Category Archives: இதர

திரைப்பட தேடியந்திரங்கள்-1

ஹாலிவுட் திரைப்படங்கள் தொடர்பாக மேற்கோள் காட்டப்படும் வசனங்களை தேட கியூஓடிபி (http://www.quodb.com/ ) தளம் வழி செய்கிறது. மனதில் பதிந்த ஒரு வசனம் எந்த படத்தில் இடம்பெற்றது எனும் தகவல் தெரிய வேண்டும் என்றால், அந்த வசனத்தை இந்த தளத்தில் சமர்பித்து தேடலாம். முழு வசனமும் தெரிய வேண்டும் என்றில்லை, வசனத்தில் இடம் பெற்ற ஒரு வார்த்தையை மட்டும் சமர்பித்து தேடலாம்.

இந்த தேடலுக்கு பொருத்தமான திரைப்படங்களின் விவரம் பட்டியலிடப்படுகிறது. படத்தில் வசனம் இடம்பெற்ற சூழலும் சுட்டிக்காட்டப்படுகிறது. அப்படியே திரைப்பட தகவல களஞ்சியமான ஐ,எம்டிபி தகவலுடனும் இணைப்பு தரப்படுகிறது.

திரைப்பட பிரியர்களுக்கு பயனுள்ள சேவை. ஆங்கில பட வசனம் தொடர்பான சந்தேகம் வரும் போது கைகொடுக்கும்.

இந்த தளத்தில் உறுப்பினராக சேர்ந்தால், வசனங்களை தேடுவதோடு, அவற்றில் பிடித்தவற்றை பட்டியலிடுவது, புதிய வசனங்களை சமர்பிப்பது, ஏற்கனவே சமர்பிக்கப்பட்டவற்றில் திருத்தங்களை செய்வது போன்றவற்றையும் மேற்கொள்ளலாம்.

தேடியந்திர முகவரி: http://www.quodb.com/

பி.கு: தயவுசெய்து தமிழில் இது போன்ற தளம் இருக்கிறதா? என கேட்க வேண்டாம்!

 

பொய்யாக ஒரு தேடியந்திரம்!

வருமான வரி தாக்கல் செய்ய உதவும் இணையதளங்கள்

பொருட்களை வாங்குவது, வங்கி கணக்கை இயக்குவது, மாதாந்திர பில் தொகைகளை செலுத்துவது, டிக்கெட் முன்பதிவு செய்வது என இணையம் மூலமே பல தேவைகளை நிறைவேற்றிக்கொள்ள முடிகிறது. இந்த வரிசையில் இணையம் மூலம் வருமான வரித்தாக்கல் செய்வதை எளிதாக்கும் இணையதளங்களும் அநேகம் இருக்கின்றன.

பெரும்பாலான இந்தியர்கள் வருமான வரி கணக்கு தாக்கல் செய்வதில்லை. வருமான வரி செலுத்தும் அளவுக்கு வருமானம் வருவதில்லை என்பதில் துவங்கி இதற்கு பல காரணங்கள் இருக்கலாம். வருமான வரி வரம்புக்குள் வராவிட்டாலும் கூட, வருமான வரி கணக்கு தாக்கல் செய்வது நல்லது என்கின்றனர். அவசியம் என்றும் வரி ஆலோசகர்கள் வலியுறுத்துகின்றனர். முறையாக வரிக்கணக்கை தாக்கல் செய்வது தனிநபர்களுக்கும் நல்லது , அரசுக்கும் நல்லது.
வருமான வரி கணக்கை தாக்கல் செய்வது வங்கி கடன் பெறுவது போன்ற விஷயங்களில் உதவியாக இருக்கும். அதே போல வரி செலுத்தும் வரம்பிற்குள் வருபவர்கள் தங்கள் வரி சேமிப்பை முறையாக திட்டமிடவும் உதவும்.
வரித்தாக்கல் செய்வது சிக்கலானது என நினைத்து தயங்குபவர்களும் இருக்கின்றனர். வரித்தாக்கல் தொடர்பான விஷயங்களை நன்கறிந்தவர்களும் கூட, இதற்கென சரியாக நேரம் ஒதுக்க முடியாமல் தடுமாறுவதும் உண்டு. எப்படி இருந்தாலும் சரி, வருமான வரித்தாக்கல் செய்வதில் உதவுவதற்கு என்றே பல இணையதளங்கள் இருகின்றன தெரியுமா? இந்த தளங்கள் உதவியோடு இணையம் மூலமே எளிதாக வருமான வரிக்கணக்கை தாக்கல் செய்யலாம்.
இணையம் மூலம் வரித்தாக்கல் என்று வரும் போது, வருமானவரித்துறையின் அதிகாரபூர்வ தளத்தையே கூட நாடலாம். இதில் இ-பைலிங் எனப்படும் இணையம் மூலம் வரித்தாக்கல் செய்வதற்கான தனிப்பகுதி இருக்கிறது: https://incometaxindiaefiling.gov.in/
வரித்தாக்கல் செயல்முறையை வழிகாட்டும் வகையில் இந்த பகுதி அமைந்திருந்தாலும், புதியவர்களுக்கும், வரித்தாக்கல் நடைமுறையில் அதிக பரிட்சயம் இல்லாதவர்களுக்கும் அடுத்தடுத்த இணைப்புகளாக அமைந்திருகும் இந்த வழிகாட்டுதல் குழப்பத்தை ஏற்படுத்தலாம்.
வரித்தாக்கலுக்கான பிரத்யேக இணையதளங்கள் இப்படி குழம்பி நிற்க வேண்டிய அவசியம் எல்லாமல் மிக எளிதாக வரித்தாக்கல் செய்ய வழி செய்கின்றன. இந்த வகை தளங்களில் கிளியர்டாக்ஸ், டாக்ஸ்பேனர், டாக்ஸ்மைல், மைஐடிரிட்டர்ன் உள்ளிட்ட தளங்கள் பிரபலமாக இருக்கின்றன.
இவற்றில் பரவலாக அறியப்பட்ட தளம் என கிளியர்டாக்சை (cleartax.in ) குறிப்பிடலாம். வரித்தாக்கல் செய்ய விரும்புகிறவர்களுக்கு மிக எளிதாக வழிகாட்டும் இடைமுகத்தை கொண்டிருப்பது இதன் சிறப்பாக கருதப்படுகிறது. இந்தியாவில் இணையம் மூலம் வரித்தாக்கல் செய்வதில் மிக எளிமையான சேவை என்றும் இது தன்னை வர்ணித்துக்கொள்கிறது. பயனாளிகள் சமர்பிக்கும் தகவல்கள் அனைத்தும் பாதுகாப்பாக கையாளப்படுவதாகவும் உறுதி அளிக்கிறது. அதைவிட முக்கியமாக அடிப்படை சேவை இது இலவசமாக வழங்குகிறது. வரித்தாக்கலுக்கு பிரதானமாக தேவைப்படும் படிவம் 16 – ஐ சமர்பித்தவுடன் ஏழு நிமிடங்களுக்கும் குறைவாக வரித்தாக்கல் செய்துவிடலாம் என குறிப்பிடப்பட்டுள்ளது. ஆனால் அதற்கு முன் இதில் உறுப்பினராக பதிவு செய்து கொள்ள வேண்டும்.
வரித்தாக்கலுக்காக தனியே எந்த தகவல்களையும் உள்ளீடு செய்ய வேண்டிய அவசியமில்லை. உரிய படிவங்களை பதிவேற்றினால் தானாக வரித்தாக்கல் நடைமுறையை கவனித்துக்கொள்கிறது. வரிமான வரி தாக்கல் செய்வபவரின் பிரிவிற்கு ஏற்ப பொருத்தமான வரித்தாக்கல் படிவத்தையும் இந்த தளமே தேர்வு செய்து கொள்கிறது.
வரித்தாக்கல் தொடர்பாக ஏதேனும் சந்தேகங்கள் இருந்தாலும், இந்த தளத்தின் மூலம் வல்லுனர்களை தொடர்பு கொண்டு விளக்கம் பெறலாம். வரித்தாக்கலில் வல்லுனர்கள் வழிகாட்டுதல் தேவை என நினைத்தால் அதற்கான கட்டணச்சேவையையும் நாடலாம். தனிநபர்கள் மட்டும் அல்லாமல் வர்த்தக நிறுவனங்களும் இந்த சேவையை பயன்படுத்திக்கொள்ளலாம். வெளிநாட்டு வாழ் இந்தியர்களும் இந்த சேவையை அணுகலாம்.
இந்த தளம் மூலம் இது வரை பத்து லட்சம் பேருக்கு மேல் வரித்தாக்கல் செய்திருப்பதாகவும் குறிப்பிடப்பட்டுள்ளது.
வரித்தாக்கல் செய்வது தவிர வருமான வரி தொடர்பான விஷயங்களில் தெளிவு ஏற்படுத்த உதவும் பகுதிகளும் இடம்பெற்றுள்ளன. வரிசேமிப்பிற்கான 80சி பிரிவின் கீழ் வருமான வரிச்சலுகைகளை பெற முதலீட்டு வாய்ப்புகளை எப்படி பயன்படுத்திக்கொள்வது என வழிகாட்டும் பகுதியும் இருக்கிறது.
வருமான வரி கணக்கிட உதவும் கால்குலேட்டர்கள் உள்ளிட்ட சாதனங்களும் இருக்கின்றன. வருமான வரி தாக்கல் செய்வது எப்படி? என்பது உள்ளிட்ட பலவேறு வழிகாட்டி கட்டுரைகளும் பயனுள்ளதாக அமைந்துள்ளன. இவைத்தவிர , வெளிநாட்டு வாழ் இந்தியர்களுக்கான வழிகாட்டி உள்ளிட்டவையும் உள்ளன. வருமான வரி விசயங்கள் தொடர்பான பயனுள்ள தகவல்களை அளிக்கும் வலைப்பதிவு பகுதியும் உங்களை கவரலாம்.
கடந்த நவம்பர் மாதம் அறிமுகம் செய்யப்பட்ட பண மதிப்பு நீக்க நடவடிக்கை தொடர்பான விளக்கங்களும் இடம்பெற்றுள்ளன. தொடர்ந்து புதிய அம்சங்கள் மற்றும் சேவைகளை அறிமுகம் செய்து கொண்டே இருப்பதும் இந்த தளத்தின் சிறப்பம்சமாக இருக்கிறது. கிளியர்டாக்ஸ் சார்பில் செயலி வடிவமும் அறிமுகம் செய்யப்பட்டுள்ளது.
கிளியர் டாக்ஸ் வருமான வரித்தாக்கல் தளங்களில் பிரபலமாக கருதப்படுவதோடு, இந்தியாவின் பிரகாசமான ஸ்டார்ட் அப் நிறுவனங்களில் ஒன்றாகவும் கருதப்படுகிறது. ஸ்டார்ட் அப் நிறுவனங்களுக்கான பயிற்சி பள்ளி என வர்ணிகப்படும் அமெரிக்காவின் ஒய் காம்பினேட்டர் ஸ்டார்ட் அப் திட்டத்தில் தேர்வு செய்யப்பட்டு நிதி பெற்ற பெருமையும் உரியது.
கிளியர் டாக்ஸ் நிறுவனத்தின் பின்னே சுவாரஸ்மான கதையும் உள்ளது. இதன் நிறுவனரான அர்சித் குப்தா தில்லியைச்சேர்ந்தவர். கவுகாத்தி ஐஐடியில் பொறியியல் பட்டம் பெற்றவர் அதன் பிறகு அமெரிக்காவில் மேற்படிப்பு பயிலச்சென்று அங்கேயே நல்ல வேலையிலும் சேர்ந்துவிட்டார். இதனிடயே கடந்த 2010 ஆம் ஆண்டு இந்தியா திரும்பியவர், வருமான வரித்தாக்கல் செய்வதில் உள்ள சிக்கல்களை கண்டு திகைத்துப்போனார். இணையம் மூலம் எளிதாக வரித்தாக்கல் செய்வதற்கான வழி இருந்தால் எப்படி இருக்கும் என யோசித்தவர் அதற்கான இணையதளத்தையும் தானே துவக்க தீர்மானித்தார். இந்த எண்ணத்துடன் அமெரிக்காவில் இருந்து தாயகம் திரும்பி வந்து கிளியர் டாக்ஸ் தளத்தை துவக்கினார். வரித்தாக்கலுக்கு தேவையான மென்பொருள் உள்ளிட்டவற்றை உருவாக்கினார். அவரது தந்தை தொழில்முறை தணிக்கையாளராக இருந்தது அவருக்கு ஊக்கமாகவும், உதவியாகவும் அமைந்தது.
2011 ல் இந்த தளம் அறிமுகமானது. அதன் எளிமையான வடிகாட்டும் தன்மைக்காக தொடர்ந்து இணையவாசிகளின் ஆதரவை பெற்று வளர்ச்சி அடைந்து வருகிறது.
டாக்ஸ்பேனர் (TaxSpanner ) தளம் கிளியர்டாக்சிற்கு சில ஆண்டுகள் முன்னதாக துவக்கப்பட்டது. தில்லியை சேர்ந்த அங்கூர் சர்மா உள்ளிட்ட பொறியியல் பட்டதாரிகள் ஒன்றிணைந்து இந்த தளத்தை துவக்கினர். 2006 ம் ஆண்டு அரசு மின்னணு நிர்வாகத்தை ஊக்குவித்து வந்த நிலையில், இணையம் மூலமே வரித்தாக்கல் செய்வதையும் ஊக்குவிக்கத்துவங்கியது. பொதுவாக அந்த கால கட்டத்தில் தனிநபர்கள் இந்த வசதியை பயன்படுத்துவது மிகவும் அரிதாக இருந்தது. இந்நிலையில் தான் தனிநபர்களும் இணையம் மூலம் வரித்தாக்கல் செய்ய வழிகாட்டும் சேவையாக டாக்ஸ்பேனர் அறிமுகமானது. சுய தொழில் முனைவோர் வரித்தாக்கல் செய்வதற்கான வசதியையும் அறிமுகம் செய்த இந்த தளம், செல்போன் மூலம் வரித்தாக்கல் செய்யவும் வழி செய்கிறது. இதற்கான வசதி 2011 ல் அறிமுகமானது.
ஆனால் ஒன்று இந்த தளம் இலவச சேவை வழங்குவதில்லை. எல்லாமே கட்டண சேவை தான். 499 ரூபாயில் இருந்து இதன் கட்டண சேவை துவங்குகிறது. அதிக கட்டணத்திற்கு வல்லுனர்கள் வடிகாட்டுதலும் பெறலாம். எளிதான வழிகாட்டுதலோடு,இணையம் வடி அரட்டை மூலமாக விளக்கம் அளிப்பது உள்ளிட்ட வசதிகளும் இருக்கின்றன. இந்த தளத்தின் வடிவமைப்பு அத்தனை நேர்த்தியானது என்று சொல்ல முடியாவிட்டாலும், இந்த சேவை சிறப்பாகவே இருப்பதாக பரவலாக கருதப்படுகிறது.
இதே டாக்ஸ்மைல் , டாக்ஸ் மேனேஜர்.இன் , மைஐடிரிட்டர்ன் உள்ளிட்ட தளங்களும் வரித்தாக்கல் சேவைகளை அளிக்கின்றன. மைஐடிரிட்டர்ன் தளம் மிகவும் எளிதாக ஒவ்வொரு படியாக வடிகாட்டும் வகையில் உள்ளது. டாக்ஸ்மேனேஜர் தளம் பல்வேறு பிரிவினருக்கு தனித்தனியே சேவை அளிக்கும் வகையில் அடர்த்தியான அம்சங்களோடு அமைந்துள்ளது. அடிப்படை சேவை இலவசம். கட்டணச்சேவையும் இருக்கின்றன.
எச்.அண்ட் ஆர் பிளாக், டாக்ஸ் ஆக்ட், டாக்ஸ் லேயர் உள்ளிட்ட வேறுபல தளங்களும் இருக்கின்றன. ஆக வருமான வரித்தாக்கல் செய்வதை ஒரு சுமையாக கருத வேண்டாம். வரித்தாக்கலுக்கு வழிகாட்டும் தளங்கள் உங்களுக்கு உதவ தயாராக இருக்கின்றன. மேலும் வரிமான வரி தொடர்பான தெளிவை பெறவும் இந்த தளங்களை நாடலாம்.

0—

நன்றி. வணிகமணியில் எழுதும் இனி எல்லாம் இணையமே தொடரில் இருந்து..

இணைய யுகத்தின் இளம் சாதனையாளர்கள்

img005நம் காலத்து நாயகர்கள் புத்தகம் வெளியாகி இருக்கிறது. இணைய யுகத்தின் இளம் சாதனையாளர்களின் அறிமுக சித்திரங்களின் தொகுப்பு இந்த புத்தகம். இதே தலைப்பில் புதிய தலைமுறை கல்வி இதழில் தொடராக வெளிவந்து, தற்போது புதிய தலைமுறை வெளியீடாக வந்திருக்கிறது.

யார் இந்த நாயகர்கள் என கேட்கலாம்? நவீன இணையத்தில் நாம் தவறாமல் பயன்படுத்தும் முன்னணி இணைய சேவைகளை உருவாக்கியவர்கள் இவர்கள்.

பெரும்பாலானோர் அறிந்த பேஸ்புக், வாட்ஸ் அப், ஸ்கைப், வேர்ட்பிர்ஸ், பிளாகர், இன்ஸ்டாகிராம், யூடியூப் உள்ளிட்ட சேவைகளை உருவாக்கியவர்கள் முதல், பரவலாக அறியப்படாத ஆனால் அனைவரும் அறிந்து கொள்ள வேண்டிய லைப்ரரிதிங், டக் டக் கோ, யெல்ப், பின்டிரெஸ்ட் உள்ளிட்ட சேவைகளை உருவாக்கியவர்கள் வரை பல இணைய சாதனையாளர்களை இந்த தொகுப்பின் மூலம் அறிமுகம் செய்து கொள்ளலாம்.

ஏர்பிஎன்பி, டிக், சவுண்ட்கிளவுட், டிராப்பாக்ஸ், பிளாகர், கிளவுட், டெலிஷியஸ், லிங்க்டுஇன், உபெர், டிவிட்ச், கிவா, கிக்ஸ்டார்ட்டர், ரெட்டிட், டம்ப்ளர், பயர்பாக்ஸ் என நவீன இணையத்தின் அடையாளமாக கருதப்படும் சேவைகளை உருவாக்கிய நாயகர்களாக இந்த பட்டியல் நீள்கிறது.

இந்த சேவைகள் அனைத்துமே இணையத்தின் ஆற்றலை புதுமையாக பயன்படுத்திக்கொள்ள முற்பட்டதன் மூலம் முன்னணி சேவையாக உருவானவை. இவை அனைத்துமே ஏதேனும் ஒரு வகையில் புரட்சிகரமானவையும் கூட! இணையம் மூலம் தொலைபேசி சேவையை பயன்படுத்த வழி செய்த ஸ்கைப், வீடியோக்களை எளிதாக பகிர வைத்த யூடியூப், சிக்கலான பிரவுசர் அனுபவத்தை எளிதாக்கிய பயர்பாக்ஸ், இணைய கடன் வழங்க வழி செய்த கிவா, இணைய நிதி திரட்டும் மேடையான கிக்ஸ்டார்ட்டர், செய்தி பகிர்வை ஜனநாயகமயமாக்கிய டிக்  என இவை அனைத்துமே ஏதேனும் ஒரு வகையில் புரட்சிகரமானவை.

இந்த புதுயுக இணைய சேவைகள் சமகால வாழ்க்கையில் ஏற்படுத்திருக்கும் தாக்கம் நினைத்து கூட பார்க்க முடியாதது. பேஸ்புக், யூடியூப் மட்டும் அல்ல, கோப்பு பகிர்வுக்கான டிராப்பாக்ஸ், தொழில்முறை வலைப்பின்னலான லிங்க்டுஇன் உள்ளிட்ட சேவைகளையும் நம்மால் பயன்படுத்தாமல் இருக்க முடியாது.

இந்த சேவைகளுக்கு பின்னே இருக்கும் சாதனையாளர்கள் இவற்றை எப்படி உருவாக்கினர் என்பதை அவர்களின் அறிமுக சித்திரம் விவரிக்கிறது. சேவைக்கான எண்ணம் உதித்த விதம், அதை செயல்படுத்துவதில் எதிர்கொண்ட சவால்கள், போராட்டங்களையும், தடைகளையும் வெற்றி கொண்ட விதம் என சுவாரஸ்யமாகவும், ஊக்கம் அளிக்கும் வகையில் இந்த சித்திரங்கள் அமைந்திருப்பதை உணரலாம்.img006

இவை வெறும் வர்த்தக வெற்றிக்கதைகளோ, தொழில் சாகசங்களோ கிடையாது. இவை தனிமனித புகழ்ச்சியும் அல்ல: இணையம் உண்டாக்கி தந்துள்ள எல்லையில்லா சாத்தியங்களையும், புதிய வாய்ப்புகளையும் இணம் கண்டு கொண்டதன் மூலம் அவற்றை நடைமுறை வாழ்க்கைக்கே ஏற்ப பயனுள்ள சேவையாக மாற்றித்தந்த முன்னோடிகளின் பதிவுகள் இவை.

பெரிய அளவிலான பண பலமோ, வலுவான பின்பலமோ இல்லாமல், தங்கள் மனதில் உதித்த எண்ணத்தின் ஆற்றலால் மட்டும் இந்த சேவைகளை உருவாக்கியவர்கள் ஜெயித்திருக்கின்றனர். இந்த எண்ணத்தை வெற்றிகரமாக மாற்றுவதில் அவர்கள் வெளிப்படுத்திய வேட்கையும், தொழில்நுட்ப புரிதலுமே வெற்றிக்கு வழி வகுத்திருக்கின்றன. இவர்கள் உருவாக்கிய நிறுவனங்கள் பல பெரிய ஜாம்பவான் நிறுவனங்களுக்கு சவால் விடும் அளவுக்கு வளர்ச்சி அடைந்திருக்கின்றன. ஆனால் இத்தகைய புதுமையான சேவையை உருவாக்குவது என்பது ஏற்கனவே வெற்றி பெற்றுள்ள எந்த பெரிய நிறுவனத்திற்கும் சாத்தியமாகவில்லை.  அதனால் தான் இவர்கள் நம் காலத்து நாயகர்களாக மின்னுகின்றனர்.

 

இணையமே நீ நலமா?

mozilla-release-internet-health-reportஇணையம் என்பது வெறும் தொழில்நுட்பம் அல்ல: அது ஒரு பொது வளம் என்பதை ஒப்புக்கொள்கிறீர்களா? ஆம் எனில் நீங்கள் அதன் ஆரோக்கியம் பற்றி கவலை கொண்டாக வேண்டும். இணையம் எந்த அளவு ஆரோக்கியமாக இருக்கிறது? அதற்கு பாதிப்பை ஏற்படுத்தும் விஷயங்கள் எவை? அவற்றை சரி செய்து இணைய ஆரோக்கியத்தை சீராக்குவது எப்படி? இது போன்ற கேள்விகளையும் பொறுப்புள்ள இணையவாசிகள் கவனத்தில் கொள்ள வேண்டும்.
இந்த கேள்விகளை அடிப்படையாக கொண்டு இணைய ஆரோக்கியத்தை அறிய வைப்பதற்கான முயற்சியில் மொசில்லா அமைப்பு இறங்கியுள்ளது. இது தொடர்பாக இணைய ஆரோக்கிய அறிக்கையின் முன்னோட்ட வடிவத்தை அந்த அமைப்பு வெளியிட்டுள்ளது. இந்த முயற்சியின் முக்கியத்துவம், தன்மைக்கேற்ப இந்த அறிக்கையும் ஓபன் சோர்ஸ் அடிப்படையில் வெளியிடப்பட்டுள்ளது. எனவே அதில் அனைவரும் பங்கேற்கலாம்; கருத்து தெரிவிக்கலாம், திருந்த்தலாம், மேம்படுத்தலாம்.
மொசில்லா அமைப்பை நீங்கள் அறிந்திருக்கலாம். இணையத்தின் நன்கறியப்பட்ட பிரவுசர்களில் ஒன்றான பயர்பாக்ஸ் பிரவுசரை நிர்வகிக்கும் அறக்கட்டளையாக விளங்கும் மொசில்லா, இணைய சுதந்திரம், செயல்பாடு, தனியுரிமை பாதுகாப்பு தொடர்பான தன்னார்வ செயல்களிலும் ஈடுபட்டு வருகிறது. இந்த முயற்சிகளின் தொடர்ச்சியாக அன்மையில் இணைய ஆரோக்கியத்தை அறியும் திட்டத்தை துவக்கியுள்ளது. இதன் முதல் கட்டமாக இணைய ஆரோக்கிய அறிக்கையை வெளியிட்டிருக்கிறது. இந்த அறிக்கை மூலமாக, இணையத்தில் ஆரோக்கியமாக இருக்கும் விஷயங்கள், ஆரோக்கியம் இல்லாமல் இருப்பவை குறித்து இணையவாசிகளுடன் உரையாடலில் ஈடுபட விரும்புவதாக மொசில்லா செயல் இயக்குனர் மார்க் சுர்மன், இது தொடர்பான பதிவில் குறிப்பிட்டுள்ளார். இணையத்தின் எதிர்காலம் பற்றியும் நம் மனதில் கொண்டாக வேண்டும் என்று அவர் குறிப்பிட்டுள்ளார்.
இணையம் துவக்கத்தில் எல்லோருக்குமானதாக இருந்தது என்றும், யாரும் எந்த கருத்தை வெளியிடக்கூடிய , எந்த செயலிலும் ஈடுபடக்கூடிய இடமாக இருந்தது என்றும், கூறியுள்ள சுர்மன், அதன் பிறகு நம்முடைய கூட்டு படைப்பாற்றல், கண்டுபிடிப்பு மற்றும் சுய வெளிப்பாட்டிற்கான உலகலாவிய மேடையாக உருவாகி இருப்பதாகவும் குறிப்பிட்டுள்ளார். ஆனால் பேஸ்புக் போன்ற ஒரு சில நிறுவனங்கள் தேடல், ஷாப்பிங், உரையாடல் போன்றவற்றில் ஆதிக்கம் செலுத்தும் நிலையில், வெப்காமிராக்கள் மீது பாட்கள் கொண்டு தாக்குதல் பெரும் தாக்குதல் நடத்தப்படும் நிலையில், நம்முடைய அளப்பரிய ஆற்றல் கொண்ட பொது வளமான இணையம் தொடர்ந்து பாதுகாப்பானதாக, நம்பகமானதாக நீடிக்க வாய்ப்புள்ளதா எனும் கேள்வி எழுதுள்ளதாகவும் குறிப்பிடுகிறார்.
நம்முடைய வாழ்க்கையில் இணையம் முழுவதும் சூழந்திருக்கும் நிலையில் இந்த கேள்வி மிகவும் முக்கியமானது என அவர் கருதுகிறார். இணையம் இப்போதைய சுற்றுச்சூழலாக உருவாகி இருப்பதால் அதன் ஆரோக்கியம் குறித்தும் கண்காணித்து கவலைகொண்டாக வேண்டும் என அவர் கூறுகிறார்.
இதற்காக தான் இணையவாசிகள் பங்கேற்போடு இணைய ஆரோக்கிய அறிக்கையை உருவாக்கும் முயற்சியில் மொசில்லா ஈடுபட்டுள்ளது. இணையத்தின் புதுமை, டிஜிட்டல் சமத்தும், மையமில்லா தன்மை, தனியுரிமை- பாதுகாப்பு , இணைய கல்வி ஆகிய ஐந்து அம்சங்களையும் இணைய ஆரோக்கியத்தின் முக்கிய அம்சமாக கருதி இவற்றின் தற்போதைய நிலை மற்றும் எதிர்கால கவலை குறித்த கருத்துக்களை முன்னோட்ட அறிக்கையில் மொசில்லா வெளியிட்டுள்ளது.
இணையம் என்பது எப்போதுமே எல்லோருக்குமான திறந்த மேடையாக இருக்க வேண்டும் என்ற கருத்து வலியுறுத்தப்பட்டுள்ளது. இணையத்தில் எல்லோருக்கும் சமமான வாய்ப்பு இருக்க வேண்டும், அனைவரும் தங்கள் வாழ்க்கையை, சமூகத்தை மேம்படுத்திக்கொள்ள இணையத்தை பயன்பட்டுத்திக்கொள்ளும் நிலை இருக்க வேண்டும் என்பது டிஜிட்டல் சமத்துவத்தின் முக்கிய அம்சமாக தெரிவிக்கப்பட்டுள்ளது. 300 கோடி பேர் பயன்படுத்துவது, விக்கிபீடியா போன்ற திட்டங்கள் இதற்கு உதாரணமாக இருந்தாலும், இணையம் இன்னமும் முழுவதும் பரவலாகமால் இருப்பதும், ஏற்கனவே உள்ள வேறுபாடுகளை அதிகரிக்க கூடிய நிலையில் இருப்பதும் ஆரோக்கியமில்லா அம்சங்களாக சுட்டிக்காட்டப்பட்டுள்ளது. இணைய சீண்டுதல்- தாக்குதல் அதிகரித்து வருவதும் , பெண்கள் இதற்கு அதிகம் இலக்காவதும் முக்கிய பிரச்சனையாக சுட்டிக்காட்டப்பட்டுள்ளது.
கூட்டு சமூக முயற்சி மற்றும் தொழில்நுட்ப முயற்சி ஆகியவற்றை கொண்டு இந்த பிரச்சனையை கட்டுப்படுத்தலாம் என்றும் தெரிவிக்கப்பட்டுள்ளது. இதே போல ஒவ்வொரு அம்சம் தொடர்பாகவும் தற்போதைய நிலை, பிரச்சனை அதற்கான தீர்வு ஆகியவை இடம்பெற்றுள்ளன.
இணைய கல்வி பகுதியில், டிஜிட்டல் உலகில் கருத்துக்களை தெரிவித்து பங்கேற்கும் வாய்ப்பும் ஆற்றலும் எல்லோருக்கும் இருக்க வேண்டும் என குறிப்பிடப்பட்டுள்ளது.
இந்த அறிக்கை ஒரு முன்னோட்ட வடிவம் தான். இதை படித்துப்பார்த்து இணையவாசிகள் தங்கள் கருத்துக்களையும் திருத்தங்களையும் தெரிவிக்கலாம். அறிக்கையில் இடம்பெற வேண்டிய கருத்துக்கள் குறித்தும் பங்களிப்பை செலுத்தலாம்.
சுற்றுச்சூழலை காக்க உருவான இயக்கம் போலவே இணையத்தின் ஆரோக்கியத்தை காப்பதற்கான ஒரு இயக்கம் உருவாக வேண்டும் என்பதும் இந்த முயற்சியின் அடிப்படை எண்ணமாக இருக்கிறது. நீங்களும் இதில் பங்கேற்க விரும்பினால்: https://internethealthreport.org/v01/about/

இவர் இணைய உலகின் கோலியாத்தை வீழ்த்தியவர் !

img005
கேபிரியல் வைன்பர்க் எனக்கு மிகவும் பிடித்தமான மனிதர். யார் இந்த வைன்பர்க்? கூகுளுக்கு சவால் விடும் மாற்று தேடியந்திரமான டக் டக் கோவின் நிறுவனர் தான் இவர்.
இணையதளங்களை அறிமுகம் செய்வது போலவே தேடியந்திரங்களை அறிமுகம் செய்யும் ஆர்வத்தால் , டக் டக் கோ அறிமுகமான காலத்திலேயே அது பற்றி எழுதியிருக்கிறேன். அப்போது அது தேடாமல் தேடும் உத்தியை பின்பற்றி கவனத்தை ஈர்த்தது.
பின்னர் எட்வர்ட் ஸ்னோடர்ன் விவகாரத்திற்கு பிறகு தனியுரிமை தொடர்பான விவாதம் விஸ்வரூபம் எடுத்த போது , கூகுல் போல பயனாளிகள் தொடர்பான தகவல்களை சேகரிக்காத நல்ல தேடியந்திரமாக டக் டக் கோ பெயரெடுத்தது. டக் டக் கோ பற்றி தமிழ் இந்து இணைய பதிப்பில் வெளியாகும் தேடியந்திர தொடரிலும் விரிவாக எழுதியிருக்கிறேன். கூகுள் போலவே புதிய அம்சங்களை அறிமுகம் செய்யும் அதன் யுத்தி பற்றி விகடன் டாட் காமில் எழுதியுள்ளேன்.
புதிய தலைமுறை கல்வி இதழில் இணைய உலகின் நவீன இளம் ஆளுமைகள் பற்றிய நம் காலத்து நாயகர்கள் தொடர் எழுதிய போது, டக் டக் கோ தேடியந்திரத்தை உருவாக்கி கேப்ரியல் வைன்பர்க் பற்றியும் எழுதினேன்.
தேடல் பேரரசாக வளர்ந்துவிட்ட,கூகுளை பெரும் முதலீடோ அல்லது தொழில்நுட்ப படையோ இல்லாமல் எளிய உத்தியை கொண்டு அவர் கூகுளுக்கு எதிரான ஒரு மாற்று தேடியந்திரத்தை நிலை நிறுத்தியிருக்கிறார். அந்த வகையில் அவரை இணைய உலகின் கோலியாத்தை வீழ்த்திய டேவிட் என்று சொல்லலாம்.
புதிய தலைமுறை வெளியீடாக வர உள்ள நம் காலத்தி நாயகர்கள் புத்தகத்தில் வைன்பர்க் பற்றிய அறிமுக சித்திரத்தை வாசிக்கலாம்.