மொழி காக்கும் சாப்ட்வேர்

ஆங்கிலத்தில்தான் எத்தனை விதமான ஆங்கிலம் இருக்கின் றன. நம்மூரில் ஆங்கிலம் கலந்த தமிழில் பேசுவதை தமிங்கிலிஷ் என்று சொல்கின்றனர். அதே போல வடநாட்டில் இந்தி மற்றும் ஆங்கிலம் கலந்து பேசுவதை இந்திங்கிலிஷ் என்று சொல்கின்றனர்.
இப்படி ஊருக்கு ஊர், நாடுக்கு நாடு ஆங்கிலம் வேறுபடுகிறது. ஆங்கிலத்தின் ஆதிக்கம் காரண மாக உள்ளூர் மொழிகள் பாதிக்கப் படுவதாக புகார் கூறப்படுகிறது. மொழிகள் முற்றாக அழிந்து போகாவிட்டாலும், ஆங்கில கலப்பால் அவற்றின் தூய்மை குறைந்து போவதாக கவலை தெரிவிக்கப்படுகிறது.

நவீன வாழ்க்கையில் ஆங்கி லத்தை தவிர்க்க இயலாமல் போகும்போது, இத்தகைய மொழிக்கலப்பையும் புறந்தள்ளு வதற்கு இல்லை. இத்தகைய மொழி கலப்பால் ஏற்படும் பாதிப்பு பற்றி மொழியி யல் வல்லுனர்கள் தீவிரமாக யோசனை செய்து வருகின்றனர். மொழிக்கலப்பிலிருந்து முற்றிலு மாக விடுபட முடியுமா என்று தெரியவில்லை. அதற்கான வழிகள் என்ன? அவை எந்த அளவுக்கு சாத்தியம்? என்ப தெல்லாம் விவாதத்துக்குரிய விஷயங்கள்.

ஆனால் இன்டெர்நெட் யுகத்தில் இந்த மொழி கலப்பு பற்றி கூடுத லாக கவலைப்பட வேண்டியிருக் கிறது. அல்லது வேறு விதமாக சொல்வதாயின், மொழி கலப்பு பற்றி அவ்வளவாக கவலைப்பட தேவையில்லாத நிலை ஏற்பட்டி ருக்கிறது என்று சொல்லலாம். இந்த இரண்டு கருத்துக்களும் ஒன்றுக்கொன்று முரண்போல தோன்றலாம்.

ஆனால் இதில் முரண் எதுவும் இல்லை. நோய்க்கு நோயே மருந்து என்று வல்லுவர் காதல் பற்றி கூறியது போல, இந்த பிரச்சனைக்கு இன்டெர் நெட்டே மருந்தாகியிருக்கிறது.
இன்டெர்நெட்டில் ஆங்கிலத் தின் ஆதிக்கம் அதிகம் இருப்ப தாக கூறப் படுகிறது. இது
வெளிப்படையாக தெரிந்த விஷயம்தான்.

இன்டெர்நெட் முகவரிகளில் தொடங்கி, இன்டெர்நெட்டில் இடம் பெற்றுள்ள தகவல்கள் வரை எல்லாமே ஆங்கில மயம்தான். மற்ற உலக மொழிகள் எல்லாம் ஆங்கிலத்துக்கு அடுத்த நிலையில்தான் உள்ளன.

எந்த நாட்டைச் சேர்ந்தவராக இருந்தாலும் ஆங்கிலத்தில் தகவல்களை தேடுவது மற்றும் ஆங்கிலத்திலேயே தகவல்களை பதிவு செய்வது என்பது வெகு இயல்பானதாக இருக்கிறது.
தாய்மொழியில் இன்டெர் நெட்டை பயன்படுத்துவது என்பது பல நாடுகளில்குறைவா கவே உள்ளது. உலகின் நாகரீக தொட்டிகளில் ஒன்றான கிரீஸ் நாட்டிலும் இதே நிலைதான்.

கிரீஸ் நாட்டில் உள்ளவர்கள் கிரேக்க மொழியை வெகு வேகமாக மறந்து வருவதாக ஒரு கருத்து இருக்கிறது. இன்டெர் நெட் யுகத்தில் இது இன்னமும் தீவிரமாகியிருப்பதாக கூறப் படுகிறது. கிரீஸ் நாட்டில் உள்ளவர்கள் குறிப்பாக இளைய தலைமுறை யினர் இமெயில் அனுப்புவதில் தொடங்கி, பிலாக் தளங்களில் கருத்துக்களை பதிவு செய்வது வரை லத்தீனும், ஆங்கிலமும் கலந்த மொழியைத்தான் பயன்படுத்துகின்றனராம்.

கிரீக்ங்கிலிஷ் என்று பிரபலமாக குறிப்பிடப்படும் இந்த மொழிக் கலப்பு செல்போனில் எஸ்எம்எஸ் செய்தி அனுப்புவதிலும் ஆதிக்கம் செலுத்துகின்றதாம். இதன் காரணமாக கிரீஸ் நாட்டில் கிரேக்க மொழியின் பயன்பாடு நாளுக்கு நாள் குறைந்து கொண்டு வருகிறது. இது நிச்சயம் பிரச்சனைதான்.

ஆனால் இந்த பிரச்சனையை சமாளிக்க கிரீஸ் நாட்டில் உள்ள தொழில்நுட்ப கில்லாடிகள் ஒரு புதிய வழியை கண்டுபிடித் துள்ளனர். அவர்கள் கிரேக்க மொழியிலேயே தகவல்களை பதிவு செய்யக்கூடிய சாப்ட் வேரை உருவாக்கியுள்ளனர்.

இந்த சாப்ட்வேரை பயன்படுத்த கிரேக்க மொழி தெரிந்திருக்க வேண்டும் என்ற அவசியம் இல்லை. எல்லோரும் தங்களுக்கு தெரிந்த கிரீக்ங்லிஷ் பாணியி லேயே தகவல்களை பதிவு செய்யலாம். இந்த சாப்ட்வேர் கிரீக்ங்லிஷ் பாணியில் உள்ள தகவல்களை தானாகவே கிரேக்க மொழியில் மாற்றித்தந்து விடும். இவ்விதமாக கிரேக்கர்கள் கிரேக்க மொழியிலேயே தகவல்களை இடம்பெறச் செய்யலாம்.

இன்டெர்நெட் மூலம் கிரேக்க மொழியின் பயன்பாட்டை ஊக்குவிக்க நினைக்கும் அமைப்பு ஆல் கிரீக் டூ மீ என்னும் பெயரில் இந்த சாப்ட்வேரை உருவாக்கியுள்ளது. கிரேக்கநாட்டைச் சேர்ந்த பலர் இதனை வரவேற்றுள்ளனர். அதிலும் குறிப்பாக வெளி நாடுகளில் வசிக்கும் கிரேக்கர்கள் இதனை இருகரம் நீட்டி வரவேற்றுள்ளனர். ஆனால் இன்னும் சில தீவிர கிரேக்க மொழி ஆர்வலர்களோ பிரச்சனைக்கு தீர்வு காண்பதற்கு பதிலாக இந்த சாப்ட்வேர் கிரீக்ங்லிஷ் பயன் பாட்டைத்தானே ஊக்குவிக்கும் என்று புலம்புகின்றனர்.

செல்போன் குறுக்கு வழி

இருந்த இடத்தில் இருந்தே இன்டெர்நெட்டை அணுகும் வசதி. செல்போன் மூலம் இன்டெர்நெட் இணைப்பை பெறுவது, இந்த நிலையைத்தான் ஏற்படுத்தி இருக்கிறது. இந்த வசதி காரணமாக இன்டெர்நெட்டை அணுகும் விதமே மாறி வருவதாக கருதப்படுகிறது.

இன்டெர்நெட்டை அணுகுவதற்கு இன்டெர்நெட் மையங்களையோ, வீட்டில் உள்ள கம்ப்யூட்டரையோ சார்ந்திராமல், கையில் இருக்கும் செல்போன் மூலமே வலையை வரவைத்து விடுவது. நினைத்த நேரத்தில் தகவல்களை தேடிக் கொள்ள மற்றும்சேவைகளை பெற வழி செய்திருக்கிறது.

ஆனால் செல்போன் மூலம் இன்டெர்நெட்டை அணுகுவதில் நிறைய சிக்கல்கள் இருக்கின்றன. முதலில் அதற்கேற்ற நவீன செல்போன் மற்றும் இன்டெர்நெட் சேவைக்கு ஈடுகொடுக்கக்கூடிய செல்போன் இணைப்பு ஆகியவை தேவை. மேலும் இதற்கான விசேஷ சாப்ட்வேர்களும் தேவைப்படுகிறது.

செல்போனின் சின்னத்திரை இன்டெர்நெட் பயன்பாட்டில் மிகப்பெரிய தடையாக இருப்பதாக கருதப்படுகிறது. இந்த பிரச்சனைக்கான மாற்று வழிகளை கண்டறியும் முயற்சிகளும் நடைபெற்று வருகின்றன.

செல்போனின் இன்டெர்நெட்டை அணுகுவதில் மற்றொரு பிரச்சனையும் இருக்கிறது. இதுவரை அதனை யாரும் பெரிதாக கருதவில்லை. ஆனால் செல்போன் சார்ந்த இன்டெர்நெட் பயன்பாடு அதிகரிக்கக்கூடிய நிலையில், இந்த பிரச்சனையை எல்லோருமே உணரத் தொடங்கலாம். பலரும் இந்த பிரச்சனையை உணர்வதற்கு முன்பாகவே ஆஸ்திரேலிய வாலிபர் ஒருவர் இதற்கான தீர்வை முன்வைத்திருக்கிறார்.

செல்போன்களுக்கு ஏற்ற வகையில் இணையமுகவரிகளை மாற்றி அமைக்கும் சேவையை டிஜிட் யூஆர்எல்(www.digiturl.com) என்னும் பெயரில் அவர் அறிமுகம் செய்திருக்கிறார். சிறிய அளவிலான இன்டெர்நெட் முகவரிகளை நினைவில் வைத்து கொள்வதிலோ, டைப் செய்வதிலோ எந்த பிரச்சனையும் இல்லை. உதாரணத்திற்கு சி.என்.என்.டாட்காம், பி.பி.சி.டாட்காம் போன்றவை.
ஆனால் எல்லா இணைய முகவரிகளும் இப்படி எளிமையாக இருப்பதில்லை.

நீளமான இணையமுகவரிகள் இருக்கின்றன. அதுமட்டுமல்லாமல் இணையதளத்தில் குறிப்பிட்ட பக்கத்துக்கு செல்லவேண்டுமானால் அதனை குறிப்பிடும் முகவரி சிக்கலானதாகவே இருக்கும். கம்ப்யூட்டரில் இவற்றை டைப் செய்வது சிக்கலானது.

அப்படியிருக்க செல்போனின் சின்ன விசைப்பலகையில் சிக்கலான இணையமுகவரிகளை டைப் செய்வது சுலபமான காரியமில்லை. இந்த பிரச்சனையை தீர்க்கத்தான் டிஜிட் யூஆர்எல் சேவை அறிமுகமாகியிருக்கிறது.

இந்த சேவையை பயன்படுத்தும் போது, இணையமுகவரியை செல்போனில் டைப் செய்ய வேண்டிய அவசியமில்லை. அதற்கு மாறாக குறிப்பிட்ட எண்ணை டைப் செய்தால் போதும்.
இணையமுகவரிகளை எண்ணாக மாற்றும் வசதியை டிஜிட்யூஆர்எல் வழங்குகிறது.

எனவே எந்த முகவரியையும் நேரடியாக குறிப்பிடாமல் அவற்றுக்கான எண்ணை டைப் செய்வதன் மூலம் சம்பந்தப்பட்ட இணையதளங்களை எளிதாக செல்போன் மூலம் அணுகிவிட முடியும்.

செல்போனில் எழுத்துக்களை டைப் செய்வது சிக்கலானது என்பதை அனைவரும் அறிந்திருக்கலாம். ஆனால் செல்போனில் எண்களை டைப் செய்வது மிகவும் இயல்பானதாகவே இருக்கிறது.

அந்த வகையில் இப்படி குறிப்பிட்ட எண்களை டைப் செய்வதன் மூலம் இணையதள முகவரிகளை அணுகுவது செல்போன் வைத்திருப் பவர்களுக்கு பேருதவியாக இருக்கும்.
ஆஸ்திரேலியாவைச் சேர்ந்த ஆன்ட்ரூ கிரே என்னும் வாலிபர் இந்த சேவையை உருவாக்கியிருக்கிறார்.

ஏற்கனவே சிக்கலான இணையமுகவரிகளுக்கு மாற்றாக எளிமையான இணையமுகவரிகள் டைனியூஆர்எல் என்னும் பெயரில் வழங்கப்பட்டு வருகின்றன. இதே போல செல்போன்களுக்கான குறுக்கு வழி சேவையாக டிஜிட் யூஆர்எல்லை உருவாக்கியிருப்பதாக கிரே கூறுகிறார்.

எதிர்காலத்தில் செல்போன் மூலம் இன்டெர்நெட்டை அணுகுவது பன்மடங்கு அதிகரிக்கக்கூடிய நிலையில் இந்த சேவை மிகவும் தேவையானதாக இருக்கும் என்று அவர் கருதுகிறார்.

டிஜிட்யூஆர்எல் இணைய தளத்தில் இருந்து இதற்கான சாப்ட்வேரை இலவசமாக டவுன்லோடு செய்து கொள்ளலாம். ஜாவா சாப்ட்வேர் செயல்படக்கூடிய எல்லா போன்களும் இது செயல்படும். இந்த சேவையை கம்ப்யூட்டரில் பயன்படுத்தும் வசதியும் இருக்கிறது. கம்ப்யூட்டரில் நாம் பார்க்கும் இணைய தளங்களில் பின்னர் பயன்படுத்துவதற்காக சேமித்து வைத்து கொள்ளும் வசதியும் உண்டு.

பத்திரிகை கட்டுரைகளை படிப்பது, இன்டெர்நெட் ஷாப்பிங் செய்வது, பிராட்காஸ்டிங் மற்றும் வரைபட விவரங்களை பெறுவது போன்ற விஷயங்களில் இந்த சேவை மிகவும் உதவியாக இருக்கும் என்று கிரே தெரிவிக்கிறார்.

தொழில்நுட்பத்தின் மீது மிகுந்த ஆர்வம் கொண்ட இவர், கடந்த ஓராண்டுகளுக்கும் மேலாக முயற்சி செய்து இந்த சேவையை உருவாக்கி யிருக்கிறார். இன்டெர்நெட் மற்றும் செல்போனின் பயன்பாடு வேகமாக மாறிவருவதை கருத்தில் கொண்டு இந்த சேவையை உருவாக்குவதற் கான எண்ணம் பிறந்ததாக அவர் கூறுகிறார்.

செல்போன் மூலம் இன்டெர் நெட்டை பயன்படுத்துவது என்பது எளிதாக இருக்க வேண்டும் என்பது தனது நோக்கம் என்று அவர் கூறுகிறார்

சிறைப்பறவைகளின் யூடியூப் நடனம்

கோலிவுட்டிலும், ஹாலிவுட்டி லும் எந்தப்படம் ஹிட்டாகும் என்பதை கூட கண்டுபிடித்து விடலாம் போலிருக்கிறது, யூடியூப் பில் எந்த வீடியோ கோப்பு புகழ் பெறப் போகிறது என்பதை கணிக் கவே முடியாது போலிருக்கிறது. வீடியோ கோப்புகளை பகிர்ந்து கொள்வதற்கான யூடியூப் தளத்தில் லட்சக்கணக்கான வீடியோ கோப்புகள் பதிவேற்றப்பட்டு வந்தாலும், திடீரென குறிப்பிட்ட ஒரு வீடியோ கோப்பு பலரால் பார்க்கப்பட்டு, அவர்களால் மற்ற வர்களுக்கு பரிந்துரைக்கப்பட்டு, உலகம் முழுவதும் பிரபலமாகி விடுகிறது.
அதன் பிறகு அந்த வீடியோ கோப்பில் அப்படி என்ன சிறப்பு இருக்கிறது. அது ஏன் உலகின் கவனத்தை கவர்ந்தது என்றெல்லாம் ஆராய்ச்சி செய்ய வேண்டியிருக்கிறது. யூடியூப்பில் இடம் பெறும் லட்சக் கணக்கான வீடியோ கோப்புகளில் எது பிரபலமாகிறது என்பதற்கான பொதுத் தன்மையோ, உள்ளடக்கிய சூத்திரமோ இன்னமும் கண்டு பிடிக்கப்படவில்லை. அப்படி ஒன்று இருக்கிறதா என்றும் தெரிய வில்லை. ஒரு சில வீடியோ கோப்புகள் மட்டும் யூடியூப்பில் பிரபலமாகி விடுகிறது என்பது மட்டும் உண்மை. தற்போது யூடியூப்பில் இப்படி பரபரப்பை ஏற்படுத்தியிருக்கும் வீடியோ கோப்பு பிலிப்பைன்ஸ் நாட்டைச் சேர்ந்தது.

பிலிப்பைன்ஸ் என்றதும் பல விஷயங்கள் நினைவுக்கு வரலாம். ஆனால் அதில் அந்நாட்டு சிறைச் சாலைகளுக்கு நிச்சயம் இடமில்லை. ஆனால் ஆச்சர்யப்படும் அளவுக்கு அந்நாட்டின் சிறைச்சாலை ஒன்று, யூடியூப் மூலம் உலகப்புகழ் பெற்றிருக்கிறது.
பிலிப்பைன்சின் மத்திய பகுதி களில் உள்ள செபு என்னும் இடத்தில் இந்த சிறைச்சாலை அமைந்திருக்கிறது. இந்த சிறைச்சாலையில் உள்ள கைதிகள் நடனமாடும் காட்சி யூடியூப்பில் இடம் பெற்று உலகில் உள்ள லட்சக்கணக்கானோரால் பார்க்கப் பட்டு, இன்டெர்நெட் உலகில் பெரும் பரபரப்பை ஏற்படுத்தி இருக்கிறது.

இந்த சிறைச்சாலையில் உள்ள 1600 கைதிகள் ஆரஞ்சு நிற உடை அணிந்து பின்னணி இசைக்கேற்ப நடனமாடும் காட்சி அது. காதுக்கும் சரி, கண்ணுக்கும் சரி இனிமையாக அமைந்திருக்கும் அந்த வீடியோ காட்சி, லட்சக்கணக்கானோரை கவர்ந்திழுத்திருக்கிறது.
இதன் மூலம் யூடியூப் பற்றிய செய்திகளில் இந்த வீடியோ காட்சி முதலிடத்தை பிடித்து மேலும் பலரை இந்த வீடியோ காட்சி பார்க்க வைத்திருக்கிறது. இந்த வீடியோ படம் பிரபலமா னது, வியப்பிலும் வியப்பானது தான். இந்த காட்சியில் அப்படி என்ன இருக்கிறது என்று தெரிய வில்லை.

யூடியூப்பில் வெற்றிபெறும் பெரும்பாலான வீடியோ கோப்பு களை போல, யூடியூப்புக்காக என்று தயாரிக்கப்பட்ட கோப்பு அல்ல இது. மேலும் யூடியூப்பின் வெற்றியை குறிவைத்தும் இது தயாரிக்கப்பட வில்லை. செபு சிறைச்சாலையின் அதிகாரி பைரென்கிரேசியா என்பவர், சிறை கைதிகளுக்கு விசேஷ பயிற்சி அளிக்க வேண்டும் என்று விரும்பினார் அவர்களின் நன்னடத்தைக்கு உதவும் வகையில், அவர்களின் அலுப்பை போக்கும் வகையிலும் அந்த பயிற்சி அமைந்திருக்க வேண்டும் என்று அவர் நினைத்தார்.

இதற்காக ஆரம்பத்தில் அவர் ராணுவ அணிவகுப்பு போல கைதிகளுக்கும் அணிவகுப்பு நிகழ்ச்சியை ஏற்படுத்தினார். முதலில் முரண்டுபிடித்த கைதிகள், பின்னர் கட்டுப்பாட்டோடு அணிவகுத்து வந்தனர். அந்த காட்சியை பார்த்ததும், கைதிகள் ரசித்து மகிழும் வகையில் இசை மயமான பயிற்சி அளிக்கலாமே என்று அவருக்கு தோன்றியது. இதனையடுத்து மைக்கேல் ஜாக்சனின் பாப் பாடலுக்கு ஏற்ப கைதிகளை நடனமாட வைத்தார்.

ஆரஞ்சு நிற உடை அணிந்து, கைதிகள் இந்த பாடலின் மெட்டுக்கு ஏற்ப தாள லயத்தோடு ஆடினர். இந்த பயிற்சிக்கு நல்ல பலன் இருந்தது. கிட்டத்தட்ட ஒருமாத கால உழைப்புக்கு பிறகு கைதிகள் ஒத்திசைவோடு, பாடலுக்கேற்ப ஆடினர். இந்த பயிற்சியின் அருமையை தன்னுடைய சக அதிகாரிகளோடு பகிர்ந்து கொள்வதற்காக கிரேசியா இதனை வீடியோவில் படம் பிடித்து அதனை யூடியூப்பில் இடம் பெற வைத்தார்.

ஆனால் தற்செயலாக பார்ப்பவர் களுக்கு இந்த காட்சி மிகவும் பிடித்துப்போக, யூடியூப் கலாச்சாரத் தின்படி அதனை தங்கள் நண்பர்க ளோடு பகிர்ந்து கொண்டனர். அவ்வளவுதான் இந்த கோப்பு பற்றிக்கொண்டு விட்டது. விரைவில் யூடியூப் சமூகம் முழுவ தும் இந்த கோப்பு பரவி, நம்பர் ஒன் அந்தஸ்தை பெற்று விட்டது.

ஆனால் கைதிகளுக்கு இந்த பயிற்சி அளித்த கிரேசியாவோ, யூடியூப் வெற்றியை பெரிதாக நினைக்க வில்லை. இந்த பிரபலத்தை விட இப்பயிற்சி கைதிகள் மத்தியில் ஒழுங்கு ணர்வை கொண்டு வந்திருப்பதே மகிழ்ச்சியை தருவதாக அவர் கூறுகிறார். இருப்பினும் கைதிகள் தாங்கள் உலகப்புகழ் பெற்றிருப்பதை நினைத்து மகிழ்ச்சி அடைந்திருப்பதோடு பெருமிதமும் கொள்கின்றனர்.

——–

youtube link adress; -http://in.youtube.com/watch?v=hMnk7lh9M3o
——-

உலகம் முழுவதும் உதவி

உங்கள் வீட்டு வாஷிங்மிஷன் பழுதாகி விட்டது என்று வைத்துக் கொள்ளுங்கள். நீங்கள் என்ன செய்வீர்கள்? இது என்ன கேள்வி? அந்த மிஷினை தயாரித்த கம்பெனி அல்லது டீலருக்கு போன் செய்து உதவி கோருவீர்கள்.
.
சம்பந்தப்பட்ட கம்பெனி உடனடியாக யாரையாவது அனுப்பி வைக்கலாம்; அல்லது நாள் கணக்கில், வாரக் கணக்கில் இழுத்தடிக்கலாம். பிரச்சனை அதுவல்ல. உண்மையில் வாஷிங்மிஷினில் ஏற்பட்ட பழுது மிகச் சிறிய தொழில்நுட்ப கோளாறாக இருக்கும். அதனை சரி செய்ய சில நிமிடங்கள்தான் ஆகும்.

அந்த விஷயம் தெரியாமல் நீங்கள் அல்லாடியிருப்பீர்கள். இதுவும் கூட பிரச்சனை அல்ல. வாழ்க்கையில் இதெல்லாம் சகஜம்தானே! பிரச்சனை என்னவென்றால், செல்போன், கம்ப்யூட்டர், ஐபாடு, டிவிடி பிளேயர், ஏசி என நமது வீடு முழுவதும் நவீன சாதனங்களாக நிறைந்திருக்கும்போது அவற்றில் ஏதோவது பழுது ஏற்பட்டால், அதனை சரி செய்ய முடியாமல் முழி பிதுங்கி நிற்பது அடிக்கடி நேரும் அனுபவமாகி விட்டதுதான்.

வீட்டில் பயன்படுத்தும் கம்ப்யூட்டர் மானிட்டர் திடீரென செயலிழந்து போயிருக்கும். கம்ப்யூட்டரே கெட்டுப் போய் விட்டதோ என நீங்கள் திகைத்துப் போய் நிற்பீர்கள். ஆனால் விஷயமறிந்த உங்களது அலுவலக நண்பர், அதனை ஆப் செய்து விட்டு ரீஸ்டாட் செய்தால் எல்லாம் சரியாக போய் விடும் என்பது போல ஒரு குறிப்பை சொல்வார். என்ன ஆச்சரியம்! மானிட்டர் மீண்டும் உயிர் பெற்று விடும்.

செல்போன்கள் விஷயத்திலும் இதே நிலைதான். நவீன சாதனங்களில் எதிர்பாராமல் ஏற்படும் சின்ன சின்ன பழுதுகள் குறைந்தபட்சம் இந்த நேரத்துக்கு நமது வாழ்க்கையை முடக்கி போட்டு விடுகிறது.

அதற்கு தீர்வு காண்பது பெரும் சோதனையாக மாறி விடுகிறது. நிறுவனத்தை அணுகுவதோ அல்லது நிபுணர்களை நாடுவதோ மட்டும்தான் நமக்கு தெரிந்த உபாயமாக இருக்கிறது.
அதிர்ஷ்டசாலிகள் சிலருக்கு விஷயமறிந்த நண்பர்கள் அல்லது தெரிந்தவர்கள் இதற்கான தீர்வை தங்கள் அனுபவத்தின் மூலம் அழகாக சொல்லி விடுகிறார்கள்.

எல்லோருமே இப்படி அதிர்ஷ்டசாலிகளாக உணரக் கூடிய இணையதளம் ஒன்று இஸ்ரேல் நாட்டின் தொழில்முனைவோரால் தொடங்கப்பட்டுள்ளது. அந்நாட்டை சேர்ந்த பென் சடான் என்பவர் பிக்ஸ் யா எனும் பெயரில் இந்த தளத்தை அமைத்திருக்கிறார்.

வாஷிங்மிஷினில் தொடங்கி ஐபாடு, அதை விட சூப்பர் எம்.பி.3 பிளேயர், ஐபோன், ஸ்மார்ட் போன் என எந்த நவீன தொழில்நுட்ப சாதனத்தில் பிரச்சனை ஏற்பட்டாலும் அந்த பிரச்சனையை இந்த தளத்தில் குறிப்பிட்டு உதவி கோரலாம்.

உலகில் எங்காவது ஒரு மூளையில் இருக்கும் நபர் யாராவது இந்த பிரச்சனையை தீர்க்கும் வழியை பதிலாக குறிப்பிடுவார்கள். நமக்குத்தான் அது பெரிய பிரச்சனையாக தெரியுமே தவிர, விஷயமறிந்தவர்களுக்கு அல்லது இது போன்ற பிரச்சனைகளை ஏற்கனவே சந்தித்தவர்களுக்கு அதனை தீர்க்கும் உபாயம் தெரிந்திருக்கும்.

இப்படி உலகம் முழுவதும் தொழில்நுட்ப கோளாறுகளை சரி செய்யும் வழிகளை அறிந்திருப்பவர்கள் சங்கமிக்கும் இடமாக இந்த தளம் செயல்பட்டு வருகிறது.

செல்போன் அல்லது மானிட்டர் கோளாறால் பாதிக்கப்பட்டிருக்கும் நபர் அந்த பிரச்சனையை இந்த தளத்தில் குறிப்பிட்டால் இவர்களில் யாராவது ஒருவர் அல்லது பலர் பொருத்தமான பதிலை தந்து விடுவார்.

இந்த தளத்தை தொடங்கிய பென் சடான் தொழில்நுட்ப சாதனங்களில் கோளாறு ஏற்படும் போது அதற்கு தீர்வு காண நிறுவனங்கள் உதவுவதில் அக்கறை காட்டுவதில்லை என்பதை உணர்ந்து நொந்துபோனார்.

இதையே ஒரு வர்த்தக வாய்ப்பாக மாற்றிக் கொள்ளும் உத்தேசத்தோடு பிக்ஸ்யா Fixya.com இணைய தளத்தை அமைத்தார்.

பிரச்சனை இருப்பவர்கள் அதனை தெரிவிக்கட்டும். அப் பிரச்சனையை தீர்க்கும் வழி அறிந்தவர்கள் அதனை தெரிவிக்கட்டும் என்னும் கோட்பாட்டை செயல்பாட்டு வேதமாக கொண்டு இந்த தளம் செயல்பட்டு வருகிறது.

இதுவரை 10 லட்சம் சாதனங்களுக்கு மேற்பட்ட பிரச்சனைகளும், தீர்வுகளும் இதில் குறிப்பிடப்பட்டுள்ளது. குறிப்பிட்ட நபர் சொல்லும் தீர்வு எந்த அளவுக்கு பயனுள்ளதாக இருக்கிறது என்பதை மதிப்பிடும் வசதியும் இந்த தளத்தில் இருக்கிறது.

அது மட்டுமல்லாமல் இப்படி அதிக மதிப்பு பெற்ற நிபுணர்களோடு நேரடியாக இன்டெர்நெட் அரட்டை மூலம் தொடர்பு கொண்டு பிரச்சனைகளுக்கு ஆலோசனை பெறும் புதிய வசதியும் அறிமுகமாகி இருக்கிறது.

அடுத்த முறை உங்கள் செல்போன் செயலிழந்து போனாலோ அல்லது ஏசி சாதனம் பழுதானாலோ இந்த தளத்திற்குள் எட்டிப் பாருங்கள். உங்களுக்கு தேவையான ஆலோசனை கிடைக்கலாம்.

பழுதாகும் வரை கூட காத்திருக்க வேண்டியதில்லை. உடனடியாக இந்த தளத்திற்கு சென்று பாருங்கள். அதில் பட்டியலிடப்பட்டிருக்கும் பிரச்சனைகளையும், பதில்களையும் பார்த்தீர்கள் என்றால் எந்த பிரச்சனைக்கும் உலகில் உதவி கிடைக்கும் என்ற நம்பிக்கை ஏற்பட்டு விடும்.

பள்ளிக்கு திரும்ப வைப்போம்!

பள்ளிக்குத் திரும்புதல்’ என்னும் தலைப்பு நன்றாக இருக்கிறது அல்லவா! இது ஏதோ நாவல் (அ) புதிய கவிதைத் தொகுதியின் தலைப்பு அல்ல! பாராட்டத்தக்க ஒரு இணைய தளத்தின் தலைப்பு இது!

.
பேக்டூ ஸ்கூல் (back 2 school.in) என்னும் இந்த இணைய தளத்தின் முகவரியை பலவிதங்களில் தமிழ்படுத்தலாம். “மீண்டும் பள்ளிக்கு’ அவற்றில் ஒன்று. இதைவிட பள்ளிக்கு திரும்புதல் என்பது கவித்துவமான ஒன்றாக இருப்பதோடு, இணைய தளத்தின் நோக்கத்திற்கும் பொறுத்தமாக இருக்கிறது.

பள்ளி படிப்பை பாதியில் கைவிட நேரும், மாணவ மாணவிகளை அப்படியே சென்றுவிட அனுமதிக்காமல், மீண்டும் அவர்களை பள்ளிக்கு கொண்டு வந்து சேர்க்கும் நோக்கத்துடன் செயல்பட்டு வரும் இணைய தளம் இது.

உள்ளபடியே உன்னதமான முயற்சி: ஆனால் கடினமானது, சவாலானது. எந்த அளவுக்கு சவாலானதோ அதே அளவுக்கு இன்றியமையாததும் கூட! இதை நன்கு உணர்ந்தே, பள்ளிக்கு திரும்ப வைக்கும் முயற்சியாக “பேக்டு ஸ்கூல்’ இணைய தளம் அமைக்கப்பட்டுள்ளது.

பள்ளி படிப்பை நிறுத்திக் கொள்வது என்பது சர்வ சாதாரணமாக இருக்கும் இந்தியாவில், இத்தகைய முயற்சிக் கான தேவை உணரப்பட்டு, இந்த இணைய தளம் அமைக்கப் பட்டிருப்பது பாராட்டுக்குரியது. இதில் மேலும் மகிழ்ச்சி அளிக்கக் கூடிய விஷயம் என்னவென்றால், நாட்டுக்கே முன் மாதிரியாக திகழக் கூடிய “பேக்டூ ஸ்கூல்’ இணைய தளம் தமிழகத்தில் இருந்து மேற்கொள்ளப் பட்டிருக்கிறது என்பதுதான்! ஆம் தமிழகத்தின் கிருஷ்ணகிரி மாவட்டத்தில் இந்த முன்னோடி முயற்சி மேற்கொள்ளப்பட்டுள்ளது. மாவட்ட கலெக்டர் டாக்டர் சந்தோஷ் பாபு முயற்சியால் “பேக்டூ ஸ்கூல்’ இணைய தளம் அமைக்கப்பட்டு மாணவர்கள் பள்ளிப்படிப்பை பாதியில் நிறுத்திக் கொள்வதற்கு முற்றுப்புள்ளி வைக்கும் முயற்சி மேற்கொள்ளப்பட்டு வருகிறது.

ஏழைகளே அதிகம் உள்ள நம்நாட்டில் பள்ளி படிப்பை தொடராமல் போவதற்கு எத்தனையோ காரணங்கள் இருக்கின்றன. அவற்றில் விநோதமானவையும் உண்டு. வேதனையில் ஆழ்த்துபவையும் உண்டு. இருப்பினும் இந்த காரணங் களில் சில பொதுத்தன்மைகள் இல்லாமல் இல்லை. எதிர்பாராமல் குடும்ப உறுப்பினர்கள் மரண மடைவது, அல்லது வருமானம் ஈட்டுவோர் வேலை இழப்பது போன்றவை பெரும்பாலான மாணவர்கள் பள்ளிப் படிப்பை தொடர முடியாமல் போவதற்கான முக்கிய காரணங்களாக அமைகின்றன. இது போன்ற சூழ்நிலையில் சம்பந்தப்பட்ட குடும்பங்களின் பொருளாதார சுமை மிகுதியாகி, பிள்ளைகளின் கல்வி செலவை சுமக்க முடியாமல் போகலாம் (அ) குடும்ப செலவை சுமக்க பிள்ளைகளின் பிஞ்சுக்கரம் தேவைப்படலாம். இந்த நிலை வேதனையானது! அது ஒரு புறமிருக்க பல நேரங்களில் பிறப்புச் சான்றிதழ் இல்லாமல் போவது போன்ற எளிமையான காரணங்களுக்காக படிப்பு நிறுத்தப்படுவதும் உண்டு. பள்ளி படிப்பை தொடர வேண்டிய நிர்ப்பந்தம் வலுவலாக இல்லாத நாட்டில் இது சகஜம்தான்!

இந்த இடத்தில் தான், “பேக்டு ஸ்கூல்’ இணைய தள முயற்சி முக்கியத்துவம் பெறுகிறது. மாணவர்கள் படிப்பை நிறுத்திக் கொள்வதற்கான காரணம் எதுவாக வேண்டுமானாலும் இருக்கட்டும்; அதனை அறிந்து கொண்டு தீர்வு காண வேண்டியது, ஆட்சி பொறுப்பில் உள்ளவர்களின் கடமை அல்லவா!

கிருஷ்ணகிரி மாவட்ட கலெக்டர் சந்தோஷ் பாபு இப்படி தான் நினைத்தார். மாணவர்கள் படிப்பை நிறுத்தும் நிலைஏற்படும் போது, அதற்கான காரணத்தை தெரிந்து கொண்டு, பிரச்சனையை தீர்க்க முயன்றால், அம்மாணவர்களை தொடர்ந்து கல்வி பயில வைக்கலாம் என்பது அவரது நம்பிக்கை.

நல்ல எண்ணம் தான்! ஆனால் ஒவ்வொரு பள்ளியிலும் உள்ள நூற்றுக்கணக்கான மாணவர்கள் மத்தியில் யாரெல்லாம் படிப்பை நிறுத்துகின்றனர் என்று தெரிந்து கொள்வது சாத்தியம் தானா?

அப்படியே தெரிந்து கொண்டாலும் குறிப்பிட்ட மாணவர்களுக்கு ஏன் இந்தநிலை ஏற்பட்டது என்று கண்டுபிடிப்பது நடைமுறை சாத்தியம் தானா? இதற்கு நூற்றுக்கணக்கான பள்ளிகளில் பயிலும் ஆயிரக்கணக்கான மாணவர்களின் நிலையை கண்கொத்தி பாம்பாக பார்த்துக் கொண்டிருக்க வேண்டாமா?

மனம் இருந்தால் சாப்ட்வேர் உண்டாயிற்றே! இந்த கண்காணிப்பு பணியை கண்ணும் கருத்துமாக செய்யக்கூடிய சாப்ட்வேர் உருவாக்கப் பட்டு, அதனை பக்கபலமாக கொண்டு, பேக்டு ஸ்கூல் இணைய தளம் வடிவமைக்கப்பட்டது. இரண்டு கட்டங்களாக இந்தப் பணி மிக அருமையாக மேற்கொள்ளப்பட்டு வருகிறது. முதல் கட்டத்தில், அரசு பள்ளிகளில் பயிலும் மாணவர்கள் அனைவர் பற்றிய விவரங்களும் சேரிக்கப்பட்டு அவர்களுக்கு என ஒரு அடையாள எண் கொடுக்கப்படுகிறது. இந்த விவரங்கள் அனைத்தும் சாப்ட்வேரிடம் சமர்பிக்கப்பட்டு விடுகின்றன.

இரண்டாவது கட்டத்தில் அவ்வப் போது மாணவர்களின் வருகை சரிபார்க்கப்பட்டு, தொடர்ந்து பள்ளிக்கு வந்து கொண்டிருக் கின்றனரா என்னும் விவரங்கள் சேகரிக்கப்பட்டு அவையும் சாப்ட்வேரிடம் சமர்பிக்கப் படுகின்றன. ஏற்கனவே உள்ள விவரப் பட்டியலோடு இவற்றை ஒப்பிட்டுப் பார்க்கும் சாப்ட்வேர் படிப்பை நிறுத்திக் கொண்ட மாணவர்கள் பற்றிய தகவலை, மைய கம்ப்யூட்டரில் எட்டிப் பார்க்கச் செய்கிறது. மைய கம்ப்யூட்டர் மாவட்ட கலெக்டர் கட்டுப்பாட்டில் இருப்பதால், படிப்பை கைவிடும் மாணவர்களை அறிந்து கொள்ளும் கலெக்டர், அதன் பின்னே உள்ள பிரச்சனையை தீர்த்து, மாணவனை மீண்டும் பள்ளிக்கு கொண்டு வரும் முயற்சியை மேற்கொள்ள முடியும்.

அவ்வப்போது பள்ளிக்கு விஜயம் செய்து , விலகிச் செல்லும் மாணவர்கள் பற்றிய விவரங்களை தெரிந்து கொள்ளும் பொறுப்பு தன்னார்வ தொண்டர்களிடம் விடப்பட்டுள்ளது. பஞ்சாயத்து ஊழியர் முதல் தலைமை ஆசிரியர் வரை பலர் அரசு பணியை மேற்கொள்கின்றனர். மற்ற பொறுப்பை மாவட்ட கலெக்டர் பார்த்துக் கொள்கிறார்.

கடந்த ஆண்டு இறுதியில் தொடங்கப்பட்ட இந்த தளம் சிறப்பாக செயல்பட்டு வருகிறது. முதல் கட்டத்தில் 337 பஞ்சாயத்துகளும், 9000 தன்னார்வ தொண்டர்கள் மூலம் கிருஷ்ணகிரியில் உள்ள பள்ளியில் பயிலும் மாணவர்கள் பற்றிய விவரங்கள் சேகரிக்கப்பட்டுள்ளது.

கிருஷ்ணகிரி மாவட்டத்தில் உள்ள மாணவர்களில் ஒருவர் கூட பள்ளி படிப்பை நிறுத்திவிடக்கூடாது என்பதை முதன்மை நோக்கமாக அறிவிக்கும் இந்த தளத்தில், மாணவர்கள் படிப்பை தொடர அரசு தரும் உதவித் திட்டங்கள் உள்ளிட்ட பல்வேறு விஷயங்கள் இடம் பெற்றுள்ளன. மேலும் குழந்தை தொழிலாளர் பற்றி புகார் தெரிவிக்கும் வசதியும் இடம் பெற்றுள்ளது.

கிருஷ்ணகிரி மாவட்டத்தில் சோதனை முறையில் செயல்படுத்தப் படும் அரசு திட்டம், எந்த மாவட்டத்தில் வேண்டுமானாலும் செயல்படுத்தப்படலாம்.

| |