Tag Archives: solar

so

வியக்க வைக்கும் சூரிய மண்டல மாதிரி யூடியூப் வீடியோ

சூரிய மண்டலம் எல்லோருக்கும் தெரிந்தது தான்.ஆனால் உண்மையில் சூரிய மண்டலம் எத்தனை பிரம்மாண்டமானது, அதில் நம்முடைய பூமி எத்தனை சிறியது என்பதை புரிந்து கொள்ள வேண்டும் என்றால் அமெரிக்கா இயக்குனர்கள் வைலி ஓவர்ஸ்டிரீட் மற்றும் அலெக்ஸ் போரோஷ் உருவாக்கியுள்ள சூரிய மண்டல மாதிரியை நீங்கள் பார்க்க வேண்டும்.

இவர்கள் இருவரும் இணைந்து, சூரிய மண்டலத்தின் பரப்பிற்கு நிகரான அளவில் உருவாக்கப்பட்ட முதல் மாதிரியை உருவாக்கி இருக்கின்றனர்.இந்த மாதிரியும் சரி, இது உருவான விதத்தை விவரிக்கும் யூடியூப் வீடியோவும் வியக்க வைக்கிறது.

சூரிய மண்டலத்தில் பூமி உள்ளிட்ட கோள்களின் இருப்பிடத்தை உணர்த்தும் எண்ணற்ற படங்களை நாம் பார்த்திருக்கிறோம். அவை எல்லாமே உத்தேசமானவையே தவிய துல்லியமானவை அல்ல; அதாவது கோள்களின் அமைப்பையும் இருப்பிடத்தையும் அவை சித்தரிக்கின்றனவே தவிர, அவற்றுக்கு இடையே உள்ள தொலைவை உணர்த்துவதில்லை.

உதாரணமாக,இந்த படங்களில் பூமிக்கு மிக அருகில் அதன் நிலவான சந்திரன் சிறியதாக இடம் பெற்றிருக்கும். ஆனால், பூமிக்கும் ,சந்திரனுக்கும் இடையிலான உண்மையான தொலைவை கணக்கில் எடுத்துக்கொண்டு அதற்கேற்ப அவற்றின் இடைவெளியை உணர்த்த முயன்றால் பூமியின் இடத்தில் இருந்து சந்திரனை வெகு தூரத்தை காண்பிக்க வேண்டும். இப்படி சூரியன் உள்ளிட்ட ஒவ்வொரு கோளையும் அவற்றின் அளவு மற்றும் அவற்றுக்கு இடையிலான தொலைவுக்கு ஏற்ப வரைபடத்தில் காண்பிக்க முற்பட்டால் ஒன்று அவை வரைபடத்தில் குறிப்பிட முடியாத அளவுக்கு மிகப்பெரியதாக ஆகிவிடும்;அல்லது கண்ணுக்குத்தெரியாத அளவுக்கு கடுகினும் சிறியதாகி விடும்.
s0-2
ஆக, பூமி உள்ளிட்ட கோள்களை அவற்றின் நிகரான அளவுக்கு ஏற்ற வகையில் சுருக்கி காண்பிக்க கூடிய வரைபடமே சூரிய மண்டலத்தின் சரியான மாதிரியாக இருக்கும். இத்தகைய மாதிரி இதுவரை உருவாக்கப்படவில்லை.

இந்த மாதிரியை தான் ,வைலி ஓவர்ஸ்டிரீட் மற்றும் அலெக்ஸ் போரோஷ் உருவாக்கி காட்டியுள்ளனர்.
சூரிய மண்டலத்தின் சரியான மாதிரியை பார்க்க வேண்டும் என்றால் அதை உருவாக்குவது தவிர வேறு வழியில்லை என்று குறிப்பிட்டபடி வைலி ஓவர்ஸ்டிரீட் இந்த முயற்சியை தனது வீடியோவில் விவரிக்கிறார்.
இவர்கள் உருவாக்கிய மாதிரி காகித்ததில் இல்லை. அமெரிககாவின் நெவேடா பாலைவனப்பகுதியில் அமைந்துள்ளது. ஏனெனில் காகித்ததில் எல்லாம் சூரிய மண்டலத்தை குறிப்பால் தான் உண்ர்த்த முடியும். அந்த பிரம்மாண்டத்தை அப்படியே சுருக்கி,மனித கண்களுக்கு புரியும் வகையில் காட்ட வேண்டும் என்றால் 7 மைல் பரப்பிலான இடம் தேவை.

அதனால் தான் பாலைவனத்தை தேர்வு செய்தனர். இந்த இடத்தில் நடுவே சூரியனை வைத்து, அதைச்சுற்றி ஒவ்வொரு கோளாக இடம்பெற வைத்துள்ளனர்.
இதில் கவனிக்க வேண்டிய விஷயம் என்ன என்றால், இந்த மாதிரியில் சூரியனின் அளவு பெரிய பலூன் அளவில் இருக்கிறது என்றால் பூமியின் அளவு சின்ன கோலி குண்டு அளவில் தான் இருக்கிறது. வியாழன் கிரகம் ஒரு பெரிய அளவு தர்பூசனி போல இருக்கிறது.
so

so-3
கோள்களின் சுற்றுப்பாதையை வரைவதற்காக காரில் வட்டமிட்டு அதற்கான பாதையை உருவாக்கியுள்ளனர். இதற்காக காரின் பின்னே ஒரு கேனில் விளக்கு வெளிச்சத்தை கொண்டு படம் பிடித்திருக்கின்றனர். ( வீடியோவில் ,இரவு நேரத்தில் சூரிய மண்டலம் உருவாகும் காட்சி பிரமிக்க வைக்கிறது).

இந்த வீடியோ முழுவதையும் பார்க்கும் போது ஏழு மைல் பரப்பிலான இடத்தில் சுற்றுப்பாதைகளில் சூரியன்,பூமி,வியாழன், நெப்டியூன் ( புளோட்டோ இல்லை) கோள்களை பார்க்கும் போது கோலி குண்டு அளவிலான பூமி விண்வெளியில் பூமியின் இடம் எத்தனை சிறியது என சிந்திக்க வைக்கும்.
வீடியோவின் நடுவே இளைஞர் ஓவரிஸ்டிரீட் ஒவ்வொரு கோளாக பொருத்துக்கொண்டிருக்கும் போது, உலகம் என் பாக்கெட்டில் தான் எங்காவது இருக்க வேண்டும் என நகைச்சுவயாக குறிப்பிடுவது ரசிக்கும்படி இருக்கிறது.
இந்த வீடியோ பேஸ்புக் மற்றும் யூடியூப்பில் வெளியிடப்பட்டு லட்சக்கணக்கானோரால் பார்த்து ரசிக்கப்பட்டு வருகிறது.

வீடியோவை காண: https://www.youtube.com/watch?v=zR3Igc3Rhfg

———-

பசுமை செய்திகளுக்கான இணையதளம்.

செய்தி உலகம் என்ன தான் பரந்து விரிந்து இருந்தாலும் அவரவர்கள் தங்களுக்கான செய்தி பிரிவு என்னும் வாயில் வழியாக‌ தான் அதில் நுழைகின்றனர். முகப்பு பக்கத்தை முதலில் மேலோட்டமாக ஒரு பார்வை பார்த்துவிட்டு அதன் பிறகு தொழில்நுட்பமோ பகுதியையோ அல்லது விளையாட்டு பகுதியையோ இல்லை சினிமா பகுதியையோ கிளிக் செய்து அதனுள்ளே நுழைந்த‌ விடுகின்ற‌னர்.

எல்லோருக்கும் இத்தகைய அபிமான பகுதிகள் இருக்கின்ற‌ன.மற்ற பகுதிகளை பொருத்தவரை அவர்கள் கண்ணை கட்டி கொண்டு இருந்து விடுகின்றனர்.இப்போது சமூக மீடியா யூகத்தில் செய்தி தளங்களின் பக்கம் போகாமலேயே குறிச்சொற்களின் அடைப்படையில் தங்களூக்கான செய்திகளை மட்டுமே படித்து கொள்ளலாம்.

இது ஒரு புறம் இருக்க செய்தி பிரியர்களுக்கு அவர்கள் விரும்பும் துறைகளில் தீனி போடுவதற்கென்றே பிரத்யேக தளங்கள் இருக்கின்றன.அந்த வகையில் பசுமை செய்திகளை விரும்பி தொடர் விரும்புகிறவர்களுக்கு பசுமை விருந்து படைக்கும் வகையில் பிஃபிரிநியூஸ் இணையதளம் உருவாக்கப்பட்டுள்ளது.

வழக்கமான செய்தி தளம் போல காட்சி அளித்தாலும் இதில் இடம்பெறுள்ள செய்திகள் எல்லாமோ பசுமை சார்ந்தவை.சுற்றுசூழல் ஆர்வலர்களால் பரவலாக விவாதிக்கப்படும் புவி உஷ்ணமாத‌ல்,சூர்ய மின்சக்தி,மாசு இல்லாத எரிசக்தி போன்ற தலைப்புகளீல் செய்திகள் இடம்பெற்றுள்ளன.

தொழில்நுடப்ம் போன்ற தனி பிரிவுகளும் உள்ளன‌.அதில் நுழைந்தாலும் பசுமை மயம் தான்.புகழ்பெற்ற நாளிதழ்கள்,வலைப்பதிவுகள்,செய்தி தளங்கள் ஆகியவற்றில் இருந்து இணைப்புகள் தரப்பட்டுள்ளன.செய்திகள் மட்டும் அல்ல வீடியோ இணைப்புகளும் இருக்கின்றன.

சுற்றுச்சுழல் என்றால் சாதரணமாக நினைத்துவிடுபவர்களை வியப்பில் ஆழ்த்தும் வகையில் 256 பசுமை சார்ந்த தலைப்புகளின் கீழ் செய்திகள் தொகுக்கப்பட்டுள்ளன.எல்லாமே ரியல் டைமில் எடுத்து தரப்படுகின்றன.அதாவது உடனுக்குடன் திரட்டித்தரப்படுகின்றன.
சுற்றுசூழல் ,பசுமை சார்ந்த விஷயங்களில் ஆர்வம் உள்ளவர்களுக்கு இந்த தளம் தகவல் அட்சயப்பாத்திரமாக விளங்கும்.பசுமை ஆய்வில் ஈடுபட்டிருப்பவர்களுக்கும் இந்த தளம் பயனுள்ளதாக இருக்கும்.

அதற்கேறப் பசுமை விஷயங்களுக்கான தேடியந்திரமும் இருக்கிறது.சுற்றுச்சுழல் உலகில் முக்கிய தலைப்பாக கருதப்படும் மின்சார கார் போன்றவை குறித்தெல்லாம் தேடி தகவல் பெறலாம்.

சுற்றுச்சுழலில் ஆர்வம் இல்லாதவர்கள் கூட இந்த  தளத்தின் பக்கம் சென்றால் பசுமையான் விஷயங்களில் ஏன் ஆர்வம் காட்ட வேண்டும் என்ற தெளிவை பெறலாம்.

இணையதள முகவரி;http://bfreenews.com/bfn/home?n=1