Category Archives: tech

சைக்கிள் மீது லேப்டாப்

லேப்டாப் கம்ப்யூட்டர் என்றதும் சைக்கிள்களை நினைத்து பார்க்க தோன்றாது, கார்களைத் தான் நினைத்து பார்க்க தோன்றும். அதிலும் வசதியான சொகுசு கார்கள். ஆனால் இனியும் அப்படியிருக்க வேண்டியதில்லை.  இப்போது காரில் செல்பவர்கள் தங்களது மடி மீது லேப்டாப் கம்ப்யூட்டரை வைத்து கொண்டு பணியாற்றியபடி செல்வதை பார்ப்பது போல, வரும் காலத்தில் சைக்கிள் மீது லேப்டாப் கம்ப்யூட்டரை வைத்திருப்பதையும் சர்வசகஜமாக பார்க்க நேரிடலாம்

இதன் அர்த்தம் சைக்கிள் வைத்திருப்பவர்கள்  எல்லாம் லேப்டாப் கம்ப்யூட்டர் வாங்கி விடுவார்கள் என்பதல்ல.  அதற்கு  புரட்சிகரமான மாற்றம் முதலில் ஏற்பட்டாக வேண்டும்.
அப்போதுதான் சைக்கிளில் செல்பவர்கள் எல்லாம்  லேப்டாப் கம்ப்யூட்டர் வாங்கக் கூடிய நிலை உண்டாகும்.

இப்போது லேப்டாப் வைத்திருப்பவர்கள் எல்லாம் சைக்கிள்  வாங்கி அதன் மீது லேப்டாப்பை வைத்து பயன்படுத்தும் நிலை வரக்கூடும் என்பதே விஷயம்.
சைக்கிள் என்றால் சாதாரண சைக்கிள் இல்லை. உடற்பயிற்சிக்காக பயன்படுத்தக் கூடிய சைக்கிள்.

சைக்கிள் மீது  ஏன் லேப்டாப்பை வைத்து கொள்ள வேண்டும் என்ற  சந்தேகம் உங்களுக்கு ஏற்படலாம். ஒரே கல்லில் 2 மாங்காயை அடிப்பது போல, ஒரே செயலில் 2 பலன்களை பெறுவதற்காகத்தான் இந்த ஏற்பாடு. அதாவது லேப்டாப் கம்ப்யூட்டர்களுக்கு  தேவையான மின்சக்தியை பெறுவதற்காக சார்ஜ் செய்ய வேண்டிய  பிரச்சனைக்கும் தீர்வு கண்டுவிடலாம்.

அதே நேரத்தில் அதிக முயற்சி இல்லாமல் தீவிர முயற்சி செய்து நல்ல உடல் தகுதியோடு இருப்பதையும் உறுதி செய்து கொள்ளலாம்.  இந்த இரண்டுமே லேப்டாப் மற்றும் சைக்கிள் ஒன்றிணைவதால்  சாத்தியமாகிறது என்பதுதான்  மிகவும் விசேஷமானது.

எப்படி என்றால் சைக்கிள் ஓட்டும் போது ஏற்படக் கூடிய விசையை பயன்படுத்தி மின்சாரத்தை உற்பத்தி செய்யும் வழியை உருவாக்கியுள்ளனர். இதன் மூலமாக லேப்டாப் பேட்டரியை சார்ஜ் செய்து விடலாம்.  ஆக சைக்கிளை மிதித்து கொண்டே இருந்தால் போதும் உடற்பயிற்சி செய்ததுபோல்  இருக்கும். அதே நேரத்தில்  லேப்டாப்புக்கு தேவையான மின்சாரத்தையும் உற்பத்தி செய்து விடலாம்.

இந்த புதுமையான வழியை அமெரிக்காவில் உள்ள  கல்லூரி மாணவர்கள் உருவாக்கியுள்ளனர்.  பாராட்டத்தக்க முயற்சி  என்று சொல்லத் தோன்றுகிறதா? இதில் விசேஷம் என்னவென்றால், இதன் பின்னே உள்ள முக்கிய ஆய்வாளர் இந்தியாவைச் சேர்ந்தவர் என்பது குறிப்பிடத்தக்கது.

இந்தியாவில் இருந்து  அமெரிக்காவில் குடியேறிய லஷ்மி ராவ் என்பவர், எம்ஐடியில்  உயர் பதவியில் இருக்கிறார். உலகம் முழுவதும் ஆய்வுப்பணிகளுக்காக புகழ் பெற்ற எம்ஐடி பல்கலைக்கழகத்தில் அவர் தகவல் தொழில்நுட்ப எரிபொருள் ஒருங்கிணைப்பாளர் என்னும் பதவியை வகித்து வருகிறார். 

எரிபொருள் சிக்கனத்திற்கான புதிய வழிகளை கண்டறிவது இவரது முக்கியபணியாக இருக்கிறது. அதிலும் தற்போது நீக்கமற நிறைய தொடங்கிய இருக்கும் கம்ப்யூட்டர்கள் மற்றும் லேப்டாப்களை இயக்க தேவைப்படும் மின்சாரத்தின் அளவை  குறைத்து அதற்கான மாற்று வழிகளை கண்டுபிடிப்பது அவரது முக்கிய ஆய்வாக இருக்கிறது. 

இந்த திசையில் தீவிரமாக பணியாற்றி வரும் அவரை, அமெரிக்காவின் கல்லூரி மாணவர்கள் குழு ஒன்று தங்களது கல்லூரி ஆய்வுக்காக அணுகியது.  லேப்டாப் கம்யூட்டரை இயக்க சைக்கிளின் விசையை பயன்படுத்த முடியுமா என்று அந்த குழு அறிய விரும்பியது.  லஷ்மி ராவ் அந்த குழுவினரோடு  இணைந்து பணியாற்றி இதற்கான வழியை உருவாக்கி கொடுத்திருக்கிறார். 

உடற்பயிற்சிக்காக பயன்படுத்தப்படும் சைக்கிளில் தேவையான  மாற்றத்தை செய்து அதில் லேப்டாப்பை வைத்து கொண்டு பெடலை மிதிக்கக் கூடிய வகையில் வடிவமைப்பில் மாற்றம் செய்து கொடுத்தார்.

இதன் விளைவாக பெடலை மிதித்து கொண்டிருக்கும் போதே மின்சாரம் உற்பத்தியாகி விடுகிறது. அந்த மின்சாரம் பேட்டரியில் சேமிக்கப்பட்டு, அங்கிருந்து லேப்டாப்புக்கு மாற்றப்படும். ஒரு அரை மணி நேரம்  சைக்கிளிளை மிதித்தால் போதும் லேப்டாப்பை இயக்குவதற்கு  தேவையான மின்சாரத்தை உற்பத்தி செய்து விடலாம்.  லேப்டாப்பை தனியே சார்ஜ் செய்ய வேண்டிய அவசியமிருக்காது. 

அதே நேரத்தில் உடற்பயிற்சி செய்த பலனையும் பெற்று விடலாம். சோதனை முறையில் உருவாக்கப்பட்டுள்ள இந்த முறை,  பரவலான கவனத்தை பெற்றுள்ளது.  நடைமுறைக்கு ஏற்றதாக இருந்தால் நாளை அனைவராலும் பயன்படுத்தக் கூடிய  நிலை வரலாம்.

மறதி இனி இல்லை

வர்த்தக துறையில் இருப்பவர் களுக்கு  தொடர்புகள்தான் உண்மை யான பலம். சரியான இடத்தில் சரியான நபர்களை அறிந்து வைத்திருப்பது வர்த்தக நோக்கம் நிறைவேற பெருமளவு கைகொடுக்கும். இதனால் எந்த நேரத்திலும், எந்த இடத்திலும் சரியான நபர்களை அறிமுகம் செய்து கொள்ளும் ஆர்வம், வர்த்தக துறையினருக்கு உண்டு. இதில் என்ன பிரச்சனை என்றால் முக்கியமான நபர் ஒருவரை  நிகழ்ச்சி ஒன்றில் சந்தித்தி ருப்பார்கள்.  அவர்களோடு அறிமுகம் செய்து கொண்டு பேசியும் இருப்பார்கள்

சில மாதங்கள் கழித்து மற்றொரு நிகழ்ச்சியில் சந்தித்து கொள்ளும் போது அவரது முகம் நினைவில் இருக்கும். ஆனால் அவர் யார்?, எப்போது சந்தித்தோம் என்ற விவரம் மறந்து போயிருக்கும்.

சில நேரங்களில் எவ்வளவுதான் யோசித்தாலும், எங்கே சந்தித்தோம் என்ற விஷயம் ஞாபகத்துக்கு வராமல்  முரண்டுபிடிக்கும்.  இது எல்லோருக்கும் நேரும் அனுபவம் தான். ஆனால் வர்த்தக துறையின ருக்கு இத்தகைய  அனுபவம் நேரும் போது, அது  அருமையான வாய்ப்பை இழப்பதற்கான காரணமாகவும் அமையலாம். ஆனால் அத்தகைய கவலை இனி இல்லை.  குறைந்த பட்சம் விழிப்புணர்வு மிக்க அந்தரங்க உதவியாளனை பெற்றிருக்கும் நபர்களுக்கு ஏற்படவாய்ப்பில்லை.  

எப்போது யாரை சந்தித்தோம் என்ற விவரத்தை விரும்பிய நேரத்தில் அந்த உதவியாளன்  எடுத்து சொல்லி விடும் ஆம். அந்த உதவியாளன் உங்களுக்கு உதவக்கூடிய  ஒரு ஹைடெக் சாதனம். அந்த சாதனத்தை நீங்கள் சின்னஞ்சிறிய மைக்கை மாட்டிக் கொள்வது போல சட்டை யோடு சேர்த்து அணிந்து கொள்ளலாம்.

அணிந்து கொள்ளக் கூடிய கம்ப்யூட்டர் என்று சொல்லக் கூடிய வியரபில் கம்ப்யூட்டர் வரிசையில் புதிதாக  உருவாக்கப்பட்டிருக்கும் சாதனம்  இந்த அந்தரங்க விழிப்புணர்வு உதவியாளன். ஒரு சாப்ட்வேர், 2 மைக்ரோ போன்கள், ஒரு காமிரா, ஒரு ஆடியோ சாதனம் எல்லாமே சின்னஞ் சிறியவை, உள்ளடக்கியது இந்த உதவியாளன்.  இதில் இருக்கும் சாப்ட்வேருக்கு பேச்சை புரிந்து கொள்ளும் ஆற்றல் உண்டு. அதில் தான் விஷயமே அடங்கியிருக்கிறது. 

இந்த உதவியாளனை அணிந்திருக் கும் நபர், யாரோ ஒருவரை சந்தித்து பேசுகிறார் என்று வைத்துக் கொள்வோம். இந்த சாதனம்  அந்த உரையாடலை உன்னிப்பாக கவனித்து கொண்டிருக்கும்.  உங்களை சந்தித்ததில் மிக்க மகிழ்ச்சி என்பது போன்ற வாசகத்தை கேட்டதுமே சாதனம் விழித்து கொண்டு, ஆஹா, நமது எஜமானர் முக்கியமான ஒருவரை சந்தித்திருக் கிறார் என்னும் உணர்வை பெற்று, அந்த மனிதரின் பெயரை குறித்து வைத்து கொண்டு அவரை அழகாக ஒரு கிளிக் செய்து படமும் எடுத்து கொள்ளும். அத்தோடு நிறுத்தாமல் அவர் பேசுவதை  எல்லாம் ஆடியோவாக பதிவு செய்து வைத்து கொள்ளும்.  
பின்னர் அழகாக அந்தமனிதரின் பெயர், அவரை சந்தித்த இடம் மற்றும் தினம்  ஆகியவற்றை  குறித்து  அதற்குரிய வரிசையில் பதிவு செய்து விடும்.

எஜமானர் மற்றொரு சந்தர்ப்பத்தில் அந்த நபரை  சந்திக்கும் போது, அவரை எங்கே சந்தித்தோம் என தெரியாமல் குழம்பி தவித்தால், அந்த உதவியாளனை உதவிக்கு அழைத் தால் போதும் அது, அவரை எங்கே எப்போது சந்தித்தார் என்ற விவரத்தை நொடிப்பொழுதில் தந்துவிடும்.

எனவே இந்த உதவியாளன் இருக்கையில் மறதி என்ற பேச்சுக்கே இடமில்லை. அது மட்டுமல்ல, வர்த்தக குழுவை சந்தித்துப்பேசும் பொழுது ஏதாவது ஒரு முக்கிய விவரம் கேட்கப்பட்டது என்றால், அது கையில்  இல்லாவிட்டால் அசடு வழிய வேண்டிய அவசியமில்லை. 

பேசிக் கொண்டே,  உதவியாளனிடம் இந்த விவரம் தேவை என்னும் குறிப்பை தெரிவித்தால் போதும்.  மறுமுனையில் அலுவலகத்தில் இருந்தபடி இந்த கூட்டத்தை கவனித்து கொண்டிருக்கும் சக ஊழி யர்களில் நிபுணத்துவம் மிக்கவர்கள் தேவையான  விவரத்தை  சொல்லி விடுவார்கள். அதனை உதவியாளன் மூலம் கேட்டு, கூட்டத்தில் பங்கேற்ப வர்களிடம் சொல்லி அசத்திவிடலாம்.

இதே போல காரில் சென்று கொண்டிருக்கும் போது, நாளிதழில் பார்க்கும் நல்ல புத்தகம் ஒன்றை வாங்க வேண்டும் என்று நினைத் தாலோ, அல்லது கண்ணில் படும் சுவரொட்டியில் உள்ள  திரைப் படத்தின் டிவிடியை வாங்க  வேண் டும் என்று நினைத்தாலோ உடனே உதவியாளனுக்கு சொன்னால் போதும். அது அந்த விவரத்தை பதிவு செய்து கொண்டு, இன்டெர்நெட் மூலம் அதற்குரிய தளத்தில் ஆர்டர் செய்து விடும். அல்லது  நாம்  வீட்டிற்கு சென்றவுடன், அந்த புத்தகத்தை வாங்க விரும்பினீர்களே என்று நினைவுபடுத்திவிடும். இவ்வாறு சகலகலாவல்லவனாக செயல்படக் கூடிய இந்த உதவியா ளனை ஆக்ஸ் சென்டர் டெக்னாலஜீஸ் என்னும் அமெரிக்க நிறுவனம் உருவாக்கியுள்ளது.

தோளின் பின்னே தேவதை

சமயங்களில் அதிகமாக பேசி விட்டோமோ என்று வருத்தமாக இருக்கும். இன்னும் சில நேரங்களில் பேசாமல் வந்தது தவறோ என்று மனது அலைபாயும். எப்படி இருந்தாலும் பேசும் நேரத்தில் சரியா, தவறா என்பது தெரியவில்லை. பேசி முடித்த பின்னர் விளைவுகள் பற்றி ஆராயும் போது தான் இதெல்லாம் புலனாகிறது

இது போன்ற நேரங்களில் மனசாட்சியின் குரல் நம்மை எச்சரிக்கும் அல்லது வழிகாட்டும்.
ஆனால் மனசாட்சியின் குரலை நாம் பெரிதாக எடுத்துக் கொள்வதில்லை. அல்லது அந்த குரலை நம்முடைய தடுமாற்றமாக கருதி விடுகிறோம். இதை விட நல்ல நண்பன் தோளில் கை வைத்து ஆலோசனை சொல்வது சரி, தவறை எடுத்துச் சொல்வதாக அமையக் கூடும்.
ஆனால் அத்தகைய நண்பர்கள் எப்போதுமே நமது அருகில் இருக்கும் வாய்ப்பு கிடைத்து விடுவதில்லை. இது போன்ற தருணங்களில் நமது தோளுக்கு பின்னே ஒரு தேவதை அமர்ந்து கொண்டு, நீங்கள் பேசுவது சரி; அல்லது ஓவராக அசடு வழிகிறீர்கள் என்று எச்சரித்தால் எப்படி இருக்கும்?

அமெரிக்காவை சேர்ந்த ஆக்சென்டர் டெக்னாலஜீஸ் நிறுவனம் இத்தகைய டிஜிட்டல் தேவதையை உருவாக்கி இருக்கிறது. இந்த டிஜிட்டல் தேவதையை கச்சிதமாக கையிலிருக்கும் செல்போனுக்குள் அடக்கி விடலாம். தனிநபர்களுக்கான பயிற்சியாளராக இந்த டிஜிட்டல் தேவதையை ஆக்சென்டர் நிறுவனம் உருவாக்கி இருக்கிறது.

அதிநவீனமான சென்சார்கள், புளூடூத் வசதி மற்றும் வயர்லெஸ் இணைப்பு ஆகியவற்றை ஒருங்கிணைத்து இந்த டிஜிட்டல் தேவதை வடிவமைக்கப்பட்டுள்ளது. இதிலுள்ள சென்சார் ஒரு நல்ல நண்பனை போல, மற்றவர்களோடு  நாம் பேசுவதை அல்லது உரையாற்றுவதை பொறுமையாக கேட்டபடி இருக்கும்.

அதோடு புத்திசாலிதனமான நண்பனை போல அந்த பேச்சின் சாராம்சத்தை பகுத்துணரும் ஆற்றலும் அதற்கு உண்டு. எனவே பேச்சின் போக்கை வைத்துக் கொண்டு அளவாக பேசுகிறாரா அல்லது அளவுக்கு மீறி பேசுகிறாரா என்பதை உணர்ந்து தக்க நேரத்தில் அது பற்றி எச்சரிக்கும்.

இத்தகைய சென்சாரை காதில் மாட்டிக் கொண்டோம் என்றால், உரிய நேரத்தில் நமது காதுக்கு அருகே எச்சரிக்கை குரல் கிசுகிசுப்பாக கேட்கும். அதனை வைத்துக் கொண்டு நாம் உஷாராகி விடலாம். பலவிதமாக இந்த சேவையை பயன்படுத்தலாம் என்கிறது ஆக்சென்டர்.

இதற்கு உதாரணமாக முதல்கட்ட மாக விற்பனை பிரதிநிதிகளுக்கு பயன்படக் கூடிய வகையில் இதனை தயார் செய்திருக்கிறது. விற்பனை பிரதிநிதிகளுக்கு பேச்சுதான் மூலதனம் என்றாலும், வளவள வென்று மட்டும் பேசிக் கொண்டி ருந்தால் காரியமாகாது.
முதலில் வாடிக்கையாளர் சொல்வதை காது கொடுத்து கேட்க வேண்டும். அவரது தேவையறிந்து பேச வேண்டும். ஆனால் பல விற்பனை பிரதிநிதிகள் இந்த பொன்விதியை மறந்து விட்டு பேசிக் கொண்டே இருக்கின்றனர்.

இத்தகைய விற்பனை பிரதிநிதிகள் மேல்சொன்ன டிஜிட்டல் தேவதையை பயன்படுத்தினார்கள் என்றால் வாடிக்கையாளரிடம் தங்கள் நிறுவன தயாரிப்பு பற்றி அவர்கள் பேசிக் கொண்டே இருக்கும் போது சரியான கட்டத்தில் குறுக்கிட்டு எச்சரிக்கை செய்யும். விற்பனை பிரதிநிதி சமாளித்துக் கொண்டு தனது யுக்தியை மாற்றிக் கொள்ளலாம்.

ஒருவேளை விற்பனை பிரதிநிதி சரியாக பேசியிருந்தால் இந்த டிஜிட்டல் தேவதை சபாஷ் என்று மட்டும் சொல்லி ஊக்குவிக்கும். மேலும் எப்படி பேசினோம் என்பதை அறிய செல்போன் மூலம் பேச்சு பற்றிய வரைபட திறனாய்வை டவுன்லோடு செய்தும் பார்த்துக் கொள்ளலாம். இதே தகவலை இன்னும் விரிவான திறனாய்வாக கம்ப்யூட்டரிலும் பார்த்துக் கொள்ளலாம்.

டிஜிட்டல் தேவதை ஒருவர் பேசும் விதத்தை கவனித்து அதன் செயல் திறனை அலசி ஆராய்ந்து இந்த தகவலை அறிக்கையாக சமர்ப்பிக்கும். அடுத்தகட்டமாக ஒருவர் பேசும் போக்கை உன்னிப்பாக கவனித்து அவர் எப்போது சிறப்பாக தகவலை வெளிப்படுத்துகிறார்; எப்போது தடுமாறுகிறார் என்பது போன்ற பரிந்துரைகளையும் இந்த டிஜிட்டல் தேவதை முன்வைக்கக் கூடும்.

மற்றவர்களோடு பேசி தங்கள் மனதில் உள்ள கருத்து அல்லது திட்டத்தை புரிய வைக்க வேண்டிய நிலையில் இருப்பவர்களுக்கு இந்த சேவை நிச்சயம் பயனுள்ளதாக இருக்கும்.
ஒரு நல்ல நண்பனை போல நம்முடைய பேச்சை கவனித்து இந்த டிஜிட்டல் தேவதை ஆலோசனை வழங்கிக் கொண்டே இருக்கும்.

மிக சரியாகவே தனிநபர்களுக்கான பயிற்சியாளர் என்று இதனை வர்ணிக்கும் ஆக்சென்டர் இப்போதைக்கு பரிசோதனையில் மட்டும் ஈடுபட்டு வருகிறது. இந்த தயாரிப்பு சந்தைக்கு எப்போது வரும் என்பது தெரியவில்லை.

பார்கோடு விக்கிபீடியா

நுகர்வோர் என்ற முறையில் நமக்கு எவ்வளவு பெரிய பொறுப்பு இருக்கிறது தெரியுமா? நாம் சரியான விவரம் தெரியாமல் தவறான பொருட்களை வாங்கி விடலாகாது என்று சொல்லப்படுவது உங்களுக்கு தெரியுமா?
.
நுகர்வோரான உங்கள் கடமையை சரிவர செய்ய,  வாங்கப்படும் பொருள் பற்றியும், அதனை தயாரித்த நிறுவனம் பற்றியும் நீங்கள் தெரிந்து கொண்டு செயல்பட வேண்டும் என்பது  தெரியுமா? 

 எல்லாம் தெரியும், விளம்பரங்களை பார்த்து விஷயங்களை தெரிந்து  கொண்ட பின்னர் தான் கடைக்கே போகிறோம் என்று நீங்கள் அலுப்புடன் அலட்சியமாக சொல்லலாம். ஆனால், இங்கே குறிப்பிடுவது விளம்பரம் மூலம்  தெரிவிக்கப்படும் தகவல்களை அல்ல; அவற்றின் பின்னே உள்ள தகவல்களை அதாவது நிறுவனங்கள் மறைக்க விரும்பும் தகவல்கள் மற்றும் வெளியிட விரும்பாத விவரங்கள் இவற்றை எல்லாம் ஏன் தெரிந்து கொள்ள வேண்டும் என்று நீங்கள் கேட்கலாம்.

அது உங்களின் தார்மீக கடமை என்று சொல்கின்றேன்.  அப்போது தான் நீங்கள் தார்மீக  பொறுப்புடன் நடந்து கொள்ள முடியும் என்றும் சொல்கின்றனர்.

சொல்வது, வர்த்தக நிறுவனங்கள் லாபத்தை மட்டும் குறிக்கோளாக கொண்டு செயல்படாமல்  சமூக பொறுப்புடன்  நடந்து கொள்ள வேண்டும் என்று நினைப்பவர்கள் இதனை உறுதி செய்ய நுகர்வோர் செய்ய வேண்டியது எல்லாம், தகவல்களை  தெரிந்து கொண்டு அதனடிப்படையில்  சரியான முடிவுகளை  மேற்கொள்வது தான்.

 கெட்ட பெயர் சம்பாதித்த நிறுவனங்களை நுகர்வோர் இயல்பாகவே  தவிர்த்து விடுவ துண்டு. ஆனால்  நுகர்வோர் அறியாமலேயே தவறான  கொள்கைகளை/ நடைமுறையை கடைபிடிக்கும் நிறுவனங்கள் இருக்கின்றனவே. ஒரு நிறுவனம் தெரிந்தே குழந்தை தொழிலாளர்களை  வேலைக்கு நியமித்திருக்கலாம். ஒரு நிறுவனம், சுற்றுச் சூழல் 
மாசுபடுவது பற்றி கவலைப்படாமல் செயல்பட்டு கொண்டிருக்கலாம். ஒரு நிறுவனம் உள்ளூர் மக்களின்  நீர் ஆதாரத்தை சுரண்டி  லாபம் பார்த்து கொண்டிருக்கலாம்.  இப்படி எத்தனையோ விஷயங்களை சொல்லலாம்.

வர்த்தக செயல்பாடுகள் பற்றி பெருமைபட்டுக் கொள்ளும் நிறுவனங்கள், இத்தகைய  சர்ச்சைக்குரிய சங்கதிகளை மூடி மறைத்து விடவே  முயற்சி செய்கின்றன.

 இப்போது உங்கள் முன் உள்ள கேள்வி, ஒரு நிறுவனம் தவறாக  செயல்படுகிறது என்று தெரிந்து கொண்டால்  அதன் தயாரிப்பை, வாங்காமல் புறக்கணிப்பது தானே சரி.  ஆம் என்பது உங்கள் பதிலாக இருந்தால்,  இந்த தகவல்களை  எல்லாம் எப்படி தெரிந்து கொள்வது என்ற கவலை உங்கள் மனதில் உண்டாகலாம்.

அந்த  கவலையே  வேண்டாம். நிறுவனங்களின்  பொருட்கள் பற்றிய விவரங்களை அளிப் பதற்காக  என்றே ஒரு இணைய தளம் உருவாக்கப்பட்டு வருகிறது.

 இன்றைய  வர்த்தக உலகில் எல்லா பொருட்களுமே விலையை குறிக்க பார்கோடை தாங்கி நிற்கின்றன அல்லவா? அந்த பார்கோடை வைத்தே  அப்பொருள் தொடர்பான முழு விவரங்களையும் அளிப்பதை நோக்கமாக  கொண்டு இந்த தளம் உருவாக்கப்பட்டு வருகிறது.  அந்த வகையில்  இதனை பார்கோடு விக்கிபீடியா என்று சொல்லலாம்.

ஒரு பற்பசையையோ, சோப்பு கட்டியையோ பால் பாக் கெட்டையோ நீங்கள்  வாங்க போகிறீர்கள் என்று வைத்துக் கொள்வோம். உடனே அதில் உள்ள பார்கோடை குறித்து வைத்துக் கொண்டு இந்த தளத்தில் அதனை டைப் செய்து பார்த்தீர்கள் என்றால் அந்த தயாரிப்பு தொடர்பான விவரங்கள்  திரையில் வந்து நிற்கும்.

விவரங்கள் என்றதும் வெறும்  தகவல்கள் மட்டும் அல்ல. நிறுவனத்தின் செயல்பாடுகளை ஒரே பார்வையில் அலசி ஆராய்ந்து எடை போட்டு விட உதவும் வகையிலான செய்திகள், விமர்சனங்கள், சர்ச்சைகள் என சகல விதமான விவரங்களும் தொகுக்கப் பட்டிருக்கும்.

உதாரணத்திற்கு நிறுவனத்தின் தயாரிப்பு முறை மற்றும் தொழிற்சாலையில்  ஊழியர்கள் நடத்தப்படும் விதம் குறித்து  ஏதாவது செய்திகள் வெளி வந்திருந்தால் அவை கட்டாயம் இடம் பெற்றிருக்கும் நிறுவனம் அரசு சலுகையை தவறாக பயன்படுத்தியது தொடர்பான செய்திகள் போன்றவையும் இடம் பெற்றிருக்கும்.

அதே போல அந்த   தயாரிப்பு பற்றி சக நுகர்வோரின் விமர்சன கருத்துக்களும் இடம் பெற்றிருக்கும். நிறுவனம் ஏதாவது சர்ச்சையில் சிக்கியிருந்தால் அந்த விவரமும் குறிப்பிடப்பட்டிருக்கும். இப்படியாக  ஒவ்வொரு பொருள் பற்றிய முழு விவரங்களும் தொகுத்தளிக்கப் பட்டிருக்கும். பார்கோடை  டைப் செய்வதன் மூலம் எந்த பொருள் பற்றியும் இதன் வழியே தெரிந்து கொள்ளலாம்.

இவ்வாறாக ஒரு நிறுவனம் தவறாக எதையும் செய்யவில்லை என்பதை உறுதி செய்து கொண்டு  அப்பொருளை நிம்மதியுடன் வாங்கலாம். இல்லை என்றால் இது போன்ற செயல்பாடுகளுடன் உடன்பட மாட்டேன் என கம்பீரமாக மறுத்து நிராகரிக்கலாம்.

நுகர்வோருக்கான இந்த தளம் நுகர்வோர் பங்களிப்பு இல்லாமல்  சிறப்பாக உருவாக வாய்ப்பில்லை. எனவே  நுகர்வோர் உதவியுடனேயே இதில் விவரங்கள் இடம் பெற உள்ளது.

  எனவே தான்  விக்கி பீடியா பாணியில் இந்த தளம் அமைக்கப்பட்டு வருகிறது.  இதில் நுகர்வோர் வர்த்தக நிறுவனங்கள் தொடர்பான   தங்கள் மதிப்பீடுகள், கருத்துக்கள் மற்றும் கண்ணில் படும் செய்திகளை  சமர்பிக்கலாம். இப்படியாக  நுகர்வோர் சமர்பிக்கும் தகவல்கள் தொகுக்கப்பட்டு பொருட் களுக்கான  களஞ்சியமாக  இந்த தளம் உருவாக உள்ளது. 

புள்ளி விவரங்களுக்கான பிரவுசர்

கட், காபி, பேஸ்ட்இன்டெர்நெட் பயன்பாட்டை பொறுத்தவரை இதுதான் செயல்பாட்டு தத்துவமாக இருக்கிறது. எந்த இணையதளத்தில் எந்தவிதமான தகவல்களை பார்த்தாலும் சரி. பிற்பாடு படிப்பதற்காக அல்லது பயன்படுத்துவதற்காக அதனை அப்படியே கட், காபி செய்து பேஸ்ட் செய்து வைத்துக் கொண்டு விட்டால் எப்போது வேண்டுமானாலும் பயன்படுத்திக் கொள்ளலாம்.இப்படி தகவல்களை சேமித்து வைத்துக் கொள்ளும் வசதி இன்டெர்நெட்டில் தகவல் வலை வீசும்போது பெரும்பாலானோர் பின்பற்றும் பழக்கமாக இருக்கிறது. இணையவாசிகளுக்கு இது பேருதவியாக இருக்கிறது என்றாலும், இதில் ஒரேயொரு குறை உண்டு.

புள்ளி விவரங்கள் மற்றும் அட்டவணையில் இடம் பெற்றுள்ள தகவல்களை இப்படி சேமித்து வைத்துக் கொள்ள முடியாது. அப்படியே சேமித்து வைத்துக் கொண்டாலும், அட்டவணை பாணியில் அதனை தக்க வைத்துக் கொள்ள முடியாது.
பெரும்பாலானோர் அட்டவணை தகவல்களை பற்றி கவலைப்படாமல் விட்டு விடுவார்கள். ஆனால் புள்ளி விவரங்களில் முக்கியத்துவம் அறிந்தவர்களுக்கு இது மிகவும் சிக்கலாகி போய் விடுவதுண்டு.

அப்போதெல்லாம் அவர்களுக்கு அட்டவணைகளை உள்ளது உள்ளபடியே சேமித்து வைக்கும் வசதி இருந்தால் நன்றாக இருக்குமே என்று தோன்றும். அது மட்டுமல்ல, அட்டவணை விவரங்களை தங்களது கோப்பில் தேவையான இடத்தில் இடம் பெற வைத்து அதன் விவரங்களை அலசி ஆராய முயன்றால் நன்றாக இருக்குமே என்று தோன்றும்.

இத்தகைய புள்ளி விவர பிரியர்களுக்காக என்றே புதியதோர் பிரவுசர் அறிமுகமாகி இருக்கிறது. எண்ணிக்கைகளில் கையாள்வதற்காக என்று உருவாக்கப்பட்டுள்ள இந்த பிரவுசரின் மூலம் புள்ளிவிவரங்கள் மற்றும் அட்டவணை தகவல்களை பயன்படுத்துவதும், கையாள்வதும் சுலபமாக்கப்பட்டுள்ளது.

கிரிக்ஸ் ஸ்டிராட்டா எனும் பெயரில் அறிமுகமாகியுள்ள இந்த பிரவுசரை பயன்படுத்தும் போது எண்ணிக்கை தொடர்பான விஷயங்களை கையாள்வது மிகவும் எளிதாகி விடுகிறது. இந்த பிரவுசரை பல விதங்களில் பயன்படுத்தலாம்.

உதாரணத்திற்கு ஒரு பிரபல நடிகரின் திரைப்படம் தொடர்பான வசூல் விவரங்களை சேகரித்து அதற்கு முன்னர் வந்த 5 படங்களின் வசூல் விவரங்களை ஒப்பிட்டுப் பார்த்து ஒரு பட்டியல் தயாரிக்கலாம்.

இதே போல, அந்த நடிகரின் குறிப்பிட்ட எந்த படம் பிரபலமாக இருக்கிறது என்பதை புள்ளி விவரங்கள் மூலம் அட்டவணையாக மாற்றியும் பார்த்துக் கொள்ளலாம். இந்த புள்ளி விவரங்களை எந்த குறிப்பிட்ட தளத்திலிருந்து வேண்டுமானாலும் எடுத்து நம் இஷ்டம் போல பயன்படுத்திக் கொள்ளலாம்.எத்தனை இணையதளங்களிலிருந்து வேண்டுமானாலும் புள்ளி விவரங்களை எடுத்து பயன்படுத்தலாம். அவற்றை கொண்டு புதிய அட்டவணையை உருவாக்குவதும் மிகவும் சுலபமானது.

தகவல்களை டைப் செய்யும்போது, அட்டவணையை தயார் செய்வதுதான் உள்ளபடியே மிகவும் கடினமானது. அந்த செயலை இந்த பிரவுசர் மிகவும் சுலபமாக்கி விடுகிறது.

புள்ளி விவரங்கள் மட்டுமல்லாமல் செய்தியோடை (ஆர்எஸ்எஸ்) வசதி மூலம் பெறப்படும் செய்திகளையும் இப்படி அட்டவணைப்படுத்தி குறிப்பிட்ட எந்த செய்தி அதிகம் படிக்கப்படுகிறது என்பது போன்ற தகவல்களையும் தெரிந்து கொள்ளலாம்.

நேட் வில்லியம்ஸ் என்பவர் தனது நண்பர்களோடு சேர்ந்து இந்த பிரவுசரை உருவாக்கியுள்ளார். புள்ளி விவரங்கள் தொடர்பான சிக்கலை நன்கு அறிந்திருந்த அவர், முதலில் வர்த்தக நிறுவனங்களில் தகவல் தொகுப்புகளில் உள்ள சிக்கல்களை சரி செய்வதற்கான சாப்ட்வேரை உருவாக்கினார். அதன் பிறகே அவருக்கு இந்த சாப்ட்வேர் இன்டெர்நெட் முழுவதற்கும் பயன்படுத்த முடிந்தால் சிறப்பாக இருக்கும் என்று தோன்றியது.

அதன் அடிப்படையில் அந்த சாப்ட்வேரின் மேம்பட்ட வடிவை உருவாக்கி அதனையொரு முழு வீச்சிலான பிரவுசராக மாற்றினார். தற்போது அந்த பிரவுசர் இணையவாசிகளின் பயன்பாட்டிற்காக அறிமுகம் செய்யப்பட்டுள்ளது. மற்ற எந்த பிரவுசரை போலவே இதனை பயன்படுத்தலாம்.

அது மட்டுமல்லாமல் இந்த பிரவுசரை நமது கம்ப்யூட்டரில் உள்ள கோப்புகளை கையாள்வதற்கும் பயன்படுத்திக் கொள்ளலாம். எண்ணிக்கை தொடர்பான விஷயங்களை பயன்படுத்துபவர்களுக்கு இந்த பிரவுசர் மிகவும் ஏற்றதாக இருக்கும்.