Tag Archives: facebook

இணைய யுகத்தின் இளம் சாதனையாளர்கள்

img005நம் காலத்து நாயகர்கள் புத்தகம் வெளியாகி இருக்கிறது. இணைய யுகத்தின் இளம் சாதனையாளர்களின் அறிமுக சித்திரங்களின் தொகுப்பு இந்த புத்தகம். இதே தலைப்பில் புதிய தலைமுறை கல்வி இதழில் தொடராக வெளிவந்து, தற்போது புதிய தலைமுறை வெளியீடாக வந்திருக்கிறது.

யார் இந்த நாயகர்கள் என கேட்கலாம்? நவீன இணையத்தில் நாம் தவறாமல் பயன்படுத்தும் முன்னணி இணைய சேவைகளை உருவாக்கியவர்கள் இவர்கள்.

பெரும்பாலானோர் அறிந்த பேஸ்புக், வாட்ஸ் அப், ஸ்கைப், வேர்ட்பிர்ஸ், பிளாகர், இன்ஸ்டாகிராம், யூடியூப் உள்ளிட்ட சேவைகளை உருவாக்கியவர்கள் முதல், பரவலாக அறியப்படாத ஆனால் அனைவரும் அறிந்து கொள்ள வேண்டிய லைப்ரரிதிங், டக் டக் கோ, யெல்ப், பின்டிரெஸ்ட் உள்ளிட்ட சேவைகளை உருவாக்கியவர்கள் வரை பல இணைய சாதனையாளர்களை இந்த தொகுப்பின் மூலம் அறிமுகம் செய்து கொள்ளலாம்.

ஏர்பிஎன்பி, டிக், சவுண்ட்கிளவுட், டிராப்பாக்ஸ், பிளாகர், கிளவுட், டெலிஷியஸ், லிங்க்டுஇன், உபெர், டிவிட்ச், கிவா, கிக்ஸ்டார்ட்டர், ரெட்டிட், டம்ப்ளர், பயர்பாக்ஸ் என நவீன இணையத்தின் அடையாளமாக கருதப்படும் சேவைகளை உருவாக்கிய நாயகர்களாக இந்த பட்டியல் நீள்கிறது.

இந்த சேவைகள் அனைத்துமே இணையத்தின் ஆற்றலை புதுமையாக பயன்படுத்திக்கொள்ள முற்பட்டதன் மூலம் முன்னணி சேவையாக உருவானவை. இவை அனைத்துமே ஏதேனும் ஒரு வகையில் புரட்சிகரமானவையும் கூட! இணையம் மூலம் தொலைபேசி சேவையை பயன்படுத்த வழி செய்த ஸ்கைப், வீடியோக்களை எளிதாக பகிர வைத்த யூடியூப், சிக்கலான பிரவுசர் அனுபவத்தை எளிதாக்கிய பயர்பாக்ஸ், இணைய கடன் வழங்க வழி செய்த கிவா, இணைய நிதி திரட்டும் மேடையான கிக்ஸ்டார்ட்டர், செய்தி பகிர்வை ஜனநாயகமயமாக்கிய டிக்  என இவை அனைத்துமே ஏதேனும் ஒரு வகையில் புரட்சிகரமானவை.

இந்த புதுயுக இணைய சேவைகள் சமகால வாழ்க்கையில் ஏற்படுத்திருக்கும் தாக்கம் நினைத்து கூட பார்க்க முடியாதது. பேஸ்புக், யூடியூப் மட்டும் அல்ல, கோப்பு பகிர்வுக்கான டிராப்பாக்ஸ், தொழில்முறை வலைப்பின்னலான லிங்க்டுஇன் உள்ளிட்ட சேவைகளையும் நம்மால் பயன்படுத்தாமல் இருக்க முடியாது.

இந்த சேவைகளுக்கு பின்னே இருக்கும் சாதனையாளர்கள் இவற்றை எப்படி உருவாக்கினர் என்பதை அவர்களின் அறிமுக சித்திரம் விவரிக்கிறது. சேவைக்கான எண்ணம் உதித்த விதம், அதை செயல்படுத்துவதில் எதிர்கொண்ட சவால்கள், போராட்டங்களையும், தடைகளையும் வெற்றி கொண்ட விதம் என சுவாரஸ்யமாகவும், ஊக்கம் அளிக்கும் வகையில் இந்த சித்திரங்கள் அமைந்திருப்பதை உணரலாம்.img006

இவை வெறும் வர்த்தக வெற்றிக்கதைகளோ, தொழில் சாகசங்களோ கிடையாது. இவை தனிமனித புகழ்ச்சியும் அல்ல: இணையம் உண்டாக்கி தந்துள்ள எல்லையில்லா சாத்தியங்களையும், புதிய வாய்ப்புகளையும் இணம் கண்டு கொண்டதன் மூலம் அவற்றை நடைமுறை வாழ்க்கைக்கே ஏற்ப பயனுள்ள சேவையாக மாற்றித்தந்த முன்னோடிகளின் பதிவுகள் இவை.

பெரிய அளவிலான பண பலமோ, வலுவான பின்பலமோ இல்லாமல், தங்கள் மனதில் உதித்த எண்ணத்தின் ஆற்றலால் மட்டும் இந்த சேவைகளை உருவாக்கியவர்கள் ஜெயித்திருக்கின்றனர். இந்த எண்ணத்தை வெற்றிகரமாக மாற்றுவதில் அவர்கள் வெளிப்படுத்திய வேட்கையும், தொழில்நுட்ப புரிதலுமே வெற்றிக்கு வழி வகுத்திருக்கின்றன. இவர்கள் உருவாக்கிய நிறுவனங்கள் பல பெரிய ஜாம்பவான் நிறுவனங்களுக்கு சவால் விடும் அளவுக்கு வளர்ச்சி அடைந்திருக்கின்றன. ஆனால் இத்தகைய புதுமையான சேவையை உருவாக்குவது என்பது ஏற்கனவே வெற்றி பெற்றுள்ள எந்த பெரிய நிறுவனத்திற்கும் சாத்தியமாகவில்லை.  அதனால் தான் இவர்கள் நம் காலத்து நாயகர்களாக மின்னுகின்றனர்.

 

நம் காலத்து நாயகர்கள் புத்தகம்

img005பேஸ்புக், ஸ்கைப், இன்ஸ்டாகிராம், டிரபாப்பாக்ஸ், சவுண்ட் கிளவுட் என நம் காலத்தில் நாம் அதிகம் பயன்படுத்தும் இணைய சேவைகள் மற்றும் இணையதளங்களை உருவாக்கிய இளம் நிறுவனர்களை அறிமுகம் செய்யும் வகையில் எழுதிய தொடர் ’நம் காலத்து நாயகர்கள்’ புத்தக வடிவில் வெளியாகிறது. புதிய தலைமுறை கல்வி வார இதழில் தொடராக வந்த இந்த கதைகள் புதிய தலைமுறை பதிப்பக வெளியீடாக புத்தக வடிவம் பெறுகிறது.
இது என்னுடைய மூன்றாவது புத்தகம். ஒரு விதத்தில் இரண்டாம் புத்தகமான நெட்சத்திரங்களின் இன்னொரு நீட்சி என இதை சொல்லலாம். நெட்சத்திரங்கள் இணையம் மூலம் புகழ் பெற்றவர்கள் வெற்றிக்கதைகளை விவரித்தது என்றால், நம் காலத்து நாயகர்கள் புத்தகம் இணைய உலகில் வெற்றி பெற்றவர்களையும், புதிய பாதை கண்டவர்களையும் அடையாளம் காட்டுகிறது.
இது வெறும் வெற்றிக்கதைகள் அல்ல. வெற்றியை முன் வைத்து எழுதப்பட்டதும் அல்ல. நம் காலத்தின் அடையாளமாக இணைய நிறுவனங்கள் மற்றும் நமக்கு இன்றியமையாததாக கருதும் மகத்தான இணைய சேவைகளை உருவாக்கி மனிதர்கள் இவர்கள்.
ஒவ்வொருவரும் ஒரு விதத்தில் முன்னோடிகள். ஒரு விதத்தில் கிளர்ச்சியாளர்கள். ஏற்கனவே இருந்த பாதை மற்றும் சிந்தனைகளில் இருந்து விலகி யோசித்து வெற்றி பெற்றவர்கள். பெரிய அளவில் பின்புலமே, செல்வாக்கோ இல்லாமல் தங்கள் ஐடியாவால் ஜெயித்தவர்கள் என்பது இவர்களின் பெரும்பாலானோரின் பொதுவான குணாதிசயம்.
பரவலாக அறியப்பட்ட வாட்ஸ் அப், ஸ்கைப், இன்ஸ்டாகிராம் போன்ற சேவைகளை உருவாக்கிய நிறுவனர்கள் தவிர அதிகம் அறியப்படாத வெற்றிக்கதைகளான லைப்ரரி திங், யெல்ப், பிண்டிரெஸ்ட், டம்பளர் ஆகிய வெற்றிக்கதைகளும் இதில் அடங்கியுள்ளன.
கொடுக்க வைக்கும் தளமான கிவா மற்றும், நிதி திரட்ட உதவும் இணைய மேடையான கிக்ஸ்டார்ட்டர் பற்றி எழுத முடிந்தத்தில் எனக்கு மட்டற்ற மகிழ்ச்சி. அதே போல வேர்பிரஸ் பின்னே உள்ள முல்லன்வெக் பற்றியும் பயர்பாக்ஸ் பின்னே உள்ள ராஸ் பற்றியும் எழுத முடிந்ததில் எனக்கு அளவில்லா மகிழ்ச்சி.
இந்த தொடரை எழுதிய எனக்கு ஒரு கற்றல் அனுபவமாகவே அமைந்தது. இணைய உலகம் தொடர்பான பல புதிய விஷயங்கள் மற்றும் ஆளுமைகளை அறிய முடிந்தது. தொடரை எழுத வாய்ப்பளித்த புதிய தலைமுறை கல்வி ஆசிரியர் பொன்.தனசேகரன் மற்றும் அவரிடம் பரிந்துரைத்த ஆரூயிர் நண்பர் சுந்தரபுத்தனுக்கும் நெஞ்சார்ந்த நன்றிகள்.புத்தக வடிவில் பதிப்பிக்கும் புதிய தலைமுறைக்கும் நன்றிகள் பல!

அன்புடன் சிம்மன்

தொழில்நுட்ப உலகின் சுவடுகளும், புதிய போக்குகளும்!

2016 ல் தொழில்நுட்ப உலகை திரும்பி பார்க்கும் போது சைபர் தாக்குதல்கள், பொய் செய்தி பிரச்சனை, தாக்காளர்கள் கைவரிசை ஆகிய நிகழ்வுகள் ஆதிக்கம் செலுத்தியதை பார்க்க முடிகிறது. பாட்கள் எனப்படும் தானியங்கி மென்பொருள்களின் எழுச்சி, செயற்கை நுண்ணறிவு தொடர்பான விவாதம், இணைய சமநிலைக்கான குரல் ஆகிய போக்குகளும் கவனத்தை ஈர்க்கின்றன. கூகுளின் பிக்சல் போன் அறிமுகம், ஸ்மார்ட்போன் பிரியர்களை பித்து பிடித்து அலைய வைத்த போக்கேமான் கோ விளையாட்டு, ஐஸ் பக்கெட் சாலெஞ்ச் போல பிரபலமாகி வரும் மேனிக்வன் சாலன்ஞ் ஆகிய போக்குகளும் முக்கியமாக திகழ்கின்றன. விடைபெறும் ஆண்டில் தொழில்நுட்ப உலகில் கவனத்தை ஈர்த்த முக்கிய நிகழ்வுகள் பற்றி ஒரு பார்வை:

பிரிபேசிக்சிற்கு தடை

இணைய சேவைகளை பயன்படுத்துவதில் பாரபட்சமான கட்டண முறையை கடைபிடிக்க கூடாது என தொலைதொடர்பு ஒழுங்குமுறை ஆணையமான டிராய் பிறப்பித்த தடையாணை இணைய சமநிலைக்கு ஆதரவான உத்தரவாக அமைந்தது. இந்த உத்தரவை அடுத்து பேஸ்புக் நிறுவனம் தனது சர்ச்சைக்குறிய பிரிபேசிக்ஸ் திட்டத்தை இந்தியாவில் விலக்கி கொள்வதாக அறிவித்தது. இணையதளங்களை இலவசமாக பயன்படுத்த வழி செய்வதாக பேஸ்புக் கூறினாலும், ஒரு பகுதி இணையத்தை மட்டுமே அணுக வழி செய்வதால் இந்த திட்டம் இணைய சமநிலைக்கு எதிரானது என கடும் விமர்சனத்திற்கு இலக்கானது.

வாட்ஸ் அப் என்கிரிப்ஷன்

முன்னணி மெசேஜிங் சேவையான வாட்ஸ் அப், செய்திகள், ஒளிப்படங்கள், வீடியோக்கள் என அனைத்துவிதமான பரிவர்த்தனைகளும் என்கிரிப்ஷன் முறையில் பாதுகாக்கப்படுவதாக அறிவித்து பரபரப்பை ஏற்படுத்தியது. இது இணைய உலகில் இன்கிர்பிஷன் தொடர்பான முக்கியத்துவத்தையும் உண்டாக்கியது. தரவுகள் பரிமாற்றத்தை சங்கேத குறியீடுகள் மூலம் பாதுகாக்கும் இந்த முறையால் அனுப்புகிறவர் மற்றும் பெறுபவர் மட்டுமே உரிய செய்தியை வாசிக்க முடியும்.

வாட்ஸ் அப் தனது தனியுரிமை கொள்கையை மாற்றி அமைத்ததும் பெரும் சர்ச்சையை ஏற்படுத்தியது. இதன் படி பயனாளிகளின் தொலைபேசி எண் உள்ளிட்ட தகவல்களை தாய் நிறுவனமான பேஸ்புக்குடன் பகிர்ந்து கொள்ள இருப்பதாக வாட்ஸ் அப் அறிவித்தது விவாத்ததையும் ஏற்படுத்தியது.

போக்கேமான் கோ மோகம்

ஸ்மார்ட்போன்களில் அறிமுகமான போக்கேமான் கோ விளையாட்டு, பெரும் வரவேற்பை பெற்று புதிய மோகமாக உருவானது. ஆக்மெண்டட் ரியாலிட்டி எனப்படும் மேம்படுத்தப்பட்ட யதார்தத்தை அடிப்படையாக கொண்டு உருவாக்கப்பட்ட இந்த விளையாட்டு, போக்கேமான் ஜீவராசிகளை தேடிப்பிடிப்பதற்காக ஸ்மார்ட்போன் பிரியர்களை வீடு, அலுவலகங்களை விட்டு வெளியேறி பொது இடங்களில் அலைய வைத்தது. குறிப்பிட்ட சில நாடுகளில் தான் முதல் கட்டத்தில் அறிமுகமானாலும் இந்த விளையாட்டு இந்தியா உள்பட பல்வேறு நாடுகளில் வரவேற்பை பெற்றது.

பொய் செய்தி பிரச்னை

சமூக ஊடகங்களின் செல்வாக்கு அதிகரித்து வரும் நிலையில், அவற்றின் மூலம் பகிரப்படும் பொய்ச்செய்தி பிரச்சனை கவலையை ஏற்படுத்தியது. குறிப்பாக அமெரிக்க அதிபர் தேர்தலின் போது டிரம்பிற்கு ஆதாரவாக ரஷ்யாவை மையமாக கொண்ட போலி இணையதளங்கள் சார்பில் உருவாக்கி உலாவிடப்பட்ட பொய்ச்செய்திகள் கவனத்தை ஈர்த்து விவாத்ததை ஏற்படுத்தின. பொய்ச்செய்திகளை கட்டுப்படுத்துவதில் தீவிரம் காட்டுவதாக பேஸ்புக், கூகுள் அறிவித்தன.

சைபர் தாக்குதல்

2016 ல் ஏதேனும் ஒரு வகையில் சைபர் தாக்குதல்கள் தலைப்புச்செய்தியில் இடம் பெற்றுக்கொண்டே இருந்தன. யாஹு நிறுவனம் தனது லட்சக்கணக்கான பயனாளிகள் தொடர்பான தகவல்கள் தாக்காளர்கள் கைவரிசைக்கு இலக்கானது தெரிவித்தது அதிர்ச்சியை ஏற்படுத்தியது. அமெரிக்க தேர்தல் செயல்முறையை பலவீனப்படுத்தும் வகையிலான செயலில் ரஷ்யவைச்சேர்ந்த தாக்காளர்கள் குழு ஈடுபட்டதாக செய்திகள் வெளியாயின. ஜனநாயக கட்சியின் பிரச்சார வலைப்பின்னல் தாக்குதலுக்கு இலக்கானது.

ராகுலுக்கு குறி

பேஸ்புக் நிறுவனர் மார்க் ஜக்கர்பர்க், கூகுள் சி.இ.ஒ சுந்தர்பிச்சை உள்ளிட்டோரும் தாக்காளர்களின் கைவரிசைக்கு இலக்கானார்கள். இந்தியாவில் காங்கிரஸ் துணைத்தலைவர் ராகுல் காந்தியின் டிவிட்டர் பக்கம் மற்றும் காங்கிரஸ் கட்சியின் டிவிட்டர் பக்கம் தாக்குதலுக்கு இலக்கானது.

பாட்களின் எழுச்சி

பாட்கள் என குறிப்பிடப்படும் தானியங்கி மென்பொருள்கள் தொடர்பான செய்திகள் பெருமளவு கவனத்தை ஈர்த்தன. அரட்டைக்கான பாட்கள், வர்த்தக நிறுவனம் சார்பில் வாடிக்கையாளர்களுக்கு வழிகாட்டும் பாட்கள் உள்ளிட்டவை வருங்காலத்தில் புதிய போக்காக அமையும் என வல்லுனர்கள் தெரிவித்தனர். வங்கிச்சேவை உள்ளிட்டவற்றில் இந்த வகை மென்பொருகளே வழிகாட்டும் நிலை உருவாகும் என எதிர்பார்க்கப்படுகிறது. பேஸ்புக்,கூகுள், மைக்ரோசாப்ட் ,ஆப்பிள் உள்ளிட்ட நிறுவனங்கள் இதில் தீவிரம் காட்டி வருகின்றன. இதே போலவே செயற்கை நுண்ணறிவு சார்ந்த ஆய்வுகளும் தீவிரமாகியுள்ளன. தானியங்கி மயமாக்களின் விளைவாக வேலை இழப்பு ஏற்படும் அபாயம் பற்றியும் ஆய்வுகள் வெளியாகின.

யு.பி.ஐ செயலி அறிமுகம்

தேசிய பேமெண்ட்ஸ் கார்ப்பரேஷன் உருவாக்கிய யு.பி.ஐ செயலி அறிமுகமானது. ஸ்மார்ட்போன் மூலம் வங்கி கணக்கில் இருந்து நேரடியாக பணம் அனுப்ப, பெற உதவும் இந்த செயலியை முன்னணி வங்கிகள் அறிமுகம் செய்தன. டிஜிட்டல் பரிவர்த்தனை தொடர்பான விவாதமும், விழிப்புணர்வும் அதிகரித்து வரும் நிலையில், பண பரிவர்த்தனைக்காக முக்கிய வழிகாக யு.பி.ஐ கவனத்தை ஈர்க்கிறது.

கபாலி தி பாஸ்

பெரிதும் எதிர்பார்ப்பை ஏற்படுத்திய நடிகர் ரஜினி காந்தின் கபாலி திரைப்படம் இணையத்தில் அதிர்வலைகளை எழுப்பியது. இந்த படத்தின் முன்னோட்டம் வெளியான போது இணையத்திலும், சமூக ஊடகங்களிலும் கபாலிடா எனும் பதம் டிரெண்டானது. முன்னோட்ட காணொலி யூடியூப்பில் பெரும் வரவேற்பை பெற்றது. படம் வெளியான போதும் டிவிட்டரில் ரஜினியின் திரை செல்வாக்கை வெளிப்படுத்தும் குறும்பதிவுகள் அதிக அளவில் பகிரப்பட்டன.

சுஷ்மாவின் சுறுசுறுப்பு’

வெளியுறவுத்துறை அமைச்சரான சுஷ்மா ஸ்வராஜ், டிவிட்டர் மூலம் தொடர்பு கொண்டவர்களுக்கு தேவையான உதவிகளை செய்வதில் சுறுசுறுப்பாக செயல்பட்டு அனைவரது பாராட்டையும் பெற்றார். டிவிட்டர் பயன்பாட்டில் முன்னுதாரணமாக திகழும் ஸ்வராஜ், நோய்வாய்ப்பட்டு மருத்துவமனையில் அனுமதிக்கப்பட்ட தகவலையும் டிவிட்டர் மூலம் தானே பகிர்ந்து கொண்டார். இணையவாசிகள் அவர் நலம்பெற விரும்பி குறும்பதிவுகளை வெளியிட்டனர்.

கலைநயமான செயலி

ஆண்ட்ராய்டு மற்றும் ஐபோன்களுக்காக எண்ணற்ற செயலி அறிமுகமானாலும், பிரிஸ்மா செயலி பெரும்பாலானோரின் கவனத்தை ஈர்த்தது. பயனாளிகள் தங்கள் ஒளிப்படங்களை நவீன ஓவியம் போல மாற்றிக்கொள்ள வழி செய்யும் இந்த செயலி வாயிலாக பகிரப்பட்ட படங்கள் அவற்றின் கலைநயமான தோற்றத்திற்காக வரவேற்பை பெற்றன.

கூகுள் பிக்சல் போன்

கூகுள் நிறுவனம் அறிமுகம் செய்த பிக்சல் ஸ்மார்ட்போன்கள் ஆண்டின் சிறந்த ஸ்மார்ட் அறிமுகங்களில் ஒன்றாக திகழ்கிறது. கூகுள் நிறுவனத்தால் நேரடியாக அறிமுகம் செய்யப்பட்ட முதல் ஸ்மார்ட்போன் எனும் அந்தஸ்து மற்றும் இதன் மேம்பட்ட தொழில்நுட்ப அம்சங்கள் பரவலாக பேசப்பட்டன. புதிய ஆண்ட்ராய்டு இயங்குதளத்தை அடிப்படையாக கொண்டு அறிமுகமானது. ஐபோன் 7பிளஸ், சாம்சங் காலெக்ஸி எஸ் 7, மோட்டோ இசட், ஜியோமி ரெட்மி 3எஸ் பிரைம், எச்டிசி 10 உள்ளிட்ட ஸ்மார்ட்போன்களின் குறிப்பிடத்தக்கதாக அமைந்தன. இவற்றில் காலெக்ஸி 7 போன்கள் அவற்றின் தீப்பிடித்துக்கொள்ளும் தன்மைக்காக சர்ச்சைக்கு இலக்காயின.

ஸ்னேப்சேட் கண்ணாடி’

தானாக மறையும் ஒளிப்படங்களை பகிர்ந்து கொள்ள வழி செய்யும் ஸ்னேப்சேட் நிறுவனம், புதிய முக்கு கண்ணாடியை அறிமுகம் செய்தது. ஸ்னேப்சேட் ஸ்பெக்டகல் எனும் இந்த சாதனம் அறுவை சிகிச்சை உள்ளிட்டவற்றை நேரடி ஒளிபரப்பு செய்ய உதவி வருகிறது. அணிகணிணி உலகில் புதிய போக்காக அமையலாம் என எதிர்பார்க்கப்படுகிறது.

சாய்வாலா புகழ்

இணையம் மூலம் பல படங்களும், வீடியோக்களும் வைரலாக பரவி புகழ் பெற்றன என்றாலும், பாகிஸ்தானில் டீக்கடை ஒன்றில் பணியாற்றிய வாலிபர் ஒரு ஒளிப்படத்தால் ஒரே நாளில் இணையம் முழுவதும் அறிந்தவரானார். அர்ஷ்த் கான் எனும் அந்த வாலிபர் டீக்கடை ஒன்றில் டீ ஆற்றிக்கொண்டிருக்கும் காட்சியை ஒளிப்படக்கலைஞர் ஒருவர் தனது டிவிட்டர் பக்கத்தில் பகிர்ந்து கொண்டார். அந்த வாலிபரின் அழகான தோற்றமும், பச்சை நிற கண்களும் கவர்ந்திழுத்தி அவரது ஒளிப்படத்தை லட்சகணக்கானோர் பகிர வைத்தது. அவரது பாகிஸ்தானை சேர்ந்தவராக இருந்தது இந்தியர்கள் மத்தியில் கூடுதல் கவனத்தை ஏற்படுத்தியது. இணைய புகழ் காரணமாக இந்த வாலிபருக்கு விளம்பர பட வாய்ப்பும் தேடி வந்தது. இதே போல அமெரிக்காவில் டேம் டேனியல் எனும் வாலிபர் தனது அழகான தோற்றத்திற்காக இணைய புகழ் பெற்றார்.

இணைய மயக்கம்

பெண்மணி ஒருவரின் கால்களின் தோற்றமும் இணையதத்தை குழப்பத்தில் ஆழ்த்தியது. அந்த படத்தில் உள்ள கால்களின் தோற்றம் பளபளப்பாக இருக்கிறதா? அல்லது அவற்றின் மீது வெள்ளை பெயிண்ட் பூசப்பட்டிருக்கிறதா? எனும் கேள்விக்கு தெளிவாக பதில் சொல்ல முடியதாதே இந்த படத்தை பற்றி பேச வைத்தது. இணையம் இதற்கு பதில் அளிப்பதில் சரி பாதியாக பிரிந்து நின்றது. அதே போல பள்ளி மாணவர்களுக்கான் குதிரை படங்களை கொண்ட அல்ஜீப்ரா புதிரும் இணையத்தை கவர்ததது.

வைரல் வீடியோ

சில ஆண்டுகளுக்கு முன்னர் குளிரிந்த நீரை மேலே கொட்டிக்கொள்ளும் ஐஸ் பக்கெட் சாலெஞ் வீடியோ வைரலானது போல 2016 இறுதியில் சிலையாக நிற்கும் மானிக்குவன் சாலஞ்ச வைரலானது. பின்னணியில் இசை ஒலிக்க, ஒரு செயலை செய்து கொண்டிருக்கும் போதே இடையே சிலையாக நிற்பது போல காட்சி தரும் வகையிலான வீடியோவை பகிர்வது புதிய போக்காக உருவாகி இருக்கிறது.

 

 

நன்றி. தமிழ் இந்துவுக்காக எழுதியது

 

 

மீண்டும் மறைந்த யுனிக்ஸ் நிறுவனர் டென்னிஸ் ரிட்சி!

ritchieதொழில்நுட்ப முன்னோடிகளில் ஒருவராக மதிக்கப்படும் டென்னிஸ் ரிட்சி மறைந்துவிட்ட செய்தி தொடர்பான கட்டுரையை பேஸ்புக் டைம்லைனில் பார்த்த போது அதிர்ச்சியாக இருந்தது. என்னது ரிட்சி மீண்டும் மறைந்துவிட்டாரா? என்று கேடக்கத்தோன்றியது. ஏனெனில் ரிட்சி, மறைந்து ஐந்தாண்டுகள் ஆகின்றன. 2011 ம் ஆண்டு அக்டோபர் மாதம் மறைந்த அவர் மீண்டும் எப்படி மறைந்திருக்க முடியும்!

ரிட்சி மறைவு செய்தி இணைப்பை கிளிக் செய்து பார்த்தால், வயர்டு இதழின் அந்த செய்தி ஒரு மீள் பிரசுரமாக இருந்தது. அநேகமாக ரிட்சி மறைவை நினைவு கூறும் வகையில் அந்த செய்தி வெளியிடப்பட்டிருக்கலாம். எது எப்படியோ இணையவெளியில் இந்த செய்தி பரவி, சி கம்ப்யூட்டர் மொழி கண்டுபிடிப்பாளர் மற்றும் யூனிக்ஸ் இணை நிறுவனரான முன்னோடி ரிட்சி மறைந்தார் எனும் விதமாக சமூக ஊடக தளங்களில் நினைவுக்குறிப்புகளும் வெளியாகத்துவங்கின.

இதில் கவனிக்க வேண்டிய விஷயம் என்ன என்றால், கூகுள் சி.இ.ஓ சுந்தர் பிச்சை போன்றவர்களும் இந்த செய்தியை பகிர்ந்து கொண்டதால் குழப்பம் மேலும் அதிகரித்தது.
இந்த குழப்பம் பற்றி சிநெட் இணையதளம் வெளியிட்டுள்ள கட்டுரையில் பல கவனிக்க வேண்டிய விஷயங்கள் இருக்கின்றன.

தொழில்நுட்ப வலைப்பதிவாளரான ஒம் மாலிக் என்பவர் தான் இந்த செய்திக்கட்டுரையை டிவிட்டரில் முதலில் பகிர்ந்து கொண்டு தனது இரங்கலை தெரிவித்துள்ளார். அதன் பிறகு சுந்தர் பிச்சை உள்ளிட்ட பலர் அதை பகிர்ந்து கொண்டுள்ளனர். இதனையடுத்து பேஸ்புக் மற்றும் டிவிட்டரில் இந்த செய்தி அதிகம் பகிரப்பட்டது.
ஆனால் நல்லவேளையாக இதற்குள் ஓம் மாலிக் தனது தவற்றை உணர்ந்து அதை திருத்திக்கொண்டார். ஐந்த ஆண்டுக்கு முந்தையை செய்தியை தேதியை பார்க்காமல் பகிர்ந்து கொண்டது தவறு தான் என மன்னிப்பு கேட்டுக்கொண்டுள்ளார்.

இதை கவனித்த சுந்தர்பிச்சை, இருந்தாலும் என்ன, மறைந்த முன்னோடியை நினைவு கூற இது ஒரு வாய்ப்பானது என்பது போல கருத்து தெரிவித்திருந்தார்.
ரிட்சி நிச்சயம் மறக்கப்படாமல் நினைவு கூறப்பட வேண்டிய மேதை தான், ஆனால் அதற்காக அவரை மீண்டும் ஒரு முறை மறையச்செய்ய வேண்டுமா என்ன?

ஆனால், கவனிக்க வேண்டிய விஷயம் என்ன என்றால் இது ரிட்சிக்கு மட்டும் நிகழுந்துள்ள விஷயம் அல்ல. கடந்த ஆண்டு ஜோ கோக்கர் எனும் அமெரிக்க பிரபலம் இறந்துவிட்டதாக பேஸ்புக், டிவிட்டரில் பரவலாக அஞ்சலி செலுத்தப்பட்டது. விஷயம் என்ன என்றால், கோக்கர் முந்தைய ஆண்டே மறைந்துவிட்டார். ஏதோ பழைய செய்தி பேஸ்புக்கில் தீயாக பரவிவிட்டது.

இது போல ஏற்கனவே மறைந்த பிரபலங்கள் மீண்டும் மறைந்து விட்டதாக செய்திகள் வெளியாவும், அஞ்சலி செலுத்தப்படுவதும் இணையத்தில் அடிக்கடி நிகழ்கின்றன என்கின்றனர். இந்த நிகழ்வுக்கு இரண்டாம் மரண பாதிப்பு ( செகண்ட் டெத் சிண்ட்ரோம்) என பெயரால் குறிப்பிடப்படுகிறது.

தினமும் கோடிக்கணக்கில் பேஸ்புக்கிலும் ,டிவிட்டரிலும் தகவல்கள் வெளியாகி கொண்டிருக்கும் போது, பழைய செய்திகள் அல்லது நினைவு குறிப்புகள் அவசரத்தில் தவறுதலாக புரிந்து கொள்ளப்பட்டு இப்படி பகிரப்படுவதாக விளக்கம் தரப்படுகிறது. இப்படி சமூக ஊடகங்களால் மீண்டும் மரணிப்பவர்களின் எண்ணிக்கை அதிகமாகி கொண்டே இருப்பதற்கு யூனிக்ஸ் இணை நிறுவனர் ரிட்சியின் மறு மரணம் ஒரு உதாரணம்.
பிரபலங்கள் மறைவுக்கு நினைவாஞ்சலில் செலுத்துவதற்கான பரவலான வேட்கையும் இதற்கு ஒரு காரணம் என்று சொல்லப்படுகிறது.

காரணம் எதுவாக இருந்தாலும், அடுத்த முறை பிரபலங்களின் மறைவு செய்தியை பகிரும் முன் அல்லது நினைவாஞ்சலி செலுத்தும் முன், அந்த செய்தியை உறுதி செய்து கொள்ள ஒரு சில நிமிடங்கள் செலவிடுவது நல்லது.

சந்தேகத்திற்கு உரிய செய்தி என்றால், அதன் உண்மை தன்மையை உறுதி செய்து கொள்ள, இணைய பொய்களை அம்பலமாக்கும் ஸ்னோஸ்.காம் ( snopes.com ) போன்ற இணையதளங்களை நாடலாம்.
இந்த விஷயத்தில் கவனிக்க வேண்டிய விஷயம், வலைப்பதிவாளர் ஓம் மாலிக்கின் நேர்மை. வயர்டு செய்தியின் தேதியை சரியாக பார்க்காமல் பழைய செய்தியை பகிர்ந்து கொண்ட, அவர் பின்னர் அந்த தவற்றை உணர்ந்து பகிர்ங்கமாக மன்னிப்பு கேட்டுள்ளார். மன்னிப்பு கேட்டதோடு, இப்படி பொறுப்பில்லாமல் நடந்து கொண்டதற்காக தன் மீதே வருத்தப்படுவதாகவும் தெரிவித்துள்ளார். இதற்கான வரிசையாக இரண்டு மூன்று குறும்பதிவுகளை வெளியிட்டுள்ளார்.

தவறுகளை ஒப்புக்கொள்ளும் இந்த திறந்த மனத்திலான அணுகுமுறை இணைய உரையாடலில் மிகவும் முக்கியம். அந்த வகையில் ஓம் மாலிக்கிறகு (@om ) சபாஷ்.

* சினெட் விளக்க கட்டுரை: https://www.cnet.com/news/tech-luminaries-laud-dennis-ritchie-5-years-after-death-second-death-syndrome/
* வயர்டு பழைய கட்டுரை:https://www.wired.com/2011/10/dennis-ritchie/

குறிப்பு: டென்னிஸ் ரிட்சி நவீன கம்யூட்டரின் முன்னோடியாக போற்றப்படுகிறார். ஸ்டீவ் ஜாப்ஸ் உள்ளிட்ட பல முன்னோடிகளுக்கு அவர் உந்துசக்தியாக இருந்திருக்கிறார். தனது கண்டுபிடிப்பை பொருளாதார நோக்கில் பயன்படுத்திக்கொள்ள நினைக்காமல் கம்ப்ட்யூட்டர் மொழி வளர்ச்சியில் மட்டும் கவனம் செலுத்தியவராகவும் அவர் கொண்டாடப்படுகிறார்.

———

அரசு இணையதளங்கள் எப்படி இருக்க வேண்டும்?

feat_artificialintelligence_1அரசு அமைப்புகளின் இணையதளங்கள் எந்த நிலையில் இருக்கின்றன என்று நமக்கு நன்றாகத்தெரியும். ஆனால் அவை எப்படி இருக்க வேண்டும் என்று தெரியுமா? இந்த கேள்விக்கு விடை காண்பது ஒரு பக்கம் இருக்கட்டும், இந்த கேள்வி எழுப்புவதன் அவசியத்தை முதலில் புரிந்து கொள்ள வேண்டும்.

இன்றைய தேதியில் இணையத்தின் முக்கியத்துவம் பற்றி வகுப்பெடுக்க வேண்டிய தேவையே இல்லை. இ-காமர்ஸ், வங்கிச்சேவை, செய்திகள், பொழுதுபோக்கு, கல்வி, தகவல் அறிதல் என்று எல்லாவற்றுக்கும் இணையத்தை பயன்படுத்துகிறோம். கருத்துக்களை வெளியிட சமூக ஊடகங்களை அதிகம் நாடுகிறோம். இன்னும் அடுக்கி கொண்டே போகலாம்.

இணையதளங்கள் மற்றும் இணைய சேவைகள் நவீன வாழ்க்கையில் இரண்டற கலந்துவிட்டன. இணைய பயன்பாடு தொடர்பாக பல்வேறு விவாதங்களும் நடைபெற்று வருகின்றன. இணைய வேகம் பற்றியும், இணையதளங்களின் அணுகும் தன்மை பற்றி எல்லாம் கூட விவாதிக்கிறோம். எல்லாம் சரி, அரசு அமைப்புகளின் இணைய செயல்பாடு எப்படி இருக்கின்றன? அரசு இணையதளங்கள் எத்தனை பேர் ஆர்வத்துடன் பயன்படுத்துகிறோம்? அவற்றின் பயன்பாடு பற்றி என்ன நினைக்கிறோம்?

அநேகமாக நாம் அதிகம் பயன்படுத்தும் அரசு இணையதளம் ரெயில்வே முன்பதிவுக்கான ஐ.ஆர்.சி.டி.சி இணையதளமாக தான் இருக்க வேண்டும். தேவை தான் இதற்கு காரணம்! பொதுவாகவே அரசு இணையதளங்கள் நாம் தேவை கருதி தான் அணுகும் நிலை இருக்கிறது இல்லையா? குறிப்பிட்ட தகவல் தேவை என்றால் அல்லது, குறிப்பிட்ட சேவைக்காக விண்ணப்பிக்க அரசு இணையதளங்களை நாடுவது இயல்பாக இருக்கிறது. இது புரிந்து கொள்ளக்கூடியதே.

இதற்கு மாறாக இணையவாசிகள் விரும்பி விஜயம் செய்யும் அபிமான தளங்களின் பட்டியலில் அரசு இணையதளங்களே ஏதேனும் இருக்க கூடுமா? என்று தெரியவில்லை. இவ்வளவு ஏன் தேவை கருதி செல்லும் போதே கூட அரசு தளங்கள் ஏமாற்றத்தையும், அதிருப்தியை தரலாம். பெரும்பாலான அரசு தளங்கள் கற்கால வடிவமைப்புகள் கொண்டதாக இருக்கின்றன. பல தளங்கள் அரசு கையேடுகளின் இணைய வடிவமாகவே எந்த புதுமையும் இல்லாமல் வெறுமையாக அமைந்திருக்கும். அதோடு தகவல்கள் உடனுக்குடன் புதுப்பிக்கப்படாமல் எப்போதும் ஒரு வித தேக்கத்துடனே இருப்பதை பல தளங்களில் பார்க்கலாம். அதிக பட்சம் போனால் செய்தி குறிப்புகள் மற்றும் அறிக்கைகள் இடம்பெற்றிருக்கும். அவையும் கூட உடனுக்குடன் புதுப்பிக்கப்படாமல் இருக்கலாம்.

நிற்க, அரசு இணையதளங்களை குறை சொல்வதல்ல என நோக்கம். அவற்றின் பொதுவான நிலையை சுட்டிக்காட்ட விரும்புகிறேன். இந்த சுட்டிககாட்டலின் நோக்கம், அரசு அமைப்புகளின் இணையதளங்கள் துடிப்பானதாக, செயல்திறன் மிக்கதாக இருக்க வேண்டும் என்ற எண்ணமும், அவை பெரும்பாலும் அவ்வாறு இல்லை என்ற ஆதங்கமும் தான்.

ஒரு நல்ல இணையதளம் எப்படி இருக்க வேண்டும் என்பதற்கு தெளிவான இலக்கணம் இருக்கிறது. இது அழகியல் சார்ந்ததல்ல: இதன் முக்கிய அம்சம் பயன்பாட்டுத்தன்மை மற்றும் அணுகும் தன்மை. இந்த அம்சங்களைப்பொருத்தவரை மற்ற இணையதளங்களை விட அரசு தளங்களிடம் இருக்கும் கூடுதலாக எதிர்பார்க்கப்படுகிறது. ஏனெனில் அரசு மக்களுக்கு கடமைப்பட்டிருக்கிறது. மக்களுக்கு தகவல்களை வழங்கவும், சேவை அளிக்கவும் இணைய வழியை பயன்படுத்தும் வாய்ப்பு இருக்கும் போது அதை செய்வது என்பது ஒரு ஜனநாயக கடமையாகவே ஆகிறது.
ஆனால் எத்தனை அரசு தளங்கள் இதை நிறைவேற்றுகின்றன. காலாவதியான வடிவமைப்பை கூட பொறுத்துக்கொள்ளலாம் ஆனால் தகவல்கள் உரிய முறையில் புதுப்பிக்கப்படாமல் இருப்பதை எப்படி பொறுத்துக்கொள்வது? பேஸ்புக் ,டிவிட்டர் என சமூக ஊடக வசதிகள் வந்துவிட்ட நிலையில் அரசு தளங்கள் அவற்றை ஒருங்கிணைத்தாக இருக்க வேண்டும் என்பது இயல்பான எதிர்பார்ப்பு தானே. அரசு தளங்கள் பொது மக்களுக்கு பயனுள்ள வகையில் துடிப்பானதாக இருக்க வேண்டும் அல்லவா!

இந்த நிலைக்கு பல காரணங்கள் இருக்கலாம். இணைய பிரிவுக்கு போதுமான ஊழியர்களும், நிதியும் ஒதுக்கப்படாதது துவங்கி, அரசின் பரம்பரை குணமான சிவப்பு நாடா கட்டுப்பாடு வரை பல காரணங்கள் இருக்கலாம். இவற்றை எல்லாம் விட முக்கிய காரணம், இணையத்தின் ஆற்றலை சரியாக புரிந்து கொள்ளாத தன்மையாகவே இருக்க வேண்டும். இந்த கால கட்டத்தில் இத்தகைய அறியாமை இருக்க வாய்ப்பில்லை என்பதால், இணையத்தின் முக்கியத்துவத்தை உணர்ந்தும் கூட அதை செயல்படுத்த முற்படாத சோம்பலும், அலட்சியமும் காரணமாக இருக்கலாம்.

ஆனால் இந்த நிலைக்கு அரசு அமைப்புகளையும் அதிகாரிகளையும் மட்டும் குறை சொல்ல முடியாது. மிகச்சிறந்த இணைய சேவை அளிக்க அரசை நாம் நிர்பந்திக்கவில்லை என்பது இன்னொரு முக்கிய காரணம். ‘
அதாவது எப்படி, பெரும்பாலான விஷயங்களில் அரசின் தன்மையை அப்படியே ஏற்றுக்கொள்கிறோமோ அதே போலவே இணைய விஷயத்திலும் அரசு தளங்கள் என்றால் இவ்வளவு தான் என இருந்து விடுகிறோம். வேறு என்ன செய்ய வேண்டும் எனும் கேள்வி உங்கள் மனதில் எழுந்தால், அமெரிக்காவின் கவ்டெக் இணையதளம் பற்றி தெரிந்து கொள்ள வேண்டும். இந்த பதிவே அந்த இணையதளத்தை பார்த்து வியந்து போனதால் எழுதப்படுவது தான்.
கவ்டெக் இணையதளம், உண்மையில் ஒரு இணைய பத்திரிகை. அதன் நோக்கம் அமெரிக்காவில் அரசு அமைப்புகளில் நவீன தொழில்நுட்பத்தின் பயன்பாடு எப்படி இருக்கிறது என்பதை ஆய்வுக்கு உட்படுத்தி அதை மேம்படுத்துவது தான். இத்தனைக்கும் அது ஒரு தனியார் அமைப்பின் லாபநோக்கிலான முயற்சியாகவே தோன்றுகிறது. அரசு அமைப்புகள் மற்றும் கல்வித்துறையில் தொழில்நுட்ப பயன்பாட்டின் புதுமையில் கவனம் செலுத்தி வரும் இ.ரிப்பளிக் எனும் நிறுவனம் இந்த இணைய பத்திரிகையை நடத்தி வருகிறது.
இந்த பத்திரிகையின் உள்ளடக்கமும், அதில் வெளியாகும் கட்டுரைகள் கவனம் செலுத்தும் விஷயங்களும் கவனத்தை ஈர்க்கின்றன. எல்லாமே ஏதேனும் ஒரு வகையில் நவீன தொழில்நுட்பத்தை அரசு அமைப்புகள் மக்கள் நோக்கில் பயன்படுத்துவது தொடர்பானவை.

உதாரணத்திற்கு இந்த மாத இதழின் முகப்பு கட்டுரை, அரசு மற்றும் உள்ளாட்சி இணையதளங்கள் நவீனப்படுத்தப்பட வேண்டியதன் அவசியம் பற்றி பேசுகிறது. அரசு தளங்கள் தங்கள் வடிவமைப்பு உத்தியை மறு சீரமைத்து மேம்படுத்த வேண்டும் என்று விரிவாக அலசுகிறது இந்த கட்டுரை.

மற்றொரு கட்டுரை, அரசின் நல்ல இணையதளத்தையும், மக்கத்தான இணையதளத்தையும் வேறுபடுத்துவது எது என்று கேட்கிறது. முந்தைய இதழ்களின் கட்டுரை இன்னும் கூட செறிவாக உள்ளன.
விஷயம் இது தான், அரசு அமைப்புகளின் இணைய செயல்பாடுகள் பற்றியும் அவற்றின் உத்தி பற்றியும் நாமும் அலசி ஆராய்ந்து உரையாடலை உண்டாக்க வேண்டும்.

எந்த விதங்களில் எல்லாம் இணைய தொழில்நுட்பத்தை பயன்படுத்தி மக்களுக்கு சேவை அளிகக் முடியுமோ அந்த வழிகளில் எல்லாம் அரசு அமைப்புகள் முயற்சி மேற்கொண்டாக வேண்டும்!

கவ்டெக்.காம் இணையதளம்: http://www.govtech.com/magazines/gt/Government-Technology-September-2016.html