Tag Archives: websites

புதுமையான புத்தக பரிந்துரை தளம்

booksஆங்கிலத்தில் நல்ல புத்தகங்களை தேடித்தேடி வாசிக்க விரும்புகிறவர்களை உற்சாகத்த்தில் ஆழ்த்தும் வகையில் புக்சலேட்டர் இணையதளம் அறிமுகம் ஆகியுள்ளது. இந்த தளம் புதிய புத்தகங்களை பரிந்துரை செய்கிறது.

பரிந்துரைக்கப்படும் புத்தகங்களை தேர்வு செய்ய இந்த தளம் பயன்படுத்தும் முறை தான் சுவாரஸ்யமானது. புத்தக பரிந்துரை செய்யும் மற்ற தளங்களில் இடம்பெறும் பட்டியலை அலசி ஆராய்ந்து அதன் அடிப்படையில் புத்தகங்களை இந்த தளம் பரிந்துரைக்கிறது.

உதாரணமாக இணைய கண்டறிதல் சேவையான பிராடக்ட் ஹண்ட் தளத்தில் புத்தக பரிந்துரைகள் இடம்பெறுகின்றன. அதே போல மின்வணிக தளமான அமேசான் இணையதளத்தில் அதிகம் வரவேற்பை பெறும் புத்தகங்களுக்கு நட்சத்திர குறியீடு வழங்கப்படுகிறது. அமேசான் வாசகர்களும் புத்தகங்களை மதிப்பீடு செய்கின்றனர்.

புத்தக புழுக்களுக்கான வலைப்பின்னல் சேவை எனப்படும் குட்ரீட்ஸ் இணையதளத்திலும் புத்தக பரிந்துரை பட்டியல் இடம்பெறுகிறது. இவற்றை எல்லாம் தொகுத்து, படிக்க வேண்டிய சிறந்த புத்தகங்களை இந்த தளம் அடையாளம் காட்டுகிறது.

ஒவ்வொரு புத்தகத்துடனும், பல்வேறு தளங்களில் அதற்கு அளிக்கப்பட்ட மதிப்பெண்ணை பார்க்கலாம். புத்தகம் பிடித்திருந்தால் அதன் அட்டை படத்தில் கிளிக் செய்து அமேசான் தளத்திற்கு சென்று பார்க்கலாம்.

புத்தகத்தின் நீளம் பெரிதாக இருக்க வேண்டுமா? அல்லது சிறியதாக இருக்க வேண்டுமா? எனும் அடிப்படையிலும் பரிந்துரைகளை பார்க்கலாம்.

இவைத்தவிர, பேஸ்புக் நிறுவனர் மார்க் ஜக்கர்பர்க் பரிந்துரைக்கும் புத்தகங்கள், தொழில்முனைவோர் படிக்க வேண்டிய புத்தகங்கள் என்பது போன்ற தலைப்புகளிலும் புத்தகங்கள் அடையாளம் காட்டப்படுகின்றன.

இணைய முகவரி: https://bookcelerator.com/

 

 

 

செயலி புதிது; செல்பிக்கு அலங்காரம்

ஸ்மார்ட்போன் வைத்திருக்கும் பலருக்கும் செல்பி எனப்படும் சுயபடங்களை எடுக்கும் பழக்கமும் இருக்கலாம். இத்தகைய செல்பி பிரியர்களுக்கு என்றே உருவாக்கப்பட்டுள்ள செயலிகளில், மிகவும் சுவாரஸ்யமானதாக ஸ்வீட் செல்பி செயலி அமைகிறது.

ஆண்ட்ராய்டு போன்களில் செயல்படக்கூடிய இந்த செயலி மூலம் பயனாளிகள் தங்கள் செல்பிக்களை அட்டகாசமாக அலங்காரம் செய்து கொள்ளலாம்.

போனில் சுய படத்தை கிளிக் செய்ததும், அதில் ஸ்பெஷல் எபெக்ட் சேர்ப்பது போல பலவித அலங்காரங்களை சேர்த்துக்கொள்ளலாம். விதவிதமான அலங்காரங்களில் இருந்து தேர்வு செய்யும் வாய்ப்பு இருக்கிறது.

சுய படங்களை இன்னும் திருத்தி மேலும் அழகூட்டவும் செய்யலாம். ஒன்றுக்கு மேற்பட்ட படங்களை இணைத்து கொலேஜ் உருவாக்கலாம்.

40 க்கும் மேற்பட்ட நாடுகளில் காமிரா சார்ந்த செயலிகளில் அதிக வரவேற்பை பெற்ற செயலியாக இது இருக்கிறதாம்.

மேலும் விவரங்களுக்கு: https://play.google.com/store/apps/details?id=com.cam001.selfie

பிளேஷ் மூடுவிழா அறிவிப்பும், இணைய வரலாறு கவலையும்!

960x0பழையன கழிதல் என்பது மென்பொருள் சேவைகளுக்கும் பொருந்தும் தான். அதிலும் இணைய தொழில்நுட்பம் வெகு வேகமாக மாறிக்கொண்டிருக்கும் நிலையில், பழைய மென்பொருள் சேவைகள் காலாவதியாகி கைவிடப்படும் நிலை ஏற்படுவது இயற்கையானது தான். இணையத்தின் அடையாளங்களில் ஒன்றாக திகழும் அடோப் பிளேஷ் மென்பொருளுக்கும் இது தான் நிகழ இருக்கிறது. பிளேஷ் மென்பொருளுக்கு விடை கொடுக்க இருப்பதாக அடோப் நிறுவனம் அண்மையில் அறிவித்ததை நீங்களும் கவனித்திருக்கலாம். இது தொடர்பாக அடோப் வெளியிட்ட அறிவிப்பில், பிளேஷ் மென்பொருள் வாழ்க்கையை முடிக்க இருப்பதாக தெரிவித்திருந்தது. 2020 ம் ஆண்டு வாக்கில் பிளேஷ் பிளேயர் மென்பொருளை வெளியிடுவது மற்றும் அதற்கான அப்டேட்கள் நிறுவத்தப்படும் என்றும் அந்த அறிவிப்பில் தெரிவிக்கப்பட்டிருந்தது. இதன் பொருள் பிளேஷ் மென்பொருள் மெல்ல கொல்லப்படும் என்பதாகும்.

இந்த அறிவிப்புக்கான எதிர்வினைகளை பார்க்கும் போது, பிளேஷ் மென்பொருளுக்கு விடை கொடுக்க பெரும்பாலானோர் தயாராகிவிட்டது போலவே தோன்றுகிறது. பிளேஷ் மென்பொருளின் முடிவு நீண்ட காலமாக எதிர்பார்க்கப்பட்டது தான் என்றும், இப்போதாவது அடோபிற்கு இதை அறிவிக்க மனம் வந்ததே என்பது போலவும் தான் பலரும் கருத்து தெரிவித்துள்ளனர். தொழில்நுட்ப செய்தி தளங்கள் கூட, பிளேஷின் தவிர்க்க இயலாத மரணம் என்பது போல தலைப்பு வெளியிட்டிருந்தன. கிஸ்மோடோ இணையதளம் பிளேஷை கருணக்கொலை செய்ய அடோப் முன்வந்துள்ளது என வர்ணித்திருந்தது. இன்னும் சிலர், தவிர்க்க இயலாத பிளேஷ் முடிவு இப்போதாவது அறிவிக்கப்பட்டுள்ளதே என நிம்மதி பெருமூச்சு விட்டுள்ளனர். பல தளங்கள் பிளேஷ் மென்பொருளுக்கு இறங்கற்பா எழுதிக்கொண்டிருக்கின்றன.

பிளேஷ் மீது ஏன் இத்தனை வெறுப்பும், விமர்சனமும் இருந்தாலும் ஒரு காலத்தில் அது கொண்டாடப்பட்ட மென்பொருளாக இருந்ததை மறந்துவிடக்கூடாது. பிளேஷ் அடிப்படையில் இணையத்திற்கான மல்டிமீடியா சேவைகளை உருவாக்க பயன்படும் மென்பொருள். அனிமேஷன், வீடியோகேம் மற்றும் வீடியோக்களை உருவாக்க பிளேஷ் பயன்படுத்தப்படுகிறது. கிராபிக் தான் இதன் பலம் என்பதால், இணையதளங்களை செழுமையாக்க கூடிய செயலிகளையும், சேவைகளையும் பிளேஷ் கொண்டு எளிதாக உருவாக்க முடிந்தது. அது மட்டும் அல்ல இணையத்தில் வீடியோக்களை எளிதாக பார்க்கவும் பிளேஷ் கைகொடுத்தது. வீடியோ பகிர்வு சேவை பிரிவில் முன்னோடியான யூடியூப் 2005 ல் அறிமுகமான போது பிளேஷ் பிளேயர் மூலமே வீடியோக்களை பார்க்க வழி செய்ததாக விக்கிபீடியா கட்டுரை குறிப்பிடுகிறது என்றால் பார்த்துக்கொள்ளுங்கள். அது மட்டும் அல்ல, பிளேஷ் கொண்டு எண்ணற்ற கேம்களும், அனிமேஷன்களும் உருவாக்கப்பட்டுள்ளன.

இப்படி கோலோச்சிய பிளேஷ் முடுவிழாவை நோக்கி தள்ளப்பட இரண்டு முக்கிய காரணங்கள் இருக்கின்றன. முதல் காரணம், பிளேஷ் தொழில்நுட்பம் காலாவதியாகவிட்டது என்பது. ஒரு காலத்தில் இணையதளங்களுக்கான சுவாரஸ்யமான உள்ளடக்கத்தை உருவாக்க பிளேஷ் தேவைப்பட்டது என்றாலும், அதன் பின் நிகழ்ந்த பாய்ச்சலில் அதைவிட மேம்பட்ட தொழில்நுட்பங்கள் வந்துவிட்டன. அதோடு பிரவுசர்களில் பயன்படுத்தப்படும் எச்டிஎம்.எல் தொழில்நுட்பத்திற்கு பிளேஷ் அந்நியமாகிவிட்டது. எனவே மென்பொருளாளரகள் பிளேஷுக்கு குட்பை சொல்லி வருகின்றனர்.

பிளேஷை பொருத்தவரை இன்னொரு பிரச்சனை, அதில் உள்ள பாதுகாப்பு பிரச்சனைகள். பிளேஷ் மென்பொருள் கொண்டு உருவாக்கப்படும் பல சேவைகள் மால்வேர் எனப்படும் வில்லங்க வாகனங்கள் மறைந்திருக்கும் இடமாக கருதப்படுகிறது. பிளேஷில் உருவாக்கப்பட்ட எட்டிப்பார்க்கும் விளம்பரங்கள் அல்லது வீடியோக்கள் மால்வேர்களின் உரைவிடமாக அமைவது உண்டு. அதோடு, உங்கள் பிளேஷ் பிளேயர் காலாவதியாகிவிட்டது, அப்டேட் செய்யவும் எனும் அறிவிப்பையும் பிளேஷ் சார்ந்த தளங்களில் அடிக்கடி பார்த்திருக்கலாம். பெரும்பாலும் இதுவும் வில்லங்க அறிவிப்பாக அமைந்து, இதை கிளிக் செய்தால் மால்வேருக்கான ஜன்னல் திறக்கப்பட்டு அவை கம்ப்யூட்டருக்குள் புகுந்துவிடும். இதற்கு பிளேஷை குற்றம் சாட்ட முடியாது என்றாலும், மால்வேரை உருவாக்கும் விஷமிகளின் பயன்பாட்டால் பிளேஷ் பாதுகாப்பு ஓட்டைகள் நிறம்பியதாக கருதப்பட்டு வருகிறது.

மேம்பட்ட தொழில்நுட்பம் வந்துவிட்டதாலும், மால்வேர் வாகனமாக இருப்பதாலும் பிளேஷுக்கு எதிராக வலுவான விமர்சனங்கள் தொடர்ந்து கூறப்படுகின்றன. பல பிரவுசர் நிறுவனங்களும், பிளேஷை கழற்றிவிட்டுள்ளன. இவ்வளவு ஏன், ஆப்பிள் நிறுவனர் மறைந்த ஸ்டீவ் ஜாப்ஸ், ஐபோனில் இதற்கு இடமே கொடுக்கவில்லை. பிளேஷ் மறைந்தாக வேண்டிய மென்பொருள் என முதலில் அறிவித்தது ஜாப்ஸ் தான். பிளேஷ் டெஸ்க்டாப் காலத்திற்கான மென்பொருள், ஸ்மார்ட்போன யுகத்தில் அதற்கு தேவையில்லை என ஜாப்ஸ் காட்டமாக கூறியிருந்தார்.

ஏதோ ஒரு விதத்தில் பலரும் இப்போது இதை ஏற்கத்துவங்கிவிட்டனர். அதன் விளைவு தான் அடோப் நிறுவனம், பிளேஷை கைவிடும் முடிவை அறிவித்துள்ளது: https://blogs.adobe.com/conversations/2017/07/adobe-flash-update.html

நிற்க இந்த செய்திக்கு இன்னொரு பக்கம் இருக்கிறது. பிளேஷ் மென்பொருளுக்கு ஆதரவாளர்கள் இருக்கின்றனர் என்பதும், அவர்களில் பலர் பிளேஷ் நீடுழி வாழ வேண்டும் என கோரிக்கை எழுப்பியிருப்பதும் தான் அது. மென்பொருளாலரான ஜுஹா லின்ஸ்டெட் (Juha Lindstedt ) என்பவர் பிளேஷை கைவிடக்கூடாது என வலியுறுத்தி கையெழுத்து இயக்கம் ஒன்றை துவக்கியிருக்கிறார். அவரது கோரிக்கை ஒரளவு வரவேற்பை பெற்றிருப்பதோடு காரசாரமான விவாதத்தையும் துவக்கி வைத்திருக்கிறது.

லின்ஸ்டெட் பிளேஷை காப்பற்ற வேண்டும் என்பதற்காக எடுத்து வைக்கும் வாதம் மிகவும் முக்கியமானது. பிளேஷுக்கு முடிவிழா என்பது ஒரு மென்பொருள் சார்ந்த முடிவு மட்டும் அல்ல, அது இணைய வரலாறு சார்ந்ததும் கூட என்பது தான் அவரது வாதத்தின் முக்கிய அம்சம். அதாவது பிளேஷ் கொண்டு உருவாக்கப்பட்ட இணையசேவைகளும், கேம்களும், அனிமேஷன்களும் தொடர்ந்து பயன்படுத்தப்படா முடியாமல் போய்விடும் என்று அவர் கவலைப்படுகிறார். இந்த சேவைகளும், கேம்களும் இணைய வரலாற்றின் அங்கமாக இருப்பதால் அவை காணாமல் போவது இணைய வரலாற்றின் ஒரு பகுதி அழிந்து போவதற்கு சமம் என்கிறார் அவர்.

இதற்காக கித்ஹப் எனும் தொழில்நுட்ப தளத்தில் கோரிக்கை மனு அளித்து ஆதரவு கோரியுள்ளவர், பிளேஷ் பிளேயர் என்பது இணைய வரலாற்றின் முக்கிய துண்டு, அதை கொல்வது எதிர்கால தலைமுறை கடந்த காலத்தை அணுக முடியாமல் செய்துவிடும் என்று தெரிவித்துள்ளார். கேம்கள், இணையதளங்கள், இணைய சோதனை முயற்சிகள் எல்லாமே மறக்கப்பட்டுவிடும் என்றும் அவர் தெரிவித்துள்ளார்.

மென்பொருளில் ஏற்படும் முன்னேற்றம் என்பது கடந்த காலத்தை அழிப்பதாக அமைய வேண்டுமா என்பது தான் அவர் கேட்கும் கேள்வி. ஆம், சில ஆண்டுகள் கழித்து மென்பொருள் வரலாறு பற்றி விவாதிக்கும் போது பிளேஷ் மென்பொருள் தொடர்பாக பேசும் போது, அதற்கான உதாரணங்களை காண முடியாமல் வெறும் விக்கிபீடியா கட்டுரையை தகவலை மட்டும் காண்பது என்பது வரலாற்று வெறுமையாகி விடலாம் அல்லவா? இந்த கவலையினால் தான் லின்ஸ்டெட் பிளேஷை காப்பாற்ற குரல் கொடுக்க கோரியிருக்கிறார். ஆனால், பிளேஷ் தொடர்பான நிதர்சனத்தை அவர் உணராமல் இல்லை. எனவே தான், பிளேஷ் மென்பொருளை கொலை செய்துவிடாமல், அதை ஓபன் சோர்ஸ் முறையில் வெளியிட்டு இணையவாசிகள் கைகளில் ஒப்படைக்க வேண்டும் என கேட்டிருக்கிறார். இது சரியா? பலன் தருமா? எனும் நோக்கில் மென்பொருள் உலகில் விவாதம் நடைபெற்று வருகிறது.: https://github.com/pakastin/open-source-flash

இணைய யுகத்தின் பழைய சேவைகளையும், தளங்களையும் தக்க வைத்து, இணைய வரலாற்றை காக்க வேண்டும் எனும் இயக்கத்தின் பாதையில் பிளேஷுக்கான போராட்டம் முக்கிய பங்கு வகிக்கும் என எதிர்ப்பாக்கலாம். இந்த செய்திக்கு வாலாக ஒரு தகவலையும் நினைத்துப்பார்ப்பது பொருத்தமாக இருக்கும். அண்மையில் மைக்ரோசாப்ட் நிறுவனம் வரைவதற்கான எம்.எஸ் பெயிண்ட் மென்பொருளுக்கு விடை கொடுப்பதாக அறிவித்தது. ஆனால் அந்த எளிமையான மென்பொருளுக்கு ஆதரவாக பயனாளிகள் டிவிட்டரில் பொங்கியதை அடுத்து, பெயிண்ட் மென்பொருள் விண்டோஸ் ஸ்டோரில் தொடரும் என அறிவித்தது. 32 ஆண்டுகளுக்கு முன் அறிமுகமான மென்பொருளுக்கு இத்தனை அபிமானிகளா என்றும் வியந்து போவதாக மைக்ரோசாப்ட் தெரிவித்திருந்தது. கம்ப்யூட்டரில் வரைவதை எளிதாக்கிய அந்த மென்பொருளும் இணைய வரலாற்றின் அங்கம் தான்.

 

தளம் புதிது: அந்த நாள் இணையதளங்கள்

இணைய வரலாற்றை திரும்பி பார்க்க இணையதளங்களை திரும்பி பார்ப்பதைவிட சிறந்த வழி வேறில்லை. அதாவது, சில ஆண்டுகளுக்கு முன் குறிப்பிட்ட இணையதளங்கள் எப்படி இருந்தன என்பதை திரும்பி பார்ப்பது. குறிப்பிட்ட கால கட்டத்தில் இணையதளங்கள் எப்படி தோற்றம் அளித்த என தெரிந்து கொள்ள முடிவது இணைய வடிவமைப்பு பற்றி மட்டும் அல்ல, உள்ளடக்கத்தின் போக்கு பற்றியும் புரிய வைக்கும்.

அந்த வகையில், இணையத்தின் முன்னணி இணையதளங்கள் பத்தாண்டுகளுக்கு முன் எப்படி இருந்தன என்பதை தெரிந்து கொள்ள வழி செய்கிறது டென் இயர்ஸ் அகோ இணையதளம்.

இதன் முகப்பு பக்கத்தில் பட்டியலிடப்பட்டுள்ள ரெட்டிட், யூடியூப், அமேசான், பிபிசி, டைம், ஆப்பிள் உள்ளிட்ட இணையதளங்களின் லோகோ மீது கிளிக் செய்தால் அவை 10 ஆண்டுகளுக்கு முன் எப்படி காட்சி அளித்தன என்பதை பார்க்கலாம்.

இணையதளங்களின் பழைய வடிவங்களை சேமித்து காப்பாற்றிவரும், வெப் ஆர்கேவ் தளத்தில் சேமிக்கப்பட்ட இணைய பக்கங்களை கொண்டு இந்த இணையதளம் உருவாக்கப்பட்டுள்ளது. நீல் அகர்வால் என்பவர் இந்த சுவாரஸ்மான இணையதளத்தை அமைத்திருக்கிறார்.

இணைய முகவரி: http://tenyearsago.io/

 

செயலி புதிது; புத்தக குழுக்களை உருவாக்கலாம் வாங்க!

நல்ல புத்தகத்தை படித்தால் மட்டும் போதுமா என்ன? அது பற்றி சக வாசகர்களுடன் விவாதித்தால் தான் வாசிப்பு அனுபவம் இன்னும் விசாலமாகும் அல்லவா? ஸ்மார்ட்போன் யுகத்தில் இத்தகைய பகிர்தலுக்கு உதவும் வகையில் புக்டிரைப்ஸ் செயலி உருவாக்கப்பட்டுள்ளது.

ஐபோனுக்காக உருவாக்கப்பட்டுள்ள இந்த செயலியில், புத்தக புழுக்கள் தாங்கள் படித்த ரசித்த புத்தகம் தொடர்பான குழுவை உருவாக்கி கொண்டு அது பற்றி விவாதிக்கலாம். இந்த குழுவில் சேருமாறு நண்பர்களுக்கு அழைப்பு விடுக்கலாம். நமக்கு பிடித்த புத்தகம் தொடர்பான குழுவில் சேர்ந்து கருத்து தெரிவிக்கலாம்.

நாம் விவாதிக்க விரும்பும் புத்தகங்களை நண்பர்களுடன் பகிர்ந்து கொண்டு கருத்து சொல்ல அழைக்கலாம். ஒவ்வொரு புத்தகம் பின்னும் ஒரு குழு இருக்கிறது என்பதை சாத்தியமாக்க விரும்புகிறது இந்த செயலி.

மேலும் விவரங்களுக்கு: http://booktribes.us/

 

 

நன்றி; தமிழ் இந்து இளமை புதுமையில் எழுதியது.

ஐரோப்பாவுக்கு ஒரு இணைய உலா!

 

lead.c2e3a89d927140b5ac304bf7bc2e45a9-800x420ஐரோப்பாவில் உள்ள எல்லா நாடுகளையும் சுற்றிப்பார்ப்பது சாத்தியமா? அது, உங்கள் கைவசம் உள்ள நேரம் மற்றும் உங்கள் வசதி சார்ந்தது. சில நாட்கள் முதல் ஓரிரு வாரங்கள் செலவிட முடிந்தால், ஐரோப்பாவின் முக்கிய நாடுகளை சுற்றிப்பார்த்து விட்டு வரலாம். ஆனால் அப்போதும் கூட பல நாடுகளை தவறவிட வேண்டியிருக்கும். கால் வைத்த நாடுகளில் கூட, அடையாளத்திற்கு சில இடங்களை பார்க்கலாம் அவ்வளவு தான். ஆனால் இந்த அனுபவமே மறக்க முடியாததாக இருக்கும் என்பது வேறு விஷயம்.

நிற்க, ஐரோப்பாவுக்கு சுற்றுலா செல்வது சாத்தியமோ இல்லையோ, நீங்கள் விரும்பினால் ஐரோப்பிய கலாச்சாரம் மற்றும் அதன் செழுமையான பாரம்பரியத்தில் மூழ்கி மகிழலாம் தெரியுமா? யூரோபியானா இணையதளம் (http://www.europeana.eu/portal/en# ) இதை சாத்தியமாக்கிறது. ஒரு அரை மணி நேரத்தை இந்த தளத்தில் செலவிட முடிந்தால், ஐரோப்பாவின் கலாச்சார செழுமை முதல் பேஷன் பெருமைகள் வரை பலவற்றை ஒளிப்படங்களாக பார்த்து மகிழலாம், இசைக்கோர்வைகளாக கேட்டு ரசிக்கலாம். கலைப்பொருட்களாக பார்த்து வியக்கலாம்.

இணையம் ஒரு அற்புதம் என்பதை பலமுறை நீங்கள் கேள்விப்பட்டிருக்கலாம். சில அரிய தருணங்களில் இந்த அற்புதத்தை நீங்களே உணர்ந்திருக்கலாம். யூரோபியானா இணையதளத்தில் நுழைந்ததுமே அத்தகைய தருணத்தை உணரத்துவங்கலாம். இந்த உணர்தலை ஒளிப்படங்களில் இருந்தே துவங்கலாம். ஏனெனில், மிகவும் அண்மையில் தான் இந்த பகுதி புதிய வசதியாக அறிமுகம் ஆகியிருக்கிறது. ’யூரோபியானா போட்டோகிராபி’ எனும் பெயரில் அறிமுகம் செய்யப்பட்டுள்ள இந்த பகுதி 20 லட்சத்திற்கும் மேற்பட்ட வரலாற்று ஒளிப்படங்களை கொண்டிருக்கிறது. 34 ஐரோப்பிய நாடுகளின் 50 க்கும் மேற்பட்ட அருங்காட்சியகங்கள் போன்ற அமைப்புகள் பங்களிப்புடன் இந்த புகைப்பட தொகுப்பு உருவாக்கப்பட்டுள்ளது.

முகப்பு பக்கத்தில், ஐரோப்பிய கலை, ஐரோப்பிய பேஷன், ஐரோப்பிய இசை என வரிசையாக உள்ள பட்டியலில் ஐரோப்பிய ஒளிப்படங்கள் எனும் தலைப்பு மூலம் இந்த படங்களை பார்த்து ரசிக்கலாம். ஒளிப்படக்கலையில் விஷயம் தெரிந்தவர்கள் எனில், ஐரோப்பாவின் புகழ் பெற்ற ஒளிப்பட மேதைகளின் பெயரை தட்டச்சு செய்து அவர்களின் ஒளிப்படைப்புகளை தேடலாம். குறிப்பிட்ட தலைப்புகள் சார்ந்தும் ஒளிப்படங்களை அணுகலாம்.

சும்மா சொல்லக்கூடாது, ஐரோப்பிய ஒளிப்படக்கலையின் முதல் 100 ஆண்டுகளில் எடுக்கப்பட்ட ஒளிப்படங்களை இந்தப்பகுதியில் பார்த்து ரசிக்கலாம். எதை பார்ப்பது, எப்படி பார்ப்பது என திகைத்து நிற்பவர்களுக்கு வழி காட்டும் வகையில் இந்த தளமே இணைய கண்காட்சிகளாக வழிகாட்டுகிறது. உதாரணத்திற்கு, ‘இயந்திரங்களின் யுகத்தில் எடுக்கப்பட்ட தொழில்கூட படங்கள் ’ கண்காட்சி மூலம் அந்த கால தொழிற்சாலைகள், இயந்திரங்கள், தொழிலாலர்கள் உள்ளிட்டவற்றை ஒளிப்படங்களாக பார்த்துபடி பின்னோக்கிச்செல்லலாம். இதே போல குறிப்பிட்ட தலைப்புகள் மற்றும் கலைஞர்கள் சார்ந்த ஒளிப்படங்களையும் காணலாம்.

012uP2P1sayKஅந்த கால ஐரோப்பா எப்படி இருந்தது என பார்க்க விரும்பினாலும் சரி, கால வெள்ளத்தில் ஐரோப்பா எப்படி மாறி வந்திருக்கிறது என அறிய விரும்பினாலும் சரி, ஒளிப்படங்கள் வாயிலாக அந்த அனுபவத்தை பெறலாம். அவரவர் விருப்பம் அல்லது தேடலுக்கு ஏற்ப மிலன் அல்லது லண்டன் என நகரங்களின் பெயரை தட்டச்சு செய்து ஒளிப்படங்களை தேடலாம். ஐரோப்பிய பேஷனில் ஏற்பட்ட மாற்றங்கள், கலாச்சார சுவடுகள் , மனிதர்கள் என பலவிதங்களில் வரலாற்றின் பக்கங்களை திரும்பிப்பார்க்கலாம். உதாரணத்திற்கு நடன அறைகளில் அணியப்பட்ட ஆடைகளை சித்தரிக்கும் ஒளிப்படங்களை பார்த்து ரசிக்கலாம். அதே போல பிரபலங்களின் பேஷனை பார்க்கலாம்.

ஒளிப்படங்களை பயன்படுத்துவது தொடர்பான காப்புரிமை சார்ந்த விவரங்களும் கொடுக்கப்பட்டுள்ளன. வண்ணங்கள், காலவரிசை என பலவிதங்களில் தேடலை மாற்றி அமைத்துக்கொள்ளும் வசதி இருக்கிறது. குறிப்பிட்ட ஒளிப்படம் கவனத்தை ஈர்த்தால் அந்த படம் தொடர்பான மேலதிக தகவல்கள் மற்றும் அதை பகிர்ந்து கொண்டுள்ள அருங்காட்சியக அமைப்பு குறித்த விவரங்களையும் தெரிந்து கொள்ளலாம்.

ஒளிப்படங்களின் தேடல் இந்த தளத்தின் ஒரு அம்சம் தான். இதே போல ஐரோப்பா தொடர்பான பலவிஷயங்களை இந்த தளத்தில் தேடலாம். குறிப்பிட்ட நாடு தொடர்பாக அறிய விரும்பினால், அந்த நாடு தொடர்பாக உள்ள ஒளிப்படங்கள் உள்ளிட்ட தகவல்கள் பட்டியலாக தோன்றுகிறது. காணொலிகள், ஒலிக்கோப்புகள், புத்தகங்கள், கலை வடிவங்கள் என பலவகையான தகவல்கள் அணிவகுக்கின்றன. தேவை எனில், தேடலில் ஈடுபடும் போது எந்த வகையான தகவல் வேண்டும் என தேர்வு செய்து கொள்ளலாம். ஒளிப்படங்களை தேர்வு செய்தால் படங்கள் மட்டும் வரும். இசை அல்லது கலையை தேர்வு செய்தால் தொடர்புடைய தகவல்களை காணலாம்.

சோவியத் யூனியன் வரலாற்றில் ஆர்வம் உள்ளவர்கள் ரஷ்ய புரட்சிக்கு வித்திட்ட லெனினின் அரிய ஒளிப்படங்களை காணலாம். அதே போல உளவியல் மேதை சிக்மண்ட் பிராய்டின் ஒளிப்படங்களை காணலாம். லண்டன் நகர தெருக்களின் உலாவலாம். மிலன் பேஷன் போக்குகளை கண்டு வியக்கலாம்.

இப்படி அநேகமாக ஐரோப்பிய நாடுகளின் முக்கிய அருங்காட்சியகங்களில் பொக்கிஷமாக பாதுக்காக்கப்படும் கலைப்பொருட்கள், காணொலிகள், ஒளிப்படங்கள் அனைத்தையும் இந்த தளம் மூலம் அணுகலாம். இந்த தளத்தை பயன்படுத்த வரலாற்று ஆர்வம் கொண்டவராக அல்லது ஆய்வாளராக இருக்க வேண்டும் என்றில்லை, சாமானியர்களையும் எளிதில் கவரக்கூடிய அம்சங்களை இந்த தளத்தில் காணலாம். அதற்கேற்ப கலாச்சார ஆர்வலர்களே வாருங்கள் என்று தான் இந்த இணையதளம் அழைப்பு விடுக்கிறது. ஆய்வு பணிக்காக வந்திருந்தாலும் சரி, அல்லது அலுப்பை போக்கி கொள்ள வந்திருந்தாலும் சரி, உங்களுக்கு ஆர்வத்தை ஏற்படுத்தக்கூடிய ஏதாவது சில எங்களிடம் நிச்சயம் இருக்கும் என்றும் இந்த தளம் பெருமிதம் கொள்கிறது.

ஐரோப்பிய பாரம்பரியம் தொடர்பான தரவுகளை இணையம் மூலம் அனைவருக்கும் அளிக்கும் நோக்கில் யூரோபியானா அமைப்பு இந்த தளத்தை நடத்தி வருகிறது. பல ஐரோப்பிய அமைப்புகள் ஒன்றிணைந்து உருவாக்கிய ஐரோப்பிய அறக்கட்டளை சார்பில் இந்த தளம் செயல்பட்டு வருகிறது. கலைப்படைப்புகளும், ஒளிப்படங்களும் டிஜிட்டல் மயமாக்கப்பட்டு, பகிரப்படும் போது என்னவெல்லாம் சாத்தியம் என்பதையும், கூட்டு முயற்சியின் அருமையையும் உணர்த்தும் வகையிலும் இந்த தளம் அமைந்துள்ளது.

யூரோபியானா திட்டம் பற்றிய அறிமுகம் : http://pro.europeana.eu/about-us/our-vision

-நன்றி; தமிழ் இந்து , இளமை புதுமை பகுதியில் எழுதியது.

இந்த தளம் இணைய இசை அகராதி

muஇணையத்தில் இசை தொடர்பான இணையதளங்களும், சேவைகளும் அநேகம் உள்ளன. அதே போல புரியாத சொற்களுக்கு அர்த்தம் தெரிந்து கொள்ள உதவும் இணைய அகராரிதிகளும் நிறையவே இருக்கின்றன. இந்த இரண்டு அம்சங்களையும் ஒன்றாக இணைந்ததாக ஆன்மியூசிக் டிக்‌ஷனரி தளம் அமைந்துள்ளது. அதாவது இசைக்கான இணைய அகராதியாக இது உருவாக்கப்பட்டுள்ளது.

வழக்கமான இணைய அகராதிகள் போலவே இதிலும் சொற்களுக்கான பொருளை தேடலாம். ஆனால், இசை தொடர்பான சொற்களை மட்டுமே இதில் தேட முடியும். இசையில் ஆர்வம் கொண்டவர்கள் அல்லது புதிதாக இசை பயில்பவர்களுக்கு இந்த அகராதி பயனுள்ளதாக இருக்கும்.

ஏதேனும் ஒரு இசைச்சொல் தொடர்பான விளக்கம் தேவை எனில் இதில் தேடிக்கொள்ளலாம். தேடப்படும் சொல்லுக்கான விரிவான விளக்கத்துடன் அதற்கான இசைக்குறிப்பும் இடம்பெறுகிறது. பல சொற்களுடன் அதற்கான ஒலிக்குறிப்பை கேட்கும் வசதி இருக்கிறது. உதாரணமாக இசைக்கருவி தொடர்பான தேடலில், அந்த கருவியின் ஒலி நயத்தையும் அறியலாம்.

இசைக்கருவிகள், இசை அமைப்பாளர்கள் சார்ந்தும் தேடும் வசதி உள்ளது. அகர வரிசையிலும் தேடலாம். இவைத்தவிர முகப்பு பக்கத்திலேயே தினம் ஒரு இசைச்சொல் விளக்கப்படுகிறது.

இணைய முகவரி: https://dictionary.onmusic.org/

 

செயலி புதிது: தயக்கத்தை வெல்ல ஒரு செயலி

ஸ்டெப்ஸ் எனும் பெயரில் ஐபோனுக்கான புதுமையான செயலி ஒன்று அறிமுகமாகி உள்ளது. இந்த செயலி சமுக தயக்கங்களை உடைத்தெறிய உதவுகிறது.

அறிமுகம் இல்லாதவர்களுடன் பேச தயங்குவது, புதிய இடங்களுக்கு செல்வது, நிராகரிப்புகளை எதிர்கொள்ள அஞ்சுவது என ஒவ்வொருவருக்கும் ஒரு விதமான சமூக சங்கடம் அல்லது தயக்கம் இருக்கலாம். கூட்டுக்குள் அடைந்து கிடக்காமல் தைரியமாக இத்தகைய சூழலை எதிர்கொள்வதே இந்த தயக்கங்களை வெல்ல ஏற்ற வழி என சொல்லப்படுகிறது. இது வெளிப்படுத்திக்கொள்ளும் சிகிச்சை என அழைக்கப்படுகிறது.

ஒருவர் அஞ்சும் சூழல் தொடர்பான சிறிய செயல்களை மேற்கொள்வதன் மூலம் அந்த சூழலுக்கு பழகிக்கொள்ள தயார் செய்யும் வகையில் இந்த சிகிச்சை செயல்படுகிறது. ஆனால் இந்த சிகிச்சை முறையை சுவாரஸ்யமான வழியில் மேற்கொள்ள உதவும் வகையில் ஸ்டெப்ஸ் செயலி உருவாக்கப்பட்டுள்ளது.’

இந்த செயலி சமுக தயக்கங்களை வெல்ல வழி செய்யும் சிறிய செயல்களை பல்வேறு தலைப்புகளில் பரிந்துரைக்கிறது. அவற்றில் இருந்து விரும்பியதை தேர்வு செய்தால் அது தொடர்பாக நினைவூட்டி ஊக்கம் அளிக்கிறது. பின்னர் அந்த செயலில் ஈடுபட்டு அந்த அனுபவத்தையும் பகிர்ந்து கொள்ளலாம். நண்பர்களையும் இந்த செயலில் ஈடுபட அழைக்கலாம்.

மேலும் தகவல்களுக்கு: https://www.stepsapp.xyz/

 

 

 

 

கல்லூரி மாணவர்களுக்கு கைகொடுக்கும் புதுமையான இணையதளங்கள்!

 

intகல்லூரி மாணவர்கள் நிச்சயம் தங்களுக்கு சுவாரஸ்யமான இணையதளங்களை அறிந்து வைத்திருப்பார்கள். அவற்றோடு வேலைவாய்ப்புக்கு உதவக்கூடிய தளங்களையும், பாடத்திட்டங்களில் வழிகாட்டக்கூடிய கல்வி சார்ந்த இணையதளங்களையும் அறிந்து வைத்திருப்பார்கள். இப்படி மாணவர்கள் குறித்து வைத்திருக்கும் முக்கிய இணையதளங்களின் பட்டியலில், தனிப்பிரிவிட்டு இண்டெர்ன்சாலா, லெட்ஸிண்டெர்ன், ஹலோஇண்டெர்ன் போன்ற இணையதளங்களையும் சேர்த்துக்கொள்ள வேண்டும். இவை எல்லாமே பயிற்சி நிலை பணிகளை பெறுவதற்கு வழிகாட்டும் இணையதளங்கள். எனவே மாணவர்களுக்கு முக்கியமானவை.

பயிற்சி நிலை என்பது ஆங்கிலத்தில் இண்டெர்ன்ஷிப் என்று குறிப்பிடப்படுகிறது. ஒரு நிறுவனத்தில் முழு நேர ஊழியராக பணிக்கு சேரும் முன், தங்கள் விரும்பும் துறை சார்ந்த ஏதேனும் ஒரு நிறுவனத்தில் பயிற்சியாளராக பணிக்கு சேர்ந்து முன் அனுபவம் பெற இந்த பயிற்சி நிலை பணி உதவுகிறது. பெரும்பாலும் கல்லூரியில் படித்துக்கொண்டிருக்கும் போதே இந்த பணியில் சேரலாம். கோடை விடுமுறை, குளிர்கால விடுமுறை போன்ற காலம் மிகவும் ஏற்றவை.

மாணவர்களுக்கும் சரி, நிறுவனங்களுக்கும் சரி இது மிகவும் ஏற்றது. மாணவர்களைப்பொருத்தவரை வர்த்தக நிறுவனத்தில் பணிக்கு சேர்வதற்கு முன்பே துறை சார்ந்த அனுபவம் பெறுவதற்கான வாய்ப்பாக பயிற்சி நிலைப்பணி அமைகிறது. தங்கள் ஆர்வத்தை பட்டைத்தீட்டிக்கொள்ளவும், துறை சார்ந்த செயல்பாடுகளை நேரடியாக அறிமுகம் செய்து கொள்ளவும் இந்த அனுபவம் கைகொடுக்கும். பயிற்சி நிலை பணிக்குப்பிறகு அவர்கள் மேலும் நம்பிக்கையிடன் வேலை வாய்ப்பை தேடலாம். தாங்கள் பயிற்சியாளராக பணியாற்றிய நிறுவனத்திலேயே முழு நேர ஊழியராக பணிக்கு சேரும் வாய்ப்பு இருப்பதோடு, வேறு நிறுவனத்திற்கு வேலைக்கு விண்ணப்பித்து நேர்க்காணலுக்கு செல்லும் போது பயிற்சி நிலை பணி அனுபவம் சாதகமான அம்சமாக கருதப்படும்.

அதோடு படித்துக்கொண்டிருக்கும் காலத்திலேயே மாணவர்கள் தங்களுக்கான துறையை தேர்வு செய்யவும் இந்த அனுபவம் வழிகாட்டும். இந்த காலத்திற்கு ஊக்கத்தொகையாக ஊதியமும் வழங்கப்படும்.

வர்த்தக நிறுவனங்களைப்பொருத்தவரை எதிர்கால திறமைகளை கண்டறிய, மாணவர்களை பயிற்சியாளராக பணிக்கு அமர்த்திக்கொள்வது சிறந்த வழியாகும். அதிலும் தற்போது தகவல் தொழில்நுட்பம், பொறியியல் என எல்லாத்துறைகளிலும் பட்டம் பெற்று வரும் மாணவர்களின் பணி தயார் தன்மை அல்லது திறன் பயிற்சி ஏமாற்றம் அளிக்கும் வகையில் இருப்பதாக கருதப்படுகிறது. தொழில்துறைக்கு என்ன தேவையோ அவை வகுப்பறைகளில் கற்றுத்தரப்படுவதில்லை, வகுப்பறைகளில் கற்றுத்தரப்படுபவை தொழில்துறைக்கு தேவைப்படுவதில்லை” என சொல்லும் வகையில் நிலைமை உள்ளது. இந்த சூழலில் இளம் பட்டதாரிகள் தொழில்துறைக்கு ஏற்றவர்களாக உருவாவதில் பயிற்சி நிலை பணிகள் பெருமளவு கைகொடுக்கின்றன.

கல்லூரி வளாகத்திற்கு வந்து முகாமிட்டு பிரகாசமான மாணவர்களை கொத்திக்கொண்டு போவது ஒரு பக்கம் நடந்தாலும், இன்னொரு பக்கம் வர்த்தக நிறுவனங்கள் தகுதியான, திறன் பயிற்சி மிக்க மாணவர்களை தேடிக்கொண்டே இருக்கின்றன. அதே நேரத்தில் பெரும்பாலான மாணவர்கள் அடுத்தது என்ன எனும் கேள்விக்கு சரியான விடை தெரியாமல் அல்லாடிக்கொண்டிருக்கின்றனர். இந்த இரண்டு கேள்விக்கும் விடை தான் பயிற்சி நிலை பணி எனப்படும் இண்டெர்ஷிப்.

பட்டப்படிப்பில் இத்தனை மதிப்பெண் பெற்றேன் என மாணவர்கள் பெருமையாக கூறிக்கொள்வது போலவே, ஆறு மாதம் இந்த நிறுவனத்தில் பயிற்சி நில பணி செய்துள்ளேன் என கூறிக்கொள்ளலாம். நிறுவனங்களும் இந்த அம்சத்தை சாதகமாக கருதும்.

எல்லாம் சரி, பயிற்சி நிலை பணிகள் தொடர்பான தகவல்களை அறிவது எப்படி? இந்த கேள்விக்கு விடையாக தான் பயிற்சி நிலை பணி தளங்கள் அமைந்துள்ளன. இவை பயிற்சி நிலை பணி தகவல்களை பட்டியலிட்டு, மாணவர்கள் மற்றும் வர்த்தக நிறுவனங்களை இணைத்து வைக்கின்றன. மான்ஸ்டர்.காம். நவ்கரி.காம் போன்ற வேலைவாய்ப்பு தளங்களை நாடுவது போலவே மாணவர்கள் படித்துக்கொண்டிருக்கும் போதே இந்த தளங்களை பயன்படுத்திக்கொள்ளலாம்.

பயிற்சி நிலை பணிகளுக்கான தேடியந்திரம் போலவே இவை அமைந்திருக்கின்றன. பணிகளை தேடுவது தவிர, பயிற்சி நிலை பணி தொடர்பாக பயனுள்ள தகவல்களையும் சுவாரஸ்யமான முறையில் அளிக்கின்றன. இண்டெர்ன்சாலா .காம் இதற்கு அழகான உதாரணம். இந்த பிரிவில் முன்னிலை பெற்றும் விளங்குகிறது.

இந்த தளத்தில் பயிற்சி நிலை பணிகளை இரண்டு விதமாக தேடலாம். பயிற்சி நிலை பணிகள் நகரங்களை மையமாக கொண்டு வகைப்படுத்தப்பட்டுள்ளன. சென்னை, தில்லி, பெங்களூரு, மும்பை என பல்வேறு நகரங்களில் உள்ள நிறுவனங்களில் உள்ள வாய்ப்புகளை இந்த பகுதி மூலம் அறிந்து கொண்டு விண்ணப்பிக்கலாம். வீட்டில் இருந்து பணியாற்றக்கூடிய வாய்ப்புகள் மற்றும் சர்வதேச அளவிலான வாய்ப்புகளையும் இந்த பட்டியலில் காணலாம். இதே போல பொறியியல் ஊடகம், சட்டம், தன்னார்வ பணி என துறைகளின் அடிப்படையிலும் வாய்ப்புகள் பட்டியலிடப்பட்டுள்ளன. மாணவர்கள் தாங்கள் விரும்பும் நகரம் அல்லது துறையை தேர்வு செய்து அவற்றில் உள்ள வாய்ப்புகளில் பொருத்தமானவற்றை கண்டறியலாம்.

மாணவர்கள் தங்களுக்கு தேவையான அம்சங்களுக்கு ஏற்ப வாய்ப்புகளை தேடும் வாய்ப்பும் உள்ளது. பொருத்தமான வாய்ப்பை கண்டறிந்ததும் இந்த தளத்தில் இருந்தே விண்ணப்பிக்கலாம். பணி காலம், ஊக்க ஊதிய தொகை, பயிற்சியின் தன்மை உள்ளிட்ட விவரங்களை தெரிந்து கொண்டு விண்ணப்பிக்கலாம்.

இவைத்தவிர பல்வேறு துறைகளில் இந்த தளமே இணையம் மூலமான பயிற்சிகளையும் அளிக்கிறது. மேலும் பயிற்சி பணி வாய்ப்பு தொடர்பான வலைப்பதிவு மூலம் பயனுள்ள தகவல்களையும் அளிக்கிறது. பயிற்சி பணி பெறுவது எப்படி? பயிற்சி பணிக்கு விண்ணப்பிக்கும் வழிமுறைகள் என்ன? என்பது உள்ளிட்ட கேள்விகளுக்கான விரிவான பதிலை இந்த கட்டுரைகள் அளிக்கின்றன.

சர்வேஷ் அகர்வால் எனும் ஐஐடி பட்டதாரி இந்த தளத்தை நிறுவி நடத்தி வருகிறார். ராஜஸ்தானைச் சேர்ந்தவரான அகர்வால், சென்னை ஐஐடியில் பட்டம் பெற்றவர் என்பது குறிப்பிடத்தக்கது. பட்டப்படிப்பை முடித்தப்பிறகு வெளிநாட்டில் சில ஆண்டுகள் பணியாற்றிக்கொண்டிருந்தார். அப்போது, ஐஐடி பட்டதாரிகள் பலர் தொழில்முனைவோர்களாக ஸ்டார்ட் அப் துறையில் கலக்கி கொண்டிருப்பதை கேள்விப்பட்டு வியந்து நின்றார்.

தொழில்முனைவு ஆர்வத்தோடு மும்பை வந்தவர் வங்கி ஒன்றில் பணிக்கு சேர்ந்தார். புதிய நிறுவனங்களுக்கான பல யோசனைகளை பரிசீலித்துக்கொண்டிருந்தவர் நண்பர்களுடன் இணைந்து செயல்பட்டார். இந்த காலட்டத்தில் தான் நண்பர் ஒருவர் வெளிநாட்டு படிப்பு முடித்த நண்பர் ஒருவர் இந்தியாவில் பயிற்சி நிலை பணி பெற விரும்பிய போது சரியான வாய்ப்பு கிடைக்காமல் அல்லாடிக்கொண்டிருப்பதை பார்த்தார். அப்போது தான் அவருக்கு பயிற்சி நிலை பணிக்கான தகவல்களை திரட்டித்தரும் எண்ணம் உண்டானது. முதல் கட்டமாக சாதாரண வலைப்பதிவு ஒன்றை துவங்கி தனக்கு கிடைத்த பயிற்சி நிலை பணிகளை பகிர்ந்து கொண்டார். இந்த வலைப்பதிவுக்கு மாணவர்கள் மத்தியில் நல்ல வரவேற்பு கிடைத்தது. நிறுவனங்களும் இந்த சேவையை விரும்பின. இதன் பயனாக ஒரு கட்டத்தில் தனது வேலையை விட்டுவிட்டு தனது வலைப்பதிவை முழுவீச்சிலான இணையதளமாக மாற்றினார். இப்படித்துவங்கிய இண்டெர்சாலா தான் இன்று முன்னணி சேவையாக வளர்ச்சி அடைந்துள்ளது. பயிற்சி நிலை பணிகள் பெற உதவும் இந்த தளம் ஆரம்ப கட்டத்தில், இத்தகைய பயிற்சி நிலை பணியாளர்களை கொண்டே வளர்ந்தது என்பது தான் கவனிக்க வேண்டிய விஷயம்.

இந்த பிரிவில் முன்னணியில் இருக்கும் மற்றொரு சேவை லெட்ஸிண்டெர்ன். இந்த தளமும் பயிற்சி பணி வாய்ப்புகளுக்கான தேடியந்திரம் போலவே விளங்குகிறது. எந்த வகை பயிற்சி பணி தேவை என இதில் உள்ள முகப்பு கட்டத்தில் குறிச்சொல் மூலம் தேடலாம். இவைத்தவிர பயிற்சி பணி வாய்ப்புகள் தனியே பட்டியலிடப்பட்டுள்ளன. நிறுவன வாய்ப்புகளும் பட்டியலிடப்பட்டுள்ளன. மாணவர்கள் தங்கள் பேஸ்புக் கணக்கு மூலம் இதில் பதிவு செய்து கொள்ளலாம். நிறுவனங்கள் தங்கள் வசம் உள்ள பயிற்சி நிலை வாய்ப்புகளை இந்த தளத்தில் பட்டியலிடலாம்.

நகரம் மற்றும் துறை சார்ந்த வாய்ப்புகளை தேட முடிவதோடு, மாணவர்கள் தங்கள் திறன் சார்ந்த வாய்ப்புகளையும் தேடலாம். திறன் பயிற்சிகளுக்கான பாடத்திட்டம் தொடர்பான தகவல்களையும் அளிக்கிறது. மாணவர்களுக்கு வழிகாட்டக்கூடிய கட்டுரைகளை வலைப்பதிவு மூலமாகவும் அளிக்கிறது.

ஹலோஇண்டெர்ன் , மேக்ன் இண்டெர்ன், டுவண்டி19.காம், இந்தியன் இண்டெர்ன்ஷிப் உள்ளிட்ட இணையதளங்களும் இதே போன்ற சேவையை அளித்து வருகின்றன.

 

  • வணிகமணி இதழில் எழுதும் இனி எல்லாம் இணையமே தொடரில் எழுதியது.