ஒரு நல்ல இணைய தளம் எப்படி இருக்க வேண்டும் என்ற இலக்கணம் குறித்த பொது கருத்து இன்னமும் உருவாகவில்லை. சிறந்த இணைய தளம் என்பது எளிமையாக இருக்க வேண்டும் என்று பரவலாக கூறப்பட்டாலும் இதற்கான மிகச்சிறந்த உதாரணமாக எளிமையே வடிவான முகப்பு பக்கத்தை தேடியந்திர முதல்வனான கூகுல் பெற்றிருந்தாலும், அநேக இணைய தளங்கள் வண்ணப் படங்கள், வரைபடங்கள், வீடியோ வசதி என ஏராளமான அம்சங்களை கொண்ட தாகவே உருவாக்கப்படுகின்றன.
.
சில தளங்கள் கிராபிக்ஸ் மயமாகவும் அமைகின்றன. இத்தகைய தளங்கள் பார்ப்பதற்கு வேண்டுமானால் வசீகரமாக இருக்கலாமே தவிர, பயன்படுத்தும் போது சிக்கலான அனுபவத்தை தரலாம் என்று கருதப்படுகிறது. படங்கள், வரைபடங்கள் தவிர, இணையவாசிகளுக்கான சர்வே, ஒப்பிட்டு பார்க்கும் வசதி போன்ற கூடுதல் அம்சங்களையும் பல தளங்கள் கொண்டிருக்கின்றன.

எனவே, இதுதான் சிறந்த வடிவமைப்பு என்று சொல்ல முடியாத குழப்பமான நிலையே இன்டெர்நெட் உலகில் நிலவுகிறது. ஒரு தளம் எப்படி இருக்கிறது என்பதை விட, இணையவாசிகளுக்கு அது எத்தகைய அனுபவத்தை தருகிறது என்பதை பொறுத்தே அது சிறந்ததா, இல்லையா என்ற தீர்மானத்திற்கு வர வேண்டியிருக்கிறது.

ஆனால், இணையவாசிகள் பல தரப்பட்டவர்களாகவும் அவர்களின் எதிர்பார்ப்பு பலதரப்பட்டதாகவும் இருக்கும் போது என்ன செய்வது? எல்லோரையும் திருப்திபடுத்தக் கூடிய இணைய தளத்தை வடிவமைப்பு எப்படி? எளிமையான வடிவமைப்பை விரும்புகிறவர்கள், ஏராளமான அம்சங்களை கொண்ட தளத்தை விரும்பாமல் விலகிச் செல்லும் போது என்ன செய்வது?

வடிவமைப்பாளர்கள் மனதில் எழக்கூடிய இத்தகைய கேள்விகளுக்கு எல்லாம் பதில் தரக்கூடிய வகையில் புதுமையான இணைய தள வடிவமைப்பு முறை முன்வைக்கப்பட்டுள்ளது.

எம்ஐடி பல்கலையைச் சேர்ந்த ஸ்லோன் அமைப்பைச் சேர்ந்த ஆய்வாளர்கள் முன்வைத்துள்ள இந்த வடிவமைப்பு முறை உண்மையிலேயே சுவாரசியமானது. ஒரு குறிப்பிட்ட வகை தளத்தை வடிவமைக்காமல், நான்கைந்து வகையான தளங்களை வடிவமைக்க வேண்டும் என்பதே இந்த முறையின் மைய கருத்து. அதாவது நான்கைந்து வகையான இணைய தளங்களை ஒன்றன் மேல் ஒன்றாக இணைத்து, ஒரே தளமாக உருவாக்கி விட வேண்டும்.

இப்படி ஒரு தளத்தை உருவாக்கும் பட்சத்தில், இணையவாசிகளின் தன்மைக்கு ஏற்ப, அவர்களுக்கு ஏற்ற வகையான வடிவமைப்பு கொண்டதாக இணைய தளம் தானாக மாறிவிடும்.

உதாரணமாக, இணையவாசி எளிமையை விரும்புகிறவர் என்றால், இணைய தளமும் தானாகவே எளிமையான வடிவமைப்பு கொண்டதாக மாறிவிடும். அதே நேரத்தில் புகைப்பட பிரியராக விளங்கும் இணையவாசி என்றால், தளம் வண்ணப்படங்களை கொண்டதாக காட்சி தரும். இத்தகைய தளம் எவரையும் ஏமாற்றாது. எல்லோரையும் திருப்தி படுத்தக்கூடியதாக இருக்கும்.

எதிர்காலத்தில் இத்தகைய வடிவமைப்பு முறையே கோலோச்சப் போவதாக பேராசிரியர் ஜான் ஹாசர் கூறுகிறார். மேலே சொன்ன வடிவமைப்பு முறையை முன் வைத்துள்ள ஆய்வுக் குழுவின் தலைவராக ஹாசர், இந்த வகை இணைய தளம், இணையவாசிகளின் இயல்பை புரிந்துக் கொண்டு அதற்கேற்ப மாறும் தன்மை கொண்டதாக இருக்கும் என்று கூறுகிறார். இந்த தளம் மாறுகிறது என்பது கூட இணையவாசிகளுக்கு தெரியாமல், அது, அவருக்கு ஏற்றதாக மாறியிருக்கும் என்று இவர் கூறுகிறார்.

கிட்டத்தட்ட வடிவமைப்பு மாயம் என்று இதனை வர்ணிக்கலாம். இந்த மாயம் எப்படிசாத்தியமாகிறது? இணைய தளம் அந்த அளவுக்கு புத்திசாலித்தனமாக வடிவமைக் கப்படுகிறது என்பதே விஷயம்.

இணையவாசிகள் “கிளிக்’ செய்யும் முறையை வைத்தே அவர்களின் எதிர்பார்ப்பை யூகித்தறியும் ஆற்றல் கொண்டதாக இருப்பதன் மூலம் இது சாத்தியமாகிறது.
முகப்பு பக்கத்தை பார்த்தவுடன் இணையவாசி, விலைகளை ஒப்பிட்டு பார்க்கும் வசதியை கிளிக் செய்தார் என்றால், அவர் அலசி ஆராயும் மனோபாவம் கொண்டவராக இருக்கக்கூடும் என்ற அனுமானம் கொள்ளப்பட்டு, அதற்கேற்ற வடிவமைப்புடன் தளம் உருமாறிக் கொள்ளும். அதே போல இணையவாசி கேள்வி பதில் பகுதியை கிளிக் செய்தால் அவர், தளத்தோடு தொடர்பு கொண்டபடி இருக்கும் ஒருவித உரையாடல் தன்மையை விரும்புகிறவர் என்று புரிந்து கொள்ளப்படும்.

வரைபடங் களை கிளிக் செய்பவருக்கு தளம் கிராபிக் மயமாக காட்சி தரும். அதிகபட்சமாக இணையவாசிகளின் பத்து கிளிக்குகளுக்குள் இணைய தளம் அவரது எதிர்பார்ப்பை புரிந்து கொண்டு விடும் என்று பேராசிரியர் ஹாசர் நம்பிக்கையோடு சொல்கிறார்.
அது மட்டும் அல்ல, இணையவாசிகள் தொடர்ந்து பயன்படுத்தும் விதத்தை தொடர்ந்து கண்காணித்து வருவதன் மூலம் பொதுவாக எந்த வகையான அம்சங்கள் பெரிதும் விரும்பப்படுகின்றன என்பதையும் தளம் குறித்து வைத்துக் கொள்ளும்.

இந்த ஆய்வு இன்னமும் ஆரம்ப கட்டத்தில் இருக்கிறது என்றாலும் எதிர்காலத்தில் இணைய தள வடிவமைப்பில் ஆய்வு மூலமான புரிதல் பெரிய அளவில் கைகொடுக்கும் என்று எதிர்பார்க்கப்படுகிறது.

தற்போது இந்த முறையில் பிரிட்டிஷ் டெலிகாம் நிறுவனத்திற்கு சோதனை அடிப்படையில் ஒரு இணைய தளம் வடிவமைத்து தரப்பட்டுள்ளது. இந்த தளத்தின் செயல்பாடுகள் ஆர்வத்தோடு கவனிக்கப்பட்டு வருகிறது.

எம்ஐடியின் ஸ்லோன் பள்ளியைச் சேர்ந்த மற்றொரு பேராசிரியரான கிளன் அர்பன், இந்தக் குழு ஜப்பானிய வங்கிக்கு ஜப்பானிய மொழியில் ஒரு மாதிரி தளத்தை வடிவமைத்து வருவதாக கூறுகிறார். இந்த சோதனை முயற்சிகள் வெற்றி பெறுமானால் எதிர்காலத்தில் எல்லோருக்கும் ஏற்ற தளமாக மாறக் கூடிய தளங்கள் வடிவமைக்கப்படுவது சாத்தியமாகும் என்று அர்பன் கூறுகிறார்.