Tag Archives: twitter

இவர் ஸ்னேப்சாட் டாக்டர்!

6jq3pYgaசமூக ஊடக பயன்பாட்டிற்கான உதாரணங்கள் என்று வரும் போது பொதுவாக பிரபலங்களும், நட்சத்திரங்களும் தான் முதலில் நினைவுக்கு வருவார்கள். ஆனால் சமூக ஊடக பயன்பாட்டில் முன்னுதாரணமாக விளங்கும் பேராசிரியர்களும், டாக்டர்களும் கூட இருக்கின்றனர். இந்த பட்டியலில் இப்போது சமீபத்தில் அமெரிக்க டாக்டர் ஒருவரும் இணைந்திருக்கிறார்.

அமெரிக்காவின் நியூயார்க் நகரைச்சேர்ந்த பல் மருத்துவரான டேனியல் ரூபின்ஷ்டியன் (Daniel Rubinshtein) எனும் அந்த டாக்டர் ஸ்னேப்சாட் சேவை மூலம் தனக்கான பாலோயர்களை தேடிக்கொண்டிருக்கிறார். அவர் தனது நோயாளிகளுடன் தொடர்பு கொள்ள ஸ்னேப்சாட் சேவையை பயன்படுத்தும் விதம் குறித்து வியந்து பாராட்டும் கட்டுரை ஒன்றை இணைய இதழான தி வெர்ஜ் வெளியிட்டுள்ளது.

மருத்துவர் ஒருவர் ஸ்னேப்சாட்டை பயன்படுத்துவதே ஆச்சர்யமானது எனும் போது அதை ரூபின்ஷ்டியன் பயன்படுத்தி வரும் விதம் இன்னும் கூட ஆச்சர்யமானது.
ஸ்னேப்சாட் சேவை பற்றி நீங்கள் அறிந்திருக்கலாம். வாட்ஸ் அப், ஹைக் போல இதுவும் ஒரு மெசேஜிங் சேவை தான். ஆனால் அடிப்படையில் மாறுபட்டது.

சுவாரஸ்யமான மெசேஜிங் சேவை என்று வர்ணிக்கப்படும் ஸ்னேப்சாட் சேவையில் தகவல்களை புகைப்படமாகவும், வீடியோவாகவும் பகிர்ந்து கொள்ளலாம். எந்த வகை பகிர்வாக இருந்தாலும் அவை பத்து நொடிகள் மட்டுமே பார்வையில் இருக்கும். அதன் பிறகு தானாக மறைந்துவிடும். இப்படி பார்த்தவுடன் மறைந்துவிடும் தன்மையே ஸ்னேப்சாட்டின் ஆதார பலம். இதன் காரணமாகவே அந்த சேவை பதின் பருவத்தினர் மற்றும் இளம் வயதினர் மத்தியில் மிகவும் பிரபலமாக இருக்கிறது.

இளம் வயதினரை கவரும் சேவையாக இருந்தாலும் ஸ்னேப்சாட் வெறும் சுவார்ஸ்யமான தகவல் பரிமாற்றத்திற்காக மட்டும் அல்லாமல் செய்தி வெளியீடு, கதை சொல்லல், மார்க்கெட்டிங் என பலவிதங்களில் பயன்படுத்தப்படுகிறது. ஸ்னேப்சாட் மூலம் தகவல்களை பகிர்ந்து கொள்ளலாம், பாலோயர்களை தேடிக்கொள்ளலாம் போன்ற அம்சங்களை பலதுறையினரும் தங்களுக்கு ஆதராவாக பயன்படுத்திக்கொண்டு வருகின்றனர். அதிலும் குறிப்பாக அதன் பின்னே இருக்கும் இளைஞர் சமூகத்தை தொடர்பு கொள்ள இது சிறந்த வழியாகவும் கருதப்படுகிறது.

இதை உணர்ந்தவராக டாக்டர். ரூபின்ஷ்டியனும் இருக்கிறார்.

ரூபின்ஷ்டியன் சமூக ஊடகங்களின் ஆற்றம் மற்றும் அருமையை நன்கு உணர்ந்தவராகவே இருக்கிறார். அவருக்கு என சொந்த இணையதளம் இருப்பதுடன் டிவிட்டர், இண்ஸ்டாகிராம் மற்றும் ஸ்னேன்சாட் உள்ளிட்ட சேவைகளில் தனக்கான பக்கங்களையும் துவக்கி வைத்திருக்கிறார்.

இவற்றில் ஸ்னேப்சாட் சேவையை சிறப்பாக பயன்படுத்தி வருகிறார். ஸ்னேப்சாட்டில் தனக்கான பாலோயர்களை பெறுவதற்காக அவர் டிவிட்டர் குறும்பதிவுகள் மூலம் அவ்வப்போது கோரிக்கையும் வைத்து வருகிறார். நீங்கள் என்னை பின் தொடர்ந்தால் நானும் உங்களை பதிலுக்கு பின் தொடர்வேன் என்றும் உறுதி அளிக்கிறார். இதை ஏற்றுக்கொண்டு, வருபவர்களை கவர்வதற்காக என்று ஸ்னேப்சாட்டில் பல்மருத்துவ சிகிச்சை தொடர்பான வீடியோக்களை வெளியிட்டு, அதன் மூலமே நோயாளிகள் கேள்விகளுக்கும் பதில் அளிக்கிறார். இந்த பதிவுகள் மூலம் அவர் தன்னைப்பற்றியும் தனது சிகிச்சை முறைகள் பற்றியும் நோயாளிகளுடன் பகிர்ந்து கொண்டு வருகிறார். அவரை பின் தொடரும் நோயாளிகளுக்கு அவரது மருத்துவ அலுவலக சூழலும், சிகிச்சைகளும் அத்துபடியாகின்றன. இதன் மூலம் அவர் தனது நோயாளிகளுடன் நெருக்கமான தொடர்பை ஏற்படுத்திக்கொள்கிறார்.

ரூபின்ஷ்டியன் வெளியிடும் வீடியோக்கள் வழக்கமான யூடியூப் வீடியோக்கள் அல்ல: ஆறு நொடிகள் மட்டுமே ஓடக்கூடிய புதுமையான் வைன் வீடியோ சேவையை இதற்காக அவர் பயன்படுத்தி வருகிறார். பொதுவாக கேளிக்கை வீடியோக்களை பகிர பயன்படும் இந்த சேவையை அவர் மருத்துவ விளக்கத்திற்காக பயன்படுத்தி வருகிறார்.

இதுவும் ஒரு மார்க்கெட்டிங் முயற்சி தானே என நினைக்கலாம். ரூபின்ஷ்டியன் இத்தகைய சமூக ஊடக வெளிப்பாடு மூலம் தனக்கான நோயாளிகளை தேடிக்கொள்கிறார் என்றாலும் அவரது பிரதான நோக்கம் நோயாளிகளுடன் தொடர்பு கொள்வதாகவே இருக்கிறது. “ நம்பினால் நம்புங்கள், இந்த காலத்திலும் கூட பல் மருத்துவரிடம் வருவதற்கு பயந்து நடுங்குபவர்கள் இருக்கின்றனர்” என்று தி வெர்ஜ் இதழுக்கான பேட்டியில் கூறியிருக்கிறார் டாக்டர்.ரூபின்ஷ்டியன். டாக்டர் கிளினிக்கை கண்டு அஞ்சும் நோயாளிகளிகளை ஸ்னேப்சாட் மூலம் சந்தித்து பேசுவது இந்த பயத்தை போக்க உதவுகிறது என்று தனது சமூக ஊடக பயன்பாடு பற்றியும் அவர் விளக்கம் அளித்திருக்கிறார்.

ஸ்னேப்சாட் போன்ற சேவைகள் மூலம் தொடர்பு கொள்வது மருத்துவ சிகிச்சை தொடர்பாக நோயாளிகள் மனதில் உள்ள தயக்கங்கள் மற்றும் அச்சங்களை போக்க வழி செய்கிறது என்கிறார் அவர். அதனால் தான் நேரில் ஆலோசனை வழங்குவதோடு ஸ்னேப்சாட் உரையாடல் மூலமும் கேள்விகளுக்கு பதில் அளித்து வருகிறார். ஸ்னேப்சாட் வாயிலாக கேட்கப்படும் சந்தேகங்களுக்கு பொறுப்பாக பதில் அளித்து வருகிறார். தனது டிவிட்டர் மற்றும் இன்ஸ்டாகிராம் பக்கங்கள் வாயிலாகவும் இந்த தகவலை பகிர்ந்து கொண்டு பரவலாக மக்களை சென்றடைய முயன்று வரும் புதுயுக டாக்டராக இருக்கிறார்.

மக்கள் தன்னை ஒரு பல் மருத்துவராக மட்டும் அல்லாமல், பல் சிகிச்சை அளிக்க கூடிய சக மனிதராக பார்க்க வேண்டும் என்பதே தமது விருப்பம் என்றும் அவர் கூறியிருக்கிறார். இதற்கு வைன் வீடியோக்களும், ஸ்னேப்சாட் மற்றும் டிவிட்டர் பகிர்வுகள் அவருக்கு கைகொடுத்து வருகின்றன.

ஸ்னேப்சாட் சேவையை திறமையாக பயன்படுத்தும் மருத்துவராக இருப்பது ரூபின்ஷ்டியன் மட்டும் அல்ல; மியாமியை சேர்ந்த பிளாஸ்டிக் சர்ஜரி வல்லுனரான மைக்கேல் சால்ஷியர் எனும் டாக்டரும் இதை செய்து வருகிறார். தான் செய்யும் பிளாஸ்டிக் சர்ஜரி தொடர்பான தகவல்கள் மற்றும் அறுவை சிகிச்சை காட்சிகள் ( நோயாளிகள் அனுமதியுடன் தான்) ஸ்னேப்சாட் மூலம் பகிர்ந்து கொண்டு வரும் டாக்டர் மைக்கேல் சமூக ஊடக உலகில் நட்சத்திர அந்தஸ்து பெற்றவராக இருக்கிறார். டாக்டர்.மியாமி என சமூக ஊடக உலகில் அவர் கொடிகட்டிப்பறக்கிறார்.

சமூக ஊடகங்கள் பெரும்பாலும் கேலி ,கிண்டல், கேளிக்கை உரையாடலுக்கான இடமாக கருதப்படும் நிலையில் அதை மாற்றி அமைக்கும் வகையில் செயல்படுபவர்களில் இந்த இரண்டு டாக்டர்களும் முன்நிற்கின்றனர். மருத்துவமனை சூழலையும், அறுவை சிகிச்சை அறைகளையும் ஸ்மார்ட்போனுக்குள் கொண்டு வருவதன் மூலம் இவர்கள் மக்களுடன் அர்த்தமுள்ள உரையாடலில் ஈடுபட்டு, விழிப்புணர்வை ஏற்படுத்தி வருவதாகவும் கருதப்படுகிறது.

டாக்டர் ரூபின்ஷ்டியனின் டிவிட்டர் பக்கம்: @DRubinshtein

இணையத்தை உருக வைத்தா தாத்தா!

324F545900000578-0-image-a-86_1458568581263சமூக ஊடக செயல்பாடுகள் பற்றி எதுவுமே அறியாத தாத்தா ஒருவர் பேரப்பிள்ளைகளால் இணையம் மூலம் புகழ் பெற்றிருக்கும் கதை இது. நெகிழ வைக்கும் இந்த கதையில் பேரப்பிள்ளைகளுக்கான பாடம் அடங்கியிருப்பதோட்டு, இணைய புகழ் சூறாவளியை எப்படி எதிர்கொள்வது என்பதற்கான வழிகாட்டுதலும் இருக்கிறது.

முதலில் முன் கதை சுருக்கம்! அதற்கு முன்னர் உங்களுக்கு தாத்தவோ,பாட்டியோ இருந்து அவர்களை நீங்கள் அடிக்கடி பார்க்கச்செல்லாமல் இருந்தால், அந்த தவற்றை சரி செய்து கொண்டு பாசக்கார பேரப்பிள்ளைகளாக மாறுங்கள். ஏனெனில் இந்த கதை உணர்த்தும் நீதி அது தான்- தாத்தாக்களும்,பாட்டிகளும் அன்புக்கு ஏங்கி கொண்டிருக்கிறார்கள், அதை ஒரளவுக்காவது தீர்த்து வைப்பது பேரப்பிள்ளைகளின் கடமை!
சாதாரணமாக சொன்னால் போதனையாக மாறி அலுப்பூட்டக்கூடிய இந்த விஷயத்தை நெஞ்சை நெகிழ வைக்கும் வகையில் உணர்த்தியிருப்பது தான் இந்த கதையின் சிறப்பம்சம்.

இணையத்தை மெல்லப்பிடித்து உலுக்கியிருக்கும் இந்த கதை எந்த எதிர்பார்ப்பும் இல்லாமல் டிவிட்டரில் பகிரப்பட்ட ஒரு புகைப்படத்துடன் துவங்குகிறது.

முதியவர் ஒருவர் தனியே சோகமாக அமர்ந்திருக்கும் புகைப்படம் அது. முதியவரின் பேத்தியான கல்லூரி மாணவி கெல்சே ஹார்மன் தான் இதை தனது டிவிட்டர் பக்கத்தில் ( https://twitter.com/kelssseyharmon) பகிர்ந்து கொண்டார். அந்த படத்துடன் அவர் தெரிவித்திருந்த தகவலின் பின்னே வருத்ததின் சாயலும் இருந்தது; ”பாப்பாவுடன் ( தாத்தா) டின்னர் சாப்பிடுகிறேன். அவர் தனது ஆறு பேரப்பிள்ளைகளுக்காக 12 பர்கர்களை தயார் செய்திருந்தார். ஆனால் நான் மட்டும் தான் அதை சாப்பிட வந்திருக்கிறேன். அவரை நான் நேசிக்கிறேன்”.

கையில் பாதி கடித்த படி தாத்தா தனிமையில் சோகத்துடன் காட்சி தரும் புகைப்படத்தை பார்த்து விட்டு இந்த செய்திய படிக்கும் போது, மனதில் தானாக ஒரு மெல்லிய சோகம் உண்டாகும். ஆறு பேரப்பிள்ளைகளுக்காக தாத்தா அன்புடன் பர்கர் செய்து காத்திருந்தால் அவர்களில் ஒருவரைத்தவிவிர மற்றவர்கள் எட்டிப்பார்க்காமல் அவரை ஏமாற்றத்தில் ஆழ்த்தியிருக்கின்றனரே , பாவம் அந்த தாத்தா என்றும் நினைக்கத்தோன்றும்.
அந்த படத்தை டிவிட்டரில் பார்த்தவர்கள் மனதில் எல்லாம் இது போன்ற எண்ணங்கள் அலைமோதின. முதியவரின் சோகமோ அல்லது பேரப்பிள்ளைகளின் பாராமுகமோ ஏதோ ஒன்று பார்த்தவர்கள் நெஞ்சத்தொட்டு இந்த படத்தை ரிடிவீட் மூலம் பகிர்ந்து கொள்ளத்தூண்டியது. அவ்வளவு தான் அடுத்த 24 மணி நேரத்தில் 70,000 முறை இந்த படம் பகிரப்பட்டது. அதைவிட அதிகமான முறை இந்த படம் மீது விருப்பம் தெரிவிக்கப்பட்டது. அதன் பிறகு பார்த்தால் இணையமே இந்த படம் பற்றி தான் பேசிக்கொண்டிருந்தது.

பலரும் தாத்தா மீது பரிவு கொண்டு கருத்து தெரிவித்திருந்தனர். இன்னும் பலர் தாங்களும் கூட தாத்தா பாட்டியை அடிக்கடி பார்க்கச்செல்லாமல் இருப்பதை குற்ற உணர்வுடன் பகிர்ந்து கொண்டிருந்தனர். குடும்ப உணர்வு, வயதானவர்களின் நிலை, பேரப்பிள்ளைகளின் கடமை ஆகிய விஷயங்கள் பற்றிய பாசம் ததும்பும் விவாதமாக இது உருவெடுத்தது. இதனிடயே சிலர் வராமல் போன அந்த பேரப்பிள்ளைகளை வறுத்தெடுக்கவும் தவறவில்லை.

இதன் வைரல் தன்மையும், அதற்கு பின்னே இருந்த பெரியவரின் சோகமும் மீடியாவின் கவனத்தையும் ஈர்த்து இந்த நிகழ்வு பற்றி செய்தி வெளியிட வைத்தது. சோகமான தாத்தா எனும் அடைமொழியுடன் வெளியாகிய செய்திகள் மேலும் பல லட்சக்கணக்கானோரின் கவனத்தை ஈர்த்தது.
இணையம் ஒரு தாத்தாவின் சோகத்திற்கு உருகியதும், பேரப்பிள்ளைகள் தாத்தாக்களை மறக்காமல் இருக்க வேண்டும் எனும் செய்தியை இது உணர்த்துவதாக அமைவதும் வலுயுறுத்தப்பட்டன.

ஆச்சர்யமாக இருக்கிறது அல்லவா.- ஒரு பேத்தி தனது தாத்தாவின் நிலை பற்றி தனிப்பட்ட முறையில் பகிர்ந்து கொண்ட ஒரு புகைப்படம்,இணையம் மூலம் பரவி, நம் காலத்தில் முதியவர்களின் நிலை தொடர்பான விவாதத்தின் மையமாக மாறியிருக்கிறது!

ஆனால் இந்த கதை இத்துடன் முடிந்துவிடவில்லை. இதில் கொஞ்சம் திருப்பங்களும் காத்திருந்தன.
பரவலாக கருதப்பட்டது போல மீது ஐந்து பேரப்பிள்ளைகளும் தாத்தாவை முற்றிலுமாக புறக்கணித்துவிடவில்லை. இணையத்தில் சிலர் கல் நெஞ்சக்காரர்கள் என தூற்றியதை மீறி அவர்கள் பாசக்கார பேரப்பிள்ளைகளாகவே இருக்கின்றனர் என்பது தெரிய வந்தது. விஷயம் என்ன என்றால், பேரப்பிள்ளைகளில் இன்னொருவர் சற்று தாமதமாக வந்து சேர்ந்திருக்கிறார். மற்ற நான்கு பேர் வாரத்தற்கு காரணம் , தாத்தாவின் டின்னர் பற்றி அவர்களுக்கு சரியாக தகவல் தெரிவிக்கப்படாதது தான். தாத்தா தனது மகனிடம் இது பற்றி தெரிவித்த தகவலை அந்த மறத்திக்கார அப்பா தனது மகன்களிடம் தெரிவிக்க மறந்திருக்கிறார். அதனால் தான் அவர்கள் வரவில்லை. புகழ்பெற்ற டெய்லிமெயில் நாளிதழ் இந்த வெளிவராத பின்னணி தகவல்களை தேடிப்பிடித்து செய்தி வெளியிட்டது.

இதனிடையே பேரப்பிள்ளைகள் தரப்பில் தன்னிலை விளக்கம் அளிக்கப்பட்டது. தாங்கள் குடும்பத்தை முக்கியமாக கருதுபவர்கள் என்றும், தாத்தாவை தாங்கள் நிராகரித்ததில்லை என்றும் தெரிவித்திருந்தனர். இணையம் கருதும் அளவுக்கு தாத்தாவை தனிமையில் தவிக்கவிடவில்லை என்றும் தெரிவித்திருந்தனர்.

இதற்குள் இணையம் அவர்களை விசாரணை கூண்டில் நிற்க வைத்து ,இந்தக்கால பிள்ளைகளே இப்படி தான் என விவாதம் நடத்தி, திருந்த வேண்டிய நெஞ்சங்கள் என்று தீர்ப்பும் வழங்கியிருந்தது. இன்னொரு பக்கம், இதெல்லாமே இணைய புகழுக்கான முயற்சி என்றும் சிலர் தூற்றியிருந்தனர்.

நல்லவேளையாக பேத்தி கெல்சே மற்றும் அவரது சகோதரர்கள் இந்த சூறாவளியை பக்குவமாக கையாண்டனர். தாத்தா மீதான பாசத்தை வெளிப்படுத்தவே புகைப்படத்தை பகிர்ந்து கொண்டதாகவும், இதன் மூலம் புகழ் பெறும் எண்ணம் இருக்கவில்லை என்றும் கெல்சே தனது டிவிட்டர் பக்கத்தில் விளக்கம் அளித்திருந்தார். அதோடு தன்னை தொடர்பு கொண்டு கருத்து தெரிவித்தபர்களுக்கு எல்லாம் தனிப்பட்ட முறையில் நன்றி தெரிவிக்க முடியாததால், அனைவருக்கும் பொதுவாக நன்றி தெரிவித்துக்கொள்வதாகவும் தெரிவித்திருந்தார்.
இன்னொரு பேரனான பிராக் ஹார்மன் (https://twitter.com/BHarmon_10 ) தங்கள் தாத்தா மகிழ்ச்சியாக இருப்பதாகவும், அதன் அடையாளமாக விருந்து ஒன்றை அளிக்க விரும்புவதாகவும் , இதற்கு யார் வேண்டுமானலும் வருகை தரலாம் என தெரிவித்திருந்தார்.

டிவிட்டர், வைரல் புகழ் பற்றி எல்லாம் அதிகம் அறிந்திராத அந்த முதியவர் ,எல்லோரும் தன்னைப்பற்றியே பேசுவதை பார்த்து கொஞ்சம் திக்குமுக்காடித்தான் போயிருக்கிறார். இந்த திடீர் புகழ் வெளிச்சம் அவருக்கு வியப்பை அளித்தாலும், உற்சாகத்தோடு எல்லோரையும் விருந்துக்கு அழை நான் பர்கர் தயார் செய்கிறேன் என கூறியிருக்கிறார்.

வரும் 26 ம் தேதி நடைபெற உள்ள இந்த விருந்து இணைய பேரப்பிள்ளைகளுக்கானதாக குறிப்பிடப்பட்டுள்ளது. ( பர்கருக்கு 2 டாலர் கட்டணம் உண்டு) . இதற்காக என்றே சேட்பாப்பா.காம் ( www.sadpapaw.com.) எனும் இணையதளமும் அமைக்கப்பட்டு தாத்தாவின் பாசத்தை வெளிப்படுத்து டிஷர்ட் மற்றும் தொப்பி விற்கப்படுவதாக அறிவிக்கப்பட்டுள்ளது என்றால் பர்த்துக்கொள்ளுங்கள்.

———
நன்றி;தமிழ் இந்துவில் எழுதியது

காமிராவில் சிக்கிய ஓவியமும் கொண்டாடிய இணையமும்

New Years Night revellersபுத்தாண்டின் முதல் வைரல் புகைப்படம்! – பிரிட்டனின் மான்செஸ்டர் நகரில் புத்தாண்டை வரவேற்கும் கொண்டாட்டங்களுக்கு நடுவே எடுக்கப்பட்ட புகைப்படம் தான் இந்த அந்தஸ்த்தை பெற்றிருக்கிறது.
அந்த புகைப்படம் இணையவெளி முழவதும் பகிரப்பட்டு, தனக்கான மெமிக்களையும் உண்டாக்கி மேலும் பிரபலமாகி இருப்பதோடு,ஆண்டின் துவக்கத்திலேயே இப்படி ஒரு அற்புதமான புகைப்படமா? என்று வியந்து பாராட்டவும் வைத்திருக்கிறது.

இணையத்தில் புகைப்படங்கள் வைரலாவது ஒன்றும் புதிய விஷயமல்ல; ஆனால் மான்செஸ்டர் புத்தாண்டு காட்சி இணையத்தின் கவனத்தை ஈர்த்த வித்ததில் வழக்கமான வைரல் அம்சங்களை மீறிய விஷயங்களை கொண்டிருக்கிறது.

அந்த புகைப்படத்தில் அப்படி என்ன இருக்கிறது? ஒரு மிக நல்ல புகைப்படத்தில் என்ன எல்லாம் இருக்க வேண்டுமோ எல்லாமே அந்த படத்தில் இருக்கின்றன.

மான்செஸ்டர் நகர் வீதி ஒன்றில் புத்தாண்டு நள்ளிரவு கொண்டாட்டத்தின் போது எடுக்கப்பட்ட அந்த காட்சியில் வலது பக்க ஓரத்தில் காவலர்கள் குடிபோதையில் இருக்கும் ஒருவரை கட்டுப்படுத்த மல்லுக்கட்டிக்கொண்டிருக்கின்றனர். இதை வழிபோக்கர்கள் வேடிக்கை பார்த்துக்கொண்டிருக்க, இடது பக்கத்தில் தரையில் படுத்திருக்கும் ஒருவர் அருகாமையில் உள்ள பீர் பாட்டிலை எட்டிப்பிடிக்க முயற்சிக்கிறார்.
ஜோயல் குட்மன் எனும் புகைப்பட கலைஞர் எடுத்த இந்த படம் மான்செஸ்டர் ஈவ்னிங் நியூஸ் பத்திரிகையிலும் அதன் இணையதளத்திலும் வெளியானது. முதலில், புகைப்பட தொகுப்பில் அந்த படம் பத்தோடு பதினொன்றாக கவனிக்கப்படாமல் தான் இருந்தது.
1CXo57HFWEAAhRe0
ஆனால், ரோலண்ட் ஹீயுக்ஸ் எனும் பிபிசி செய்தியாளர் இந்த படத்தை பார்த்ததுமே அசந்துபோய் விட்டார்.
”அந்த படம் துள்ளி குதித்து நின்றது. அதில் ஒரே இடத்தில் எல்லா அம்சங்களும் நிகழ்ந்து கொண்டிருந்தன.என்னால் அந்த படத்தில் இருந்து பார்வையை விலக்கவே முடியவில்லை” என்று ஹீயூக்ஸ் இது பற்றி வியந்து போய் குறிப்பிடுகிறார்.

இது போன்ற ஒரு புகைப்படத்தை பார்த்ததுமே இணைய யுகத்தில் ஒருவர் என்ன செய்யக்கூடுமோ அதையே அவரும் செய்தார். ஆம்,தனது டிவிட்டர் பக்கத்தில் அந்த படத்தை பகிர்ந்து கொண்டார். ”இந்த மான்செஸ்டர் புத்தாண்டு புகைப்படத்தில் பாருங்கள் எத்தனை நிகழ்ந்து கொண்டிருக்கின்றன. ஒரு அழகான ஓவியம் போல” என்றும் குறிப்பிட்டிருந்தார்.

ஓவியம் போல எனும் அந்த வர்ணனை அந்த புகைப்படத்தின் அத்தனை சிறப்புகளையும் அடையாளம் காட்டியது.அந்த புகைப்படத்தை உற்றுப்பார்க்கும் போது அதே உணர்வு தான் உண்டானது. செறிவுடன் தீட்டப்பட்ட ஒரு ஓவியத்தில் நுணுக்கமாக இடம்பெற்றிருக்க கூடிய விவரங்கள் அந்த படத்திலும் இருந்தன.
மான்செஸ்டர் நகர கண்ணாடி மூலம் பிரிட்டனின் புத்தாண்டு கொண்டாட்ட முறையை அந்த காட்சி ஓவியம் போல சித்தரிப்பதாகவும் பாராட்டப்பட்டது.இதனிடையே, இன்னொரு டிவிட்டர் பயனாளி (@GroenMNG ) ஒரு நல்ல புகைப்படத்திற்காக சொல்லப்படும் தங்க விகித இலக்கணத்திற்கு இந்த படமும் உட்பட்டிருப்பதை , அந்த அந்த அம்சங்களை குறிப்பிட்டு சுட்டிக்காட்டியிருந்தார். இது மேலும் கவனிக்க வைத்தது.

ஆக,காண்பவர் கவனத்தை ஈர்க்க கூடிய தகுதி அந்த படத்திற்கு இருந்தால், டிவிட்டர் பயனாளிகள் அதற்கு உண்டான மரியாதையை செய்தனர். அதாவது தன்னிச்சையாக அதை மறுகுறும்பதிவிட்டு (ரீடிவீஇட்) தங்கள் டைம்லைனில் பகிர்ந்து கொண்டனர்.இதன் பிறகு என்ன நிகழ்ந்திருக்கும் என்பதை விளக்க வேண்டிய அவசியமில்லை. ஒரு குறும்பதிவு பத்தாகி,பத்து நூறாகி , நூறு ஆயிரமாகி குறும்பதிவுகள் பரவிக்கொண்டே இருந்தன. திடிரென பார்த்தால் 25,000 முறைக்கு மேல் மறுகுறும்பதிவிடப்பட்டு இணையவெளியின் பெரும்பாலான இடங்களில் அந்த படம் தான் கவனத்தை ஈர்த்தது.

இதற்கு அடுத்த கட்டமாக அந்த படத்தை பகிர்ந்து கொண்டவர்கள் அதனை காவிய பாணி ஓவியங்களுடன் ஒப்பிட்டதுடன் நிற்காமல், வரலாற்றின் புகழ் மிக்க ஓவியங்களுக்குள் இந்த காட்சியின அம்சங்களை திணித்து அவற்றை மெமீக்களாக பகிர்ந்து கொண்டனர். இப்படி லியானார்டோ ஓவியத்திற்கு நடுவிலும், வான்கா ஒவியம் ஊடாகவும் அந்த படம் இணையத்தில் பயணித்தது.

ஓவிய காட்சிகள் நடுவே பார்க்கும் போது அந்த படத்தின் மகத்துவம் இன்னமும் அதிகமானது.
விளைவு புத்தாண்டின் முதல் வைரல் படமாக பரவி பேசப்பட்ட இந்த நிகழ்வை பிரிட்டன் மற்றும் ஐரோப்பிய நாளிதழ்கள் செய்தியாக வெளியிட்டன.

ஆண்டின் துவக்கத்திலேயே வைரலாக பரவியது ஒரு புறம் இருக்க, அழகிய ஓவியத்துடன் ஒப்பிடக்கூடிய அம்சம் மற்றும் கலாச்சார்க்கூறுகளை கொண்டிருப்பதால் நல்லவிதமாக கவனத்தை ஈர்த்த படமாகவும் இது அமைந்துள்ளது.

தேவையில்லாத விவாதங்களையும் ,சர்ச்சைகளையும் ஏற்படுத்தாமல் கலையின் கொண்டாட்டமாகவும் அமைந்தது பலரையும் மகிழ்ச்சியில் ஆழ்த்தியுள்ளது.
இந்த படத்தை முதலில் கண்டெடுத்து பகிர்ந்து கொண்ட ஹீயூக்ஸ் இந்த மொத்த நிகழ்வையும் விவரித்து பிபிசி தளத்தில் கட்டுரை ஒன்றை எழுதியிருக்கிறார்.இணைய உலகமே பாராட்டும் அந்த படத்தை எடுத்த புகைப்பட கலைஞர் குட்மேன் தனது தளத்தில் ( http://www.joelgoodman.net/) அந்த அச்சிட்ட பிரதிகளை வாங்கி கொள்ள வழி செய்திருக்கிறார்.

—-

நன்றி; தமிழ் இந்துவுக்காக எழுதியது.

முகவரி சுருக்க சேவைகளின் வளர்ச்சி

php-url-shortenerஇணைய பயன்பாடு மற்றும் இணைய போக்குகளில் உங்களுக்கு உள்ளொளியும், புரிதலும் தேவை என்றால் முகவரி சுருக்க சேவைகளின் வரலாற்றை கொஞ்சம் திரும்பி பார்க்க வேண்டும்.
இணைய முகவரி சுருக்க சேவைகளை பற்றி விரிவாக கூட விவரிக்க வேண்டாம்; பிட்.லி அல்லது டைனியூ.ஆர்.எல் ஆகிய இணைய சேவைகளின் பெயரை குறிப்பிட்டாலே போதுமானது.இந்த இரண்டும் தான் இணைய முகவரி சுருக்க சேவைகளின் முன்னோடி தளங்கள்!

இவை சமுக வலைப்பின்னல் யுகத்தின் பகிர்தல் தாகத்தை தணிக்க பிறந்தவை.
நீளமாக இருக்கும் இணைய முகவரிகளை( யூ.ஆர்.எல் அல்லது உரலி)சின்னதாக சுருக்குத்தருவது தான் இவற்றின் பணி.இந்த சுருக்கங்களை எளிதாக பகிர்ந்து கொள்ளலாம்.இவற்றில் கிளிக் செய்தால் சுட்டிக்காட்டப்பட்ட தளங்களுக்கு சென்றுவிடலாம்.

இணையதளங்களை அல்லது இணைய பக்கங்களை பகிர்ந்து கொள்ளும் போது அவற்றின் முகவரி சற்றே நீளமாக அமைந்து விடுகின்றன.இந்த நீளத்தையோ அல்லது அவற்றின் சுமையையோ இமெயில் யுகத்தில் யாரும் உணர்ந்ததில்லை.ஆனால் சமூக வலைதளங்களில் அதிலும் குறிப்பாக 140 எழுத்து வரம்பு கொண்ட குறும்பதிவு சேவையான டிவிட்டர் வருகைக்கு பிறகு இந்த குறை உணரப்பட்டது.இணைப்பை சுட்டிக்காட்டும் போது முகவரியே இடத்தை அடைத்துக்கொண்டால் என்ன செய்வது?

இந்த சிக்கலுக்கு தீர்வாக தான் முகவரி சுருக்க சேவைகள் அறிமுகமாயின. 50-60 எழுத்துக்கள் கொண்ட நீளமான இணைய முகவரிகளை இந்த சேவைகளில் சமர்பித்தாலும் அழகாக அவற்றை சின்னதாக சுருக்கித்தந்துவிடும்.
இது இவற்றின் ஆரம்ப கால வரலாற்று சுருக்கம்.

2002 ல் டைனி யூ.ஆர்.எல் அறிமுகமானது.பின்னர் பிட்.லி வந்தது.தொடர்ந்து மழை கால காளான் போல நூற்றுக்கும் அதிகமான முகவரி சுருக்க சேவைகள் உதயமாயின.இவற்றில் பெரும்பாலானவற்றின் பெயர்கள் மட்டுமே மாறுபட்டிருந்தனவே தவிர அவற்றின் சேவையிலோ பயன்பாட்டிலோ எந்த புதுமையும் இருக்கவில்லை.
இந்த புற்றீசல் போட்டியை பிட்.லி,டைனியூ.ஆர்.எல் உள்ளிட்ட தளங்கள் சமாளித்து முன்னிலை பெற்றன.ஆனால் சற்ற்ம் எதிர்பாராத வகையில் டிவிட்டரே சொந்தமாக முகவரி சுருக்க சேவையை ஒரு கட்டத்தில் அறிமுகம் செய்தது.டிவிட்டரில் பகிரப்படும் முகவரிகளை தனியே சுருக்க வேண்டிய தேவையில்லாமல் அவை தானாகவே சுருக்கப்பட்டன.

இதே காலகட்டத்தில் முன்னணி தேடியந்திரமான கூகுளும் தன் பங்கிற்கு ஒரு முகவரி சுருக்க சேவையை அறிமுகம் செய்தது:https://goo.gl/
இணையத்தின் பகிர்தல் பிரச்ச்னைக்கான அழகான தீர்வை முன்வைத்து வளர்ச்சி வாய்ப்புகளை எதிர்நோக்கியிருந்த முகவரி சுருக்க சேவைகளுக்கு இதைவிட பெரிய சோதனை இருக்க முடியாது தான்.
இது இவற்றின் சோதனை!
ஆனால் முகவரி சுருக்க சேவைகள் இதனால் சுருங்கிவிடவில்லை.அவை சின்ன சின்ன புதுமைகளால் தங்களை புணரமைத்துக்கொண்டிருக்கின்றன.

இப்போது இந்த சேவைகள் முகவரி சுருக்கத்தை மட்டும் அளிப்பதில்லை.சுருக்கப்படும் முகவரிகளின் முன்னோட்டத்தை அளிக்கின்றன.அதாவது கிளிக் செய்வதற்கு முன்னரே அந்த இணைப்பின் பின்னே உள்ள இணையதளத்தின் தோற்றத்தை பார்க்கலாம். இந்த முன்னோட்ட வசதி மிகவும் முக்கியமானது.முகவரி சுருக்க வசதியை பயன்படுத்திக்கொண்டு ஒரு சிலர் மோசமான அல்லது மால்வேர் பாதிப்பை உண்டாக்க கூடிய தளங்களுக்கு கடத்திச்செல்லும் அபாயம் உண்டானதால்,கிளிக் செய்ய இருக்கும் தளம் உண்மையில் இணைப்பில் சுட்டிக்காட்டப்பட்டது தானா என்பதை தெரிந்து கொள்ளலாம்.

நடுவே இணைப்புகளை பரிசோதித்து அவை மால்வேர் ஆபத்து இல்லாதவை தானா என்று உறுதிபடுத்தும் சேவையை பிரதானமாக வழங்கும் இணையதளங்களும் கூட அறிமுகமாயின.
அதோடு,இத்தகைய தவறான பயன்பாட்டை தவிர்ப்பதற்காக இந்த சேவைகள் முதலில் பயனாளிகளை நீங்கள் மனிதர்கள் தானா என்று நிருபித்துக்காட்டவும் சொல்கின்றன.கூகுள் இதற்கு கேப்ட்சா சோதனை வைக்கிறது என்றால் பிட்.லி அழகான சின்ன விளையாட்டை முன்வைக்கிறது.

இணையதளங்களை பகிர்ந்து கொண்டால் மட்டும் போதுமா? அவற்றை எத்தனை பேர் கிளிக் செய்து பார்த்தனர் என்று தெரிந்து கொள்ள வேண்டாமா? இப்போது முகவரி சுருக்க சேவைகள் இந்த புள்ளிவிவரங்களையும் சேர்த்தே வழங்குகின்றன. பிட்.லி ஒரு படி மேலே சென்று பிராண்ட்கள் தங்களுக்கான முகவரி சுருக்கங்களை உருவாக்கி கொண்டு அவற்றின் வீச்சை அறிவதற்கான சேவையையும் வழங்குகிறது.

அதோடு இந்த சேவைகள் ஸ்மார்ட்போன் யுகத்திற்கு ஏற்ப செயலி வடிவமும் எடுத்துள்ளன.
டைனி.யூஆர்.எல் – பிரவுசர் நீட்டிப்பாகவே பயன்படுத்திக்கொள்ளும் வாய்ப்பை அளிக்கிறது.
http://yourls.org/ சேவை பயனாளிகள் தங்களுக்கான முகவரி சுருக்க சேவையை சொந்தமாகவே உருவாக்கி கொள்ள வழி செய்கிறது.ஓபன் சோர்ஸ் அடிப்படையில் செயல்படும் சேவை இது.
முகவரி சுருக்க சேவைகளில் இப்போது எத்தனை தளங்கள் இருக்கின்றன என அறிய விரும்பினால் அந்த பட்டியலை http://bit.do/list-of-url-shorteners.php தளம் அளிக்கிறது.

http://longurl.org/ தளம் சுருக்கப்பட்ட முகவரிகளின் பின்னே உள்ள இணையதளம் பற்றிய முக்கிய தகவல்களை தெரிந்து கொள்ள வழி செய்கிறது.
http://is.gd/ தளம் இணைய முகவரிகள் தவறான நோக்கங்களுக்காக சுருக்கப்படுவதை தடுக்கும் வகையில் செயல்படுகிறது.
காலத்திற்கு ஏற்ப தங்களை மேம்படுத்திக்கொண்டுள்ள முகவரி சுருக்க சேவைகளின் அடுத்த பரிமானம் என்னவாக இருக்கும்.இப்போதே ஒரு முன்னோட்டம் பார்க்க் முடியுமா? என்பது சுவாரஸ்யமான கேள்வி!

1445887906366202

இணைய கற்காலத்தின் இனிய நினைவுகள்

பேஸ்புக்,டிவிட்டருக்கு முந்தைய இணையத்தை உங்களுக்கு நினைவிருக்கிறதா?இரண்டும் தான் உலகம் என நினைக்கும் ஸ்மார்ட்போன் தலைமுறையிடம் இந்த கேள்வியை,அந்த கால இணையம் எப்படி இருந்தது என்பதை அறிவீர்களா? என்று கேட்க வேண்டும்.

இணையத்தில் அந்த காலம் என்றால் எச்.டி.எம்.எல் யுகம்;கூகுள் தேடலுக்கு முந்தைய காலம்.பிரவுசர் என்றால் நெட்ஸ்கேப்பும்,இணையத்தில் உலாவுதல் என்றால் யாஹுவும் என இருந்த ஆண்டுகள்.இணைய சாமனியர்களின் சொந்த வீட்டுக்கனவை ஜியோசிட்டீஸ் நிறைவேற்றித்தந்த நாட்கள்.

இணையத்தின் ஆரம்ப கால அற்புதங்களின் நினைவு சின்னங்கள் இவை.இணைய பரிணாமத்தில் வலை 1.0 என குறிப்பிடப்படும் இந்த கால கட்டம் முடிந்து இப்போது வலை 2.0 அலை வீசிக்கொண்டிருக்கிறது.சமூக வலைததளங்களும் ,உள்ளங்கையில் இணையத்தை அணுகும் வசதியும் இதன் அடையாளமாக உருவாகியிருக்கின்றன.எல்லாவற்றுக்கும் ஒரு செயலி இருக்கிறது.இ-காமர்ஸ் கோலோச்சுகிறது.எதிர்காலத்தில் தொழில்நுட்பம் இன்னும் என்ன எல்லாமோ மாற்றங்களை கொண்டுவர இருக்கின்றன.

எதிர்கால அற்புதங்கள் பற்றிய மாநாடுகள் நடத்தப்படும் நிலையில்,இணையத்தின் அந்த காலத்தை திரும்பி பார்க்கும் வகையில் ஒரு மாநாடு நடந்து முடிந்திருக்கிறது.அமெரிக்காவைச்சேர்ந்த புரோகிராமர் கெய்லே டிரேக் மற்றும் சைபர் மானுடவியலாளரான ஆம்பர் கேஸ் இருவரும் இணைந்து இந்த இரண்டு நாள் மாநாட்டை வெற்றிகரமாக நடத்தியிருக்கின்றனர்.

வலை 1.0 மாநாடு, 2105 ( தி வெப் 1.0 கான்பிரன்ஸ் 2015) எனும் பெயரிலான இந்த மாநாட்டில் ஏராளமானோர் ஆர்வத்துடன் கலந்து கொண்டிருக்கின்றனர்.
இந்த மாநாட்டை இணைய பிளேஷ்பேக் என்றோ அல்லது அந்த கால நினைவுகளில் மூழ்கும் முயற்சி என்றோ அலட்சியமாக நினைத்துவிட வேண்டாம்.
1445887923610154
இணையத்தின் ஆரம்ப கால அற்புதங்களை எடுத்துரைத்து,அதற்கும் இன்றைய இணையத்திற்குமான வேறுபாடுகளையும் இந்த மாநாடு கவனத்தில் கொண்டு வந்ததுள்ளது.மாநாட்டுக்கு என்று அமைக்கப்பட்ட இணையதளமும் அந்த கால தன்மையுடனேயே அமைந்திருந்தது.இலவச இணையதளங்களை உருவாக்க வழி செய்த ஜியோசிட்டீஸ் இணையதளம் ( http://websiteconf.neocities.org/) போலவே அந்த தளம் அமைந்திருந்தது.
மாநாட்டில் இதே பாணியிலான இணையதளத்தை உருவாக்கும் முயற்சியிலும் பிரதிநிதிகள் ஈடுபட்டனர்.
இதற்கு என்ன அவசியம் என்று கேட்கலாம்?

ஆம்,இணையம் ஆரம்ப நாட்களில் இவ்விதமாக தான் இருந்தது.அதற்காக 3ஜியையும் கடந்து 4ஜி-5ஜி என பேசிக்கொண்டிருக்கும் காலத்தில் ஆமை வேக டயல் அப் இணைய யுகத்திற்கு திரும்ப முடியுமா?என கேட்கலாம்.
இல்லை,இது இணைய கற்காலத்திற்கு திரும்பச்சொல்லும் கோரிக்கை அல்ல;மாறாக நவீன இணையத்தில் எவை எல்லாம் தவறாக இருக்கின்றன என்பதை அந்த கால இணையத்தில் சரியாக இருந்தவை மூலம் சுட்டிக்காட்டுவதே இந்த மாநாட்டின் முக்கிய நோக்கமாக இருக்கிறது.

’இணையம் என்பதே மக்களை நுகர வைப்பதற்கான சதியாக மாறிவிட்டது’ என்கிறார் மாநாட்டு அமைப்பாளரான கெய்லே டிரேக்.அது மட்டும் அல்ல பிக் டேட்டா மற்றும் பிக் பிஸ்னஸ் ஆதிக்கம் செலுத்த கண்காணிப்பு யுகமும் கட்டவிழ்த்து விடப்பட்டிருப்பதை அவர் கவலையுடன் சுட்டிக்காட்டுகிறார்.
இணையத்தின் ஆரம்ப காலத்தில் இவ்வாறு இருக்கவில்லை என்பதோடு எல்லாவற்றிலும் ஒரு படைப்பூக்கமும்,புதுமையயும் இருந்தன என்கிறார்.இவற்றுக்கான அடையாளமாக தான் ஜியோசிட்டிஸ் கால இணையதளங்களை முன்வைக்கிறார்.

இந்த கால நவீன இணையதளங்களுடன் ஒப்பிடும் போது இவை தோற்றத்திலோ, உருவாக்கத்திலோ பல மடங்கு பின் தங்கியிருப்பவை.ஆனால் என்ன ,இவற்றின் உள்ளடக்கத்தில் இருந்த தனிநபர் படைப்பாற்றலும்,கற்பனைத்திறனும் இப்போது சாத்தியமாகிறதா என்ன?

தொழில்நுட்ப நோக்கில் இவை அதிக பின்புலம் இல்லாத நிலையான பக்கங்களை கொண்டவை. ஸ்டேட்டின் வெப் என குறிப்பிடப்படுகின்றன.இன்றைய பிராண்ட்பேண்ட் இணையத்தில் இருந்து திரும்பி பார்த்தால் இவை மாட்டுவண்டிகளுக்கான ஒரு வழிப்பாதை போல தோன்றலாம்.
ஆனாலும் என்ன, இணையத்தில் தாங்கள் நினைத்த வகையில் தங்களுக்கு என்று சொந்தமாக ஒரு வலைமனையை உருவாக்கி கொள்ள இவை வழி செய்தனவே. அதன் காரணமாகவே இவற்றில் தனிமனித படைப்பாக்கம் அதன் அப்பாவித்தனத்துடன் அழகாக வெளிப்பட்டனவே!

விக்கி மற்றும் சமூக வலைதளங்களின் எழுச்சி, இ-காமர்ஸ் அலை எல்லாம் சேர்ந்து அந்த கால இணையத்தை வெகுவாக பின்னுக்கு தள்ளிவிட்டதுடன், புதிய விதிகளையும் உருவாக்கி இருக்கின்றன.கண்காணிப்பு யுகத்திற்கும் வித்திட்டுள்ளன.

பலரும் இணையத்தின் ஆரம்ப காலத்தில் இருந்த படைப்பாற்றல் மற்றும் வெளிப்படுத்தும் தன்மையை இழந்துள்ளதாக உணர்கின்றனர், அவர்களுக்காக தான் இந்த மாநாடு என்கிறார் கெய்லே டிரேக்.
ஆரம்ப இணையத்தின் நல்ல விஷ்யங்களை மீண்டும் கொண்டு வர விரும்புகிறோம் என்று சொல்பவர் போர்ட்லாண்டில் மாநாட்டிற்கு கிடைத்த வரவேற்பின் தொடர்ச்சியாக மற்ற நகரங்களிலும் இருந்து அழைப்பு வந்திருக்கிறது என்கிறார்.

டிரேக் பற்றி மற்றொரு சுவாரஸ்யமான தகவல் ஜியோசிட்டீஸ் பாணியில் அந்த கால இணையதளங்களை உருவாக்கி கொள்ள வழி செய்யும் நியோசிட்டீஸ் ( Neocities ) தளத்தை அவர் நடத்தி வருகிறார்.
——–
productcamhead
செயலி புதிது; மின்வணிக செயலி

இ-காமர்ஸ் எனப்படும் மின்வணிக யுகத்தில் நீங்களும் பங்கேற்கலாம்- வாடிக்கையாளராக மட்டும் அல்ல;விற்பனையாளராகவும் தான்!.மின்வணிக தளங்கள் மூலம் அல்லது சமூக வலைதளங்கள் வாயிலாக உங்கள் தயாரிப்புகளை நீங்களே விற்பனை செய்யலாம்.நீங்கள் வடிவமைத்த ஆடைகள்,உருவாக்கிய பொருட்கள் என எதை வேண்டுமானாலும் விற்பனை செய்யலாம்.இதற்கு புகைப்படத்துடன் உங்கள் தயாரிப்பின் சிறப்பை விவரித்தாலே கூட போதுமானது.புகைப்படத்தை ஸ்மார்ட்போனிலேயே எடுத்துவிடலாம் தான்.ஆனால் மின்வணிக விற்பனைக்காக படம் எடுக்க சரியான முறை ஒன்று இருக்கிறது தெரியுமா? அதாவது, பின்னணி விவரங்கள் இல்லாமல் விற்பனை பொருள் மட்டுமே தெரியும் வகையில் படம் இருந்தால் நல்லது.அந்த பொருளை மட்டும் கத்திரித்து எடுத்து வெள்ளை காகிதத்தில் ஒட்டியது போல இருக்க வேண்டும். அப்போது தான் விற்பனை பொருள் பளிச்சென தெரியும்.காண்பவர்களையும் ஈர்க்கும்.

இத்தகைய படத்தை எடுப்பது எப்படி? என்று கவலைப்பட வேண்டாம்.அதற்காக என்றே பிராடக்ட் காமிரா (Product Camera ) செயலி அறிமுகமாகியுள்ளது.பின்னணி காட்சி இல்லாமல் விற்பனை பொருள் மட்டும் தோன்றும் வகையில் இந்த செயலி மூலம் புகைப்படத்தை கிளிக் செய்து கொள்ளலாம்.மின்வணிகத்திற்கு தான் என்றில்லை,நீங்கள் உருவாக்கிய படைப்புகளை,புதிதாக வாங்கிய பொருட்களை சமூக வலைத்தளங்களில் புகைப்படமாக பகிர்ந்து கொள்ளவும் இந்த செயலியை பயன்படுத்திக்கொள்ளலாம்.
ஆண்டாராய்டில் தரவிறக்கம் செய்ய: https://play.google.com/store/apps/details?id=com.productstudio.android

2
வீடியோ புதிது; எது அழகு?

அழகு என்பது காண்பவர் கண்களில் தான் இருக்கிறது என்று சொல்லப்பட்டால் தான் என்ன? பலருக்கு அழகு ஒரு பிரச்சனையாக தான் இருக்கிறது.சிலர் அழகாக இருப்பதை நினைத்து கர்வம் கொள்ளலாம்.சிலர் தாங்கள் அழகில்லாமல் இருப்பதாக நினைத்து கவலை கொள்ளலாம்.இப்படி அழகு பற்றி எப்படி நினைத்துக்கொண்டிருந்தாலும் சரி,தி ஸ்கூல் ஆப் லைப் உருவாக்கியுள்ள அழகு வீடியோவை அவசியம் பார்க்க வேண்டும்.கார்ட்டூன் சித்திரங்கள் மூலம் நகரும் இந்த வீடியோ அழகு பற்றிய பொதுவான அபிப்ராயங்களை அழகாக தகர்த்தெறிகிறது.அழகு என்பது தனிப்பட்டதல்ல என்றும் வாழ்க்கையில் ஜனநாயகத்தன்மை மிகவும் குறைவாக இருக்கும் அம்சங்களில் இதுவும் ஒன்று என்று கூறும் இந்த வீடியோ நல்ல தோற்றம் கொண்டிருப்பது லாட்டரி போன்றது என்றும் தெரிவிக்கிறது. இது தான் நானா?என்றெல்லாம் தோற்றத்தை நினைத்து கவலைப்பட வேண்டிய அவசியமில்லை என்றும் அழகு என்பது காலத்தால் மாறக்கூடியது என்றும் இந்த வீடியோ எடுத்துச்சொல்லி அழகை புதிய இடங்களில் தேடுங்கள் என ஊக்கம் அளிக்கிறது.

வீடியோவை காண: https://www.youtube.com/watch?v=DPiSFGrHCbE

தளம் புதிது; கருத்து கணிப்பு நடத்தலாம் வாங்க!
google-about-me

கருத்து கணிப்புகளை ஆய்வு நிறுவனங்கள் தான் நடத்த வேண்டுமா என்ன? நீங்கள் நினைத்தாலும் கருத்து கணிப்புகளை நடத்த முடியும் தான்.கேள்வி பதில் பாணியில் எளிதாக கருத்துக்கணிப்புகளை நடத்தி க்கொள்ள வழி செய்யும் இணையதளங்கள் பல இருப்பதை நீங்கள் அறிவீர்களா? இந்த பட்டியலில் இப்போது ரிடில் தளமும் சேர்ந்திருக்கிறது. மிக எளிதாக இணையவாசிகளுடன் தொடர்பு கொள்ளக்கூடிய உள்ளட்டக்கத்தை உருவாக்கி கொள்ள வாருங்கள் என அழைப்பு விடுக்கும் இந்த தளம்,கருத்து கணிப்புகள்,வினாடி வினா மற்றும் உங்களுக்கான பட்டியல்களையும் உருவாக்கி கொள்ள வழி செய்கிறது. இவ்வளவு ஏன் நீங்களே கூட ஆளுமை சோதனைக்கான கேள்விகளையும் உருவாக்கி கொள்ளலாம். வலைப்பதிவு மற்றும் சொந்தமாக இணையதளம் வைத்திருப்பவர்கள் தங்கள் வாசகர்களுடன் மேலும் சிறந்த முறையில் தொடர்பு கொள்ள இந்த சேவையை பயன்படுத்திக்கொள்ளலாம்.ஆசிரியர்களும் கூட மாணவர்கள் மத்தியில் சுவையான வினாடி வினாக்களை நடத்த பயன்படுத்திக்கொள்ளலாம்.

இணைய முகவரி: http://www.riddle.com/welcome

கூகுளில் உங்கள் விவரங்கள்

கூகுள் பயனாளிகளுக்காக புதிய வசதியை அறிமுகம் செய்திருக்கிறது.இது பயன்பாட்டில் நோக்கிலானது இல்லை என்றாலும் முக்கியமானது.பயனாளிகள் தங்களைப்பற்றிய விவரங்களை கட்டுப்படுத்தும் வசதியை கூகுள் அளிக்கிறது.
சமூக வலைத்தளங்களில் பதிவு செய்யும் போது நம்மைப்பற்றிய பல விஷயங்களை சமர்பிக்கிறோம்.பெயர்,இ-மெயில் முகவரி,இருப்பிடம்,செல்போன் எண் உள்ளிட்ட பல தகவல்கள் நம்மிடம் இருந்து கோரப்படலாம்.இந்த விவரங்கள் நம்முடைய சேவை பக்கத்தில் மட்டும் அல்லாது பொதுவிலும் இடம்பெற வாய்ப்பிருக்கிறது.பொதுவில் என்றால்,இணையத்தில் தேடப்படும் போது நம்முடைய பெயர் தொடர்பான விவரங்களில் இவையும் தோன்றுவதற்கான வாய்ப்பாகும்.
தனியுரிமை நோக்கில் இது அத்தனை பாதுகாப்பானது அல்ல; இந்நிலையில் கூகுள் அதன் பயனாளிகளுக்கு அவர்களைப்பற்றிய விவரங்களை கட்டுப்படுத்தும் வாய்ப்பை அளிக்கும் வகையில் புதிய வசதியை அறிமுகம் செய்துள்ளது. கூகுள் அபவுட் மீ (https://aboutme.google.com/ ) பக்கத்தில் நுழந்து இதை பயன்படுத்திக்கொள்ளலாம். இந்த பக்கத்தில் நுழைந்தால் கூகுள் சேவை மூலம் தெரிவிக்கப்பட்ட உங்களைப்பற்றிய தகவல்களில் எவை எல்லாம் பொதுவில் இருக்கின்றன என காண்பிக்கப்படுகிறது. அவற்றை நீங்கள் எடிட் செய்யலாம் அல்லது நீக்கலாம்.
இவை கூகுள் பிளஸ் விவரங்கள் தொடர்பானது என்றாலும் தனியிரிமை விழிப்புணர்வில் முதல் படியாக கருதலாம்.

நன்றி; தமிழ் இந்துவில் எழுதியது;