விஞ்ஞானத்தால் விளக்க முடியாத ஐந்து விநோத ஒலிகள்

GettyImages-165665968உலகில் புரியாத புதிர்களாக பல விஷயங்கள் இருக்கின்றன. இவற்றில் பல விநோதமானவை, பல நம்ப முடியாவை. இன்னும் சில வெறும் புனைவுகளாக உலாவிக்கொண்டிருப்பவை. அறிவியல் கண் கொண்டு பார்த்தால் இவற்றில் பலவற்றை விளங்கி கொண்டு விடலாம். ஆனால் அறிவியலால் கூட முழுமையாக விளக்க முடியாமல் இருக்கும் ஐந்து விநோதமான ஒலிகள் பற்றி காஸ்மோஸ் மேகஜைன் பத்திரிகை கட்டுரை ஒன்றை சுவாரஸ்யமாக விவரிக்கிறது.

 

ஹம்

மிகவும் குறைந்த அலைவரிசை கொண்ட ஒரு ஒலி உலகின் பல பகுதிகளில் கேட்டுக்கொண்டே இருக்கிறது. தூரத்து இடி முழக்கம் என்பதைப்போல, எங்கே இருக்கும் டிரக் இஞ்சின் அனைக்கப்படும் ஓசை போல ஒலிப்பாக அதை கேட்டவர்கள் சொல்கின்றனர். ஆனால் அந்த ஒலி இடைவிடாமல் கேட்டுக்கொண்டிருப்பது தான் பிரச்சனை. அது மட்டும் அல்ல, அந்த ஒலி எல்லோருக்கும் கேட்காமல் சிலருக்கு மட்டுமே கேட்டுக்கொண்டிருப்பது தான் அதைவிட பெரிய பிரச்சனை. உங்களை சுற்றி இருப்பவர்கள் எல்லாம் அமைதியாக உணரும் போது உங்களுக்கு மட்டும் ஒரு ஒலி கேட்டுக்கொண்டிருந்தால் எப்படி இருக்கும். அப்படி தான், ’ஹம்’ என குறிப்பிடப்படும் இந்த விநோத ஒலி, கனடா, ஸ்காட்லாந்து, நியூசிலாந்து, நியூமெக்சிகோ உள்ளிட்ட பகுதிகளில் உள்ள சிலருக்கு மட்டும் கேட்கிறது. உலக மொத்த மக்கள் தொகையில் 2 சதவீதம் பேருக்கு மட்டுமே இந்த ஒலி கேட்பதாக ஒரு புள்ளிவிவரம் தெரிவிக்கிறது.

ஒலியை கேட்பவர்களுக்கு இது எங்கிருந்து வருகிறது என்பது தெரிவதில்லை. இந்த ஒலியால் பாதிக்கப்பட்ட பெண்மணி ஒருவர், இரவு தூங்கும் போது படுக்கையில் துவங்கி வீடு முழுவதும் அதிர்வது போல இந்த ஒலி கேட்பதாக கூறியிருக்கிறார். அவரைத்தவிர மற்றவர்கள் அப்படி ஒரு ஒலியே கேட்கவில்லையே என கூறுவது தான் அவரது நிலைமைய மோசமாக்கி இருக்கிறது. இப்படி பலர் உலகம் முழுவதும் மற்றவர்களுக்கு கேட்காமல் தங்களுக்கு மட்டும் கேட்கும் ஒலியால் பாதிக்கப்பட்டுள்ளனர். காதில் பஞ்சை வைத்து அடைத்துக்கொண்டால் கூட இவை நிற்பதில்லை என கூறுகின்றனர். ஒலியை கேட்பதால மயக்கமும் தலைசுற்றலும் வருவதாகவும் பலரும் புலம்பியுள்ளனர். ஆனால், இதெல்லாம் மாயை அல்லது கற்பனை என மற்றவர்களால் கூறப்படுவது பாதிக்கப்பட்டவர்கள் நிலையை மேலும் மோசமாக்கிறது.

1960 கள் முதல் இந்த ஒலி கேட்கப்படுவதாக தகவல்கள் பதிவாகியுள்ளன. 1970 களில் பிரிட்டனில் உள்ள பிரிஸ்டல் பகுதியில் தான் இந்த ஒலியை கேட்டதாக சொல்பவர்கள் எண்ணிக்கை அதிக அளவில் இருந்ததாகவும் அறிய முடிகிறது. கடந்த நூற்றாண்டின் இறுதியிலேயே இந்த ஒலி பற்றிய பதிவுகள் இருப்பதாகவும் கூறப்படுகிறது.

இவை அனைததையும் மீறி, இந்த ஒலி எங்கிருந்து வருகிறது என்பதை கண்டறிய முடியவில்லை என்பது விநோதம். அறிவியலாலும் இந்த புதிருக்கு விடை அளிக்க முடியவில்லை. இருப்பினும் பலவிதமான விளக்கங்கள் முன்வைக்கப்படுகின்றன. நெடுஞ்சாலை வாகனங்களோ. தொழிற்சாலை உபகரணங்களோ இதற்கு காரணம் அல்ல என தெளிவுபடுத்தப்பட்டுள்ளது. பூமிக்கு அடியில் கால்வாய் அமைக்கும் பணியின் ஒலி, மீன்கள் உறவு கொள்வதன் ஒலி, பூகம்பத்தின் அதிர்வு என்பது போன்ற விளக்கங்களும் கூறப்படுகின்றன.

ஒரு தரப்பினர் இந்த ஒலி உண்மையில் இல்லவே இல்லை, எல்லாம் உளவியல் தாக்கம் என்று கூறுகின்றனர். இன்னும் சிலர், இந்த ஒலி, செவியின் கேட்கும் திறன் சார்ந்த கோளாறு என்கின்றனர். ராணுவம் பயன்படுத்தும் குறைந்த அலைவரிசை உபகரகணங்களின் தாக்கமாக இது இருக்கலாம் என்றும் கூறப்படுகிறது. இப்படி பலவிதமான விளக்கங்கள் முன்வைக்கப்பட்டாலும், இன்னமும் உறுதியான காரணம் கண்டறியப்படவில்லை.

வானத்து பூகம்பம்

பூகம்ப அதிர்வுகள் போல வானத்திலும் ஒருவிதமான அதிர்வுகள் உலகம் முழுவதும் கேட்டுக்கொண்டே இருக்கின்றன. இந்தியாவின் கங்கை நதிக்கரை முதல் ஜப்பான் கடல் பகுதி வரை பல இடங்களில் இந்த ஒலி, ஆகாயத்தில் இருந்து இறங்கி வரும் ஒளி பிழம்பின் வெடிப்பு போல கேட்டுக்கொண்டிருக்கிறது. பெரும்பாலும் நதிக்கரை அருகே இவை கேட்கின்றன. சில நேரங்களில் இதன் அதிர்வுகள் ஜன்னல்களையும், தட்டுகளையும் பதம் பார்க்கின்றன. இந்த ஒலி எங்கிருந்து வருகிறது என்பதும் புரியாத புதிராகவே இருக்கிறது. ராணுவ விமானம் ஒலியின் வேகத்தைவிட சீறிப்பாய்வதால் உண்டாகும் பாதிப்பு என்று ஒரு விளக்கம் தரப்படுகிறது. ஆனால் இத்தகைய விமானம் கண்டுபிடிக்கப்படுபதற்கு பல் ஆண்டுகள் முன்பே இந்த ஒலி பல இடங்களில் கேட்டிருப்பது எப்படி என புரியவில்லை.

கடற்கரை அருகே ராட்சத அலைகள் மலைப்பாறைகள் மீது மோதுவதன் தாக்கமாக இது இருக்கலாம் என விஞ்ஞானிகள் கூறுகின்றனர். மணல் குன்றுகளும் இதற்கு காரணமாக இருக்கலாம் என கூறப்படுகிறது. இவை சில நேரங்களில் வெடிப்பது போலவும் கேட்கலாம் என்கின்றனர். எரிகற்கள் பூமியின் காற்று மண்டலத்திற்குள் வேகமாக நுழைவதால் ஏற்படும் பாதிப்பும் என்றும் கூறப்படுகிறது. எங்கோ வெடித்து குமுறும் எரிமலை, பூமியின் ஆழத்தில் ஏற்படும் பூகம்பம் ஆகியவையும் இதற்கு காரணமாக இருக்கலாம் என கூறப்படுகிறது. ஆனால் எந்த காரணம் என்பது தான் உறுதியாக தெரியவில்லை.

தனியொரு திமிங்கல ஒலி

பெருங்கடல்களில் வாழும் திமிங்கலங்கள் தங்களுக்குள் தொடர்பு கொள்ள விசிலடிப்பது போல ஒலி எழுப்புகின்றன. இந்த ஒலிகளை விஞ்ஞானிகள் ஆழமாக ஆய்வு செய்திருக்கின்றனர். அவற்றின் பல தன்மைகளையும் கண்டறிந்துள்ளனர். ஆனால், இந்த ஒலிகளுக்கு மத்தியில் தனித்து கேட்ட ஒரு ஒலியை மட்டும் அவர்களால் முழுவதும் விளங்கி கொள்ள முடியவில்லை. 1992 ம் ஆண்டு முதல் வட பசுபிக் கடல் பகுதியில் இந்த ஒலி பதிவாகிறது. திமிங்க ஒலி போல இருந்தாலும், இந்த ஒலி வழக்கமாக திமிங்கிலங்கள் எழுப்பக்கூடிய ஒலி அளவை எல்லாம் விட அதிகமாக இருப்பதாக விஞ்ஞானிகள் குழம்பித்தவிக்கின்றனர். பொதுவாக திமிங்கலங்கள் எழுப்பும் ஒலி 10 முதல் 39 ஹெட்ஸ் அளவு கொண்டதாக இருக்கும் எனில் இந்த ஒலி மட்டும் உச்சஸ்தானியில் 52 ஹெட்ஸ் கொண்டதாக பதிவாகிறது.

தனித்த ஒற்றை திமிங்கலத்தின் பாடல் என சற்றே சோகமாக குறிப்படும் இந்த ஒலி, திமிங்கல ஒலி வல்லுனர்களையே திகைக்க வைத்திருக்கிறது. அந்த தனித்த திமிங்கலம் எழுப்பும் இந்த ஒலி புரியாத புதிராக இருப்பதோடு, அதன் ஏக்க கீதத்திற்கு பதில் கிடைத்ததா என தெரியாததும் மனிதகுலத்தை பரிதவிக்கச்செய்கிறது.

கடலின் ஆவேசப்பாடல்

இதுவரை கேட்டறியாத ஒரு பெருங்கூச்சல் போல ஒரு ஒலி தொடர்ந்து கேட்டால் எப்படி இருக்கும். இப்படி தான் பசுபிக் கடல் பகுதியில் 1991 ல் ஒரு பேரொலி பதிவானது. குறைந்த அலைவரிசையில் துவங்கி மேலே செல்லும் அந்த ஒலி வருடம் முழுவதும் விதவிதமாக கேட்பதாக கருதப்படுகிறது. இந்த ஒலியின் தோற்றுவாயை மட்டும் அல்ல, அதில் ஏற்படும் மாற்றங்களையும் விஞ்ஞானிகளால் விளக்க முடியவில்லை. அப்ஸ்வீப் என சொல்லப்படும் இந்த ஒலிக்கு கடலுக்கு அடியில் குமுறும் எரிமலைகள் காரணமாக இருக்கலாம் என ஊகிக்கப்படுகிறது.

அந்த கால ஒலி

இவை எல்லாம் இந்த காலத்து ஒலிகள் என்றால் பல ஆயிரம் ஆண்டுகளுக்கு முன் எகிப்தில் கேட்ட ஒலியும் இன்று வரை புதிராக இருக்கிறது. நைல் நதியின் மேற்கு பகுதியில் உள்ள பிரம்மாண்டமான இரட்டை கற்சிலையில் இருந்து விநோதமான பாடல் ஒலி கேட்பதாக அந்த காலத்து மனிதர்கள் கூறியிருக்கின்றனர். கி.மு 27 ம் ஆண்டில் பூகம்பத்தால் இந்த இரட்டை சிலைகளில் ஒன்று பாதிக்கப்பட்ட பிறகு அதிலிருந்து பாடல் கேட்கத்துவங்கியதாக வரலாற்று பதிவுகள் சொல்கின்றன. விஞ்ஞானிகள் இதற்கு வெப்பம் அதிகமானதால் உண்டான பாதிப்பாக இருக்கலாம் என விளக்கம் அளிக்க முற்பட்டாலும், பல நூற்றாண்டுகளுக்கு முன்னர் சிலை பழுதுப்பார்க்கப்பட்ட போது ஒலி நின்று போனதால் இதை உறுதிப்படுத்த வழியில்லை.

 

 

கட்டுரை மூலம்: https://cosmosmagazine.com/geoscience/5-sounds-science-can-t-explain

 

  • நன்றி; மின்னம்பலத்தில் எழுதியது.

தளம் புதிது: இணைய கடிகாரம்

 

 

கெடு வைத்துக்கொண்டு குறிப்பிட்ட நேரத்தில் ஒரு செயலை முடிக்க வேண்டும் என நினைப்பவர்களுக்கு உதவும் வகையில் அமைந்திருக்கிறது டைமர் இணையதளம். இந்த தளத்தின் உள்ள நேரம் காட்டும் கருவியில் நமக்கான நேரத்தை அமைத்துக்கொண்டு அதற்கேற்ப செயல்படலாம். பெரும்பாலும் சமையலறையில் பயன்படுத்துப்படுவது போன்ற டைமர் சாதனம் இந்த தளத்தில் உள்ளது. இதில் உள்ள பச்சை நிற அம்புக்குறி மூலம் நேரத்தை குறிப்பிட்டு கெடு வைத்துக்கொள்ளலாம். அதன் பிறகு அந்த நேரம் குறைந்து கொண்டே வரும். அதை கெடுவாக வைத்துக்கொண்டு வேலைகளை செய்து முடிக்கலாம். சமையல் வேலை துவங்கிம் உடற்பயிற்சி செய்வது, பாடல் கேட்பது என பலவற்றுக்கு இதை பயன்படுத்தலாம். சிக்கலான கூடுதல் அம்சங்கள் எல்லாம் இல்லாத மிகவும் எளிமையான இணையதளம். கவனச்சிதறலை குறைத்துக்கொண்டும், செயல்திறனை அதிகமாக்கி கொள்ள விரும்புகிறவர்களுக்கு பயனுள்ளதாக இருக்கும்.

இணைய முகவரி: http://timerrr.com/

 

 

செயலி புதிது:

ஆங்கிலம் உள்ளிட்ட மொழிகளை கற்றுக்கொள்ள ஸ்மார்ட்போன்  செயலிகள் அநேகம் இருக்கின்றன. இவற்றில் மிகவும் எளிமையானதாகவும் பயன்படுத்த ஏற்றதாகவும் இருக்கிறது 4 கார்ட்ஸ் செயலி.

இந்த செயலி மூலம் ஒவ்வொரு வார்த்தையாக கற்றுக்கொள்ளலாம். குறிப்பிட்ட ஒரு வார்த்தைக்கான விளக்கம் அளிக்கப்படுகிறது. இவ்வாறு தினமும் நான்கு வார்த்தைகளுக்கான அட்டைகள் மூலம் புதிய சொற்கள் அறிமுகம் செய்யப்படுகின்றன.

வார்த்தைகளுக்கான பொருளுடன் அவற்றுக்கான உச்சரிப்பையும் அறியலாம்.

தொடர்ச்சியாக பயன்படுத்தினால் புதுப்புது வார்த்தைகளாக அறிந்து கொள்ளலாம். ஆங்கில வார்த்தைகளை பயனாளிகள் தங்கள் மொழியில் மொழிபெயர்த்துக்கொள்ளும் வசதியும் இருக்கிறது. தமிழ் உள்ளிட்ட பலமொழிகளில் பயன்படுத்தலாம்.

தினமும் விநாடிவினாவை எதிர்கொள்ளும் வசதியும் இருக்கிறது. இணைய இணைப்பு இல்லாவிட்டாலும் இந்த செயலியை பயன்படுத்தலாம் எனத்தெரிவிக்கப்பட்டுள்ளது. ஆண்ட்ராய்டு போனில் தரவிறக்கம் செய்து பயன்படுத்தலாம்.

மேலும் விவரங்களுக்கு: https://4cards.in

 

 

சைபர்சிம்மன்

தோழமையுடன் நிதி திரட்ட உதவும் புதுமை இணையதளம்

DSYjiGzUQAA79GKஎனக்கு ஒரு கோப்பை காபி வாங்கித்தர சம்மதமா? என்பது போல பொருள் தரும் வகையிலான பைமீஏகாபி.காம் எனும் இணையதளம் பிராடக்ட் ஹண்ட் தளத்தில் கவனத்தை ஈர்த்தது. பெயரே சுவாரஸ்யமாக இருக்கிறதே என அந்த தளத்திற்கு நுழைந்து பார்த்தால் அதன் உள்ளடக்கமும் சுவாரஸ்யமாகவே இருக்கிறது.

உண்மையில் தளத்தின் பெயர் தான் உள்ளடக்கமே. அது தான் சுவாரஸ்யமே என்று வைத்துக்கொள்ளுங்களேன். காபி வாங்கி கொடுங்கள் என்பதை ஆங்கிலத்தில் பை மீ ஏ காபி என்று சொல்கிறோம் அல்லவா? இதையே கோரிக்கையாக வைப்பதற்காக தான் இந்த இணையதளமும் அமைக்கப்பட்டுள்ளது.

ஆம், இணையம் மூலம் நிதி திரட்ட உதவும் இணையதளங்கள் போல இந்த தளம், இணைவாசிகள் உங்களுக்காக காபி வாங்கித்தர வழி செய்கிறது. இந்த தளத்தில் ஒரு கோரிக்கை பக்கம் அமைத்தால், காபி வாங்கி கொடுக்கவும் என வேண்டுகோள் வைப்பதாக புரிந்து கொள்ளலாம். வேண்டுகோளை ஏற்றுக்கொள்பவர்கள், காபி வாங்கி கொடுக்க வேண்டியதில்லை. ஆனால் அதற்கு ஆகக்கூடிய தொகையை நன்கொடையாக அளிக்கலாம். பேபால் போன்ற இணைய பண பரிவர்த்தனை சேவை மூலம் இந்த தொகையை அனுப்பி வைக்கலாம்.

இந்த தளம் யாருக்காக என்றால், கலைஞர்கள், வலைப்பதிவாளர்கள், டெவலப்பர்கள் போன்ற உருவாக்குனர்களுக்கானது. அதாவது கிரியேட்டர்களுக்கானது. புதிய இணைய சேவை அல்லது படைப்புகளை உருவாக்குபவர்கள் தங்கள் பயனாளிகளிடம் இருந்து அதற்கான ஆதரவாக நிதி கோர இந்த தளத்தை பயன்படுத்திக்கொள்ளலாம்.

இணைய புதுமைகள், சேவைகள் தழைக்க வேண்டும் எனில் இது போன்ற ஆதரவு அவசியம் அல்லவா? அதை தான் இந்த தளம் உறுதி செய்ய முயற்சிக்கிறது.

இணையம், தொழில்நுட்பத்தில் ஆர்வம் கொண்ட பலர் வர்த்தக வெற்றியை இலக்காக கொண்டு புதிய சேவைகள், செயலிகளை உருவாக்க முயற்சிக்கின்றனர். பலர் இதை ஸ்டார்ட் அப் கனவுகளுடனும் முயற்சிக்கின்றனர். இந்த முயற்சியில் வெற்றி கிடைத்து டாலர்களும், ரூபாயும் கொட்டலாம். அல்லது தோல்வி பாடங்களை கற்றுத்தரலாம். விஷயம் அதுவல்ல, வர்த்தக நோக்கம் பற்றி எல்லாம் அலட்டிக்கொள்ளாமல் புதிய சேவைகளை உருவாக்கி அறிமுகம் செய்யும் தொழில்நுட்ப கில்லாடிகளும் அநேகம் பேர் இருக்கின்றனர். இவர்கள் பெரும்பாலும், தொழில்நுட்பம் தரக்கூடிய சாத்தியங்களையும், வாய்ப்புகளையும் பயன்படுத்து ஊருக்கு பயன்படும் புதிய சேவையை உருவாக்கும் உத்வேகத்துடன் மட்டுமே செயல்படுகின்றனர். தங்கள் சேவை இணையவாசிகளின் பிரச்சனைக்கு தீர்வாகவோ அல்லது அவர்களுக்கு புதிய வசதியை ஏற்படுத்தி தரும் சேவையாகவோ அமைந்திருப்பதே இவர்களுக்கு மகிழ்ச்சியையும், திருப்தியையும் தருகிறது.

இவர்களில் பலர் வேறு வேலை பார்த்துக்கொண்டே பகுதி நேரத்தில் ஆர்வத்தோடு இந்த முயற்சியில் தங்களை கரைத்துக்கொள்கின்றனர். இதையே முழு நேரமாக செய்யும் கர்மவீரர் மென்பொருளாலர்களும் இருக்கின்றனர். இணையத்தின் பல பயனுள்ள சேவைகள் இப்படி அறிமுகமானவை தான்.

மென்பொருளாளர்கள் மட்டும் அல்ல வலைப்பதிவாளர்கள் பலர் வாசகர்களுக்கு பயனுள்ள தகவல் அளிக்கும் நோக்கத்துடன் வலைப்பதிவு செய்கின்றனர். வீடியோக்களை உருவாக்குகின்றனர். கலைஞர்கள் பலர் கலைப்படைப்புகளை உருவாக்குகின்றனர். இவை எல்லாவற்றுக்குமே நேரமும், உழைப்பு அவசியம்.

இதனால் நமக்கு கிடைக்கும் பலன் என்ன என்று இந்த பிரம்மாக்கள் அதிகம் கவலைப்படுவதில்லை. தொழில் முறையிலான வேறு வழிகளில் தங்களுக்கான வருமானத்தை ஈடு செய்து கொள்கின்றனர். அல்லது, மென்பொருள் திட்டங்களை பகிர்வதற்கான கிட் ஹப் போன்ற இணையதளங்களில், ஓபன் சோர்ஸ் அடிப்படையில் தங்கள் திட்டத்தை வெளியிட்டு விட்டு ஆதரவு கேட்கின்றனர். இன்னும் சிலர், தங்கள் இணையதளம் அல்லது வலைப்பதிவில், இந்த சேவை பயனுள்ளது என உணர்ந்தால் இதை உருவாக்கிய என் முயற்சியை பாராட்டும் விதமாக நிதி அளியுங்கள் என கோருவதும் உண்டு.

நிதியுதவி என்றால் ஆயிரக்கணக்கிலோ, லட்சக்கணக்கிலோ அல்ல, உங்களால் முடிந்ததை கொடுங்கள் என மென்மையாக கேட்டு விட்டு அமைதி காப்பதாக இருக்கிறது. இதை கூட நிதி உதவி என்பது போல கோருவதில்லை. என் திறமையயும், நேரத்தையும் செலவிட்டு உங்களுக்கான சேவையை உருவாக்கி இருக்கிறேன். அது பிடித்திருந்தால், எனக்கு ஒரு காபி வாங்கி கொடுங்களேன் என்று கேட்கின்றனர். இ-காமர்ஸ் யுகத்திலும் இணையம் மூலம் காபி அனுப்பி வைக்க முடியாது என்பதால் அதற்கு ஈடான தொகையை நன்கொடையாக அனுப்பி வைக்கலாம்.

இந்த வழக்கம் தான், இணைய உலகில் பிரபலமாக ’பை மீ ஏ காபி’ என குறிப்பிடப்படுகிறது. நிதியுதவி என்பதை விட, உழைப்புக்கான பரிசு என வைத்துக்கொள்ளலாம். இணையத்தின் ஆரம்ப காலத்தில் இந்த கோரிக்கை டோனேட் மீ எனப்படும் நன்கொடை கோரும் பட்டன்கள் வடிவில் வெளிப்பட்டது. இணையவாசிகள் இந்த பட்டனை கிளிக் செய்து பேபால் அல்லது கிரெடிட் கார்டு மூலம் நிதி அளிக்கலாம்.

இந்த நிதி கோரிக்கை இன்னும் எளிமையாக்கித்தருவதற்கான இணைய மேடையாக பை மீ ஏ காபி இணையதளம் அமைந்துள்ளது. உருவாக்குனர்கள் இதற்கென தங்கள் இணையதளத்தில் தனியே கோரிக்கை வைக்க வேண்டிய அவசியம் இனி இல்லை. அதற்கு பதிலாக இந்த தளத்தில் தங்களுக்கான பக்கத்தை அமைத்துவிட்டு, தங்களது சேவை அல்லது திட்டம் குறித்த தகவல்களை அதில் பகிர்ந்து கொண்டால் போதுமானது. அந்த பக்கத்தை பார்க்கும் இணைவாசிகள் காபி வாங்கிக்கொள்வதற்கு நிகரான நிதி அளிக்கலாம். பயன்படுத்த எளிதானது என்பதோடு, இணையவாசிகள் அதி அளித்து ஆதரிப்பதற்கான இணைய மேடை என்பதால் இதன் மூலம் கிடைக்க கூடிய பலனும் அதிகமாக இருக்கலாம்.

அந்த வகையில் இந்த தளம் நிதி திரட்டுவதற்கான அபவுட்.மீ இணையதளம் போல இருப்பதாக பிராடக்ட் ஹண்ட் தளத்தின் நிறுவனர் ரயான் ஹோவர் பாராட்டியுள்ளார். ( அபவுட்.மீ என்பது இணையவாசிகள் தங்களுக்கான அறிமுகத்தை உருவாக்கி கொள்ள வழி செய்யும் சேவை). பிராடக்ட் ஹண்ட் தள பின்னூட்ட வடிவில் அளிக்கப்பட்ட இந்த பாராட்டை ஏற்றுக்கொண்டுள்ள, தளத்தின் இணை நிறுவனர்களில் ஒருவரான ஜோசப் சன்னி (@josephsunny_ ) தாங்கள் எதிர்பாராத விதங்களில் எல்லாம் இந்த தளம் பயன்படுத்தப்படுவதாக கூறியுள்ளார்.

இந்த தளத்தின் மூலம் பிட்காயின் வடிவில் நிதி அளிக்கும் வசதியும் அறிமுகம் ஆகியிருக்கிறது என்பது இன்னும் சுவாரஸ்யம்.

இணையம் மூலம் நிதி திரட்ட கிக்ஸ்டார்ட்டர் உள்ளிட்ட பல தளங்கள் இருக்கின்றன. இந்த வரிசையில் படைப்பாளுக்கான பிரத்யேக நிதி திரட்டும் மேடையான பேட்ரனும் சேர்ந்துள்ளது. ஆனால் பயனாளிகளிடம் தோளில் கைபோட்டபடி உரிமையோடு ஆதரவு கோர வழி செய்வதற்காக இந்த புதிய தளம் உருவாக்கப்பட்டுள்ளது. நீங்கள் உருவாக்குனர்களாக இருந்தால், இந்த தளத்தில் உங்களுக்கான கோரிக்கை பக்கத்தை அமைத்துக்கொள்ளலாம். அல்லது அதில் பட்டியலிடப்பட்டிருக்கும் திட்டங்களை ஒரு பார்வை பார்த்து ஆதரவு அளிக்கலாம்.- https://www.buymeacoffee.com/

டெயில்பீஸ்; கோ-பீ (ko-fi.com) எனும் இணையதளமும் இதே போன்ற சேவையை வழங்கி வருவதாக அறிய முடிகிறது. ஆனால் இந்த சேவை குறித்து எந்த பரபரப்பும் இல்லை.

யுவர்ஸ்டோரி தமிழில் எழுதியது

வலுவான பாஸ்வேர்டை உருவாக்கும் வழிகள்!

BN-UO739_80807p_HD_20170807010616பாஸ்வேர்டு என்பது இமெயில் உள்ளிட்ட இணைய சேவைகளுக்கான திறவுகோள் மட்டும் அல்ல அவற்றுக்கான பூட்டும் தான். எனவே நீங்கள் பயன்படுத்தும் பாஸ்வேர்டு வலுவானதாக இருப்பது மிகவும் அவசியம். இல்லை எனில் பாஸ்வேர்டு பூட்டு ஹேக்கர்களால் உடைக்கப்பட்டு, உள்ளே நுழைந்து விபரீதத்தை ஏற்படுத்தும் அபாயம் இருக்கிறது. இமெயில் பாஸ்வேர்டு களவாடப்பட்டால் உங்கள் தனிப்பட்ட தகவல்கள் பறிபோகலாம். இணைய வங்கிச்சேவைக்கான பாஸ்பேர்டு களவு போனால் பொருளதாரரீதியாக பெரும் இழப்பு ஏற்படலாம். அது மட்டும் அல்ல, ஒரே பாஸ்வேர்டை பல சேவைகளுக்கான திறவுகோளாக பயன்படுத்தும் வழக்கம் இருந்தால், ஒரு பாஸ்வேர்டு திருடப்பட்டால், நீங்கள் பயன்படுத்தும் ஒட்டுமொத்த இணைய சேவைகளுக்கான பின் வாசல் கதவை ஹேக்கர்களுக்கு திறந்து வைத்தது போலாகிவிடும்.

இணைய வாழ்க்கையின் பாதுகாப்பு பாஸ்வேர்டின் பாதுகாப்பில் இருக்கிறது. எனவே வலுவான பாஸ்வேர்டை உருவாக்கி கொள்வதற்கான அடிப்படைகள் நீங்கள் அறிந்திருக்க வேண்டும். இந்த நோக்கில் அனைவரும் தெரிந்து கொள்ள வேண்டிய வழிகள் என வல்லுனர்களால் முன்வைக்கப்படும் குறிப்புகள் இதோ:

நூறு யூகங்கள்

வலுவான பாஸ்வேர்டுக்கான அடிப்படை விதி மிகவும் எளிதானது. அந்த பாஸ்வேர்டு எளிதாக யூகித்து அறியும் வகையில் இருக்க கூடாது. ஒரு பாஸ்வேர்டு எளிதாக யூகிக்க கூடியதா என அறியவும் எளிதான வழி இருக்கிறது. பாஸ்வேர்டு எதுவாக இருந்தாலும், அது நூறு யூகங்களை தாக்குப்பிடிக்க கூடியதாக இருக்க வேண்டும் என்பது தான் அது.

அதாவது நீங்கள் பயன்படுத்தும் பாஸ்வேர்டு என்னவாக இருக்கும் என ஒருவர் வரிசையாக யூகிக்க முற்பட்டால், நூறு முறை யூகித்தாலும் அவரால் பாஸ்வேர்டை கண்டுபிடிக்க முடியாமல் இருக்க வேண்டும். பெரும்பாலானோர் பாஸ்வேர்டை தேர்வு செய்யும் போது, பெயர், பிறந்த தேதி, முக்கிய நிகழ்வுகள் போன்றவற்றின் அடிப்படையிலேயே பாஸ்வேர்டை அமைப்பதால், ஒருவரைப்பற்றிய தனிப்பட்ட தகவல்களை சமூக ஊடகங்களில் இருந்து திரட்டினால், அவற்றைக்கொண்டு என்ன பாஸ்வேர்டு அமைக்கப்பட்டிருக்கலாம் என யூகித்துவிட வாய்ப்பிருக்கிறது. 73 சதவீத ,முயற்சிகளில் ஹேக்கர்கள் பயனாளிகள் பாஸ்வேர்டை சரியாக கணித்துவிடும் வாய்ப்பிருக்கிறது என சைபர் வல்லுனர்கள் சொல்வதை இங்கே நினைத்துப்பார்க்க வேண்டும்.

பேஸ்புக் போன்ற சமூக ஊடகங்களில் பகிரப்படும் விஷயங்களை கொண்டு ஒருவரைப்பற்றிய தகவல்களை எளிதாக திரட்டிவிடலாம். ஆக, பொதுவெளியில் இருக்க கூடிய தகவல்களை எல்லாம் தவிர்த்து விட்டு உங்களுக்கான பாஸ்வேர்டை உருவாக்க முயற்சிக்கவும்.

சொற்றொடர் வழி

பாஸ்வேர்டை உருவாக்க அகராதி சொற்களை நாடக்கூடாது என்பது பொதுவான விதி. ஏனெனில் ஹேக்கர்கள் பயன்படுத்தும் உத்திகளில், அகராதி சொற்களை எல்லாம் முயன்று பார்க்கும் டிக்‌ஷனரி அட்டாக் மிகவும் பிரபலமானது. அதனால் தான் பாஸ்வேர்டை யோசிக்கும் போது, உங்களுக்கான பிரத்யேக சொற்றடர் ஒன்றை தேர்வு செய்து, அந்த தொடரில் இடம்பெறும் வார்த்தைகளின் முதல் எழுத்துக்களை சேர்த்து பாஸ்வேர்டை அமைக்கலாம் என்கின்றனர். இதை நீங்கள் நினைவில் கொள்வது எளிது. ஆனால் மற்றவர்கள் யூகித்து அறிவது கடினம். மானே தேனே பொன் மானே போட்டுக்கொள்வது போல, இடையே அடைப்பு குறிகள் மற்றும் எண்களை சேர்த்துக்கொள்ளலாம்.

நீளம் முக்கியம்

பெரும்பாலான இணைய சேவைகள் பாஸ்வேர்டு குறைந்தபட்சம் 8 எழுத்துக்கள் கொண்டதாக இருக்க வேண்டும் என வலியுறுத்தினாலும், உண்மையில் பாஸ்வேர்டு இன்னும் நீளமாக இருந்தால் நல்லது என்கின்றனர். அதிகபட்சம் 64 எழுத்துகள் கொண்டிருந்தாலும் பாதகம் இல்லை என்று வலியுறுத்தப்படுகிறது. பாஸ்வேர்டு எழுத்துக்களுக்கு நடுவே வெற்றிடத்தையும் பயன்படுத்தலாம். ஒரு மைய பொருளின் அடிப்படையில் பாஸ்வேர்டை தொடர் வார்த்தைகள் கொண்டதாகவும் அமைக்கலாம்.

உதாரணத்திற்கு செல்லப்பிராணி பிரியர்கள் தாங்கள் வளர்த்த செல்லப்பிராணிகளின் பெயர்களை எல்லாம் வரிசையாக பயன்படுத்தலாம்.

மாற்றம் தேவையா?

பாஸ்வேர்டு பாலபாடங்களில் ஒன்றாக இவற்றை அடிக்கடி மாற்றிக்கொண்டிருக்க வேண்டும் என சொல்லப்படுவது இப்போது மாறியிருக்கிறது. தேவையில்லாமல் பாஸ்வேர்டை மாற்ற வேண்டிய அவசியமில்லை. உங்கள் பாஸ்வேர்டு தாக்குதலுக்கு உள்ளாகி இருக்கலாம் எனும் சந்தேகம் எழும் போது மட்டும் மாற்றினால் போதுமானது. ஜிமெயில் உள்ளிட்ட சேவைகளில், சந்தேகத்திற்கு உரிய செயல்பாடுகள் இருந்தாலே எச்சரிக்கை தகவல் அனுப்பி வைக்கப்படுவதை நீங்கள் அறிந்திருக்கலாம். இது போன்ற நேரங்கள் உடனடியாக பாஸ்வேர்டை மாற்ற வேண்டியிருக்கலாம். அதே போல, பாஸ்வேர்டு கொள்ளை பற்றி பெரிய அளவில் செய்தி வெளியாகும் போது உங்கள் கணக்கு பாதுகாப்பாக இருக்கிறதா என உறுதி செய்து கொள்வது நல்லது.

நினைவில் நிற்கும் ரகசியம்

பாஸ்வேர்டை துண்டு சீட்டில் எழுதி வைப்பது நல்ல பழக்கம் இல்லை, தவிர்க்கப்பட வேண்டும் என்கின்றனர். எனவே தனித்தன்மை வாய்ந்த பாஸ்வேர்டை உருவாக்கினால் அது நினைவில் நிற்கும் ரகசியமாக அமையும். இல்லை எனில் பாஸ்வேர்டு நிர்வாகத்திற்கான பாஸ்வேர்டு மேனேஜர் மென்பொருள்களை பயன்படுத்தலாம்.

பாஸ்வேர்டை உருவாக்கும் போது, ஒரு எண், ஒரு சிறப்பு குறியீடு, பெரிய மற்றும் சிறிய எழுத்து வேறுபாடு ஆகியவற்றையும் பயன்படுத்தலாம்.

இரண்டு அடுக்கு பாதுகாப்பு

பாஸ்வேர்டு வலுவாக இருந்தால் மட்டும் போதாது. அதற்கு கூடுதல் அரணும் தேவை. இதை தான் டுபேக்டர் ஆதண்டிகேஷன் என்கின்றனர். அதாவது இரண்டு அடுக்கு பாதுகாப்பு. பாஸ்வேர்டை டைப் செய்த பிறகு இமெயில் அல்லது குறுஞ்செய்தி அல்லது செயலி வழியே தனி குறியீட்டை பெற்று அதை உள்ளீடு செய்து கணக்கின் உள்ளே நுழைவதை இது குறிக்கிறது. இணைய கில்லாடிகள் தாக்குதல் நடத்தியதை நீங்கள் உடனடியாக அறியாமலே இருக்கும் வாய்ப்பு இருப்பதால் பாஸ்வேர்டுக்கு இத்தகைய இரண்டு அடுக்கு பாதுகாப்பு இருப்பது நல்லது. பாஸ்வேர்டு மாற்ற முயற்சிக்கப்பட்டால் அல்லது புதிய சாதனம்., புதிய இருப்பிடத்தில் இருந்து கணக்கை அணுக முயன்றாலும் இந்த முறையில் எச்சரிக்கை செய்யப்படும்.

 

 

தளம் புதிது; நீங்களும் வடிவமைப்பாளராகலாம்!

போட்டோஷாப், கிராபிக்ஸ் போன்ற எந்த நுணுக்கங்களையும் அறியாமல், அழகான வடிவமைப்புகளை உருவாக்கி கொள்ள வழி செய்கிறது கிரெல்லோ இணையதளம்.

இந்த தளத்தில் உள்ள வடிவமைப்புகளை ( டெம்பிளேட்) தேர்வு செய்து அதில் பின்னணியை மாற்றுவது, வாசகங்களை சேர்ப்பது மூலம் பயனாளிகள் தங்களுக்கான புதிய வடிவமைப்புகளை உருவாக்கி கொள்ளலாம். பேஸ்புக் பதிவுகளுக்கான வடிவமைப்பு, இன்ஸ்டாகிராம் பகிர்வுக்கான வடிவமைப்பு போன்றவற்றை இந்த தளம் மூலம் எளிதாக உருவாக்கி கொள்ளலாம். போஸ்டர்களையும் வடிவமைக்கலாம். அனிமேஷன் சித்திரங்களையும் உருவாக்கி கொள்ளும் வசதி இருக்கிறது. நூற்றுக்கணக்கான டெம்பிளேட்கள் உள்ளன. அவற்றில் இருந்து விரும்பியதை தேர்வு செய்து தேவையான மாற்றங்களை செய்து கொள்ளலாம். ஏற்கனவே உருவாக்கப்பட்டுள்ள வடிவமைப்புகளை பார்த்தும் ஊக்கம் பெறலாம். கட்டணச்சேவையில் கூடுதல் வசதிகள் உண்டு. சமூக ஊடக பகிர்வு முதல் வலைப்பதிவு வரை பலவற்றில் பயன்படுத்தலாம்.

இணைய முகவரி: https://crello.com/home/

 

செயலி புதிது; கலைகளுக்கு ஸ்கேன் செய்யவும்

செயலி உலகில் ஷாஸம் செயலி மிகவும் பிரபலமானது. இசை கண்டறிதல் செயலி என வர்ணிக்கப்படும் ஷாஸம், இசை மெட்டுகள் அல்லது ஒலி குறிப்புகளை கேட்டு அதற்குறிய பாடல் எது என்பது உள்ளிட்ட விவரங்களை அளிக்க வல்லது. இதே போலவே, கலைப்படைப்புகளை ஸ்மார்ட்போன் மூலம் ஸ்கேன் செய்து அவை தொடர்பான விவரங்களை அளிக்கும் வகையில் ஸ்மார்ட்டிபை செயலி உருவாக்கப்பட்டுள்ளது.

உலகின் புகழ்பெற்ற அருங்காட்சியகங்களுக்கு செல்லும் போது, அங்குள்ள கலைப்படைப்புகள் தொடர்பாக தகவல்கள் தேவை எனில், இந்த செயலியால் அந்த படைப்புகளை ஸ்கேன் செய்தால் போதும், அவை தொடர்பான தகவல்கள் திரையில் தோன்றும். குறிப்பிட்ட அந்த படைப்பை உருவாக்கிய கலைஞரின் நேர்காணலையும் அணுகலாம். உலகின் முன்னணி அருங்காட்சியகங்கள் பலவற்றில் இந்த செயலி செயல்படுகிறது. இந்த பட்டியலில் மேலும் பல அருங்காட்சியகங்கள் இணைக்கப்படும் வாய்ப்புள்ளது. ஆண்ட்ராய்டு மற்றும் ஐபோனில் செயல்படுகிறது.

மேலும் தகவல்களுக்கு: https://smartify.org/

 

 

தகவல் புதிது: பொய் செய்தியின் தாக்கம்

இணைய உலகில் பெரும் பிரச்சனையாக உருவாகி இருக்கும் பொய் செய்தி எனப்படும் ஃபேக் நியூஸ் சவாலை சமாளிக்க பேஸ்புக், கூகுள், உள்ளிட்ட நிறுவனங்கள் பெரும்பாடு பட்டுக்கொண்டிருக்கின்றன. இந்த பிரச்சனை இணையத்தின் நம்பகத்தன்மைக்கான சவாலாகவும் அமைந்துள்ளது. இந்நிலையில் காலின்ஸ் அகராதி இந்த ஆண்டுக்கான சொல்லாக ஃபேக் நியூசை தேர்வு செய்வதாக அறிவித்துள்ளது. இன்ஸ்டா, யூனிகார்ன், ஆண்டிபா உள்ளிட்ட பல வார்த்தைகளை பின்னுக்குத்தள்ளி ஃபேக் நியூஸ் முதலிடத்தை பெற்றுள்ளது. செய்தி வெளியீடு எனும் போர்வையில், பரப்பபடும், தவறான, பெரும்பாலான நேரங்களில் பரபரப்பானதாக அமையும் தகவல்களை பொய்ச்செய்தி என காலின்ஸ் அகராதி குறிப்பிடுகிறது.

மேலும் தகவல்களுக்கு: https://www.collinsdictionary.com/woty

 

நன்றி; தழிம் இந்துவில் எழுதியது.

உங்கள் புத்தாண்டு உறுதிமொழி என்ன?

calendar-796x569புத்தாண்டு கொண்டாட்டங்கள், வாழ்த்துக்கள் நடுவே, உறுதிமொழிக்கும் இடம் இருக்கிறது அல்லவா? புத்தாண்டு கொண்டு வரும் உற்சாகத்திற்கு நடுவே, இந்த ஆண்டு முதல் இதை செய்ய வேண்டும் என ஏதாவது ஒரு இலக்கை மனதுக்குள் வரித்துக்கொள்வது பலருக்கு வழக்கம் தான். ஆனால் பிரச்சனை என்னவெனில் புத்தாண்டு உற்சாகம் வடிந்தவுடன் பலரும் உறுதிமொழியையும் மறந்துவிடுகின்றனர். ஆக, உடல் இளைக்க வேண்டும் என கொண்ட இலட்சியமோ அல்லது தினமும் உடற்பயிற்சி செய்ய வேண்டும் எனும் இலக்கோ மறக்கப்பட்டதாகி விடுகிறது. அதை நினைத்துப்பார்த்தால் குற்ற உணர்வு தான் ஏற்படும்.

நீங்களும் இந்த ரகம் என்றால், கவலைப்படாதீர்கள், புத்தாண்டு உறுதிமொழியை நீங்களும் வெற்றிகரமாக நிறைவேற்றலாம். அதற்கு நீங்கள் செய்ய வேண்டியது எல்லாம் ஒரே ஒரு உறுதிமொழி எடுத்துக்கொள்வது தான். அந்த உறுதிமொழி தினமும் எழுத வேண்டும் என்பது தான்.

தினமும் எழுதுவதா? எனக்கு எழுத்தாளராக வேண்டும் என்ற எண்ணம் இல்லையே என நினைக்க வேண்டாம். எழுத வேண்டும் என இங்கே டயரி எழுதுவதை தான். டயரி என்றவுடன் தினசரி நடப்பதை எல்லாம் எழுத வேண்டும் என்று அவசியமில்லை. உங்கள் உணர்வுகளை மட்டும் எழுதும் பழக்கத்தை ஏற்படுத்திக்கொண்டால் போதும்.

எதை எழுதுவது என்று யோசித்து திண்டாட வேண்டிய அவசியமும் இல்லை. வாழ்க்கையில் நீங்கள் நன்றி சொல்ல நினைக்கும் ஒரு விஷயத்தை எழுதலாம். உங்கள் சமாளிக்க முடியாத பிரச்சனை அல்லது உங்களுக்கு உள்ள பயம் பற்றி எழுதலாம். தினமும் உணர்வுகளை வெளிப்படுத்தும் வகையில் எழுத வேண்டும் என்பது தான் முக்கியம்.

சரி, இப்படி எழுதுவதால் என்ன பயன்?

எழுதுவது உங்கள் மகிழ்ச்சியானவராக மாற்றும். ஆம் அறிவியல் ஆய்வு அப்படி தான் சொல்கிறது. தாங்கள் நன்றி சொல்ல வேண்டிய விஷயங்கள் பற்றி நினைத்துப்பார்ப்பவர்கள் அல்லது மற்றவர்களுக்கு நன்றி கடிதம் எழுதுபவர்கள் தங்களைப்பற்றி நம்பிக்கை கொண்டவர்களாகவும், தங்கள் வாழ்க்கை பற்றி மேம்பட்ட உணர்வு கொண்டவர்களாகவும் இருப்பதாக ஆய்வாளர்கள் தெரிவிக்கின்றனர். இதற்கு முக்கிய காரணம், உணர்வுகளை எழுதுவது தங்கள் வாழ்க்கை பிரச்சனையை தாண்டி யோசிக்க வைப்பது மற்றும் வாழ்க்கை நம்மைவிட பெரிது என உணர வைப்பதுமாக இருக்கிறது. ஹார்வர்டு பல்கலை நடத்திய ஆய்வு இது: https://www.health.harvard.edu/healthbeat/giving-thanks-can-make-you-happier

feature_devicesஅது மட்டும் அல்ல, எழுதுவது உங்கள் செயல்திறனையும் அதிகரிக்கச்செய்யும் வாய்ப்பிருக்கிறது. பொதுவாகவே தினமும் ஒரு விஷயத்தை செய்யும் பழக்கம் கொண்டிருப்பது உங்கள் கவனத்தை அதிகரித்து, செயல்களுக்கு முன்னுரிமை அளிக்க வைக்கிறது. எழுதுவதை பழக்கமாக கொள்ளும் போது உங்கள் சுயமதிப்பும் அதிகரிக்கிறது. இது உங்கள் படைப்பூக்கத்தையும் வெளிப்படுத்தலாம். உங்கள் நல்ல எழுத்தாளராகவும் மாற்றலாம்.

எழுதுவது தனிப்பட்ட வாழ்க்கையை மேம்படுத்துவதாக ஆய்வுகள் தெரிவிக்கின்றன.

எப்படி எழுதுவது, எதை எழுதுவது என்று கவலைப்பட வேண்டாம். உங்களிடம் இருக்கும் நல்ல விஷயங்களை நினைத்துப்பார்த்து அதற்காக நன்றி தெரிவித்துக்கொள்ளுங்கள். இதை செய்வதன் மூலம் வாழ்க்கை நீங்கள் நினைப்பதை விட சிறந்ததாக இருக்கிறது என உணர்வீர்கள். அப்படியே உங்களை வாட்டும் பிரச்சனைகளையும் எழுதுங்கள். முதல் விஷயத்தை தவறாமல் செய்து வருவது நல்லது.

நன்றி உணர்வின் பலனை உணர்த்தும் இந்த குறிப்புகளுக்கு, கெய்லா மேதுயூஸ் எனும் இணைய எழுத்தாளருக்கு தான் நான் நன்றி சொல்ல வேண்டும், ஏனெனில் அவர் தான், தி நெக்ஸ்ட் வெப் இணையதளத்தில் இந்த புத்தாண்டுக்கான எனது உறுதிமொழி டயரி எழுதுவது தான் என்று கூறி, இதன் பலன்களை அழகாக விவரித்துள்ளார்: https://thenextweb.com/contributors/2017/12/26/ive-made-daily-writing-new-years-resolution/

இந்த கட்டுரையை படித்து வியந்து, எழுதுவதை புத்தாண்டு உறுதிமொழியாக கொள்வது பற்றி மேலும் தேடிப்பார்த்தால், அப்வொர்த்தி தளத்தின் அருமையான கட்டுரை இன்னும் ஊக்கம் தருகிறது. வேலையை இழந்த பொறியாளர்களில் ஒரு பிரிவினரை தினமும் எழுத வைத்த போது அவர்களில் பலருக்கு சில மாதங்களில் வேலை கிடைத்துவிட்டதாக தெரிவிக்கும் ஆய்வு ஒன்றை மேற்கோள் காட்டும் இந்த கட்டுரை, டயரி எழுதுவது மட்டுமே உங்கள் புத்தாண்டு உறுதிமொழியாக இருப்பதற்கான 9 காரணங்களை பட்டியலிடுகிறது.

எழுதுவது உங்களை மகிழ்ச்சியை அதிகமாக்குகிறது, ஆரோக்கியத்தை அதிகமாக்குகிறது, மன அழுத்தத்தை குறைக்கிறது, எடை குறைய வைக்கிறது என்றெல்லாம் காரணங்கள் அடுக்கப்பட்டுள்ளன. இவற்றுக்கான விளக்கமும் அளிக்கப்பட்டுள்ளது. எழுதுவது நோய் எதிர்ப்பு செல்களை அதிகம் உற்பத்தி செய்வதால் ஆரோக்கியம் அதிகரிக்கிறது. உணர்வுகளை எழுதுவது மனதில் உள்ள காயங்கள் ஆற வழி செய்வது மகிழ்ச்சியாக உணர வைக்கிறது.

இதே போலவே எழுதுவது புதிய வேலை கிடைக்க உதவுகிறது, பணியில் சிறந்து விளங்க வைக்கிறது, படைப்பூக்கம் கொள்ள வைக்கிறது என்றெல்லாம் இந்த கட்டுரை விவரிக்கிறது. ஆக இந்த புத்தாண்டில் தினமும் எழுதுவது எனும் உறுதிமொழியை மேற்கொள்ளுங்கள். அதன்படி தினமும் எழுதுங்கள்!

உணர்வுகளை எழுதுவதால் கிடைக்கும் ஆரோக்கிய பலன்களை வேறு பல கட்டுரைகளும் பட்டியலிடுகின்றன.

உங்கள் மனதில் குறிப்பிட்ட இலக்கு இருந்தால் அதை புத்தாண்டு உறுதிமொழியாக ஏற்றுக்கொண்டு அது பற்றியும் எழுதி வரலாம். இலக்கு தொடர்பான உங்கள் உணர்வுகள், அதை மேற்கொள்வதில் உள்ள தடைகள் பற்றி எழுதத்துவங்கலாம்.

புத்தாண்டு பரிசாக வந்த டயரியையும், பேனாவையும் கையில் எடுங்கள், எழுத துவங்குங்கள். இணைய யுகத்தில் இதற்கு என்றே பிரத்யேக இணைய சேவைகள் மற்றும் ஸ்மார்ட்போன் செயலிகளும் இருக்கின்றன தெரியுமா? பென்சு (https://penzu.com/ ) இணையதளம், இணைய டயரி எழுதுவதற்கான வசதியை அளிக்கிறது. டேஒன் (http://dayoneapp.com/) செயலி ஆண்ட்ராய்டி மற்றும் ஐபோனில் தினமும் இணைய டயரி எழுத கைகொடுக்கிறது.

ஆல் தி பெஸ்ட்!