Tag Archives: kids

சிறார்களுக்கான தேடியந்திரம் கிட்லே!

kiddle-search-engine-is-the-google-for-kidsஇணையத்தில் சிறுவர், சிறுமிகள் பயன்படுத்துவதற்காக என்று தனியே தேடியந்திரங்கள் இருப்பதை நீங்கள் அறிந்திருக்கலாம். இந்த வரிசையில் தான் கிட்லேவும் வருகிறது.

சிறார்களுக்கு என்று தனியே தேடியந்திரம் உருவாக்கப்படுவதற்கான தேவையை எளிதாக புரிந்து கொள்ளலாம். தேடியந்திரங்களில் தேடும் போது, பிள்ளைகளின் வயதுக்கு பொருத்தமில்லாத தேடல் முடிவுகளும் தோன்றலாம். பிஞ்சு மனதை நஞ்சாக்க கூடிய ஆபாச பக்கங்களும் கண்ணில் படலாம். அது மட்டும் அல்ல, பெரும்பாலான பக்கங்கள் குழந்தைகளால் புரிந்து கொள்ள முடியாத அளவுக்கு சிக்கலாக இருக்கலாம்.

இந்த காரணங்களினால் தான் குழந்தைகளுக்கான தேடியந்திரங்கள் தேவைப்படுகின்றன. இந்த தேடியந்திரங்கள் குழந்தைகள் பாதுகாப்பாக பயன்படுத்தக்கூடிய வகையில் தேடல் முடிவுகளை பட்டியலிடுகின்றன. ஆபாச பக்கங்கள் உள்ளிட்ட அவர்களுக்கு பொருத்தமில்லாத பக்கங்களை வடிகட்டி நீக்கி விடுகின்றன. எனவே சிறார்கள் இதை தைரியமாக பயன்படுத்தலாம். அதைவிட முக்கியமாக பெற்றோர்கள் அதிக கவலையோ,அச்சம் இல்லாமல் இவற்றை தங்கள் பிள்ளைகள் பயன்படுத்த அனுமதிக்கலாம்.

கிட்லேவும் இந்த அம்சங்களை எல்லாம் கொண்டிருக்கிறது. குறிப்பாக இதன் முகப்பு பக்கம் சிறார்களுக்கு ஏற்ற வகையில் அமைந்துள்ளது. வண்ணமயமான பின்னணியில், அசத்தலான ரோபோ இதன் லோகோவாக அமைந்துள்ளது. தேடல் முடிவுகளும் சிறார்களை கவரும் வகையில் வடிவமைக்கப்பட்டுள்ளது.
வழக்கமாக கூகுளில் தேடுவது போலவே இதிலும் கீவேர்டு எனும் குறிச்சொல்லை டைப் செய்து தேடலாம். இணைய பக்கங்கள் தவிர, புகைப்படங்கள், செய்திகள் மற்றும் வீடியோக்களை தேடலாம்.

தேடல் பட்டியலில் இடம்பெறும் முடிவுகள் பளிச் என கண்ணில் படும் வகையில் அவற்றுக்கு அருகே பெரிய அளவிலான புகைப்படங்கள் இடம்பெறுகின்றன. எழுத்துருவும் பெரிதாகவே இருக்கிறது. இவை எல்லாம் பிள்ளைகளை கருத்தில் கொண்டு வடிவமைக்கப்பட்டவை.

தேடல் பட்டியலில் தோன்றும் முடிவுகள் பொதுவானவை அல்ல; சிறார்களுக்கு என்று தேர்வு செய்யப்பட்டவை. இதற்காக என்றே ஆசிரியர் குழுவை கொண்டு சிறார்களுக்கு பொருத்தமானவை என தேர்ந்தெடுக்கப்பட்ட இணையதளங்களில் இருந்து முடிவுகள் எடுக்கப்படுகின்றன. இத்தகைய பாதுகாப்பான முடிவுகளே முதல் மூன்று இடங்களில் பட்டியலிடப்படுகின்றன.

அதன் பிறகு வரும் நான்கு முடிவுகள், பொதுவான இணையதளங்களில் இருந்து எடுக்கப்பட்டவை என்றாலும், சிறுவர், சிறுமியர் எளிதாக புரிந்து கொள்ளக்கூடிய வகையில் அமைந்தவையாக இருக்கின்றன.
8 ம் முடிவுகளுக்கு மேல் இடம்பெறுபவை, பெரியவர்களுக்கான தளங்களில் இருந்து எடுக்கப்பட்டவை. சிறார்களுக்கு இவை கடினமாக இருக்கலாம். ஆனால் பாதுகாப்பானவை!

எல்லா முடிவுகளுமே வடிகட்டப்படவை என்பதால் பிள்ளைகளுக்கு பாதிப்பை ஏற்படுத்தாது என எதிர்பார்க்கலாம்.
அணுக்கள் அல்லது அகராதி போன்ற வார்த்தைகளை டைப் செய்து தேடினால் இந்த தேடியந்திரத்தின் அணுகுமுறையை சிறப்பை உணர்ந்து கொள்ளலாம். இவற்றுக்காக பட்டியலிடப்படும் முடிவுகள் பெரும்பாலும் கல்வி நோக்கில் அல்லது தகவல் நோக்கிலான இணையதளங்களில் இருந்தே அமைகின்றன. செய்திகளும் அப்படி தான். வீடியோக்களும் அப்படி தான்.

பொதுவாக புகைப்படங்கள் மற்றும் வீடியோக்களில் தான் ஆபத்து அதிகம். ஆனால் கிட்லேவில் தேடும் போது கல்வி சார்ந்த வீடியோக்களே தோன்றுகின்றன.

இது பாதுகாப்பானது மட்டும் அல்ல, பிள்ளைகள் தேவையான இணைய பக்கங்களை இணைய கடலில் தேடி அல்லாடாமல் தங்களுக்கு பொருத்தமானவற்றை எளிதாக தேடிக்கொள்ளவும் உதவுகிறது.
ஆனால் ஒன்று கிட்லே தனக்கென சொந்த தேடல் நுட்பத்தை கொண்டிருக்கவில்லை. கூகுளின் தேடல் நுட்பத்தை தான் பயன்படுத்துகிறது. தனிப்பட்ட நோக்கத்திற்கு ஏற்ற தேடியந்திர வசதியை உருவாக்கி கொள்ள அனுமதிக்கும் கூகுளின் கஸ்டம்ஸ் சர்ச் வசதியை அடிப்படையாக கொண்டே இது செயல்படுகிறது. மேலும் பாதுகாப்பிற்கான வடிகட்டலுக்கும், கூகுளின் சேப் சர்ச் வடிகட்டல் வசதியே பயன்படுத்தப்படுகிறது.

இந்த தேடியந்திரம் கவனத்தை ஈர்த்த போது, கூகுள் அறிமுகம் செய்துள்ள சிறார்களுக்கான தேடியந்திரம் என பல செய்திகளில் குறிப்பிடப்பட்டாலும், இதற்கும் கூகுளுக்கும் தொடர்பு இல்லை. இது கூகுள் தேடல் நுட்பத்தை பயன்படுத்துகிறது. அதனால் என்ன இதுவரை உருவாக்கப்பட்ட அநேக சிறுவர் – சிறுமியர் தேடியந்திரங்களும் கூட கூகுளை அடிப்படையாக கொண்டு உருவாக்கப்பட்டவை தான்.

கிட்லே பற்றி மேலும் சில குறிப்புகள்: இது பயனாளிகள் பற்றிய தனிப்பட்ட விவரங்களை சேகரிப்பதில்லை என்கிறது. அந்த வகையிலும் பிள்ளைகளுக்கு பாதுகாப்பானது. மேலும் இதன் முகவரி டாட் கோ என முடிகிறது. ஆங்கிலத்தில் சில்டர்ன் ஒன்லி என்பதன் அடையாளமாம் இது.

ஆனால், இந்த தேடியந்திரத்திற்கான அறிமுக பகுதியில், இது செயல்படும் விதம் பற்றி விளக்கப்பட்டிருக்கிறதே தவிர, இதன் பின்னே உள்ள நிறுவனம் அல்லது குழு பற்றிய தகவல்கள் இல்லை.

நிற்க, கிட்லேவின் வடிகட்டல் வசதி பாதுகாப்பனதாக கருதப்பட்டாலும், இதனால் வடிவகட்டப்படும் வார்த்தைகள் மற்றும் முடிவுகள் பிள்ளைகளுக்கு பாரபட்சமான தகவல்களை வழங்ககூடியதாக இருப்பதாக விமர்சனங்கள் முன்வைக்கப்பட்டுள்ளன. பொதுவாக வடிகட்டல் என்றால் வரக்கூடிய பிரச்சனை இது என்றாலும், பிள்ளைகளுக்கு பாதுகாப்பானை தகவல்கள் என்று நாம் வடிகட்டக்கூடியவை எந்த அளவு சரியானவை என்பது விவாத்த்திற்கு உரியது தான்.

அதோடு இன்னொரு சுவாரஸ்யமான கேள்வி, பிள்ளைகள் எதுவரை இது போன்ற குழந்தை தேடியந்திரங்களை பயன்படுத்தலாம் மற்றும் எப்போது அவர்களை பெரியவர்களாக அனுமதித்து கூகுள் அல்லது பிங் அல்லது டக் டக் கோ போன்ற தேடியந்திரங்களை பயன்படுத்த அனுமதிக்கலாம்?

தேடியந்திர முகவரி; http://www.kiddle.co/

1. தேடியந்திரங்கள் தொடர்பான தமிழ் இந்துவில் எழுதும் ஆ’வலை’ வீசுவோம் தொடரை வாசிக்க:

2. சிறுவர்களுக்கான தேடியந்திரங்கள்: http://cybersimman.com/2014/11/07/search-54/

வராலாறு அறிய அழைக்கும் இணையதளங்கள்!

வரலாறு அலுப்பூட்டுக்கூட்டும் விஷயமாக நீங்கள் நினைத்துக்கொண்டிருக்கலாம். ஆனால் வரலாறு சுவார்ஸ்யமானது மட்டும் அல்ல; முக்கியமானதும் கூட!. மனித குலத்தின் கடந்த கால நிகழ்வுகளை அறிந்து கொள்வது வாழ்க்கை பற்றிய புரிதலுக்கு உதவும். பொது அறிவு நோக்கிலும் வரலாற்றை அறிந்திருப்பது அவசியமானது.

பாடப்புத்தகங்களை மீறி வரலாற்றை அறிந்து கொள்ளும் ஆர்வம் இருந்தால் அதற்கு வழிகாட்டக்கூடிய இணையதளங்கள் இருக்கின்றன. இந்த இணையதளங்கள் வரலாற்று நிகழ்வுகளையும் , தெரிந்து கொள்ள வேண்டிய முக்கிய தகவல்களையும் சுவாரஸ்யமாக முன் வைக்கின்றன. பக்கம் பக்கமாக படிக்க வேண்டிய தேவை இல்லாமல் ரத்தினச்சுருக்கமாக இவை வரலாற்று தகவல்களை அளிப்பதோடு, வரலாற்று தொடர்பான விளையாட்டுகளுடனும் கவர்ந்திழுக்கின்றன.

முதலில் பிபிசியின் வரலாற்று இணைதளத்தை பார்க்கலாம். உலகின் மிகச்சிறந்த செய்தி நிறுவனங்களின் ஒன்றாக விளங்கும் பிபிசி இணையதளத்தின் சார்பில் சுட்டிஸ்களுக்கு ஹிஸ்டரியை எளிதாக கற்றுத்தருவதற்காகவே அமைக்கப்பட்டுள்ள பகுது இது; http://www.bbc.co.uk/schools/primaryhistory/.
வரலாறு என்றவுடன் கிரேக்கமும் ,ரோமாபுரியும் தவறாமல் நினைவுக்கு வரும். கூடவே நம்முடைய சிந்து சமவெளி நாகரீகமும் மனதில் தோன்றும். கிரேக்கம் பற்றி அறிய வேண்டுமா? பண்டைய கிரேக்கம் தலைப்பில் கிளிக் செய்தால் , கிரேக்க வரலாறு துவக்கத்தில் இருந்து , அதன் வளர்ச்சி, எதென்ஸ் நகரின் சிறப்பு, ஒலிம்பிக் போட்டிகள், கிரேக்க போர்கள், கிரேக்க கடவுள்கள் என கிரேக்க வரலாற்றின் சுருக்கத்தை தெரிந்து கொண்டு விடலாம்.

இதே போலவே சிந்து சமவெளி தலைப்பை கிளிக் செய்தால் , நமது இந்தியாவின் வரலாற்று சிறப்பை அறிந்து கொள்ளலாம்.
பிரிட்டனை சேர்ந்த சார்லஸ் மேசன் என்பவர் தான் , சிந்து சமவெளி நாகரீகம் கண்டறியப்பட காரணமாக இருந்தவர். அவர் தான் 1826 ல் முதன் முதலில் ஹரப்பா நாகரீகத்தின் சுவடுகளான கட்டிடங்களின் மிச்சங்களை தனது பயணத்தின் போது கண்டறிந்தவர்.
ஏறக்குறைய 5,000 ஆண்டுகளுக்கு முன்னரே இந்த பகுதியில் இருந்தவர்கள் அடுப்பை பயன்படுத்தி ரொட்டி சுட அறிந்திருந்தனர்.

எகிப்தியர்கள் போல பிரமிடுகள் மற்றும் சீனர்கள் போல சீனப்பெருஞ்சுவர் போன்ற அடையாளங்களை விட்டுச்செல்லாவிட்டாலும் சிந்து சமவெளி மக்கள் வர்த்தகம், விவசாயம் மற்றும் செங்கல் சுடுவது போன்ற கலைகளை விட்டுச்சென்றனர். இந்திய கலாச்சாரமும் இந்த நாகரிகத்தின் பரிசு தான்.
ஒற்றுமையாகவும் அமைதியாகவும் வாழும் முறையையும் சிந்து சமவெளி மக்கள் அறிந்திருந்தனர்.
இது போல சிந்து சமவெளி மக்களின் வாழ்க்கை தொடர்பான இன்னும் பல முக்கிய தகவல்களை இந்த தலைப்பின் கீழ் அறிந்து கொள்ளலாம். எல்லா விஷயங்களுமே 10-15 வரிகளில் சுருக்கமாகவும் சுவையாகவும் இருப்பதால், எளிதாக படித்து தெரிந்துகொண்டு அடுத்த அடுத்து என கிளிக் செய்து முன்னேறலாம். அருகிலேயே தொடர்புடைய புகைப்படங்கள் மற்றும் வீடியோ இணைப்புகளும் கொடுக்கப்பட்டுள்ளன. ஒவ்வொரு தலைப்புக்கும் ஏற்ற வரலாற்று விளையாட்டும் உண்டு. உதாரணமாக சிந்து சமவெளி பற்றி படிக்கும் போது அந்த கால வர்த்தகராக செயல்பட்டு வணிகத்தில் ஈடுபடலாம். இதே போல கிரேக்க நாயகனாக சாகச விளையாட்டிலும் ஈடுபடலாம்.
வைக்கிங்களின் வரலாறு ,உலக வரலாறு, உலகப்போர் ஆகியவற்றையும் அறிந்து கொள்ளலாம். இவற்றில் உலக வரலாறு விளக்கப்பட்டிருக்கும் விதம் விஷேசமானது. வரலாற்றின் முக்கிய பொருட்கள் மூலம் இந்த விளக்கம் அமைந்துள்ளது.

ஹிஸ்டரிபார்கிட்ஸ் ( http://www.historyforkids.net/) வரலாற்று தகவல்களோடு வொர்க்‌ஷீட், வினாடி வினா மற்றும் விளையாட்டுகள் என சுவாரஸ்யத்தை ஏற்படுத்துகிறது. எகிப்து, சீனா, கிரேக்கம், ரோமாபுரி, ஆசியா, அமெரிக்கா என பல தலைப்புகளில் தகவல்கள் இடம்பெற்றுள்ளன. ஒவ்வொரு தலைப்பை கிளிக் செய்தால் துணைத்தலைப்புகளின் கீழ் விரிவாக வரலாற்றை அறிந்து கொள்ளலாம். ஆசியா எனும் தலைப்பில் இந்திய வரலாறு பற்றி விரிவாக இடம்பெற்றுள்ளது.

இவை தவிர வரலாற்று வினாடி வினாக்களும், வொர்க்‌ஷீட்களும் இன்னும் சுவாரஸ்யத்தை அளிக்கின்றன.
இதே தலைப்பில் இருக்கும் மற்றொரு இணையதளம்: http://www.historyforkids.org/. வரலாற்று களஞ்சியமான இந்த தளத்தில் புராதன இந்தியா உட்பட பல தலைப்புகளை வரலாற்றை கொஞ்சம் ஆழமாகவே தெரிந்து கொள்ளலாம். இந்தியா பற்றி மட்டுமே பத்துக்கும் மேல்பட்ட தலைப்புகளும் அவற்றின் கீழ் பல துணைத்தலைப்புகளும் இடம் பெற்றுள்ளன. எல்லாமே கொஞ்சம் விரிவாக கொடுக்கப்பட்டுள்ளன என்றாலும் படிப்பதற்கு எளிதாகவும் சுவாரஸ்யமாகவும் இருக்கிறது. இந்த தளத்தின் முகப்பு பக்கத்தில் வரலாற்று கார்ட்டூன்களும் கவர்கின்றன. கணித மேதை பித்தகோரஸ், தத்துவஞானி பிளாட்டோ ஆகிய வரலாற்று நாயகர்களையும் அறிந்து கொள்ளலாம்.

வரலாறு தொடர்பான இன்னொரு சுவாரஸ்யமான தளம்: http://www.kidspast.com/.
இந்த தளத்தில் வரலாற்று தகவல்களும் உண்டு; வரலாறு தொடர்பான விளையாட்டுகளும் இருக்கிறது. வரலாற்று மேற்கோள்கள் இதன் தனிச்சிறப்பு. இதே போல வரலாற்று புள்ளிவிவரங்களும் தனியே கொடுக்கப்பட்டுள்ளன. டைட்டானிக் கப்பல் பற்றிய தனிப்பகுதியும் இருக்கிறது.

இந்த இணையதளங்கள் நிச்சயம் வரலாற்றில் ஆர்வத்தையும் ஏற்படுத்தும் வரலாற்று அறிவையும் வளர்த்துக்கொள்ள உதவும். இந்த பட்டியலில், வரலாற்று அகராதியையும் (http://www.historytoday.com/dictionary ) சேர்த்துக்கொண்டால் இன்னும் பயனுள்ளதாக இருக்கும். பிரபலமான வரலாற்று இணையதளமான ஹிஸ்டரி டுடேவின் ஒரு அங்கமான இந்த அகராதி முக்கிய வரலாற்று பதங்களுக்கு அர்த்தம் தருகிறது.
——

நோபல் நிபுணராகலாம் , வாங்க!.

இந்த ஆண்டுக்கான நோபல் பரிசு அறிவிக்கப்பட்டுள்ளன. அமைதிக்கான நோபல் பரிசு இந்தியரான கைலாஷ் சத்யார்த்தி மற்றும் பாகிஸ்தானின் மலாலாவுக்கு இணைந்து வழங்கப்பட்டுள்ளதால இந்த ஆண்டு நோபல் பரிசு பற்றி அறிய நம்மவர்களுக்கு கூடுதல் ஆர்வம் ஏற்பட்டிருக்கும். நோபல் பரிசு பற்றிய செய்திகளை தவறவிட்டிருந்தாலும் பரவாயில்லை, நோப்ல பரிசுக்கான அதிகாரபூர்வ இணையதளத்தில் எல்லா விவரங்களையும் தெரிந்து கொள்ளலாம்.

நோபல்பிரைஸ்.ஆர்ஜி (http://www.nobelprize.org/ ) எனும் அந்த இணையதளத்தில் இந்த ஆண்டு விருது பெற்ற மேதைகள் மற்றும் அவர்களுக்கு விருது வழங்கப்படுவதற்கான காரணம் பற்றி தெளிவாக குறிப்பிடப்பட்டுள்ளது. இதே போல கடந்த காலங்களில் விருது பெற்றவர்கள் மற்றும் அவர்களின் பங்களிப்பையும் தெரிந்து கொள்ளலாம்.
நோபல் பரிசை வழங்கும் அமைப்பு நடத்தும் இணையதளம் இது .வடிவமைப்புலும் சரி உள்ளடக்கத்திலும் சரி மிகச்சிறந்த்தாக இந்த இணையதளம் விளங்குகிறது. அமைப்புகளுக்கான இணையதளம் போல சம்பிரதாயமாக இல்லாமல் உயிரோட்டத்துடன் துடிப்பாக இந்த இணையதளம் இருப்பதை இதில் விஜயம் செய்தவுடன் தெரிந்து கொள்ளலாம். அனைவருக்கும் ஆர்வம் ஏற்படுத்தும் வகையில் இந்த தளம் இருப்பது தான் விஷேசம். அலுப்பே இல்லாமல் நோபல் பரிசு விவரங்கள் மற்றும் வரலாறு பற்றி தெரிந்து கொள்ளலாம்.
இந்த ஆண்டு ஒவ்வொரு துறையிலும் நோபல் பரிசு பெறுவபர்கள் பற்றி வரிசையாக தகவல்கள் இடம்பெற்றுள்ளன.

இந்தியாவில் ஏற்பாடு செய்யப்பட்டுள்ள சிறப்பு நிகழ்வுகள் பற்றிய தகவலும் முகப்பு பக்கத்தில் இடம்பெற்றுள்ளது.
இந்த தளத்தில் இன்னொரு சிறப்பு , சிறுவர்களுக்கும் நோபல் பரிசு மீது ஆர்வத்தை ஏற்படுத்தும் கல்வி பகுதி.
நோபல் பரிசு தகவல்களை சிறுவர் சிறுமிகளும், சுவாரஸ்யமா படிச்சு தெரிந்து கொள்ள வேண்டும் என்பதற்காகவே இந்த தனிப்பகுதி உருவாக்கப்பட்டுள்ளது; நோபல் பிரைஸ்/ எஜுகேஷனல் (http://www.nobelprize.org/educational/ ) இது தான் அந்த பகுதி.

இந்த பகுதியின் ஸ்பெஷாலிட்டி என்ன தெரியுமா? கொஞ்சம் கூட போரடிக்காமா ,சுவாரஸ்யமான முறையில் தகவல்களை தெரிஞ்சுக்கலாம் என்பது தான் அது. ஆம், நோபல் மேதைகளின் கண்டுபிடிப்புகளை எல்லாம் சிறுவர்களுக்கு ரொம்ப பிடிச்ச கேம்ஸ் மூலமா கற்று கொள்ள வழி செய்துள்ளனர்.

நோபல் பரிசு பற்றி அறிந்து கொள்ள நீங்க பெரிய ஜீனியசாக இருக்கனும் அவசியம் இல்லை, இந்த கேம்கள் சுவாரஸ்யமா உங்களுக்கு அவற்றை கற்று கொடுக்கும்னு உற்சாகமாக வரவேற்கும் இந்த பகுதியில் பெளதீகம் ,ரசாயனம், மருத்துவம், பொருளாதாரம் என நோபல் பரிசு தரப்படும் ஒவ்வொரு துறை தொடர்பாகவும் கேம்கள் இருக்கின்றன. இந்த கேம்கள் விளையாடி பார்க்க ஜாலியா இருப்பதோடு , நோபல் பரிசு பற்றி தெரிஞ்சுக்கவும் உதவியா இருக்கு. உதாரணமா, பாவ்லோ நாய் என்கிற கேமை எடுத்துக்குவோம். பாவ்லோ பரிசோதனை நமக்கு தெரிஞ்சது தான். ரஷ்யாவை சேர்ந்த பாவ்லோ தினமும் குறிப்பிட்ட நேரத்துக்கு மணி அடிச்சு நாய்க்கு சாப்பாடு போட்டா அந்த நேரம் வந்த பிறகு அதுக்கு பசிக்க ஆரம்பிச்சிடும்னு இந்த பரிசோதனை மூலமா நிருபித்தார். இப்ப நாமும் கூட இந்த பரிசோதனையை செய்து பார்கலாம். இந்த பரிசோதனையோட நோக்கம் என்ன , இதை எப்படி விளையாடுவது ஆகிய குறிப்புகளும் கொடுக்கப்பட்டுள்ளன.

இந்த கேமை ஆடிவிட்டு பாவலோ பற்றியும் படிச்சு தெரிஞ்சுக்கலாம். பாவ்லோ என்றதுமே இந்த பரிசோதனை தான் நினைவுக்கு வர்யும் என்றாலும் அவருக்கு பரிசு கிடைச்சது இதுக்காக இல்லை. நாம் சாப்பிடும் உணவு வயிற்றில் எப்படி ஜீரணமாகிறது என்று அவர் கண்டுபிடிச்சு சொன்னதுக்காக 1904 ம் ஆண்டு மருத்துவ துறையில் நோபல் பரிசு வழங்கப்பட்டது. பாவ்லோ இது பற்றி ஆய்வு செய்வதற்கு முன்பாக உணவு எப்படி ஜீரணம் ஆகிறது என்பது பற்றி சரியான விவரம் தெரியாம தான் இருந்ததாம்.

இதே போல மரபணு தொடர் என்று சொல்லப்படும் டி.என்.ஏ வுக்கான ஒரு விளையாட்டும் இருக்கு. இந்த விளையாட்டில் டி.என்.ஏ மாதிரிய நாம உருவாக்கி காட்டனும். அதுக்கு உதவிய முதலிலேயே மரபணுனா என்ன ,அது எப்படி இருக்கும் போன்ற விவரங்களை படிச்சு தெரிஞ்சுக்கலாம். டி.என்.ஏ கண்டுபிடிப்புக்கான நோபல் பரிசு 1962 ல் பிரான்சிஸ் கிரிக்,ஜேம்ஸ் வாட்சன் மற்றும் மவுரிஸ் வில்கின்ஸ் ஆகிய மூன்று விஞ்ஞானிகளுக்கு வழங்கபட்டது.

இதே மாதிரி இரத்த வகை, டிரான்சிஸ்டர் , நோய் எதிர்ப்பு முறை உள்ளிட்ட தலைப்புகளிலும் விளையாட்டுக்கள் இருக்கு. ஒவ்வொரு விளையாட்டா முன்னேறிச்சென்றால் நோபல் கண்டுபிடிப்பு தொடர்பா பல விஷயங்களை தெரிஞ்சுக்க முடியுது.

பொருளாதாரம் மற்றும் இலக்கியம் தொடர்பான சுவாரஸ்யமான விளையாட்டுக்களும் இருக்கின்றன. உண்மையிலேயே இண்டிரஸ்டிங்கா இருக்கு. இந்த தளத்தில் பல விஷயங்களை தெரிஞ்சுக்க முடியுது. நோபல் பரிசு ஸ்வீடனை சேர்ந்த ஆல்பிரட் நோபல் எனும் கோடீஸ்வரர் ஏற்படுத்தியதுனு படிச்சுருக்கோம். ஆல்பிரட் நோபல் பற்றி மேலும் பல தகவல்கள் இதில் இருக்கு. 17 வயசுலேயே அவருக்கு 5 மொழிகள் தெரியுமாம். டைனமைட்டை கண்டுபிடிச்ச அவர் 87 நாடுகளின் நிறுவங்களை வைத்திருந்தார். அதோட 355 காப்புரிமைகளுக்கும் சொந்தக்காராக இருந்தார்.

நோபல் பரிசு பொதுவா அக்டோபர் மாதம் அறிவிக்கப்பட்டு டிசம்பர் பத்தாம் தேதி வழங்கப்படும் .அன்று தான் ஆல்பிர்டப் நோபலின் நினைவு தினம்.

நோபல் பரிசு பற்றி இன்னொரு சுவாரஸ்யமான விஷயம், தான் நோப்ல மேதைகளிலேயே மிகவும் இளையவர் எனும் சிறப்பை ஆஸ்திரேலியாவை சேர்ந்த லாரன்ஸ் பிராக் என்பவர் பெற்றிருந்தார். இவர் பெளதீக துறைக்கான நோபல் பரிசை 1915 ல் பெற்ற போது அவருடைய வயது 25 தான் . ஆனால் இந்த ஆண்டு அமைதிக்கான நோபல் பரிசை பெறும் மலாலாவுக்கு 17 வயது.
இது வரை நோபல் பரிசு பற்றி அதிகம் அறிந்திருக்காவிட்டாலும் இந்த இணையதளத்திற்கு சென்று பாருங்கள் நோபல் பரிசு மீது மதிப்பும் ஆர்வமும் தானாக ஏற்படும்.

அசத்தலான ஆன்லைன் அகராதிகள்!

wபடித்துக்கொண்டிருக்கும் போதோ,வீட்டுப்பாடம் செய்து கொண்டிருக்கும் போதோ புரியாத சொற்களுக்கு அர்த்தம் தெரிந்து கொள்ள டிக்‌ஷனரி அதாவது அகராதிகளை புரட்டி பார்த்திருப்பீர்கள். ஆனால் , இதற்காக புத்தக அலமாரியில் இருக்கும் தலையனை சைஸ் டிக்‌ஷனரி அல்லது கையடக்க டிக்‌ஷனரியை தான் நாட வேண்டும் என்றில்லை. இணைய வசதி இருந்தால், இணையத்திலேயே புரியாத எந்த சொல்லுக்கும் அர்த்தம் தெரிந்து கொண்டு விடலாம். இதற்காக என்றே ஆன்லைன் அகராதிகள் இருப்பது உங்களுக்கு தெரிந்திருக்கும். அகராதிகளில் பல ரகம் இருப்பது போலவே இணைய அகராதிகளிலும் பல ரகம் இருக்கின்றன. அவற்றில் அசத்தலான அகராதிகள் சிலவற்றை அறிமுகம் செய்து கொள்ளலாமா?

இந்த அகராதிகளின் சிறப்பம்சம் என்ன தெரியுமா? இவை அர்த்தம் தேடுவதை மேலும் சுவாரஸ்யமாக்குவதோடு , வார்த்தைகளுக்கான பொருளை காட்சிரீதியாவும் புரிய வைக்க கூடியவையாக இருக்கின்றன. அது மட்டுமா? அர்த்தம் தேடும் சொற்களுடன் தொடர்புடைய வேறு பல விஷயங்களையும் இவை தெரிந்து கொள்ள உதவுகின்றன.

இத்தகைய காட்சி அகராதிகளுக்கு அழகான உதாரணமாக வேர்ட்சென்ஸ்.மீ (http://wordsense.me/ ) அகராதி இருக்கிறது. வேர்டு சென்ஸ் தேடப்படும் வார்த்தைகளுக்கான அர்த்ததை அழகாக வரைபடம் போல காட்டுகிறது. இடது பக்கத்தில் பார்த்தீர்கள் என்றால் தேடிய சொல்லுக்கான அர்த்தம் கொடுக்கப்பட்டிருக்கும். அந்த சொல்லுக்கு பெயர்ச்சொல்லாக என்ன பொருள், வினைச்சொல்லாக இருந்தால் என்ன அர்த்தம் போன்றவற்றை இதைப்பார்த்து தெரிந்து கொள்ளலாம். அப்படியே பக்கத்தில் பார்த்தால் , அந்த சொல்லுக்கு இணையான சொற்கள் மற்றும் தொடர்புடைய சொற்களின் பட்டியலும் இடம்பெற்றிருக்கும். அவற்றில் எந்த சொல்லை கிளிக் செய்தாலும் அதற்கான விளக்கமும் வரும். அந்த சொல்லுக்கான வார்த்தை வரைபடமும் வரும். ஆக, எந்த சொல்லாக இருந்தாலும் அதற்கான பொருளையும் பயன்பாட்டையும் விரிவாக தெரிந்து கொள்ளலாம். ஆங்கிலம் அறிந்து கொள்வதில் ஆர்வம் இருந்தால் இந்த இணைய அகராதி உங்களை கவர்ந்திழுத்துவிடும். ஏதோ இணைய விளையாட்டு ஆடுவது போல நேரம் போவதே தெரியாமல் இதை பயன்படுத்திக்கொண்டே இருக்கத்தோன்றும்.
இந்த அகராதியில் இன்னும் ஒரு சிறப்பு , நீங்கள் ஏற்கனவே தேடிய வார்த்தைகளையும் இது நினைவில் வைத்துக்கொண்டே அடையாளம் காட்டிக்கொண்டே இருக்கும். அதே போல இதில் பரிந்துரைக்கப்பட்டுள்ள வார்த்தைகளின் பட்டியலையும் கிள்க் செய்து பார்க்கலாம்.

எல்லாம் சரி, அகராதியை பாடம் படிப்பது போல படித்துப்பார்க்கலாம் என்றால் நம்ப முடிகிற்தா? கிட்ஸ்.வேர்ட்ஸ்மித் ( http://kids.wordsmyth.net/we/) இதை சாத்தியமாக்குகிறது. இதில் மற்ற அகராதிகள் போல புரியாத வார்த்தைக்கான பொருள் தேடலாம். குறிப்பிட்ட அந்த வார்த்தைக்கான விளக்கத்தை விரிவாக பார்க்கலாம். அந்த சொல்லின் சரியான உச்சரிப்பையும் ஆடியோவாக கேட்கலாம். இதே பக்கத்தில் பார்த்தீர்கள் என்றால், ஒவ்வொரு சொல்லுக்கும் , வார்த்தை ஆராய்ச்சி, வார்த்தை வரலாறு ,வார்த்தை பாகங்கள் ஆகிய வசதிகள் இருப்பதை பார்க்கலாம். இதில் வார்த்தை ஆராய்சியை கிளிக் செய்தால் அந்த சொல்லின் பயன்பாடு தொடர்பான வாக்கியங்களை பார்க்கலாம். வாரத்தை வரலாறு அந்த சொல் தோன்றிய விதம் பற்றி தெரிந்து கொள்ளலாம். வார்த்தை பாகங்கள் பகுதியில் எந்த ஒரு சொல்லையும் பகுதி பகுதியாக பிரித்து பொருள் சொல்லப்படுகிறது.

இது வார்த்தை தேடலுக்கானது. முகப்பு பக்கத்தில் வார்த்தைகளுக்கான வழிகாட்டி எனும் வர்ணனையோடு பலவேறு தலைப்புகள் கொடுக்கப்பட்டிருக்கும். வரலாறு, மனித உடல், பொருளாதாரம என பல தலைப்புகளை பார்க்கலாம். எந்த தலைப்பை கிளிக் செய்தாலும் அந்த தலைப்புக்கான முக்கிய சொற்களின் பட்டியல் வந்துநிற்கும். அந்த சொற்களுக்கான பொருளை கிளிக் செய்து தெரிந்து கொள்ளலாம். வார்த்தைகளின் தங்கச்சுரங்கம் என்று இந்த வசதியை இந்த தளம் குறிப்பிடுகிறது. இதை பயன்படுத்திப்பார்ப்பு சுவாரஸ்யமானது என்பதோடு தினமும் புதிய சொற்களை அறிமுகம் செய்து கொள்ளலாம். வார்த்தை விளையாட்டு புதிர்களும் இதில் உண்டு. சிறுவர்களுக்கான தனி பகுதியில் இருக்கிறது. அதில் எல்லாமே காட்சிகளாக விளக்கப்பட்டிருக்கும்.
ஸ்னேப்பி வேர்ட்ஸ் ( http://www.snappywords.com/) அகராதி இன்னும் கூட சுவாரஸ்யமானது.

இதில் எந்த வார்த்தையை சமர்பித்தாலும் அந்த சொல்லை மையமாக வைத்துக்கொண்டு தொடர்புடைய சொற்களை வரைபட சித்திரமாக காட்டுகிறது. சொற்களின் அருகே மவுசை கொண்டு சென்றாலே அவற்றுக்கான விளக்கத்தை பார்க்கலாம். அந்த வார்த்தையில் கிளிக் செய்தால் , அந்த சொலை மையமாக கொண்ட வார்த்தை சித்திரத்தையும் பார்க்கலாம். ஒரு வார்த்தை மட்டும் அல்ல இரு வார்த்தை சொற்களையும் இப்படி தேடிப்பார்க்கலாம். இந்த சித்திரத்தில் சொற்களின் தன்மைக்கு ஏற்ப தனித்தனி வண்ணங்களிலும் அடையாளம் காட்டப்படுகின்றன. அதாவது வினைச்சொல் என்றால் ஒரு வண்ணம். பெயர்ச்சொல் என்றால் ஒரு வண்ணம். ஆங்கில சொற்களின் பயன்பாட்டை காட்சிரீதியாக மிக அழகாக புரிய வைக்கிறது இந்த அகராதி.
காட்பிரைனி (http://www.gotbrainy.com/ ) அகராதி சொற்களுக்கான விளக்கத்தை அளிப்பதுடன் அதை புகைப்படமாகவும் காண்பித்து வியக்க வைக்கிறது. சொற்களின் அர்தத்தை விளக்கும் இந்த படங்கள் மூலம் சொற்களின் பயன்பாட்டை இன்னும் கூட தெளிவாக புரிந்து கொள்ளலாம். இந்த புகைப்படங்கள் பெரும்பாலும் இணையவாசிகளால் சமர்பிக்கப்பட்டவை.

அகராதிகளை பயன்படுத்துவது இத்தனை சுவாரஸ்யமானதா என்று வியப்பை ஏற்படுத்தி , வார்த்தைகளுக்கு பொருள் தேடும் ஆர்வத்தையும் இந்த அகராதிகள் உருவாக்கும். அப்படியே உங்களை ஆங்கில புலியாகவும் ஆக்கிவிடும்.

இணையத்தில் பாதுகாப்பாக தேடுங்கள்!.

குட்டீஸ் இணைய உலகில் கூகுலை தெரியாதவர்களே இருக்க முடியாது.தேடல் உலகின் ராஜா என்று சொல்லப்பட்டும் கூகுலை நிச்சயம் நீங்களும் அறிந்து வைத்திருப்பீர்கள்.இணையத்தில் தகவல்களை தேட நீங்களே பலமுறை இந்த தேடியந்திரத்தை(சர்ச் இஞ்சின்)பயன்படுத்தியிருப்பீர்கள்.

கூகுல் போலவே வேறு பல தேடியந்திரங்களும் இருப்பதையும் நீங்கள் அறிந்திருக்கலாம்.ஆனால் உங்களுக்காக என்றே தேடியந்திரங்கள் இருப்பது உங்களுக்கு தெரியுமா?அதாவது குட்டீஸ்களுக்கான என்றே உருவாக்கப்பட்ட பிரத்யேக தேடியந்திரங்கள் இருக்கின்றன.

இந்த தேடியந்திரங்கள் பாதுகாப்பானவை.எளிமையானவை.குட்டீஸ்களுக்கு ஏற்ற வகையில் கலர்புல்லானவை தெரியுமா?

எப்படி என்று பார்போம்!

கூகுலில் எந்த தகவல் தேடினாலும் கிடைக்கும் தான்.ஆனால் கூகுலில் சிறுவர்கள் பார்வையில் படக்கூடாத தகவல்களும் தளங்களும் கூட கண்ணில் படலாம்.இதனால் தான் உங்கள் அம்மாவோ அப்பாவோ நீங்கள் இணையத்தை பயன்படுத்தும் போது பின்னால் இருந்து பார்த்து கொண்டே இருக்கலாம்.தவறான இணையதளத்தின் பக்கம் பிள்ளைகள் போய்விடகூடாது என்று கவலைப்படலாம்.

இதற்காக என்றே சிறுவர்கள் பார்க்ககூடாத தளங்களை தடுத்து விடும் சாப்ட்வேர் எல்லாம் கூட இருக்கின்றன.நல்ல தளங்களை மட்டுமே இந்த சாப்ட்வேர்கள் வடிகட்டி தருகின்றன.

இத்தகைய பாதுகாப்பு பிள்ளைகளுக்கு தேவை என்று எல்லா பெற்றோர்களும் எதிர்பார்க்கவே செய்வார்கள்.

அதனால் தான் சிறுவர்களுக்காக என்றே தனி தேடியந்திரங்கள் உருவாக்கப்பட்டுள்ளன.

இந்த தேடியந்திரங்கள் பாதுகாப்பானவை மட்டும் அல்ல சுட்டீஸ் பயன்பாட்டிற்கு ஏற்ற வகையில் மிகவும் சுவாரஸ்யமானவையும் கூட!

உதாரணத்திற்கு அகா கிட்ஸ்.காம் தேடியந்திரத்தை முதலில் பார்ப்போம்.குழந்தைகளுக்கான தேடியந்திரம் என்று தான் இந்த தளம் வரவேற்கிறது.

இந்த தேடியந்திரத்தின் முகப்பு பக்கத்தை (ஹோம் பேஜ்) பார்த்தாலே ரொம்ப ஜாலியாக இருக்கும்.சின்ன சின்ன பொம்மைகளோடு வரவேற்கும் இந்த தேடியந்திரத்தில் கூகுலில் இருப்பது போலவே தேடுவதற்கான கட்டம் இருக்கிறது.அதில் தேடுவதற்கான கீவேர்டை டைப் செய்து தேடலாம்.அதன் பிறகு தேடல் பட்டியல் தோன்றும் அதிலிருந்து தேவையான தகவலை எடுத்து கொள்ளலாம்.எல்லாமே உங்களுக்கு பொருத்தமான தளங்களாக இருக்கும்.

இந்த தேடியந்திரம் கொஞ்சம் விஷுவலானது.அதாவது படங்களாக தகவல்கள் தேவையா என்றும் தீர்மானித்து கொள்ளலாம்.தேடுவதற்கு முன்பே தவல்கள் சாதாரணமாக தோன்ற வேண்டுமா அல்லது காட்சி ரீதியாக (விஷுவலாக)தோன்ற வேண்டுமா என செலக்ட் செய்து கொள்ளலாம்.

இதை தவிர கார்ட்டூன்,விளையாட்டுகள்,பொம்மை செய்தல் ஆகிய தனிப்பகுதிகளும் இருக்கின்றன.இணையத்திலேயே வரைவதற்கான தனிப்பகுதியும் இருக்கிறது.

அது மட்டும் அல்ல தேட கட்டத்திற்கு மேலேயே பல குறிச்சொற்களும் கொடுக்கப்பட்டுள்ளன.அவற்றிலும் கிளிக் செய்து பார்க்கலாம்.

http://aga-kids.com/

இதே போலவே கிட்ரெக்ஸ்.ஆர்ஜி என்னும் தேடியந்திரம் அழகான டைனசோர் படத்தோடு வரவேற்கிறது.இந்த தேடியந்திரம் கூகுலை பயன்படுத்தி சுட்டீஸ்களுக்கு பொருத்தமான தளங்களை மட்டும் தருகிறது.இதில் குழந்தைகளுக்கு என்று தனிப்பகுதியும் பெற்றோர்களுக்கு என்று தனிப்பகுதியும் இருக்கிறது.

குழந்தைகளுக்கான பகுதியை கிளிக் செய்தால் குட்டீஸ் வரைந்த அழகான ஓவியங்களை பார்க்கலாம்.பெற்றோர் பகுதியில் இந்த தேடியந்திரம் பற்றியும் இது ஏன் குழந்தைகளுக்கு ஏற்றது என்றும் தெரிவிக்கப்பட்டுள்ளது.

http://www.kidrex.org/

ஆஸ்க்கிட்ஸ் தேடியந்திரத்தில் எந்த சந்தேகத்தையும் கேள்வியாக கேட்டு தேடலாம்.நூற்றுக்கணக்கான கேள்விகளுக்கான பதில்கள் இதில் தொகுக்கப்பட்டுள்ளன.இதை தவிர விளையாட்டு மற்றும் திரைப்படங்கள் பற்றியும் தேடலாம்.

http://www.askkids.com/

கிஸ்கிளிக்.ஆர்ஜி தேடியந்திரம் சிறுவர்களுக்காக என்று நூலகர்களால் உருவாக்கப்பட்டது.எனவே ஹோம் ஒர்கிற்கு தேவையான தகவல்களை இதில் தைரியமாக தேடலாம்.

http://kidsclick.org/

இவற்றை தவிர யாஹூவின் குழந்தைகளுக்கான தேடியந்திரமும் ஸ்குவரில்நெட் என்ற தேடியந்திரமும் ,ஸ்டடிசர்கில் என்ற தேடியந்திரமும் இருக்கின்றன.

———-

சுட்டி விகடனில் வெளியாகும் எனது தொடரின் இரண்டாவது பதுதி இது.

(நன்றி சுட்டி விகடன்)