Category Archives: நெட்சத்திரங்கள்

Boy_Studying_620.jpg=s1300x1600

இணையத்தை உருக வைத்த ஏழை சிறுவனின் கல்வி ஆர்வம்

ஸ்மார்ட்போன் வைத்திருக்கும் எல்லோரும் தான் புகைப்படம் எடுக்கிறோம்- பேஸ்புக்கில் பகிர்ந்து கொள்கிறோம். ஆனால் பிலிப்பைன்ஸ் நாட்டில் கல்லூரி மாணவி ஒருவர் பேஸ்புக்கில் பகிர்ந்து கொண்ட புகைப்படம் இணையத்தின் மனசாட்சியையே உலுக்கியிருக்கிறது. அது மட்டும் அல்லாமல் அந்த புகைப்படத்தின் நாயகனான ஏழை சிறுவனை ஊக்கத்தின் அடையாளம் என மனதார பாராட்டுகிறது.அதைவிட முக்கியமாக அந்த சிறுவனுக்கு உதவிகள் குவிந்து அவனது வாழ்க்கையையே மாற்றி இருக்கிறது.

எல்லாம் அந்த ஒரு புகைப்படத்தால் நிகழ்ந்த மாற்றம் !
அந்த புகைப்படத்தை பார்த்தால் நீங்களும் கூட உருகிதான் போவீர்கள்!

ஒரு சிறுவன் டெஸ்க் முன் அமர்ந்து மங்கிய விளக்கொளியில் வீட்டுப்பாடம் செய்து கொண்டிருக்கும் புகைப்படம் தான் அது. சாதாரணமாக பார்த்தாலே கூட அந்த சிறுவனின் ஆர்வம் கவரக்கூடியதாக தான் இருக்கும். ஆனால் இந்த புகைப்படத்தின் பின்னணி தான் முக்கியமானது.

அந்த சிறுவன் அமர்ந்திருக்கும் இடம் வீடு அல்லது வீதி. ஆம், வசிப்பதற்கு வீடு கூட இல்லாத அந்த ஏழை சிறுவன், சாலையோரமாக அமர்ந்து அருகே உள்ள மெக்டொனால்ட்ஸ் ரெஸ்டாரண்ட் விளக்கு வெளிச்சத்தின் ஒளியில் சிரத்தையாக வீட்டுப்பாடம் செய்து கொண்டிருந்தான்.
ஆர்வம் மற்றும் அர்பணிப்பு ஆகியவற்றின் அடையாளமாக விளங்கிய அந்த காட்சியை தற்செயலாகப்பார்த்த ஜாய்ஸ் டோரேபிரான்கா எனும் மருத்துவக்கல்லூரி மாணவி தன்னை அறியாமல் ஸ்மார்ட்போனில் கிளிக் செய்து கொண்டார். வறுமை வாட்டும் நிலையை மீறி சாலையோரத்தில் அமர்ந்து படித்துக்கொண்டிருந்த அந்த சிறுவனின் ஆர்வம் அவரை அசர வைத்தது.
மறுநாள் இந்த புகைப்படத்தை அவர் தனது பேஸ்புக் பக்கத்தில் பகிர்ந்து கொண்டார். ” இந்த சிறுவனைப்பார்த்து நான் ஊக்கம் பெற்றேன்” என்றும் அந்த புகைபத்துடன் குறிப்பிட்டிருந்தார்.
filipino-homework-411x500
அந்த புகைப்படத்தை பார்த்த பலரும் , சூழலை மீறி அந்த சிறுவன் காட்டிய கல்வி ஆர்வத்தால் கவரப்பட்டு, ஊக்கம் பெற்று அந்த படத்தை தங்கள் நட்பு வட்டத்தில் பகிர்ந்து கொண்டனர். இப்படியே அந்த படம் அடுத்தடுத்து 7,000 முறைக்கு மேல் பகிரப்பட்டு பேஸ்புக் முழுவதும் பரவியது. அப்படியே உள்ளூர் தொலைக்காட்சி சேனலிலும் ஒளிப்பரப்பாகி சர்வதேச அளவில் கவனத்தை ஈர்த்தது.
அனைவரும் இந்த சிறுவனை ஊக்கத்தின் அடையாளமாக குறிப்பிட்டனர்.மோசமான வாழ்க்கை சூழலிலும் படிப்பில் கவனம் செலுத்தும் சிறுவனின் மன உறுதியை பாராட்டினர். இன்னும் சிலரோ எல்லா வசதி வாய்ப்புகள் இருந்தும் வீட்டுப்பாடம் செய்யவும் படிக்கவும் முரண்டு பிடிக்கும் மாணவர்கள் இந்த சிறுவனை பார்த்து பாடம் கற்றுக்கொள்ள வேண்டும் என்று கருத்து தெரிவித்திருந்தன்ர்.

இணைய உலகில் இப்படி தீவிர விவாதத்தை ஏற்படுத்திய அந்த சிறுவனை உள்ளூர் தொலைக்காட்சி தேடி கண்டுபிடித்து செய்தி வெளியிட்ட போது அவனைப்பற்றிய மேலும் விவரங்கள் தெரியவந்தது.

பிலிப்பைன்ஸின் மத்திய மாகாணமான செபுவில் உள்ள மாண்டேயு எனும் பகுதியில் சிறுவன் தனது அம்மா மற்றும் சகோதரருடன் வசிக்கிறான். அவனது பெயர் டேனியல் கேப்ரேரா. வயது 9. சிறுவனின் அப்பா சில ஆண்டுகளுக்கு முன் இறந்துவிட்டார். அம்மா ஸ்பினோசா தான் கிடைத்த வேலைகளை செய்து குடும்பத்தை காப்பாற்றி வருகிறார். வாடகைக்கு கூட கொடுக்க முடியாத நிலையில் சாலையோரத்தில் இருக்கும் தற்காலிக ஷெட்டில் வசித்து வருகின்றன. ஆனால் இந்த வறுமை நிலையிலும் சிறுவன் கேப்ரேரா விடாமல் பள்ளிக்கு சென்று படித்துவருகிறான். வீடு இல்லாததால் தினமும் சாலையோரத்தில் மெக்டோனால்ட்ஸ் ரெஸ்டாரண்ட் விளக்கு வெளிச்சத்தில் வீட்டுப்பாடம் செய்வதை வழக்கமாக கொண்டிருக்கிறான்.
_84331104_gettyimages-111656508

Boy_Studying_620.jpg=s1300x1600
மகனுக்கு படிப்பதில் மிகுந்த ஆர்வம் என்றும் , படித்து முடித்து காவலராக வேண்டும் என்பது அவனது லட்சியம் என்றும் தொலைக்காட்சி பேட்டியில் ஸ்பினோசா கூறியிருந்தார். இந்த விவரங்களை எல்லாம் கேள்விப்பட்ட மக்கள் நெகிழ்ந்து போயினர்.குறிப்பாக சிறுவன கேப்ரேரா தன்னிடம் இரண்டு பென்சில்கள் மட்டும் இருந்ததாகவும் அதில் ஒன்றை பள்ளியில் மாணவர்கள் திருடிவிட்டதாகவும் கூறியதை கேட்டு மேலும் நெகிழந்தனர். இந்த சிறுவன் நன்றாக படித்து முன்னேற உதவி செய்வது தங்கள் கடமை என்று பலருக்கும் இயல்பாக தோன்றியதால் நிதி உதவியும் பொருளுதவியும் குவிந்திருக்கிறது. பலர் சிறுவனின் உதவித்தொக்கைக்கு ஏற்பாடு செய்திருக்கின்றனர் என்றால் சிலர் எழுதுபொருள் மற்றும் மேசை விளக்கு வாங்கு கொடுத்துள்ளனர். இது மட்டும் அல்லாமல் சிறுவனின் கல்விக்கு நிதி திரட்டுவதற்காக என்றே தனி இணைய பக்கமும் துவக்கப்பட்டது; (http://bayanihanproject.com/projects/daniel-crowdfunding-campaign/ )
இந்த எதிர்பாராத உதவிகளால் சிறுவனின் தாய் திக்குமுக்காடி போயிருக்கிறார்.

இந்த புகைப்படத்தை பகிர்ந்து கொண்ட கல்லூரி மாணவி ஜாய்ஸ் , ‘ ஒரு எளிய புகைபப்டம் இந்த அளவுக்கு மாற்றத்தை ஏற்படுத்தும் என்று நினைக்கவில்லை” என்று குறிப்பிட்டு இந்த படத்தை பகிர்ந்து கொண்டவர்களுக்கு எல்லாம் தனது பேஸ்புக் பக்கத்தில் நன்றி தெரிவித்துக்கொண்டிருக்கிறார்.
வாழ்க்கையின் சூழலை மீறி ஊக்கத்துடன் செயல்பட டேனியல் கதை நமக்கெல்லாம் உதாரணமாக இருக்கும் என்றும் அவர் குறிப்பிட்டுள்ளார்.’உண்மை தானே!.

———-

as

விடைபெற்றார் வீடில்லாத நட்சத்திரம்! ஒரு இணைய அஞ்சலி

இணைய புகழுடன் விடைபெற்றிருக்கிறார் வீடில்லாத மனிதர். இணைய உலகம் அவருக்காக கண்ணீர் சிந்திக்கொண்டிருக்கிறது. வீதியில் வசித்த அவர் இணையம் மூலம் பலருக்கு அறிமுகமாகி, வீடில்லாத நட்சத்திரமாக புகழ்பெற்று மறைந்திருக்கிறார்.

கென்னி தாம்ஸ் நிக்கோலஸ் என்பது அவரது பெயர். சொந்த வாழ்க்கையில் ஏற்பட்ட சோதனையால் அவர் வீடில்லாதவராக வீதியில் வசிக்கும் நிலைக்கு ஆளானார். எத்தனையோ வீடில்லாதவர்கள் போலவே அவரும் கவனிக்கப்படாத மனிதராகவே இருந்திருந்தால் இன்று அவரது மரணத்தை யாரேனும் அறிந்திருப்பார்களா? என்பது சந்தேகம் தான்.

ஆனால் ஒரு வைரல் வீடியோ அவரை இணையம் முழுவதும் அறிந்தவராக்கியது. யூடியூப் வீடியோ கலைஞரான ஜோஷ் லின் என்பவர் தான் அவரை வீடியோ மூலம் புகழ்பெற வைத்தது.
ஜோஷுக்கு கூட அவரை பிரபமானவராக்க வேண்டும் என்ற நோக்கமில்லை. உண்மையில் வீடில்லாதவரான நிக்கோலசை சோதித்து பார்க்கும் வகையில் தான் அவர் அந்த வீடியோவை பதிவு செய்தார். வீடில்லாதவரிடன் 100 டாலரிடம் கொடுத்தால் அவர் என்ன செய்வார் என்று அறிவது தான் அந்த சோதனை.

கையில் கிடைத்த 100 டாலரை அவரைப்போன்ற வீடில்லாத மனிதர்கள் குடித்தே வீணடிப்பார்கள் என ஜோஷ் நினைத்தற்கு மாறாக நிக்கோலஸ் அந்த பணத்தில்
ரொட்டிகளாக வாங்கி பூங்காவில் வசித்த தன்னைப்போன்ற வீடில்லாதவர்களுடன் பகிர்ந்து கொண்டார்.
அவரது இந்த நேர்மையான செயல் ஜோஷ் பதிவேற்றிய வீடியோ மூலம் வெளிப்பட்ட போது லட்சக்கணக்கானோரால் பார்த்து ரசிக்கப்பட்டு வைரலாக பரவி அவரை இணைய நட்சத்திரமாக்கியது. அதன் பிறகு நிக்கோலஸுக்கு நிதி திரட்டும் முயற்சியிலும் ஜோஷ் ஈடுபட்டார்.பலர் அவருக்காக அள்ளிக்கொடுத்தனர்.
வீடில்லாதவர்கள் பற்றிய பொது பிம்பத்தை மாற்றிக்காட்டிய பெரியவர் நிக்கோலஸ் அன்மையில் இறந்துவிட்டார். லாஸ் எஞ்சலஸ் பகுதியில் அவரது சடலம் கிடந்திருக்கிறது. மதுப்பழக்க பாதிப்பால் அவர் இயற்கையான முறையில் மரணம் அடைந்ததாக தெரிவிக்கப்பட்டுள்ளது.

இந்த செய்தியை தான் வீடில்லாத நட்சத்திரம் மறைந்தார், இணைய புகழ் வீடியோவில் தோன்றியவர் விடை பெற்றார், என்றெல்லாம் நாளிதழ்களும் இணையதளங்களும் செய்தி வெளியிட்டுள்ளன. எல்லாவற்றுக்கும் அந்த வீடியோ தான் காரணம். அந்த வீடியோ வைரலாக பரவ அவரது நேர்மை தான் காரணம்.

ஆனால் , அந்த வீடியோவே செட் அப் செய்து எடுக்கப்பட்டது என்பது போல ஒரு புகாரும் கூறப்படுகிறது. இதை வீடியோ கலைஞரான ஜோஷ் மறுத்துள்ளார். நிக்கோலஸ் மறைவுக்கு இரங்கல் தெரிவித்துள்ள ஜோஷ் அவரது நினைவாக இன்னொரு வீடியோவை எடுத்து வெளியிட இருப்பதாகவும் அறிக்கை மூலம் தெரிவித்துள்ளார்.
ஜோஷ் மீதான புகாரால் பெரியவர் நிக்கோலஸ் நேர்மையை சந்திக்க வேண்டுமா என்று தெரியவில்லை. இதற்கு விளக்கம் அளிக்க அவர் உயிருடன் இல்லாத நிலையில் அவரது நேர்மையை களங்கபடுத்தாமல் இருப்பதே சிறந்தது.
இணையப்புகழுக்கான நெகிழ்ச்சியான உதாரணமாக விளங்கிய நிக்கோலஸ் யாருமறியதவராக மறையாமல் இணைய நட்சத்திரமாக உதிர்ந்திருக்கிறார்.

நிக்கோலஸ் புகழ் பெற்ற அந்த வீடியோ நிகழ்வு பற்றி முன்னதாக விகடன்.காமில் எழுதிய பதிவு கிழே;

அமெரிக்கர்களில் பலர் தங்களுக்கு இதைவிட அருமையான கிறிஸ்துமஸ் அமைந்திருக்க முடியாது என மகிழ்ந்தும் நெகிழந்தும் போயிருக்கின்றனர். அதற்கு காரணம் அவர்களுக்கு கிடைத்த கிறிஸ்துமஸ் பரிசு அல்ல; மாறாக ஒரு நல்ல மனிதருக்கு பரிசளித்து அவருக்கு மிகழ்ச்சியான கிறிஸ்துமஸ் தினத்தை அளிக்க முடிந்ததுதான்.

இந்த வாய்ப்பை அவர்களுக்கு ஏற்படுத்தி தந்த இணையம், வீடில்லாத மனிதர் ஒருவருக்கு முகம் தெரியாத மனிதர்கள் எல்லாம் டாலர்களை அள்ளிக்கொடுத்து, ஒரு லட்சத்திற்கும் மேல் நன்கொடையை குவிய வைத்திருக்கிறது.

விதிவசத்தால் வீதியில் வசிக்கும் நிலைக்கு தள்ளப்பட்ட ஒருவருக்காக பலரும் உருகி தவித்து, உதவி செய்திருக்கும் இந்த நிகழ்வுக்கு ஒரு யூடியூப் வீடியோதான் காரணம் என்பது ஆச்சர்யமான விஷயம். அதைவிட ஆச்சர்யமான விஷயம் அந்த வீடியோ நையாண்டி நோக்கத்தில் எடுக்கப்பட்டது என்பதுதான்.

வீடில்லாத ஒருவரை பொறியில் சிக்க வைக்க எடுக்கப்பட்ட அந்த வீடியோ, அதை எடுத்தவருக்கு மட்டும் அல்லாமல் மற்றவர்களுக்கும் சேர்த்தே மனிதநேய பாடத்தை புகட்டியிருக்கிறது.அதனால் தான் வீடியோ 2 கோடி முறைக்கு மேல் பார்த்து ரசிக்கப்பட்டுள்ளது.

மனதை நெகிழ வைக்கும் அந்த ஆச்சர்யமான கதையை பார்ப்போம்;

அமெரிக்கா இளைஞரான ஜோஷ் பேலர் லின் (Josh Paler Lin ) யூடியூப் உலகில் வெகு பிரபலம். ஜோஷ் குறும்பும் நையாண்டியும் கலந்த வீடியோக்களை தயாரித்து வெளியிட்டு, யூடியூப் உலகில் தனக்கென ரசிகர்களை தேடிக்கொண்டிருப்பவர். நிஜ வாழ்க்கையில் நண்பர்களிடம், அவர்கள் அறியாமல் குறும்பு செய்து திகைப்பில் ஆழ்த்தி ரசிக்க வைக்கும் பழக்கம் பலரிடம் உண்டல்லவா? அத்தகைய குறும்புக்காரர் தான் ஜோஷ். அவரது வேலையே இப்படி ஏதேனும் குறும்பு செய்து அதில் சிக்குபவர்களை வீடியோவில் படம் பிடித்து தன்னுடையை யூடியூப் சேனலில் வெளியிடுவதுதான். இதற்காக என்றே பிரத்யேகமாக யோசித்து புத்துப்புது குறும்புகளாக உருவாக்கி இருக்கிறார்.

இப்படிதான் கடந்த வாரம் அவர் , வீதிகளில் வசிக்கும் வீடில்லாத மனிதர் ஒருவரை சோதித்துப்பார்க்க தீர்மானித்தார்.

வீடில்லாத மனிதர் ஒருவரிடம் 100 டாலரை கொடுத்து அவர் என்ன செய்கிறார் என ரகசியமாக படம் பிடித்து வெளியிட வேண்டும் என்னும் நோக்கத்துடன் லாஸ் ஏஞ்சலஸ் நகரில் கண்ணில் பட்ட வீடில்லாத மனிதர் ஒருவரை தேர்வு செய்தார். அவர் யார் என்றும் தெரியாது. அவரது பெயரும் தெரியாது. அவரிடம் ஜோஷ் 100 டாலர்களை கொடுத்தார். வீடில்லாத மனிதருக்கு முதலில் ஆச்சர்யம். 100 டாலர்களை திகைப்புடன் வாங்கியவர், பின்னர் அது மிக அதிகம் என திருப்பிக்கொடுக்க முயன்றார். ஜோஷ் உங்களுக்குதான் பணம் என்று வலியுறுத்துக்கொடுத்தார்.

வீடில்லாத மனிதர் பணத்தை வாங்கி கொண்டு விடைபெற்று சென்றார். ஜோஷ் சிறுது இடைவெளி விட்டு அவரை ரகசியமாக பின் தொடர்ந்து சென்றார். எதிர்பாராமல் 100 டாலர் கையில் கிடைத்ததும் வீடில்லாத மனிதர் என்ன செய்கிறார் என அவர் படம் பிடித்துக்காட்ட விரும்பியிருந்தார். வீடில்லாத மனிதர் கொஞ்ச தூரம் நடந்து மதுக்கடை ஒன்றுக்கு சென்றார். சற்று நேரத்தில் திரும்பி வந்தார்.

இது வரை ஜோஷ் மனதில் உருவாக்கி வைத்திருந்த திரைக்கதை படி எல்லாம் நடந்தது, ஆனால் இதன் பிறகு அந்த வீடில்லாத மனிதர் செய்தது தான் ஜோஷ் கொஞ்சமும் எதிர்பாரதது. அந்த மனிதர் அருகே இருந்த பூங்காவுக்கு சென்று, அங்கே இருந்த தன்னைப்போன்ற வீடில்லாத மனிதர்களுக்கு தான் வாங்கி வைத்திருந்த உணவு பொருட்களை விநியோகிக்க துவங்கினார்.( மதுக்கடையில் அவர் உணவு பொருட்களைதான் வாங்கி வந்திருக்கிறார்) .

இந்த காட்சியை பார்த்ததும் ஜோஷ் வியந்து போனார். வீடில்லாதவர் கையில் கிடைத்த பணத்தை குடித்து மகிழ்வார் என நினைத்தற்காக தன்னை தானே நொந்துகொண்டார்.

உடனே அந்த மனிதரிடம் சென்று தான் அவரைப்பற்றி தவறாக நினைத்ததற்காக வருத்தம் தெரிவித்து மன்னிப்பு கேட்டுக்கொண்டார். அவரது செயலை படம் பிடிக்க திட்டமிட்டிருந்ததையும் ஒப்புக்கொண்டார்.

அப்போது அந்த மனிதர், “பணத்தை வாங்கி நான் குடித்து மகிழ்வேன் என நினைத்தீர்களா? பணத்தால் வாங்க முடியாத பல இருக்கின்றன, நான் செய்யும் செயல்கள் மூலம் மகிழ்ச்சியை பெற முயற்சிக்கிறேன் “ என்று பதில் சொல்லியிருக்கிறார். அதை கேட்டு நெகிழந்து போன ஜோஷ் அவரது பின்னணியை கேட்டிருக்கிறார்.

தாமஸ் எனும் பெயர் கொண்ட அந்த மனிதர் , நோயால் பாதிக்கப்பட்டிருந்த தனது பெற்றோர்களை கவனித்துக்கொள்வதற்காக வேலையை விடும் நிலை ஏற்பட்டதாகவும், அதன் பிறகு பெற்றோர்கள் இறந்துவிட , பார்த்து கொண்டிருந்த வேலை, இருந்த வீடு இரண்டும் போய் வீதிக்கு வந்துவிட்டதாக கூறியிருக்கிறார்.

ஜோஷ் அவரிடம் மீண்டும் 100 டாலர் பணத்தை எடுத்து கொடுத்து விட்டு , தனது போன் நம்பரையும் தந்து எந்த உதவி வேண்டுமானாலும் கேளுங்கள் என்று கூறியிருக்கிறார்.

பின்னர் இந்த முழு சம்வத்தையும் வீடியோவாக தனது சேனலில் பகிர்ந்து கொண்டார்.

“இது போன்ற ஒரு காட்சியை நான் எதிர்பார்க்கவில்லை, உண்மையை சொல்ல வேண்டும் என்றால் வீடில்லாதவர்களை வெளிப்படுத்த வேண்டும் என்று தான் நினைத்தேன். ஆனால் இத்தகைய ஒரு அருமையான காட்சியை படம் பிடிக்க முடிந்தது எனக்கு மகிச்சியை தருகிறது . இந்த சேனலின் வரலாற்றில் இதுதான் அற்புதமான தருணம். ஒரு வீடில்லாதவருக்கு நான் உதவ முடிந்ததுடன் ,ஒரு மகத்தான் மனிதர் மற்றும் நண்பரையும் சந்தித்துள்ளேன்” எனும் அறிமுகத்துடன் இந்த வீடியோவை பதிவேற்றியிருந்தார்.

வீடில்லாமல் வசிக்கும் எல்லோரும் சோம்பேறிகள் அல்ல, வெளித்தோற்றத்தை வைத்து யாரையும் எடைபோட்டு விடக்கூடாது என்றும் அதில் அவர் குறிப்பிட்டிருந்தார்.

இந்த வீடியோவை பார்த்த எல்லோருமே வீடில்லாத மனிதர் தாமசின் கருணையால் நெகிழ்ந்து போயினர். தன்னிடம் காசு இல்லாத நிலையிலும், தனக்கு கிடைத்த பணத்தை தன்னைப்போன்றவர்களுக்கு கொடுத்து மகிழந்த அவரது செயல் எல்லோரையும் உருக வைத்தது. அடுத்த சில நாட்களில் அந்த வீடியோ வைரலாக பரவியது. நான்கு நாட்களுக்குள் அந்த வீடியோ 2 கோடிக்கும் அதிமான முறை பார்க்கப்பட்டுள்ளது என்றால் பார்த்துக்கொள்ளுங்கள்’.

இதனிடையே ஜோஷ் அந்த மனிதருக்கு ஏதாவது செய்ய வேண்டும் என நினைத்து அவருக்காக நிதி திரட்டும் முயற்சியில் ஈடுபட்டார். இணையம் மூலம் நிதி திரட்டுவதற்கான இண்டிகோ கோ இணையதளத்தில் தாம்சுக்காக ஒரு பக்கத்தை துவக்க, அவருக்கு நிதி அளிக்க கோரிக்கை வைத்தார்.

தாமஸ் புது வாழ்வு துவங்க கைகொடுங்கள் எனும் கோரிக்கையோடு , இந்த வீடியோவையும் அதன் பின்னே உள்ள கதையையும் குறிப்பிட்டு நிதி உதவி கேட்டிருந்தார்.

தன்னிடம் எதுவும் இல்லாத நிலையிலும் அடுத்தவருக்கு உதவிய தாமசுக்கு உதவுவோம் என அவர் குறிப்பிட்டிருந்ததை இணையவாசிகள் பலரும் ஏற்றுக்கொண்டு நிதி அளித்தனர். விளைவு.. வீடியோ நான்கு நாளில் ஹிட்டானது போல் நான்கே நாட்களில் தாமசுக்கு உதவுதற்காக ஒரு லட்சம் டாலர்களுக்கு மேல் நிதி குவிந்திருக்கிறது. இன்னும் குவிகிறது.

நிதி அளித்த பலரும் இந்த பக்கத்தில் தாமஸ் பற்றி தங்கள் உணர்வுகளை பகிர்ந்து கொண்டு வருகின்றனர்,
தாமசுக்கு பலரும் கிறிஸ்துமஸ் வாழ்த்துக்களை தெரிவித்திருந்ததுடன் அவருக்கு உதவுதன் மூலம், இந்த கிறிஸ்துமஸ் கொண்டாட்டம் மிகவும் சிறப்புமிக்கதாக மாறியதாகவும் தெரிவித்திருந்தனர்.

” உங்கள் செயலால் அசந்து போனேன். உங்களைப்போல் மேலும் பலருக்கு கொடுக்கும் தன்மை வர வேண்டும். கிறிஸ்துமசின் உண்மையான அர்த்த்தை இது புரிய வைத்துள்ளது” என ஒருவர் குறிப்பிட்டிருந்தார்.

ஏறக்குறைய எல்லோரும் அதை கருத்தைதான் கொண்டிருந்தனர். கூடவே மனிதநேயத்தின் மகத்துவத்தை உணர்த்துவதாகவும் குறிப்பிட்டிருந்தனர்.

நெகிழ வைத்த அந்த வீடியோ;https://www.youtube.com/user/JoshPalerLin

தாமசுக்காக உருவாக்கப்பட்ட இணைய பக்கம்: https://www.indiegogo.com/projects/help-thomas-to-get-a-fresh-start

christian.jpg-pwrt2

உதவினார், உலகப்புகழ் பெற்றார்; இணையம் கொண்டாடும் வாலிபர்

அந்த வாலிபர் செய்தது சின்ன உதவி தான். ஆனால் அந்த செயல் அவரை இணைய உலகம் முழுவதும் பிரபலமாக்கி கொண்டாட வைத்திருக்கிறது. சில நேரங்களில் சரியான சின்ன செயல்கள் பெரிய அளவில் தாக்கத்தை ஏற்படுத்தும் என உணர்த்தியுள்ளது.

பிரிட்டனின் ஹார்விச் நகரைச்சேர்ந்த அந்த வாலிபரின் பெயர் கிரிஸ்டியன் டிரவுஸ்டேல்.(Christian Trouesdale ). 19 வயதாகும் கிறிஸ்டியன் கல்லூரியில் படித்துக்கொண்டே ஆல்டி எனும் டிபார்ட்மண்டல் ஸ்டோரில் பகுதிநேர ஊழியராக இருக்கிறார்.

சமீபத்தில் அவரது கடைக்கு 96 வயது முதியவர் ஒருவர் வந்திருக்கிறார். வயோதிகம் காரணமாக தளர்ந்திருந்த அந்த முதியவரை வாலிபர் கிறிஸ்டியன் கைத்தாங்கலாக அவரது வீடு வரை அழைத்துச்சென்று விட்டு வந்தார். சிறிய உதவி தான். ஆனால் மனிதாபிமானத்தையும்,பெரியவர்கள் மீதான பரிவையும் வெளிப்படுத்திய செயல்.
ஹார்விச் என்பது பிரிட்டனில் மான்செஸ்டர் அருகே இருக்கும் போல்டனில் அமைந்துள்ள சிறிய ஊர். அங்கு ஒரு சூப்பர் மார்கெட்டில் வெளிப்பட்ட இந்த மனிதநேயம் மிக்க செயல் உள்ளூர்வாசிகளுக்கே கூட தெரியாமல் போயிருக்கலாம். வாலிபர் கிறிஸ்டியனும் தனது செயலை மிக இயல்பானதாகவே கருதியதால் அதை இக்கால வழக்கப்படி பேஸ்புக்கில் படம் பிடித்து நிலைத்தகவலாக வெளியிட்டுக்கொள்ள முற்படவில்லை.

உண்மையில் கிறிஸ்டியன் பெரியவருக்கு இதே போல உதவியது இது இரண்டாவது முறை. இந்த சம்பவத்திற்கு ஒரு வாரம் காலம் முன் அந்த பெரியவர் கடைக்கு வந்த போது வெளியே பேய்க்காற்று அடித்துக்கொண்டிருந்தது. இதனால் பெரியவர் தானாக நடந்து செல்ல தயங்கி கொண்டிருந்தார். இதைப்பார்த்த கிறிஸ்டியன், தனது மேலாளரிடம் அனுமதி கேட்டுக்கொண்டு அவரை கைப்பிடித்து அழைத்து வீட்டில் விட்டு வந்தார். அந்த உரிமையில் தான் பெரியவர் மறுமுறை வாலிபரின் உதவியை கோர அவரும் மகிழ்ச்சியுடன் அதை நிறைவேற்றினார்.எனினும் அவர் பேஸ்புக் பகிர்வு பற்றி எல்லாம் யோசிக்கவில்லை.

ஆனால் சமந்தா பிராடி மற்றொரு பேஸ்புக் பயனாளி வாலிபரின் இந்த செயல் பாராட்டுக்குறியது என்றும் இதை உலகுடன் பகிர்ந்து கொள்ள வேண்டும் என்றும் நினைத்தார். இந்த காட்சியை நேரில் பார்த்த சாட்சி. வாலிபர் கிறிஸ்டியன் முதியவரை அன்போடு பொறுமையாக கைப்பிடித்து அழைத்துச்சென்றதை பார்த்து சமந்தா , அட இந்த பையன் தான் எத்தனை பொறுப்பாக இருக்கிறான் என நெகிழந்திருக்கிறார்.

அருகாமையில் உள்ள நிறுவனம் ஒன்றில் வேலை பார்க்கும் சம்ந்தா, கிறிஸ்டியன் செயலை பாராட்டியதோடு ,இந்த தகவலையும் புகைப்படத்தையும் தனது பேஸ்புக் பக்கத்தில் பகிர்ந்து கொள்ளவும் அனுமதி கேட்டார்.
அதன் படி தனது பேஸ்பக் பக்கத்தில் பகிர்ந்து கொள்ளவும் செய்தார். இதை நான் பகிர்ந்து கொண்டே ஆக வேண்டும் எனும் அறிமுக வரியுடன் இந்த தகவலை பகிர்ந்து கொண்டார். வாலிபர் கிறிஸ்டியனின் அன்பான,கணிவான ,சிந்தனைமிக்க செயலை பாராட்டியவர், மனிதகுலம் மீது நம்பிக்கை ஏற்படுத்துவதற்காக இந்த வாலிபரின் செயலுக்கு கொஞ்சம் அங்கீகாரம் தேடித்த விரும்புவதாகவும் குறிப்பிட்டிருந்தார்.

அவர் விரும்பியது போலவே சக பேஸ்புக பயனாளிகள் பலரும் வாலிப்ரைன் இந்த செயலை மனதார பாராட்டி அவர் கைத்தட்டலுக்கும் பூங்கொத்துக்கும் தகுதியானவர் என முடிவு செய்தனர். அந்த எண்ணத்துடனே இந்த தகவலுக்கு லைக் தெரிவித்து இதை தங்கள் நட்பு வட்டத்திலும் பகிர்ந்து கொண்டனர். விளைவு இந்த தகவலும் படமும் பேஸ்புக்கில் வைரலாக பரவியது. பார்த்தவர்கள் எல்லாம் பாராட்டும் தெரிவித்தனர்.
அமெரிக்க முதல் கனடா, நியூசிலாந்து என உலகின் பலநாடுகளில் இந்த தகவல் பேஸ்புக்கில் பகிரப்பட்டு பலரும் தங்கள் பாராட்டுகளை பதிவு செய்தனர்.

இவ்வாறு இரண்டு லட்சம் முறைகளுக்கு மேல் கைல் செய்யப்பட்டு கிட்டத்தட்ட ஒரு லட்சம் பேரால் இந்த தகவல் ஷேர் செய்யப்பட்டுள்ளது. ஆயிரக்கணக்கானோர் பின்னூட்டம் மூலம் வாழ்த்து தெரிவித்துள்ளனர்.
இந்த செயலைப்பார்த்து உனது அம்மா நிச்சயம் பெருமை கொள்வார் என ஒரு பயனாளி குறிப்பிட்டிருந்தார்.
இனொருவர் நீ மிகப்பெரிய ஆசிர்வாதம் என தெரிவித்திருந்தார். இது போன்ற செயலை நான் அதிகம் பார்க்கமாட்டேன் என நினைத்துக்கொண்டிருந்தேன் என இன்னொருவர் கூறியிருந்தார். இன்னொருவரோ இவரைப்போன்ற வாலிபர்கள் அதிகம் தேவை என கூறியிருந்தார். இப்படி வாலிபருக்கு வாழ்த்துக்கள் குவிந்து ஒரே நாளில் உலகம் அறிந்தவராக மாறியிருக்கிறார்.

பேஸ்புக் மூலம் கிடைத்திருக்கும் இந்த கவனம் எதிர்பாராதது என்று வாலிபர் கிறிஸ்டியன் லேசான சங்கடத்துடன் தெரிவித்துள்ளார்.
இது மிகவும் விநோதமாக இருக்கிறது,ஏனெனில் இந்த செயல் தனக்கு இயலபானது, பெற்றோர்கள் , மற்றவர்கள் நம்மை நடத்த விரும்புவது போலவே அவர்களிடம் நடந்து கொள்ளும்படி தன்னை வளர்த்திருப்பதாக அவர் கூறியுள்ளார்.

வாலிபரை பிரபலமாக்கிய பேஸ்புக் பகிர்வு: https://www.facebook.com/Youniquebybrady/posts/10206133693811604

—-

ikid1

அப்பாவின் சிகிச்சைக்கு நிதி திரட்டிய இணைய குழந்தை!

மகன் தந்தைக்கு ஆற்றும் உதவி என்பார்களே,அதே போல இணைய நட்சத்திரமாக விளங்கிய குழந்தை இன்று சிறுநீரக கோளாறால் வாடும் தந்தையின் மருத்துவ செலவிற்காக நிதி திரட்டி கொடுத்து நெகிழ வைத்திருக்கிறார்.
முதலில் கொஞ்சம் பிளேஷ்பேக்.

இணைய வரலாறை திரும்பி பார்க்கும் போது, இணைய குழந்தை வெற்றி புன்னகையோடு கையுர்த்தி நிற்கும் காட்சியை கட்டாயம் பார்க்கலாம். இணையம் முழுவதும் பரவிய இணைய நிகழ்வுகளில் ஒன்றாக இந்த புகைப்படம் கருதப்படுகிறது. நீங்களும் கூட அந்த புகைப்படத்தை பார்த்து ரசித்திருக்கலாம்.அல்லது இப்போது இணையத்தில் இண்டெர்நெட் கிட் என டைப் செய்து பார்த்தால் கூட அந்த புகைப்படத்தை பார்த்து ரசிக்கலாம்.
அந்த புகைப்படத்தில் இருப்பது சாம் கிரின்னர். படம் எடுக்கப்பட்ட போது கிரின்னரெ 11 மாத குழந்தை. கடற்கரை மணலில் எடுக்கப்பட்ட அந்த புகைப்படத்தை சேமின் அம்மா லானே கிரின்னர் புகைப்பட பகிர்வு தளமான பிலிக்கரில் பகிர்ந்து கொண்டார்.

கைப்பிடி கடல் மண்ணுடன் கள்ளச்சிரிப்பு சிரித்தபடி வெற்றி எனதே என்பது போல கம்பீரமாக போஸ் அந்த குழந்தை கொடுத்த போஸ் காண்பவர்களை கவர்ந்தது. அதன் பிறகு மைஸ்பேஸ் வலைப்பின்னல் தளத்தில் பகிரப்பட்டு பிரபலமானது.
அவ்வளவு தான் அந்த படத்தை பார்த்த பலரும் அதனோடு புகைப்பட குறிப்பையும் சேர்ந்த்து பகிர்ந்து கொள்ளத்துவங்கினர்.

சூழ்நிலையை மீறி வெற்றி கொள்ளும் அல்லது நிம்மதி பெருமூச்சு விட வைக்கும் குறிப்புகளை இடம் பெற வைத்து இந்த புகைப்படத்தை பலரும் பகிர்ந்து கொண்டனர். இப்படி வைரலாக பரவி இணையம் முழுவதும் அந்த குழந்தையை வெற்றிக்குழந்தையாக கொண்டாடியது.

இப்போது குழந்தை சேமிக்கு 8 வயதாகிறது.இப்போது சேமியின் தாய் இணையத்தின் உதவியை நாடி வந்திருக்கிறார். அவரது கணவருக்கு அதாவது சேமியின் தந்தை சிறுநீரக கோளாறால் பாதிக்கப்பட்டிருக்கிறார்.கடந்த ஆறு ஆண்டுகளாக டயாலிசிஸ் சிகிச்சை எடுத்துக்கொண்டு வரும் ஜஸ்டின் கிரின்னருக்கு இப்போது சிறுநீரக மாற்று சிகிச்சை தேவைப்படுகிறது.
ikid2
அறுவை சிகிச்சை செலவு மற்றும் மருத்துவ செலவுக்கு தேவைப்படும் 75,000 டாலருக்கான நிதி திரட்ட சிறுவனின் அம்மா லேனே கிரின்னர் இணையத்தின் உதவியை நாடினார். இணைய நிதி திரட்டும் மேடையான கோஃபண்ட்மீ தளத்தில் கணவரின் சிகிச்சைக்காக நிதி உதவி கோரும் பக்கத்தை அமைத்தவர், ஜஸ்டினின் அம்மா சிறுநீரக கோளாரால் உயிரிழந்தார், ஆனால் ஜஸ்டினுக்கும் அவரது மகனுக்கும் அவ்வாறு நிகழக்கூடாது என வேண்டுகோள் விடுத்திருந்தார்.

கணவர் மற்றும் சிறுவன் சேமியிடன் இணைந்து இருக்கும் புகைப்படத்தை வெளியிட்டிருந்தவர், இந்த நிதி கோரிக்கை பற்றி டிவிட்டரிலும் தகவல் தெரிவித்திருந்தார்.
தனது டிவிட்டர் பக்கத்தில், அன்பான மக்களே இணைய குழந்தை தனது தந்தைக்காக நிதி திரட்டுக்கிறான் என குறிப்பிட்டு இந்த இணைய பக்கத்திற்கு இணைப்பு கொடுத்திருந்தார்.
சேமியை வெற்றிக்குழந்தையாக ஆக்கிய ஒவ்வொருவரும் ஒரு டாலர் கொடுத்தால் கூட போதும், அவனது அப்பா உயிரை காப்பாற்ற முடியும் என்றும் அடுத்த குறும்பதிவில் தெரிவித்திருந்தார்.
ikid3
அவ்வளவு தான், இந்த குறும்பதிவை பார்த்த பலரும், இணையக்குழந்தையின் அழகிய படத்தை நினைத்துப்பார்த்து அவனது தந்தைக்கு உதவுவது தங்கள் கடமை என நினைத்து டாலர்களை அள்ளிக்கொடுத்தனர். பலரும் இந்த செய்தியை தங்கள் சமூக வட்டத்தில் #SuccessKid எனும் ஹாஷ்டேகுடன் பகிர்ந்து கொண்டனர். இதன் பயனாக இந்த செய்தி இணையத்தில் வைரலாக பரவி சிகிச்சைக்கான நிதி குவிந்தது.
முதல் ஒரு வாரத்திலேயே கேட்ட தொகைக்கும் மேலாக நிதி குவிந்துவிட்டது.

நிதி அளித்தவர்கள் பலரும் இணையத்தில் சிறுவன் சேமியின் புகைப்படத்தை பார்த்து ரசித்ததை நினைவு கூர்ந்து தங்கள் கருத்துக்களையும் பகிர்ந்து கொண்டுள்ளனர்.

இந்த ஆதரவால் சேமியின் அம்மா லானே நெகிழந்து போயிருக்கிறார். நல்ல இணைய குழந்தையின் பெற்றோர்கள் என பெருமையாக குறிப்பிட்டுள்ள லானே, இணையத்தின் ஆற்றலையும் வீச்சையும் அறிந்து மகிழ்வதாக தெரிவித்துள்ளார்.

லானே அமைத்த நிதி திரட்டும் பக்கம்:http://www.gofundme.com/opp5cs

—-

le-1

இணைய நாயகியான மாணவி.

வேலைக்கோ கல்லூரி படிப்பிற்கோ விண்ணப்பிக்கும் போது நிராகரிப்பு கடிதம் வந்தால் நெஞ்சம் லேசாக நொறுங்கத்தான் செய்யும். அதிலும் அபிமாக கல்லூரிக்கு விண்ணப்பித்து காத்திருக்கும் போது இடமில்லை என்பதை நயமாக சொல்லும் கடிதம் வந்தால் மனது நொந்து நூடுல்சாக தான் செய்யும். நீங்க யான் என்னை நிராகரிக்க நான் உங்களை நிராகரிக்கிறேன் என்று கூட சொல்லத்தோன்றும்.

அமெரிக்க மாணவி ஒருவர் இதை தான் செய்திருக்கிறார். ஆனால் இந்த மறுநிராகரிப்பை அவர் கொஞ்சம் கவித்துவம் கலந்து கிரேயிட்டிவாக செய்து இணையவெளியில் கைத்தட்டல் வாங்கியிருக்கிறார். அவர் பகிர்ந்து கொண்ட நிராகரிப்பு கடிதம் சமூக வலைப்பின்னல் தளங்களில் ஆயிரக்கணக்கில் லைக் பெற்று அவரை இணைய நாயகியாக்கி இருக்கிறது.

அந்த மாணவியின் பெயர் சியோபான் ஒ’டெல். அமெரிக்காவின் வடக்கு கரோலினாவை சேர்ந்தவர். 17 வயதான ஓ’டெல் கண்களில் கனவுகளோடு டியூக் பலகலைக்கழகத்தில் சேர விண்ணப்பித்திருந்தார்.
ஆனால் கல்லூரியில் இடம் கிடைக்கும் அதிர்ஷ்டம் அவருக்கு இல்லை. மாறாக உங்களுக்கு இடம் அளிக்க முடியாததற்கு வருந்துகிறோம் எனும் நிராகரிப்பு இமெயில் தான் வந்து சேர்ந்தது.
le-2
இப்படி ஒரு கடிதம் வந்தால் எத்தகைய ஏமாற்றமும் ,கோபமும் ஏற்படுமோ அது தான் அவருக்கும் ஏற்பட்டது. ஆனால் இந்த நிராகரிப்பை அவர் அப்படியே ஏற்றுக்கொள்ள தயாராக இல்லை. பார்த்தார், இந்த நிராகரிப்பை தான் நிராகரிப்பதாக பலகலைக்கழகத்திற்கு ஒரு மெயில் அனுப்பினார். ஆனால் அதில் கோபத்தையோ, ஏமாற்றத்தையோ வெளிப்படுத்தாமல், ” உங்கள் நிராகரிப்பு கடிதம் கிடைத்தது. மிகவும் கவனமாக பரிசிலித்த பின் டியூக்கில் பட்டபட்டியில் 2015 ல் எனக்கு அனுமதி வழங்க நீங்கள் மறுத்ததை நான் ஏற்க முடியாமல் இருக்கிறேன்” என குறிப்பிட்டிருந்தார்.’
‘இந்த ஆண்டு நாட்டின் மிகச்சிறந்த பல்கலைக்கழகங்களில் இருந்து நிராகரிப்பு கடிதங்களை பெறும் அதிர்ஷ்டம் செய்திருக்கிறேன். இப்படி பர்ந்து விரிந்த நிராகரிப்பு கடிதங்களை பெற்றிருக்கும் நான் உங்கள் கடிதத்தை ஏற்க முடியாமல் இருக்கிறேன் என்றும் எழுதியிருந்தவர் ,முந்தைய மாணவர்களை நிராகரிப்பதில் டியூக் பல்கலை என்ன தான் சாதனைகள் செய்திருந்தாலும் என்னுடைய தேர்வு தகுதியை நீக்கள் பூர்த்தி செய்யவில்லை.. எனவே நான் புதிய வகுப்பிற்கு வருவேன்’ என்றும் முத்தாய்ப்பாக குறிப்பிட்டிருந்தார்.

ஏறக்குறைய பல்கலைக்கழகங்கள் அனுப்பும் நிராகரிப்பு கடித மொழியிலேயே இந்த கடிதத்தை அமைத்திருந்தார்.
இப்படி ஒரு மெயிலை எழுதியதும் அவருக்கு பல்கலைக்கழத்திற்கு சரியான பதிலடி கொடுத்த திருப்தி இருந்திருக்க வேண்டும்.

ஆனால், பல்கலைக்கழக நிர்வாகத்திற்கு இந்த மெயிலை அனுப்பியதுடன் அவர் நின்றுவிடவில்லை. இந்த மெயிலை அப்படியே ஸ்கேன் செய்து தனது டம்ப்ளர் வலைப்பதிவு பக்கத்தில் பகிர்ந்து கொண்டார்.
அவ்வளவு தான் , அந்த நிராகரிப்பு மெயிலை பார்த்தவர்கள் அதில் ஏமாற்றம் நயமாக வெளிப்பட்ட விதத்தால் வெகுவாக ஈர்க்கப்பட்டனர். உடனே அதை மறு பதிவு செயதனர். அதை பார்த்தவர்களும் அட இது நல்ல இருக்கே என ஈர்க்கபப்ட்டு தங்கள் பங்கிற்கு மறுபதிவு செய்ய அந்த கடிதம் சமூக வலைதள பரப்பில் வேகமாக பரவியது. பலர் டிவிட்டரில் அதை பகிர்ந்து கொண்டனர். கூடவே மாணவியை பாராட்டவும் மறக்கவில்லை.
தனது மெயில் இந்த அளவுக்கு பிரபலமாகும் என்பதை மாணவி ஒ’டெல் நிச்சயம் எதிர்பார்க்கவில்லை. சும்மா விளையாட்டாக தான் செய்தேன், இந்த அளவு பிரபலமாகும் எனத்தெரியவில்லை என அவர் வியந்து போயிருக்கிறார். இப்படி பிரபலமாகும் என்று தெரிந்திருந்தால் எழுத்து பிழைகளையும் திருத்தியிருப்பேன் என்று அழகாக அலுத்துக்கொண்டிருக்கிறார்.
le-3
ஓ’டெல் இணைய உலகில் பிரபலமானது மட்டும் அல்ல, நிராகரிப்பு இலக்கான டியூக் பல்கலைக்கழகம் அவரது மெயிலுக்கு பதிலும் அனுப்பியிருக்கிறது. அவர் நிராகரிக்கப்ப்ட திறமை குறைவு காரணம் இல்லை, போதிய இடம் இல்லாததே காரணம் என டியூக் பல்கலை நிர்வாகம் தெரிவித்துள்ளது.

வேண்டுமானால் மனு சீராய்வுக்கு விண்ணப்பிக்கலாம் என்றும் தெரிவித்துள்ளது.
சீராய்வு செய்யப்பட்டாலும் இடம் கிடைக்கும் வாய்ப்பு குறைவு தானாம். ஆனால் இடம் கிடைக்கிறதோ இல்லையோ மாணவி ஒ’டெல் அமெரிக்கா முழுவதும் அறியப்படவராக இருக்கிறார்.
கல்லூரியில் இடம் கிடைக்காமல் நிராகரிப்பு கடிதம் பெற்று வெறுத்து போகிறவர்கள் எல்லாம் தங்கள் சார்பாக அழகாக பதிலடி கொடுத்திருப்பதாக அவரை தலையில் வைத்து கொண்டாடாத குறையாக பாராட்டுகின்றனர்.

மாணவியின் நிராகரிப்பு மெயில்: http://scarrlettjohanson.tumblr.com/tagged/mine

———

( இந்த பதிவு விக்டன்.காமில் எழுதியது. இப்படி இணையம் மூலம் கவனத்தை ஈர்க்கும் சாமானியர்கள் பற்றி தொடர்ந்து எழுது வருகிறேன். இவர்களில் இணைய நெட்சத்திரங்களாக உயர்ந்தவர்கள் பற்றி விரிவான் அறிமுகமாக நெட்சத்திரங்கள் தொகுப்பு அமைந்துள்ளது: https://www.google.co.in/search?q=%E0%AE%A8%E0%AF%8D%E0%AE%A8%E0%AF%8D%E0%AE%A8%E0%AF%8D.%E0%AE%95%E0%AF%8B&oq=%E0%AE%A8%E0%AF%8D%E0%AE%A8%E0%AF%8D%E0%AE%A8%E0%AF%8D.%E0%AE%95%E0%AF%8B&aqs=chrome..69i57.1407j0j1&sourceid=chrome&espv=2&es_sm=93&ie=UTF-8#q=%E0%AE%A8%E0%AF%86%E0%AE%9F%E0%AF%8D%E0%AE%9A%E0%AE%A4%E0%AF%8D%E0%AE%A4%E0%AE%BF%E0%AE%B0%E0%AE%99%E0%AF%8D%E0%AE%95%E0%AE%B3%E0%AF%8D