Category Archives: tech

டொமைன் ரகசியம் -3

நேற்றைய தொடர்ச்சி

உலகில் டோகேலா எனும் பெயரில் ஒரு நாடு இருப்பது உங்களுக்கு தெரியுமா? டச்சு தொழிலதிபர் ஜூர்பியருக்கு இந்த விவரம் தெரியும். பசுபிக் மகா கடலில் அமைந்திருக்கும் தீவுக் கூட்டமாக இந்த நாடு அமைந்துள்ளது. இந்த நாட்டுக்கான இணையதள முகவரி டாட் டிகே என்று முடிகிறது. இந்த முகவரிக்கான உரிமையைத் தான் ஜூர்பியர் தனது பெயரில் பதிவு செய்து வைத்துக் கொண்டார்.
.

ஆனால் இந்த முகவரியை பதிவு செய்து கொள்ளும் வாய்ப்பை பெற அவர் மிகவும் கஷ்டப்பட வேண்டி இருந்தது. காரணம் டோகேலா எனும் பெயரில் ஒரு நாடு இருக்கிறதா? என்பது இணைய முகவரிகளை பதிவு செய்யும் மூல அமைப்பான ஐகானுக்கே தெரியவில்லை. எனவே இந்த அமைப்பில் உள்ளவர்கள் ஜூர்பியர் இல்லாத நாட்டின் பெயரை குறிப்பிட்டு கதை விடுகிறாரா என்று சந்தேகப்பட்டனர்.

பின்னர் ஜூர்பியர் அரும் பாடுபட்டு அந்த நாட்டின் இருப்பை நிரூபித்து அதற்கான உரிமையை பெற்றுக் கொண்டார். உண்மையில் 2001ம் ஆண்டு டொமைன் பெயர் உரிமையில் முதலீடு செய்ய அவர் முடிவு செய்த போது நான்கு நாட்டு முகவரிகளை பதிவு செய்து கொள்வதற்கான வாய்ப்பு இருந்தது.

அவை பாலஸ்தீனம், கிழக்கு தைமூர், பிட்கைரன் மற்றும் டோகேலா. அதாவது இந்த நான்கு நாடுகளின் முகவரி உரிமையும் பதிவு செய்யப்படாமலேயே இருந்தது. பாலஸ்தீனம் மற்றும் கிழக்கு தைமூர் இரண்டுமே பிரச்சனை பூமிகளாக இருப்பதால் அந்நாடுகளின் முகவரிகள் பதிவு செய்யப்படாமல் இருப்பது புரிந்து கொள்ளக் கூடியது.

தினசரி வாழ்க்கையே செத்துப் பிழைக்கும் அனுபவமாக இருக்கும் போது டொமைன் பெயர் பற்றியெல்லாம் யோசிக்க யாருக்கு தோன்றும். இவற்றில் டோகேலா பெயரை பதிவு செய்து கொள்ளலாம் என்று ஜூர்பியர் தீர்மானித்தார். பதிவு செய்து கொண்டதுமே டாட் டிகே எனும் பெயரில் ஒரு திட்டத்தையும் தொடங்கினார்.

முன்னணி நிறுவனங்களை டிகே எனும் பதத்தோடு முடியும் முகவரிகளை பதிவு செய்து கொள்ள ஊக்குவிக்கும் திட்டமாக இது அமைந்தது. இந்த பெயரில் முகவரிகள் பதிவு செய்து கொள்ளப்படும் போது அவருக்கு ஒரு வருமானம் கிடைக்கும். அந்த பெயரில் உள்ள தளங்களில் கூகுல் விளம்பரங்களை இடம் பெற செய்து அதன் மூலமும் வருமானத்தை பெற முடியும்.

இவ்வாறு வரும் வருமானத்தில் ஒரு பகுதியை அவர் டோகேலா நாட்டிற்கு வழங்கி விடுகிறார். அதுதான் டாட் டிகே திட்டத்தின் முக்கிய பகுதி. இந்த திட்டம் டோகேலா நாட்டின் பொருளாதாரத்திற்கு பக்கபலமாக நிற்கும் வகையில் அமைந்துள்ளது. பசுபிக் கடல் பகுதியில் அமைந்திருக்கும் இந்த தீவுக் கூட்ட நாட்டில் அதிகம் போனால் 1500 பேர் இருப்பார்கள். இந்த நாட்டில் உள்ளவர்களை விட இந்த நாட்டிலிருந்து வெளியே போய் வசிக்கும் டோகேலாவாசிகள்தான் அதிகம்.

நியூசிலாந்து நாட்டுக்கு அருகே உள்ளது இந்நாடு. அரசியல் ரீதியாக தனி நாடு அந்தஸ்து இல்லை. நியூசிலாந்துக்கு கீழ்பட்ட தன்னாட்சி உரிமை கொண்ட நாடாக இது அமைந்துள்ளது. நிதியுதவி உட்பட பல விஷயங் களுக்கு இந்நாடு நியூசிலாந்தைத் தான் நம்பி இருக்கிறது. 1994 வரை இந்நாடு தகவல் தொடர்புக்கு ரேடியோ தொலைபேசித்தான் நம்பி இருந்தது. அதன் பிறகு செயற்கைக் கோள் தொலைபேசிக்கு மாறியது. ஆனால் டாட் டிகே திட்டம் செயல்பாட்டுக்கு வந்த பிறகு அந்நாட்டில் இன்டெர்நெட் தொலைபேசி வசதி சாத்தியமானது.

அதற்கு முன்பு இந்நாட்டில் மொத்தமே 12 கம்ப்யூட்டர்கள்தான் இருந்தன. ஆனால் டாட் டிகே வருவாய் மூலம் இன்டெர்நெட் மையங்கள் ஏற்படுத்தப்பட்டு கம்ப்யூட்டர்களின் எண்ணிக்கை 200ஐ தொட்டது. அது மட்டுமல்லாமல் இந்த நாட்டை சேர்ந்தவர்கள் இணையதளங்களின் மூலம் பாடல்களை டவுன்லோடு செய்வது, மை ஸ்பேஸ் போன்ற தளங்களை பார்ப்பது ஆகிய செயல் களிலும் ஈடுபட தொடங்கினர்.

இன்று இந்த நாட்டிற்கான பொருளாதாரத்தில் 10 சதவீத நிதி டாட் டிகே திட்டத்தின் மூலம் கிடைத்து கொண்டிருக்கிறது. பொருளாதார ரீதியாக சுதந்திரம் பெற வேண்டும் எனும் நோக்கத்தை இந்த திட்டம் நிறைவேற்றி வருவதாக டோகேலா நாட்டை சேர்ந்தவர்கள் பெருமைப்படுகின்றனர். இதற்காக இந்த திட்டத்திற்கு ஆதரவு தெரிந்தவர்களுக்கு எல்லாம் அவர்கள் பஃகா பேட்டாய் என்கின்றனர். அதாவது அவர்கள் மொழியில் நன்றி என்று அர்த்தம்.

இப்படியாக ஜூர்பியர் டாட் டிகே முகவரிகளை பதிவு செய்வதன் மூலமே வருவாயை தேடிக் கொண்டு வருகிறார். இது குறுக்கு வழிதான். ஆனால் ஒரு நாட்டுக்கே உதவும் நியாயமான குறுக்கு வழி.

டொமைன் ரகசியம்- 2

முன்னணி தளங்களுக்கு இவை கூடுதல் வருவாய்க்கான வழியாக அமைந்திருக்கின்றன.
நிற்க! ஒரு சில புத்திசாலிகள் இத்தகைய விளம்பரங்களை இடம் பெற வைப்பதற்காக என்று பெயருக்கு என்று ஒரு இணைய தளத்தை நடத்தி அதன் மூலம் வருமானம் சம்பாதித்து வருகின்றனர். அநேகமாக இவை உள்ளடக்கம் ஏதும் இல்லாமல் வெறுமையாகவே இருக்கும். இந்த வெற்று இணைய தளங்களை தேடி இணையவாசிகளை வர செய்வதற்கு சுலபமான வழி இருக்கிறது. அதுதான் குறுக்கு வழி.

.
கூகுல் விளம்பரங்கள் மூலம் வருமானம் பெறுவதற்காக நடத்தப்படும் உள்ளடக்கமில்லா வெற்று தளங்களை நோக்கி இணையவாசிகளை வருகை தர வைப்பதற்காக என்று மிகவும் சுலபமான வழி இருக்கிறது. அது, சாமர்த்தியமாக இணையதள முகவரிகளை தேர்வு செய்து பதிவு செய்வது. உதாரணமாக ஒரு சில பெயர்களின் மூலமே, அது மகத்தானதாக இருக்கும் என்ற உணர்வை ஏற்படுத்தி விடலாம்.

அத்தகைய பெயர்களை யோசித்து இணையதள முகவரிகளை பதிவு செய்து கொள்ள வேண்டும். அல்லது பிரபலமான இணையதளத்திற்கு இணையான வேறு மாற்று முகவரிகளை பதிவு செய்து கொள்ள வேண்டும். தேடியந்திரங்களில் தேடும் போது அல்லது முகவரிகளை மாற்றி டைப் செய்யும் போது இந்த இணைய தளங்களுக்கு இணையவாசிகள் வருகை தர நேரிடும்.

அப்போது உள்ளடக்கம் இல்லாமல் அவர்கள் ஏமாந்து திரும்புவதால் ஒன்றும் நஷ்டம் இல்லை. அவர்களில் 10ல் ஒருவர் அல்லது நூறில் ஒருவர், ஏன் ஆயிரத்தில் ஒருவர் இந்த தளங்களில் உள்ள விளம்பரங்களை க்ளிக் செய்தால் போதும் வருவாய் வந்து விடும்.
இத்தகைய சாமர்த்திய முகவரிகள் பலவற்றை பதிவு செய்து கொண்டால் அதிக வருவாய் பார்க்கலாம்.

இப்படி பலர் செய்து வருகின்றனர். அவர்களில் ஒரு சிலர் கோடீஸ்வர அதிபர்களாகி இருக்கின்றனர். அதிக உழைப்பின்றி பணம் சம்பாதிப்பதால் இவையும் குறுக்கு வழிதான். ஆனால் இவற்றில் எந்த சட்ட விரோதமான செயலும் இல்லை. மற்றவர்கள் பரவலாக அறிந்திராத நடைமுறையை புத்திசாலிதனமாக பயன்படுத்திக் கொள்ளும் செயல் மட்டுமே.

எனவே இவற்றை நேர்மையான குறுக்கு வழி என்று சொல்லலாம்.
டொமைன் பெயர் மூலம் சம்பாதிப்பதிலேயே மற்றொரு வழி இருக்கிறது. அது நாடுகளுக்கு உரிய டொமைன் உரிமை பதிவு செய்யப்படாமல் இருக்கிறது என்று தெரிந்தால் அதனை ஒட்டு மொத்தமாக பதிவு செய்து கொண்டு, அதன் பிறகு அதன் மூலம் வருவாயை பெருக்கிக் கொள்வது. அந்த நாடுகளுக்கான இணைய முகவரிகள் பதிவு செய்யப்படும் ஒவ்வொரு முறையும் அதன் மூலம் வருவாய் வந்து கொண்டிருக்கும்.

அதெப்படி ஒரு நாட்டுக்கான முகவரியின் உரிமையை பதிவு செய்யாமல் இருப்பார்கள். விஷயம் தெரிந்த உடனேயே பெரிய நிறுவனங்கள் அல்லது அமைப்புகள் போட்டிப் போட்டு கொண்டு பதிவு செய்து கொண்டு விடாதா? வாஸ்தவம்தான். முன்னணி நாடுகளின் பெயர் உரிமைகள் இப்படி உடனேயே பதிவு செய்யப்பட்டு விட்டன. மற்ற நாடுகளும் விழித்துக் கொண்டு பெயர் உரிமையை பதிவு செய்து கொண்டு விட்டன. ஆனால் பெயர் தெரியாத உலகம் அறியாத நாடுகள் சில இருக்கின்றன.

அவற்றுக்கு டொமைன் பெயரை பதிவு செய்து கொள்ள வேண்டும் என்ற விஷயம் தெரியவில்லை. அந்த பெயரில் டொமைன் பெயரை பதிவு செய்து கொள்ளலாம் என்ற விஷயம் மற்றவர்களுக்கும் தெரியவில்லை. உண்மையிலேயே இப்படி பல நாடுகள் இருக்கின்றன.

அத்தகைய அபூர்வ நாடுகளில் ஒன்றுக்கான டொமைன் பெயர் உரிமையை டச்சு தொழிலதிபர் ஜூஸ்ட் ஜூர்பியர் பதிவு செய்து வைத்துக் கொண்டார். இப்போது இந்த நாடுகளின் முகவரி யில் அமைக்கப்படும் ஒவ்வொரு இணையதள முகவரிக்கும் அவருக்கு வருவாய் கிடைத்துக் கொண்டி ருக்கிறது. ஆனால் இதனை அவர் முற்றிலும் நேர்மையான முறையில் பயன்படுத்தி வருகிறார்.

நேர்மையான முறையில் மட்டு மல்ல, பாராட்டக் கூடிய வகையிலும் தான். சொல்லப் போனால் ஒரு நாட்டின் பொருளாதாரத்திற்கே அவர் உதவுகிறார். அடிப்படை வசதிகள் அதிகமில்லாத ஒரு நாட்டுக்கு தகவல் தொடர்பு வசதியை அவர் தேடி தந்து தானும் வளமாகி தன்னை வளமாக்கிய நாட்டுக்கும் செல்வத்தை பெற்றுத் தந்து வருகிறார்.
போற்றுதலுக்குரிய அந்த கதையை தொடர்ந்து பார்ப்போம்…

ரோபோ நோயாளி

ரோபோக்கள் மனித இயந்திரம்தான் என்றாலும் அவற்றை உணர்ச்சி இல்லாதவை என்று இனி யாரும் கூறி விட முடியாது. காரணம் வலியை உணரக் கூடிய ரோபோவை ஜப்பான் நாட்டில் வடிவமைத்துள்ளனர். இந்த ரோபோ வலியை உணரக் கூடியது மட்டுமல்ல; வலியை உணர்த்தக் கூடியதும் என்பதுதான் விசேஷம்.
.
ரோபோ ஆய்வு மற்றும் தயாரித்தல் ஜப்பான் முன்னிலை வகிக்கிறது. ரோபோ பயன்பாட்டிலும் அந்நாடு தான் முதலிடத்தில் இருக்கிறது. ரோபோ தொடர்பான ஆய்வு ஜப்பானில் தீவிரமாக நடைபெற்று வருவதால் புதுப்புது ரோபோக்கள் உருவாக்கப்பட்டு வருவதாலும் அங்கே சர்வதேச ரோபோ கண்காட்சி அண்மையில் நடத்தப்பட்டது.

தலைநகர் டோக்கியோவில் நான்கு நாட்கள் இந்த கண்காட்சி நடைபெற்றது. இந்த கண்காட்சியில் பலவிதமான ரோபோக்கள் அறிமுகம் செய்யப்பட்டன. அதில் ஒன்றுதான் வலியை உணரும் ரோபோ. ரோபோ நோயாளியாக இது அறிமுகம் செய்யப்பட்டிருப்பதால் இதற்கு தனியே பெயரும் சூட்டப் பட்டுள்ளது. சிம்ராய்டு என்பது இதன் பெயர்.

அழகான இளம்பெண்ணை போல வடிவமைக்கப்பட்டுள்ள இந்த ரோபோ, பல் மருத்துவ மாணவர் களுக்காக உருவாக்கப்பட்டுள்ளது. இந்த ரோபோவால் பல்வலியை உணர்ந்து வெளிப்படுத்த முடியும்.

பல்வலிக்கு சிகிச்சை பெறும் நோயாளி எப்படி வலியால் துடிப்பாரோ அந்த உணர்வை இந்த ரோபோ வெளிப்படுத்தும். பயிற்சி மருத்துவர்கள் இந்த ரோபோவை கொண்டு பயிற்சியில் ஈடுபடும் போது, நோயாளிகள் வலியை எப்படி உணர்வார்கள் என்பது குறித்த அனுபவத்தை பெற முடியும் என்று கருதப்படுகிறது.

மருத்துவர்கள் நோயாளிகளின் வலியை உணர்வது நல்ல விஷயம்தான். ஆனால் அதற்காக நோயாளிகளை கஷ்டப்படுத்தாமல் இந்த பணியை செய்வதற்காக என்று ஒரு ரோபோவை உருவாக்கி உள்ளனர். விரைவில் இந்த ரோபோ விற்பனைக்கு வரும் என்று எதிர்பார்க்கப்படுகிறது.

பல் மருத்துவர்கள் நோயாளிகளின் உணர்வை நன்றாக புரிந்து கொண்டு அவர்களுக்கு சிறந்த சிகிச்சையை அளிக்க இந்த ரோபோ நோயாளி உதவும் என்றும் கருதப்படுகிறது.
இந்த ரோபோ கண்காட்சியில் மேலும் பல வித்தியாசமான ரோபோக்களும் அறிமுகம் செய்யப்பட்டன. அவற்றில் ஒன்று வீட்டு வேலையில் கைகொடுக்கக் கூடிய ரோபோ சேவகன்.

இந்த ரோபோ பல்வேறு விதமான வீட்டு வேலைகளை செய்து முடிக்கும் திறன் கொண்டதாக இருக்கிறது. அதோடு மனிதர்கள் மீது மோதிக் கொண்டால் அதனை உணரும் ஆற்றலும் இந்த ரோபோவுக்கு உண்டு.

வயதானவர்களை கைகொடுத்து தூக்கி விடுவது போன்ற சேவைகளையும் இந்த ரோபோ செய்யும் திறன் படைத்தது. ஜப்பானில் வயதானவர்கள் அதிக எண்ணிக்கையில் இருப்பதாலும் அவர்களின் தனிமை உணர்வை போக்க ஏற்கனவே ரோபோக்கள் பெருமளவில் பயன்படுத்தப்பட்டு வரும் நிலையில் மற்றுமொரு புதிய துணைவனாக இந்த ரோபோ வந்திருப்பதாக கருதப்படுகிறது.

டோக்கியோவை சேர்ந்த வசேடா பல்கலைக்கழகம் இந்த ரோபோவை வடிவமைத்துள்ளது. டூவன்டிஒன் என்று இதற்கு பெயரிடப்பட்டுள்ளது. இந்த ரோபோ சந்தைக்கு விற்பனைக்கு வர மேலும் பல ஆண்டுகள் ஆகும் என்று கருதப்படுகிறது.

அநேகமாக 2015 ஆம் ஆண்டு வாக்கில் இந்த ரோபோ விற்பனைக்கு வரும். அதற்கு முன்பாக இந்த ரோபோ மேலும் மேம்படுத்தப்பட உள்ளது. இந்த ரோபோ காலை உணவையும் பரிமாறக் கூடிய திறன் படைத்தது.

இந்த கண்காட்சியில் மேலும் பல ரோபோக்கள் அரங்கேற்றப்பட்டாலும் இந்த கண்காட்சிக்கு தொடர்பில்லாத ஒரு வித்தியாசமான ரோபோவை பற்றி தெரிந்து கொள்ளலாம். ரோபோ கித்தார் எனும் பெயர் அறிமுகம் செய்யப்பட்டுள்ள தானியங்கி கித்தார் அது. இந்த கித்தாரில் என்ன விசேஷமென்றால் அது தன்னைத்தானே ஸ்ருதி சேர்த்துக் கொள்ளும் என்பதுதான்.

கித்தாரை இயக்குவதில் தேர்ச்சி இல்லாதவர்கள் இதனை பயன்படுத்துவது எளிது. இசைக்கப்படும் பாடலுக்கு ஏற்ப அது தன்னைத்தானே ஸ்ருதி அமைத்துக் கொள்ளும்.
கிப்சன் எனும் ஆய்வாளர் 15 ஆண்டு கால ஆய்வின் முயற்சியாக இந்த ரோபோ கித்தாரை வடிவமைத்துள்ளார்.

முதல் கட்டமாக சுமார் 4 ஆயிரம் கித்தார்கள் விற்பனைக்கு வரவுள்ளன. அடுத்த ஆண்டு துவக்கத்தில் இது விற்பனைக்கு வருகிறது. இசைப் பிரியர்கள் மத்தியில் இது பெரும் வரவேற்பை பெறும் என்று எதிர்பார்க்கப்படுகிறது.
——

வயலின் இசைக்கும் ரோபோ

ஒரு பக்கம் இயந்திரமயம், மறுபக்கம் இசைமயம். ஜப்பானிய கார் தயாரிப்பு நிறுவனமான டொயோட்டோவின் சமீபத்திய அறிமுகத்தை இப்படி வர்ணிப்பது பொருத்தமாக இருக்கும். டொயோட்டோ நிறுவனம் அண்மையில் அறிமுகம் செய்துள்ள வயலினை இசைத்து காட்டக்கூடிய இசை மனிதனாக இருக்கிறது.
.
மனிதர்களுக்கு நிகராக அதனால் வயலின் வாசிக்க முடியும் என்று சொல்ல முடியாவிட்டாலும், இசை மயமான ரோபோ என்று சொல்லக் கூடிய வகையில் அது அற்புதமாக வயலின் இசைக் கருவியின் ஒரு பாடலை இசைத்து காண்பித்திருக்கிறது.

டோக்கியோ நகரில் உள்ள டொயோட்டோ ஷோரூமில் காட்சிக்கு வைக்கப்பட்டுள்ள இந்த ரோபோ தனது இயந்திர விரல்களால் வயலின் கருவியை வாசிப்பது புதிய அனுபவமாகவே இருக்கிறது.

ரோபோ ஆய்வு மற்றும் தயாரிப்பில் ஜப்பான் முன்னிலை வகிக்கிறது. புதிய புதிய ரோபோக்கள் அந்நாட்டில் அறிமுகம் செய்யப்படுகின்றன. இந்த ரோபோக்களை கொஞ்சம் உன்னிப்பாக கவனித்திருந்தீர்கள் என்றால், பெரும்பாலான கார் தயாரிப்பு நிறு வனங்கள் இதன் பின்னே இருப்பதை நீங்கள் உணர்ந்திருக்கலாம்.

அந்த வகையில் டொயோட்டோ நிறுவனம் ரோபோ தயாரிப்பில் கொஞ்சம் தாமதமாக அறிமுக மானதாக கருதப்படுகிறது. ஆனால் போட்டி யாளர்களுக்கு சவால் விடக் கூடிய அளவுக்கு திறமை படைத்த வயலின் வாசிக்கும் ரோபோவை அந்நிறுவனம் அறிமுகம் செய்திருக்கிறது.

டொயோட்டோ நிறுவனம் ஏற் கனவே வீடுகளில் பயன் படுத்தக் கூடிய ரோபோக்களை பெரிய அளவில் அறிமுகம் செய்திருக்கிறது. அதோடு வயதானவர்களுக்கு உதவக் கூடிய ரோபோக்களும் இந்நிறுவனத் தால் தயாரிக்கப் பட்டுள்ளது.

கார் தயாரிப்பு நிறுவனங்கள் கார்களை விட்டுவிட்டு ரோபோ தயாரிப்பில் ஈடுபடுவது வியப்பை அளிக்கலாம். முதல் விஷயம், கார் தயாரிப்பு நிறுவனங்கள் தொடர்ந்து கார் தயாரிப்பில் கவனம் செலுத்திக் கொண்டே ரோபோ வடிவமைப்பிலும் ஈடுபட்டு வருகின்றன. இரண்டுக்கும் தொடர்பு இருக்கிறது என்பதே குறிப்பிடத்தக்க விஷயம்.

தொழில் வளர்ச்சியில் முன்னிலையில் இருக்கும் ஜப்பான் இயந்திர மயமாக்கலிலும் பல படி முன்னே இருப்பது தெரிந்த விஷயம்தான். அந்நாட்டு தொழிற்சாலைகள் பல இயந்திரமயமாகிவிட்டன. அதாவது தொழிற்சாலைகளில் மேற்கொள்ளப்படும் பல செயல்கள் ரோபோக்களால் செய்யப்பட்டு வருகின்றன.

அதிலும் குறிப்பாக கார் தயாரிப்பு நிறுவனங்கள் ரோபோக் களை அதிக அளவில் பயன்படுத்தி வருகின்றன. உற்பத்தி திறனை பெருக்கும் வகையில் கார் வடிவமைப்பு குறித்த அநேக விஷயங் களை சிறப்பாக செய்து முடிப்பதற்கு ஏற்ற ரோபோக்கள் உருவாக்கப்பட்டுள்ளன.

ரோபோ பயன்படுத்துவதில் இருக்கும் நிபுணத்துவத்தை கொண்டு வாழ்க்கையின் மற்ற அம்சங் களிலும் கைகொடுக்கக் கூடிய ரோபோக்களை உருவாக்கி அறிமுகம் செய்ய கார் தயாரிப்பு நிறுவனங்கள் விரும்பு கின்றன. இதன் விளைவாகவே புதிய புதிய ரோபோக்கள் அறிமுகம் செய்யப்பட்டு வருகின்றன.

ஹோண்டா நிறுவனம் தான் இதனை முதலில் துவக்கி வைத்தது. 1986ம் ஆண்டே அந்நிறுவனம் அசிமோ ரோபோவை அறிமுகம் செய்தது. தற்போது டொயோட்டோ நிறுவனமும் அந்த போட்டியில் சேர்ந்து கொண்டுள்ளது. ரோபோ பயன் படுத்துவதில் தனக்குள்ள நிபுணத் துவத்தை பயன்படுத்திக் கொண்டு சிறந்த ரோபோக்களை உருவாக்கி சந்தைப்படுத்த திட்ட மிட்டிருப்பதாக டொயோட்டோ நிறுவனத் தலைவர் வாட்னாபே தெரிவித்துள்ளார்.

மிகப்பெரிய அளவில் ரோபோக்களை விற்பனை செய்ய நிறுவனம் விரும்புவதாகவும் அவர் கூறியுள்ளார். 2010ம் ஆண்டு வாக்கில் பல செயல்களில் கை கோர்த்து நிற்கக்கூடிய ரோபோக்கள் விற்பனை செய்யப் படும் என்று அவர் கூறியிருக்கிறார்.

ரோபோ தயாரிப்புக்கு ஜப்பானிய அரசு அளித்து வரும் ஊக்கமும் இதற்கு ஒரு காரணமாக இருக்கிறது. ரோபோ தொடர்பான ஆய்வுப் பணிகளை ஊக்குவிக்க ஜப்பானிய அரசு பெரிதும் விரும்புகிறது. ரோபோ வடிவமைப்பை தனது நாட்டின் தேசிய தொழிலாக கருதி ஜப்பானிய அரசு பல சலுகைகளை அளித்து வருகிறது. இதன் விளைவாகவும் வர்த்தக நிறுவனங்கள் ரோபோ ஆய்வில் ஈடுபட்டு வருகின்றன.

ரோபோக்களின் மூலம் தங்களது நிறுவனத்தின் தனித்தன்மை மற்றும் தொழில்நுட்ப சிறப்புகளை பறைசாற்ற முடியும் என்று டொயோட்டோ உள்ளிட்ட வர்த்தக நிறுவனங்கள் கருதுகின்றன.

—————

என்னருகே நிழல் இருந்தால்..

உங்களை ஒரு கல்லூரி மாணவராக கற்பனை செய்து கொள்ளுங்கள். அதிலும் ஜப்பானில் உள்ள கல்லூரி ஒன்றில் படிப்பதாக நினைத்துக் கொள்ளுங்கள்.  அந்த கல்லூரி விடுதி அறையில் நீங்கள் அமர்ந்து படித்துக் கொண்டி ருக்கிறீர்கள். உங்கள் அருகே விளக்கு ஒன்று எரிந்து கொண்டிருக்கிறது. அறைக்கு வெளிச்சத்தை தருவதற் கென்று இருக்கும் விளக்கிற்கும் இந்த விளக்கிற்கும் எந்த தொடர்பும் இல்லை

இந்த விளக்கை நீங்கள் அடிக்கடி பார்த்து கொண்டிருக்கிறீர்கள். அதன் உள்ளே நிழல் உருவம் ஒன்று அசைந்து கொண்டே இருக்கிறது. அந்த அசைவு உங்களை புன்னகைக்க வைக்கிறது. ஒருவித திருப்தியை, மகிழ்ச்சியை தருகிறது.

சற்று நேரம் படுத்துக் கொண்டி ருக்கிறீர்கள். தூக்கம் கண்ணை சுற்றுகிறது. கொட்டாவி விட்டபடி புத்தகத்தை மூடி வைக்க போகும் போது விளக்கில் இருக்கும் நிழலை பார்த்து விட்டு, மீண்டும் படிக்க உட்காருகிறீர்கள். இது என்னடா மாயமாக இருக்கிறதே என நினைக்க வேண்டாம். நிழல் மூலம் நண்பர்களோடு தொடர்பு கொள்ள ஜப்பானிய மாணவர் ஒருவர் உருவாக்கியுள்ள நவீன தொழில்நுட்ப சாதனத்தால் சாத்தியமாக்கக் கூடிய அற்புத காட்சிதான் இது.

நண்பர்களாக இருக்கும் எல்லோருக் கும் அதிலும் குறிப்பாக கல்லூரி பருவத்தில் இருப்பவர் களுக்கு தங்களுடைய நெருக்கமான நண்பர் இப்போது என்ன செய்து கொண்டிருப் பார் என்று அறியும் ஆர்வம் சமயங்க ளில் ஏற்படும். அது போன்ற நேரத்தில் நண்பரை பார்க்க அல்லது தொடர்பு கொள்ள தோன்றும். செல்போன் யுகத்தில் இதுவொரு பெரிய விஷயமல்ல.

ஆனால் இதெல்லாம் விட இந்த நிழல் யுக்தி மிகவும் அற்பதமானது. டெலி ஷேடோ எனும் பெயரில் இதனை ஜப்பானிய மாணவரான யசுடா என்பவர் உருவாக்கி இருக்கிறார்.
மேலே பார்த்த காட்சியில் இருந்த அலங்கார விளக்குதான் இந்த சாதனத்தின் முக்கிய பகுதி. இந்த விளக்கில் தெரிந்த நிழல் உருவம் எங்கேயோ இருந்த உங்கள் நண்பரின் தோற்றம்.

நண்பர் தனது அறையில் என்ன செய்து கொண்டிருக்கிறார் எனும் காட்சி நிழல் உருவாக இந்த விளக்கில் தெரிந்து கொண்டே இருக்கும். அதனை பார்ப்பதன் மூலமாக நண்பர் என்ன செய்கிறார் என்பதை உணர்வ தோடு, அவர் அருகாமையில் இருக்கும் உணர்வையும் பெறலாம்.

நண்பர் படித்துக் கொண்டிருக் கிறாரா அல்லது கனவு காண்கிறாரா, பாட்டு கேட்கிறாரா போன்ற விவரங்களை விளக்கை பார்த்தே நீங்கள் தெரிந்து கொள்ளலாம். இது வீடியோ யுகமும் என்பதால் நண்பர்களின் அருகாமையை உணர வேண்டுமென்று நினைப்பவர்கள் வீடியோ காட்சி மூலம் அல்லது இன்டெர் நெட்டில் பொருத்தப்பட்ட வெப்கேம் மூலம் நண்பர்கள் செய்வதை பார்க்கலாம்தான்.

ஆனால் அதற்கும் இந்த நிழல் யுக்திக்கும் ஒரு முக்கிய வேறுபாடு இருக்கிறது. வீடியோ காட்சியை பார்க்கும்போது நீங்கள் அதிலேயே மூழ்கி உங்கள் வேலை தடைபட்டு விட வாய்ப்பு உள்ளது. ஆனால் இந்த நிழல் விளக்கு உங்கள் வேலையில் எந்தவிதத்திலும் குறுக்கிடாது. சொந்த வேலையை கவனித்தபடி நண்பர்க ளின் செயலை நிழல் வடிவில் தேவைப் படும்போது பார்த்துக் கொள்ளலாம்.

இதனை உருவாக்கிய மாணவர் யசுடா, புகைப்படத்திற்கும், வீடியோ காட்சிக்கும் இடைபட்ட சாதனம் இது என்று கூறுகிறார். புகைப்படத்தில் நினைவு மட்டும்தான் இருக்கும். வீடியோ காட்சியில் சகலமும் இருக்கும். ஆனால் வேலையை பாதிக்கும். இந்த இரண்டும் இடைபட்ட வகை யில் நண்பர்களின் அருகாமையை இடைஞ்சல் இல்லாத வகையில் நிழல் விளக்கு ஏற்படுத்துகிறது.

ஜப்பானிய வீடுகளில் திரை சீலை சுவர்கள் அமைக்கும் பழக்கம் பல நூற்றாண்டுகளாக இருந்து வருகிறது. இந்த திரை சீலை சுவர்களை ஜப்பா னில் ஷோஜி என்று குறிப்பிடுகின்றனர். பெரும்பாலும் காகிதத்தாலான இந்த சுவர்கள் மெலிதாக இருக்கும். அறையின் தடுப்பாக இருப்பதோடு மறுபக்கத்தில் இருப்பவர்கள் செய்வதை பார்க்கக் கூடிய வகையில் இருக்கும். ஆனால் முழு உருவமும் தெரியாது. நிழல் உருவம் மட்டுமே தெரியும்.

அடுத்தவரின் அந்தரங்கத்தில் ஊடுருவாமல் அவர் செய்வதை தெரிந்து கொள்ள இந்த திரை சீலை சுவர் பயன்படுவதாக ஜப்பானியர்கள் கருதுகின்றனர். இந்த சுவற்றை பார்த்துதான் யசுடாவுக்கு நிழல் விளக்கை வடிவமைக்கும் யோசனை பிறந்ததாம். தொலை தூரத்தில் இருக்கும் நண்பர் களின் செயலை நிழல் விளக்கில் கார்ட்டூன் போல பார்த்து ரசிக்கும் வகையில் இந்த நிழல் விளக்கை வடிவமைத்துள்ளார்.

இந்த விளக்கின் கீழே ஒரு புரஜக்டர் இருக்கிறது. அந்த புரஜக்டரில் நண்பர் அறையில் பொருத்தப்பட்டுள்ள வீடியோ காமிராவில் பதிவாகும் காட்சி கள் வந்து சேரும்.
அதிலுள்ள விசேஷ சாப்ட்வேர் வீடியோ காட்சியை நிழல் உருவமாக மாற்றி விளக்கில் மின்ன வைக்கும். ஒரே சமயத்தில் நான்கு நண்பர் களோடு இந்த நிழல் விளக்கு மூலம் தொடர்பு கொள்ளலாம்.

சோதனை முயற்சியாக இந்த நிழல் விளக்கை யசுடா தயார் செய்திருக் கிறார். நடைமுறையில் இது பயன் பாட்டுக்கு வருமா? என்பது ஜப்பானி யர்கள் இதன் தேவையை உணர்வதை பொருத்தே இருக்கிறது.