Tag Archives: websites

மொழிகளின் ஒலிகளை கேட்டு ரசிக்க ஒரு தளம்

locallingual3உலகில் பேசப்படும் ஒவ்வொரு மொழியின் ஒலிக்குறிப்பை கேட்டறிய விருப்பமா? எனில் லோக்கல்லிங்குவல் இணையதளம் அதற்கான வாய்ப்பை ஏற்படுத்தி தருகிறது.

இந்த தளம் உலக வரைப்படத்துடன் வரவேற்கிறது. வரைபடத்தில் உள்ள எந்த நாட்டின் மீது கிளிக் செய்தாலும், அந்த நாட்டில் பேசப்படும் மொழியின் ஒலிக்குறிப்பை கேட்கலாம். அந்த நாட்டுக்கான பொதுவான மொழியோடு, அங்குள்ள பல்வேறு பகுதிகளில் பேசப்படும் மற்ற மொழிகளுக்கான ஒலிக்குறிப்புகளையும் கேட்கலாம்.

இந்தியாவுக்கான பகுதியை கிளிக் செய்தால் இந்தியில் துவங்கி வரிசையாக தமிழ் உள்ளிட்ட பல்வேறு மொழிகள் பட்டியலிப்படுகிறது. ஒவ்வொரு மொழியிலும் இடம்பெற்றுள்ள வார்த்தைகளின் உச்சரிப்புகளை கேட்கலாம். ஆண் மற்றும் பெண் குரல்களில் உச்சரிப்புகளை கேட்பதற்கான வசதியும் உள்ளது. மாநிலவாரியாகவும் கிளிக் செய்து கேட்க முடிகிறது.

இதே போல மற்ற நாடுகளையும் கிளிக் செய்து அங்கு பேசப்படும் மொழிகளின் ஒலிகளை கேட்கலாம். மொழி ஆர்வலர்களை இந்த தளம் உற்சாகத்தில் ஆழ்த்தும் வாய்ப்பு இருக்கிறது.

பயணங்களில் ஆர்வம் கொண்ட டேவிட் எனும் தனிமனிதர் இந்த தளத்தை உருவாக்கி இருக்கிறார். ஐரோப்பாவில் சுற்றிக்கொண்டிருந்த போது உக்ரைன் நாட்டில் உள்ளு மொழியில் எளிய வார்த்தையை கூட தன்னால் சரியாக உச்சரிக்க முடியாமல் திண்டாடிய போது, உலக மொழிகளுக்கான இந்த தளத்தை உருவாக்கும் எண்ணம் ஏற்பட்டதாக அவர் குறிப்பிட்டுள்ளார்.

இந்த தளத்தில் ஒலிகளை கேட்டு ரசிப்பதோடு, விரும்பினால் உங்கள் மொழியில் புதிய வார்த்தைகளுக்கான ஒலிக்குறிப்புகளையும் இடம்பெறச்செய்யும் வசதி இருக்கிறது. அந்த வகையில் உலக மொழிகளின் ஒலிகளுக்கான விக்கிபீடியா போல இந்த தளம் விளங்குகிறது.

இணைய முகவரி: https://localingual.com

 

 

செயலி புதிது: ஒளிப்படங்களை மெருகேற்ற உதவும் செயலி

ஒளிப்படங்களை திருத்தி மெருகேற்றி மேம்படுத்த வேண்டும் என்றால் அடோபியின் போட்டோஷாப் சிறந்த வழியாக விளங்குகிறது. பொதுவாக ஸ்மார்ட்போனில் எடுக்கும் ஒளிப்படங்களை பகிர்ந்து கொள்ளும் போது, போட்டோஷாப் அளவுக்கு நுட்பமான மென்பொருள்கள் தேவையில்லை தான். ஆனால், சில நேரங்களில் ஒளிப்படங்களை மேம்படுத்தும் தேவையை உணர்ந்தால், போட்டோஷாப் பிக்ஸ் செயலியை நாடலாம். இதுவரை ஐபோன்களுக்கான வடிவில் மட்டுமே செயல்பட்ட இந்த செயலி தற்போது புதிய அம்சங்களை பெற்றிருப்பதுடன், ஆண்ட்ராய்டு போன்களுக்காகவும் அறிமுகமாகி இருக்கிறது.

இந்த செயலி மூலம் ஸ்மார்ட்போனில் எடுக்கப்பட்ட ஒளிப்படங்களை இனி இஷ்டம் போல மேம்படுத்திக்கொள்ளலாம். படத்தை அளவை மாற்றுவது, அதன் வண்ணம் உள்ளிட்ட அம்சங்களை திருத்துவது உள்ளிட்ட நுட்பங்களை பயன்படுத்திக்கொள்ளலாம்.

ஒளிப்படத்தை மேம்படுத்துவதுண்ட, அடோபியின் கிரியேட்டிவ் கிளவிட்டிலும் பகிர்ந்து கொள்ளலாம். வேறு பல பிரத்யேக வசதிகளும் உள்ளன. தொழில்முறையிலான மேம்பாட்டை நாடுபவர்களுக்கு இந்த செயலி மிகவும் பயனுள்ளதாக இருக்கும்.

மேலும் விவரங்களுக்கு: http://www.adobe.com/in/products/fix.html

 

இணைய விடுதலை பெற உதவும் இணைய சேவை

unஇணையத்தில் இருந்து முற்றிலுமாக வெளியேற வேண்டும் என்று எப்போதாவது உங்களுக்கு தோன்றியிருக்கிறதா? அப்படி ஒரு எண்ணம் உங்களுக்கு உண்டாகி, அதை செயல்படுத்தும் உறுதியும் இருந்தால் அதற்காக என்றே ஒரு இணைய சேவை அறிமுகமாகி இருக்கிறது. டீசீட்.மீ ( deseat.me) எனும் அந்த இணையதளம் உங்களை நீங்களே இணையத்தில் இருந்து டெலிட் செய்து கொள்ள உதவுகிறது.
இணையத்தில் இருந்து வெளியேற வேண்டிய அவசியம் என்ன? அப்படியே வெளியேற நினைத்தாலும் அதை நாமே செய்து கொள்ளலாமே, இதற்காக தனியே ஒரு இணையதளம் தேவையா? என நீங்கள் கேட்கலாம்.
ஆம், நீங்களே நினைத்தாலும் இணையத்தில் இருந்து வெளியேறுவது என்பது அத்தனை எளிதல்ல. ஏனெனில் இணையத்தில் உங்கள் சுவடு எங்கெங்கோ பதிந்திருக்கலாம். இணையத்தில் உலா வந்த காலத்தில் நிங்கள் எண்ணற்ற இணையதளங்களை பயன்படுத்திருப்பீர்கள். அவற்றில் சிலவற்றில் உறுப்பினர்களாகவும் பதிவு செய்து கொண்டிருப்பீர்கள். செய்திமடல் சேவைகளில் சந்தா செலுத்தி இருக்கலாம். மின்வணிக தளங்களில் பதிவு செய்திருக்கலாம். ஒருமுறை பயன்படுத்தி பார்ப்போமே என்று சில தளங்களில் உள்ளே நுழைந்து உறுப்பினராகி இருக்கலாம். இவற்றில் பல தளங்களை நீங்கள் மறந்து விட்டிருக்கலாம். இப்படி எந்த தளங்களில் எல்லாம் உறுப்பினராக பதிவு செய்து கொண்டோம் என்பதை நிச்சயமாக உங்களால் கணக்கு வைத்திருக்க முடியாது. இது அநேகமாக எல்லா இணையவாசிகளுக்கும் பொருந்தும்.
எனவே ஏதோதோ தளங்களில் உங்கள் பயனர் பெயரும், கடவுச்சொல்லும் பதிவாகி இருக்கும். அவற்றோடு நீங்கள் சமர்பித்த விவரங்களும் இருக்கலாம்.
இவற்றில் இருந்தெல்லாம் உங்கள் தடத்தை அழித்துக்கொண்டால் மட்டுமே இணையத்தில் இருந்து உங்களால் முழுமையாக விடுவித்துக்கொள்ள முடியும்.
ஆக, இணைய விடுதலை தேவை எனில், பதிவு செய்து கொண்ட இணையதளங்களில் இருந்தெல்லாம் டெலிட் செய்து கொள்ள வேண்டும். இது கொஞ்சம் சிக்கலானது.
அதனால் தான், இணையத்தில் இருந்து தங்களை டெலிட் செய்ய விரும்புகிறவர்களுக்கு உதவுவதற்காக என்றே அன்சீட்.மீ இணையதளம் அறிமுகம் ஆகியுள்ளது.

ஸ்வீடன் நாட்டைச்சேர்ந்த மென்பொருள் வல்லுனர்களால் உருவாக்கப்பட்டுள்ள இந்த தளம் பயனாளிகள் சார்பில் அவர்களின் இணைய சுவடுகளை எல்லாம் அழிக்க உதவுகிறது. இந்த சேவையை பயன்படுத்திக்கொள்ள முதலில் பயனாளிகள் தங்கள் ஜிமெயில் முகவரி மற்றும் பாஸ்வேர்டை தெரிவிக்க வேண்டும். அதன் பிறகு இந்த தளம் இணையத்தில் தேடுதல் வேட்டை நடத்தி, எந்த தளங்களில் எல்லாம் உறுப்பினராக சேர்ந்திருக்கிறோம் என காண்பிக்கிறது. அதோடு அந்த தளங்களில் இருந்து டெலிட் செய்து கொள்வதற்கான இணைப்பையும் அளிக்கிறது. எந்த தளங்களில் இருந்தெல்லாம் நீக்கி கொள்வது என முடிவு செய்து கொள்ளலாம். அல்லது ஓட்டுமொத்தமாக எல்லாவற்றில் இருந்தும் விலகலாம். இந்த தளம் மூலம் வெளியேற உதவும் சேவைகளில் பேஸ்புக்கில் துவங்கி யூடியூப், எவெர்நோட் என பெரிய பட்டியலே இருக்கிறது.
எல்லாம் சரி, இந்த தளத்திடம் இமெயில் முகவரியையும், பாஸ்வேர்டையும் சமர்பிப்பதால் அந்தரங்க மீறல் ஏற்படலாமே என்று சந்தேகிக்கலாம். அத்தகைய சந்தேகம் தேவையில்லை, பயனாளிகள் வெளியேற வேண்டிய தளங்கள் பற்றிய விவரத்தை மட்டுமே தங்களிடம் அளிப்பதாகவும், நீக்கம் தொடர்பான அனைத்து செயல்களும் பயனாளிகள் கம்ப்யூட்டரிலேயே நிகழ்வதாகவும், இந்த தளத்தை உருவாக்கிய மென்பொருளாலர்கள் வில்லே டால்போ மற்றும் லினஸ் உன்னேபேக் தெரிவிக்கின்றனர். பயனாளிகள் தொடர்பான எந்த தகவலையும் அணுக வாய்ப்பில்லை என்றும் கூறுகின்றனர். இணையவாசிகள் தங்கள் இணைய இருப்பை சுத்தமாக்கி கொள்ள உதவும் நோக்கத்துடனே இந்த தளத்தை அமைத்துள்ளதாகவும் தெரிவிக்கின்றனர்.
ஆனால், இந்த சேவை மூலம் கூட இணையத்தில் இருந்து முற்றிலும் வெளியேறிவிட்டதாக சொல்லிவிட முடியாது. ஏனெனில் இது ஜிமெயில் கணக்கு அடிப்படையில் செயல்படுவதால், அதனுடன் தொடர்பு கொண்டு தளங்களில் இருந்து மட்டுமே நீக்கி கொள்ள முடியும். ஜிமெயிலுக்கு முந்தையை இமெயில் முகவரி ( ஹாட்மெயிலை நினைவில் உள்ளதா?) அல்லது வேறு முகவரிகளில் பதிவு செய்து கொண்ட சேவைகளை ஒன்றும் செய்ய முடியாது. ஒரு காலத்தில் சமூக வலைப்பின்னல் பரப்பில் கோலோச்சிய மைஸ்பேஸ் போன்ற தளங்களில் இது செல்லுபடியாகாது.
இருந்தாலும் இது சுவாரஸ்யமான சேவை தான்.
ஆனால், இணைய யுகத்தில் இணையத்தில் இருந்து முற்றிலுமாக வெளியேற வேண்டும் என்ற எண்ணம் ஏற்படும் வாய்ப்பிருக்கிறதா? என்று தெரியவில்லை. ஆனால் விஷயம் என்னவென்றால், அப்படியே விரும்பினாலும் கூட அது முற்றிலும் சாத்தியமில்லை. பதிவு செய்து கொண்ட தளங்களில் இருந்தெல்லாம் நீக்கி கொண்டால் கூட, சமூக ஊடகங்களில் நண்பர்கள் நம்மைப்பற்றி பகிர்ந்து கொண்ட தகவல்கள் இருக்கலாம். அவர்கள் டேக் செய்த படங்கள் இருக்கலாம்.
ஆக, இணையத்தில் இருந்து நீக்கி கொள்வது அத்தனை எளிதல்ல. எப்படியும் இணையம் ஏதேனும் ஒரு வழியில் நினைவில் வைத்திருக்கும். இதை ஏற்றுக்கொள்வது ஒரு விழிப்புணர்வாகவே அமையும். இணையத்தில் நம்முடைய சுவடுகள் பதிந்து கொண்டே இருப்பதால், நாம் அதை எப்படி பயன்படுத்துகிறோம் என்பதில் கொஞ்சம் கவனம் செலுத்துவது நல்லது. அது மட்டும் அல்ல எந்த இணையதளங்களில் எல்லாம் பதிவு செய்து கொண்டோம் என நினைத்துப்பார்ப்பதே கூட நல்ல இணைய பயிற்சியாக இருக்கும். நமது இணைய பழக்கத்தை அறிந்து கொள்ளும் பயிற்சியாக இருக்கும்!

புத்தகம் படிக்க உதவும் செயலி

தளம் புதிது: ஆவணப்படங்களை பார்த்து ரசிக்க!

docuஇணையத்தில் ஆவணப்படங்களை பார்த்து ரசிக்க உதவும் இணையதளங்களின் பட்டியலில் புதிதாக இணைந்திருக்கிறது ரோக்கும்னடரிஸ் இணையதளம்.
இந்த தளம் தேர்ந்தெடுக்கப்பட்ட சிறந்த ஆவணப்படங்களை பார்த்து ரசிக்க உதவுவதாக கூறுகிறது.
பிபிசி. சேனல்4, நெட்பிளிக்ஸ் ,யூடியூப் மற்றும் விமியோ உள்ளிட்ட தளங்களில் இருந்து ஆவணப்படங்களை தேர்வு செய்து இந்த தளம் பட்டியலிடுகிறது. முகப்பு பக்கத்திலேயே இந்த பட்டியலை பார்க்கலாம். அவற்றில் தேவையானதை கிளிக் செய்து பார்த்துக்கொள்ளலாம்.
இப்போதைக்கு பிரிட்டனில் உள்ள ஆவணப்படங்களை மட்டுமே பட்டியலிடுவதாகவும், விரைவில் உலகம் முழுவதும் உள்ள ஆவணப்படங்கள் பட்டியலிடப்படும் என்றும் தெரிவிக்கப்பட்டுள்ளது.
எனவே இவற்றில் சிலவற்றை பார்ப்பதில் காப்புரிமை சிக்கல்கள் இருக்கலாம்.
ஆனால் யூடியூப் போன்ற தளங்களில் இருந்து தேர்வு செய்யப்படவற்றை எளிதாக பார்க்கலாம். எப்படி இருந்தாலும் புதிய ஆவணப்படங்கள் பற்றி தெரிந்து கொள்வதற்கான சிறந்த தளமாக இருக்கிறது.
இமெயில் முகவரியை சமர்பித்து உள்பெட்டியிலும் புதிய ஆவணப்படங்கள் பற்றிய தகவல்களை பெறலாம்.

இணையதள முகவரி: http://rocumentaries.com/

செயலி புதிது: புத்தகம் படிக்க உதவும் செயலி

bookletஸ்மார்ட்போன் தலைமுறையினர் மத்தியில் புத்தகம் படிக்கும் பழக்கம் குறைந்துவிட்டது என்று சொல்லப்படுவதை அடிக்கடி கேள்விபடுகிறோம். இந்த பிரச்சனைக்கு, ஸ்மார்ட்போன் மூலமே தீர்வு ஒன்றை முன்வைத்திருக்கிறார் ஸ்மார்ட்போன் தலைமுறை இளைஞரான அம்ருத் தேஷ்முக். இவரது தீர்வு புத்தகம் படிக்க உதவும் செயலி.
புக்லெட் எனும் இந்த செயலி மூலம் அவர் வாரம் ஒரு புத்தகத்தின் சுருக்கத்தை வழங்கி வருகிறார். முழு புத்தகத்தையும் படிக்க வேண்டிய அவசியம் இல்லாத அளவுக்கு அதன் சாரம்சத்தை புரிய வைக்கும் அளவுக்கு இந்த புத்தக சுருக்கம் அமைகிறது. அதே நேரத்தில் வெறும் விமர்சனமாக இல்லாமல், வாசிப்பு அனுபவத்தை வழங்க கூடியதாக இருக்கிறது.
பெஸ்ட் செல்லர் என சொல்லப்படும் அதிகம் விற்பனையாகும் புத்தகங்களில் இருந்து ஒரு புத்தகத்தை தேர்வு செய்து வாசித்து அதன் சுருக்கத்தை அளிக்கிறார் அம்ருத். 20 நிமிடங்களில் படித்துவிடக்கூடியதாக இது அமைந்துள்ளது. பல்வேறு தலைப்புகளில் புத்தகங்கள் தேர்வு செய்யப்படுகின்றன. சுயசரிதை, சுயமுன்னேற்றம், நிர்வாகவியல் உள்ளிட்ட துறைகளில் புத்தகங்கள் அமைந்துள்ளன. எல்லாமே ஆங்கில புத்தகங்கள்.
வேலைபளு அல்லது சோம்பல் காரணமாக புத்தகங்களை படிக்கும் பழக்கம் குறைந்துவிட்ட நிலையில் வாசிப்பு பழக்கத்தை ஏற்படுத்தும் நோக்கத்துடன் இந்த செயலியை அவர் உருவாக்கியுள்ளார்.
புத்தக சுருக்கத்தையும் படிக்க நேரமில்லை என்பவர்களுக்கான அவற்றை ஒலிப்புத்தகமாகவும் வழங்குகிறார்.

மேலும் விவரங்களுக்கு: https://play.google.com/store/apps/details?id=com.booklet.app&hl=en

வீடியோ புதிது: போட்டோஷாப் பாடங்கள்

productphotofeat-800x420-300x200-c-defaultவீடியோ பகிர்வு சேவையான யூடியூப்பில் லட்சக்கணக்கில் பார்க்கப்பட்ட வீடியோக்களும், ஆயிரக்கணக்கில் உறுப்பினர்களை கொண்ட சேனல்களும் இருக்கின்றன. ஆனால் இப்படி அமோக ஆதரவு பெற்ற சேனல்களை தான் கவனிக்க வேண்டும் என்றில்லை. அதிக உறுப்பினர்களின் ஆதரவு பெறாத சேனல்களிலும் கூட நல்ல வீடியோக்கள் இருக்கலாம்.
சமூக தளமான ரெட்டிட் பயனாளி ஒருவர் இத்தகைய வீடியோ சேனல் ஒன்றை அடையாளம் காட்டியுள்ளது. கிறிஸ்டினா கிரேமரின் கிரேசி போட்டோஷாப் வீடியோ டுடோரியல் எனும் அந்த சேனலில் மொத்தமே ஏழு வீடியோக்கள் தான் இருக்கின்றன. மேலும் இரண்டு ஆண்டுகளுக்கும் மேல் புதுப்பிக்கப்படாமல் இருக்கிறது,’
எனினும் அதில் உள்ள வீடியோக்கள் புகைப்படங்களை போட்டோஷாப் செய்வது தொடர்பாக அருமையான விளக்கங்களை கொண்டிருப்பதாக ரெட்டிட் பயனாளி கூறியிருக்கிறார்.
புகைப்படங்களை திருத்துவது தொடர்பான நுட்பங்களை தேடிக்கொண்டிருந்த போது இந்த சேனலில் உள்ள வீடியோக்களில் தனக்கான பதில் கிடைத்ததாக அந்த பயனாளி குறிப்பிட்டுள்ளதை பெட்டாபிக்சல் தளம் அடையாளம் காட்டியுள்ளது.

ரெட்டிட் பயனாளியின் பரிந்துரை சரிதானா என நீங்களே சோதித்துப்பார்த்துக்கொள்ளலாம்;https://www.youtube.com/channel/UCZIcebBcU81BWJLrNA3Yz3g

அரசு இணையதளங்கள் எப்படி இருக்க வேண்டும்?

feat_artificialintelligence_1அரசு அமைப்புகளின் இணையதளங்கள் எந்த நிலையில் இருக்கின்றன என்று நமக்கு நன்றாகத்தெரியும். ஆனால் அவை எப்படி இருக்க வேண்டும் என்று தெரியுமா? இந்த கேள்விக்கு விடை காண்பது ஒரு பக்கம் இருக்கட்டும், இந்த கேள்வி எழுப்புவதன் அவசியத்தை முதலில் புரிந்து கொள்ள வேண்டும்.

இன்றைய தேதியில் இணையத்தின் முக்கியத்துவம் பற்றி வகுப்பெடுக்க வேண்டிய தேவையே இல்லை. இ-காமர்ஸ், வங்கிச்சேவை, செய்திகள், பொழுதுபோக்கு, கல்வி, தகவல் அறிதல் என்று எல்லாவற்றுக்கும் இணையத்தை பயன்படுத்துகிறோம். கருத்துக்களை வெளியிட சமூக ஊடகங்களை அதிகம் நாடுகிறோம். இன்னும் அடுக்கி கொண்டே போகலாம்.

இணையதளங்கள் மற்றும் இணைய சேவைகள் நவீன வாழ்க்கையில் இரண்டற கலந்துவிட்டன. இணைய பயன்பாடு தொடர்பாக பல்வேறு விவாதங்களும் நடைபெற்று வருகின்றன. இணைய வேகம் பற்றியும், இணையதளங்களின் அணுகும் தன்மை பற்றி எல்லாம் கூட விவாதிக்கிறோம். எல்லாம் சரி, அரசு அமைப்புகளின் இணைய செயல்பாடு எப்படி இருக்கின்றன? அரசு இணையதளங்கள் எத்தனை பேர் ஆர்வத்துடன் பயன்படுத்துகிறோம்? அவற்றின் பயன்பாடு பற்றி என்ன நினைக்கிறோம்?

அநேகமாக நாம் அதிகம் பயன்படுத்தும் அரசு இணையதளம் ரெயில்வே முன்பதிவுக்கான ஐ.ஆர்.சி.டி.சி இணையதளமாக தான் இருக்க வேண்டும். தேவை தான் இதற்கு காரணம்! பொதுவாகவே அரசு இணையதளங்கள் நாம் தேவை கருதி தான் அணுகும் நிலை இருக்கிறது இல்லையா? குறிப்பிட்ட தகவல் தேவை என்றால் அல்லது, குறிப்பிட்ட சேவைக்காக விண்ணப்பிக்க அரசு இணையதளங்களை நாடுவது இயல்பாக இருக்கிறது. இது புரிந்து கொள்ளக்கூடியதே.

இதற்கு மாறாக இணையவாசிகள் விரும்பி விஜயம் செய்யும் அபிமான தளங்களின் பட்டியலில் அரசு இணையதளங்களே ஏதேனும் இருக்க கூடுமா? என்று தெரியவில்லை. இவ்வளவு ஏன் தேவை கருதி செல்லும் போதே கூட அரசு தளங்கள் ஏமாற்றத்தையும், அதிருப்தியை தரலாம். பெரும்பாலான அரசு தளங்கள் கற்கால வடிவமைப்புகள் கொண்டதாக இருக்கின்றன. பல தளங்கள் அரசு கையேடுகளின் இணைய வடிவமாகவே எந்த புதுமையும் இல்லாமல் வெறுமையாக அமைந்திருக்கும். அதோடு தகவல்கள் உடனுக்குடன் புதுப்பிக்கப்படாமல் எப்போதும் ஒரு வித தேக்கத்துடனே இருப்பதை பல தளங்களில் பார்க்கலாம். அதிக பட்சம் போனால் செய்தி குறிப்புகள் மற்றும் அறிக்கைகள் இடம்பெற்றிருக்கும். அவையும் கூட உடனுக்குடன் புதுப்பிக்கப்படாமல் இருக்கலாம்.

நிற்க, அரசு இணையதளங்களை குறை சொல்வதல்ல என நோக்கம். அவற்றின் பொதுவான நிலையை சுட்டிக்காட்ட விரும்புகிறேன். இந்த சுட்டிககாட்டலின் நோக்கம், அரசு அமைப்புகளின் இணையதளங்கள் துடிப்பானதாக, செயல்திறன் மிக்கதாக இருக்க வேண்டும் என்ற எண்ணமும், அவை பெரும்பாலும் அவ்வாறு இல்லை என்ற ஆதங்கமும் தான்.

ஒரு நல்ல இணையதளம் எப்படி இருக்க வேண்டும் என்பதற்கு தெளிவான இலக்கணம் இருக்கிறது. இது அழகியல் சார்ந்ததல்ல: இதன் முக்கிய அம்சம் பயன்பாட்டுத்தன்மை மற்றும் அணுகும் தன்மை. இந்த அம்சங்களைப்பொருத்தவரை மற்ற இணையதளங்களை விட அரசு தளங்களிடம் இருக்கும் கூடுதலாக எதிர்பார்க்கப்படுகிறது. ஏனெனில் அரசு மக்களுக்கு கடமைப்பட்டிருக்கிறது. மக்களுக்கு தகவல்களை வழங்கவும், சேவை அளிக்கவும் இணைய வழியை பயன்படுத்தும் வாய்ப்பு இருக்கும் போது அதை செய்வது என்பது ஒரு ஜனநாயக கடமையாகவே ஆகிறது.
ஆனால் எத்தனை அரசு தளங்கள் இதை நிறைவேற்றுகின்றன. காலாவதியான வடிவமைப்பை கூட பொறுத்துக்கொள்ளலாம் ஆனால் தகவல்கள் உரிய முறையில் புதுப்பிக்கப்படாமல் இருப்பதை எப்படி பொறுத்துக்கொள்வது? பேஸ்புக் ,டிவிட்டர் என சமூக ஊடக வசதிகள் வந்துவிட்ட நிலையில் அரசு தளங்கள் அவற்றை ஒருங்கிணைத்தாக இருக்க வேண்டும் என்பது இயல்பான எதிர்பார்ப்பு தானே. அரசு தளங்கள் பொது மக்களுக்கு பயனுள்ள வகையில் துடிப்பானதாக இருக்க வேண்டும் அல்லவா!

இந்த நிலைக்கு பல காரணங்கள் இருக்கலாம். இணைய பிரிவுக்கு போதுமான ஊழியர்களும், நிதியும் ஒதுக்கப்படாதது துவங்கி, அரசின் பரம்பரை குணமான சிவப்பு நாடா கட்டுப்பாடு வரை பல காரணங்கள் இருக்கலாம். இவற்றை எல்லாம் விட முக்கிய காரணம், இணையத்தின் ஆற்றலை சரியாக புரிந்து கொள்ளாத தன்மையாகவே இருக்க வேண்டும். இந்த கால கட்டத்தில் இத்தகைய அறியாமை இருக்க வாய்ப்பில்லை என்பதால், இணையத்தின் முக்கியத்துவத்தை உணர்ந்தும் கூட அதை செயல்படுத்த முற்படாத சோம்பலும், அலட்சியமும் காரணமாக இருக்கலாம்.

ஆனால் இந்த நிலைக்கு அரசு அமைப்புகளையும் அதிகாரிகளையும் மட்டும் குறை சொல்ல முடியாது. மிகச்சிறந்த இணைய சேவை அளிக்க அரசை நாம் நிர்பந்திக்கவில்லை என்பது இன்னொரு முக்கிய காரணம். ‘
அதாவது எப்படி, பெரும்பாலான விஷயங்களில் அரசின் தன்மையை அப்படியே ஏற்றுக்கொள்கிறோமோ அதே போலவே இணைய விஷயத்திலும் அரசு தளங்கள் என்றால் இவ்வளவு தான் என இருந்து விடுகிறோம். வேறு என்ன செய்ய வேண்டும் எனும் கேள்வி உங்கள் மனதில் எழுந்தால், அமெரிக்காவின் கவ்டெக் இணையதளம் பற்றி தெரிந்து கொள்ள வேண்டும். இந்த பதிவே அந்த இணையதளத்தை பார்த்து வியந்து போனதால் எழுதப்படுவது தான்.
கவ்டெக் இணையதளம், உண்மையில் ஒரு இணைய பத்திரிகை. அதன் நோக்கம் அமெரிக்காவில் அரசு அமைப்புகளில் நவீன தொழில்நுட்பத்தின் பயன்பாடு எப்படி இருக்கிறது என்பதை ஆய்வுக்கு உட்படுத்தி அதை மேம்படுத்துவது தான். இத்தனைக்கும் அது ஒரு தனியார் அமைப்பின் லாபநோக்கிலான முயற்சியாகவே தோன்றுகிறது. அரசு அமைப்புகள் மற்றும் கல்வித்துறையில் தொழில்நுட்ப பயன்பாட்டின் புதுமையில் கவனம் செலுத்தி வரும் இ.ரிப்பளிக் எனும் நிறுவனம் இந்த இணைய பத்திரிகையை நடத்தி வருகிறது.
இந்த பத்திரிகையின் உள்ளடக்கமும், அதில் வெளியாகும் கட்டுரைகள் கவனம் செலுத்தும் விஷயங்களும் கவனத்தை ஈர்க்கின்றன. எல்லாமே ஏதேனும் ஒரு வகையில் நவீன தொழில்நுட்பத்தை அரசு அமைப்புகள் மக்கள் நோக்கில் பயன்படுத்துவது தொடர்பானவை.

உதாரணத்திற்கு இந்த மாத இதழின் முகப்பு கட்டுரை, அரசு மற்றும் உள்ளாட்சி இணையதளங்கள் நவீனப்படுத்தப்பட வேண்டியதன் அவசியம் பற்றி பேசுகிறது. அரசு தளங்கள் தங்கள் வடிவமைப்பு உத்தியை மறு சீரமைத்து மேம்படுத்த வேண்டும் என்று விரிவாக அலசுகிறது இந்த கட்டுரை.

மற்றொரு கட்டுரை, அரசின் நல்ல இணையதளத்தையும், மக்கத்தான இணையதளத்தையும் வேறுபடுத்துவது எது என்று கேட்கிறது. முந்தைய இதழ்களின் கட்டுரை இன்னும் கூட செறிவாக உள்ளன.
விஷயம் இது தான், அரசு அமைப்புகளின் இணைய செயல்பாடுகள் பற்றியும் அவற்றின் உத்தி பற்றியும் நாமும் அலசி ஆராய்ந்து உரையாடலை உண்டாக்க வேண்டும்.

எந்த விதங்களில் எல்லாம் இணைய தொழில்நுட்பத்தை பயன்படுத்தி மக்களுக்கு சேவை அளிகக் முடியுமோ அந்த வழிகளில் எல்லாம் அரசு அமைப்புகள் முயற்சி மேற்கொண்டாக வேண்டும்!

கவ்டெக்.காம் இணையதளம்: http://www.govtech.com/magazines/gt/Government-Technology-September-2016.html

முடிவெடுக்க உதவும் இணையதளம்

poolதளம் புதிது; முடிவெடுக்க உதவும் இணையதளம்

முடிவெடிப்பதில் உங்களுக்கு உதவி தேவையா? முடிவெடுப்பதற்கு முன் மற்றவர்களின் கருத்துக்களை அறிந்து கொண்டால் நன்றாக இருக்கும் என நினைக்கிறீர்களா? எனில் டூபூல்.கோ (doopoll.co ) இணையதளம் உங்களுக்கு பயனுள்ளதாக இருக்கும்.

இந்த தளம் இணையம் மூலம் கேள்வி கேட்டு கருத்துக்கணிப்பு நடத்த வழி செய்கிறது. இந்த தளத்தில் உறுப்பினராக பதிவு செய்து கொண்டு, நீங்கள் கருத்துக்களை அறிய விரும்பும் விஷயம் தொடர்பான கேள்விகளை கேட்கலாம்.

ஆம், இல்லை என பதில் அளிக்கும் எளிய கேள்வியில் துவங்கி, ஒரே கேள்விக்கு பல பதில்களை அளிக்கும் வாய்ப்பு அளிப்பது வரை பலவிதமாக இதில் கருத்துக்கணிப்பு நடத்ததலாம். இப்படி இணைய வாக்கெடுப்பு நடத்த உதவும் இணையதளங்கள் ஏற்கனவே இருக்கின்றன. ஆனால் இந்த தளம் கூடுதலான பல அம்சங்களை கொண்டிருக்கிறது.

இந்த தளத்தை எப்படி பயன்படுத்தலாம் என்பதற்கான உதாரணங்களும் இடம்பெற்றுள்ளன. நேரில் கேட்கும் போது பலர் வெளிப்படையாக கருத்து கூற தயங்கலாம். இப்படி கேள்வி கேட்டு பதில் அளிக்கச்சொல்வதன் மூலம் நேர்மையான எதிர்வினைய அறியலாம் என இந்த தளம் குறிப்பிடுகிறது. உடனடியாக பதில்களை அறியும் வசதியும் இருக்கிறது.

நீங்களும் முயன்று பார்க்கலாம்:http://doopoll.co/

=—

வீடியோ புதிது: பழைய படம் பார்க்கலாம் வாங்க!

காப்புரிமை சிக்கல் இல்லாமல் இணையத்தில் ஆங்கில திரைப்படங்களை பார்த்து ரசிக்க விருப்பமா? கவலையை விடுங்கள் இதற்காக என்றே ஒரு யூடியூப் சேனல் இருக்கிறது.

பப்ளிக் டொமைன் புல் மூவிஸ் எனும் அந்த யூடியூப்பில் நூற்றுக்கும் மேற்பட்ட அந்தக்கால ஆங்கில திரைப்படங்களை பார்த்து ரசிக்கலாம். இவை எல்லாமே காப்புரிமை விடுபட்டு பொது வெளியில் இருப்பவை என்பதால் எந்த சிக்கலும் இல்லை.

சார்லி சாப்ளின், லார்ல் ஹார்டி காமெடி திரைப்படங்கள் உள்ளிட்ட அந்த கால படங்கள் பலவற்றை பார்த்து ரசிக்கலாம்.

பழைய ஆங்கில திரைப்படங்களை பார்த்து ரசிக்க விரும்புகிறவர்களுக்கு இந்த சேனல் ஏற்றதாக இருக்கும்.

படங்களை பார்த்து ரசிக்க:https://www.youtube.com/user/BestPDMovies/

——-

உலகம் முழுவதும் உணவு

தினமும் ஒரே மாதிரியான மதிய உணவு சாப்பிட்டு அலுத்துவிட்டதா? மதிய உணவுக்காக மாறுபட்ட சுவையை எதிர்பார்க்கிறீர்கள? இதற்கான ஊக்கமும் உந்துதலும் தேவையா?

இந்த கேள்விகளுக்கான பதிலை அழகான வரைபட சித்திரம் அளிக்கிறது. சோஸ் வீடியோடூல்ஸ் உருவாக்கியுள்ள இந்த வரைபட சித்திரம் உலகின் பல நாடுகளில் மதிய உணவு எப்படி இருக்கிறது எனும் தகவலை சுவாரஸ்யமாக அளிக்கிறது. சீனா, கோஸ்டா ரிக்கா, டென்மார்க்,பிரான்ஸ், அர்ஜண்டினா,ஜெர்மனி, ஐஸ்லாந்து உள்ளிட்ட நாடுகளின் மதிய உணவு பற்றிய விவரங்களை இதன் மூலம் தெரிந்து கொள்ளலாம். இந்தியாவும் இந்த பட்டியலில் இருக்கிறது.

உலக உணவு சித்திரம்: https://www.sousvidetools.com/toolshed/lunch-around-the-world/

——-

குறிப்பு; மேலே குறிப்பிட்ட தளங்களில் பழைய படங்களுக்கான யூடியூப் சேனல் காப்புரிமை சார்ந்த புகாரால் கைவிடப்பட்டுள்ளது. இந்த தகவலை பகிர்ந்து கொண்ட டிவிட்டர் வாசகர் விவன் சாமுவேலுக்கு நன்றி. மாற்றாக ஒரு தளம் :http://www.openflix.com/ விரிவாக பின்னர் எழுத திட்டம்.