Tag Archives: history

வராலாறு அறிய அழைக்கும் இணையதளங்கள்!

வரலாறு அலுப்பூட்டுக்கூட்டும் விஷயமாக நீங்கள் நினைத்துக்கொண்டிருக்கலாம். ஆனால் வரலாறு சுவார்ஸ்யமானது மட்டும் அல்ல; முக்கியமானதும் கூட!. மனித குலத்தின் கடந்த கால நிகழ்வுகளை அறிந்து கொள்வது வாழ்க்கை பற்றிய புரிதலுக்கு உதவும். பொது அறிவு நோக்கிலும் வரலாற்றை அறிந்திருப்பது அவசியமானது.

பாடப்புத்தகங்களை மீறி வரலாற்றை அறிந்து கொள்ளும் ஆர்வம் இருந்தால் அதற்கு வழிகாட்டக்கூடிய இணையதளங்கள் இருக்கின்றன. இந்த இணையதளங்கள் வரலாற்று நிகழ்வுகளையும் , தெரிந்து கொள்ள வேண்டிய முக்கிய தகவல்களையும் சுவாரஸ்யமாக முன் வைக்கின்றன. பக்கம் பக்கமாக படிக்க வேண்டிய தேவை இல்லாமல் ரத்தினச்சுருக்கமாக இவை வரலாற்று தகவல்களை அளிப்பதோடு, வரலாற்று தொடர்பான விளையாட்டுகளுடனும் கவர்ந்திழுக்கின்றன.

முதலில் பிபிசியின் வரலாற்று இணைதளத்தை பார்க்கலாம். உலகின் மிகச்சிறந்த செய்தி நிறுவனங்களின் ஒன்றாக விளங்கும் பிபிசி இணையதளத்தின் சார்பில் சுட்டிஸ்களுக்கு ஹிஸ்டரியை எளிதாக கற்றுத்தருவதற்காகவே அமைக்கப்பட்டுள்ள பகுது இது; http://www.bbc.co.uk/schools/primaryhistory/.
வரலாறு என்றவுடன் கிரேக்கமும் ,ரோமாபுரியும் தவறாமல் நினைவுக்கு வரும். கூடவே நம்முடைய சிந்து சமவெளி நாகரீகமும் மனதில் தோன்றும். கிரேக்கம் பற்றி அறிய வேண்டுமா? பண்டைய கிரேக்கம் தலைப்பில் கிளிக் செய்தால் , கிரேக்க வரலாறு துவக்கத்தில் இருந்து , அதன் வளர்ச்சி, எதென்ஸ் நகரின் சிறப்பு, ஒலிம்பிக் போட்டிகள், கிரேக்க போர்கள், கிரேக்க கடவுள்கள் என கிரேக்க வரலாற்றின் சுருக்கத்தை தெரிந்து கொண்டு விடலாம்.

இதே போலவே சிந்து சமவெளி தலைப்பை கிளிக் செய்தால் , நமது இந்தியாவின் வரலாற்று சிறப்பை அறிந்து கொள்ளலாம்.
பிரிட்டனை சேர்ந்த சார்லஸ் மேசன் என்பவர் தான் , சிந்து சமவெளி நாகரீகம் கண்டறியப்பட காரணமாக இருந்தவர். அவர் தான் 1826 ல் முதன் முதலில் ஹரப்பா நாகரீகத்தின் சுவடுகளான கட்டிடங்களின் மிச்சங்களை தனது பயணத்தின் போது கண்டறிந்தவர்.
ஏறக்குறைய 5,000 ஆண்டுகளுக்கு முன்னரே இந்த பகுதியில் இருந்தவர்கள் அடுப்பை பயன்படுத்தி ரொட்டி சுட அறிந்திருந்தனர்.

எகிப்தியர்கள் போல பிரமிடுகள் மற்றும் சீனர்கள் போல சீனப்பெருஞ்சுவர் போன்ற அடையாளங்களை விட்டுச்செல்லாவிட்டாலும் சிந்து சமவெளி மக்கள் வர்த்தகம், விவசாயம் மற்றும் செங்கல் சுடுவது போன்ற கலைகளை விட்டுச்சென்றனர். இந்திய கலாச்சாரமும் இந்த நாகரிகத்தின் பரிசு தான்.
ஒற்றுமையாகவும் அமைதியாகவும் வாழும் முறையையும் சிந்து சமவெளி மக்கள் அறிந்திருந்தனர்.
இது போல சிந்து சமவெளி மக்களின் வாழ்க்கை தொடர்பான இன்னும் பல முக்கிய தகவல்களை இந்த தலைப்பின் கீழ் அறிந்து கொள்ளலாம். எல்லா விஷயங்களுமே 10-15 வரிகளில் சுருக்கமாகவும் சுவையாகவும் இருப்பதால், எளிதாக படித்து தெரிந்துகொண்டு அடுத்த அடுத்து என கிளிக் செய்து முன்னேறலாம். அருகிலேயே தொடர்புடைய புகைப்படங்கள் மற்றும் வீடியோ இணைப்புகளும் கொடுக்கப்பட்டுள்ளன. ஒவ்வொரு தலைப்புக்கும் ஏற்ற வரலாற்று விளையாட்டும் உண்டு. உதாரணமாக சிந்து சமவெளி பற்றி படிக்கும் போது அந்த கால வர்த்தகராக செயல்பட்டு வணிகத்தில் ஈடுபடலாம். இதே போல கிரேக்க நாயகனாக சாகச விளையாட்டிலும் ஈடுபடலாம்.
வைக்கிங்களின் வரலாறு ,உலக வரலாறு, உலகப்போர் ஆகியவற்றையும் அறிந்து கொள்ளலாம். இவற்றில் உலக வரலாறு விளக்கப்பட்டிருக்கும் விதம் விஷேசமானது. வரலாற்றின் முக்கிய பொருட்கள் மூலம் இந்த விளக்கம் அமைந்துள்ளது.

ஹிஸ்டரிபார்கிட்ஸ் ( http://www.historyforkids.net/) வரலாற்று தகவல்களோடு வொர்க்‌ஷீட், வினாடி வினா மற்றும் விளையாட்டுகள் என சுவாரஸ்யத்தை ஏற்படுத்துகிறது. எகிப்து, சீனா, கிரேக்கம், ரோமாபுரி, ஆசியா, அமெரிக்கா என பல தலைப்புகளில் தகவல்கள் இடம்பெற்றுள்ளன. ஒவ்வொரு தலைப்பை கிளிக் செய்தால் துணைத்தலைப்புகளின் கீழ் விரிவாக வரலாற்றை அறிந்து கொள்ளலாம். ஆசியா எனும் தலைப்பில் இந்திய வரலாறு பற்றி விரிவாக இடம்பெற்றுள்ளது.

இவை தவிர வரலாற்று வினாடி வினாக்களும், வொர்க்‌ஷீட்களும் இன்னும் சுவாரஸ்யத்தை அளிக்கின்றன.
இதே தலைப்பில் இருக்கும் மற்றொரு இணையதளம்: http://www.historyforkids.org/. வரலாற்று களஞ்சியமான இந்த தளத்தில் புராதன இந்தியா உட்பட பல தலைப்புகளை வரலாற்றை கொஞ்சம் ஆழமாகவே தெரிந்து கொள்ளலாம். இந்தியா பற்றி மட்டுமே பத்துக்கும் மேல்பட்ட தலைப்புகளும் அவற்றின் கீழ் பல துணைத்தலைப்புகளும் இடம் பெற்றுள்ளன. எல்லாமே கொஞ்சம் விரிவாக கொடுக்கப்பட்டுள்ளன என்றாலும் படிப்பதற்கு எளிதாகவும் சுவாரஸ்யமாகவும் இருக்கிறது. இந்த தளத்தின் முகப்பு பக்கத்தில் வரலாற்று கார்ட்டூன்களும் கவர்கின்றன. கணித மேதை பித்தகோரஸ், தத்துவஞானி பிளாட்டோ ஆகிய வரலாற்று நாயகர்களையும் அறிந்து கொள்ளலாம்.

வரலாறு தொடர்பான இன்னொரு சுவாரஸ்யமான தளம்: http://www.kidspast.com/.
இந்த தளத்தில் வரலாற்று தகவல்களும் உண்டு; வரலாறு தொடர்பான விளையாட்டுகளும் இருக்கிறது. வரலாற்று மேற்கோள்கள் இதன் தனிச்சிறப்பு. இதே போல வரலாற்று புள்ளிவிவரங்களும் தனியே கொடுக்கப்பட்டுள்ளன. டைட்டானிக் கப்பல் பற்றிய தனிப்பகுதியும் இருக்கிறது.

இந்த இணையதளங்கள் நிச்சயம் வரலாற்றில் ஆர்வத்தையும் ஏற்படுத்தும் வரலாற்று அறிவையும் வளர்த்துக்கொள்ள உதவும். இந்த பட்டியலில், வரலாற்று அகராதியையும் (http://www.historytoday.com/dictionary ) சேர்த்துக்கொண்டால் இன்னும் பயனுள்ளதாக இருக்கும். பிரபலமான வரலாற்று இணையதளமான ஹிஸ்டரி டுடேவின் ஒரு அங்கமான இந்த அகராதி முக்கிய வரலாற்று பதங்களுக்கு அர்த்தம் தருகிறது.
——

டிவிட்டரில் வரலாற்று நாயகர்கள்.

140 எழுத்துக்கள் தானே என்று டிவிட்டர் குறும்பதிவுகளை சாதாரணமாக எடுத்து கொண்டு விட முடியாது.பக்கம் பக்கமாக எழுதும் போது எப்படி எழுத்து திறமையையும் படைப்பாற்றலையும் வெளிப்படுத்த முடியுமோ அதே போல குறும்பதிவுகளிலும் திறமையை பளிச்சிட செய்யலாம்.

வல்லவனுக்கு புல்லும் ஆயுதம் என்று சொல்வது போல டிவிட்டரின் 140 எழுத்து வரையரைக்குள்ளும் கைவண்ணத்தை வெளிப்படுத்தி குறும்பதிவுகளை சுவாரஸ்யமானதாகவும் கருத்தை கவரும் வகையிலும் வெளியிட்டு முத்திரை பதித்தவர்கள் இருக்கின்றனர்.

இதற்கு அழகான உதாரணம் தேவை என்றால் ஹிஸ்டாரிகல் டிவீட்ஸ் தளத்தை சொல்லலாம்.இந்த தளத்தின் பின்னே உள்ளே ஐடியா அடிப்படையில் மிகவும் எளிதானது,ஆனால் சுவாரஸ்யமானது .கேலியும் கிண்டலுமாக அதனை வெளிப்படுத்தியிருக்கும் விதம் அதைவிட சுவாரஸ்யமானது.

வரலாற்று நாயகர்கள் டிவிட்டர் செய்தால் எப்படி இருக்கும்?என்னும்  கற்பனை தான் இந்த தளத்தின் அடிப்படை.ஆபிரகாம் லிங்கனில் துவங்கி,ஹிட்லர்,எழுத்தாளர் மார்க் டுவைன்,நம் தேசத்தந்தை மகாத்மா காந்தி என வராலாற்று நாயகர்கள் அனைவர் சார்பிலும் குறும்பதிவுகள் இந்த தளத்தில் வெளியாகியுள்ளன.

அந்த கால தலைவர்கள் குறும்பதிவுகளை வெளியிட்டால் எப்படி இருக்கும் என்பதே நல்ல கற்பனை தான்.அதில் மேலும் சுவையை கூட்டும் வகையில் அந்த பதிவுகளை சற்றே நகைச்சுவை கலந்து சரியான நையாண்டியாக தோன்ற செய்திருப்பது தான் இந்த தளத்தின் தனிச்சிறப்பு.

அதாவது தலைவர்களையே கலாய்ப்பது போல அவர்கள் வாழ்க்கையின் முக்கிய கட்டங்களில் அந்த தலைவர்களின் சிந்தனையும் பேச்சும் எப்படி இருக்கும் என்பது போல இந்த குறும்பதிவுகள் அமைந்துள்ளன.

உதாரணத்திற்கு அமெரிக்காவில் கருப்பர்களின் விடுதலை போராட்டத்திற்கு வித்திட்ட மார்டின் லூதர் கிங்கின் பெயரில் வெளியாகி இருக்கும் குறும்பதிவு ,தூக்கம் பற்றி எழுதுவதற்கான டைரியை வாங்கியுள்ளேன்,நிறைய கணவுகள் வருகின்றன,ஆனால் அவற்றை குறித்து வைக்க மறந்து விடுகிறேன் என்று தெரிவிக்கிறது.

கிங்கை அறிந்தவர்களுக்கு வரது வரலாற்று சிறப்பு மிக்க உரையில் இடம்பெற்றிருந்த இதயம் தொட்ட எனக்கு ஒரு கணவு உண்டு என்னும் வாசகத்தை நிச்சயம் அறிந்திருப்பார்கள்.அப்போது ஒவ்வொரு அமெரிக்கரின் மனசாட்சியையும் உலுக்கிய இந்த வாசகம் இன்றளவும் மேற்கோள் காட்டப்படும் போதெல்லாம் உள்ளத்தை தொடத்தவறுவதில்லை.

பொன்மொழிகளை எல்லாம் விட சிறந்த இந்த வாசகத்தை கேலிக்குளாக்குவது கொஞ்சம் வேதனையானது என்றாலும் இதில் உள்ள நையாண்டியை ரசிக்காமல் இருக்க முடியாது.

அதே போல நிலவில் கால் வைத்து சாதனை படைத்த நீல் ஆம்ஸ்டிராங் சார்பிலான குறும்பதிவு ,சக விண்வெளி வீரரான பஸ் ஆர்டினிடம் ‘செட்டுக்கு சென்று கொண்டிருக்கிறேன்,அதாவது நிலவுக்கு…” என்பது போல அமைந்துள்ளது.நிலவில் கால் வைத்த நிகழ்வே ஒரு மோசடி வேலை என்று ரு கருத்து இருப்பதை அறிந்தவர்களுக்கு இந்த கிண்டல் வாசகம் புன்னகையை வர வைக்கும்.

உலகையே வெல்லத்துடித்த மாவீரன் ஆலெக்ஸாண்டர் ‘எனது சாதனைகளை பார்த்துவிட்டு அலெக்ஸாண்டர் ரொம்ப நல்லவர் என்று புகழ்கின்ரனர்.இனி ஏதாவது நல்லது செய்ய வேண்டும் என்று சொல்வது போல வெளிப்படுகிறது.மிக பொருத்தமாக ஆங்கிலத்தில் ஆலெக்ஸாண்டர் தி டிவீட என்னும் பெயரில் வெளியாகியுள்ள இந்த பதவி அவரது வெற்றி வெறியை அழகாக பகடி செய்கிறது.

உலகையே ஆட்டிப்படைத்த ஹிட்லர் பெயரிலான குறும்பதிவு முகத்தோற்றம் பற்றிய காதலியின் தவறான எண்ணத்தை போக்குவதற்காக துண்டு மீசை வளர்ப்பதாக தெரிவிக்கிறது.

இதைவிட நகைச்சுவை சொட்ட எழுதிய எழுத்தாளர் மார்க் டுவைன் பெயரிலான பதிவு இன்னும் கூட சுவையானது.இன்னும் நேரம் இருந்தால் ஒரு அழகான குறும்பதிவை எழுதியிருப்பேன் என்று கூறுவது போல உள்ளது.

இப்படி ஒவ்வொருவரின் தனித்தன்மையை நினைவுபடுத்தி அதனை கிண்டல் செய்யும் வகையில் பதிவுகள் அமைந்துள்ளன.

வரலாற்று சம்பவங்களையும் அதன் நாயகர்களையும் அறிந்தவர்கள் இந்த கிண்டலை புரிந்து கொண்டு ரசிக்கலாம்.

ஆனால் மகாத்மா பற்றிய பதிவு நிச்சயம் வேதனையை ஏற்படுத்தும்.சில பதிவுகள் வரலாற்று நாயகர்களை இப்படி கேலிக்குள்ளாக்குவது சரியா என முகஞ்சுளிக்க வைக்கலாம்.ஆனால் இவற்றின் பின்னே உள்ளே கற்பனைத்திறன் மற்றும் நகைச்சுவை ரசிக்கும்படி இருப்பதை மறுப்பதற்கில்லை.

ஒரு கார்ட்டூனை ரசிக்கும் மனதோடு இந்த பதிவுகளை அணுகினால் இதில் உள்ள நகைச்சுவையை ரசிக்கலாம்.

இந்த பதிவுகள் எல்லாமே டிவிட்டரில் வெளியாகவில்லை.டிவிட்டர் போன்ற தோற்றத்தில் அதே பாணியில் உருவாக்கப்பட்டு இதற்கான இணையதளத்தில் வெளியிடப்பட்டு வந்தன.அதிலும் அழகான ஓவியங்களோடு வெளியாயின.

இந்த தளத்துக்கான அறிமுகத்திலேயே நையாண்டியையும் கிண்டலையும் காணலாம்.டிவிட்டர் எல்லா காலத்திலும் உண்டு என்பதை இந்த தளம் உணர்த்தும் என்று அதில் குறிப்பிடப்பட்டுள்ளது.

பரவலாக கவனத்தையும் விமர்சனைத்தையும் ஈர்த்த இந்த குறும்பதிவுகள் தொகுக்கப்பட்டு புத்தகமாகவும் வெளியாகியுள்ளது.

குறும்பதிவுகளை எப்படியெல்லாம் பயன்படுத்தலாம் என்பதற்கான உதாரணமாகவும் விளங்கும் நித பதிவுகளை ஹிஸ்டாரிகல் டிவீட்ஸ் தளத்திலும் படித்து ரசிக்கலாம்.பிரபலமானவை,சமீபத்தியவை என பல்வேறு தலைப்புகளில் பகுக்கப்பட்டுள்ளதோடு வரலாற்று கால கட்டத்தின் அடிப்படையிலும் அவற்றை படித்து மகிழலாம்.

இணையதள முகவரி;http://historicaltweets.com/