Tag Archives: jobs

புதிய வேலை வாய்ப்பு இணையதளங்கள்.


வேலை வாய்ப்பு இணையதளங்கள் வளர்ந்து கொண்டே இருக்கின்றன.அதாவது புதிய தளங்கள் உதயமாவதோடு அவை புதுமையானதாகவும் இருக்கின்றன.ரேங்க் ஷீட் மற்றும் ஐ லிப்ட் ஆப் ஆகிய இரண்டு தளங்களுமே இதற்கான அழகான உதாரணங்கள்.

இரண்டு தளங்களுமே வழக்கமான வேலை வாய்ப்பு தளங்களில் இருந்து வேறுபட்டவையாக இருக்கின்றன.இரண்டுமே வழக்கமான வேலைவாய்ப்பு தளங்களில் இருந்து மேம்பட்டவையாக இருக்க முயல்கின்றன.

வேலைவாய்ப்பு தளங்கள் ஒரு பக்கம் வேலை தேடுபவர்களை பட்டியலிட்டு இன்னொரு பக்கம் வேலை வாய்ப்புகளை பட்டியலிட்டு இருவருக்குமான இணைப்பு பாலமாக இருக்கின்றன.அப்படியே வேலை தேடி வருபவர்களுக்கு பொருத்தமான நல்ல வேலை வாய்ப்பை தேடித்தர முயல்கின்றன.

இத்தகைய வேலை வாய்ப்பு தளங்கள் அநேகம் இருக்கின்றன.ஆனால் இந்த தளங்களில் இரு தரப்பினருக்குமே பிரச்சனை இருக்கிறது.வேலை தேடுபவர்களை பொருத்தவரை சம்பிரதாயமான பயோடேட்டா தங்கள் திறமையை வெளிப்படுத்த போதுமானதாக இல்லை என்று நினைக்கின்றனர்.பல்லாயிரக்கணக்கானோர் போட்டி போடும் போது தங்களது தனித்தன்மையை வெளிப்படுத்தி கொள்ள முடிந்தால் நிறுவன‌ங்களின் கவனத்தை உடனடியாக ஈர்க்கலாம் என்று வேலை தேடுபவர்கள் எதிர்பார்க்கின்றனர்.

வர்த்தக நிறுவங்களை பொருத்தவரை ஆயிரக்கணக்கில் குவியும் விண்ணப்பங்களில் இருந்து பொருத்தமானவற்றை தேர்வு தேர்வு செய்வது என்பது சிக்கலானதாக அமைந்து விடுகிறது.அதோடு வேலை தேடும் எல்லோருமே பயோடேட்டாவில் தங்களது தகுதி, திறமை பற்றி பிரகாசமான குறிப்புகளை எழுதி வைப்பதால் அவர்களில் காகித புலிகள் யார்,உண்மையான திறமைசாலிகள் யார் என முடிவுக்கு வருவது சிக்கலானதாகி விடுகிறது.

வர்த்தக நிறுவன‌ங்கள் சரியான முடிவுக்கு வர விண்ணப்பங்களை அலசி ஆராய்ந்து களையெடுத்து அதன் பிறகு நேர்முக தேர்வுக்கு அழைத்து கேள்விகள் கேட்டு தகுதியான நபர்களை கண்டுபிடித்தாக வேண்டும்.இது நேரத்தை விரயாக்கமாக்க கூடியது என்பதோடு மனிதவள மேம்பாட்டு துறையினரை சோதித்து விடக்கூடியது.

இந்த குறைகளை களைந்து இரு தரப்பினருக்குமே உதவக்கூடிய அடுத்தக்கட்ட வேலை வாய்ப்பு தளங்களாக ரேங்க் ஷீட் மற்றும் ஐ லிப்ட் ஆப் உருவாக்கப்பட்டுள்ளன.

இரண்டு தளங்களுமே தேர்வு அல்லது சோதனையின் அடிப்படையில் இயங்குகின்றன.

அதாவது வேலை வாய்ப்பு தேடி வருபவர்கள் தங்கள் திற‌மையை நிருபித்து காட்ட வைக்கின்றன.இதற்காக இரண்டு தளங்களுமே ஆன்லைன் தேர்வுகளை நடத்துகின்றன.

இந்த தேர்வுகள் மூலம் வேலை தேடுபவர்கள் தங்கள் திறமையை நிறுவனங்களுக்கு அழகாக உணர்த்தலாம்.

பயோடேட்டாவில் அது தெரியும் இது தெரியும் என குறிப்பிட்டு விட்டு உண்மையில் எது தெரியும் என்ற சந்தேகத்தை நிறுவன அதிகாரிகள் மத்தியில் ஏற்படுத்தாமல் எது தெரியும் என குறிப்பிட்டுள்ளனரோ அதற்கான சான்றை தேர்வு மூலம் காட்ட இந்த தளங்கள் வழி செய்கின்றன.

ஐ லிப்ட் ஆப் தளத்தை பொருத்தவரை சாப்ட்வேர்,நிதி உள்ளிட்ட பல்வேறு துறைகளில் ஆன்லைன் தேர்வுகளை வழங்குகிறது.வேலை தேடுபவர்கள் முதலில் உறுப்பினராக பதிவு செய்து கொண்டு அதன் பிறகு தங்களுக்கான தேர்வை எழுதி திறமையை உணர்த்தலாம்.

வர்த்தக நிறுவனங்கள் தாங்கள் எதிர்பார்க்கும் திறமைகள் கொண்ட நபரை இந்த தேர்வு முடிவுகளின் அடிப்படையில் தேர்வு செய்து கொள்ளலாம்.

உண்மையில் இந்த தளம் வேலைக்கு பொருத்தமான நபர்களை தேர்ந்தெடுப்பதில் வர்த்தக நிறுவனங்களின் வேலையை எளிதாக்குகிறது என்று சொல்ல வேண்டும்.

வேலைக்கு விண்ணப்பிக்கும் நபர்களிடம் உள்ள திறமைகளை கண்டறிய படாதபாடு படுவதற்கு பதில் அவர்கள் இதில் எல்லாம் திறமைசாலிகள் என்று இந்த தளம் சோதனை நடத்தி காட்டி விடுகிறது.

வாலை தேடுபவர்களுக்கும் இது தங்களின் சரியான திறமையை நிறுவனங்கள் பார்வைக்கு சமர்பிக்க வழி செய்கிறது.

பொதுவான தேர்வுகளோடு நிறுவன‌ங்கள் விரும்பினால் தங்களுக்கான பிரத்யேக தேர்வையும் வடிவமைத்து சம‌ர்பிக்கலாம்.

ரேங்க் ஷீட் தளம் இதோ போன்றது தான் என்றாலும் இது கொஞ்சம் கூடுதலான அம்சங்களை கொண்டிருக்கிறது.ஆன்லைன் சான்றிதழ் வழங்கும் தளம் என வர்ணித்து கொள்ளும் இந்த தளம் முழுக்க முழுக்க சாப்ட்வேர் பிரிவு தொடர்பான தேர்வுகளை மட்டுமே அளிக்கிறது.

டாட்.நெட்,ஜாவா,சி ஷார்ப் என பல பிரிவுகளில் தேர்வு எழுதி அதில் உள்ள திறமையை உணர்த்தலாம்.

தேர்வுகளுக்கான சான்றிதழையும் இந்த தளம் வழங்குகிறது.அதோடு நின்று விடவில்லை.பயோடேட்டாவை துடிப்பானதாக மாற்றிக்கொள்ளவும் உதவுகிறது.பயோடேட்டாவில் திறமைகளை சேர்த்து கொண்டு அதனை மேலும் ஈர்ப்பு மிக்கதாக மாற்றலாம்.

பயோடேட்டா பக்கத்தை இணைய முகவரியாகவும் பகிர்ந்து கொள்ளும் வசதி இருக்கிறது.அந்த அளவுக்கு உறுப்பினர்களின் பயோடேட்டா பக்கம் செறிவானதாக மாறியிருக்கும்.

அது மட்டும் அல்ல உறுப்பினர்கள் சக உறுப்பினர்களோடு கலந்துரையாடி அவர்கள் பணி சூழலில் தொழில்நுடப் சவால்களை எப்படி எதிர்கொள்கின்ற‌னர் என்றும் தெரிந்து கொள்ளலாம்.அந்த வகையில் இந்த தளம் வலைப்பின்னல் தளத்தின் சாயலை கொண்டிருக்கிறது.

பயோடேட்டாவை மட்டும் நம்பியிருக்காமல் வேலைக்கான திறமையை நிருபித்து காட்ட உதவும் தளங்கள் .

அதாவது கல்லூரியிலும் பயிற்சி நிறுவங்களிலும் தேர்வு எழுதி வெற்றி பெற்று நிலையிலும் இரண்டாவதாக ஒரு தேர்வு எழுத தயாராக இருப்பவர்கள் இந்த தளங்களை நல்ல வேலைக்கான சுலபமான வாய்ப்பாகவே கருதுவார்கள்.

இணையத்ள முகவரி;

1.http://www.iliftoff.com/web_iliftoff/index.php

2.http://ranksheet.com/

சாதனைகளை பகிர்ந்து கொள்ள அழைக்கும் இணையதளம்.


பேஸ்புக்கிலும் டிவிட்டரிலும் நீங்கள் விரும்பியதை எல்லாம் பகிர்ந்து கொள்ளலாம்.ஆனால் நீங்கள் செய்து முடித்த சாதனைகளை பகிர்ந்து கொள்ள விரும்பினால் அதனை பேஸ்புக்கிலோ டிவிட்டரிலோ செய்யாதீர்கள்,எங்களிடம் வாருங்கள் என்று அழைக்குறது ‘அச்சூ’ இணையதளம்.

காரணம்,உங்களது சாதனைகளை பகிர்ந்து கொள்வதற்கான வலைப்பின்னல் சேவையாக அச்சூ உருவாக்கப்பட்டிருப்பது தான்.(அச்சூ என்பது அச்சீவ்மென்ட்ஸ் என்னும் ஆங்கில எழுத்தின் சுருக்கம்.)

இந்த இடத்தில் சாதனை என்பது மகத்தான செயல் என்னும் பொருளில் பயன்படுத்தப்படவில்லை என்பதை கவந்த்தில் கொள்ளுங்கள்.மாறாக பயனுள்ள வகையில் (உங்களால்)செய்து முடிக்கப்பட்ட எந்த ஒரு செயலும் என்று அர்த்தப்படுத்தி கொள்ளுங்கள்.

உதாரணத்திற்கு நீங்கள் புதிதாக அறிமுகம் செய்யப்பட்ட அவுட்லுக் இமெயில் சேவையயை பயன்படுத்தி பார்த்ததாக இருக்கலாம்.நீங்கள் கேட்டு ரசித்த இசை நிகழ்ச்சி பற்றி டிவிட்டரில் நேரடி விமர்சமாக குறும் பதிவுகளை பகிர்ந்து கொண்டதாக இருக்கலாம்.புதிய மொழியை கற்பதற்கான முயற்சி,ஒரே மூச்சில் படித்து முடித்த நாவல்… இப்படி நீங்கள் செய்து முடித்த எந்த செயலை வேண்டுமானாலும் அச்சூவில் பகிர்ந்து கொள்ளலாம்.

இது ஒரு வகையான சுய தம்பட்டமடிக்கும் செயல் இல்லையா என்று கேட்கலாம்.சந்தேகமே வேண்டாம் இது சுய தம்பட்டம் தான்.இதை தான் அச்சூவும் செய்யத்தூண்டுகிறது.

இத தான் நீங்கள் செய்து முடித்தவற்றை பகிர்ந்து கொண்டு அது வைரஸ் போல பரவச்செய்யுங்கள் என்கிறது அச்சூ.

ஆனால் இது முற்றிலும் சுய தம்பட்டமும் இல்லை.உங்களது ஆர்வத்தை,அதனடைப்படியில் நீங்கள் செய்தவற்றை மற்றவர்களோடு பகிர்ந்து கொள்ளும் செயல் தான் இது.

எல்லாம் சரி இப்படி செய்வதால் என்ன பயன் என்று கேட்கலாம்.உங்களை பற்றி மற்றவர்களுக்கு தெரிவித்து அதன் மூலம் புதிய வாய்ப்புகளை தேடிக்கொள்வதற்காக தான் என்கிறது அச்சூ .

இவற்றை பேஸ்புக் அல்லது டிவிட்டரிலேயே பகிர்ந்து கொள்ளலாம் தான்.பலரும் இதனை செய்து வருகிறோம்.ஆனால் பேஸ்புக்/டிவிட்டரில் வெளீயிடும் போது இந்த பதிவுகள் மற்ற பதிவுகளோடும் புகைப்படங்களோடும் கலந்து பின்னுக்கு தள்ளப்பட்டு காணாமல் போய்விடும் வாய்ப்பு இருக்கிறது.

ஆனால் அச்சூ தளத்தில் ஒருவர் சாதித்த செயல்கள் மட்டுமே இடம் பெருகின்றன.அந்த செயலையும் பகிர்பவர் தனது துறை சார்ந்த குறிச்சொற்களை இணைத்து வெளியிடலாம் என்பதால் இந்த சாதனை பகிர்வு ஒருவரை சரியான வகையில் அறிமுகம் செய்யும் விதத்தில் அமைந்து விடுகின்றன.

ஒரு விதத்தில் இவை உங்களுக்கான அறிமுக சீட்டு போல தான்.உங்கள் ஆர்வத்தையும் திறமையையும் செயல்கள் வாயிலாக வெளிப்படுத்த உதவும் அறிமுக சீட்டாக இந்த பதிவுகளை கருதலாம்.

இந்த பதிவுகளை காணும் நண்பர்கள் அதனை பேஸ்புக் அல்லது டிவிட்டர் மூலம் தங்கள் நண்பர்கள் வட்டத்தில் பகிர்ந்து கொள்ளலாம்.அதற்கு ஆதரவாக கருத்து தெரிவிக்கலாம்.மற்ற வலைப்பின்னல் தளங்கள் போலவே நண்பர்களை பிந்தொடர‌வும் செய்யலாம்.

இந்த பதிவுகளை சக உறுப்பினர்கள் கிளிக் செய்து பார்க்கும் போது உங்கள் திறமைகளை தெரிந்து கொள்வதோடு அது தனக்கோ தனது நிறுவனத்திற்கோ தேவைப்பட்டால் பயன்படுத்தி கொள்ள முன் வரலாம்.இதன் மூலம் புதிய வேலை வாய்ப்பு அல்லது வர்த்தக வாய்ப்புகள் சாத்தியமாகலாம்.

சின்ன சின்ன சாதனைகளை இப்படி பகிர்ந்து கொள்வதன் அவசியம் பற்றி இந்த தளத்தின் வலைப்பதிவு பக்கத்தில் அழகாக குறிப்பிடப்பட்டுள்ளது.

பயோ டேட்டா என்னும் தன் விவர குறிப்பை பார்த்து வேலை வாய்ப்பு கிடைத்ததெல்லாம் அந்த காலம் .இப்போதெல்லாம் நீங்கள் என்ன செய்திருக்கிறீர்கள் என்பதை அறியவே பலரும் விரும்புகின்றனர் என்று ச‌மூக ஊடக வல்லுனர் சேத் கோல்டின் கூறியதை மேற்கோள் காட்டி நீங்கள் செய்த சாதனைகளின் தடங்களை பதிவு செய்யும் நோக்கத்துடன் அச்சூ உருவாக்கப்பட்டுள்ளதாக தெரிவிக்கப்பட்டுள்ளது.

அதே போல டிவிட்டர் குறும்பதிவுகளில் கூட தங்கள் சாதனைகளை பகிர்ந்து கொள்ளும் குறும்பதிவுகளுக்கு அதிக கவனம் கிடைப்பதாக தெரிவிக்கும் ஆய்வு முடிவும் மேற்கோள் காட்டப்பட்டுள்ளது.

ஆக செய்த சாதனைகளை பகிர்ந்து கொள்ளுங்கள்,அதாவது சமூக வலைப்பின்னல் யுக‌த்தில் உங்களை சரியாக வெளிப்படுத்தி கொள்ளுங்கள்.

இணையதள முகவரி;http://www.achoo.co/

laud

தோழர்களை தட்டி கொடுக்க ஒரு இணையதளம்.


மனிதன் எத்தனை கம்பீரமான சொல் என்று மக்சிம் கார்க்கி வியந்தது போல பாராட்டு தான் எத்தனை மகத்தான செயல்.பாராட்டு அதனை பெறுபவரின் முகத்திலும் அகத்திலும் மலர்ச்சியை ஏற்படுத்துகிறது.அங்கீகரிக்கப்பட்ட உணர்வை தருகிறது.நல்ல பாராட்டு இன்னும் எத்தனையோ அற்புதங்களை செய்ய வல்லது.

நாம் எல்லோருமே பாராட்டுகிறோம்.பாரட்டப்படுகிறோம்.இதனை உலகறிய செய்தால் என்ன என்று கேட்கிறது லாடிட்ஸ் இணையதளம்.

நண்பர்களுக்கான பாராட்டை தெரிவிப்பதற்கான இணைய சேவையாக இந்த தளம் உருவக்கப்பட்டுள்ளது.அதன் மூலம் நண்பர்களுக்கு புதிய வாயில்களை திறந்து விடுவதற்கான வாய்ப்பையும் ஏற்படுத்தி தருவதாக சொல்கிறது இந்த தளம்.

நண்பர்கள் என்பது இங்கே அலுவலகத்தில் பணியாற்றும் சக ஊழியர்களை குறிக்கிறது.ஏதோ ஒரு விதத்தில் அவர்கள் பணியாற்றும் விதம் உங்களை கவ‌ர்ந்திருந்தால் அல்லது உங்கள் வேலையில் அவர்கள் திறம்பட உதவியிருந்தால் அதற்கான பாராட்டையும் நன்றியையும் இந்த தளம் வழியே பகிர்ந்து கொள்ளலாம்.

பொதுவாக இது எந்த எதிர்பார்ப்பும் இல்லாமல் பலரும் செய்வது தான் .சிலர் செய்யாமல் இருப்பதும் உண்டு.அது அல்ல விஷயம்.சக ஊழிய‌ர்களை பாராட்டும் போது அது வெளியுலகிற்கு தெரியாமலேயே போய் விடுகின்றது.காரணம் ஒன்று நண்பரிடமே பாராட்டை தெரிவிப்போம் அல்லது அவரைப்பற்றி சக நண்பர்களிடம் பாராட்டுவோம்.எப்படி இருந்தாலும் மற்றவர்கள் இதனை அறிய நியாயமில்லை.

மற்றவர்கள் அறிய வேண்டிய அவசியமும் இல்லை தான்.ஆனால் அதே துறையில் இருப்பவர்கள் நண்பரின் இந்த திறமையை அறிந்திருப்பது அவசியம் தானே.காரணம் எந்த திறமையும் குன்றிலிட்ட விளக்காக சுருங்கி விடக்கூடாது தானே!

உதாரணத்திற்கு உங்கள் சகாக்களில் ஒருவர் எத்தனை நெருக்கடி வந்தாலும் அசராமல் பதட்டப்படாமல் வேலை பார்ப்பவராக இருக்கலாம்.நீங்களே கூட இக்கட்டான நிலையில் சிக்கி கொண்ட போது அவர் உதவிக்கு வந்து பக்கவாக அந்த வேலையை முடித்து கொடுத்திருக்கலாம்.அதே போல ஆவேசமாக வரும் வாடிக்கையாளர்களிடம் நேர்த்தியாக பேசி சமாளிக்கும் திறன் கொண்டவர்கள் இருக்கலாம்.யாரவது சொதப்பி விட்டால் அது வெளியே தெரியாமல் சமாளித்து காப்பாற்றும் நபர்களும் இருக்கலாம்.

தப்பே இல்லாமல் அடித்து தரும் டிடிபி ஆப்பரேட்டர்,ஒரே நேரத்தில் பல தொலை பேசி அழைப்புகள் வந்தாலும் எல்லா அழைப்புகளுக்கும் கச்சிதமாக பதில் சொல்லி அழைப்புகள் பற்றி உரியவர்களிடம் மறக்காமல் தகவல் சொல்லும் வரவேற்பாளினிகள்,கடைசி நேரத்திலும் பதட்டமே இல்லாமல் முக்கிய செய்தியை சட்டென அடித்து தரும் தலைமை நிருபர் என்று பாராட்டுக்குரியவர்களை சொல்லிக்கொண்டே போகலாம்.

துறைக்கு துறை நிறுவனத்திற்கு இது மாறுபடலாம்.ஆனால் வேலையில் அதீத திறமையை வெளிப்படுத்தி சபாஷ் வாங்கும் நபர்கள் எல்லா இடங்களிலும் உண்டு.இவர்களை பாராட்டும் தருணங்களும் உண்டு.

இந்த பாராட்டுக்களை எல்லாம் பகிரங்கமாக பகிர்ந்து கொள்ளுங்களேன் என்கிறது லாடிட்ஸ்.அப்படி பகிர்ந்து கொண்டால் அதே துறையில் இருப்பவர்கள் அந்த நண்பரின் திறமையை தெரிந்து கொள்ள வாய்ப்பாக இருக்குமே என்றும் லாடிட்ஸ் சொல்கிறது.அதோடு அவருக்கு புதிய வேலை வாய்ப்பு கிடைக்கவும் வழி செய்யக்கூடும்.

தொழில் துறையினருக்கான பேஸ்புக்காக கருதப்படும் லின்க்டுஇன் தளத்தின் உறுப்பினர் கணக்கை கொண்டு இதில் உறுப்பினராக சேர வேண்டும்.அதன் பிறகு எந்த சகாவை பாராட்ட விரும்புகிறிர்களோ அவர்களை பயரை குறிப்பிட்டு பாராட்டிற்கான காரணங்களையும் எழுதி அவ்ருக்கு இமெயில் மூலம் அனுப்பி வைக்க வேண்டும்.

இந்த பாராட்டு நண்பரின் முகத்தில் மகிழ்ச்சியை ஏற்படுத்தும் என்பதோடு இந்த பாராட்டு பத்திரத்தை அவர் தனது லின்க்டுஇன் பக்கத்தில் பெருமிதத்தோடு இடம் பெறவும் வைக்கலாம்.

லின்க்டுஇன் தொழில் ரீதியாக பயன்படுத்தப்படும் சமூக வலைப்பின்னல் என்பதை நீங்கள் அறிந்திருக்கலாம்.நிறுவனங்களில் பணியாற்றுபவர்களே அதில் உறுப்பினராக இருக்கின்றனர்.அது மட்டுமா வேலை வாய்ய்பு தேடுபவர்களும் சரி வேலைக்கு பொருத்தமானவர்களை தேடுபவர்களும் சரி இந்த வலைப்பின்னலை தான் பயன்படுத்துகின்றனர்.

எனவே நண்பர்களின் வேலை திறமை பற்றிய உங்களின் மனந்திறந்த பாராட்டு நல்ல சம்பளத்தோடு பெரிய நிறுவனங்கள் அவர்களை கொத்தி கொண்டு போக வைக்கலாம்.அந்த வகையில் உங்கள் பாராட்டு மிகச்சிறந்த சிபாரிசாக அமையலாம்.

இப்படி பாராட்டுவது தொழில்முறையாக நன்றி சொல்லுதல் என்று லாடிட்ஸ் தளம் குறிப்பிடுகிறது.அதோடு உங்கள் அலுவலக நண்பர்களின் நற்திறமையை பாராட்டி நன்றி சொல்லுங்கள் வாருங்கள் அழைக்கிறது லாடிட்ஸ்.

பாராட்டுங்கள்! நீங்களும் பாராட்டப்படலாம்!

இணையதள முகவரி;http://www.laudits.com/