Tag Archives: tab

விக்கிபீடியாவில் அதிக அறியாத வசதிகள்

Wikipedia-hovercards-640x398
விக்கிபீடியா நிச்சயம் நீங்கள் நன்கு அறிந்த தளம் தான். கட்டற்ற களஞ்சியமான அதை நீங்கள் அடிக்கடி பயன்படுத்திக்கொண்டிருக்கவும் செய்யலாம். சில நேரங்களில் குறிப்பிட்ட விவரங்களுக்காக நீங்களே விக்கிபீடியாவை நாடலாம். அல்லது பலநேரங்களில் தகவலை தேடும் போது தேடல் பட்டியலில் முதலிலேயே விக்கிப்பீடியா பக்கம் கண்சிமிட்டி வரவேற்கலாம்.

எல்லாம் சரி விக்கிபீடியா பயனாளியான நீங்கள் எப்போதாவது விக்கிபீடியாவாவில் உறுப்பினராவது பற்றி யோசித்திருக்கிறீர்களா?

நுழைவுச்சீட்டு போன்ற அனுமதி தேவைப்படாத சேவையாகவே விக்கிபீடியா இருப்பதால் உறுப்பினராகாமலேயே அதை பயன்படுத்தலாம். அதன் கட்டுரைகளை வாசிக்க மட்டும் அல்ல, அவற்றை திருத்தவும் பயனாளியாக இருந்தால் மட்டுமே போதுமானது: உறுப்பினராக வேண்டும் என்ற கட்டாயம் இல்லை. கட்டற்ற களஞ்சியம் என்பதால் எந்த கட்டுப்பாடும் கிடையாது என்பது விக்கிபீடியாவின் சிறப்பாக இருக்கிறது.

இருந்தாலும் விக்கிபீடியாவில் உறுப்பினராவது மூலம் கூடுதல் பலன்களை பெற முடியும் தெரியுமா?
அப்படியா எனும் ஆச்சர்யம் ஏற்பட்டால், பிரபல தொழில்நுட்ப இணையதளமான மேக்யூஸ்ஆப் , இது பற்றி வெளியிட்டுள்ள கட்டுரை உங்களை உற்சாகத்தில் ஆழ்த்தும். விக்கிபீடியாவில் உறுப்பினராகாமல் இருப்பதன் மூலம் நீங்கள் இந்த இணைய களஞ்சியத்தை தவறான முறையில் பயன்படுத்திக்கொண்டிருக்கிறீர்கள் என குறுப்பிடும் இந்த கட்டுரை, விக்கிபீடியா உறுப்பினராவதால் பெறக்கூடிய பலன்களை பட்டலிட்டுள்ளது:

இணைப்புகளின் முன்னோட்டம்:
விக்கிபீடியாவில் இடம்பெறும் எல்லா கட்டுரைகளும் மற்ற பல கட்டுரைகளுக்கான இணைப்புகளை கொண்டவை. இவற்றில் பல சுவாரஸ்யமாகவும், பயனுள்ளதாகவும் இருக்கலாம். ஆனால் ஒவ்வொரு இணைப்பாக கிளிக் செய்து படித்துப்பார்ப்பது கொஞ்சம் சோதனையான அனுபவமாக தான் இருக்கும்.
இதற்கு மாறாக இணைப்புகளின் உள்ளடக்கத்தை சுருக்கமான அறிமுகத்தோடு முன்னோட்டமாக பார்க்க முடிந்தால் எப்படி இருக்கும். இதற்கென உள்ள ஹோவர்கார்டு வசதியை உறுப்பினர்கள் பிரபர்ன்ஸ் பகுதிக்கு சென்று வரவைத்துக்கொள்ளலாம்.

இதே பகுதியில் சென்று தொடர்புடைய கட்டுரைகள் அம்சத்தை கிளிக் செய்தால், ஒவ்வொரு கட்டுரையின் அடிப்பக்கத்திலும் தொடர்புடைய கட்டுரைகளுக்கான இணைப்புகளை பார்க்க முடியும்.
இந்த வசதி மூலம் விக்கிபீடியாவில் புதிய விஷயங்களை தெரிந்து கொள்ளலாம்.
Wikipedia-watchlist-640x403
புதிய டேபில் இணைப்புகள் ;
விக்கிபீடியா கட்டுரைகள் ஆதாரங்களுக்கான அடிக்குறிப்புகளை கொண்டிருப்பவை. தகவல்களின் நம்பகத்தன்மையை உணர்த்துவதற்காக இது கைகொடுக்கிறது. ஆனால் கட்டுரையை வாசித்துக்கொண்டிருக்கும் போது , இணைப்புகளில் கிளிக் செய்தால் அந்த பக்கத்திற்கு அழைத்துச்செல்லப்படுவோம். மீண்டும் கிளிக் செய்து மூல கட்டுரைக்கு திரும்பி வரவேண்டும்.
இந்த சங்கடத்தை தவிர்க்க, பிரபரன்ஸ் பகுதிக்கு சென்று பிரவுசிங் அம்சத்தில் இணைப்புகளை தனியே புதிய டேபாக தோன்றும் வசதியை இயக்கி கொள்ளலாம்.
வெவ்வேறு பின்னணி
விக்கிபீடியா கட்டுரைகளின் தோற்றம் உங்களுக்கு அலுப்பூட்டலாம். எனில் வேறு பல பின்னணி வண்ணங்களையும் தேர்வு செய்து கொள்ளலாம். இவ்வாறு நான்கு விதமான வசதிகள் இருக்கின்றன.
விளம்பரம் நீக்க வசதி!
அதே போல விக்கிபீடியாவை ஆண்டிற்கு ஒரு முறை தோன்றக்கூடிய நன்கொடை கோரும் விளம்பர அறிவிப்பையும் நீக்கிக்கொள்ளும் வசதியும் இருக்கிறது.
அதே போல நீங்கள் வாசித்துக்கொண்டிருக்கும் கட்டுரையின் பக்கத்தை கவனிக்க விரும்பும் பட்டியலில் சேர்த்துக்கொள்ளலாம். இதன் மூலம் அந்த பக்கத்தில் செய்யப்படும் திருத்தங்கள் தொடர்பான தகவல்களை பெற முடியும்.

இந்த வசதியை உங்களுக்கு பிடித்தமான கட்டுரைகளுக்கான புக்மார்க் வசதி போலவும் பயன்படுத்திக்கொள்ளலாம். மற்ற உறுப்பினர்களையும் இந்த பட்டியலில் சேர்த்துக்கொள்ளலாம். அதே போல குறிப்பிட்ட தலைப்பை பின் தொடரும் ஆர்வம் இருந்தால் அந்த தலைப்பு தொடர்பான அறிவிப்புகளை கவனிக்க விரும்பும் பட்டியலில் பெற ஏற்பாடு செய்யலாம். கட்டுரை பக்கத்தின் மேல் உள்ள கவனிப்பு பட்டியல் ஐகானை கிளிக் செய்து அந்த கட்டுரையை நமக்கான பட்டியலில் சேர்த்துக்கொள்ளலாம்.

மேலும் ஆண்டின் சிறந்த புகைப்படம் போன்றவற்றின் மீது வாக்களிக்கும் உரிமையும் பெறலாம். இப்போது இணைந்தால் கடந்த ஆண்டுக்கான புகைப்படங்கள் மீது வாக்களிக்கலாம். மேலும் பல அம்சங்களும் இருக்கின்றன.
புதிய பக்கங்களை துவக்குவது, பெயர் மாற்றம் செய்வது ஆகிய அம்சங்கள் இதில் அடங்கும்.
உங்களுக்கான பயனர் பெயரையும் தேர்வு செய்து கொள்ளலாம்.
வாசிப்பதை மீறி , விக்கிபீடியா தன்னார்வலர்கள் சமூகத்தில் இணைந்து கொள்ளுங்கள் என்று விக்கிபீடியா உறுப்பினர் பக்கத்தில் அழைப்பு விடுக்கிறது.

மேலும் விவரங்களுக்கு: https://en.wikipedia.org/wiki/Wikipedia:Why_create_an_account%3F

———
செயலி புதிது; கூகுள் காலண்டரில் புதிய வசதி

கூகுள் காலண்டர் செயலியை பயன்படுத்த மேலும் ஒரு வலுவான காரணம் கிடைத்துள்ளது. இந்த செயலிக்காக அறிமுகம் செய்யப்பட்டுள்ள இலக்குகள் வசதி தான் அது.
கோல்ஸ் எனும் பெயரில் அறிமுகம் செய்யப்பட்டுள்ள இந்த வசதி மூலம் பயனாளிகள் தங்கள் சின்ன சின்ன இலக்குகளை நிறைவேற்றிக்கொள்வதற்கான ஊக்கம் பெறலாம்.
வாரம் ஒரு புத்தகம் படிப்பது, தினமும் 15 நிமிடம் நடக்க வேண்டும் என்பது போல நாம் அடைய விரும்பும் இலக்கு எதுவாக இருந்தாலும் அதற்காக இந்த வசதியை நாடலாம்.
மனதில் உள்ள இலக்கை, கூகுள் காலெண்டர் செயலியில் சமர்பித்தால் போதுமானது. அதன் பிறகு நம்முடைய நாட்காட்டியில் எந்த நேரம் வெறுமையாக இருக்கிறது என கண்டறிந்து அந்த நேரத்தை இது தானாக பரிந்துரைக்கிறது.
கூகுள் காலெண்டர் சேவையை பயன்படுத்துபவர்களுக்கு இது கூடுதல் வசதியாக அமையும். புதிய பயனாளிகள் இலக்கை அடையும் வாய்ப்பை பெறுவதற்காகவும் கூகுள் காலெண்டர் சேவையை பயன்படுத்தலாம்.
நிகழ்ச்சிகளை குறித்து வைத்து திட்டமிடலுக்கு உதவும் இந்த சேவையில் ஏற்கனவே நினைவூட்டல் உள்ளிட்ட புதிய வசதிகள் அறிமுகம் செய்யப்பட்டுள்ளன.

மேலும் விவரங்களுக்கு: https://play.google.com/store/apps/details?id=com.google.android.calendar

——–

தளம் புதிது; மாற்று மென்பொருளுக்கான தளம்

உங்கள் டிஜிட்டல் வாழ்க்கையை மேம்படுத்திக்கொள்ள புதிய மென்பொருள்களை தெரிந்து கொள்வது அவசியமானது. இந்த அறிமுகம் வசதியை கொஞ்சம் சுவாரஸ்யமாகவும் தெரிந்து கொள்ள வழி செய்கிறது ஆல்டர்நேட்டிவ்டு.நெட் இணையதளம்.

பெயர் உணர்த்தக்கூடியது போலவே இந்த தளம் மாற்று மென்பொருள்களை அறிமுகம் செய்கிறது. அதாவது ஒருவர் ஏற்கனவே அறிந்த அல்லது பயன்படுத்தும் மென்பொருளுக்கான மாற்று மென்பொருளை அறிமுகம் செய்கிறது.

நல்ல மென்பொருள்களை அறிமுகம் செய்து கொள்வதற்கான வழியாக இது முன்வைக்கப்படுகிறது. இந்த தளத்தில் வழக்கமான மென்பொருட்களுக்கான மாற்றுகளை அறிந்து கொள்ள முடிவதோடு, உறுப்பினராகி உங்களுக்கு தேவையான மாற்று மென்பொருளையும் தேடிக்கொள்ளலாம்.
பிரபலமாக இருக்கும் மாற்று மென்பொருட்கள் மற்றும் செயலிகள் முகப்பு பக்கத்திலேயே பட்டியலிடப்பட்டுள்ளன. இவை தவிர மென்பொருள் வகைக்கேற்பவும் பட்டியல் உள்ளது.

பயனாளிகளும் தாங்கள் அறிந்த மென்பொருட்களை சமர்பிக்கலாம். இப்படி பலரது பரிந்துரையால் மென்பொருட்கள் பட்டியலிடப்படுவது இந்த தளத்தின் சிறப்பம்சமாகவும் இருக்கிறது.
மென்பொருட்களை லைக் செய்யும் வசதியும் இருக்கிறது. அதற்கேற்ப அதிக லைக் செய்யப்பட்டவற்றை பார்க்கும் வசதியும் இருக்கிறது.
மென்பொருள் தேவையை நிறைவேற்றிக்கொள்ள சுவாரஸ்யமான இணையதளம்.

இணையதள முகவரி: http://alternativeto.net/

——–

வீடியோ புதிது; 100 ஆண்டுகள் :100 திரைப்படங்கள்

திரைப்படங்களின் 100 ஆண்டுகளை சுவாரஸ்யமான முறையில் திரும்பி பார்க்க வைத்திருக்கிறார் ஜேகப் ஸ்வின்னி எனும் இணையவாசி. திரைப்பட ஆர்வலர்,எடிட்டர், இயக்குனர் என வர்ணித்துக்கொள்ளும் ஸ்வின்னி தனது விமியோ சேனலில் ( யூடியூப் போன்ற வீடியோ பகிர்வு சேவை) புதிய வீடியோ தொகுப்பு ஒன்றை பதிவேற்றி இருக்கிறார்.

இந்த தொகுப்பில் திரைப்பட உலகின் 100 ஆண்டுகளை திரும்பி பார்க்கும் வகையில் ஆண்டுக்கு ஒரு திரைப்படத்தை தேர்வு செய்து ஒவ்வொரு படத்தில் இருந்தும் சிறந்த காட்சியை வீடியோவாக தைத்திருக்கிறார்.
ஹாலிவுட் படங்களின் ஆதிக்கம் இருந்தாலும் ஒற்றை வீடியோவில் 100 ஆண்டு படங்களை பார்ப்பது புதிய அனுபவமாக இருக்கும். 30 ஷாட்களில் ஸ்பீல்பர்க் போன்ற வீடியோக்களையும் உருவாக்கி இருக்கிறார்.

வீடியோவை காண: https://vimeo.com/162855085

———

இணைய பகிர்வுக்கு எளிய வழி!

நீங்கள் பார்த்து ரசித்த இணைய பக்கங்களை டிவிட்டர்,பேஸ்புல், இமெயில் என பல இடங்களில் பகிர்ந்து கொள்ள விரும்பலாம். இப்படி பகிர நினைக்கும் போது குறிப்பிட்ட இணைய பக்கத்தின் முகவரியை மவுசால் தேர்வு செய்து பின்னர் அந்த டெக்ஸ்ட்டை காபி செய்து கொள்ள வேண்டும். இதைவிட எளிய வழி தேவை என்றால் இதற்கான பிரவுசர் குறுக்கு வழியை பயன்படுத்தலாம்.
இணைய பக்கம் ஒன்றின் இணைப்பை பகிர்ந்து கொள்ள விரும்பினால், உடனே விசைப்பலகையில் கண்ட்ரோல்+ எல் என டைப் செய்தால் போதும், குறிப்பிட்ட அந்த இணைய முகவரி தானாக தேர்வு செய்யப்பட்ட, ஹைலைட் செய்யப்பட்டிருக்கும். அதை அப்படியே நகலெடுத்து வேண்டிய இடத்தில் பேஸ்ட் செய்து பகிர்ந்து கொள்ளலாம்.
இதே போலவே பிரவுசரில் இணைய முகவரிக்கான எழுத்துக்களை டைப் செய்த பிறகு கண்ட்ரோல்+ எண்டர் என டைப் செய்தால் போதும் முகவரிக்கு முன்னர் மற்றும் பின்னர் வரவேண்டிய (www. and a .com. ) பதங்களை தானாகவே இடம்பெறச்செய்து இணையபக்கத்தை அணுக வழி செய்யும்.

——-

நன்றி; தமிழ் இந்துவில் எழுதியது

Shove_Home-582x297

நண்பர்கள் பிரவுசர் உங்கள் கையில்;புதுமையான இணைய சேவை

உங்கள் நண்பர்கள் கம்ப்யூட்டரில் நீங்கள் விரும்பும் இணையதளத்தை புதிய டேபாக திறக்க முடிந்தால் எப்படி இருக்கும்? அதே போல உங்கள் கம்ப்யூட்டரில் திடிரென உங்கள் நண்பர்கள் நினைக்கும் இணையதளம் தானாக திறக்கப்பட்டால் எப்படி இருக்கும்?

புதிதாக அறிமுகமாகி இருக்கும் பிரவுசர் நீட்டிப்பு சேவையான ஷோவ் (shove) இதை தான் சாத்தியமாக்குகிறது.
இணையத்தில் உலாவும் போது நண்பர்களுடன் இணையதளங்களை இணப்புகளாக பகிர்ந்து கொள்ள உதவும் சேவைகள் இருக்கின்றன.இந்த வசதியை இன்னும் ஒரு படி மேலே கொண்டு சென்று நண்பர்களின் பிரவுசரிலேயே புதிய இணையதளத்தை தோன்றச்செய்யும் வகையில் ஷோவ் சேவை உருவாக்கப்பட்டுள்ளது.பிரபலமான கூகுள் குரோம் பிரவுசருக்கான நீட்டிப்பு சேவையான இது செயல்படுகிறது.

ஷோவ் சேவையை பயன்படுத்த முதலில் அதை ஒருவர் தனது பிரவுசரில் நிறுவிக்கொள்ள வேண்டும்.அதன் பிறகு இணையத்தில் ஏதேனும் முக்கியமான அல்லது சுவாரஸ்யமான இணையதளத்தை பார்க்கும் போது அதை நண்பர்களுடன் பகிர்ந்து கொள்ள விரும்பினால்,ஒரு கிளிக் செய்தால் போதும் அந்த தளம் நண்பரின் பிரவுசரில் திறக்கப்பட்டுவிடும். அதற்கு முன்னர் ஒரு சின்ன அறிவிப்பு போல ,நண்பர் உங்களுக்கு ஒரு இணையதளத்தை காண்பிக்க விரும்புகிறார் எனும் செய்தி எட்டிபார்க்கும்.இதன் தொடர்ச்சியாக இணையதளம் திறக்கப்படும்.
ஆனால் இதற்கு உங்கள் நண்பர்களுக்கும் ஷோவ் நீட்டிப்பு சேவையை நிறுவியிருக்க வேண்டும்.அதோடு நண்பர்களை நீங்கள் உங்கள் ஷோவ் பட்டியலில் சேர்த்திருக்க வேண்டும். இந்த இரண்டையும் செய்த பிறகு, ஷோவ் பட்டியலில் உள்ள நண்பரின் பெயரை கிளிக் செய்ததுமே குறிப்பிட்ட இணைதளத்தை நண்பர்கள் பார்வைக்கு தோன்றச்செய்யலாம்.

கிட்ட்த்தட்ட நண்பர்களின் பிரவுசரை கைப்பற்றுவது போல அவர்களின் பிரவுசரில் நாம் விரும்பும் இணையதளத்தை இந்த சேவை தோன்றச்செய்கிறது.முதல் பார்வைக்கு இது விபரீதமானதாகவோ,வில்லங்கமானதாகவோ தோன்றலாம்.அதற்கேற்ப இந்த சேவையை விளையாட்டு நோக்கில் பயன்படுத்தும் வாய்ப்பு இருக்கத்தான் செய்கிறது.மோசமான அல்லது ஆபாசமான இணையதளத்தை திடிரென தோன்றச்செய்வதோ அல்லது வைரஸ் இணைப்பு தளங்களை எட்டிப்பார்க்கச்செய்யும் அபாயமோ இருக்கத்தான் செய்கிறது. அதிலும் அலுவலக சூழலில் இப்படி ஒரு இணையதளம் கம்ப்யூட்டரிலோ ,லேப்டாப்பில்லோ தோன்றினால் சங்கடமாக தான் இருக்கும்.

ஆனால்,இதில் நமது நண்பர்களை கவனமாக தேர்வு செய்து கொண்டால் பிரச்சனை இல்லை. பேஸ்புக் போல இதில் முகம் தெரியாதவர்களை எல்லாம் நண்பர்களாக சேர்த்துக்கொள்ள வேண்டியதில்லை.பயனுள்ள அல்லது சுவாரஸ்யமான இணைப்புகளை பகிர்ந்து கொள்ள விரும்பும் நெருக்கமான நண்பர்களை மட்டும் தேர்வு செய்து கொள்ளலாம்.

புதுமையான இந்த சேவையை பலவிதங்களில் பயன்படுத்தலாம்.

இணையதளங்களின் இணைப்பை அனுப்பி வைப்பதைவிட இந்த சேவை முற்றிலும் சுவாரஸ்யமானது.இணைப்புகளை அனுப்பும் போது அது எப்போது திறந்து பார்க்கப்படும் என்பது தெரியாது.ஆனால் இந்த சேவையில் நினைத்தவுடன் இணையப்பை இணையதளமாகவே அறிமுகம் செய்துவிடலாம்.
அதிலும் இணைய அரட்டை அல்லது விவாதத்தில் ஈடுபட்டிருக்கும் போது உடனடியாக இணையதளத்தை பார்க்கச்செய்வது பயனுள்ளதாக இருக்கும்.

அது மட்டும் அல்லாமல் நண்பர் பார்த்து ரசித்த ஒரு சூப்பரான இணையதளம் உங்கள் கம்ப்யூட்டரிலும் திறக்கப்படுவது திரில்லான அனுபவமாக தானே இருக்கும்.
நெகிழ வைக்கும் வீடியோ இது எனும் பரிந்துரை இ-மெயில் மூலம் அல்லது பேஸ்புக் பகிர்வாக வந்து,அதை கிளிக் செய்து பார்ப்பதைவிட அந்த வீடியோ பிரவுசரில் திடிரென ஓடத்துவங்குவது சுவாரஸ்யமாக தானே இருக்கும்.
இணைய பகிர்வில் சின்னதாக ஒரு புதிய அத்தியாயத்தை இந்த சேவை துவக்க வைத்திருக்கிறது என்றே சொல்லலாம்.
அமெரிக்காவைச்சேர்ந்த மைக் லீச்சர் மற்றும் அவரது நண்பர்கள் இணைந்து இந்த சேவையை உருவாக்கியுள்ளனர்.
ஆரம்பத்தில் விளையாட்டாக தான் இந்த சேவையை உருவாக்கியதாகவும்,ஆனால் இதற்கான முயற்சியில் ஈடுபட்ட போது இணைய பகிர்வில் இது புதுமையாக இருக்கும் என தோன்றியதாகவும் வயர்டு இணைய தளத்திற்கு அளித்துள்ள பேட்டியில் லீச்சர் கூறியுள்ளார்.

முற்றிலும் புதுமையான இணைய உரையாடலுக்கு இது வித்திடும் என்றும் அவர் நம்புகிறார்.
இது இன்னொரு அரட்டை சேவை அல்ல,இது உங்கள் பிரவுசரை நண்பர்களின் கட்டுப்பாட்டில் ஒப்படைப்பது,இதை கொஞ்சம் பொறுப்பாக தான் பயன்படுத்த வேண்டும் என்கிறார் லீச்சர்.

இணையதள முகவரி: http://shove.wtf/

நன்றி;விகடன்.காமில் எழுதியது

us1

புதிய இணையதளங்களை அடையாளம் காட்டும் புதுமையான தளம்

புதிய பயனுள்ள இணையதளங்களை அறிமுகம் செய்து கொள்வது எப்போதுமே இனிமையான அனுபவம் தான்.இதை கொஞ்சம் சுவாரஸ்யமானதாகவும் ஆக்குகிறது ’ரேண்டம் யூஸ்புல் வெப்சைட்’ இணையதளம்.
புதிய இணையதள அறிமுக தளங்கள் பல காலமாக இருக்கின்றன என்றாலும், இதை முற்றிலும் புதுமையாக செய்கிறது இந்த தளம். வழக்கமாக பார்க்க கூடியயது போல, இணையதளங்களை பட்டியல் போடாமல், அவற்றை பல்வேறு தலைப்புகளின் கீழ் வகைப்படுத்தாமல் ஒவ்வொரு கிளிக்கிலும் ஒரு பயனுள்ள புதிய இணையதளத்தை தோன்றச்செய்கிறது இந்த தளம்.

அதாவது, இணையதளங்களை எந்தவித வரையறைக்கும் உட்படுத்தாமல்,ஒவ்வொரு தளமாக எட்டிப்பார்க்க செய்கிறது. இதற்கு செய்ய வேண்டியதெல்லாம் இதன் முகப்பு பக்கத்தில் உள்ள, என்னை பயனுள்ள இணையதளத்திற்கு அழைத்துச்செல்லவும் எனும் கட்டளைக்கு கீழ் இருக்கும் பட்டனை கிளிக் செய்வது தான் – கிளிக் செய்ததுமே தானாக ஒரு டேப் ஓபனாகி அதில் புதிய இணையதளம் தோன்றுகிறது.
இப்படி ஒவ்வொரு முறை கிளிக் செய்யும் போது புதிய இணையதளத்துடன் புதிய டேப் ஓபனாகும். அடுத்த வரும் தளம் என்னவாக இருக்கும் , எந்த வகையை சேர்ந்ததாக இருக்கும் என்று தெரியாது;ஆனால் பயனுள்ளதாக இருக்கும்.

புதிய தளங்களை அறிமுகம் செய்து கொள்வது என்பதே இணையத்தில் மூழ்கி முத்தெடுப்பது போலதானே. இந்த கண்டறிதலை கொஞ்சம் புதுமையான முறையில் சாத்தியமாக்குகிறது ’ரேண்டம் யூஸ்புல் வெப்சைட்’ .
பயன்படுத்திப்பாருங்கள்; பயனுள்ள இணையதளங்களை அறிமுகம் செய்து கொள்ளுங்கள்.
புதிய தளங்களை இமெயில் மூலம் பெற்றுக்கொள்ளும் வசதியும் இருக்கிறது. இந்த தளத்தில் இடம் பெறக்கூடியது என நீங்கள் தரும் இணையதளங்களையும் சமர்பிக்கலாம்.

டான் வாக்கர் மற்றும் மாட் கார்பெண்டர் ஆகிய இரு மென்பொருளாளர்கள் உருவாக்கியுள்ள இந்த தளம் தான் இப்போது இணையத்தில் லட்சக்கணக்கானோரை கவர்ந்துள்ளது.

இணையதள முகவரி: http://randomusefulwebsites.com/

——–