Tag Archives: network

பிரிபேசிக்சை ஆதரிக்கலாமா? ஒரு விளக்கம்

_0eb19116-a47b-11e5-a915-4cd4d91edd66பேஸ்புக்கில் நண்பர்கள் பலரும் பிரிபேசிக்ஸ் திட்டத்தை ஆதரித்து கையெழுத்திட்டிருப்பதாக பேஸ்புக் தொடர்ந்து தகவல் அளித்துக்கொண்டே இருக்கிறது. இதன் மூலம் இந்தியாவில் டிஜிட்டல் இடைவெளியை போக்குவதற்கு ஆதரவு தெரிவிப்பதாகவும் நம்ப வைக்கப்பட்டுள்ளனர்.

ஆனால் இந்த ஆதரவில் மிகப்பெரிய சிக்கல் இருக்கிறது. உண்மையில் பிரிபேசிக்ஸ் என்பது இணைய சமநிலைக்கு எதிரானது என சொல்லப்படுகிறது. கடந்த ஆண்டு நாம் எல்லாம் எதிர்த்து போராடி டிராய் அமைப்பிறகு லட்சகணக்கில் மெயில் அனுப்பியது நினைவில் உள்ளதா?
அதே இணைய சமநிலைக்கு எதிராக தான் இப்போது பேஸ்புக் மூலம் பிரிபேசிக்சிற்கு ஆதரவாக மெயில் அனுப்புகிறோம்.

இது புதிராக இருக்கலாம். ஆனால் இதை பேஸ்புக்கின் தந்திரம் அல்லது ஏமாற்று வேலை என்கின்றனர். பேஸ்புக் மிக சாமர்த்தியமாக இந்தியர்களில் பெரும்பாலானோர் எதிர்த்த இணைய சமநிலைக்கு எதிரான ஒன்றை வார்த்தை விளையாட்டுகள் மூலம் ஆதரிக்க வைத்திருக்கிறது.
எப்படி என்றால், பிரிபேசிக்ஸ் என்பது ஏற்கனவே பேஸ்புக் முன்வைத்த இண்டெர்நெட்.ஆர்க் திட்டத்தின் வேறு பெயரே.

தொலைதொடர்பு நிறுவனங்களுடன் இணைந்து இணைய வசதி இல்லாதவர்களுக்கு இலவச இணைப்பை அளிக்கும் நோக்கம் கொண்டதாக இண்டெர்நெட்.ஆர்க் திட்டம் விளக்கப்படுகிறது.
ஆனால் இதில் உள்ள சிக்கல் என்ன என்றால், இது முழு இணையத்தையும் இலவசமாக அளிக்க முற்படாமல் பகுதி அளவு இணையத்தை மட்டுமே அளிக்கிறது. அதில் பேஸ்புக்கும் இன்னும் சில தளங்களும் இருக்கும்.
இந்தியாவில் இணைய சமநிலை எதிர்ப்பின் போது இந்த திட்டமும் கடும் விமர்சனத்திற்கும் இலக்காகி, பல நிறுவங்கள் இதில் இருந்து விலகின. அதன் பிறகு பேஸ்புக் இதன் பெயரை பிரிபேசிக்ஸ் என்று மாற்றி உள்ளது. மேலும் இதில் இணையதளங்கள் இடம்பெறும் முறையையும் மாற்றி உள்ளது.
ஆனால் அடிப்படையில் இது இன்னமும் இணைய சமநிலை கொள்கைக்கு எதிராகவே இருப்பதாக விமர்சிக்கப்படுகிறது.

இந்த நிலையில் தான் பேஸ்புக் பிரிபேசிக்ஸ் ஆதரவு விண்ணப்பத்தை முன்வைத்து கையெழுத்து கேட்கிறது.
இதில் உள்ள வாசகங்கள் மிக கவனமாக இந்தியாவில் இணைய்த்தை அணுக வாய்ப்பில்லாதவர்கள் அதை இலவசமாக பெறுவதை தடுக்க முயற்சி நடப்பது போலவும், அதற்கு மாறாக டிஜிட்டல் இடைவெளியை போக்கும் வகையி, பிரிபேசிக்சை ஆதரிக்குமாறு கூறப்பட்டுள்ளது.
இதை ஆமோதித்து கிளிக் செய்தால் , பிரிபேசிக்சை நான் ஆதரிக்கிறேன் எனும் செய்தி டிராய் அமைப்புக்க் போய் சேரும்.

இது தான் வில்லங்கம். பயனாளிகளை குழப்பி பேஸ்புக் தன் சார்பாக பேச வைக்கிறது.
எல்லாம் சரி, அது தான் கடந்த ஆண்டே டிராய் கருத்து கேட்ட போது எதிர்ப்பை தெரிவித்தோமே என நீங்கள் நினைக்கலாம். அது சரி தான். அது தொடர்பாக இன்னும் முடிவு எடுக்கப்படவில்லை.,
இந்நிலையில் ட்ராய் கடந்த வாரம் மீண்டும் ஒரு ஆவணத்தை வெளியிட்டு கருத்து கேட்டுள்ளது. இது இணைய சமநிலை தொடர்பானது அல்ல.

ஜிரோ ரேட்டிங் எனப்படும், வெவ்வேறு சேவைகளுக்கு வேறு வேறு கட்டணங்கள் வசூலிக்க அனுமதி கோருவது தொடர்பான அறிக்கை இது. ஆனால் உள்ளடக்கத்தி அது இணைய சமநிலைக்கு வேட்டு வைக்க கூடியது.
வெவ்வேறு கட்டண முறையை அனுமதிப்பது என்பது இணைய சமநிலையை குலைக்கவே வழி செய்யும்.
இது தொடர்பாக தான், பேஸ்புக் பிரிபேசிக்சை ஆதரிக்க கேட்கிறது.
இணைய சமநிலைக்கு இது எதிரானதல்ல என்று சொல்கிறது.
புரிந்து கொண்டு செயல்படுங்கள்.

தேவை எனில் பேஸ்புக்கிற்கு இந்த செய்தியை அனுப்பலாம் என இணைய சமநிலை ஆதரவாளர்கள் பரிந்துரைக்கின்றனர்.

டிராய் புதிய அறிக்கை பற்றிய அருமையான விளக்க செய்தி: http://www.hindustantimes.com/tech/decoded-what-trai-s-latest-paper-about-zero-rating-is-all-about/story-RhvyVx6OkbgsTkJlKo8vXP.html

அன்புடன் சைபர்சிம்மன்

குறிப்பு; இதை ஷேர் செய்யுங்க என்றெல்லாம் கேட்க மாட்டேன்.

நான் வாங்க விரும்புவதெல்லாம்…;ஷாப்பிங் வலைப்பின்னல்


தேவைகளையும் விருப்பங்களையும் பட்டியலிட்டு பகிர்ந்து கொள்ள உதவும் இணையதளங்கள் இருக்கின்றன.இவை ஒவ்வொன்றும் ஒரு ரகம் .ஒவ்வொன்றும் ஒரு தேவையை நிறைவேற்றுகின்றன.

அதே போல வாங்க விரும்பும் பரிசுப்பொருட்களை பட்டியலிட்டு பகிர்ந்து கொண்டு அதன் மூலம் புதுமையான மற்றும் பயனுள்ள பரிசுப்பொருளை கண்டு கொள்ளும் உதவும் தளங்களும் இருக்கின்றன.

பரிசு பொருள் என்று இல்லை,பொதுவாக வாங்க விரும்பும் பொருட்களை பட்டியலிட்டு பகிர்ந்து கொள்ள உதவும் சமூகம் ஷாப்பிங் தளங்களும் இருக்கின்றன.

இவை எல்லாவற்றின் நோக்கமும் அடிப்படையில் ஒன்று தான்.இணையம் மூலம் விருப்பங்களை பகிர்ந்து கொண்டு அந்த பகிர்தல் மூலம் புதியவற்றை இனங்காண்பது தான் அது.

இந்த வகை தளங்களின் செயல்பாடுகளும் பொதுவானது தான்.விருப்பங்களை பட்டியலாக பகிர்ந்து கொள்வது.மற்றவர்களின் பட்டியலை பின் தொடர்ந்து அவர்கள் விருப்பங்களை அறிவது.அந்த அறிதல் மூலமாக புதிய யோசனைகளை பெறுவது.இவை தான் இந்த தளங்களின் அடிப்படை செயல்பாடு.

இதன் மூலம் இந்த தளங்கள் சாத்தியமாக்கும் சமூக தன்மையையும் அந்த சமூக தன்மை மூலமாக நிறைவேறும் தனிப்பட்ட தேவைகளும் அற்புதமானவை.

இந்த பிரிவில் புதுப்புது தளங்களும் அறிமுகமாகி கொண்டே தான் இருக்கின்றன.சில உண்மையிலேயே புதுமையானவை.சில ஏற்கனவே உள்ள தளங்களின் இன்னொரு வடிவமாக அலுப்பூட்டக்கூடியவை.

வான்ஸ்டர் இந்த பட்டியலில் புதிதாக சேர்ந்திருக்கிறது.

வான்ஸ்டரை முற்றிலும் புதுமையான சேவை என்று புகழவும் முடியாது.அதே நேரத்துல் ஏற்கனவே உள்ள சேவை தானே என்று புறந்தள்ளி விடவும் முடியாது.

நீங்கள் விரும்பும் எல்லாம் ஒரே இடத்தில் என அழைக்கும் வான்ஸ்டர் ,மூன்று வகையான தேவையை ஒரே நேரத்தில் நிறைவேற்றி கவனத்தை ஈர்க்கிறது.

இணைய பலகையான பின்ட்ரெஸ்ட்டின் தோற்றத்தை நினைவு படுத்தும் முகப்பு பக்கத்தை பெற்றுள்ள வான்ஸ்டர் என்ன செய்கிறது என்றால் உங்கள் விருப்பங்களுக்கான பட்டியலை உருவாக்கி கொள்ள உதவுகிறது.விருப்பங்கள் என்பது நீங்கள் வாங்க விரும்பும் பொருட்கள்.(பெரும்பாலும் இணையம் வழியே வாங்க விரும்புபவை).

புதிதாக வந்துள்ள செல்போனையோ அல்லது புத்தகத்தை வாங்க விரும்புகிறீர்களா,உடனே அதனை உங்கள் விருப்ப பட்டியலில் சேர்த்து கொள்ளலாம்.இதற்கென்றே புக்மார்க் வசதியும் இருக்கிறது.உறுப்பினராக சேர்ந்த பின் புக்மார்க் வசதியையும் உங்கள் பிரவுசரில் சேர்த்து கொண்டால் அதன்பிறகு இணையத்தில் உலாவும் போது வாங்க தூண்டும் பொருள் கண்ணில் பட்டல் அதன் மீது புக்மார்க்கை கிளிக் செய்தால் போதும் அந்த பொருள் தானாக உங்கள் விருப்ப பட்டியலில் சேர்ந்து விடும்.அதுவும் அதன் அழகான புகைப்படத்துடன்.

முகப்பு பக்கத்தில் இந்த புகைப்படங்களை தான் வரிசையாக பார்க்கலாம்.எந்த புகைப்படத்தை கிளிக் செய்தாலும் அத்ய் தொடர்பான விவரங்களை காணலாம்.அதாவது அந்த பொருளை வாங்க விரும்பி குறித்து வைத்தது யார்,வேறு யாரெல்லாம் அதனை வாங்க விருப்பம் தெரிவித்துள்ளனர் போன்ற விவரங்களை அறிந்து கொள்வதோடு அதனை எங்கே வாங்கலாம் என்ற தகவலையும் தெரிந்து கொள்ளலாம்.

முகப்பு பக்கத்தில் பகிரப்படும் வாங்குவதற்கான விருப்பங்களை பார்க்கும் போது புதிய பொருட்களை அறிமுகம் செய்து கொள்ளலாம் என்றால் புகைப்படங்களை கிளிக் செய்து பார்ப்பதன் மூலம் அவை மற்றவர்கள் மத்தியில் பிரபலமாக இருக்கிறதா என்றும் தெரிந்து கொள்ளலாம்.

பொருட்களின் கீழ் அவை பற்றிய கருத்துக்களையும் தெரிவிக்கலாம்.பொருட்கள் பற்றிய கூடுதல் தகவல் மற்றும் அவற்றின் பயன்பாடு குறித்து அறிய இந்த பின்னூட்டங்கள் உதவலாம்.

மற்றவர்கள் விருப்பம் தெரிவித்த பொருட்களை நாமும் விரும்பினால் ஒரே கிளிக்கில் நமது விருப்ப பட்டியலில் சேர்த்து விடலாம்.குறிப்பிட்ட ஒரு உறுப்பினரின் தேர்வுகள் வியக்க வைத்தால் அவரை பின் தொடர தீர்மானிக்கலாம்.அதன் பிறகு விரும்பும் புதிய பொருட்களை நாமும் உடனடியாக தெரிந்து கொள்ளலாம்.இந்த வலையில் வாங்கும் விருப்பத்திற்கான வலைப்பின்னலாக இந்த தளம் செயல்படுகிறது.

ஷாப்பிங்கில் நாட்டம் கொண்டவர்கள் பரிசளிக்க ஏற்ற புதிய பொருட்களை அறிமுகம் செய்து கொள்ள இந்த தளம் மிகவும் உதவியாக இருக்கும்.

அது மட்டும் அல்ல குறிப்பிட்ட பொருளை வாங்கலாமா வேண்டாமா என்ற சந்தேகம் இருந்தால்,அந்த கேள்வியை நமது நண்பர்கள் மத்தியில் கேட்டு கருத்து கணிப்பு நடத்தி அதனடிப்படையில் முடிவு செய்யலாம்.இது இந்த தளம் வழங்கும் இரண்டாவது வசதி.

அதே போல குறிப்பிட்ட பொருளை நண்பருக்கு வாங்கி பரிசளிக்க விரும்பி அதன் விலை கூடுதலாக இருப்பதாக நினைத்தால் மற்ற நண்பர்களோடு இணைந்து கூட்டாக அதனை வாங்கி கொடுக்கலாம்.இதற்கான ஒருங்கிணைப்பு வசதியையும் இந்த தளம் வழங்குகிறது.இது இந்த தளத்தின் மூன்றாவது வசதி.

இது தவிர பிறந்த நாள் மற்றும் திருமண நாள் போன்ற பரிசளிப்புக்கு ஏற்ற நாட்களை மறக்காமல் இருக்க நினைவூட்டும் வசதியும் இருக்கிறது.

பேஸ்புக் மூலமே உறுப்பினராகலாம்.தனியேவும் உறுப்பினராகலாம்.

இணையதள முகவரி;http://www.wantster.com/

உணவு மூலம் உறவை வளர்க்கும் இணையதளம்.

மதிய உணவையும் சமுக வலைப்பின்னல் சேவையையும் இணைத்து உணவை ருசித்த படி நண்பர்களோடும் உரையாடி மகிழும் வசதியை தரும் சேவைகள் வரிசையில் உதயமாகியுள்ளது ‘கிரப் வித் அஸ்’இணைய சேவை .எங்களோடு சாப்பிட வாருங்கள் என்று அழைக்கும் இந்த தளம் இந்த வகையான சேவையை இன்னும் ஒரு படி மேலே எடுத்து சென்றுள்ளது என்றும் பாராட்டலாம்.

மற்ற உணவு சார்ந்த சமூக வலைப்பின்னல் சேவை போல்வே கிரப் வித் அஸ் தளமும் நண்பர்களோடு சேர்ந்து மதிய உணவு சாப்பிட உதவுகிறது.ஆனால் மதிய உணவுக்கான திட்டமிடலை மேற்கொண்டு நண்பர்களை அழைக்க உதவுவதோடு நின்று விடாமல் இவை எல்லாவற்றையும் மேலும் எளிமையாக்கி தருகிறது.

அதோடு முக்கியமாக இந்த சேவையை பயன்படுத்தும் போது சாப்பிடுவதற்கான ரெஸ்டாரண்டை தேர்வு செய்யவோ சாப்பாட்டிற்கான பில தொகையை செலுத்தவோ அல்லாட வேண்டியதில்லை.

நண்பர்களோடு சேர்ந்து சாப்பிட விரும்புகிறவர்கள் இந்த தளத்தில் நுழைந்து யாருடன் சாபிடலாம் அல்லது எங்கே சாப்பிடலாம் என்று தீர்மானித்து கொள்ள வேண்டும்.இதற்காக இங்கே பட்டியலிடப்பட்டுள்ள உணவு அட்டவனையில் பொருத்தமான தினத்தை தேடிப்பார்க்கலாம்.

எந்த ரெஸ்டாரண்டில் என்று உணவுக்கு ஏற்பாடு செய்யப்பட்டுள்ளது,யாரெல்லாம் பங்கேற்கினறனர் என்பதை பார்த்து அந்த ஏற்பாட்டில் உடன்பாடு இருந்தால் நாமும் இணைந்து கொள்ளலாம்.உணவருந்த வருவதாக தெரிவிக்கும் போதே உணவுக்கான கட்டணத்தையும் ஆன்லைனிலேயே செலுத்தி விட வேண்டும்.எனவே விருந்தன்று பில் தொகை பற்றி கவலைப்படாமல் நேராக ரெஸ்டாரண்டுக்கு சென்று நண்பர்களோடு உரையாடியபடி உணவை சுவைக்கலாம்.

நண்பர்கள் என்பது நண்பர்களாக கூடியாவர்களையும் தான் குறிக்கும்.அறிமுகமில்லாதவர்களாக இருந்தாலும் வருவதாக பதிவு செய்து கொண்டு அங்கே சென்று அறிமுகம் செய்து கொண்டு நட்பை ஏற்படுத்தி கொள்ளலாம்.

ஆக,நட்புக்கு நட்பும் கிடைக்கும் சுவையாக சாப்பிட்டது போலவும் இருக்கும்.ஆனால் புதியவர்களோடு உணவு சாப்பிட சங்கடப்படுபவர்கள் தாஙக்ள் விரும்பும் தினத்தில் தங்களுக்கு விருப்பமான ரெஸ்டாரண்டில் விருந்துக்கு ஏற்பாடு செய்து விட்டு அதில் பங்கேற்குமாறு நண்பர்களுக்கு அழைப்பு விடுக்கலாம்.

இந்த தளத்தின் மற்றொரு சிறப்பம்சம் வருங்கால விருந்துகள் பட்டியலிடபட்டிருப்பதோடு கடந்த கால விருந்துகளும் பட்டியலிடப்பட்டுள்ளன.இந்த பட்டியலை புரட்டி பார்ப்பதன் மூலம் முன்னர் நடைபெற்ற விருந்துகளில் யாரெல்லாம கலந்து கொண்டனர் என்பதை பார்த்து கொள்ளலாம்.இதன் மூலமும் புதிய நட்பு கிடைக்க வாய்ப்புள்ளது.புதிய ரெஸ்டாரண்ட்களையும் அறிமுகம் செய்து கொள்ளலாம்.

அதே போல வருங்கால விருந்து பட்டியலில் இடங்கள் காலியாகி இருக்கின்றனவா அல்லது அனைத்து இடங்களும் நிரம்பிவிட்டனவா என்ற தகவலும் கொடுக்கப்பட்டுள்ளன.

அமெரிக்காவை மையமாக கொண்டு உருவாக்கப்பட்டுள்ள இந்த தளத்தில் முக்கிய அமெரிக்க நகரங்கள் இடம் பெற்றுள்ளன. குறிப்பிட்ட நகரங்களில் வசிப்பவர்கள் தங்கள் நகரத்தின் பெயரை குறிப்பிட்டு அங்கு திட்டமிடப்படும் விருந்து நிகழ்ச்சிகள் பற்றிய முன்னறிவிப்பை இமெயில் மூலம் பெற்று கொள்ளலாம்.

இந்த தளத்தில் உணவு சார் சமூக வலைப்பின்னல் சேவை தொடர்பான வலைப்பதிவும் இருக்கிறது.அதே போல நண்பர்களோடு ரெஸ்டாரண்டில் உணவு சாப்பிடும் போது கடைபிடிக்க வேண்டிய நாகரீகம் பற்றியும் குறிப்புகள் தரப்பட்டுள்ளன.

உணவு பிரியர்களுக்கு நிச்சயம் இந்த தளம் உற்சாகத்தை தரும்.

இணையதள முகவரி;https://www.grubwithus.com

புதுமையான இணையதளம் மன்ச்மீல்ஸ்

உணவு சார்ந்த சமூக வலைப்பின்னல் தளங்கள் வரிசையில் மேலும் ஒன்றாக மன்ச் மீல்ஸ் சேர்ந்திருக்கிறது.

உணவு மூலம் நட்பு வளர்ப்பது,நண்பர்களோடு சேர்ந்து உணவு சாப்பிட ஏற்பாடு செய்து கொள்வது ஆகிய இரண்டையும் சாத்தியமாக்கும் இந்த வகை தளங்களில் புதியதாக மேலும் ஒன்று தேவையா என்று தோன்றலாம்.வெட்னஸ்டே,கிரப்வித் அஸ் போன்ற தளங்கள் எல்லாம் மதிய உணவை சேர்ந்டு சாப்பிடுவதற்கான ஏற்பாட்டை இணையம் மூலம் செய்து கொள்வதன் வாயிலாக புதிய தொடர்புகளை ஏற்படுத்திகொள்ள உதவுகின்றன.அப்படியிருக்க இதே போன்ற இன்னொரு இணையதளம் என்ன பெரிதாக செய்துவிடப்போகிறது என்ர அலுப்பு இயல்பானதே என்றாலும் மன்ச் மீல்ஸ் இரண்டும் விஷயங்களில் கவனத்தை ஈர்க்கிறது.

முதலில் இது (சு)தேசி இணையதளம்.அதாவது இந்தியாவையும் இந்தியர்களையும் மையமாக கொண்ட தளம்.எனவே சென்னையிலும் ,பெங்களுரிலும் நண்பர்களோடு விருந்து சாப்பிட இதனை பயன்படுத்தலாம்.

இரண்டாவதாக இந்த தளம் உணவு சார்ந்த வலைப்பின்னலை ஏற்படுத்தி தருவதில் புதுவிதமான வழியை முன் வைக்கிறது.

ஒரு உயர்தரமான ரெஸ்டாரண்ட் அதில் விருந்துக்கான திட்டம் ,குறிப்பிட்ட எண்ணிக்கையிலான விருந்தினர்களுக்கு அழைப்பு என செய்லப்டும் இந்த இணையதளம் அதனை ஏற்போர் சேர்ந்து சாப்பிட வழி செய்வதன் மூலம் உணவு சந்திப்புகளை சமூகமயமாக்குகிறது.

இந்த தளத்தை பயன்படுத்த புதியவர்களோடு சாப்பிட தயராக இருந்தால் போதும்.இணையம் மூலம் ஏற்பாடு செய்வதன் நோக்கமே புதிய தொடர்புகளுக்கு தானே.ஆனால் மற்ற உணவு தளங்கள் சாப்பாடு மூலம் ஒரே துறையில் உள்ளவர்களை சந்திக்க வைத்து தொழில்ரீதியிலான தொடர்புகளை சாத்தியமாக்குவதில் கவனம் செலுத்துகின்றன என்றால் இந்த தளம் நட்பையே பிரதானமாக கொண்டிருக்கிறது.

சுவையான சாப்பாடும் தேவை,அதனை பேசியபடி சுவைத்து சாப்பிட்டு மகிழ புதிய நண்பர்களும் தேவை என நினைத்தால் இதில் பட்டியலிடப்பட்டுள்ள உணவு சந்திப்ப் அழைப்புகளை பார்த்து அதில் எது பிடித்திருக்கிறதோ அதனை தேர்வு செய்து கொள்ளலாம்.

உதாரணத்திற்கு மீன் உணவு பிரியர்களுக்கான விருந்து என்னும் அழைப்போடு பெங்களூர் ஓட்டலில் சாப்பிட அழைப்பு இருக்கிறது.அதற்கான் கட்டணம்,எத்தனை பேர் தேவை என்ற விவரத்தோடு விருந்தின் தன்மை,மற்றும் அதன் பங்கேற்பாளர்களின் தன்மை போன்றவை குறிப்பிடப்பட்டுள்ளன.

இந்த விவரங்களை பார்த்து நமக்கேற்ற நண்பர்கள் கிடைப்பார்களா என்று தீர்மானித்து கொள்ளலாம்.விருந்துக்கு சம்மதித்துள்ளவர்களின் விவரங்களையும் பார்க்கலாம்.

ஓகே என்றால் பதிவு செய்து விட்டு கட்டணம் செலுத்தி விட்டு குறிப்பிட்ட நாளில் சென்று விருந்தையும் சுவைக்கலாம்.புதிய நண்பர்களையும் சந்திக்கலாம்.

அறிமுகம் இல்லாதவர்களோடு சேர்ந்து சாப்பிடுவது தான் இந்த உணவு வலைப்பின்னலின் விஷேசம் என்றாலும் சிலருக்கு இதில் தயக்கம் இருக்கலாம்.அவர்கள் அறிமுகம் இல்லாதவர்களுக்கு பதிலாக தங்களது குடும்பத்தினர் மற்றும் தெரிந்த்வர்களோடு இந்த தளத்தின் வாயிலாக விருந்துக்கு ஏற்பாடு செய்து கொள்ளலாம்.

இதே போல பிரபலங்களோடு நட்சத்திர விருந்து சாப்பிடும் வாய்ப்பும் உள்ளது.நன்கொடை வழங்குவதற்கான சாரிட்டி லஞ்சும் இருக்கிறது.

இந்த தளம் பிரித்திருந்தால் நண்பர்களுக்கு பரிந்துரைக்கலாம்.அப்படி பரிந்துரைத்தால் சலுகையும் தருகின்றனர்.

புதியவர்களை சந்திப்பதை சுவாரஸ்யமாக ஆக்கும் தனமையை இந்த தளம் கோன்டிருப்பதாக அதன் நிறுவனர்கள் கருதுகின்றனர்.சேர்ந்து சாப்பிடும் போது கடைபிடிப்பதற்கான விரிவான நெறிமூறைகளையும் கொடுத்துள்ளனர்.

இணையதள முகவரி;http://www.munchwithus.com

விருப்பங்களுக்காக ஒரு வலைப்பின்னல்

மைலைக்ஸ் தளத்தை பயன்படுத்துவதற்கு முன் ஒரு நிமிடம் நீங்கள் விரும்பும் விஷயங்கள் என்ன என்ன என்று யோசித்து கொள்ளுங்கள்.அப்படியே அவற்றை எதற்காக விரும்புகிறீர்கள்.எந்த அளவுக்கு விரும்புகிறீர்கள் என்றும் யோசித்து கொள்ளுங்கள்.

காரணம்,இந்த தளத்தில் உங்கள் விருப்பங்களை தான் பகிர்ந்து கொள்ள‌ப்போகிறீர்கள்.ஆம் விருப்பு வெறுப்புகளை பகிர்ந்து கொள்வதற்கான தளம் தான் இந்த மைலைக்ஸ்.விருப்பங்களை பகிர்வது மட்டும் அல்ல ,அதன் மூலமாகவே நண்பர்களை தேடிக்கொள்ளலாம்;நண்பர்களை இன்னும் நன்றாக புரிந்து கொள்ளலாம்.

பொதுவாகவே பேஸ்புக் போன்ற தளங்களில் கூட நீங்கள் விரும்பும் விஷயங்களை தான் பகிர்ந்து கொள்கிறீர்கள் என்றாலும் கூட இந்த தளத்தை பொருத்தவரை விருப்பங்கள் தான் எல்லாமும்.விருப்பங்கள் மூலம் உங்களை வெளிப்படுத்திக்கொள்ளலாம்.விருப்பங்கள் வாயிலாகவே உங்களை இன்னும் தெளிவாக அடையாளப்படுத்தி கொள்ளலாம்.

பிடித்த புத்த்கம்,விருப்பமான பாடல்,பார்த்து ரசித்த இடங்கள் என்று விருப்பம் எதுவாக இருந்தாலும் அதனை இங்கே பகிர்ந்து கொள்ளலாம்.

இப்படி விருப்பங்கள் வெளிப்படுத்தி கொள்ள முதலில் உறுப்பினராக வேண்டும்.ஏற்கனவே பேஸ்புக் அல்லது டிவிட்டரில் உறுப்பினராக இருப்பவர்கள் அதை சொல்லியே உறுப்பினராகவிடலாம்.

உறுப்பினரான உடன் விருப்பங்களை பகிர்ந்து கொள்ளத்துவங்கிவிடலாம்.உங்களுக்கான பக்கத்தில் விருப்புங்களை சேர்க்கவும் என்னும் இடத்தில் கிளிக் செய்தால் விருப்பங்களை பகிர்வதற்கான பகுதி வந்து நிற்கிற‌து.

எதை பிடிக்கும் என்பதை முதலில் உள்ள கட்டத்தில் குறிப்பிட்டு விட்டு அடுத்த கட்டத்தில் ஏன் பிடிக்கும் என்று விளக்கம் அளிக்கலாம்.அதற்கும் கீழே எந்த அளவுக்கு பிடிக்கும் என்ப‌தையும் குறிப்பிடலாம்.இதற்காக என்று உள்ள சித்திர குறியீடுகளை பயன்படுத்தி கொள்ளலாம்.

எப்போதெல்லாம் தோன்றுகிறதோ அப்போதெல்லாம் பிடித்தமானவற்றை சேர்த்து கொண்டே இருக்கலாம்.தேவையான போது நாமே இவற்றை திரும்பி பார்க்கலாம்.விருப்பங்களை புதிதாக சேர்க்கலாம்,சேர்த்தவற்றை திருத்தலாம் நீக்கவும் செய்ய‌லாம்.

இப்படி நமது விருப்பங்களை பட்டியலிட்டு கொள்வதோடு அவற்றை மற்றவர்க‌ளோடும் பகிர்ந்து கொள்ளலாம்.இந்த பகிர்வதில் தான் சுவாரஸ்யமே உள்ள‌து.

நண்பர்களுடன் பேசும் போது இலையராஜாவின் ரசிகர் என தெரிந்தால் எனக்கும் ராஜா தான் பிடிக்கும் என்று சொல்லி மேலும் நெருக்கமாகிவிடுவது உண்டல்லவா?அதே போல தான் இந்த தளத்தின் மூலம் விருப்பங்கள் வாயிலாகவே நண்பர்களோடு தொடர்பு கொள்ளலாம்.

உங்களுக்கான பக்கத்தில் விருப்பங்களை பதிவு செய்ததுமே அதனை பேஸ்புக் அல்லது டிவிட்டர் நண்பர்களோடு பகிர்ந்து கொள்ளலாம்.நண்பர்களுக்கும் அதே விருப்பம் இருந்தால் உங்களோடு தொடர்பு கொண்டு தங்கள் கருத்தை பகிர்ந்து கொள்வார்கள்.விருப்பம் சார்ந்த உரையாடலாக அது வளரலாம்.

அதே போல தளத்தில் உள்ள சக உறுப்பினர்களிலும் உங்களைப்போலவே விருப்பம் கொண்டவர்களை தொடர்பு கொள்ளலாம்.அவர்கள் ரசனை ப‌டித்து போனால் அவர்களை பின்தொடரலாம்.அதன் பிறகு அவர்களின் விருப்பங்களை உடனுக்குடன் அறிந்து கொள்ள முடியும்.இதே போலவே உங்களையும் கூட பலரும் விருப்பம் சார்ந்து பின்தொடரலாம்.

இணைய குழுக்களில் ஒரு குறிப்பிட்ட தலைப்பில் நாட்டம் கொன்டவர்கள் கருத்துக்களை பரிமாறிக்கொள்வது போல இதில் விருப்பத்தின் அடிப்படையில் பேசிக்கொள்ளாலாம்.

விருப்பங்களை தெரிவிக்கும் போது பலவிதமான குறிச்சொற்களோடு அடையாள‌ப்படுத்தலாம்.உதாரணத்திற்கு இசை என்றோ இலக்கியம் என்றோ உணவு என்றோ குறிச்சொல்லை இணைக்கலாம்.அனைவரது விருப்பங்களும் இப்படி குறிச்சொற்களாக தொகுத்தளிக்கப்படுவதால் புதிய நண்பர்கள் தேவைப்பட்டால் விருப்பமான குறிச்சொல்லை கிளிக் செய்து அதில் இணைந்துள்ள‌வர்களில் யாரையேனும் பின்தொடர‌லாம்.

எல்லாமே விருப்பம் சார்ந்தது என்பதால் உங்களை தொடர்பு கொள்பவர்களும் உங்களுக்கு பிடித்த விஷயம் பற்றியே பேசக்கூடியவர்களாக இருப்பர்கள்.

அது தான் இந்த தளத்தின் சிற‌ப்பமசம்.

இணையதள முகவரி;https://www.mylykes.com/home