Tag Archives: visual

அசத்தலான ஆன்லைன் அகராதிகள்!

wபடித்துக்கொண்டிருக்கும் போதோ,வீட்டுப்பாடம் செய்து கொண்டிருக்கும் போதோ புரியாத சொற்களுக்கு அர்த்தம் தெரிந்து கொள்ள டிக்‌ஷனரி அதாவது அகராதிகளை புரட்டி பார்த்திருப்பீர்கள். ஆனால் , இதற்காக புத்தக அலமாரியில் இருக்கும் தலையனை சைஸ் டிக்‌ஷனரி அல்லது கையடக்க டிக்‌ஷனரியை தான் நாட வேண்டும் என்றில்லை. இணைய வசதி இருந்தால், இணையத்திலேயே புரியாத எந்த சொல்லுக்கும் அர்த்தம் தெரிந்து கொண்டு விடலாம். இதற்காக என்றே ஆன்லைன் அகராதிகள் இருப்பது உங்களுக்கு தெரிந்திருக்கும். அகராதிகளில் பல ரகம் இருப்பது போலவே இணைய அகராதிகளிலும் பல ரகம் இருக்கின்றன. அவற்றில் அசத்தலான அகராதிகள் சிலவற்றை அறிமுகம் செய்து கொள்ளலாமா?

இந்த அகராதிகளின் சிறப்பம்சம் என்ன தெரியுமா? இவை அர்த்தம் தேடுவதை மேலும் சுவாரஸ்யமாக்குவதோடு , வார்த்தைகளுக்கான பொருளை காட்சிரீதியாவும் புரிய வைக்க கூடியவையாக இருக்கின்றன. அது மட்டுமா? அர்த்தம் தேடும் சொற்களுடன் தொடர்புடைய வேறு பல விஷயங்களையும் இவை தெரிந்து கொள்ள உதவுகின்றன.

இத்தகைய காட்சி அகராதிகளுக்கு அழகான உதாரணமாக வேர்ட்சென்ஸ்.மீ (http://wordsense.me/ ) அகராதி இருக்கிறது. வேர்டு சென்ஸ் தேடப்படும் வார்த்தைகளுக்கான அர்த்ததை அழகாக வரைபடம் போல காட்டுகிறது. இடது பக்கத்தில் பார்த்தீர்கள் என்றால் தேடிய சொல்லுக்கான அர்த்தம் கொடுக்கப்பட்டிருக்கும். அந்த சொல்லுக்கு பெயர்ச்சொல்லாக என்ன பொருள், வினைச்சொல்லாக இருந்தால் என்ன அர்த்தம் போன்றவற்றை இதைப்பார்த்து தெரிந்து கொள்ளலாம். அப்படியே பக்கத்தில் பார்த்தால் , அந்த சொல்லுக்கு இணையான சொற்கள் மற்றும் தொடர்புடைய சொற்களின் பட்டியலும் இடம்பெற்றிருக்கும். அவற்றில் எந்த சொல்லை கிளிக் செய்தாலும் அதற்கான விளக்கமும் வரும். அந்த சொல்லுக்கான வார்த்தை வரைபடமும் வரும். ஆக, எந்த சொல்லாக இருந்தாலும் அதற்கான பொருளையும் பயன்பாட்டையும் விரிவாக தெரிந்து கொள்ளலாம். ஆங்கிலம் அறிந்து கொள்வதில் ஆர்வம் இருந்தால் இந்த இணைய அகராதி உங்களை கவர்ந்திழுத்துவிடும். ஏதோ இணைய விளையாட்டு ஆடுவது போல நேரம் போவதே தெரியாமல் இதை பயன்படுத்திக்கொண்டே இருக்கத்தோன்றும்.
இந்த அகராதியில் இன்னும் ஒரு சிறப்பு , நீங்கள் ஏற்கனவே தேடிய வார்த்தைகளையும் இது நினைவில் வைத்துக்கொண்டே அடையாளம் காட்டிக்கொண்டே இருக்கும். அதே போல இதில் பரிந்துரைக்கப்பட்டுள்ள வார்த்தைகளின் பட்டியலையும் கிள்க் செய்து பார்க்கலாம்.

எல்லாம் சரி, அகராதியை பாடம் படிப்பது போல படித்துப்பார்க்கலாம் என்றால் நம்ப முடிகிற்தா? கிட்ஸ்.வேர்ட்ஸ்மித் ( http://kids.wordsmyth.net/we/) இதை சாத்தியமாக்குகிறது. இதில் மற்ற அகராதிகள் போல புரியாத வார்த்தைக்கான பொருள் தேடலாம். குறிப்பிட்ட அந்த வார்த்தைக்கான விளக்கத்தை விரிவாக பார்க்கலாம். அந்த சொல்லின் சரியான உச்சரிப்பையும் ஆடியோவாக கேட்கலாம். இதே பக்கத்தில் பார்த்தீர்கள் என்றால், ஒவ்வொரு சொல்லுக்கும் , வார்த்தை ஆராய்ச்சி, வார்த்தை வரலாறு ,வார்த்தை பாகங்கள் ஆகிய வசதிகள் இருப்பதை பார்க்கலாம். இதில் வார்த்தை ஆராய்சியை கிளிக் செய்தால் அந்த சொல்லின் பயன்பாடு தொடர்பான வாக்கியங்களை பார்க்கலாம். வாரத்தை வரலாறு அந்த சொல் தோன்றிய விதம் பற்றி தெரிந்து கொள்ளலாம். வார்த்தை பாகங்கள் பகுதியில் எந்த ஒரு சொல்லையும் பகுதி பகுதியாக பிரித்து பொருள் சொல்லப்படுகிறது.

இது வார்த்தை தேடலுக்கானது. முகப்பு பக்கத்தில் வார்த்தைகளுக்கான வழிகாட்டி எனும் வர்ணனையோடு பலவேறு தலைப்புகள் கொடுக்கப்பட்டிருக்கும். வரலாறு, மனித உடல், பொருளாதாரம என பல தலைப்புகளை பார்க்கலாம். எந்த தலைப்பை கிளிக் செய்தாலும் அந்த தலைப்புக்கான முக்கிய சொற்களின் பட்டியல் வந்துநிற்கும். அந்த சொற்களுக்கான பொருளை கிளிக் செய்து தெரிந்து கொள்ளலாம். வார்த்தைகளின் தங்கச்சுரங்கம் என்று இந்த வசதியை இந்த தளம் குறிப்பிடுகிறது. இதை பயன்படுத்திப்பார்ப்பு சுவாரஸ்யமானது என்பதோடு தினமும் புதிய சொற்களை அறிமுகம் செய்து கொள்ளலாம். வார்த்தை விளையாட்டு புதிர்களும் இதில் உண்டு. சிறுவர்களுக்கான தனி பகுதியில் இருக்கிறது. அதில் எல்லாமே காட்சிகளாக விளக்கப்பட்டிருக்கும்.
ஸ்னேப்பி வேர்ட்ஸ் ( http://www.snappywords.com/) அகராதி இன்னும் கூட சுவாரஸ்யமானது.

இதில் எந்த வார்த்தையை சமர்பித்தாலும் அந்த சொல்லை மையமாக வைத்துக்கொண்டு தொடர்புடைய சொற்களை வரைபட சித்திரமாக காட்டுகிறது. சொற்களின் அருகே மவுசை கொண்டு சென்றாலே அவற்றுக்கான விளக்கத்தை பார்க்கலாம். அந்த வார்த்தையில் கிளிக் செய்தால் , அந்த சொலை மையமாக கொண்ட வார்த்தை சித்திரத்தையும் பார்க்கலாம். ஒரு வார்த்தை மட்டும் அல்ல இரு வார்த்தை சொற்களையும் இப்படி தேடிப்பார்க்கலாம். இந்த சித்திரத்தில் சொற்களின் தன்மைக்கு ஏற்ப தனித்தனி வண்ணங்களிலும் அடையாளம் காட்டப்படுகின்றன. அதாவது வினைச்சொல் என்றால் ஒரு வண்ணம். பெயர்ச்சொல் என்றால் ஒரு வண்ணம். ஆங்கில சொற்களின் பயன்பாட்டை காட்சிரீதியாக மிக அழகாக புரிய வைக்கிறது இந்த அகராதி.
காட்பிரைனி (http://www.gotbrainy.com/ ) அகராதி சொற்களுக்கான விளக்கத்தை அளிப்பதுடன் அதை புகைப்படமாகவும் காண்பித்து வியக்க வைக்கிறது. சொற்களின் அர்தத்தை விளக்கும் இந்த படங்கள் மூலம் சொற்களின் பயன்பாட்டை இன்னும் கூட தெளிவாக புரிந்து கொள்ளலாம். இந்த புகைப்படங்கள் பெரும்பாலும் இணையவாசிகளால் சமர்பிக்கப்பட்டவை.

அகராதிகளை பயன்படுத்துவது இத்தனை சுவாரஸ்யமானதா என்று வியப்பை ஏற்படுத்தி , வார்த்தைகளுக்கு பொருள் தேடும் ஆர்வத்தையும் இந்த அகராதிகள் உருவாக்கும். அப்படியே உங்களை ஆங்கில புலியாகவும் ஆக்கிவிடும்.

இணைய வடிவமைப்பின் அடிப்படைகளை அறிய ஒரு தளம்.

இப்போது பார்க்கப்போகும் இணையதளம் இணைய வடிவமைப்பு தொடர்பானது என்றாலும் இது இணைய வடிவமைப்பாளர்களுக்கானது மட்டும் அல்ல;எலோருக்குமானது.

சொல்லப்போனால் இந்த தளம் வடிவமைப்பாளர்களை விட இணையவாசிகளை மனதில் வைத்தே உருவாக்கப்பட்டது.அதாவது இணையவாசிகளுக்காக வடிவமைப்பாளர்களால் உருவாக்கப்பட்டுள்ளது.

எந்த வடிவமைப்பாளரும் இந்த தளத்தை பார்த்ததுமே மகிழ்ந்து போவார்கள்.அதோடு தங்களை நாடி வரும் வாடிக்கையாளர்களை எல்லாம் இந்த தளத்திற்கு அனுப்பி வைப்பார்கள்.

காரணம் இந்த தளம் இணையதளங்களுக்கான அடிப்படை அம்சங்களை முன்வைக்கிறது.இந்த அம்சங்களை பார்த்து இணைய வடிவமைப்பை கற்று கொள்ள முடியாது என்றாலும் ஒரு இணையதளம் எப்படி இருக்க வேண்டும் என்பதை தெரிந்து கொள்ளலாம்.

அது தான் இந்த தளத்தின் நோக்கம்.அதாவது இணைய வடிவமைப்பின் அடிப்படை அம்சங்களை தெரிந்து கொள்ளலாம்.செய்யக்கூடியாவை மற்றும் செய்யக்கூடாதவை என்று சொல்லப்படுவது உண்டலாவா ,இணைய வடிவமைப்பை பொருத்தவரை செய்யக்கூடியவற்றையும் செய்யக்கூடாதவற்றையும் இதில் உள்ள கட்டுரைகள் எடுத்துறைக்கின்றன.

இந்த அம்சங்கள் எல்லாம் இணைய வடிவமைப்பாளர்களுக்கு அத்துபடி.இவற்றை மனதில் வைத்து கொண்டு தான் வடிவமைப்பிலே ஈடுபடுவார்கள்.ஆனால் இணையதளம் விரும்புவோர்களுக்கு இந்த விஷயங்கள் எல்லாம் தெரிய வாய்ப்பு இல்லை அல்லவா?அவர்களுக்கு இணைய வடிவமைப்பின் சூட்சமங்களை புரிய வைப்பது தான் இந்த தளத்தின் நோக்கம்.

இதையே வேறுவிதமாக சொல்வதாயின் அடாவடி வாடிக்கையாளர்களிடம் மாட்டி கொண்டு அல்லல் படும் இணைய வடிவமைப்பாளர்களை காப்பாற்றுவதற்காகவே இந்த தளம் உருவாக்கப்பட்டுள்ளது.

அதாவது இப்படி தான் இணையதளம் இருக்க வேண்டும் என்று பிடிவாதம் பிடிக்கும் வாடிக்கையாளர்கள் அல்லது ஏடாகூடமாக கேள்விகள் கேட்டு வெறுப்பேற்றும் வாடிக்கையாளர்களுக்கு இணையதள அடிப்படைகளை உணர்த்துவது தான் இந்த தளத்தின் பிரதான நோக்கம்.

சொந்த இணையதளம் வேண்டும் என்று வரும் வாடிக்கையாளர்கள் பல நேரங்களில் எந்த அம்சம் வேண்டும் அந்த அம்சம் வேண்டும் என்றெல்லாம் கேட்டு வடிவமைப்பாளர்களை திணறடித்து விடுவார்கள்.தங்களுக்கான இணையதளம் எப்படியெல்லாம் இருக்க வேண்டும் என்று கேட்டு கொள்ளும் உரிமை வாடிக்கையாளர்களுக்கு உண்டு தான் .அவற்றை நிறைவேற்றி தருவது தான் வடிவமைப்பாளரின் வேலை.

ஆனால் பிரச்சனை என்னவென்றால் இந்த விருப்பம் இணைய அடிப்படைக்கும் இணைய அழகியலுக்கும் உட்பட்டு இருக்க வேண்டும்.இல்லையென்றால் வடிவமைப்பாளரால் எதுவும் செய்ய முடியாது.

உதாரணத்திற்கு வாடிக்கையாளர் எல்லா தகவல்களும் முகப்பு பக்கத்திலேயே இருக்க வேண்டும் என விரும்பலாம்.ஆனால் முகப்பு பக்கத்தில் இப்படி எல்லா தகவல்களையும் போட்டு அடைத்தால் பார்ப்பதற்கும் நன்றாக இருக்காது,தேவையான தகவல்களை பளிச்சென தெரிவிக்க கூடிய வகையிலும் இருக்காது .எனவே வடிவமைப்பாளர் முக்கிய தகவல்கள் மட்டுமே கொண்ட முகப்பு பக்கத்தை வடிவமைக்கலாம்.

ஆனால் வாடிக்கையாளரிடம் எடுத்து சொன்னால் அவரால் இதை புரிந்து கொள்ளாமல் வடிவமைப்பாளர் மீது அதிருப்தி கொள்ளலாம்.தான் சொல்வதை வடிவமைப்பாளர் நிறைவேற்ற மறுப்பதாக கோபம் அடையலாம்.

வடிவமைப்பாளர் பாவம் என்ன செய்வார்.ஒன்று வாடிக்கையாளரிடம் பொருமையாக காரணங்களை எடுத்து சொல்லலாம்.அல்லது அவரோடு வாதிடலாம்.அகராதி பிடித்த வாடிக்கையாளர் என்றால் ‘நான் சொல்வதை நிறைவேற்றாமல் சட்டம் பேசுகிறீர்களா? என்றும் பதில் விவாதம் செய்யலாம்.
செல்வாக்கு மிக்க வாடிக்கையாளர் என்றால் ஒரு சிறு சைகையிலேயே தனது அதிருப்தியை தெரிவித்து விலகி விடலாம்.

இது போன்ற நேரங்களில் மிகவும் பொருமையாக இணையதள வடிவமைப்பின் அடிப்படையான அம்சங்களை விளக்கி சொல்லி புரிய வைப்பது நல்ல பயனை தரலாம்.

அதை தான் வீநட்ஜ் இணையதளம் செய்கிறது.

இந்த தளத்தில் இணையதள வடிவமைப்பு தொடர்பான அடிப்படை அம்சங்களை விளக்கும் கட்டுரைகள் பலவேறு தலைப்புகளின் கீழ் கொடுக்கப்பட்டுள்ளன.

வடிவமைப்பாளர்கள் பிரச்சனைக்குறிய வாடிக்கையாளர்களை எதிர்கொள்ளும் போது அவரோடு மல்லுக்கட்டாமல் இந்த தளத்திற்கு அனுப்பி வைத்துவிடலாம்.எந்த அம்சத்தில் சந்தேகமே அது தொடர்பான பகுதியில் கிளிக் செய்து தெளிவு பெறலாம்.

உதாரணமாக இணையதளத்தில் எங்கு பார்த்தாலும் காலியிடம் விடப்பட்டுள்ளதாக வாடிக்கையாளர் அதிருப்தி தெரிவித்தால் இந்த தளத்தில் உள்ள வெற்றிடம் பற்றிய கட்டுரை அவர்களுக்கு சரியான விளக்கத்தை அளிக்கும்.வெற்றிடம் என்று சொல்வதைவிட வென்மை பகுதி என்று சொல்வதே பொருத்தமாக இருக்கும் என்று ஆரம்பிக்கும் இந்த கட்டுரை வென்மை பகுதி எப்படி இனைய அழகுக்கும் தெளிவிக்கும் உதவுகிறது என விளகுகிறது.

இதே போலவே வடிவமைப்பின் அனைத்து அம்சங்களையும் அழகாக எளிமையாக விளக்குகிறது.இவற்றை படித்துப்பார்த்தால் இணையதள வடிவமைப்பு தொடர்பான தெளிவை பெறலாம்.அப்போது வடிவமைபாளர் சொல்வதை எளிதாக புரிந்து கொள்ள முடியும்.

இணையதள முகவரி;http://weenudge.com