Tag Archives: ticket

m

இணையத்தை கலக்கும் எக்ஸ்குலிசிவ் இணையதளம்

ஒரு இணையதளத்தை பயன்படுத்திப்பார்க்க ஆயிரக்கணக்கானோர் வரிசையில் காத்திருப்பது பற்றி நீங்கள் கேள்விப்பட்டிருக்கிறீர்களா? இணைய உலகை இப்போது கலக்கி கொண்டிருக்கும் மோஸ்ட் எக்ஸ்குலிசிவ் வெப்சைட் எனும் இணையதளத்தின் உள்ளே நுழையும் அனுமதிக்காக தான் இப்படி ஆயிரக்கணக்கானோர் ஆர்வத்துடன் காத்திருக்கின்றனர்.

நீங்களும் அந்த தளத்தை பயன்படுத்திப்பார்க்க விரும்பினால் அதில் அனுமதி சீட்டு வாங்கி இணைய வரிசையில் நின்றாக வேண்டும்.

ஆச்சர்யமாக இருக்கலாம்.அப்படி அந்த இணையதளத்தில் என்ன பிரமாதமாக இருக்கிறது என்று வியப்புடன் கேட்கலாம். ஆனால் அந்த இணையதளத்தில் ஒன்றுமே கிடையாது என்பது தான் இன்னும் ஆச்சர்யமானது. உண்மையில் அது ஒரு பயனில்லா இணையதளம் – ஆனால் அது தான் இன்று உலகின் பிரத்யேக இணையதளமாகி இருக்கிறது.
எப்படி என்று கேட்கிறீர்களா? எல்லாம் அந்த இணையதளம் அமைக்கப்பட்ட விதத்தில் இருக்கும் புத்திசாலித்தனத்தில் தான் இருக்கிறது!

பெயரிலேயே பாதி வெற்றி என்பது போல அந்த இணையதளத்தை உருவாக்கியவர் இணைய உலகின் மிகவும் பிரத்யேக தளமாக உருவாக்கும் எண்ணத்துடன் அதற்கு மோஸ்ட் எக்ஸ்குலுசிவ் வெப்சைட் என பெயர் வைத்தார். அந்த தளம் பிரத்யேக தன்மை கொண்டதாக இருக்கும் வகையிலும் அதை அமைத்திருந்தார். அதன் பிரத்யேக தன்மை என்ன தெரியுமா? அந்த தளத்தை ஒரு நேரத்தில் ஒருவர் மட்டும் தான் பயன்படுத்த முடியும்.அந்த ஒருவரும் ஒரு நிமிடம் மட்டும் தான் தளத்தை பயன்படுத முடியும். ஒருவர் பயன்படுத்தி முடிக்கும் வரை மற்றவர்கள் வரிசையில் காத்திருக்க வேண்டும். இதற்காக முகப்பு பக்கத்தில் இருந்து அனுமதி சீட்டு வாங்கிக்கொள்ள வேண்டும். குறிப்பிட்ட எந்த நேரத்தில் இந்த தளத்தில் நுழைந்தாலும், இத்தனை ஆயிரம் பேர் காத்திருக்கின்றனர், நீங்களும் வரிசையில் நிற்க அனுமதிச்சீட்டு வாங்கி கொள்ளவும் என தெரிவிக்கப்படுகிறது.
இப்படி காத்திருக்க வேண்டியிருப்பதும், ஒரு நேரத்தில் ஒருவர் மட்டுமே தளத்தை பயன்படுத்தலாம் எனும் பிரத்யேக தன்மையும் தான் இணையவாசிகளை இந்த தளத்தை நோக்கி படையெடுக்க வைத்துள்ளது.
இதுவரை 2,65000 பேருக்கு மேல் இந்த தளத்தை பயன்படுத்த அனுமதிச்சீட்டு பெற்றுள்ளனர் என்றால் பார்த்துக்கொள்ளுங்கள்.

அமெரிக்காவின் ஜஸ்டின் போலே என்பவர் இந்த தளத்தை அமைத்திருக்கிறார். இணையதள வடிவமைப்பாளராக இருக்கும் போலே, இணையம் திறந்தவெளி தன்மை கொண்ட்தாக இருக்கும் நிலையில் அதற்கு நேர் எதிரான தன்மையுடன் ஒரு இணையதளத்தை அமைத்தால் என்ன என்று யோசித்து இந்த பிரத்யேக தளத்தை உருவாக்கியதாக கூறியுள்ளார்.

மார்ச் மாதவாக்கில் இந்த தளத்தை உருவாக்கினார். ஆனால் அதன் பிரத்யேக தன்மையை மீறி அது உடனடியாக கவனத்தை ஈர்க்கவில்லை. பின்னர் ஜானி வெப்பர் எனும் வலைப்பதிவாளர் தனது பட்டியல் இணையதளத்தில் , இணையத்தின் பயனில்லா இணையதளங்கள் எனும் பட்டியலை வெளியிட்டு இதை அடையாளம் காட்டியிருந்தார். அதன் பிறகு இந்த தளம் பிரபல இணைய சமூகமான ரெட்டிட்டிலும் இடம்பெற மெல்ல இணையவாசிகள் மத்தியில் பிரபலமானது.
அப்புறம் என்ன, இதன் விநோதமான விஷேசத்தன்மை பலரையும் பேச வைத்து இணையத்தை கலக்கி கொண்டிருக்கிறது.’

எல்லாம் சரி, இந்த இணையதளத்தை ஒரு நிமிடம் பயன்படுத்தும் போது என்ன தான் செய்ய முடிகிறது என கேட்கலாம்? அது சஸ்பென்ஸ்! நீங்களும் முயன்று பாருங்களேன்!. ஆனால் ஒன்று ஆயிரக்கணக்கானோர் முற்றுகையிடுவதால் தளம் முடங்கி நின்றாலும் ஆச்சர்யப்படுவதற்கில்லை.

இணையதள முகவரி: http://mostexclusivewebsite.com/

—–
நன்றி;விகடன்.காமில் எழுதியது

ரெயில் டிக்கெட்களின் நிலை அறிய உதவும் இணையதளம்.

நீங்கள் அடிக்கடி நீண்ட தூர ரெயில் பயணம் மேற்கொள்கிறவர் என்றால் நிச்சயம் இந்திய ரெயில்வேயின் முன்பதிவு வசதி தளமான ஐசிஆர்டிசி தளத்தை அறிந்து வைத்திருப்பீர்கள்.அதோடு மைபிஎன்ஆர் இணையதளத்தை அறிந்து வைத்து கொள்வது பயனுள்ளதாக இருக்கும்.

இந்த தளம் ஒரே கிளிக்கில் ரெயில் டிக்கெட்டின் பிஎன்ஆர் எண் நிலை குறித்து அறிந்து கொள்ள உதவுகிறது.

இந்த வசதி தான் ரெயில்வே இணைய‌தளத்திலேயே இருக்கிறதே என்று விவரம் அறிந்தவர்கள் அலட்சியத்தோடு கேட்கலாம்.உண்மை தான் ரெயில்வே தளத்திலே பிஎன்ஆர் எண் நிலை அறியும் வசதி இருக்கிறது.

இந்த வசதியை தேடி கண்டுபிடிக்க வேண்டிய அளவுக்கு ஐசிஆர்டிசி இணையதள வடிவமைப்பு சிக்கலானதாக இருக்கிறது என்பது ஒரு புறம் இருக்க முன்பதிவு டிக்கெட் உறுதியாகிவிட்டதா என அறிய அவப்போது இந்த தளத்திற்கு விஜயம் செய்து பிஎன்ஆர் எண்ணை டைப் செய்து பார்த்து கொண்டிருக்க வேண்டும்.

இது பொறுமையை சோதிக்ககூடியது மட்டும் அல்ல பொன்னான நேரத்தை விரயமாக்க கூடியது.

இந்த விரயத்தை தவிர்த்து பயணிகள் டிக்கெட்டின் நிலையை சுலபமாக அறிந்து கொள்ளும் விதத்தில் மைபிஎன்ஆர் தளம் உருவாக்கப்பட்டுள்ளது.

முன்பதிவு செய்தவர்கள் தங்கள் பிஎன்ஆர் எண்ணை இந்த தளத்தில் சமர்பித்தால் அதன் அபோதைய நிலையை தெரிந்து கொள்ளலாம் .அப்படியே தங்கள் செல்போன் எண்ணை சமர்பித்தால் டிக்கெட்டின் நிலை மாறும் போது அந்த தகவலை எஸ் எம் எஸ் மூலமாக இந்த தளம் தெரிவிக்கிறது.

அதாவது பயணிகள் சார்பில் அவர்கள் பிஎன்ஆர் எண் நிலையை கண்காணித்து அதில் மாற்றம் வந்தவுடன் அதனை தெரிவிக்கிறது.

மிகவும் பிசியானவர்கள் முன்பதிவு செய்த ரெயில் டிக்கெட் நிலை என்ன ஆயிற்று என்று அறிய தங்கள் நண்பர்கள் அல்லது உறவினர்களிடம் இணையத்தில் அதனை பார்த்து சொல்ல கேட்பதுண்டு அல்லவா?

இப்படி முன்பதிவு செய்த எல்லோர் சார்பிலும் பிஎன்ஆர் எண் நிலையை கண்காணித்து சொல்கிறது இந்த தளம்.அதிலும் அழகாக செல்போனில் குறுஞ்செய்தியாக அனுப்பி வைக்கிறது.இந்த தகவலை இமெயில் மூலமும் பெற்றுக்கொள்ளலாம்.

உங்கள் சார்பில் உங்கள் வேலையை யாரோ ஒருவர் செய்து கொன்டிருக்கின்றனர் என்ற உணர்வு ஏற்படுவது சிறந்தது தானே அதை தான் செய்கிறோம்(இலவசமாக) என்றும் இந்த தளம் பெருமை பட்டுக்கொள்கிறது.

இதற்கென எழுதப்பட்ட நிரல் இந்த பணியை செய்தாலும் பயணிகளை பொறுத்தவரை இது பயனுள்ள சேவை என்பதில் சந்தேகம் இல்லை.

விஷால் குப்தா என்னும் பெங்களுரை சேர்ந்த மென்பொருள் வல்லுனர் இந்த தளத்தை உருவாக்கி இருக்கிறார்.

பிஎன்ஆர் எண் நிலை மட்டும் அல்ல டிக்கெட் உறுதியாகி விட்டது என்றால் அந்த ரெயில் குறித்த நேரத்தில் புறப்படுமா அல்லது ஏதேனும் தாமதம் இருக்கிறதா போன்ற விவரங்களையும் தெரிந்து கொள்ளலாம்.

இந்த தளத்தை உருவாக்கிய விஷால் குப்தா கூடுதல் வசதிகளையும் இந்த தளத்தில் இணைக்க திட்டமிட்டுருக்கிறார்.(நன்றி யூவர்ஸ்டோரி)நல்ல விஷயம் தான் செய்யடும்.

இணையதள முகவரி;http://www.mypnr.in/

லண்டன் ஒலிம்பிக்கின் அற்புத தருணம்.

லண்டன் ஒலிம்பிக் போட்டியின் மறக்க முடியாத தருணங்களில் தொலைந்து போன டிக்கெட் டிவிட்டர் மூலம் திரும்பி கிடைத்த அற்புதத்தையும் சேர்த்து கொள்ள வேண்டும்.இந்த சம்பவம் டிவிட்டரின் ஆற்றலை உணர்த்துவதாக அமைந்ததோடு மனிதநேயம் மிச்சமிருப்பதறகான அடையாளமாகவும் அமைந்தது.

நடந்தது இது தான்!

ஒலிம்பிக்கில் தடகள போட்டிகளை காண்பதற்கான டிக்கெட்டை வாங்கியிருந்த மைக் போவக் என்பவர் அதனை எப்படியோ தவற விட்டு விட்டார்.கன்டா நாட்டு வாலிபரான் போவக் தனது அறைக்கு திரும்பிய பின்னர் தான் கையில் டிக்கெட் இல்லாததை உணர்ந்திருக்கிறார்.

அறை முழுவதையும் தேடிப்பார்த்தவருக்கு ஏமாற்றமே மிஞ்சியிருக்கிறது.டிக்கெட்டை காண‌வில்லை.

இப்படி டிக்கெட்களை தவற விடுவதும் தொலைத்து விட்டு தேடுவதும் வாழ்க்கையில் பலருக்கும் நடப்பது தான்.ஆனால் தொலைந்து போனவை திரும்ப கிடைப்பது என்பது சில நேரங்களில் அரிதானது சில நேரங்களில் அதிர்ஷ்டமானது.பல நேரங்களில் ஏமாற்றம் தரக்கூடியது.

போவக் டிக்கெட்டை காணவில்லை என அறிந்ததும் என்ன நினைத்தார் என்று தெரியவில்லை.ஆனால் ஏதோ ஒரு ந‌ம்பிக்கையில் அவர் இண்டெர்நெட்டுக்கு சென்று தொலைந்து போன டிக்கெட் என டைப் செய்து பார்த்தார்.

ஆனால் நிச்சயம் ஒரு அற்புதம் காத்திருக்கும் என்பதை அவர் எதிர்பார்த்திருக்க மாட்டார்.21 ம் நூற்றாண்டின் அற்புதம் அது.இணைய அற்புதம்.

யாரேனும் ஒலிம்பிக் டிக்கெட்டை தவற விட்டு விட்டீர்களா? என்னும் குறும்பதிவு முதல் முடியாக மின்னிக்கொண்டிருந்தது.அவர் டிக்கெட்டை தவற விட்ட இடத்தை சுட்டிக்காட்டிய அந்த குறும்பதிவை பார்த்ததுமே போவக்கிற்கு நம்ப முடியாமல் இருந்தது.

அந்த குறும்பதிவை வெளியிட்டவர் கேமருன் மான்டகோமரி .ஆஸ்திரேலியரான மான்டகோமரி லண்டனில் 3 ஆண்டுகளுக்கு முன் குடியேறியிருந்தார்.லண்டனின் பாரிங்டன் ரெயில் நிலையத்தில் அவர் அன்றைய தினம் காலை ஒலிம்பிக் போட்டிக்கான டிக்கெட்டை கண்டெடுத்தார்.

தடகள போட்டியின் முதல் நாள் நிகழ்வுக்கான அந்த டிக்கெட்டை கண்டெடுத்ததும் அதிர்ஷம் அடித்தது என நினைத்து தானே அந்த டிக்கெட்டில் போட்டியை காண சென்றிருக்கலாம்.

ஆனால் மான்ட்கோமரி அவ்வாறு நினைக்கவில்லை.அந்த டிக்கெட்டை உரியவரிடம் எப்படியாவது ஒப்படைக்க விரும்பினார்.ஆனால் எப்படி?

டிக்கெட்டை தவறவிட்டது யார் என்பது தெரியாது.அவர் எங்கிருக்கிறார் என்பதும் தெரியாது.இந்த நிலையில் அதனை உரியவரிடம் ஒப்படைப்பது எப்படி?

இதியெல்லாம் யோசித்து பார்த்து சரி இதெல்லாம் சரிபட்டு வராது என அவர் தன் வேலையை பார்க்க சென்றிருக்கலாம்.

ஆனால் மான்டகோமரி எப்படியாவது முயன்று பார்க்க தீர்மானித்தார்.

ஒலிம்பிக் போட்டியின் எல்லா டிக்கெட்களிலும் அதனை வாங்கியவரின் பெயர் அச்சிடப்பட்டிருக்கும்.அந்த டிக்கெட்டிலும் பெயர் இருந்தது.அந்த பெயருக்குறியவரை கண்டுபிடிக்க முடிகிறதா என்று பார்ப்பதற்காக அவர் பேஸ்புக் கூகுல் பிலஸ், கூகுல்,டிவிட்டர் ,லிங்க்டின் போன்ற தளங்களில் அந்த பெயரை டைப் செய்டு தேடிப்பார்த்தார்.

இந்த தேடல்கள் எந்த பலனையும் தரவில்லை.அப்போது தான் டிகெட்டை வாங்கியது தவறவிட்டவராக இல்லாமல் அவரது நண்பராக கூட இருக்கலாமே என்ற‌ எண்ணம் தோன்றியது.

இது நிலமையை மேலும் சிக்கலாக்கியது.இருந்தும் மான்டகோமரி நம்பிக்கையோடு மேலும் முயன்று பார்க்க தீர்மானித்து டிவிட்டரின் உதவியை நாடினார்.

அப்படி அவர் வெளியிட்ட குறும்பதிவு தான் போவக் பார்த்தது.

போவக் அதனை உடனே பார்த்து விடவில்லை.அந்த குறும்பதிவு அவர் கண்ணில் படுவதற்கு சில மணி நேரங்கள் ஆனது.அது வரை மான்டகோமரி டிக்கெட்டுக்கு உரியவரை கண்டுபிடிப்பதற்கான தேடலில் தீவிரமாக இருந்தார்.

தனது குறும்பதிவுக்கு எந்த பதிலும் கிடைக்காதது கண்டு அவர் பிபிசி போன்ற செய்தி தளங்களுக்கு அந்த செய்தியை குறும்பதிவு செய்தார்.அவை அதனை மறு பதிவிட்டன.இதனால் மேலும் பலரை அது சென்ற‌டைந்தது.

இதற்குள் பலரும் உரியவரை கண்டுபிடிப்பது கடினம் ,நீங்களே அந்த டிக்கெட்டை பயன்படுத்தி கொள்ளுங்கள் என்று ஆலோசனை கூறினர்.மான்டகோமரி தனது நோக்கத்தில் உறுதியாக இருந்தார்.

அந்த உறுதியின் பலனாக தான் டிக்கெட்டை தவறவிட்ட போவக் அந்த குறும்பதிவை பார்த்தார்.

உடனே அவர் பரபரப்போடு,அது எனது டிக்கெட்டாக இருக்க வேண்டும்.தயவுசெய்து என்னை தொடர்பு கொள்ளுங்களேன் நான் ஆதாரங்களை தருகிறேன் என்று பதில் தெரிவித்தார்.

அதன் பிறகு ஒரு இமெயில் மற்றும் பத்து நிமிடங்களில் டிக்கெட் அவரிடம் ஒப்படைக்கப்பட்டு விட்டது.

எதிர்பார்க்க கூடியது போலவே தொலைந்த டிக்கெட் மீண்டும் கிடைத்தது போவக்கை மகிழ்ச்சியில் ஆழ்த்தியது.அதிலும் ஒருவர் அதனை தன்னிடம் ஒப்படைக்க இந்த அளவுக்கு முயன்றது நெகிழ்ச்சியில் ஆழ்த்தியது.

மனிதநேயம் மீதான எனது நம்பிக்கையை இது மெய்பித்துள்ளது என அவர் டிவிட்டரில் அந்த நெகிழ்ச்சியை வெளிப்படுத்தியிருந்தார்.

மான்டகோமரியோ லண்டன் போன்ற பெரு நகரில் உங்கள் பக்கம் அதிர்ஷ்டம் இருக்க வேண்டும்.அது தான் நல்ல மனதை வெளிப்படுத்த ஒரு வாய்ப்பு கிடைத்த போது அதனை பயன்படுத்தி கொண்டேன் என்று அடக்கத்தோடு குறிப்பிட்டிருந்தார்.

நல்ல மனதோடு டிவிட்டரை பயன்படுத்திக்கொள்ளும் புத்திசாலித்தனமும் அவரிட‌ம் இருந்ததை பாராட்ட வேண்டும் .

————-
http://twitter.com/patternr

http://twitter.com/mikeboag

மலிவு விலையில் திரைப்பட டிக்கெட்கள் தரும் இணையதளம்..

எப்படியாவது டிக்கெட் வாங்கி திரைப்படம் பார்த்து விட வேண்டும் என்று ரசிகர்கள் துடித்ததெல்லாம் ஒரு காலம்.இதற்காக மணிக்ககணக்காக வரிசையில் காத்திருப்பார்கள்,பிளாக்கில் விற்கப்படும் டிக்கெட்களை இடண்டு மூன்று மடங்கு விலை கொடுத்து வாங்கவும் தயாராக இருப்பார்கள்.

ஆனால் இப்போதோ ரசிகர்கள் எப்போதோ தான் படம் பார்க்க வருகின்றனர்.அடித்து பிடித்து டிக்கெட் வாங்க எல்லாம் யாருக்கும் ஆர்வம் இல்லை.

விளைவு திரையரங்குகள் காற்று வாங்குகின்றன.ஹவுஸ்புல் போர்டு போட்டு வெறுப்பேற்றிய காலம் போய் இன்று பாதி திரையரங்கு நிறைந்தாலே பெரிய விஷயமாகி விட்டது.

ஹாலிவிட் முதல் கோலிவுட் வரை இந்த நிலை தான்.இதற்கான காரணங்கள் ஆய்வுக்குறியவை .அவை ஒரு புறம் இருக்கட்டும் இந்த நிலையில் இரு தரப்பினருக்குமே பயனளிக்கக்கூய வகையிலான சேவையை டீல்பிலிக்ஸ் இணையதளம் அறிமுகம் செய்துள்ளது.

டீல்பிலிக்ஸ் தளம் மலிவு விலையில் அதாவது டிக்கெட் விலையை விட 40 முதல் 50 சதவீதம் வரை குறிவான விலையில் வழங்குகிறது.இதன் மூலம் ரசிகர்களுக்கு குறைந்த விலையில் படம் பார்த்த பலன் கிடைக்கும் என்றால் திரையரங்குகளுக்கோ காலி இருக்கைகள் நிரம்பிய பலன் கிடைக்கும்.

அமெரிக்காவில் அறிமுகமாகியுள்ள தளம் இது.

திரையரங்குகளில் கூட்டம் குறைந்து கொண்டே வருவது பற்றி பலரும் கவலை பட்டு கொண்டிருக்கும் நிலையில் அதற்கான சிறு தீர்வாக இந்த சேவை அறிமுகமாகியுள்ளது.

இந்த சேவையின் மூலம் குறைந்த விலையில் டிக்கெட் பெற விரும்பும் ரசிகர்கள் தாங்கள் பார்க்க விரும்பும் திரைப்படத்தையும்,பார்க்க விரும்பும் நாளையும் தேர்வு செய்து தெரிவிக்க வேண்டும்.எந்த பகுதியில் படம் பார்க்க விருப்பம் என்பதையும் குறிப்பிட வேண்டும் ,ஆனால் எந்த திரையரங்கம் என்பதை தேர்வு செய்ய முடியாது.(திரையரங்குகளுக்கு கவுரவ பிரச்சனையாக இருக்கலாம் என்பதால் இப்படி)

இதனையடுத்து டீல்பில்க்ஸ் தளம் உங்களுக்கான சலுகை விலை டிக்கெட்டை பரிந்துரைக்கும் .அதற்கு ஒப்புக்கொண்டு டிக்கெட்டை வாங்கி கொண்ட பின் எந்த திரையரங்கு என்பது தெரியவரும்.

விற்காத சரக்கை தள்ளுபடியில் தள்ளிவிடுவது போல தான் இதுவும்.ஆனால் ரசிகர்கள்,திரையரங்குகள் இரு தரப்பினருக்குமே ஆதாயம் தரக்கூடியது.

ஹாலிவிட்டில் ஆரம்பித்து விட்டார்கள்,கோலிவுட்டிலும் ஆரம்பிக்கலாம்.

யோசித்து பாருங்கள் சலுகை விலையில் கூட்டமாக கூட டிக்கெட்கள் பெற்று அரங்கை நிரப்பி விடலாம்.குழுவாக பார்க்க விரும்பும் ரசிகர்கள் கூடுதல் சலுகையும் கோரிப்பெறலாம்.

இணையதள முகவரி;http://www.dealflicks.com/movie_index.php

spare

பயன்ப‌டுத்த முடியாத டிக்கெட்களை விற்க ஒரு இணையதளம்.

விளையாட்டு போட்டிகள்,இசை நிகழ்ச்சிகள் போன்றவற்றுக்கு அடிக்கடி செல்லும் வழ‌க்கம் கொண்டவ‌ர்கள் ஸ்பேர் டிக்கெட்(உபரி டிக்கெட்) இணையதளத்தை தவறாமல் குறித்து வைத்து கொள்ள வேண்டும்.அது அவர்களுக்கும் ந‌ல்லது.அந்த தளத்திற்கும் நல்லது.

பெயருக்கேற்ப இந்த தளம் உபரியாக உள்ள டிக்கெட்டை உரிய நேரத்தில் பைசல் செய்வதற்கான இணைய மேடையாக உருவாக்கப்பட்டுள்ளது.

அதாவது நம்மிடம் உள்ள ஆனால் நம்மால் பயன்ப‌டுத்த முடியாத டிக்கெட்களை அவற்றை பயன்படுத்தகூடியவர்களிடம் தருவதற்கான வழியாக இந்த தளம் விளங்குகிறது.

இத்தகைய அனுபவம் பலருக்கு ஏற்பட்டிருக்கலாம்.சினிமாவுக்கோ,ஐபிஎல் போட்டிக்கோ டிக்கெட் வாங்கியிருப்போம்,திடீரென போக முடியாத சூழ்நிலை ஏர்பட்டு விடும்.அப்போது என்ன செய்வோம்.வேறு யாரிடமாவ‌து அந்த டிக்கெட்டை கொடுத்து விட நினைப்போம்.

சில நேரங்களில் நண்பரோ அல்லது தெரிந்தவரோ அட்டா நானும் டிக்கெட்டுக்காக அலைந்து கொண்டிருந்தேன் என ஆனந்தமாக வாங்கி கொள்ளலாம்.பல நேரங்களில் தெரிந்தவர் நண்பர்கள்,தெரியாதவர்கள் என யாரை கேட்டாலும் பயன் இருக்காது.

இந்த பிரச்ச‌னைக்கு தீர்வாக தான் ஸ்பேர் டிக்கெட் தளம் உருவாகப்பட்டுள்ளது.

யாரிடம் பய‌ன்படுத்த முடியாத உபரி டிக்கெட் இருக்கிறதோ அவர்கள் இந்த தளத்தில் அந்த டிக்கெட்டை பட்டியலிடலாம்.யாருக்கு இவை தேவையோ அவர்கள் தொடர்பு கொண்டு அந்த டிக்கேட்டை வாங்கி கொள்ளலாம்.

பல‌ருக்கும் போன செய்து தேவையா தேவையா என கேட்டு கொண்டிருக்க வேண்டிய தேவையில்லை.டிக்கெட்டை பட்டியலிட்டு விட்டு காத்திருக்கலாம்.அதே நேரத்தில் நிகழ்ச்சிகளுக்கான டிக்கெட் கிடைக்காமல் அலைபாய்ந்து கொண்டிருப்பவர்கள் நேராக இந்த‌ தளத்தில் வந்து தங்களுக்கு தேவையான டிக்கெட் இருக்கிறதா என பார்த்து கொள்ளலாம்.

டிக்கெட்களை சம்ர்பிப்பவர்கள் அவற்றுக்கு தள்ளுபடி த‌ர விரும்பினால் அதனையும் குறிப்பிடலாம்.

டிக்கெட்கள் வீணாக கூடாது என நினைப்பவ‌ர்களுக்கும் சரி ,குறிப்பிட்ட நிகழ்ச்சிக்கான டிக்கெட் கிடைகாத என ஏங்கி கொண்டிருப்பவருக்கும் சரி இந்த தளம் ஒரு வரப்பிரசாதம் தான்.ஆனால் ஒன்று கணிசமான அளவு பயனாளிகள் சேர வேண்டும்.இல்லை என்றால் கடை விரித்தோம் கொள்வார் இல்லை என்னும் நிலை ஏற்படலாம்.

அமெரிக்கா உள்ளிட்ட நாடுகள் இப்படி உபரி டிக்கெட்டை தேவைப்படுவரிடம் விற்பதற்கான இணைய சேவைகள் நிரைய உள்ளன.இவ்வ‌ளவு ஏன் கையில் இருக்கும் டிக்கெட்களை ஏல தளமான இபேவில் பட்டியலிட்டால் கொத்தி கொண்டு போய் விடுவார்கள்.

இந்த வகையில் இந்திய சந்தியில் அறிமுகமாகியுள்ள முதல் தளமாக இந்தனை குறிப்பிடலாம்.முதல் க‌ட்டமாக‌ மும்பை,டெல்லி,புனா போன்ற‌ நகரங்களில் அறிமுகம் செய்துள்ளனர்.அடுத்த கட்டமாக் சென்னை உள்ளிட்ட ந‌கரங்களுக்கு விரிவாக்கம் செய்யப்படலாம்.

இந்த தளத்தில் உள்ள மற்றொரு சிற‌ப்பம்சம் பயனாளிகள் தாங்கள் விரும்பும் நிகழ்ச்சிகளை குறிப்பிட்டால்,அவ‌ற்றுக்கான உபரி டிக்கெட் சம‌ர்பிக்கப்படும் போது அது பற்றிய தகவல் உடனே தெரிவிக்கப்படும்.மற்றவர்களை முந்திக்கொண்டு டிக்கெட்களை வாங்கி கொள்ளலாம்.

நடைமுறையில் பயன் தரக்கூடிய தளங்களின் வரிசையில் இந்த தளத்திற்கு நல்வரவு கூறலாம்.

இணையதள முகவ‌ரி;http://spareticket.in/