Tag Archives: furniture

ஆன்லைனில் அசத்தும் பர்னீச்சர் நிறுவனங்கள்

இந்திய இ-காமர்ஸ் துறையை பொருத்தவரை, ஆசிஷ் கோயல் மற்றும் அசிஷ் ஷா ஆகிய இருவரையும் தீர்க தரிசனம் மிக்கவர்கள் என்று தான் சொல்ல வேண்டும். ஏனெனில் இவர்களின் கணிப்பு படியே இ-காமர்ஸ் என்ப்படும் மின்வணிகச்சந்தை இந்தியாவில் விரிவடைந்துள்ளது. இதை நன்றாக பயன்படுத்திக்கொண்டு இருவரும் இந்திய மின் வணிக துறையின் முன்னோடிகளாகவும் உருவாகி இருக்கின்றனர்.

கோயலும், ஷாவும் இணைய பர்னீச்சர் விற்பனை தளங்களான பெப்பர் பிரை மற்றும் அர்பன் லேடர் ஆகிய வெற்றிகரமான நிறுவனங்களின் இணை நிறுவனர்கள். இணைய மூலமான விற்பனை என்பது பெரும்பாலும் புத்தகங்களும், ஆடைகளும், கேட்ஜெட்களும் என்றிருந்த நிலையில், இதே போலவே மேஜை நாற்காலிகளையும் ஆன்லைனில் வாங்கும் தேவையும், பழக்கமும் இந்தியர்களுக்கு ஏற்படும் என கணித்து அதனடிப்படையில் தங்கள் நிறுவனத்தை துவக்கி வெற்றி பெற்றுள்ளனர். இன்று இந்த பிரிவு மின்வணிக சந்தையில் போட்டி மிக்க பிரிவாக மாறியிருக்கிறது.

பெப்பர்பிரை மற்றும் அர்பன்லேடர் ஆகிய இரு நிறுவனங்களுமே ஏறக்குறைய ஒரே காலத்தில் துவக்கப்பட்டவை என்றாலும், இதன் நிறுவனர்கள் இதற்கான பாதையை கண்டறிந்த விதம் கொஞ்சம் மாறுபட்டவை.

இணையம் மூலம் பொருட்களை வாங்குவதில் இருந்த தயக்கங்கள் மறைந்து மின்வணிகம் என்பது பரவலாக ஏற்றுக்கொள்ளப்பட்ட நிலையில், பர்னீச்சர்களையும் ஆன்லைனில் வாங்கும் வசதி என்பது இயல்பாக எதிர்பார்க்க கூடியது தான். ஆனால், ஆச்சர்யப்படும் வகையில், 2012 ம் ஆண்டு வரை இணைய பர்னீச்சர் விற்பனைக்கு என்று தனியே ஒரு நிறுவனம் துவங்கப்படவில்லை. மேஜை,நாற்காலி, சோபா ரகங்களை வாங்கும் தேவை எல்லோருக்கும் இருந்தாலும், பெரும்பாலும் இவை கடைகளிலேயே வாங்கப்பட்டன. பெரிய பிராண்ட்கள் சில இருந்தாலும் இத்துறை ஒருங்கிணைக்கப்படாததாகவே இருந்தது. அதோடு ஆன்லைனில் இத்தகைய பொருட்களை வாங்குவதும் இயல்பாக அமையவில்லை.

இந்த பின்னணியில் தான் அசிஷ் ஷாவும் அவரது நண்பரான அம்ப்ரீஷ் மூர்த்தியும் இணைந்து பெப்பர்பிரை இணைய நிறுவனத்தை துவக்க தீர்மானித்தனர். இருவருமே இணைய நிறுவன பரப்பில் அனுபவம் மிக்கவர்கள். மேலும் சில ஆண்டுகள் இந்திய ஏல நிறுவனமான பாஸி.காம் நிறுவனத்தில் இணைந்து பணியாற்றியுள்ளனர்.

இருவருக்குமே சொந்த நிறுவனம் துவக்க வேண்டும் என்ற கனவும் இருந்தது. இணைந்து செயல்படுவதை விட இதற்கு வேறு சிறந்த வழி என்ன? தங்கள் கனவை நிறைவேற்றிக்கொள்ள இணைய பர்னீச்சர் விற்பனையை தேர்வு செய்தனர்.

இந்த தேர்வுக்கு காரணம் இல்லாமல் இல்லை. இல்லங்களுக்கான பர்னீச்சர் அலங்காரம் என்பது எல்லையில்லா ரகங்களை கொண்டதாக பரந்து விரிந்து. ஆனால் அப்படியும் கூட ஆன்லையில் வாங்குவதற்கான வாய்ப்பு பெரிய அளவில் இல்லை. வேறு எந்த ஒரு நிறுவனமும் இணைய பர்னீச்சர் விற்பனையை இலக்காக கொள்ளாத நிலையில், ஷாவும், மூர்த்தியும் முழுவீச்சிலான பரினீச்சர் விற்பனையை இணையம் மூலம் அளிக்க தீர்மானித்தனர். இந்த எண்ணமே பெப்பர்பிரை நிறுவனமாக உருவானது. 2012 ம் ஆண்டு ஜனவரி மாதம் பெப்பர்பிரை செயல்படத்துவங்கியது.

பேஷன் ரகங்களையும், வீட்டு உபயோக பொருட்களையும் எப்படி இணையதளத்தில் பார்த்து, விரும்பிய ரகத்தை தேர்வு செய்து ஆன்லைனிலேயே ஆர்டர் செய்ய முடிந்ததோ , அதே போல மேஜை நாற்காலி, கட்டில், சோபா உள்ளிட்ட பொருட்களை இணையத்தில் பார்த்து வாங்க பெப்பர்பிரை வழி செய்தது.

பர்னீச்சர்களை கடையில் வாங்குவதை விட இணையத்தில் வாங்குவது புதுமையாக மட்டும் அல்ல, வசதியாகவும் இருந்தது. கடைகளில் இருப்பிடம் பிரச்சனை என்பதால் எல்லா ரகங்களையும் காட்சிக்கு வைத்திருக்க முடியாது. குறிப்பிட்ட சில ரகங்களை மட்டுமே வைத்திருக்க முடியும். எனவே விரும்பிய மாதிரியை தேர்வு செய்ய விரும்பும் வாடிக்கையாளர் கடை கடையாக ஏறி இறங்க வேண்டும். அப்படியும் விரும்பிய ரகம் கிடைக்கும் என்று உறுதியாக சொல்வதற்கில்லை. ஆனால் இணைய விற்பனையில் இந்த பிரச்ச்னை இல்லை. எல்லா வகையான பொருட்களையும் காட்சியில் வைக்கலாம். அவற்றை பல வகைகளின் கீழ் வரிசைப்படுத்தி பட்டியலிடலாம். புகைப்படங்களோடு அவை பற்றி விவரங்களையும் விரிவாக அளிக்கலாம். வாடிக்கையாளர்கள் தங்கள் மனதுக்கு பிடித்த ரகத்தை தேடிப்பார்த்து தேர்வு செய்ய வாய்ப்பிருக்கிறது.

அதன் பிறகு ஆன்லைனில் ஆர்டர் செய்ததும், இல்லந்தேடி வந்து டெலிவரி செய்யப்படும். இந்த வசதி நகரபுற இந்தியர்களுக்கும் , இளம் வயதினருக்கும் ஏற்றதாக இருந்தது. இதுவே பெப்பர்பிரை தளத்தை வெற்றி பெற வைத்தது. அதன் பிறகு பெப்பர்பிரை இணைய விற்பனையில் தொடர்ந்து புதிய அம்சங்களை புகுத்தி வளர்ச்சி அடைந்து வருகிறது.

இது பெப்பர்பிரையின் கதை என்றால், அதன் பிரதான போட்டியாளரான அர்பன்லேடர் அதன் இணை நிறுவனரான ஆசிஷ் கோயலின் தனிப்பட்ட அனுபவத்தால் பிறந்த நிறுவனமாகும். எம்பிஏ பட்டதாரியான கோயல் பன்னாட்டு நிறுவனங்களில் உயர் பதவி வகித்தவர். ஒரு கட்டத்தில் நண்பரான ராஜீவ் ஸ்ரீவத்ஸ்வாவுடன் இணைந்து சொந்தமாக நிறுவனம் துவக்க திட்டமிட்டார். இருவரும் பெங்களுரூவுக்கு குடிபெயர்ந்தனர்.

பெங்களூருவில் தங்கள் குடியிருப்புக்கான பர்னீச்சர்களை வாங்க முயற்சித்த போது, சரியான பொருட்கள் கிடைக்காமல் திண்டாடினர். அவர்கள் தேவைக்கேற்ற ரகங்கள் சந்தையில் கிடைக்காததோடு, இணையத்திலும் அது சாத்தியமாகவில்லை. இந்த சம்பவம் தான் கோயலை யோசிக்க வைத்தது. தனக்கு ஏற்பட்ட இதே அனுபவம் தானே மற்றவர்களுக்கும் ஏற்படும். எனில், இணையத்தில் பர்னீச்சர்களை விற்பதற்கு பெரிய அளவில் வாய்ப்பு இருப்பதாக தோன்றியது. இந்த வாய்ப்பு உண்டாக்கிய நம்பிக்கையின் அடிப்படையில் இணைய பர்னீச்சர் கடையான அர்பன் லேடர் நிறுவனத்தை துவக்கினர். பெப்பர்பிரை துவங்கிய சில மாதங்கள் கழித்து துவக்கப்பட்ட இந்நிறுவனம் இன்று பெரிய அளவில் வளர்ந்துள்ளது.  இணைய பர்னீச்சர் விற்பனை என்று சொன்னால், முதலில் நினைவுக்கு வரும் பெயர்களாக பெப்பர்பிரை மற்றும் அர்பன் லேடர் அமைந்துள்ளன. இந்நிறுவனங்களின் வெற்றியால் வேறு பல நிறுவனங்களும் இந்த பிரிவில் செயல்படத்துவங்கியுள்ளன. வுட்டன்ஸ்டீரிட், பேப்பரினீஷ்ம் ஹவுஸ்புல் ஆகிய இணைய நிறுவனங்கள் இப்பிரிவில் செயல்பட்டு வருகின்றன. மேலும் அமேசான், ஸ்னேப்டீல் போன்ற மின்வணிக நிறுவனங்களும் கூட இணைய பர்னீச்சர் விற்பனையை துவக்கியுள்ளன.

எனவே இந்த பிரிவு வேகமான வளர்ச்சி மற்றும் பலத்த போட்டியை கண்டு வருகிறது. ஆன்லைன் தரும் தேர்வுகள் மற்றும் வாய்ப்பு பர்னீச்சர் விற்பனையை பிரபலமாக்கியுள்ளது.

போட்டியை சமாளித்து வளர்ச்சி அடையும் வகையில் இந்நிறுவனங்கள் புதிய அம்சங்களையும் அறிமுகம் செய்து வருகின்றன. பர்னீச்சர்களின் அளவை புரிந்து கொள்ளும் வகையில் அவற்றின் மீது மனிதர்களின் நிழலுருவத்தை பொருத்திப்பார்க்கும் வசதியை அர்பன் லேடர் வழங்கி வருகிறது. மேலும் பர்னீச்சர்களை வாங்கும் முன், வீட்டுக்கு தருவித்து சரியாக இருக்குமா என சோதித்துப்பார்க்கும் வசதியையும் அளிக்கிறது.

மேலும் பல அம்சங்களையும் அளித்து வருகின்றன. இவை பெரும்பாலும் தன்கள் சொந்த பர்னீச்சர்களை தயார் செய்து விற்கின்றன. பிராண்டட் பர்னீச்சர்களையும் வழங்குகின்றன. பரினீச்சர்களை பொருத்தவரை விலை அதிகமான பொருட்கள் என்பதும், பல்வேறு ரகங்கள் கொண்டவை என்பதும் சாதகமான அம்சங்களாகும். இவற்றில் பலரும் தனிப்பட்ட தேர்வுகளை எதிர்பார்ப்பதால் ஆன்லைன் வழங்கும் வாய்ப்பு வரப்பிசாதமாக இருக்கிறது. மேலும் அதிக விலை என்பது வருவாய்க்கும் வழி செய்கிறது. தள்ளுபடி என கூவி விற்காமலே வாடிக்கையாளர்களை ஈர்க்க கூடிய துறையாக இது விளங்குகிறது. அதுவே இணைய பர்னீச்சர் விற்பனையை மேலும் வளர்ச்செய்து வருகிறது.

 

 


 

 

நாற்காலி செய்ய வாருங்கள்!அழைக்கும் இணையதளம்.

கைத்தொழிலை சுயத்தொழிலாக தான் மேற்கொள்ள வேண்டும் என்றில்லை.ஆர்வத்திலும் கைத்தொழிலை பழகலாம்.புதிதாக ஒன்றை உருவாக்கும் திருப்தியை தரும் கைத்தொழில் மூலம் கிடைக்ககூடிய ஆனந்தமும் சுய திருப்தியும் அளவில்லாதது.அதிலும் நமக்கு தேவையான பொருட்களை நம் கைகளாலேயே உருவாக்கி கொள்ளும் போது கிடைக்கும் ஆத்ம திருப்தி அனுபவித்து பார்த்தால் மட்டுமே தெரியும்.

மனிதர்கள் தங்களுக்கு தேவையான பொருட்களை தாங்களே உருவாக்கி கொள்வதில் இருந்து விலகியது எப்படி உழைப்பிலிருந்து மனிதர்களை அந்நியமாக்கியது என்று காரல் மார்க்ஸ் ஆத‌ங்கத்தோடு விளக்கியிருக்கிறார்.இப்படி உழைப்பின் அந்நியமாதல் நுகர்வு சந்தையையும் சுரண்டலையும் கொண்டு வந்தது என்பது மார்க்சின் கருத்து.

இன்று ஈடுப்பாட்டையும் சுய திருப்தியையும் தரக்கூடிய உஐப்பிலிருந்து தொலை தூரத்தில் வந்து விட்டோம்.

இயற்கைக்கு திரும்புதல் என்று சொல்வது போல உடல் உழைப்பின் பரவ‌சத்தை தரக்கூடிய அனுபவத்தை மீண்டும் பெற விரும்பினாலும் கைத்தொழிலை பயிலலாம்.அதிலும் குறிப்பாக மேஜைகளையும் நாற்காலிகளையும் உருவாக்கி கொள்ளகூடிய தச்சுத்தொழில்.

தச்சு வேலை நுட்பமானது.இவ்வள‌வு ஏன் சுந்தர ராமசாமி எழுதிய ஜே ஜே சில குறிப்புகள் நாவலின் நாயகன் ஜே ஜே வே ஆரம்பத்தில் ஒரு தச்சன் தானே.

ஜே ஜே வும்,’மர வேலை எனக்கு பிடிக்கும்.மனதை பரவ‌சப்படுத்தும் நிமிஷங்கள் கொண்டது தான்.படைப்புத்திற்னுக்கும் அழகின் வேலைப்பாட்டிற்கும் இடந்தரகூடியது தான்’என்று தச்சு வேலை பற்றி குறிப்பிடுகிறார்.

தச்சு வேலையில் ஈடுபடுவதற்கான ஆர்வமும் மனதும் இருந்தால் நமது தேவைகேற்ற மேஜை நாற்காலி போன்றவற்றை நாமே உருவாக்கி கொள்ளலாம்.

எல்லாம் சரி ,தச்சு வேலையை எங்கே போய் கற்றுக்கொள்வது என்று கேட்டால் கவலையே வேண்டாம் அதற்காக என்றே எளிமையான இணையதளம் இருக்கிறது.

பர்னிச்சர் டிசைன் பேங்க் என்பது தான் அந்த தலத்தின் முகவரி.

விதவிதமான மேஜை நாற்காலிகளை செய்ய கற்றுத்தரும் இணையதளம் என்று ஒற்றை வரியில் இந்த தளத்தை அறிமுகம் செய்துவிடலாம் தான்.ஆனால் அந்த ஒற்றை வரி இந்த தளம் தரக்கூடிய அனுபவத்திற்கு நியாயம் செய்வதாகாது.புதியதாக முயன்று பார்க்க தயாராக இருப்பவர்களை இந்த தளம் ஆனந்தத்தில் ஆழ்த்திவிடக்கூடியது.

முக்காலிகள்,நாற்காலிகள்,மேஜைகள்,பெஞ்சுகள் என மரத்தால் செய்யக்கூடிய பொருட்களின் செய‌ல் முறையை எளிமையான வரைபடத்தோடு அழகாக விளக்குகிற‌து இந்த தள‌ம்.

அதோடு விதவிதமான ஸ்டூல்கள் ,புத்தக அலமாரிகளும் இடம் பெற்றுள்ளன.ஸ்டூல்களில் மட்டும் எத்தனை வகை இருக்கின்றன தெரியுமா?அதே போல நாற்காலிகளில் ப‌ல ர‌கங்கள்.முதலில் இவற்றை நோட்டம் விட்டு விட்டு பின்னர் நமக்கு தேவையான பொருளை கிளிக் செய்தால் அதற்கான தனிப்பக்கம் வந்து நிற்கிறது.

தச்சு வேலை செய்பவர் தனக்கு தானே போட்டு கொள்ளகூடிய வரை பட குறிப்புகளோடு அவற்றிக்கான செய்குரை குறிப்புகள் விரிவாக கொடுக்கப்பட்டுள்ளன.எல்லா குறிப்புகளுமே மிக விளக்கமாக விரிவாக அமைந்துள்ளன.அவற்றை பார்க்கும் போதே முக்காலிகளையும் நாற்காலிகளையும் செய்து பார்க்க தோன்றும்.

இந்த தள‌த்தை உருவாக்கியவர் வடிவமைப்பில் கில்லாடி போலும் .அவர் உர்வாக்கிய எண்ணற்ற வடிவமைப்பு மாதிரிகள் எல்லாவற்றையும் அவராலேயே உருவாக்கிட முடியாது என்பதால் மற்றவர்களின் உபயோயக்கத்திற்கு பகிர்ந்து கொள்வதற்காக இந்த தளத்தை நடத்தி வருகிறார்.த‌ச்சுத்தொழிலின் பார‌ம்பரியதன்மை மற்றும் தற்காலத்தின் நவீனத்தன்மை இரண்டும் கலந்தவை இந்த வடிவமைப்புகள் என்கிறார் இதன் நிறுவ‌னர்.

அவரது கூற்றுப்படி சில வடிவமைப்புகள் எளிதானவை.சில சிக்கலானவை.ஆர்வம் உள்ளவர்கள் முயன்று பார்க்கலாம்.

இணையதள முகவ‌ரி;http://www.dickreynoldsdesign.com/