Tag Archives: archie

உலகின் முதல் நவீன தேடியந்திரம் எது?

webcrawler_screenshot_6-7-2010இணைய உலகின் முதல் தேடியந்திரம் எதுவென நீங்கள் அறிந்திருக்கலாம். ஆர்ச்சி தான் அது. ஆர்ச்சி இப்போது பயன்பாட்டில் இல்லை. இணைய சரித்திரத்தில் மட்டும் தான் இருக்கிறது. எல்லாம் சரி, உலகின் முதல் நவீன தேடியந்திரம் எது என்பது தெரியுமா? தயவு செய்து கூகுள் என்று மட்டும் பதில் சொல்ல வேண்டாம். தேடியந்திர உலகில் கூகுள் முழு முதல் தேடியந்திரம் போல தோன்றினாலும் அது சற்று தாமதமான வரவு . அதற்கு முன்னரே எண்ணற்ற முன்னோடி தேடியந்திரங்கள் தோன்றிவிட்டன. பல மறைந்துவிட்டன என்பது வேறு விஷயம்.

லைகோஸ், ஜம்ப்ஸ்டேஷன், மெட்டா கிராலர் என நீளக்கூடிய ஆரம்ப கால தேடியந்திர பட்டியலில் ஒன்றாக இடம்பெறும் வெப்கிராலர் தேடியந்திரமே முதல் நவீன தேடியந்திரமாக கருதப்படுகிறது.

இணையதளங்களை துழாவுவது, அவற்றை பட்டியலிடுவது மற்றும் அந்த பட்டியலில் இருந்து தேடுவதற்கான வசதியை அளிப்பது ஆகியவை தான், எந்த ஒரு தேடியந்திரத்தின் மூன்று முக்கிய அம்சங்களாக கருதப்படுகின்றன. தேடியந்திரங்களுக்கான சாமுந்திரிகா லட்சனம் என்றும் வைத்துக்கொள்ளலாம். இந்த மூன்று முக்கிய அம்சங்களையும் கொண்ட முதல் தேடியந்திரமாக வெப்கிராலர் அறிமுகமானது. எப்போது தெரியுமா? 1994 ல்!

அதற்கு முன்னர் உருவான தேடியந்திரங்கள் பெரும்பாலும் மனித கைகளால் தேர்வு செய்யப்பட்ட தொகுப்பை கொண்டதாகவும், மிக குறைவான செயல்பாடு கொண்டதாகவும் இருந்தன.

ஆர்ச்சி இதை ஒரளவு மாற்றியது. பின்னர் ஜம்ப்ஸ்டேஷன் தான் முதன் முதலில், இணையதளங்களை துழாவி,பட்டியலிட்டு தேட வழி செய்தது. ஆனால், இதுவும் கூட இணையதளங்களின் முழுவதையும் பட்டியலிடாமல், தலைப்பை மேட்டும் தேட வழி செய்வதாக அமைந்தது.

மாறாக, இணையத்தில் துழாவி, இணையதளங்களை பட்டியலிட்டு, அவற்றின் முழு பக்கத்தையும் தேடக்கூடிய முதல் தேடியந்திரமான வெப்கிராலர் அறிமுகமானது. அநேகமாக நவீன தேடியந்திர பாதை வெப்கிராலரில் இருந்து தான் துவங்குகிறது.
தேடியந்திர முன்னோடியான வெப்கிராலர் பின்னர் தேடியந்திர அலையில் பின்னுக்குத்தள்ளப்பட்டு மறக்கப்பட்டு விட்டது. 1995 ல் ஏ.ஓ.எல் நிறுவனத்தால் வாங்கப்பட்டு பின்னர் பல நிறுவனங்களின் கைகளுக்கு மாறிய வெப்கிராலர் ஒரு கட்டத்தில், மற்ற தேடியந்திர முடிவுகளை ஒப்பிடும் மெட்டா தேடியந்திரமாக மாறிப்போனது. இன்று வெப்கிராலர் தளம் இருந்தாலும், செயல்பாடில்லாமல் தான் இருக்கிறது.

* நவீன தேடியந்திரம் எது? http://www.howtogeek.com/trivia/what-was-the-first-modern-web-search-engine/

* வெப்கிராலர் :http://www.webcrawler.com/

* முதல் தேடியந்திரமான ஆர்ச்சி பற்றி:http://cybersimman.com/2013/06/29/search-48/

* முக்கிய தேடியந்திரங்கள்: http://cybersimman.com/2016/09/28/%E0%AE%95%E0%AF%82%E0%AE%95%E0%AF%81%E0%AE%B3%E0%AF%8D-%E0%AE%A4%E0%AE%B5%E0%AE%BF%E0%AE%B0-%E0%AE%A8%E0%AF%80%E0%AE%99%E0%AF%8D%E0%AE%95%E0%AE%B3%E0%AF%8D-%E0%AE%85%E0%AE%B1%E0%AE%BF%E0%AE%A8/

உலகின் முதல் தேடியந்திரம்.

archie_search_box

 

ஆதியில் ஒளி இருந்தது என்று சொல்வது போல இணைய உலகில் முதலில் ஆர்ச்சி இருந்தது. அதுவே முதல் தேடியந்திரமாக அறியப்படுகிறது.

கல் தோன்றி மண் தோன்றா காலம் என்பது போல இணையம் தோன்றி வலை ( வைய விரிவு வலை) தோன்றா காலத்தில், அதாவது 1990 ல் ஆர்ச்சி உதயமானது. அப்போது வலைமனைகள் இல்லையே தவிர இணையத்தில் சிறிய அளவிலான வலைப்பின்னல்களும், அவற்றில் பல கோப்புகளும் இருந்தன.

இந்த கோப்புகளை எல்லாம் பட்டியலிட்டு வைத்து கொண்டு கேட்கப்படும் போது தேடி எடுத்து தரும் பணியை ஆர்ச்சி செய்தது.ஆர்ச்சி உருவாக்கப்படும் முன் வரை, இணையத்தில் உள்ள கோப்புகளை பற்றி யாரேனும் சொன்னால் மட்டுமே அவற்றை தேடி எடுக்க முடியும்.

ஆர்ச்சி ஆரம்ப கால தேடியந்திரம் என்றாலும் அதில் பல்வேறு மேம்பட்ட வசதிகளும் இருந்தன.ஆர்ச்சி தேடியந்திர காலத்தில் தேடல் எப்படி இருந்தது என விவரிக்கும் சுவார்ஸ்யமான கட்டுரை மேக் யூஸ் ஆப் வலைப்பதிவில் வெளியாகி உள்ளது.

ஆர்ச்சி வரலாற்றில் காணாமல் போய்விட்டாலும் அதன் மாதிரியை போலந்து பல்கலையில் இன்னும் வைத்துள்ளர்.இப்போதும் அங்கு ஆர்ச்சியில் தேடலாம்.

குறிப்பு:அல்டாவிஸ்டா மூடப்படும் அறிவிப்பின் நினைவலையால இதனை எழுதியுள்ளேன். ஆர்ச்சி தேடியந்திரத்தை உருவாக்கியவர் பற்றி நான் ஏன் குறிப்பிடவில்லை என நீங்கள் நினக்கலாம். அதற்கு ஒரு காரணம் உள்ளது. ஆர்ச்சியை உருவாக்கியவர் பற்றிய பதிவில் அதை எதிர்பாருங்கள்.