Tag Archives: facebook

எந்திரன்களிடம் எப்படி பேச வேண்டும்?

 

maxresdefaultஎந்திரன் படத்தில் சந்தானமும், கர்ணாசும் சிட்டி ரோபோவிடம் இடக்காகவும், ஆபாசமாகவும் பேசி விட்டு அதற்காக நாயகன் ரஜினியிடன் வாங்கி கட்டிக்கொள்வது போல ஒரு காட்சி வரும். வெறும் நகைச்சுவை என்பதை மீறி இந்தக்காட்சி எதிர்காலத்தில் நினைவில் கொள்ள வேண்டிய செய்தியை கொண்டிருக்கிறது தெரியுமா? எந்திரன்களிடம் கன்ணியமாக நடந்து கொள்ள வேண்டும் என்பது தான் அந்த செய்தி. இல்லை எனில் விளைவுகள் விபரீதமாக இருக்கலாம். வேலையை இழக்கும் அபாயமும் ஏற்படலாம்!

உடனே எந்திரன் போன்ற சூப்பர் ரோபோ நடைமுறையில் இப்போதைக்கு சாத்தியமில்லையே என்று வாதாட  முற்பட வேண்டாம்.  இத்தகைய எந்திரன்கள் பழக்கத்திற்கு வர காலம் ஆகலாம் என்றாலும், நம்முடன் உரையாடல் நடத்தக்கூடிய, கேள்விகளுக்கு பதில் சொல்லகூடிய மென்பொருள் எந்திரன்கள் நிச்சயம் சர்வ சகஜமாக இருக்கும்.

இந்த போக்கு ஏற்கனவே துவங்கிவிட்டது. ஆப்பிளின் சிறியும், மைக்ரோசாப்டின் கார்ட்டனாவும், அமேசானின் அலெக்சாவும் இதற்கான உதாரணங்கள். அரட்டை இயந்திரங்கள் ( சாட் பாட்) என குறிப்பிடப்படும்  மென்பொருள்களில் இவை டிஜிட்டல் உதவியாளர்கள் எனும் பிரிவின் கீழ் வருகின்றன. போனுக்குள் வீற்றிருக்கும் உதவியாளர்கள். இந்த மென்பொருள்கள் அடிப்படையான செயற்கை அறிவை கொண்டிருப்பதோடு, எந்திர கற்றல் ஆற்றலையும் கொண்டுள்ளன. எனவே, இவை பயனாளின் கேள்விகளுக்கு பதில் அளித்து அவர்களுடன் உரையாடும் ஆற்றல் பெற்றிருப்பதோடு, காலப்போக்கில் பயனாளிகளின் விருப்பு வெறுப்புகளை புரிந்து கொண்டு, அதற்கேற்ப  பரிந்துரகளை வழங்க கூடியவையாக இருக்கும். உதாரணத்திற்கு, தொடர்ந்து இளையராஜா பாடல்களை விரும்பிக்கேட்டால், இந்த மென்பொருள்கள் அதை புரிந்து கொண்டு, ஓய்வு நேரத்தில் ராஜாவின் பாடலை ஒலிக்கச்செய்யலாம்.

கூகுளும் கூட இந்த பிரிவில் ஒரு மென்பொருளை பெற்றிருக்கிறது. பேஸ்புக்கும் இந்த பிரிவில் விஷேச கவனம் செலுத்தி வருகிறது. அதோடு  வாடிக்கையாளர் சேவையில் இருந்து, காப்பீடு அல்லது முதலீடு பரிந்துரை போன்றவற்றை மென்பொருள்கள்வழங்கத்துவங்கியிருக்கின்றன. வங்கிகள், இகாமர்ஸ் நிறுவனங்கள், வர்த்தக நிறுவனங்கள் இது போன்ற மென்பொருள் எந்திரன்களை பயன்படுத்த துவங்கியுள்ளன.

ஸ்டார்ட் அப் நிறுவனங்களும் கூட இத்தகைய எந்திரன்களை உருவாக்குவதில் ஆர்வம் காட்டி வருகின்றன. குறிப்பாக நிதிச்சேவை பிரிவில் பல வகையான அரட்டை மென்பொருள் எந்திரங்கள் உருவாக்கப்பட்டுள்ளன. ரோபோ அட்வைசர் என குறிப்பிடப்படும் இவை, கேள்விகளுக்கு முதலீட்டாளர்கள் அளிக்கும் பதில்களின் அடிப்படையில் அவர்களுக்கு ஏற்ற முதலீட்டு வாய்ப்புகளை பரிந்துரைக்கின்றன. நிதிச்சேவைகளுக்கான செலவை குறைக்கவும், அவற்றை பரவலாக்கவும் இந்த வகை ’பாட்க’ள் கைகொடுக்கும் என்று கருத்தும் உற்சாகமாக முன்வைக்கப்படுகிறது.

இவ்வளவு ஏன் செய்தி சேகரிப்புக்கு கூட இத்தகைய மென்பொருள்களை உருவாக்கி களமிறக்கலாம். அலுவலக பணிகளுக்கும் இவை உருவாக்கப்படலாம். இன்னும் பலவிதங்களில் இவற்றை பயன்படுத்தலாம். நாமும் கூட இவற்றை பலவிதங்களில் பயன்படுத்தலாம் என்பதையும் நினைவில் கொள்ளுங்கள். எனவே தான் நாம் இவற்றிடம் எப்படி நடந்து கொள்கிறோம் என்பதில் எச்சரிக்கையாக இருக்க வேண்டியது அவசியமாகிறது. இவற்றிடம் வாய்த்துடுக்கு காட்டுவதோ அல்லது வசை பாடுவதோ வில்லங்கமாக அமையலாம். இப்படி தான் ஹார்வர்டு பிஸ்னஸ் ரிவ்யூ கட்டுரை ஒன்று எச்சரிக்கிறது.

எல்லாம் சரி மென்பொருள்களிடம் நாம் ஏன் வாய் கொடுக்கப்போகிறோம் என்று கேட்பதற்கில்லை. ஏனெனில் ஏற்கனவே பலர் இதை தான் செய்து கொண்டிருக்கின்றனர். டிஜிட்டல் உதவியாளர் மென்பொருள்கள் அளிக்கும் பதில் திருப்தி அளிக்கவில்லை அல்லது ஏமாற்றம் தரும் விதமாக இருந்தால், அதன் பயனாளிகள் கடுப்பாகி கோபத்தை வார்த்தைகளாக வெளிப்படுத்துவது அடிக்கடி நடக்கவே செய்கிறது. ஆப்பிளின் சிறி மென்பொருள் மீதோ, மைக்ரோட்சாப்டின் கார்ட்டனா மென்பொருள் மீதோ பயனாளிகள் கோபம் கொண்டதற்கான எண்ணற்ற உதாரணங்கள் இருக்கின்றன. மேலும் தெளிவு தேவை எனில் இது தொடர்பாக கூகுளில் தேடிப்பாருங்கள்.

பொதுவாக டிஜிட்டல் உதவியாளர் மென்பொருள்கள் புத்திசாலித்தனமாக உருவாக்கப்பட்டிருந்தாலும் அவற்றில் போதாமைகள் அதிகம். இன்றைய வானிலை எப்படி இருக்கும் என்றோ, நகரில் குறிப்பிட்ட திரையரங்கில் என்ன திரைப்படம் பார்க்கலாம் என்றோ பொதுவாக கேட்டால் இவை சரியாக பதில் சொல்லிவிடும். ஆனால் குறிப்பிட்ட கேள்விகளுக்கு இவை சொதப்பிவிடலாம். இது போன்ற நேரங்களில் பலருக்கு சிரிப்பு வரலாம். இன்னும் சிலருக்கு கோபம் வரலாம். அதனால் ஆபாசமாக திட்டவும் செய்யலாம்.

மென்பொருள் தானே திட்டினால் என்ன ஆகிவிடும் என்றும் கேட்கத்தோன்றலாம். இந்த மென்பொருள்கள் உணர்வில்லாதவையாக இருக்கலாம், ஆனால் பதில் பேசாமல் இருக்கக்கூடியவை அல்ல. மோசமான வார்த்தைகள் பேசப்படும் போது, கொஞ்சம் பார்த்துப்பேசுங்கள் என்று இவை பதிலுக்கு சொல்லக்கூடும். ’ஒரு போன் நம்மை பார்த்து வாயை மூடச்சொல்கிறதே’ என இது போன்ற ஒரு சம்பவத்தை உதாரணம் காட்டுகிறது ’மெட்ரோ’ பத்திரிகை கட்டுரை.

பெரும்பாலான நவீன அரட்டை மென்பொருள்கள் பயனாளிகள் கேள்விகளுக்கு பதில் அளிப்பதோடு, அவர்கள் சொல்லும் வார்த்தைகளை புரிந்து கொள்ளும் தன்மையும் கொண்டிருக்கின்றன. அதாவது பயனாளிகள் நடவடிக்கையை பார்த்து அவையும் கற்றுக்கொண்டு தங்களை மேம்படுத்திக்கொள்கின்றன. ஆப்பிளின் சிறி மென்பொருள், ஆபாச வார்த்தைகள் இனங்கண்டு கொண்டு, கொஞ்சம் பார்த்து பேசுங்கள் என்று சொன்னது இப்படி தான்.

ஆக, நாம் விவாதிக்கும் விஷயத்திற்கு வந்துவிட்டோம். அரட்டை மென்பொருள்கள் பயனாளிகளுடனான உரையாடல் மூலம் கற்றுக்கொள்ளும் எந்திர கற்றல்( மிஷின் லேர்னிங்) ஆற்றலுடன் உருவாக்கப்பட்டிருப்பதால் அவை காலப்போக்கில் மேலும் மேலும் புத்திசாலி ஆகிவிடும் எனும் எதிர்பார்ப்பு இருக்கிறது. ஆக நாம் நல்லவிதமாக பேசினால் மென்பொருள்கள் அதற்கேற்ப கற்றுக்கொண்டு, அடுத்த முறை தொடர்புடைய கேள்விகள் வரும் போது பொருத்தமாக பதில் அளிக்கும். மாறாக அவற்றிடம் மோசமாக பேசினால் அவை தப்பும் தவறுமான விஷயங்கள் கற்றுக்கொள்ளும்.

மைரோசாப்ட் நிறுவனம் அறிமுகம் செய்த ’டே’ எனும் செயற்கை அறிவு சார்ந்த மென்பொருள், மற்றவர்களுடன் பேசத்துவங்கியவுடன், நாசிசம் பற்றி பேசவும், ஹிட்லர் நல்லவர் என கூறவும் கற்றுக்கொண்டுவிட்டது. இந்த சம்பவம் பெரும் சர்ச்சையை ஏற்படுத்தி இயந்திர கற்றலில் உள்ள சிக்கல்களை உணர்த்தியது. ஒரு சில விஷமத்தனமான பயனாளிகள் அதனிடம் விவகாரமான முறையில் உரையாடியதன் விளைவு இது.

இப்படி தான் பலரும், நடந்து கொள்வதாக டாக்டர்.ஷெரில் பிரானம் எனும் ஆய்வாளரும் கூறுகிறார். மென்பொருள்களுடனான மனிதர்கள் உரையாடல் பற்றி விரிவாக ஆய்வு நடத்தியிருக்கும் ஷெரில், 50 சதவீதம் வரையான இத்தகையை உரைடால்கள் அவதூறான வகையில் இருப்பதாக பேட்டி ஒன்றில் தெரிவித்துள்ளார். ஆக, மனிதர்களாகிய நம்முடைய நயத்தக்க நாகரீகம் இவ்வளவு தான். பாட்களிடம் பேசும் போது நம்மில் பலர், எந்திரன் சந்தானம் போலவே நடந்து கொள்ளும் வாய்ப்பிருக்கிறது.

ஆனால், இது பாட்களுக்கும் நல்லதல்ல. நமக்கும் நல்லதல்ல.

பாட்களுக்கு ஏன் நல்லதல்ல என எளிதாக புரிந்து கொள்ளலாம். நாம் வசைபாடினால் அவை நல்ல விஷயங்களை எப்படி கற்றுக்கொள்ள முடியும். சரி, இதனால் பயனாளிகளுக்கு என்ன பிரச்சனை? என்று கேட்கலாம்.

இந்த பாட் வகை மென்பொருள்கள் உருவாக்கத்திலும், ஆய்விலும் அமேசான், கூகுள் உள்ளிட்ட நிறுவனங்கள் பெரும் செல்வத்தையும், உழைப்பையும் முதலீடு செய்துள்ளன. இவற்றின் மீது மிகுந்த நம்பிக்கையும் வைத்துள்ளன. ஆகவே அவை தங்கள் மென்பொருள் படைப்புகள் பயனாளிகளால் மோசமாக நடத்தப்படுவதை விரும்பாது என்பதோடு இவ்வாறு நிகழ்வதை தவிர்க்கவே முயற்சிக்கும். அது மட்டும் அல்ல, மோசமாக நடத்தப்படும் போது அதை உணர்ந்து கொண்டு, புகார் செய்யவும் இவை புரோகிராம் செய்யப்படலாம் என்கிறது ஹார்வர்டு பிஸ்னஸ் ரிவ்யூ கட்டுரை.

நிறுவனங்களில் பலவிதமான பணிகளுக்கு டிஜிட்டல் உதவியாளர்கள் பயன்படுத்தப்படும் போது, பலரும் பழக்க தோஷத்தில் அவற்றை வசை பாடலாம், வம்புக்கு இழுக்கலாம், மோசமான வார்த்தைகளை பேசலாம். ஆனால் நிறுவனங்கள் இவற்றை பார்த்துக்கொண்டு சும்மா இருக்காது என்கிறது இந்தக்கட்டுரை. மோசமான உரையாடல்கள் தங்கள் மென்பொருள்களின் ஆற்றலை பாதிக்கும் என்பதால் நிறுவனங்கள் அவற்றிடம் தரக்குறைவாக நடந்து கொள்ளும் ஊழியர்களை கண்டறிந்து அவர்கள் மீது நடவடிக்கை எடுக்கும் வாய்ப்பு இருப்பதாக குறிப்பிடப்பட்டுள்ளது. விஷமத்தனம் கொண்ட ஊழியர்கள் பாட்களிடம் ஆபாசமாக பேசுவது தெரியவந்தால், மனிதவள அதிகாரியிடம் இருந்து அழைப்பு வந்து வேலையில் இருந்து நீக்கப்படலாம்.

எனவே தான் நாளைய அலுவலகங்களில் பாட்களிடம் மோசமாக நடந்து கொள்வது ஏற்றுக்கொள்ளப்படாத விஷயமாக இருக்கும் என்றும் இந்தக்கட்டுரையில் தெரிவிக்கப்பட்டுள்ளது. எனவே பாட்களிடம் எப்படி பேச வேண்டும் என நாம் கற்றுக்கொள்வதும் நல்லது தான்.

எச்.பி.ஆர் கட்டுரை: https://hbr.org/2016/10/why-you-shouldnt-swear-at-siri

மெட்ரோ செய்தி; http://metro.co.uk/2017/10/05/heres-what-happens-when-you-swear-at-or-insult-apples-siri-6942091/

 

நன்றி; யுவர்ஸ்டோரிக்காக எழுதியது

 

 

 

பேஸ்புக் நட்பு இலக்கணம்

People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images
People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images

திருவிளையாடல் திரைப்படத்தின் சிவபெருமான் –புலவர் தருமி உரையாடலை இணைய யுகத்திற்கு ஏற்ப அப்டேட் செய்ய வேண்டும் எனில், பேஸ்புக்கில் செய்யக்கூடிவையும், செய்யக்கூடாதவையும் என தருமி கேட்பதாக சேர்த்துக்கொள்ளலாம். அந்த அளவுக்கு பேஸ்புக் பயன்பாட்டில் கவனம் கொள்ள வேண்டிய விஷயங்கள் இருக்கின்றன. புதிய நட்பை தேடிக்கொள்ளவும், நண்பர்களோடு உரையாடவும் பேஸ்புக் அருமையான வழி தான். ஆனால் பேஸ்புக்கில் பகிரும் தகவல்கள் நட்பையும், விருப்பங்களையும் (லைக்ஸ்) மட்டும் பெற்றுத்தருவதில்லை. பல நேரங்களில் வில்லங்கத்தையும் தேடித்தரலாம்.

பேஸ்புக் நட்புக்கான வலைப்பின்னல் சேவை என்றாலும், பெரும்பாலானோரால் அது ஒரு வெளியீட்டு சாதனமாகவும் பயன்படுத்தப்படுகிறது. மனதில் உள்ள எண்ணங்களை பகிரவும், நாட்டு நடப்புகள் குறித்து கருத்து தெரிவிக்கவும் பேஸ்புக் சுவற்றை பயன்படுத்துவது என்பது அதன் பயனாளிகளுக்கு இயல்பாக இருக்கிறது. பலரும் ஆழமான கருத்துக்களை நீள் பதிவுகளாக வெளியிடவும் பேஸ்புக்கை பயன்படுத்தி வருகின்றனர். வலைப்பதிவு உலகில் இயங்கி வந்தவர்களில் பலர் பேஸ்புக்கிற்கு மாறிவிட்டதாகவும் தெரிகிறது.

மிகை பகிர்வு!

எதை எடுத்தாலும் பேஸ்புக்கில் வெளியிடுவது என்பது மிகை பகிர்வு பழக்கமாக மாறி இருப்பது மற்றும் கலாய்த்தால், கேலி செய்தல், சண்டையிடுதல், துவேஷம் கக்குதல், தனிமனித தாக்குதல் உள்ளிட்டவை பேஸ்புக் பயன்பாடு தொடர்பான விவாதத்தை ஏற்படுத்தியிருக்கிறது. பேஸ்புக்கில் நல்லவையும் உண்டு, தீயவையும் உண்டு எனும் நிலையில், அந்த சேவையை சரியாக பயன்படுத்துவது என்பது பயனாளிகளின் கைகளில் தான் இருக்கிறது.

பேஸ்புக் நிலைத்தகவல்களை எப்படி வெளியிடுவது என்பதும், மற்றவர்கள் தகவல்களுக்கு எவ்வாறு எதிர்வினை ஆற்றுவதும் அவரவர் விருப்பமும், உரிமையும் சார்ந்தது. பேஸ்புக் சேவையை எப்படி பயன்படுத்துவது என்பது தொடர்பாக விதிமுறைகளை எல்லாம் உருவாக்க முடியாது என்றாலும், பயனாளிகள் தங்கள் நலன் கருதி (மற்றவர்கள் நலனுக்காகவும் தான்) பேஸ்புக்கில் சில அடிப்படையான நெறிமுறைகளை கடைப்பிடிப்பது நல்லது என இணைய வல்லுனர்கள் கருதுகின்றனர்.

நண்பர்கள் மட்டும்

முதல் விஷயம், சமூக வலைப்பின்னல் சேவையாக பேஸ்புக்கின் தன்மையை புரிந்து கொள்ள வேண்டும். பேஸ்புக்கை நண்பர்களின் இருப்பிடம் என நீங்கள் கருதினாலும், உங்கள் பதிவுகளை கவனித்துக்கொண்டிருப்பது நண்பர்கள் மட்டும் அல்ல; அறிமுகம் இல்லாதவர்களும் தான். நண்பர்கள், நண்பர்களின் நண்பர்கள், அவர்களின் நண்பர்கள் என விரியும் நட்பு வலையில் நேரடியாக அறிமுகம் இல்லாதவர்களும் இருக்கலாம். எனவே பொதுவெளியில் எதை எல்லாம் பகிர்வோமோ அவற்றை மட்டுமே பேஸ்புக் சுவற்றில் பகிர்வது சரியாக இருக்கும். புகைப்படங்களை பகிர்ந்து கொள்வதையே எடுத்துக்கொள்வோம். ஒருவர் தன்னுடைய திருமண ஆல்பத்தை சாலையில் சென்று கொண்டிருப்பவர்களிடம் எல்லாம் காண்பிக்க விரும்புவாரா, என்ன? ஆனால் பேஸ்புக்கில் இதற்கு நிகரான செயலை தான் பலரும் செய்கின்றனர். ஊருக்கு போன படத்தையும், வீட்டில் பிறந்த நாள் அல்லது திருமண நாள் கொண்டாடிய படத்தையும் உடனுக்குடன் பகிர்ந்து கொள்கின்றனர்.

இப்படி படத்தை பகிர்வதன் நோக்கத்தை விமர்சிப்பதோ, கேலி செய்வதே அல்ல நம் நோக்கம்; இந்த பகிர்வால் ஏற்படக்கூடிய வில்லங்களும், விபரீதங்களும் தான் கவனத்தில் கொள்ளப்பட வேண்டியவை. எத்தனையோ படங்களை இதுவரை வெளியிட்டிருக்கிறோம், எந்த பிரச்சனையும் வந்தது இல்லையே என நீங்கள் கேட்கலாம். வராத வரை சந்தோஷம் என நினைத்துக்கொள்ளுங்கள். ஆனால் தனிப்பட்ட படங்களை பேஸ்புக் போன்ற பொதுவெளியில் பகிர்வது எப்போதுமே ஆபத்தானது தான். எப்போது என்ன நோக்கில் அவை பயன்படுத்தப்படலாம் எனத்தெரியாது.

உதாரணத்திற்கு கேளிக்கை விருந்து நிகழ்ச்சியில் ஒருவர் உற்சாகமாக மது அருந்தும் புகைப்படத்தை தனது நண்பர்கள் வட்டத்தில் பகிர்ந்து கொள்ளலாம். ஆனால் அந்த படத்தை அலுவலக மேலதிகாரி பார்க்கும் நிலை ஏற்பட்டால் என்னாகும் யோசித்துப்பாருங்கள். அதிலும், அவர் உடல்நிலை சரியில்லை என காரணம் கூறி அலுவலகத்தில் விடுப்பு கோரியிருந்தால், நிலைமை மோசமாகிவிடும் அல்லாவா! அது மட்டும் அல்ல, இந்த புகைப்படம் காப்பீடு நிறுவனத்தின் பார்வையில் பட்டாலும் சிக்கலாகலாம். குடிப்பழக்கம் என்பது காப்பீடு கோரிக்கை நிராகரக்கப்படுவதற்கான காரணமாக கூட அமையலாம். நிஜ வாழ்க்கையில் இப்படி பாதிப்பு ஏற்பட்டதற்கான கதைகள் இருக்கின்றன. அது மட்டும் அல்ல, புகைப்படங்களில் உள்ளவர்கள் எல்லாம் எங்கங்கோ டேக் செய்யப்படுவதும், முகம் உணர் தொழில்நுட்பம் காரணமாக, புகைப்படங்களில் உள்ளவர்கள் அடையாளம் காணப்படும் சாத்தியத்தையும் எண்ணிப்பார்க்க வேண்டும்.

புகைப்படம் பகிரும் முன்!

எனவே, புகைப்படங்களை பகிரும் முன், இது அவசியமா? என ஒரு முறை கேட்டுக்கொள்ளுங்கள், புகைப்படத்தை வேறு மாற்று வழியில் நண்பர்களுடன் பகிரலாமா? என்றும் யோசித்துப்பாருங்கள். பல நேரங்களில் நண்பர்களுக்கு இமெயில் மூலம் படங்களை அனுப்பி வைப்பது சரியாக இருக்கும்.

இதே போலவே பணி நிமித்தமாகவோ அல்லது தனிப்பட்ட முறையிலோ வெளியூர் பயணங்களுக்கு செல்லும் போது, எல்லோருக்கும் சொல்லிக்கொள்வது போல அந்த செய்தியை பகிர்வது தவிர்க்கப்பட வேண்டியது. ஏனெனில் ஒருவர் ஊரில் இல்லை என்பதை அவரது நண்பர்கள் மட்டும் அல்ல, விஷமிகள் யாரேனும் கூட தெரிந்து கொண்டு அந்த தகவலை தவறாக பயன்படுத்த முற்படலாம். பேஸ்புக்கில் வெளியூர் சென்ற தகவலை பார்த்துவிட்டு அவரது வீட்டில் கொள்ளையடிக்கப்பட்ட சம்பவம் எல்லாம் மேலைநாட்டில் நடந்திருக்கின்றன.  பொதுவாகவே இருப்பிடத்தை காட்டும் தகவல்களை பேஸ்புக்கில் மட்டும் அல்ல, இணையத்தில் பகிராமல் இருப்பதே நல்லது. எப்படியும் இணைய நிறுவனங்களும், உளவு மென்பொருள்களும் ஓயாமல் இணையவாசிகளை பின் தொடர்ந்து அவர்கள் இணைய சுவடுகளை கண்காணித்து தகவல்களை சேகரிக்கின்றன. இதில் நம் பங்கிற்கு நாமும் இருப்பிடம் சார் தகவல்களை இணைய சுவடாக பதிவு செய்ய வேண்டுமா?

இருப்பிடம் சார் தகவல்களை தவிர்ப்பது போலவே, தொலைபேசி எண் அல்லது இல்ல முகவரியையும் டைம்லைனில் பகிரக்கூடாது. தொலைபேசி எண் போன்றவை தேவை எனில், இன்பாக்ஸ் வழியே தனியே செய்தி அனுப்பிக்கொள்ளலாம்.

நம்மைப்பற்றிய தகவல்களை பகிர்வதில் கவனமாக இருப்பது போலவே நண்பர்கள், உறவினர்கள் தொடர்பான தகவல்களை பகிர்வதிலும் கவனம் தேவை. அவர்கள் பொதுவெளியில் பகிர விரும்பாத தகவல்களை நாம் வெளியிடாமல் இருப்பதே சரியானது.

துவேஷம் வேண்டாம்

பொதுவாக மற்றவர்கள் மீது துவேஷம் கொண்ட கருத்துகள், மிரட்டல், சீண்டல் கருத்துக்களை வெளியிடாமல் இருக்க வேண்டும். எதிர் கருத்தை கூறினாலும், கண்ணியமான வார்த்தைகளை பயன்படுத்த வேண்டும். தேவையில்லாத கேலி, கிண்டலை தவிர்த்தல் நல்லது.

ஒரே விஷயம் தொடர்பாக பதிவுகளை வெளியிடுவதும் ஏற்றதல்ல. இது நண்பர்களை வெறுப்புக்குள்ளாக்கும். உங்கள் ஆர்வம் சார்ந்த கருத்துகள் நிறைய இருந்தால் அதற்கென தனியே ஒரு பேஸ்புக் பக்கம் துவங்கி பகிர்ந்து கொள்வது பொருத்தமாக இருக்கும்.

அதே போல், அறிமுகம் இல்லாதவர்களின் கோரிக்கையை ஏற்றுக்கொள்ள வேண்டாம். முதலில் அவர்களைப்பற்றிய விவரங்களை தெரிந்து கொண்டு பிறகு முடிவு செய்யுங்கள். நண்பர்கள் எண்ணிக்கை அதிகரிப்பதை பெருமையாக கருத வேண்டாம். அர்த்தமுள்ள உரையாடல் சாத்தியமாக வேண்டும் என்பதே முக்கியம்.

பேஸ்புக்கில் எட்டிப்பார்க்கும் சுவாரஸ்யமான விளையாட்டுகள் மற்றும் செயலிகளை பயன்படுத்தும் முன், அவை உங்களைப்பற்றிய தனிப்பட்ட தகவல்களை சேகரிக்க கூடியவை என்பதை மனதில் கொள்ளுங்கள். 20 வருடம் கழித்து நீங்கள் எப்படி தோற்றம் அளிப்பீர்கள் அல்லது நீங்கள் எந்த பிரபலம் போல இருக்கிறீர்கள் என உணர்த்தும் செயலிகள் சுவாரஸ்யமாக இருக்கலாம். ஆனால் அந்த செயலிகளை பயன்படுத்தும் போது உங்கள் முழு டைம்லைனையும் அவற்றின் வசம் ஒப்படைக்கு நிலை இருக்கலாம் என்பதை பலரும் கவனிப்பதில்லை.

மேலும் பணியிடத்து சிக்கல்கள் குறித்து புலம்புவதும் தேவையில்லாத வம்பை விலை கொடுத்து வாங்குவது போன்றது தான்.

இவைத்தவிர, பேஸ்புக்கின் பிரைவசி செட்டிங் வசதி பற்றியும் அறிந்திருக்க வேண்டும். நிலைத்தகவல்கள் பொது வெளியில் பகிரப்பட வேண்டியவையா அல்லது நண்பர்கள் வட்டத்தில் மட்டும் தெரிய வேண்டியவையா என்பதை தீர்மானிக்கும் வசதி செட்டிங் பகுதியில் இருக்கிறது. தனிப்பட்ட பகிர்வு எனில் அவற்றை நண்பர்கள் வட்டத்தில் மட்டுமே பகிர்ந்து கொள்வது சரியாக இருக்கும். பேஸ்புக் வழங்கும் பிரைவஸி அமைப்புகள் பற்றி தெரிந்து கொள்வதோடு, பொறுமையாக நேரம் எடுத்துக்கொண்டு பேஸ்புக்கின் பிரைவசி கொள்கை பற்றியும் கூட படித்துப்பார்ப்பது பல விஷயங்களை புரிய வைக்கும்.

 

நன்றி; புதிய தலைமுறை இதழில் நிறைவடைந்த எண்டெர்.நெட் தொடருக்கான எழுதியது.

பேஸ்புக்கில் நீங்கள் யார்?

People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images
People are seen as silhouettes as they check mobile devices whilst standing against an illuminated wall bearing Facebook Inc.s logo in this arranged photograph in London, U.K., on Wednesday, Dec. 23, 2015. Facebook Inc.s WhatsApp messaging service, with more than 100 million local users, is the most-used app in Brazil, according to an Ibope poll published on Dec. 15. Photographer: Chris Ratcliffe/Bloomberg via Getty Images

சமூக வலைப்பின்னல் சேவையான பேஸ்புக்கை நீங்கள் பயன்படுத்தும் முறை குறித்து எப்போதாவது யோசித்திருக்கிறீர்களா? அதாவது பேஸ்புக்கை எதற்காக, எப்படி பயன்படுத்துகிறீர்கள் என்று நினைத்துப்பார்த்தது உண்டா? இதுவரை இப்படி யோசித்ததில்லை எனில், இப்போது, உங்கள் பேஸ்புக் பயன்பாடு குறித்து யோசியுங்கள். ஏனெனில், பேஸ்புக்கில் நீங்கள் என்னவாக இருக்கிறீர்கள் எனும் கேள்விக்கான விடையை ஆய்வாளர்கள் கண்டறிந்துள்ளனர். அது உங்களுக்கு பொருந்துகிறதா என பார்க்க, பேஸ்புக்கை நீங்கள் எப்படி எல்லாம் பயன்படுத்துகிறீர்கள் என்பதை கொஞ்சம் சுய ஆய்வுக்கு உள்ளாக்கி கொள்வது நல்லது தானே.

இனி பேஸ்புக் தொடர்பான ஆய்வை பார்ப்போம்.

பேஸ்புக்கின் தாக்கமும், வீச்சும் அதன் பயனாளிகள் அறிந்தது தான். அண்மை புள்ளிவிவரப்படி பேஸ்புக் 200 கோடி பேர் பயனாளிகளுக்கு மேல் பெற்றுள்ளது. சராசரியாக ஒவ்வொரு நாளுன் 128 கோடி பேர் அதை பயன்படுத்துகின்றனர். பேஸ்புக் பயனாளி சராசரியாக தினமும் 35 நிமிடம் இந்த தளத்தில் செல்வு செய்கிறார்.  இவர்கள் ஒவ்வொருவரும் பேஸ்புக்கை ஒவ்வொரு விதமாக பயன்படுத்தலாம். நோக்கங்களும் மாறுபடலாம். ஆனால் இந்த இரண்டிலுமே பரவலான பொதுத்தன்மைகளை காணலாம்.

இந்த பொதுத்தன்மையை தான் அமெரிக்க ஆய்வாளர்கள் தங்கள் ஆய்வு மூலம் கண்டறிந்து அறிக்கையாக தந்துள்ளனர். பிரிகாம் யங் பல்கலைக்கழகத்தை சேர்ந்த இந்த ஆய்வாளர்கள் முன்வைக்கும் கண்டுபிடிப்பு என்னவெனில் பேஸ்புக் பயனாளிகளை அடிப்படையில் நான்கு வகையாக பிரிக்கலாம் என்பது தான். அதாவது பேஸ்புக் பயனாளிகளில் நான்கு வகை இருப்பதாக இந்த ஆய்வு சொல்கிறது.

உறவுகளை வலுப்படுத்துபவர்கள், தண்டோரா போடுபவர்கள், சுயபுராணம் பாடுபவர்கள் மற்றும் வேடிக்கை பார்ப்பவர்கள் என இந்த நான்கு வகையான பயனாளிகளை அமைகின்றனர் என தெரிவிக்கப்பட்டுள்ளது. இந்த வகையினருக்கான பேஸ்புக் குணங்களும் தெரிவிக்கப்பட்டுள்ளன.

முதல் வகையான உறவுகளை மேம்படுத்துபவர்கள், பேஸ்புக்கை தங்கள் நிஜ வாழ்க்கையின் நீட்டிப்பாக, குடும்பத்தினர் மற்றும் நண்பர்களுடன் பயன்படுத்திக்கொள்கின்றனர். இவர்கள் நிலைத்தகவல்களை வெளியிடுவதற்கு பின்னே உறவுக்கு கைகொடுப்போம் என்ற நோக்கம் இருப்பதாக ஆய்வாளர்கள் தெரிவிக்கின்றனர். அதாவது பேஸ்புக்கிற்கு வெளியே உள்ள உறவுகளை வலுப்படுத்திக்கொள்வதற்காக தான் நிலைத்தகவல்களை வெளியிடுவதிலும், பதிவுகளுக்கு பதில் சொல்வதிலும் இவர்கள் கவனம் செலுத்துகின்றனர். கொஞ்சம் ஆச்சர்யமாக இருக்கிறது என்றாலும், குடும்பத்தின் மீதான அன்பை வெளிப்படுத்தவும், அவர்கள் தங்கள் அன்பை வெளிப்படுத்தவும் பேஸ்புக் உதவுவதாக இந்த பிரிவினர் கூறியிருக்கின்றனர். இந்த பிரிவினர் ஒளிப்படங்களையும், காணொலிகளையும் அதிகம் பகிர்கின்றனர்.

இரண்டாவது பிரிவினர் தண்டோரா போடுபவர்களாக இருக்கின்றனர். இவர்களுக்கு தங்களை வெளிப்படுத்திக்கொள்வதைவிட உலகில் என்ன நடக்கிறது என்பதையும், நாட்டு நடப்புகளை பதிவு செய்வதிலும் தான் ஆர்வம் அதிகம். இவர்கள் பெரும்பாலும் செய்திகளையும் நிகழ்வுகளையும் பகிர்ந்து கொள்கின்றனர். அதே நேரத்தில் தங்கள் அறிமுக பக்கத்தை அப்டேட் செய்வதில் அதிக ஆர்வம் காட்டாதவர்களாக இருக்கின்றனர்.

மூன்றாவது பிரிவினர் சுயநல செல்பீக்கள். அதாவது தங்களை முன்னிறுத்திக்கொள்ளவும், விளம்பரப்படுத்திக்கொள்ளவும் பேஸ்புக்கை பயன்படுத்துபவர்கள். முதல் பிரிவினரைப்போலவே இவர்களும் ஒளிப்படங்கள் மற்றும் காணொலிகளை அதிகம் பகிர்ந்தாலும் நோக்கம் எல்லாம், இவற்றுக்கு எத்த்தனை லைக்குகள் குவிகின்றன என்பதிலேயே இருக்கின்றன. எந்த அளவுக்கு லைக் தொடர்பான அறிவிப்புகள் வருகின்றனவோ அந்த அளவு சக மனிதர்களால் அங்கீகரிக்கப்படுவதாக நினைக்கின்றனர்.

சரியோ தவறோ தங்களைப்பற்றிய ஒரு பிம்பத்தை பேஸ்புக் மூலம் உருவாக்குவது தான் செல்பி பிரிவினரின் நோக்கமாக அமைகிறது.

நான்காவது பிரிவினர், ஷாப்பிங் மால்களில் எதையும் வாங்காமல் அப்படியே உலா வந்து வேடிக்கை பார்ப்பவர்களுக்கு நிகரானவர்கள். இவர்கள் பேஸ்புக்கிலும் இப்படி தான் செய்து கொண்டிருக்கின்றனர். தங்களைப்பற்றி தனிப்பட்ட தகவல்களை பதிவு செய்வதில் ஆர்வம் காட்டாமல், மற்றவர்கள் என்ன செய்கின்றனர் என்பதை அறிந்து கொள்ள முற்படும் கில்லாடிகளாக இருக்கின்றனர். பேஸ்புக்கில் யாரது பக்கத்தை வேண்டுமானாலும் எட்டிப்பார்த்து அவர்கள் விருப்பு வெறுப்புகளை தெரிந்து கொள்வேன் என்று கூறுபவர்களாக இந்த பிரிவினர் இருக்கின்றனர்.

இந்த நான்கு வகை பேஸ்புக் பயனாளிகளில் தண்டோரா போடுபவர்களும், வேடிக்கை பார்ப்பவர்களும் புதிதாக வெளிச்சத்திற்கு வந்து இருப்பவர்கள் என ஆய்வை முன்னின்று நடத்திய பேராசிரியர் டாம் ராபின்சன் வியப்புடன் கூறியுள்ளார். ஏனெனில், இதற்கு முன்னரும் பேஸ்புக் பயன்பாடு தொடர்பாக பல ஆய்வுகள் நடத்தப்பட்டுள்ளன. அவற்றின் அடிப்படையில் பேஸ்புக் பயனாளிகளும் வகைப்படுத்தப்பட்டுள்ளனர். அந்த வகையினருடன் பொருத்திப்பார்க்கும் போது, உறவுகளை மேம்படுத்துபவர்களும், சுய புராணம் பார்ப்பவர்களும் எற்கனவே அறியப்பட்டுள்ளனர். ஆனால் மற்ற இரு பிரிவினரும் புதிதாக உள்ளனர் என ராபின்சன் கூறுகிறார்.

இந்த இரு பிரிவினர் குறித்து இதுவரை யாரும் அதிகம் பேசியதில்லை என்று கூறுபவ தங்கள் ஆய்வில் இவர்கள் மிகவும் பொருத்தமானவர்களாக தெரிகின்றனர் என்கிறார்.

ராபின்சனும் குழுவினரும் இந்த ஆய்வை மிக விரிவாகவே நடத்தியுள்ளனர். பேஸ்புக்குடனான தொடர்பு குறித்து 48 விதமான வாசகங்களை கொடுத்து அதற்கான கருத்துக்களை பயனாளிகளிடம் இருந்து பெற்று அதன் பிறகு தனிப்பட்ட கேள்விகளை கேட்டு ஆய்வை நடத்தியுள்ளனர். மக்கள் ஏன் பேஸ்புக்கில் தங்கள் வாழ்க்கையை வெளிப்படுத்திக்கொள்ள முற்படுகின்றனர் என்பதை ஆதார கேள்வியாக கொண்டு ஆய்வு நடந்திருக்கிறது.

ஆய்வு முடிவுகள் சுவாரஸ்யம் தருபவையாக இருப்பதோடு சிந்திக்கவும் வைக்கின்றனர். எல்லாம் சரி, இந்த நான்கு ரகத்தில் நீங்கள் எந்த ரகம் என நினைக்கிறீர்கள்? அந்த ரகம், இந்த ரகம் என தீர்மானிக்கும் முன் ஆய்வாளர்கள் சொல்லும் இன்னொரு முக்கியமான விஷயத்தையும் நினைவில் கொள்ளுங்கள். பேஸ்புக் பயனாளிகளில் பலர், இவற்றில் ஒன்றுக்கு மேற்பட்ட வகையினருடன் தங்களை தொடர்பு படுத்துக்கொள்ளலாம் என்பது தான் அது. ஒன்றுக்கும் மேற்பட்ட வகையினரின் குணத்தை பார்க்க முடிந்தாலும், குறிப்பிட்ட ஒரு வகையின் தாக்கம் தூக்கலாக இருக்கும் என்கின்றனர் ஆய்வாளர்கள். ஆய்வில் பங்கேற்றவர்களே கூட, இதில் கொஞ்சம் அதில் கொஞ்சம் என பதில் கூறினாலும், பெரும்பாலும் பார்த்தால் இது தான் என குறிப்பிட்ட ஒரு பிரிவின் பக்கம் சாய்ந்துள்ளனர். இனி, ஆய்வின் படி நீங்கள் எந்த வகை பேஸ்புக் பயனாளி என ஆய்வு செய்து கொள்ளுங்கள்!

 

 

தளம் புதிது: இணைய குலுக்கல் நடத்த உதவும் தளம்

நடைமுறை வாழ்க்கையில் செய்யும் பல விஷயங்களை இணையம் மூலம் இன்னும் எளிதாக செய்ய உதவும் இணையதளங்கள் பட்டியலில் நேம்பிக்கர்நிஞ்சா தளத்தையும் சேர்த்துக்கொள்ள வேண்டும்.

இந்த தளம், பல பெயர்களை கொண்ட பட்டியலில் இருந்து ஏதேனும் ஒரு பெயரை தேர்வு செய்ய உதவுகிறது. அதாவது பெயர்களை எல்லாம் துண்டு சீட்டுகளில் எழுதிப்போட்டு குலுக்கல் நடத்தி ஒரு பெயரை தேர்வு செய்வோம் அல்லவா? இது போன்ற நேரங்களில் இந்த தளத்தை பயன்படுத்தலாம்.

இந்த தளத்தின் முகப்பு பக்கத்தில் உள்ள பட்டியலில் பெயர்களை எல்லாம் வரிசையாக தட்டச்சு செய்து, கோ எனும் கட்டளையை கிளிக் செய்தால், பட்டியலில் உள்ள பெயர்கள் வரிசையாக ஓடி, இறுதியில் ஒரு பெயர் மட்டும் முன்வைக்கப்படுகிறது.

சீட்டு குலுக்குப்போட பயன்படுத்தலாம். அதைவிட பள்ளி ஆசரியர்கள் மாணவர்கள் பெயர்களை எழுதி, அடுத்த கேள்வி யாரிடம் கேட்பது என தீர்மானிக்க பயன்படுத்தலாம். அடுத்த முறை அந்த பெயரை மட்டும் நீக்கவிட்டு புதிதாக பயன்படுத்தலாம். அல்லது, அந்த பெயரையும் வைத்துக்கொண்டு மீண்டும் ஒரு முறை பட்டியலை சுழலவிடலாம். கேள்விக்கு பதில் சொல்ல மட்டும், வகுப்பில் மாணவர் தலைவரை தேர்வு செய்யுவும் கூட இந்த முறையை பயன்படுத்தலாம்.

எளிமையான இணையதளம் தான். ஆனால் சுவாரஸ்யமானது.

இணைய முகவரி: http://namepickerninja.com/index.html

 

 

செயலிபுதிது; வானிலை அறிய உதவும் செயலி

வானிலை அறிவதற்கு இன்னொரு செயலியை தரவிறக்கம் செய்ய நான் தயாரில்லை என நினைப்பவர்கள் கூட, ட்பிள்யூடிஎச்.ஆர் எனும் வானிலை செயலியை பார்த்தால் மனம் மாறும் வாய்ப்பு இருக்கிறது. ஏனெனில் இந்த செயலி, அத்தனை எளிமையான முறையில் வானிலை தகவல்களை அளித்து கவர்கிறது.

ஐபோனுக்கான உருவாக்கப்பட்டுள்ள இந்த செயலி, வானிலை தகவல்களை அழகாக சுட்டிக்காட்டுகிறது. ஆனால் அதைத்தவிர வேறு எதையும் செய்வதில்லை. திரையில் அன்றைய தினத்திற்கான வானிலை தகவல் இடம்பெறுகிறது, அவ்வளவு தான். கூடுதலாக வேறு எந்த தகவலும் கிடையாது.

மினிமலிசம் என்று சொல்லப்படும், தேவையான குறைந்த பட்ச தகவல்களை மட்டுமே அளிக்கும் கோட்பாட்டிற்கு ஏற்ப இந்த செயலி வானியை விவரங்களை கச்சிதமாக அளிக்கிறது. இந்த தகவல்களும் கையால் வரையப்பட்ட மேகச்சித்திரத்துடன், கையான் எழுதிய எழுத்துக்கள் மூலம் தெரிவிக்கப்படுவது இன்னும் சிறப்பு.

 

மேலும் தகவல்களுக்கு: https://itunes.apple.com/app/id1252405260

 

 

 

வாட்ஸ் அப் சேவையை இப்படியும் பயன்படுத்தலாம்!

 

WhatsApp-568x500முன்னணி மேசேஜிங் சேவையான வாட்ஸ் அப்பின் பலவித பயன்களை நீங்கள் நன்றாக அறிந்திருக்கலாம். தகவல் தொடர்புக்கு, வீடியோக்களையும், செய்திகளையும் பகிர்ந்து கொள்ள, உங்களுக்கான குழுவை உருவாக்கி கருத்துக்களை பகிர்ந்து கொள்ள என வாட்ஸ் அப்பை பலவிதங்களில் பயன்படுத்தலாம். அழைப்பிதழ்களை அனுப்ப, பள்ளி மாணவர்கள் வீட்டுப்பாட குறிப்புகளை பகிர்ந்து கொள்ள என எல்லாவற்றுக்கும் வாட்ஸ் அப் கைகொடுக்கிறது.

நீங்கள் வாட்ஸ் அப் சேவையை அதிகம் பயன்படுத்துபவர் என்றால், குறிப்பெடுக்கும் சேவையாகவும் அதை பயன்படுத்திக்கொள்ளலாம் தெரியுமா? இதற்கான எளிய வழியை தொழில்நுட்ப செய்தி தளமான மேக் யூஸ் ஆப் அழகாக விவரித்துள்ளது.

உங்களுக்கான குழுவை உருவாக்கி கொண்டு அதில் நீங்கள் மட்டுமே உறுப்பினராக இருப்பது தான் அந்த வழி. இது எப்படி சாத்தியம் என கேட்கலாம். இதற்கான வழி இதோ: முதலில் வாட்ஸ் அப் பக்கத்திற்கு சென்று அதில் உள்ள சாட் பகுதியை கிளிக் செய்யவும். பின்னர் அதில் உள்ள புதிய குழுவை உருவாக்கும் பகுதியை கிளிக் செய்யவும். குழுவை உருவாக்க முதலில் நீங்கள் அதில் உறுப்பினர்களை சேர்க்க வேண்டும். எனவே உங்கள் தொடர்பு பட்டியலில் இருக்கும் ஒருவரை உறுப்பினராக சேர்த்துக்கொள்ளவும்.

அடுத்த கட்டமாக இந்த குழுவுக்கு பெயர் சூட்ட வேண்டும். உங்கள் குறிப்புகளை மையமாக கொண்டு ஒரு பெயரை சூட்டவும். ஏனெனில் இந்த குழுவை குறிப்புகளுக்கு மட்டும் தான் பயன்படுத்த போகிறீர்கள். இதன் பிறகு குழுவின் மேல் பகுதிக்கு சென்று கிளிக் செய்யவும். குழு உறுப்பினர் பட்டியல், புதிய உறுப்பினரை சேர்க்கும் வசதி ஆகியவற்றுக்கான பட்டியல் தோன்றும்.

நீங்கள் புதிதாக யாரையும் உறுப்பினராக சேர்க்க வேண்டாம். மாறாக ஏற்கனவே சேர்த்துள்ள அந்த ஒற்றை உறுப்பினரையும் நீக்கி விட வேண்டும். உறுப்பினர் பெயரின் மீது கிளிக் செய்தால் அவரை நீக்குவதற்கான வசதி தோன்றும்.

இருந்த ஒரே ஒரு உறுப்பினரையும் நீக்கிய பின், இந்த குழுவில் நீங்கள் மட்டும் தான் இருப்பீர்கள். இனி ஏதேனும் குறிப்புகளை சேர்க்க விரும்பினால், இந்த குழுவின் குறிப்பு பகுதிக்க்சென்று மனதில் உள்ள கருத்துகக்ளை குறித்து வைக்கலாம். இவை உங்களுக்கே வாட்ஸ் அப் செய்தியாக வரும்.

இவ்விதமாக தகவல்கள், நினைவூட்டல்கள், சின்ன சின்ன ஐடியாக்களை உங்களுக்கு நீங்களே அனுப்பிக்கொள்ளலாம். ஆடியோ மற்றும் வீடியோ குறிப்புகளையும் அனுப்பி  வைக்கலாம். மற்ற குழுக்கள் போல இந்த குழு உங்கள் நேரத்தை வீணாக்காது. மாறாக பயனுள்ள தகவல்களை எளிதாக அணுக வழி செய்யும். உங்கள் தேவைக்கேற்ப திட்டமிட இந்த வசதியை பயன்படுத்திக்கொள்ளலாம்.

இந்த குழுவில் யாரையும் நீங்கள் உறுப்பினராக அழைக்க வேண்டாம். நண்பர்களிடம் வேண்டுமானால் அவர்களுக்கான குழுவை உருவாக்கி கொள்ளுமாறு ஆலோசனை கூறலாம்.

வாட்ஸ் அப் சேவையின் டெஸ்க்டாப் வடிவத்தை பயன்படுத்தும் வசதி மூலம், இந்த குறிப்புகளை கம்ப்யூட்டருக்கு அல்லது லேப்டாப்பிற்கு மாற்றிக்கொள்ளலாம். அங்கிருந்து போனுக்கு தகவல்களை மாற்றிக்கொள்ளலாம்.

மேலும் வாட்ஸ் அப் செய்திகள் அனைத்தும் என்கிரிப்ஷன் பாதுகாப்புக்கு உட்பட்டவை என்பதால் உங்கள் குறிப்புகளுக்கும் அந்த பாதுகாப்பு கிடைக்கும்.

ஆனால் இந்த குறிப்பேடு வசதியில் வகைப்படுத்துவது, பழைய கோப்பை எளிதாக வரிசைப்படுத்துவது போன்றவை சாத்தியம் இல்லை. தகவல்களை சேமிக்க, கோப்புகளை பரிமாற, சேமிக்க பயன்படுத்திக்கொள்ளலாம். வாட்ஸ் அப் சேவைக்கு பழகியவர்களுக்கு ஸ்மார்ட்போனிலே உள்ள பலவித குறிப்பெடுக்கும் செயலிகளை விட இந்த வசதி எளிதாக இருக்கலாம்.

வாட்ஸ் அப்பை இப்படியும் பயன்படுத்தலாமா எனும் வியப்பை ஏற்பட்டால் இந்த வசதிய பயன்படுத்திப்பாருங்கள். உங்களுக்கு சரியாக இருந்தால் செயல்திறன் மேம்பாட்டிற்கு கைகொடுக்கும்.

இதே போலவே நீங்கள் நன்கறிந்த ஜிமெயில் சேவையையும் குறிப்பெடுக்கும் வசதியாக பயன்படுத்திக்கொள்ளலாம் தெரியுமா? ஜிமெயில் உள்ள டிராப்ட் எனப்படும் வரைவு வசதி மூலம் இது சாத்தியம்.

ஜிமெயிலை குறிப்பெடுக்க பயன்படுத்த வேண்டும் எனில், வழக்கம் போல கம்போஸ் வசதியை கிளிக் செய்து புதிய மெயிலை அனுப்பும் வசதியை பெற வேண்டும். எனினும், மெயில் பெட்டியில் மெயில் வாசகத்தை டைப் செய்வதற்கு பதில், மனதில் உள்ள குறிப்புகளை டைப் செய்யத்துவங்க வேண்டும். எல்லாவற்றையும் அடித்து முடித்தவுடன், இந்த செய்தியை யாருக்கும் அனுப்பாமல் விட்டுவிட வேண்டும். தானாக சேமிக்கும் வசதி காரணமாக இந்த மெயில் வரைவு பகுதிக்கு சென்று விடும். நாமாக சேமிக்கும் வசதியை கிளிக் செய்தும் சேமிக்கலாம். பின்னர் வரைவு பகுதிக்குச்சென்று அங்கிருந்து இதை அணுகலாம்.

இந்த குறிப்புகளை அப்படியே கூகுள் டிரைவிற்கும் மாற்றிக்கொள்ளலாம். வழக்கமான மின்னஞ்சல் கட்டம் சிறியதாக இருக்கும். எனவே மின்னஞ்சல் மேல் பகுதியில் உள்ள பகுதியில், மினிமைஸ் மற்றும் சேமிக்கும் வசதிக்கு இடையே உள்ள குறியீட்டில் கிளிக் செய்தால் இன்னும் சற்று பெரிய முகவரி பெட்டி உண்டாகும்.

மின்னஞ்சல் உருவாக்க பகுதியில் மவுசை வைத்து, ஷிப்ட் கீயை டைப் செய்தால் இதை தனி பெட்டியில் பெறலாம். கண்ட்ரோல் விசை மூலம் இவ்வாறு செய்தால் புதிய விண்டோவில் இந்த வசதியை பெறலாம்.

inbox.google.comஎனும் பகுதியில் இருந்தும் வரைவு வசதியை அணுகலாம். இதன் அமைப்பு குறிப்பெடுக்க இன்னும் ஏற்றதாக இருக்கும்.

 

பேஸ்புக்கில் நீங்கள் கண்காணிக்கப்படுவது தெரியுமா?

facebook-change-visibilityநீங்கள் தீவிர பேஸ்புக் பயனாளி என்றால் ஸ்டாக்ஸ்கேன் இணையதளம் உங்களை லேசாக திகைப்பில் ஆழ்த்தும். பேஸ்புக் பயன்பாடு தொடர்பாக விழிப்புணர்வு தேவை எனும் எண்ணத்தையும் ஏற்படுத்தும். அதோடு பேஸ்புக்கில் அதிகம் கவனிக்காமல் இருக்கும் தகவல்களை பொதுவெளியில் தோன்றும் வித்ததை தீர்மானிக்கும் தனியுரிமை அமைப்பை (பிரைவசி செட்டிங்) ஆய்வு செய்யவும் தூண்டும்.

ஸ்டாக்ஸ்கேன் தளம் அப்படி என்ன செய்கிறது என்றால், உங்கள் பேஸ்புக் பக்கத்தை வேறு யார் வேண்டுமானாலும் உளவு பார்ப்பது சாத்தியம் என்பதை புரிய வைக்கிறது. என் பேஸ்புக் பக்கத்தை உளவு பார்க்க என்ன இருக்கிறது என நீங்கள் நினைக்கலாம். விஷயம் அதுவல்ல, ஒருவரது பேஸ்புக் பயன்பாட்டை இன்னொருவரால் எட்டிப்பார்க்க முடியும் என்பதையே இந்த இணையதளம் உணர்த்துகிறது.

நட்பு வளையம்

பேஸ்புக்கில் நட்பு வளையத்தில் இருப்பவர்கள் தானே நாம் பகிரும் தகவல்களை பார்க்க முடியும், அப்படியிருக்க யாரோ ஒருவரால் எப்படி நம் பேஸ்புக் செயல்பாட்டை அறிய முடியும் என நீங்கள் கேட்கலாம். இந்த கேள்விக்கான பதிலை தெரிந்து கொள்ள ஸ்டாக்ஸ்கேன் தளத்தை ஒரு முறை பயன்படுத்திப்பாருங்கள். யாரோ ஒரு பேஸ்புக் பயனாளி தொடர்பான எத்தனை தகவல்களை தெரிந்து கொள்ள முடிகிறது என்ற வியப்பு ஏற்படும். இதற்கு, குறிப்பிட்ட பயனாளியின் பேஸ்புக் முகவரியை மட்டும் இருந்தால் போதுமானது.

ஸ்டாக்ஸ்கேன் தளத்தில் பேஸ்புக் பயனாளி முகவரியை டைப் செய்து தேடினால், அவர் பேஸ்புக்கில் பகிர்ந்து கொண்ட தகவல்களை எவை எல்லாம் பொதுவெளியில் இருக்கின்றன என்பதை இந்த தளம் காண்பிக்கிறது. பொதுவெளியில் இருக்கிறது என்றால், அந்த தகவல்கள் வேறு யாரால் வேண்டுமானாலும் பார்க்கப்படலாம் என பொருள்.

எந்த வகையான விவரங்கள் எல்லாம் தோன்ற வாய்ப்பிருக்கிறது தெரியுமா? ஒருவரது ஒளிப்படங்கள், நிலைத்தகவல்கள், காணொலிகள், கலந்து கொண்ட நிகழ்வுகள் உள்ளிட்டவற்றை தெரிந்து கொள்ளலாம். ஒருவருடைய வயது, உறவு நிலை, பாலினம் போன்ற தகவல்கள், அவர் மற்ற ஒளிப்படங்களில் டேக் செய்யப்பட்டிருந்தால் அவை தொடர்பான தகவல்கள் ஆகியவற்றையும் அறியலாம். அதே போல ஒருவர் இதற்கு முன்னர் எந்த படங்கள் அல்லது விஷயங்களை எல்லாம் லைக் செய்திருக்கிறார், யாருடைய பதிவுகளுக்கு எல்லாம் பின்னூட்டம் அளித்திருக்கிறார், எந்த இடங்களுக்கு எல்லாம் சென்றிருக்கிறார், உறவினர்கள் யார், உடன் பணியாற்றியவர்கள் யார்?, எந்த குழுக்களில் எல்லாம் உறுப்பினராக உள்ளார் உள்ளிட்ட தகவல்களை எல்லாம் அறிய முடியும்.

பேஸ்புக் தேடல்

பேஸ்புக் உறுப்புனர் முகவரியை சமர்பித்ததுமே, அந்த முகவரி தொடர்பாக திரட்டப்பட்ட தகவல்களை பல்வேறு தலைப்புகளின் கீழ் வகைப்படுத்திக்காட்டுகிறது. ஒவ்வொரு வகையாக தேர்வு செய்து ஆய்வு செய்துப்பார்க்கலாம்.

பொதுவாக பேஸ்புக்கை நண்பர்களும், நண்பர்களின் நண்பர்கள் சூழ்ந்த அறையாகவும் நினைத்துக்கொண்டிருக்கிறோம். அந்த உணர்வுடன் தான் தகவல்களையும், ஒளிப்படங்களையும் பகிர்ந்து கொள்கிறோம். விவாவிதிக்கிறோம், உரையாடுகிறோம். நட்பு வளையத்திற்கு வெளியே இருப்பவர்களுக்கு என்னத்தெரியப்போகிறது என நாம் நினைக்கலாம். ஆனால், பேஸ்புக்கில் பகிரும் தகவல்கள் எந்த அளவுக்கு பொது வெளியில் சிதறிக்கிடக்கின்றன என்பதை பலரும் அறிவதில்லை. இதை தான் ஸ்டாக்ஸ்கேன் இணைய சேவை அம்பலப்படுத்துகிறது. பேஸ்புக் தகவல்களை மற்றவர்கள் அணுகுவது எளிது என்பதையும் புரிய வைக்கிறது.

ஆனால், ஸ்டாக்ஸ்கேன் அத்துமீறி எதையும் செய்யவில்லை. சொல்லப்போனால் அது பிரமாதமாக எதையுமே செய்யவில்லை. பேஸ்புக் தகவல்களில் பொதுவெளியில் காண கூடியவற்றை அது அடையாளம் காட்டுகிறது அவ்வளவே. இதில் கவனிக்க வேண்டிய விஷயம் என்னவெனில், இந்த அடையாளம் காட்டுதலையும் பேஸ்புக் வழங்கும் தேடல் வசதி கொண்டே சாத்தியமாக்குகிறது.

அதாவது இந்த தேடலுக்கு ஸ்டாக்ஸ்கேன் தேவை என்றில்லை. 2013 ம் ஆண்டு பேஸ்புக் அறிமுகம் செய்ய கிராப் சர்ச் தேடல் வசதி மூலம் யார் வேண்டுமானாலும் இது போன்ற தகவல்களை தேட முடியும். அப்படி தேடக்கூடிய தகவல்களை எல்லாம் ஒரே இடத்தில் பல்வேறு தலைப்புகளின் கீழ் எளிதாக அணுக்ககூடிய வகையில் ஸ்டாக்ஸ்கேன் அளிக்கிறது என்பதே அதன் சிறப்பு.

நல்லெண்ண தாக்காளர்

பேஸ்புக் பயன்பாட்டின் தனியுரிமை அம்சம் தொடர்பாக விழிப்புணர்வை ஏற்படுத்தவே இதை செய்கிறது. பெல்ஜியம் நாட்டைச்சேர்ந்த Inti De Ceukelaire  எனும் நல்லெண்ண தாக்காளர் இந்த சேவையை உருவாக்கியிருக்கிறார். கிராப் சர்ச் தேடலின் வீச்சும், பிரச்சனையும் பரவலாக அறியப்படாமல் இருப்பதால், சாதாரண இணையவாசிகளும் இதை அறிந்து கொள்ளும் வகையில் இந்த சேவையை உருவாக்கியதாக மதர்போர்ட் இணைய இதழுக்கு அளித்த பேட்டியில் அவர் கூறியிருக்கிறார்.

பெரும்பாலான சாமானியர்களுக்கு தாங்கள் பொதுவெளியில் பகிர்ந்து கொள்பவை பற்றிய புரிதால் இல்லாத நிலையில், இது தொடர்பான விழிப்புணர்வை ஏற்படுத்த பயனாளிகளுக்கு நட்பான இந்த சேவையை உருவாக்கியதாகவும் அவர் தெரிவித்துள்ளார்.

கிராப் சர்ச் அறிமுகமான போது அதன் அந்தரங்க மீறல் தன்மைக்காக பெரும் சர்ச்சை உண்டானது. பின்னர் பேஸ்புக் இந்த தேடல் சேவையை அதிகம் முன்னிறுத்துவதில்லை. மற்ற தேடல் அம்சங்களிலேயே கவனம் செலுத்துகிறது. எனினும் விஷயம் அறிந்தவர்கள் கிராப் சர்ச் தேடலை பயன்படுத்தி தகவல் வேட்டை நடத்திக்கொள்ளலாம். இதை தான் ஸ்டாக்ஸ்கேன் வெளிச்சத்திற்கு கொண்டு வந்துள்ளது.

ஆனால், இந்த சேவை பேஸ்புக்கின் தனியுரிமை கொள்கையை மீறவில்லை என்றும், பொதுவெளியில் பார்க்க கூடிய, ஆனால் மறைந்திருக்கும் தகவல்களை மட்டுமே காட்டுவதாகவும் தளத்தின் முகப்பு பக்கத்திலேயே குறிப்பிடப்பட்டுள்ளது.

ஆக, ஒரு பேஸ்புக் பயனாளி தான் பகிரும் தகவல்களை நண்பர்கள் பார்வைக்கு மட்டும் என அமைத்திருந்தால் என்றால் அதற்குள் யாரும் எட்டிப்பார்க்க முடியாது. ஆனால் எப்படி பகிர்ந்து கொள்கிறோம் என அறியாமல் பொதுவெளியில் பகிர்ந்து கொண்டவர்களின் தகவலை எல்லோரும் பார்க்க முடியும்.

நீங்களும் உஷார்

நீங்களும் கூட இந்த தளத்தில் உங்கள் பேஸ்புக் முகவரியை டைப் செய்து பார்த்தால், உங்கள் பேஸ்புக் விவரங்களில் எத்தகைய தகவல்கள் மற்றவர் பார்வைக்கு கடை பரப்பி வைக்கப்படுள்ளது என்பதை தெரிந்து கொள்ளலாம். அதிக தகவல்கள் இல்லை எனில், நீங்கள் தனியுரிமை அமைப்பை நன்றாக பயன்படுத்துகிறீர்கள் என திருப்தி பட்டுக்கொள்ளலாம். மாறாக, உங்களை திகைப்பில் ஆழ்த்தக்கூடிய அல்லது சங்கடத்தில் ஆழ்த்தக்கூடிய தகவல்கள் எல்லாம் தேடலில் கிடைக்க கூடியதாக இருந்தால் உங்கள் பேஸ்புக் பக்கத்திற்கான தனியுரிமை பாதுகாப்பு போதுமானதல்ல என உணர வேண்டும்.

உடனடியாக, உங்கள் பேஸ்புக் பக்கத்தில் செட்டிங்ஸ் பகுதியில் உள்ள பிரைவசி அமைப்பை ஆய்வு செய்து, எவற்றை எல்லாம் நண்பர்கள் பார்க்கலாம், எவை எல்லாம் பொது வெளியில் தோன்றலாம் போன்ற விஷயங்களில் கவனம் செலுத்துவது நல்லது. ஒவ்வொரு முறை நிலைத்தகவல் பதியும் போது, அல்லது பின்னூட்டம் அளிக்கும் போதும் கூட இதை நினைவில் கொள்வது இன்னும் நல்லது. இதற்கான இணைய முகவரி: https://www.facebook.com/help/443357099140264

இணையதள முகவரி: https://www.stalkscan.com

 

நீங்கள் தீவிர பேஸ்புக் பயனாளி என்றால் ஸ்டாக்ஸ்கேன் இணையதளம் உங்களை லேசாக திகைப்பில் ஆழ்த்தும். பேஸ்புக் பயன்பாடு தொடர்பாக விழிப்புணர்வு தேவை எனும் எண்ணத்தையும் ஏற்படுத்தும். அதோடு பேஸ்புக்கில் அதிகம் கவனிக்காமல் இருக்கும் தகவல்களை பொதுவெளியில் தோன்றும் வித்ததை தீர்மானிக்கும் தனியுரிமை அமைப்பை (பிரைவசி செட்டிங்) ஆய்வு செய்யவும் தூண்டும்.

ஸ்டாக்ஸ்கேன் தளம் அப்படி என்ன செய்கிறது என்றால், உங்கள் பேஸ்புக் பக்கத்தை வேறு யார் வேண்டுமானாலும் உளவு பார்ப்பது சாத்தியம் என்பதை புரிய வைக்கிறது. என் பேஸ்புக் பக்கத்தை உளவு பார்க்க என்ன இருக்கிறது என நீங்கள் நினைக்கலாம். விஷயம் அதுவல்ல, ஒருவரது பேஸ்புக் பயன்பாட்டை இன்னொருவரால் எட்டிப்பார்க்க முடியும் என்பதையே இந்த இணையதளம் உணர்த்துகிறது.

நட்பு வளையம்

பேஸ்புக்கில் நட்பு வளையத்தில் இருப்பவர்கள் தானே நாம் பகிரும் தகவல்களை பார்க்க முடியும், அப்படியிருக்க யாரோ ஒருவரால் எப்படி நம் பேஸ்புக் செயல்பாட்டை அறிய முடியும் என நீங்கள் கேட்கலாம். இந்த கேள்விக்கான பதிலை தெரிந்து கொள்ள ஸ்டாக்ஸ்கேன் தளத்தை ஒரு முறை பயன்படுத்திப்பாருங்கள். யாரோ ஒரு பேஸ்புக் பயனாளி தொடர்பான எத்தனை தகவல்களை தெரிந்து கொள்ள முடிகிறது என்ற வியப்பு ஏற்படும். இதற்கு, குறிப்பிட்ட பயனாளியின் பேஸ்புக் முகவரியை மட்டும் இருந்தால் போதுமானது.

ஸ்டாக்ஸ்கேன் தளத்தில் பேஸ்புக் பயனாளி முகவரியை டைப் செய்து தேடினால், அவர் பேஸ்புக்கில் பகிர்ந்து கொண்ட தகவல்களை எவை எல்லாம் பொதுவெளியில் இருக்கின்றன என்பதை இந்த தளம் காண்பிக்கிறது. பொதுவெளியில் இருக்கிறது என்றால், அந்த தகவல்கள் வேறு யாரால் வேண்டுமானாலும் பார்க்கப்படலாம் என பொருள்.

எந்த வகையான விவரங்கள் எல்லாம் தோன்ற வாய்ப்பிருக்கிறது தெரியுமா? ஒருவரது ஒளிப்படங்கள், நிலைத்தகவல்கள், காணொலிகள், கலந்து கொண்ட நிகழ்வுகள் உள்ளிட்டவற்றை தெரிந்து கொள்ளலாம். ஒருவருடைய வயது, உறவு நிலை, பாலினம் போன்ற தகவல்கள், அவர் மற்ற ஒளிப்படங்களில் டேக் செய்யப்பட்டிருந்தால் அவை தொடர்பான தகவல்கள் ஆகியவற்றையும் அறியலாம். அதே போல ஒருவர் இதற்கு முன்னர் எந்த படங்கள் அல்லது விஷயங்களை எல்லாம் லைக் செய்திருக்கிறார், யாருடைய பதிவுகளுக்கு எல்லாம் பின்னூட்டம் அளித்திருக்கிறார், எந்த இடங்களுக்கு எல்லாம் சென்றிருக்கிறார், உறவினர்கள் யார், உடன் பணியாற்றியவர்கள் யார்?, எந்த குழுக்களில் எல்லாம் உறுப்பினராக உள்ளார் உள்ளிட்ட தகவல்களை எல்லாம் அறிய முடியும்.

பேஸ்புக் தேடல்

பேஸ்புக் உறுப்புனர் முகவரியை சமர்பித்ததுமே, அந்த முகவரி தொடர்பாக திரட்டப்பட்ட தகவல்களை பல்வேறு தலைப்புகளின் கீழ் வகைப்படுத்திக்காட்டுகிறது. ஒவ்வொரு வகையாக தேர்வு செய்து ஆய்வு செய்துப்பார்க்கலாம்.

பொதுவாக பேஸ்புக்கை நண்பர்களும், நண்பர்களின் நண்பர்கள் சூழ்ந்த அறையாகவும் நினைத்துக்கொண்டிருக்கிறோம். அந்த உணர்வுடன் தான் தகவல்களையும், ஒளிப்படங்களையும் பகிர்ந்து கொள்கிறோம். விவாவிதிக்கிறோம், உரையாடுகிறோம். நட்பு வளையத்திற்கு வெளியே இருப்பவர்களுக்கு என்னத்தெரியப்போகிறது என நாம் நினைக்கலாம். ஆனால், பேஸ்புக்கில் பகிரும் தகவல்கள் எந்த அளவுக்கு பொது வெளியில் சிதறிக்கிடக்கின்றன என்பதை பலரும் அறிவதில்லை. இதை தான் ஸ்டாக்ஸ்கேன் இணைய சேவை அம்பலப்படுத்துகிறது. பேஸ்புக் தகவல்களை மற்றவர்கள் அணுகுவது எளிது என்பதையும் புரிய வைக்கிறது.

ஆனால், ஸ்டாக்ஸ்கேன் அத்துமீறி எதையும் செய்யவில்லை. சொல்லப்போனால் அது பிரமாதமாக எதையுமே செய்யவில்லை. பேஸ்புக் தகவல்களில் பொதுவெளியில் காண கூடியவற்றை அது அடையாளம் காட்டுகிறது அவ்வளவே. இதில் கவனிக்க வேண்டிய விஷயம் என்னவெனில், இந்த அடையாளம் காட்டுதலையும் பேஸ்புக் வழங்கும் தேடல் வசதி கொண்டே சாத்தியமாக்குகிறது.

அதாவது இந்த தேடலுக்கு ஸ்டாக்ஸ்கேன் தேவை என்றில்லை. 2013 ம் ஆண்டு பேஸ்புக் அறிமுகம் செய்ய கிராப் சர்ச் தேடல் வசதி மூலம் யார் வேண்டுமானாலும் இது போன்ற தகவல்களை தேட முடியும். அப்படி தேடக்கூடிய தகவல்களை எல்லாம் ஒரே இடத்தில் பல்வேறு தலைப்புகளின் கீழ் எளிதாக அணுக்ககூடிய வகையில் ஸ்டாக்ஸ்கேன் அளிக்கிறது என்பதே அதன் சிறப்பு.

நல்லெண்ண தாக்காளர்

பேஸ்புக் பயன்பாட்டின் தனியுரிமை அம்சம் தொடர்பாக விழிப்புணர்வை ஏற்படுத்தவே இதை செய்கிறது. பெல்ஜியம் நாட்டைச்சேர்ந்த Inti De Ceukelaire  எனும் நல்லெண்ண தாக்காளர் இந்த சேவையை உருவாக்கியிருக்கிறார். கிராப் சர்ச் தேடலின் வீச்சும், பிரச்சனையும் பரவலாக அறியப்படாமல் இருப்பதால், சாதாரண இணையவாசிகளும் இதை அறிந்து கொள்ளும் வகையில் இந்த சேவையை உருவாக்கியதாக மதர்போர்ட் இணைய இதழுக்கு அளித்த பேட்டியில் அவர் கூறியிருக்கிறார்.

பெரும்பாலான சாமானியர்களுக்கு தாங்கள் பொதுவெளியில் பகிர்ந்து கொள்பவை பற்றிய புரிதால் இல்லாத நிலையில், இது தொடர்பான விழிப்புணர்வை ஏற்படுத்த பயனாளிகளுக்கு நட்பான இந்த சேவையை உருவாக்கியதாகவும் அவர் தெரிவித்துள்ளார்.

கிராப் சர்ச் அறிமுகமான போது அதன் அந்தரங்க மீறல் தன்மைக்காக பெரும் சர்ச்சை உண்டானது. பின்னர் பேஸ்புக் இந்த தேடல் சேவையை அதிகம் முன்னிறுத்துவதில்லை. மற்ற தேடல் அம்சங்களிலேயே கவனம் செலுத்துகிறது. எனினும் விஷயம் அறிந்தவர்கள் கிராப் சர்ச் தேடலை பயன்படுத்தி தகவல் வேட்டை நடத்திக்கொள்ளலாம். இதை தான் ஸ்டாக்ஸ்கேன் வெளிச்சத்திற்கு கொண்டு வந்துள்ளது.

ஆனால், இந்த சேவை பேஸ்புக்கின் தனியுரிமை கொள்கையை மீறவில்லை என்றும், பொதுவெளியில் பார்க்க கூடிய, ஆனால் மறைந்திருக்கும் தகவல்களை மட்டுமே காட்டுவதாகவும் தளத்தின் முகப்பு பக்கத்திலேயே குறிப்பிடப்பட்டுள்ளது.

ஆக, ஒரு பேஸ்புக் பயனாளி தான் பகிரும் தகவல்களை நண்பர்கள் பார்வைக்கு மட்டும் என அமைத்திருந்தால் என்றால் அதற்குள் யாரும் எட்டிப்பார்க்க முடியாது. ஆனால் எப்படி பகிர்ந்து கொள்கிறோம் என அறியாமல் பொதுவெளியில் பகிர்ந்து கொண்டவர்களின் தகவலை எல்லோரும் பார்க்க முடியும்.

நீங்களும் உஷார்

நீங்களும் கூட இந்த தளத்தில் உங்கள் பேஸ்புக் முகவரியை டைப் செய்து பார்த்தால், உங்கள் பேஸ்புக் விவரங்களில் எத்தகைய தகவல்கள் மற்றவர் பார்வைக்கு கடை பரப்பி வைக்கப்படுள்ளது என்பதை தெரிந்து கொள்ளலாம். அதிக தகவல்கள் இல்லை எனில், நீங்கள் தனியுரிமை அமைப்பை நன்றாக பயன்படுத்துகிறீர்கள் என திருப்தி பட்டுக்கொள்ளலாம். மாறாக, உங்களை திகைப்பில் ஆழ்த்தக்கூடிய அல்லது சங்கடத்தில் ஆழ்த்தக்கூடிய தகவல்கள் எல்லாம் தேடலில் கிடைக்க கூடியதாக இருந்தால் உங்கள் பேஸ்புக் பக்கத்திற்கான தனியுரிமை பாதுகாப்பு போதுமானதல்ல என உணர வேண்டும்.

உடனடியாக, உங்கள் பேஸ்புக் பக்கத்தில் செட்டிங்ஸ் பகுதியில் உள்ள பிரைவசி அமைப்பை ஆய்வு செய்து, எவற்றை எல்லாம் நண்பர்கள் பார்க்கலாம், எவை எல்லாம் பொது வெளியில் தோன்றலாம் போன்ற விஷயங்களில் கவனம் செலுத்துவது நல்லது. ஒவ்வொரு முறை நிலைத்தகவல் பதியும் போது, அல்லது பின்னூட்டம் அளிக்கும் போதும் கூட இதை நினைவில் கொள்வது இன்னும் நல்லது. இதற்கான இணைய முகவரி: https://www.facebook.com/help/443357099140264

இணையதள முகவரி: https://www.stalkscan.com/

 

  • நன்றி; தமிழ் இந்துவில் எழுதியது!