Category Archives: தேடல்

கவனிக்க வேண்டிய இசை தேடியந்திரம்!

hypeஇணையத்தில் தகவல்களை தேடுவதற்கும் இசையை தேடுவதற்கும் முக்கிய வேறுபாடு இருக்கிறது. தகவல்கள் என வரும் போது நீங்கள் எதிர்பார்க்கும் தகவல்கள் அல்லது அது தொடர்பான மேலதிக விவரங்கள் கிடைக்கின்றனவா என்று பார்க்கிறீர்கள்.

ஆனால் இசையை தேடும் போது, நீங்கள் எதிர்பார்க்கும் பாடல்களை மட்டும் அல்ல, நீங்கள் விரும்பக்கூடிய பாடல்களையும் உங்கள் அறியாமல் எதிர்பார்க்கிறீர்கள். அதாவது, குறிப்பிட்ட ஒரு பாடல் அல்லது பாடகர் அல்லது இசைக்குழுவை நீங்கள் தேடும் போது, அந்த தேடல் தொடர்பான தகவல்களோடு தொடர்புடைய பாடல் அல்லது இசைக்குழுவை தெரிந்து கொள்ள முடிந்தாலும் மகிழ்ச்சி தான்.

உதாரணத்திற்கு இளையராஜா இசையில் 70 களின் இறுதியில் ஒலித்த குறிப்பிட்ட பாடலை தேடும் போது, அந்த பாடலோடு, அதே காலத்தில் வெளியான ஜி.குமார் அல்லது ஜி.கே.வெங்கடேஷ் இசையில் வெளியான தொடர்புடைய ஒரு பாடல் முன்வைக்கப்பட்டால் அதை கேட்டுப்பார்த்து சபாஷ் போடத்தோன்றும்.

இதை இசை கண்டறிதல் என்கின்றனர். இசைப்பிரியர்கள் புதிய இசையை இப்படி தான் அறிமுகம் செய்து கொள்ள விரும்புகின்றனர். இதற்கு தொழில்நுட்பம் மூலம் உதவும் சேவைகளும் இருக்கின்றன.
இசை தேடியந்திரங்களும் இவ்விதமே செயல்பட வேண்டும் என்று ரசிகர்கள் எதிர்பார்க்கலாம். இந்த எதிர்பார்ப்பிற்கு ஏற்ப தான் ஹைப் மெஷின் தேடியந்திரம் அமைந்திருக்கிறது.

ஹைபெம்.காம் (http://hypem.com ) எனும் இணைய முகவரி கொண்ட ஹைப்மெஷின் உண்மையில் இசை வலைப்பதிவுகளுக்கான தேடியந்திரம். அதாவது இசை தொடர்பான ஆர்வத்துடன் எழுதி வருபவர்களின் பதிவுகளை இது தொகுத்தளிக்கிறது. தினந்தோறும் ஆயிரக்கணக்கானோர் தாங்கள் விரும்பும் இசை பற்றி இணையத்தில் எழுதுகின்றனர். அவை எல்லாவற்றையும் இங்கே கண்டறியலாம் என அழைப்பு விடுக்கிறது ஹைப் மெஷின்.
ஆங்கிலத்தில் இசை தொடர்பான எழுதி வருபவர்களின் 800 க்கும் மேற்பட்ட வலைப்பதிவுகள் இதன் பட்டியலில் உள்ளன. இந்த இசைப்பதிவுகளில் சுட்டிக்காட்டப்படும் பாடல்களை இந்த தளம் மூலம் நீங்கள் தேடலாம், கண்டறியலாம்.

ஆக, இதில் குறிப்பிட்ட பாடகர் அல்லது இசைக்குழுவை நீங்கள் தேடும் போது அந்த பாடகர் அல்லது இசைக்குழு தொடர்பான இசை வலைப்பதிவாளர் குறிப்புகளை இதில் காணலாம். அப்படியே அவர்கள் கொடுத்துள்ள இசைக்கோப்புக்கான இணைப்பு மூலம் பாடலை கேட்டுப்பார்க்கலாம். ஆனால் பாடலை டவுண்லோடு செய்ய முடியாது. தேவை எனில் அமேசான் அல்லது ஐடியூன்ஸில் வாங்கிக்கொள்ளலாம்.
இசை வலைப்பதிவாளர்களின் பரிந்துரைகளை ஒரே இடத்தில் தேட வழி செய்வதோடு, அவர்கள் மூலமே புதிய இசையை கண்டறியவும் உதவுகிறது.
எனவே , நீங்கள் விரும்பி தேடக்கூடிய பாடல் பற்றிய விவரங்களோடு, நீங்கள் விரும்பக்கூடிய இசை பரிந்துரைகளையும் இங்கு எதிர்கொள்ளலாம்.
ஒரு இசைப்பிரியருக்கு இதைவிட சுவாரஸ்யம் வேறு என்ன இருக்க முடியும்?

இசை வெளியின் பரந்து விரிந்த பரப்பில் வெளியாகும் பலவித இசைகளை அறிமுகம் செய்து கொள்வதோடு, மனதை கவரக்கூடிய புதிய இசையையும் கண்டறியலாம்.

தனித்தனியே இசை வலைப்பதிவாளர்களை தேடி படிக்க முயல்வதை விட, இப்படி ஒற்றை தேடலில் அனைத்து விதமான இசை பரிந்துரைகளையும் அணுக முடிவது அற்புதம் தான். இசை வலைப்பதிவாளர்களுக்கும் தங்களுக்கான வாசக ரசிகர்களை தேடிக்கொள்ள இது உதவும்.
பாடகர்களை குறிப்பிட்டு தேடுவது தவிர, தற்போது பிரபலமான பாடல்கள், பாடகர்கள், வீடியோக்கள் ஆகிய தலைப்புகளிலும் இசையை அணுகலாம். இசை வகைகளுக்கு ஏற்பவும் அணுகலாம்.

மேற்கத்திய இசை சார்ந்து இருப்பதால் நம்மவர்களுக்கு ஆதங்கம் ஏற்படலாம் என்றாலும் இளையராஜாவை தேடினாலும் குறிப்புகள் வருகின்றன.

டிவிட்டரில் பகிரப்படும் பாடல்களும் அடையாளம் காட்டப்படுகின்றன.
அமெரிக்காவில் குடியேறிய ரஷயரான அந்தோணி வோலோட்கின் ( Anthony Volodkin) என்பவர் 2005 முதல் இந்த தேடியந்திரத்தை நடத்தி வருகிறார். கார்டியன் நாளிதழின் 100 இணையதளங்கள் பட்டியலில் இடம்பெற்றுள்ளதோடு பரவலாக கவனத்தை ஈர்த்த இந்த தேடியந்திரம் தனி மனித முயற்சி என்பதை மீறி, முதலீட்டாளர்கள் ஆதரவுடன் பெரிதாக வளர்ந்திருக்கிறது.

தேடியந்திர முகவரி:http://hypem.com/popular?workaround=lol

குறிப்பு: இசையை போலவே , புத்தகங்கள் மற்றும் திரைப்படங்கள் தொடர்பான தகவல்களை தேடும் போதும் நாம், எதிர்பார்த்த தகவல்களை மட்டும் அல்லாமல், தொடர்புடைய புத்தகம் அல்லது படங்களின் பரிந்துரைகளையும் எதிர்பார்க்கிறோம். இத்தகைய கண்டறிதல் தேடியந்திரங்கள் அநேகம் இருக்கின்றன. அவை பற்றிய விவரங்கள் தனிப்பதிவாக!

குறிப்பு: தமிழ் இந்துவில் எழுதி வரும் ஆ’வலை’ வீசுவோம் தொடரில் வெளியாகும் தேடியந்திரங்களின் நீட்டிப்பாக இந்த அறிமுகத்தை கொள்ளலாம்.: http://tamil.thehindu.com/general/technology/%E0%AE%86%E0%AE%B5%E0%AE%B2%E0%AF%88-%E0%AE%B5%E0%AF%80%E0%AE%9A%E0%AF%81%E0%AE%B5%E0%AF%8B%E0%AE%AE%E0%AF%8D-13-%E0%AE%8E%E0%AE%A9%E0%AF%8D%E0%AE%A9-%E0%AE%AA%E0%AE%BE%E0%AE%9F%E0%AF%8D%E0%AE%9F%E0%AF%81-%E0%AE%A4%E0%AF%87%E0%AE%9F/article7726703.ece

உலகின் முதல் நவீன தேடியந்திரம் எது?

webcrawler_screenshot_6-7-2010இணைய உலகின் முதல் தேடியந்திரம் எதுவென நீங்கள் அறிந்திருக்கலாம். ஆர்ச்சி தான் அது. ஆர்ச்சி இப்போது பயன்பாட்டில் இல்லை. இணைய சரித்திரத்தில் மட்டும் தான் இருக்கிறது. எல்லாம் சரி, உலகின் முதல் நவீன தேடியந்திரம் எது என்பது தெரியுமா? தயவு செய்து கூகுள் என்று மட்டும் பதில் சொல்ல வேண்டாம். தேடியந்திர உலகில் கூகுள் முழு முதல் தேடியந்திரம் போல தோன்றினாலும் அது சற்று தாமதமான வரவு . அதற்கு முன்னரே எண்ணற்ற முன்னோடி தேடியந்திரங்கள் தோன்றிவிட்டன. பல மறைந்துவிட்டன என்பது வேறு விஷயம்.

லைகோஸ், ஜம்ப்ஸ்டேஷன், மெட்டா கிராலர் என நீளக்கூடிய ஆரம்ப கால தேடியந்திர பட்டியலில் ஒன்றாக இடம்பெறும் வெப்கிராலர் தேடியந்திரமே முதல் நவீன தேடியந்திரமாக கருதப்படுகிறது.

இணையதளங்களை துழாவுவது, அவற்றை பட்டியலிடுவது மற்றும் அந்த பட்டியலில் இருந்து தேடுவதற்கான வசதியை அளிப்பது ஆகியவை தான், எந்த ஒரு தேடியந்திரத்தின் மூன்று முக்கிய அம்சங்களாக கருதப்படுகின்றன. தேடியந்திரங்களுக்கான சாமுந்திரிகா லட்சனம் என்றும் வைத்துக்கொள்ளலாம். இந்த மூன்று முக்கிய அம்சங்களையும் கொண்ட முதல் தேடியந்திரமாக வெப்கிராலர் அறிமுகமானது. எப்போது தெரியுமா? 1994 ல்!

அதற்கு முன்னர் உருவான தேடியந்திரங்கள் பெரும்பாலும் மனித கைகளால் தேர்வு செய்யப்பட்ட தொகுப்பை கொண்டதாகவும், மிக குறைவான செயல்பாடு கொண்டதாகவும் இருந்தன.

ஆர்ச்சி இதை ஒரளவு மாற்றியது. பின்னர் ஜம்ப்ஸ்டேஷன் தான் முதன் முதலில், இணையதளங்களை துழாவி,பட்டியலிட்டு தேட வழி செய்தது. ஆனால், இதுவும் கூட இணையதளங்களின் முழுவதையும் பட்டியலிடாமல், தலைப்பை மேட்டும் தேட வழி செய்வதாக அமைந்தது.

மாறாக, இணையத்தில் துழாவி, இணையதளங்களை பட்டியலிட்டு, அவற்றின் முழு பக்கத்தையும் தேடக்கூடிய முதல் தேடியந்திரமான வெப்கிராலர் அறிமுகமானது. அநேகமாக நவீன தேடியந்திர பாதை வெப்கிராலரில் இருந்து தான் துவங்குகிறது.
தேடியந்திர முன்னோடியான வெப்கிராலர் பின்னர் தேடியந்திர அலையில் பின்னுக்குத்தள்ளப்பட்டு மறக்கப்பட்டு விட்டது. 1995 ல் ஏ.ஓ.எல் நிறுவனத்தால் வாங்கப்பட்டு பின்னர் பல நிறுவனங்களின் கைகளுக்கு மாறிய வெப்கிராலர் ஒரு கட்டத்தில், மற்ற தேடியந்திர முடிவுகளை ஒப்பிடும் மெட்டா தேடியந்திரமாக மாறிப்போனது. இன்று வெப்கிராலர் தளம் இருந்தாலும், செயல்பாடில்லாமல் தான் இருக்கிறது.

* நவீன தேடியந்திரம் எது? http://www.howtogeek.com/trivia/what-was-the-first-modern-web-search-engine/

* வெப்கிராலர் :http://www.webcrawler.com/

* முதல் தேடியந்திரமான ஆர்ச்சி பற்றி:http://cybersimman.com/2013/06/29/search-48/

* முக்கிய தேடியந்திரங்கள்: http://cybersimman.com/2016/09/28/%E0%AE%95%E0%AF%82%E0%AE%95%E0%AF%81%E0%AE%B3%E0%AF%8D-%E0%AE%A4%E0%AE%B5%E0%AE%BF%E0%AE%B0-%E0%AE%A8%E0%AF%80%E0%AE%99%E0%AF%8D%E0%AE%95%E0%AE%B3%E0%AF%8D-%E0%AE%85%E0%AE%B1%E0%AE%BF%E0%AE%A8/

இது நேர்மையான தேடியந்திரம்!

halal-search-640x480சில ஆண்டுகளுக்கு முன் ’ஐயம் ஹலால்’ என்ற தேடியந்திரம் அறிமுகம் ஆனது தெரியுமா? இஸ்லாமியர்களுக்கான தேடியந்திரம் அது. இணையத்தில் தேடும் போது இஸ்லாமியர்கள் அவர்களின் மத நம்பிக்கைக்கு ஏற்ற வகையிலான பாதுகாப்பான முடிவுகளை மட்டுமே அணுக இந்த தேடியந்திரம் வழி செய்தது.

ஆபாசமான தளங்கள் மற்றும் பதங்களை விலக்குவதன் மூலம், பொருத்தமான, பயனுள்ள தளங்களை மட்டும் முன்வைக்கும் வகையில் அதன் தேடல் நுட்பம் அமைந்திருந்தது.
2009 ல் அறிமுகமான போது இந்த தேடியந்திரம் இந்த வகையில் புதுமையான தேடியந்திரம் என்று வர்ணிக்கப்பட்டது.

ஐயம் ஹலால் இப்போது, காலாவதியான தேடியந்திரங்களின் பட்டியலில் சேர்ந்துவிட்டது. புதுமையான நோக்கத்துடனும், அதற்கேற்ற தேடல் நுட்பத்துடனும் அறிமுகமான தேடியந்திரம் மூடப்பட்டது வருத்தம் தருகிறது. ஆனால் ஐயம் ஹலால், நேர்மையான தேடியந்திரங்களின் பட்டியலிலும் சேர்ந்திருக்கிறது என்பது ஆறுதல் அளிக்கும் விஷயமாக இருக்கிறது.

அதாவது ஐயம் ஹலால் தனது சேவை நிறுத்தப்பட்டு விட்டது என்பதை பகிர்ந்து கொண்டு அதற்கான காரணங்களையும் தெரிவித்திருக்கிறது. 2011 ல் மூடப்பட்டுவிட்ட நிலையிலும் அதன் முகப்பு பக்கத்தில் இந்த தகவல்கள் ஒரு அறிவிப்பாக இடம்பெற்றுள்ளன.

இணைய உலகில் இது கொஞ்சம் அபூர்வமானது தான். துவக்கப்படும் எல்லா இணையதளங்களும் வெற்றி பெறுவதில்லை. பல காரணங்களினால் இணையதளங்கள் தொடர்ந்து நடத்தப்படாமல் மூடப்படுகின்றன, கைவிடப்படுகின்றன.

இதில் சிக்கல் என்ன என்றால், பெரும்பாலான இணையதளங்கள் மூடப்பட்ட பின் இருந்த சுவடு தெரியாமல் காணாமல் போய்விடுவது தான். குறிப்பிட்ட அந்த தளத்திற்கு என்ன ஆனது, அதன் சேவை ஏன் நிறுத்தப்பட்டது என்பது தொடர்பான தகவல்கள் எதையுமே அறிய முடியாது. இன்னும் மோசம் என்ன எனில், பல தளங்களை கிளிக் செய்தால் அவற்றுக்கு தொடர்பே இல்லாத விளம்பர இணைப்புகள், வேற்று மொழி விளம்பரங்கள் இடம்பெற்றிருக்கும். தேடியந்திரங்களுக்கும் இது பொருந்தும்.

மிகுந்த ஆர்வத்தை ஏற்படுத்திய தளங்கள் அல்லது தேடியந்திரங்களை பின்னர் தேடிச்செல்லும் போது அவற்றின் இடத்தில் வெறுமையை எதிர்கொள்ளும் போது பெரும் ஏமாற்றமாக இருக்கும். அந்த சேவை இல்லாமல் போனதோடு அதற்கான காரணமும் தெரிந்து கொள்ள முடியாமல் இருப்பது கூடுதல் ஏமாற்றத்தை அளிக்கும்.
இதற்கு மாறாக வெகு சில தளங்களே அவை மூடப்பட்டது தொடர்பான அறிவிப்பை வெளியிட்டிருக்கும். இந்த அபூர்வ தளங்களில் ஒன்றாக ஐயம் ஹலால் தேடியந்திரம் இருக்கிறது. போதிய நிதி இல்லாமல் இந்த சேவை நிறுத்தப்பட்டதாகவும், ஐயம் ஹலால் தொடர்பான நினைவுகளை உயிருடன் வைத்திருப்பதற்காக இந்த பக்கம் பராமரிக்கப்படுவதாகவும் அதன் முகப்பு பக்கத்தில் குறிப்பிடப்பட்டுள்ளது. தேடியந்திரத்தின் நோக்கம், செயல்பாடுகள் பற்றியும் சுருக்கமான தகவல்கள் இடம்பெற்றுள்ளன. அது செயல்பட்ட வரை புதுமையான சேவையாக இருந்தது பற்றியும் பெருமிதத்துடன் குறிப்பிடப்பட்டுள்ளது.

இந்த தகவல் நிச்சயம் ஐயம் ஹலால் இணைப்பை நாடி செல்பவர்களுக்கு ஆசுவாசத்தை அளிக்கும்.
உண்மையில் ஒவ்வொரு நல்ல இணையதளங்களிடம் இருந்தும் இணையவாசிகள் எதிர்பார்க்கும் தகவல் இது.
ஐயம் ஹலால் தேடியந்திரத்தின் நிறுவனர் பற்றியும் சுவாரஸ்யமான தகவல்களை அறிய முடிகிறது. ரெஸா சார்டெஹா எனும் இளம் தொழில்முனைவோர் தான் இந்த தேடியந்திரத்தை நிறுவியவர். தற்போது ஸ்டார்ட் அப் பரப்பில் சுறுசுறுப்பாக செயல்பட்டு வரும் இவர், அண்டர்டவலப்டு எனும் இணைய நிறுவனத்தையும் நடத்தி வருகிறார்.

தனது டிவிட்டர் பக்கத்தில், இவர் அண்டர்டவலப்டு மற்றும் விருது வென்ற ஐயம் ஹலால் தேடியந்திரத்தின் நிறுவனர் என்று பெருமிதத்துடன் குறிப்பிட்டுள்ளார்.
homepagelogo
பின் குறிப்பு: ஐயம் ஹலால் மூடப்பட்டு விட்டாலும், ஹலால் கூகுளிங் தேடியந்திரம் அது போலவே பாதுகாப்பான முறையில் தகவல்களை தேட உதவுகிறது: http://halalgoogling.com/

* ஐயம் ஹலால் பற்றிய பழைய பதிவு: http://cybersimman.com/2009/09/13/search-5/

* ஐயம் ஹலால் தளம்:http://www.imhalal.com/index.php

* ஐயம் ஹலால் நிறுவனர் டிவிட்டர் பக்கம்: https://twitter.com/rsardeha

ஆங்கிலத்தில் எழுத உதவும் தேடியந்திரம்!

ludwig_1இணைய உலகில் புதிதாக ஒரு தேடியந்திரம் அறிமுகமாகி இருக்கிறது. லுத்விக் (Ludwig ) எனும் அந்த தேடியந்திரம் புதியது மட்டும் அல்ல, புதுமையானதும் கூட! புத்திசாலி மொழிபெயர்ப்பு சாதனம் மற்றும் மொழியியல் தேடியந்திரம் என வர்ணித்துக்கொள்ளும் இந்த தேடியந்திரம் அமெரிக்காவிலோ மற்ற ஆங்கிலம் பேசும் நாடுகளில் இருந்து அறிமுகமாகமல் ஐரோப்பிய நாடான இத்தாலியில் இருந்து உருவாகி இருப்பது மிகவும் பொருத்தமானது. ஏனெனில், லுத்விக் தேடியந்திரம் ஆங்கிலத்தில் சரியாக எழுத உதவும் நோக்கத்துடன் உருவாக்கப்பட்டுள்ளது.

ஒரு தேடியந்திரம் எப்படி ஆங்கிலத்தில் எழுத உதவக்கூடும் என்று கேட்கலாம். பொருத்தமான ஆங்கில சொற்றொடர்களை தேடித்தருவதன் மூலம் லுத்விக் இதை செய்கிறது. எப்படி என பார்க்கலாம்!
ஆங்கிலத்தில் நன்றாக எழுத வருபவர்களை விட்டுவிடுங்கள். ஆனால் ஓரளவு மட்டுமே ஆங்கிலம் அறிந்தவர்கள், அலுவல் தேவைக்காக ஆங்கிலத்தில் எழுத வேண்டிய நிலை வரும் போது கொஞ்சம் தடுமாறவே செய்வார்கள். அப்படியே எழுதிவிட்டாலும், அது சரியாக இருக்கிறதா எனும் சந்தேகம் இருக்கும்.

இது போன்ற நேரங்களில் லுத்விக் ஆங்கிலம் அறிந்த நண்பன் போல வழிகாட்டும். லுத்விக் தேடியந்திர முகப்பு பக்கத்தில் டைப்ரைட்டர் சாதன லோகோவின் கீழ், உள்ள தேடல் கட்டத்தில், பயனாளிகள் தாங்கள் சரி பார்க்க விரும்பும் ஆங்கில வாசகத்தை டைப் செய்ய வேண்டும். உடனே, அந்த வாசகத்திற்கு பொருத்தமான ஆங்கில வாசகங்கள் பட்டியலிப்படும். அவற்றில் இருந்து சரியான வாசகத்தை தேர்வு செய்து கொள்ளலாம். அல்லது தாங்கள் எழுதிய வாசகத்துடன் ஒப்பிட்டு அதில் உள்ள தவறுகளை சரி செய்து கொள்ளலாம்.
ludwig_4
பிபிசி, நியூயார்க் டைம்ஸ், நியூயார்க்கர் உள்ளிட்ட முன்னணி ஊடகங்களில் இருந்து சேகரிக்கப்பட்ட ஆங்கில வாசக தொகுப்பில் தேடிப்பார்த்து, பொருத்தமான வாசகங்களை லுத்விக் பரிந்துரைக்கிறது. வரிசையாக ஒவ்வொரு வரியாக தட்டச்சு செய்து, அதற்கு காண்பிக்கப்படும் வாசக பட்டியலுடன் ஒப்பிட்டுப்பார்த்து, ஏதேனும் தவறுகள் இருந்தால் திருத்தி நாம் எழுதியதை மேம்படுத்திக்கொள்ளலாம். தவறுகளை திருத்திக்கொள்வதோடு, சரியான ஆங்கில வரிகளுடன் ஒப்பிட்டு பார்ப்பதன் மூலம் ஆங்கில சொற்களின் பயன்பாடு பற்றியும் கற்றுக்கொள்ளலாம்.

ஆங்கிலத்தில் எழுதப்பட்ட கட்டுரைகள், செய்திகள் ஆகியவற்றில் இருந்து திரடப்பட்ட வாசகங்களை தொகுப்பில் இருந்து, பயனாளிகள் எழுத முயலும் வாசகத்திற்கு பொருந்தக்கூடிய வரிகளை தேடித்தருவதே லுத்விக்கின் முதன்மையான பணியாக இருக்கிறது. இதற்கான அல்கோரிதம் மொழியியலை அடிப்படையாக கொண்டு உருவாக்கப்பட்டுள்ளது.

ஆனால், ஒன்று ஆங்கிலத்தில் அதிக பரிட்சயம் இல்லாதவர்களை மனதில் வைத்துக்கொண்டு இது உருவாக்கப்பட்டுள்ளது என்பதை புரிந்து கொள்ள வேண்டும். இதன் நிறுவனர்களில் ஒருவரான இத்தாலி நாட்டைச்சேர்ந்தவரான ஆண்டோனியோ ரோடோலோ ஆகழ்வாராய்ச்சி மாணவராக இருந்த போது, தனது துறையில் தொழில்முறை வாய்ப்புகளை சர்வதேச அளவில் பெற ஆங்கிலத்தில் கட்டுரைகளை வெளியிடும் நிபந்தத்தை உணர்ந்தார். இத்தாலியரான அவருக்கு ஆங்கிலத்தில் கட்டுரைகள் எழுதுவதில் தயக்கம் இருந்ததால், ஆங்கில சொற்களின் தவறான பயன்பாட்டில் திருத்தம் செய்ய உதவும் சேவையின் தேவையை உணர்ந்தார். அதன் பலனாகவே தன்னைப்போன்றவர்கள் பயன்பாட்டிற்காக லுத்விக் மொழியில் தேடியந்திரத்தை நண்பர்களுடன் இணைந்து உருவாக்கியுள்ளார். இத்தாலியின் சிசிலியை தலைமையகமாக கொண்டு லுத்விக் செயல்பட்டு வருகிறது.

ஆங்கிலம் உலக மொழி என வைத்துக்கொண்டால், அது ஆங்கிலம் பேசும் நாடுகளை சேர்ந்தவர்களுக்காக மட்டும் அல்லாமல் எல்லோருக்குமானதாக இருக்க வேண்டும் என்று பேட்டி ஒன்றில் குறிப்பிட்டுள்ள ரோடோலோ, உலகில் உள்ள எல்லோருக்கும் தொடர்பு கொள்வதில் சம வாய்ப்புகள் இருக்க வேண்டும் என்றும் தெரிவித்துள்ளார். இதை நிறைவேற்றும் நோக்கத்துடன் தான் லுத்விக் தேடியந்திரம் வடிவமைக்கப்பட்டுள்ளது.
லுத்விக் தேடியந்திரத்தில் மேலும் சில மொழி சார்ந்த வசதிகளும் இருக்கின்றன. இதில் ஆங்கில அகராதியும் இணைக்கப்பட்டுள்ளது. பட்டியலிடப்படும் வாசகங்களில் உள்ள புரியாத சொற்களை ,இருமுறை கிளிக் செய்தால் அவற்றுக்கான பொருள் விளக்கம் தோன்றும். அதே போல ஆங்கில சொற்றொடர்களுக்கான விளக்கத்தையும் பார்க்கலாம். தேவை எனில் இரண்டு வார்த்தைகளுக்கு இடையே எந்த சொல் வர வேண்டும் என்றும் தெரிந்தும் கொள்ளலாம்.

இது தவிர, ஆங்கிலம் சரியாக அறியாதவர்கள் தங்கள் மொழியில் வாசகத்தை டைப் செய்து அதை ஆங்கிலத்தில் மொழிபெயர்த்துக்கொண்டு அது சரியா என்றும் பார்த்துக்கொள்ளலாம். ( கூகுள் மொழிபெயர்ப்பு சேவை சார்ந்து இது இயங்குகிறது).
ஆங்கிலத்தில் தயக்கமும்,சந்தேகமும் உள்ளவர்களுக்கு இந்த தேடியந்திரம் நிச்சயம் உதவியாக இருக்கும்.
ஒவ்வொரு முறை சேவையை பயன்படுத்தியவுடன், முடிவுகள் திருப்தியாக இருக்கிறதா? என கேட்கும் சிறு பெட்டியும் தோன்றுகிறது. அதில் உள்ள ஸ்மைலியை கிளிக் செய்யும் போது உங்கள் முகத்திலும் புன்சிரிப்பு தோன்றலாம்.

நாம் ஏற்கனவே பயன்படுத்திய வாசகங்களை மீண்டும் திரும்பி சென்று பார்க்கும் வசதியும் இருக்கிறது.
இந்த தேடியந்திரத்தின் பெயர் தொடர்பாக சுவாரஸ்யமான தகவல் ஒன்றும் இருக்கிறது. ஆஸ்திரியாவைச்சேர்ந்த புகழ்பெற்ற தத்துவஞானியான லுத்விக் விட்ஜென்ஸ்டியன் என்பவர் நினைவாகவே இதற்கு லுத்விக என பெயர் சூட்டப்பட்டுள்ளதாம்.” என்னுடைய மொழியின் வரம்பு தான் என்னுடைய உலகின் வரம்பு” என்னும் வாசகம் அவரது சிந்தனைகளின் முக்கியத்துவத்தை உணர்த்துகிறது.

தேடியந்திர முகவரி:https://ludwig.guru/

—-
நன்றி; தமிழ் இந்துவில் எழுதியது!

கலைகளுக்கான தேடியந்திரம்!

women-artists-of-the-renaissance-sofonisba-anguissola-self-portrait-midகுறிப்பிட்ட துறைகளுக்காக என்று உருவாக்கப்பட்ட பிரத்யேக தேடியந்திரங்கள் வகையின் கீழ் வருகிறது ஆர்ட்சைக்லோபீடியா (artcyclopedia). பெயரில் இருந்தே உணரக்கூடியது போலவே இது கலைகளுக்கான தேடியந்திரம்.

கலை மற்றும் கலைஞர்கள், குறிப்பாக ஓவியக்கலைஞர்கள் தொடர்பான தகவல்களை தேட இது உதவுகிறது.
முதல் முறையாக இந்த தேடியந்திரத்தை அறிமுகம் செய்து கொள்ளும் போது, அட கலைகளுக்காக என்று தனியே ஒரு தேடியதிரமா என வியக்கத்தோன்றும். ஆனால், இதை பயன்படுத்திப்பார்க்கும் போது, இவ்வளவுதானா? என்ற அலுப்பும் ஏற்படலாம். ஏனெனில் இதில் எல்லா கலைஞர்களை பற்றிய தகவல்களை தேட முடியாது. இதன் தொகுப்பில் உள்ள கலைஞர்கள் பற்றி மட்டுமே தேட முடியும். பொதுவான தேடலில் ஈடுபட விரும்புகிறவர்களுக்கு இது ஏமாற்றம் தரலாம். ஆனால் இந்த தேடியந்திரத்தின் வரம்பை புரிந்து கொள்ளும் போது தான் அதன் அருமை புரியும்.

அருங்காட்சியக தரத்தை அளவுகோளாக வைத்துக்கொண்டு தான் இந்த தேடியந்திரம் கலைஞர்கள் மற்றும் அவர்களின் கலை தொடர்பான தகவல்களை தொகுத்தளிக்கிறது. அதாவது உலக அருங்காட்சியகத்தில் படைப்புகள் இடம்பெற்றிருக்க கூடிய கலைஞர்கள் மட்டுமே இந்த தொகுப்பில் உள்ளனர். அது மட்டும் அல்ல, அருங்காட்சியகத்தில் உள்ள அந்த கலைஞர்களின் படைப்புகளை இணையம் மூலம் அணுகும் வாய்ப்பும் இருக்க வேண்டும்.

இது தவிர, பொதுவாக இணையத்தில் தேடப்படும் கலைஞர்கள், இணையத்தின் மூலம் தகவல்கள் தேட்பபடக்கூடிய கலைஞர்கள் தொடர்பான தகவல்களே பட்டியலிடப்படுவதாகவும் குறிப்பிடப்பட்டுள்ளது. மொத்தம் 9,000 கலைஞர்கள் , 2900 கலை இணையதளங்கள் மட்டுமே பட்டியலிடப்பட்டுள்ளதாக தெரிவிக்கப்பட்டுள்ளது என்றால் பார்த்துக்கொள்ளுங்கள். மொத்த இணைப்புகளின் எண்ணிக்கை 1,60,000 தான்!
ஆனால் இந்த வரம்புகளை புரிந்து கொண்ட பிறகு இந்த தேடியந்திரத்தை பயன்படுத்த முற்பட்டால் புதிய வெளிச்சம் கிடைத்தது போல இருக்கும். இதில் பிரதானமான மூன்று வகையாக தேடலாம்: கலைஞர்களின் பெயரை குறிப்பிட்டு தேடலாம். அவர்களின் படைப்புகளை பெயரை குறிப்பிட்டும் தேடலாம். மூன்றாவது வழி அருங்காட்சியகத்தை குறிப்பிட்டு தேடுவது.

தேடல் வசதி தவிர, இந்த தளத்தில் இடம்பெற்றுள்ள பட்டியலில் இருந்தும் கலைஞர்களை அணுகலாம். கலைஞர்களின் பெயர், அவர்கள் பயன்படுத்திய கலை சாதனம், தேர்வு செய்து கொண்ட வகை மற்றும் அவர்களின் தேசம் ஆகிய தலைப்புகளில் தகவல்கள் வகைப்படுத்தப்பட்டுள்ளன. பெண் கலைஞர்களுக்கும் தனிப்பகுதி இருக்கிறது. கலை இயக்க வகைகளுக்கான பட்டியலும் கூட இடம்பெற்றுள்ளது. ஒவ்வொரு தலைப்பாக கிளிக் செய்து பார்க்கலாம். அந்த பிரிவில் இடம்பெற்றுள்ள கலைஞர்களை தனித்தனியே கிளிக் செய்து பார்க்கலாம்.

இந்த அம்சங்கள் இந்த தளத்திற்கு இணைய கையேடு தன்மையை அளிக்கிறது. முகப்பு பக்கத்திலேயே, பிரபலமான கலைஞர்கள் பட்டியலும் வழிகாட்டுகிறது. மற்றொரு முக்கிய அம்சம் கலை சார்ந்த செய்திகளும் தனியே கொடுக்கப்பட்டுள்ளது.

கலைஞர்கள் பற்றி அறியும் ஆர்வம் கொண்டவர்கள் இந்த தளத்தில் அங்கும் இங்கும் உலாவும் போதே கலைகள் தொடர்பான அருமையான தகவல் களஞ்சியமாக இது அமைந்திருப்பதை உணரலாம்.
குறிப்பிட்ட கலைஞர்கள் தொடர்பான தகவல்களை தேடும் போது இதன் அருமையை இன்னும் கூடுதலாக உணரலாம். பிக்காசோ, வான்கா, சால்வடார் டாலி என ஓவிய மேதைகள் பெயரை கிளிக் செய்து தேடினால் அட என்ற வியப்பு கண்டிப்பாக ஏற்படும். பிக்காசோ என்று குறிப்பிட்டதும் கூகுள் போல கோடிக்கணக்கில் பக்கங்களை பட்டியலிடுவதற்கு பதிலாக், ஒரே பக்கத்தில் பிக்காசோ தகவல்களை முன்வைக்கிறது. ஆனால், எந்த முடிவை கிளிக் செய்தால் பிக்காசோ பற்றிய தகவல்களை சரியாக தெரிந்து கொள்ள முடியும், எந்த தளத்தில் அவரது ஓவியங்களை பார்க்கலாம் என்ற தடுமாற்றம் எல்லாம் இருக்காது. பிக்கசோ பற்றிய சுருக்கமான அறிமுகத்திற்கு கீழே, இந்த விவரங்கள் எல்லாம் அழகாக வகைப்படுத்தப்பட்டிருப்பதை பார்க்கலாம். முதலில் அருங்காட்சியகங்களிள் உள்ள பிக்காசோ படைப்புகளின் பட்டியல் தோன்றுகிறது. உலகம் முழுவதும் உள்ள பிக்காசோ ஓவியங்களை இதில் பார்க்கலாம். புதிய சேர்க்கைகள் தனியே அடையாளம் காட்டுப்பட்டுள்ளன. தொடர்ந்து கலைக்கூடங்களில் உள்ள படைப்புகள், ஒளிபடங்களின் பட்டியல் இடம்பெறுகின்றன. பிக்காசோ தொடர்பான இணையதளங்கள், கட்டுரைகள் மற்றும் புத்தகங்களையும் தனிதனியே அணுகலாம். தளங்களை தேடிப்பார்க்க வேண்டிய தேவையே இல்லாமல், ஏற்கனவே கவனமாக அலசி ஆராய்ந்து தேர்ந்தெடுத்த தளங்களில் உள்ள தகவல்களை மட்டுமே இங்கு அணுகலாம்.

இதே போல ஒவ்வொரு கலைஞர்களுக்குமான தகவல்களை தேடலாம்.
இந்த தளத்தின் பயன்பாட்டை உணர வேண்டும் என்றால் கலைகளின் மீதும் ஓவியர்கள் மீதும் தனியாத தாகம் இருக்க வேண்டும். இந்த தேடியந்திரத்தை சீர்தூக்கி பார்க்க வேண்டும் என்றால் கூட, கலைஞர்கள் பற்றியும், கலைகள் பற்றியும் ஓரளவாவது அறிந்திருக்க வேண்டும்.

கனடாவைச்சேர்ந்த ஜான் மேல்யான் என்பவர் இந்த தேடியந்திரத்தை நடத்தி வருகிறார். 1999 ம் ஆண்டு முதல் இது செயல்பட்டு வருகிறது.

தேடியந்திர முகவரி:http://www.artcyclopedia.com/

தேடல் நுட்பங்கள்: தமிழ் இந்துவில் தேடியந்திரங்கள் தொடர்பான ஆ’வலை’ வீசுவோம் தொடரில் இடம்பெற்று வரும் பிரதான தேடியந்திரங்கள் தவிர கவனத்தை ஈர்க்கும் பிற தேடியந்திரங்களின் வரிசையில் இந்த தேடியந்திரம் அமைகிறது.