Tag Archives: emai

Shove_Home-582x297

நண்பர்கள் பிரவுசர் உங்கள் கையில்;புதுமையான இணைய சேவை

உங்கள் நண்பர்கள் கம்ப்யூட்டரில் நீங்கள் விரும்பும் இணையதளத்தை புதிய டேபாக திறக்க முடிந்தால் எப்படி இருக்கும்? அதே போல உங்கள் கம்ப்யூட்டரில் திடிரென உங்கள் நண்பர்கள் நினைக்கும் இணையதளம் தானாக திறக்கப்பட்டால் எப்படி இருக்கும்?

புதிதாக அறிமுகமாகி இருக்கும் பிரவுசர் நீட்டிப்பு சேவையான ஷோவ் (shove) இதை தான் சாத்தியமாக்குகிறது.
இணையத்தில் உலாவும் போது நண்பர்களுடன் இணையதளங்களை இணப்புகளாக பகிர்ந்து கொள்ள உதவும் சேவைகள் இருக்கின்றன.இந்த வசதியை இன்னும் ஒரு படி மேலே கொண்டு சென்று நண்பர்களின் பிரவுசரிலேயே புதிய இணையதளத்தை தோன்றச்செய்யும் வகையில் ஷோவ் சேவை உருவாக்கப்பட்டுள்ளது.பிரபலமான கூகுள் குரோம் பிரவுசருக்கான நீட்டிப்பு சேவையான இது செயல்படுகிறது.

ஷோவ் சேவையை பயன்படுத்த முதலில் அதை ஒருவர் தனது பிரவுசரில் நிறுவிக்கொள்ள வேண்டும்.அதன் பிறகு இணையத்தில் ஏதேனும் முக்கியமான அல்லது சுவாரஸ்யமான இணையதளத்தை பார்க்கும் போது அதை நண்பர்களுடன் பகிர்ந்து கொள்ள விரும்பினால்,ஒரு கிளிக் செய்தால் போதும் அந்த தளம் நண்பரின் பிரவுசரில் திறக்கப்பட்டுவிடும். அதற்கு முன்னர் ஒரு சின்ன அறிவிப்பு போல ,நண்பர் உங்களுக்கு ஒரு இணையதளத்தை காண்பிக்க விரும்புகிறார் எனும் செய்தி எட்டிபார்க்கும்.இதன் தொடர்ச்சியாக இணையதளம் திறக்கப்படும்.
ஆனால் இதற்கு உங்கள் நண்பர்களுக்கும் ஷோவ் நீட்டிப்பு சேவையை நிறுவியிருக்க வேண்டும்.அதோடு நண்பர்களை நீங்கள் உங்கள் ஷோவ் பட்டியலில் சேர்த்திருக்க வேண்டும். இந்த இரண்டையும் செய்த பிறகு, ஷோவ் பட்டியலில் உள்ள நண்பரின் பெயரை கிளிக் செய்ததுமே குறிப்பிட்ட இணைதளத்தை நண்பர்கள் பார்வைக்கு தோன்றச்செய்யலாம்.

கிட்ட்த்தட்ட நண்பர்களின் பிரவுசரை கைப்பற்றுவது போல அவர்களின் பிரவுசரில் நாம் விரும்பும் இணையதளத்தை இந்த சேவை தோன்றச்செய்கிறது.முதல் பார்வைக்கு இது விபரீதமானதாகவோ,வில்லங்கமானதாகவோ தோன்றலாம்.அதற்கேற்ப இந்த சேவையை விளையாட்டு நோக்கில் பயன்படுத்தும் வாய்ப்பு இருக்கத்தான் செய்கிறது.மோசமான அல்லது ஆபாசமான இணையதளத்தை திடிரென தோன்றச்செய்வதோ அல்லது வைரஸ் இணைப்பு தளங்களை எட்டிப்பார்க்கச்செய்யும் அபாயமோ இருக்கத்தான் செய்கிறது. அதிலும் அலுவலக சூழலில் இப்படி ஒரு இணையதளம் கம்ப்யூட்டரிலோ ,லேப்டாப்பில்லோ தோன்றினால் சங்கடமாக தான் இருக்கும்.

ஆனால்,இதில் நமது நண்பர்களை கவனமாக தேர்வு செய்து கொண்டால் பிரச்சனை இல்லை. பேஸ்புக் போல இதில் முகம் தெரியாதவர்களை எல்லாம் நண்பர்களாக சேர்த்துக்கொள்ள வேண்டியதில்லை.பயனுள்ள அல்லது சுவாரஸ்யமான இணைப்புகளை பகிர்ந்து கொள்ள விரும்பும் நெருக்கமான நண்பர்களை மட்டும் தேர்வு செய்து கொள்ளலாம்.

புதுமையான இந்த சேவையை பலவிதங்களில் பயன்படுத்தலாம்.

இணையதளங்களின் இணைப்பை அனுப்பி வைப்பதைவிட இந்த சேவை முற்றிலும் சுவாரஸ்யமானது.இணைப்புகளை அனுப்பும் போது அது எப்போது திறந்து பார்க்கப்படும் என்பது தெரியாது.ஆனால் இந்த சேவையில் நினைத்தவுடன் இணையப்பை இணையதளமாகவே அறிமுகம் செய்துவிடலாம்.
அதிலும் இணைய அரட்டை அல்லது விவாதத்தில் ஈடுபட்டிருக்கும் போது உடனடியாக இணையதளத்தை பார்க்கச்செய்வது பயனுள்ளதாக இருக்கும்.

அது மட்டும் அல்லாமல் நண்பர் பார்த்து ரசித்த ஒரு சூப்பரான இணையதளம் உங்கள் கம்ப்யூட்டரிலும் திறக்கப்படுவது திரில்லான அனுபவமாக தானே இருக்கும்.
நெகிழ வைக்கும் வீடியோ இது எனும் பரிந்துரை இ-மெயில் மூலம் அல்லது பேஸ்புக் பகிர்வாக வந்து,அதை கிளிக் செய்து பார்ப்பதைவிட அந்த வீடியோ பிரவுசரில் திடிரென ஓடத்துவங்குவது சுவாரஸ்யமாக தானே இருக்கும்.
இணைய பகிர்வில் சின்னதாக ஒரு புதிய அத்தியாயத்தை இந்த சேவை துவக்க வைத்திருக்கிறது என்றே சொல்லலாம்.
அமெரிக்காவைச்சேர்ந்த மைக் லீச்சர் மற்றும் அவரது நண்பர்கள் இணைந்து இந்த சேவையை உருவாக்கியுள்ளனர்.
ஆரம்பத்தில் விளையாட்டாக தான் இந்த சேவையை உருவாக்கியதாகவும்,ஆனால் இதற்கான முயற்சியில் ஈடுபட்ட போது இணைய பகிர்வில் இது புதுமையாக இருக்கும் என தோன்றியதாகவும் வயர்டு இணைய தளத்திற்கு அளித்துள்ள பேட்டியில் லீச்சர் கூறியுள்ளார்.

முற்றிலும் புதுமையான இணைய உரையாடலுக்கு இது வித்திடும் என்றும் அவர் நம்புகிறார்.
இது இன்னொரு அரட்டை சேவை அல்ல,இது உங்கள் பிரவுசரை நண்பர்களின் கட்டுப்பாட்டில் ஒப்படைப்பது,இதை கொஞ்சம் பொறுப்பாக தான் பயன்படுத்த வேண்டும் என்கிறார் லீச்சர்.

இணையதள முகவரி: http://shove.wtf/

நன்றி;விகடன்.காமில் எழுதியது

சாப்ட்வேருக்கும் சார்பு உண்டு!

software
பெரும்பாலான நிறுவனங்களில் வேலைவாய்ப்பு விண்ணப்பங்களை எல்லாம் முதலில் சாப்ட்வேர் தான் படித்துப்பார்த்து முதல் கட்டமாக தேர்வு செய்கின்றன. வேலைக்கு பொருத்தமான தகுதியை உணர்த்தக்கூடிய குறிச்சொற்களை அடிப்படையாக கொண்டு சாப்ட்வேர்கள் விண்ணப்பக்குவியலை வடிகட்டித்தருகின்றன. இது பலருக்கும் தெரிந்த விஷயம் தான். வேலைவாய்ப்பு என்றில்லை, கடனுக்கான விண்ணபங்களையும் கூட சாப்ட்வேர் தான் வடிகட்டித்தருகின்றன. அதனால் தான் சாப்ட்வர் அடையாளம் காணக்கூடிய குறிச்சொற்கள் விண்ணபத்தில் இருந்தால் நல்லது என்கின்றனர்.

விண்ணப்பங்களை பரிசிலித்து பிரித்தரியும் பொறுப்பு சாப்ட்வேரிடம் ஒப்படைக்கப்படும் பழக்கம் அதிகரித்து வரும் நிலையில், இது குறித்து கவலை அளிக்கும் தகவல் ஒன்று வெளியாகி உள்ளது.
மனிதர்கள் போலவே சாப்ட்வேர்களும் கூட தேர்வில் சார்புத்தன்மையை வெளிப்படுத்தலாம் என்பது தான் அந்த தகவல்.

இந்த பணிக்காக உருவாக்கப்படும் சாப்ட்வேர்களுக்கு, தரவுகள் அளிக்கப்பட்டு அவற்றில் இருந்து அடிப்படையான அம்சங்களை கண்டறிந்து செயல்படுவதற்கான குறிப்புகள் அலோகோரிதமாக வழங்கப்படும். அதே முறையில் அவையும் விண்ணப்பங்களை ஸ்கேன் செய்து வடிகட்டித்தருகின்றன.தகுதிக்கான அம்சங்கள் அடிப்படையில் எப்படி மனிதர்கள் தேர்வு செய்கின்றனரோ அதே போலவே அல்கோரிதம்களும் செயல்படுகின்றன.
ஆனால்,மனித தேர்வில் சார்புகள் உண்டாக வாய்ப்பு இருப்பது போலவே சாப்ட்வேர் தேர்விலும் நிகழலாம் என ஆய்வாளர்கள் கண்டறிந்துள்ளனர். அமெரிக்காவின் உட்டா, அரிசோனா மற்றும் ஹாவர்போர்டு உள்ளிட்ட பல்கலைகழகங்களை சேர்ந்த ஆய்வாளர்கள் இதற்கான ஆய்வை மேற்கொண்டுள்ளனர். தங்கள் ஆய்வு முடிவுகளை சமீபத்தில் சிட்னியில் நடைபெற்ற இயந்திர புரிதல் தொடர்பான மாநாட்டில் வெளியிட்டுள்ளனர். இந்திய அமெரிக்கரான சுரேஷ் வெங்கடசுப்பிரமணியன் எனும் பேராசிரியர் தலைமையில் தான் இந்த ஆய்வு நடைபெற்றிருக்கிறது.

இந்த ஆய்வு மூலம் சாப்ட்வேர்களின் தேர்வில் அவற்றை அறியாமல் சார்பு உண்டாக வாய்ப்பிருக்கிறதா? என கண்டுபிடிக்கும் சோதனை ஒன்றையும் உருவாக்கியுள்ளனர். வேலைவாய்ப்பு விண்ணப்பங்களை பரிசிலிக்கும் அல்கோரிதம்களை இந்த சோதனைக்கு உட்படுத்தினால் அவை தங்களை அறியாமல் விண்ணப்பதாரர்களின் இனம் அல்லது பாலினம் தொடர்பான தகவல்களை, அவை மறைந்திருந்தாலும் ஊகித்தறிய முடிந்தது என்றால் அது சார்பு நிலைக்கு வித்திடும் என தெரிவிக்கப்பட்டுள்ளது. சோதனைக்காக உருவாக்கப்பட்டுள்ளதும் ஒரு அல்கோரிதம் தான்.

சாப்ட்வேர்கள் இவ்வாறு செய்வதாக கூறவில்லை, ஆனால் இதற்கான வாய்ப்பு இருப்பதாக பேராசிரியர் சுரேஷ் வெங்கடசுப்பிரமணியன் கூறியுள்ளார். முரண் என்ன என்றால், மனிதர்களை செயல்படும் விதத்தை போலி செய்யும் வகையில் சாப்ட்வேர்களை உருவாக்கும் போது , செயற்கை அறிவு நம்மை போலவே செயல்பட முற்படும் போது நம்மை போலவே சார்பு கொள்ளவும் வாய்ப்பிருப்பதாக அவர் கூறியுள்ளார்.
விண்ணப்பங்களை சாப்ட்வேர் மூலம் வடிகட்டுவதை மையமாக கொண்டு ஒரு தொழில் துறையே உருவாகியுள்ள நிலையில் , அது செயல்படும் வித்த்தில் குறிப்பிட்ட பிரிவினருக்கு எதிரான தன்மை இருக்கும் என்றால் அது நியாயமாக இருக்காது என்றும் அவர் சொல்கிறார்.

ஆனால் நல்லவேளையாக, இது போன்ற சார்பு சாப்ட்வேரிடம் இருப்பது தெரியவந்தால் அதை சீராக்கும் தரவுகளை சமர்பித்து சாப்ட்வேர் செயல்பாட்டை சரி செய்துவிடலாம் என்றும் பேராசிரியர் தெரிவித்துள்ளார். ஆக, சாப்ட்வேர் தவறு செய்தாலும் திருத்திக்கொண்டு விடும்! மனிதர்கள்?

—–
hதளம் புதிது: வாசிப்பு காலம் என்ன?

புத்தக பிரியர்களுக்கான புதுமையான இணையதளம் இது. படிக்க விரும்பும் புத்தகத்தை படித்து முடிக்க எவ்வளவு நேரம் ஆகும் என கணித்து சொல்வது தான் இந்த தளத்தின் சிறப்பு. அதுவும் எப்படி உங்கள் வாசிப்பு வேகத்தை புரிந்து கொண்டு அதற்கேற்ப தகவல் தருகிறது. எப்படி?
நீங்கள் எந்த புத்தகத்தை படிக்க விரும்புகிறீர்களே அதன் தலைப்பை இந்த தளத்தில் சமர்பிக்க வேண்டும். உடனே அந்த தலைப்பிலான புத்தகம் மற்றும் தொடர்புடைய புத்தகங்கள் பற்றிய விவரங்களை காண்பிக்கிறது.புத்தகத்தில் உள்ள மொத்த வார்த்தைகள் தொடர்பான தகவலும் இடம்பெறுகிறது. இந்த பட்டியலில் இருந்து உங்களுக்கான புத்தகத்தை தேர்வு செய்த்தும், அந்த புத்தகத்தில் இருந்து ஒரு மாதிரி பக்கம் வருகிறது. அதை நீங்கள் படித்துக்காட்ட வேண்டும். நீங்கள் படிக்கும் வேகத்தை கொண்டு அந்த முழு புத்தகத்தையும் படித்து முடிக்க எவ்வளவு நேரம் ஆகும் என கணித்து சொல்கிறது.
துல்லியமான கணிப்பு என்று சொல்ல முடியாது. ஆனால் சுவாரஸ்யமான சேவை. பயணங்களின் போது கையில் எடுத்துச்செல்ல வேண்டிய புத்தகத்தை தீர்மானிக்க இந்த தளத்தை பயன்படுத்திப்பார்க்கலாம். அதே நேரத்தில் புதிய புத்தகங்களை அறிமுகம் செய்து கொள்வதற்கான வழியாகவும் கூட இதை கருதலாம். புத்தக தேடியந்திரம் என்று வர்ணித்துக்கொள்ளும் இந்த தளம் ஒரு கோடிக்கு மேற்பட்ட புத்தகங்களின் விவரங்களை கொண்டுள்ளது. புத்தகங்களை அமேசான் தளத்தில் வாங்கிக்கொள்ளும் வசதியும் கொடுக்கப்பட்டுள்ளது.

இணையதள முகவரி; http://www.howlongtoreadthis.com

———

செயலி புதிது; போனுக்குள் ஒரு தோழன்

அலுப்பாக உணர்கிறீர்களா? அடுத்து என்ன செய்வது என்று தெரியவில்லையா? இது போன்ற நேரங்களில் ஸ்மார்ட்போனில் பதில் பெற முடிந்தால் எப்படி இருக்கும்? ’ஷபிள் மை லைப்’ செயலி இதை தான் செய்கிறது. ஆண்ட்ராய்ட் போனுக்கான இந்த செயலி, பொழுதுபோக்க வழி தெரியாத நேரங்களில் அடுத்து என்ன செய்யலாம் என ஆலோசனை சொல்கிறது. அருங்காட்சியகத்திற்கு செல்லலாம் அல்லது யூடியூப்பில் கான் அகாடமி கல்வி வீடியோவை பார்க்கலாம் என்பது போல இந்த பரிந்துரைகள் அமைகின்றன. சும்மாயில்லை அன்றைய தினத்தின் வானிலை மற்றும் பயனாளிகளின் இருப்பிடம் அடிப்படையில் இந்த பரிந்துரைகள் இருக்கின்றன. பரிந்துரைக்கப்படும் செயல்களின் தன்மை பற்றிய விளக்கம் மற்றும் அவற்றுக்கு ஆகக்கூடிய செலவு பற்றிய விவரங்களும் இடம்பெறுகின்றன. இப்போதைக்கு 250 க்கும் மேற்பட்ட செயல்களின் பட்டியல் இருக்கிறது. பயனாளிகளும் புதிய செயல்களை இந்த செயலியிடம் பரிந்துரைக்கலாம்.
Shuffle My Life
தரவிறக்கம் செய்ய; https://play.google.com/store/apps/details?id=com.gadsby.shufflemylife&hl=en

—–

பிடிஎப் கோப்பாக இ-மெயில்

முக்கிய மெயில்களாக இருந்தால் சில நேரங்களில அவற்றை அச்சிடும் தேவை ஏற்படலாம். இவ்வாறு மெயில்களை அச்சிட்டுக்கொள்வது எளிதானது தான். ஆனால் காகித வடிவில் இல்லாமல் மெயில்களை கோப்பு வடிவில் பயன்படுத்த வேண்டிய தேவை ஏற்பட்டால் என்ன செய்வது? அதாவது மெயில்களை பிடிஎப் கோப்பாக மாற்றிக்கொள்ள விரும்பினால்,டஃப்பல் பிரவுசர் நீட்டிப்பு சேவை அதற்காக வழி காட்டுகிறது. குரோம் பிரவுசர்களுக்கான இந்த நீட்டிப்பு சேவையை டவுண்லோடு செய்து கொண்டு ஜிமெயிலில் இதை பயன்படுத்திக்கொள்ளலாம். அதன் பிறகு ஒவ்வொரு முறை இன்பாக்சை ஓபன் செய்து மெயில்களை படிக்கும் போது, மெயிலின் மேல் பகுதியில் உள்ள டூல்பாரில் டவுண்லோடு எனும் ஐகான் எட்டிப்பார்க்கும். அதை கிளிக் செய்தால் பார்த்துக்கொண்டிருக்கும் மெயில் பிடிஎப் கோப்பாக மாற்றப்படும். ஒன்றுக்கு மேற்பட்ட மெயில்களை செலக்ட் செய்து அவற்றை கோப்புகளாக மாற்றவும் இதே முறையை பயன்படுத்தலாம்.

தரவிறக்கம் செய்ய: https://getduffel.com/

——–

வை-பை குப்பைத்தொட்டி

wi-fi-binபொது (புது) இடங்களுக்கு செல்லும் போது அருகே வை-பை வசதி எங்கே இருக்கிறது என அறிந்து கொள்ளும் ஆர்வமும் தேவையும் உண்டாகும். ( இலவச சேவையாக இருந்தால் இன்னும் நல்லது!). இந்த கேள்விக்கு விடையாக மட்டும் அல்ல போனசாக பரிசு அளிக்கும் வகையில் புதுமையான யோசனையை மும்பை இளைஞர்கள் பரதீக் அகர்வால் மற்றும் ராஜ் தேசாய் முன்வைத்துள்ளனர். இருவரும் வை-பை வசதி கொண்ட குப்பைத்தொட்டியை வடிவமைத்துள்ளனர். இந்த குப்பைத்தொட்டியில் குப்பையை போடும் ஒவ்வொரு முறையும் அதில் ஒரு எண் பளிச்சிடும். அந்த எண்ணை கொண்டு இலவச வை-பை இணைப்பு வசதியை பெற்றுக்கொள்ளலாம்.
டென்மார்க் போன்ற நாடுகளில் சுற்றுப்புறம் தூய்மையாக இருப்பதை பார்த்து வியந்த போது அதே போன்ற நிலையை இந்தியாவில் உண்டாக்க வேண்டும் என்றால் மக்கள் அணுகுமுறையில் மாற்றம் தேவை என உணர்ந்து அவர்களை ஊக்கப்படுத்தும் நோக்கத்துடன் குப்பை போட்டால் வை-பை புள்ளிகளாக பரிசளிக்கும் இந்த நவீன குப்பைத்தொட்டி மாதிரியை வடிவமைத்ததாக இருவரும் கூறியுள்ளனர். அதே நேரத்தில் வை-பை இணைப்பு தொடர்பான தேடலுக்கும் இது தீர்வாகும் என்கிறனர். அதாவது வை-பை இணைப்பையும் அளிக்கும், குப்பைத்தொட்டியில் குப்பை போடும் பழக்கத்தையும் ஊக்குவிக்கும். இந்த யோசனை நடைமுறைக்கு வந்தால் நன்றாக தான் இருக்கும் அல்லவா?

=–

நன்றி; தமிழ் இந்துவில் எழுதியது

இமெயில் பிரச்சனைக்கு தீர்வு

http _www.five.sentenc.esஉங்கள் எல்லா இமெயில் பதில்களையும் 5 வரிகளுக்கு முடித்துக்கொள்ளவும் எனும் ஒற்றை வரியுடன் இந்த பதிவை முடித்துகொள்ளலாம். ஏனெனில் 5 வரிகளுக்குள் இமெயில் பதில்களை அனுப்ப வலியுறுத்தும் பைவ் செண்டன்சஸ் இணையதளத்தை அறிமுகம் செய்வதற்கான பதிவு இது.

இமெயில் பிரச்சனைக்கு இது அழகான தீர்வு. பதில்களை நீட்டி முழக்காமல் 5 வரிகளுக்குள் முடித்துக்கொள்வது நல்ல யோசனை தான். ஆனால் இந்த இணையதளத்தில் 5 வரிகளுக்குள் இமெயிலை அனுப்ப முடியாது. இந்த தளத்திற்குள் நுழைந்தால் , பிரச்சனை மற்றும் தீர்வு எனும் தலைப்புகளில் இமெயில் சுமையின் பாதுப்பு பற்றியும் அதற்கான தீர்வு பற்றியும் அழகாக குறிபிடப்பட்டுள்ளது.
பிரச்ச்னை என்ன என்றால் இமெயிலுக்கு பதில் அளிக்க அதிக நேரம் தேவைப்படுவதால் புதிய இம்யெல்கள் குவிந்து விடுகின்றன. அவற்றுக்கு பதில் அளிக்க முற்பட்டால் இன்னும் தேக்கம் ஏற்படும்.
இதற்கான தீர்வு தான் எந்த மெயிலையும் குறுஞ்செய்தி போல கருதி 5 வரிகளுக்குள் முடித்துக்கொள்ள வேண்டும் என்பது. எழுத்துக்களை எண்ணிக்கொணிடிருப்பதை விட வரிகளை எண்ணுவது சுலபம் இல்லையா? இது தான் இந்த தளம் முன் வைக்கும் தீர்வு.

இருப்பினும் இந்த வழியை நீங்கள் இந்த தளத்தில் இருந்து கடைபிடிக்க முடியாது. நீங்கள் இமெயில் அனுப்பும் போது இதை நினைவில் கொண்டு பின்பற்ற வேண்டும். இதை வலியுறுத்துவது மட்டும் தான் இந்த தளத்தின் கடமை.

ஒரு இணைய பொது சேவை போல இருந்தாலும் இது உண்மையில் ஒரு தனிநபரின் கொள்கை விளக்க இணையதளம். மைக் டேவிட்சன் எனும் இணைய பிரமுகர் ஒருவர் தனது இமெயில் பிரச்சனைக்கு தீர்வாக எந்த இமெயிலுக்கான பதிலையும் 5 வரிகளில் முடித்துகொள்வது என தீர்மானித்தார். நல்ல முடிவு தான். ஆனால் சபதில் பெறுபவர்களும் 5 வரி மகத்துவத்தை புரிந்து கொள்வதற்கான இந்த கொள்கையை விளக்குவத்ற்காக அழகான இணையதளத்தை உருவாக்கினார். அந்த தளம் தான்; http://www.five.sentenc.es/. இந்த தளத்திற்கான இணையப்பை தனது இமெயில் கையெழுத்தில் இணைத்தார்.

இது தான் இந்த தளத்தின் பின்னே உள்ள சுவாரஸ்யமான கதை. மைக் 2007 ல் இந்த தளத்தை உருவாக்கினார். இன்னும் செல்லிபடியாக கூடியதாக தான் இந்த அறிவுரை இருக்கிறது. ( இதே போல 2 ,3,4 செண்டன்சஸ் என்றும் இணையதளம் அமைத்துள்ளார்).

மைக் எழுதிய மூல விளக்கம் இது. இமெயில் பதில் பற்றிய அவரது வாதம் பொருள் பொதிந்தது என இது புரிய வைக்கும்.; http://www.mikeindustries.com/blog/archive/2007/07/fight-email-overload-with-sentences


இணையதள முகவரி; http://www.five.sentenc.es/

——–

உண்மையில் சில வரிகள் மெயில் அனுப்ப விரும்பினால் அதற்கான வழியான இமெயிலில் அடுத்த புரட்சி ஷார்ட்மெயில் அறிமுகம் என எழுதியிருந்தேன். ஆனால் அந்த ஷார்ட்மெயில் சேவையும் மூடப்பட்டு பாதை மாறிவிட்டது.எனவே நீங்களே சுருக்கமான இமெயில் அனுப்புவது தான் சிறந்த வழி.

சரி, இமெயிலில் உங்கள் அனுபவம் எப்படி ? நீங்கள் அனுப்பும் மெயிலின் சராசரி நீளம் என்ன/ உங்களுக்கு வரும் மெயிலின் சராசரி அளவு என்ன? பகிர்ந்து கொள்ளுக்களேன் ! பயனுள்ளதாக இருக்கும்.

பொன்மொழிகளுக்கான இரண்டு இணையதளங்கள்

qபொன்மொழிகளுக்கான இணையதளங்களில் தாட்ஜாய் ( http://thoughtjoy.com/) மற்றும் கோட்ஸ்4ஆல் (http://quotes4all.net/ ) இடையே போட்டியே வைக்கலாம் , இந்த இரண்டு இணையதளங்களில் எது மிக எளிமையாக இருக்கிறது என்று ? அந்த அளவுக்கு இரண்டு தளங்களும் நேர்த்தியான எளிமையோடு அமைந்துள்ளன.

தாட்ஜாய் , பொன்மொழி தேடியந்திரமாக வரவேற்கிறது. முகப்பு பக்கம் அத்தனை எளிமை. நடுநாயகமாக ஒரு தேடல் கட்டம். அதில் பொன்மொழிகளை தேடலாம். அதன் கீழே பொன்மொழிகளை ,மூன்று விதமான தலைப்புகளில் பட்டியலாக பார்க்கலாம். அருகிலேயே டிவிட்டர் அல்லது பேஸ்புக் மூலம் தினம் ஒரு பொன்மொழி பெறும் வசதி இருக்கிறது. அவ்வளவு தான் இந்த பொன்மொழி தளம். ஆனால் இஷ்டம் போல பொன்மொழிகளை தேடிக்கொண்டே இருக்கலாம். குறிப்பிட்ட பொன்மொழி தேவை என்றால் தேடல் கட்டத்தை பயன்படுத்தலாம் .அல்லது, பொன்மொழி வகைகள் அல்லது பொன்மொழி சொன்னவர்கள் பட்டியலை கிளிக் செய்து வரிசையாக பொன்மொழிகளை பார்த்துக்கொண்டே இருக்கலாம். பொன்மொழி வகைகள் ஆங்கில அகர வரிசைப்படி அமைந்துள்ளன. ஒவ்வொரு தலைப்பாக பார்த்தால் நேரம் போவதே தெரியாது.

கோட்ஸ்பாரால்  தளமும் இதே முறையில் ஆனால் கொஞ்ச்ம் மாறுபட்டு இருக்கிறது. ( http://quotes4all.net/) . இதன் முகப்பு பக்கம் வரிசையாக பொன்மொழிகளுடன் வரவேற்கிறது. அந்த பொன்மொழிகளை படித்து ரசித்த பின், கீழ் பகுதியில் கிளிக் செய்தாலும் சரி அல்லது மேலே உள்ள பகுதிக்கு சென்றாலும் சரி பொன்மொழிகளின் உலகம் அகல விரிகிறது. கீழ்ப்பகுதியில் இணையவாசிகள் மத்தியில் பிரபலமாக உள்ள பொன்மொழி வகைகள் குறிப்பிடப்பட்டுள்ளன. அவற்றை கிளிக் செய்து பார்க்கலாம். அதற்கும் கீழே மேலும் பொன்மொழிகளுக்கான வாயில் ஒரு கிளிக்கில் திறக்கிறது. தளத்தின் மேல் பகுதியில் பார்த்தால், ஆங்கில எழுத்துக்களின் அகர வரிசை கண்களை உறுத்தாத வகையில் தரப்பட்டுள்ளது. எந்த எழுத்தை கிளிக் செய்தாலும் அந்த எழுத்தியில் துவங்கும் பொன்மொழிகளை காணலாம்.

பொன்மொழிகளை மதிப்பீடு செய்யும் வசதியும் இருக்கிறது. எளிமையான அமைப்பை மீறி இந்த தளங்களில் இருககூடிய செழுமை வியப்பானது.

தினம் தினம் விஜயம் செய்ய வேண்டிய தளங்கள் இவை . காலையில் ஒரு சில நிமிடங்களையாவது செலவிடுங்கள். இல்லை, அவப்போது நேரம் கிடைக்கும் போது சென்றுப்பாருங்கள் .உங்கள் வாழ்க்கை ஊக்கம் பெறட்டும்.

———-

தினமும் பொன்மொழியுடன் துவக்க விருப்பமா? கோட்சீக்ரெட் உட்பட சிறந்த பொன்மொழி இணையதள அறிமுகங்களுக்கு :

இணையத்தை உலுக்கும் ஹார்ட்பிலீட்

heartbleedஹார்ட்பிலீட் என்றால் என்ன ? ஏன் இது இணைய உலகில் இத்தனை பரபரப்பை ஏற்படுத்தியிருக்கிறது என்ற கேள்விகள் உங்கள் மனதில் எழுந்திருக்கும். நீங்கள் அலட்சியம் செய்தாலும் கூட தொழில்நுட்ப இணையதளங்களும் செய்தி தளங்களும் ஹார்ட்பிலீட் பற்றி அலறிக்கொண்டிருப்பதை பார்த்து குழம்பியிருக்கலாம். அநேகமாக எல்லா முன்னணி தொழில்நுட்ப இணையதளங்களும் ஹார்ட்பிலீட் பற்றிய விளக்கத்தை வெளியிட்டுள்ளன. எல்லாவற்றிலுமே ,இது முழுமுழுக்க தொழில்நுட்பம் சார்ந்தது என்பதால் எளிதாக புரிந்து கொள்ள முடியாமல் குழப்பத்தை ஏற்படுத்தும் என்ற எச்சரிக்கை குறிப்புடன் முடிந்த வரை எளிதான விளக்கத்தை முன்வைத்துள்ளன.

புரியாத தொழில்நுட்பம் சார்ந்தது என்றாலும் பலவிதங்களில் சராசரி இணையவாசிகளை பாதிக்ககூடியது என்பதால் இது பற்றி தெரிந்து கொள்வது நலம்.

ஹார்ட்பிலீட் பற்றி ஒற்றை வரியில் சொல்வதானால் , இணையத்தில் பாதுகாப்பான தகவல் பரிமாற்றத்திற்காக பயன்படுத்தப்படும் சாப்ட்வேரில் ஏற்படுள்ள ஓட்டை . இந்த ஓட்டை வழியாக தாக்காளர்கள் பாஸ்வேர்டு முதல் கொண்டு கிரிடிட் கார்டு எண் வரை முக்கிய தகவல்களை களவாடிவிடக்கூடிய அபாயம் இருக்கிறது. இதில் மோசம் என்னவென்றால் இப்படி களவாடப்படுவது தெரியவே தெரியாது. 

இந்த அறிமுகம் எதையும் விளக்கவில்லை என்றால் இன்னும் விரிவாக பார்ப்போம். இணையத்தில் எப்போதும் ரகசிய கைகுலுக்கல்கள் நடந்து கொண்டே இருக்கின்றன. இந்த கைகுலுக்கல் தான் இணையத்தில் தகவல் பாதுகாப்பை உறுதி செய்கின்றன. உங்களது பிரவுசருக்கும் , சர்வருக்கும் இடையே இந்த டிஜிட்டல் குலுக்கல் நடக்கிறது. சாதாரணமாக இமெயிலுக்குள் நுழைய பாஸ்வேர்டு டைப் செய்வதில் இருந்து முக்கியமான தகவல்களை அனுப்பி வைப்பது வரை எல்லாவற்றையும் பாதுகாப்பாக மேற்கொள்ள இந்த கைகுலுக்கல் அவசியம். இந்த கைலுக்குகளின் போது என்ன நடக்கிறது என்றால் பிரவுசருக்கும் சர்வருக்கும் இடையே தொடர்பு உண்டாகிறது. பொதுவாக பாஸ்வேர்டு மற்றும் முக்கிய தகவல்கள் ( கிரிடிகார்டு எண்,வங்கி கணக்கி எண்) போன்றவை என்கிரிப்ட் செய்யப்பட்டு சங்கேத குறியீடுகளாக அனுப்பி வைக்கப்படுகின்றன. பிரவுசரில் இருந்து இந்த தகவல்கள் சர்வருக்கு போய் சேரும் போது , ஆம் சரியான இடத்தில் இருந்து தான் கோரிக்கை வந்திருக்கிறது என்பதை சர்வர் உறுதி செய்து கொண்டால் தான் இந்த பரிமாற்றத்தை அனுமதிக்கும் . அது தான் பாதுகாப்பாக இருக்கும். இல்லை என்றால் இணைய களவாணிகளுக்கு கொண்டாட்டமாகிவிடும். 

இந்த உறுதியை தான் டிஜிட்டல் கைகுலுக்கல் சாத்தியமாக்கிகிறது. அதாவது பிரவசரில் இருந்து ஒரு இணையதுடிப்பு கேட்கும். சர்வரில் இருந்து ஒரு இதயத்துடிப்பு கேட்கும். பரஸ்பரம் கேட்கப்ட்ட பின் பரிவரத்தனைக்கு பச்சைக்கொடி காட்டப்படும். 

இந்த டிஜிட்டல் சரிபார்த்தலை மேற்கொள்ள எஸ்.எஸ் .எல் மற்றும் டி.எஸ்.எல் ஆகிய இரண்டு முறை பயன்படுதின்றன. சாப்ட்வேர் என்று வைத்துக்கொள்ளுங்களேன். இந்த சாப்ட்வேர் ஓபன் சோர்ஸ் முறையில் செயல்படுகிறது. இது வரை இந்த முறை நன்றாக தான் செயல்பட்டுக்கொண்டிருந்தது. இனியும் செயல்படப்போகிறது. ஆனால் இதனிடையே இந்த சாப்ட்வேரில் ஒரு ஓட்டை இருப்பது தெரிய வந்துள்ளது. இந்த ஓட்டை வழியே இணைய கள்வாணிகள் கைவரிசை காட்டலாம் என்று இணைய உலகம் பதட்டப்படுகிறது. இந்த ஓட்டைக்கு தான் ஹார்ட்பிலீட் என்று பெயர் .

இந்த ஓட்டை இரண்டு ஆண்டுகளாக இருப்பதும் இது வரை கண்டுபிடிக்கப்படாமெலே இருப்பதும் தான் , ஹார்ட்பிலீட் வழக்கமான ஓட்டை அல்ல, வெறும் சாப்ட்
வேர் பேட்சால் இதை ஒட்டு சரி செய்து விட முடியாது என அலற வைத்துள்ளது. இரண்டு ஆண்டுகளுக்கும் மேலாக இருப்பதால் இதுவரை என்ன எல்லாம் நடந்த்தோ தெரியாது என்கின்றனர். கண்டுபிடிக்கப்படாமல் இருந்த்தால் இனியும் கூட களவாணிகள் தவறாக பயன்படுத்தினால் தெரியாமலே இருக்கலாம் என்பதால் ரிஸ்கோ ரிஸ்க் என்கின்றனர்.

விபரீதமான விஷயம்  என்றாலும் இதற்காக எஸ் எஸ் எல் முறையை குற்றம் சொல்வதற்கில்லை என்கின்றனர். ஓப்ன சோர்ஸ் மீதும் பழி போட வேண்டாம் என்கின்றனர். கோடு எழுதுவதில் ஏற்பட்ட பிழை தான் இதற்கு காரணம் என்கின்றனர்.

சரி, இதனால் என்ன ஆகும்? என்ன வேண்டுமானால் ஆகலாம். இமெயில் பாஸ்வேர்டு பறிபோகலாம். கிரிடிட் கார்டு விஷமிகள் கைக்கு போகலாம்.  இணைய பாதுகாப்பிற்கான ரகசிய திறவுகோள்கள் வேண்டாதவர்களிடம் கிடைத்தால் என்ன எல்லாம் நடக்குமோ அத்தனை விபரீதமும் நிகழலாம்.

சரி, இதை தடுக்க முடியாத?முடியும் . அதற்கான தீர்வுகளை முன்வைத்து வருகின்றனர். ஆனால் இணையவாசிகளால் நேரடியாக எதுவும் செய்ய முடியாது. இணைவாசிகளுக்கு சேவை வழங்கும் இணையதளங்கள் பாதிப்பு இருக்கிறதா என பார்த்து சரி செய்தாக வேண்டும். இணைவாசிகள் ஒரு பாதுகாப்பிற்காக தங்கள் பாஸ்வேர்டுகளை மாற்றிக்கொள்ளலாம். நீங்கள் பயன்படுத்தும் இணையதளத்திற்கு பாதிப்பு உண்டா என்று அறிந்து கொள்வதற்கான பட்டியலை மாஷபில் வெளியிட்டுள்ளது. இங்கே பார்க்காவும் ; http://mashable.com/2014/04/09/heartbleed-bug-websites-affected/

கண்ணில் படாமலே இருந்த இந்த சாப்ட்வேர் ஓட்டையை கோட்னோனிகான் எனும் இணைய பாதுகாப்பு நிறுவனம் கண்டுபிடித்துள்லது.கூகிள் பொறியாளர் ஒருவரும் இதை கண்டுபிடித்துள்ளார். இந்நிறுவனம் ( Codenomicon ) ஹார்ட்ப்லீடை விளக்க இதே பெயரில் இணையதளம் ஒன்றை அமைத்துள்ளது. ( http://heartbleed.com/) . கொஞ்சம் ரிஸ்க் எடுத்து படித்து புரிந்து கொள்ள பாருங்கள்.

இந்த கண்டுபிடிப்பாளர்களுக்கு ஒரு சபாஷ். ஹார்ட்பிலீட் பற்றிய விளக்க கட்டுரைகளில் இது கொஞ்சம் பரவாயில்லை: http://www.gizmodo.in/Gizmodo/Heartbleed-Why-the-Internets-Gaping-Security-Hole-Is-So-Scary/articleshow/33462151.cms

——

பி.கு; முற்றிலும் தொழில்நுட்பம் சார்ந்த விஷ்யத்தை அதன் பயன்பாடு கருதி இயன்றவரை புரிந்து கொள்ள முற்பட்டு அதை பகிர்ந்து கொண்டிருக்கிறேன். பயனுள்ளதாக உள்ளதா என சொல்லவும். தவிர பாஸ்வேர்டு மற்றும் பாதுகாப்பு பற்றி தொடர்ந்து எழுதி வருவதாலும் இந்த முக்கிய இணைய பாதுகாப்பு அச்சுறுத்தல் பற்றி பதிவு செய்திருக்கிறேன். சும்மாயில்லை நவீன் இணையவரலாற்றில் மிகப்பெரிய பாதுகாப்பு பிரச்சனை என்கின்றனர். 

 

————

பயனுள்ள இணையதளங்கள் பற்றிய விரிவான அறிமுகம் அடங்கிய எனது தொகுப்பு நூல்: http://www.dialforbooks.in/reviews/innaiyaththal-innaivom.html