Tag Archives: olympics

நான் ஏன் டிவிட்டர் செய்கிறேன்? உசேன் போல்ட்.

தடகள ராஜா உசேன் போல்ட்டின் குறும்பதிவுகளை டிவிட்டரில் படிக்கும் போது ஆரவமும் ஈடுபாடும் ஏற்பட்டாலும் இவற்றை எல்லாம் பதிவிடுவது உசேன் போல்ட் தானா,சாம்பியனான அவருக்கு இதெற்கெல்லாம் நேரம் இருக்கிறதா என்று கேட்க தோன்றலாம்.

இந்த ச‌ந்தேகத்திற்கு உசேன் போல்ட்டே மஷாபில் தொழில்நுட்ப தள‌த்திற்கு அளித்த பேட்டியில் பதில் அளித்திருக்கிறார்.

டிவிட்டர் செய்வதில் தனக்கு உதவி தேவைப்பட்டாலும் பெரும்பாலும் தானே குறும்பதிவுகளை வெளீயிடுவதாக போல்ட் கூறியுள்ளார்.

சும்மா ஒன்றும் இல்லை,போல்ட் எப்போதும் லேப்டாப்பை விட்டு பிரியாத தொழில்நுட்ப அபிமானியாக தான் இருக்கிறார்.அதோடு ஐபேட் மற்றும் காமிராவையும் எப்போதும் கொண்டு செல்கிறார்.இந்த சாத‌னங்களின் உதவியோடு அவரால் உடனுக்குடன் குறும்பதிவிட்டு ரசிகர்களை தொடர்பு கொள்ள முடிகிறது.

அந்த பேட்டியில் டிவிட்டர் செய்வது எதற்காக என்றும் போல்ட் விளக்கமாக கூறியிருக்கிறார்.

டிவிட்டர் செய்ய துவங்கிய போது பலரும் தன்னை பின்தொடர்வதை விரும்பவில்லை என்று குறிப்பிடும் போல்ட் நண்பர்களுடன் தொடர்பு கொள்ளவே டிவிட்டரை பயன்படுத்த துவங்கியதால் இவ்வாறு நினைத்தாக தெரிவிக்கிறார்.

ஆனால் டிவிட்டரை பயன்படுத்த துவங்கிய பின்னர் தான் அது தொடர்பு கொள்வதற்கு எத்தனை மகத்தான‌ சாதனம் என்பதை உணர்ந்து கொண்டு தீவிரமாக பயன்படுத்த துவங்கியதாகவும் குறிப்பிட்டுள்ளார்.

தனது திட்டங்களையும் எண்ணங்களையும் டிவிட்டர் வழியே பகிர்ந்து கொள்வதை மிகவும் விரும்புவதாக அவர் கூறியுள்ளார்.புகைப்படத்தை இணைக்க முடிந்தால் இன்னும் மகிழ்வதாகவும் கூறியுள்ளார்.

போல்ட் இதனை கச்சிதமாக செய்து வருகிறார் என்பது அவரது டிவிட்டர் பக்கத்தை பாரத்தாலே தெரிகிறது.

போல்ட் அபிமானிகளுக்கு மேலும் ஒரு நற்செய்தி இருக்கிறது.போல்ட் பெயரில் ஒரு வீடியோ கேம் மற்றும் ஐபோன் விளையாட்டு உருவாக்கப்பட்டுள்ளது.

————-

உசேன் போல்ட்டின் டிவிட்டர் பக்கத்தின் மூலம் அவரது ஆளுமையை புரிந்து கொள்ளும் முயற்சியாக எழுதப்பட்ட இந்த‌ ‘உசேன் போல்ட் என்னும் மனிதன்‘என்னும்
முந்தைய பதிவையும் படித்து பார்க்கவும்.

உசேன் போல்ட் என்னும் மனிதன்.

உசேன் போல்டு யார் என்பதை தெரிந்து கொள்ள வேண்டும் என்றால் அவரது டிவிட்டர் பக்கத்திற்கு சென்று பார்க்க வேண்டும்.தடகளத்தில் அவர் தான் ராஜா என்பது உலகிற்கே தெரிந்த விஷயம்.

லண்டன் ஒலிம்பிக்கில் மீண்டும் 100 மீட்டர் ஓட்டத்தில் தங்கத்தை வென்று தடகளத்தில் தனக்கு நிகராக யாரும் இல்லை என்று அவர் உணர்த்தியிருக்கிறார்.

ஆனால் உசேன் போல்ட் தடகள ராஜா மட்டும் அல்ல.தங்கமான மனிதரும் தான்!.

தடகள சாம்பியனின் அடையாளம் சாதனைகளும் வெற்றிகளும் என்றால் தன்னடக்கமும் ,தலைவணங்கும் பண்பும் நல்ல மனிதனுக்கான இலக்கணம்.

உசேன் போல்டிடம் இரண்டுமே நிறைந்திருக்கிறது.

போல்ட்டின் நல்ல மனதிற்கு அவரது டிவிட்டர் பக்கமே சான்றாக உள்ளது.

தங்கப்பதக்கத்தை வென்று உலகின் அதிவேக மனிதன் என்னும் பட்டத்தை தக்க வைத்து கொண்ட போல்ட் வெற்றி செருக்கில் முழங்கியிருக்கலாம்.நானே ராஜா என மார் தட்டியிருக்கலாம்.

ஆனால் அவர் அதையெல்லாம் செய்யவில்லை.

மாறாக ‘என்னை ஆதரித்ததற்கும் நம்பியதற்கும் ரசிகர்களுக்கும் நன்றி,இந்த பயணத்தில் நீங்களும் என்னுடன் இருந்தீர்கள்’என்று தனது வெற்றிக்காக ரசிகர்களூக்கு டிவிட்டர் மூலம் நன்றி தெரிவித்து கொண்டார்.

வெற்றியை கூட அவர் தங்கம் வென்றுவிட்டேன் என அறிவிக்கவில்லை.ஒலிம்பிக் இணையதள அறிவிப்பை அப்படியே மறு டிவீட் செய்திருந்தார்.இன்னும் சில டிவீட்கள் கழித்து சிஎன்என் செய்தியை மறு டிவீட் செய்தார்.

அது மட்டும் அல்ல டிவிட்டர் மூலம் அவரது வெற்றிக்கு வாழ்த்து தெரிவித்திருந்த இந்திய கிரிக்கெட் நட்சத்திரம் யுவராஜ் சிங்கின் வாழ்த்தை கவனித்து அதற்கு நன்றியும் தெரிவித்திருந்தார்.

அதற்கு அடுத்த குறும்பதிவில் வெற்றிக்களிப்பின் சாயலே இல்லாமல் நான் தயார்,மீண்டும் ஓட! என்று கூறியிருந்தார்.

உசேன் போல்ட் புது யுகத்தின் சாம்பியன் தான்.

தன்னை ஆராதிக்கும் ரசிகர்களோடு தொடர்பு கொள்வது தனது கடமை என்பதை உணர்ந்தவராக ஒலிம்பிக் வெற்றி நிமிடங்களுக்கு பிறகு அவர் டிவிட்டர் மூலம் தனது எண்ணங்களை ரசிகர்களோடு பகிர்ந்து கொண்டிருக்கிறார்.

கிட்டத்தட்ட போல்டின் கரம் பற்றி அவருக்கு வாழ்த்து தெரிவிக்கும் உணர்வையும் அதனை அவர் நன்றியோடு ஏற்று கொள்ளும் உணர்வை இந்த குறும்பதிவுகள் தருகின்றன.

போல்ட்டின் கடந்த கால குறும்ப‌திவுகளை பார்வையிட்டால் ஒலிம்பிக்கிற்கு அவர் தயாராகி வந்திருப்பதை புரிந்து கொள்ள முடிகிறது.எல்லாமே மிகவும் ஆழமானவை என்றோ போல்ட் என்னும் சாதனையாளர் பற்றிய உள்ளொளியை தரக்கூடியது என்றோ சொல்வதற்கில்லை.

ஆனால் பயிற்சிக்காக ஜிம்மிற்கு செல்வது பற்றியும் ,கடினாமான உடற்பயிற்சிக்கு பிறகு களைப்படைந்தது பற்றியும் அவர் குறிப்பிட்டிருந்தார்.இடையே தனது ஐபோன் விளையாட்டு பற்றியும் பிபிசி பேட்டி குறித்தும் தகவலை பகிர்ந்து கொண்டார்.

இன்னொரு குறும்பதிவில் ஆதரவுக்கு நன்றி லண்டனில் சந்திப்போம் என்று கூறியிருந்தார்.

இண்ஸ்டாகிராம் செயலி மூலம் நிறைய புகைப்படங்களை பகிர்ந்து கொள்ளவும் செய்தார்.(ரசிகர்களூக்கு இதை விட வேறு என்ன வேண்டும்)

ரசிகர்களோடு தொடர்பு கொள்ள விரும்பும் அவரது விருப்பதை இந்த குறும்பதிவுகள் உணர்த்த தவறவில்லை.அதோடு போல்ட்டின் தடகள் வாழ்க்கை பற்றிய மின்னல் கீற்றுகளாகவும் அமைந்திருந்தன.

ஐஸ் குளியல் அடுத்து கொண்டது பற்றியும்,ஒரு நாள் ஆசிரியராக செயல்பட்டது குறித்தும்,சிறுஅவர்களை சந்தித்து உரையாடி மகிழ்ந்தது பற்றியும் ஆர்வத்தோடு குறிப்பிட்டிருந்தார்.உசேன் போல்ட் என்னும் மனிதர் பற்றி உணர்த்தும் கீற்றுகளாக இவை அமைந்திருந்தன.

லண்டன் ஒலிம்பிக் நெருங்கியதும் ஒலிம்பிக் கிராமத்திற்கு வருகை தந்தது பற்றியும் துவக்க விழாவுக்கு தயாராவது பற்றியும் குறும்பதிவிட்டிருந்தார்.

துவக்க விழாவின் போது ஜமைக்கா தேசியக்கொடி ஏந்தி சென்றதை பெருமையோடு குறிப்பிட்டிருந்தார்.

இப்போது ஒலிம்பிக்கில் தங்கம் வென்று அந்த மகிழ்ச்சியையும் வெளிப்படுத்தி நன்றி தெரிவித்து கொண்டிருக்கிறார்.அப்படியே பதக்கம் வழ்னக்கும் நிகழ்ச்சிக்கு தயாராவதையும் குறிப்பிட்டிருந்தார்.

போல்ட்டின் இந்த சாதனை தருணத்தில் டிவிட்டரில் அவரை பின் தொடர்பவர்களின் எண்ணிக்கை ஒரு மில்லியனை கடதிந்ருப்பது மிகவும் பொருத்தமானது என்றே சொல்ல வேண்டும்.

போல்ட்டிற்கு பேஸ்புக் பக்கமும் இருக்கிறது.சொந்த இணையதளமும் இருக்கிறது.அவரது இணையதளத்தில் கோட் சூட்டில் ஒரு கார்ப்பரேட் நிறுவன அதிகாரி போல போல்ட் மிடுக்கோடு தோன்றும் படங்களையும் காணலாம்.

அது மட்டும் அல்ல போல்ட் பொது சேவைக்கான மையம் ஒன்றை தன் பெயரில் நடத்தி வருவது பற்றியும் தெரிந்து கொள்ள முடிகிறது.இந்த மையத்தின் மூலம் தன்னை தடகள மன்னனாக உருவாக்கிய ஜமைக்காவிற்கு அவர் தன் பங்கிற்கு திருப்பித்தர விரும்புவதையும் குறிப்பாக ஏழை சிறுவர்களின் நலனுக்காக செய்லபடுவதை கடமையாக கருதுவதையும் புரிந்து கொள்ள முடிகிறது.

பபோல்ட் பவிண்டேஷன் மூலம் அவர் ஆற்றும் பணிகள் அவர் மீது மேலும் மதிப்பை ஏற்படுத்துகிறது.

போல்ட் டிவிட்டர் முகவரி;http://twitter.com/usainbolt

இணையதள முகவரி;http://usainbolt.com/

ஒலிம்பிக் காலி இருக்கை டிவிட்டர் செய்கிற‌து.

ஒரு மரம் டிவிட்டர் செய்திருக்கிறது.காணாமல் போன பாம்பு டிவிட்டர் செய்திருக்கிறது.இப்போது ஒரு காலி இருக்கை டிவிட்டர் செய்து உலகின் கவனத்தை ஈர்த்து வருகிறது.

ஒரு இருக்கை எப்படி டிவிட்டர் செய்யும் என்று கேட்பதற்கில்லை.இருக்கை போல யாரேனும் டிவிட்டர் செய்கின்றனர் என்பதை எளிதாக புரிந்து கொள்ளலாம்.

அதாவது புனை பெயரில் டிவிட்டர் செய்வது போல யார் வேண்டுமானாலும் வேறு ஒரு வஸ்துவின் பின்னே ஒளிந்து கொண்டு அது பேசுவது போல டிவிட்டர் செய்யலாம்.

இப்படி தான் அமெரிக்க விலங்கியல் பூங்காவில் இருந்து பாம்பு ஒன்று காணாமல் போன போது வாலிபர் ஒருவர் அந்த பாம்பின் பெயரில் டிவிட்டர் கணக்கை பதிவு செய்து குறும்ப்திவுகளை வெளியிட்டு பரபரப்பை ஏற்படுத்தி கொஞ்சம் போல இணைய புகழை தேடிக்கொண்டார்.

இப்போது லண்டன் ஒலிம்பிக் நடைபெற்று கொண்டிருக்கும் போது எப்படி இணைய புகழ் தேடிக்கொள்வது என்று அறிந்த புத்திசாலி வாலிபர் ஒருவர் ஒலிம்பிக் அரங்கில் உள்ள காலி இருக்கையை டிவிட்டரில் பேச வைத்திருக்கிறார்.

லண்டன் ஒலிம்பிக் கோலகலமாக துவங்கி நடைபெற்றாலும் பல போட்டிகளுக்கான அரங்கில் காலி இருக்கைகள் அதிகம் இருப்பது சர்ச்சையை ஏற்படுத்தியுள்ளது.காலி இருக்கைகளுக்கான காரணம் பற்றிய விவாதம் ஒரு புறம் இருக்க யாரோ ஒருவர் இந்த காலி இருக்கை பேசினால் எப்படி இருக்கும் என்பது போல கற்பனை செய்து காரியத்திலும் இறங்கி விட்டார்.

எம்டி சீட் என்னும் பெயரில் டிவிட்டர் கணக்கை துவக்கியவர் அந்த இருக்கை யாருமற்ற தனிமையில் இருக்கும் மன உண்ரவை குறும்பதிவுகளாக பகிர்ந்து கொள்ள துவங்கினார்.

‘வெறுமையை தவிர வேறு எதையும் உணரவில்லை’ என்னும் அறிமுகத்தை கொண்ட அந்த காலி இருக்கையின் முதல் குறும்பதிவு ஒற்றை வார்த்தையில் அலுப்பாக வெளியானது.அடுத்த குறும்பதிவு நான் மிகவும் மன அயர்ச்சியோடு இருக்கிறேன் என வெளியானது.

நான் மிகவும் வெறுமையாக இருக்கிறேன் என அதன் நான்காவது குறும்பதிவு அமைந்திருந்தது.

அதன் பிறகு தான் அந்த காலி இருக்கை தன மனதை திறக்க துவங்கியது.

ஒலிம்பிக் இருக்கையாக வேண்டும் என்பது என்பது வாழ் நாள் லட்சியம்.ஊக்கமும் உற்சாகமும் கொண்ட விளையாட்டு ரசிகருக்கு இருக்கையாக இருக்க வேண்டும் என விரும்பினேன்.ஆனால் இப்போதோ ஒரு தோல்வியாக உண்ர்கிறேன்.

இப்படி வேதனையை வெளிப்படுத்திய அந்த இருக்கை அடுத்த குறும்பதிவில் ” அம்மா என் வாழ்க்கை ஒரு ஐகியா இருக்கை போல நிலையானதாக இருக்க வேண்டும் என விரும்பினால் ஆனால் நான் தான் லட்சிய இருக்கையாக வேண்டும் என‌ விரும்பினேன்” என குறை பட்டு கொண்டது.

என தாத்தா 1948 ஒலிம்பிக்கில் இருக்கையாக இருந்தது பற்றி பெருமையோடு கூறியுள்ளார்.அவர் வழியை தான் நான் பின்பற்றியிருக்கிறேன் என அடுத்த குறும்பதிவு அமைந்திருந்தது.

இந்த தருணத்திற்காக தான் 7 ஆண்டுகளாக காத்திருந்தேன் ஆனால் எல்லாம் எதற்காக? என ஒலிம்பிக்கிறகாக லண்டன் 7 ஆண்டுகளாக தயாராகி வந்ததை சுட்டிகாட்டி அமைந்த அடுத்த பதிவு காலி இருக்கையின் வேதனையை இன்னும் கூடுதலாகவே வெளிப்படுத்தி ‘நான் மாபெரும் தோல்வியாக உணர்கிறேன்’ என அடுத்த பதிவில் அழுது புலம்பியது.

தொடர்ந்து வெளியான குறும்பதிவுகள் சுவாரஸ்யமாகவே இருந்தன.எல்லாம் காலி இருக்கை பேசுவது போலவே இருந்தன.

ஒரு வேளை நான் பீச் வாலிபால் போன்ற விளையாட்டு அரங்கை தேர்வு செய்திருக்க வேண்டுமோ ?இப்படி ஒரு குறும்பதிவு.

இன்று மூன்றாவது நாள்;இன்னும் வெறுமை.இது ஒரு குறும்பதிவு.

இந்த வெறுமை யார் தவறு;எல்லோரும் நிர்வாகிகளை குறை சொல்கின்றனர்.ஆனால் நான் என்ன்னையே நொந்து கொள்கிறேன்.இது இன்னொரு குறும்பதிவு.

இதனிடயே பிரிட்டன் தங்கப்பதக்கம் வென்ற‌ செய்தியையும் பகிர்ந்து கொண்டது.அருகே வந்த ஒருவர் தள்ளி போய் வேறிடத்தில் அமர்ந்த ஏமாற்றத்தையும் பகிர்ந்து கொண்டது.

5 வது நாள் அன்று நாளை எனது நாளாக இருக்கலாம் என்ற‌ நம்பிக்கையை வெளியிட்டது.

இதற்குள் காலி இருக்கை டிவிட்டரில் பிரபலமாகி விட்டது.ஆம் அதற்கு 20 ஆயிரம் பின் தொடர்பாளர்கள் உண்டாகி விட்டனர்.டிவிட்டரில் நுழைந்த சில நாட்களிலெயே பல்லாயிரக்கணக்கில் ஆதரவு கிடைப்பது நட்சத்திரங்களுக்கு மட்டுமே சாத்தியம் .ஆனால் காலி இருக்கையும் இந்த அந்தஸ்தை பெற்று விட்டது.

இந்த ஆதரவையும் குறும்பதிவாக பகிர்ந்து கொண்ட இருக்கை ஒருவழியாக ஒருவர் தன் மீது அமர்ந்து விட்ட மகிழ்ச்சியையும் பகிர்ந்து கொண்டது.

ஆனால் அடுத்த சில குறும்பதிவுகளிலேயே இனியும் நான் ஒலிம்பிக் இருக்கையாக இருக்க விரும்பவில்லை என்னும் மன மாற்றத்தை வெளியிட்டது.பின்னர் இருக்கையாக இருப்பதில் இருந்து விலகி கொள்வதாக தெரிவித்தது.

நிச்சயம் அதன் பின் தொடர்பாளர்கள் அனைவரும் இந்த குறும்பதிவுகளை ரசித்திருப்பார்கள்.

ஒரு சிறு கதை போல இந்த குறும்பதிவுகள் அழகாக இல்லை.

டிவிட்டரில் வெற்றி பெற வேண்டும் என்றால் இது தான் சுட்சமம்.

கொஞ்சம் படைப்பற்றல் கொஞ்சம் கற்பனை போதும் டிவிட்டரில் நீங்களும் பிரபலமாகலாம்.

காலி இருக்கையின் டிவிட்டர் முகவரி;https://twitter.com/OlympicSeat

இண்டெர்நெட்டில் ஒலிம்பிக்சிற்கு தடை போட‌!

லண்டன் ஒலிம்பிக் கோலகலமாக துவங்கியுள்ள நிலையில் ஒலிம்பிக் ஜுரம் உலகம் முழுவதும் பரவியிருக்கிறது.இணையத்திலும் எங்கு திரும்பினாலும் ஒலிம்பிக் தான்.

ஒலிம்பிக் போட்டிகளை இணையத்தில் கண்டு களிப்பது எப்படி என வழிகாட்டும் குறிப்புகள்,ஒலிம்பிக்கை பின் தொடர உதவும் இணையதள‌ங்களின் பட்டியல் ஆகியவற்றுக்கும் குறைவில்லை.செய்தி தளங்களை பற்றி கேட்கவே வேண்டாம்,ஒலிம்பிக்கிற்கு என்று தனி பகுதியே அமைக்கப்பட்டுள்ளது.

தேடியந்திரமான கூகுல் வேறு தினம் ஒரு ஒலிம்பிக் லோகோ என கலக்கி கொண்டிருக்கிறது.

ஒலிம்பிக் வீரர்களின் டிவிட்டர் குறும்பதிவுகள் பற்றியும் பரப‌ரப்பாக பேசப்படுகிறது.

விளையாட்டு திருவிழா என்று வர்ணிக்கப்படும் ஒலிம்பிக் தொடர்பான எதிர்பார்ப்பும் பரபரப்பும் புரிந்து கொள்ளக்கூடியது தான்.

இப்படி இணையமே ஒலிம்பிக் மயமாகி இருக்கும் நிலையில் ஒலிம்பிக்கிற்கு எதிராக ஒரு இணைய சேவை அறிமுகமாகியிருக்கிறது தெரியுமா?

ஒலிம்பிக் செய்திகளை உங்கள் பார்வையில் இருந்து முற்றிலுமாக மறைத்து விடுவதற்காக உருவாக்கப்பட்டுள்ள சேவை அது.

எந்த இணையதளத்திற்கு சென்றாலும் ஒலிம்பிக் செய்திகள் கண்ணில் படுவதை விரும்பாத‌வர்கள் (அப்படி எத்தனை பேர் இருப்பார்கள்)பிரவுசரின் நீட்சியாக வரும் இந்த சேவையை டவுண்லோடு செய்து கொண்டால் அதன் பிற‌கு ஒலிம்பிக் தொடர்பான எல்லா செய்திகளும் அவர்கள் பார்வைக்கு முடக்கப்பட்டு விடும்.

ஆக ஒலிம்பிக் பற்றிய கவன‌ சிதறல் இல்லாமல் இணையத்தில் உலா வரலாம்.

ப்ரி ஆர்ட் ஆண்டு டெக்னாலஜி என்னும் தொழிநுட்ப இணையதளம் ஒல்விம்பிக்ஸ் என்னும் பெயரிலான இந்த பிரவுசர் நீட்சி சாதனத்தை உருவாக்கி உள்ளது.

ஒலிம்பிக்ஸ் வந்து விட்டது,எல்லா பெரிய நிகழ்வுகள் போல இப்போதும் இணையத்தில் நாம் விரும்பி செல்லும் இடங்களில் எல்லாம் ஒலிம்பிக்கின் ஆதிக்கம் தான்.என‌வே தடகளம் பற்றி எல்லாம் கவலைப்படாத இணையவாசிகள் வசதிக்காக இந்த சேவையை உருவாக்கி இருப்பதாக இந்த தளத்தில் குறிப்பிடப்பட்டுள்ள‌து.

குரோம்,பயர்பாக்ஸ்,சபாரி ஆகிய பிரவுசர்களில் இது செயல்படுகிறது.

விளையாட்டு பிரியர்களும்,ஒலிம்பிக் ரசிகர்களும் இதனை கொஞ்சம் ஓவர் என கருதலாம்.

ஆனால் விஷயம் என்னவென்றால் இண்டெர்நெட்டில் எல்லாவற்றிற்கும் வாய்ப்பு இருக்கிறது என்பதை உணர்த்தும் சேவை இது.

ஒலிம்பிக்கை பின் தொடர‌ விருப்பமில்லாதவர்கள் எல்லா இணையதளங்களிலும் ஒலிம்பிக் பற்றிய செய்திகளே இடம் பெறூம் போது வெறுப்படைய வாய்ப்பிருக்கிற‌து அல்லவா?

அவர்கள் தங்கள் அளவில் ஒலிம்பிக்கிற்கு தடை விதித்து கொள்ள இந்த சேவை வழி செய்கிறது.

விளையாட்டு உணர்வின் உச்சமாக கருதப்படும் ஒலிம்பிக் போட்டியை இப்படி விரோதமாக நினைப்பதை ஏற்று கொள்ள முடியாது தான்.ஆனால் குறிப்பிட்ட நிக்ழ்வுகளின் போது எல்லா தளங்களும் அந்த நிகழ்வு பற்றியே பேசுவதும் அலசி ஆராய்வதும் பலருக்கு அயர்ச்சியை தருவது நிச்சயம்.

இது போன்ற நேரங்களில் குறிப்பிட்ட அந்த நிகழ்வுகளை குறிச்சொல் பூட்டு போட்டு முடக்கி விடக்கூடிய பொதுவான ஒரு இணைய தடுப்பு சேவையை உருவாக்கினாலும் நன்றாக தான் இருக்கும்.

இணையதள முகவரி;http://fffff.at/olwimpics/