உலக பெருங்கடல் தினத்தை முன்னிட்டு இந்திய பெருங்கடல் உள்ளிட்ட உலகின் முக்கிய அழகடல் பகுதிகளில் மூழ்கிப்பார்க்கும் வசதியை கூகுள் தனது ஸ்டிரீட்வியூ சேவை மூலம் வழங்கியிருக்கிறது. இந்த சேவை மூலம் கடல் ஆமைகளுடனும், அரிய ரக திமிங்களுத்துடனும் ஆழ் கடலில் நீந்தி உலா வரலாம்.

கூகுள் தனது வரைபட சேவையின் ஒரு பகுதியாக உலகில் உள்ள பல்வேறு இடங்களின் 360 கோணத்திலான தோற்றத்தை ஸ்டிரீட்வீயூ சேவையாக அளித்து வருகிறது. துருவ பிரதேசத்தின் பனிக்கரடிகள் முதல் அமேசான் மழைக்காடுகள் வரை பல அரிய இடங்களை ஸ்டிரீட்வியூவில் பார்க்கலாம்.

இப்போது கூகுள் கடலுக்கடியிலும் இந்த சேவையை கொண்டு சென்றுள்ளது. இந்திய பெருங்கடலில் உள்ள சகோஸ் தீவுகள் , டென் பசுபிக் பெருங்டலில் உள்ள அமெரிக்கன் சமோவா உள்ளிட்ட பல அரிய கடல் பகுதிகளை ஸ்டிரீட்வியூ காட்சியாக்கி இருக்கிறது. இந்த பகுதிகளுக்கான இணைப்பை கிளிக் செய்தால் அவற்றின் அழ்கடல் காட்சிகளை சுற்றிலும் பார்க்கலாம். அந்த அந்த பகுதியில் காணப்படும் அரிய விலங்குகளுடன் சேர்ந்து நீந்துவது போன்ற உணர்வுடன் இந்த காட்சிகளை காணலாம்.

நிலத்தில் பிரத்யேக் காமிரா கொண்டு 360 கோண காட்சிகளை படம் பிடிப்பது போல ஆழ்கடல் பகுதியில் இந்த காட்சிகளை கூகுள் குழு படம் பிடித்துள்ளது. உலக பெருங்கடல் தினம் கொண்டாடப்படும் நிலையில் இந்த காட்சிகளை கூகுள் பதிவேற்றியுள்ளது.

இந்த ஆழ்கடல் காட்சிகள் கடல் உயிரினங்களை கண்டு ரசிப்பதற்கு மட்டும் அல்ல; பருவநிலை மாற்றத்தால் கடல் பகுதியில் ஏற்பட்டு வரும் மாற்றங்கள் மற்றும் பாதிப்பு பற்றிய விழிப்புணர்வையும் ஏற்படுத்துவதற்காக என்று கூகுள் குறிப்பிட்டுள்ளது.

பூமியின் பெரும்பகுதி உயிரினத்தை கொண்டிருக்கும் பெருங்கடல்கள் பருவநிலை முதல், மழை , பிராணவாயு என எல்லாவற்றையும் கட்டுப்படுத்தினாலும் மாசுபடுதல் மற்றும் அதிக மீன்பிடி காரணமாக அவற்றில் பெரும் மாற்றம் ஏற்பட்டு வருவதாகவும் ,இது நம் காலத்தின் மிகப்பெரிய சுற்றுச்சூழல் பிரச்சனையாக இருப்பதாகவும் கூகுள் தெரிவித்துள்ளது.

இந்நிலையில் இந்த காட்சிகள் எதிர்காலத்தில் ஆழ்கடலில் ஏற்படும் மாற்றங்களை ஒப்பிட்டு பார்ப்பதற்கான டிஜிட்டல் அடையாளமாக விளங்கும் என்றும் தெரிவித்துள்ளது.
ஆக, உலக பெருங்கடல் தினத்தில் ஆழ்கடலில் ஒரு உலா வாருங்கள். பெருங்கடல் நிலை பற்றிய விழிப்புணர்வையும் பெறுங்கள்!.

ஆழ்கடலில் உலா வர;http://google-latlong.blogspot.fr/2015/06/explore-life-beneath-waves-in-honor-of.html

—–