந்தது. ஆனால் ராஜினாமா செய்த கையோடு பயோவில் முன்னாள் முதல்வர் ,பேர்வா தொகுதி எம்.எல்.ஏ என மாற்றிவிட்டார். இந்த மாற்றத்தையும் ஒரு குறும்பதிவாக குறிப்பட்டிருந்தார்.
டிவிட்டர் பயோவை அப்டேட் செய்ததில் அவர் காட்டிய சுறுசுறுப்பு மெச்சத்தக்கது தான். அடுத்த குறும்பதிவில் ’ அமைதியாக இருங்கள்,

ஏனெனில் நான் திரும்பி வருவேன்” என் கொட்டை எழுத்துக்களில் நம்பிக்கையுடன் தெரிவித்திருந்தார்.
தேர்தல் பிரச்சார காலத்திலேயே ஒமர் அப்துல்லா எல்லா விஷய்ங்கள் பற்றியும் டிவிட்டர் பக்கத்தில் வெளிப்படையாக கருத்து தெரிவித்து வந்திருப்பதை பார்க்கலாம்.
தேர்தல் தோல்விக்கு பிறகு ஒமர் அப்துல்லா ஒரு தேர்ந்த அரசியல்வாதி போல நடந்து கொண்டிருக்கிறார். டிவிட்டர் பயன்பாட்டில் தனது நிபுணத்துவத்தை காட்டியிருக்கிறார்.
ஆனால் இதைவிட முக்கியமான விஷயம் இனி எதிர்கட்சியில் செயல்பட இருக்கும் நிலையில் இதே சுறுசுறுப்பை மக்கள பிரச்சனையை எதிரொலிப்பதிலும் அதைவிட முக்கியமாக மக்கள் ஏன் அவரது கட்சியை நிராகரித்தனர் என்று புரிந்து கொள்ளும் வகையில மக்களின் கருத்துக்களை அறிய உரையாடலிலும் ஈடுப்பட்டார் என்றால் இன்னும் கூட நன்றாக இருக்கும். டிவிட்டரில் அவரை 7 லட்சத்திற்கும் அதிகமானோர் பின் தொடரும் நிலையில் மக்களுடனே தொடர்பில் இருக்க மட்டும் அல்ல மக்கள் மனதை அறியவும் டிவிட்டர் அருமையான வழி. அப்துல்லா அதை செய்வாரா?

ஒமர் அப்துல்லாவின் அதிகாரபூர்வ டிவிட்டர் பக்கம் : https://twitter.com/abdullah_omar

இரண்டு குறும்பதிவுகளின் கதை

cia]அமெரிக்க உளவு அமைப்பான சி.ஐ.ஏ குறும்பதிவு சேவையான டிவிட்டருக்கு வந்திருப்பதை நீங்கள் அறிந்திருக்கலாம். சி.ஐ.ஏ டிவிட்டருக்கு வந்திருப்பது (@CIA
) ஆச்சர்யமும் அதிர்ச்சியும் கலந்த ஒன்று தான். ரகசியங்களுக்கும் சர்ச்சைகளுக்கும் பெயர் பெற்ற சி.ஐ.ஏ டிவிட்டரில் என்ன விதமான தகவல்களை பகிர்ந்து கொள்ளும் ? அதிலும் வெளிப்படையானத்தன்மை மற்றும் உரையாடல் குணம் டிவிட்டரில் ஆதார குணம் எனும் போது சி.ஐ.ஏ வின் டிவிட்டர் வருகை எப்படி இருக்கும்?
இந்த கேள்விகள் ஒருபுறம் இருக்க, சி.ஐ.ஏ வில் முதல் குறும்பதிவு குறிப்பிட்த்தக்க வகையில் அமைந்து கவனத்தை ஈர்க்கவே செய்தது.

‘ இது தான் எங்கள் முதல் குறும்பதிவு என்பதை நாங்கள் மறுக்கவும் இல்லை, ஒப்புக்கொள்ளவும் இல்லை’
இது தான் அந்த முதல் குறும்பதிவு. பதிவான நாள் ஜூன் 6,2014.

சி.ஐ.வுக்கே உரிய தன்மையுடன் அமைந்த இந்த குறும்பதிவு , சி.ஐ.ஏவின் டிவிட்டர் வருகையை விட அதிக பரபரப்பை ஏற்படுத்தியது. இந்த குறும்பதிவில் இருந்த கேலியும் கிண்டலும் கலந்த நகைச்சுவை டிவிட்டருக்கு உகந்தது என்றால் , இந்த நகைச்சுவை திரை விலக்கிப்பார்த்தால் புரியக்கூடிய சி.ஐ.ஏத்தனம் குரூரமாக புன்னகைக்கும்.

உண்மையில் இது சி.ஐ.ஏ தன்னையே பகடி செய்து கொள்ளும் வகையிலான குறும்பதிவு.
ஒரு உளவு அமைப்பிடம் இருந்து வெளிப்படையான தன்மையை எதிர்பார்க்க முடியாது என்றாலும் ,சி.ஐ.வின் செயல்பாடுகள் ரகசியத்தின் உச்சம் தொட்டவை. 1970 களில் அமெரிக்காவில் , ரஷ்ய நீர்மூழ்கி கப்பல் மூழ்க அடிக்கப்பட்ட்து தொடர்பாக ஒரு சர்ச்சை வெடித்த போது சி.ஐ.ஏ தன் மீதான குற்றசாட்டுகளுக்கு பதில் அளிக்காமல் மவுனம் சாதித்த்து. அப்போது இந்த பிரச்ச்னை பற்றி விடாமல் கேட்ட நிருபருக்கு சி.ஐ.ஏ அளித்த பதில் மிகவும் பிரபலமானது.

‘ இந்த குற்றச்சாட்டை நாங்கள் மறுக்கவும் இல்லை, ஏற்கவும் இல்லை”
இப்படி அளிக்கப்படும் பதிலை எப்படி புரிந்து கொள்வது. அரசு அமைப்பின் மூர்கத்தனம் என்றா? அல்லது சர்ச்சையில் இருந்து நழுவும் சாமர்த்தியம் என்றா?
இதே பதிலை நினைவுப்படுத்தும் வகையில் டிவிட்டருக்கு சற்றே மாற்றம் செய்து சி.ஐ.ஏ தனது முதல் குறும்பதிவை வெளியிட்டு கவனத்தை ஈர்த்தது.

இந்த குறும்பதிவு உடனடியாக மறுகுறும்பதிவிடப்பட்டு( ரிடிவீட்) , அபிமானமும் தெரிவிக்கப்பட்ட்து( பேவரைட்). இரண்டின் எண்ணிக்கையுமே பல்லாயிரக்கணக்கில் பெருகி சில லட்சங்களை தொட்டது.
ஆக, இப்படியாக சி.ஐ.ஏவின் முதல் குறும்பதிவு உலகை கவர்ந்த முதல் குறும்பதிவானது.
ஆனால் சி.ஐ.ஏவின் டிவிட்டர் வருகையை எல்லோருமே கைத்தட்டி வரவேற்கவில்லை. பல பதில் குறும்பதிவுகள் அதன் செயல்பாடுகள் மீதான கடுமையான விமர்சனமாக அமைந்திருந்தன. இவற்றில் பல நேரடி தாக்குதலாக இல்லாமல் சி.ஐ.ஏவின் முதல் குறும்பதிவு பாணியிலேயே நக்கலும் நையாண்டியுமாக, ஆனால் அதன் செயலபாடுகளை நச்சென சுட்டிக்காட்டும் வகையில் இருந்தன.

“ இனி சி.ஐ.ஏ டிவிட்டர் கணக்கில் இருந்து உலகில் எங்கோ உள்ள பகுதிகளில் இருந்தெல்லாம் அருமையான சித்தரவதை படங்களை எதிர்பார்க்கலாம்’ என்று ஒரு டிவிட்டர் பயனாளி (@madmanweb ) குறிப்பிட்டிருந்தார்.
சி.ஐ.ஏ என்னை எல்லாம் பின் தொடர பாடுபட வேண்டாம், அவர்களின் சகோதர அமைப்பான என்.எஸ்.ஏ அதை செய்து கொண்டிருக்கிறது’என இன்னொருவர் (@AKBakota ) குறிப்பிட்டிருந்தார்.
இன்னும் சில குறும்பதிவுகள் ஈரான் புரட்சி மற்றும் சிலியின் ஆட்சி கவிழ்ப்பு ஆகியவற்றில் சி.ஐ.ஏ க்கு இருப்பதாக சொல்லப்படும் பங்குகளை இடித்துக்காட்டின.

இந்த விமர்சனங்களை மீற
ி சில நாட்களில் எல்லாம் சி.ஐ.ஏ வின் பின் தொடர்பாளர் எண்ணிக்கை சில லட்சங்களை தொட்டது.
ஒரு மக்கள் தொடர்பு முயற்சியாக தான் சி.ஐ.ஏ டிவிட்டருக்கு வந்துள்ளது. இதே காலத்தில் பேஸ்புக் மற்றும் யூடியூப் பக்கங்களும் சி.ஐ.ஏ சார்பில் அமைக்கப்பட்டன.
ஆனால், சி.ஐ.ஏவை பின் தொடர்பவர்கள் அதனிடம் இருந்து என்ன எதிர்பார்க்கின்றனர்?
நிற்க, சி.ஐ.ஏவின் முதல் குறும்பதிவு மட்டும் அல்ல ,அதன் டிவிட்டர் பயோவும் கூட கவனிக்கத்தக்கதாக தான் இருக்கிறது.
“ நாங்கள் தேசத்தின் முதல் பாதுகாப்பு அறன். மற்றவர்களால் செய்யமுடியாததை செய்கிறோம். மற்றவர்கள் செல்ல முடியாத இடங்களுக்கு செல்கிறோம்’
உள்ளடக்கத்தில் உடன்பாடு இருக்கிறதோ இல்லையோ அருமையான டிவிட்டர் பயோ இல்லையா!

இது இன்னொரு முதல்குறும்பதிவு

சி.ஐ.ஏ பற்றி குறிப்பிட்டு விட்டு, எழுத்தாளர் ஜார்ஜ் .ஆர்.ஆர் .மார்டின் பற்றி பேசுவது பொருத்தமாக இருக்காது தான். ஆனால் சி.ஐ.ஏ வருகை தந்த அதே காலத்தில் டிவிட்டரில் நுழைந்ததாலும் , மார்டினுடைய முதல் குறும்பதிவும் கவனத்திற்குரியதாக இருந்தாதாலும் இங்கே மார்டின் டிவிட்டர் வருகை பற்றி குறிப்பிடலாம். அமெரிக்க தொலைக்காட்சிகளில் கலக்கி கொண்டிருக்கும் கேம் ஆப் த்ரொன்ஸ் தொடருக்கான மூலக்கதை வடிவை தந்தவரும் ,லயித்து மகிழக்கூடிய கற்பனை உலகை தனது நாவல்களில் சிருஷ்டிப்பவராக பாராட்ட்டப்படும் எழுத்தாளரான மார்டினின் முதல் குறும்பதிவும் மகத்தானதாகவே இருந்தது. ஜிஆர்.எம் ஸ்பீகிங் (@GRRMspeaking
) எனும் முகவரியில் அமைந்திருந்த தனது டிவிட்டர் பக்கத்தில் மார்டினின் முதல் குறும்பதிவு இப்படி இருந்தது:
‘நான் அடிக்கடி டிவீட் செய்யமாட்டேன். தயவுசெய்து எனது லைவ்ஜர்னல் (வலைப்பதிவு) பக்கத்தை பாருங்கள்’ .
எழுத்தாளர்கள் டிவிட்டருக்கு வரும் போது வாசகர்களிடம் பெரும் எதிர்பார்ப்பு இருக்கும். ஆனால் அதற்கு நேர்மாறாக பெரும்பாலான எழுத்தாளர்கள் குறும்பதிவுகளாக தங்கள் எண்ணங்களை அருவி போல் எல்லாம் பகிர்வதில்லை.

இந்த ஏமாற்றத்தை அளிக்காமல் இருக்கும் வகையில் மார்டின் முதல் குறும்பதிவிலேயே அதிகம் குறும்பதிவு செய்யமாட்டேன் என கூறிவிட்டார். அதிகம் எதிர்பார்க்கும் ரசிகர்களுக்காக தனது வலைப்பதிவையும் குறிப்பிட்டிருந்தார். அந்த வகையில் உண்மையிலேயே அருமையான முதல் குறும்பதிவு தான். அவரது பயோவும் கூட , தயவுசெய்து லைவ்ஜர்னலில் என்னை தொடருங்கள் என்றே அமைந்திருந்தது.
ஆனால் , அடிக்கடி குறும்பதிவிட மாட்டேன் எனும் அறிமுகத்தை மீறி , எழுத்தாளர் மார்டினுக்கு டிவிட்டரில் 7 லட்சத்துக்கும் மேற்பட்ட பின் தொடர்பாளர்கள் சில நாட்களில் கிடைத்தனர்.

ஆக, ஒரே குறும்பதிவில் லட்சக்கணக்கான பின் தொடர்பாளர்களை அள்ளியவர்கள் பட்டியலில் திரைப்ப நட்சத்திரங்களுக்கு மட்டும் தான் இடம் கிடைக்கவேண்டுமா என்ன? மார்டின் போன்ற நட்சத்திர எழுத்தாளர்களுக்கும் அந்த பெருமை உண்டு என டிவிட்டர் உலகம் காட்டியிருக்கிறது.

உலக கோப்பை அணிகளுக்கு ஆதரவு தெரிவிக்க டிவிட்டரில் ஹாஷ்பிளாக் அறிமுகம்

androidtimelines கால்பந்தின் சொர்கபூமி பிரேசில் உலககோப்பை கால்பந்து துவங்குகிறது. # இந்த உதைத்திருவிழாவை கொண்டாட டிவிட்டரை விட சிறந்த வழி எது? உடனுக்குடன் அப்டேட்கள், பிரத்யேக ஹாஷ்டேகுகளுடன் பிரத்யேக வசதிகளுடன் உங்களைப்போலவே டிவிட்டரும் உலக கோப்பை கொண்டாட தயாராகி இருக்கிறது. ஆம், குறும்பதிவு சேவையான டிவிட்டர் ,உலககோப்பைக்காக என்று புதிய வசதிகளை அறிமுகம் செய்துள்ளது.

இவற்றை நீங்களே கூட கவனித்திருக்கலாம். டிவிட்டர் தனது முகப்பு பக்கத்தையே மாற்றி அமைத்து கால்பந்து மயமாக்கி இருக்கிறது. # டிவிட்டரில் உலககோப்பை எனும் அழைப்புடன்!

உலக கோப்பைக்காக அறிமுகம் செய்யப்பட்டுள்ள வசதிகளில் அசத்தலானது ஹாஷ்பிளேகை பறக்க விடுவது. ஹாஷ்டேக் தெரிந்திருக்கும் , அதென்ன ஷாஷ்பிளேக்!. உலககோப்பையில் ஒவ்வொருவருக்கும் ஒரு அபிமான அணி இருக்கும் அல்லவா? அந்த அணிக்கு ஆதரவாக கொடி பிடிக்கும் வசதி தான் இது. அதாவது, உலககோப்பை தொடர்பாக பகிர்ந்து கொள்ளும் ஒவ்வொரு குறும்பதிவிலும் ஹாஷ்டேக் சின்னத்தை சேர்த்து அதனுடன் உங்கள் அபிமான நாட்டின் சுருக்க குறியீட்டினை குறிப்பிட்டால் ( உதார்ணமாக பிரேசில் என்றால் ) அந்த குறும்பதிவுடன் அதன் தேசியக்கொடி தோன்றும். ஆக ஒவ்வொரு குறும்பதிவிலும் அபிமான அணியின் கொடியை பறக்க விட்டு ஆதரவு தெரிவிக்கலாம். அது மட்டுமா.உங்கள் டைம்லைனில் கால்ந்து குறும்பதிவுகளில் உங்கள் அணியின் ஆதரவாளர்களையும் எளிதில் கண்டு கொள்ளலாம்.

ஹாஷ்பிளேக வசதி உண்மையில் , 2010 உலக கோப்பையிலேயே அறிமுகமானது.இப்போது மறு அறிமுகம் செய்யப்பட்டுள்ளது. இதன் மறு அறிமுகத்தை கொலம்பிய இசைக்குயில் ஷகிரா சிறப்பாக டிவீட் செய்திருந்தார். உலககோப்பை என்றால் ஷகிரா தான்!.

இதே போல உங்கள் டிவிட்டர் பின்னணியையும் அபிமான அணியின் வண்ணத்திற்கு மாற்றிக்கொள்ளலாம். அதே போல ஒவ்வொரு அணியிலும் டிவிட்டரில் பின் தொடர வேண்டிய முக்கிய டிவிட்டர் முகவரிகளையும் டிவிட்டரே முன் வைக்கிறது. அதே போலடைம்லைனுக்கு அருகிலேயே இன்றைய ஆட்டங்களின் பட்டியலும் இடம் பெறுகிறது.

இவைத்தவிர உலக கோப்பையின் ஒவ்வொரு நொடியையும் பின் தொடர இருக்கின்றன : #WorldCup2014 , #WorldCup .

ஆக ,டிவிட்டரில் உலக கோப்பையை கொண்டாடுங்கள்!.