Tag Archives: hawking

ஸ்டீபன் ஹாகிங் ஆய்வை ஆய்வு செய்ய அரிய வாய்ப்பு!

hawking_with_newtons_copy_of_principia_mathematica_please_credit_graham_copekogaஇணையத்தில் நட்சத்திரங்களுக்கும், பிரபலங்களுக்கும் தான் ரசிகர்கள் இருப்பதாக நினைத்துவிட வேண்டாம், விஞ்ஞானிகளுக்கும் அபிமானிகள் இருக்கின்றனர். ஸ்டீபன் ஹாக்கிங் ஆய்வுக்கட்டுரையை வாசிக்கு ஆர்வத்தால் அவரது அதி தீவிர ரசிகர்கள் முற்றுகையால், அதை வெளியிட்ட இணையதளம் முடங்கியதாக வெளியான செய்தியே இதற்கு சான்று.

வாழும் விஞ்ஞானிகளில் மகத்தானவர்களில் ஒருவராக போற்றப்படும் ஸ்டீபன் ஹாகிங், அறிவியலும் அற்புதமானது, அதைவிட வாழ்க்கை அதி அற்புதமானது. மோட்டார் நியூரான் கோளாறால் பாதிக்கப்பட்டதன் விளைவாக சக்கர நாற்காலியில் முடங்கும் நிலைக்கு தள்ளப்பட்டாலும் அவரது அறிவியல் செயல்பாடுகள் தளர்வில்லாமல் துடிப்பாகவே தொடர்கிறது. நோயின் தாக்கம் காரணமாக அவரால் பேச முடியாவிட்டாலும், தனக்கென பிரத்யேகமாக தயாரிக்கப்பட்ட பேச்சு மாற்று மென்பொருள் மூலம் உலகுடன் தொடர்பு கொண்டு தனது அறிவியல் சிந்தனைகள் மற்றும் ஆய்வு கருத்துகளை அவர் தொடர்ந்து உற்சாகமாக பகிர்ந்து கொண்டு வருகிறார்.

பிரபஞ்சத்தின் தோற்றம், கருந்துளைகளின் ரகசியம் பற்றி எல்லாம் தீவிரமாக ஆய்வு செய்து வரும் ஹாக்கிங் செயற்கை நுண்ணறிவு பற்றி எல்லாமும் தொடர்ந்து பேசி வருகிறார். அவரைப்போலவே அவரது ஆய்வுகளும், பேச்சுகளும் ஊக்கம் அளிக்க கூடியது. அறிவியல் வழியே, பிரபஞ்ச ரகசியத்தை அறிந்து கொள்ள துடிக்கும் ஆர்வம் உள்ளவர்களுக்கு ஹாக்கிங்கின் கருத்துக்கள் கலங்கரை விளக்கம் போன்றவை.

காலத்தின் சுருக்கமான வரலாறு போன்ற பெஸ்ட் செல்லர் புத்தகங்கள் மூலம் வெகுமக்கள் மத்தியிலும் பிரபலமாக விளங்கும் ஹாக்கிங், பேசினாலோ அல்லது மாநாட்டில் உரையாற்றினாலோ அவை தப்பாமல் தலைப்புச்செய்தியாகிவிடும். அப்படி இருக்க அவரது பிஎச்டி ஆய்வை கட்டுரையை வாசிக்கும் வாய்ப்பு கிடைத்தால் அவரது அபிமானிகள் சும்மா இருந்துவிடுவார்களா என்ன? அதை பயன்படுத்திக்கொள்ள படையெடுத்துவிட மாட்டார்களா என்ன?

அது தான் இப்போது நடந்திருக்கிறது.

இங்கிலாந்தின் கேம்பிர்ட்ஜில் பிறந்து வளர்ந்த ஹாக்கிங், ஆக்ஸ்போர்ட் பல்கலையில் படித்து முடித்த பிறகு கேம்பிரிட்ஜ் பல்கலையில் பிஎச்டி பட்டம் பெற்றார். பிஎச்டிக்காக அவர் விரிவடையும் பிரபஞ்சத்தின் கூறுகள் எனும் தலைப்பில் ஆய்வுக்கட்டுரையை சமர்பித்தார். இது பழைய கதை என்று வைத்துக்கொள்ளுங்களேன். அதன் பிறகு அவர் டாக்டர் பட்டம் பெற்று ஒரு பக்கம் தன்னை வறுத்தி முடக்கிக்கொண்டிருக்கும் நோயுடன் விடாமல் போராடியபடி, பிரபஞ்சத்தின் அடிப்படையை புரிந்து கொள்ளும் முயற்சியில் ஈடுபட்டு தன்னை மகத்தான விஞ்ஞானியாக உயர்த்திக்கொண்டு விட்டார்.

இந்நிலையில், அந்த மகத்தான விஞ்ஞானியின் பிஎச்டி ஆய்வுக்கட்டுரையை படித்துப்பார்க்கும் வாய்ப்பு கிடைக்கிறது என்றால் சும்மாவா? அதிலும் சும்மாவே கிடைக்கிறது என்றால் எப்படி!

கேம்பிரிட்ஜ் பல்கலைக்கழக நூலகத்தில் பொக்கிஷமாக பாதுகாக்கப்படும் அந்த ஆய்வுக்கட்டுரையை அண்மையில் பல்கலைகழக இணையதளத்தில் பகிர்ந்து கொள்ளப்பட்டது. 134 பக்கங்கள் கொண்ட அந்த கட்டுரையை வாசிக்க வேண்டும் எனில் இதற்கு முன்னர் 65 பவுண்ட் கட்டணம் செலுத்தினால் மட்டுமே சாத்தியம். அதையும் மீறி பலரும் அந்த கட்டுரையை ஆர்வத்துடன் வாசித்து வந்த நிலையில், ஆய்வுக்கட்டுரைகளை அனைவரும் எளிதாக அணுகும் வசதியை உறுதி செய்யும் கருத்தாக்கத்தை கொண்டாடும் வாரத்தை முன்னிட்டு பல்கலைக்கழகம் கடந்த 24 ம் தேதி இந்த கட்டுரையை அனைவரும் தரவிறக்கம் செய்து வாசிக்கும் வாய்ப்பை ஏற்படுத்தி தந்தது.

அடுத்த 24 மணி நேரத்தில் 60,000 பேருக்கு மேல் இந்த கட்டுரையை தரவிறக்கம் செய்யும் ஆர்வத்துடன் இணையதளத்திற்கு வருகை தந்தனர். இந்த எதிர்பாராத படையெடுப்பால் இணையதளம் தாக்குபிடிக்க முடியாமல் தற்காலிகமாக முடங்கிப்போனது. ஹாக்கிங் ஆய்வுக்கட்டுரைக்கு பெருமளவு ஆதரவு குவிந்ததால் இணையதளம் தற்காலிகமாக பாதிக்கப்பட்டதாக பல்கலைக்கழக செய்தித்தொடர்பாளர் தெரிவித்திருந்தார்.

010080586023நிச்சயம் இந்த வரவேற்பு பல்கலைக்கழக நிர்வாகிகளுக்கு மகிழ்ச்சியை கொடுத்திருக்கும். அது மட்டும் அல்ல, ஹாக்கிங்கும் மகிழ்ந்திருப்பார். ஏனெனில் ஆய்வுக்கட்டுரையை இலவசமாக அணுக வழி செய்ய அனுமதி கேட்கப்பட்ட போது ஹாக்கிங் அதற்கு உற்சாகமாக ஒப்புக்கொண்டதோடு, அறிவியல் ஆர்வலர்களுக்கான செய்தியையும் அறிக்கையாக வெளியிட்டார். என்னுடைய கட்டுரையை எல்லோரும் அணுகி படிக்க வழி செய்திருப்பதன் மூலம் உலகம் முழுவதும் உள்ளவர்கள் குணிந்து கீழே பார்க்காமல், வானத்தை நோக்கி நட்சத்திரங்களை பார்ப்பதற்கான ஊக்கத்தை பெறுவார்கள் என நம்புகிறேன் என துவங்கும் அந்த அறிக்கையில், பிரபஞ்சத்தில் நம்முடைய இடம் பற்றி யோசித்து, பேரண்டம் பற்றியும் யோசிக்க இது தூண்டுதலாக அமையும் என குறிப்பிடுகிறார். உலகில் எந்த மூளையில் இருப்பவரும் என்னுடைய ஆய்வை மட்டும் எல்லா அனைத்து ஆய்வுகளையும் எளிதாக அணுகி படித்துப்பார்க்கும் வாய்ப்பை பெற வேண்டும் என்றும் அவர் குறிப்பிட்டுள்ளார்.

ஹாக்கிங்கின் இந்த அறைகூவலை அறிவியல் ஆர்வலர்கள் தட்டாமல் ஏற்றுக்கொண்டுள்ளனர். நீங்களும் கூட அறிவியல் கடலில் நீந்த விரும்பினால் ஹாக்கிங் ஆய்வுக்கட்டுரையை தரவிறக்கம் செய்து படித்துப்பார்க்கலாம்.

எல்லாம் சரி இந்த ஆய்வுக்கட்டுரையில் ஹாக்கிங் என்ன எல்லாம் எழுதியிருக்கிறார்? பிரபஞ்ச உருவாக்கத்தில் ஈர்ப்பு விசையின் பங்கு, ஆதியில் நிகழ்ந்ததாக கருதப்படும் சிங்குலாரிட்டி, கருந்துளைகள், ஈர்ப்புவிசை கதிர்கள் பற்றி எல்லாம் விவரித்திருக்கிறார். இது அவரது ஆரம்ப கால ஆய்வு. ஹாக்கிங்கே இதை கடந்து வெகுதூரம் வந்துவிட்டார் என்றாலும், ஒரு மேதையின் தீர்க தரிசனத்தின் கீற்றுகளை கொண்ட இந்த ஆய்வுக்கட்டுரையை வாசித்து பார்க்கும் வாய்ப்பு அறிவியல் மாணவர்களுக்கும், ஆர்வலர்களுக்கும் கிடைத்துள்ள வரப்பிரசாதம் என்றே சொல்ல வேண்டும்.

வால்; ஸ்டீபன் ஹாக்கிங் ஆய்வுக்கட்டுரைக்கு கிடைத்துள்ள அமோக வரவேற்பு பரபரபுக்கு மத்தியில் இந்த கட்டுரையை வாசித்த வாசகர் ஒருவர் அதன் முதல் பக்கத்திலேயே எழுத்துப்பிழை இருப்பதை கண்டுபிடித்து சுட்டிக்காட்டிய தன் பங்கிற்கு கவனத்தை ஈர்க்க முற்பட்டார்.

 

 

ஹாக்கிங் ஆய்வுக்கட்டுரையை அணுக: http://schema.lib.cam.ac.uk/PR-PHD-05437_CUDL2017-reduced.pdf

 

நன்றி; மின்னம்பலம் இதழில் எழுதியது

 

ha

செயற்கை அறிவால் மனிதகுலத்துக்கு ஆபத்து; ஸ்டீபன் ஹாகிங் எச்சரிக்கை!

1hவிஞ்ஞானி ஸ்டீபன் ஹாகிங் ஒரு விஷயத்தை சொல்கிறார் என்றால் அதை அலட்சியப்படுத்த முடியாது. ஹாக்கிங்கின் சமீபத்திய கருத்து செயற்கை அறிவு பற்றி அச்சம் கொள்ள வைக்கிறது.
முழு அளவிலான செயற்கை அறிவு வளர்ச்சி மனிதகுலத்துக்கே முடிவுகட்டிவிடலாம் என ஹாகிங் கூறியுள்ளார். தொழில்நுட்பம் தானாக சிந்திக்க கற்றுக்கொள்ளும் மற்றும் சூழலுக்கு ஏற்ப மாற்றிக்கொள்ளும் தன்மை பெற்று வருவதும் மனிதகுலத்தின் எதிர்காலத்தை கேள்விகுறியாக்க கூடியது என்றும் அவர் எச்சரித்துள்ளார்.
ஹாகிங்கின் கருத்து திகிலூட்டக்கூடியதாக இருந்தாலும் , தொழில்நுட்பத்தின் உதவியேடனேயே அவர் இந்த கருத்துக்களை வெளியிட்டிருக்கிறார் என்பது தான் கவனிக்க வேண்டிய விஷயம். அந்த காரணத்தினாலேயே அவரது எச்சரிக்கை கூடுதல் கவனம் பெறுகிறது.

பிரிட்டனைச்சேர்ந்த கோட்பாடு சார்ந்த விஞ்ஞானியான ஸ்டீபன் ஹாகிங் சமகாலத்து முக்கிய அறிவியல் சிந்தனையாளர்களில் ஒருவராக கருதப்படுகிறார். ஐன்ஸ்டினை போன்ற விஞ்ஞானி என்று போற்றப்படும் ஹாகிங்கின் அறிவியலும் வியக்க வைக்க கூடியது. அதைவிட அவரது வாழ்க்கை வியக்க வைக்க கூடியது.
நரம்பு மண்டல இயக்கத்தை பாதிக்கும் ஏ.எல்.எஸ் எனும் நோய் பாதிப்பு அவரது பேச்சு மற்றும் சுந்திரமான இயக்கத்தை முடக்கியுள்ளது. ஆனால் அவரது சிந்தனையை நோயால் முடக்க முடியாத நிலையில் ஹாகிங் நவீன சாப்ட்வேர் மூலம் தனது சிந்தனைகளை வெளிப்படுத்தி வருகிறார்.
கண்ணத்தில் பொருத்தப்பட்ட சென்சார் மூலம் அவர் எண்ணங்களால் சாப்ட்வேரை இயக்கி எழுதுகிறார். பேசுகிறார். தொடர்ந்து இயங்கி ஊக்கம் அளித்து வருகிறார்.

இந்நிலையில் பேராசிரியர் ஹாங்கிற்காக புதிய தகவல் தொடர்பு நுட்பத்தை இண்டெல் நிறுவனம் உருவாக்கியுள்ளது. Assistive Context Aware Toolkit (ACAT) என்று சொல்லப்படும் இந்த நவீன தொழில்நுப்டம் , ஸ்மார்ட்போனில் பயன்படுத்தப்படும் ஸ்விப்ட்கீ நுட்பத்துடன் இணைந்து செயல்படுகிறது. இந்த நுட்பம் ஹாகிங் செயல்பாடுகளை கவனித்து அவர் சிந்திக்கும் முறையை புரிந்து கொண்டு அவர் அடுத்ததாக என்ன வார்த்தையை டைப் செய்யப்போகிறார் என ஊகித்து சொல்லக்கூடியது. இதன் காரணமாக ஹாகிங்கால் முன்பை விட 20 சதவீதம் வேகமாக டைப் செய்ய முடியும். இந்த தகவல் அவரது ஸ்பீச் சிந்தசைசருடன் இணைக்கப்பட்டு ரோபோ குரலை உருவாக்கிறது. இதன் மூலம் அவர் தனது லேப்டாப் வழியே மற்றவர்களுடன் தொடர்பு கொள்ள முடிகிறது.

ஹாங்கி இணையத்தை பயன்படுத்துவது உட்பட பல செயல்களை இந்த புதிய சாப்ட்வேர் அமைப்பு தானியங்கிமயமாக்கி உள்ளது.
இந்த நுட்பம் அறிமுகம் செய்யப்பட்ட லண்டன் நிகழ்ச்சியில் பேசிய ஹாங்கிங், டிஜிட்டல் உதவியாளர் தொழில்நுப்டங்களாம் சிரி, கூகிள் நவ் மற்றும் கார்டனா ஆகியவை வருங்காலத்தில் நிகழக்கூடிய தொழில்நுட்ப போட்டியின் ஆரம்ப அறிகுறி என்று கூறினார். ஆனால் வருங்காலத்தில் நிகழக்கூடிய சாத்தியங்களுக்கு எல்லையே இல்லை என்று கூறிய ஹாகிங், மனித மூளையை மிஞ்சக்கூடிய திறன் படைத்த கம்ப்யூட்டர்களை உருவாக்குவது சாத்தியமாகலாம் என்றார்.

ஆர்டிபிஷியல் இண்டலிஜென்ஸ் எனப்படும் செயற்கை அறிவின் முழு அளவிலான வளர்ச்சி மனித குலத்திற்கு முடிவு கட்டும் ஆபத்து இருப்பதாகவும் ஹாகிங் பிபிசிக்கு அளித்த பேட்டியில் கூறியுள்ளார்.
ஆனால் இந்த தொழில்நுட்பத்திற்கு போர்,நோய் மற்றும் வறுமையை ஒழிக்கும் ஆற்றல் இருப்பதாகவும் கூறினார்.
மருத்துவத்தால் என்னை குணப்படுத்த முடியாததால் தொழில்நுட்பத்தின் உதவியுடன் தொடர்பு கொள்கிறேன் என்று கூறிய ஹாகிங் , இந்த புதிய தொழில்நுட்ப அமைப்பு ஆயிரக்கணக்கான மாற்றுத்திறனாளி மனிதர்களுக்கு உதவியாக இருக்கும் என்றும் தகவல் தொடர்பில் இருந்த எல்லைகளை உடைத்தெரியும் என்றும் தெரிவித்தார்.
ஹாகிங் போலவே சமீபத்தில் இணைய தொழில்முனைவோரான எலோன் மஸ்க் செயற்கை அறிவு பற்றி எச்சரிக்கை செய்திருந்தது குறிப்பிடத்தக்கது.

————–

ஸ்டீபன் ஹாங்கின் பிபிசி பேட்டி; http://www.bbc.com/news/technology-30290540

———-

நன்றி. விகடன்.காம்
—-

நெட்சத்திரங்கள் புத்தகம் பற்றி இன்று தகவல் விடுமுறை; இன்று ஒரு கேள்வி மட்டும். மஹிர் காக்ரியை உங்களுக்கு தெரியுமா? அவரும் ஒரு நெட்சத்திரம் தான். ஒரு க்ளு மனிதர் துருக்கி காரர். தகவல் தெரிந்தவர்கள் சொல்லலாம். நாளை காக்ரி பற்றிய தகவலை பகிர்கிறேன்.

அன்புடன் சிம்மன்

பேஸ்புக்கில் இணைந்தார் ஸ்டீபன் ஹாகிங்!

stephen-hawking-pbsஇனி பேஸ்புக்கில் நீங்கள் நட்பு பரிமாறிக்கொள்வதோடு விஞ்ஞானத்திலும் ஆர்வம் கொள்ளலாம். பிரபஞ்ச ரகசியத்தையும் அறிந்து கொள்ள முயற்சிக்கலாம். ஏனெனில் பேராசிரியர் ஸ்டீபன் ஹாகிங் பேஸ்புக்கில் இணைந்திருக்கிறார். அறிவியலுக்காக தனது வாழ்நாளையே அர்பணித்துக்கொண்ட ஹாக்கிங் 72 வது வயதில் பேஸ்புக்கில் அடியெடுத்து வைத்திருக்கிறார். அவர் தனது முதல் பகிர்விலேயே அறிவியல் மீது ஆர்வம் கொள்ளுங்கள் என்று கோரிக்கையும் வைத்திருக்கிறார்.

பேஸ்புக் வரலாற்றில் இது நிச்சயம் மைல்கல் நிகழ்வு தான். ஸ்டீபன் ஹாகிங் அவரது அறிவியலுக்காகவும் , தனது உடல்நல குறைவால் உண்டான வரம்பை வெற்றி கண்டுவரும் விடாமுயற்சிக்காகவும் வியக்க வைத்து வருபவர். எல்லா விதங்களிலும் ஊக்கம் தரும் வாழ்க்கைக்கு சொந்தக்காரரான ஹாகிங் , ஏற்கனவே தனது புத்தகங்களின் மூலம் அறிவியலின் மகத்துவத்தை பகிர்ந்து வருபவர். பிரபஞ்சம் தோன்றிய விதம் , கருந்துளைகள் ஆகிய மிரல வைக்கும் விஞ்ஞான விஷயங்களை கூட எல்லோருக்கும் புரியும் வகையில் விளக்கி எழுதும் ஆற்றல் கொண்ட ஹாக்கிங் இளைஞர்களின் இருப்பிடமாக கருதப்படும் பேஸ்புக்கில் உறுப்பிராகி இருப்பது நிச்சயம் நல்ல செய்தி தான்.

பேராசிரியர் ஸ்டீபன் ஹாகிங்கின் அதிகாரபூர்வ பேஸ்புக் பக்கம் எனும் அறிமுகத்துட்டன் அவருக்கான பேஸ்புக் பக்கம் உருவாக்கப்பட்டுள்ளது. கடந்த அக்டோபர் மாதமே இந்த பக்கம் அமைக்கப்பட்டாலும் ஹாகிங் இப்போது தான் முதல் பதிவை பகிர்ந்து கொண்டுள்ளார்.

“ பிரபஞ்சத்தை எது உண்டாக்கியது எனும் கேள்வி என்னை எப்போதுமே ஈர்த்துள்ளது. காலமும் வெளியின் புதிராக இருக்கலாம். ஆனால் இது எனது தேடலை முடக்கிவிடவில்லை. நம் ஒருவருக்கு ஒருவர் இடயிலான தொடர்பு எல்லையில்லாத முறையில் வளர்ந்திருக்கிறது. இப்போது வாய்ப்பிருப்பதால் உங்களூடன் என் பயணத்தை பகிர்ந்து கொள்ள ஆர்வமாக இருக்கிறேன். ஆர்வமுடன் இருங்கள். நான் எப்போதும் இருப்பேன்” – என்று குறிப்பிட்டுள்ள ஹாகிங் தனது பேஸ்புக் பக்கத்திற்கு வருகை தந்ததற்கு நன்றியும் தெரிவித்துள்ளார்.
ஹாங்கிங் பேச்சு, மற்றும் செயல்பாடு பெருமளவு நோயால் பாதிக்கப்பட்டுள்ள நிலையில் பிரத்யேக சாப்ட்வேர் மூலமே அந்த மாமேதை தனது எண்ணங்களை பகிர்ந்து கொண்டு வருகிறார்.

பேஸ்புக் பக்கம் அவரது குழுவால் நிர்வகிக்கப்பட்டாலும் அவரது தனிப்பட்ட பகிர்வுகள் அவரது கையொப்பமுடன் வெளியாகின்றன.
ஹாகிங்கின் முதல் பகிர்வு 43,000 முறைக்கு மேல் லைக் செய்யப்பட்டுள்ளது. மொத்தமாக 10,63000 க்கும் மேற்பட்ட லைக்குகள் கிடைத்துள்ளன.
ஹாகிங் வாழ்க்கை வரலாற்றை மையமாக கொண்டுள்ள தி தியரி ஆப் எவ்ர்திங் திரைப்படம் விரைவில் வெளியாக உள்ளது.

ஸ்டீபன் ஹாக்கிங்கிற்கு உலகம் முழுவதும் அபிமானிகள் உண்டு. அவர்கள் பேஸ்புக்கில் குவிந்து வருகின்ற்னர். பல்ரும் ஹாகிங் வருகையை போற்றி வரவேற்றுள்ளனர். பின்னூட்டத்தில் சிலர் எதிர்மறையான கருத்துக்களை கூறியிருந்தாலும் அவற்றுக்கும் ஹாக்கிங் அப்மானிகளே அழகாக பதில் அளித்துள்ளனர். இது அவரது முதல் பதிவு, வழக்கமான இணைய அபத்ததை தவிர்ப்போம் என்று ஒருவர் வேண்டுகோள் விடுத்துள்ளார்.
பேஸ்புக் மூலம் பலருக்கு லைக் கிடைத்திருந்தாலும் ஸ்டீபன் ஹாகிங் பேஸ்புக்கை லைக் செய்து வந்திருப்பது பெரிய விஷயம் தான்.

ஸ்டீபன் ஹாங்கிங் பேஸ்புக் பக்கம்: https://www.facebook.com/stephenhawking?fref=nf
———-

விகடன்.காமில் எழுதியது