Tag Archives: adobe

பிளேஷ் மூடுவிழா அறிவிப்பும், இணைய வரலாறு கவலையும்!

960x0பழையன கழிதல் என்பது மென்பொருள் சேவைகளுக்கும் பொருந்தும் தான். அதிலும் இணைய தொழில்நுட்பம் வெகு வேகமாக மாறிக்கொண்டிருக்கும் நிலையில், பழைய மென்பொருள் சேவைகள் காலாவதியாகி கைவிடப்படும் நிலை ஏற்படுவது இயற்கையானது தான். இணையத்தின் அடையாளங்களில் ஒன்றாக திகழும் அடோப் பிளேஷ் மென்பொருளுக்கும் இது தான் நிகழ இருக்கிறது. பிளேஷ் மென்பொருளுக்கு விடை கொடுக்க இருப்பதாக அடோப் நிறுவனம் அண்மையில் அறிவித்ததை நீங்களும் கவனித்திருக்கலாம். இது தொடர்பாக அடோப் வெளியிட்ட அறிவிப்பில், பிளேஷ் மென்பொருள் வாழ்க்கையை முடிக்க இருப்பதாக தெரிவித்திருந்தது. 2020 ம் ஆண்டு வாக்கில் பிளேஷ் பிளேயர் மென்பொருளை வெளியிடுவது மற்றும் அதற்கான அப்டேட்கள் நிறுவத்தப்படும் என்றும் அந்த அறிவிப்பில் தெரிவிக்கப்பட்டிருந்தது. இதன் பொருள் பிளேஷ் மென்பொருள் மெல்ல கொல்லப்படும் என்பதாகும்.

இந்த அறிவிப்புக்கான எதிர்வினைகளை பார்க்கும் போது, பிளேஷ் மென்பொருளுக்கு விடை கொடுக்க பெரும்பாலானோர் தயாராகிவிட்டது போலவே தோன்றுகிறது. பிளேஷ் மென்பொருளின் முடிவு நீண்ட காலமாக எதிர்பார்க்கப்பட்டது தான் என்றும், இப்போதாவது அடோபிற்கு இதை அறிவிக்க மனம் வந்ததே என்பது போலவும் தான் பலரும் கருத்து தெரிவித்துள்ளனர். தொழில்நுட்ப செய்தி தளங்கள் கூட, பிளேஷின் தவிர்க்க இயலாத மரணம் என்பது போல தலைப்பு வெளியிட்டிருந்தன. கிஸ்மோடோ இணையதளம் பிளேஷை கருணக்கொலை செய்ய அடோப் முன்வந்துள்ளது என வர்ணித்திருந்தது. இன்னும் சிலர், தவிர்க்க இயலாத பிளேஷ் முடிவு இப்போதாவது அறிவிக்கப்பட்டுள்ளதே என நிம்மதி பெருமூச்சு விட்டுள்ளனர். பல தளங்கள் பிளேஷ் மென்பொருளுக்கு இறங்கற்பா எழுதிக்கொண்டிருக்கின்றன.

பிளேஷ் மீது ஏன் இத்தனை வெறுப்பும், விமர்சனமும் இருந்தாலும் ஒரு காலத்தில் அது கொண்டாடப்பட்ட மென்பொருளாக இருந்ததை மறந்துவிடக்கூடாது. பிளேஷ் அடிப்படையில் இணையத்திற்கான மல்டிமீடியா சேவைகளை உருவாக்க பயன்படும் மென்பொருள். அனிமேஷன், வீடியோகேம் மற்றும் வீடியோக்களை உருவாக்க பிளேஷ் பயன்படுத்தப்படுகிறது. கிராபிக் தான் இதன் பலம் என்பதால், இணையதளங்களை செழுமையாக்க கூடிய செயலிகளையும், சேவைகளையும் பிளேஷ் கொண்டு எளிதாக உருவாக்க முடிந்தது. அது மட்டும் அல்ல இணையத்தில் வீடியோக்களை எளிதாக பார்க்கவும் பிளேஷ் கைகொடுத்தது. வீடியோ பகிர்வு சேவை பிரிவில் முன்னோடியான யூடியூப் 2005 ல் அறிமுகமான போது பிளேஷ் பிளேயர் மூலமே வீடியோக்களை பார்க்க வழி செய்ததாக விக்கிபீடியா கட்டுரை குறிப்பிடுகிறது என்றால் பார்த்துக்கொள்ளுங்கள். அது மட்டும் அல்ல, பிளேஷ் கொண்டு எண்ணற்ற கேம்களும், அனிமேஷன்களும் உருவாக்கப்பட்டுள்ளன.

இப்படி கோலோச்சிய பிளேஷ் முடுவிழாவை நோக்கி தள்ளப்பட இரண்டு முக்கிய காரணங்கள் இருக்கின்றன. முதல் காரணம், பிளேஷ் தொழில்நுட்பம் காலாவதியாகவிட்டது என்பது. ஒரு காலத்தில் இணையதளங்களுக்கான சுவாரஸ்யமான உள்ளடக்கத்தை உருவாக்க பிளேஷ் தேவைப்பட்டது என்றாலும், அதன் பின் நிகழ்ந்த பாய்ச்சலில் அதைவிட மேம்பட்ட தொழில்நுட்பங்கள் வந்துவிட்டன. அதோடு பிரவுசர்களில் பயன்படுத்தப்படும் எச்டிஎம்.எல் தொழில்நுட்பத்திற்கு பிளேஷ் அந்நியமாகிவிட்டது. எனவே மென்பொருளாளரகள் பிளேஷுக்கு குட்பை சொல்லி வருகின்றனர்.

பிளேஷை பொருத்தவரை இன்னொரு பிரச்சனை, அதில் உள்ள பாதுகாப்பு பிரச்சனைகள். பிளேஷ் மென்பொருள் கொண்டு உருவாக்கப்படும் பல சேவைகள் மால்வேர் எனப்படும் வில்லங்க வாகனங்கள் மறைந்திருக்கும் இடமாக கருதப்படுகிறது. பிளேஷில் உருவாக்கப்பட்ட எட்டிப்பார்க்கும் விளம்பரங்கள் அல்லது வீடியோக்கள் மால்வேர்களின் உரைவிடமாக அமைவது உண்டு. அதோடு, உங்கள் பிளேஷ் பிளேயர் காலாவதியாகிவிட்டது, அப்டேட் செய்யவும் எனும் அறிவிப்பையும் பிளேஷ் சார்ந்த தளங்களில் அடிக்கடி பார்த்திருக்கலாம். பெரும்பாலும் இதுவும் வில்லங்க அறிவிப்பாக அமைந்து, இதை கிளிக் செய்தால் மால்வேருக்கான ஜன்னல் திறக்கப்பட்டு அவை கம்ப்யூட்டருக்குள் புகுந்துவிடும். இதற்கு பிளேஷை குற்றம் சாட்ட முடியாது என்றாலும், மால்வேரை உருவாக்கும் விஷமிகளின் பயன்பாட்டால் பிளேஷ் பாதுகாப்பு ஓட்டைகள் நிறம்பியதாக கருதப்பட்டு வருகிறது.

மேம்பட்ட தொழில்நுட்பம் வந்துவிட்டதாலும், மால்வேர் வாகனமாக இருப்பதாலும் பிளேஷுக்கு எதிராக வலுவான விமர்சனங்கள் தொடர்ந்து கூறப்படுகின்றன. பல பிரவுசர் நிறுவனங்களும், பிளேஷை கழற்றிவிட்டுள்ளன. இவ்வளவு ஏன், ஆப்பிள் நிறுவனர் மறைந்த ஸ்டீவ் ஜாப்ஸ், ஐபோனில் இதற்கு இடமே கொடுக்கவில்லை. பிளேஷ் மறைந்தாக வேண்டிய மென்பொருள் என முதலில் அறிவித்தது ஜாப்ஸ் தான். பிளேஷ் டெஸ்க்டாப் காலத்திற்கான மென்பொருள், ஸ்மார்ட்போன யுகத்தில் அதற்கு தேவையில்லை என ஜாப்ஸ் காட்டமாக கூறியிருந்தார்.

ஏதோ ஒரு விதத்தில் பலரும் இப்போது இதை ஏற்கத்துவங்கிவிட்டனர். அதன் விளைவு தான் அடோப் நிறுவனம், பிளேஷை கைவிடும் முடிவை அறிவித்துள்ளது: https://blogs.adobe.com/conversations/2017/07/adobe-flash-update.html

நிற்க இந்த செய்திக்கு இன்னொரு பக்கம் இருக்கிறது. பிளேஷ் மென்பொருளுக்கு ஆதரவாளர்கள் இருக்கின்றனர் என்பதும், அவர்களில் பலர் பிளேஷ் நீடுழி வாழ வேண்டும் என கோரிக்கை எழுப்பியிருப்பதும் தான் அது. மென்பொருளாலரான ஜுஹா லின்ஸ்டெட் (Juha Lindstedt ) என்பவர் பிளேஷை கைவிடக்கூடாது என வலியுறுத்தி கையெழுத்து இயக்கம் ஒன்றை துவக்கியிருக்கிறார். அவரது கோரிக்கை ஒரளவு வரவேற்பை பெற்றிருப்பதோடு காரசாரமான விவாதத்தையும் துவக்கி வைத்திருக்கிறது.

லின்ஸ்டெட் பிளேஷை காப்பற்ற வேண்டும் என்பதற்காக எடுத்து வைக்கும் வாதம் மிகவும் முக்கியமானது. பிளேஷுக்கு முடிவிழா என்பது ஒரு மென்பொருள் சார்ந்த முடிவு மட்டும் அல்ல, அது இணைய வரலாறு சார்ந்ததும் கூட என்பது தான் அவரது வாதத்தின் முக்கிய அம்சம். அதாவது பிளேஷ் கொண்டு உருவாக்கப்பட்ட இணையசேவைகளும், கேம்களும், அனிமேஷன்களும் தொடர்ந்து பயன்படுத்தப்படா முடியாமல் போய்விடும் என்று அவர் கவலைப்படுகிறார். இந்த சேவைகளும், கேம்களும் இணைய வரலாற்றின் அங்கமாக இருப்பதால் அவை காணாமல் போவது இணைய வரலாற்றின் ஒரு பகுதி அழிந்து போவதற்கு சமம் என்கிறார் அவர்.

இதற்காக கித்ஹப் எனும் தொழில்நுட்ப தளத்தில் கோரிக்கை மனு அளித்து ஆதரவு கோரியுள்ளவர், பிளேஷ் பிளேயர் என்பது இணைய வரலாற்றின் முக்கிய துண்டு, அதை கொல்வது எதிர்கால தலைமுறை கடந்த காலத்தை அணுக முடியாமல் செய்துவிடும் என்று தெரிவித்துள்ளார். கேம்கள், இணையதளங்கள், இணைய சோதனை முயற்சிகள் எல்லாமே மறக்கப்பட்டுவிடும் என்றும் அவர் தெரிவித்துள்ளார்.

மென்பொருளில் ஏற்படும் முன்னேற்றம் என்பது கடந்த காலத்தை அழிப்பதாக அமைய வேண்டுமா என்பது தான் அவர் கேட்கும் கேள்வி. ஆம், சில ஆண்டுகள் கழித்து மென்பொருள் வரலாறு பற்றி விவாதிக்கும் போது பிளேஷ் மென்பொருள் தொடர்பாக பேசும் போது, அதற்கான உதாரணங்களை காண முடியாமல் வெறும் விக்கிபீடியா கட்டுரையை தகவலை மட்டும் காண்பது என்பது வரலாற்று வெறுமையாகி விடலாம் அல்லவா? இந்த கவலையினால் தான் லின்ஸ்டெட் பிளேஷை காப்பாற்ற குரல் கொடுக்க கோரியிருக்கிறார். ஆனால், பிளேஷ் தொடர்பான நிதர்சனத்தை அவர் உணராமல் இல்லை. எனவே தான், பிளேஷ் மென்பொருளை கொலை செய்துவிடாமல், அதை ஓபன் சோர்ஸ் முறையில் வெளியிட்டு இணையவாசிகள் கைகளில் ஒப்படைக்க வேண்டும் என கேட்டிருக்கிறார். இது சரியா? பலன் தருமா? எனும் நோக்கில் மென்பொருள் உலகில் விவாதம் நடைபெற்று வருகிறது.: https://github.com/pakastin/open-source-flash

இணைய யுகத்தின் பழைய சேவைகளையும், தளங்களையும் தக்க வைத்து, இணைய வரலாற்றை காக்க வேண்டும் எனும் இயக்கத்தின் பாதையில் பிளேஷுக்கான போராட்டம் முக்கிய பங்கு வகிக்கும் என எதிர்ப்பாக்கலாம். இந்த செய்திக்கு வாலாக ஒரு தகவலையும் நினைத்துப்பார்ப்பது பொருத்தமாக இருக்கும். அண்மையில் மைக்ரோசாப்ட் நிறுவனம் வரைவதற்கான எம்.எஸ் பெயிண்ட் மென்பொருளுக்கு விடை கொடுப்பதாக அறிவித்தது. ஆனால் அந்த எளிமையான மென்பொருளுக்கு ஆதரவாக பயனாளிகள் டிவிட்டரில் பொங்கியதை அடுத்து, பெயிண்ட் மென்பொருள் விண்டோஸ் ஸ்டோரில் தொடரும் என அறிவித்தது. 32 ஆண்டுகளுக்கு முன் அறிமுகமான மென்பொருளுக்கு இத்தனை அபிமானிகளா என்றும் வியந்து போவதாக மைக்ரோசாப்ட் தெரிவித்திருந்தது. கம்ப்யூட்டரில் வரைவதை எளிதாக்கிய அந்த மென்பொருளும் இணைய வரலாற்றின் அங்கம் தான்.

 

தளம் புதிது: அந்த நாள் இணையதளங்கள்

இணைய வரலாற்றை திரும்பி பார்க்க இணையதளங்களை திரும்பி பார்ப்பதைவிட சிறந்த வழி வேறில்லை. அதாவது, சில ஆண்டுகளுக்கு முன் குறிப்பிட்ட இணையதளங்கள் எப்படி இருந்தன என்பதை திரும்பி பார்ப்பது. குறிப்பிட்ட கால கட்டத்தில் இணையதளங்கள் எப்படி தோற்றம் அளித்த என தெரிந்து கொள்ள முடிவது இணைய வடிவமைப்பு பற்றி மட்டும் அல்ல, உள்ளடக்கத்தின் போக்கு பற்றியும் புரிய வைக்கும்.

அந்த வகையில், இணையத்தின் முன்னணி இணையதளங்கள் பத்தாண்டுகளுக்கு முன் எப்படி இருந்தன என்பதை தெரிந்து கொள்ள வழி செய்கிறது டென் இயர்ஸ் அகோ இணையதளம்.

இதன் முகப்பு பக்கத்தில் பட்டியலிடப்பட்டுள்ள ரெட்டிட், யூடியூப், அமேசான், பிபிசி, டைம், ஆப்பிள் உள்ளிட்ட இணையதளங்களின் லோகோ மீது கிளிக் செய்தால் அவை 10 ஆண்டுகளுக்கு முன் எப்படி காட்சி அளித்தன என்பதை பார்க்கலாம்.

இணையதளங்களின் பழைய வடிவங்களை சேமித்து காப்பாற்றிவரும், வெப் ஆர்கேவ் தளத்தில் சேமிக்கப்பட்ட இணைய பக்கங்களை கொண்டு இந்த இணையதளம் உருவாக்கப்பட்டுள்ளது. நீல் அகர்வால் என்பவர் இந்த சுவாரஸ்மான இணையதளத்தை அமைத்திருக்கிறார்.

இணைய முகவரி: http://tenyearsago.io/

 

செயலி புதிது; புத்தக குழுக்களை உருவாக்கலாம் வாங்க!

நல்ல புத்தகத்தை படித்தால் மட்டும் போதுமா என்ன? அது பற்றி சக வாசகர்களுடன் விவாதித்தால் தான் வாசிப்பு அனுபவம் இன்னும் விசாலமாகும் அல்லவா? ஸ்மார்ட்போன் யுகத்தில் இத்தகைய பகிர்தலுக்கு உதவும் வகையில் புக்டிரைப்ஸ் செயலி உருவாக்கப்பட்டுள்ளது.

ஐபோனுக்காக உருவாக்கப்பட்டுள்ள இந்த செயலியில், புத்தக புழுக்கள் தாங்கள் படித்த ரசித்த புத்தகம் தொடர்பான குழுவை உருவாக்கி கொண்டு அது பற்றி விவாதிக்கலாம். இந்த குழுவில் சேருமாறு நண்பர்களுக்கு அழைப்பு விடுக்கலாம். நமக்கு பிடித்த புத்தகம் தொடர்பான குழுவில் சேர்ந்து கருத்து தெரிவிக்கலாம்.

நாம் விவாதிக்க விரும்பும் புத்தகங்களை நண்பர்களுடன் பகிர்ந்து கொண்டு கருத்து சொல்ல அழைக்கலாம். ஒவ்வொரு புத்தகம் பின்னும் ஒரு குழு இருக்கிறது என்பதை சாத்தியமாக்க விரும்புகிறது இந்த செயலி.

மேலும் விவரங்களுக்கு: http://booktribes.us/

 

 

நன்றி; தமிழ் இந்து இளமை புதுமையில் எழுதியது.

பாஸ்வேர்டு குறுக்கெழுத்து புதிர் !.

indexகுறுக்குழுத்து புதிர் ஆர்வத்தை ஏற்படுத்தும் ! விழிப்புணர்வை ஏற்படுத்துமா ? இந்த கேள்விக்கான பதிலாக பாஸ்வேர்ட் குறுக்கெழுத்து புதிர் உருவாகி இருக்கிறது. ஆம், இணையத்தில் கசிந்த பாஸ்வேர்டுகளை வைத்து சுவாரஸ்யமான குறுக்கெழுத்து புதிர் உருவாக்கப்பட்டுள்ளது.
புக்ழபெற்ற அடோப் நிறுவனம் சமீபத்தில் லட்சக்கணக்கான பயனாளிகளின் பாஸ்வேர்டை கோட்டை விட்டு நின்றது . 150 மில்லியன் பயனாளிகளின் பாஸ்வேர்டுகள் மற்றும் அவற்றுக்கான குறிச்சொற்கள் திருடப்பட்டு இணையத்தில் வெளியானது. இணைய நிறுனங்களின் பாஸ்வேர்டுகள் இப்படி திருட்டுக்கு ஆளாவது பற்றி அடிக்கடி செய்தி வெளியாகி கொண்டிருக்கின்றன. அடோப் சமீபத்தில் இந்த பட்டியலில் சேர்ந்த்துள்ளது.
பாஸ்வேர்டு பாதுகாப்பில் உள்ள போதாமைகளின் அடையாளம் இவை.
அடோபுக்கு மட்டும் உரிதான் பிரச்சனை அல்ல இது. தாக்காளர்கள் அவ்வப்போது இணைய நிறுவனங்களிடம் இப்படி கைவரிசை காட்டி பாஸ்வேர்டுகளை பகிரங்கமாக்கி வருகின்றனர்.
இப்போது பென் பால்க்னர் என்பவர் புதுமையான பாஸ்வேர்டு குறுக்கெழுத்து புதிரை உருவாக்கி உள்ளார். அடோப் பயனளிகளின் திருடப்பட்ட பாஸ்வேர்டுகளில் ஆயிரம் பாஸ்வேர்டுகளை வைத்து இந்த புதிரை உருவாக்கியுள்ளார். வழக்கமான ஆங்கில குறுக்கெழுத்து புதிர போல தான் இதுவும் இருக்கிறது. ஆனால் ஆங்கில சொற்களுக்கு பதிலாக பாஸ்வேர்டுகள் இடம்பெற்றுள்ளன. அந்த பாஸ்வேர்டை மறக்காமல் இருக்க சமர்பித்த குறிச்சொற்கள் அந்த வார்த்தைகளுக்கான வழிகாட்டி வாக்கியமாக கொடுக்கப்பட்டுள்ளன.
http://zed0.co.uk/crossword/ என்ற முகவரியில் இந்த பாஸ்வேர்டு குறுக்கெழுத்து விளையாட்டை ஆடிப்பார்க்கலாம்.
குப்பை போல இணையத்தில் கொட்டப்பட்ட இந்த பாஸ்வேர்டுகளை பார்த்த போது அவற்றோடு விளையாடிப்பார்க்கும் எண்ணம் ஏற்பட்டு இந்த புதிரை உருவாக்கியதாக பால்கன் கூறியுள்ளார். ஆனால் பாஸ்வேர்டுகள் இப்படி பகிரங்கமாக்கி, அவற்றை எப்படி கண்டுபிடிப்பது என்று அடையாளம் காட்டுவது ஆபாதானது இல்லையா ? என்று கேட்கலாம். ஆனால் பாஸ்வேர்டுகள் திருடப்பட்டு இணையத்தில்  வீசி எரியப்பட்ட பிறகு அவற்றில் எங்கே பாதுகாப்பு இருக்கிறது என்று அவர் கேட்கிறார். ஆக இந்த பட்டிஅய்லில் உங்கள் பாஸ்வேர்டை பார்த்தால் உடனடியாக அதை மாற்றுங்கள் ,வேறு வழியில்லை என்கிறார்.
இந்த பட்டியலில் இல்லாவிட்டாலும் கூட அடிக்கடி உங்கள் இணைய பாஸ்வேர்டை மாற்றிக்கொண்டே இருங்கள் அது தான் பாதுகாப்பானது.
பால்கனுக்கு நிச்சயம் சபாஷ் போட வேண்டும். வெறும் செய்தியாக மறந்துவிடக்கூடியத் பாஸ்வேர்டு திருட்டை அவர் குறுட்க்கெழுத்து புதிராக்கி கலைநயமாக ஆவணப்படுத்தி இருக்கிறார். பாஸ்வேர்ட் பயன்பாட்டில் உள்ள குறைகளை இதன் மூலம் சுட்டிக்காட்டியிருக்கிறார். இதிலிருந்து விழுப்புணர்வு பெறுவது அவரவர் பொறுப்பு.
ஆனால் பால்கனுக்கு முன்பாக ராண்டல் முன்ரோவுக்கு நன்றி சொல்ல வேண்டும்.http://www.xkcd.com/1286/   எனும் இணைய காமிக்கை நடத்தி வருபவர் முன்ரோ. அவர் தான் முதலில் அடோப் களவு கொடுத்த பாஸ்வேர்டுகளை கொண்டு குறுக்கெழுத்து புதிரை காமிக்காக வரைந்து காட்டினார். அதை பார்த்து ரசிக்கலாம், ஆனால் ஆட முடியது. இந்த காமிக்கை பார்த்து உந்துதல் பெற்ற பால்கன் உண்மையான குறுக்கெழுத்தை உருவாக்கினார்.

குறுக்கெழுத்து புதிர்: http://zed0.co.uk/crossword

பி.கு: பாஸ்வேர்டு பற்றி தொடரும் பதிவுகளில் சற்று இடைவெளி விட்டு இதை எழுதுகிறேன். நடுவே ஏன் பாஸ்வேர்டு பற்றி எழுதவில்லை என்று யாரேனும் கேட்டீர்கள் என்றால் உற்சாகமாக இருக்கும்.