Tag Archives: server

hidden-social-media-features-header

சமூக வலைப்பின்னல் தள ரகசியங்கள்

நீங்கள் பேஸ்புக் அபிமானியா? டிவிட்டர் விரும்பியா? இல்லை நீங்கள் லிங்க்டுஇன் அல்லது ஜி-பிளஸ் சேவையை அதிகம் பயன்படுத்துபவரா? உங்கள் அபிமான வலைப்பின்னல் சேவை எதுவாக வேண்டுமானாலும் இருக்கட்டும், கேள்வி என்ன என்றால் அந்த சேவையில் உள்ள எல்லா அம்சங்களும் உங்களுக்குத்தெரியுமா? என்பது தான். ஏனெனில் பரவலாக பயன்படுத்தப்படும் சமூக வலைப்பின்னல் தளங்களில் பலரும் அறிந்திராத சின்ன சின்ன அம்சங்கள் இருக்கின்றன என்கின்றனர்.
உதாரணத்திற்கு குறும்பதிவு சேவையான டிவிட்டரில் பயனாளிகள் தாங்கள் டிவிட்டர் நண்பர்களை அன்பாலோ செய்யாமல், அவர்கள் குறும்பதிவுகள் தங்கள் டைம்லைனில் தோன்றாத வகையில் மியூட் மட்டும் செய்யலாம். அதே போல டிவிட்டரில் புகைப்படத்தை பகிர்ந்து கொள்ளும் போது அதில் உள்ளவர்களை டேக் செய்யும் வசதியும் இருக்கிறது.
இப்படி ஒவ்வொரு சமூக வலைப்பின்னல் சேவையிலும் பரவலாக அறியப்படாத வசதிகளும் அம்சங்களும் இருக்கவே செய்கின்றன. இவற்றை எல்லாம் அழகாக தொகுத்து இன்போகிராபிக் வடியில் சேல்ஸ்போர்ஸ்.காம் நிறுவனம் வெளியிட்டுள்ளது.
இந்த இன்போகிராபிக்கில் பேஸ்புக்,டிவிட்டர் ,ஜி-பிளஸ் மற்றும் லிங்க்டுஇன் ஆகிய முன்னணி சமூக வலைப்பின்னல் சேவைகளில் மறைந்திருக்கும் அம்சங்கள் வரிசையாக புகைப்பட குறிப்புகளுடன் விளக்கப்பட்டுள்ளது.
பேஸ்புக்கும் , டிவிட்டரும் எனக்கு அத்துபடி என நினைப்பவர்களுக்கே கூட இந்த அம்சங்கள் வியப்பை அளிக்கலாம். தொழில்முறை நோக்கில் மட்டுமே பயன்படுத்தப்படும் லிங்க்டுஇன் சேவை பற்றி சொல்லவே வேண்டாம். சமூக வலைப்பின்னல் தளங்களில் ஏற்கனவே பயன்படுத்திவரும் அம்சங்களோடு இந்த ரகசிய அம்சங்களையும் தெரிந்து கொண்டால் பயனுள்ளதாக இருக்கும்.
அவற்றில் சிலவற்றை பார்க்கலாம்;
பேஸ்புக்; பேஸ்புக்கில் மெசேஜ் பகுதியில் செய்திகளை பார்க்கும் போது அருகே உள்ள அதர்( பிற) பகுதியை கிளிக் செய்தால் ,பேஸ்புக்கில் உங்களுக்கு தொடர்பு இல்லாதவர்களிடம் இருந்து பேஸ்புக்கால் அனுப்பி வைக்கப்படும் செய்திகளை பார்க்கலாம்.
பேஸ்புக் பதிவுகளின் கீழ் உள்ள பகுதியில் கிளிக் செய்தால் அந்த பதிவுக்கான லைக்குகள் மற்றும் பகிர்வுகளை தெரிந்து கொள்ளலாம்.
அதே போல மேனேஜ் பகுதிக்கு சென்று பக்கவாட்டில் தோன்றும் அம்சங்களின் வரிசையை மாற்றி அமைத்துக்கொள்ளலாம்.
ஜி-பிளஸ்; ஜி-பிளசில் பியூபிள் பகுதிக்கு சென்று அங்கிருந்து உங்கள் நட்பு வட்டத்தை மற்றவர்களுடன் பகிர்ந்து கொள்ளலாம்.
லிங்க்டுஇன்; தொழில் சார்ந்த நட்புகளை உருவாக்கித்தரும் லிங்க்டுஇன் சேவையில் குறிப்பிட்ட ஒரு குழுவில் இணைவதன் மூலம் உங்களுடன் தொடர்பில் இல்லாத ஒரு உறுப்பினருக்கு அந்த குழுவில் இருந்து செய்தி அனுப்பலாம்.
அதே போல பயனாளிகள் தங்கள் தொடர்புகளின் பட்டியலையும் செட்டிங்சிற்கு சென்று தரவிறக்கம் செய்து கொள்ளலாம்.

மேலும் விவரங்களுக்கு சமூக வலைப்பின்னல் இன்போகிராபிக்: https://www.salesforce.com/ca/blog/2015/07/hidden-social-media-features.html

——

தளம் புதிது; தொழில்நுட்ப தோழன்

இணையத்தில் செய்திகளை தெரிந்து கொள்ள வேண்டும் என்றால் கூகுள் நியூஸ் அல்லது பிங் நியூஸ் தளம் ஏற்றது.யாஹூ நியூசையும் மறந்துவிடுவதற்கில்லை. அதே நேரத்தில் இணையம் மற்றும் தொழில்நுட்பம் சார்ந்த செய்திகளை மட்டும் தெரிந்து கொள்ள விரும்பினால் டெக்மெமீ இணையதளம் அதற்கு ஏற்றதாக இருக்கும். திரட்டி வகையை சேர்ந்த இந்த தளத்தை தொழில்நுடப் செய்திகளின் சங்கமம் என்று சொல்லலாம். அந்த அளவுக்கு முக்கிய தளங்களில் இருந்து தொழில்நுட்ப செய்திகள் இதில் இடம்பெறுகின்றன. செய்திகளை தேடும் வசதியும் இருக்கிறது.
தொழில்நுட்ப உலகில் அப்டேட்டாக இருக்க விரும்பினால் இந்த தளத்தை புக்மார்க் செய்து கொள்ளலாம்.

இணையதள முகவரி: http://techmeme.com/

———–

செயலி புதிது; இ-மெயில் எளிது

மைக்ரோசாப்ட் நிறுவனம் இ-மெயில் பயன்பாட்டை மேலும் எளிதாக்கும் வகையில் ஐபோனில் செயல்படக்கூடிய செண்ட் எனும் புதிய செயலியை அறிமுகம் செய்துள்ளது. இந்த செயலி இ-மெயில் அனுப்புவதை குறுஞ்செய்தி போல் கொண்டு வந்திருக்கிறது. மெயில் வடிவமைப்பில் அதன் உள்ளடக்கத்தை குறிக்கும் சப்ஜெக்ட் அம்சத்தை நீக்கி இதை சாத்தியமாக்கியுள்ளது. இந்த செயலி மூலம் பயனாளிகள் தங்களுடன் மெயில் தொடர்பில் உள்ளவர்களுக்கு குறுஞ்செய்தி போல எளிதாக மெயில் அனுப்பலாம். முதல் கட்டமாக அமெரிக்காவில் அறிமுகமாகி உள்ளது,.விரைவில் மற்ற நாடுகளிலும் எதிர்பார்க்கலாம். ஆண்ட்ராய்டுக்கும் வரும் என நம்பலாம்.

செயலி இணைப்பு: https://blogs.office.com/2015/07/22/introducing-send-designed-for-in-and-out-email/

——

பயர்பாக்சில் ஹைலைட் வசதி

டெக்ஸ்ட்மார்க்கர் பயர்பாக்ஸ் பிரவுசருக்கான நீட்டிப்பு சேவையாக அறிமுகமாகி உள்ளது. இதன் மூலம் இணையத்தில் உலாவும் போது பயன்படுத்தும் இணையதளங்களில் குறிபிட்ட வாசகங்களை ஹைலைட் செய்து கொள்ளலாம். ஹைலைட் செய்ய வேண்டிய வாசகங்களை மவுஸ் மூலம் செலெக்ட் செய்து விட்டு, டெக்ஸ்ட்மார்க்கர் டூல் பாரை கிளிக் செய்தால் போதும். ஹைலைட் வசதிக்கான வண்ணத்தையும் முதலிலேயே தேர்வு செய்து கொள்ளலாம். ஒன்றுக்கும் மேற்பட்ட வண்ணங்களையும் பயன்படுத்தலாம். பின்னணி நிறத்தையும் மாற்றிக்கொள்ளும் வசதி இருக்கிறது. இந்த வசதி தற்காலிகமானது தான் என்றாலும் இதை நிரந்தமாகவும் மாற்றிக்கொள்ளலாம். இவற்றை புக்மார்க்காக கூட மாற்றிக்கொள்ளலாம்.

விவரங்களுக்கு: https://addons.mozilla.org/en-US/firefox/addon/textmarkerpro/?src=cb-dl-updated

———
இணையத்தின் முதல் பரிமாற்றம்

இணையத்தில் ஒவ்வொரு நொடியும் கோடிக்கணக்கான பைட்களில் தகவல்கள் பரிமாறிக்கொள்ளப்படுகின்றன. ஆனால் இணையத்தில் முதன் முதலில் பரிமாறிக்கொள்ளப்பட்ட வார்த்தை என்ன தெரியுமா? இது பற்றிய ஆச்சர்ய தகவலை பிஸ்னஸ் இன்சைடர் இணையதளம் சமீபத்தில் வெளியிட்டது.
இன்றைய இணையத்தின் மூல வடிவமான அர்பாநெட் வலைப்பின்னலில் இந்த தகவல் பரிமாற்றம் 1969 ல் நிகழந்துள்ளது. இணையத்திற்கான ஆய்வு நடைபெற்று வந்த யூ.சி.எல்.ஏ மையத்தில் இருந்து ஆய்வாளர்கள் சில நூறு மைல்கள் தொலைவில் இருந்த ஸ்டான்போர்ட் பல்கலைக்கழ ஆய்வாளர்களுடன் தொடர்பு கொள்ள முயற்சி செய்து கொண்டிருந்தனர். இதற்காக அவர்கள் லாக் இன் எனும் வார்த்தையை மட்டும் அனுப்பி வைக்க முயன்றனர். அப்போது முதல் இரண்டு எழுத்துக்களை டைப் செய்ததுமே கம்ப்யூட்டர் கிராஷாகி விடவே அந்த இரண்டு எழுத்துக்கள் மட்டும் போய் சேர்ந்தன. ஆக, ’லோ’ தான் இணையத்தில் பரிமாறிக்கொள்ளப்பட்ட முதல் வார்த்தையாக ஆனது.

இணைப்பு; http://www.lk.cs.ucla.edu/internet_first_words.html

———

martin_cooper-01

எதிர்கால செயலிகள் நம்மைத்தேடி வரும்; செல்போன் பிதாமகரின் பேட்டி

ஸ்மார்ட்போன்கள் என்ன எல்லாம் செய்கின்றன என்று வியப்பாக இருக்கிறதா? விரல் நுனியில் இணையம், ஒவ்வொரு தேவைக்கும் நூற்றுக்கணக்கில் செயலிகள் என அவர் உள்ளங்களையில் உலகை கொண்டு வந்திருக்கின்றன தான். ஆனால் இவை எல்லாம் ஒன்றுமே இல்லை, ஸ்மார்ட்போன்கள் விஸ்வரூபம் இனி மேல் தான் விஸ்வரூபம் எடுக்க இருக்கின்றன என்று சொன்னால் எப்படி இருக்கும்?

மார்டின் கூப்பர் அப்படி தான் நினைக்கிறார். ஸ்மார்ட்போன்களின் முழுமையான ஆற்றலை நாம் உணர இன்னும் இரண்டு தலைமுறை ஆகும் என்றும் சொல்லி அசர வைக்கிறார் கூப்பர்.

என்ன நம்ப முடியாமல் இருக்கிறதா? கூப்பர் சொல்வதை பார்ப்பதற்கு முன்னர் அவர் யார் என்று தெரிந்து கொண்டு விடலாம். கூப்பர் வேறு யாருமில்லை,முதல் செல்போனை கண்டுபிடித்த செல்போன் பிதாமகர் தான் அவர்.

1973 ம் ஆண்டில் மோட்டோரோலா நிறுவனத்தில் இருந்த போது கூப்பர் தான் முதன் முதலில் செல்போன் மூலம் பேசி நவீன தகவல் தொடர்பை துவக்கி வைத்தார். அதன் பிறகு செல்போன்கள் எங்கோ வந்துவிட்டன.
மார்டின் கூப்பருக்கு தற்போது 86 வயதாகிறது. தான் துவங்கி வைத்த செல்போன் புரட்சி ஸ்மார்ட்போன் வடிவில் எண்ணற்ற மாயங்களை ஏற்படுத்தி வரும் நிலையில் கூப்பர் தொழில்நுட்ப இணையதளமான மதர்போர்டிற்கு பேட்டி அளித்துள்ளார். வீடியோ மூலமான அந்த பேட்டியில் அவர் செல்போன்கள் கண்டுபிடிக்கப்பட்டது பற்றி சுவாரஸ்யமான தகவல்களை பகிர்ந்து கொண்டுள்ளதுடன் இவற்றின் எதிர்காலம் பற்றிய கணிப்புகளையும் வெளியிட்டுள்ளார்.

இந்த பேட்டியில் செல்போன்களின் ஆதார அம்சம் பற்றி கூப்பர் சொல்லும் விஷயம் கவனிக்கத்தக்கது.எங்கிருந்தும் பேசக்கூடிய ஆற்றல் தான் உண்மையான சுதந்திரம் என்கிறார் அவர். இதை புரிந்து கொள்ள கொஞ்சம் பின்னோக்கி போக வேண்டும்.

செல்போன்களுக்கு முன் டெலிபோன் இருந்தது நமக்குத்தெரியும்.ஆனால் இடையே கார்போன் இருந்ததை நம்மில் பலர் அறிந்திருக்க வாய்ப்பில்லை. இந்த கார்போன்கள் தான் செல்போன்களின் முன்னோடி.

தொலைதூர தகவல் தொர்பை டெலிபோன் சாத்தியமாக்கினாலும் அவை வீட்டுக்குள்ளே ஒரே இடத்தில் நிலையாக இருந்தன. ஆனால் எங்கிருந்தாலும் பேசக்கூடிய ஆற்றலுக்கான தேவை உணரப்பட்ட போது ,கார்களில் போனை பொருத்தி பேசும் வசதி அறிமுகமானது. கார் போன்களை மோட்டரோலா தான் முதலில் அறிமுகம் செய்தது என்றாலும் இந்த பிரிவில் அடுத்த கட்ட வளர்சிக்கான கடும் போட்டி தொலைபேசி சந்தையில் நிலவியது. இந்த போட்டி தான் செல்போனுக்கு வித்திட்டது.
30bits-cooper-tmagArticle-695x336
ஏடி&டி நிறுவனம் செல்போன் சேவையை உருவாக்க தயாராகி கொண்டிருந்த நிலையில் மோட்டரோலா முந்திக்கொண்டு செல்போன் சேவையை அறிமுகம் செய்து அசர வைத்தது. 1973 ல் ஏப்ரலில் செல்போன் சேவையை அறிமுகம் செய்த போது மார்ட்ன் கூப்பர் தான் அந்த செங்கல் சைஸ் போனை கையில் வைத்துக்கொண்டு முதலில் பேசினார். அமெரிக்காவின் நியூயார்க் நகரில் பத்திரிகையாளர்கள் மத்தியில் கூப்பர் கொஞ்சம் குசும்புடன் தனது போட்டியாளரான ஏடி&டி நிறுவன அதிகாரியை அழித்து, செல்போனில் இருந்து பேசுகிறேன் என சொல்லி அவரை வாயடைத்துப்போக வைத்திருக்கிறார்.

மறு முனையில் பேச்சே இல்லை என இந்த அனுபவத்தை அவர் சிரித்த படி பேட்டியில் நினைவு கூர்ந்துள்ளார்.
இது வரலாறு; இதில் முக்கிய விஷயம் என்ன என்றால், செல்போன்களை உருவாக்க முயன்றதற்காக கூப்பர் சொல்லும் காரணம் தான். காரில் போனை கொண்டு வந்தது என்பது வீட்டுக்குள் போனை வைத்து மக்களை அங்கேயே பயன்படுத்த கட்டுப்படுத்தியதில் இருந்து எந்தவிதத்திலும் மாறுபட்டுவிடவில்லை, எங்கிருந்தும் பேசக்கூடிய ஆற்றலே உண்மையான சுதந்திரமாகும் என்று அவர் சொல்கிறார்.

இந்த தகவல் தொடர்பு சுதந்திரத்தில் இன்னமும் முழு நம்பிக்கை இருப்பதாக கூப்பர் சொல்கிறார். அதனால் தான் செல்போன்களின் முழு ஆற்றலை இன்னமும் நாம் உணரத்துவங்கவில்லை என்கிறார் அவர். போன் பேச கையில் போன் எதற்கு, உடலில் பர்சனல் சர்வரை மாட்டிக்கொண்டு பேசும் காலம் வரப்போகிறது என்கிறார் அவர்.அதாவது உடலோடு போன்கள் ஒட்டிக்கொண்டிருக்கும் என்கிறார்.

இந்த வகை வளர்ச்சி இன்னும் இரு தலைமுறைகளில் சாத்தியமாகும் என்பவர், ஸ்மார்ட்போன்களின் முக்கிய அம்சமான செயலிகள் குறித்தும் அதிருப்தி தெரிவிக்கிறார். ஆயிரக்கணக்கில், லட்சக்கணக்கில் செயலிகள் எதற்காக என்று கேட்பவர், செயலிகள் நமது தேவையை புரிந்து கொண்டு நம்மை தேடி வரும் நிலை உருவாகும் என்கிறார். இதை செயற்கை அறிவு சாத்தியமாக்கும் என்றும் தெம்பாக சொல்கிறார்.
இந்த வகை செயலி தற்போதைய செயலிகளை தேவையில்லாமல் ஆக்கும் என்றும் அடித்துச்சொல்கிறார்.

மார்டின் கூப்பர் பேட்டிக்கு: http://motherboard.vice.com/read/meet-marty-cooper-the-forefather-of-your-cell-phone

——-
விகட.காமில் எழுதியது

இமெயில் தாமதமாவ‌து ஏன்? ஒரு விளக்கம்.

message-headersஇமெயில் பயன்படுத்தும் எல்லோருக்கும் எழக்கூடிய கேள்வி தான் இது.ஏன் இந்த தாமதம்? அதாவது, எப்போதோ அனுப்பி வைக்கப்பட்ட இமெயில் இன்னும் ஏன் இன்பாக்சில் வரவில்லை?

இந்த இமெயில் குழப்பத்தை நீங்களும் அனுபவித்திருக்கலாம்.நண்பரிடம் இருந்தோ,அலுவலக அதிகாரியிடம் இருந்தோ முக்கியம் மெயிலை எதிர்பார்த்திருப்பீர்கள்.அதை அனுப்பியவரும்,போனில் தகவல் சொல்லிவிட்டு மெயில் வந்திருக்கிறதா? பார்த்து சொல்லுங்கள் என கேட்டிருப்பார். நீங்களும் இன்பாக்சில் கிளிக் செய்து கொண்டே இருப்பீர்கள் ஆனால் அந்த மெயில் மட்டும் எட்டிப்பார்க்காது.

பொதுவாக,இமெயில்கள் அனுப்பிய சில நொடிகளில் எல்லாம் வந்து சேர்ந்து விடும் போது சில மெயில்கள் மட்டும் தாமதமாவது ஏன்?என்ற கேள்வி குழம்ப வைக்கும்.

அனுப்பிய‌ இமெயில் முகவரி சரி தானா என்று பார்ப்பீர்கள். இன்டெர்நெட் இணைப்பு ஒழுங்காக இருக்கிறதா என சோதிப்பீர்கள்.சர்வர கோளாறா,இல்லை இணைத்து அனுப்பட்ட கோட்டுகளால் சிக்கலா என்றெல்லாம் யோசிக்க வேண்டியிருக்கும். அப்படியும் மெயில் வந்திருக்காது.பின்னர் ஒரு மணி நேரம் கழித்து அந்த மெயில் வந்து நிற்கும். அதற்குள் கிளிக் செய்து செய்து வெறுத்து போயிருப்பீர்கள்.

ஏன் இந்த தாமதம்?

இந்த கேள்விக்கு விடை அறிய விரும்பினால் அதற்கான வழி இருக்கிறது. அதாவது குறிப்பிட்ட இமெயில் ஏன் தாமதமாக வந்த்து என தெரிந்து கொள்ளலாம்.இந்த பதில் உங்களுக்கு வந்த மெயில்லேயே இருக்கிறது என்கிறார் அமீத் அகர்வால்.

ஜிமெயிலில் அந்த மெயிலை ஓபன் செய்து அதில் மூலத்தை பார்ப்பதற்கான ஷோ ஒரீஜினல் என்னும் கட்டளையை கிளிக் செய்ய வேண்டும்.அதன் பிறகு அந்த மெயில் பயணம் செய்த இணைய பாதையும் அதில் சந்தித்த சர்வர்களும் வந்து நிற்கும்.அந்த மெயில் எந்த ஐ.பி முகவரிகளை எல்லாம் கடந்து வந்திருக்கிறது என இதன் மூலம் தெரிந்து கொள்ளலாம்

இப்படி இணையத்தில் எங்கெங்கோ சுற்றி மூச்சிறைக்க வந்ததால் தான் இன்பாக்சிற்கு தாமதமாக வந்து சேர்ந்திருக்கிறது என புரிந்து கொள்ளலாம்.

இதனால் என்ன பயன் என்று கேட்கலாம். இமெயில் பயணித்து வரும் முறை பற்றிய அறிதல் இருந்தால் அடுத்த முறை ஏதேனும் மெயில் உடனடியாக வந்து சேராவிட்டால் டென்ஷ்னாகமல் இணைய எதார்தத்தை புரிந்து கொண்டு கூலாக இருக்கலாம் அல்லவா?

அதோடு நீங்கள் ஒரு மெயில் அனுப்பி அது இன்னும் வரவில்லையே என யாரேனும் உங்களை தொல்லை செய்தால் இந்த விளக்கத்தை சொல்லி பார்க்கலாம்.

bu

ரகசியமான செய்திகளை அனுப்ப ஒரு இணையதளம்.

ரகசியமாக இமெயில் அனுப்பி வைக்க உதவும் பிரைவ் நோட் இணையதளம் பற்றி ஏற்கனவே எழுதியுள்ளேன்,அதே போலவே இன்னொரு இணையதளமும் இருக்கிறது.பர்ன் நோட் என்னும் அந்த தளமும் படித்தவுடன் செய்திகள் அழிக்கப்படுவதாக தெரிவிக்கிறது.

நீங்கள் யாருக்கு செய்தி அனுப்பி வைக்கிறீர்களோ அவர் மட்டுமே அந்த செய்தியை படிக்க கூடிய அளவுக்கு பாதுகாப்பாக செய்திகளை அனுப்புவதாக கூறும் இந்த தளம் தான் சாத்தியமாக்கும் ரகசியம் மற்றும் நம்பகத்தன்மையை மிக மிக விரிவாகவே உறுதி செய்கிறது.

முகப்பு பக்கத்தில் உள்ள பகுதியில் செய்தியை டைப் செய்தவுடன் அதற்குறிய இணைப்பு முகவரி ஒன்றை தருகிறது.இந்த முகவரியை யாருக்கு அனுப்பி வைக்கிறோமோ அவர்கள் மட்டும் தான் அதனை படிக்க முடியும்.அவர்களும் கூட குறிப்பிட்ட நேரம் வரை தான் படிக்க முடியும்.அதன் பிறகு அந்த செய்தி இணைய வெளியில் மறைந்து விடும்.

செய்தியை எத்தனை நொடிகள் பார்க்கலாம் என்ப‌தையும் அதற்கு பாஸ்வேர்டு தேவையா என்பதை கூட அனுப்புகின்றவரோ தேர்வு செய்து கொள்ளலாம்.பாஸ்வேர்டு பாதுகாப்பு உறுப்பினர்களுக்கு மட்டும் தான்.ஆனால் செய்தி அனுப்ப உறுப்பினராக வேண்டும் என்ற நிபந்தனையில்லை.

எந்த செய்தியும் ஒரே ஒரு முறை மட்டுமே படிக்க முடியும்.பர்ன் நோட்டும் தனது சர்வர்களில் எந்த செய்தியையும் சேமித்து வைப்பதில்லை என்று உறுதி அளிப்பதால் அந்த செய்தியின் ஆயுள் அவ்வளவு தான்.அதனை மீண்டும் உயிர்பிக்க செய்வது எந்த வகையிலும் எவருக்கும் சாத்தியமில்லை என்றும் சொல்லப்படுகிறது.உறுப்பினராக இருந்தால் செய்தி படிக்கப்பட்டு விட்டதா என்னும் பதிலை தெரிந்து கொள்ளும் வசதியும் உண்டு.

படித்தவுடன் கிழித்து எரிந்து விடவும் என்று சில கடித்தங்களில் குறிப்பிடப்பட்டிருக்கும் அல்லவா அந்த வகையான செய்திகளுக்கு இந்த தளம் மிகவும் ஏற்றது.

ரகசிய செய்திகளை யாரும் ந‌கலெடுக்கவோ அல்லது அந்த இணைய பக்கத்தையோ மொத்தமாக ஸ்கிரின்ஷாட் போல சேமிப்பதோ சாத்தியமில்லை என்றும் இந்த தளம் உறுதி அளிக்கிறது.இந்த செய்திக்கான பக்கத்தை பார்த்து கொண்டிருக்கும் போதே வேறு ஒரு தளத்திற்கு சென்று விட்டு திரும்பி வந்தாலும் அந்த பக்கம் காலியாக தான் இருக்குமாம்.

யாருக்கு அனுப்பபட்டதோ அவரால் செய்தி பார்க்கபடவில்லை என்றாலும் 72 மணி நேரத்தில் செய்தி தானாக மறைந்து விடுமாம்.

நம்பகமான முறையில் தகவல்களை அனுப்ப இதனை பயன்படுத்தலாம்.ஆனால் சட்ட ரிதியிலான காரணங்களுக்காக செய்தியின் நகலை பாதுக்காக்க வேண்டிய தேவையிருந்தால் இந்த சேவையை பயன்படுத்துவது ஏற்றதல்ல.இது போன்ற விஷயங்களுக்கு எதற்கும் ஒரு முறை இந்த தளத்தின் பிரைவசி கொள்கையை படித்து விடுவது நல்லது.

இணையதள முகவரி;https://burnnote.com/#/
</a