Tag Archives: microsoft

தகவல் திங்கள்: ஒரு புகைப்படத்தின் கதை

Bliss
அந்த ஒளிபடத்தை நான் பலமுறை பார்த்திருக்கிறேன். நீங்களும் பல முறை பார்த்திருப்பீர்கள். நம்மைப்போலவே உலகின் பல பகுதிகளில் இருக்கும் எண்ணற்ற மனிதர்கள் அந்த படத்தை பார்த்திருக்கிறார்கள். ஆனால், அந்த படத்தின் அருமையை எத்தனை பேர் உணர்ந்திருக்கிறோம் எனத்தெரியவில்லை. உங்களைப்பற்றி தெரியவில்லை; ஆனால் நான் நிச்சயம் உணரவில்லை. அந்த படத்தின் சிறப்பை தற்செயலாக படித்த போது, அடாடா இந்த படத்தின் பின் இத்தனை விஷயங்கள் இருக்கின்றனவா? என வியந்து போனேன். அந்த வியப்பை பகிர்ந்து கொள்ளத்தான் இந்த பதிவு.

அந்த ஒளிபடம் கம்ப்யூட்டர் திரையில் ஸ்கிரீன்சேவர் சித்திரமாக நாம் பார்த்துப்பழகிய காட்சி தான். பச்சை புல் வெளி பரந்து விரிந்திருக்க அதன் விளிம்பில் நீல வான மேகங்கள் திரண்டிருக்கும் காட்சி தான் அது. இப்போது, அட ஆமாம் எனும் ஆமோதிப்புடன் உங்கள் மனத்திரையிலும் அந்த ஒளிபடம் காட்சியாக ஓடிக்கொண்டிருக்கலாம். பல இடங்களில் வால்பேப்பராக பார்த்து பழகிய ஸ்கிரீன்சேவவர் தான் என்றாலும் அது பத்தோடு பதினொன்னு ரக வால்பேப்பர் அல்ல;

உலகில் எந்த மூளைக்குச்சென்றாலும் அங்குள்ள கம்ப்யூட்டர் அல்லது லேப்டாப்பில் பார்க்க கூடிய வால்பேப்பர் அது. மைக்ரோசாப்டின் எக்ஸ்பி இயங்குதள வடிவின் தானாக தோன்றும் வால்பேப்பராக அமைக்கப்பட்ட காரணமாக அந்த வால்பேப்பர் எங்கெலும் விண்டோஸ் கம்ப்யூட்டர்கள் இருக்கிறதோ அங்கெல்லாம் தோன்றிக்கொண்டே இருக்கிறது. அதனால் தான் அந்த படம் உலகில் அதிகம் பார்க்கப்பட ஒளிபடம் எனும் அங்கீகாரத்தை பெற்றுள்ளது. ஆம், ஒரு கணக்குபடி அந்த படம் 100 கோடி முறைக்கு மேல் பார்க்கப்பட்டிருக்கலாம் என கருதப்படுகிறது. சும்மாயில்லை புகழ் பெற்ற மோனோலிசா ஓவியத்திற்கு அடுத்தபடியாக இப்படி உலகம் முழுவதும் பார்த்து ரசிக்கப்பட்ட படமாக இது இருக்கிறது.

ஆனால் வெறும் எண்ணிக்கை மட்டும் அல்ல இதன் பலம். இந்த படத்தின் பின்னே ஒரு சுவாரஸ்யமான கதை இருக்கிறது. அது மட்டும் அல்ல அந்த படமே ஒரு அர்த்தம் நிறைந்த ஓவியமாக இருக்கிறது. கவித்துவமாக அதை ஒரு காமிரா காவியம் என்று கூறலாம். அதனால் தான் அதை நாம் பார்த்து ரசித்திருக்கிறோம்.
முதலில் அந்த படம் மைக்ரோசாப்ட் வசம் வந்த கதையை பார்க்கலாம்.

புத்தாயிரமாண்டின் துவக்கத்தில் மைக்ரோசாப்ட் நிறுவனம் எக்ஸ்பி இயங்குதள வடிவத்தை அறிமுகம் செய்தது. அதற்கு முன்னதாக புதிய இயங்கு தளத்தின் தானாக தோன்றும் பின்னணி காட்சியாக அமைப்பதற்கான ஒரு ஒளிபடம் மைக்ரோசாப்ட் பொறியாளர்களுக்கு தேவைப்பட்டது. அவர்கள் வலைவீசி கோர்பிஸ் ஒளிபட நிறுவனத்திடம் இருந்து ஒரு படத்தை தேர்வு செய்தனர். இங்கு கவனிக்க வேண்டிய விஷயம் கோர்பிஸ் மைக்ரோசாப்ட் அதிபர் பில்கேட்சுக்கு சொந்தமான நிறுவனமாகும். எனவே அவர்கள் மற்றொரு ஒளிபட சேவை நிறுவனமான கெட்டி இமேஜசிடம் செல்லவில்லை.

கோர்பிஸ் கோப்புகளில் இருந்து அவர்கள் தேர்வு செய்த படம் தான் சார்லஸ் ஓ’ரியர் எனும் ஒளிபட கலைஞர் எடுத்த புல்வெளி படர்ந்த மலைச்சரிவும், நீல வானமும் சங்கமிக்கும் காட்சி. புகழ் பெற்ற நேஷனல் ஜியாகிராபிக் இதழின் முன்னாள் ஒளிபட கலைஞரான ஓ’ரியர், 1996 ம் ஆண்டு அமெரிக்காவின் கலிபோரினியா மாகாணத்தில் தனது காதலியை பார்க்கச்சென்ற போது அந்த படத்தை எடுத்திருந்தார். அவரது காதலி ( அவரும் முன்னாள் தான்) ஓயின் தோட்டம் பற்றிய புத்தகம் எழுதிக்கொண்டிருந்தார். அதற்கான படம் எடுக்க வந்த ஓ’ரியர் வேலையை முடித்து திரும்பிச்செல்லும் வழியில், நேபா பள்ளத்தாக்கில் வழக்கமான திராட்சை கொடிகளுக்கு பதிலாக பச்சை பசேலென புல்வெளியாக காட்சி அளித்த மலைப்பகுதியை பார்த்து மனதை பறி கொடுத்து அந்த காட்சியை கிளிக் செய்தார். சூரிய ஒளி மின்ன, பின்னணியில் மேக கூட்டம் தவழ புல்வெளி படர்ந்த தாழ்வான மலைப்பகுதி காமிராவில் அழகிய காட்சியாக பதிவானது.

இந்த படத்தை பயன்படுத்த விரும்பிய மைக்ரோசாப்ட் அதிக விலை கொடுத்து வாங்க தீர்மானித்தது. அந்த படத்தை பயன்படுத்தும் உரிமையை மட்டும் வாங்காமல் அந்த படத்திற்கான மொத்த உரிமத்தையும் வாங்க தீர்மானித்தது. இதற்காக பெரும் தொகை கொடுக்கப்பட்டது. தொகையின் அளவு ரகசியமாக வைத்துக்கொள்ளப்பட்டாலும், ஒரு ஒளிபடத்திற்கு அளிக்கப்பட்ட இரண்டாவது பெரிய தொகை என்றும் மட்டும் ஒ’ரியர் ஒரு பேட்டியில் கூறியிருக்கிறார்.
Charles_O'Rear
இதன் காரணமாகவே கூரியர் நிறுவனம் அந்த படத்தை கொண்டு சேர்க்கும் பொறுப்பில் இருந்து பின் வாங்கி கொண்டதால், ஒ’ரியரே விமானத்தில் நேரில் சென்று படத்தை மைக்ரோசாப்டிடம் ஒப்படைத்திருக்கிறார்.
அப்போது அந்த படம் எதற்காக பயன்படுத்தப்பட போகிறது எனும் விவரம் அவருக்கு தெரியாது. எக்ஸ்.பி வெளியான பின்னர் தான் அதன் பின்னணிக்காட்சியாக அலங்கரித்த விஷயம் தெரிய வந்தது. மைக்ரோசாப்ட் அந்த படத்திற்கு பிளிஸ் அதாவது ஏகாந்தம் என்றும் பெயர் சூட்டியிருந்தது.

அதன் பிறகு எங்கு பார்த்தாலும் அந்த படத்தை பார்க்க முடிந்தது. அமெரிக்காவின் வெள்ளை மாளிகை, ரஷ்யாவின் அதிபர் மாளிகையான கிரெம்லின் என எல்லா இடங்களிலும் அந்த படத்தை பார்க்க முடிந்திருக்கிறது. உலகின் பார்வையில் இருந்து விலகி இருக்கும் வட கொரியா சென்றால் கூட கம்ப்யூட்டரில் அந்த படத்தை பார்க்க முடிந்தது என ஓ’’ரியரே வியந்து போய் கூறியிருக்கிறார் என்றால் பார்த்துக்கொள்ளுங்கள். இப்போது 15 வயதில் இருக்கும் எவருக்கும் வாழ்நாள் முழுவதும் இந்த படம் நினைவில் இருக்கும் என்றும் அவர் கூறியிருக்கிறார்.
ஆயிரத்திற்கும் மேற்பட்ட புகைப்படங்களை எடுத்திருந்தாலும் இந்த ஒரு படத்திற்காக தான் அறியப்படுவேன் என்றும் ஓ’ரியர் கூறியிருக்கிறார்.
இந்த படத்தை அவர் புகைப்பட சுருளில் எடுத்தார். அதன் தனித்தன்மைக்கு இதுவும் ஒரு காரணம்.
எல்லாம் சரி, இந்த படம் ஏன் இத்தனை கோடி பேரை கவர்ந்திருக்கிறது. மைக்ரோசாப்டின் திணிப்பு தான் காரணமா? நிச்சயம் இல்லை.பெயருக்கு ஏற்ப அந்த படத்தில் ஏகாந்தமான ஒன்று இருக்கிறது. ஒளிபட கலைஞர் ஒருவர் இது பற்றி அழகாக விளக்கியிருக்கிறார். “சிலர் இந்த படம் வெறுமையாக ,சுவாரஸ்யம் இல்லாமல் இருப்பதாக கருதலாம். ஆனால் அழகிய பரப்பில் பளிச்சென மின்னும் பொழுதே ஈர்க்கிறது என பலரும் கருதலாம். மலைச்சரிவில் ஊடுருவும் சூரிய ஒளி கனவு போன்ற தோற்றத்தை அளிக்கிறது. அதுவே இந்த பட்த்தை தனித்து காட்டுகிறது” என்கிறார் டேவிட் கிளார்க் எனும் அந்த கலைஞர். இந்த படம் பார்க்க உறுத்தாமல் சுலபமானதாக இருப்பதால் மைக்ரோசார்ப் இதை தேர்வு செய்திருக்கலாம் என்கிறார் அவர். அதே நேரத்தில் டெஸ்க்டாப்பில் உள்ள எதற்கும் இடையூறு இல்லாமல் அமைந்திருக்கிறது என்றும் அவர் சொல்கிறார்.
எது எப்படியோ, இணைய யுகத்தில் அதிகம் பார்க்கப்பட்ட படமாக இது இருக்கிறது.

நடுவே சில காலம் இந்த ஒளிபடம் எங்கே எடுக்கப்பட்டது எனத்தெரியாமல் குழப்பமாக இருந்திருக்கிறது. பல யூகங்களும் வெளியாகி இருக்கின்றன. ஆனால் சில ஆண்டுகள் கழித்து இதன் பின்னணி பற்றிய விவரங்கள் வெளியாகின.

இப்போது குழப்பமே இல்லை. இந்த ஒளிபடத்திற்கு என தனியே ஒரு விக்கிபீடியா பக்கம் இருக்கிறது. இந்த படம் தொடர்பாக ஒரு ஆவணப்பட வீடியோவும் இருக்கிறது. இந்த இடத்தை கூகுள் ஸ்டிரீட் வீயூவிலும் பார்க்கலாம். அது மட்டும் அல்ல, மேலும் பல ஒளிபட கலைஞர்கள் அந்த இடத்திற்கு சென்று அதே படத்தை எடுக்க முயன்றிருக்கின்றனர். அந்த இடமே மாறிப்போய்விட்டாலும் கூட பலரும் சளைக்காமல் அங்கு படம் எடுத்து மூல காட்சியை மறு உருவாக்கம் செய்ய முயன்றிருக்கின்றனர். ஆனால் மூலப்படத்திற்கு நிகரான காட்சி யாருக்குமே கிடைக்கவில்லை!

பிளிஸ் ஒளி படத்திற்கான விக்கிபீடியா பக்கம்: https://en.wikipedia.org/wiki/Bliss_(image)

புகைப்படம் மூலம் வயதை கணிக்கும் இணையதளம்

புகைப்படத்தை வைத்து அதில் உள்ளவரின் வயதை கணித்துச்சொல்லும் இணையதளம் ஆயிரக்கணக்கானோரை கவர்ந்து ,வைரலாக பரவி இணையத்தின் மிகவும் பிரபலமான இணையதளமாகி இருக்கிறது.

மைக்ரோசாப்ட் நிறுவனம் சார்பில் ஹவ் ஓல்டு.நெட் எனும் பெயரில் இந்த இணையதளம் அமைக்கப்பட்டுள்ளது. மனித முகங்களை கண்டுணறக்கூடிய பேசியல் ரிகக்னேஷன் எனும் தொழில்நுட்பத்தின் அடிப்படையில் இந்த இணையதளம் அமைக்கப்பட்டுள்ளது. அதாவது இந்த தளத்தின் பின்னே உள்ள நுட்பம் மனித முகத்தை பார்த்து,புரிந்து கொண்டு அவர்களின் பாலினம் மற்றும் வயதை சரியாக கணித்து சொல்லக்கூடியது. சரியாக என்றும் சொல்வது பொருத்தமாக இருக்காது. கணித்துச்சொல்வது என்பதே சரியாக இருக்கும்.

இந்த தளத்தின் திறனை இணையவாசிகள் யார் வேண்டுமானாலும் பரிசோதித்துப்பார்க்கலாம். இதற்கு செய்ய வேண்டியதெல்லாம், தங்கள் புகைப்படத்தை இந்த தளத்தில் சமர்பித்து, எங்கே என் வயதை சொல்லுப்பார்க்கலாம் என கேட்பது தான். உடனே இந்த தளம் உங்கள் வயதை கணித்துச்சொல்லும்.

ஆனால் இந்த கணிப்பு எல்லா நேரங்களிலும் துல்லியமாக இருக்க முடியும் என்று சொல்ல முடியாது. சில நேரங்களில் சரியாக இருக்கும். சில நேரங்களில் தவறாக இருக்கும். தவறு எனில் அடுத்த படத்தை சமர்பிக்கவும் என இந்த தளமே சொல்லி விடுகிறது.

வயது விஷயத்தில் உணர்ச்சிவசப்படக்கூடியவர் என்றால் இந்த தளத்தில் உங்கள் புகைப்படத்தை சமர்பிக்காமல் இருப்பதே நல்லது. ஏனெனில் நீங்கள் இளமையானவராக இருந்து இந்த தளம் உங்கள் வயதை 50 க்கு மேல் குறிப்பிட்டால் உங்கள் மனது லேசாக முறிந்துப்போகலாம்.

சொந்த புகைப்படத்தை சமர்பிக்க தயங்குபவர்களும் தாராளமாக இந்த தளத்தை சோதித்துப்பார்க்கலாம். அத்ற்கும் ஒரு வழி இருக்கிறது. அதாவது இணையத்தில் உள்ள புகைப்படங்களை சமர்பித்து இந்த தளத்தை கணிக்கச்சொல்லலாம். இதற்காக மைக்ரோசாப்டின் பிங் தேடியரத்தின் புகைப்பட சேவையில் இருந்து படங்களை தேர்வு செய்து கொள்ளலாம்.

இந்த வசதி தான் இந்த தளத்தை பிரபலமாக்கியுள்ளது. பலரும் இணையத்தில் கிடைக்கும் பிரபலங்களின் புகைப்படத்தை இந்த தளத்தில் சமர்பித்து அது தரும் கணிப்பை தங்கள் சமூக வலைதள பக்கங்களில் பகிர்ந்து கொண்டு வருகின்றனர்.

ஹாலிவுட் நடிகை ,அரசியல் தலைவர்கள் என நன்கறியப்பட்ட நபர்களின் புகைபப்டங்களை சமர்பித்து, அவர்களின் வயது கணிப்பை ,அது எந்த அளவுக்கு சரியாக இருக்கிறது என்பதை லேசான கிண்டலுடன் பகிர்ந்து கொள்கின்றனர்.
இந்த தளம் யாருடையை வயதை எல்லாம் சரியாக சொல்கிறது, யாருடைய விஷ்யத்தில் கோட்டை விடுகிறது போன்ற விவரங்கள் சுவாரஸ்யமாக இருக்கிறது.
இந்த சுவாரஸ்ய அம்சமே இந்த தளத்தை ஹிட்டாகி இருக்கிறது.

இதில் என்ன சுவாரஸ்யம் என்றால் இந்த தளம் இந்த அளவு ஹிட்டாகும் என்பதை மைக்ரோசாப்டே எதிர்பார்க்கவில்லை. சமீபத்தில் மைக்ரோசாப்ட் நடத்திய டெவலப்பர் மாநாட்டில் தான் இந்த தளம் அறிமுகம் செய்யப்பட்டது.

மைக்ரோசாப்டின் அஸ்யூர் மெஷின் லேர்னிங் பிரிவைச்சேர்ந்த இரண்டு வல்லுனர்கள் சோதனை முறையில் இந்த தளத்தை உருவாக்கினர். முகங்களை கண்டுணரும் சாப்ட்வேரின் ஆற்றலை வெள்ளோட்டம் பார்ப்பதற்காக மிக எளிமையான முறையில் புகைப்படம் பார்த்து வயதை சொல்லும் வகையில் தளத்தை அமைத்தனர். முதலில் 50 பேருக்கு தான் மெயில் அனுப்பியிருந்தன்ர். ஆனால் இந்த மெயில் வைரலாகி 35,000 பேர் இந்த தளத்தை பார்த்து பயன்படுத்தினர். இதனால் மீடியாவின் கவனத்தை ஈர்த்து இப்போது இணையவாசிகள் மத்தியிலும் பிரபலமாகி விட்டது.

மெஷின் லேர்னிங் என்று சொல்லப்படும் தொழில்நுட்பத்தின் எதிர்கால ஆற்றல் மற்றும் போதாமைகளின் அடையாளமாக இந்த தளம் விளங்குகிறது. நீங்களும் தாராளமாக இந்த தளத்தை பயன்படுத்திப்பார்த்துச்சொல்லுங்கள் .

ஆனால் ஒரு விஷயத்தை நினைவில் கொள்ளுங்கள், இந்த தளத்தில் சமர்பிக்கப்படும் புகைப்படங்கள் பயன்படுத்தப்படக்கூடிய விதம் குறித்த ஒரு சர்ச்சை இருக்கிறது. இந்த புகைப்படங்களை மைக்ரோசாப்ட் விரும்பிய வகையில் பயன்படுத்த வாய்ப்பிருப்பதாக சொல்லப்படுகிறது. மைக்ரோசாப்டோ புகைப்படங்களை சேமித்து வைத்துக்கொள்ளவில்லை என சொல்கிறது.

கவனிக்க வேண்டிய இன்னொரு விஷயம் இந்த தளத்தின் பின்னே இருக்கும் மைக்ரோசாப்ட் பொறியாளர்களில் நம்மவரான சந்தோஷ் பாலசுப்பிரமணியமும் ஒருவர்!

இணையதள முகவரி; http://how-old.net/

வெள்ளிவிழா காணும் பவர்பாயிண்ட்;ஒரு பிளேஷ்பேக் !

மைக்ரோசாப்ட் போலவே தான் பவர்பாயிண்டும்!

மைக்ரோசாப்ட் எப்படி பெரும்பாலானோரால் பயன்படுத்தப்படும் அதே நேரத்தில் பலரால் வெறுக்கப்படுகிறதோ அதே போலவே அதன் பிரபலமான சாப்ட்வேர்களில் ஒன்றான பவர்பாயிண்டும் உலகம் முழுவதும் பயன்படுத்தபடுகிறது,வெறுக்கப்படுகிறது.

இரண்டுக்குமே ஒரே காரணம் தான்.அது பவர்பாயிண்டு பிரசன்டேஷன்களை சுலபமாக்கியிருப்பது தான்.

காட்சிரீதியாக ஒரு எண்ணத்தை உணர்த்த விரும்பும் எவரும் பவர்பாயிண்டை கொண்டு அழகான காட்சி விளக்கத்தை (பிரசன்டேஷன்)தயார் செய்து விடலாம்.அதன் பின்னே உள்ள ஐடியா நன்றாக இருந்தா விளக்கமும் நன்ராக இருக்கும்.ஆனால் மொக்கை ஐடியாக்களை எல்லாம் எத்தை அழகான ஸ்லைடுகளாக காட்டினாலும் அலுப்பு ஏற்படுவதை தவிர்க்க முடியாது.

கல்லூரி மாணவர்களில் துவங்கி பேராசிரியர்கள்,நிறுவன அதிகாரிகள் கார்ப்பரேட் தலைவர்கள் என பலரும் பவர்பாயிண்ட் உதவியால் அழகழகான ஸ்லைடுகளால் பொறுமையை சோதித்து வருகின்றனர்.

இதனால் தான் பவர்பாயிண்ட் கேலிக்கும் ஆளாகிறது.காட்சி விளக்கத்தை மிகவும் மலினப்படுத்தி விட்டதாக பலரும் குறை பட்டு கொள்ளும் நிலையும் இருக்கிறது.

பல பவர்பாயிண்ட் விளக்கங்கள் பவர்பாயிண்டா என அலர‌ வைக்கும் நிலை இருந்தாலும் இதற்கு பவர் பாயின்டை பொறுப்பாக்க முடியாது.

அதிலும் பவர்பாயிண்ட் வெள்ளிவிழா ஆண்டில் அடியெடுத்து வைத்திருக்கும் நிலையில் அதனை கேலிக்கும் கிண்டலுக்கும் இலக்காக்குவது சரியாக இருக்காது.

சாப்ட்வேர்களில் வெற்றிகரமான ஒன்றாக கருதப்பட வேண்டிய பவர்பாயின்ட் 25 ஆண்டுகளை தாக்கு பிடித்து இன்னும் பரவலாக பயன்படுத்தப்படும் சாப்ட்வேராக இருப்பது சாதரண விஷயம் அல்ல!.

எனவே இந்த சாப்ட்வேர் வரலாற்றை கொஞ்சம் கண்ணியத்தோடு திரும்பி பார்க்கலாம்.

பவர்பாயின்ட் மைக்ரோசாப்டிற்கு சொந்தமானது என்பது உலக‌றிந்த விஷ‌யம்.அது மட்டும் அல்லாமல் அது மைக்ரோசாப்டின் பிரிக்க முடியாத அங்கமாக இருக்கிறது.விண்டோஸ் என்றால் பவர்பாயிண்டும் இருக்கும்.

ஆனால் பவர்பாயின்ட் மைக்ரோசாப்ட் உருவாகியது இல்லை.வாங்கியது.முதன் முதலில் கையக‌ப்படுத்தியது.

1987 ம் ஆண்டு பவர்பாயிண்டை மைக்ரோசாப்ட் நிறுவனம் கையக‌ப்படுத்தி தன்னோடு இணைத்து கொண்டது.

முதலில் அதற்கு வைக்கப்பட்டிருந்த பெயர் பிரசன்டர்(இது நன்றாகவா இருக்கிற‌து).

தாமஸ் ரட்கின்,டென்னிஸ் ஆஸ்டின் ,மற்றும் ராபர்ட் காஸ்கின்ஸ் ஆகிய மும்மூர்த்திகள் தான் இதனை உருவாக்கியவர்கள்.

அப்போது கம்ப்யூட்டர் உலகம் அதன் பிள்ளை பருவத்தில் இருந்தது.ஆப்பிள் மேக்குகளை அறிமுகம் செய்து பர்சனல் கம்ப்யூட்டருக்கு உயிர் கொடுத்து கொண்டிந்தது.இன்னொரு பக்கம் பில்கேட்ஸ் என்னும் இளைஞர் மைக்ரோசாப்ட்டை உருவாக்கி நடத்தி கொண்டிருந்தார்.

இந்த மும்மூர்த்திகள் போர்தாட் என்னும் நிறுவனத்தில் பணியாற்றி கொண்டிருந்தனர்.வர்த்தக விளக்கங்களை அளிப்பதற்கான ஸ்லைடுகளை உருவாக்குவதற்கு என ஒரு சாப்ட்வேரை உருவாக்கினால் எதிர்கால கம்ப்யூட்டர் தலைமுறைக்கு ஏற்றதாக இருக்கும் என காஸ்கின்ஸ் மற்றும் அவரது நண்பர்கள் ந‌ம்பிக்கையோடு இந்த எண்ணத்தை நிறைவேற்றும் வகையில் பவர்பாயின்ட் சாப்ட்வேரை பிரசன்டர் என்னும் பெயரில் உருவாக்கினர்.

முதலில் விண்டோசை மனதில் வைத்து தான் செயல்பட்டனர் என்றாலும் அதில் சில தொழில்நுட்ப சிக்கல் இருந்த்தால் முதலில் ஆப்பிளின் மேக்கில் செயல்படும் வகையில் அதனை உருவாக்கினர்.ஆப்பிளும் அதன் அருமையை உணர்ந்து நிதியுதவி மூலம் ஆதரவு அளித்தது.

பின்னர் மைக்ரோசாப்ட் தொடர்பு கொண்டு பேச்சு வார்த்தை நடத்தியது.இதன் ப‌யனாக 1987 ல் அதிகார்பூர்வமாக அறிமுகமாவதற்கு ஒரு வார்ம் முன் மைக்ரோசாப்டால் வாங்கப்பட்டது.காப்புரிமை சிக்கலை தவிர்க்க பிரசன்டர் என்பதற்கு பதில் பவ‌ர்பாயின்டு என்று பெயர் சூட்டப்பட்டது.

அதன் பிறகு மற்றெதெல்லாம் வரலாறு அறியும் என சுருக்கமாக சொல்லி விடலாம்.

அதற்கு முன்னர் காட்சி விளக்கங்களை அளிக்க வேண்டும் என்றால் மணிக்கக்கணக்காக உடகார்ந்து வாசகங்களை எழுதி வரைப்பட மற்றும் புகைப்படங்களை சேர்த்து ஸ்லைடுகளை கஷ்டப்பட்டு உருவாக்க வேண்டும்.பவர்பாயிண்ட் இதனை சுலபமாக்கி காட்டியது.அதனாலேயே பிரபலமானது.இதுவே வினையானது வேறு விஷயம்.

இந்த 25 ஆண்டுகளில் உலகம் முழுவதும் பவர்பாயிண்ட் விளக்கங்கள் கோடிக்ககணக்கில் அளிக்கப்பட்டுள்ளன.

உலகின் நூறு கோடி கம்ப்யூட்டர்களில் அது உட்கார்ந்து கொண்டிருக்கிற‌து.

அது மட்டும் அல்ல மைக்ரோசாப்ட் கையக‌ப்படுத்திய நிறுவனங்களிலேயே பவர்பாயின்ட் தான் லாபகரமானதாக இருக்கிறது.

மைக்ரோசாப்ட் தனது வரலாற்றிலேயே முதன் முறையாக இந்த காலாண்டில் தான் நஷ்டத்தை சந்தித்திருப்பதாகவும் இதற்கு பெரும் செலவில் அது கையக‌ப்படுத்திய சில நிறுவன‌ங்களே காரணம் என்றும் சொல்லப்படும் நிலையில் பவர்பாயின்டின் அருமையை நன்றாக புரிந்து கொள்ளலாம்.

எனவே பவர்பாயின்டை வசைபாடுபவர்கள் கூட அதனை கொஞ்ச்ம வாழ்த்தலாம்.

————–
பவர்பாயிண்டை உருவாக்கிய ராபர்ட் காஸ்கின்சின் இணையதளம்.;http://www.robertgaskins.com/#powerpoint25

————

பவர்பாயின்டு விளக்கங்களை தேட என்றே ஒரு தேடியந்திரம் இருக்கிறது தெரியுமா? http://www.pptsearchengine.net/