Tag Archives: syria

ரோபோ புன்னகை என்ன விலை?

DOnf8ENXcAAXL_Zவிருதுகள், தேர்வுகள் என்று வந்தாலே சர்ச்சைகள் எழுவது இயல்பானது தான். ஆனால், சர்வதேச புகைப்பட போட்டி ஒன்றில் எழுந்திருக்கும் சர்ச்சை கொஞ்சம் வித்தியாசமானது. இந்த சர்ச்சை விருதுக்கு தேர்வு செய்யப்பட்ட புகைப்படத்தின் தரம் அல்லது தகுதி குறித்து உண்டாகவில்லை. மாறாக புகைப்படத்தில் இருக்க வேண்டிய உயிர்த்துடிப்பு அல்லது ஆன்மா தொடர்பான கேள்விகளை எழுப்புகிறது. இந்த கேள்விகள் சுவாரஸ்யமாக அமைவதோடு, நம் காலத்து கேள்விகளாகவும் இருப்பது தான் முக்கிய விஷயமாக இருக்கிறது.

சர்ச்சைக்குள்ளாகி இருக்கும் அந்த புகைப்படத்தில் ஒரு நல்ல புகைப்படத்திற்கு தேவையான எல்லா அம்சங்களும் இருக்கவே செய்கின்றன. அந்த படம் அழகாக இருக்கிறது. அதில் ஒரு வசீகரம் இருக்கிறது. அது ஒரு மைய கருத்தை பேசுகிறது. எல்லாம் இருந்தும் அந்த படத்தினுள் உயிரோட்டம் இல்லை எனும் குற்றச்சாட்டு எழுந்துள்ளது. ஏனெனில் அந்த படத்தில் இருப்பது மனித முகம் அல்ல, மனித இயந்திரம் முகம் என்பது தான்!

மனித மாதிரிகளை போஸ் கொடுக்க வைத்து படம் எடுப்பது போல, புகைப்பட கலைஞர் ஒருவர் இயந்திர மனித மாதிரியை போஸ் கொடுக்க வைத்து படம் எடுத்திருக்கிறார். படம் எடுத்தவர் பின்லாந்து நாட்டைச்சேர்ந்தவர். அவர் படம் எடுத்த மாதிரி, ஜப்பானைச்சேர்ந்த எரிகா எனும் எந்திரன். எரிகா ஒரு ரோபோ தான் என்றாலும், சாதாரண ரோபோ அல்ல. அது ஒரு ஆண்ட்ராய்டு. அதாவது மனித முகம் போன்ற தோற்றத்தை கொண்ட ரோபோ.

ரோப்போக்களி;ல் பலவகை உண்டு. தொழிற்சாலைகளில் பார்க்க கூடிய ரோபோக்கள் இயந்திர வகையை சேர்ந்தவை. மனித வடிவிலான ரோபோக்களும் இருக்கின்றன. ஹோண்டோவின் அசிமோ இதற்கு நல்ல உதாரணம். ரோபோ விலங்குகளும் உள்ளன. அண்மையிம் மறுஅறிமுகம் செய்யப்படுவதாக அறிவிக்கப்பட்ட சோனியின் ஐபோ நாய்க்குட்டி இதற்கு அழகான உதாரணம். இன்னும் பல வகை ரோபோக்கள் உள்ளன. இவற்றில் அச்சு அசல் மனித உருவத்தை கொண்டுள்ளவை ஆண்ட்ராய்டு என குறிப்பிடப்படுகின்றன.

ஆண்ட்ராய்டு ரோபோவுக்கு உதாரணம் தேவையில் எனில் நமக்கு பரீட்சயமான எந்திரன் படத்தின் சிட்டி ரோபோவை சொல்லலாம். ரஜினியை போலவே காட்சி அளித்தததால் தான் சிட்டி ஆண்ட்ராய்டு ரகம். இத்தகைய ஆண்ட்ராய்டு ரோபோ உருவாக்கத்திலும், ஆய்விலும் முன்னணியில் இருப்பது ஜப்பானியர்கள் தான். அதிலும் ஹிரோஷி இஷிகுரோ (Hiroshi Ishiguro ) எனும் விஞ்ஞானி தான் படுகில்லாடியாக இருக்கிறார். ரோபோ குரு என்றே வர்ணிக்கப்படும் இஷிகுரோ, மனித வடிவிலான ரோபோக்களை உருவாக்கும் ஆய்வில் தீவிரமாக ஈடுபட்டு வருபவர். சுய தோற்றம் கொண்ட ரோபோ ஒன்றையும் உருவாக்கியுள்ள இஷிகுரோவின் மற்றொரு உருவாக்கம் தான் எரிகா.

23 வயது பெண் தோற்றம் கொண்ட எரிகாவை விஷேசமான ரோபோ என்று தான் சொல்ல வேண்டும். ஏனெனில் இது பேசும் ரோபோ என்பது மட்டும் அல்ல, கிட்டத்தட்ட மனிதர்கள் போலவே பேசும் ஆற்றலும் கொண்டது. குறிப்பிட்ட தலைப்புகளின் கீழ் உரையாடவும் செய்யக்கூடியது. உலகிலேயே மிகவும் அழகான ஆண்ட்ராய்டு என வர்ணிக்கப்படும் எரிகா, மனித தோற்றத்துக்கு மிகவும் நெருக்கமான உருவ அமைப்பையும் கொண்டிருக்கிறது.

இஷிகுரோ உருவாக்கிய ரோபோக்களில் எரிகா மட்டும் தான் சுயம்பு ரகம். அதாவது, மனித மாதிரியை அடிப்படையாக கொள்ளாமல் சுயேட்சையாக உருவாக்கப்பட்டது.

எரிகா ரோபோ பற்றியே நிறைய பேசலாம். ஆனால், இப்போதைக்கு எரிகாவால் உண்டான சர்ச்சை மற்றும் அது தொடர்பான இருத்தலியல் கேள்விகள் பார்க்கலாம்.

எரிகா அச்சு அசல் பெண் போலவே இருப்பதால் பின்லாந்து புகைப்படக்கலைஞரான மைஜா டம்மி என்பவர், எரிகாவை அழகாக படமெடுத்து டெய்லர் வெஸிக் போட்டோகிராபில் போர்ட்ரய்ட் பரிசுக்கு அனுப்பி வைத்தார். அந்த புகைப்படம் இறுதிச்சுற்றுக்கு தேர்வானதோடு, மூன்றாவது பரிசையும் வென்றிருக்கிறது. இந்த தேர்வே சர்ச்சைக்கு காரணமாகியுள்ளது.

போட்டியே போர்ட்ரயட் எனப்படும் உருவப்படம் தொடர்பானது. உருவப்படம் என்றால், மனிதர்களின் ஆளுமை சித்திரங்கள் என புரிந்து கொள்ளலாம். இந்த வகை படங்கள் பல உணர்வுகளை சொல்லாமல் சொல்லக்கூடியவை. இந்த போட்டியிலேயே முதல் பரிசை வென்ற லிபியா கடற்கரை பகுதியில் மீட்கப்பட்ட ஆப்பிரிக்க அகதியின் புகைப்படம் இதற்கான சரியான உதாரணமாக அமைகிறது. காமிராவை அகன்ற கண்களால் வெறித்துப்பார்ப்பது போல அமைந்துள்ள அந்த அகதியின் ஊடுருவும் பார்வை, மீட்கப்பட்ட நம்பிக்கை, சூழலின் மீதான அவநம்பிக்கை, இனம் புரியாத அச்சம் என பலவித உணர்வுகளை பேசுவதாக பாராட்டப்படுகிறது.

இத்தகைய ஆளுமை சித்திரங்கள் நடுவே ஒரு ரோபோ படத்தை தேர்வு செய்வது சரியா? என்பது தான் கேள்வியாக எழுந்துள்ளது. ஆனால், இந்த கேள்விக்கு பதில் தேடும் முன் எரிகாவின் உருவப்படத்தை ஒரு முறை பார்த்துவிட வேண்டும். முதல் பார்வைக்கு ஜப்பானிய பெண் எனும் தோற்றத்தை தரக்கூடிய அந்த புகைப்படத்தில் எரிகா, பக்கவாட்டில் நோக்கியபடி புன்னகைக்க முயல்பவர் போல காட்சி அளிக்கிறார். இந்த படத்தை சட்டென்று பார்க்கும் எவரும் இதில் உள்ளது ரோபோ என உணர மாட்டார்.

எனினும் எரிகா ரோபோ என்று கண்டுபிடிக்க முடியாதது என்பதல்ல விஷயம். எரிகா எனும் ரோபோவை படம் எடுத்து அனுப்பியிருக்கிறேன் என்று குறிப்பிட்டே புகைப்பட கலைஞர் டம்மி போட்டியில் பங்கேற்று இருக்கிறார். இந்த விஷயம் தெரிந்து விவாதிக்கப்பட்டே நடுவர்களும் இந்த படத்தை அனுமதித்து தேர்வும் செய்துள்ளனர்.

_97673208_taylor_wessing_ppp_2017_0155உருவப்படத்திற்கான போட்டி விதிகளின் படி, வாழ்க்கையில் இருந்து தேர்வு செய்யப்பட்டவர் மற்றும் உயிருடன் போஸ் கொடுத்தவரின் படமாக இருக்க வேண்டும் என தெளிவாக குறிப்பிடப்பட்டுள்ளது. அதன் படி பார்த்தால், ரோபோவை படமெடுத்தது உருவப்படம் கீழ் வராது. ஆனால் இந்த காரணத்தினால் படத்தை தகுதி நீக்கம் செய்யாமல், தேர்வு செய்ய நடுவர்கள் தீர்மானித்துள்ளனர். இது தொடர்பாக விதிகளில் மாற்றம் தேவையா என பின்னர் தீர்மானிக்கபடும் என கூறியுள்ள போட்டி நிர்வாகிகள், ஒரு சில தீவிரமான உருவப்பட சித்திரங்கள், அவற்றின் ரகம் தொடர்பாக வலுவான கேள்விகளை எழுப்பக்கூடியவை எனும் அடிப்படையில் எரிகாவின் தேர்வு அனுமதிக்கப்படுவதாக தெரிவித்துள்ளனர்.

ஒரு ரோபோ புகைப்படம் பரிசுக்குறியதாக தேர்வு செய்யப்பட்டது சுவாரஸ்யமாக இருந்தாலும், புகைப்பட வல்லுனர்கள் இதை கேள்விக்குள்ளாக்கி உள்ளனர். உருவப்படம் என்பது ஜீவன் சார்ந்தது, உயிரில்லாத ஒரு படத்தை எப்படி ஏற்க முடியும் என கேள்வி எழுப்பியுள்ளனர். இந்த படம் அழகாக இருக்கலாம் ஆனால், அதில் ஜீவனோ, உயிரோட்டமோ இல்லையே என விமர்சித்துள்ளனர். எரிகா ஒரு பொம்மை போல் அல்லவா இருக்கிறது, அதன் ஆன்மா எங்கே என்றும் சிலர் கேட்டுள்ளனர்.

இந்த கேள்விகளே அழமான விவாதத்திற்கு வழி வகுத்துள்ளன. ரோபோக்கள் சகஜமாக துவங்கும் சாத்தியம் உள்ள சூழலில், ஆன்மா இல்லை என்பதால் அவற்றை நிராகரிக்க முடியுமா என்பது போன்ற கேள்விகள் எழுகின்றன. அதிலும் செயற்கை நுண்ணறிவு சார்ந்த ஆய்வுகள் தீவிரமடைந்துள்ள நிலையில், பேசும் இயந்திரங்களும், இன்னும் பிறவகை புத்திசாலி இயந்திரங்களும் உருவாக்கப்பட்டு வரும் சூழலில் இயந்திரம் தொடர்பான நம்முடைய புரிதல் எவற்றின் அடிப்படையில் அமைய வேண்டும் எனும் கேள்வி எழுகிறது.

ஒரு சில புகைப்பட கலைஞர்கள் எரிகா சர்ச்சை சார்ந்து இருத்தலியல் தொடர்பான கேள்விகளையும் எழுப்பியுள்ளனர். எது ரோபோ தன்மை, எது மனித தன்மை எனும் கேள்விகளும் இது தொடர்பாக எழுகின்றன.

எரிகாவை படமெடுத்த புகைப்படக்கலைஞர் டம்மி எதிர்பார்த்ததும் இத்தகைய விவாதத்தை தான். ’ மனிதர்களாக இருப்பது என்றால் என்ன? உயிருடன் இருப்பது என்றால் என்ன? என்பது போன்ற கேள்விகளை எழுப்ப முயன்றிருக்கிறேன் என அவர் கூறியிருக்கிறார். இதற்காகவே ஜப்பான் சென்று எரிகாவுடன் அரை மணி நேரம் செலவிட்டு இந்த படத்தை எடுத்துள்ளார்.

புகைப்படக்கலையில் டாக்டர் பட்டம் பெற ஆய்வு செய்து வருபவர் ரோபோக்களை நாம் அணுகும் விதத்தையும் கேள்விக்குள்ளாக்குகிறார். அவர் எழுப்பும் கேள்வியில் உங்களுக்கு உடன்பாடு இருக்கிறதா? உங்கள் பதிலை பதிவு செய்யுங்களேன்.

 

எரிகா தேர்வு புகைப்பட போட்டி செய்தி: http://www.bbc.com/news/in-pictures-41161964

புகைப்பட போட்டி அமைப்பின் இணையதளம்: https://www.npg.org.uk/whatson/twppp-2017/exhibition.php

 

நன்றி; யுவர் ஸ்டோரி தமிழ் இணையதளத்தில் எழுதும் பத்தியிர்ல் இருந்து…

 

உலக மோதல்களை அறிய ஒரு இணையதளம்

3FB5A48B00000578-4453666-image-a-9_1493410960407உலகில் ஏதாவது ஒரு பகுதியில் இப்போது உள் நாட்டு போரோ அல்லது ஆயுத மோதலோ நடைபெற்றுக்கொண்டிருப்பதை நீங்கள் அறிந்திருக்கலாம். இத்தகைய ஆயுத மோதல்கள் எந்த அளவுக்கு தீவிரமாக இருக்கின்றன என்பதை புரிந்து கொள்ள விரும்பினால் இரின் (IRIN ) அமைப்பு உருவாக்கியுள்ள இணைய வரைபடம் பேரூதவியாக இருக்கும். உலகின் மூளை முடுக்கிகளில் நடைபெற்று வரும் மோதல்களையும், அவற்றுக்கான காரணங்களையும் இந்த வரைபடம் விளக்குகிறது.

உலகில் நடைபெறும் போர்கள் என்றதும் ஆப்கானிஸ்தானும், சிரியாவும் உடனடியாக நினைவுக்கு வரும். ஊடக செய்திகளால் இந்த போர்கள் தொடர்பான செய்தியும், அவற்றின் பாதிப்புகளும் உலகின் பார்வைக்கு தெரிய வருகிறது.  ஆனால் மீடியாவின் கவனத்தில் இருந்து விலகிய நிலையில் உலகின் பல பகுதிகளில் உள்நாட்டு போர்களும், ஆயுத மோதல்களும் நடைபெற்று கொண்டிருகின்றன என்பது வேதனையான நிஜம்.

இவற்றில் பெரும்பாலான மோதல்கள் பல ஆண்டுகளாக நீடித்து வருகின்றன என்பது இந்த வேதனையை இன்னும் தீவிரமாக்க கூடியது. இப்படி உலகம் மறந்த மோதல்களையும் இந்த வரைபடம் அடையாளம் காட்டுகிறது.

போரால் பாதிக்கப்பட்ட பகுதிகளுக்கான மனிதநேய நோக்கிலான உதவிகளை வழங்கி வரும் சேவை அமைப்பான இரின், உலகம் மறந்து விட்ட மோதல்கள் குறித்து கவனத்தை ஈர்க்கும் வகையில் தொடர் கட்டுரைகளை வெளியிட்டு வருகிறது. ஆழமான தகவல்களை கொண்டுள்ள இந்த கட்டுரை தொடர் வரிசையில் தற்போது உலகை உலுக்கும் மோதல்களை சுட்டிக்காட்டும் இணைய வரைபடத்தை இரின் அமைப்பு உருவாக்கி வெளியிட்டுள்ளது.

இதில் உலக வரைபடத்தில் உள்ள நாடுகளில் மோதல் அல்லது போரால் பாதிக்கப்பட்டுள்ள நாடுகள் சிவப்பு புள்ளியால் கவனத்தை ஈர்க்கின்றனர். மோதல் நடைபெறும் இடத்தை இந்த சிவப்பு புள்ளி குறிக்கிறது. மோதல் எவ்வளவு காலமாக நடைபெற்றுக்கொண்டிருப்பதை புள்ளியின் அளவு குறிக்கிறது. ஒரு சில இடங்களில் சிவப்பு புள்ளி சற்று பெரிதாக இருப்பதை பார்க்கலாம். அந்த இடங்களில் எல்லாம் ஆண்டு கணக்கில் மோதல் நடைபெற்றுக்கொண்டிருக்கின்றன.

ஒவ்வொரு புள்ளியை கிளிக் செய்வதுவுடன் மோதல் தொடர்பான மேலதிக தகவல்களை தெரிந்து கொள்ளலாம். மோதலுக்கான காரணம், எவ்வளவு காலமாக நடைபெறுகிறது மற்றும் மோதலின் தற்போதைய நிலை ஆகியவை தனியே பெட்டிச்செய்தியாக தோன்றுகின்றன.

தெற்கு சுடானின் எல்லைப்பகுதியில் புளு நைல் எனும் மோதல் கடந்த 60 ஆண்டுகளாக தொடர்ந்து நடைபெற்று வருவதாக குறிப்பிடப்பட்டுள்ளது. இந்த போர் மூன்றாவது சூடான் உள்நாட்டுப்போர் என்றும் அழைக்கப்படுகிறது. தெற்கு சூடான் தனி நாடாக உருவாக வழிவகுத்த இந்த போர் முடிவில்லாமல் நீண்டு கொண்டிருக்கிறது. இதுவரை பத்துக்கும் மேற்பட்ட அமைதி பேச்சு வார்த்தை முயற்சிகள் தோல்வியில் முடிந்திருக்கின்றன என்றும் குறிப்பிடப்பட்டுள்ளது.

இந்த மோதலால் மக்கள் கடும் நெருக்கடிக்கு இலக்காகி வருவதாகவும், பசி பட்டிணி என அவதிப்பட்டு வருவதாகவும் தெரிவிக்கப்பட்டுள்ளது.

இந்த வரைபடத்தில் பார்த்தால் ஆப்பிரிக்காவில் மட்டும் ஒரே சிவப்பு வட்டங்களாக காட்சி அளிக்கின்றது. அந்த அளவுக்கு ஆப்பிரிக்க கண்டத்தில் மோதல்கள் நிகழ்கின்றன. மேற்காசியா, ஆசியா மற்றும் பசுபிக் பிராந்திய பகுதிகளிலும் அதிக மோதல்களை காண முடிகிறது.

இந்த வரைபடத்தில் இந்தியாவில் மாவோயிஸ்ட்கள் நடத்தி வரும் மோதலும் இந்த வரைபடத்தில் சுட்டிக்காட்டப்பட்டுள்ளது. காஷ்மீர் பிரச்சனையும் சுட்டிக்காட்டப்பட்டுள்ளது.

வட கொரியா மற்றும் தென் கொரியா இடையிலான மோதல், யுக்ரைன் பிரச்சனை என இந்த மோதல்கள் விரிகின்றன. இந்த வரைபடம் மூலம் உலக மோதல்களை ஒரு பறவை பார்வையாக அறிந்து கொள்ளலாம் என்பதோடு, மேலும் ஆழமான புரிதல் தேவை எனில், மறக்கப்பட்ட மோதல்கள் பிரிவில் உள்ள கட்டுரைகளை படித்துப்பார்க்கலாம். இந்த கட்டுரைகள் உலகம் மறந்த மோதல்கள் தொடர்பான விரிவான தகவல்களை அளிக்கிறது. பல்வேறு சிறப்பு கட்டுரைகளும் இடம்பெற்றுள்ளன. பிலிப்பைன்ஸ், தெற்கு தாய்லாந்து , மியான்மர் உள்ளிட்ட பகுதிகளில் ஏற்பட்டுள்ள பாதிப்புகளையும் தனிக்கட்டுரைகள் விவரிக்கின்றன.

உலக மோதல்கள் பற்றி அறிய:  http://www.irinnews.org/in-depth/forgotten-conflicts

இணைய உலகில் அன்மையில் இன்னொரு வரைபடமும் கவனத்தை ஈர்த்துள்ளது. இந்த வரைபடம் இணையத்திற்காக உருவாக்கப்பட்டது. உலகின் முதல் இணைய அட்லஸ் என இந்த வரைபடம் வர்ணிக்கப்படுகிறது. இணையத்தின் பெளதீக உள்கட்டமைப்பை விவரிக்கும் வகையில் இந்த வரைபடம் அமைந்துள்ளது.

இணையம் என்பது வலைப்பின்னல்களின், வலைப்பின்னல் என்பது நமக்குத்தெரியும். அது உலகம் முழுவதும் கம்ப்யூட்டர்களாகவும், சர்வர்களாகவும் பரவியிருக்கிறது. டேட்டா செண்டர்களால் இணைக்கப்பட்டு, கடலுக்கடியிலான கேபிள்களும் அதன் இணைப்புகளாக அமைந்துள்ளன. ஆனால் இந்த பெளதீக உள்கட்டமைப்பின் விவரம் மிகவும் சிக்கலானது.

இந்த விவரங்களை சித்தரிக்கும் வரைபடத்தை அமெரிக்காவில் விஸ்கான்சின் – மேடிசன் பல்கலையில் உள்ள ஆய்வாளர்கள் அரும்பாடுபட்டு உருவாக்கியுள்ளனர். இந்தியாவை சேர்ந்த ஆயவாளர் ராமகிருஷ்ணன் துரைராஜன் என்பவரும் இந்த வரைபட உருவாக்கத்தில் முக்கிய பங்காற்றியிருக்கிறார்.

இந்த இணைய வரைபடம் இணைய உள்கட்டமைப்பு தொடர்பான புரிதலை அளிப்பதோடு, பருவநிலை பாதிப்பு மற்றும் தீவிரவாத தாக்குதல் போன்றவற்றில் இருந்து இணையத்தை பாதுக்காக்கவும் உதவும் என ஆய்வாளர்கள் கருதுகின்றனர். ஆயிரத்துக்கும் மேற்பட்ட வரைபடங்களை வைத்துக்கொண்டு அவற்றில் உள்ள தகவல்களை இணையம் மூலம் ஒருங்கிணைத்து இந்த இணைய அட்லஸ் உருவாக்கப்பட்டுள்ளது. இணையத்தின் அமைப்பை காட்சிரீதியாக இந்த அடல்ஸ் விளக்குகிறது.

இணைய அடல்ஸ் முகவரி: http://internetatlas.org/

 

அகதிகளுக்கு நேசக்கரம் நீட்டும் தளம்

ewx
ஐரோப்பாவில் தஞ்சம் அடைந்துள்ள சிரியா அகதிகளுக்கு மனிதநேய அடிப்படையில் நேசக்கரம் நீட்டுவதற்காக இணையம் மற்றும் தொழில்நுட்பத்தை பயன்படுத்தி தங்களால் இயன்ற சிறிய உதவிகளை அளிக்க தொழில்நுட்ப ஆர்வலர்கள் முயன்று வருகின்றனர்.இந்த நோக்கத்துடன் உருவாக்கப்பட்டுள்ள எக்ஸ்பாட்.ஆர்க்
(http://expatt.org/en/ )எனும் இணையதளம் அகதிகளுக்கான வேலைவாய்ப்பை பெற்றுத்தர முயல்கிறது.

இந்த தளத்தின் மூலம் அகதிகள் தங்கள் பெயர் உள்ளிட்ட விவரங்கள் மற்றும் திறன்களை பதிவு செய்து கொள்ளலாம். அகதிகளை பணிக்கு அமர்த்திக்கொள்ள விரும்பும் நிறுவனங்கள் இவர்களில் பொருத்தமானவர்களை தேர்வு செய்து வாய்ப்பு அளிக்கலாம். தாய்நாட்டை விட்டு வெளியேறி பிற நாடுகளில் தஞ்சம் அடைபவர்களுக்கு அடைக்கலம் கிடைப்பது முதல் பிரச்சனை என்றால் அதன் பிறகு வாழ்வதாரத்தை தேடிக்கொள்வது பெரும் பிரச்சனையாக அமையலாம். அடைக்கலம் தரும் நாடுகளுக்கும் இது சவால் தான்.
இந்த இரண்டையுமே குறைக்கும் வகையில் கடினமாக உழைக்கத்தயாராக உள்ள அகதிகளையும், நிறுவனங்களையும் இணைத்து வைக்கும் இந்த தளத்தை நல்ல இதயம் கொண்ட ஆர்வலர்கள் உருவாக்கியுள்ளனர்.

அகதிகள் நெருக்கடி பற்றி விழிப்புணர்வை ஏற்படுத்தும் இணையதளம்.

பொய்மையும் சில நேரங்களில் நன்மை பயக்கும் என்பதற்கு ஏற்ப தேடியந்திரமான கூகுள் புதிய சேவையை அறிமுகம் செய்திருப்பது போன்ற தோற்றத்தை தரும் வகையில் அமைக்கப்படுள்ள போலி இணையதளம் ஐரோப்பாவை உலுக்கி கொண்டிருக்கும் அகதிகள் நெருக்கடி பற்றிய விழிப்புணர்வை ஏற்படுத்தும் வகையில் அமைந்துள்ளது.

உங்கள் உங்கள் எதிர்காலத்தை அறிய வேண்டுமா? எனும் கேள்விக்கு பதில் அளிப்பது போன்ற இணையதளம் ஒன்று இணைய உலகில் அறிமுகமாகி கவனத்தை ஈர்த்துள்ளது. புகழ் பெற்ற தேடியந்திரமான கூகுள் போலவே தோற்றத்துடன் கூகுள் ஜோதிடம் எனும் பெயரில் அந்த இணையதளம் அமைந்துள்ளது.
அதில் உள்ள தேடல் கட்டத்தில் எதிர்காலம் பற்றிய கேள்விகளை டைப் செய்யலாம். ஆனால் எதிர்காலம் பற்றிய ஆருடம் வருவதற்கு பதில், நிச்ச்யம் எங்களால் உங்கள் எதிர்காலத்தை கணிக்க முடியாது என குறிப்பிடப்பட்டுள்ளது.

அதற்கு கீழே, 60 மில்லியன் அகதிகள் தங்களுக்கு எதிர்காலம் உண்டா எனும் கேள்வியை தினமும் கேட்டு வருகின்றனர்.எனவே தான் போலி கூகுள் தளத்தை பயன்படுத்தி, உங்கள் கவனத்தை அகதிகள் பிரச்சனை பக்கம் ஈர்க்க முயன்றிருக்கிறோம் என குறிப்பிடப்பட்டு, அகதிகள் எதிர்காலம் குறித்து ஒரு நிமிடமாவது யோசிக்குமாறு வேண்டுகோள் விடுக்கப்பட்டுள்ளது.

அகதிகள் பிரச்சனை குறித்து விழிப்புணர்வை ஏற்படுத்தும் வகையில அமைக்கப்பட்டுள்ள இந்த இணையதளம் அகதிகளுக்கு நிதி உதவி அளிக்கவும் வழி செய்துள்ளது. அதோடு ஒவ்வொரு நிமிடமும் அதிகரித்துக்கொண்டிருக்கும் அகதிகள் எண்ணிக்கையும் குறிப்பிடப்படுகிறது.அகதிகளின் பரிதவிப்பை உணர்த்தும் புகைப்படங்கள் மற்றும் வீடியோ காட்சிகளுக்கான இணைப்பும் கொடுக்கப்பட்டுள்ளன.

கூகுல் போலவே தோற்றம் அளிக்கும் இந்த இணையதளம் முதலில் கவனத்தை ஈர்த்த போது, கூகுள் சார்பாக இந்த இணையதளம் அமைக்கப்பட்டதாக பலரும் கருதினர். ஆனால் இது நெதர்லாந்தை சேர்ந்த பிரைன் மீடியா எனும் விளம்பர நிறுவனம் ஒன்றின் சார்பாக நல்ல நோக்கத்துடன் அமைக்கப்பட்ட போலி இணையதளம் என தெரியவந்துள்ளது.

இரண்டாம் உலகப்போருக்கு பிறகு உலகம் சந்திக்கும் மிகப்பெரிய மனிதநேய நெருக்கடி என குறிப்பிடப்படும் இந்த அகதிகள் நெருக்கடியின் நிலை குறித்து கவனத்தை ஈர்க்கும் வகையில் இந்த புதுமையான முயற்சி அமைந்துள்ளது.

இணையதள முகவரி: http://betagoogle.com/refugees.html