Tag Archives: chat

டிஜிட்டல் தலைமுறைக்கு தனித்திறன் உண்டா?

GettyImages-150007692டிஜிட்டல் உலகிலும் மண்ணின் மைந்தர்கள் உண்டு. இவர்கள் டிஜிட்டல் பூர்வகுடிகள் என குறிப்பிடப்படுகின்றனர். ஆங்கிலத்தில் டிஜிட்டல் நேட்டிவஸ்!. பொதுவாக 1980 களுக்கு பிறகு பிறந்த தற்கால தலைமுறையினர் அனைவரும் இந்த பிரிவின் கீழ் வருகின்றனர். அதற்கு முந்தைய தலைமுறையினர் எல்லோரும் டிஜிட்டல் குடியேறிவர்கள் என கருதப்படுகின்றனர். இதை பாகுபாடு என கொள்வதா அல்லது வகைப்படுத்தல் என கொள்வதா என்பது கேள்விக்குறியது தான்.

இணையம் தொழில்நுட்பங்களையும், டிஜிட்டல் கருவிகளையும், சேவைகளையும் வெகு இயல்பாக பயன்படுத்தும் திறன் அடிப்படையில் இந்த வகைப்படுத்தல் அமைகிறது. இப்போது பிறக்கும் குழந்தைகள் ஐபேட் சாதனத்துடனும், ஸ்மார்ட்போனுடனும் பிறப்பதாக நாமே கூட பல முறை வியப்பதுண்டு அல்லவா! இப்படி வியக்க வைக்கும் பிள்ளைகள் தான் டிஜிட்டல் பூர்வகுடிகள். டிஜிட்டல் உலகம் அவர்களின் தாய் வீடு போல. எனவே அவர்களால் கம்ப்யூட்டரையும், ஸ்மார்ட்போனையும், பேஸ்புக்கையும், வாட்ஸ் அப்பையும் தானாகவே பழகிக்கொள்ள முடியும். டிஜிட்டல் சங்கதி என்று வரும் போது அவர்கள் பெற்றோர்களுக்கு மட்டும் அல்ல ஆசிரியர்களுக்கே பாடம் நடத்தக்கூடியவர்களாக இருப்பதாகவும் சொல்லலாம்.

இப்படி கம்ப்யூட்டரும், இணையமும் அவர்கள் உடன் பிறந்த நுட்பங்களாக இருப்பதால் கம்ப்யூட்டர் யுகத்திற்கு பிறந்தவர்கள் எல்லாம் டிஜிட்டல் மைந்தர்களாக அறியப்படுகின்றனர். முந்தைய தலைமுறையினர் இணைய பயன்பாட்டில் என்ன தான் கில்லாடிகளாக இருந்தாலும், அவர்கள் டிஜிட்டல் நுணுக்கங்களை கற்றுக்கொண்டு புதிய யுகத்திற்கு ஏற்ப மாறியவர்களாக கருதப்படுவதால், டிஜிட்டல் உலகில் குடியேறிவர்களாக குறிப்பிடப்படுகின்றனர். அதாவது டிஜிட்டல் இமிகிரண்ட்ஸ்!.

இந்த வகைப்படுத்தல் எந்த அளவுக்கு சரி என்பது இருக்கட்டும், இக்கால தலைமுறை டிஜிட்டல் தலைமுறையாக கருதப்படுவது ஏற்றுக்கொள்ளப்பட்டதாகவே இருக்கிறது. இளம் பெண்களும், பையன்களும், கையில் போனை வைத்துக்கொண்டு குறுஞ்செய்தி தட்டச்சு செய்யும் வேகத்தையும், காதில் இயர்போனை மாட்டிக்கொண்டு தன்னை மறந்தவர்களாக உலாவுவதையும் பார்க்கும் போது இவர்கள் வேறு கிரகத்தில் இருந்து வந்தவர்கள் போல தான் தோன்றும். இந்த அளவுக்கு தொழில்நுட்ப உலகில் மூழ்கி விடுவது நமக்கெல்லாம் சாத்தியம் இல்லை என முந்தைய தலைமுறையினர் எண்ணலாம்.

ஆனால் விஷயம் என்னவெனில் இதெல்லாம் வெற்று மாயை என ஆய்வாளர்கள் தெரிவித்துள்ளனர் என்பது தான். அதாவது முந்தைய தலைமுறையோ, இந்த தலைமுறையோ தொழில்நுட்ப பயன்பாடு என்று வரும் போது, யாருக்கும் தனித்திறன் எல்லாம் கிடையாது எனத்தெரிவித்துள்ளனர். டிஜிட்டல் பூர்வகுடிகள் எனும் கருத்தாக்க பலூனை ஊசியால் குத்தி காற்றுப்போக வைத்திருக்கும் இந்த ஆய்வை பற்றி பார்ப்பதற்கு முன், அமெரிக்க கல்வியாளரான மார்க் பிரென்ஸ்கை பற்றி கொஞ்சம் தெரிந்து கொள்வது நல்லது. ஏனெனில் இவர் தான், டிஜிட்டல் பூர்வகுடிகள் எனும் கருத்தாக்கத்தை துவக்கி வைத்தவர்.

2001 ம் ஆண்டு அவர் எழுதிய கட்டுரை ஒன்றில் தான் டிஜிட்டல் பூர்வகுடிகள், டிஜிட்டல் குடியேறியேறிவர்கள் எனும் கருத்தாக்கத்தை முன்வைத்திருந்தார். கட்டுரையின் தலைப்பே ’டிஜிட்டல் பூர்வகுடிகள், டிஜிட்டல் குடியேறியேறிவர்கள்’ என அமைந்திருந்தது. அமெரிக்க கல்வித்தரத்தில் ஏற்பட்டுள்ளதாக சொல்லப்படும் வீழ்ச்சி பற்றிய விவாதத்துடன் துவங்கிய இந்த கட்டுரையில், இதற்கான மூலக்காரணம் நம்முடைய மாணவர்கள் எல்லாம் மிகவும் மாறிவிட்டனர், இன்றைய மாணவர்கள் நம்முடைய கல்வி அமைப்பு கற்றுத்தரக்கூடியவர்களாக இல்லை என குறிப்பிட்டிருந்தார்.

கல்வி அமைப்பில் தேவையான மாற்றத்தை தொடர்ந்து வலியுறுத்தியவர், இன்றைய மாணவர்கள் புதிய மாணவர்களாக இருக்கின்றனர், அவர்கள் கம்ப்யூட்டர், வீடியோகேம், இணையத்தின் மொழியை இயல்பாக பேசும் டிஜிட்டல் பூர்வகுடிகளாக இருக்கின்றனர் என்றும் குறிப்பிட்டிருந்தார். மற்றவர்கள் எல்லாம், அதாவது டிஜிட்டல் உலகில் பிறக்காமல் புதிய தொழில்நுட்பத்தின் அம்சங்களால் ஈர்க்கப்பட்டு அவற்றை கற்றுக்கொண்டவர்களாகவே இருப்பதால் அவர்களை டிஜிட்டல் குடியேறியவர்கள் என்றும் குறிப்பிட்டிருந்தார். கல்வியாளர்களும், வர்த்தக நிறுவனங்களும் பழைய வழிகளை தூக்கியெறிந்துவிட்டு, டிஜிட்டல் தலைமுறைக்கு ஏற்ற புதிய வழிகளை கடைப்பிடிக்க வேண்டும் என்றும் இந்த கட்டுரையில் வாதிட்டிருந்தார்.

இதன் பிறகு டிஜிட்டல் பூர்வகுடிகள் எனும் கருத்தாக்கம் மெல்ல வலுப்பெற்று பரவலாகி விட்டது. கம்ப்யூட்டர் சார்ந்த தொழில்நுட்பங்கள் நிறைந்த யுகத்தில் பிறந்து வளரும் தலைமுறை, டிஜிட்டல் நுட்பங்களை தாய்மொழி போல கற்றுக்கொண்டு விடுவதாகவும் கருதுவதும் பரவலாக ஏற்றுக்கொள்ளப்பட்டுள்ளது. இந்த கருத்தாக்கம் அறிவியல் சார்ந்தது அல்ல என்பது மட்டும் அல்ல, இடைப்பட்ட காலத்தில் பல ஆய்வுகள் இந்த கருத்தாக்கத்தை கேள்விக்குள்ளாக்கி இருக்கின்றன.

இந்த வரிசையில் தான் அண்மையில், நெதர்லாந்து ஆய்வாளர் பால் கிற்ச்னர் ( ) மற்றும் அவரது சகா பெட்ரோ டி புருக்கரே ( ) இணைந்து நடத்திய ஆய்வு அமைந்துள்ளது. ’டீச்சிங் அண்ட் டிச்சர் எஜுகேஷன்’ எனும் சஞ்சிகையில் வெளியாகியுள்ள இந்த ஆய்வு, டிஜிட்டல் பூர்வகுடிகள் என இக்கால தலைமுறையினரை கருதுவதே ஒரு மாயை என தெரிவிக்கிறது. உயர் கல்வியில் நுழையும் புதிய இளம் மாணவர் தலைமுறைக்கான எந்த ஆதாரமும் இல்லை என்றும், இணைய தலைமுறை மற்றும் டிஜிட்டல் பூர்வகுடிகள் என்று சொல்வதெல்லாம் இப்போது நிகழும் மாற்றத்தை பிரதிபலிப்பதாக இல்லை என்றும் தெரிவிக்கப்பட்டுள்ளது. இளம் தலைமுறையைச்சேர்ந்த பலரும், முந்தைய தலைமுறை ;போல தான் தொழிநுட்பத்தை பயன்படுத்துவதாகவும் ஆய்வு தெரிவிப்பதாக இது தொடர்பான நேச்சர் பத்திரிகை கட்டுரை சுட்டிக்காட்டுகிறது.

மக்களை வழக்கமான முறையில் கற்றுக்கொள்ளக்குடியவர்களாக தான் பார்க்க வேண்டுமேத்தவிர, ஒரு குறிப்பிட்ட பிரிவினரை விஷேச திறன் கொண்டவர்களாக பார்க்க முடியாது என்று ஆய்வை முன்னின்று நடத்திய பால் கிற்ச்னர் கூறியுள்ளார். அது மட்டும் அல்ல, இணைய தலைமுறை ஒரே நேரத்தில் பல வேலை பார்க்க கூடியவர்களாக இருப்பதாக கூறப்படுவதையும் இந்த ஆய்வு மறுத்துள்ளது. வகுப்பில் பாடம் கேட்டுக்கொண்டே, போனில் செய்தி அனுப்புவது ஒரே நேரத்தில் பலவற்றை செய்யும் மல்டிடாஸ்கிங் ஆற்றல் அல்ல, பாடத்தில் கவனம் செல்லாமல் இருப்பது என தெரிவிக்கப்பட்டுள்ளது.

டிஜிட்டல் யுகம் தொடர்பான பிரதான மாயை தகர்க்கும் வகையிலான இந்த ஆய்வு பலவிதங்களில் இது முக்கியமானது தான். ஏனெனில் டிஜிட்டல் பூர்வகுடிகள் என்று யாருமே கிடையாது என இந்த ஆய்வு தெரிவிக்கிறது. இந்த மாயை கலைவது நல்லது தான்.

இந்த இடத்தில், டிஜிட்டல் பூர்வகுடிகள் கருத்தாக்கத்தை முதலில் தெரிவித்த மார்க் பெர்ன்ஸ்கையை மீண்டும் நினைவில் கொள்ள வேண்டும். பெர்ன்ஸ்கை, இந்த கருத்தாக்கம் ஏற்படுத்திய விவாதங்களையும், சர்ச்சையையும் அறியாமல் இல்லை. எனவே தான் இந்த கருத்தாக்கத்திற்கு ஏற்கனவே விளக்கம் அளித்துள்ளார். டிஜிட்டல் பூர்வகுடி எனும் பதத்தை பலரும் தவறாக புரிந்து கொண்டுள்ளனர், நம்மைச்சுற்றி நடக்கும் மாற்றத்தை குறிப்பதற்கான உருவகமே இந்த பதம் என்றும் அவர் தெரிவித்துள்ளார். குறிப்பிட்ட காலத்திற்கு பிறகு பிறந்தவர்களுக்கு எல்லாம் தொழில்நுட்பம் பற்றி எல்லாம் தெரியும் எனும் அர்ததத்தில் இந்த பதம் அமையவில்லை என்றும் அவர் விளக்கம் அளித்திருந்தார். இந்த பதம் உண்மையில், தொழில்நுட்பம் தொடர்பான அணுகுமுறையை மட்டுமே குறிப்பதாகவும் தெரிவித்திருந்தார்.

அது மட்டும் அல்ல, இந்த பதத்திற்கு பதிலாக டிஜிட்டல் ஞானம் எனும் பதத்தை அவர் பயன்படுத்தி வருகிறார்.: http://marcprensky.com/digital-native/

 

 

தளம் புதிது: பிட்காயினால் என்ன பயன்?

எண்ம நாணயம், இணைய நாணயம் என்றெல்லாம் பலவிதமாக குறிப்பிடப்படும் மெய்நிகர் நாணயமான பிட்காயின் தொடர்பான ஆர்வம் பரவலாக அதிகரித்து வருவதோடு, அதன் மதிப்பும் அதிகரித்தபடி தான் இருக்கிறது. மையமில்லாத பணம், எதிர்கால பணம் போன்ற காரணங்களுக்காக பிட்காயினை ஆதரிப்பவர்கள் இருந்தாலும், பிட்காயினை ஒரு முதலீடாக பார்ப்பவர்களும் இருக்கின்றனர். அதற்கேற்பவே பிட்காயினுக்கு நிகரான மதிப்பும் எக்கச்சக்கமாக உயர்ந்திருக்கிறது.

சில ஆண்டுகளுக்கு முன் கொஞ்சம் போல பிட்காயினை வாங்கி வைத்திருந்தால் இன்று அதன் மதிப்பு எங்கோ போயிருக்கும் என்றும் சொல்லப்படுவதுண்டு. இப்படி பிட்காயின் மதிப்பு எங்கே போயிருக்கும் என்பதை உணர்த்துவதற்காக என்றே ஒரு இணையதளம் அமைக்கப்பட்டுள்ளது. வாட் இப் பிட்காயின் எனும் அந்த தளத்தில் 2011 ம் ஆண்டு முதல் பிட்காயினில் முதலீடு செய்திருந்தால் அதற்கு இப்போது என்ன மதிப்பு இருக்கும் என கணக்கிட்டு சொல்லப்படுகிறது.

பிட்காயின் மதிப்பை தெரிந்து கொள்ள இந்த இணையதளம் உதவலாம். ஆனால் இந்த தளத்தைப்பார்த்துவிட்டு பிட்காயினை வாங்க தீர்மானிப்பது எல்லாம் ரிஸ்கானதாக இருக்கும். ஏனெனில் பிட்காயினை ஒரு முதலீடாக கருதலாம் தப்பில்லை. ஆனால் எல்லா முதலீடுகள் போலவே அதுவும் ரிஸ்கானது தான் என்பதை உணர வேண்டும்.

இணைய முகவரி: http://whatifbitcoin.com

 

செயலி புதிது; ஒளிப்படங்களை மேம்படுத்தும் செயலி

ஸ்மார்ட்போன்களில் ஒளிப்படங்களை எடுக்கும் ஆர்வம் கொண்டவர்களுக்கு உதவக்கூடிய பல்வேறு காமிரா செயலிகள் இருக்கின்றன. இந்த வரிசையில் ஓபம் காமிரா செயலியையும் சேர்த்துக்கொள்ளலாம்.

ஒளிப்படக்காட்சிகளை அசைவுகள் இல்லாமல் தானாக நிலைப்படுத்துவது உள்பட பல்வேறு அம்சங்களை இந்த செயலி கொண்டிருக்கிறது. குரல் வழி மூலுமும் இதில் படம் எடுக்கலாம். சுயபடங்கள் எடுப்பதற்கான விஷேச வசதியும் இருக்கிறது.

படங்களின் கோப்பு அளவு சிறியதாக இருக்கும் என குறிப்பிடப்பட்டுள்ளது. வெளிப்புற மைக்ரோபோனை இணைக்கும் வசதியும் உள்ளது. படத்துடன் நாள் , நேரம் ஆகிய விவரங்களை சேர்ப்பதோடு, ஒளிப்பட குறிப்பையும் சேர்க்கலாம். பல வகையான காட்சி அமைப்பு மற்றும் வண்ணம் சேர்க்கும் வசதியும் உள்ளது.

மேலும் தகவல்களுக்கு: http://opencamera.org.uk/

1445887906366202

இணைய கற்காலத்தின் இனிய நினைவுகள்

பேஸ்புக்,டிவிட்டருக்கு முந்தைய இணையத்தை உங்களுக்கு நினைவிருக்கிறதா?இரண்டும் தான் உலகம் என நினைக்கும் ஸ்மார்ட்போன் தலைமுறையிடம் இந்த கேள்வியை,அந்த கால இணையம் எப்படி இருந்தது என்பதை அறிவீர்களா? என்று கேட்க வேண்டும்.

இணையத்தில் அந்த காலம் என்றால் எச்.டி.எம்.எல் யுகம்;கூகுள் தேடலுக்கு முந்தைய காலம்.பிரவுசர் என்றால் நெட்ஸ்கேப்பும்,இணையத்தில் உலாவுதல் என்றால் யாஹுவும் என இருந்த ஆண்டுகள்.இணைய சாமனியர்களின் சொந்த வீட்டுக்கனவை ஜியோசிட்டீஸ் நிறைவேற்றித்தந்த நாட்கள்.

இணையத்தின் ஆரம்ப கால அற்புதங்களின் நினைவு சின்னங்கள் இவை.இணைய பரிணாமத்தில் வலை 1.0 என குறிப்பிடப்படும் இந்த கால கட்டம் முடிந்து இப்போது வலை 2.0 அலை வீசிக்கொண்டிருக்கிறது.சமூக வலைததளங்களும் ,உள்ளங்கையில் இணையத்தை அணுகும் வசதியும் இதன் அடையாளமாக உருவாகியிருக்கின்றன.எல்லாவற்றுக்கும் ஒரு செயலி இருக்கிறது.இ-காமர்ஸ் கோலோச்சுகிறது.எதிர்காலத்தில் தொழில்நுட்பம் இன்னும் என்ன எல்லாமோ மாற்றங்களை கொண்டுவர இருக்கின்றன.

எதிர்கால அற்புதங்கள் பற்றிய மாநாடுகள் நடத்தப்படும் நிலையில்,இணையத்தின் அந்த காலத்தை திரும்பி பார்க்கும் வகையில் ஒரு மாநாடு நடந்து முடிந்திருக்கிறது.அமெரிக்காவைச்சேர்ந்த புரோகிராமர் கெய்லே டிரேக் மற்றும் சைபர் மானுடவியலாளரான ஆம்பர் கேஸ் இருவரும் இணைந்து இந்த இரண்டு நாள் மாநாட்டை வெற்றிகரமாக நடத்தியிருக்கின்றனர்.

வலை 1.0 மாநாடு, 2105 ( தி வெப் 1.0 கான்பிரன்ஸ் 2015) எனும் பெயரிலான இந்த மாநாட்டில் ஏராளமானோர் ஆர்வத்துடன் கலந்து கொண்டிருக்கின்றனர்.
இந்த மாநாட்டை இணைய பிளேஷ்பேக் என்றோ அல்லது அந்த கால நினைவுகளில் மூழ்கும் முயற்சி என்றோ அலட்சியமாக நினைத்துவிட வேண்டாம்.
1445887923610154
இணையத்தின் ஆரம்ப கால அற்புதங்களை எடுத்துரைத்து,அதற்கும் இன்றைய இணையத்திற்குமான வேறுபாடுகளையும் இந்த மாநாடு கவனத்தில் கொண்டு வந்ததுள்ளது.மாநாட்டுக்கு என்று அமைக்கப்பட்ட இணையதளமும் அந்த கால தன்மையுடனேயே அமைந்திருந்தது.இலவச இணையதளங்களை உருவாக்க வழி செய்த ஜியோசிட்டீஸ் இணையதளம் ( http://websiteconf.neocities.org/) போலவே அந்த தளம் அமைந்திருந்தது.
மாநாட்டில் இதே பாணியிலான இணையதளத்தை உருவாக்கும் முயற்சியிலும் பிரதிநிதிகள் ஈடுபட்டனர்.
இதற்கு என்ன அவசியம் என்று கேட்கலாம்?

ஆம்,இணையம் ஆரம்ப நாட்களில் இவ்விதமாக தான் இருந்தது.அதற்காக 3ஜியையும் கடந்து 4ஜி-5ஜி என பேசிக்கொண்டிருக்கும் காலத்தில் ஆமை வேக டயல் அப் இணைய யுகத்திற்கு திரும்ப முடியுமா?என கேட்கலாம்.
இல்லை,இது இணைய கற்காலத்திற்கு திரும்பச்சொல்லும் கோரிக்கை அல்ல;மாறாக நவீன இணையத்தில் எவை எல்லாம் தவறாக இருக்கின்றன என்பதை அந்த கால இணையத்தில் சரியாக இருந்தவை மூலம் சுட்டிக்காட்டுவதே இந்த மாநாட்டின் முக்கிய நோக்கமாக இருக்கிறது.

’இணையம் என்பதே மக்களை நுகர வைப்பதற்கான சதியாக மாறிவிட்டது’ என்கிறார் மாநாட்டு அமைப்பாளரான கெய்லே டிரேக்.அது மட்டும் அல்ல பிக் டேட்டா மற்றும் பிக் பிஸ்னஸ் ஆதிக்கம் செலுத்த கண்காணிப்பு யுகமும் கட்டவிழ்த்து விடப்பட்டிருப்பதை அவர் கவலையுடன் சுட்டிக்காட்டுகிறார்.
இணையத்தின் ஆரம்ப காலத்தில் இவ்வாறு இருக்கவில்லை என்பதோடு எல்லாவற்றிலும் ஒரு படைப்பூக்கமும்,புதுமையயும் இருந்தன என்கிறார்.இவற்றுக்கான அடையாளமாக தான் ஜியோசிட்டிஸ் கால இணையதளங்களை முன்வைக்கிறார்.

இந்த கால நவீன இணையதளங்களுடன் ஒப்பிடும் போது இவை தோற்றத்திலோ, உருவாக்கத்திலோ பல மடங்கு பின் தங்கியிருப்பவை.ஆனால் என்ன ,இவற்றின் உள்ளடக்கத்தில் இருந்த தனிநபர் படைப்பாற்றலும்,கற்பனைத்திறனும் இப்போது சாத்தியமாகிறதா என்ன?

தொழில்நுட்ப நோக்கில் இவை அதிக பின்புலம் இல்லாத நிலையான பக்கங்களை கொண்டவை. ஸ்டேட்டின் வெப் என குறிப்பிடப்படுகின்றன.இன்றைய பிராண்ட்பேண்ட் இணையத்தில் இருந்து திரும்பி பார்த்தால் இவை மாட்டுவண்டிகளுக்கான ஒரு வழிப்பாதை போல தோன்றலாம்.
ஆனாலும் என்ன, இணையத்தில் தாங்கள் நினைத்த வகையில் தங்களுக்கு என்று சொந்தமாக ஒரு வலைமனையை உருவாக்கி கொள்ள இவை வழி செய்தனவே. அதன் காரணமாகவே இவற்றில் தனிமனித படைப்பாக்கம் அதன் அப்பாவித்தனத்துடன் அழகாக வெளிப்பட்டனவே!

விக்கி மற்றும் சமூக வலைதளங்களின் எழுச்சி, இ-காமர்ஸ் அலை எல்லாம் சேர்ந்து அந்த கால இணையத்தை வெகுவாக பின்னுக்கு தள்ளிவிட்டதுடன், புதிய விதிகளையும் உருவாக்கி இருக்கின்றன.கண்காணிப்பு யுகத்திற்கும் வித்திட்டுள்ளன.

பலரும் இணையத்தின் ஆரம்ப காலத்தில் இருந்த படைப்பாற்றல் மற்றும் வெளிப்படுத்தும் தன்மையை இழந்துள்ளதாக உணர்கின்றனர், அவர்களுக்காக தான் இந்த மாநாடு என்கிறார் கெய்லே டிரேக்.
ஆரம்ப இணையத்தின் நல்ல விஷ்யங்களை மீண்டும் கொண்டு வர விரும்புகிறோம் என்று சொல்பவர் போர்ட்லாண்டில் மாநாட்டிற்கு கிடைத்த வரவேற்பின் தொடர்ச்சியாக மற்ற நகரங்களிலும் இருந்து அழைப்பு வந்திருக்கிறது என்கிறார்.

டிரேக் பற்றி மற்றொரு சுவாரஸ்யமான தகவல் ஜியோசிட்டீஸ் பாணியில் அந்த கால இணையதளங்களை உருவாக்கி கொள்ள வழி செய்யும் நியோசிட்டீஸ் ( Neocities ) தளத்தை அவர் நடத்தி வருகிறார்.
——–
productcamhead
செயலி புதிது; மின்வணிக செயலி

இ-காமர்ஸ் எனப்படும் மின்வணிக யுகத்தில் நீங்களும் பங்கேற்கலாம்- வாடிக்கையாளராக மட்டும் அல்ல;விற்பனையாளராகவும் தான்!.மின்வணிக தளங்கள் மூலம் அல்லது சமூக வலைதளங்கள் வாயிலாக உங்கள் தயாரிப்புகளை நீங்களே விற்பனை செய்யலாம்.நீங்கள் வடிவமைத்த ஆடைகள்,உருவாக்கிய பொருட்கள் என எதை வேண்டுமானாலும் விற்பனை செய்யலாம்.இதற்கு புகைப்படத்துடன் உங்கள் தயாரிப்பின் சிறப்பை விவரித்தாலே கூட போதுமானது.புகைப்படத்தை ஸ்மார்ட்போனிலேயே எடுத்துவிடலாம் தான்.ஆனால் மின்வணிக விற்பனைக்காக படம் எடுக்க சரியான முறை ஒன்று இருக்கிறது தெரியுமா? அதாவது, பின்னணி விவரங்கள் இல்லாமல் விற்பனை பொருள் மட்டுமே தெரியும் வகையில் படம் இருந்தால் நல்லது.அந்த பொருளை மட்டும் கத்திரித்து எடுத்து வெள்ளை காகிதத்தில் ஒட்டியது போல இருக்க வேண்டும். அப்போது தான் விற்பனை பொருள் பளிச்சென தெரியும்.காண்பவர்களையும் ஈர்க்கும்.

இத்தகைய படத்தை எடுப்பது எப்படி? என்று கவலைப்பட வேண்டாம்.அதற்காக என்றே பிராடக்ட் காமிரா (Product Camera ) செயலி அறிமுகமாகியுள்ளது.பின்னணி காட்சி இல்லாமல் விற்பனை பொருள் மட்டும் தோன்றும் வகையில் இந்த செயலி மூலம் புகைப்படத்தை கிளிக் செய்து கொள்ளலாம்.மின்வணிகத்திற்கு தான் என்றில்லை,நீங்கள் உருவாக்கிய படைப்புகளை,புதிதாக வாங்கிய பொருட்களை சமூக வலைத்தளங்களில் புகைப்படமாக பகிர்ந்து கொள்ளவும் இந்த செயலியை பயன்படுத்திக்கொள்ளலாம்.
ஆண்டாராய்டில் தரவிறக்கம் செய்ய: https://play.google.com/store/apps/details?id=com.productstudio.android

2
வீடியோ புதிது; எது அழகு?

அழகு என்பது காண்பவர் கண்களில் தான் இருக்கிறது என்று சொல்லப்பட்டால் தான் என்ன? பலருக்கு அழகு ஒரு பிரச்சனையாக தான் இருக்கிறது.சிலர் அழகாக இருப்பதை நினைத்து கர்வம் கொள்ளலாம்.சிலர் தாங்கள் அழகில்லாமல் இருப்பதாக நினைத்து கவலை கொள்ளலாம்.இப்படி அழகு பற்றி எப்படி நினைத்துக்கொண்டிருந்தாலும் சரி,தி ஸ்கூல் ஆப் லைப் உருவாக்கியுள்ள அழகு வீடியோவை அவசியம் பார்க்க வேண்டும்.கார்ட்டூன் சித்திரங்கள் மூலம் நகரும் இந்த வீடியோ அழகு பற்றிய பொதுவான அபிப்ராயங்களை அழகாக தகர்த்தெறிகிறது.அழகு என்பது தனிப்பட்டதல்ல என்றும் வாழ்க்கையில் ஜனநாயகத்தன்மை மிகவும் குறைவாக இருக்கும் அம்சங்களில் இதுவும் ஒன்று என்று கூறும் இந்த வீடியோ நல்ல தோற்றம் கொண்டிருப்பது லாட்டரி போன்றது என்றும் தெரிவிக்கிறது. இது தான் நானா?என்றெல்லாம் தோற்றத்தை நினைத்து கவலைப்பட வேண்டிய அவசியமில்லை என்றும் அழகு என்பது காலத்தால் மாறக்கூடியது என்றும் இந்த வீடியோ எடுத்துச்சொல்லி அழகை புதிய இடங்களில் தேடுங்கள் என ஊக்கம் அளிக்கிறது.

வீடியோவை காண: https://www.youtube.com/watch?v=DPiSFGrHCbE

தளம் புதிது; கருத்து கணிப்பு நடத்தலாம் வாங்க!
google-about-me

கருத்து கணிப்புகளை ஆய்வு நிறுவனங்கள் தான் நடத்த வேண்டுமா என்ன? நீங்கள் நினைத்தாலும் கருத்து கணிப்புகளை நடத்த முடியும் தான்.கேள்வி பதில் பாணியில் எளிதாக கருத்துக்கணிப்புகளை நடத்தி க்கொள்ள வழி செய்யும் இணையதளங்கள் பல இருப்பதை நீங்கள் அறிவீர்களா? இந்த பட்டியலில் இப்போது ரிடில் தளமும் சேர்ந்திருக்கிறது. மிக எளிதாக இணையவாசிகளுடன் தொடர்பு கொள்ளக்கூடிய உள்ளட்டக்கத்தை உருவாக்கி கொள்ள வாருங்கள் என அழைப்பு விடுக்கும் இந்த தளம்,கருத்து கணிப்புகள்,வினாடி வினா மற்றும் உங்களுக்கான பட்டியல்களையும் உருவாக்கி கொள்ள வழி செய்கிறது. இவ்வளவு ஏன் நீங்களே கூட ஆளுமை சோதனைக்கான கேள்விகளையும் உருவாக்கி கொள்ளலாம். வலைப்பதிவு மற்றும் சொந்தமாக இணையதளம் வைத்திருப்பவர்கள் தங்கள் வாசகர்களுடன் மேலும் சிறந்த முறையில் தொடர்பு கொள்ள இந்த சேவையை பயன்படுத்திக்கொள்ளலாம்.ஆசிரியர்களும் கூட மாணவர்கள் மத்தியில் சுவையான வினாடி வினாக்களை நடத்த பயன்படுத்திக்கொள்ளலாம்.

இணைய முகவரி: http://www.riddle.com/welcome

கூகுளில் உங்கள் விவரங்கள்

கூகுள் பயனாளிகளுக்காக புதிய வசதியை அறிமுகம் செய்திருக்கிறது.இது பயன்பாட்டில் நோக்கிலானது இல்லை என்றாலும் முக்கியமானது.பயனாளிகள் தங்களைப்பற்றிய விவரங்களை கட்டுப்படுத்தும் வசதியை கூகுள் அளிக்கிறது.
சமூக வலைத்தளங்களில் பதிவு செய்யும் போது நம்மைப்பற்றிய பல விஷயங்களை சமர்பிக்கிறோம்.பெயர்,இ-மெயில் முகவரி,இருப்பிடம்,செல்போன் எண் உள்ளிட்ட பல தகவல்கள் நம்மிடம் இருந்து கோரப்படலாம்.இந்த விவரங்கள் நம்முடைய சேவை பக்கத்தில் மட்டும் அல்லாது பொதுவிலும் இடம்பெற வாய்ப்பிருக்கிறது.பொதுவில் என்றால்,இணையத்தில் தேடப்படும் போது நம்முடைய பெயர் தொடர்பான விவரங்களில் இவையும் தோன்றுவதற்கான வாய்ப்பாகும்.
தனியுரிமை நோக்கில் இது அத்தனை பாதுகாப்பானது அல்ல; இந்நிலையில் கூகுள் அதன் பயனாளிகளுக்கு அவர்களைப்பற்றிய விவரங்களை கட்டுப்படுத்தும் வாய்ப்பை அளிக்கும் வகையில் புதிய வசதியை அறிமுகம் செய்துள்ளது. கூகுள் அபவுட் மீ (https://aboutme.google.com/ ) பக்கத்தில் நுழந்து இதை பயன்படுத்திக்கொள்ளலாம். இந்த பக்கத்தில் நுழைந்தால் கூகுள் சேவை மூலம் தெரிவிக்கப்பட்ட உங்களைப்பற்றிய தகவல்களில் எவை எல்லாம் பொதுவில் இருக்கின்றன என காண்பிக்கப்படுகிறது. அவற்றை நீங்கள் எடிட் செய்யலாம் அல்லது நீக்கலாம்.
இவை கூகுள் பிளஸ் விவரங்கள் தொடர்பானது என்றாலும் தனியிரிமை விழிப்புணர்வில் முதல் படியாக கருதலாம்.

நன்றி; தமிழ் இந்துவில் எழுதியது;

வீடியோ உரையாடலை எளிமையாக்கும் இணையதளம்

apவீடியோ கான்பிரசிங் என்பது இனியும் வர்த்தக நிறுவங்களுக்கானது மட்டும் அல்ல . இப்போது வீடியோ கான்பிரன்ஸ் வசதியை யார் வேண்டுமானாலும் பயன்படுத்தலாம் எனும் அளவுக்கு இந்த தொழில்நுட்பம் பரவலாகி இருக்கிறது. அது மட்டும் அல்ல, வீடியோ கான்பிரன்சிங் ஜனநாயகமயமாகியும் வருகிறது. இதன் சமீபத்திய அடையாளம் வீடியோவழி உரையாடலுக்கான எளிமையான சேவையான அப்பியர்.இன் (https://appear.in/ ) .
இணையத்தில் வீடியோ வழி உரையாடல் என்றதும் கூகிள் ஹாங்கவுட்ஸ் தான் நினைவுக்கு வரலாம். ஸ்கைப் வசதியை கூட பயன்படுத்திக்கொள்ளலாம். ஆனால் இந்த இரண்டையும் விட மிக எளிதான வீடியோ சேவையாக அப்பியர்.இன் அறிமுகமாகியிருக்கிறது. ஒரு கிளிக் வீடியோ சந்திப்பு சேவை என சுய வர்ணனை செய்து கொள்ளும் அப்பியர்.இன், மிக எளிதாக வீடியோ சந்திப்புகளை திட்டமிடவும், காட்சி உரையாடலில் ஈடுபடவும் வழி செய்கிறது.

எல்லாம் எளிது

அப்பியர்.இன் சேவையின் தனித்தன்மை என்ன என்றால், இதன் மூலம் உரையாட நீங்கள் எதையும் டவுண்லோடு செய்ய வேண்டியதில்லை, எதையும் இன்ஸ்டால் செய்ய வேண்டியதில்லை என்பது தான். இவ்வளவு ஏன், இந்த சேவையை பயன்படுத்த உறுப்பினராக பதிவு செய்து கொள்ளும் தேவையும் கிடையாது. உங்கள் வசம் வெப்கேம் மற்றும் மைக் இருந்தால் போதும் எடுத்த எடுப்பில் உரையாடலை துவங்கிவிடலாம். ஏனெனில் இந்த சேவை முழுக்க முழுக்க இணையவாசிகளின் பிரவுசரிலேயே செயல்படுகிறது. ஆக, பிரவுசரில் இருந்தே உரைடாலுக்கான இணைய அறையை உருவாக்கி கொண்டு விடலாம்.

இணைய அறையை உருவாக்குவது மிகவும் எளிதானது. இந்த தளத்தில் நுழைந்ததும் , அதன் மையப்பகுதியில் தேடல் கட்டம் ஒன்று வரவேற்கும். அந்த கட்டம் தான் இணைய அறைக்கான சாவி. அதில் உங்கள் பெயர் அல்லது நீங்கள் விரும்பும் பெயரை டைப் செய்தால் போதும் நீங்கள் வீடியோ உரையாடலில் ஈடுபடுவதற்கான அறை தயார். உங்களுக்கான அறை ஒரு பிரத்யேக இணைய முகவரியாக உருவாக்கி தரப்படும். யாருடன் உரையாட விருப்பமோ அவர்களுக்கு அந்த இணைய முகவரியை அனுப்பி வைக்க வேண்டும். இமெயில் வடிவில் அல்லது பேஸ்புக்கில் என எப்படி வேண்டுமானாலும் முகவரியை அனுப்பி வைக்கலாம். அவர்கள் இந்த முகவரியை தங்கள் பிரவுசரில் டைப் செய்ததும் வெப்கேம் வழியே உங்கள் வீடியோ அறையில் வந்து நிற்பார்கள். ஒரு பக்கத்தில் உங்கள் வெப்கேம் காட்சி .அருகிலேயே உங்கள் நண்பரும் வெப்கேமில் தோன்ற உரையாடலை துவங்க வேண்டியது தான். இவ்வாறு 8 நண்பர்கள் வரை உரையாடலுக்கு அழைக்கலாம். இதே போலவே உங்கள் நண்பர்கள் யாரேனும் அப்பியர்.இன் தளத்தில் வீடியோ அறையை உருவாக்கி இருந்தாலும் அதில் நீங்கள் நுழைந்து உரையாடலாம். வீடியோ உரையாடல் இந்த அளவுக்கு எளிதாகும் என்று எதிர்பார்த்திருக்க மாட்டீர்கள் இல்லையா?

நேரடி தொடர்பு

வெப் ஆர்டிசி தொழில்நுட்பத்தை பயன்படுத்தி இந்த சேவை உருவாக்கப்பட்டுள்ளது. சிக்கலான பிளாஷ் சாப்ட்வேர் பயன்பாடு இல்லாமல் பிரவுசர் மூலம் நேரடியாக சக நண்பர்களுடன் உரையாட இந்த நுட்பமே உதவுகிறது. இதில் உள்ள ஒரே குறை குரோம், பயர்பாக்ஸ் மற்றும் ஓபரா ஆகிய பிரவுசர்களில் மட்டுமே இதை பயன்படுத்த முடியும். இதில் உள்ள மற்றொரு குறை , வீடியோ அறைக்கான இணைய முகவரி தெரிந்தால் யார் வேண்டுமானாலும் உள்ளே நுழையலாம் என்பது தான். அறைகளுக்கான பாஸ்வேர்டு பூட்டு எல்லாம் கிடையாது. ஆனால் இதை தடுப்பதற்கும் எளிதான வழி இருக்கிறது. வீடியோ அறைக்கான பெயரை பதிவு செய்து கொள்ளலாம். இதன் மூலம் பதிவு செய்யாமால் பயன்படுத்தும் பறிபோனாலும் உங்களுக்கு என சொந்தமாக ஒரு வீடியோ

நேரடி விவாதங்களுக்கான இணையதளம்.

தொலைக்காட்சி நிகழ்ச்சிகளில் முக்கிய பிரமுகர்களும் அரசியல்வாதிகளும் குறிப்பிட்ட தலைப்புகள் குறித்து காரசாரமாக விவாதிப்பதை பார்க்கும் போது அந்த விவாதத்தின் கருத்துக்களால் ஈர்க்கப்படுவதோடு நம் பங்கிற்கும் சில கருத்துக்களை சொல்ல ஆர்வம் உண்டாகலாம்.ஆனால் தொலைக்காட்சி விவாதத்தில் சாமான்யர்கள் பங்கேற்பது எப்படி?

அந்த கவலையே வேண்டாம் ,இனி நீங்களும் நிபுணர்கள் போலவே விவாதம் நடத்தலாம்.அதற்காக என்றே டீயோன் தளம் உருவாக்கப்பட்டுள்ளது.

இணைய விவாத களம் என்று சொல்லப்படக்கூடிய இந்த தளம் எதை பற்றியும் விவாதிக்கலாம்,எவரோடும் விவாதிக்கலாம் என்று ஊக்கமளிக்கிறது.

சிந்தனை வேகமும் கருத்துக்களை பகிரும் ஆர்வமும் இருந்தால் போதும் எவரும் இந்த தளத்தின் மூலம் தங்களுக்கு நெருக்கமான தலைப்புகள் குறித்து விவாதம் நடத்தலாம்.

இணையத்தில் அரட்டை அடிக்கும் வசதி இருக்கிறது.சாட்ரவுலெட் வருகைக்கு பிறகு வீடியோ வழி அரட்டையும் புத்துயிர் பெற்றிருக்கிறது.சாட்ரவுலெட் அறிமுகம் இல்லாதவர்களோடு அரட்டை அடிக்க வழி செய்கிறது என்றால் ஏர்டைம் பேஸ்புக் நண்பர்களோடு உரையாடலில் ஈடுபட வைக்கிறது.

ஆனால் அரட்டை அடிப்பது என்பது வேறு கருத்து மோதலில் ஈடுபடுவது என்பது வேறு.ஒருவர் தீவிரமாக நம்பும் விஷயம் குறித்து இன்னொருவரோடு காரசாரமான விவாதத்தில் ஈடுபடுவது என்பது ஊக்கம் தரக்கூடியது தான்.

அலுவலத்திலோ வீட்டிலோ நண்பர்களோடு விவாதிக்கலாம் தான்.ஆனால் விவாதத்தில் ஒரு தொழில் முறை தன்மை இருந்தால் தானே சுவாரஸ்யமாக இருக்கும்.அதை தான் டீயோ தளம் வழங்குகிறது.

மற்றவர்களோடு நேரடி விவாதத்தில் ஈடுபட விரும்புகிறவர்கள் அதற்கான தலைப்பை குறிப்பிட்டு மற்றவர்களை விவாதத்திற்கு அழைக்கலாம்.இதற்காக என்றே விண்ணப்ப படிவம் போன்ற பகுதி இருக்கிறது.அதில் விவாதத்திற்கான கேள்வியையும் அதில் உங்கள் நிலையையும் குறிப்பிட்டு மறுத்தும் எதிர்த்தும் பேச தயாராக இருப்பவர்களை அழைக்கலாம்.

எந்த தலைப்பின் கீழும் விவாதிக்கலாம்.எந்த பொருள் குறித்தும் விவாதிக்கலாம்.கிரிக்கெட் போட்டி நடக்கும் காலம் என்றால் அது பற்றி விவாதிக்கலாம்.தேர்தல் என்றால் கட்சிகளின் வெற்றி தோல்வி பற்றி விவாதிக்கலாம்.சமீபத்தில் வெளியான திரைப்படம் பற்றி விவாதிக்கலாம்.

கொஞ்சம் சமூக அக்கறையோடு பிரச்சனைகள் அல்லது அறிவியல் போக்கு குறித்தும் விவாதிக்கலாம்.

விவாதங்களுக்கான தலைப்பிற்கு எல்லையே கிடையாது.எனினும் இணையவாசிகளின் வசதிக்காக பொருத்தமான தலைப்புகளை தேர்வு செய்ய விவாத அறைகள் ஏற்படுத்தப்பட்டுள்ளன.விளையாட்டு.பொடுதுபோக்கு,கலை,கல்வ,பாலினம்,குடும்பம்,சுற்றுச்சூழல் என்று பல்வேறு தலைப்புகளில் விவாத அறைகள் இருக்கின்றன.உறவு,தொழில்நுட்பம்,அரசியல் என்றும் இவை நீள்கின்றன.
இதற்கான வண்ண பெட்டிகளில் கிளிக் செய்தால் அந்த குறிப்பிட்ட துறைகள் தொடர்பான விவாதங்களில் பங்கேற்கலாம்.

விவாததிற்கு என்று ஒரு பொதுவான வடிவமும் கொடுக்கப்பட்டுள்ளது.விவாதிக்க விருபுகிறவர்கள் தங்களை பற்றி அறிமுகம் செய்து கொண்டு விவாதத்திற்கான கேள்வியையும் அதில் தங்கள் நிலையையும் தெரிவித்து விவாதிக்க தயாராகலாம்.விவாதத்திற்கான நேரத்தையும் குறிப்பிடலாம்.

விவாதிக்க ஆர்வம் உள்ள சக உறுப்பினர்கள் இதில் பங்கேற்று தங்கள் தரப்பு வாதத்தை எடுத்து வைக்கலாம்.

வீடியோ வசதி கொண்ட தளம் என்பதால் வெப்கேமை இயக்கி விட்டு தொலைக்காட்சி விவாதத்தில் பேசுவது போலவே உற்சாகமாக வாதிடலாம்.

தீவிர சிந்தனை போக்கு கொண்டவர்கள் தங்கள் மனதில் உள்ள கருத்த்துக்களையும் இங்கனம் உலகோடு பகிர்ந்து கொள்ளலாம்.

தளத்தில் இடம் பெறும் விவாதங்களையும் பார்த்து,கேட்டு ரசிக்கலாம்.அதோடு அந்த விவாதத்தின் கருத்துக்களுக்கு வாக்குகள் மூலம் ஆதரவோ எதிர்ப்போ தெரிவிக்கலாம்.டிவிட்டர் மூலமும் கருத்துக்களை பகிர்ந்து கொள்ளலாம்.எல்லா விவாதங்களிலும் இத்தகைய கருத்துக்களை காணலாம்.ஆக மூழு வீசிலான சமூக விவாத தளமாக இது வடிவமைக்கப்பட்டுள்ளது.

தொலைக்காட்சி விவாதங்களில் வெறுத்து போனவர்கள் மற்றும் சமூகத்தில் போதிய கருத்துக்கள் விவாதிக்கப்படவில்லை என நினைப்பவர்கள் இந்த களத்தை பயன்படுத்தி கொள்ளலாம்.

இணையதள முகவரி;http://deeyoon.com/

அசத்தலான புதிய வீடியோ சேவை ஏர்டைம்.


நேப்ஸ்டர் ஹீரோ ஷான் ஃபேனிங் இணையத்திற்கு திரும்பியிருக்கிறார்.அதுவும் எப்படி கைத்தட்டி வரவேற்க கூடிய வகையில் மகத்தான புதிய சேவையோடு வந்திருக்கிறார்.

பியர் டு பியர் என்று சொல்லப்படும் நண்பர்களிடையிலான பகிர்வு தொழில்நுட்பம் மூலம் இணையத்தில் பாடல்கள் பகிர்வதை எளிமையாக்கி இசைத்தட்டு நிறுவங்களை நடுங்க வைத்த ஃபேனிங்கின் நேப்ஸ்டர் பின்னர் காப்புரிமை வலையில் சிக்கி மூடப்பட்டது எல்லாம் பழைய கதை.

இணையத்தில் இசை பகிர்வுக்கான வாயிலை அகல திறந்து விட்ட ஃபேனிங் நீண்ட இடைவெளிக்கு பிறகு இப்போது ஏர்டைம் என்னும் புதிய சேவையை இணையவாசிகளுக்கு அறிமுகம் செய்திருக்கிறார்.

ஒரு வரியில் சொல்வதாயின் ஏர்டைம் பழைய‌ மற்றும் புதிய நண்பர்களுடன் வீடியோ மூலம் உரையாடுவதற்கான சேவை.இன்னொரு விதத்தில் சொல்வதாயின் வீடியோ வழி உரையாடலுக்கு புத்துணர்ச்சி தந்திருக்கும் சேவை.

ஏர்டைமின் அருமையை புரிந்து கொள்ள வேண்டும் என்றால் அதனை பயன்படுத்தி பார்க்க வேண்டும்.

வீடியோ முலம் உரையாடும் வசதி ஒன்றும் புதிதல்ல தான்.இணையத்தில் வெப்கேம் வழியே உரையாடலாம்.சாட்ரவுலெட் தளம் வழியே முன்பின் தெரியாதவர்களோடு உரையாடலாம்.வீடியோ கான்பிரன்சிங் மூலம் தொழில் முறையில் உரையாடலாம்.

ஆனால் ஏர்டைமோ இந்த உரையாடலில்களில் இல்லாத நட்புறவை மையமாக கொண்டிருக்கிறது.இதற்கு காரணம் இந்த சேவை பேஸ்புக்கை அடிப்படையாக கொண்டு செயல்படுகிறது.

ஷான் ஃபேனிங்கே கூட,இணைய உலகில் நீக்கமற நிறைந்திருக்கும் சேவையாக பேஸ்புக் உருவாகியிருக்கும் நிலையில் தான் இந்த சேவை சாத்தியாமாகியிருக்கிறது என்கிறார்.

ஆக பேஸ்புக்கின் சாவியை கொண்டே இந்த சேவையையும் பயன்படுத்த துவங்கலாம்.

அதாவது பேஸ்புக் கணக்கு மூலமே இந்த தளத்திலும் நுழையலாம்.நுழைந்த பிறகு தான் ஆச்சர்யமும் அற்புதமும் காத்திருக்கிறது.

அதற்கு முன்னர் தரமான வெப்கேம்,நேர்த்தியான மைக் மற்றும் பிளாஷ் வசதி ஆகியவற்றை உறுதி செய்து கொள்ளுங்கள்.காரணம் நீங்கள் வீடியோ உரையாடலில் ஈடுபட்டு முற்றிலும் புதிய உலகில் லயிக்கப்போகிறீர்கள்.

ஆம் ஏர்டைமில் நுழைந்த பிறகு வலது பக்கத்தில் உங்கள் பேஸ்புக் நண்பர்களின் பட்டியல் வந்து நிற்கிறது.அவர்களில் யாரை வேண்டுமானாலும் அழைத்து வீடியோ உரையாடலில் ஈடுபடலாம்.

எந்த நண்பரை உரையாடலுக்கு அழைக்கிறீர்களே அவர்களுக்கான செய்தியை டைப் செய்து அனுப்பும் வசதியும் இருக்கிறது.அவர்களும் இதற்கு பதில் அளிக்கலாம்.

நண்பர் உரையாடலுக்கு ரெடி என்றால் வீடியோ வழியே பேசத்துவங்கி விட‌லாம்.

மற்ற எந்த வீடியோ உரையாடல் களத்தையும் விட மிக அழகான மிக துல்லியமான தோற்றம் திரையில் தோன்றுகிறது.அதில் ஒரு பாதி உங்களின் வீடியோ தோற்றம் மறு பாதி உங்கள் நண்பரின் வீடியோ தோற்றம்.

உங்கள் நண்பரின் முகத்தையும் அவரது அங்க அசைவுகளையும் பார்த்து கொண்டே பேசலாம் .இதனால் நேரில் பார்த்து பேசுவது போலவே இருக்கும்.

அது மட்டும் அல்ல,இருவரும் என்ன பேசுவது என்பதை கூட தானாக தீர்மானித்து கொள்ளலாம்.

இதற்கு உதவும் வகையில் இருவரின் விருப்பங்கள்,பொது தன்மைகள்,படித்த புத்தகங்கள் பார்த்த வீடியோக்கள் போன்ற தகவல்கள் இருவரின் அறிமுக பக்கத்தில் சுட்டிக்காட்டப்படும்.அதனடிப்படையில் பேசுவதற்கும் பகிர்ந்து கொள்வதற்குமான விஷயங்கள் கிடைத்து கொண்டே இருக்கும்.

ஆக இது வெறும் வீடியோ உரையாடல் அல்ல.நட்பு செறிந்த உயிரோட்டமான உரையாடல்.

உரையாடலுக்கு அழைக்கும் நேரத்தில் நண்பர் இணையத்தில் இல்லை என்றால் வீடியோ செய்தியையும் அவருக்காக விட்டு செல்லலாம்.

சமீபத்தில் பார்த்த படம்,மனதை கவர்ந்த புத்தகம் ,நேற்று கேட்டு ரசித்த பாடல்.லேட்டஸ்ட் ரிங்டோன் என்று எத்த்னையோ விஷயங்கள் பற்றி பேசித்தீர்க்கலாம்.

இதே முறையில் புதிய நண்பர்களையும் தேடிக்கொள்ளலாம்.யாருடனாவது பேசுங்கள் என்னும் வசதி இதற்காகவே உருவாக்கப்பட்டுள்ளது.இதனை கிளிக் செய்தால் யாராவது ஒரு நபருடனான வீடியோ தொடர்பு ஏற்படுத்தி தரப்படுகிறது.அந்த நபரோடு பேசத்துவங்கலாம்.

அறிமுகம் இல்லாதவர் என்ற போதிலும் அவர் யாரோ ஒரு நபராக இருக்க மாட்டார்.அடுத்த சில நிமிடங்களிலேயே அவரை நீங்களும் உங்களை அவரும் அறிமுகம் செய்து கொண்டு பரஸ்பட்ம் ஆர்வம் உள்ள விஷயங்களை தெரிந்து கொண்டு பொதுவான ஆர்வத்தின் அடிப்படையில் நண்பர்களாகி விடலாம்.

அதவது இருவருக்கும் அறிமுகமான நண்பர் பரஸ்பரம் அறிமுகம் செய்து வைத்தது போல ஒருவித நட்புண‌ர்வோடு அறிமுகமாக இணக்கமாகலாம்.

புதிய நண்பர்களை தேர்வு செய்யும் போதே கூட இருவருக்கும் இடையிலான பொதுவான ரசனையை பரிசிலித்து பார்த்து கொள்ளலாம்.

பேஸ்புக் மூலம் அறிமுகமாகும் நண்பர்களோடு நெருக்கமாவதை விட இப்படி வீடியோ உரையாடலில் ஏற்படும் நட்பு நெருக்கமானதாக இருக்க வாய்ப்புள்ளது.

இந்த வீடியோ உரையாடல் வசதியை எப்படி வேண்டுமானாலும் பயன்படுத்தலாம்.ஒரே வீடியியோவை பார்த்து ரசித்து அது பற்றிய கருத்துக்களை பகிர்ந்து கொள்ள பயன்ப‌டுத்தலாம்.

விரைவில் குழு உரையாடல் மற்றும் நண்பர்கள் இசையை சேர்ந்து கேட்பது போன்ற வசதிகளும் அறிமுகம் செய்யப்பட உள்ளதாம்.அப்போது இந்த சேவை இன்னும் களை கட்டும்.

பேஸ்புக்கையும் வீடியோவையும் இணைத்து நட்பிலும் உற‌விலும் புதிய அத்யாயத்தை துவக்கி உள்ளது இந்த ஏர்டைம்.

இணையதள முகவரி;https://www.airtime.com/