Tag Archives: parents

சிறார்களுக்கான தேடியந்திரம் கிட்லே!

kiddle-search-engine-is-the-google-for-kidsஇணையத்தில் சிறுவர், சிறுமிகள் பயன்படுத்துவதற்காக என்று தனியே தேடியந்திரங்கள் இருப்பதை நீங்கள் அறிந்திருக்கலாம். இந்த வரிசையில் தான் கிட்லேவும் வருகிறது.

சிறார்களுக்கு என்று தனியே தேடியந்திரம் உருவாக்கப்படுவதற்கான தேவையை எளிதாக புரிந்து கொள்ளலாம். தேடியந்திரங்களில் தேடும் போது, பிள்ளைகளின் வயதுக்கு பொருத்தமில்லாத தேடல் முடிவுகளும் தோன்றலாம். பிஞ்சு மனதை நஞ்சாக்க கூடிய ஆபாச பக்கங்களும் கண்ணில் படலாம். அது மட்டும் அல்ல, பெரும்பாலான பக்கங்கள் குழந்தைகளால் புரிந்து கொள்ள முடியாத அளவுக்கு சிக்கலாக இருக்கலாம்.

இந்த காரணங்களினால் தான் குழந்தைகளுக்கான தேடியந்திரங்கள் தேவைப்படுகின்றன. இந்த தேடியந்திரங்கள் குழந்தைகள் பாதுகாப்பாக பயன்படுத்தக்கூடிய வகையில் தேடல் முடிவுகளை பட்டியலிடுகின்றன. ஆபாச பக்கங்கள் உள்ளிட்ட அவர்களுக்கு பொருத்தமில்லாத பக்கங்களை வடிகட்டி நீக்கி விடுகின்றன. எனவே சிறார்கள் இதை தைரியமாக பயன்படுத்தலாம். அதைவிட முக்கியமாக பெற்றோர்கள் அதிக கவலையோ,அச்சம் இல்லாமல் இவற்றை தங்கள் பிள்ளைகள் பயன்படுத்த அனுமதிக்கலாம்.

கிட்லேவும் இந்த அம்சங்களை எல்லாம் கொண்டிருக்கிறது. குறிப்பாக இதன் முகப்பு பக்கம் சிறார்களுக்கு ஏற்ற வகையில் அமைந்துள்ளது. வண்ணமயமான பின்னணியில், அசத்தலான ரோபோ இதன் லோகோவாக அமைந்துள்ளது. தேடல் முடிவுகளும் சிறார்களை கவரும் வகையில் வடிவமைக்கப்பட்டுள்ளது.
வழக்கமாக கூகுளில் தேடுவது போலவே இதிலும் கீவேர்டு எனும் குறிச்சொல்லை டைப் செய்து தேடலாம். இணைய பக்கங்கள் தவிர, புகைப்படங்கள், செய்திகள் மற்றும் வீடியோக்களை தேடலாம்.

தேடல் பட்டியலில் இடம்பெறும் முடிவுகள் பளிச் என கண்ணில் படும் வகையில் அவற்றுக்கு அருகே பெரிய அளவிலான புகைப்படங்கள் இடம்பெறுகின்றன. எழுத்துருவும் பெரிதாகவே இருக்கிறது. இவை எல்லாம் பிள்ளைகளை கருத்தில் கொண்டு வடிவமைக்கப்பட்டவை.

தேடல் பட்டியலில் தோன்றும் முடிவுகள் பொதுவானவை அல்ல; சிறார்களுக்கு என்று தேர்வு செய்யப்பட்டவை. இதற்காக என்றே ஆசிரியர் குழுவை கொண்டு சிறார்களுக்கு பொருத்தமானவை என தேர்ந்தெடுக்கப்பட்ட இணையதளங்களில் இருந்து முடிவுகள் எடுக்கப்படுகின்றன. இத்தகைய பாதுகாப்பான முடிவுகளே முதல் மூன்று இடங்களில் பட்டியலிடப்படுகின்றன.

அதன் பிறகு வரும் நான்கு முடிவுகள், பொதுவான இணையதளங்களில் இருந்து எடுக்கப்பட்டவை என்றாலும், சிறுவர், சிறுமியர் எளிதாக புரிந்து கொள்ளக்கூடிய வகையில் அமைந்தவையாக இருக்கின்றன.
8 ம் முடிவுகளுக்கு மேல் இடம்பெறுபவை, பெரியவர்களுக்கான தளங்களில் இருந்து எடுக்கப்பட்டவை. சிறார்களுக்கு இவை கடினமாக இருக்கலாம். ஆனால் பாதுகாப்பானவை!

எல்லா முடிவுகளுமே வடிகட்டப்படவை என்பதால் பிள்ளைகளுக்கு பாதிப்பை ஏற்படுத்தாது என எதிர்பார்க்கலாம்.
அணுக்கள் அல்லது அகராதி போன்ற வார்த்தைகளை டைப் செய்து தேடினால் இந்த தேடியந்திரத்தின் அணுகுமுறையை சிறப்பை உணர்ந்து கொள்ளலாம். இவற்றுக்காக பட்டியலிடப்படும் முடிவுகள் பெரும்பாலும் கல்வி நோக்கில் அல்லது தகவல் நோக்கிலான இணையதளங்களில் இருந்தே அமைகின்றன. செய்திகளும் அப்படி தான். வீடியோக்களும் அப்படி தான்.

பொதுவாக புகைப்படங்கள் மற்றும் வீடியோக்களில் தான் ஆபத்து அதிகம். ஆனால் கிட்லேவில் தேடும் போது கல்வி சார்ந்த வீடியோக்களே தோன்றுகின்றன.

இது பாதுகாப்பானது மட்டும் அல்ல, பிள்ளைகள் தேவையான இணைய பக்கங்களை இணைய கடலில் தேடி அல்லாடாமல் தங்களுக்கு பொருத்தமானவற்றை எளிதாக தேடிக்கொள்ளவும் உதவுகிறது.
ஆனால் ஒன்று கிட்லே தனக்கென சொந்த தேடல் நுட்பத்தை கொண்டிருக்கவில்லை. கூகுளின் தேடல் நுட்பத்தை தான் பயன்படுத்துகிறது. தனிப்பட்ட நோக்கத்திற்கு ஏற்ற தேடியந்திர வசதியை உருவாக்கி கொள்ள அனுமதிக்கும் கூகுளின் கஸ்டம்ஸ் சர்ச் வசதியை அடிப்படையாக கொண்டே இது செயல்படுகிறது. மேலும் பாதுகாப்பிற்கான வடிகட்டலுக்கும், கூகுளின் சேப் சர்ச் வடிகட்டல் வசதியே பயன்படுத்தப்படுகிறது.

இந்த தேடியந்திரம் கவனத்தை ஈர்த்த போது, கூகுள் அறிமுகம் செய்துள்ள சிறார்களுக்கான தேடியந்திரம் என பல செய்திகளில் குறிப்பிடப்பட்டாலும், இதற்கும் கூகுளுக்கும் தொடர்பு இல்லை. இது கூகுள் தேடல் நுட்பத்தை பயன்படுத்துகிறது. அதனால் என்ன இதுவரை உருவாக்கப்பட்ட அநேக சிறுவர் – சிறுமியர் தேடியந்திரங்களும் கூட கூகுளை அடிப்படையாக கொண்டு உருவாக்கப்பட்டவை தான்.

கிட்லே பற்றி மேலும் சில குறிப்புகள்: இது பயனாளிகள் பற்றிய தனிப்பட்ட விவரங்களை சேகரிப்பதில்லை என்கிறது. அந்த வகையிலும் பிள்ளைகளுக்கு பாதுகாப்பானது. மேலும் இதன் முகவரி டாட் கோ என முடிகிறது. ஆங்கிலத்தில் சில்டர்ன் ஒன்லி என்பதன் அடையாளமாம் இது.

ஆனால், இந்த தேடியந்திரத்திற்கான அறிமுக பகுதியில், இது செயல்படும் விதம் பற்றி விளக்கப்பட்டிருக்கிறதே தவிர, இதன் பின்னே உள்ள நிறுவனம் அல்லது குழு பற்றிய தகவல்கள் இல்லை.

நிற்க, கிட்லேவின் வடிகட்டல் வசதி பாதுகாப்பனதாக கருதப்பட்டாலும், இதனால் வடிவகட்டப்படும் வார்த்தைகள் மற்றும் முடிவுகள் பிள்ளைகளுக்கு பாரபட்சமான தகவல்களை வழங்ககூடியதாக இருப்பதாக விமர்சனங்கள் முன்வைக்கப்பட்டுள்ளன. பொதுவாக வடிகட்டல் என்றால் வரக்கூடிய பிரச்சனை இது என்றாலும், பிள்ளைகளுக்கு பாதுகாப்பானை தகவல்கள் என்று நாம் வடிகட்டக்கூடியவை எந்த அளவு சரியானவை என்பது விவாத்த்திற்கு உரியது தான்.

அதோடு இன்னொரு சுவாரஸ்யமான கேள்வி, பிள்ளைகள் எதுவரை இது போன்ற குழந்தை தேடியந்திரங்களை பயன்படுத்தலாம் மற்றும் எப்போது அவர்களை பெரியவர்களாக அனுமதித்து கூகுள் அல்லது பிங் அல்லது டக் டக் கோ போன்ற தேடியந்திரங்களை பயன்படுத்த அனுமதிக்கலாம்?

தேடியந்திர முகவரி; http://www.kiddle.co/

1. தேடியந்திரங்கள் தொடர்பான தமிழ் இந்துவில் எழுதும் ஆ’வலை’ வீசுவோம் தொடரை வாசிக்க:

2. சிறுவர்களுக்கான தேடியந்திரங்கள்: http://cybersimman.com/2014/11/07/search-54/

பேஸ்புக் வழி தண்டனைகள்!

பெற்றோர்களை எதிர்த்து பேசும் பிள்ளைகள் இனி கொஞ்சம் எச்சரிக்கையாக இருப்பது நல்லது.அதே போல அப்பா அம்மாவுக்கு கீழ் படியாத பிள்ளைகளும் தங்களை மாற்றிக்கொள்ள வேண்டும்.இல்லை என்றால் பேஸ்புக் தண்டனைக்கு ஆளாக வேண்டியிருக்கும்.

அதென்ன பேஸ்புக் தண்டனை?

பிள்ளைகளுக்கு புரியும் மொழியிலேயே பேச வேண்டும் என நினைக்கும் பெற்றோர்கள் தேர்ந்தெடுக்கும் புதுமையான தண்டனை!

பிள்ளைகள் சொல் பேச்சு கேட்காமல் இருந்தாலோ அல்லது தவறு செய்தாலோ ஒரு சில பெற்றோர்கள் இப்போது கோபம் கொள்வதில்லை;அட்வைஸ் செய்வதில்லை.மாறாக பேஸ்புக் வழியே தண்டனை வழங்குகின்றனர்.

இப்படி தான் அமெரிக்காவின் டெனிஸ் அபோட் என்னும் பெண்மணி தனது 13 வயது மகள் அவா மற்றவர்கள் முன் தன்னை அவமதிக்கும் வகையில் நடந்து கொண்டதால் அதிருப்தியும் ஆவேசமும் அடைந்தார்.

வழக்கமான அம்மாவாக இருந்தால் மகளை அந்த இடத்திலேயே நாசுகக்காக கண்டித்திருப்பார்,அல்லது விட்டிற்கு வந்தவுடன் எல்லோரிடமும் பணிவுடன் நடந்து கொள்வதன் அவசியம் குறித்து அன்பாகவோ ஆவேசமாகவோ எடுத்து சொல்லியிருப்பார்.

ஆனால் டெனிஸ் அபோட்டோ இப்படி எல்லாம் செய்யவில்லை!மாறாக மகளின் பேஸ்புக் பக்கத்திற்கு சென்று அதில் இருந்த புகைப்படத்தை நீக்கி விட்டு அந்த இடத்தில் வாய் மீது பெருக்கல் குறி இடப்பட்டிருக்கும் சிறுமியின் படத்தை இடம் பெறச்செய்திருந்தார்.அதோடு அந்த படத்தின் கீழ் ‘வாயை மூடிக்கொண்டிருப்பது எப்படி என்பது எனக்கு தெரியவில்லை,நான் பேஸ்புக் அல்லது செல்போனை பயன்படுத்த அனுமதிக்கப்படவில்லை.தயவு செய்து ஏன் என்று கேளுங்கள்!ஏன் என்றால் ஒவ்வொருவருக்கும் நான் சரியாக பதில் சொல்ல வேண்டும் என்று என்பது என் அம்மாவின் உத்தரவு’ என்னும் வாசகமும் இடம் பெற்ச்செய்திருந்தார்.

தனியே அழைத்து அட்வைஸ் செய்வதை விட மகளின் நண்பர்கள் அனைவரும் பார்க்கும் படி இப்படி பேஸ்புக் மூலம் செய்த தவற்றை எடுத்து சொன்னால் தான் பேஸ்புக்கே கதியென இருக்கும் மகளுக்கு புரியும் என நினைத்தே அவர் இப்படி உலகமே பார்க்க கூடிய வகையில் பேஸ்புக் மூலம் பகிரங்கமாக தனது கோபத்தை வெளிப்படுத்தினார்.

இப்படி ஏதாவது செய்தால் தான் மற்றவர்கள் முன்னால் மோசமாக நடந்து கொண்டால் எப்படி இருக்கும் என்பதை உணர்ந்து கொள்ளக்கூடிய அளவுக்கு தாக்கத்தை ஏற்படுத்த முடியும் என்று அவர் நினைத்தார்.

மகள் தான் செய்த தவற்றை உணர்ந்து கொள்ள வேண்டும் என்று தான் இவ்வாறு செய்தாலும் அவரது இந்த செயல் இணைய உலகில் எதிர்பாராத பரபரப்பை ஏற்படுத்தி விட்டது.இப்படி பகிரங்கமாக தண்டனை தருவது சரியா என்று கேள்வி எழுப்பினர்.ஆனால் பெரும்பாலனோர் இது சரியான தண்டனையே என்று கருத்து தெரிவித்திருந்தனர்.

இணையம் மூலம் இத்தனை பரபரப்பு ஏற்படும் என்பதை எதிர்பார்க்கவில்லை என்றாலும் டெனிஸ் தான் செய்தது தவறு இல்லை என்றே கூறுகிறார்.மகளின் மனதில் தாக்கத்தை ஏற்படுத்தக்கூடிய வகையில் செயல்பட வேண்டும் என்பதே தமது நோக்கம் என்று அவர் எந்த வித வருத்தமும் இல்லாமல் கூறுகிறார்.

பேஸ்புக் வழியிலான இந்த பகிரங்க தண்டனைக்கு இலக்கான அவரது மகள் அவாவும் இதனை பெரிதாக எடுத்து கொள்ளவில்லை.தவறு செய்தால் கண்டிப்பது என அம்மாவின் வழக்கம் இப்போதும் அதை தான் செய்திருக்கிறார் என்று அந்த பெண் கூலாக சொல்லியிருக்கிறாள்.

ஆனால் சமூக ஊடக போக்கை கவனிக்கும் நிபுணர்கள் தான் கொஞ்சம் கவலை அடைந்துள்ளனர்.காரணம் இப்படி பகிரங்க தண்டனை தரும் போக்கு அதிகரித்து வருவது தான்.

கடந்த ஏப்ரல் மாதம் அமெரிக்காவின் இல்லினாய்ஸ் நகரை சேர்ந்த மான்ட்ரயல் ஒயிட் என்னும் தந்தை தனது மகள் வீடில் திருடும் பழக்கம் கொண்டிருந்ததால் ,நான் திருடி என்று எழுதிய அட்டையை கையில் பிடித்த படி பள்ளி முன் நிறக் வைத்து விட்டார்.

அதே போல கடந்த சில மாதங்களுக்கு முன் டாமி ஜோர்டன் என்னும் அமெரிக்க அப்பா மகல் பேஸ்புக்கில் தனக்கெதிராக கருத்து தெரிவித்ததை அடுத்து கஆவேசமாகி அவளது லேப்டாப்பை துப்பாக்கியால சுட்டுத்தள்ளி அந்த காட்சியை யூடியுப்பிலும் பதிவேற்றியது நினைவிருக்கலாம்.

பெற்றோர்களின் இந்த பேஸ்புக் கால கோபம் நல்லதா,கெட்டதா தெரியவில்லை.

பெற்றோர்க்கு கற்றுத்தர ஒரு இணைய தளம்

பிள்ளைகள் முன் பெற்றோர்கள் மாணவர்கள் போல கைக்கட்டி நிற்க வேண்டி இருக்கும் என்று கடந்த தலைமுறையைச் சேர்ந்த பெரியவர்கள் நிச்சயம் நினைத் துக்கூட பார்த்திருக்க மாட்டார் கள். ஆனால் தொழில்நுட்பத்தின் வளர்ச்சியின் இண்டெர் நெட்டின் தாக்கம் இதைத் தான் செய்து இருக்கிறது.
.
பிறக்கும்போதே இமெயில் முகவரியோடு குழந்தைகள் பிறக்கத் துவங்கியிருக்கும் காலத்தில் கம்ப்யூட்டரும், இண்டெர்நெட்டும் எல்லா துறைகளிலும் ஊடுருவி இருக்கிறது. இந்தக்கால தலைமுறையினர் மிகச் சுலபமாக இண்டெர் நெட்டுக்கு பரீட்சைமாகி விடுகின்றனர். ஆனால் கடந்த தலைமுறையைச் சேர்ந்தவர்கள்  இண்டெர்நெட் என்றால் ஏதோ தொழில்நுட்ப பூதம் என்பது போல விலகி நிற்கின்றனர்.

பலர் காலத்தின் போக்கை அறிந்து இண்டெர்நெட்டை பயன்படுத்த கற்று வருகின்றனர். பலர் தங்கள் பிள்ளைகள் மூலமே இண்டெர் நெட் பயன்பாட்டை அறிந்துகொள்கின்றனர்.  வீட்டில் அம்மா  அப்பாவுக்கு, தாத்தா  பாட்டிகளுக்கு பிள் ளைகளும் பேரக்குழந்தைகளும் தொழில்நுட்ப அரிச்சுவடியில் பாடம் நடத்துவதை பல வீடுகளில் பார்க்கலாம். டிவி விளம்பரம் ஒன்றில் வருவதுபோல இண்டெர் நெட் பற்றி மகன் விளக்கிக் கூறுவதை பார்த்து தாய் வியந்து போய் நிற்பதுதான் இந்த தொழில்நுட்ப யுகத்தின் யதார்த்தம்.

பெரியவர்களும், வயதின் தயக்கத்தை உதறித் தள்ளி இந்த யுகத்துக்குள் அடியெடுத்து வருகின்றனர். ஆனால் பல நேரங்களில் பிள்ளைகளுக்கு பெற்றோர்கள் கம்ப்யூட்டர் மற்றும் இண்டெர் நெட் கேட்கக்கூடிய கேள்விகளுக்கு பதில் அளிக்கும் பொறுமை இல்லாமல் போகலாம்.  அதிலும் வேலை பளு அதிகம் உள்ளவர்கள் ஒரே மாதிரியான சின்னச் சின்ன சந்தேகங்களுக்கு மீண்டும் மீண்டும் விளக்கம் அளிக்க நேர்வதால் வெறுத்துப் போகலாம்.

இதுபோன்ற நேரங்களில் பெற்றோர்களுக்கும் வேதனை தராமல் அதே நேரத்தில் பிள்ளைகளின் நேரமும் பாழாகமல்  கைக்கொடுக்க ஒரு இணைய தளம் அமைக்கப்பட்டு உள்ளது. பெற்றோர்களுக்கு தொழில் நுட்பத்தை கற்றுக்கொடுங்கள் என்று பொருள் தரும் வகையில் (டீச் பேரெண்ட்ஸ் டெக்) அமைக்கப்பட்டுள்ள அந்த இணையதளம், கம்ப்யூட்டர் இண்டெர் நெட் தொடர்பாக புதிதாக பயன்படுத்தக்கூடியவர் களுக்கு ஏற்படக்கூடிய அடிப் படையான சந்தேகங்களை தீர்த்து வைப்பதற்கான வழிகளை கொண்டு இருக்கிறது. அதிலும் வீடியோ மூலமான செய்முறை விளக்கங்களாக இவை அமைந்துள்ளன. உதாரணத்துக்கு கம்ப்யூட்டரை பயன்படுத்த துவங்கும்போது என்னவெல்லாம் செய்ய வேண்டும் என்று குறிப்பிடப் பட்டுள்ளன. அதேபோல இணைய தளத்தில் உலாவர என்னவெல்லாம் செய்ய வேண் டும் என்று குறிப்பிடப்பட்டு உள்ளன.

எந்த பிரிவில் உதவி தேவையோ அதனை கிளிக் செய்து அந்த வீடியோவை அப்பாவுக்கோ, அம்மாவுக்கோ, தாத்தாவுக்கோ  அல்லது பாட்டிக்கோ அனுப்பி வைக்கலாம். தேடியந்திர உலகில் முன்னணியில் இருக்கும் கூகுல் நிறுவனத்தில் பணியாற்றும்  நபர்கள் இணைந்து இந்த தளத்தை உருவாக்கி உள்ளனர்.

கூகுலைப்போலவே எளிமை யான வடிவமைப்பை கொண்ட இந்த தளத்தின் மூலமாக அன்புள்ள அம்மாவுக்கு/அப்பா வுக்கு எனும் அறிமுகத்தோடு தேவைப்படும் வீடியோ வழிமுறையை கிளிக் செய்து அனுப்பி வைக்கலாம். பெற்றோர்களின் இண்டெர்நெட் பயன்பாடு குறித்து பிள்ளை கள் கொண்டிருக்கும் எண்ணத்தையும் வெளிப்படுத்த வழி செய்திருக்கின்றனர்.  பிள்ளைகளுக்கு பெற்றோர்கள் கற்றுத் தந்த காலம் மாறி பிள்ளைகள் பெற்றோருக்கு கற்றுத் தரும் காலத்தை உணர்த்தும் இணைய தளம் இது.

இணைய தள முகவரி: www.teachparentstech.org