Tag Archives: type

விக்கிபீடியா விளையாட்டும், வாசிப்பு சாகசமும்!

wபணி நிமித்தமாக தகவல்களை தேட இணையத்தை பயன்படுத்துவதை நீங்கள் வழக்கமாக கொண்டிருக்கலாம். இணைய ஆய்வில் களைப்பு ஏற்பட்டால் அல்லது பணிக்கு நடுவே ஒரு மாறுதல் ஏற்பட்டால் இணையத்தில் விளையாட்டாக பொழுதை கழித்து இளைப்பாறுதலையும் வழக்கமாக கொண்டிருக்கலாம். அது யூடியூப்பில் நகைச்சுவை வீடியோவாக இருக்கலாம் அல்லது பிரவுசரில் விளையாடும் விளையாட்டாக இருக்கலாம். ஆக, இணையத்தில் நீங்கள் தகவல்களை தேடிக்கொண்டே இருக்கலாம் அல்லது விளையாட்டாக பொழுதை போக்கலாம். எல்லாம் சரி, எப்போதாவது நீங்கள் விளையாட்டாக தகவல்களை தேடியது உண்டா?

அதாவது குறிப்பிட்ட தகவலை தேடாமல், அறிதல் நோக்கில் எதையாவது தேடிய அனுபவம் உண்டா? இத்தகைய அனுபவம் இருந்தாலும் சரி, அல்லது இப்படி எல்லாம் விளையாட்டாக தகவல்களை தேடியது இல்லை என்றாலும் சரி, விக்கிபீடியா கட்டுரைகளை மையமாக கொண்டு உருவாக்கப்பட்டுள்ள புதிய விளையாட்டு உங்களை நிச்சயம் கவர்ந்திழுக்கும். ஏனெனில், விக்கிபீடியா; தி டெக்ஸ்ட் அட்வன்சர் எனும் இந்த விளையாட்டு, விக்கிபீடியா கட்டுரைகளை விளையாட்டு வடிவில் படிக்க வைக்கிறது.

கட்டற்ற இணைய களஞ்சியமான விக்கிபீடியா தகவல் சுரங்கமாக இருப்பது உங்களுக்கு தெரிந்த விஷயம் தான். குறிப்பிட்ட தலைப்பில் தகவல் தேவை எனில் நேராக விக்கிபீடியாவில் தேடிப்பார்க்கலாம். மேலும் பல நேரங்களில் கூகுளில் தகவல்களை தேடும் போதும் பெரும்பாலும் தேடப்படும் பதம் தொடர்பான விக்கிபீடியா பக்கம் முன் வந்து நிற்பதை பார்த்திருக்கலாம்.

புதிய தகவல்களை தெரிந்து கொள்ள விரும்புகிறவர்கள், விக்கிபீடியாவுக்குள் நுழைந்து எந்தவித இலக்கும் இல்லாமல் ஏதாவது ஒரு கட்டுரையில் இருந்து துவங்கி, தொடர்ந்து வெவ்வேறு கட்டுரைகளாக படிக்கும் வழக்கமும் கொண்டிருக்கலாம். ஆங்கில விக்கிபீடியாவில் மட்டும் 60 லட்சத்திற்கும் மேற்பட்ட கட்டுரைகள் இடம்பெற்றிருப்பதால், இப்படி மனம் போன போக்கில் கட்டுரைகளை பின் தொடர்ந்து செல்வது மற்றபடி அறிந்து கொள்ள வாய்ப்பில்லாத புதிய சுவாரஸ்யமான தகவல்களை தெரிந்து கொள்ள உதவும். விக்கிபீடியாவை சுவாரஸ்யமான மற்றும் விநோதமான கட்டுரைகளுக்கு குறைவில்லை என்பதால் இந்த தேடல் பயணம் சாகசம் மிக்கதாகவே இருக்கும்.

ஆனால், எல்லோருக்கும் இந்த பழக்கம் இருக்க வாய்ப்பில்லை. அதனால் என்ன, இந்த சாகசத்தை எல்லோருக்கும் சாத்தியமாக்குவதற்காக தான் விக்கிபீடியா கட்டுரைகள் சார்ந்த விளையாட்டு உருவாக்கப்பட்டுள்ளது. லண்டனைச்சேர்ந்த கேவன் டேவிஸ், இதை உருவாக்கியுள்ளார்.

விக்கிடெக்ஸ்ட் விளையாட்டிற்கான தளத்தில் (http://kevan.org/wikitext/) நுழைந்ததுமே, கட்டுரை தேடலை துவக்குவதற்கான குறிப்புகள் கொடுக்கப்பட்டிருக்கும். அந்த குறிப்புகள் ஒவ்வொன்றும் ஒரு இடத்தை குறிக்கும். அவற்றில் ஏதாவது ஒன்றை கிளிக் செய்தால், அந்த இடம் தொடர்பான விக்கிபீடியா கட்டுரையின் சுருக்கம் மற்றும் தொடர்புடைய ஒளிப்படம் இடம்பெறும். அந்த தகவல்களை படித்து முடித்தால், கீழே அடுத்த கட்டுரைக்கான இணைப்பு இடம் பெற்றிருக்கும். அந்த இணைப்பு இன்னொரு இடத்திற்கு அழைத்துச்செல்லும். பட்டியலில் உள்ள இடங்களை தவிர, பயனாளிகள் தங்கள் மனதில் உள்ள ஏதேனும் இடத்தை டைப் செய்தும் தேடலாம்.

இதில் என்ன சுவாரஸ்யம் என்றால், குறிப்பிட்ட இடத்தில் இருந்து அடுத்த கட்டுரைக்கு எந்த திசையில் வேண்டுமானாலும் செல்லலாம். தேர்வு செய்யும் திசைக்கு ஏற்ப வெவ்வேறு இடம் தொடர்பான கட்டுரை சுருகங்களை படிக்கலாம். இதன் மூலம் முற்றிலும் புதிய இடங்கள் தொடர்பான தகவல்களை தெரிந்து கொள்ளலாம். இந்த தேடலும் ஒரு சாகச விளையாட்டு போல சுவாரஸ்யமாகவே இருக்கும்.

உதாரணத்திற்கு அமெரிக்காவின் வெள்ளை மாளிகையை கிளிக் செய்தால், அந்த மாளிகளையில் உள்ள ஒவ்வொரு அறை தொடர்பான விக்கிபீடியா தகவல்களை தெரிந்து கொள்ளலாம். அடுத்தடுத்து இடங்களுக்கு செல்வது அலுப்பாக இருந்தால், திடிரென ஏதாவது ஒரு இடத்திற்கு தாவிச்செல்லலாம். இதற்கு செல் (கோ) எனும் சொல்லை டைப் செய்து தொடர்ந்து இடத்தின் பெயரை டைப் செய்தால் போதுமானது. இன்னும் கூடுதல் தகவல்கள் தேவை எனில், ஆய்வு (எக்ஸ்) என டைப் செய்து ஏதேனும் தலைப்பை டைப் செய்தால் அது தொடர்பான தகவல்களை பெறலாம்.

இந்த விளையாட்டில் எதிர்கொள்ளும் தகவல் பக்கத்தை சமூகம் ஊடகம் வாயிலாக நண்பர்களுடன் பகிர்ந்து கொள்ளவும் செய்யலாம்.

மிகப்பெரிய சாகச விளையாட்டு என்று சொல்ல முடியாவிட்டாலும், விக்கிபீடியா கட்டுரைகளை படித்து புதிய தகவல்களை தெரிந்து கொள்வதற்கான சுவாரஸ்யமான வழி இது. மேலும் விக்கிபீடியாவின் நீள அகலத்தையும் இதன் மூலம் தெரிந்து கொள்ளலாம். வரிசையாக கட்டுரைகளை படித்து பார்ப்பதை விட, இப்படி தகவல் தேடல் விளையாட்டில் ஈடுபடுவது புதிய அனுபவமாக இருக்கும்.

மென்பொருளாளரான டேவிஸ் இது போன்ற விக்கி விளையாட்டுகளை உருவாக்குவது புதிதல்ல. இவர் ஏற்கனவே கேட்பிஷிங் (http://kevan.org/catfishing.php) எனும் விக்கி விளையாட்டையும் உருவாக்கியிருக்கிறார். இந்த விளையாட்டில் குறிப்பிட்ட ஒரு கட்டுரை இடம்பெறும் வகைகள் அனைத்தும் வார்த்தைகளாக கொடுக்கப்பட்டிருக்கும். அந்த வார்த்தைகள் விவரிக்கும் கட்டுரை எது என்பதை ஊகிக்க வேண்டும். இதை தனியாகவும் விளையாடலாம், நண்பர்களுடன் இணைந்தும் விளையாடலாம்.

இதே போல நாவல் எழுதும் மாதத்தை முன் வைத்து விக்கிபீடியா கட்டுரைகளை மட்டுமே வைத்துக்கொண்டு ஒரு புத்தகத்தையும் எழுதியிருக்கிறார்.

டேவிஸ் இணையதளத்தில் அவர் உருவாக்கிய மேலும் பல இணைய விளையாட்டுகளை பார்க்கலாம். வகை வகையான விளையாட்டுகளை மனிதர் உருவாக்கியிருக்கிறார். எல்லாம் தனித்தனி தலைப்புகளில் வகைப்படுத்தப்பட்டுள்ளன. குறும்பதிவு சேவையான டிவிட்டர் சார்ந்த விளையாட்டுகள் மட்டுமே பல உள்ளன. தேடியந்திரம் சார்ந்த விளையாட்டுகளும் இருக்கின்றன. இவைத்தவிர கலை மற்றும் சோதனை முயற்சி சார்ந்த விளையாட்டுகளும் இருக்கின்றன. வார்த்தை விளையாட்டு மற்றும் வினாடிவினா ரக விளையாட்டுகளும் கூட இருக்கின்றன.

இணையம் எத்தனை சுவாரஸ்யமானது என்பதை டேவிஸ் இணைய பக்கம் பார்த்து தெரிந்து கொள்ளலாம்: http://kevan.org/

ஆங்கிலத்தில் எழுத உதவும் தேடியந்திரம்!

ludwig_1இணைய உலகில் புதிதாக ஒரு தேடியந்திரம் அறிமுகமாகி இருக்கிறது. லுத்விக் (Ludwig ) எனும் அந்த தேடியந்திரம் புதியது மட்டும் அல்ல, புதுமையானதும் கூட! புத்திசாலி மொழிபெயர்ப்பு சாதனம் மற்றும் மொழியியல் தேடியந்திரம் என வர்ணித்துக்கொள்ளும் இந்த தேடியந்திரம் அமெரிக்காவிலோ மற்ற ஆங்கிலம் பேசும் நாடுகளில் இருந்து அறிமுகமாகமல் ஐரோப்பிய நாடான இத்தாலியில் இருந்து உருவாகி இருப்பது மிகவும் பொருத்தமானது. ஏனெனில், லுத்விக் தேடியந்திரம் ஆங்கிலத்தில் சரியாக எழுத உதவும் நோக்கத்துடன் உருவாக்கப்பட்டுள்ளது.

ஒரு தேடியந்திரம் எப்படி ஆங்கிலத்தில் எழுத உதவக்கூடும் என்று கேட்கலாம். பொருத்தமான ஆங்கில சொற்றொடர்களை தேடித்தருவதன் மூலம் லுத்விக் இதை செய்கிறது. எப்படி என பார்க்கலாம்!
ஆங்கிலத்தில் நன்றாக எழுத வருபவர்களை விட்டுவிடுங்கள். ஆனால் ஓரளவு மட்டுமே ஆங்கிலம் அறிந்தவர்கள், அலுவல் தேவைக்காக ஆங்கிலத்தில் எழுத வேண்டிய நிலை வரும் போது கொஞ்சம் தடுமாறவே செய்வார்கள். அப்படியே எழுதிவிட்டாலும், அது சரியாக இருக்கிறதா எனும் சந்தேகம் இருக்கும்.

இது போன்ற நேரங்களில் லுத்விக் ஆங்கிலம் அறிந்த நண்பன் போல வழிகாட்டும். லுத்விக் தேடியந்திர முகப்பு பக்கத்தில் டைப்ரைட்டர் சாதன லோகோவின் கீழ், உள்ள தேடல் கட்டத்தில், பயனாளிகள் தாங்கள் சரி பார்க்க விரும்பும் ஆங்கில வாசகத்தை டைப் செய்ய வேண்டும். உடனே, அந்த வாசகத்திற்கு பொருத்தமான ஆங்கில வாசகங்கள் பட்டியலிப்படும். அவற்றில் இருந்து சரியான வாசகத்தை தேர்வு செய்து கொள்ளலாம். அல்லது தாங்கள் எழுதிய வாசகத்துடன் ஒப்பிட்டு அதில் உள்ள தவறுகளை சரி செய்து கொள்ளலாம்.
ludwig_4
பிபிசி, நியூயார்க் டைம்ஸ், நியூயார்க்கர் உள்ளிட்ட முன்னணி ஊடகங்களில் இருந்து சேகரிக்கப்பட்ட ஆங்கில வாசக தொகுப்பில் தேடிப்பார்த்து, பொருத்தமான வாசகங்களை லுத்விக் பரிந்துரைக்கிறது. வரிசையாக ஒவ்வொரு வரியாக தட்டச்சு செய்து, அதற்கு காண்பிக்கப்படும் வாசக பட்டியலுடன் ஒப்பிட்டுப்பார்த்து, ஏதேனும் தவறுகள் இருந்தால் திருத்தி நாம் எழுதியதை மேம்படுத்திக்கொள்ளலாம். தவறுகளை திருத்திக்கொள்வதோடு, சரியான ஆங்கில வரிகளுடன் ஒப்பிட்டு பார்ப்பதன் மூலம் ஆங்கில சொற்களின் பயன்பாடு பற்றியும் கற்றுக்கொள்ளலாம்.

ஆங்கிலத்தில் எழுதப்பட்ட கட்டுரைகள், செய்திகள் ஆகியவற்றில் இருந்து திரடப்பட்ட வாசகங்களை தொகுப்பில் இருந்து, பயனாளிகள் எழுத முயலும் வாசகத்திற்கு பொருந்தக்கூடிய வரிகளை தேடித்தருவதே லுத்விக்கின் முதன்மையான பணியாக இருக்கிறது. இதற்கான அல்கோரிதம் மொழியியலை அடிப்படையாக கொண்டு உருவாக்கப்பட்டுள்ளது.

ஆனால், ஒன்று ஆங்கிலத்தில் அதிக பரிட்சயம் இல்லாதவர்களை மனதில் வைத்துக்கொண்டு இது உருவாக்கப்பட்டுள்ளது என்பதை புரிந்து கொள்ள வேண்டும். இதன் நிறுவனர்களில் ஒருவரான இத்தாலி நாட்டைச்சேர்ந்தவரான ஆண்டோனியோ ரோடோலோ ஆகழ்வாராய்ச்சி மாணவராக இருந்த போது, தனது துறையில் தொழில்முறை வாய்ப்புகளை சர்வதேச அளவில் பெற ஆங்கிலத்தில் கட்டுரைகளை வெளியிடும் நிபந்தத்தை உணர்ந்தார். இத்தாலியரான அவருக்கு ஆங்கிலத்தில் கட்டுரைகள் எழுதுவதில் தயக்கம் இருந்ததால், ஆங்கில சொற்களின் தவறான பயன்பாட்டில் திருத்தம் செய்ய உதவும் சேவையின் தேவையை உணர்ந்தார். அதன் பலனாகவே தன்னைப்போன்றவர்கள் பயன்பாட்டிற்காக லுத்விக் மொழியில் தேடியந்திரத்தை நண்பர்களுடன் இணைந்து உருவாக்கியுள்ளார். இத்தாலியின் சிசிலியை தலைமையகமாக கொண்டு லுத்விக் செயல்பட்டு வருகிறது.

ஆங்கிலம் உலக மொழி என வைத்துக்கொண்டால், அது ஆங்கிலம் பேசும் நாடுகளை சேர்ந்தவர்களுக்காக மட்டும் அல்லாமல் எல்லோருக்குமானதாக இருக்க வேண்டும் என்று பேட்டி ஒன்றில் குறிப்பிட்டுள்ள ரோடோலோ, உலகில் உள்ள எல்லோருக்கும் தொடர்பு கொள்வதில் சம வாய்ப்புகள் இருக்க வேண்டும் என்றும் தெரிவித்துள்ளார். இதை நிறைவேற்றும் நோக்கத்துடன் தான் லுத்விக் தேடியந்திரம் வடிவமைக்கப்பட்டுள்ளது.
லுத்விக் தேடியந்திரத்தில் மேலும் சில மொழி சார்ந்த வசதிகளும் இருக்கின்றன. இதில் ஆங்கில அகராதியும் இணைக்கப்பட்டுள்ளது. பட்டியலிடப்படும் வாசகங்களில் உள்ள புரியாத சொற்களை ,இருமுறை கிளிக் செய்தால் அவற்றுக்கான பொருள் விளக்கம் தோன்றும். அதே போல ஆங்கில சொற்றொடர்களுக்கான விளக்கத்தையும் பார்க்கலாம். தேவை எனில் இரண்டு வார்த்தைகளுக்கு இடையே எந்த சொல் வர வேண்டும் என்றும் தெரிந்தும் கொள்ளலாம்.

இது தவிர, ஆங்கிலம் சரியாக அறியாதவர்கள் தங்கள் மொழியில் வாசகத்தை டைப் செய்து அதை ஆங்கிலத்தில் மொழிபெயர்த்துக்கொண்டு அது சரியா என்றும் பார்த்துக்கொள்ளலாம். ( கூகுள் மொழிபெயர்ப்பு சேவை சார்ந்து இது இயங்குகிறது).
ஆங்கிலத்தில் தயக்கமும்,சந்தேகமும் உள்ளவர்களுக்கு இந்த தேடியந்திரம் நிச்சயம் உதவியாக இருக்கும்.
ஒவ்வொரு முறை சேவையை பயன்படுத்தியவுடன், முடிவுகள் திருப்தியாக இருக்கிறதா? என கேட்கும் சிறு பெட்டியும் தோன்றுகிறது. அதில் உள்ள ஸ்மைலியை கிளிக் செய்யும் போது உங்கள் முகத்திலும் புன்சிரிப்பு தோன்றலாம்.

நாம் ஏற்கனவே பயன்படுத்திய வாசகங்களை மீண்டும் திரும்பி சென்று பார்க்கும் வசதியும் இருக்கிறது.
இந்த தேடியந்திரத்தின் பெயர் தொடர்பாக சுவாரஸ்யமான தகவல் ஒன்றும் இருக்கிறது. ஆஸ்திரியாவைச்சேர்ந்த புகழ்பெற்ற தத்துவஞானியான லுத்விக் விட்ஜென்ஸ்டியன் என்பவர் நினைவாகவே இதற்கு லுத்விக என பெயர் சூட்டப்பட்டுள்ளதாம்.” என்னுடைய மொழியின் வரம்பு தான் என்னுடைய உலகின் வரம்பு” என்னும் வாசகம் அவரது சிந்தனைகளின் முக்கியத்துவத்தை உணர்த்துகிறது.

தேடியந்திர முகவரி:https://ludwig.guru/

—-
நன்றி; தமிழ் இந்துவில் எழுதியது!

இணைய தேடலில் ஒரு சுவாரஸ்யம்.

இந்த இணையதளம் எந்த அளவுக்கு பயனுள்ளதாக இருக்கும் என்று தெரியவில்லை.ஆனால் முதல் முறை பயன்படுத்தும் போது நிச்சயம் சுவாரஸ்யத்தை ஏற்படுத்தவே செய்யும்.

ரைட் வித் இமேஜஸ் என்னும் இந்த தளம் நீங்கள் டைப் செய்வதை எல்லாம் புகைப்பட உருவமாக மாற்றிக்காட்டுகிறது.அதாவது எந்த சொல்லை டைப் செய்தாலும் அதற்கு பொருத்தமான உருவத்தை காட்டுகிறது.

இந்த மாற்றத்தை உருவ மொழி என இந்த தளம் குறிப்பிடுகிறது.

டைப் செய்யப்படும் சொல்லுக்கு நிகரான உருவத்தை கூகுல் உருவ தேடலில் இருந்து கொண்டு வந்து காட்டுகிறது.ஆம் குறிப்பிட்ட சொல்லுக்கான கூகுல் உருவ தேடலில் எந்த உருவம் முதலில் வருகிறதோ அந்த உருவத்தை முன் வைக்கிறது.

இடது பக்கம் உள்ள தேடல் கட்டத்தில் சொற்களை டைப் செய்தால் வலது பக்கத்தில் கூகுல் உருவ தேடல் படம் தோன்றுகிறது.இந்த உருவ மொழியை பேஸ்புக் வழியே நண்பர்களோடு பகிர்ந்து கொள்ளவும் செய்யலாம்.

சொற்களையும் உருவங்களையும் இணைத்து உருவாக்கப்பட்ட அழகான இணைய பரிசோதனை முயற்சி என இந்த தளம் மேலும் குறிப்பிட்டுள்ளது.

ஒவ்வொரு முறையும் ஒரு சொல்லை டைப் செய்யும் போது ஒரு சொல் வரக்கூடும் என்பது தான் இந்த சோதனையில் உள்ள சுவாரஸ்யம்.காரணம் கூகுல் தேடலில் உருவங்களின் வரிசை மாறிக்கொண்டே இருக்கிறது அல்லவா?

நேரமும் ஆர்வமும் இருந்தால் பிடித்தமான ஒவ்வொரு சொல்லாக அல்லது சொற்றொடராக டைப் செய்து என்ன உருவங்கள் வருகிரது என பார்க்கலாம்.கவனம் சில நேரங்களில் அற்புதமான படங்கள் தோன்றலாம்.சில நேரங்களில் அலுப்பூட்டும் படங்களும் ஏன் மோசமான படங்களும் கூட தோன்றலாம்.

இணைய உலகின் பிரலமான தேடியந்திரமான கூகுலை வைத்து கொண்டு உருவாக்கப்பட்ட இன்னொரு அழகான சேவையாகவே இது தோன்றுகிற‌து.இதனை இணையம் சார்ந்த கலை ப‌டைப்பு என்று கூட சொல்லலாம்.

இணையதள முகவரி;http://writewithimages.com/index.php

நண்பர்களோடு சேர்ந்து டைப் செய்ய ஒரு தளம்.


டைப்வித்.மீ இணையதளத்தை ஒரு சின்ன இணைய அற்புதம் என்று சொல்லலாம்.காரணம் ஒரே நேரத்தில் நண்பர்களோடு சேர்ந்து இணையம் வழியே டைப் செய்ய உதவுகிறது இந்த இணையதளம்.நண்பர்கள் வேறு வேறு இடங்களில் இருந்தாலும் ஒரே நேரத்தில் டைப் செய்யலாம்.

அந்த வகையில் இந்த தளத்தை கூட்டு இணைய பலகை என்று சொல்லலாம்.

கூட்டு டைப்பிங் செய்ய இந்த தளத்தை பயன்படுத்துவது மிகவும் எளிதானது.உறுப்பினராக கூட பதிவு செய்யும் தேவை இல்லாமல் இதனை பயன்படுத்த துவங்கி விடலாம்.

வெறுமையாக இருக்கும் இதன் முகப்பு பக்கத்தின் மையத்தில் உள்ள சின்ன கட்டத்தில் கிளிக் செய்தால் புதிய பலகையை திரையில் தருவிக்கலாம்.தேவை என்றால் விரும்பிய பெயரையும் டைப் செய்து அதே பெயரில் பலகையை உருவாக்கி கொள்ளலாம்.

அதன் பிறகு இணைய எழுதிக்கான (வோர்டு பிராசஸர்)அடிப்படை அமசங்களோடு இணைய பலகை தோன்றுகிறது.அதில் நீங்கள் டைப் செய்ய துவங்கலாம்.அதற்கு முன்னர் இந்த பக்கத்தின் இணைய முகவரியை நீங்கள் இணைந்து பணியாற்ற விரும்பும் நண்பர்களோடு பகிர்ந்து கொள்ளலாம்.அதன் பின்னர் அவர்களாலும் அதே பக்கத்தை தங்கள் கம்ப்யூட்டரில் காண முடியும் .அதோடு அந்த பக்கத்திலேயே டைப் செய்யவும் முடியும்.இவ்வாறு ஒன்றுக்கும் மேற்பட்ட நண்பர்களையும் அழைக்கலாம்.அவர்களாலும் இதே பக்கத்தை பார்க்க முடியும்.

நீங்கள் டைப் செய்ய செய்ய அத‌னை நண்பர்கள் பார்ப்பதோடு அதில் திருத்தங்களையும் செய்யலாம்.கூடுதல் தகவல்களையும் டைப் செய்யலாம்.

இந்த கூட்டு டைப்பிங்கில் குழப்பம் ஏற்படாமல் இருக்க நண்பர்கள் தங்கள் எழுத்துக்களுக்கான வண்ணத்தை தேர்வு செய்து கொள்ளலாம்.இதனால் யார் எதை டைப் செய்கின்றனர் என்பதை சரியாக தெரிந்து கொள்ளலாம்.

நண்பர்களோடு அப்படியே இணைய உரையாடலில் ஈடுபடும் வசதியும் இருப்பதால் டைப் செய்யும் விஷயம் குறித்த கருத்துக்களையும் பரிமாறிக்கொள்ளலாம்.

எல்லாவற்றையும் சேமித்து வைத்து கொள்ளலாம்.இதன் மூலம் ஏற்கனவே டைப் செய்தவற்றை எப்போது வேண்டுமானாலும் திரும்பி பார்க்கலாம்.

எழுத்துருக்களை பெரிதாக்குவது,அடிக்கோடிடுவது போல கொட்டை எழுத்துக்கள் கொண்டதாக மாற்றுவது என எல்லா வசதிகளும் இந்த இணைய பலகையில் இருக்கிற‌து.

ஒரே நேரத்தில் நண்பர்கள் அல்லது அலுவலக குழுவினர் கூட்டாக டைப் செய்ய வழி செய்யும் இந்த இணைய பலகையை பலவிதங்களில் பயன்படுத்தலாம்.

அலுவலக நோக்கிலான கடிதத்தை எழுதிய பின் அதில் திருத்தங்கள் தேவை என்றால் யாராவது நண்பரிடம் காண்பித்து சரியாக இருக்கிறதா என்று ஆலோசனை கேட்போம் அல்லவா?இது போன்ற நேரங்களில் டைப் செய்தவற்றை இமெயில் மூலம் அனுப்பி ஆலோசனை கேட்கலாம்.ஆனால் இதற்கு நேரம் ஆகலாம்.

இதற்கு மாறாக இந்த சேவை மூலம் டைப் செய்யும் போதே நண்பரையும் அழைத்து அவரது உதவியுடனே கடிதததை தயார் செய்து விடலாம்.இது ஒரு உதாரணம் தான்.

கூட்டு முயற்சி சார்ந்த எந்த பணிக்கும் இந்த சேவையை பயன்படுத்தி கொள்ளலாம்.

முற்றிலும் இலவசமானது இந்த சேவை.

கூகுல் நிறுவனத்தால் வாங்கப்பட்ட ஈதர்பேட் என்னும் கூட்டு முயற்சி சேவையின் உப சேவையாக அதன் ஓபன் சோர்ஸ் தன்மையை பயன்படுத்தி இந்த இணைய பலகை உருவாக்கப்பட்டுள்ளது என்பது கூடுதல் த‌கவல்.

இணையதள முகவரி;http://typewith.me/

டைப் செய்ய கற்றுக்கொள்ள உதவும் இணையதளம்.

டைப் செய்ய கற்று கொள்ள வேண்டும் என்றெல்லாம் இப்போது யாரும் நினைப்பதில்லை.பலருக்கும் அது இயல்பாக வருகிறது.பலர் டைப் செய்ய கற்று கொள்ளுங்கள் என சொல்லப்படுவதையே அவமானமாக கருதலாம்.சிலர் இத்தகைய பயிற்சி தேவையில்லை என்று கருதலாம்.

ஆனால் யாராக இருந்தாலும் டைப் செய்ய கற்றுக்கொடுக்கும் லெட்டர் பபில் இணையதளத்தை பார்த்தால் கொஞ்சம் சொக்கிப்போய் விடுவார்கள்.

எதையும் விளையாட்டாக செய்தால் சுவாரஸ்யமாக இருக்கும் இல்லையா!இந்த தளமும் டைப் செய்வதற்கான பயிற்சியை ஒரு விளையாட்டாகவே மாற்றியிருக்கிறது.அதற்கேற்ப இதன் முகப்பு பக்க தோற்றமும் எளிமையான கம்ப்யூட்டர் விளையாட்டு பக்கம் போலவே தோன்றுகிறது.

இந்த தளத்தில் நுழைந்ததுமே டைப் செய்யும் விளையாட்டுக்கான வழிமுறையும் விளையாட்டு நிலைகளும் தோன்றுகின்றன.அவற்றில் விரும்பியதை தேர்வு செய்தால் திரையில் கண்ணாடி குமிழ்கள் தோன்றி கொண்டே இருக்கும் .குமிழ்களில் தோன்றும் ஆங்கில எழுத்துக்களை பார்த்து அவற்றுக்கான விசையை அழுத்த வேண்டும்.கண்ணாடி குமிழ்கள் தோன்ற தோன்ற அவற்றுக்கான விசையை தேடி அழுத்த வேண்டும்.

சரியான விசையை அழுத்துவதற்கு ஏற்ப ஒவ்வொரு நிலையாக முன்னேறி கொண்டே இருக்கலாம்.ஒவ்வொரு நிலையிலும் எழுத்துக்களின் சவால் கூடிக்கொண்டே போவது சுவாரஸ்யம்.

இவ்வாறு மூன்று கட்டங்களின் விளையாட்டுக்கள் அதாவது பயிற்சி இருக்கின்றன.திறமைக்கேற்ப ஏதாவது ஒன்றை தேர்வு செய்து கொள்ளலாம்.

விளையாட்டாக இருப்பதால் எவருக்குமே முயன்று பார்க்கலாமே என்று தோன்றும்.குமிழ்களை பார்க்கும் போது ஒருவித சவாலாகவே தோன்றும்.இந்த இரண்டும் இணைந்து விளையாட்டில் மூழ்க வைக்கும்.அப்படியே டைப் செய்வதில் வேகத்தையும் விவேகத்தையும்(பிழையின்றி டைப் செய்வது) ஏற்படுத்தி தரும்.

டைப் செய்ய கற்று கொள்ள வேண்டும் என்ற ஆர்வம் உள்ளவர்களோ இதில் ஒரு வித லயிப்போடு பயிற்சியில் ஈடுபடலாம்.

உறுப்பினராகும் வசதியும் இருக்கிறது.உறுப்பினராகமாலேயே டைப்ச் எய்யும் வசதியும் இருக்கிறது.ஆனால் உறுப்பினரானால் பல சிறப்பம்சங்களை அனுபவிக்கலாம்.அதாவது டைப் செய்வதில் ஒருவரது முன்னேற்றத்தை தெரிந்து கொள்ளலாம்.நண்பர்களை அழைத்து அவர்களோடு போட்டி போடலாம்.

டைப் செய்ய கற்று கொள்வது இத்த்னை சுவாரஸ்யமானதா என்னும் வியப்பை ஏற்படுத்தி கூடவே டைப் செய்யும் திறனையும் மேம்படுத்தும் இணையதளம்.

இணையதள முகவரி;http://www.letterbubbles.com/