Tag Archives: timer

நீங்கள் அறியாத தேடல் ரகசியங்கள்

ddg-bangs-640x460மாற்று தேடியந்திரங்களில் முன்னணியில் இருக்கும் ’டக்டக்கோ’ பற்றி நீங்கள் கேள்விப்பட்டிருக்கலாம். கூகுள் சவால் விடக்கூடிய அளவுக்கு மிகப்பெரிய தேடியந்திரம் இல்லை என்றாலும், ’டக்டக்கோ’ கடந்த 7 ஆண்டுகளில் கொஞ்சம் கொஞ்சமாக வளர்ந்து தனக்கென தனியிடத்தை பிடித்திருக்கிறது. இதற்கு முக்கிய காரணம் டக்டக்கோ இணைவாசிகளின் தனியுரிமையை மதிக்கும் வகையில் செயல்படுவது தான். ஆம், இணையவாசிகளின் தேடல் பழக்கத்தை கண்காணிப்பதில் ஈடுபடாமல் இருப்பதும், அவர்களைப்பற்றி தகவல்களை திரட்டி விளம்பர வலை விரிக்காமல் இருப்பதும் டக்டக்கோவின் தனிச்சிறப்பாக அமைகிறது. இணையத்தில் தகவல்களை தேடுவதற்காக டக்டக்கோவை பயன்படுத்தும் போது, நீங்கள் யார் என்பதை அது கவனிக்காமல் இருக்கிறது. இந்த அனாமதேய தன்மையை பிரைவசி ஆர்வலர்கள் கொண்டாடி வருகின்றனர்.

எனவே உங்கள் இணைய தேடல் அனாமதேயமாக இருக்க வேண்டும் என விரும்பினால் நீங்களும் டக்டக்கோவை பயன்படுத்திப்பார்க்கலாம். பிரைவசி பாதுகாப்பு பிரதான அம்சம் என்றாலும், டக்டக்கோவுக்கு மாறலாம் என நினைப்பதற்கு மேலும் பல காரணங்கள் இருக்கின்றன. ஒரு தேடியந்திரமாக டக்டக்கோ பல தனித்தன்மையான சேவைகளை வழங்கி வருகிறது. இவற்றில் பல பிரத்யேகமானவை என்பது குறிப்பிடத்தக்கது:

ஸ்டாப்வாட்ச்

நீங்கள் விரும்பினால் டக்டக்கோவை ஸ்டாப்வாட்சாக பயன்படுத்தலாம். இதன் கட்டத்தில் ஸ்டாப்வாட்ச் என டைப் செய்தால் போதும், அதற்கான கடிகாரம் தோன்றும். அதில் உங்களுக்கு தேவையான நேரத்தை அமைத்துக்கொள்ளலாம். அது மட்டும் அல்ல, அடுத்தடுத்து வேலைகள் இருப்பின், லேப் வசதி மூலம் தொடச்சியாக பயன்படுத்தலாம். இதே முறையில் டைமர் சேவையையும் பயன்படுத்தலாம். டைமரில் நேரம் முடிந்ததும் அலாரமும் ஒலிக்கும்.

பெரிய எழுத்துக்கள்

ஆங்கில வாசகங்களில் தேவையான இடங்களில் கேபிடல் எழுத்துக்களை அமைக்க விரும்பினால் அதற்கான வசதியையும் இந்த தேடியந்திரம் வழங்குகிறது. வாசகத்தை டைப் செய்து அதற்கு முன் டைடில் கேஸ் என குறிப்பிட்டு இடைவெளி விடுவதன் மூலம் இந்த வசதியை பயன்படுத்திக்கொள்ளலாம். எழுத்துக்களை லோவர் கேஸ் அல்லது அப்பர் கேசாக மாற்றவும் இதை பயன்படுத்தலாம். மாணவர்களுக்கு இந்த வசதி மிகவும் பயனுள்ளதாக இருக்கும்.

செய்திகளை தேட

கூகுளில் தகவல்களை தேடும் போது, தொடர்புடைய செய்திகளும் இடம்பெற்றிருக்கும். ஆனால் டக்டக்கோ தேடல் முடிவுகளை மட்டுமே அளிக்கிறது. இருப்பினும் செய்திகளும் இடம்பெற விரும்பினால், தேடலுக்கான கீவேர்டு முன் அல்லது முடிவில் நியூஸ் என சேர்த்துக்கொண்டால் போதும், தொடர்புடைய செய்திகளையும் காணலாம். 100 க்கும் மேற்பட்ட தளங்களில் இருந்து செய்திகள் பட்டியலிடப்படுகின்றன.

பிடிஎப் கோப்புகள்

டக்டக்கோவில் எச்.டி.எம்.எல் கோப்புகளையும் எளிதாக தேடலாம். எச்.டி.எம்.எல்: என குறிப்பிட்டால் பொருத்தமான முடிவுகளை காணலாம். புரோகிராமிங் சிறப்பு குறியீடுகளையும் தேடலாம். இதே போல பிடிஎப் கோப்புகள் அல்லது மின் புத்தகங்களை எதிர்பார்க்கும் போது, கீவேர்டுடன் பிடிஎப் எனும் வார்த்தையை சேர்த்துக்கொண்டால் போது, இத்தகைய கோப்புகளை மட்டும் தேடலாம்.

நெத்தியடி தேடல்

சில நேரங்களில் ஒட்டுமொத்த இணைய கடலிலும் தேட விரும்பாமல் குறிப்பிட்ட இணையதளத்தில் மட்டும் தேட விரும்பலாம். இதற்கும் டக்டக்கோவில் வழி இருக்கிறது. இந்த வசதி ஐபேங்க் என சொல்லப்படுகிறது. தேடல் பதத்திற்கு முன் ஆச்சர்யக்குறியை சேர்த்து, குறிப்பிட்ட தளத்திற்கான முதல் எழுத்தை குறிப்பிட்டால் போதும், அந்த ஒரு தளத்தில் மட்டும் தேடலாம். உதாரணத்திற்கு  !a என்றால் அமேசான் தளத்தில் தேடலாம். இப்படி நூற்றுக்கணக்கான தளங்களில் நேரடியாக தேடும் வசதியை அளிக்கிறது. இதற்கான நீண்ட பட்டியலும் கொடுக்கப்பட்டுள்ளது: https://duckduckgo.com/bang

ஆய்வுப்பிரிவிலும் தளங்கள் பட்டியலிடப்பட்டுள்ளதால் மாணவர்கள் மற்றும் ஆய்வாளர்களுக்கு இந்த சேவை மிகவும் பயனுள்ளதாக இருக்கும். இவ்வளவு ஏன், இந்த வசதியை பயன்படுத்தி கூகுளிலும் தேடலாம் தெரியுமா? https://duckduckgo.com/bang?q=google

உடனடி பதில்கள்

இன்ஸ்டண்ட் ஆன்சர்ஸ் எனும் பெயரில் உடனடி பதில்களையும் டக்டக்கோ வழங்கி வருகிறது. குறிப்பிட்ட பல கேள்விகள் அல்லது பதங்களுக்கு தேடல் வார்த்தையை டைப் செய்ததுமே பொருத்தமான பதிலை காணலாம். கிளிக் செய்யாமலே தேடும் வசதி எனும் வர்ணனையோடு டக்டக்கோ இதை அறிமுகம் செய்தது. கூகுள் நாலட்ச் கிராப் எனும் பெயரில் இது போன்ற வசதியை வழங்கினாலும், முதலில் டக்டக்கோ தான் இதை அறிமுகம் செய்தது.

வீடியோ தேடல்

வீடியோ கோப்புகள் மட்டும் தான் தேவை எனில் தேடல் பதத்திற்கு முன் வீடியோ என சேர்த்துக்கொண்டால் 28 வீடியோக்கள் வந்து நிற்கின்றன. மேலும் வீடியோக்கள் தேவையில் எனில் அதற்கான வசதியை கிளிக் செய்யலாம். சமையல் குறிப்பு வீடியோக்கள் என்று குறிப்பிட்டும் தேடலாம். இந்த முடிவுகள் யூடியூப் மட்டுமே சார்ந்திருப்பது தான் ஒரே குறை.

குறுக்கு வழிகள்

இணையசேவைகளுக்கான கீபோர்டு சார்ந்த குறுக்கு வழிகள் தேவை எனில், சீட்ஷீட் வசதியை பயன்படுத்திக்கொள்ளலாம். உதாரணத்திற்கு போட்டோஷாப்  சீட்ஷீட் என தேடினால் போட்டோஷாப் தொடர்பான குறுக்கு வழிகளை பெறலாம். புரோகிராமிங் தொடர்பான தகவல்களையும் எளிதாக தேடலாம்.

டக்டக்கோவில் இன்னும் கூட பல அம்சங்கள் இருக்கின்றன. எல்லாம் சரி, கூகுள் போல வருமா? என கேட்பவர்களுக்காக கூகுல் தொடர்புடைய சுவாரஸ்யமான தகவல் ஒன்று. கூகுளில் ஏதேனும் பிரச்சனையா? எனும் பொருள்பட, ஈஸ் கூகுள் டவுன் என கூகுளில் கேட்டால், இல்லை (நோ) என பதில் பளிச் என தோன்றுகிறது.

 

நன்றி; தமிழ் இந்து இளமை புதுமையில் எழுதியது.

 

டக்டக்கோ தொடர்பான முந்தைய பதிவுகள்: http://cybersimman.com/?s=%E0%AE%9F%E0%AE%95%E0%AF%8D%E0%AE%9F%E0%AE%95%E0%AF%8D%E0%AE%95%E0%AF%8B

டீ போட உதவும் இணையதளம்!


முட்டையை சரியான முறையில் வேக வைப்பதற்கான நேரத்தை காட்டும் இணையதளம் இருப்பது போல கமகமக்கும் டீயை சரியாக போடவும் தேயிலையை எவ்வளவு நேரம் கொதிக்க வைக்க வேண்டும் என்று சொல்வதற்காகவே ஸ்டீப்.இட் இணையதளம் இருக்கிற‌து.

தேயிலையை பல வகைகள் இருக்கின்றன.ஒவ்வொரு தேயிலையையும் ஒரு குறிப்பிட்ட நேரம் கொதிக்க வைத்தால் தான் அதன் சுவையை முழுமையாக உணர முடியும்.

ஸ்டீப்.இட் இணையதளம் இப்படி தேயிலையை அதன் வகைக்கு ஏற்ப முழுமையாக சுவைத்து மகிழ இரண்டு விதங்களில் உதவுகிறது.ஒன்று தேயிலையை எவ்வளவு நேரம் கொதிக்க வைக்க வேண்டும் என்பது உங்களுக்கு தெரிந்திருந்தால் அடுப்பில் தேயிலையை கொதிக்க வைத்து விட்டு இந்த தளத்தில் கடிகாரத்தில் அதற்கான நேரத்தை குறிப்பிட்டு காத்திருக்கலாம்.அந்த நேரம் முடிந்ததும் இந்த தளம் அலாரத்தின் மூலம் அதனை தெரிவிக்கிறது.

கிரின் டீயோ,மூலிகை டீயோ எவ்வளவு நேரம் கொதிக்க வைப்பது என்று உங்களுக்கு தெரியாவிட்டால் அதற்கான நேரத்தையும் தெரிவித்து,கொதிக்கும் போது நேரம் கணக்கிட்டு எச்சரிக்கும் சேவையையும் இந்த தளம் வழங்குகிற‌து.இதற்கான என்று தனியே அட்டவணையே இருக்கிற‌து.

டீ போட எல்லாம் கணக்கு போட ஒரு இணையதளமா என இல்லத்தலைவிகள் இளக்காரமாக பார்க்கலாம் என்றாலும் ஆண்களுக்கும் குறிப்பாக இளைஞர்களுக்கும் இந்த தளம் கைகொடுக்கலாம்.

தவிரவும் சமையலையும் கொஞ்சம் ஹைடெக்காக மாற்றிக்கொண்டால் சுவாரஸ்யமாக தானே இருக்கும்.

இந்த தளத்தில் இன்னொரு சுவாரஸ்யம் என்னவென்றால்,தேயிலை கொதிப்பதற்கான நேரம் தெரியும் என்றால் அதனை தனியே டைப் செய்யகூட தேவையில்லை,பிர்வுசரில் இணையதள முகவரி டைப் செய்யும் போது,ஒரு ஸ்லேஷ் போட்டு அந்த நேரத்தையும் அடித்தால் போதும் கடிகாரம் வேலை செய்யத்துவங்கி விடும்.அதே போல இணையதள முகவரியோடு டீயின் பெயரை சேர்த்து டைப் செய்தாலும் கடிகாரம் செயல்படத்துவங்கி விடுகிற‌து.

இணையதள முகவரி;http://www.steep.it/

(முந்தைய முட்டை வேக வைக்கும் பதிவில் குறிப்பிட்டது போல நேரம் கணக்கிடும் தளங்கள் பற்றி எழுத துவங்கியுள்ளேன்.தேயிலை பிரியர்களுக்கான இனையதளம்,முட்டை வேக வைக்க மற்றொரு இணையதளம் மற்றும் பிற‌ நேரம் காட்டும் தளங்களை தொடர்ந்து பார்க்கலாம்)

முட்டை வேக வைக்கும் அறிவியல் கற்றுத்தரும் இணையதளம்.

முட்டை வேக வைப்பதற்கான நேரத்தை கணக்கிட உதவும் எக்வாட்சர்ஸ் இணையதளம் பற்றி நண்பர் வின்மணி ஏற்கனவே எழுதியுள்ளார்.இப்போது நானும் அதே இணையதளம் பற்றி எழுதுவதற்கு காரணம்,இதே போன்ற நேரம் கணக்கிடும் இணையதளங்கள் பற்றி தொடர்ந்து எழுதலாம் என்ற திட்டம் தான்.(அந்த அளவுக்கு விதவிதமான நேரம் கணக்கிட உதவும் இணையதள‌ங்கள் இருக்கின்றன)

அதோடு எக்வாட்சர்ஸ் இணையதளத்தில பலரும் கவனிக்காத இன்னொரு அழகான விஷயமும் இருக்கிறது.அதனை சுட்டிக்காட்டவும் தான் இந்த பதிவு.

முட்டையின் அளவையும் அது பிரிட்ஜிலிருந்து எடுக்கப்பட்டதா போன்ற தகவலை தெரிவித்தால் அந்த முட்டையை வேக வைப்பதற்கு எவ்வளவு நேரம் ஆகும் என தெரிவிப்பதோடு அதற்கான நேரத்தையும் காட்டுகிறது.நேரம் முடிந்ததும் அதையும் உணர்த்துகிறது.இடைப்பட்ட நேரத்தில் அழகான யூடியூப் வீடியோவும் ஒளிபரப்பாகிற‌து.

முட்டை வேக வைப்பதற்கு எல்லாம் நேரம் கணக்கிட்டு கொண்டிருக்க வேண்டுமா என்று சிலர் கேட்கலாம்.குறிப்பாக சமையல் கலையில் அனுப‌வம் மிக்கவர்கள் அலட்சியமாகவே கேட்கலாம்.

ஆனால் முட்டையை கச்சிதமாக வேக வைக்க தேவைப்படும் நேரத்தை சரியாக கணக்கிட்டு சொன்னால் நன்றாக இருக்கும் என்று நினைப்பவர்கள் பலர் இருக்கின்றனர்.அதிலும் சிலர் முட்டையை வேக வைப்பதற்கு ஏதாவது சூத்திரம் இருக்கிறதா என்றும் கேட்கக்கூடும்.

உண்மையிலேயே அப்படி ஒருவர் கேட்டிருக்கிறார்.அந்த கேள்விக்கு ஒருவர் மிகவும் விரிவாக பதிலும் அளித்திருக்கிறார்.முட்டை வேக வைக்கும் அறிவியலை விளக்கும் அந்த விரிவான கட்டுரையையும் இந்த தளத்தில் பார்க்கலாம்.

முட்டிஅயை வேக வைக்கும் முன் இதனை படியுங்கள் என்னும் சிறிய அறிமுகத்தோடு இந்த கட்டுரைக்கான இணைப்பு முகப்பு பக்கத்தில் கொடுக்கப்பட்டுள்ளது.

இந்த இணைப்பை கிளிக் செய்தால் முட்டியை வேக வைப்பதில் உள்ள அறிவியல் செயல்பாடு அழகாக விளக்கப்பட்டுள்ளது.கட்டுரையின் ஆரம்பத்தில் முட்டையை வேக வைப்பதற்கான கணித சூத்திரமும் கொடுக்கப்பட்டுள்ளது.

ஆக முட்டை வேக வைப்பதை சாதாரணமாக நினைக்க முடியாது தான் இல்லையா?

முட்டையை வேக வைக்க ஏதேனும் கனித சூத்திரம் இருக்கிறதா என கேட்டு நியூ சயின்டிஸ்ட் இதழில் வெளியான கடிதஅத்திற்கு பதிலாக ஏன் இல்லை என்று கேட்டு டாக்டர் சார்லஸ் வில்லியம் இந்த கட்டுரையை எழுதியுள்ளார்.

இந்த கட்டுரையின் போக்கிலேயே முட்டியை வேக வைக்கும் கலை தொடர்பாக கற்றுத்தரும் லார்ன்2.காம் தளத்திற்கு இணைப்பு தரப்பட்டுள்ளது.அதோடு இந்த‌ கட்டுரையோடே முட்டை வேக வைப்பதற்கான நிபுணர் ஒருவரின் கையேடும் இடம் பெற்றுள்ளது.டெல்டா என்னும் பெண்மணி எழுதியுள்ள அந்த கட்டுரையை படிக்கும் போது முட்டையை வேக வைப்பதில் இத்தனை நுணுக்கங்கள் இருக்கின்றனவா என்ற வியப்பு ஏற்படுகிறது.

இணையதள முகவரி;http://www.eggwatchers.com/

http://newton.ex.ac.uk/teaching/cdhw/egg/