Tag Archives: wen

இணையம் இல்லாத இடங்களை தேடி!

3062125-inline-10-this-app-will-help-you-find-the-edge-of-the-internetஎங்கே சென்றாலும், அங்கு இணைய இணைப்பு வேகமாக இருக்குமா? வயர்லெஸ் சிக்னல் வலுவாக இருக்குமா? போன்ற கேள்விகளே மனதில் எழுகின்றன. இணையத்தின் தேவை தான் இப்படி கேட்க வைக்கின்றன. இணைய வசதி உள்ள இடங்களில் கூட, அதன் தரத்தை சீர் தூக்கி பார்க்கவே தோன்றுகிறது. இணையம் அந்த அளவுக்கு முக்கியமாகி இருக்கிறது.

இவை நவீன வாழ்க்கையின் இயல்பு என்றாலும், எப்போதாவது இணையம் இல்லாத இடங்கள் பற்றி யோசித்திருக்கிறோமா? நெதர்லாந்து நாட்டைச்சேர்ந்த வடிவமைப்பாளரான ரிச்சர்டு விஜ்ஜென் (Richard Vijgen ) இந்த கேள்வியை கேட்டு அதற்கான பதிலை தேட உதவும் செயலியை உருவாக்கி இருக்கிறார்.
ஒயிட் ஸ்பாட்ஸ் எனும் பெயரிலான அந்த செயலி பற்றி பார்ப்பதற்கு முன் விஜ்ஜென் பற்றி அறிந்து கொள்ள வேண்டும்.

விஜ்ஜெட் டிஜிட்டல் கலைஞர்கள் என்று குறிப்பிடக்கூடிய நவீன பிரிவின் கீழ் வருகிறார். கலைக்காக அவர் கையாளும் சாதனங்கள் மட்டும் புதிதல்ல, அவர் உருவாக்கும் கலையும் புதுமையானவை. அது மட்டும் அல்ல, கலையின் மூலமாக அவர்கள் உணர்த்த முற்படும் செய்தி நம் காலத்திற்கான புரிதலை அளிக்க கூடியதாக இருக்கிறது. அந்த வகையில் விஜ்ஜென் தன்னை சமகால தகவல் கலாச்சார் பரப்பில் செயல்படுபவராக குறிப்பிடுகிறார். ஆய்வு மற்றும் வடிவமைப்பு வாயிலாக பிக் டேட்டா எனப்படும் தரவுகளின் குவியல்களில் இருந்து பெரிய கதைகளை தேட முற்படுவதாகவும் அவர் சொல்கிறார். தனது கலை முயற்சிகள் டிஜிட்டல் பரப்பில் வேரூன்றி இருந்தாலும் எப்போதுமே அவை பெளதீக அல்லது சமூக பரப்பிலும் தொடர்பு கொண்டிருப்பதாகவும் அவர் குறிப்பிடுகிறார்.

தகவல்களை காட்சியாக உருவகப்படுத்தி பார்க்கும் வகையிலான டிஜிட்டல் படைப்புகளை அவர் உருவாக்கி கொண்டிருக்கிறார். இந்த வரிசையில் தான் சமீபத்திய செயலியான ஒயிட் ஸ்பேஸ் வருகிறது.
இந்த செயலி பற்றி பார்க்கும் முன், இதற்கு முன்பாக அவர் உருவாக்கிய செயலியை அறிந்து கொள்வது பொருத்தமாக இருக்கும். ஏனெனில் அந்த செயலியின் தொடர்ச்சியாகவே இது அமைந்துள்ளது.
விஜ்ஜென் உருவாக்கியுள்ள செயலிகள் நாம் வழக்கமாக அறிந்திருக்கும் செயலிகளை போன்றது அல்ல. நோக்கம்,செயல்பாடு இரண்டிலுமே அவை வித்தியாசமானவை. அவை அடிப்படையில் டிஜிட்டல் கலைபடைப்புகள். அதே நேரத்தில் நம் காலத்து தகவல்களை புரிய வைப்பவை!

ஒலியின் கட்டிடக்கலை என பொருள்படும் வகையிலான ஆர்கிடெக்சர் ஆப் சவுண்ட் என்பது தான் விஜ்ஜென் இதற்கு முன்னர் உருவாக்கிய செயலி. நம்மைச்சுற்றியுள்ள கண்ணுக்குத்தெரியாத தகவல் உலகை காட்சிப்படுத்தி பார்க்க வழி செய்யும் செயலி இது. ஜெர்மனியில் உள்ள கலைக்கூடத்தை இதை கண்காட்சியாக நிறுவி அதற்கு துணையாக ஒரு ஐபேடு செயலியையும் உருவாக்கி இருந்தார்.

நாம் இணையத்தை எளிதாக பயன்படுத்துகிறோம். ஆனால் இணயத்தை நம்மால் கண்ணால் பார்க்க முடிவதில்லை. இதை பார்க்கச்செய்யும் வகையில், இந்த செயலி ஜி.பி.எஸ் மூலம் இருப்பிடத்தை உணர்ந்து கொண்டு சுற்றியுள்ள செல்போன் கோபுரங்கள், செயற்கைகோள்கள் ஆகியவற்றை சுட்டிக்காட்டுகிறது. அதோடு, வை-பை ரவுட்டர்கள் மற்றும் கேபிள்கள் மூலம் நம்மைச்சுற்றி சுழன்று கொண்டிருக்கும் தரவுகளின் கட்டமைப்பையும் பார்க்க வைக்கிறது.

ஒரு தகவல் கலைஞராக நம்மால் பார்க்க முடியாமல் இருப்பதை காட்சி படுத்தி காட்டுவதே தனக்கு சுவாரஸ்யம் அளிப்பதாக அவர் சொல்கிறார். 24 மணி நேரமும் நாம் இணையம் அல்லது வயர்லெஸ் மூலம் சாதனங்களுடன் இணைக்கப்பட்டிருக்கிறோம். ஆனாலும் வானொலி காலத்தில் இருந்து போல அல்லாமல் இப்போது தகவல் உலகின் அடிப்படைய கட்டமைப்பு நம் கண்ணில் படாமல் மறைந்து இருக்கிறது என்கிறார் அவர். வை-பை ரவுட்டர்கள் புத்தக அலமாரியின் பின்னே மறைந்து இருக்கின்றன. செல்போன் கோபுரங்கள் கட்டிடங்களுடன் கட்டிடங்களாக கலந்திருக்கின்றன.

இப்படி கண்ணுக்குத்தெரியாமல் இருக்கும் டிஜிட்டல் பரப்பை, உருவகப்படுத்துவதன் மூலம் ஐபேடில் பார்க்க வைக்கிறார் விஜ்ஜென். இதென்ன அத்தனை முக்கியமா? என்று கேட்கலாம்.
நம்முடைய காலத்தில் எது நீக்கமற நிறைந்திருக்கிறதோ அதை நம்மால் பார்க்க முடியாமல் இருப்பதி என்னை கவலையில் ஆழ்த்துகிறது என்கிறார் விஜ்ஜென். தொழில்நுட்பம் மேலும் மேலும் வெளிப்படையான தன்மை கொள்ளும் போது, நம் வாழ்க்கையில் முக்கிய அங்கம் வகிக்கும் தரவுகளுடன் தொடர்பு கொள்ள காட்சிப்படுத்தல் உதவுகிறது என்றும் அவர் சொல்கிறார்.

இதை தான் நம்மைச்சுற்றியிருக்கும் தகவல் மண்டலமாக அவர் உருவாகப்படுத்தி காட்டியிருக்கிறார்.
இதன் தொடர்ச்சியாக தான் ஒயிட் ஸ்பாட்ஸ் செயலியை வடிவமைத்துள்ளார். இந்த செயலியை இயக்கியதுமே அது நம்மைச்சுற்றியுள்ள செல்போன் கோபுரங்களையும், அவை நம்முடன் எப்படி தொடர்பு கொண்டுள்ளன என்பதையும் பார்க்க முடியும். நாம் இருக்கும் இடத்தில் இருந்து அவை எவ்வளவு தொலைவில் உள்ளன என்பதை தெரிந்து கொள்ளலாம். ஸ்மார்ட்போனை உயர்த்தி பார்ப்பதன் மூலம் இந்த விவரங்களை திரையில் காணலாம். இதன் மூலம் நம்மை சுற்றியுள்ள இணைய உலகை காட்சிப்படுத்திக்கொள்ளலாம். இது முதல் பகுதி தான். இனி அடுத்த கட்டமாக, இணையம் இல்லாத இடங்களுக்கு அழைத்துச்செல்லவும் என கட்டளையிட்டால், திரையில் வெள்ளை கோடுகள் தோன்றுகின்றன. இவை எல்லாம் இணைய வசதி இல்லாத இடங்கள். இவை பெரும்பாலும் கடல் பரப்பில் அமைந்திருதாலும், நிலப்பரப்பிலும் பல பகுதிகளில் வெள்ளை கோடுகளை பார்க்கலாம். அங்கெல்லாம் இணைய இணைப்போ வயர்லெஸ் வசதியோ இல்லை என புரிந்து கொள்ளலாம்.
பொதுவாக இணையத்தை நாம் புவியியல் நோக்கில் பார்ப்பதில்லை ,ஆனால் அது அத்தன்மை கொண்ட்தே என்கிறார் விஜ்ஜென். அவரது செயலி இதை புரிய வைக்கிறது. பூவியியல் பரப்பில் இணையம் இல்லாத இடங்கள் நமக்கு பல விஷயங்களை உணர்த்தகூடியதாக இருக்கின்றன. பொருளாதார காரணத்தில் துவங்கி பல விஷயங்கள் இதற்கு பின்னே உள்ளன.

21ம் நூற்றாண்டில் இணைய வசதி இல்லாத இடங்களில் இருப்பவர்கள் எந்த தரவுகளையும் உற்பத்தி செய்வதில்லை, அவர்களை கூகுளில் தேட முடியாது, மேலும் அவர்கள் இணையம் மூலம் புரிந்து கொள்ளப்படும் உலகில் அங்கம் வகிக்காதவர்களாக இருக்கின்றனர் என்கிறார் விஜ்ஜென்.
இவற்றை எல்லாம் உணரக்கூடிய வகையில், இணைய வசதி இல்லாத பகுதிகளில் வசிப்பவர்களிடம் எடுக்கப்பட்ட கதைகள் மற்றும் வீடியோக்களையும் வரைபடத்தின் மூலம் அணுக வழி செய்யப்பட்டுள்ளது.

இந்த செயலியை ஆண்ட்ராய்டு போன்களில் அணுகலாம். – http://www.white-spots.net/ இணைய உலகம் தொடர்பான புதிய புரிதலுக்கு இது நிச்சயம் உதவும்.

ரிச்சர்ட் விஜ்ஜென் படைப்புகள் பற்றி அறிய: http://www.richardvijgen.nl/

முகவரி சுருக்க சேவைகளின் வளர்ச்சி

php-url-shortenerஇணைய பயன்பாடு மற்றும் இணைய போக்குகளில் உங்களுக்கு உள்ளொளியும், புரிதலும் தேவை என்றால் முகவரி சுருக்க சேவைகளின் வரலாற்றை கொஞ்சம் திரும்பி பார்க்க வேண்டும்.
இணைய முகவரி சுருக்க சேவைகளை பற்றி விரிவாக கூட விவரிக்க வேண்டாம்; பிட்.லி அல்லது டைனியூ.ஆர்.எல் ஆகிய இணைய சேவைகளின் பெயரை குறிப்பிட்டாலே போதுமானது.இந்த இரண்டும் தான் இணைய முகவரி சுருக்க சேவைகளின் முன்னோடி தளங்கள்!

இவை சமுக வலைப்பின்னல் யுகத்தின் பகிர்தல் தாகத்தை தணிக்க பிறந்தவை.
நீளமாக இருக்கும் இணைய முகவரிகளை( யூ.ஆர்.எல் அல்லது உரலி)சின்னதாக சுருக்குத்தருவது தான் இவற்றின் பணி.இந்த சுருக்கங்களை எளிதாக பகிர்ந்து கொள்ளலாம்.இவற்றில் கிளிக் செய்தால் சுட்டிக்காட்டப்பட்ட தளங்களுக்கு சென்றுவிடலாம்.

இணையதளங்களை அல்லது இணைய பக்கங்களை பகிர்ந்து கொள்ளும் போது அவற்றின் முகவரி சற்றே நீளமாக அமைந்து விடுகின்றன.இந்த நீளத்தையோ அல்லது அவற்றின் சுமையையோ இமெயில் யுகத்தில் யாரும் உணர்ந்ததில்லை.ஆனால் சமூக வலைதளங்களில் அதிலும் குறிப்பாக 140 எழுத்து வரம்பு கொண்ட குறும்பதிவு சேவையான டிவிட்டர் வருகைக்கு பிறகு இந்த குறை உணரப்பட்டது.இணைப்பை சுட்டிக்காட்டும் போது முகவரியே இடத்தை அடைத்துக்கொண்டால் என்ன செய்வது?

இந்த சிக்கலுக்கு தீர்வாக தான் முகவரி சுருக்க சேவைகள் அறிமுகமாயின. 50-60 எழுத்துக்கள் கொண்ட நீளமான இணைய முகவரிகளை இந்த சேவைகளில் சமர்பித்தாலும் அழகாக அவற்றை சின்னதாக சுருக்கித்தந்துவிடும்.
இது இவற்றின் ஆரம்ப கால வரலாற்று சுருக்கம்.

2002 ல் டைனி யூ.ஆர்.எல் அறிமுகமானது.பின்னர் பிட்.லி வந்தது.தொடர்ந்து மழை கால காளான் போல நூற்றுக்கும் அதிகமான முகவரி சுருக்க சேவைகள் உதயமாயின.இவற்றில் பெரும்பாலானவற்றின் பெயர்கள் மட்டுமே மாறுபட்டிருந்தனவே தவிர அவற்றின் சேவையிலோ பயன்பாட்டிலோ எந்த புதுமையும் இருக்கவில்லை.
இந்த புற்றீசல் போட்டியை பிட்.லி,டைனியூ.ஆர்.எல் உள்ளிட்ட தளங்கள் சமாளித்து முன்னிலை பெற்றன.ஆனால் சற்ற்ம் எதிர்பாராத வகையில் டிவிட்டரே சொந்தமாக முகவரி சுருக்க சேவையை ஒரு கட்டத்தில் அறிமுகம் செய்தது.டிவிட்டரில் பகிரப்படும் முகவரிகளை தனியே சுருக்க வேண்டிய தேவையில்லாமல் அவை தானாகவே சுருக்கப்பட்டன.

இதே காலகட்டத்தில் முன்னணி தேடியந்திரமான கூகுளும் தன் பங்கிற்கு ஒரு முகவரி சுருக்க சேவையை அறிமுகம் செய்தது:https://goo.gl/
இணையத்தின் பகிர்தல் பிரச்ச்னைக்கான அழகான தீர்வை முன்வைத்து வளர்ச்சி வாய்ப்புகளை எதிர்நோக்கியிருந்த முகவரி சுருக்க சேவைகளுக்கு இதைவிட பெரிய சோதனை இருக்க முடியாது தான்.
இது இவற்றின் சோதனை!
ஆனால் முகவரி சுருக்க சேவைகள் இதனால் சுருங்கிவிடவில்லை.அவை சின்ன சின்ன புதுமைகளால் தங்களை புணரமைத்துக்கொண்டிருக்கின்றன.

இப்போது இந்த சேவைகள் முகவரி சுருக்கத்தை மட்டும் அளிப்பதில்லை.சுருக்கப்படும் முகவரிகளின் முன்னோட்டத்தை அளிக்கின்றன.அதாவது கிளிக் செய்வதற்கு முன்னரே அந்த இணைப்பின் பின்னே உள்ள இணையதளத்தின் தோற்றத்தை பார்க்கலாம். இந்த முன்னோட்ட வசதி மிகவும் முக்கியமானது.முகவரி சுருக்க வசதியை பயன்படுத்திக்கொண்டு ஒரு சிலர் மோசமான அல்லது மால்வேர் பாதிப்பை உண்டாக்க கூடிய தளங்களுக்கு கடத்திச்செல்லும் அபாயம் உண்டானதால்,கிளிக் செய்ய இருக்கும் தளம் உண்மையில் இணைப்பில் சுட்டிக்காட்டப்பட்டது தானா என்பதை தெரிந்து கொள்ளலாம்.

நடுவே இணைப்புகளை பரிசோதித்து அவை மால்வேர் ஆபத்து இல்லாதவை தானா என்று உறுதிபடுத்தும் சேவையை பிரதானமாக வழங்கும் இணையதளங்களும் கூட அறிமுகமாயின.
அதோடு,இத்தகைய தவறான பயன்பாட்டை தவிர்ப்பதற்காக இந்த சேவைகள் முதலில் பயனாளிகளை நீங்கள் மனிதர்கள் தானா என்று நிருபித்துக்காட்டவும் சொல்கின்றன.கூகுள் இதற்கு கேப்ட்சா சோதனை வைக்கிறது என்றால் பிட்.லி அழகான சின்ன விளையாட்டை முன்வைக்கிறது.

இணையதளங்களை பகிர்ந்து கொண்டால் மட்டும் போதுமா? அவற்றை எத்தனை பேர் கிளிக் செய்து பார்த்தனர் என்று தெரிந்து கொள்ள வேண்டாமா? இப்போது முகவரி சுருக்க சேவைகள் இந்த புள்ளிவிவரங்களையும் சேர்த்தே வழங்குகின்றன. பிட்.லி ஒரு படி மேலே சென்று பிராண்ட்கள் தங்களுக்கான முகவரி சுருக்கங்களை உருவாக்கி கொண்டு அவற்றின் வீச்சை அறிவதற்கான சேவையையும் வழங்குகிறது.

அதோடு இந்த சேவைகள் ஸ்மார்ட்போன் யுகத்திற்கு ஏற்ப செயலி வடிவமும் எடுத்துள்ளன.
டைனி.யூஆர்.எல் – பிரவுசர் நீட்டிப்பாகவே பயன்படுத்திக்கொள்ளும் வாய்ப்பை அளிக்கிறது.
http://yourls.org/ சேவை பயனாளிகள் தங்களுக்கான முகவரி சுருக்க சேவையை சொந்தமாகவே உருவாக்கி கொள்ள வழி செய்கிறது.ஓபன் சோர்ஸ் அடிப்படையில் செயல்படும் சேவை இது.
முகவரி சுருக்க சேவைகளில் இப்போது எத்தனை தளங்கள் இருக்கின்றன என அறிய விரும்பினால் அந்த பட்டியலை http://bit.do/list-of-url-shorteners.php தளம் அளிக்கிறது.

http://longurl.org/ தளம் சுருக்கப்பட்ட முகவரிகளின் பின்னே உள்ள இணையதளம் பற்றிய முக்கிய தகவல்களை தெரிந்து கொள்ள வழி செய்கிறது.
http://is.gd/ தளம் இணைய முகவரிகள் தவறான நோக்கங்களுக்காக சுருக்கப்படுவதை தடுக்கும் வகையில் செயல்படுகிறது.
காலத்திற்கு ஏற்ப தங்களை மேம்படுத்திக்கொண்டுள்ள முகவரி சுருக்க சேவைகளின் அடுத்த பரிமானம் என்னவாக இருக்கும்.இப்போதே ஒரு முன்னோட்டம் பார்க்க் முடியுமா? என்பது சுவாரஸ்யமான கேள்வி!

அரசு ஊழியர் வருகையை ஆன்லைனில் கண்காணிக்கலாம்!

Government-online-attendance-system3-1024x429எல்லாமே டிஜிட்டல் மயமாகி வரும் நிலையில் ஊழியர்களுக்கான வருகை பதிவேட்டையும் மத்திய அரசு டிஜிட்டல் மயமாக்கி ஆன்லைனுக்கு கொண்டு வந்திருக்கிறது. இதன் பயனாக அரசு ஊழியர்களின் தினசரி வருகை விவரங்களை பொதுமக்களில் யார் வேண்டுமானாலும் ஆன்லைனில் பார்த்து தெரிந்து கொள்ளலாம். அரசு ஊழியர் செயல்பாட்டில் திறந்தவெளித்தன்மையை கொண்டு வரும் வகையிலான இந்த திட்டம் ஊழியர் வருகையை கண்காணிப்பதற்கும் வழி செய்யும் முன்னோடித்திட்டமாக இருக்க்கிறது.
ஆதார் அடையாள அட்டை அடிப்படையில் பயோமெட்ரிக் முறையிலான வருகை பதிவேட்டின் மூலம் இது சாத்தியமாகியுள்ளது.

இந்த ஆன்லைன் வருகை பதிவேட்டை http://attendance.gov.in/ எனும் இணையதளத்தில் பார்வையிடலாம். அரசு அலுவலகங்களில் ஊழியர்களின் வருகை பற்றிய அறிய முற்படும் போது பெரும்பாலும் அலட்சியத்திற்கே ஆளான திருவாளர் பொதுஜனம் இந்த தளத்தை பார்த்தால் ஆச்சர்யத்தில் ஆழ்ந்துவிடுவார். ஏனெனில் இதில் மத்திய அரசு அலுவலகங்களில் எந்த எந்த துறைகளில் எத்தனை ஊழியர்கள் பணிக்கு வந்துள்ளனர் என்பதை தெரிந்து கொள்ளலாம். மொத்த ஊழியர்களில் பணிக்கு வந்தவர்களின் எண்ணிக்கையை தெரிந்து கொள்வதுடன், அவர்களில் குறித்த நேரத்தில் வந்தவர்கள் ( 9.00-10.00 மணி) எண்ணிக்கை, தாமதமாக வந்தவர்கள் மற்றும் 11 மணிக்கு பின் வந்தவர்களின் எண்ணிக்கை ஆகிய விவரங்க்ளையும் அறிந்து கொள்ளலாம். இவை அழகிய வரைபடமாக காட்டப்படுகிறது.

துறை வாரியாக விவரங்கள் இருப்பதால் குறிப்பிட்ட நாளில் ஒரு அரசு அலுவலகத்தில் எத்தனை பேர் வேலைக்கு வந்துள்ளனர் என்ற தகவலையும் சுலபமாக தெரிந்துகொள்ளலாம். இந்த விவரங்கள் தொடர்ந்து அப்டேட் செய்யப்படும் என்பதால் குறிப்பிட்ட கால அளவிலான ஊழியர் வருகை குறித்த போக்கையும் இந்த தளம் சுட்டிக்காட்டும்.

ஆதார் அடையாள அட்டை அடிப்படையில் பயோமெட்ரிக் முறையில் இந்த வருகை பதிவேடு உருவாக்கப்பட்டுள்ளது. ஊழியர்கள் வருகைக்கான டிஜிட்டல் பலகை அல்லது கைய்டக்க ஸ்கேனர் மூலம் வருகையை பதிவு செய்யலாம். அந்த விவரம் உடனே பதிவேட்டில் ஏற்றப்பட்டுவிடும். பயோமெட்ரிக் முறை என்பதால் ஊழியர் மட்டும் தான் பதிவு செய்ய முடியும். வராமல் கையெழுத்து போடுவதோ, தாமதமாக வந்து கையெழுத்து போடுவதோ சாத்தியமில்லை.

முதல் கட்டமாக தலைநகர் தில்லியில் உள்ள 148 அரசு துறைகளின் வருகை விவரம் இந்த தளத்தில் இடம்பெற்றுள்ளது. படிப்படியாக மற்ற மத்திய அரசு அலுவலகங்களுக்கு விரிவிபடுத்தப்பட்டு நாடு தழுவிய அளவில் இது அறிமுகமாக உள்ளது.

பிரதமர் நரேந்திர மோடியின் டிஜிட்டல் இந்தியா திட்டத்தின் ஒரு அங்கமாக இது செயல்படுத்தப்பட்டு வருகிறது.
இந்த ஆன்லைன் வருகை பதிவேட்டின் இன்னொரு முக்கிய அம்சம், இந்த விவரங்களை அப்படியே டவுண்லோடு செய்து கொள்ளலாம் என்பது தான். அதே போல அரசு ஊழியர்களின் பெயரை குறிப்பிட்டு தேடும் வசதியும் இருக்கிறது. ஊழியரின் பதவி, இமெயில் உள்ளிட்ட விவரங்களையும் பெற முடியும். அந்த அளவுக்கு இந்த திட்டம் விரிவாகவும் நுட்பமாகவும் இருக்கிறது.

அரசு ஊழியர்கள் செயல்பாட்டில் இந்த திட்டம் பெரும் மாற்றத்தை ஏற்படுத்தக்கூடியது.
தகவல் அறியும் உரிமை சட்டம் போலவே இந்த தகவல்களை பொதுமக்களும் செயற்பாட்டாளர்களும் மக்கள் நலனுக்காக ஆயுதமாக பயன்படுத்தலாம்.

மொத்த இந்தியாவுக்கும் விரிவு படுத்தப்பட்டால் இந்த திட்டம் எப்படி இருக்கும் என யோசித்துப்பாருங்கள்.
அருமையான திட்டமாக இருக்கிறது என்று ஆச்சர்யப்படுகிறீர்களா? எனில் அரசு அதிகாரியான ராம் சேவக் சர்மாவுக்கு பாராட்டு தெரிவிக்க வேண்டும். ஆதார் திட்டத்தில் நந்தன் நிலேகனியின் வலதுகரமாக செயல்பட்ட சர்மா , ஜார்கண்ட் மாநில தலைமை செயலாளராக நியமிக்கப்பட்ட போது ,தலைமை செயலகத்தில் சில ஊழியர்கள் பதிவேட்டில் வருகை தந்திருந்தாலும் அலுவலகத்தில் இல்லாமல் இருப்பது கண்டு அதிருப்தி அடைந்தவர் அதார் அட்டை அடிப்படையில் ஊழியர்கள் வருகையை பயோமெட்ரிக் முறையில் பதிவு செய்யும் முறையை கொண்டு வந்தார்.: attendance.jharkhand.gov.in.
இப்போது இந்த திட்டம் மாநிலம் முழுவதும் விரிவுபடுத்தப்பட்டு 24 மாவட்டங்களில் 69 துறைகளில் 34,000 ஊழியர்களை உள்ளடக்கியதாக இருக்கிறது.
இந்த ஆண்டு துவக்கத்தில் மத்திய அரசின் தகவல் தொழில்நுட்ப துறையில் செயலராக நியமிக்கப்பட்டவர் ஜூன் மாத வாக்கில் பிரதமர் நரேந்திர மோடியிடம் இந்த திட்டத்தை எடுத்துரைத்தார். மோடி இதற்கு பச்சைக்கொடி காட்டவே டிஜிட்டல் இந்தியாவின் அங்கமாகி அமலுக்கு வந்துள்ளது.; இது பற்றிய விரிவான கட்டுரை இங்கே: http://qz.com/277897/meet-the-man-who-built-the-awesome-online-attendance-system-for-indias-government-officials/
இந்த திட்டத்தை மாநில அளவிலும் விரிவுபடுத்துவது சாத்தியம் என்கின்றனர். இது நேர்மையான நிர்வாகத்திற்கான முக்கிய ஆயுதமாக இருக்கும் என்றும் கருதப்படுகிறது. உதாரணத்திற்கு பள்ளிகளில் மதிய உணவு பயனாளிகளுக்கும் இதை விரிவுபடுத்தலாம். அப்போது மாணவர்களின் எண்ணிக்கைக்கு ஏற்ப உணவின் அளவை ஒப்பிட்டு பார்த்து திருட்டை தடுப்பதம் சாத்தியமாகலாம். அரசு மருத்துவமனை உள்ளிட்ட எல்லா துறைகளிலும் இதை பயன்படுத்தலாம்.

இதன் சாத்தியங்கள் எல்லையில்லாதது. நடைமுறையில் இதன் பயன்பாட்டை பொருத்திருந்து பார்க்கலாம்.

அரசு ஊழியர் வருகையை அறிய: http://attendance.gov.in/

எதையும் அடைய ஒரு தளமிருந்தால்!


இலக்கை அடைவதற்காக உதவும் இன்னொரு இணையதளம் தான் என்ற போதிலும் அகம்ப்லிஷ் (http://accompl.sh/ ) கொஞ்சம் வித்தியாசமானதாகவே இருக்கிறது.

வழக்கமான செய்து முடிக்க வேண்டிய பட்டியலாக மட்டும் இல்லாமல் மனதில் உள்ள திட்டங்களையும் எண்ணங்களையும் இலக்காக நிர்ணயித்து கொண்டு அவற்றை மறந்து விடாமல் செய்து முடிப்பதற்கான வழிகாட்டியாக இந்த தளம் உருவாக்கப்பட்டுள்ளது.

ஒவ்வொரு இலக்காக உங்கள் கண‌வினை அடையுங்கள் என்று அழைக்கும் இந்த தளம் அதனை அழகாக செய்து முடிக்கவும் உதவுகிறது.

எல்லோருக்குமே பலவிதமான விருப்பங்களும் அதனை அடைய வேண்டும் என்ற இலக்கும் இருக்கும்.ஆனால் இலக்கை அடைவதற்கான வேட்கையும் தீவிரமும் தான் நபருக்கு நபர் மாறுபடும்.பலர் செய்ய வேண்டும் என்று நினைத்து கொண்டே இருப்பார்கள் ஆனால் செய்யாமல் தள்ளிப்போட்டு விடுவார்கள்.சிலருக்கு செய்து முடிப்பதற்கான ஊக்கம் இல்லாமல் போகலாம்.

நினைத்தை எல்லாம் அடைவதற்கான வழி என்ன செய்ய விரும்புகிறோம் என்பதை குறித்து வைத்து கொளவது நல்ல வழி.இதற்காக என்றே செய்து முடிக்க விரும்பும் விஷயங்களை படிட்டியலிட்டு கொள்ள உதவும் இணைய குறிப்பேடு தளங்கள் பல இருக்கின்றன.

ஆனால் செய்ய விரும்பும் செயல்களை பட்டியல் போட்டு விட்டால் மட்டும் போதுமா,அவற்றை செய்து முடிக்க வேண்டாமா?

இந்த இடத்தில் இருந்து முன்னேறி செல்வதற்கான வழி காட்டுவது தான் அகம்ப்லிஷ் தளத்தின் சிறப்பாக இருக்கிறது.

இந்த தளம் விருப்ப செயல்களின் பட்டியலை நண்பர்களோடு பகிர்ந்து கொள்ள வைத்து அதன் மூலம் செயல்பாட்டிற்கான ஊக்கத்தை பெற வழி செய்கிறது.

இந்த தளத்தில் “நான் இதை செய்து முடிக்க விரும்புகிறேன்”என்று ஏதாவது ஒரு செயலோடு துவங்க வேண்டும்.அது தினமும் ஒரு புத்தகத்தில் இருந்து பத்து பக்கம் படிக்க வேண்டும் என்னும் எளிய விருப்பமாக இருக்கலாம்.அல்லது சிறுகதை எழுதும் விருப்பமாக இருக்கலாம்.விருப்பங்கள் என்னவாக வேண்டுமானாலும் இருக்கலாம்.

முதல் விருப்பத்தை தெரிவித்தவுடன் உறுப்பினராக பதிவு செய்து கொள்ளலாம்.அதன் பிறகு தான் விஷயமே இருக்கிறது.முதல் விருப்பத்துடன் சேர்த்து மொத்தம் பத்து விருப்பங்களை குறிப்பிட வேண்டும்.அவை தான் நாம் அடைய நினைக்கும் இலக்கு.

பத்து விருப்பங்களை பட்டியலிட்டவுடன் அந்த பக்கம் பூட்டப்பட்டு விடும்.அதாவது அதன் பிறகு அந்த பட்டியலில் உள்ள எந்த விருப்பத்தையும் நீக்கவோ மாற்றியமைக்கவோ முடியாது.அவற்றை செய்து முடிப்பதை தவிர‌ வேறு வழியில்லை.

செய்து முடிக்க நினைத்த செயல்கள் மீது உறுப்பினர்களுக்கு ஒரு இறுக்கமான பற்றும் ஈடுபாடும் ஏற்பட வேண்டும் என்பதற்காகவே இவ்வாறு விருப்பங்களின் பட்டியல் பூட்டப்பட்டு விடுகிறது.

ஆக எப்போது இந்த தளத்தில் நுழைந்தாலும் நாம் இதை எல்லாம் செய்ய விரும்பியிருக்கிறோம் என்பது உறுப்பினர்களின் கவனத்திற்கு வந்து கொண்டே இருக்கும்.அது மட்டும் அல்ல அந்த செயலின் நிலை பற்றியும் சுட்டிக்காட்ட்பட்டிருக்கும்.செயலை செய்து முடித்திருந்தால் பச்சை வண்ணத்திலும் செய்து முடிக்க விட்டால் சிவப்பு வண்ணத்திலும் செய்து கொண்டிருந்தால் ஆரஞ்சு வண்ணத்திலும் சுட்டிக்காட்டப்பட்டிருக்கும்.

கிட்டத்தட்ட உறுப்பினர்களுக்கான முன்னேற்ற அறிக்கை போலவே இந்த பக்கம் அமைந்திருக்கும்.இது தரக்கூடிய ஈடுபாடும் ஊக்கமும் அலாதியானது.

இந்த விருப்ப பட்டியலை தளத்தின் மூலம் மற்ற உறுப்பினர்களோடு பகிர்ந்து கொள்ளலாம்.பேஸ்புக் நண்பர்களோடும் பகிர்ந்து கொள்ளலாம்.

இப்படி பகிர்தல் மூலம் ஏற்படக்கூடிய சமூக த‌ன்மையே இந்த தளத்தின் இன்னொரு சிறப்பம்சம்.

உறுப்பினர்கள் பட்டியலிட்ட விருப்பங்களை பார்த்து நண்பர்கள் அதனை செய்து முடிக்க ஊக்கம் அளிக்கலாம்.செய்து முடிக்காவிட்டால் உரிமையோடு கேள்வி கேட்டு முடுக்கி விடலாம்.அந்த செயல் தொடர்பான தங்கள் அனுபவத்தையும் கருத்துக்களாக பகிர்ந்து கொள்ளலாம்.

இப்படி மற்ற உறுப்பினர்களின் விருப்ப பட்டியலையும் பார்வையிடலாம்.மற்றவர்கள் விருப்ப செயல்களை பார்க்கும் போது அதுவும் ஒரு வகையில் ஊக்கத்தை ஏற்படுத்தலாம்.

யாருடைய விருப்ப பட்டியலாவது ஆர்வத்தை ஏற்படுத்தினால் அந்த நண்பரை டிவிட்டரில் செய்வது போல பின் தொடரலாம்.இப்ப‌டி பின் தொடரும் போது அந்த நண்பரின் முன்னேற்றத்தையும் பின் தொடர் முடியும்.இதே போல நம்மையும் பின் தொடரக்கூடிய நண்பர்கள் கிடைக்கலாம்.

செய்ய விரும்பும் செயல்கள் அடிப்படையில் நட்பை தேடிக்கொள்ள உதவும் இந்த தளம் அந்த நட்பு மூலமே நினைத்தை செய்து முடிப்பதற்கான ஊக்கத்தையும் தருகிறது.

இணையதள முகவரி;http://accompl.sh/

திட்டமிடலுக்கு ஒரு இணைய பலகை.

எதையும் திட்டமிட்டு செய்ய வேண்டும் என்ற விருப்பம் உள்ளவர்கள் அதனை நிறைவேற்றிக்கொள்ள தாராளமாக இணையத்தை நாடலாம்.செய்ய வேண்டியவற்றை பட்டியல் போட்டு வைத்து கொள்ள என்று இணையதளங்கள் இருக்கின்றன.நினைத்தவற்றை தள்ளிப்போடாமல் முடிக்க நினைவூட்டும் சேவைகள் இருக்கின்றன.கொஞ்சம் விரிவாக வரைபடம் போட்டு எல்லாவற்றையும் திட்டமிடவும் இணையதளங்கள் இருக்கின்றன.

இப்போது இந்த பட்டியலில் புதிதாக மை சிம்பில் சர்பேஸ் தளம் சேர்ந்துள்ளது.இது வரையான திட்டமிடல் தளங்களை விட எளிமையான ஆனால் அதே நேரத்தில் மேம்ப்பட்ட சேவையை வழங்குவதாக இந்த தளம் சொல்கிறது.

பட்டியல் போடும் தளங்களும் போதாது,குறித்து வைக்கும் சேவைகளும் முழுமையாக கைகொடுக்காது என்று சொல்லும் இந்த தளம் இந்த இரண்டும் இணைந்த ஒருங்கிணைந்த வசதியை அளித்து திட்டமிட உதவுவதாக அழைக்கிறது.

எளிமையான இணைய பலகையை வழங்குவதன் மூலம் எல்லாவற்றையும் குறித்து வைத்து அதனடிப்படையில் செயல்களை திட்டமிட இந்த தளம் வழி செய்கிறது.

அறைகுறையாக திட்டமிடலில் துவங்கி முழுமையாக திட்டமிட உதவுவது இந்த இணைய பலகையின் சிறப்பியல்பு என்றும் சொல்லப்படுகிறது.அறைகுறையாக திட்டமிடுவது என்றால் என்ன செய்யப்போகிறோம் என்பது முன்கூட்டியே முழுவதும் தெரியாத நிலையை குறிக்கும்.

திட்டமிட முயன்றவர்களுக்கு இந்த சங்கடம் நன்றாகவே புரியும்.ஒரு விஷயத்தை செய்ய வேண்டும் என்ற முடிவோடு திட்டமிட துவங்கியவுடன் எல்லாமே மறந்து போனது போல ஒரு உணர்வு ஏற்படும்.வரிசையாக என்ன என்ன செய்ய வேண்டும் என்று பட்டியல் போடவோ அல்லது குறித்து வைக்கவோ முற்பட்டால் அடுத்த செயல் எது என்று தெரியாமல் குழப்பமாக இருக்கும்.

ஆக திட்டமிடுவதற்கு முன்பாக முதலில் எப்படி திட்டமிட வேண்டும் என்பதை திட்டமிட்டு கொள்ள வேண்டும்.இல்லை என்றால் பாதியிலேயே தடம் மாறி உற்சாகமும் மறைந்து போய்விடும்.

ஆனால் ‘சிம்பில் சர்பேஸ்’ இணைய பலகை இந்த பிரச்சனைக்கு அழகான தீர்வை தருகிறது.இதில் ஒவ்வொன்றாக செயல்களை குறித்து கொள்ளலாம்.எப்போது வேண்டுமானாலும் அதில் மாற்றங்களை செய்யலாம்.புதிய செயல்களை சேர்க்கலாம்.எல்லாவற்றையும் மாற்றை ஒருங்கிணைக்கலாம்.எல்லாமே மிகவும் எளிதானவை.

எதையும் திறந்த மனதோடு அணுக வேண்டும் என்று சொல்லப்படுவது உண்டல்லவா?அதே போல இணையவாசிகள் திட்டமிடுதலை துவக்க விரும்பினால் அழகான வெள்ளை பலகை வந்து நிற்கிறது.

இந்த பலகையில் எதை வேண்டுமானாலும் குறித்து வைக்கலாம்.முதல் பார்வைக்கு வெறுமையாக தோன்றினாலும் இந்த பலகையின் என்ன வேண்டுமானாலும் செய்யலாம்.

புதிதாக ஒன்றை குறித்து வைக்க வேண்டும் என்றால் ஏதாவது ஓரிடத்தில் இரட்டை கிளி செய்தால் போதும் சின்னதாக ஒரு கட்டம் தோன்றும் .அதற்கு ஒரு தலைப்பு கொடுத்த் சேமித்து கொண்டு அதன் கீழ் குறிப்புகளை இடம் பெற வைக்கலாம்.அதிலேயே மீண்டும் வலது பக்கமாக கிளிக் செய்தால் வண்ணத்தை மாற்றுவது,இணைய முகவரியை இணைப்பது,மேல் அல்லது கீழே புதிய விஷயங்களை சேர்ப்பது என பல வித உப வசதிகள் இருக்கின்றன.

ஏதாவது ஒரு தலைப்பில் மனதில் உள்ளவற்றை குறித்து வைத்து விட்டு அந்த பக்கத்தை அப்படியே சேமித்து கொள்ளலாம்.இந்த பக்கத்தை கோடு போட்டார் போல எந்த இடத்தில் வேண்டுமானாலும் பிரித்து கொள்ளலாம்.கோட்டை மேலும் கீழாக அல்லது பக்கவாட்டில் எப்படி வேண்டுமானாலும் நகர்த்தி கொள்ளலாம்.அந்த இடங்களில் இரட்டை கிளிக் செய்து புதிய தலைப்பில் குறிப்புகளை இடம் பெற வைக்கலாம்.

அதே போல அட்டவனைகளையும் விருப்பம் போல அமைத்து கொள்ளலாம்.எதை வேண்டுமானாலும் எப்போது வேண்டுமானாலும் திருத்தி கொள்ளலாம்,புதிய விவரங்களை சேர்த்து கொள்ளலாம்.ஓரிடத்தில் இருந்து வேறொரு இடத்திற்கு கொண்டு செல்லலாம்.

எல்லாமே மிகவும் சுலபமானது. ஆக எப்போது தோன்றுகிறதோ அப்போதெல்லாம் இந்த பலகையில் தகவல்களை சேர்த்து திட்டமிடுதலை ஒருங்கிணைத்து கொள்ளலாம்.

இந்த பலகையை சேமித்து வைத்து இமெயில் மூலம் நண்பர்களோடு பகிர்ந்து கொள்ளலாம்.புதிய பலகையை உருவாக்கி ஒன்றோடு ஒன்று இணைப்பு கொடுத்து ஒருங்கிணைக்கலாம்.

பெயருக்கு ஏற்பவே எளிமையான பலகை தான்.ஆனால் திட்டமிடலில் பல மாயங்களை செய்ய வல்லது.ஒரு முறை பயன்படுத்தி பார்த்தால் உங்ளுக்கே புரியும்.

இணைய பலகை முகவரி;http://www.mysimplesurface.com/