Tag Archives: smart

நூலிழையில் மின்சக்தி உற்பத்தி; வியக்க வைக்கும் விஞ்ஞான ஆய்வு

carbon-yarn-1000-2017-08பேட்டரி இல்லாமலே ஸ்மார்ட்போனை சார்ஜ் செய்து கொள்ள முடிந்தால் எப்படி இருக்கும்? அமர்களமாக தான் இருக்கும், ஆனால் இது எப்படி சாத்தியம் என கேட்கலாம். இந்த கேள்விக்கு விடை அளிக்கும் வகையில் தொழில்நுட்ப உலகில் பல ஆய்வுகள் சுறுசுறுப்பாக நடைபெற்று வருகின்றன. இந்த ஆய்வுகள் பல மட்டங்களில், பலவிதமாக நடைபெற்றுக்கொண்டிருக்கின்றன. ஒரு பக்கம் பார்த்தால் பேட்டரி தொழில்நுட்பத்தை இன்னும் மேம்படுத்த முயன்றுக்கொண்டிருக்கின்றனர். இன்னொரு பக்கம் பார்த்தால், பேட்டரியே இல்லாமல் மின்சக்தியை உருவாக்கி கொள்வதற்கான வழியை தேடிக்கொண்டிருக்கின்றனர்.

இரண்டாம் பிரிவிலான ஆய்வின் பிரதான நோக்கம் ஸ்மார்ட்போன்கள் அல்ல; ஸ்மார்ட் ஆடைகள் அல்லது வியரபில் என சொல்லப்படும் அணிகணிணிகள். நாம் அணியும் சட்டை அல்லது மேலாடையை அதிநுட்ப துணிகளால் உருவாக்கும் போது அவற்றில் சின்னஞ்சிறு சென்சார்களை பொருத்தி தகவல்களை திரட்டவும், பெறவும், இன்னும் பலவித நவீன செயல்களுக்கும் பயன்படுத்திக்கொள்ளலாம். இதயத்துடிப்பை கண்காணிப்பது துவங்கி, பிட்னஸ் முன்னேற்றத்தை கணக்கிடுவது வரை பலவித பயன்கள் இந்த ஸ்மார்ட் ஆடைகளை முன்வைத்து விவரிக்கப்பட்டாலும், இந்த அற்புதங்களுக்கு மிகப்பெரிய தடையாக இருப்பது பேட்டரி போதாமை தான்.
ஆம், ஸ்மார்ட் ஆடைகள் இயங்க வேண்டும் எனில் அவற்றில் பொதிக்கப்பட்டுள்ள சென்சார்கள் செயல்பட பேட்டரி தேவை. ஆடையில் சென்சார்களை தொழில்நுட்ப இழையாக நெய்துவிடும் அளவுக்கு விஞ்ஞானம் வளர்ந்திருக்கிறது என்றாலும், பேட்டரி நுட்பத்தில் அந்த அளவு முன்னேற்றம் இல்லை. விளைவு ஸ்மார்ட் ஆடைக்கு தேவையான ஆற்றலை வழங்க பேட்டரியை தனியே சுமந்து செல்ல வேண்டும். அப்படியே சின்னஞ்சிறிய பேட்டரிகளை உருவாக்கினாலும் கூட, அவற்றின் செயல்திறன் சொற்மாகவே இருக்கும் என்பதால் அரைமணிக்கு ஒரு முறை சார்ஜ் செய்யும் தேவை ஏற்படலாம்.
எனவே தான், சுயமாகவே மின்சக்தியை உற்பத்தி செய்து கொள்ளும் சாதனங்களை உருவாக்குவதில் கவனம் செலுத்தி வருகின்றனர். சாதனங்கள் என்றால் மிகவும் சிக்கலானவை இல்லை, ஒரு மெல்லிய நூலிழை போன்றவை தான். அந்த நூலிழையை இழுத்தாலோ அல்லது சுருக்கும் வகையில் திரும்பினாலே மின்சக்தி எட்டிப்பார்க்கும் வகையிலான கண்டுபிடிப்பிற்கான முயற்சியில் ஆய்வுக்குழுவினர் மூழ்கியுள்ளனர்.
இத்தகைய ஆய்வில் எதிர்கால நம்பிக்கையை ஏற்படுத்தும் வகையில் மைல்கல் செய்தி ஒன்று அண்மையில் வெளியாகியுள்ளது. கார்பன் நுண்குழாய்களை கொண்டு அதி நவீன நூலிழை உருவாக்கம் தொடர்பான செய்தி தான் அது.
அமெரிக்காவின் டெக்சாஸ் பல்கலைக்கழகம் மற்றும் தென்கொரியாவின் ஹான்யாங் பல்கலைக்கழக ஆய்வாளர்களை கொண்ட சர்வதேசக்குழு, உருவாக்கியுள்ள இந்த அதி நவீன நூலிழைக்கு ’டிவிஸ்ட்ரான்’ என பெயரிடப்பட்டுள்ளது. இந்த டிவிஸ்ட்ரானை முறுக்கினால் அல்லது நீட்டினால் அதிலிருந்து மின்சாரம் உற்பத்தியாகிறது. இந்த மின்சாரத்தை அறுவடை செய்து கொள்ளலாம் என்பதும், இந்த இழையை ஸ்மார்ட் ஆடை தயாரிப்பு உள்ளிட்ட பல்வேறு பயன்பாடுகளுக்காக பயன்படுத்திக்கொள்ளலாம் என்பதும் தான் ஆய்வில் கவனிக்க வேண்டிய முக்கிய அம்சங்கள்.
ஒரு நூலிழையில் இருந்து மின்சக்தி உற்பத்தியாகும் என்பதை நம்புவது கடினமாக இருக்கலாம். ஆனால், இந்த நூலிழை நாம் அறிந்த சாதாரண நூலிழைகள் போன்றது அல்ல. இவை கார்பன் நேனோடியூப் என சொல்லப்படும் கார்பன் நுண் குழாய்களால் உருவானவை.
இந்த இடத்தில் கார்பன் நுண்குழாய்கள் பற்றி சில முக்கிய விஷயங்கள்: கார்பன் நுண்குழாய்கள் மிகவும் மெல்லியவை. அதாவது கண்ணால் பார்க்க முடியாத அளவுக்கு மெல்லியவை. எந்த அளவு மெல்லியவை என்றால், மனித தலைமுடியை விட 10 ஆயிரம் மடங்கு மெல்லியவை. ஆனால் அதே நேரத்தில் எக்கை விட 100 மடங்கு உறுதியானவை மற்றும் தாமிரத்தை விட அதிகமாக மின்சக்தியை கடத்தும் ஆற்றல் கொண்டவை. இந்த அற்புத ஆற்றல் காரணமாக கார்பன் நுண்குழாய்களை பலவித ஆய்வுகளில் பயன்படுத்தி வருகின்றனர்.
டெக்சாஸ் பல்கலை ஆய்வுக்குழுவினரும் இந்த காரணத்தில் தான் கார்பன் நுண்குழாய்களை கொண்டு நூலிழைகளை உருவாக்கி இருக்கின்றனர். விளைவு இந்த நூலிழைகளை இழுத்தால் அல்லது முறுக்கினால் அவற்றில் இருந்து மின்சக்தி உற்பத்தியாகும். ஆனால் அதற்கு முன் இவற்றை எலக்ட்ரோலைட் என சொல்லப்படும் கலைவையில் மூழ்க வைக்க வேண்டும். உடனே இழைகள் மின்னாக்கம் பெறுகின்றன. இந்த இழைகளை முறுக்கும் போது, அவற்றில் உருவாகியுள்ள அயனிகள் நெருக்கமாக வருகின்றன. இவற்றை அப்படியே பாய்ந்தோடச்செய்து மின்சக்தியாக அறுவடை செய்து கொள்ளாம் என்கின்றனர் ஆய்வாளர்கள்.
இதில் கவனிக்க வேண்டிய விஷயம் என்னவெனில், டிவிஸ்ட்ரான் இழைகளை மின்னாக்கம் பெற வைக்க, அவற்றை வெறும் உப்பு தண்ணீர் கரைசலில் மூழ்க வைத்தாலும் போதும் அல்லது, அவை மீது இத்தகைய கரைசலை பூசினாலும் போதும். அதன் பின் இந்த இழைகள் சுருங்கும் போது அல்லது நீளமாகும் போது தானாக மின்சக்தி உற்பத்தியாகும். இந்த இழைகளை, ஆடைகளில் நெய்து அணிந்து கொண்டால், நம்முடைய உடலில் இருந்து வெளியாகும் வியர்வையே கூட இவற்றுக்கான உப்பு கரைசலாகலாம் என்பதும், நம்முடைய மூச்சுக்காற்று மற்றும் நடை அசைவுகளே இவற்றை கசக்கிப்பிழிந்து மின்சக்த்தி பெறுவதற்கு போதுமானது என்பதும் தான் கவனிக்க வேண்டிய விஷயம்.
இந்த அளவுக்கு எளிதானது இல்லை என்றாலும், இது போன்ற எண்ணற்ற சாத்தியங்கள் இருக்கின்றன. எனவே தான், இந்த ஆய்வு தொடர்பான கண்டுபிடிப்பு சயன்ஸ் இதழில் வெளியான பின், எண்ணற்ற இணைய இதழ்களிலும், நாளிதழ்களிலும் கட்டுரையாக வெளியாகி கவனத்தை ஈர்த்துள்ளது.
டிவிஸ்ட்ரான் இழையை ஆய்வுக்குழுவினர் சிறிய அளவில் தான் உருவாக்கியுள்ளனர். இதனைக்கொண்டு ஒரு சிறிய எல்.இ.டி விளக்கை எரிய வைத்துள்ளனர். ஆனால் எதிர்காலத்தில் இவற்றின் சாத்தியங்கள் எல்லையற்றவையாக இருக்கின்றன என்பது தான் முக்கியம்.
ஏற்கனவே குறிப்பிட்டபடி, ஸ்மார்ட் ஆடைகளில் இவற்றை நெய்து, அணிகணிகளுக்கு தேவையான மின்சக்தியை நம்முடைய உடல் அசையில் இருந்தே உருவாக்கி கொள்ளலாம். அதே போல, இந்த இழைகளை கடல் அலைகளுக்கு நடுவே வைத்து, அலைகள் மூலம் மின்சக்தியை உற்பத்தி செய்யலாம் என்கின்றனர்.
எந்திரவியல் ஆற்றலை இப்படி மின்சக்தியாக மாற்றக்கூடிய பொருட்கள் பைசோஎலெட்ரிக் தன்மை கொண்டவையாக குறிப்பிடப்படுகின்றன. இத்தகைய பொருட்களை கொண்டு நடைபெற்று வரும் ஆய்வுகளுக்கான உந்துசக்தியாகவும் இந்த ஆய்வு அமைந்துள்ளது.

கட்டுரைக்கு துணை நின்ற இணைப்புகள்:
1. http://www.utdallas.edu/news/2017/8/25-32663_No-Batteries-Required-Energy-Harvesting-Yarns-Gene_story-wide.html
2. http://www.popsci.com/nano-carbon-yarn-electricity#page-3
3. https://techcrunch.com/2017/08/24/carbon-nanotube-twistron-yarn-generates-electricity-when-stretched/

நன்றி; மின்னம்பலம் இணைய இதழில் எழுதியது

davek2

மறந்து வைத்தால் நினைவூட்டும் குடை!

நீங்கள் எடுத்துச்செல்லும் குடை உங்களுடன் பேசினால் எப்படி இருக்கும்? கிக்ஸ்டார்ட்டரில் அறிமுகமாகி இருக்கும் புதிய குடை இந்த கேள்வியை கேட்டு, குடை உங்களுடன் தொடர்பு கொள்வதற்கான புதிய வழியை உருவாக்கி இருப்பதாகவும் சொல்கிறது.
குடை எதற்கு நம்முடன் பேச வேண்டும்?
அதனை மறந்துவிட்டுச்செல்லாமல் நினைவூட்ட தான்!

ஆம், கொட்டும் மழையிலோ கொளுத்தும் வெய்யிலிலோ எடுத்துச்செல்லும் குடையை மறக்காமல் திரும்ப எடுத்து வருவதை உறுதி செய்யும் ஆற்றல் கொண்டதாக இந்த நவீன குடை உருவாக்கப்பட்டுள்ளது.
குடையை மறந்து வைத்து விட்டு அதன் பிறகு வருந்தும் அனுபவம் பெரும்பாலானோருக்கு இருக்கலாம். ஒவ்வொரு முறையும் குடையை மறக்காமல் இருக்க வேண்டும் என என்ன தான் உறுதி எடுத்திக்கொண்டாலும் மறதி வென்று வெறுப்பேற்றலாம்.

இந்த மறதி பிரச்சனையை வெல்வதற்கான வழியாக குடையே தன்னை நினைவு படுத்திக்கொள்ளும் சின்ன நடைமுறை அற்புதத்தை தான் டெவேக் அலர்ட் எனும் இந்த கிக்ஸ்டார்ட்டர் குடை சாத்தியமாக்குகிறது.
எப்படி?
இந்த குடையின் கைப்பிடியில் சின்னதாக ப்ளுடூத் வசதி கொண்ட அருகாமை உணரும் சிப் இருக்கிறது. இந்த சிப் சதா உங்கள் ஸ்மார்ட்போனுடன் தொடர்பில் இருக்கும். அதாவது நான் இருக்கிறேன் என்று சொல்லிக்கொண்டே இருக்கும்.

குடையை கையில் எடுத்ததுமே இந்த அம்சம் விழித்திக்கொள்ளும். குடையை விட்டு நீங்கள் குறிப்பிட்ட தொலைவு சென்றீர்கள் என்றால்,குடையை வைத்து விட்டு செல்கிறீர்களே என்று யாரோ சொல்வது போல குடையே உடனே போனுக்கு ஒரு நினைவூட்டல் அனுப்பி வைக்கும். ஆக, எங்கு சென்றாலும் குடையை மறந்துவிட்டு வரும் பிரச்சனையே இருக்காது.
ஆண்ட்ராய்டு மற்றும் ஐபோனுடன் இணைந்து செயல்படக்கூடிய ஆற்றல் கொண்டது இது.
குடையில் உள்ள பேட்டரி அசைவற்று இருக்கும் போது ஸ்லீப் மோடில் இருக்கும் என்பதால் ஓராண்டுக்கும் மேல் பேட்டரியின் ஆயுல் இருக்கும் என்று குறிப்பிடப்பட்டுள்ளது.

குடைக்கான நினைவூட்டும் செயலியை எளிதாக டவுண்லோடு செய்து கொள்ளலாம். குடைக்கான செயலி நினைவூட்டல் சேவை தவிர, வானிலை சேவையையும் வழங்க கூடியது.

இதைப்பார்த்தே இன்று மழை வருமா? குடையை எடுத்துச்செல்ல வேண்டுமா என தீர்மானித்துக்கொள்ளலாம்.
இந்த குடை சாதாரண குடையும் அல்ல; வழக்கமாக பயன்படுத்தி தூக்கியெறிந்து விடும் குடை போல அல்லாமல், நீண்ட காலம் பயன்படுத்த ஏற்ற வகையில் பல உறுதியான அம்சங்களை கொண்டது. எனவே இதன் விலையும் அதிகம். அமெரிக்க டாலர் கணக்கில் 100 டாலர். இந்த அளவுக்கு காஸ்ட்லியான குடையை தயங்காமல் வாங்க வைக்க எப்படி என யோசித்த போது, இதை மறக்காமல் எடுத்து வரும் வசதி நினைவில் வந்து இந்த நினைவூட்டும் அம்சத்தை உருவாக்கியதாக குடையின் பின்னே உள்ள நிறுவனத்தை நடத்தும் டேவ் காங் சொல்கிறார்.
ஆரம்பத்தில் ஜிபிஎஸ் மூலம் இதை செய்ய நினைத்தவர், பயன்படுத்தவும் எளிதாக இருக்க வேண்டும் என்பதற்காக ப்ளுடூத் முறையை தேர்வு செய்திருக்கிறார்.

குடை பற்றி அறிய: https://www.kickstarter.com/projects/896798832/davek-alert-umbrella-never-lose-your-umbrella-agai?ref=mashable

——–

iphone

பார்வையற்றோருக்கு விழியாக இருக்க உதவும் செயலி

ரு சின்ன உதவி செய்வதில் திருப்தி அடையும் குணமும் மனமும் உள்ளவர்கள் உற்சாகமாக உதவிக்கரம் நீட்டி உலகம் முழுவதும் உள்ள பார்வையற்றவர்களுக்கு விழியாக இருந்து வழி காட்டக்கூடிய செயலி அறிமுகமாகி இருக்கிறது. இந்த செயலியின் மனிதநேய தன்மைக்கு ஏற்ப அறிமுகமான சில நாட்களிலேயே இந்த செயலி 40 ஆயிரத்துக்கும் மேற்பட்ட பங்கேற்பாளர்களை ஈர்த்திருக்கிறது.

பி மை ஐஸ் ( Be My Eyes) எனும் அந்த செயலி ஐபோனில் செயல்படும் வகையில் உருவாக்கப்பட்டுள்ளது. ஒரு சில நிமிடங்களை மற்றவர்களுக்காக ஒதுக்கி சின்ன உதவிகளை செய்யத்தயாராக இருப்பவர்களை , பார்வையற்றவர்களுடன் இணைப்பது இதன் நோக்கமாக இருக்கிறது.இப்படி முன்பின் தெரியாதவர்கள் செய்யும் சின்ன உதவிகள் பார்வையற்றோருக்கு மகத்தான உதவியாக அமைவதை இது சாத்தியமாக்க விரும்புகிறது.

சுருக்கமாக சொன்னால், பார்வையற்றவர்களுக்கு மற்றவர்கள் விழியாக இருந்து வழி காட்ட வைக்கிறது இந்த செயலி! எப்படி? பார்ப்போம்.

பார்வையற்றவர்கள் மற்றும் அவர்களுக்கு உதவ தயாராக இருப்பவர்கள் என இரு தரப்பினரும் இந்த செயலியை தங்கள் போனில் தரவிறக்கம் செய்து கொண்டு, உதவுபவர்களாக அல்லது உதவி கோருபவர்களாக பதிவு செய்து கொள்ள வேண்டும். அதன் பிறகு, பார்வையற்ற உறுப்பினர்களுக்கு மற்றவர் உதவி தேவைப்படும் நேரங்களில் இந்த செயலி மூலம் அவர்கள் உதவி கோரலாம்.

பார்வையற்றவர்கள் மற்றும் பார்வை குறைபாடு கொண்டவர்கள் மிகுந்த தன்னம்பிக்கையுடன் தங்கள் பணியை மேற்கொள்ளக்கூடியவர்களாக இருந்தாலும் சில நேரங்களில் அவர்களும் மற்றவர்களின் விழிப்பார்வை தேவைப்படலாம். உதாரணத்திற்கு பால் பாக்கெட் அல்லது உணவு பொருளின் மீதான காலாவதி தேதியை தெரிந்து கொள்ளும் தேவை ஏற்படலாம். அல்லது கையில் வைத்திருக்கும் பழரசம் மாம்பழமா? ஆப்பிளா என அறிய விரும்பலாம். அல்லது தெரு முனையில் இருக்கும் அறிவிப்பு பலகையின் வாசகத்தை படித்து பார்க்கும் தேவை ஏற்படலாம்.

இது போன்ற நேரங்களில் அவர்கள் அருகே இருப்பவரின் உதவியை நாட வேண்டியிருக்கும். அருகே யாரும் இல்லாவிட்டால் அல்லது அருகே இருப்பவர்கள் செவி சாய்க்க மறுத்தால் காத்திருக்க வேண்டும். இந்த இடத்தில் தான் பி மை ஐஸ் செயலி உதவிக்கு வருகிறது. இத்தகைய நேரங்களில் பார்வையற்றவர்கள் செயலியை ஆன் செய்து உதவி தேவை என கோரிக்கை வைத்தால் போதும். அந்த கோரிக்கை பங்கேற்பாளர்களுக்கு அனுப்பி வைக்கப்படும். அதை பார்த்தததும் உதவ தயாராக இருப்பவர்கள் சம்மதம் தெரிவித்தால் உடனே ஐபோனில் இருக்கும் வீடியோ உரையாடல் வசதி மூலம் இருவரும் இணைக்கப்படுவார்கள். அதன் பிறகு மறு முனையில் இருப்பவர் பார்வையற்றவர் தனது போனில் காட்டும் காட்சியை பார்த்து அவரது கேள்விகளுக்கு பதில் அளித்து வழிகாட்டலாம்.

உதவ தயாராக இருப்பவர்களுக்கு இது சாதாரண செயலாக இருந்தாலும் உதவி கோருபவருக்கு இது சரியான நேரத்தில் கிடைத்த வழிகாட்டுதலாக இருக்கும்.

இந்த கைகொடுத்தலை உலகின் எந்த மூளையில் இருப்பவரும் செய்யக்கூடிய வகையில் டிஜிட்டல் உறவுப்பாலம் அமைக்கும் வகையில் பி மை ஐஸ் உருவாக்கப்பட்டுள்ளது.

டென்மார்க் நாட்டை சேர்ந்த தெல்லி கிறிஸ்டன் என்பவர் தனது நிறுவனம் மூலம் இந்த செயலியை வடிவமைத்திருக்கிறார். இவரும் பார்வை குறைபாடு கொண்டவர் தான். இரண்டு ஆண்டுகளுக்கும் மேலாக உழைத்து இதை உருவாக்கி இருக்கிறார்.

இந்த மனிதநேய செயலியை இதுவரை 40 ஆயிரம் பேருக்கு மேல் தரவிறக்கம் செய்து ப்ங்கேற்பாளராக பதிவு செய்து கொண்டுள்ளனர். 1500 க்கும் மேற்பட்ட பார்வையற்றவர்களும் பயனாளிகளாக பதிவு செய்து கொண்டுள்ளனர். இதுவரை 3,000 உதவிகளுக்கு மேல் நிகழ்ந்துள்ளன.

உதவுபவர்கள் மற்றும் பயனாளிகள் இருவருமே மற்றவர்களை மதிப்பீடு செய்யலாம்.ஏதேனும் தவறான பயன்பாடு தலைதூக்கினால் அதை தவிர்க்க இந்த மதிப்பீடு உதவும் என கருதப்படுகிறது.

அடுத்ததாக ஆண்ட்ராய்டு சாதனங்களுக்கான செயலி வடிவமும் உருவாக்கப்பட்டு வருகிறது.

 

பி மை ஐஸ் செயலியின் இணைய பக்கம்:http://www.bemyeyes.org/

 

செயலிகள் சிறப்பு பற்றிய முந்தைய பதிவுகள்;

அகதிகள் நிலை உணர்த்தும் செல்போன் செயலி!http://cybersimman.com/2012/06/27/app/

 

 

பிரிந்தவர்களை சேர்த்து வைக்கும் அற்புதமான செயலி; http://cybersimman.com/2010/12/20/apps-2/

அதிவேக ஸ்மார்ட்போன்கள்

ஸ்மார்ட்போன்களின் செயல்திறனை கணக்கிடுவதும் மதிப்பிடுவதும் சிக்கலான வேலை. இதில் வல்லுனர்கள் மட்டும் அல்ல, ஸ்மார்ட்போன் அபிமானிகளும் மாறுபடுவார்கள். தங்கள் அபிமான போன் தான் செயல்திறன் மிக்கது எனும் தீர்மானமான எண்ணம் பலரிடம் இருக்கலாம். அதோடு விலை மற்றும் பயன்பாட்டுத்தன்மையை கருத்தில் கொண்டால் இது இன்னும் சிக்கலாகும்.
ஆனால் உலகின் அதிவேகமான ஸ்மார்ட்போன் எது எனும் கேள்விக்கு பதில் சொல்ல இந்த சிக்க எல்லாம் இல்லை. பின்லாந்து நாட்டைச்சேர்ந்த ஆல்டோ பல்கலைக்கழகா ஆய்வாளர்கள், டவுன்லோடு மற்றும் அப்லோடு வேகத்தை அடிப்படையாக கொண்டு உலகின் வேகமான ஸ்மார்ட்போன்களை பட்டியலிட்டுள்ளனர். சும்மாயில்லை, உலகம் முழுவதும் உள்ள 4,500 ஸ்மார்ட்போன்களை பல்வேறு செல்போன் நெட்வொர்க்கில் பயன்படுத்திப்பார்த்து இந்த பட்டியலை தயாரித்துள்ளனர்.
டவுண்லோடு வேகப்படி பார்த்தால் முதல் 10 ஸ்மார்ட்போன்கள் பட்டியலில் சாம்சங் காலெக்ஸி நோட் 3 முதலிடத்தில் உள்ளது. இதன் வேகம் 137.8Mbps .அடுத்த இடத்தில் இருப்பது சீன தயாரிப்பான ஒன் பிளஸ் ஒன். இதன் வேகம் 137.4Mbps. 3 வது இடத்தில் ஐபோன் 6 இருக்கிறது. சாம்சங் காலெக்ஸி எஸ் 4 மற்றும் எஸ் 5 அடுத்த 2 இடங்களிலும் அதை அடுத்து எல்ஜியின் ஜி3 மற்றும் ஜி 2 உள்ளன. நோக்கியா லூமியா 1520 க்கு 8 வது இடம்.
பதிவேற்றும் (அப்லோட்) வேகத்தின் படி பார்த்தால் சாம்சங் காலெக்ஸி எஸ்5 முதலிடத்தில் உள்ளது. காலெக்ஸி எஸ் 4 க்கு 2 வது இடம் என்றால் எல்ஜி- ஜி2 வுக்கு மூன்றாவது இடம். நோக்கியா லூமியா 1020 க்கு 5 வது இடம்.
புகைப்பட பகிர்வு சேவையான இன்ஸ்டாகிராமில் படங்களை பகிர்வதும் பேஸ்புக்கில் வீடியோவை பதிவேற்றுவதும் பிரபலமாக இருக்கும் நிலையில் அப்லோடு வேகமும் முக்கியம் தான்.
இந்த ஆய்வை நடத்தி பலகலைக்கழக பேராசிரியர் ஜுக்கா மேனர் (Jukka Manner ) அதிக விலை என்பது அதிக இணைய வேகத்துடன் தொடர்புடையது அல்ல என்பதை இந்த முடிவுகள் உணர்த்துவதாக கூறியுள்ளார்.
ஆல்டோ பல்கலைக்கழகத்தின் ஸ்கூல் ஆப் எலக்டிரிகல் இஞ்சினியரிங் 2013 முதல் நெட்ரேடார் எனும் செயலி மூலம் மொபைல் இணைய வசதியை ஆய்வு செய்து வருகிறது. நெட்ரேடார் செயலி மூலமாக இணைய பயன்பாடு பற்றிய விவரங்கள் சேகரிக்கப்படுகிறது. இந்த செயலி டவுண்லோடுக்கும் கிடைக்கிறது. நீங்களும் கூட இதில் பங்கேற்கலாம்.; https://www.netradar.org/

———–

இது ஆப்பிள் ரகசியம் !
ஆப்பிளின் ஐபோன் பற்றி நீங்கள் விரிவாக அறிந்து வைத்திருக்கலாம். ஐபோன் பற்றி பல அறிய தகவல்களும் அத்துபடியாக இருக்கலாம். ஆனால் ஐபோன் விள்ம்பரத்தை உற்று கவனித்து இருக்கிறீர்களா? அதில் எப்போதுமே ஒரு பொதுத்தன்மை இருக்கும் தெரியுமா? அந்த விளம்பரங்களில் எல்லாம் காட்டப்படும் நேரம் காலை 09.41 ஆக இருக்கும். இதன் பின்னே ஏதோ சங்கேத குறியீடு இருப்பதாக எல்லாம் நினைக்க வேண்டாம். இதன் பின்னே இருப்பது மர்மமும் அல்ல; அழகான சின்ன ரகசியம் , அவ்வளவு தான். தி அட்லாண்டிக் பத்திரிகை இதை கண்டுபிடித்து சொல்லியிருக்கிறது.
09.42 என்பது 2007 ஜனவரில் ஆப்பிளின் ஸ்டீவ் ஜாப்ஸ், முதல் முறையாக ஐபோனை அறிமுகம் செய்த நேரம். 2010 வரை இந்த நேரமே விளம்பரத்தில் இடம்பெற்றது. 2010 ல் இது 09.41 என மாற்றப்பட்டது. இது ஜாப்ஸ் முதல் ஐபேடை அறிமுகம் செய்த நேரம். அதன் பிறகு ஐபோன் மற்றும் ஐபேட் விளம்பரங்களில் எல்லாம் 09.41 எனும் நேரமே இடம் பெற்றுள்ளது.
ஆப்பிளின் புதிய பொருள் அறிமுகத்துக்கான கீநோட் உரை மிகவும் பிரசித்தம். இந்த உரையை எப்போதுமே 40 வது நிமிடத்தில் அறிமுகம் நிகழும் வகையில் அமைப்பதும் ஆப்பிளின் வழக்கமாம். பெரிய திரையில் தயாரிப்பு தோன்றும் போது அதில் உள்ள நேரமும் பார்வையாளர் கடிகாரத்தில் உள்ள நேரமும் ஒன்றாக இருக்க வேண்டுமாம். ஆனால் 40 நிமிடத்தை துல்லியமாக அடைவது கடினம் என்பதால் ஒரு நிமிடம் கூடுதலாக வைத்துள்ளனர்.
எல்லாம் சரி, ஆப்பிளின் ஸ்மார்ட்வாட்ச் விளம்பரம் என்ன நேரம் காட்டும்?

————-

ஓபரா மினி உலாவியின் மைல்கல்

சமீபத்தில் இந்தியாவில் பயனாளிகள் எண்ணிக்கையில் வாட்ஸ் அப் செயலி 70 மில்லியன் தீவிர பயனாளிகள் எனும் மைல்கல்லை எட்டியது. இப்போது மொபைல் உலாவியான ( பிரவுசர்) ஓபரா மினி இந்தியாவில் 50 மில்லியன் பயனாளிகள் எண்ணிக்கையை எட்டியுள்ளது. இந்த மைல்கல் தொடர்பான செய்தியை பகிர்ந்து கொண்டுள்ள ஓபரா, இந்தியாவில் பேஸ்புக் மற்றும் வாட்ஸ் அப் செயலிகளுக்கு அடுத்த இடத்தில் தனது பிரவுசர் இருப்பதாகவும் கூறியுள்ளது. அதோடு உலக அளவில் இந்தியாவின் தான் ஓபரா மினி பயனாளி பரப்பு அதிகம் இருப்பதாகவும் தெரிவித்துள்ளது.
இந்தியாவில் ஓபரா பிரவுசர் பயன்படுத்தும் ஸ்மார்போன் பயனாளிகள் எண்ணிக்கை கடந்த ஆண்டு 110 சதவீதம் அதிகரித்து மொத்த பயனாளிகளில் பாதியாக இருப்பதாகவும் கூறியுள்ளது.
இணைய பக்கத்தை 90 சதவீதம் சுருக்கி தருவது உட்பட பல்வேறு சிறப்பம்சங்கள் நிறுவன பிரவுசரில் இருப்பதாக ஓபரா தெரிவிக்கிறது. நீங்களும் வேண்டுமானால் பயன்படுத்தி பரிசோதித்துப்பாருங்கள்!.

—————-

சாம்சங்கின் புதிய போன் வரிசை

ஸ்மார்ட்போன் சந்தையில் போட்டி நாளுக்கு நாள் அதிகரித்து வரும் நிலையில் சாம்சங் நிறுவனம் புதிய வரிசையிலான ஸ்மார்ட்போன்களை அறிமுகம் செய்ய தயாராகி வருவதாக சொல்லப்படுகிறது. சாம்மொபைல் இணையதளம் இது தொடர்பான செய்தியை வெளியிட்டுள்ளது. சாம்சங் வழக்கப்படி இந்த புதிய வரிசை போன்களும் ஒற்றை எழுத்து பெயர் கொண்டிருக்கும் என தெரிகிறது. இதனிடையே காலெக்ஸி எஸ்- 5 க்கு தொடர்ச்சியாக பிராஜக்ட் ஜிரோ எனும் பெயரில் எஸ்- 6 க்கான தயாரிப்பு நடைபெற்று வருவதாகவும் சொல்லப்படுகிறது.
இது ஒருபுறம் இருக்க ஏற்கனவே கசிந்த தகவல்களை உறுதி செய்வது போல சாம்சங் டைசன் இயங்கு தளத்திலான ஸ்மார்ட்போன்களை விரைவில் அறிமுகம் செய்ய இருப்பதாக செய்திகள் வெளியாகி கொண்டிருக்கின்றன. குறைந்த விலையிலான இந்த போன்கள் இந்திய சந்தையில் தான் முதலில் அறிமுகம் செய்யப்பட இருப்பதாகவும் சொல்லப்படுகிறது. ஏற்கனவே சாம்சங் தனது கியர் வாட்சில் டைசன் இயங்கு தளத்தை பயன்படுத்தி வருகிறது.

———–
செயலி செய்யலாம் வாங்க!
எங்கு பார்த்தாலும் செயலிகள்( ஆப்ஸ்) பற்றி தான் பேச்சாக இருக்கிறது. செயலிகள் பயன்படுத்துவது சுலபமாக இருப்பது போல புதிய செயலிகளை உருவாக்குவதும் சுலபமானது தான் என்று பலரும் சொல்வதை நீங்களும் கேட்டிருக்கலாம். அட நாமும் கூட செயலி செய்து பார்க்கலாமே என்ற ஆசை இருந்தால் அதற்கான இலவச இணைய வகுப்பை ஆஸ்திரேலிய பலகலைக்கழகம் துவங்கியுள்ளது.அந்நாட்டின் சார்லஸ் ஸ்டர்ட் பலகலை (Charles Sturt University ) இணைய வகுப்பு மற்றும் வெப்பினார் மூலம் இந்த பயிற்சியை வழங்க இருக்கிறது. போன்கேப் எனும் ஓபன் சோர்ஸ் பிரேம் ஒர்க் மூலம் இந்த செயலி பயிற்சியை அளிக்கிறது.
ஆண்ட்ராய்டு, ஐபோன் மற்றும் விண்டோஸ் என எல்லா போன்களுக்குமான செயலிகளை உருவாக்கலாம்.
நவம்பர் மற்றும் டிசம்பர் மாதங்களில் இந்த பயிற்சி வகுப்புகள் நடைபெற உள்ளன.
இணையம் வழி கல்வி செல்வாக்கு பெற்று வரும் நிலையில் இது புதியதொரு நல்வரவு; மேலும் விவரங்களுக்கு: http://www.itmasters.edu.au/free-short-course-cross-platform-mobile-app-development/

————–
செல்ஃபீ எச்சரிக்கை

இது செல்ஃபீ யுகம். ஸ்மார்ட்போன் வைத்திருக்கும் பலரிடம் இப்படி சுயபடம் எடுத்து வெளியிடும் பழக்கம் இருக்கிறது. எந்த நிகழ்வையும் சுயபடம் எடுக்கும் பழக்கம் நல்லதா ? கெட்டதா? என்பது ஒருபுறம் இருக்கட்டும் சுயபட பழக்கம் பணியிட்த்தில் பாதிப்பை ஏற்படுத்தலாம் என்று சமீபத்தில் ஆய்வு ஒன்று தெரிவிக்கிறது. ஜார்ஜியா பல்கலைக்கழகத்தை சேர்ந்த ஆய்வாளர்கள் இது தொடர்பாக நடத்திய ஆய்வில் சுயபடம் எடுப்பது , நார்சிஸம் எனப்படும் சுய ரசிப்பின் அடையாளமாக இருக்கலாம் என தெரியவந்துள்ளது. அது மட்டும் அல்ல, சுயபடம் எடுப்பது ஒருவரது சுய கட்டுப்பாடு இனமையையும் குறிக்கலாம் என இந்த ஆய்வு தெரிவிக்கிறது. இது ஒருவரது வேலைவாய்ப்பையும் பாதிக்கலாம். வேலைக்கு ஆள் எடுக்கும் பணியில் ஈடுபட்டுள்ள நிறுவன அதிகாரிகள் பலர் , சமூக ஊடகங்களில் ஆய்வு செய்வதாகவும் அப்போது அதிக சுயபடம் வெளியிட்டவர்களை நிராகரிக்கின்றனர் என்றும் தெரியவந்துள்ளது. சுயவெளிப்பாட்டில் இத்தனை ஆர்வம் கொண்டவர்கள் ஒரு குழுவாக சிறப்பாக செயல்படும் தன்மை குறைவாக பெற்றிருப்பார்கள் என்று இதற்கு வல்லுனர்கள் இதற்கு விளக்கம் தருகின்றனர். ஆக, செல்ஃபீ பிரியர்கள் கொஞ்சம் யோசித்து படம் எடுப்பது நல்லது.

———-
நன்றி; தமிழ் இந்துவுக்காக எழுதியது.

ஸ்மார்ட்கீ வந்தாச்சு

ஆண்ட்ராய்டு ஆதிக்கம்

ஸ்மார்ட்போன் சந்தையில் ஆண்ட்ராய்டு ஓஎஸ் ஆதிக்கம் தொடர்கிறது. சமீபத்தில் ஆய்வு அமைப்பான ஸ்ட்ராடஜி அனல்டிக்ஸ் வெளியிட்டுள்ள தகவல் படி, 2014 ம் ஆண்டின் மூன்றாம் காலாண்டில் உற்பத்தியான ஸ்மார்ட்போன்களில் 84 சதவீதம் ஆண்ட்ராய்ட் அடிப்படையிலானது. ஆனால் முந்தைய காலாண்டை விட இது நூலிழை அதாவது 1 சதவீதம் குறைவு என்றாலும் ஆண்ட்ரய்டு முன்னிலை இடத்தில் நீடிக்கிறது.
இரண்டாவது இடத்தில் ஆப்பிளின் ஐஓஎஸ் (12 சதவீதம் ) இருக்கிறது. மைக்ரோசாப்டின் விண்டோஸ் போன்கள் 3 சதவீத்துடன் அடுத்த இடத்தில் உள்ளது. பிளாக்பெரிக்கு ஒரு சதவீதம். ஆண்ட்ராய்டு போன்கள் தொடர்பான புள்ளிவிவரங்களில் இன்னொரு கவனிக்கத்தக்க விஷயம் அதில் சாம்சங் ஸ்மார்ட்போனின் பங்கு 35 சதவீத்தில் இருந்து 25 சதவீதமாக குறைந்திருப்பது. சீன ஸ்மார்ட்போன் நிறுவனங்களின் போட்டியே இதற்கு காரணம்.
ஆனால் ஆண்ட்ராய்டு ஆதிக்கம் செலுத்தினாலும் வளர்ச்சி கோட்டை பொருத்தவரை அது உச்சத்தை தொட்டுவிட்டதாக வல்லுனர்கள் கருதுகின்றனர். எனவே சந்தை பங்கை இதற்கு மேல் அதிகரிக்க முடியாது, தக்க வைத்துக்கொண்டாலே பெரிய விஷயமாக இருக்கும் என்கின்றனர்.
இதே போல , ஸ்மார்ட்போன் சந்தையில் லெனோவோ மூன்றாவது இடத்தை பிடித்துள்ளது. சீனாவிடன் லெனோவோ , மோட்டாரோலா மொபிலிட்டையை வாங்கியதை அடுத்து இந்த கூட்டணி மூன்றாவது இடம் பிடித்துள்ளது. சர்வதேச அளவில் ஸ்மார்ட்போன் சந்தையில் சீனாவின் ஜியோமி மூன்றாவது இடத்துக்கு வந்த நிலையில் இந்த கூட்டு அந்நிறுவனத்தை 4 வது இடத்துக்கு தள்ளியுள்ளது. ஐ.டீசி (IDC) ஆய்வு தெரிப்விக்கும் தகவல் இது.
——————

மைக்ரோசாப்ட் லூமியா முதல் பார்வை

லூமியா போன்களில் நோக்கியா பெயருக்கு பதிலாக மைக்ரோசாப்ட் பெயரே முன்னிறுத்தப்படும் என அறிவிக்கப்பட்டுவிட்டது. சரி , மைக்ரோசாப்ட் பெயரில் வெளியாகும் லூமியா போன் எப்படி இருக்கும் என அறிவதில் ஆர்வம் இருக்கிறதா? சீனாவின் வெய்போ இணையதளம் இதற்கான பதிலை அளித்துள்ளது. இந்த தளத்தில் மைக்ரோசாப்ட் லூமியாவின் போன் எனும் தகவலுடன் புதிய போனின் புகைப்படம் கசிந்துள்ளது. சீன அரசிடம் சான்றிதழ் பெற்ற RM-1090 போன்களில் இவை இடம்பெற்றிருப்பதாக தெரிவிக்கப்பட்டுள்ளது.
லூமியா 530 போலவே காட்சி அளிக்கும் இந்த போனின் மேல்பகுதியில் நோக்கியா லோலோவுக்கு பதில் மைக்ரோசாப்ட் பெயர் இடம் பெற்றுள்ளது. பின் பக்கத்திலும் மைக்ரோசாப்டின் பெயர் தான்.
9.32 மீமீ அகலம் , இரட்டை சிம் வசதி,1,905mAh பேட்டரி, 3 ஜி வசதி ஆகியவை இருப்பதாக சொல்லப்படுகிறது.
வரட்டும் பார்க்கலாம்.

——-

அமேசானின் அதிரடி

மின்வணிக ஜாம்பவானான அமேசான் அமெரிக்க சந்தையில் அமேசான் பயர் ஸ்மார்ட்போனை அறிமுகம் செய்ததும் அது எதிர்பார்த்த அளவுக்கு வரவேற்பை பெறாததும் பழைய செய்தி. 83 மில்லியன் டாலர் மதிப்பிலான போன்கள் விற்காமல் தேங்கி இருப்பதாக ஒரு செய்தி தெரிவிக்கிறது. இந்த நிலையில் அமேசான், ஸ்மார்ட்போனை இத்தோடு விட்டுவிடும் என்று யாரேனும் நினைத்தால் அது தவறாக தான் இருக்கும். ஏனெனில் அமேசான் தொடர்ந்து ஸ்மார்ட்போன் திட்டத்தில் ஈடுபட்டு எதிர்காலத்தில் அடுத்த போன்களை அறிமுகம் செய்ய இருப்பதாக பார்டியூன் பத்திரிகை தெரிவிக்கிறது.
அமேசான் பயன் போன் விஷயத்தில் விலையில் தவறு செய்த்தாகவும் அதுவே மோசமான வரவேற்பிற்கு காரணம் என அமேசான் உயர் அதிகாரி ஒருவர் கூறியுள்ளார்.
இபுக் ரீடர் சாதனமான கிண்டில் விஷயத்தில் இப்படி தான் ஆரம்பத்தில் நடந்தது ஆனால், தவறுகள் சர் செய்யப்பட்ட பின் கிண்டில் கலக்கவில்லையா? என அமேசான் நினைக்கிறது. ஆக, அமேசான் ஸ்மார்ட்போன் சந்தையில் வைத்த கண்ணை எடுக்காமலே இருக்கிறது.

———–

ஆண்ட்ரய்டு வியரில் பிளிப்கார்ட்

ஸ்மார்ட்போன் திரை போலவே ஸ்மார்ட்வாட்ச்க்கான திரையும் முக்கியத்துவம் பெறலாம். ஆக, எனவே நிறுவனங்கள் ஸ்மார்ட்வாட்ச்களுக்கான செயலிகளிலும் (ஆப்) கவனம் செலுத்தியாக வேண்டும். இதை பிளிப்கார்ட் உணர்ந்திருப்பதாக தெரிகிறது. அதன் அடையாளம் தான், ஆண்ட்ராய்டு வியருக்கான பிளிப்கார்ட்டின் செயலி.
இந்தியாவின் முன்னணி மின்வணிக தளமான பிளிப்கார்ட், ஆண்ட்ராய்ட் வியர் ஸ்டோருக்கான முதல் செயலியை அறிமுகம் செய்துள்ளது. மோட்டோ 360 போன்ற பிளிப்கார்ட்டில் விற்பனையாகும் ஸ்மார்ட்வாட்சிகளில் இந்த செயலி முன்கூட்டியே இடம்பெற்றிருக்கும் என தெரிவிக்கப்பட்டுள்ளது.
விஷ் லிஸ்ட் மற்றும் நோட்டிபிகேஷன ஆகிய வசதிகள் இந்த செயலியில் உண்டு. எதிர்காலத்தில் ஸ்மார்ட்போன் செயலியில் உள்ள எல்லா வசதிகளும் இதிலும் இடம்பெறலாம்.
ஸ்மார்ட்வாட்சி வைத்திருப்பவர்கள் , ஆண்ட்ராய்டு சாதனத்தில் பிளிப்கார்ட் செயலியை அப்டேட் செய்தால் போதுமானதாம்.
ஸ்மார்ட் வாட்ச் சந்தையில் பெரிதும் எதிர்பார்க்கப்படும் ஆப்பிள் வாட்ச் பற்றிய சமீபத்திய தகவல் அதன் அறிமுகத்திற்கு இன்னமும் காத்திருக்க வேண்டும் என்பதாக இருக்கிறது. அடுத்த ஆண்டு துவக்கம் என்று எதிர்பார்கக்ப்பட்டதற்கு மாறாக 2015 வசந்தத்தில் தான் ஆப்பிள் வாட்ச் சந்தைக்கு வரலாம் என சொல்லப்படுகிறது.

————-

புதிய அறிமுகங்கள்

ஸ்மார்ட்போன் சந்தையில் புதிய அறிமுகங்கள் தொடர்கின்றன. தொடர இருக்கின்றன. தைவானை சேர்ந்த எச்.டி.சி ஏற்கனவே இந்த ஆண்டு புதிய அறிமுகங்களை செய்துள்ள நிலையில் மேலும் இரண்டு அறிமுகங்கள் நிகழலாம் என கூறப்படுகிறது. எச்டிசி டிசைர் 620 எனும் பெயரில் இரண்டு வடிவங்களில் இந்த போன் வரலாம் என சொல்லப்படுகிறது. இதனிடையே இந்திய நிறுவனமான ஐபால் 3 புதிய ஆண்ட்ராய்டு போன்களை அறிமுகம் செய்துள்ளது. அதன் ஆன்டி வரிசையில் அறிமுகமாகும் இந்த போன்கள் ரூ,3,499, ரூ,4,699 மற்றும் ரூ. 6499 ஆகிய விலை கொண்டிருக்கும் என நிறுவன இணையதளத்தில் குறிப்பிடப்பட்டுள்ளது. ஆனால் சந்தையில் எப்போது கிடைக்கத்துவங்கும் எனும் தகவல் இல்லை. இதனிடையே கூகிள் நெக்சஸ் சாதனம் விரைவில் எனும் அறிவிப்புடன் பிளிப்கார்ட் தளத்தில் விளம்பரம் செய்யப்பட்டுள்ளது.
ஒப்போ (Oppo ) நிறுவனம் தனது என்3 மற்றும் ஆர் 5 போன்களை டிசம்பர் முதல் விற்பனைக்கு கொண்டு வரலாம் என சொல்லப்படுகிறது. ஒப்போ நிறுவனம் இந்திய சந்தையை முக்கியமாக கருதுவதாகவும் தெரிவித்துள்ளது. 4.85 மீமீ அகலம் கொண்ட ஒப்போ ஆர் 5 உலகின் மெல்லிய ஸ்மார்ட்போன் என்று நிறுவனம் சொல்கிறது.

———–

ஸ்மார்ட்கீ வந்தாச்சு

ஸ்மார்ட்போனிலேயே பணம் செலுத்தும் வசதி வந்தாச்சு. இனி ஹோட்டல் அறைகளுக்கான சாவியாகவும் ஸ்மார்ட்போனே பயன்படலாம். அமெரிக்காவின் ஸ்டார்வுட் ஹோட்டல் குழுமம் தனது ஹோட்டல்களில் இத்தகைய வசதியை அறிமுகம் செய்துள்ளது. இந்த ஹோட்டல் அறையில் உள்ள பூட்டுகள் பளுடூத் வசதி கொண்டதாக இருக்கும். ஸ்மார்ட்போன் அல்லது ஆன்லைனில் ரூம் புக் செய்யும் போது அறை எண் போனுக்கு அனுப்பி வைக்கப்படும். ஆக, ஹோட்டலுக்கு வந்தால் வரவேற்பறையில் காத்திருக்காமல் நேராக ரூமுக்கு சென்று ஸ்மார்ட்போனை காட்டி கதை திறக்கச்செய்யலாம்.
மற்ற ஹோட்டல்களும் இதே போன்ற திட்டத்தை வைத்துள்ளன. இந்த வசதி எளிதானது என்றாலும் பாதுகாப்பு பற்றிய அச்சங்களும் இருக்கவே செய்கின்றன. ஆனால் ஹோட்டல் சாவியை மறந்து வைத்துவிட்டோமே என்ற கவலை இருக்காது. ஸ்மார்ட்போன் போல ஸ்மார்ட்வாட்சிலும் இந்த வசதி வரலாம் என்கின்றனர். ஹோட்டல் மட்டுமா வீடுகளுக்கும் ஸ்மார்ட் கீ வரப்போகிறது. எல்லாம் தொழில்நுட்பம் செய்யும் மாயம்.

————
தமிழ் இந்துவுக்காக எழுதியது. நன்றி; தமிழ் இந்து