Tag Archives: chat

என்னோடு பேச வாருங்கள்;அழைக்க ஒரு இணையதளம்

யாரேனும் என்னுடன் பேசத்தயாராக இருக்கிறீர்களா? இந்த கேள்விக்கான விடையை இணையம் மூலம் தேட விரும்புகிறவர்களுக்காக உருவாக்கப்பட்டுள்ள தளமாக ‘எனி ஒன் அவுட் தேர்’ தோன்றுகிறது.

இது ஒரு இணைய அரட்டை தளமாக இருக்க வேண்டும் என்று நீங்கள் நினைத்திருந்தால் உங்கள் யூகம் சரி தான்.இது இணைய அரட்டைக்கு வழி செய்யும் தளம் தான்!

அது மட்டும் அல்ல,சாட்ரவுலெட்டிற்கு பிறகு உதயமான இரண்டாம் அலை அரட்டை தளங்களில் ஒன்றாகவும் இதனை கருதலாம்.

சாட்ரவுலெட் இணைய அரட்டைக்கு மீண்டும் சுவாரஸ்யம் அளித்து மறுவாழ்வு தந்த தளம்.

முற்றிலும் அறிமுகம் இல்லாதவர்களோடு வெப்கேம் மூலம் உரையாடும் வசதியை ஏற்படுத்தி தந்ததோடு இப்படி உரையாடுபவர்களை தேர்வு செய்வதில் எந்த சுதந்திரமும் தராமல் ஒரு வித தற்செயல் தன்மையை அளித்ததே சாட்ரவுலெட்டின் தனிச்சிற‌ப்பு.இந்த எதிர்பாரா தன்மையே சாட்ரவுலெட்டை பரபரப்பாக பேச வைத்தது.

சாட்ரவுலெட்டின் வெற்றி அதே போன்ற மேலும் பல இணைய அரட்டை தளங்களுக்கு வித்திட்டது.எல்லாவற்றிலுமே அடிப்படையில் ஒரு வித தற்செயல் தன்மை இருப்பதாக கொள்ளலாம்.எல்லாமே ஏதாவது ஒரு வகையில் அறிமுகம் இல்லாதவர்களோடு உரையாட வழி செய்கின்ற‌ன.

ஆனால் எனி ஒன் அவுட் தேர் அரட்டை தளம் இவற்றில் இருந்து கொஞசம் மாறுபட்டு இருப்பது தான் சுவாரஸ்யம்.

யாராவது என்னோடு பேச தயாராக இருக்கிறீர்களா என கேட்டு அதற்கு சம்மதிக்கும் நபர்களோடு பேசுவதற்கான வாய்ப்பை ஏற்படுத்தி தருகிறது.ஆனால் யாரோ ஒருவரை பேச வைப்பதற்கு பதில் இந்த கேள்வியை கேட்பவர்களின் விருப்பத்திற்கேற்ற நபர்களை அறிமுகம் செய்து வைக்கிறது.

அதாவது உரையாட விரும்புகிறவர்கள் எந்த விஷயம் பற்றி பேச விரும்புகின்றனரோ அது பற்றி பேச தயாராக இருப்பவர்களை தேடித்தருகிறது.

அரட்டைக்கு ஏங்குபவர்கள் முதலில் தாங்கள் பேச விரும்பும் விஷயம் பற்றி குறிப்பிட வேண்டும்.இதற்காக என்றே டிவிட்டரில் குறும்பதிவுட இருப்பது போல ஒரு கட்டம் போல ஒரு கட்டம் இருக்கிறது.(ஆனால் அதிகபட்சம் 110 எழுத்துக்கள் தான்).அந்த கட்டத்தில் மனதில் உள்ள விருப்பத்தை குறிப்பிட வேண்டும்.

உடனே இந்த இணையதளம் அதில் உள்ள வார்த்தைகளை பிரித்து போட்டு அதன் பின்னே உள்ள விருப்பத்தை புரிந்து கொண்டு அதே எண்ணம் கொண்ட இணையவாசிகளை பரிந்துரைக்கிறது.

அந்த பரிந்துரையை ஏற்று உரையாடலை துவக்கலாம்.அல்லது இன்னும் பொருத்தமானவர் தேவை என்றால் கீவேர்டுகளை மாற்றி போட்டு தேடலாம்.இணையவாசிகளின் தேசங்களின் அடிப்படையிலும் தேர்வு செய்து கொள்ளலாம்.இல்லை என்றால் இணையவாசிகளின் அறிமுக பக்கத்தை பார்த்து அவர்களை பற்றிய தகவல்களின் அடிப்படையில் யாருடன் பேசுவது என தீர்மானிக்கலாம்.

தேடல் மிக்கவர்கள் என்றால் கேள்வி பதில் தளங்களில் செய்வது போல தாங்கள் பதில் தேட நினைக்கும் கேள்வியையும் கேட்கலாம்.சக உறுப்பினர்களில் அதற்கு பதில் தெரிந்தவர்கள் அதற்கு பதில் அளிக்க முன்வந்தால் அதனடிப்படையிலும் உரையாடலாம்.

உரையாடல் என்பதே ஒத்த கருத்தின் அடிப்படையில் உருவாவது என்னும் போது பேச நினைப்பவர்கள் அவர்கள் மனதில் உள்ள விஷயங்களுக்கேற்ற நபர்களோடு பேச வாய்ப்பு தரும் இந்த தளத்தை வரவேற்கலாம்.

எளிமையான‌ அடிப்படை கருத்தாக்கத்தை மீறி இந்த தளம் சிக்கலான கூடுதல் அம்சங்களை பெற்றுள்ளது.உறுப்பினர்கள் கேட்கும் கேள்விகளும் அதற்கான கருத்துக்களும் தொகுத்தளிக்கப்படுவதால் அவற்றை பார்த்து குறிப்பிட்ட உறுப்பினரின் தனமையை தெரிந்து கொண்டு அவரோடு உரையாட முற்படலாம்.

உரையாடல் அனுபவத்தின் அடிப்படையில் அவருக்கு சாதகமாக வாக்களித்து கருத்து தெரிவிக்கலாம்,இல்லை ஆட்சேபம் தெரிவித்து எதிர் வாக்களிக்கலாம்.எதிர் வாக்குகளுக்கு பயந்து உறுப்பினர்கள் மோசமாக நடந்து கொள்ளாமல் இருக்க இது உதவும் என எதிர்பார்க்கலாம்.

அதேபோல‌ உறுப்பினர்கள் கேட்டிருக்கும் கேள்விகளின் பட்டியல் தோன்றி கொண்டே இருக்கிறது.அதனை பார்த்து நீங்களும் கூட யாருடன் பேசலாம் என தீர்மானித்து கொள்ளலாம்.

இணையம் வழி உரையாடலுக்கும் அது தரும் சுவாரஸ்யத்திற்கும் (ஆபத்துக்களுக்கும்)தயாராக இருப்பவர்கள் பயன்படுத்தி பார்க்கலாம்.புதிய நட்பும் கிடைக்கலாம்.

இணையதள முகவரி;http://www.anybodyoutthere.com/

சாட்ரவுலெட் கல்யாணம்.

இணைய கல்யாணங்களில் இன்னொரு கல்யாணமும் சேர்ந்திருக்கிறது.இணைய அரட்டை சேவையான சாட்டர‌வுலெட் மூலம் சந்தித்த ஜோடி திருமணம் செய்து கொண்டிருக்கிறது.அதுவும் சாட்ரவுலெட் மூலம் கலயாணம் செய்து கொண்ட உலகின் முதல் ஜோடி என்ற பெருமையோடு!

சாட்ரவுலெட் மிகவும் சுவாரஸ்யமான ஆனால் கொஞ்சம் வில்லங்கமான சேவை.

வெப்கேம் வழியே அரட்டை அடிப்பதற்கு வழி செய்யும் சாட்ரவுலெட் இந்த தொடர்பை ஏற்படுத்தி தரும் விதம் தான் அதனை பிரபலமாக்கியது.மற்ற அரட்டை தளங்களில் இருந்து அதனை தனித்து நிறகவும் செய்தது.

பொதுவாக அரட்டை தளங்களில் யாருடன் அரட்டை அடிப்பது என்பதை உறுப்பினர்கள் தீர்மானித்து கொள்ள முடியும்.சாட்ரவுலெட்டில் அந்த கதை இல்லை.சாட்ரவுலெட்டில் யாருடன் அரட்டை போகிறோ, என்பது யாருக்குமே தெரியாது.இந்த தளத்தில் அரட்டைக்காக யாருடன் தொடர்பு கிடைக்கும் என்பது முற்றிலும் தற்செயலானது.

வெப்கேமும் கையுமாக இந்த தளத்தில் நுழைந்தால் சக உறுப்பினர்கள் யாரையாவது சந்திக்கலாம்.அவர்களோடு அரட்டை அடிக்கலாம்.யார் என்பது எந்த அடிப்படையும் இல்லாமல் சீட்டு குலுக்கி போடுவது போல தீர்மானிக்கப்படுவது தான்.எனவே யாரை வேண்டுமானாலும் சந்திக்க நேரலாம்.

சந்திக்கும் நபரை பிடிக்கவில்லை என்றால் அப்படியே கிளிக் செய்து அடுத்த நபரை சந்திக்கலாம்.அவரும் யாரோவாக தான் இருப்பார்.

யாரை சந்திக்க போகிறோம் என தெரியாமல் யாரையாவது சந்தித்து பேச முடிவதே இந்த தளத்தின் தனிச்சிறப்பாக கருதப்படுகிறது.உலகின் வெவேறு பகுதிகளை சேர்ந்தவர்களை சந்திக்கலாம் என்பதால் முற்றிலும் புதிய மனிதர்களை புதிய கலாச்சாரத்தை சேர்ந்தவர்களை அறிமுகம் செய்து கொள்ள வாய்ப்பிருப்பது இந்த தளத்தின் பலமாக கருதப்படுகிறது.

ஆனால் இந்த தற்செயல் தன்மை சுவாரஸ்யமானது எனறு மட்டும் சொல்லிவிட முடியாது.சில நேரங்களில் வில்லங்கமான மனிதர்களை சந்திக்க நேரலாம்.அவர்களில் செய‌ல்கள் அருவருக்க வைக்கலாம்.இந்த தளத்தில் வெப்கேம் விகாரங்களை வெளிப்படுத்தியவர்களும் இருக்கின்றனர்.

ஆனால் மன்ம் திறந்து பேசுபாவ‌ர்களையும் நெகிழ செய்யக்கூடியவ‌ர்களையும் சந்திக்கலாம் .பேசுவதற்கு யாராவது கிடைக்க மாட்டார்களா என்று ஏங்கித்தவிப்பாவர்களையும் எதிர் கொள்ளலாம்.சிரிக்க சிரிக்க பேசி ரசிக்க வைப்பவர்களையும் சந்திக்கலாம்.

இவையெல்லாம் சாட்ரவுலெட் மகிமைகள்.

ஆனால் இந்த தளம் வழியே காதல் மலர்ந்ததாக இது வரை எந்த தகவலும் இல்லை.இப்போது இந்த தளத்தில் சந்தித்து கண்டதும் காதல் கொண்டு கல்யாணமும் செய்து கொண்டுள்ள ஜோடி பற்றி சுவாரஸ்யமான கதை வெளீயாகியுள்ளது.

சாட்ரவுலெட்டின் முதல் காதல் கதை என்னும் அடைமொழியை பெற்றுள்ள இந்த காதல் கதை உணமையிலேயே வித்தியாசமமான‌து தான்.

இபடி சாட்ரவுலெட் மூலம் இணைந்திருக்கும் காதல் ஜோடி அமெரிக்காவை சேர்ந்த சியோபன் மற்றும் பிரிட்ட்னை சேர்ந்த அலெக்ஸ் ரோட்ஜர்ஸ்.

இந்த இருவருமே சாட்ரவுலெட் மூலம் சந்தித்த போது முதல் பார்வையிலேயே காதல் கொண்டு விட்டனராம்.அதுவும் எப்படி வெப்கேமை விட்டு பார்வையை எடுக்க முடியாத படி தொடர்ந்து ஆறு மணி நேரம் உரையாடி மகிழ்ந்துள்ளனர்.இரவில் ஆரம்பித்த உரையாடல் மறு நாள் விடியும் வரை தொடர்ந்திருக்கிறது.

முதலில் பார்த்ததுமே அவளது அழகில் விழுந்து விட்டேன் என்று அலெக்சும்,அவரை கண்டதும் பிடித்து போனது என்று சியோபனும் இந்த காதல் சந்திப்பு பற்றி மகிழ்ச்சியோடு குறிப்பிடுகின்றனர்.

இந்த காதல் உரையாடலுக்கு நடுவே எங்காவது தப்பித்தவறி அடுத்த பட்டனை கிளிக் செய்து தொடர்பை இழந்து விடப்போகிறோம் என்ற அச்சத்தில் தவித்தனராம்.இத‌னால் பரஸ்பரம் பேஸ்புக்கில் நண்பர்களாகி இருக்கின்றனர்.அதன் பிறகு ஸ்கைப்பிலும் பேஸ்புக்கிலுமாக காதல் வளர்ந்திருக்கிறது.

பின்னர் அலெக்ஸ் பிரிட்டனில் இருந்து அமெரிக்க பறந்து சென்று காதலியின் குடும்பத்தை சந்தித்து திருமணத்திற்கு சம்மதமும் பெற்றிருக்கிறார்.

கடந்த ஆக்ஸ்டு மாதம் திருமணம் நடைபெற்றது,இதற்கிடையே சியோபன் தான் பார்த்து கொண்டிருந்த வேலையை விட்டு விட்டு லண்டனுக்கு குடி பெயர்ந்து விட்டார்.

சாட்ரவுலெடில் சந்தித்து தம்பதிகளானது தங்கள் அதிர்ஷடம் என்று இருவரும் உற்சாக‌மாக சொல்கின்றனர்.

பேஸ்புக்கோ சாட்ரவுலெட்டோ எதுவுமே பயன்படுத்தும்க் விதத்தில் தான் இருக்கிறது அல்லவா?

இணையதள முகவரி;http://chatroulette.com/

—–

சாட்ரவுலெட் தொடர்பான மற்றொரு பதிவு.http://cybersimman.wordpress.com/2012/03/30/share-3/

———-
மேலும் ஒரு சாட்ரவுலெட் தொடர்பான பதிவு.http://cybersimman.wordpress.com/2010/10/02/twitter-78/

poly

பேசுங்கள்;புதிய மொழியை கற்று கொள்ளுங்கள்!

புதிதாக ஒரு மொழியை கற்று கொள்ள முற்படுபவர்களுக்கு கைகொடுக்கும் இணையதளங்களின் வரிசையில் பாலிஸ்பீக்ஸ் இணையதளமும் சேர்ந்திருக்கிறது.

ஆனால் பாலிஸ்பீகஸ் மொழி பாடம் எல்லாம் நடத்துவதில்லை.அதற்கு பதிலாக கற்று கொள்ள விரும்பும் மொழியில் பயிற்சி பெற உதவுகிற‌து.அதாவது எந்த மொழியை கற்க விரும்புகின்றனறோ அதே மொழியை பேசுபவருடன் இணைய உரையாடலில் ஈடுபட வழி செய்கிற‌து.

புதிதாக மொழியை கற்க முற்படும் போது அந்த மொழியை தாய்மொழியாக கொண்டவரோடு பேசிப்பார்ப்பதை விட சிறந்த வழி வேறு இருக்க முடியாது.

இத்தகைய சிறந்த வழியை தான் பாலிஸ்பீக்ஸ் தளம் உண்டாக்கி தருகிறது.

இந்த தளத்தில் உறுப்பினரானவுடன் எந்த மொழியில் பேச வேண்டும் என்று கேட்பது போல பல்வேறு மொழி பேசுபவர்களோடு தொடர்பு ஏற்படுத்தி தருகிற‌து.பயனாளிகள் தாங்கள் கற்க விரும்பும் மொழி பேசுபவரோடு இணையத்தில் உரையாட துவங்கி விடலாம்.

உதாரனத்திற்கு ஜப்பானிய மொழி கற்று கொள்பவர்கள் இந்த தளம் மூலம் ஜப்பானியரோடு அரட்டை அடித்து அந்த மொழியில் உள்ள பேச்சு நுணுக்கங்களை தெரிந்து கொள்ள‌‌ முற்படலாம்.

இதே போலவே வேற்று மொழி பேசுபவர்களோடு வீடியோ வழியே உரையாடும் வசதியை வெர்ப்லிங் தளம் தருகிறது.

ஆனால் பாலிஸ்பீக்ஸ் வீடியோ வசதி இல்லாமல் சாட் செய்வது போலவே இணைய உரையாடலில் ஈடுபட வைக்கிறது.புதிதாக ஒரு மொழியை கற்று கொள்ளும் நிலையில் பேசுவதை விட எழுத்து மூலம் உரையாடுவதே உகந்த‌தாக இருக்கும் என்று நினைத்து இந்த அரட்டை வசதியை தருவதாக பாலிஸ்பீகஸ் தளம் தெரிவிக்கிற‌து.

பேஸ்புக் கணக்கை கொண்டே இதில் உறுப்பினராகி வேற்று மொழி பேசுபவருடன் அரட்டையில் ஈடுபட்டு மொழியை வளர்த்து கொள்ளலாம்,நட்பையும் வளர்த்து கொள்ளலாம்.

ஒரு காலத்தில் சாட் என்று சொல்லப்படும் அரட்டை தளங்கள் இணையத்தில் கொடி கட்டி பறந்தன.அதன் பிறகு அரட்டை தளங்களின் செல்வாக்கு தேய்ந்து போய்விட்டன.

அதன் பிறகு சாட்ரவுலட் தளம் மீண்டும் அர‌ட்டை தளங்களுக்கு புதிய மவுசை தேடித்தந்தது.

இந்த நிலையில் அரட்டையை மொழி கற்பது உள்ளிட்ட பயனுள்ள வழிகளில் பயன்படுத்துவதற்கான வாய்ப்பை பாலிஸ்பீக்ஸ் போன்ற தளங்கள் ஏற்படுத்தி தருகின்ற‌ன.

இணையதள முகவரி;http://www.polyspeaks.com/

வெர்ப்லிங் பற்றிய எனது முந்தைய பதிவு இதோ;http://cybersimman.wordpress.com/2011/09/10/learning/

rediro

இணையதளங்களை அறிய புதுமையான வழி.

இணையம் ஒரு தகவல் பெருங்கடல்.அந்த கடல் முன் எப்போதாவது நீங்கள் திசை தெரியாமல் குழம்பி தவித்தது உண்டா?அதாவது இப்போது எந்த இணையதளத்தை நோக்கி செல்லலாம் என்று தெரியாமல் திகைத்து நிற்பது!

இந்த குழப்பமும் திகைப்பும் யாருக்கு வேண்டுமானாலும் ஏற்படலாம்.இணைய கத்துகுட்டிகளுக்கும் ஏற்படலாம்.இணையத்தின் மூளை முடுக்குகளை நன்கறிந்த இணைய கில்லாடிகளுக்கும் உண்டாகலாம்.

இத்தகைய ஒரு நிலை ஏற்படும் போது வழிகாட்டுவதற்காக என்றே ரெடிரோ இணையதளம் உருவாக்கப்பட்டுள்ளது.இப்போது எந்த தளத்தை காணலாம் என்னும் கேள்விக்கு இந்த தளமே முடிவு செய்து ஒரு புதிய இணையதளத்தை பரிந்துரைக்கிறது.

எந்த வகையை சேர்ந்தது என்றெல்லாம் பாராமல் சீட்டு குலுக்கி போடுவது போல இந்த தளம் ஏதாவது ஒரு புதிய இணையதளத்தை உத்தேசமாக தேர்வு செய்து அறிமுகம் செய்கிறது.இதன் முகப்பு பக்கத்தில் உள்ள’ கோ’ என்று கொடுக்கப்பட்டுள்ள பட்டனை கிளிக் செய்தால் போதும் ஏதாவது ஒரு தளத்திற்கு அழைத்து செல்கிறது.

இந்த தள்ம் வேண்டாம் என்றாள் இன்னொரு முறை கிளிக் செய்தால் வேறொரு புதிய இணையதளம் வந்து நிற்கிறது.தினமும் வருகை தந்தால் புதிய தளங்களை தெரிந்து கொள்ளலாம்.

புதிய இணையதளங்களை அறிமுகம் செய்து கொள்ள ஏற்கனவே எண்ணற்ற தளங்கள் இல்லாமல் இல்லை.யாஹூ காலத்தில் அறிமுகமான கூல் சைட்ஸ் இணையதளத்தில் துவங்கி பல தளங்கள் புதிய தளங்களை அடையாளம் காட்டி வருகின்றன.பிரபலமான செய்தி தளங்கள் மற்றும் வலைப்பதிவுகளில் இதற்கென தனிப்பகுதியும் இருக்கின்றன.

உதாரணத்திற்கு பிபிசி தலத்தில் வெப்ஸ்கேப் பகுதி புதிய தளங்களை அறிமுகம் செய்கிறது.மேக் யூஸ் ஆப் வலைப்பதிவு தினந்தோறும் கூல் சைட்ஸ் என்ற பெயரில் புதிய தளங்களை அறிமுக செய்கிறது.இந்தியாவின் மும்பை மிரர் நாளிதழின் தொழிநுட்ப பகுதியில் புதிய தளங்கள் தொகுத்தளிக்கப்டுகிறது.

ஆனால் இவற்றில் எல்லாம் ஒவ்வொரு தளமாக பார்வையிட்டு உங்கள் விருப்பத்திற்கேற்ற தளத்தை தேர்வு செய்ய வேண்டும்.அந்த தளம் உங்கள் எதிர்பார்ப்பை நிறைவேற்றலாம்.இல்லை ஏமாற்றத்தை தரலாம்.ஏமாற்றம் ஏற்பட்டால் வேறு சில தளங்களை பார்வையிட வேண்டும்.

இதற்கு மாறாக தோராயமாக தேர்வு செய்யப்பட்டு முன வைக்கப்படும் இணையதளத்தை பார்வையிட முடிவது சுவாரஸ்யமானது தானே.இதில் உள்ள ஒரு புதிர் தன்மை ஏற்படுத்தும் ஆர்வமும் அதன் பிறகு பயனுள்ள தளத்தை பார்க்க நேர்ந்தால் ஒருவித திருப்தியும் உண்டாகத்தானே செய்யும்.அதைதான் இந்த தளம் சாத்தியமாக்குகிறது.

ரெடிரோவை பற்றி படிக்கும் போதே சாட்ரவுலட் தளம் பற்றியும் நினைவுக்கு வரலாம்.இணைய அரட்டை அதன் புதுமையையும் சுவாரஸ்யத்தையும் இழந்து அலுப்பை த்ந்து கொண்டிருந்த நிலையில் அதை தலைகிழாக பிரட்டிப்போடுவது போல வந்து சேர்ந்த சாட்ரவுலட் இணைய அரட்டையில் மீண்டும் சுவாரஸ்யத்தை உயிர் பெற வைத்தது.

ரவுலட் சூதாட்ட விளையாட்டு பாணியில் முன் பின் அறிமுகம் இல்லா யாரோ ஒருவரோடு வெப்கேம் மூலம் அரட்டை அடிக்க உதவுவதே இந்த தளத்தின் தனிச்சிறப்பு.யாருடன் அரட்டை அடிப்பது என நாம் முடிவு செய்ய வேண்டாம்.நல்லவர் ,வல்லவர் என்றெல்லாம் பார்த்து தேர்வு செய்ய வேண்டாம்.ஒவ்வொரு முறையும் யார்வது ஒருவரை சாட்ரவுலட்டே பரிந்துரை செய்யும்.

இணையய்தள அறிமுகத்திலும் இதே தன்மையை ரெடொரோ கொண்டு வந்துள்ளது.

இதில் உள்ள ஒரு புதிர் தன்மை ஏற்படுத்தும் ஆர்வமும் அதன் பிறகு பயனுள்ள தளத்தை பார்க்க நேர்ந்தால் ஒருவித திருப்தியும் உண்டாகத்தானே செய்யும்.அதைதான் இந்த தளம் சாத்தியமாக்குகிறது.

இதுவரை 70 தளங்கள் இந்த பட்டியலில் இடம் பெற்றுள்ளன.இவற்றில் இருந்து ஒவ்வொரு முறையும் ஒரு தளம் முன் வைக்கப்படுகிறது.இந்த பட்டியலில் இடம் பெறக்கூடிய புதிய தளங்களை இணையவாசிகளும் பரிந்துரை செய்யலாம்.

இணையதள முகவரி;http://www.rediro.com/