Tag Archives: doctor

இவர் ஸ்னேப்சாட் டாக்டர்!

6jq3pYgaசமூக ஊடக பயன்பாட்டிற்கான உதாரணங்கள் என்று வரும் போது பொதுவாக பிரபலங்களும், நட்சத்திரங்களும் தான் முதலில் நினைவுக்கு வருவார்கள். ஆனால் சமூக ஊடக பயன்பாட்டில் முன்னுதாரணமாக விளங்கும் பேராசிரியர்களும், டாக்டர்களும் கூட இருக்கின்றனர். இந்த பட்டியலில் இப்போது சமீபத்தில் அமெரிக்க டாக்டர் ஒருவரும் இணைந்திருக்கிறார்.

அமெரிக்காவின் நியூயார்க் நகரைச்சேர்ந்த பல் மருத்துவரான டேனியல் ரூபின்ஷ்டியன் (Daniel Rubinshtein) எனும் அந்த டாக்டர் ஸ்னேப்சாட் சேவை மூலம் தனக்கான பாலோயர்களை தேடிக்கொண்டிருக்கிறார். அவர் தனது நோயாளிகளுடன் தொடர்பு கொள்ள ஸ்னேப்சாட் சேவையை பயன்படுத்தும் விதம் குறித்து வியந்து பாராட்டும் கட்டுரை ஒன்றை இணைய இதழான தி வெர்ஜ் வெளியிட்டுள்ளது.

மருத்துவர் ஒருவர் ஸ்னேப்சாட்டை பயன்படுத்துவதே ஆச்சர்யமானது எனும் போது அதை ரூபின்ஷ்டியன் பயன்படுத்தி வரும் விதம் இன்னும் கூட ஆச்சர்யமானது.
ஸ்னேப்சாட் சேவை பற்றி நீங்கள் அறிந்திருக்கலாம். வாட்ஸ் அப், ஹைக் போல இதுவும் ஒரு மெசேஜிங் சேவை தான். ஆனால் அடிப்படையில் மாறுபட்டது.

சுவாரஸ்யமான மெசேஜிங் சேவை என்று வர்ணிக்கப்படும் ஸ்னேப்சாட் சேவையில் தகவல்களை புகைப்படமாகவும், வீடியோவாகவும் பகிர்ந்து கொள்ளலாம். எந்த வகை பகிர்வாக இருந்தாலும் அவை பத்து நொடிகள் மட்டுமே பார்வையில் இருக்கும். அதன் பிறகு தானாக மறைந்துவிடும். இப்படி பார்த்தவுடன் மறைந்துவிடும் தன்மையே ஸ்னேப்சாட்டின் ஆதார பலம். இதன் காரணமாகவே அந்த சேவை பதின் பருவத்தினர் மற்றும் இளம் வயதினர் மத்தியில் மிகவும் பிரபலமாக இருக்கிறது.

இளம் வயதினரை கவரும் சேவையாக இருந்தாலும் ஸ்னேப்சாட் வெறும் சுவார்ஸ்யமான தகவல் பரிமாற்றத்திற்காக மட்டும் அல்லாமல் செய்தி வெளியீடு, கதை சொல்லல், மார்க்கெட்டிங் என பலவிதங்களில் பயன்படுத்தப்படுகிறது. ஸ்னேப்சாட் மூலம் தகவல்களை பகிர்ந்து கொள்ளலாம், பாலோயர்களை தேடிக்கொள்ளலாம் போன்ற அம்சங்களை பலதுறையினரும் தங்களுக்கு ஆதராவாக பயன்படுத்திக்கொண்டு வருகின்றனர். அதிலும் குறிப்பாக அதன் பின்னே இருக்கும் இளைஞர் சமூகத்தை தொடர்பு கொள்ள இது சிறந்த வழியாகவும் கருதப்படுகிறது.

இதை உணர்ந்தவராக டாக்டர். ரூபின்ஷ்டியனும் இருக்கிறார்.

ரூபின்ஷ்டியன் சமூக ஊடகங்களின் ஆற்றம் மற்றும் அருமையை நன்கு உணர்ந்தவராகவே இருக்கிறார். அவருக்கு என சொந்த இணையதளம் இருப்பதுடன் டிவிட்டர், இண்ஸ்டாகிராம் மற்றும் ஸ்னேன்சாட் உள்ளிட்ட சேவைகளில் தனக்கான பக்கங்களையும் துவக்கி வைத்திருக்கிறார்.

இவற்றில் ஸ்னேப்சாட் சேவையை சிறப்பாக பயன்படுத்தி வருகிறார். ஸ்னேப்சாட்டில் தனக்கான பாலோயர்களை பெறுவதற்காக அவர் டிவிட்டர் குறும்பதிவுகள் மூலம் அவ்வப்போது கோரிக்கையும் வைத்து வருகிறார். நீங்கள் என்னை பின் தொடர்ந்தால் நானும் உங்களை பதிலுக்கு பின் தொடர்வேன் என்றும் உறுதி அளிக்கிறார். இதை ஏற்றுக்கொண்டு, வருபவர்களை கவர்வதற்காக என்று ஸ்னேப்சாட்டில் பல்மருத்துவ சிகிச்சை தொடர்பான வீடியோக்களை வெளியிட்டு, அதன் மூலமே நோயாளிகள் கேள்விகளுக்கும் பதில் அளிக்கிறார். இந்த பதிவுகள் மூலம் அவர் தன்னைப்பற்றியும் தனது சிகிச்சை முறைகள் பற்றியும் நோயாளிகளுடன் பகிர்ந்து கொண்டு வருகிறார். அவரை பின் தொடரும் நோயாளிகளுக்கு அவரது மருத்துவ அலுவலக சூழலும், சிகிச்சைகளும் அத்துபடியாகின்றன. இதன் மூலம் அவர் தனது நோயாளிகளுடன் நெருக்கமான தொடர்பை ஏற்படுத்திக்கொள்கிறார்.

ரூபின்ஷ்டியன் வெளியிடும் வீடியோக்கள் வழக்கமான யூடியூப் வீடியோக்கள் அல்ல: ஆறு நொடிகள் மட்டுமே ஓடக்கூடிய புதுமையான் வைன் வீடியோ சேவையை இதற்காக அவர் பயன்படுத்தி வருகிறார். பொதுவாக கேளிக்கை வீடியோக்களை பகிர பயன்படும் இந்த சேவையை அவர் மருத்துவ விளக்கத்திற்காக பயன்படுத்தி வருகிறார்.

இதுவும் ஒரு மார்க்கெட்டிங் முயற்சி தானே என நினைக்கலாம். ரூபின்ஷ்டியன் இத்தகைய சமூக ஊடக வெளிப்பாடு மூலம் தனக்கான நோயாளிகளை தேடிக்கொள்கிறார் என்றாலும் அவரது பிரதான நோக்கம் நோயாளிகளுடன் தொடர்பு கொள்வதாகவே இருக்கிறது. “ நம்பினால் நம்புங்கள், இந்த காலத்திலும் கூட பல் மருத்துவரிடம் வருவதற்கு பயந்து நடுங்குபவர்கள் இருக்கின்றனர்” என்று தி வெர்ஜ் இதழுக்கான பேட்டியில் கூறியிருக்கிறார் டாக்டர்.ரூபின்ஷ்டியன். டாக்டர் கிளினிக்கை கண்டு அஞ்சும் நோயாளிகளிகளை ஸ்னேப்சாட் மூலம் சந்தித்து பேசுவது இந்த பயத்தை போக்க உதவுகிறது என்று தனது சமூக ஊடக பயன்பாடு பற்றியும் அவர் விளக்கம் அளித்திருக்கிறார்.

ஸ்னேப்சாட் போன்ற சேவைகள் மூலம் தொடர்பு கொள்வது மருத்துவ சிகிச்சை தொடர்பாக நோயாளிகள் மனதில் உள்ள தயக்கங்கள் மற்றும் அச்சங்களை போக்க வழி செய்கிறது என்கிறார் அவர். அதனால் தான் நேரில் ஆலோசனை வழங்குவதோடு ஸ்னேப்சாட் உரையாடல் மூலமும் கேள்விகளுக்கு பதில் அளித்து வருகிறார். ஸ்னேப்சாட் வாயிலாக கேட்கப்படும் சந்தேகங்களுக்கு பொறுப்பாக பதில் அளித்து வருகிறார். தனது டிவிட்டர் மற்றும் இன்ஸ்டாகிராம் பக்கங்கள் வாயிலாகவும் இந்த தகவலை பகிர்ந்து கொண்டு பரவலாக மக்களை சென்றடைய முயன்று வரும் புதுயுக டாக்டராக இருக்கிறார்.

மக்கள் தன்னை ஒரு பல் மருத்துவராக மட்டும் அல்லாமல், பல் சிகிச்சை அளிக்க கூடிய சக மனிதராக பார்க்க வேண்டும் என்பதே தமது விருப்பம் என்றும் அவர் கூறியிருக்கிறார். இதற்கு வைன் வீடியோக்களும், ஸ்னேப்சாட் மற்றும் டிவிட்டர் பகிர்வுகள் அவருக்கு கைகொடுத்து வருகின்றன.

ஸ்னேப்சாட் சேவையை திறமையாக பயன்படுத்தும் மருத்துவராக இருப்பது ரூபின்ஷ்டியன் மட்டும் அல்ல; மியாமியை சேர்ந்த பிளாஸ்டிக் சர்ஜரி வல்லுனரான மைக்கேல் சால்ஷியர் எனும் டாக்டரும் இதை செய்து வருகிறார். தான் செய்யும் பிளாஸ்டிக் சர்ஜரி தொடர்பான தகவல்கள் மற்றும் அறுவை சிகிச்சை காட்சிகள் ( நோயாளிகள் அனுமதியுடன் தான்) ஸ்னேப்சாட் மூலம் பகிர்ந்து கொண்டு வரும் டாக்டர் மைக்கேல் சமூக ஊடக உலகில் நட்சத்திர அந்தஸ்து பெற்றவராக இருக்கிறார். டாக்டர்.மியாமி என சமூக ஊடக உலகில் அவர் கொடிகட்டிப்பறக்கிறார்.

சமூக ஊடகங்கள் பெரும்பாலும் கேலி ,கிண்டல், கேளிக்கை உரையாடலுக்கான இடமாக கருதப்படும் நிலையில் அதை மாற்றி அமைக்கும் வகையில் செயல்படுபவர்களில் இந்த இரண்டு டாக்டர்களும் முன்நிற்கின்றனர். மருத்துவமனை சூழலையும், அறுவை சிகிச்சை அறைகளையும் ஸ்மார்ட்போனுக்குள் கொண்டு வருவதன் மூலம் இவர்கள் மக்களுடன் அர்த்தமுள்ள உரையாடலில் ஈடுபட்டு, விழிப்புணர்வை ஏற்படுத்தி வருவதாகவும் கருதப்படுகிறது.

டாக்டர் ரூபின்ஷ்டியனின் டிவிட்டர் பக்கம்: @DRubinshtein

இந்த தளம் இணைய மருத்துவர்.

இ காமர்ஸ் போல இ மருத்துவம் இன்னும் பிரபலமாகவில்லை.சொல்லப்போனால் இ மருத்துவம் இன்னும் முழுவீச்சில் அறிமுகமாக கூட இல்லை.

இ மருத்துவம் என்றால் இணையம் மூலம் மருத்துவம் என்று புரிந்து கொள்ளலாம்.அதாவது நோய்க்கூறுகள் வாட்டும் போது இணையத்தின் மூலம் ஆலோசனை பெறுவது.

இண்டெர்நெட் மூலம் மருத்துவ ஆலோசனை பெறலாம் என்னும் கருத்து பலருக்கு அதிர்ச்சியை தரலாம்.இணையம் வழியே மருத்துவம் பெறுவது எந்த அளவுக்கு பாதுகாப்பானது என்னும் சந்தேகம் எழலாம்.சிகிச்சை பெறுவது என்பது ஷாப்பிங் செய்வது போல அல்ல என்றும் வாதிடலாம்.

எப்படி இருந்தாலும் இ மருத்துவம் என்பது எதிர் கால நிதர்சனம் என்றே தோன்றுகிறது.அதாவது சர்வ சகஜமாக இணையம் மூலம் மருத்துவ ஆலோசனையை பெறும் நிலை உருவாகும்.

இப்போதே கூட இணையவாசிகளில் பலர் நோய் பாதிப்பு இருந்தாலோ அல்லது நோய்க்கூறுகள் தொடர்பான சந்தேகம் இருந்தாலோ தாங்களே மருத்துவ விவரங்களை கூகுல் மூலம் தேடிப்பார்க்கின்றனர்.முன்னோடி மருத்துவர்கள் சிலர் இணையதளம் மூலம் நோயாளிகளை சந்தித்து ஆலோசனை சொல்கின்றனர்.வெப்கேம் வருகையும் மேற்கொள்கின்றனர்.

இப்படி மெல்ல இ மருத்துவம் சாத்தியமாகலாம்.இந்த போக்கிற்கான அழகான உதாரணமாக சிம்கேட் இணையதளம் அமைந்துள்ளது.

சிம்கேட்டை நோய்க்கூறு தேடியந்திரம் என்றும் சொல்லலாம்.அல்லது மருத்துவ‌ கூகுல் என்றும் சொல்லலாம்.

கூகுல் எப்படி தகவல்களை குறிச்சொல் அடிப்படையில் தேடித்தருகிறதோ அதே போல இந்த தளம் நோய்க்கூறுகளின் அடிப்படையில் சிகிச்சைக்கான ஆலோசனையை வழங்குகிறது.

இன்று உங்களை சஞ்சலப்படுத்துவது என்ன என்று கேட்கும் இந்த தளத்தில் இணையவாசிகள் தங்களின் நோய்க்கூறுகளை டைப் செய்ய வேண்டும்.உதாரணத்திற்கு கை கால் வலி என்றோ அல்லது ஒயாத தலை வலி என்றோ டைப் செய்யலாம்.

ஆனால் கூகுல் போல உடனே பதில் சொல்லி விடாது.மாறாக இணையவாசிகள் தங்கள் உடல்நிலை பிரச்ச‌னை தொடர்பாக டைப் செய்த‌ நோய்க்கூறின் அடிப்படையில் தொடர்புடைய சில கேள்விகளை கேட்கும்.நீங்கள் ஆணா,பெண்ணா, உபாதை எத்தனை நாளாக இருக்கிறது,ஏற்கன‌வே மருத்துவ பிரச்ச‌னைகள் உண்டா என வரிசையாக கேள்விகள் கேட்கப்படும்.

கிட்டத்தட்ட ஒரு மருத்துவரிடம் நேரில் பேசும் போது அவர் எப்படி சில அடிப்படையான கேள்விகளை கேட்பாரோ அதே போல இந்த தேடியந்திரமும் பல கேள்விகளை கேட்டு உங்கள் கேள்விக்கான பதிலை சொல்கிறது.

தேடியந்திரம் தரும் பதில் நோய்க்கான சிகிச்சையாகவோ மருந்துகளுக்கான பரிந்துரையாகவோ இருக்கும் என்று நினைத்து விட வேண்டாம்.இந்த தேடியந்திரம் உடனே மருத்துவரை பார்க்க வேண்டுமா வேண்டாமா என்ற ஆலோசனையை மட்டுமே வழங்குகிறது.

சில‌ நேரங்களில் சாதாரண உபாதைகளே கூட ஏதேனும் நோயாக இருக்குமோ என்ற அச்சத்தை கொடுக்கலாம் அல்லவா?அது போன்ற நேரங்களில் இந்த தளத்தை நாடினால் நீங்கள் சொல்லும் அம்சங்களை பரிசிலித்து கவலைப்பட ஏதும் இல்லை என்றோ அல்லது உடனடியாக மருத்துவரை பாருங்கள் என்றோ தேவைக்கேற்ப ஆலோசனையை வழங்குகிறது.மற்றபடி சிகிச்சையை மருத்துவரிடம் இருந்து தான் பெற வேண்டும்.

ஆனால் மருத்துவரை பார்க்க செல்வதற்கு முன் நம்மை வாட்டும் நோய்க்கூறின் தன்மை தொடர்பாக ஓரளவு தெளிவாக தெரிந்து கொண்டு விடலாம்.

தேவையில்லாமல் நோயை நினைத்து அஞ்சுபவர்களுக்கு,அதிலும் டாக்டரை பார்க்கலாமா வேண்டாமா என்று குழம்பி தவிப்பவர்களுக்கு இந்த தளம் தெளிவை தரக்கூடிய‌து.

எனவே நோக்கூறு பாதிப்பு இருப்பவர்கள் மருத்துவர்களை நாட வேண்டுமா என தீர்மானிப்பதற்கு இந்த தேடிய்ந்திரத்தை பயன்படுத்தி பார்க்கலாம்.

அதற்கு முன் இந்த தேடியந்திரம் எப்படி செயல்படுகிறது என்பதை தெரிந்து கொள்வது அதைவிட பயனுள்ளதாக இருக்கும்.

நோயாளிகள் நோய்க்கூறுகளை விவரிக்கும் போதே மருத்துவருக்கு என்ன நோய் என்பது தெரிந்துவிடும் அல்லவா?அதனடிப்படையில் சிகிச்சை அளிப்பார்கள்.

இந்த நோய்க்கூறுகள் என்றால் இந்த நோய் பாதிப்பாக இருக்கும் என பகுப்பாய்வு செய்யும் ஆற்றல் மருத்துவர்களுக்கு இருக்கிறது.மேலும் சூழல் நோயாளியின் தனமை கடந்த கால மருத்துவ வரலாறு போன்ற விவரங்களை ஆய்வு செய்து நோய் பாதிப்பை துல்லிய‌மாக கண்டறிகின்றனர்.

இந்த தகவல்களை எல்லாம் டேட்டாவாக கம்ப்யூட்டரிடம் சமர்பித்தால் அதில் உள்ள பொது தன்மைகளை அது கிரகித்து கொண்டு விடும் .இன்ன நோய்க்கூறாக‌ இருந்தால் இன்ன பாதிப்பாக இருக்கும் என்பதை அது கணக்கிட்டு விடும்.ஆனால் அதற்கு மூளையாக செய்லப்டகூடிய சாப்ட்வேர் தேவை.

அததகைய ஒரு சாப்ட்வேர் தான் இந்த தேடியந்திரத்தை இயக்குகிறது.நோயாளிகளின் கடந்த கால மருத்துவ கோப்புகளில் இருந்து திரட்டப்பட்ட தகவல்களையும் மருத்துவர்கள் வழங்கிய சிகிச்சையையும் இந்த தேடியந்திரம் தனது தகவல் பெட்டகத்தில் கொண்டுள்ளது.அவற்றை கொண்டே இணையவாசிகள் தங்கள் நோய் உபாதையை தெரிவித்தால் அது என்னவாக எல்லாம் இருக்கலாம் என்னும் அனுமானத்தின் அடிப்படையில் கேள்விகளை கேட்டு அந்த அம்சங்களை கடந்த கால மருத்துவ கோப்புகளுடன் ஒப்பிட்டு ஆலோசனை வழங்குகிறது.

ஐபிஎம் நிறுவனம் வாட்சன் என்னும் பெயரில் இதே போன்ற மருத்துவாய்வு சாப்ட்வேரை உருவாக்கியுள்ளது.அதை விட சிற்ந்ததாக தங்கள் சாப்ட்வேர் இருப்பதாக இதனை உருவாக்கியுள்ள புளுபிரின்ட் ஹெல்த் நிறுவனம் தெரிவிக்கிறது.அதற்கு காரணம் கம்ப்யூட்டரின் ஆய்வு திறனோடு நோயாளிகள் தகவலையும் சேர்த்து ஆல‌சி ஆராய்வது தான் என்று சொல்கிறது.

அதனால் தான் எதிர்காலத்தில் இதில் தகவல்களை தேடும் நோயாளிகள் தங்கள் மருத்துவ முடிவையும் இதில் சம‌ர்பிக்குமாறு கேட்டுக்கொள்கிறது.]

குறிப்பிட்ட நோய்க்கூறுகளை டைப் செய்து தேடிய நபர்கள் தங்களுக்கு மருத்துவர் அளீத்த சிகிச்சையை குறிப்பிட்டால் அந்த தகவலையும் இது தனது நினைவறயில் சேமித்து வைத்து கொள்ளும் .அடுத்த முறை யாரேனும் அதே நோய்கூறினை குறிப்பிடும் போது இந்த தகவலையும் சேர்த்து கொண்டு மேலும் பொருத்தமான பதிலை தரும்.

இது போன்ற‌ மருத்துவ தகவல்களின் அடிப்படையில் செயல்ப‌டக்கூடிய சாப்ட்வேர்களும் அதனை பயன்ப்டுத்தும் இணையதளங்களுமெ இ மருத்துவம் பற்றி கனவு காண வைக்கின்ற‌ன.

இணையதள முகவரி;http://symcat.com/