Tag Archives: english

வியக்க வைக்கும் விக்கி உலகம்!

’ஒரு கனவு நனவாகி விட்ட நிலையில் நாம் காண வேண்டியது இன்னொரு கனவு’.

இந்த மேற்கோளுக்கு சொந்தக்காரர் யார் என யூகிக்க முடிகிறதா? ஒரு சின்ன க்ளு ,அவர் நம்மவர் தான்!. இதற்கான பதிலை பார்ப்பதற்கு முன் முதலில் விக்கிபீடியா புராணத்தை கொஞ்சம் பார்க்கலாம்.

விக்கிபீடியாவை ஒரு இணைய அதிசயம். கூட்டு முயற்சியின் அடையாளமாக விளங்கும் விக்கிபீடியா இணையத்தின் எல்லையில்லா ஆற்றலுக்கும் உதாரணமாக விளங்குகிறது. விக்கிபீடியா அறிமுகமான போது இந்த அளவு வெற்றி பெறும் என யாரும் எதிர்பார்த்திருக்க மாட்டார்கள். இவ்வளவு ஏன், விக்கிபீடியா வெற்றி பெறும் என்று கூட பெரும்பாலானோர் நினைத்திருக்க மாட்டார்கள்.

ஏனெனில் அப்போது விக்கிபீடியாவின் கருத்தாக்கமே புதிதாக இருந்தது. விக்கிபீடியாவிற்கு முன் கலைக்களஞ்சியம் என்றால் அதை நிர்வகிக்க ஒரு ஆசிரியர் குழு இருக்கும், அதற்கு வழிகாட்ட வல்லுனர்கள் குழு இருக்கும். ஒவ்வொரு தகவலையும் ஆய்வு செய்து பல்முறை சரி பார்த்து இடம்பெறச்செய்வார்கள். ஆனால் கட்டற்ற களஞ்சியமாக அறிமுகமான விக்கிபீடியா இந்த சித்தாந்தத்தையே தலைகீழாக புறட்டிப்போட்டது. விக்கிபீடியா இணையவாசிகளால், இணையவாசிகளுக்காக உருவாக்கப்பட்டது. அதில் மையமாக ஆசிரியர் குழு இல்லை. யார் வேண்டுமானாலும் கட்டுரைகளை சமர்பிக்கலாம்.- அந்த கட்டுரையில் உள்ள தகவல்களை யார் வேண்டுமானாலும் திருத்தி மாற்றி அமைக்கலாம் எனும் ஜனநாயகத்தன்மையுடன் விக்கிபீடியா அறிமுகமானது. இதன் நிறுவனர் ஜிம்மி வேல்ஸ்.

மாபெரும் களஞ்சியம்

விக்கிபீடியாவின் ஆதார தன்மையே இந்த பங்கேற்பு தன்மை தான். விக்கி என்றால் மென்பொருள் மொழியில், எவரும் திருத்தங்களை செய்யக்கூடிய இணையதளம் என்று பொருள். இதை விக்கியின் பின்னே உள்ள மென்பொருள் சாத்தியமாக்குகிறது. ஆக, தொழில்நுட்ப நோக்கில்  யார் வேண்டுமானால் தகவல்களை இடம்பெற வைப்பது சாத்தியமாகலாம். ஆனால் இவ்வாறு உருவாக்கப்படும் இணையதளத்தையும், அதில் இடம் பெறும் தகவல்களையும் எப்படி நம்புவது என்ற கேள்வி எழுந்தது. அதோடு, வல்லுனர்கள், ஆசிரியர்கள் குழு உதவி இல்லாமல் ஒரு களஞ்சியத்தை சாமானியர்கள் ஒன்று சேர்ந்து உருவாக்குவது எல்லாம் நடைமுறையில் செல்லுபடியாகுமா? என்று கேட்கப்பட்டது. இத்தகைய முயற்சி அபத்தமாகவே அமையும் என ஆருடம் கூறப்பட்டது. ஆனால் விக்கிபீடியா இணையவாசிகளின் பங்கேற்பால் பெரும் அளவில் வெற்றி பெற்று உலகின் மாபெரும் களஞ்சியமாக உருவாகியுள்ளது.

விக்கிபிடியாவின் வளர்ச்சி வியக்க வைக்க கூடியதாக இருக்கிறது. இன்று விக்கிபீடியா ஆங்கில மொழியில் மட்டும் அல்லாமல், நம் தமிழ் உள்ளிட்ட 295 மொழிகளில் செயல்படுகிறது. ஆங்கில மொழியில் மட்டும் 5 மில்லியனுக்கு மேல் கட்டுரைகள் இடம்பெற்றுள்ளன. நாள்தோறும் 800 புதிய கட்டுரைகள் சேர்க்கப்படுகின்றன. நொடிக்கு இத்தனை தகவல்கள் திருத்தப்படுகின்றன. தமிழ் மொழியில் கட்டுரைகள் ஒரு லட்சத்தை நெருங்கிக் கொண்டிருக்கின்றன. இந்தி உள்ளிட்ட இந்திய மொழிகளிலும் விக்கிபீடியா இயங்குகிறது. இந்த பிரும்மாண்ட வளர்ச்சிக்கு பின்னே உலகம் முழுவதும் பரவிக்கிடக்கும் தன்னார்வலர் படை ஓயாமல் இயங்கி கொண்டிருக்கிறது. பாரம்பரிய களஞ்சியங்கள் எல்லாம் ஒவ்வொரு பதிப்பின் போது மேம்படுத்தப்படும். விக்கிபீடியா ஒவ்வொரு நொடியும் திருத்தப்பட்டு மேம்படுத்தப்பட்டு கொண்டிருக்கிறது. அதுவே விக்கிபீடியாவின் தனித்தன்மையாக இருக்கிறது.

இணைய உலகில் விக்கிபீடியாவுக்கு இருக்கும் செல்வாக்கை பற்றியும் அதிகம் கூற வேண்டியதில்லை. மாணவர்கள் முதல் ஆய்வாளர்கள் வரை தகவல்கள் தேவை எனில் விக்கிபீடியாவை நாடுகின்றனர். கூகுள் உள்ளிட்ட தேடியந்திரங்களில் தகவல்களை தேடும் போது, அநேகமாக அது தொடர்பான விக்கிபீடியா பக்கம் தேடல் பட்டியலில் முதல் பக்கத்திலேயே வரவேற்கும்.

தகவல் சுரங்கம்

விக்கிபீடியா தகவல் சுரங்கம் என்பதில் சந்தேகம் இல்லை. ஆனால் அதன் தகவல்களை எந்த அளவுக்கு நம்பலாம் எனும் கேள்வி இன்னும் கூட பலருக்கு இருக்கலாம். இந்த கேள்விக்கு நம்பலாம் அல்லது நம்ப முடியாது என ஒற்றை வார்த்தையில் பதிலை எதிர்பார்ப்பது விக்கி சித்தாந்தத்தையே கொச்சை படுத்துவது போலாகிவிடும். ஏனெனில் விக்கிபீடியா அந்த அளவுக்கு நம்பகத்தன்மையை உறுதி செய்வதற்கான பல அடுக்கு செயல்முறைகளையும், அவற்றை இயக்கும் கராரான விதிகளையும் கொண்டுள்ளது. இது பற்றி சுருக்கமாக சொல்வது என்றால் விக்கிபீடியாவில் எப்படி தகவல்களை இடம்பெற வைக்க தன்னார்வலர் படை இயங்கி வருகிறதோ, அதே போல, தகவல்களை சரி பார்க்கவும் , அவற்றில் பிழை எனில் திருத்தம் செய்யவும் ஒரு பெரும் படை செயல்பட்டு வருகிறது. இந்த படை விக்கிபீடியா கட்டுரைகளில் உள்ள தகவல்களை சரி பார்த்து தேவையான திருத்தங்களை மேற்கொள்கிறது. இந்த திருத்தங்களும் திருத்தப்படலாம் என்பதால் பல நேரங்களில் திருத்தல் யுத்தம் நிகழ்வது உண்டென்றாலும், விக்கிபீடியா தன்னைத்தானே திருத்திக்கொண்டே இருக்கிறது.

நம்பகத்தன்மை

எனவே விக்கிபிடியாவில் உள்ள தகவல்கள் நம்பகமானவை என்று சொல்வது சரியல்ல, நியாயமும் அல்ல. ஆனால் அதற்காக விக்கிபீடியா தகவல்கலை அப்படியே கண்ணை மூடிக்கொண்டும் நம்பி விடக்கூடாது. இவை அடிப்படையில் வழிகாட்டி நோக்கிலானவை என்பதை புரிந்து கொள்ள வேண்டும். இவற்றை ஒரு துவக்கப்புள்ளியாக வைத்துக்கொள்ளலாம். அதோடு விக்கிபீடியா கட்டுரைகள் செயல்படும் விதத்தையும் புரிந்து கொள்ள வேண்டும். விக்கிபீடியாவில் யார் வேண்டுமானாலும் கட்டுரை எழுதலாம் என்றாலும், மனம் போன போக்கில் எதையும் எழுத முடியாது. முதலில் கட்டுரை தலைப்பை சமர்பிக்க வேண்டும். அதை சக பயனாளிகள் குழு பார்த்து ஏற்றுக்கொள்ள வேண்டும். அதன் பிறகு தகவல்களை சேர்க்கலாம். தகவல்களையும் இஷ்டம் போல சேர்க்க முடியாது. அதற்கான ஆதாரங்களை சமர்பிக்க வேண்டும். மாற்றம் செய்ய வேண்டுமானாலும் ஆதாரங்கள் தேவை. தகவலுக்கான மூலத்தை சுட்டிக்காட்ட வேண்டும்.

விக்கி கட்டுரைகளை வாசிக்கும் போது, தகவல்கள் தொடர்பான ஆதாரங்கள் இணைப்பை படித்துப்பார்க்க வேண்டும். கட்டுரைக்கு கீழே இந்த இணைப்புகள் வரிசையாக இருக்கும். அதிகார பூர்வ தளங்களுக்கான இணைப்புகளும் கொடுக்கப்பட்டிருக்கும். இவற்றை படித்துப்பார்க்கும் போது தகவல்களின் நம்பகத்தன்மை குறித்த தெளிவு உண்டாகும். குறிப்பாக மிக முக்கிய தகவல் எனில். அது தொடர்பான ஆதாரங்கள் என்ன என்பதை ஆராய வேண்டும். தேவை எனில் அந்த தகவல் குறித்து தனியே கூகுளில் தேடிப்பார்க்கலாம். விக்கியில் வாசித்தால் மட்டும் போதாது, கொஞ்சம் ஆய்வும் தேவை.

விக்கிபீடியா பயனாளியாக மட்டும் இல்லாமல் விக்கிபீடியாவில் பங்கேற்கவும் செய்தால், இந்த செயல்முறையை நன்றாக விளங்கி கொள்ளலாம். அதோடு விக்கிபீடியாவில் பங்கேற்பது என்பது நம் மொழியில் உள்ள களஞ்சியத்தின் வளத்தை பெருக்குவதில் தொண்டாற்றுவது போல தான். தமிழ் விக்கிபீடியாவில் இன்னும் கட்டுரைகளை சேர்க்கலாம். திருத்தங்களை மேற்கொண்டு மேம்படுத்தலாம். :

தினம் தினம் தகவல்கள்

நிற்க விக்கிபீடியாவில் தெரிந்து கொள்ள வேண்டிய விஷயங்கள் இன்னும் பல இருக்கின்றன. விக்கிபீடியாவில் தேவையான தகவல்களை பெறலாம் என்பதோடு தினந்தோறும் புதிய விஷயங்கள் கற்றுக்கொள்ளவும் செய்யலாம். விக்கிபீடியா முகப்பு பக்கத்தில் இருந்தே இதை துவங்கலாம். விக்கிபீடியா பரவலாக அறியப்பட்டதாக இருந்தாலும் கூட, அந்த தளத்திற்கு நேரடியாக பலரும் விஜயம் செய்வதில்லை. பெரும்பாலானோர் கூகுள் தேடல் மூலம் கண்டறியும் குறிப்பிட்ட விக்கிபீடியா பக்கத்தையே நாடுகின்றனர். ஆனால் விக்கிபீடியா முகப்பு பக்கத்தில் தினமும் ஒரு கட்டுரை முன்னிறுத்தப்படும். அதன் மூலம் புதிய தகவல்களை தெரிந்து கொள்ளலாம். அருகிலேயே செய்திகளின் பட்டியலையும் பார்க்கலாம். அதன் கீழே உங்களுக்குத்தெரியுமா எனும் தலைப்பிலும், இன்றைய தின நிகழ்வுகள் எனும் தலைப்பிலும் தகவல்களை பார்க்கலாம். தினமும் ஒரு புகைப்படம் மூலம் தகவல் முன்வைக்கப்படும்.

தினமும் இல்லாவிட்டாலும் அடிக்கடி விக்கிபிடியாவுக்குள் எட்டிப்பார்ப்பதை வழக்கமாக கொண்டு சில நிமிடங்களை செலவிட்டால் புதிய விஷயங்களை அறுவடை செய்து கொண்டே இருக்கலாம். முகப்பு பக்கத்தில் விக்கிபீடியாவில் அப்டேட்டாகும் தகவல்களை எளிதாக அடையாளம் காணலாம் என்றால், போர்ட்டல் பகுதியின் மூலம் விக்கி சுரங்கத்தில் உள்ளவற்றை எல்லாம் காணலாம்.: https://en.wikipedia.org/wiki/Portal:Contents/Portals

இந்த பகுதியில் விக்கி கட்டுரைகள் பல்வேறு தலைப்புகள் வகைப்படுத்தப்பட்டுள்ளன. அகர வரிசைப்பட்டியலையும் காணலாம். இதில் மேலோட்டமாக பார்வையை ஓட்டி விருப்பமான பகுதியை தேர்வு செய்து மேற்கொண்டு படிக்கலாம். இதே பகுதியில் மிகவும் பிரபலமான கட்டுரை பட்டியல் மூலமும் புதிய கட்டுரைகளை அணுகலாம். போர்ட்டல் பகுதியில் உள்ள தலைப்புகளையும், வகைகளையும் பார்த்தாலே விக்கிபீடியாவின் நீள ,அகலத்தை நன்றாக தெரிந்து கொள்ளலாம்.

இணையத்தில் நேரம் கிடைக்கும் போதெல்லாம் விக்கிபீடியா தளத்தில் உலா வருவதை ஒரு பழக்கமாக வைத்துக்கொண்டால் நீங்களும் கூட நாளடைவில் நடமாடும் தகவல் களஞ்சியமாக மாறிவிடலாம். அதோடு குறிப்பிட்ட தலைப்பில் உங்கள் தகவல் ஞானத்தையும் ஆழமாக்கி கொள்ளலாம்.

சகோதர தளங்கள்

விக்கிபீடியா தளமே வியக்க வைக்க கூடியது என்றால் அதன் சகோதர தளங்களை பார்த்தால் இன்னும் பிரம்மிப்பு உண்டாகும். ஆம், விக்கிமீடியா அறக்கட்டளையால் நிர்வகிக்கப்படும் விக்கிபீடியா சார்பில் விக்குபுக்ஸ், விக்கிகோட்ஸ், விக்கிஷ்னரி, விக்கிநியூஸ், விக்கிசோர்ஸ் ,விக்கிவர்சிட்டி, விக்கிடேட்டா உள்ளிட்ட துணை திட்டங்களும் செயல்படுத்தபட்டு வருகின்றன. எல்லாமே இணையவாசிகளால் உருவாக்கப்படுபவை.

இவற்றில் விக்கி நியூஸ் (https://en.wikinews.org/ ) என்பது செய்திகளுக்கானது. விக்கி சமூகத்தால் பகிர்ந்து கொள்ளப்படும் செய்திகளை இந்த பக்கத்தில் அணுகலாம். உலக செய்து முதல் உள்ளூர் செய்திகள் வரை உண்டு. செய்திக்ள் தவிர, கட்டுரைகள், நேர்காணல்கள், செய்தி சேகர்ப்பு ஆகியவற்றையும் வாசிக்கலாம். விக்கி செய்திகள் தமிழிலும் இருக்கிறது: http://bit.ly/2oZMSyx

விக்கி செய்திகள் போலவே விக்கி புக்ஸ் (https://en.wikibooks.org/wiki/Main_Page ) பகுதியில் புத்தகங்களை வாசிக்கலாம். பல்வேறு தலைப்புகளில் புத்தகங்கhttps://en.wikibooks.org/wiki/Main_Pageளை வாசிக்க முடியும்.

விக்கிஷ்னரி (https://en.wiktionary.org/wiki/Wiktionary:Main_Page ) பகுதி விக்கி அகராதியாகும். இந்த அகராதியில் ஆங்கில் சொற்களுக்கான பொருள்மற்றும் பயன்பாட்டை தெரிந்து கொள்ளலாம். தமிழிலும் விக்கிஷ்னரி இருக்கிறது. இதே போலவே பிரபலமானவர்களின் மேற்கோள்களின் தொகுப்பாக விக்கிகோட் பகுதி அமைகிறது. மேற்கோள்களையும், பொன்மொழிகளையும் இதில் காணலாம். இதன் தமிழ் பகுதியில் தான் மேலே சொன்ன கனவு மேற்கோள் வருகிறது. அதன் சொந்தக்காரர் நடிகர் கமல்ஹாசன். https://en.wiktionary.org/wiki/Wiktionary:Main_Page

இந்த பக்கத்தில் மேலும் பல பிரபலங்கள், இலக்கியங்கள், திரைப்படங்களின் மேற்கோள்களை பார்க்கலாம். கலை,இலக்கியம், சமயம், வீரம் என தனித்தனி தலைப்புகள் கீழும் மேற்கோள்களை அணுகலாம். மயில்சாமி அண்ணாதுரை முதல் பாவலரேறு பெருஞ்சித்திரனார், மண்டேலா, மகாத்மா என மேதைகளின் மேற்கோள்களையும் அறியலாம்.

விக்கி வாயேஜ் (https://en.wikivoyage.org/wiki/Main_Page ) என்பது பயண வழிகாட்டி. உலகின் எந்த நாடு அல்லது நகருக்கு பயணம் செல்ல விரும்புகிறோமோ அந்த நாடு அல்லது நகரம் தொடர்பான தகவல்களை அறியலாம். குறிப்பாக சுற்றுலா நோக்கிலான தகவல்கள் மற்றும் பயண வழிகளை அறியலாம்.

விக்கி பல்கலை

விக்கி சோர்ஸ் என்பது மூலத்தகவல்களுக்கான நூலகம் போன்றது. விக்கிடேட்டா தரவுகளுக்கான காப்பகம். விக்கி வார்சிட்டி (https://en.wikiversity.org/wiki/Wikiversity:Main_Page) பகுதியில் விக்கி பல்கலைகழகம் போன்றது. கல்வி சார்ந்த தகவல்கள் இதில் கொட்டிக்கிடக்கின்றன. இணைய வடிவமைப்பு உள்பட பல விஷயங்களை இந்த ப்குதியில் கற்றுக்கொள்ளாலாம். மாணவர்கள் இந்த பக்கத்திற்குள் நுழைந்தால் பயனுள்ள பல தகவல்களை பெறலாம். பள்ளி பாடத்திற்கான ஊக்கத்தையும் பெறலாம், போட்டித்தேர்வுகளுக்கு தயாராகும் வகையில் தகவல்களையும் திரட்டிக்கொள்ளலாம்.

இவைத்தவிர விக்கி ஸ்பிஷியஸ் (https://species.wikimedia.org/wiki/Main_Page ) பகுதியில் தாவிரங்கள், விலங்குகள் உள்ளிட்ட உயிரணங்கள் தொடர்பான தகவல்களை அறியலாம். இவை எல்லாமே இணையவாசிகள் பங்கேற்பால் உருவாகி வருபவை., எனவே நீங்களும் பங்கேற்கலாம். தமிழ் விக்கிபீடியா பக்கம்: http://bit.ly/1o52tcM

விக்கி ஆர்வலர்கள் அவசியம் அறிந்திருக்க வேண்டிய இன்னொரு இணையதளம் விக்கிமீடியா அறக்கட்டளையின் வலைப்பதிவாகும்: https://blog.wikimedia.org/ . இதில் விக்கிபீடியாவின் புதிய திட்டங்கள், விக்கி சமூக நிகழ்வுகள் உள்ளிட்டவற்றை அறிந்து கொள்ளலாம். இந்த வரிசையில் சிம்பிள் விக்கிபீடியாவையும் (https://simple.wikipedia.org/wiki/Main_Page ) சேர்த்துக்கொள்ள வேண்டும். இது விக்கிபீடியாவின் எளிமையான வடிவம். இதில் உள்ள கட்டுரைகள் எல்லாம் அடிப்படை ஆங்கிலத்தில் எழுதப்பட்டிருக்கும். வாக்கியங்களும் சிறியதாக எளிதில் படிக்க கூடியதாக இருக்கும். சிறுவர் ,சிறுமியர் மற்றும் முதல் ஆங்கிலம் கற்று வருபவர்களுக்கு இந்த எளிமையான பக்கம் ஏற்றதாக இருக்கும். இதே போல கிவிக்ஸ் (http://www.kiwix.org/ ) இணையதளம் விக்கிபீடியா பக்கங்களை தரவிறக்கம் செய்து இணைய இணைப்பு இல்லாமலேயே பயன்படுத்த உதவுகிறது.

இவை எல்லாம் விக்கி சாம்பிராஜ்யத்தின் சில மாதிரிகள் மட்டுமே. விக்கி உலகிற்குள் நுழைந்தால் இன்னும் பல அற்புதங்களை நீங்களே தெரிந்து கொள்ள முடியும்.

 

 

 

 

 

 

 

 

ஆங்கிலத்தில் எழுத உதவும் தேடியந்திரம்!

ludwig_1இணைய உலகில் புதிதாக ஒரு தேடியந்திரம் அறிமுகமாகி இருக்கிறது. லுத்விக் (Ludwig ) எனும் அந்த தேடியந்திரம் புதியது மட்டும் அல்ல, புதுமையானதும் கூட! புத்திசாலி மொழிபெயர்ப்பு சாதனம் மற்றும் மொழியியல் தேடியந்திரம் என வர்ணித்துக்கொள்ளும் இந்த தேடியந்திரம் அமெரிக்காவிலோ மற்ற ஆங்கிலம் பேசும் நாடுகளில் இருந்து அறிமுகமாகமல் ஐரோப்பிய நாடான இத்தாலியில் இருந்து உருவாகி இருப்பது மிகவும் பொருத்தமானது. ஏனெனில், லுத்விக் தேடியந்திரம் ஆங்கிலத்தில் சரியாக எழுத உதவும் நோக்கத்துடன் உருவாக்கப்பட்டுள்ளது.

ஒரு தேடியந்திரம் எப்படி ஆங்கிலத்தில் எழுத உதவக்கூடும் என்று கேட்கலாம். பொருத்தமான ஆங்கில சொற்றொடர்களை தேடித்தருவதன் மூலம் லுத்விக் இதை செய்கிறது. எப்படி என பார்க்கலாம்!
ஆங்கிலத்தில் நன்றாக எழுத வருபவர்களை விட்டுவிடுங்கள். ஆனால் ஓரளவு மட்டுமே ஆங்கிலம் அறிந்தவர்கள், அலுவல் தேவைக்காக ஆங்கிலத்தில் எழுத வேண்டிய நிலை வரும் போது கொஞ்சம் தடுமாறவே செய்வார்கள். அப்படியே எழுதிவிட்டாலும், அது சரியாக இருக்கிறதா எனும் சந்தேகம் இருக்கும்.

இது போன்ற நேரங்களில் லுத்விக் ஆங்கிலம் அறிந்த நண்பன் போல வழிகாட்டும். லுத்விக் தேடியந்திர முகப்பு பக்கத்தில் டைப்ரைட்டர் சாதன லோகோவின் கீழ், உள்ள தேடல் கட்டத்தில், பயனாளிகள் தாங்கள் சரி பார்க்க விரும்பும் ஆங்கில வாசகத்தை டைப் செய்ய வேண்டும். உடனே, அந்த வாசகத்திற்கு பொருத்தமான ஆங்கில வாசகங்கள் பட்டியலிப்படும். அவற்றில் இருந்து சரியான வாசகத்தை தேர்வு செய்து கொள்ளலாம். அல்லது தாங்கள் எழுதிய வாசகத்துடன் ஒப்பிட்டு அதில் உள்ள தவறுகளை சரி செய்து கொள்ளலாம்.
ludwig_4
பிபிசி, நியூயார்க் டைம்ஸ், நியூயார்க்கர் உள்ளிட்ட முன்னணி ஊடகங்களில் இருந்து சேகரிக்கப்பட்ட ஆங்கில வாசக தொகுப்பில் தேடிப்பார்த்து, பொருத்தமான வாசகங்களை லுத்விக் பரிந்துரைக்கிறது. வரிசையாக ஒவ்வொரு வரியாக தட்டச்சு செய்து, அதற்கு காண்பிக்கப்படும் வாசக பட்டியலுடன் ஒப்பிட்டுப்பார்த்து, ஏதேனும் தவறுகள் இருந்தால் திருத்தி நாம் எழுதியதை மேம்படுத்திக்கொள்ளலாம். தவறுகளை திருத்திக்கொள்வதோடு, சரியான ஆங்கில வரிகளுடன் ஒப்பிட்டு பார்ப்பதன் மூலம் ஆங்கில சொற்களின் பயன்பாடு பற்றியும் கற்றுக்கொள்ளலாம்.

ஆங்கிலத்தில் எழுதப்பட்ட கட்டுரைகள், செய்திகள் ஆகியவற்றில் இருந்து திரடப்பட்ட வாசகங்களை தொகுப்பில் இருந்து, பயனாளிகள் எழுத முயலும் வாசகத்திற்கு பொருந்தக்கூடிய வரிகளை தேடித்தருவதே லுத்விக்கின் முதன்மையான பணியாக இருக்கிறது. இதற்கான அல்கோரிதம் மொழியியலை அடிப்படையாக கொண்டு உருவாக்கப்பட்டுள்ளது.

ஆனால், ஒன்று ஆங்கிலத்தில் அதிக பரிட்சயம் இல்லாதவர்களை மனதில் வைத்துக்கொண்டு இது உருவாக்கப்பட்டுள்ளது என்பதை புரிந்து கொள்ள வேண்டும். இதன் நிறுவனர்களில் ஒருவரான இத்தாலி நாட்டைச்சேர்ந்தவரான ஆண்டோனியோ ரோடோலோ ஆகழ்வாராய்ச்சி மாணவராக இருந்த போது, தனது துறையில் தொழில்முறை வாய்ப்புகளை சர்வதேச அளவில் பெற ஆங்கிலத்தில் கட்டுரைகளை வெளியிடும் நிபந்தத்தை உணர்ந்தார். இத்தாலியரான அவருக்கு ஆங்கிலத்தில் கட்டுரைகள் எழுதுவதில் தயக்கம் இருந்ததால், ஆங்கில சொற்களின் தவறான பயன்பாட்டில் திருத்தம் செய்ய உதவும் சேவையின் தேவையை உணர்ந்தார். அதன் பலனாகவே தன்னைப்போன்றவர்கள் பயன்பாட்டிற்காக லுத்விக் மொழியில் தேடியந்திரத்தை நண்பர்களுடன் இணைந்து உருவாக்கியுள்ளார். இத்தாலியின் சிசிலியை தலைமையகமாக கொண்டு லுத்விக் செயல்பட்டு வருகிறது.

ஆங்கிலம் உலக மொழி என வைத்துக்கொண்டால், அது ஆங்கிலம் பேசும் நாடுகளை சேர்ந்தவர்களுக்காக மட்டும் அல்லாமல் எல்லோருக்குமானதாக இருக்க வேண்டும் என்று பேட்டி ஒன்றில் குறிப்பிட்டுள்ள ரோடோலோ, உலகில் உள்ள எல்லோருக்கும் தொடர்பு கொள்வதில் சம வாய்ப்புகள் இருக்க வேண்டும் என்றும் தெரிவித்துள்ளார். இதை நிறைவேற்றும் நோக்கத்துடன் தான் லுத்விக் தேடியந்திரம் வடிவமைக்கப்பட்டுள்ளது.
லுத்விக் தேடியந்திரத்தில் மேலும் சில மொழி சார்ந்த வசதிகளும் இருக்கின்றன. இதில் ஆங்கில அகராதியும் இணைக்கப்பட்டுள்ளது. பட்டியலிடப்படும் வாசகங்களில் உள்ள புரியாத சொற்களை ,இருமுறை கிளிக் செய்தால் அவற்றுக்கான பொருள் விளக்கம் தோன்றும். அதே போல ஆங்கில சொற்றொடர்களுக்கான விளக்கத்தையும் பார்க்கலாம். தேவை எனில் இரண்டு வார்த்தைகளுக்கு இடையே எந்த சொல் வர வேண்டும் என்றும் தெரிந்தும் கொள்ளலாம்.

இது தவிர, ஆங்கிலம் சரியாக அறியாதவர்கள் தங்கள் மொழியில் வாசகத்தை டைப் செய்து அதை ஆங்கிலத்தில் மொழிபெயர்த்துக்கொண்டு அது சரியா என்றும் பார்த்துக்கொள்ளலாம். ( கூகுள் மொழிபெயர்ப்பு சேவை சார்ந்து இது இயங்குகிறது).
ஆங்கிலத்தில் தயக்கமும்,சந்தேகமும் உள்ளவர்களுக்கு இந்த தேடியந்திரம் நிச்சயம் உதவியாக இருக்கும்.
ஒவ்வொரு முறை சேவையை பயன்படுத்தியவுடன், முடிவுகள் திருப்தியாக இருக்கிறதா? என கேட்கும் சிறு பெட்டியும் தோன்றுகிறது. அதில் உள்ள ஸ்மைலியை கிளிக் செய்யும் போது உங்கள் முகத்திலும் புன்சிரிப்பு தோன்றலாம்.

நாம் ஏற்கனவே பயன்படுத்திய வாசகங்களை மீண்டும் திரும்பி சென்று பார்க்கும் வசதியும் இருக்கிறது.
இந்த தேடியந்திரத்தின் பெயர் தொடர்பாக சுவாரஸ்யமான தகவல் ஒன்றும் இருக்கிறது. ஆஸ்திரியாவைச்சேர்ந்த புகழ்பெற்ற தத்துவஞானியான லுத்விக் விட்ஜென்ஸ்டியன் என்பவர் நினைவாகவே இதற்கு லுத்விக என பெயர் சூட்டப்பட்டுள்ளதாம்.” என்னுடைய மொழியின் வரம்பு தான் என்னுடைய உலகின் வரம்பு” என்னும் வாசகம் அவரது சிந்தனைகளின் முக்கியத்துவத்தை உணர்த்துகிறது.

தேடியந்திர முகவரி:https://ludwig.guru/

—-
நன்றி; தமிழ் இந்துவில் எழுதியது!

விக்கிபீடியாவை மேலும் சிறப்பாக பயன்படுத்துவதற்கான வழிகள்!

wi1இணையவாசிகளின் பங்களிப்பால் உருவாகும் கட்டற்ற கலைகளஞ்சியமான விக்கிபீடியாவை நீங்கள் விரும்பலாம், விரும்பாமல் போகலாம். ஆனால் அதை பயன்படுத்தாமல் இருக்க முடியாது. ஒன்று விக்கிபீடியாவை நீங்கள் தற்செயலாக பயன்படுத்தலாம் – எப்படியும், இணையத்தில் தகவல்களை தேடும் போது , உங்கள் குறிச்சொல் தொடர்பான விக்கிபீடியா பக்கம் வந்து நிற்கலாம். அல்லது நீங்களே விரும்பி விக்கிபீடியாவில் தகவல்களை தேடலாம். நம்பகத்தன்மை பற்றிய கேள்விகள், அதில் அரங்கேறும் திருத்தங்களின் அரசியல் ஆகியவற்றை மீறி விக்கிபீடியா மிகச்சிறந்த தகவல் சுரங்கம். அதிகம் பயன்படுத்தப்படும் இணையதளங்களின் பட்டியலில் அது ஆறாவது இடத்தில் இருப்பதற்கான காரணமும் அதுவே.

ஒரு முறை விக்கிபீடியாவை பயன்படுத்தினால் அதில் உள்ள ஏதவாது ஒரு அம்சம் உங்களை கவராமல் இருக்க வாய்ப்பில்லை. தகவல் களஞ்சியமாக விக்கிபீடியா பயன் மிக்கது என்றாலும் அதன் வடிவமைப்பு அத்தனை நேர்த்தியானது அல்ல. அதோடு விக்கிபீடியாவை பயனாளிகள் தங்கள் தேவைக்கேற்ப மாற்றியமைத்துக்கொள்ள முடியாது. இந்த குறைகளுக்கு தீர்வு காணவும், விக்கிபீடியாவை மேலும் சிறந்த முறையில் பயன்படுத்தவும் வழிகள் இல்லாமல் இல்லை. உங்கள் விக்கி அனுபவத்தை மேம்படுத்தக்கூடிய சில வழிகளையும் விக்கி சார்ந்த சேவைகளையும் இங்கே பார்க்கலாம்.

 

எளிய ஆங்கித்தில்!
எப்போதாவது விக்கிபீடியா கட்டுரைகள் கடினமாக இருப்பதாக உணர்ந்திருக்கிறீர்களா? கட்டுரையில் பயன்படுத்தப்படும் ஆங்கிலம் மற்றும் அதில் இடம்பெறும் கரடுமுரடான சொற்கள் இடையூறாக இருப்பதாக நினைத்திருக்கிறீர்களா? ஆம் எனில், கவலையேபடாதீர்கள், உங்களுக்காக என்றே எளிய ஆங்கில விக்கிபீடியா (http://simple.wikipedia.org/wiki/Main_Page ) இருக்கிறது. இங்கு விக்கிபீடியா கட்டுரைகளை எளிய ஆங்கிலத்தில் படிக்கலாம். அடிப்படையில் விக்கிபீடியாவில் உள்ள கட்டுரைகள் தான் இங்கும் இருக்கின்றன. ஆனால் அவை எல்லாமே சிக்கல் இல்லாமல் எளிய ஆங்கிலத்தில் எழுதப்பட்டுள்ளன. விக்கி கட்டுரைகளில் உள்ள கரடுமுரடான சொற்கள் நீக்கப்பட்டு அவற்றின் சாரம்சம் எளிதாக புரியும் வகையில் சிக்கலான விஷயங்கள் நீக்கப்பட்டு எளிதாக படிக்க கூடிய வகையில் திருத்தி எழுத்தப்பட்டுள்ளன. எளிய ஆங்கிலத்தில் எழுதப்பட்ட மூலக்கட்டுரைகளையும் இங்கு சமர்பிக்கலாம். அடிப்படையான ஆங்கில சொற்களை மட்டுமே பயன்படுத்த வேண்டும். விக்கிபீடியா கட்டுரைகள் எல்லோருக்குமானதாக இருக்க வேண்டும் எனும் நோக்கத்துடன் எளிமையான வடிவில் வழங்கப்பட்டு வருகின்றன. 2003 ம் ஆண்டு முதல் செயல்பட்டு வரும் இதில் ஒரு லட்சத்திற்கும் அதிகமான கட்டுரைகள் உள்ளன. குறிப்பாக மாணவர்களுக்கு மிகவும் பயனுள்ளதாக இருக்கும். ஆங்கிலத்தை தாய்மொழியாக கொள்ளாதவர்களுக்கும் ஏற்றதாக இருக்கும். இதே போலவே விக்கி அகராதியான விக்கிஷ்னரிக்கும் எளிய ஆங்கில வடிவம் இருக்கிறது – http://simple.wiktionary.org/wiki/Main_Page

 

செய்திகளை தொடர
செய்திகள் என்றதும் விக்கிபீடியா நினைவுக்கு வர வாய்ப்பில்லை. அதற்கு செய்தி தளங்களையோ அல்லது தேடியந்திரங்களையோ தான் தேடிச்செல்வோம். இருப்பினும் தவறவிட்ட முக்கிய செய்திகளை தெரிந்து கொள்ள விக்கிபீடியா சிறந்த இடம் என்பது உங்களுக்குத்தெரியுமா? இதற்காக நீங்கள் செய்ய வேண்டியதெல்லாம் , விக்கிபீடியா தளத்தில் , நீங்கள் எந்த மாதத்தின் நிகழ்வுகளை தெரிந்து கொள்ள விரும்புகிறீர்களோ , அந்த மாதத்தை விக்கிபீடியா தேடலில் கட்டத்தில் குறிப்பிட்டு தேடினால் , அந்த மாதத்தின் முக்கிய நிகழ்வுகளை எல்லாம

பொன்மொழிகளுக்கான இரண்டு இணையதளங்கள்

qபொன்மொழிகளுக்கான இணையதளங்களில் தாட்ஜாய் ( http://thoughtjoy.com/) மற்றும் கோட்ஸ்4ஆல் (http://quotes4all.net/ ) இடையே போட்டியே வைக்கலாம் , இந்த இரண்டு இணையதளங்களில் எது மிக எளிமையாக இருக்கிறது என்று ? அந்த அளவுக்கு இரண்டு தளங்களும் நேர்த்தியான எளிமையோடு அமைந்துள்ளன.

தாட்ஜாய் , பொன்மொழி தேடியந்திரமாக வரவேற்கிறது. முகப்பு பக்கம் அத்தனை எளிமை. நடுநாயகமாக ஒரு தேடல் கட்டம். அதில் பொன்மொழிகளை தேடலாம். அதன் கீழே பொன்மொழிகளை ,மூன்று விதமான தலைப்புகளில் பட்டியலாக பார்க்கலாம். அருகிலேயே டிவிட்டர் அல்லது பேஸ்புக் மூலம் தினம் ஒரு பொன்மொழி பெறும் வசதி இருக்கிறது. அவ்வளவு தான் இந்த பொன்மொழி தளம். ஆனால் இஷ்டம் போல பொன்மொழிகளை தேடிக்கொண்டே இருக்கலாம். குறிப்பிட்ட பொன்மொழி தேவை என்றால் தேடல் கட்டத்தை பயன்படுத்தலாம் .அல்லது, பொன்மொழி வகைகள் அல்லது பொன்மொழி சொன்னவர்கள் பட்டியலை கிளிக் செய்து வரிசையாக பொன்மொழிகளை பார்த்துக்கொண்டே இருக்கலாம். பொன்மொழி வகைகள் ஆங்கில அகர வரிசைப்படி அமைந்துள்ளன. ஒவ்வொரு தலைப்பாக பார்த்தால் நேரம் போவதே தெரியாது.

கோட்ஸ்பாரால்  தளமும் இதே முறையில் ஆனால் கொஞ்ச்ம் மாறுபட்டு இருக்கிறது. ( http://quotes4all.net/) . இதன் முகப்பு பக்கம் வரிசையாக பொன்மொழிகளுடன் வரவேற்கிறது. அந்த பொன்மொழிகளை படித்து ரசித்த பின், கீழ் பகுதியில் கிளிக் செய்தாலும் சரி அல்லது மேலே உள்ள பகுதிக்கு சென்றாலும் சரி பொன்மொழிகளின் உலகம் அகல விரிகிறது. கீழ்ப்பகுதியில் இணையவாசிகள் மத்தியில் பிரபலமாக உள்ள பொன்மொழி வகைகள் குறிப்பிடப்பட்டுள்ளன. அவற்றை கிளிக் செய்து பார்க்கலாம். அதற்கும் கீழே மேலும் பொன்மொழிகளுக்கான வாயில் ஒரு கிளிக்கில் திறக்கிறது. தளத்தின் மேல் பகுதியில் பார்த்தால், ஆங்கில எழுத்துக்களின் அகர வரிசை கண்களை உறுத்தாத வகையில் தரப்பட்டுள்ளது. எந்த எழுத்தை கிளிக் செய்தாலும் அந்த எழுத்தியில் துவங்கும் பொன்மொழிகளை காணலாம்.

பொன்மொழிகளை மதிப்பீடு செய்யும் வசதியும் இருக்கிறது. எளிமையான அமைப்பை மீறி இந்த தளங்களில் இருககூடிய செழுமை வியப்பானது.

தினம் தினம் விஜயம் செய்ய வேண்டிய தளங்கள் இவை . காலையில் ஒரு சில நிமிடங்களையாவது செலவிடுங்கள். இல்லை, அவப்போது நேரம் கிடைக்கும் போது சென்றுப்பாருங்கள் .உங்கள் வாழ்க்கை ஊக்கம் பெறட்டும்.

———-

தினமும் பொன்மொழியுடன் துவக்க விருப்பமா? கோட்சீக்ரெட் உட்பட சிறந்த பொன்மொழி இணையதள அறிமுகங்களுக்கு :

நீங்களும் இனி, இமெயிலை டிக்டேட் செய்யலாம்

http---dictationநீங்கள் சொல்ல சொல்ல இமெயில் தானாகவே எழுதப்பட்டால் எப்படி இருக்கும் ? இது ஒன்றும் சாத்தியமாகாத மாயம் இல்லை. பேச்சறியும் மென்பொருள் ( ஸ்பீச் ரிகக்னிஷன் சாப்ட்வேர்) கைவசம் இருந்தால் , நாம் சொல்வதை அது புரிந்து கொண்டு எல்லாவற்றையும் வாக்கியங்களாக எழுதித்தரும். இப்போது இந்த வசதியை உங்கள் உலாவிக்கே ( பிரவுசர்) கொண்டு வந்திருக்கிறது டிக்டேஷன்.இயோ இணையதளம்.

இந்த தளத்தை உங்களது  நட்பான உதவியாளர் என்று வைத்துக்கொள்ளுங்களேன். இதில் நீங்கள் இமெயிலை டிக்டேட் செய்யலாம் . கட்டுரை மற்றும் ஆவணங்களை டிக்டேட் செய்யலாம். நீங்கள் சொல்லுவது இருந்தாலும் அதை எழுத்து வடிவில் டைப் செய்து தருகிறது இந்த தளம். இதை பயன்படுத்துவதும் எளிதானது தான். இதன முகப்பு பக்கத்தில் மாணவர்களின் நோட்டு பக்கம் போல கோடுகளை கொண்ட குறிப்பேடு இருக்கிறது. அந்த குறிப்பேட்டின் கிழே உள்ள , டிக்டேட் செய்யவும் பகுதியை கிளிக் செய்து விட்டு , யாரோ நீங்கள் சொல்வதை எல்லாம் கேட்க காத்திருப்பது போல மளமளவென்று சொல்ல வேண்டும். இப்படி சொல்லப்படுவதை எல்லாம் அந்த குறிப்பேடு டைப் செய்து தரும். 

இமெயில் அனுப்புவதாக இருந்தால் , அதை டைப் செய்யாமலே இப்படி டிக்டேட் செய்து அனுப்பிவிடலாம். அட நன்றாக இருக்கிறதே என வியக்கத்தோன்றுகிறாதா? 

பொதுவாக பேச்சறியும் மென்பொருளை தனியே வாங்கி பயன்படுத்த வேண்டும். ஆனால் இந்த தளமோ அதை தானே உள்ளீடு செய்து ,நம் பயன்பாட்டிற்கு தருகிறது. இந்த வசதி கூகுல் கூரோமிலேயே இருப்பது தான் . அது எத்தனை பேருக்கு தெரியும் எனத்தெரியவில்லை. ஆனால் இந்த தளம் கூகுல் குரோமில் உள்ளடங்கியுள்ள பேச்சறியும் மென்பொருள் வசதியை எல்லோரும் பயன்படுத்தக்கூடிய அழகான சேவையாக எளிதாக்கி தந்திருக்கிறது. பணிச்சுமை மிக்கவர்களுக்கும் ,எழுதுவதை ஒரு வேலையாக நினைப்பவர்களுக்கும் இந்த சேவை பேரூதவியாக இருக்கும்.

இவ்வளவு சொல்லிவிட்டு , இப்போது ஏமாற்றம் தரக்கூடிய ஒரு தகவல். இந்த டிக்டேஷன் சேவையை ஆங்கிலத்தில் தான் பயன்படுத்தலாம். இந்தி , தமிழ் உள்ளிட்ட இந்திய மொழிகளில் பயன்படுத்தும் வசதி இல்லை. இத்தனைக்கும், இந்தியரான அமீத் அகர்வால் தான் இந்த சேவையை உருவாக்கியுள்ளார். அப்படியும் இந்தியும் இல்லை , தமிழும் இல்லை. அகர்வால் வாருங்காலத்தில் இந்திய மொழிகளை கொண்டு வருகிறாரா என பார்க்கலாம். இல்லை கூகுலு குரோம் அதை செய்ய காத்த்ருப்பாரா என்று தெரியவில்லை.

இணையதள முகவரி: https://dictation.io/

பி.கு; naviதமிழில் இது போன்ற சேவையை , அருமையான சந்திப்பிழை சரிபார்ப்பு சேவையை வழங்கி வரும் நாவி சந்திப்பிழை திருத்தி போன்ற இணையதளங்களில் இருந்து எதிர்பார்க்கலாம். ஆனால் அதற்கு முதலில் இத்தகைய நல்ல தமிழ் முயற்சிகளை நாம் ஆதரிக்க வேண்டும். :