Tag Archives: browse

இணையத்தில் உங்களுக்காக ஒரு அறை!

animation3_still_dhylzgஇணையத்தில் உங்களுக்கு என ஒரு அறை இருந்தால் எப்படி இருக்கும்? அந்த அறை உங்கள் இணைய உடமைகளையும், சேகரிப்புகளையும் கொண்டதாக இருக்கும். அந்த அறைக்கு நீங்கள் நண்பர்களையும் அழைக்கலாம். அது மட்டும் அல்ல, இணையத்தில் உங்களுக்கென உருவாகி இருக்கும் ஆளுமையை வெளிப்படுத்தும் வகையிலும் அந்த அறை இருக்கும்!.

இப்படி ஒரு அறை தேவை தான் என நீங்கள் நினைத்தால், மைவெப்ரூம் சேவை இதை சாத்தியமாக்குகிறது. இந்த இணைய கண்டறிதல் சேவை, வழக்கமான முறையில் இருந்து முற்றிலும் புதுமையான வழியில் உங்களுக்கு பிடித்தமான செய்திகளையும், வீடியோக்களையும், இணையதளங்களையும் அணுக வழி செய்கிறது. இந்த சேவையில் இருந்தே இணையத்தில் உலாவலாம். அப்போது எதிர்கொள்ளும் எல்லாவற்றையும் இந்த தளத்திலேயே சேமித்து வைக்கலாம். அதன் பிறகு எப்போது தேவையோ, அப்போது இவற்றை மீண்டும் அணுகலாம்.

இவை எல்லாவற்றையும், உங்களுக்காக என்று ஒரு இணைய அறையை உருவாக்கி கொள்வதன் மூலம் மேற்கொள்ளலாம். இந்த அனுபவம் காட்சிரீதியாக அமைந்திருக்கும்.

இணைய அனுபவம் என்பது பெரும்பாலும் பட்டியல்களையும், டைம்லைனையும் கொண்டதாக தான் இருக்கிறது. செய்திகள், கட்டுரைகள், ஒளிப்படங்கள், வீடியோக்கள் என உள்ளடக்கம் பலவிதமாக இருந்தாலும், அவற்றை அணுகுவது என்பது ஒரே மாதிரியான தட்டையான அனுபவமாக தானே இருக்கிறது. காட்சிரீதியான பலகையாக இருக்கும் பின்டிரெஸ்ட் மற்றும் ஒளிப்பட பகிர்வு சேவையான இன்ஸ்டாகிராம் போன்ற விதிவிலக்குகள் தவிர இணையத்தில் காட்சிரீதியான அனுபவத்திற்கு அதிக வழி இல்லை.

இந்த குறையை போக்கும் வகையில் தான் மைவெப்ரூம் சேவை அறிமுகமாகி இருக்கிறது.

இந்த தளத்தில் பயனாளிகள் தங்களுக்காக என்று ஒரு இணைய அறையை உருவாக்கி கொள்ளலாம். நிஜ வாழ்க்கையில் பார்க்க கூடிய வீட்டு அறை போலவே அது அமைந்திருக்கும். அந்த அறையில், டிவி, மேஜை விளக்கு, சோபா, கம்ப்யூட்டர் … என எல்லா பொருட்களும் இருக்கும். இவை எல்லாம் வெறும் பொருட்கள் அல்ல- உங்கள் இணைய உடமைகளின் வடிவங்கள் இவை!.

ஆம், இணையத்தில் உலாவும் போது கண்டறியும் செய்திகளையும், இணையதளங்களையும், வீடியோக்களையும் இந்த பொருட்களுக்குள் சேமித்து வைக்கலாம். உதாரணத்திற்கு வீடியோ கோப்புகளை எல்லாம் டிவியில் போட்டு வைக்கலாம், வாசிக்க வேண்டிய விஷயங்களை எல்லாம் புத்தக அலமாரியில் போட்டி வைக்கலாம். பதிவிறக்கம் செய்பவற்றை எல்லாம், கம்யூட்டருக்குள் போட்டு வைக்கலாம். பின்னர் தேவைப்படும் அவற்றுக்குறிய பொருட்களில் கிளிக் செய்து பயன்படுத்திக்கொள்ளலாம்.

ஆக, இந்த தளம் இணைய புக்மார்கிங் சேவை போன்றது. ஆனால், குறித்து வைக்கும் தளங்களை கோப்புகளாக அல்லாமல், நமக்கான இணைய அறையில் பொருட்கள் வடிவில் அணுகலாம்.
3029927-inline-i-1-webroom
எப்படி நமது வீடு அல்லது அலுவலக அறைக்குள் நுழைந்து அங்குள்ள பொருட்களை எல்லாம் பயன்படுத்துகிறோமோ அதே போலவே , மைவெப்ரூம் மூலம் இணைய சேவைகளையும், நமக்கான அறை மூலமே மேற்கொள்ளலாம். இந்த அனுபவம் உற்சாகம் தரக்கூடியதாகவும் இருக்கும். உதாரணத்திற்கு பொழுதுபோக்கு சங்கதிகளை எல்லாம் அறையில் உள்ள சோபாவில் இருந்து பயன்படுத்தலாம்.

இந்த சேவையை பயன்படுத்துவது எளிதானது. இமெயில் முகவரி அல்லது பேஸ்புக் அடையாளம் மூலம் பயனாளிகள் தங்களுக்கான அறையை உருவாக்கி கொள்ளலாம். ஆனால், அதன் பிறகு இந்த அறையின் வசதிகள் பழக கொஞ்சம் நேரம் பிடிக்கும். புதிய வீட்டுக்குள் நுழைந்தது போல பிரமிப்புக்கு நடுவே எந்த பொருட்கள், எந்த வசதிகள் எங்கே இருக்கின்றன என சற்று குழம்ப வைக்கும். ஆனால், கொஞ்சம் ஆர்வத்துடன் உலாவினால் சுவாரஸ்யத்தோடு அறை அளிக்கும் அனைத்து வசதிகளையும் அறிமுகம் செய்து கொள்ளலாம்.

அறையை உருவாக்கி கொண்டவுடன் அதில் பொருட்களில் ஒவ்வொன்றாக் கிளிக் செய்து, நமக்கான கோப்பை உருவாக்கி கொள்ளலாம். அதன் பிறகு, அந்த தலைப்பு தொடர்பான இணைய பக்கங்களை அணுகி நமக்கு பிடித்த பக்கங்களை சேமித்துக்கொள்ளலாம். இப்படி ஒவ்வொரு தலைப்பாக முன்னேறி நமக்கான அறையை அலங்கரிக்கச்செய்யலாம். அறையில் வடிவமைப்பையும் மாற்றிக்கொள்ளலாம். அதில் உள்ள பொருட்களையும் மாற்றிக்கொள்ளலாம்.

இணையத்தில் இருந்து தகவல்களை சேகரிக்க, இந்த தளம் பரிந்துரைக்கும் சேவைகள் தவிர நமக்கான புதிய இணையதளங்களையும் இணைத்துக்கொள்ளலாம். நமக்கான புதிய கோப்புகளையும் உருவாக்கி கொள்ளலாம். இணைய அறையை அலங்கரிக்கும் புதிய பொருட்களையும் கூட சேர்த்துக்கொள்ளலாம்.

பயனாளிகள் சேகரிக்கும் தகவல்களை பேஸ்புக் உள்ளிட்ட சமூக ஊடக சேவைகள் மூலம் பகிர்ந்து கொள்ளலாம். நண்பர்களை அறைக்கும் அழைக்கலாம். பேஸ்புக், டிவிட்டர் போலவே இந்த சேவையிலும் மற்ற பயனாளிகளை பின் தொடரலாம். நமது அறையையும் மற்றவர்கள் பின் தொடரலாம்.

ரஷ்யாவைச்சேர்ந்த ஆர்டெம் பெடாயே (Artem Fedyaev ) எனும் இளைஞர் தனது சகாவுடன் இணைந்து இந்த சேவையை உருவாக்கி இருக்கிறார். கல்லூரியில் படிக்கும் போதே இந்த தளத்திற்கான யோசனையை முன்வைத்து முதலீட்டாளர்களை கவர்ந்து, படிப்பை முடித்த பிறகு அமெரிக்காவுக்கு குடியேறி மைவெப்ரூம் சேவையை துவக்கியிருக்கிறார். இணையத்தில் புதுமையான அனுபவத்தை நாடுபவர்கள் இந்த சேவையை பயன்படுத்திப்பார்க்கலாம்.

இணைய அறையை உருவாக்க:http://www.mywebroom.com/

ஆவணப்படங்களுக்கான தேடல் தளங்கள்

topதிரைப்படங்களுக்கு என்று தனியே தேடியந்திரங்கள் இருப்பது போல டாக்குமண்ட்ரி என குறிப்பிடப்படும் ஆவணப்படங்களுக்காக என்றே தனியே தேடியந்திரங்கள் இருக்கின்றன. டாப்டாக்குமண்ட்ரிபிலிம்ஸ், டாக்குமண்டரிஹெவன்,டாக்குமண்ட்ரிஸ்டிராம், டாக்குமண்ட்ரிவயர் என ஆவணப்பட பிரியர்களை மகிழ்ச்சியில் ஆழ்த்தக்கூடிய அளவில் இந்த பட்டியல் நீள்கிறது.

ஆனால், தேடியந்திர அளவுக்கோளின் படி பார்த்தால் இவற்றை முழு வீச்சிலான தேடியந்திரங்கள் என்று வரையறுக்க முடியாது. இவை தேடல் வசதி கொண்ட இணையதளங்களாக இருக்கின்றன. இருப்பினும் முழுக்க முழுக்க ஆவணப்படங்களை மையமாக கொண்டு செயல்படுவதால் இவற்றின் மூலம் புதிய ஆவணப்படங்களை அணுகுவது எளிதானது.

பொதுவாக தேடியந்திரங்கள் இணையத்தில் துழாவி, இணைய பக்கங்களை அட்டவனையிட்டு அவற்றை தேடப்படும் குறிச்சொல்லுக்கு ஏற்ப பட்டியலிட்டு தருகின்றன. இதற்கு மாறாக ஆவணப்பட இணையதளங்கள் அவற்றை ஒரே இடத்தில் தொகுத்தளிக்கின்றன. இந்த தளங்கள் பட்டியலிடும் ஆவணப்படங்களை பெரும்பாலும், இணையத்தில் நீங்களே தேடிக்கொள்ளலாம். ஆனால் அதற்காக தனியே மெனக்கெடும் தேவை இல்லாமல் இவை ஆவணப்படங்களை தொகுத்து அளிக்கின்றன. எனினும் விஷயமறிந்தவர்களின் தேர்வு மற்றும் சக ஆவணப்பட ரசிகர்களின் பங்கேற்கு ஆகிய அம்சங்கள் இவற்றை ஆவணப்பட தேடலுக்கு நிகரில்லாதவையாக ஆக்குகின்றன.

டாப்டாக்குமண்ட்ரிபிலிம்ஸ்.காம் (http://topdocumentaryfilms.com/ ) இதற்கு நல்ல உதாரணம். இந்த தளம் ஆவணப்படங்களை அழகாக தேர்வு செய்து முன்வைக்கிறது. முகப்பு பக்கத்திலேயே ஆவணப்படங்களின் பட்டியலை பார்க்கலாம். ஒவ்வொரு படம் குறித்த சுருக்கமான அறிமுகத்துடன் அவற்றுக்கான இணைப்பு அளிக்கப்பட்டுள்ளது. எந்த தலைப்பில் ஆவணப்படம் தேவையோ அதற்கான குறிச்சொல்லை டைப் செய்து தேடலாம்.
இவைத்தவிர ஆவணப்படங்களை அவற்றின் வகைகளுக்கு ஏற்பவும் தேடலாம். சிறந்த ஆவணப்படங்களின் பட்டியலும் இருக்கிறது. தனிமனித முயற்சியாக துவங்கி, ரசிகர்களின் பங்களிப்போடு சிறப்பாக செயல்பட்டு வருகிறது இந்த தளம். பின்னூட்டங்கள் வாயிலாக, ஆவணப்படங்கள் தொடர்பான விவாத்த்திலும் ஈடுபடலாம்.

டாக்குமண்டரிஹெவன்.காம் (http://documentaryheaven.com/ ) தளமும் ஏறக்குறைய இதே விதமாக அமைந்திருக்கிறது. வழக்கமான பட்டியல் தவிர, அதிகம் பார்க்கப்பட்டவை, மற்றும் இப்போது பார்க்கப்படுவை எனும் தலைப்புகளிலும் ஆவணப்படங்கள் முன்வைக்கப்படுவது சுவாரஸ்யம் அளிக்கலாம்.

டாக்குமண்டரிஸ்டிராம்.காம் (http://documentarystorm.com/ ) புதிய படங்கள், அதிகம் பார்க்கப்படுபவை, அதிக வாக்குகள் பெற்றவை என தனித்தனி தலைப்புகளில் ஆவணப்படங்களை பட்டியலிடுகிறது. இவைத்தவிர போகிற போக்கில் தேர்வு செய்யப்பட்டு முன்வைக்கப்படும் பட்டியலும் உள்ளது. வகைகள் மற்றும் முன்னணி பட்டியல் மூலமும் தேடலாம்.

டாக்கும்னட்ரிவயர்.காம் ( http://www.documentarywire.com/) தளமும் இதே போன்ற அம்சங்களை கொண்டிருந்தாலும், இந்த தளத்தில் ரசிகர்களின் பங்கேற்பு மற்றும் அதற்கான அம்சங்கள் அதிகம் இருப்பதை உணரலாம். இதில் உறுப்பினராக சேர்ந்து கருத்துக்களை பகிர்ந்து கொண்டு உரையாடலில் ஈடுபடலாம். உறுப்பினர்களின் கருத்துக்கள் தனியே முன்னிறுத்துப்படுவதால், அவற்றை பின்பற்றியும் ஆவணப்படங்களை அணுகலாம். அதிகம் விரும்ப பட்ட மற்றும் அதிகம் விவாதிக்கப்பட்ட ஆவணப்படங்களின் பட்டியலையும் காணலாம்.

பிரிடாக்குமண்டரிஸ்.ஆர்க் ( https://freedocumentaries.org/) ஆவணப்படங்களை ஸ்டீரிமிங் முறையில் பார்க்க வழிசெய்கிறது.

டாக்குமண்டரி24.காம் (http://www.documentary24.com/ ) மிக எளிமையான வடிவமைப்புடன் வரவேற்கிறது. செய்திகளுக்கான பட்டியல் போல ஆவணப்படங்கள் பட்டியலிடப்பட்டிருப்பதால் அவற்றை எளிதாக தேர்வு செய்யலாம்.வரிசையாக பட்டியலை பார்க்கலாம். அல்லது மேலே உள்ள வகைகளில் கிளிக் செய்து அணுகலாம்.
டாக்குமண்டரிலாக்.காம் (http://www.documentary-log.com/ ) கொஞ்சம் சிக்கலான வடிவமைப்பு கொண்டிருந்தாலும், ஆசிரியர் குழு பரிந்துரை, அதிக பின்னூட்டங்கள் பெற்றவை என கூடுதல் அம்சங்களை கொண்டுள்ளது.
டாக்குமண்டரிடியூப்.காம் (http://www.documentarytube.com/ ) தளத்தையும் இந்த பட்டயலில் சேர்த்துக்கொள்ளலாம். ஆவணப்படங்கள் தொடர்பான செய்திகள் மட்டும் கட்டுரைகளையும் அளிப்பது இதன் சிறப்பம்சம்.
ஆவணப்பட உலகில் மூழ்கி திளைக்க விரும்புகிறவர்களுக்கும், புதிய ஆவணப்படங்களை கண்டு கொள்ள விரும்புகிறவர்களுக்கும் இந்த தளங்கள் உற்சாகம் அளிக்க கூடியவை!

———

குறிப்பு: தேடியந்திரங்கள் தொடர்பாக தமிழ் இந்து இணைய பதிப்பில் எழுதி வரும் ஆ’வலை’ வீசுவோம் தொடரின் நீட்சியாக இதை வாசித்தால் இன்னும் பயனுள்ளதாக இருக்கும்:http://bit.ly/2aFndTa

விளம்பரங்களை தடுக்கும் புதிய பிரவுசர்

braveஇணைய உலகில் மீண்டும் பிரவுசர் யுத்தம் உருவாக எந்த அளவு வாய்ப்பிருக்கிறது என்று தெரியவில்லை.இணையத்தில் நெட்ஸ்கேப் கோலோச்சிய காலத்தில் மைக்ரோசாப்ட் எக்ஸ்புளோரரை அறிமுகம் செய்ததால் பெரும் போட்டி ஏற்பட்ட நிலையில் இருந்து இணயய உலகம் வெகுவாக மாறிவிட்டது.பிரவுசர்களும் வெகுவாக முன்னேறி வந்துவிட்டன.

ஒற்றை பிரவுசர் ஆதிக்கம் செலுத்தும் சூழல் இப்போது இல்லை.இணையவாசிகள் தங்கள் தேவைக்கேற்ப தேர்வு செய்து கொள்ள நிறைய வாய்ப்பு இருக்கிறது.ஆனாலும் கூட,பிரவுசர்களின் போக்கை மாற்றி அமைக்ககூடிய கருத்தாக்கம் கொண்ட புதிய பிரவுசர்கள் அறிமுகமாகி கொண்டே இருக்கின்றன.

இந்த வகையில் புதிதாக பிரேவ் எனும் பெயரில் பிரவுசர் அறிமுகமாகியுள்ளது.கடந்த ஆண்டு அறிமுகமான விவால்டி புதிய பிரவுசரை விட, பிரேவ் பிரவுசர் அறிமுகமாகும் போதே அதிக கவனத்தையும்,விவாதத்தையும் ஏற்படுத்தியுள்ளது.இதற்கு இரண்டு முக்கிய காரணங்கள் இருக்கிறன. முதல் காரணம் பிரேவ் பிரவுசரின் பின்னே உள்ள நிறுவனர். இரண்டாவது காரணம் அதன் பின்னணியில் உள்ள கோட்பாடு.

பிரேவ் பிரவுசரை உருவாக்கியுள்ளவர் பிரெண்டன் ஐச் (Brendan Eich).இவர் வேறு யாருமில்லை.இணைய உலகின் பிரபலமான பிரவுசராக இருக்கும் பயர்பாக்சின் பின்னணியில் உள்ள மொசில்லா அமைப்பின் இணை நிறுவனர்.அது மட்டும் அல்ல பிரவுசர் செயல்பாடுகளுக்கு முக்கியமாக அமையும் ஜாவா ஸ்கிரிப்டை உருவாக்கியவர்.எதிர்பாராத சர்ச்சை காரணமாக மொசில்லா அமைப்பில் இருந்து விலக நேர்ந்த ஐச்,இப்போது பிரேவ் சாப்ட்வேர் எனும் நிறுவனத்தை உண்டாக்கி அதன் மூலம் அதே பெயரில் புதிய பிரவுசரை அறிமுகம் செய்துள்ளார்.

ஏற்கனவே உள்ள குரோமியம் பிரவுசர் அமைப்பை அடிப்படையாக கொண்டு ,இணையம் மற்றும் மொபைலில் செயல்படக்கூடிய இந்த பிரவுசர், விளம்பரங்களை தடுக்கும் தன்மையுடன் உருவாக்கப்பட்டுள்ளது என்பது தான் ஆதார பலமாக முன்வைக்கப்படுகிறது.இதன் காரணமாக இணையவாசிகள் விளம்பர ஊடுருவல் இன்றி இணையத்தில் உலாவலாம் என்பது மட்டும் அல்ல, இதுவே பிரவுசரின் செயல்பாட்டை மேலும் விரைவாக்கும் என்றும் சொல்லப்படுகிறது.விளம்பரங்கள் மட்டும் அல்ல இணையவாசிகள் செயல்பாடுகளை பின் தொடரும் குக்கி சாப்ட்வேர் பொறிகளையும் நீக்குகிறது.

விளம்பரங்கள் நீக்கப்படுவதால் இணையதளங்கள் வழக்கமான பிரவுசகளில் தோன்றுவதை விட 60 சதவீதம் விரைவாக தோன்ற வாய்ப்பிருப்பதாக ஐச் தெரிவித்திருக்கிறார்.

பிரவுசர் தொழில்நுட்பத்தில் பெரிய அளவில் புதுமை இல்லை என்றாலும் கூட,விளம்பரத்தை தடுக்கும் தன்மையே இதன் முக்கிய பலமாக அமைந்துள்ளது.இணைய உலகில் விளம்பரங்களை தடுக்கும் மென்பொருள்கள் இப்போது பிரபலமாக இருப்பதை நீங்கள் அறிந்திருக்கலாம்.இவை ஆட் பிளாக்கர்ஸ் என்று குறிப்பிடப்படுகின்றன. இவை இணையவாசிகளுக்கு விளம்பரங்களில் இருந்து விடுதலை அளித்தாலும்,இணையதள நிறுவனங்களுக்கான வருவாயை அடைக்கும் வழியாக அமைவதால் சர்ச்சைக்கும் இலக்காகி இருக்கின்றன.

இந்த பின்னணியில் விளம்பரங்களை தடுப்பதை மட்டுமே முக்கிய கருத்தாக்கமாக பிரேவ் பிரவுசர் கொண்டுள்ளது. பிரேவ் பிரவுசர் விளம்பரங்களை தடுப்பதுடன் நிற்கப்போவதில்லை. நீக்கப்படும் விளம்பரங்களை தனது சொந்த பதில் விளம்பரங்களால் பதிலீடு செய்யவும் திட்டமிட்டுள்ளது.

விளம்பரங்களுக்கு பதில் வேறு விளம்பரங்களா? அது என்ன நியாயம் என்று கேட்கலாம். பிரேவ் தரப்பில் இதற்கான நியாயம் முன்வைக்கப்படுகிறது. வழக்கமான விளம்பரங்கள் போல இந்த விளம்பரங்கள் ஊடுருவும் தன்மை கொண்டிருக்காது மற்றும் இணையவாசிகளை பின் தொடரும் தன்மை கொண்டிருக்காது எனும் விளக்கம் தான் அந்த நியாயம்! அதாவது பொதுவாக செய்யப்படுவது போல இணையவாசிகள் பற்றிய தனிப்பட்ட விவரங்கள் எதையும் சேகரிக்காத வகையில் புதிய விளம்பரங்கள் அமைந்திருக்கும்.

மாறாக இணையவாசிகளின் பயன்பாட்டு தன்மை அடிப்படையில் பொருத்தமான விளம்பரங்கள் தோன்றுமாறு செய்யப்படும்.பிரவுசர் செயல்பாட்டை மெதுவாக்கும் மற்றும் இணையவாசிகளின் அந்தரங்கத்தை ஊடுருவும் விளம்பரங்களுக்கு விடை கொடுத்து விட்டு,அதே நேரத்தில் புதிய விளம்பரங்கள் மூலம் கிடைக்கும் வருமானத்தை இணையதளங்களுடன் மற்றும் இணையவாசிகளுடன் பகிர்ந்து கொள்ளவும் திட்டமிடப்பட்டுள்ளது. ஆம்,இணையவாசிகளின் பயன்பாட்டிற்கு ஏற்ப அவர்களுக்கும் ஏதேனும் வித்ததில் பலன் அளிக்கப்படும்.இதற்கு முதல் கட்டமாக குறிப்பிட்ட அளவு பயனாளிகளை சென்றடையவும் இலக்கு நிர்ணயிக்கப்பட்டுள்ளது.

விளம்பர தடுப்பு சேவைகளில் வருவாய் இழப்பே பெரிய குறையாக இருக்கும் நிலையில், மாற்று விளம்பரங்கள் மற்றும் அனைத்து தரப்பினருடன் வருவாய் பகிர்வு ஆகிய அம்சங்களை கொண்டிருப்பதால் தான் பிரேவ் பிரவுசர் கவனத்தை ஈர்ப்பதாக இருக்கிறது.மேலும் என்கிரிப்ஷன் சார்ந்த செயல்பாடும் இதில் ஒருங்கிணைக்கப்பட்டுள்ளது. இதனால் இது மிகவும் பாதுகாப்பானதாகவும் கருதப்படுகிறது.

இவையே பிரவுசர் உலகில் புதிய போக்காக பிரேவ் அமையுமா என்ற எதிர்பார்ப்பையும் ஏற்படுத்தியிருக்கிறது.
நிற்க, பேஸ்புக் தரப்பிலும் அதன் செயலிக்கான புதிய பிரவுசர் ஒன்று சோதனை முறையில் உருவாக்கப்பட்டு வருவதாக செய்தி வெளியாகியுள்ளது. குறிப்பிட்ட சில பயனாளிகள் மத்தியில் பரிசோதித்து பார்க்கப்படும் இந்த பிரவுசர் பேஸ்புக் பக்கத்தில் இருந்து பயனாளிகள் வெளியேறாமலேயே இணையத்தில் உலாவ வழி செய்யும் வகையில் வடிமைக்கப்பட்டுள்ளதாக கூறப்படுகிறது.பயனாளிகள் இணையத்தை பயன்படுத்தினாலும் தன்னை விட்டு வெளியேறாமலொ இருக்க வேண்டும் என பேஸ்புக் விரும்புவதை இது காட்டுகிறது.

இந்த பிரவுசர் பொது பயன்பாட்டிற்கு வரும் வாய்ப்பு இருக்கிறதா? அப்படியே வந்தாலும் வெற்றி பெறுமா? வெற்றி பெற்றால் என்ன நிகழும்? போன்ற பல கேள்விகள் எழுகின்றன. விஷயம் என்ன என்றால் ஏதோ ஒரு வகையில் இணைய உலகில் மீண்டும் பிரவுசர்கள் முக்கியத்துவம் பெறுகின்றன என்பது தான். வர்ச்சுவல் ரியாலிட்டி எனப்படும் மெய்நிகர் தன்மை அடுத்த பெரிய தொழில்நுட்பமாக அமையும் என்று கூறப்படும் நிலையில் மெய்நிகர் தன்மை கொண்ட பிரவுசர் ஒன்றும் உருவாக்கப்பட்டு வருவதையும் நினைவில் கொள்வது பொருத்தமாக இருக்கும்.

பிரேவ் பிரவுசர் பற்றிய விவரம் அறிய:https://www.brave.com/

——

whatbrதளம் புதிது;பிரவுசர் அறிவோம்!

கூகுள் குரோம்,ஆப்பிள் சபாரி,ஓபரா, பயர்பாக்ஸ் என பலவகையான பிரவுசர்கள் இருப்பது போலவே பிரவுசர்களை அடிப்படையாக கொண்டு சில சுவாரஸ்யமான இணையதளங்களும் இருக்கின்றன. வாட்பிரவுசர் ( https://whatbrowser.org/) எனும் இணையதளம் நீங்கள் இப்போது பயன்படுத்திக்கொண்டிருக்கும் பிரவுசர் என்ன என்பதை உங்களுக்கு அடையாளம் காட்டுகிறது. எந்த பிரவுசரை பயன்படுத்துகிறோம் என்பது எல்லோருக்கும் தெரிந்திருக்குமே என்று நீங்கள் நினைக்கலாம். உண்மை தான்,எல்லா பயனாளிகளுமே தாங்கள் பயன்படுத்தும் பிரவுசரை அறியாமல் இருக்க முடியாது தான். ஆனால் பிரவுசர்கள் அடிக்கடி மேம்படுத்தப்பட்ட வரும் நிலையில் அவற்றில் பலவித வர்ஷன்கள் இருக்கலாம் அல்லவா? இந்த இணையதளம் ஒருவர் பயன்படுத்தும் பிரவுசர் எந்த வர்ஷனை சேர்ந்தது என்றும் சொல்கிறது. தேவை எனில் மாற்று பிரவுசர்களை பயன்படுத்தும் வாய்ப்பையும் பரிந்துரைக்கிறது. பிரவுசர் பற்றிய எளிய அறிமுகமும் இருக்கிறது.
பிரவுஸ் ஹாப்பி இணையதளம் (http://browsehappy.com/ ) அனைத்து வகையான பிரவுசர்களையும் பட்டியலிட்டிருப்பதுடன் அவற்றை சமீபத்திய வர்ஷனை டவுண்லோடு செய்து கொள்ளவும் வழி செய்கிறது. ஆக நீங்கள் பிரவுசரை அப்டேட் செய்ய விரும்பினால் இந்த தளத்திற்கு விஜயம் செய்தால் போதும் அதை எளிதாக நிறைவேற்றிக்கொள்ளலாம்.பிரவுசர்களின் வர்ஷன் விவரங்களையும் தெரிந்து கொள்ளலாம்.

mimicker_alarm_app_screenshots_2_ndtv
செயலி புதிது; அலாரம் செயலியில் மேலும் ஒரு புதுமை

ஸ்மார்ட்போன் பயனாளிகளை தூக்கத்தில் இருந்து எழுப்ப உதவும் அலாரம் செயலிகளுக்கு குறைவில்லை.இருந்தாலும் சின்ன சின்ன புதுமைகளுடன் புதிய அலாரம் செயலிகள் அறிமுகமாகி கொண்டு தான் இருக்கின்றன. இந்த வரிசையில் இப்போது மைக்ரோசாப்டும் தன் பங்கிற்கு ஒரு அலாரம் செயலியை அறிமுகம் செய்துள்ளது. பயிற்சி ஊழியர்களை ஊக்குவிக்கும் வகையில் மைக்ரோசாப்ட் செயல்படுத்தி வரும் மைக்ரோசாப்ட் கேரேஜ் திட்டத்தின் கீழ் , மிமிக்கர் அலாரம் உருவாக்கப்பட்டுள்ளது. ஆண்ட்ராய்டு போன்களுக்கான வடிவமைக்கப்பட்டுள்ள இந்த செயலி,விளையாட்டு அடிப்படையில் செயல்படுகிறது. அதாவது கண் விழிக்குமாறு இந்த செயலி குரல் கொடுத்த்தும் இதை நிறுத்த வேண்டும் என்றால் கேம் விளையாட வேண்டும். குறிப்பிட்ட போசில் சுயபடம் எடுப்பது,குறிப்பிட்ட வண்ணத்திலான பொருளை கண்டுபிடிப்பது உள்ளிட்ட மூன்று விதமான விளையாட்டுகள் இருக்கின்றன. இவற்றை வெற்றிகரமாக விளையாடி முடித்தால் மட்டுமே செயலி அமைதியாகும். இல்லை என்றால் மீண்டும் எச்சரிக்கை செய்யத்துவங்கும்.
வீடியோ கேமிற்கு பழக்கப்பட்ட தலைமுறையை தூக்கத்தில் இருந்து கண் விழிக்கச்செய்யவும் அதே முறையை பயன்படுத்த முயற்சிப்பது நல்ல உத்தி தான் இல்லையா?

தரவிறக்கம் செய்ய: https://play.google.com/store/apps/details?id=com.microsoft.mimickeralarm


1-plane
வீடியோ புதிது; ஜன்னல் ரகசியம்

விமானங்களை பார்த்திருப்பீர்கள். விமானங்களை கவனித்திருக்கிறீர்களா?ஆம் எனில், அதன் ஜன்னல்கள் வட்ட வடிவில் அமைந்திருப்பது ஏன் என்ற கேள்வி உங்கள் மனதில் எழுந்திருக்கலாம். இந்த கேள்விக்கு விடை அளிக்கும் வகையில் ரியல் இஞ்சினியரிங் யூடியூப் சேனல் வீடியோ ஒன்றை உருவாக்கியுள்ளது. இந்த வீடியோவில் விமான ஜன்னல்கள் வழக்கம் போல சதுரமாக இல்லாமல் வட்ட வடிவில் இருப்பதற்கான விஞ்ஞான பூர்வ காரணங்கள் எளிதாக புரியும் வகையில் சுவாரஸ்யமாக விளக்கப்பட்டுள்ளது.
விமானங்கள் வடிவமைக்கப்பட்ட ஆரம்ப காலங்களில் அதன் கேபின் பகுதி அழுத்தம் மற்றும் வெளிப்புற பகுதியின் அழுத்தம் இடையிலான வேறுபாட்டை சமாளிக்க சதுர வடிவிலான ஜன்னல்கள் இடையூறாக கருதப்பட்டன. இதன் விளைவே வட்ட வடிவிலான ஜன்னல்கள்.
மேலும் விரிவான விளக்கத்தை அறிய: https://www.youtube.com/channel/UCR1IuLEqb6UEA_zQ81kwXfg/feed



நன்றி; தமிழ் இந்துவில் எழுதியது